الجزء التاسع والعشرون

جراح نازفة

قد نعتقد ان الكره يلبس اروحنا درعا فولاذيا يجعلنا حصينين ضد الالم واننا ان كرهنا فلن نبالي وسيكون بمقدورنا ان نقسو ...
غافلين او متناسين ان الكره شعور يجعل ارواحنا هشه سهلة التأثر وان اي ضربة توجه لنا ممن نكرهه بشده قد تسسب جراح نازفة دماؤها لا تتجلط لاننا ما دمنا نكره فلن نستطيع الا ان نكترث

ان الكره احساس فكيف تقترن اللا مبالاة بالاحاسيس
ولكن كما قد تكون قمة الجنون عبقريه
فاحيانا كثيره تكون قمة الكره عشق لا يدرك مداه
فصدقوني لا يضمد تلك الجراح الا دفء الحب
خاصه ان ابطالي يكرهون بعضهم لدرجة الغليان
وليس كره لدرجة التجمد
فالاول ما هو الا حب حرارته اصابت ابطالي بالجنون فاختلط عليهم الامر
والثاني كره محض يجمد الروح فيسهل كسرها ثم يصبح المرء بعدها ميت وهو حي


ام مــــــــــــــــــاجد



رقيت الدرج ورى ابو ماجد وانا حاملة بشته في يدي
:- بس يابو ماجد مهي بعدلة ندى ماطلعت من العدة وزوجها ما صار له غير شهر من مات
وشو بتقول العرب عنا ؟؟؟تراها عيبة في حقنا

ابو ماجد وشكله طفران
:- مهي بعدلة !! والعرب خلهم يقولو بو ماجد مستعجل يبي يعرس بنته ...احسن من يقولو بو ماجد بنته سودت وجهه

حاولت اخفف عنه بس وشو ممكن اقول
:- الحمدلله الله ستر ومحد عرف ...وانا اقول خلنا ناخر شوي عشان خاطر بو طلال ...والناس بتقول اكيد في شي ولا ليه ما استنو قبل ما تطلع بنت عمها من العدة

قلع شماغه ورماه على السرير وجلس على حافته وبيدينه شد على حافة السرير
:- بو طلال ما بيقول شي وما في شرع يقول اننا نستنى بنت عمها المعتده

علقت بشته ورجعت لعنده اخذ الشماغ
:- بس عوايدنا تقول نستنى... وحتى لو سايرتك يومين ما يمدي البنت تطلع السوق وتجهز حالها

رفع راسه وقال بحده خوفتني
:- طلعه من البيت لا ....مو تحسبين اني لمن سمحت تروح العزا اني بسمح لها تطلع مره ثانيه لا ....ما تطلع من هنا الا معه مسود الوجه

بتردد قربت منه وانا اطوي شماغه بيدي وجلست عن يمينه
:-عاذرتك ...وادري انك من يومها حابسها في غرفتها ما سمحت لها تروح حتى لجامعتها ويمكن تقول انه من الغباء اقول لك خلها تروح السوق ...بس ما يصير عروس من غير جهاز

لف راسه لي وناظرني بعيني وقال اللي صدمني
:- انتي تحسبين ان بنتك عروس مثل غيرها ؟!!! اذا تحسبينها كذا اصحي
العروس يا ام العروس يجون الخطاب لغاية بيت ابوها ...العروس خطابها يترجون رضى ابوها العروس لها مهر يدفعه العريس ...العروس ابوها سهله عنده يقول لا وصعبة عنده يقول اعطيناكم بنتنا ....

نزلت دمعه من عينه واهتزصوته على اخر كلمه رفعت يدي حطيتها على كتفه بحركه اواسيه فيها وقبل ما اتكلم قال
:-انا صار لي اكثر من شهر اضغط عليه ابن الـ...استغفر الله ...في البداية كلمته لكنه رفض (فرك جبينه ) هه المشكله مقدر الومه على رفضه وبعدها ظغطت عليه حاربته في رزقه يا نوره...شفتي لوين وصلتني بنتك...وعشان يحافظ على عمله كان لازم يوافق وعشان ما يماطل دفعت له مهرها ترجيته ياخذها ...(ناظرني والغضب حل محل الحزن لكن الالم ما غادره ) بعتها وكنت خايف يرفض...لاني ساعتها بندم بجد اني منعت ماجد من ذبحها

رفعت يدي عن كتفه فتحت فمي مذهوله وملت الدموع عيني كنت بتكلم لكن رجعت سكرت فمي وعقب ثواني قلت
:- معقوله ...انت تتمنى لو ولدك ذبح اخته؟!!

وقف واتجه لغرفة التبديل وهو يقول
:- ما خلاني ادفه عنها الا خوفي عليه وسكرت الباب عليها بالمفتاح بدل ما اذبحها بنفسي لاني اخاف ربي....ومثل ما قلت ما في طلعة قبل يوم زواجها

لف راسه يناظرني كانه يتاكد اني اسمعه
:- ترى لا زلت كاره شوفتها ... عشان كذا خلها في غرفتها

كنت اتوقع ان الغضب اللي في قلبه بيزول بمجرد ان يتطمن ان هالعصام بيتزوجها ...صحيح ما كنت متوقعه ياذن لها بالخروج او حتى يرجع لها جوالاتها وكمبيوترها ...لكن انه يكره يشوفها !!!
حسبي الله على اللي كان السبب ...لو ما بنت نجاة كان زمانها مخطوبه لولد خالها وارتحنا من وجع الراس

((ام ماجد وكره بااااااااااااارد .... فحبها المجنون لابنتها اعماها عن عيوب ساره وعندما صدمها الواقع اختارت ان تلقي اللوم على من تكره لتغطي جرح الامومة الفاشلة ))

ام طــــــــــــــــــــلال



مررت بيالة الشاي على ام خالد اخذتها مني ورجعتها على الطاولة اللي قدامها وتلفتت حواليها وقالت
:- اجل ندى وينها؟؟شفت سعاد ووداد بس ندى ما بانت ...وكيف حالها اللحين

تنهدت
:- ندى بغرفتها مع مزنه اخت المرحوم ....وش اقول لك ياختي ...البنيه حالها هذا هو ما تغير ....بالزور تنزل تاكل وبعدها ترقى لغرفتها الله يهداها بس

ام خالد اللي كانت جالسة على طرف الكنبه بعيد عني قربت مني وقالت
:- لا حول الله ...لا تخلوها على كيفها ...حاولي معها اجبريها...اذا مو عشانها عشان ولدها

قربت راسي من ام خالد وقلت بهمس عشان محد يسمع خاصة ان مزنه في بيتنا
:- والله يا ختي مني بعارفه وشو اسوي معها ...في الاول قلت البنت مصدومه ترملت وهي صغيرة وولدها بعده رضيع ومن حقها تحزن وكلها كم يوم وترجع مثل ما كانت ...خاصة عقب ما درينا انه تزوج عليها من ورانا بس هذا حنا كملنا شهر ودخلناعلى الثاني وهذي حالها

