كاتب الموضوع :
معاميريا
المنتدى :
القصص المكتمله من وحي قلم الاعضاء
الجزء الخامس
(( غيض من فيض ))
لكل شخص طريقته الخاصه في التعبير عن مشاعره...ولكل شخص حريه التعبير عن مشاعره...لكن احنا في كثير من الاحيان نحط لنفسنا
خطوط حمره ما نتعداها الى ان يجي موقف يهزنا من الداخل ويخلينا
نضرب بهذي الخطوط عرض الحائط .... واغلب الاحيان يكون هالموقف القشه التي قصمت ظهر البعير...والناس تشوفه ما يستاهل منا كل هالانفعال بينما احنا نشوف انه مجرد غيض من فيض وانه اول الغيث
رن موبايلي رفعته ولمن شفت المتصل ما حبيت ارد قدام الجماعه فرحت المطبخ اول ما ضغت على زر الرد حسيت ان في خطوات متجهه صوبي
..... الظاهر اني اتوهم بلعت ريقي وتوكلت على الله ورديت
:-السلام عليكم و
ما كملت حتى السلام وجاني الرد:- جذي تسوين في امش ؟ انا اخر من يعلم!!!!!ولا تعلميني ولا تقولين لي ليكون مو حاسبتني ام؟؟
حسيت ان حراتي ارتفعت وجهي احمر من الاحراج وكأن الكل يسمعها
فقلت ادافع عن نفسي:-انا اساسا ما دريت الا متأخر .... وجدي قال ....
مره ثانيه قاطعتني وبحده اكبر قالت :- جدش اتصل فيني علشان يهددني يقول لي ترى بنتش بتزوج ولد عمها...وملكتها بعد يومين في بيت ابوها...واذا ما بتباركين لها لاتجين
سكت ما عرفت ارد اساسا وش اقول لها بس هي تابعت :-وانتي شلون ترضين في واحد امش تكرهه من كرهها لاهله؟؟
رديت عليها بغيض وقهر:- ليش هو بيدي ؟؟ لو بيدي ما وافقت ... والله غصب عني ...
ردت بسخريه وكان واضح من لهجتها انها مو مصدقتني:- مو بيدش !! وش اللي غاصبنش ان شاء الله ؟؟ يعني تبين تفهميني انش مو موافقه؟
حسيت انها ما راح تسمعني ولا حتى بتفهمني بس حاولت استجديها:- يكفي اني اعرف ان هالزواج بيفرقني عن اعز ناسي وبيفصلني عن...
للاسف ما حست فيني وقالت:- اسمعي يا بنت يوسف((دائما تقولها علشان تحسسني انها غضبانه علي ما تدري انها تحسسني انها ما تبيني واني مو بنتها))هالكلام مو علي... واذا تحسبيني ام لش تركي هالزواجه وردي البحرين؟؟
غمضت عيوني واخذت نفس علشان اقدر احبس دموعي:-ما اقدر ...لو اقدر مأ تأخرت لحظه وحده...ولو رجعت البحرين وين اروح؟؟
ردت وكانها تتكلم عن مسأله تافهه :-وين يعني ؟ اكيد بيت جدش
ما قدرت امسك دموعي اااااااااااااه ما اقسى قلبها :- ما اقدر...ما اقدر اخالف شوره واكسر كلمته ...ما اقدر اصغره قدام الناس وبعدين اقول له
خلني في بيتك!!!
بكل برود ردت :-عجل خلي اهل ابوش ينفعونش يا بنت يوسف
سكرت التلفون في وجهي ...نزلت التلفون طالعته وغمضت عيوني وعضيت على شفايفي علشان ما ابكي بس الالم اقوى مني...خلاص صدري ما عاد يوسع احس رئتي بتنفجر نزلت ادموعي غصب عني
...توني التفت وراي ابي اهرب ابي اكون بروحي إلا واتنصدم عيوني بثوب بيضه رفعت راسي ما ادري شلون عرفت من وسط دموعي ان هذا خالد ...وبدل ما امسك نفسي وما اصيح قدامه انهرت اكثر وصار بكاي مخلوط بأنين وفجأة ومن غير ما احس شفت نفسي في حظنه
خــــــــــالد
عادة الجلسه مع امي وخالتي ام طلال تريحني بس هالمره ما ادري ليش احس بخنقه واني متوتر ...في البدايه حاولت اشغل نفسي بفارس الاعبه واكلمه بس اول ما تكلمت نجود وعلت صوتها على تركي التفت لهم للجهة اللي كنت متجاهلنها.... وشفتها شفت سبب ضيقي وخنقتي كانت لابسه عبايتها وبرقع واللي قهرني انها ما غطت اعيونها...مع ذلك مسكت نفسي وحاولت اتجاهلها ...بس شدني صوت جوالها وانها اول ما
شافت المتصل طلعت ...وقفت وقلت للشباب :- ليكون ناوين تجلسون مع الحريم وتخلون الجماعه اللي في المجلس ؟
رد سلطان بانزعاج لانه حاب الجلسه :-أي جماعه الله يهداك...كلهم ابوك وعمك وعزيز وجد حرمتك
ما ادري ليش كلمة حرمتك ذكرتني فيها :-على راحتكم بس انا بروح مشوار قريب واذا تأخرت تغدوا عني ...يلا في امان الله
طلعت ادور عليها واول ما لمحت عباتها في المطبخ رحت على طول وراها و ما ادري وش اللي خلاني اروح وراها....بس كان لازم انبهها
واقول لها تغطي عيونها مو ناقص الا انها تتكحل بعد توني بناديها وبكلمها بس ردت على جوالها ... في الاول اثارت فضولي قالت
:- انا اساسا ما دريت الا متأخر .... وجدي قال ....
