أطياف الغرام

البداية جيدة استمري
وياريت رايك في اعمالي

الصراحه استغربت وحده في هالزمن تتزوج غصب ومو أي وحده هذي علياء
ايه صح انتو ما تعرفون علياء عليا ء بنت طويله بالنسبه لي لاني قصيرة بس هي طولها حلو رشيقه عليها جسم يهبل وبيضاء شعرها بني فاتح ناعم وطويل يوصل الى اخر ظهرها وكثيف احلى ما فيها عيونها وساع ورموشها كثيفه وطويله عيونها عسليه وخشمها طويل وحلو وفمها صغير وشفايفها ممتليه خدودها وشفايفها على طول ورديه ذكيه كانت الاولى على الدفعه حاليا تدرس في الجامعه سنه ثانيه تخصص تارخ (وع ما احبه) هادئه مالها اصدقاء واجد او بالاصح ما لها الاانا والباقي مجرد زميلات ما تحب تهذر واجد ومن الصعب انها تعبر عن مشاعرها يمكن السبب انها تربت على يدجدها بعيد عن امها وابوها
اكيد خطر على بالكم انها يتيمه لا امها وابوها عايشين بس كل واحد لاهي بحياته عنها
علياء الله رزق جدها خلفته صبيان وبنت وحده اللي هي ام علياء وكانت جميله جدا ومدلله لانها اخر العنقود والوحيده بين ثلاث صبيان لمن صار عمر ام علياء 18 سنه تزوجت من واحد سعودي متزوج اسمه يوسف بن سلمان عاشت معاه ام علياء خمس سنوات كانت كلها مشاكل تطلقت عقبها وردت البحرين وعلياء عمرها سنه ونص في البدايه ابو علياء ترك علياء عند امها لين تكمل السنتين ولمن جاء علشان ياخذها امها عارضت ولولا تدخل جدها كان وصلت المسأله للمحاكم ورجع ابو طلال( ابو علياء)للسعوديه وانشغل بعياله وزوجته وما كان بينه وبين علياء أي نوع من الاتصال غير انه يطرش لها فلوس كل شهروبعض الزيارات الخاطفه في الاعياد اما امها تزوجت وعمر علياء 6 سنوات وتركت علياء عند ابوها وامها اللي ماتت عقب زواج بنتها بسنه ومن تزوجت وعلياء ما تشوف امها الا في المناسبات يا دوب تقعد خمس دقايق وتطلع وحجتها انشغالها بعيالها وزوجها

جد علياء فعلا رجال كبير وشديد وربى علياء على السنع والاخلاق الحلوه ورباها احسن مما ربى امها وصحيح انه شديد وما يقبل احد يناقشه في امر هو مقتنع فيه بس مع ذلك ما توصل انه يجبر علياء على الزواج وعلياء اساسا يمكن تكون الوحيده اللي تعرف شلون توصل رايها لجدها وتقنعه علشان جذي قلت لها

هاجر :- علياء انتين اكيد تمزحين يعني من هذا اللي بيجبرش جدش انش تتزوجينه

رفعت علياء راسها وقالت :- امزح ياليت امزح مو انتين لو تعرفين من العريس كان ما قلتين اني امزح العريس يا طويله العمر اسمه خالد بن مشعل بن سلمان

حكيت راسي وهزيت كتوفي وقلت :- خير يا طير من يعني هالخالد

علياء:- هذا يا طويله العمر وقصيرة القامه يصير ولد عمي امس جا ابوي وعمي يخطبوني من جدي او بالاصح يقولون لجدي انهم خطبوني لولد عمي

طالعتها باستغراب :- زين وبعدين صراحه للحين ما فهمت ليش رافضته ولا تقولين لانش بتروحين السعوديه ترى في الاول والاخير انتي سعوديه وبعدين من بعدها السعوديه يعني

علياء بغضب تضغط على ضروسها وتدز راسي بيدها :- انا ابي اعرف انتين شلون تفكرين والقهر انا اقول محد يفهمني كثر هاجر وفي الاخير يطلع كلامش نفس كلام خالي محمد بالظبط

قلت لها وانا افرك راسي مكان يدها :- زيييييييييييييييين لا دزين وفهميني يا حكيمه زمانش

علياء شبكت اياديها مع بعض وحطتها على شفتها وبعديتن قالت :- خايفه يا هاجر خايفه
تدرين انا اذا تزوجته بدخل عالم ثاني غريب ومختلف
تعرفين احنا ناس على قد حالنا وهم ناس اغنياء يعني شلون بتصرف شلون بتعامل وياهم غير اني ما اعرف اذا بيتقبلوني او لا