ام خالد حطت يدها على كفوفي المتشابكات وقالت وهي تضغط عليهم
:- الحرمه ممكن تكره الرجال اذا اعرس عليها بالذات اذا ما كنت تحبه ...لكن هذا ما يعني انها ما انجرحت...وندى اللي نعرفه ان علاقتها مع المرحوم كانت زوينه... وخلي في بالك انها ما لحقت تفوق من صدمة موته ودخلت في صدمة زواجه عليها

رديت عليها وحنا لازلنا نتهامس
:-السد عندك امانه ...ترى ندى عرفت قبل عرس خالد ان عزيز اعرس عليها (ورديت على السؤال اللي ما طرحته بس بان في عيونها ) زوجته الثانيه ارسلت لها على الجوال تعزمها على العرس(شهقة ام خالد لكني واصلت ) بس طيحت بو عبد العزيز خلتهم يلغون حفلة الزواج شكل قدمها نحس عليه اول طيحة ابوه وبعدها موته

سحبت يدي من يد ام خالد ومسحت وجهي وانا استغفر
:- استغفر الله ..استغفر الله ...والله يام خالد انا من اشوف ندى قلبي يشتعل نار البنت في اول شبابها ولاقت من المر اللي ما تتحمله جبال...اذا انا ما اعرف انام كيف هي

حاولت ام خالد تبتسم وقالت
:- ادري هذا قلب الام ...وادعي لها الله يشرح لها صدرها وصدقيني فراس بيسليها

ناولتها بيالتها وقلت لها
:- اشربي الشاهي قبل ما يبرد....وفراس هذا سبب ثاني يخليني اقلق عليها.... لو تشوفين كيف تمسكه صايره متعلقه فيه بشكل مرضي...ما تتركه, بالغصب تخليه يلعب مع فيصل وما تعطيه لحد الا اذا المسكين بكى يبيهم

ختمت كلامي بزفرة وقلت في محاولة لتغيير الموضوع
:- ما قلتي لي كيف العيال ؟؟؟ صار لي شهر وزود ما شفتهم حتى خالد ينزل عليا وما يدخل

رجعت بيالتها فارغة وقالت
:- خالد ما يدخل عشان ندى لسى في العده ...لكن احواله واخوانه شاغلتني

ناظرتها بحيره
:- ليه وش فيهم ؟؟صاير عليهم شي؟؟

ابتسمت
:- وش اقول لك ...على قولت بو خالد وسواس ...قلبي يقول لي ان بهم شي ما عادوا مثل اول ,تركي من سافر جده ما جا...صحيح يكلمني يوميا لكن صوته مو عاجبني واذا سالته يقول ضغوط العمل .... وخالد مدري ما كنه معرس جديد كنه نحفان ومهموم ...واذا سالته هم قال ضغوط العمل ...وسلطان كثرانه طلعاته وسهراته برى خايفه عليه لا يخاوي ناس كذا ولا كذا
ويضيع مني ...وش اسوي

جا دوري اواسيها واخفف عنها ابتسمت لها
:- مثل ما قلتي قلب الام هذا اللي صايب اولادك ...اذا على تركي على ما سمعت من يوسف ان مشروع جده مسؤليته كلها على راسه يعني الولد ما كذب , وسلطان ما عليك منه هم في هالسن كذا لكن اذا تبين تتطمنين عليه خلي تركي ولا خالد يكلمه احسن ...وخالد اللي صار عليه مهو بقليل توفي جد عليا يوم عرسه وبو عبد العزيز من ترك الشركة وخالد ما يهجد يوم الشرقيه ويوم جده ويوم برى المانيا واليابان ومدري وين ...اكيد بينحف وبيتضايق...على ما قلتي ما كنه معرس جديد...وهذا كنه ماثر على عليا

ام خالد وبدفاع عن ابنها
:- لا في هذي ما عندك حق يام طلال ترى خالد مهو مقصر

هزيت راسي
:- فهمتيني غلط والله ان خالد رجال ما عليه قصور بس...البنت وش اقول لك احسها صايره هاديه زياده عن اللزوم ..وكنها ما تنام ولا تاكل ...انا صحيح ما اعرفها عدل بس اول ما جت ما كانت كذا... هي هاديه وخجوله بس مو كذا وانا اقول يمكن لانها عروسن جديده وجدها ما صار له زمان من توفى وخالد ما يجلس في الرياض كثر ما يسافر يمكن هذا اللي مغير حالها

سحبت نفس طويل وردت علي
:- وشو بيدي والله ان العنود ما تخليها لحالها حتى انها تبات عندها اذا سافر خالد
واكثر من اني اطرش لها الاكل واخلي العنود ولا نجود ياكلون معاها واذا نزلت عندي اهرج معاها واشوف انها عادي ما بها شي ...تتكلم عن الجامعه واحيانا اهلها ...وعلى ما قلتي لاحظت انها غير وقلت يمكن بينها وبين خالد شي بس سالتها مره وسالته عقب وكلن يقول ما على الثاني قصور وانهم مرتاحين من بعض

توني برد عليها الا بدخلة ام ماجد علينا استغربنا جيتها البيت لاننا من ملكة تركي على وداد ما شفناهاغير في عزا عزيز....ان شاء الله خير يا رب... ومن بعدالسلام جلست على الكنبه المفرده عن يسارنا وقالت لام خالد
:- زين انك هنا ...تدرين اني من بعد ما طردتوني وبنتي ما عدت ادخل بيتكم

سكتت كانها تستنى رد من ام خالد اللي قالت
:- والله يا نوره انا يمكن اتحمل واسامح على كل شي ...لكن تجي لعند امي... لا لو فيها رقبتي ما اسكت ولا انسى واسامح الى ان ترضى امي

ام ماجد ولا كانها تسمع وبدل ما تعتذر ناظرتني وقالت
:- وحتى انتي يام طلال لو ما اللي صار لندى ما كنت عتبت بيتكم

اندهشت نوره هي هي ما تغيرت لو وشو يصير دائما توهم نفسها انها على حق وان غيرها هو الغلطان فقلت لها
:- ما قصرت وحظورك وقفتك معنا في العزا ما ينسى ...بس من الاحق بالزعل انا اللي بنتي تركها ولدك يوم ملكتها ....ولا انتي اللي تخلين ولدك يهين خاله قدام الرجاجيل

ولا كاني اكلمها ولا حتى اهتمت وقالت
:- والله اللي صابكم قدم بنت نجاة النحس عليكم ...اولها وداد وبعدها موت جدها واخرتها موت عزيز عشان كذا ...انا جيت هنا اعزمكم على زواج ساره وقولوا للبنات الا بنت نجاة ما ابيها تنحس بنتي