قاطعها الطرف الثاني عقب فترة صمت قالت
:- ليش هو بيدي ؟؟ لو بيدي ما وافقت ... والله غصب عني ...
هالشي حيرني واثار ضيقي بشكل رهيب وش اللي مو بيدها لكنها رجعت قالت الاشد مراره الشي اللي خمنته وحاولت انكره قالت
:-يكفي اني اعرف ان هالزواج بيفرقني عن اعز ناسي وبيفصلني عن...
انقهرت ما قدرت اتحمل اكثر هذا اللي مو بيدها وغصب عنها ...ليش ليكون تحسب اني ابيها وميت عليها... ومن هذا اعز ناسها اللي بافصلها عنه خساره ما كملت قاطعها الطرف الثاني ونطقت ويا ليتها ما نطقت
قالت:- ما اقدر ...لو اقدر مأ تأخرت لحظه وحده...ولو رجعت البحرين وين اروح؟؟
يعني هي ناويه تهرب ...ولو ما جواز سفرها عند عمي وخروجها من السعوديه يحتاج اذن ولي الامر كان هربت ضغت على اسناني وشديت على قبضة يدي احاول اسيطر على غضبي وانا كذا سمعت جملتها
الاخيره :- ما اقدر...ما اقدر اخالف شوره واكسر كلمته ...ما اقدر اصغره قدام الناس وبعدين اقول له خلني في بيتك!!!
خلاص طفح الكيل انا اليوم لازم اوريها قدرها زين لازم ... التفتت لي انذهلت من عيونها كانت حمرا ومليانه دموع شكلها خلاني اتجمد بمكاني اول مره احس اني محتار وما اعرف وش اسوي ودي اصرخ عليها والومها وافرغ كل حرتي فيها ...وفي نفس الوقت ما ودي اشوف دموعها وودي اهديها وامسح دمعها خاصه ان بكاها زاد لمن شافتني ...وما انقذني من حيرتي الا صوت طلال يناديني ودخل المطبخ
ناظرها بذهول والتفت لي وفي عيونه الف سؤال هزيت كتفي علامة اني نفسه ما ادري عن شي وقلت
:-انا دخلت وهي كذا
طلال ما اهتم لجوابي على طول راح لها وضمها بقوه في هذي اللحظه انا على طول طلعت برى وصلني صوت بكاها اللي زاد....ما اردي وين اروح ومن غير احساس توجهت مباشرة لسيارتي شغلتها ومشيت على طول ادور في الشوارع مو عارف وين اروح ما ادري للمره الكم دق جوالي بس هالمره قررت ارد
:-هلا
:-يعني انت قاصد انك ما تردعلي؟
ناظرت جوالي بذهول وفعلا المتصل تركي بس هذا مو صوته رديت عليه:-افاااااااااا يا ذا العلم انا ما ارد عليك
قاطعني بحده:-ايه وشف جوالك كم مره ادق عليك وما ترد واول ما دقيت عليك من جوال تركي رديت
ابتسمت بتعب وقلت:- موكذا السالفه...بس انا نسيت الجوال في السياره
واول ما ركبت السياره جاني اتصالك حتى قبل ما اشوف المكالمات
رد على بضحكه:-طيب صدقتك ...بس وينك فيه يا خوي صار لك اكثر من ساعتين من طلعت
فركت جبهتي بقوه عل عسى الصداع يخف:-كنت ضايق شوي قلت اطلع شوي اوسع صدري ...بس الوقت سرقني
قال لي وكأنه حس اني لا زلت متضايق:-شوي؟؟انت برى صار لك اكثر من ساعتين...خالد وش فيك؟ اقلقتني
طبعا انا اكذب على الكل إلا طلال فقلت له اصرف:-مو وقته هالكلام ...اقول انا جوعان ما اكلت شي من الفطور...((ابتسمت))يعني بقى لي شي ولا امر اشتري لي
ضحك بقوه:-هههههههههههه صحيح انهم ياكلون الاخضر واليابس بس البركه في خالتي وامي...تعال الخير كثير ولا تتأخر تراني جوعان اكثر منك....يلا استناك
سكر قبل ما اعرف هو ليش ما تغدا معقوله طول هالوقت كان معاها طيب ليش هالبكى وكل هالمده؟ ومن يكون اللي تبكي عليه بحرقه؟راسي بينفجر كلما احاول اتجاهلها والغيها من تفكيري ترجع من جديد وتسيطر على افكاري ما صار لي من شفتها اسبوع وهي عافسه حالي...انا لازم الغيها من تفكيري و...هي ثواني بس واخليت بقراري ياترى وش قالت لطلال؟...واذا هي فعلا ما تبي الزواج فليش اجبر نفسي واتزوجها ..((اخذت نفس عميق وضغت على السكان((المقود)) وقلت بصوت مسموع))
