كاتب الموضوع :
معاميريا
المنتدى :
القصص المكتمله من وحي قلم الاعضاء
هذا الجزء اهداء مني لكل متابعي
أطياف الغرام
وبالذات للغائبات القريبات للقلب
اقدار
مذهله
دفى الكون
وذوات الردود المتميزه والمبهره دوما
جين
emomsa
جودي
((الجزء التاسع عشر ))
(رد فعل )
رد الفعل عند الانسان ليس له قياس محدد ولا يخضع لحسابات او قوانين معينه
وغالبية ردود الافعال تكون غير متوقعه .....والاغرب انها ساعات تجي فعلا مغايره لكل المقاييس لانها تكون عكس اللي نحسه .... وساعات يكون لنفس الشخص اكثر من رد فعل واحد تجاه نفس القضيه ....ما ادري هو بطء في الاستجابه او ان النفس البشريه تختزن الفعل وفي كل مره تستذكره يكون لها رد فعل مختلف ؟؟؟
نــــــــــــــــــــــــــــدى
ابتدأت اليوم فرحانه ومتناسيه كل همومي وفرحة طلال كانت اكبر من ان صدره لحاله يختزنها
فكان لنا نصيب من عدوى الفرح ......الى ان جتني سعاد تقول بصوت لاهث
:- ندوش ما دريتي باللي صار ؟!!
توقعت انها عرفت عن طلال والعنود لكني حبيت استهبل فقلت :- ليش وش صاير ؟؟
اخذتني على جنب وهمست في اذوني :- عليا في المستشفى
شهقت وبطلت عيوني على وسعهم :- في المستشفى ؟!!! وش فيها ؟؟
حركت يدها قدامي :- اششششششش لا يسمعونك العجايز .....ساره كبت على عليا كاسه كوفي وحرقتها
لا عاد اول صفعتها واللحين حرقتها معقوله ساره البارده تسوي كذا ؟!!
:- وليش حرقتها ؟؟اقصد عليا وش قالت لها
سعاد وهي تتكتف :- ما يبيلها تفكير لنفس السبب اللي خلاها تصفعها خلاها تحرقها
((الصراحه ما اصدق ساره البارده الهادئه تسوي كذا ....وعلى وشو على كذبه ما ادري من اللي اخترعتها فيهم ....والله اني خايفه ان عليا ابتدت تسوي حركات مثل امها ))
انتبهت من افكاري وقلت لسعاد :- يعني تبيني افهم ان ساره علشان هالسالفه تصرفت على غير عادتها وحرقت عليا من غير ما عليا تقول لها او تسوي لها شي ؟؟؟
ردت سعاد وصبعها على راسي :- انا ابي اعرف انتي شلون تفكرين ؟؟........خذيها بالعقل الكل يعرف ان خالد عمره ما خطب ساره ....وان الدعوه كذب في كذب ...لكن عليا شخص غريب ما تعرف خلفيات الموضوع فشلون بتخترع كذبه زي هاذي .....ويا حبيبتي اللي دفع ساره انها تصفع عليا وتحرقها وقدام الكل مو الكذبه نفسها لا ؟؟
هزيت راسي ابي استوعب اللي تقوله سعاد واللي خلى تفكيري يتجه لطريق مختلف
:- وشو هو الدافع يا بو العريف ؟؟
ابتسمت سعاد :- بكل بساطه ساره تشوف ان خالد ملكها وبس وعليا سلبتها املاكها فحبت تنتقم من عليا والله العالم وش قالت لها واكيد رد عليا افحمها وما شافت لها منفذ تنقذ كرامتها من خلالها غير تصرفات هبله ومن غير تفكير
اقنعتني سعاد بكلامها خاصه انه يفسر اللي صار من غير ما يترك اي ثغره :- طيب وعليا من امعاها اللحين وش اخبارها ؟؟
تنهدت سعاد :- معاها نجود وخالد .....وما اعرف وش صار عليها لان الثنتين تركوا جوالاتهم هنا
طرأت على بالي فكره وانا اناظر الصاله والحريم اللي فيها وساره اللي ماخذه زاويه لحالها جنب امها :- طيب هاتي جوال عليا علشان نتطمن عليها
بلمت سعاد :- وشلون بتطمنين عليها
حطيت صبعي على راسها :- شغلي مخك...بندق على خالد (وكملت بتساؤل ) انتي تعرفين عليا مخزنه رقم خالد تحت اي اسم
ابتسمت :- هو احد ينسى ((لهيب الروح ))
راحت ورجعت وجوال عليا في يدها مدته علي :- تفضلي
اخذته وقلت :- يلا خلينا نروح الصاله نكلم هناك
سحبت سعاد الجوال من يدي :- اقول لك الحريم ما يعرفون عن عليا تقولين بتكلمين قدامهم
ابتسمت على جنب وانا اغمز لها :- ليه ما تبين ساره ساره تسمع المكالمه؟؟