لوت ام خالد فمها على صوب قالت
:- استغفري ربك يا نوره عيب اللي تقولينه ترى الموت حق وموت جد عليا وعزيز قضاء رب العالمين وكلن له يومه....واما على وداد انا اشوف اللي صار خير لها ولولدي لاني ما كنت بشوف له بنت احسن منها

مسحت على ذراعها
:- ولا في رجال اخير من تركي لوداد (ورجعت التفت لنوره) الله يبارك لكم يا ام ماجد بس انا ما قدر اخلي ندى واروح اعراس ووداد وسعاد ما يطلعون في انصاص الليالي من غيري...سامحينا ما نقدر نجيك

وقفت على رجولها وهي رافضه تمد يدها على اي شي قدمته لها واشرت على ام خالد
:- لطيفة وما تقدر تجي عشان ندى لساها في العده ...وانتي يا نوال

ردت ام خالد
:-وانا بعد سامحيني ... خالد مسافر المانيا وانا مقدر اترك عليا في البيت لحالها والبنات ما يطلعون من غيري...الله يبارك لكم وعقبال ماجد

كل اللي قالته ام ماجد
:- ايه كنت داريه انكم ما بتجون بس قلت اشوف اذا لي خاطر عندكم او لا وهذا انا عرفت انا وين وبنت نجاة وين

هذا حنا واسم نجاة هذي متى بتتعلم تقول عليا ولا بنت اخوي ولا حتى بنت يوسف وقبل ما ارد عليها نزلت مزنه من عند ندى وهذا كان كفيل باننا نقفل الموضوع


((ام طلال وام خالد اصحاب قلوب صافيه يعتقدون ان قلوبهم قادره على الكره المحض ولكنهم ليسوا كذلك فهم بحاجة لاسباب تحيل الصخر تراب ليكرهوا....فام خالد كرهت ام ماجد لانها اهانت امها....وام طلال كرهت ماجد لانه كسر قلبها كام وكرهت نجاة لانها كسرت قلبها كانثى...ولكن ردود فعلهما توضح بانهما لا تمتلكان القدره على ان يكرهوا بشراسه وان جروحهما نتاج عذابات من يحبون))




هــــــــــــــــــاجــــــــــــــــــــــر



قاعدة في حجرة جواهر على سريرها اهز رجولي وشوي وباكل شفتي من التوتر ...لكن استاهل وش لي اطاوع عليا ....عاد ما دروت الا عليا استشيرها في هالموضوع كان المفروض اعرف ان نصيحتها في هالامور ما تنفعني ...طالعت الساعه سبع المغرب صار لي ثلاث ساعات متحمله خبال جواهر وهو ولا حس ولا خبر...وهذا دليل على غباء افكار عليا والله صار له يومين من رجع من مصر ولا سأل وش لي اذل روحي واجي لكن كله من عليا

اذكر ليله وصوله كنت اكلمها على الموبايل
:- عليا ... باجر حمد بيجي من مصر

كاني اشوفها ابتسمت
:- مبروك وبعدين ؟

نرفزتني :- ويش اللي بعدين وش قصدش ؟

هالمره سمعت صوت ضحكها
:- اقصد وبعدييييييييييين ...ترى صار لش اسبوع وانتين تعيدين وتزيدين وتعدين تنازليا باقي من الوقت على عودة البطل حمد

صرخت عليها ورفعت ايدي كانها قدامي مو اكلمها على التلفون
:- هييييييي لا تستهزأين .... ومن حقي اعد تنازليا (وكملت وانا اقصدها) الكل يعد تنازليا
بس اني اعد بصوت مسموع وحضرتش تعدين على السايلنت

ما انكرت وكالمعتاد ما حبت تناقش حتى فقالت
:- ارجع واقول وبعديييييييييين ؟؟ وش ورى التكرار؟؟ وبشكل مباشر من ويش خايفه

كالمعتاد بطلت شعري ولعبت فيه
:- خايفه مو بمعنى خايفه لكن قلقه متوجسه ....

لحظة صمت مرت لانها تعرف اني ما كملت كلامي ولاني عارفه مو هذا اللي ابي اقوله واخيرا قلت بعد ما زفرت نفس بصوت عالي
:- الصراحة ...خايفة ان حمد يرجع في خطبته (ونزل صوتي لدرجة الهمس) يطلقني...ما ادري شكله يخطط لجذي

عليا مباشره ردت
:- تعوذي من ابليس ...والله لا يقوله صدقيني مستحيل هالشي يصير

في البدايه كل اللي قلته
:- تؤ ...وليش ان شاء الله مستحيل وانتين تدرين عن ظروف الخطبة ....يعني واحد مثله كان يخطط لمستقبله انه بعد التخرج يكون نفسه ويخطب البنت اللي مختارنها ... في لحظة وعقب كل المجهود اللي بذله يتحطم كل شي ...ويتزوج وحده مفروضه عليه ....ويمكن اقل من البنت اللي في باله....خلنا نكون موضوعيين يعني وش تتوقعين نهايتنا غير الطلاق؟؟؟

علياء واحسها كانت تتمنى اني قدامها عشان تضربني
:- فال الله ولا فالش.... هاجر لا تفقعين مرارتي ... بلا غباء ....اذا بتكون استنتاجتي نفس استنتاجاتش بقول خلنا نكون مجانين مو موضوعيين ... يا بت الحلال كبري عقلش ...وايه مستحيل تكون هذي نهايتكم لاسباب وجيهه واولها يحصل له هاجر بنت جاسم ويفرط فيها
ضحكت وان من غير نفس لانها في العادة هذي جملتي لكني قلت
:- واذا كان اعمى او خفي عليه هالسبب

علياء:- هاجر وش فيش ؟؟ من عرفتش وانتين واثقه من نفسش وش اللي جد؟؟

سكت ما رديت فواصلت
:- على العموم ما اعرف اللي يبيها هذاعلى فرض ان في وحدة فعلا يبيها او لازال يبيها ...بس اللي اعرفه انه ما جا خطبش مباشره عقب اللي صار ...بمعنى انه قرار اخذه بكامل حريته وعقب تفكير ....واذا كان قرار زواجه عقلاني مو عاطفي فهذا ما يعني انه قرار غلط
واذا رجح العقل على القلب في زواجه فاكيد بيرجع العقل على القلب وما بينهي هالزواج

ما ادري ليش حسيت ان عليا تتحاشى ذكر كلمة طلاق اكثر مني ويمكن يكون كلامها منطقي بس قلت ليها
:- بس اذا كانت البنت ...