:-هه اللي يسمعها وهي تقول بتهرب ما يقول هي نفسها اللي هامها كلمة وسمعة جدها وابوها...لكن لا انا ما اتزوج وحده تفكر في غيري
رميت شماغي على الكرسي اللي جمبي ودخلت اصابعي في شعري وضغطت بقوه على راسي ورددت في نفسي
((تحب غيري؟؟طيب وانا؟ وساره ؟ بس انا وضعي غير انا........))
نفضت راسي ابي اتخلص من افكاري وصلت الاستراحه ومع وصولي قررت اتخلص من هالزواج باي طريقه ايه هذا احسن حل لا انا ولا هي نبي هذا الزواج ....نزلت من السياره وشفت طلال رسمت ابتسامه على وجهي ورحت له...........
وداد
من طلعت علياء علشان تكلم ما رجعت تأخرت والكل كانت في عيونه نظرة تساؤل بس اللي سأل هو نجود
:-دودو حبيبتي وين راحت علياء ؟
رديت عليها:-وانا وش دراني
دخلت سعاد في الموضوع وقالت:-بس انتي كنتي جمبها
قلت من غير اهتمام:- علمي علمكم من جاها الاتصال ما عدت شفتها
واذا هامتكم روحوا دوروها
نجود قالت بابتسامه:-جبتيها والله اللحين نروح ندورها ((ومدت يدها على سعاد علشان تقوم معها)) وبالمره نجيبها معنا علشان تتغدا
مسكت يد سعاد الثانيه وقلت :- جلسوا مكانكم اكيد البنت تعبانه وتبي تريح واذا جهزت السفره روحوا نادوها
اعترضوا بس امي تدخلت وقالتلهم :-وداد عندها حق خلوها ترتاح دوبها جايه من سفر وما ارتاحت وجبناها المزرعه
طبعا امي قالت كلمتها وراحت مع خالتي ام خالد الى المطبخ يشرفون على الشغالات ويجهزون غدا الرجال طلعت امي من هنا وقالت ندى
:-اقول وداد شفتي فستان علياء اخاف تحرجنا قدام الناس
وقبل ما ارد عليها قالت العنود:- حرام عليك وش تحرجنا الصراحه البنت باين من لبسها انها ذوق
طبعا ندى ما عجبها الكلام ورفعت حاجب وقالت :- العنود انتي لحقتي تشوفي لبسها علشان تحكمي
رديت وانا العب في جوالي :-ندى ... خفي شوي ما يصير كذا كل ما جبنا سيرتها قلبتي وجهك ((ناظرتها علشان اتأكد انها تسمعني وكملت)) انا ما اقلو لك حبيها بس صيري موضوعيه ولا تبيني مشاعرك هذي قدام الناس
ثارت ندى وقالت بحده :-انا مو موضوعيه يا وداد وبعدين مشاعري وانا حره فيها
رديت بهدوء :- ايه مو موضوعيه اجل كيف حكمتي انها بتحرجك
((ميلت راسي على جنب وحطيت عيوني في عيونها)) لانك تكرهينها قلت كذا ولا البنت ما بدر منها أي تصرف يخليكي تقولي هالكلام
هدأت ثوره ندى بنفس السرعه اللي اشتعلت فيهاوقالت :-ما ادري بس انا ما احبها
هنا تدخلت العنود مره ثانيه وقالت:-ندى بسألك سؤال انتي فعلا تكرهين علياء؟؟؟؟؟
ندى رفعت راسها للعنود وعلى وجهها علامات الدهشه والمفاجأة من السؤال وبعدها نزلت راسها وتنهدت:- تصدقون اذا قلت لكم ما ادري... واني اسوي كذا لاني خايفه انها تكون مثل امها
ابتسمت العنود ابتسامه تدل على انها متفهمه شعور ندى وقالت :- اذا كذا اجل لا تعامليها بجفاء لان لو خوفك طلع ماله داعي راح تندمين على تصرفاتك ((وكملت ردا على نظرة الاعتراض في عيون ندى )) يمه من عيونك...طيب ما قلنا حبيها عامليها مثل ما تعاملين شخص توك تتعرفين عليه ...