قاطعتها :- علياء وش هالكلام ترفضين واحد لانه غني !!!!!!!!!! واكيد بتقبلونش لانهم لو ما يبونش ما خطبوش لولدهم

علياء: انا ما قلت اني رافضه لانه غني انا قلت انه شي يخوف انتين تعرفين ان امي وافقت تتزوج من ابوي بس لانه غني ووسيم ورغم غناه ما قدرت تعيش معاه بعيد عن اهلها
فشلون انا اللي ما عندي أي مبرر لقبول هالشخص وثانيا انا خايفه انهم ينظرون لي على اساس ان البنت مثل امها

هاجر وباندفاع ومن غير تفكير:- امش ما تطلقت لانها بعيده عن اهلها امش تطلقت لان ابوش ما صار مثل الخاتم في صبعها ولا نه ما طاعها وما رضى يطلق بنت عمه ولمن عرف انها تزوجته طمع في فلوسه طلقها ولو هم ينظرون لش انش مثل امش ما خطبوش

الصراحه ندمت اني تسرعت وقلت لها هالكلام بس مشكلتي ان اللي في قلبي على لساني وما اعرف اجامل

علياء والعبره خانقتها :- ادري ما يحتاج تذكريني بس انتين تعرفين انهم ما كانو يحبون امي وكانو يعاملونها على اساس انها اقل منهم واخاف انهم يعاملوني بنفس الطريقه

هاجر وهي تتافف وترفع ايدها بالدعاء :- يا رب ارحمني من غباء هالبنت يا بنتي اسمعيني زين اولا الكلام اللي انتين قاعده تقولينه مصدره امش يعني مو اكيد ولو فرضنا انه صحيح بقول لش من حقهم وحده وتزوجت على بنتهم شلون تبين يعاملونها يعني انا مثلا اكيد بحتقر أي وحده تتزوج ابوي او زوج خالتي او عمتي فشلون لو عرفنا انها ما تزوجته الا لفلوسه
وثانيا انتين بنتهم مو غريبه واذا ابوش غني يعني انتين غنيه
وتعالي اهني لو كلامش صحيح وش اللي يخليهم يخطبونش يعني ما في شي يجبرهم


علياء وهي تفكر في كلام هاجر وسرحانه فيه :- هذا اللي محيرني ماني شايفه سبب مقنع مرات اقول ابوي يبيني اعيش جنبه بس ارد واقول لو يبيني يكفي انه ياخذني ما يحتاج يزوجني ولد اخوه

هاجر بتفكير :- ولد عمش شافش؟

علياء :- صدق انش خبله شلون يعني شافني وين بيشوفني


هاجر :- وين يعني في السوق ولا في الجامعه ولا في بيتكم

علياء بعصبيه :- شوف هذي اللي يسمعش ما يقول قاعده على جبدي 24 ساعه وين يشوفني يابنتي من متى والحريم يقعدون مع الرجال انا لو ادخل المجلس وفيه رجال يوم ثاني تحضرين عزاي على طول هذا وانتين تعرفين ان جدي وافق على الجامعه بالموت كله بسبب الخلط
اخذت علياء نفس من عقب الصراخ وقالت :- اذا ابوي لو شافني في الشارع يمكن ما يعرفني فشلون ولد اخوه وثانانيا وش دخل شافني وما شافني بالسالفه

هاجر وبكل عفويه :- يعني قلت لو شافش اكيد سحره جمالش مثل ما جمال امش سحر عمه
الا بقول لش جدش وش قال عن السالفه

علياء وهي مبوزه:- تدرين انش سخيفه وما ادري عن جدي هو قال بكل بساطه ترى عمش خطبش لولده خالد وانا قلت لهم يسوون الملكه في البحرين تراني حالف ما اطلعش من بيتي الا وانتي متزوجه واخذ روحه وراح المسجد يصلي العصر

هاجر وهي ترفع حواجبها وكتوفها دليل على الاستغراب :-غريبه يعني ما قال لش شي عن خلودي وليش هو وافق بهالسهوله

علياء :- سألته قلت له انت موافق يا جدي على هالخطبه ؟ قالي ايه ولمن قلت له بس انا مو موافقه قال لي عقب صلاة العشا لي كلام معاش

هاجر :- يمكن قصده انه بيتفاهم معاش ويعرف ليش انتين رافضه مو يجبرش

علياء وتعض على شفايفها وتتنهد :- اللي يسمعش يقول ما تعرفين جدي أي يتفاهم تعرفين يعني شنو لي كلام يعني هو اللي بيتكلم وتعرفين جدي ما بيقتنع باسبابي