قاطعتني وبحده
:- هاجر لا تعليني ...مافي بنت الا في خيالش ...انا اتوقع ان الصبي انقهر من حركتش يومها وعند فيش وعشان يقهرش قال هالكلام ...والظاهر انه حقق نجاح ساحق

حسيت نفسي رجعت تلميذة مدرسة والمعلمة تهزأني وهذا كان يحصل بكثرة بما اني كنت ملقوفه
:- وش ان شاء الله دليلش على انه كان يجذب ؟؟؟

اتخيلها تشد شعرها من القهر لانها قالت وهي ضاغطه على ضروسها
:- الا وش دليلش يا فالحه انه بيرجع في كلامه خاصة ان فلم توم وجيري اللي بينكم انتهى ؟؟

كنت بدأت استمتع بان ارفع ضغطها بالذات انها في الفتره الاخيره احسها خاشه عني اشياءلكن سؤالها احبطني وقلت بزعل
:- ما يتصل ...ولا تقولين انه موسبب ...لانه سبب وقوي بعد ...في البدايه خفت اتصالاته ولمن شفت اتصالاته قليلة صرت انا ما اتصل فيه خير شر...بعدها تقريبا من شهراتصل وقال ان الامتحانات قربت ولا يبي ينشغل عن الدراسة فما بيتصل ولا يبي يتلقى اتصالات

شديت اطراف شعري اللي كنت اللعب فيه وقربت قبظتي من فمي حاولت امنع دمعتي من النزول لحظتها قالت عليا
:- زين هذا شي يطمن ما يخوف خاصة ان الامتحانات وفي مصر شي مرعب مقارنة بامتحاناتنا تدرين هناك نظامهم مختلف والمنافسة قويه باذات مع عدد الطلبة الكبير ...وهذي سنته الاخيره وما يبي يضيعها هدر

رديت عليها وانا متغبنه
:- الامتحانات صار ليها اسبوع من خلصت ...اسبوع ما اتصل فيه ....اصلا حتى خبر رجعته عرفته من جواهر يعني اتصل في بيتهم ولا اتصل يخبرني انه بيرجع

عليا شكلها اليوم ضدي لانها قالت
:- يمكن كان يخطط انه يفاجأش يعني يطب بيتكم ويصدمش انه في البحرين

انفجرت وبدل ما اصيح صرخت
:- اني ابي اعرف انتين شلون تفكرين ؟...لو يبيها مفاجأة كان جواهر ما تكلمت الا القهر انها تكلمت على اساس اني ادري ومكالمتها لي كانت علشان احضر غدا رجعته بالسلامه حتى انها قالت بالحرف (وقلبت صوتي اقلد جواهر) الغدا يوم ثاني من جيته اوكي....
ولوما وقفتها قبل ما تقفل الخط كان ليومش هذا ما بعرف متى بيرجع

سكت شوي بعدها قلت بغضب
:- لكت تدرين ما بروح عزيمتهم ....واذا على امي بقول ليها استحي اروح بيتهم وانه هو اللي لازم يجي البيت اول....واذا على خالتي بدور لي اي حجه رغم ان امي اكيد بتتكفل بالموضوع

ورجعت عليا تعارضني شكلها مسويه تحالف مع حمد من وراي
:- بالعكس اني اشوف انش لازم تروحين ...طبعا اذا مركم قبل العزومة بتكون روحتش عاديه
واذا ما مر بيتكم بتكون روحتش ضروريه عشان تعرفين على الاقل وش وراه وتكسبينه ....يعني يمكن يكون يتغلى عليش ...يمكن يكون زعلان انش دريتين انه خلص امتحانات وما دقيتين عليه

وهذا اني مثل الهبله طاوعتها وجيت قبل الناس مع امي وظليت للين مشت الناس وهو بكل بساطة يتحاشاني... بس خلاص صبري نفذ وقفت ورحت لعند الشماعة اخذت شيلتي ودفتي وقفت قدام المنظره....رفعت جواهر عيونها من موبايلها وقالت
:- وش تسوين ؟ وين بتروحين هالحزه ومن غير ما تتعشين ؟؟

اللهم طولك يا روح طبعا تجاوزت السؤال الاول ورديت مباشره على اللي عقبه
:- برجع البيت ما ااقدر اتاخر اكثر من جذي ...وما يصير انا وامي نقعد للعشى تدرين ابوي ما وياه احد

وقفت ومدت ايدها
:- جيبي الدفة واستريحي ابوش بيطرشون له عشاه لعنده...واليوم سهرتش عندنا

ماعطيتها دفتي وقلت
:- اذا جذي عجل بنزل تحت اقعد ويا امي وخالتي ...مليت من القعده بروحي وانتين طول الوقت تسبحين في البلاك بيري

طبعا هي ما كانت تسبح بس حركة صبعها على الجهاز كانها ماسكه مسباح وكالمعتاد جواهر اذا كان مزاجها عالي تضحك على اتفه شي خلصت ضحك وقالت
:- خلش وياي...... تحت ما في غير امي وخالتي وخواتي مع اولادهم يعني ازعاج وجع راس

ما عطيتها وجه وقلت
:- زين يعني ما في رجال تحت ...عجل خلش مكانش وانا بروح للازعاج ترى واصفينه لي عن الملل

طلعت من حجرتها وشفت باب داره قدامي موارب جاني فضول اني اتقدم وادخل اشوفها بس خفت جواهر تطلع وراي او حتى الجهال يشوفوني ساعتها بتصير فضيحة الكل بيدري اني دخلت داره ...صرفت نظر وقمعت فضولي ونزلت الدرج وانا في نص الدرج سمعت صوته
ميزت صوته اي لكن من يكلم ما عرفت وفي البدايه ما سمعت وش يقول بس اخر شي قاله كان

:- ياريت والله خاطري اقعد وياكم بس الشباب يحارسوني برى ....يلا في امان الله

ظليت واقفه على الدرج علشان اشوفه وهو طالع ...ادري ان موقعي ما بيسمح لي الا ان اشوف ظهره بس داخلي شوق لشوفته اشتعل بمجرد سماعي لصوته


لكن الصدمة اني ما شفت ظهره لانه ما كان متجه لباب البيت لا كان متجه للدرج ما عرفت وين افر ارجع دار جواهر ولا انزل تحت ايه برجع لجواهر عشان ما يشوفني لكني تاخرت في اتخاذ قراري

((هاجر الوحيده بين ابطالي التي تعرف حقيقه شعورها فهي تكره كون حمد لا يحبها وتتمنى لو انها تستطيع ان تكرهه ولكنها على يقين بانها عندما تقول اكرهه فهي تعني احبه ....كما انها كلمة لن تسببب لها الخجل ولكنها كلمة لا تعالج جرح الحب من طرف واحد الذي تعتقد انها تعيشه))



عـــــــــــــــــــلـــــــــــــــــــــــي




انتعشت عقب الدش البارد اللي اخذته ونزلت ادور وين امي ومزنه جالسين عشان اجلس معاهم واول ما اقبلت عليهم وقفت مزنه وهي تقول
:- بروح اجهز لك الغدا تراني ادري انك ما كلت شي