تدخلت انا وقلت :-ترى هي فعلا شخص تونا نتعرف عليه ...وعلشان تعرفين تتعاملين معها انسي امها...ولا تخلينها هاجس يسيطر عليك
دخلت نجود وسعاد قبل ما ترد ندى علشان يخبرونا ان الغدا جاهز
وقبل ما يروحون لعلياء اتصل طلال وخبرني ان علياء نايمه ونبهنا ما نصحيها من النوم لانها تعبانه وفعلا تركناها على راحتها الى وقت صلاة المغرب طلعت علشان اصحيها للصلاه وبالمره تاكل لها شي لانها ما تغدت رقيت الدرج وتوجهت للغرفه فتحتها كانت مظلمه وباااااااااااااااارده
ولعت النور وطفيت التكييف وجلست على حافة السرير علشان اصحيها واول ما همست باسمها رفعت راسها وابتسمت
:-شكلي نمت واجد
ضحكت على وجهها المنفوخ من النوم والتعب:-كثييييييييييييييييير ويلا قومي صلي فاتك العصر وصار وقت المغرب
قامت لمت شعرها وجهزت لها لبس عباره عن تنوره جينز طويله وبلوزه ورديه هاديه دخلت الحمام اخذت لها شاور سريع وعقب ما خلصت صلاة قلت لها
:-علياء ما تحسين بالجوع
ضحكت وقالت :-بلى احس بطني يقرصني من الجوع
رديت:- يلا اجل ننزل المطبخ علشان تاكلين لك شي يصبرك لوقت العشا
وتونا بننزل إلا البنات دخلوا عليناواخرهم سعاد اللي حامله في يدها صينيه في عصير للكل وسندويشات لعلياءنزلت الصينيه قدامنا وجلست جنب نجود على السرير وقالت:-علياء...الصراحه انا الفضول بيذبحني
ودي اشوف فستانك حق الملكه
ابتسمت علياء بنعومه وقالت :-ما طلبتي شي اللحين اطلعه تشوفينه
نجود حطت يدها على كتف سعاد وقالت :-ودنا نشوفك لابسته
هزت علياء راسها علامة نعم واشرت على عيونها بمعنى من عيوني
وقامت فتحت الدولاب فقالت ندى
:- ما عليكي منهم اول اكلي
طلعت الفستان وابتسمت لندى وقالت :- ما بلبسه اللحين بس ابي اخذ رايكم ...اي اكسسوار البس معه
اخذت العنود من علياء الفستان وفرشته على السرير وقالت لعلياء
:- مو مشكله بنساعدك بس مو شرط تلبسينه
طلعت علياء طقمين اكسسوار وقبل ما تورينا اياهم قاموا نجود وسعاد اخذوا الطقمين يشوفونهم فقالت لهم ندى بعصبيه
:-تعالوا هنا ورونا
ردت سعاد :-ما يحتاج تشوفين انا ونجود بنختار((ورفعت راسها لعلياء وكملت ))عندك غيرهم
كملت علياء سندويشتها وضحكت :-لا ما عندي غيرهم اساسا انا شاريتهم حق الفستان واحترت في المحل اشتري أي واحد فشريتهم اثنينهم
بطلت سعاد عيونها :-من جدك ما عندك غيرهم
ابتسمت علياء ابتسامه واسعه وقالت :-ايه من جدي ...لان ربي رزقني بزوجه خال كل ما رحنا السوق وحبيت اشتري تمنعني
عقدت حواجبي وقلت:- ليش تمنعك ؟وليش ما تروحين مع غيرها ؟
تدخلت سعاد:-او تروحين لحالك طلال يقول انك تسوقين؟
ردت علياء وهي تناظر حضنها:-ممنوع ارح اسواق بروحي وما اروح مع غيرها لان ما في الا هي وهاجر يقبل جدي اني اروح معها حتى هاجر اذا تروح معي ما يقبل جدي الا اذا كانت ويانا امها او زوجة خالي...((سكتت شوي وقالت ))اما ليش تمنعني فهذا لانها من تشوف الاسعار تسحبني من يدي وتقول بدل ما تضيعين فلوسك في هالخرابيط اشتري لك ذهب
اشرت ندى على واحد من الاطقم كان فضي ناعم على شكل طوق من الزهور المشغوله بفصوص فيروزيه وحلقه ناعم مكون من زهرة وحده مشابهه للي في العقد وقالت
:-هذا يناسب الفستان...صحيح الذهب ينفعك اكثر من الاكسسوار بس بعد الذهب ما يناسب كل لبس
ابتسمت علياء :-عندك حق بس من يقدر يقنع ام محمد بهالكلام..(( تنهدت وقالت ))بس الله راحمني بتشكيلات ديماس تدرين شغلهم راقي وحلو يدخلون الاحجار بشكل حلو في الذهب ويبان مثل الاكسسوار
اخذت العنود الطقم من يد ندى وقالت:-طيب هذا وخلصنا منه واللحي المكياج فكرتين وش بتسوين؟؟
رفعت علياء كتوفها وقالت:-ما ادري انا في المناسبات اروح صالون
((وعضت شفتها وقالت بخجل ))بس اهني ما اعرف ولا صالون انا حتى لنفسي ما اعرف احط مكياج....