هاجر بجديه :- زين ليش ما تستعينين بامش تعرفينها ما تحب اهل ابوش

علياء تطالع هاجر باندهاش :- والله جبتيها ما ادري شلون راحت عن بالي بس ان شاء الله تقدر تقنع جدي

هاجر وشافت ان هالاقتراح غير مزاج علياء فحبت تلعب على اعصابها قالت لها وهي تغمز:- لا تنسين وانتين تكلمين جدش تسالينه عن خلودي حلو مثل ابوش او لا

رفعت علياء راسها لهاجر واخذت علبه الكلينكس ورمتها لكن ما اصابه الهدف لان هاجر شالت عليه وراحت بيتهم





في مكان اخر في السعوديه في الرياض تحديدا

طالع من الفيلا بسرعه وسويج السياره في يده مبين عليه انه معصب حده شكله ونظراته تخلي أي عاقل يبعد عنه وما يحاول يتكلم معاه يحسس الل يقدامه انه مستعد انه يقتل أي واحد يوقف في طريقه دخل سيارته وسكر بابها بكل قوته ظغط على سكان السيارة بكل قوته كانه يفرغ كل غضبه في السكان وغمض عيونه بقوه واخذ نفس عميق وطرد كل الهوا اللي احتبس في صدره
عل وعسى اعصابه تهدأ
فتح عيونه على صوت موبايله طالعه كان المتصل طلال ولد عمه ما حب يرد عليه طنش لكن طلال كان مصر اخيرا قرر انه يرد
طلال:- واخيرا رديت وينك من الصبح اسأل عنك

..... :- انا هنا ما رحت مكان امر عسى ما شر

طلال :- ابدا بس ........... كنت يعني بقول .................

.............:- طلال وش فيك عمي به شي

طلال قاطعه :- لا يا ابن الحلال لا يروح فكرك لبعيد انا كنت بقول لك عن روحت ابوي وعمي الى البحرين

.................:- ايه قالت لي الوالده والي قاهرني انهم يتصرفون ولا كأني المعني بالامر يروحون يخطبون لي وحده من غير ما يسألوني حتى اذا ابغى اعرس وابغى البنت او لا

طلال :- هدي هدي لا يطق لك عرق اسمعني يا خالد انا الحين بفهمك بالسالفه كلها

خالد بعصبيه :- أي سالفه بعد يخطبون لي من غير ما يشاوروني او حتى يعطوني خبر
مثل الغريب يقولون لي خطبنا لك كانهم يعزموني على عرس واحد من الجيران والقهر ان امي اللي خبرتني موابوي

طلال :- والله اني فاهمك وحاسس باللي فيك المهم انت وين اللحين وانا اعلمك هم لش سوو كذا

خالد :- انا اللحين بطلع من البيت التقي وياك بالكوفي الي دايم نروحها

طلال :- زين اجل انا بسبقك بما اني قريب


سكر خالد موبايله ورماه على الكرسي اللي جنبه وقال في نفسه((اذا انا كذا وش حال ساره؟ والاهم وش اللي يخلي ابوي وعمي يخطبونها لي وش معنى هي ؟ وش معنى انا؟ المشكله اهم حاصروني وصار من الصعب اقول لا اااااااااااااااااااااااااااااااااااه راسي بينفجر))


ياترى من تكون ساره؟
وش سبب هالخطبه؟
وش مبرر عم خالد وابوه ؟


ملحوظه: (( اعذروني اذا اخطأت في اللهجة السعوديه ))

السلام عليكم ورحمة الله وبركاته


معاميريا

حياك الله كاتبة ضمن كوكبة كتاب ليلاس
أتمنى تلاقي هنا كل الدعم و التشجيع و النقد البناء اللي يساعدك على التألق و التميز بالكتابة


ميدان ليلاس للكتابة و الابداع هو للجميع بلا استثناء
الميدان لك يا معاميريا فأثبتي وجودك و نجاحك بين فرسانه


أطياف الغرام

ماراح أعلق على الشخصيات لأن للآن ما ظهرت المعالم الكاملة للشخصيات
لكن تعريفك للشخصيات حلو و بسيط
لكن أتمنى ن يكون تركيزك أكثر على وصف شخصياتهم أكثر من وصف أشكالهم

أسلوبك شيق و سلس يا معاميريا


ملاحظة صغيرة

لمن كان الكلام و الافكار على لسان هاجر ... انا الصراحة ضعت
لأن ما كان شي يدل على انتقال دفة الحوار الداخلي من علياء الى هاجر
أتمنى انك تحطي قبل ما تنتقلي بين الشخصيات اسم الشخصية اللي بتركزي على افكارها و مشاعرها


انتظر التكملة يا معاميريا

سلمت يمناك