ابتسمت وهزيت راسي بايه وبعدها رحت لعند امي اللي جالسه على طرف الكنبه تشرب قهوة العصر بست راسها وايديها وحطيت راسي في حظنها وتمددت على الكنبه ووغمضت عيوني وضع مريح ويبعث على الاسترخاء يرجعني لايام طفولتي فتحت عيوني على صوت امي تناديني على طول رفعت راس من حضنها وقلت بلهجة اعتذار
:- عورتك يمه ؟؟ اعذريني نسيت ان رجلك تالمك
ابتسمت بحنان وهي تمسح على زنودي
:- لا يمه بس بغيتك في موضوع ...خاص شوي

سكتت و ما تكلمت اعطيها فرصه انها تقول اللي تبغيه من غير ما اقاطعها وفعلا قالت اللي اثار اهتمامي
:- يخص فراس

ورجعت سكتت لكني كالمعتاد استناها تخلص حكيها ولمن رديت عليها بالصمت قالت
:- الولد ما يصير نخليه يتربى بعيد عننا حنا اهله وعشيرته ...وادري انه بعده بزر صغير وما نقدر نفصله عن امه وهي ما تستاهل ناخذ ولدها من حضنها ... والمره حلوه وصغيره والف من يتمناها ...وما اظن ان وحده مثلها تظل من غير زواج ...ومن بيلومها اصلا ؟؟ بس انا ما ارضى ان ولد اولدي يربيه رجالن غريب

حسيتها تستشيرني فشرت عليها
:- شوفي يمه اذا على فراس شوفته مقدور عليها حاليا خلكم من الشرقيه واسكنوا عندي على الاقل الى ان يكبر وبعدها ناخذه عندنا هذا اذا ما اعرست ...واذا اعرست ناخذه ما بنمنعها من شوفته بس بعد ما يتربى في حضن رجال غريب

هزت راسها بلا وقالت
:- هذا الشور ما يلوق لنا انا وابوك ...انا ضقت فقد الولد وما ابيها تضوقه ...ولا تقول لي بتشوفه ترى انه يتربى في حضنها شي ويتشوفه في الاسبوع مره شي ثاني ...اناابيه يجلس بينا من غير ما نخذه منها

حيرتني وش تبي توصل له
:- يمه اذا على كذا سهله بس تخلص عدتها تجي تسكن عندكم في الشرقيه وبكذا يكون فراس بينكم كلكم

ابتسمت امي ابتسامة الم
:- يمكن كنت باخذ بشورك لو كنت متاكده انها ما تبي تتزوج من بعد اخوك ...

دخلت مزنه وفي يدها صينية الغدا وحطتها على الطاولة قبالي لانها تعرف اني احب اكل وهم حولي وقالت
:- بس ندى ما تبي تعرس تقول بتقعد لفراس تربيه ومهي بحاجة رجال دام ابوها واخوانها حولها
قربت لعند الصينيه ومسكت الملعقه باكل وقلت
:- شفتي هذى هي انحلت يا م علي من نفسها

لكن امي قالت اللي خلى اللقمه توقف في حلقي
:- لا ما انحلت ... لان ابوها ما بيرضى بنته تسكن عندنا(اشرت علي) مع رجال غريب وما في الا حل واحد يضمن ان فراس يتربى بينا وفي حضن امه من غير ما نقلق من مسالة زواجها
انك تزوجها

سكووووووووووون لحظات صمت طالت وكانها دهر صحيح اللي سمعته ولا اتخيل رميت الملعقه وقفت على طولي استوعبت الفكره وانا مشمئز منها قلت
:- لا ...هذا مو حل ,انا اتزوج حرمة اخوي ؟؟ ومن اللي يقول؟ امي !! يمه المره للحين ما طلعت من العده وتتكلمين عن زواجها ؟!!!لا عزيز ما صار له غير شهر وكم يوم من مات وانتي تتكلمين عن زواجي ؟؟ ومن من ؟؟من حرمته!!لا والف لا ..اللي تقولينه يمه تشمئز منه النفس

امي ولا تحركت من مكانها وكل اللي قالته وعيونها تلمع من الدموع اللي مغرقتها
:- ما عادت حرمته ...هي ارملته...واناابيك تزوجها على سنه الله ورسوله...وانا مااقول لك ارتكب اثم عشان تقول تشمئز نفسك منه انا اقول اللي الله شرعه واحله

قلت وانا احاول ما اصرخ
:- ادري انه حلال بس مهو بواجب وفي فرق بين الاثنين

حاولت تستدر عطفي
:- يعني ترضى ان يتربى ويكبر ولد اخوك يتيم ...ترضى انه يعيش غريب بين اهله ....اذا مو عشاني عشان فراس هاليتيم اكسب فيه ثواب ترى محد يقدر يحل محل ابوه غيرك انت عمه اولى فيه ...اذا ما تزوجتها بيعيش طول عمره يحس انه ضيف وحمل ثقيل ...وارجع واقول لك اذا انت اعرست عليها بتحل محل ابوه لكن اذا اعرست بغيره بيصير يتيم الاب ويتيم الام

ما انكر ان كلامها اثر فيني خاصه اني تعلقت بفراس كثير في الفتره الاخيرة لدرجة اني بعض الاحيان اجبر مزنه على زيارة بيت بو طلال بس عشان اشوفه دائما في كل زياره بو طلال ,طلال او حتى فيصل يجيبون فراس عندي الاعبه وحتى مرات انيمه في حضني الى ان تنتهي زيارة مزنه ...احبه ايه لكن اتزوج امه لا لا لا

وعلى هالفكره هزيت راسي وبدل ماتتكلم امي قالت مزنه
:- يمه ماله داعي هالحكي كله لانك حتى لو اقنعتي علي ما بتستفيدي حاجه لان ندى رافضه تزوج

محاوله مني لتجاهل الموضوع منعت نفسي ان اظهر اي انفعال وعشان ما يقولون اني مهتم او مكبر السالفه رجعت جلست ودفعت باللقمه لفمي اغصب نفسي على الاكل وامي تولت الرد على مزنه بانها قالت
:- ما تبي تزوج هذا كلام تقوله عن اي احد بس علي غير

لو الوضع مختلف كانت هالكلمات اشبعت غروري بس فهالوقت ما عنت اي شي وواصلت الوالده
:- علي مو اي رجال علي عم ولدها يعني زواجها منه بيضمن لها ان فراس يتربى في حضنها من غير ماحد يحاربها عليه وبيريحها من كلام الناس لانها اذا اعرست بغريب الناس بتتكلم واذا ما اعرست كمان الناس بتتكلم

امي مصره تستمر واللي يقهر ان مزنه مسايرتها ومستمره في الرد عليها
:- بس يمه هي ما تبي تعرس وانا بنفسي اليوم كلمتها في هالموضوع ورفضت قالت انها ما تبي تزوج وعلي بالذات مستحيل تتزوجه