استغربت وتوني بتكلم لكن سعاد الملقوفه قالت :-في بنت في هالزمن ماتعرف للمكياج
اشرت علياء على نفسها وقالت :-انا...((وبدفاع عن نفسها قالت تبرر))
لاني بصراحه ما احط لي مكياج تعرفون انا كنت اسوق وما اتغطى
والبيت يدخلونه اولاد خالي ...((سكتت شوي كانها تجمع افكارها وقالت )) اكذب اذا قلت اني ما اعرف بالمره بس بعد انا حدي مكياج نهاري
اما مكياج السهرات ما قط جربته الا على هاجر كتسليه....
ابتسمت وقلت لها :- كذا معقوله((ابتسمت على جنب وقلت))احنا ماتفقنا مع احد يعني اعتمدنا على الخبيره ندى تحجز لنا وحده تجينا هنا ((وقلت بتردد ))بس انتي عروس و.......
قاطعتني علياء وقالت:-اذا ما عندكم مانع انا قابله انها تمكيجني
هزت ندى راسها علامه لا عندها علياء تغير لون وجهها انصدمت قهرتني ندى وخزيتها بنظره معناها وين الكلام اللي قلناه الظهر لكن اللي قالته غفر لها لانها قالت
:- ما يصير انتي عروس انا باتصل في وحده اعرفها زين وشغلها لا يعلى عليه وعلشاني بتخلي شغلها وبتجي
رد اللون لوجه علياء وانصبغ لون وجهها بحمرة الخجل من تعليقنا عليها واستمرت سهرتنا على هالنمط وقضينا وقت ممتع وكأننا نعرف علياء من زمان....
طــــــــلال
اليوم خالد مو طبيعي اكيد فيه شي وشي كايد بعد هو صحيح من عرف بمخطط ابوي وعمي بتزويجه من علياء وهو متوتر بس لا اليوم في شي غييييييييير كنت ناوي اسأله على الغدا بس وجود تركي وسلطان معنا ما خلاني اتكلم وما صرنا لحالنا الا في نهايه السهره طلعنا نتمشى في وسط الزرع لغايه ما وصلنا للمسبح قعدنا على الكراسي اللي عند المسبح وكل واحد مقابل الثاني وكان الصمت هو عنوان جلستنا الى ان كسرت الصمت وقلت له
:-خالد علامك يا خوي اليوم منت طبيعي
هز راسه وابتسم :- ما فيني شي جديد وانت اعلم باحوالي
ناظرت عيونه اللي عرفت منها انه مخبي علي شي وقلت
:-تدري ان بكره العصر بتوصل عمتي ام ماجد؟
رفع راسه لي وكانه عرف وش اقصد بسؤالي وقال :- ليش تسأل
ابتسمت وقلت له :- انت عارف ليش اسأل انا اقصد ساره
غمض خالد عيونه وقال :- وش فيها ؟؟
سندت ظهري للكرسي وقلت :- وين صارت ؟وش بتسوي معها؟
سحب نفس وقال :-خلك من ساره وقولي علامها اختك؟
ما عجيتني تصريفته فقلت استعبط:- أي اخت حدد
لعب خالد بمفاتيح سيارته وقال:-علياء وش فيها ليه كانت تبكي؟
ابتسمت وانا اتذكر موقفي معها وقلت :- والله انها تونس هالبنت ، كل تصرفاتها غير متوقعه تدري اتوقع حياتك معها ما راح يتسرب لها الملل
ابتسم خالد بتهكم وقال:-غير ممله وغير سعيده ((تجاهل نضرة الاستنكار اللي وجهتها له وكمل))بعد ما قلت لي ليش كانت تبكي؟؟
رفعت رجلي وحطيتها في حضني مسكتها بيدي وقلت:-ليتك اخرت طلعتك شويه بس كان شفت علياء وش سوت
رجع خالد مفاتيحه لمخباه وانحنى باتجاهي وقال:-ليه وش سوت؟؟