حسيت اللقمه واقفت في صدري ضربت صدري عشان تنزل وقلت لمزنه بغضب

:- انتي كيف تجريتي وفاتحتيها في موضوع زي كذا ....ما تحسين المره لساها في العده ....عدة اخوك وانتي تكلمينها تزوج بالثاني ...يعني وشو توقعتي ترد عليك ...(وكملت بسخريه ) تبينها تقول لك تحت امرك اول ما اخلص من العدة بجهز حالي وبتزوج اخوك ....انتم ما تحسون اساسا الحرمة يكفيها ان الرجال اللي عاشت معه على الحلوه والمرة تزوج عليها بس عشان(انتبهت لوجود امي) استغفر الله اذا ابوك ما تحمل وطاح مريض ...كيف حرمته تحملت؟؟ زين منهم يطالعون في وجيهنا

ردت ببرود
:- ما كنت استناها تقول كلام زي كذا وكنت متوقعه ترفض بس قلت اكلمها من الحين عشان اخليها تتعود على الفكره

تركت الاكل وبعدته عني
:- حتى لو تعودت على الفكره وحتى لو وافقت ما في فايده لاني ما بوافق

امي تكلمت وهي في طريقها لغرفتها تجهز حالها لصلاة المغرب
:- عشان فراس انت وهي بتوافقو

ما حبيت اعطي المسألة اكبر من حجمها الموضوع سقيم وقررت ان وقت الانسحاب حان ....وقفت بطلع لكن مزنه قالت
:- يمكن انت توافق عشان فراس ....لكن ندى عقب اللي قالته اليوم مستحيل توافق مهما كان السبب
ناظرتها وكلي فضول اعرف وش اللي قالته وخلت مزنه تقتنع بعد هالاصرار العجيب اللي خلاها تفتح هالموضوع وبهالوقت وجاوبت نظرتي بانها قالت اللي جمدني مكاني

:- ندى تقول انها عشان فراس ما بتتزوج ابد وانها مستحيل تخليه تحت رحمة زوج ام او تعطينا الفرصه اننا ناخذه منها...وانها حتى لو ما كان عندها طفل ما بتتزوج لانها عقب عزيز كرهت كل الرجال, قالت لي اخوك ما قصر غصبني على اشياء كثيره وعاملني على اني جاريه
واخرتها اتهمني ان سقطت حالي عمد وختمها بانه اعرس علي ...

نزلت دمعه على خد مزنه لكنها واصلت:- تقول انها تكرهه وانها مهي مسامحته على اللي سواه فيها ....تقول انك من طينته وانك اشد منه غرور وغطرسه ...ولو الدنيا خلت من الرجال ما تزوجتك لان مافي عاقل يرمي بروحه للتهلكه....وانها ما تامنك على ولدها ... تقول انها تحس تنازع الروح اذا اخذت ولدها دقايق فكيف اذا سلمتكك اياه طول العمر

بلعت ريقي ولاول مره ما ارد لاني عاجز عن الرد ....في البدايه حسيت قلبي ارتعد معقوله لهالحد عزيز نكل بها ...لدرجة انها ما تسامحه...لكن انها تشوفني وحش بهالطريقه طعن كبريائي....لو خلت الدنيا من الرجال ما تزوجتني !! ليكون تحسبني ابيها !! هذي مسحت بي الارض ...وكله ممكن اسامح عليه واعذرها فيه بسبب وضعها والتوقيت وسخافة الفكره ككل

لكن انها ما تامني على فراس ولد اخوي هذا شي خلاني اغضب من تحسب حالها عشان ما تسلمني ولد اخوي ...والله ثم والله طال الزمن او قصر فراس ما بيتربى الا عندي يا بنت يوسف






((ندى حالتها بسبب كرهها لعزيز ذاك الكره البارد الذي تركها بلا شعور تجاهه ,فهي تكره المها الناتج من افعاله لذلك هي بارده مستكينه ولذلك هي تكره علي نسخة عزيز كما تعتقد...اما تعلقها الشديد بفراس فهو تعلق بحياتها فحبها الامومي نحوه يمنحها الشعور بانها لا زالت حيه ولكن هل ذلك سيجعل جرح انوثتها يلتئم؟؟...اما علي كرهها لانها طعنت كبرياؤه طعنت غروره ورجولته واشعلت غضبه بذلك... كرهها واغضبته لدرجة انه لم يعد يراها كزوجة اخيه ....الى اين يا ترى سيوصله غروره المجروح؟؟))



حــــــــــــــــــــمـــــــــــــــــــــد



كنت بطلع لربعي اللي يحارسوني(يحارسون= ينتظرون) بس تذكرت الكتب اللي موصني عليهم واحد من الربع واتجهت ناحية الدرج وانتبهت للي كانت واقفة على الدرج
هاجر ثلاثة اشهر من اخر مره شفتها فيها ....حسيت اول ما طاحت عيني عليها ان النفس انسحب مني ...صدق ما كنت متوقع او حتى مخطط اني اشوفها ...لكن مو هذا اللي صدمني لا
...اللي صدمني وما كن متوقعه تاثير شوفتي لها...انتبهت انها موعارفة وش تسوي وين تروح ...وكان بامكاني اني اتنحى على جنب او حتى انزل الدرجات القليله اللي ركبتها واخليها تنزل لكني بدل ما اسوي جذي قلت

:- سلام حيا الله بنت الخاله

ردت بهمس
:- وعليكم السلام ...الحمد لله على السلامه

ماادري ليش قلت
:- الله يسلمش ...صدق متاخره اربعه وعشرين ساعه بس زين انها جت

ردت ولا زالت تهمس
:- والله ... لو شفناك قبل كانت وصلت قبل ...بس ما درينا الا متاخر

حسيت انها معصبه رغم ان ما بين عليها بس يمكن من المكالمات اللي كانت بينا صرت اعرف مزاجها من صوتها وعشان اتاكد قلت
:- متاخر؟!! شكثر يعني ؟ معقوله توش تدرين اني رجعت !!!ترى صرنا وقت العشى والعزومه كانت على الغدا

مئه بالمئة انها مو بس معصبة الا وصلت لدرجة الغليان لانها قالت وهي تجاهد عشان صوتها ما يرتفع
:- مو حالنا حال الغرب لو ما العزومة ما درينا برجعتك ...يعني لو اخذت من وقتك الثمين كم دقيقه واتصلت تخبرني عن موعد رجعتك كنت......

سكتت ما كملت هو خجل او غضب ما عرفت لكني ما سمحت لها تلومني فقلت
:- بس انا اذكر اني قلت لش عن جدول امتحاناتي واني برجع في ظرف اسبوع من انتهائي
....يعنى كنتين تعرفين اني برجع خلال هاليومين

اذا كانت خجلى فبالتاكيد تحولت للغضب وهي تقول
:- لا والله !! واذا كنت متوقعة ؟؟ وش اسوي ارابط في بيتكم الى ان ترجع عشان اتحمد لك بالسلامة بدري

الفكره بحد ذاتها خلتني ابتسم فشلون وهي تقولها بنرفزه ...كنت شوي واضحك لكني سيطرت على نفسي وقلت بعتب جاد
:- كان بامكنش بكل بساطه تتصلين لي وتتاكدين من موعد رجعتي ...ولا ما خطرعلى بالش تتصلين ؟؟؟

ضيقت عيونها وضغطت على اسنانها وهي تقول في نفس واحد
:- اتصل !!! ومن المفروض اللي يتصل ؟؟ من اللي قال انه خلال امتحاناته بيكون مشغول ولا يقدر يتصل؟؟من اللي قال انه بيكون محتاج يركز على دراسته ؟؟ رسالتك كانت واضحه ...لا تتصلين ...فشلون اتصل؟؟

هذي وش تقول ؟؟ ما ادري شلون النسوان يفكرون ؟َّ!! اقول شي وتفهمه شي ثاني لكني قلت بهدوء عكس غضبها وعصبيتها
:- انا قلت ما اقدر اتصل ,ما قلت لا تتصلين (كانت بتقاطني لكني رفعت يدي اوقفها وكملت) وعلى فرض اني قصدت ما ابيش تتصلين ...ليش ما اتصلتين عقب ما خلصت امتحاناتي
مو انا بنفسي عاطنش الجدول

ردت وما كنت متوقع هالرد
:- لا تلومني وتحملني المسؤليه ... ولو كنت هامتنك كان ما انتظرت لين تشوفني عشان تعتب
....لو صدق مهتم كان دقيت تسأل ليش انا ما اتصلت فيك .....

صوتها ابتدى يهتز وكانها بتصيح وفعلا لمى طالعت عيونها لقيتها تلمع من الدموع المتجمع فيها وهي تقول بسخرية تحاول تغطي فيها دمعتها
:- لو مهتم كان على الاقل طرشت مسج تقول فيه على موعد رجعتك مو تخليني مثل الهبلة قدام جواهر ولا كاني مرتك ....يعني درينا اني مو فتاة احلامك بس على الاقل حط اعتبار لكوني بنت خالتك قبل ما اكون مرتك

عورت قلبي بس انا بعد في قلبي نار وابيها تنطفي انا بعد من حقي اعتب
:- بس انا كنت في غربه ...يعني لو كنتي فعلا حاسبة حساب اني زوجش كان كلمتيني على ابعد تقدير عقب يومين من انتهاء الامتحانات تسألين ليش ما رفعت السماعة وكلمتش...ولاما سالتين نفسش هالسؤال ليش حمد ما يتصل ؟؟؟ لاني سألت نفسي هالسؤال...ليش هاجر ما تتصل وهذا شي من قبل امتحاناتي بحوالي الشهر ؟؟

وكملت بغضب مصدره تجاهلها لي وموجه ضدها :- وجاني الجواب لمن تعمدت ما اتصل ان ما يهمش امري لدرجة انش ما سالتين عني ولو من خلال اهلي ...

نزلت درجتين وصارت في مستواي تماما وقالت بحدة ولكن بصوت واطي عشان محد يسمع
:- شوف مو كل كلمة تقلبها علي وتقعد تبرر لنفسك وتوهمها اني الغلطانه ... (ولمعت عيونها بالتحدي) انا ما اتصلت ايه ...لكن ما هتميت لا ... بس وش تبيني اسوي ...انا استحي اتصل واسأل خالتي او حتى جواهر وش بيقولون اكيد بشكون ان في شي ....(وكملت وخدودها تحولت للون الاحمر)...وثانيا انا من وين لي اعرف انك حاط في خاطرك اني ما اتصل؟؟ ...انت حتى ما لمحت ...(انخفض صوتها وصرت بصعوبه اسمعها ) انا اساسا ما قاطعتك الا عشان ما اثقل عليك وتمل

تغير مزاجي مئة وثمانين درجة وابتسمت من قلب لاني عرفت انها كانت تدلل وقلت اشاكسها
:- يعني كنتين تتغلين ؟؟ كنتين تشوفين اذا بشتاق او لا؟؟ ليكون تحبيني ؟؟

خدودها مو احمرت بس الا اشتعلت نار ونزلت راسها ورجعت ركبت خطوه ورى عجبني حياها اطربني ردها رد هاجر الانثى المختبأه في ملابس الطفله
:- هااااااا.... انت ....انت مغرور وما مخذ مقلب في نفسك...على بالك انك محور الكون انا...

سكتت ما عرفت تكمل صراحة رجعتني لايام الطفوله كنت اسحب شعرها بس لاني استمتع اذا غضبت واللحين استمتع اذا انحرجت بهالشكل فقلت ازيدها
:- هجور اذا كنتي تحبيني وتبين تعرفين اذا انا ابادلش الحب اولا خلش صريحة واسالي مباشره

شهقت وبطلت فمها وعيونها على وسعهم وقبل ما تنطق باي كلمه رن موبايلي اوووه هذولا ربعي نسيتهم برى... شغلت الخط ما رديت وطالعت الساعة شفت اني تاخرت عليهم وصرفت نظر عن الكتب وقلت لهاجر وانا ارجع الموبايل لجيب ثوبي
:- مع السلامه وعلى فكره ولانش مرتي انا بداوم الاسبوع الجاي في مكتب الاستاذ عبد الله

نزلت متجه لباب البيت واندهشت لانها نزلت وراي ومسكتني من كم ثوبي بقوه وقالت بغضب مجنون
:- الاستاذ عبدالله ابو ريم ؟ ليش انت مصر تشتغل عنده ؟ تعاندني انت وتبي تقهرني ؟ ولا ما تقدر تستغنى عن شوفتها ما يكفيك انها وياك في مصر واللحين بتكملون بعد في البحرين .... شوف اذا انا حجرة عثرى في طريقك وانت تحبها وميت في هواها طلقني و تزوجها ...ومافي داعي تلعب من وراي ...

نفضت ايدها وبقوه من على كم ثوبي وطالعتها بنظرة غضب وتهديد ومن غير ما انطق طلعت برى البيت ...هذي شلون تفكر شلون تجرأت واتهمتني في اخلاقي ...احنا كم مرة تناقشنا وتكلمنا في موضوع شغلي كم مرة شرحت ليها اسباب اختياري للاستاذ عبد الله ..كم مرة قلت ليها اني ما اشوف هالريم الا في النادي الثقافي ...انا يا هاجر انا العب هذي مو طبيعيه اكيد فيها شي ....ولا السالفه انها تباني اطفش واطلقها؟؟؟؟؟؟؟؟؟؟؟؟؟؟
لكن هذا بعدش يا بت جاسم وعشم ابليس في الجنه

((حمد يحب هاجر التي تثير فيه مشاعر غريبه عليه وتحيي فيه مشاعر ميته لكنه يكره ما تظنه هاجر به ,يكره غيرتها المجنونه ....التي تترك كرامته تنزف))


(( وداد ))



:- ما له داعي اشوفه والزواج ما باقي عليه شي

ابتسم طلال وقال
:- انا ابي اعرف وش دخل موعد الزواج ؟؟ رجال ويبغى يشوف حرمته وش نقول له ؟ اصبر لوقت حفلة العرس !!