اثار حماسي انتباهه فقلت له :-انا من شفت دموعها وشلون تشهق وهي تصيح خفت عليها ((ورفعت عيني بتجاهه)) ظنيت انك قلت لها شي عن ساره او حتى انك ما تبيها فعلى طول ضميتها لصدري ((ضحكت )) وما حسيت الا وهي تحاول تدفني وتبعدني عنها تحسبني انت وانا احاول اهديها وما في فايده فبعدتها عن صدري ومسكت وجهها وقلت لها علياء وش بك ليش تبكين ؟ومن سمعت صوتي رفعت راسها ناظرتني ورجعت دفنت راسها في صدري وبكت ((تنهدت وانقلبت ابتسامتي لعبوس )) بكت بحرقه وكل ما قلت لها كلمات علشان اهديها يزيد بكاها لدرجه اني خفت انها تختنق وما عاد تقدر تتنفس فقررت اسكت واخفف من ضمتي لها لغايه ما تهدأ وضليت على هالحال ربع ساعه...
ضحك خالد بصوت عالى وقال :-ربع ساعه واقف على رجلك في المطبخ
فرديت عليه اغايضه :-صحيح واقف على رجلي بس ضام غزاله لصدري
عصب خالد وقال بلهجة تهديد:-استح على وجهك هذي اختك وسالفه ضم ولم انساها
ضحكت عليه من قلب وقلت :-ابوك يا الغيره...ومن مين من اخوها
((رفعت حاجب ))وش اللي انسى هذي اختي ومن انت علشان تقول كذا
فهمني خالد فقال :-بكره اعلمك من اكون
تلاشت ابتسامتي وانا اتذكر بكره وش بيصير :- خالد
خالد :-سم
قلت له وانا انحني باتجاهه:- علياء امانه عندك ...اكرمها و...
ما كملت كلامي وقاطعني خالد:- افا يا ذا العلم توصيني على بنت عمي يا طلال
مديت يدي ومسكت يده وقلت :- اعرفك رجال والنعم يا ولد عمي ... بس انا ابيك تراعيها وما تجرحها ولو بكلمه ((سكت ماني عارف كيف اوصله قصدي فتابعت)) انا ما بقول لك حبها بس ابيك تتفهمها تحترمها ابيك تكون الصدر الحنون اللي تفرغ فيه همومها والظهر اللي يحميها ويسندها طول عمرها...
ابتسم خالد وقال:-طول عمرك حنون على خواتك وكأنك ابو لهم وما اقول الا يا بختها العنود فيك
حطيت يدي على قلبي وقلت :-العنود اااااااااااااااه من العنود ((وناظرته نظرت رجا)) طيب ما يصير املك معكم بكره
ضحك خالد وقال :- اقول يا شين رزت الوجه((سكت كانه متردد يسأل او لا لكنه في الاخير سأل)) إلا ما قلت لي هي ليش كانت تبكي ؟
ما قدرت اقوله عن السبب علياء استأمنتني على سرها اللي لو لا انها كانت منهاره وبحاجه الى انها تفضفض ما كانت قالته لي غير ان مو من مصلحة خالد وعلياء انهم يعرفون ان كل واحد فيهم رافض للثاني لكني تذكرت كلام علياء هي قالت انها من شافت خالد زاد بكاها لانها تحسبه سمع المكالمه بس انا طمنتها انه ما سمع شي فقلت علشان اتأكد
:-ليه انت ما سمعت المكالمه؟
رد خالد وقال اللي ريحني:-أي مكالمه انا دخلت المطبخ وشفت وحده عيونها غرقانه دموع<< مسكين يا طلال ما تدري ان خالد يعرف ان علياء ما تبيه ويظن الظنون فيها بعد وان سؤاله بس علشان يعرف هي وش قالت لك بالضبط علشان يكتشف نواياها
طلال:-كل السالفه ان امها اتصلت عليها تقول ما تقدر تجي
وانت تعرف البنات في يوم زي هذا يتمنون ان امهم تكون معهم
وطبعا علياء ما استحملت وبكت ولمن شافتك عرفت انك شفتها تبكي
فزاد بكاها من الحرج
يوم الملكه الساعه الرابعه عصرا
البيت حوسه ام خالد وام طلال مشغولين بترتيبات الملكه وضيوفهم اللي وصلوا من البحرين اما البنات فتاركين كل الشغل على الشغالات وامهاتهم وما همهم الا زينتهم بس ندى كانت مع العروس واقفه على راس الكوافيره وتدقق على شغلها وكل شوي تذكرها ان علياء عروس وانها لازم تطلع مميزه اما باقي البنات كل شوي وحده تجي اتطل على العروس البنات خلصوا وما بقى الا الرتوش الاخيره على العروس
دخلت وداد والعنود وكانوا جاهزات ولقوا ندى جاهزة بس بعدها ما
بدلت فقالت العنود
:-الناس كلها تحت وانت لسى بهدوم البيت
ردت ندى :- متأكده كلهم وصلوا
وداد مسكت ندى من يدها وسحبتها الى الباب :- كلهم وصلوا وعمتي ام ماجد توها واصله يلا بدلي علشان ننزل نسلم عليها
وقفت ندى عند الباب وقالت :-توها واصله ليه تأخرت هالكثر
ردت وداد وهي تتأفف:- اف ما ادري بس سعاد تقول انها تأخرت لان ساره نأخرت في المشغل
ندى استغربت قطبت حواجبها وقالت :-ساره جت؟؟وراحت مشغل تزين بعد؟؟
وداد فقدت صبرها فقالت :-ايه يلا تحركي بسرعه ما عندنا وقت
اخيرا ندى فتحت الباب وقالت :- انتم اسبقوني وانا بجي بعدكم
فتحت ندى الباب ولقت نجود وسعاد في وجهها توها بتتكلم بس سعاد سحبتها ونجود شدت وداد وصاروا كلهم واقفين عند الباب من برى
وقبل ما تتكلم ندى سعاد قالت
:- دريتو ان ساره وصلت ؟
وداد هزت راسها باشارة نعم وندى قالت :-ليش وش صاير؟
سعاد براءه:-ابدا بس اذا قالت لكم بتشوف العروس قولوا لها ما يصير ترقي لها فوق علشان نبي نفاجأ الكل
حطت ندى يدها على خصرها وقالت :-ومن صاحب هالفكره العبقريه ؟
ابتسمت نجود وقالت لندى :-انتي
فتحت ندى عيونها على الاخر وقالت :-انا؟!!!!!!!ابي اعرف ليه تكذبون وتحملوني المسؤليه...
تمسكنت سعاد وقلت لندى وهي تمسك كتفها:-الصراحه احنا قلنا لسارة انك ما خليتي احد يدخل يشوف العروس علشان تبينها مفاجأة للكل... فجينا نقول لكم علشان ما تغلطون قدامها وتحرجونا...
وكملت نجود :- وعلشان اذا طلبت منكم تشوفها ما تقولون كلام غير او تغلطون وتقولون انكم شفتوها
ندى تنهدت وهزت راسها وقالت :- الحمد لله والشكر صدق مراهقات
وعلى طول راحت تبدل هدومها اما ندى اللي تعرف مشاعر ساره تجاه خالد انذهلت من تصرف ساره و ليش طلبت انها تشوف علياء ؟؟
دخلت وداد عند علياء علشان تخبر العنود باللي قالوه البنات ولقت علياء جاهزه وما ناقصها الا انها تلبس فستانها اللي في يد العنود
العـــــــــنــــــــود
دخلت وداد وشكلها يوحي بان عندها سالفه حاولت استشف من نظراتها بس ما عرفت توني بفتح الفستان واجهزه لعليا ء الا وداد تقول لي
:- العنود خلي عنك الفستان تعالى ابيكي تساعديني في شغله تحت
قلت وانا ااشر على الفستان وعلياء
:-طيب وعلياء من يساعدها في لبس الفستان؟
اخذت الفستان من يدي وفرشته على السرير وقالت
:-ندى اللحين تجي وتساعدها ((والتفت على علياء وقالت)) ندى ما راح تتأخر عليكي لكن العنود انا محتاجتها ضروري
وطلعنا برى وقفتني في الممر وقالت لي عن فكرة نجود والعنود ابتسمت
وقلت :-طيب ليه شايله الهم هذي سعاد ونجود طول عمرهم وهم كذا مع ساره ...يعني هذا شي متوقع يبون يغيضون ساره فقالوا لها كذا
مسكتني وداد من كتوفي وقالت لي :-انا موهذا اللي محيرني
انا اللي محيرني ان ساره جت وتزينت وفوق هذا كله طلبت بنفسها انها تشوف علياء
ابتسمت وقلت لوداد:-اهدي يا بنت الحلال ولا تحتارين هذي كلها امور طبيعيه ساره مسويه كل هذا علشان تبين لنا انها مو متأثره بخطبه خالد لغيرها وان خالد مو اكثر من ولد خال ...((سحبت نفس وقلت )) يعني كل هذا علشان تصون كرامتها قدامنا احنا بالذات