نزلت راسي وميلت فمي ورفعت حواجبي ورديت عليه
:- ايه الناس كلها كذا

قاطعني طلال وهو يضحك
:- تبيني اقول الكلام ذا لتركي ؟ لا لا ما اقدر اخاف يتوطى ببطني...(وانرسمت على وجهه ملامح الجديه )
يعني العنود اذا سوت هالحركه اسمي معها في نفس الحي وكنت اشوفها كل مده ..... لكن تركي حرام عليك الرجال صار له خمس اشهر ما نزل الرياض
ابتسمت اول ما تكلم عن العنود...وخطر على بالي اقول
:- صراحة استحي ...انا مو متعوده من الملكة للحين ما شفته الا كم مرة

ابتسم طلال وحطت يده على كتفي ومشى معي باتجاه المجلس
:- وللسبب نفسه لازم تجلسي معه ...عشان تلحقي في هالاسبوعين تتعودي عليه (وكمل يغيضني) والرجال هم له حق يشوفك عشان يتعود على خشتك

وصلنا عند باب المجلس فتح الباب ودفعني للداخل وسكر الباب وتركني لحالي مع تركي...كنت منزله راسي واول ما رفعته شفته واقف عند الكنبه يستنى اني اتقدم ناحيته ....وصلت لعنده وانا الود ودي طلعت من المكان ركض...لكني سلمت واشرت عليه يرجع يجلس مكانه ما يفرق بينا غير اذرع الكنبات

هدوء ساد المكان وكأن في تحدي بينا من اللي ينهزم اول ويقتل الصمت ...الى ان تركي قرر يتكلم وقال
:- انا جيت عشان اتكلم في ترتيبات الزواج .

رفعت راسي(( ترتيبات الزواج ! هذا كلام المفروض اما يدور بين الحريم او بين الرجال)) ... هذا الكلام اللي كنت ناويه اقوله بس اللي شفته منعني ...تغير شكله تغير ...نحفان بشكل مخليه وكأنه اطول وعضلاته...لا لا هذا اكيد لاني اول مرة اشوفه ببلوزة وبنطلون ....صدمني ما يحق له صاير وسيم بزيادة

شاف اني ما تكلمت فواصل
:- اقصد ترتيبات ما بعد الزواج ... طبعا حنا في الرياض بنسكن عند ابوي في البيت الصغنون اللي بنيته ...لكن هذا بعد ما انتهي من مشروع جده يعني بنسكن هناك حول السنه وانـ...

قاطعته وانا عيني عليه مو قادره ارفعها عنه
:- اذا كذا ناجل ازواج لبعد ما تخلص من المشروع ...(وبررت كلامي) انا مقدر اعيش برى الرياض بعيد عن امي

ابتسم اول مره من ملكنا اشوفه يبتسم بهالشكل ابتسامة ما يكون وراها الف معنى ومعنى وقال
:- تطمني جده شي مؤقت ...وباقي عمرنا ان شاء الله بنعيشه في الرياض....لكن تأجيل لا بالذات ان ما في سبب خاصة انك انهيتي دراستك

وش اقول له فعلا ما عندي حجة ممكن تقنعه ...انتبهت لحالي انا وش جالسه اقول ؟!! الظاهر ان شوفته جمدت عقلي وشتتني واخاف اذا طولت الجلسه معاه ارتكب حماقه ولكذا قلت
:-خلاص دامك قررت ووصلت الخبر...اظن ما عاد لجلستي لزمه

وقفت عشان بطلع من المجلس وقبل ما اخطو اي خطوة مسك يدي جمدت مكاني وقال
:- رجعي مكانك ... انا ابي اعرف متى بتعلمين على الاقل اصول الضيافة ...في احد يترك ضيـ...

قاطعته :- انت منت ضيف انت من اهل البيت

وحاولت افك يدي من يده لكنه شدد قبضته فرجعت اجلس عل وعسى يتركني لكنه وان خفف من قبضته ما تركني وقال
:- وانا زوجك... زوجك اللي ما شفتيه من بعد غيبه ... بس ما عليه الاقل عامليني كضيف

زوجي اللي حتى ما اهتم يتصل ...زوجي اللي حتى في لحظات ضعفي وانصياعي لقلبي خفت اتصل فيه خفت لا يقفل في وجهي لان الامر مو ضروري سحبت يدي من يده بقوه وقلت وانا افرك يدي
:- لا تقول زوجك, لاننا نعرف انك ولد عمي وبس....يعني حتى لو بتكون ضيف مو انا اللي تضيفك... ولا تستنى مني غير كذا

توجهت للباب وكنت بفتحه لكنه قال بسخريه
:- صدقيني مو وقت اعلمك كيف تعامل الزوجه زوجها ...مع انه امر المفروض انه من طبيعة الانثى وانها مجبولة عليه....لكن قريب يجي هالوقت

دائما دائما يطعني, وابدا السلاح ما تغير والالم ما تغير رديت عليه وانا اكتم الالم واظهر الغضب
:- تدري انا ما تفاجأت ولا انصدمت ...لانك كنت ولا زلت تشوف حالك فوق ما انت (وبنفس اسلوبه قلت ) وصدقني مو وقته ...بس قريب يجي الوقت اللي اكسر فيه غرورك واعلمك كيف تعامل ....(واخترت بالذات اقول) الانثى

(( وداد تعرف ان تركي يذيب قلبها عشقا...ولكنها بذات القدر تكرهه لانه لا يراها كاملة....
تركي يعشقها ولكنه يمقت كونها لا تحبه ...لكن عشقه اكبر من مقته فهو يأمل انه في وقت ما يستطيع ان يجعلها تبادله المشاعر))




تمنياتي بقراءة ممتعة ومشوقة ان شاء الله

الى الملتقى يوم الاحد باذن الله

اعذب وارق التحايا

ميما

الجزء الثلاثون بينزل بمشيئة الله يوم الاحد

ومن الان حتى نلتقي

اتمنى ان ارى تفاعلكم وردودكم

اعذب التحايا
ميما

يسعد صباحك

توني قاريه بارتين
طبعا ماراح اقول توقعات لان الروايه باقي
لها بارت وتكتمل

بدايه جدا رائعه
والحلو فيها ان الاحداث بين السعوديه والبحرين..

موقفه يابنت البحرين
وبالمبارك مقدما على اكتمال الروايه

وان شاء الله يكون لك روايه غيرها..

صباح الخير والخيرات
صباحكم عسل صباحكم سكر
صباكم شهد مكرر

المهم لحظات وينزل البارت 30