حسيت ان وداد ما ارتاحت كليا لهالفكره رغم انها هدأت الله يهديها وداد طول عمرها حذره وحريصه في التعامل مع الناس وفوق هذا كله هي حساسه جدا
تـــــــــــــركــــــــــــي
تعبان طول اليوم شغل وتجهيزات حق الملكه ما كان عندي وقت اريح فيه كل اللي قدرت اسرقه من الوقت ساعه جهزت فيها علشان ارجع
وضليت طول الوقت واقف استقبل المعازيم الى ان وصل عمي ابو ماجد(زوج عمتي)ومعه ماجد اللي كان باين عليه التعب فقلت اجلس جنبه اتطمن عليه وارتاح من الوقفه شوي وخليت سلطان يستقبل الضيوف لحاله وجلست مع ماجد في زاويه ما يشوفني منها ابوي او عمي ضربت بيدي على فخذ ماجد وقلت
:-حيا الله ماجد
ابتسم في وجهي وقال :- ياالله يحييك ويبقيك
ابتسمت وقلت له في عتب :- ليه جاي متأخر ؟ ما كأنك من اهل البيت وبدل ما تفزع لولد خالك تجي حالك من حال الغريب
التفت لي وقال :-البركه في اخوانه واولاد عمه...((بلع ريقه وقال ))
لو كان يبيني افزع له واوقف معه في هاليوم ما تراجع عن خطبته لسارة وخطب بنت عمه...
حطيت يدي على كتفه وقلت بعتب :-افا ياماجد شايل كل هذا في قلبك علينا ؟
ناظرني وقال :-انت ما يدخلك انا اتكلم عن خالد ولو ما ابوي لزم علي ما جيت
ابتسمت بسخريه وقلت :-انا واخوي واحد يا ماجد واعذرني في هالكلمه لكن ما ظنيتك تفكر مثل الحريم اولا خالد متى خطب ساره علشان تقول انه تراجع عن كلمته وثانيا بنت عمه هذي تكون لك بنت خالك
وتوني بوقف شدني من كم ثوبي وقال :-اجلس يا رجال ولا تزعل
ما كان ودي ازعل منه فقلت له :-بجلس بس شوي شوي على ثوبي تراه جديد((وغمزت له ))ما قلت لي وش رايك في الاوف وايت والغتره
ضحك ماجد من قلب :-طول عمرك تقول بيج اللحين تقول اوف وايت هههههههه
رفعت حاجب وقلت :- اربع سنوات في بريطانيا وما تبيني اقول اوف وايت واثناء كلامنا دخل الشيخ اللي بيملك على خالدفقال ماجد
:-صدق الدنيا حظوظ ناس تخطب وفي ظرف اسبوع تتملك ((ويأشر على نفسه )) وناس تخطب وتستنى سنين علشان تتملك ...
حسيت بكلامه قطع الهوا عن صدري ما تحملت كلام ماجد عنها وعن خطبته وملكته المرتقبه احسه بكلامه يعصر قلبي انت في نعمه يا ماجد وش يعني تستنى سنه او سنتين دامك في الاخير بتتزوجها...آآآآآآآآآآه
لو تعرف وش كثر انت محظوظ
تعذرت منه وبعدت بحجه اني ابي اكون قريب من خالد وقت العقد
مقتطفات من الجزء القادم
خــــــــــالـــــــــــد
- حسيت اني اوقع على موتي بس...........
- شميت ريحت عطرها وانحبست انفاسي.........
- ايه انا احب ساره بس للاسف ما عادت ساره لي خلاص فقدتها.....
- انسي هذا ((وحطيته في جيبي))وهذا اللي ...........
علــــــــيـــــــــــاء
_ حسيت برجفه في كل جسمي .........
_ حسيت مثل الضربه على راسي ما صدقت الل اسمعه يحبها.........
_ رديت وانا امثل دور الواثقه رغم اني من الداخل انزف........
-والله لو كنت مكانش كان ما تجرأت وتكلمت...........
اسمحوا لي هذا ما استطعت كتابته
انتظر ردودكم وتوقعاتكم
ارق واعذب الاماني
التعديل الأخير تم بواسطة معاميريا ; 05-09-08 الساعة 07:39 AM
|
05-09-08, 06:44 AM
جديد مواضيع قسم القصص المكتمله من وحي قلم الاعضاء
العرض العادي