وقبل ما ترد سعاد دق جوالي وكان المتصل عزيز التفتت لسعاد وقلت لها
:- هذا عزيز ...روحي انتي وكلمي خالد ولا اقول لك عطي خالتي ام عبد الملك تكلمه احسن منك ومني
ضحكت سعاد :- اه منك تبين تولعينها انتي تعرفين ان خالتي ام عبد الملك ما تحب ساره
على العموم اخليك مع عزوز
كنت ناويه اضربها بس ركضت قبل امسكها ناظرت جوالي قبل ما ارد على عزيز سحبت نفس اهدي من نفس ورديت
:- هلا حبيبي
عزيز :- هلا ....ندى انتي للحين في بيت عمك
ما استغربت جفاءه خاصه بعد الخلاف اللي بينا :- ايه تعرف الحريم يطولون مو مثل الرجال
سكت فتره بعدها قال :- كذا ما ينفع .....لكن تدرين بكره عقب اذان المغرب جهزي حالك بمرك
ما كنت حابه ارد الشرقيه فقلت بدلال :- عزيييييييييز حبيبي بلاها بكره اجلها ليوم ثاني
تنحنح :- وشو اللي ااجلها ؟؟
:- الشرقيه
ما ادري ليش حسيت ان نبرته تغيرت للغضب :- اول ما نخلص مشوار علي بنرجع الشرقيه ولا تحسبين انك اذا اجلتين اني بانسى اتفاقنا
كنت ناويه ارد عليه اي اتفاق هذا اللي تتكلم عنه لكني قلت :- وانا وش دخلني في مشاوير اخوك
رد من غير نفس :- امي مصره تشوف البنت اللي بيخطبها علي ومصره انك تكونين معهم
ما لي نفس اروح مكان فقلت :- بس انا وجودي ما له داعي
عزيز وبنفس المزاج المتعكر :- ادري بس امي مصره انها تروح وانتي واختي مزنه معاها
مع مزاجه هذا اكيد بيكون من الجنون معارضته فقلت :- صار بعد اذان المغرب راح اكون جاهزه ان شاء الله
قال عزيز وكأنه يتقصد انه يغثني :- بنطلع من عندهم على الشرقيه على طول فجهزي كل اغراضك ترى المهله خلصت من اليوم
ما رديت عليه انا اساسا ناويه اجي له من زاويه ثانيه والكلام اللي بقوله يحتاج اننا نكون في مواجهة بعض مو عن بعد كذا سلمت عليه وسكرت الجوال
علـــــــــــــــــــيــــــــــــــاء
صرخت من غير احساس او شعور وما قدرت اوقف على رجلي ونزلت الارض وانا اصرخ من الحراره وكل اللي اعرفه ان نجود كانت قاعده جنبي ومحتاسه مو عارفه شلون تتصرف طبعا كان الفرق ثواني من صرختي الى تواجد خالد في المطبخ او لما شفته كنت ناويه اكتم صرخاتي بس الالم ما عطاني فرصه وما قدرت اتماسك قدامه ....سمعت صراخه على نجود المسكينه وكلامه لساره (((والله ثم والله اللي ما احلف به باطل اني ما بعديها لك ...ولو ما انك حرمه كنت دفتك في مكانك ))) حسيت ان كلماته هذي ردت لي اعتباري قدام ساره لكن اول ما شالني على ذراعه وقربني لصدره وانا في دنيا ثانيه كل اهتمامي واحاسيسي مع العضلات الصلبه اللي جسمي الغض متسند عليها ودفء جسمه ودقات قلبه المنتضمه اللي بعثت في نفسي شعور اشبه بالمسكن .....بتقولون شلون انتبهت لكل هذا وهي تتألم من حراره الحرق بقول
ان خالد هذا انسان غريب مجرد حضوره وتواجده جنبي يفقدني تركيزي على الاشياء من حولي واليوم اكتشفت ان قربه يسلبني احساسي بكل شي حولي ما عدا هو هو وبس ..... ولول ما نزلني على السيت الوراني في السياره رجع لي الاحساسس بالالم بقوه خاصه مع الفكره الجديده اللي جت على بالي((انا بكل غباء احب شخص ما يكن لي اي نوع من الشعور ودفاعه عني كان لمجرد اني زوجته وكرامتي من كرامته .....))استرسلت في افكاري ((معقوله يا عليا لانش تحبينه بتنسين موضوع الطلاق ......لا لا لا تسوينها لان احساسش بالذل من شخص ما يعني لش كل شي راح يكون اشد ايلام من الذل على يد شخص ما يعني لش اي شي ))
قطع افكاري وصولنا للمستشفى نزل خالد وكان ناوي يشيلني على ذراعه مره ثانيه لكني رفضت
:- ما له داعي اقدر امشي
من غير ولا كلمه شالني وتوجه للاستقبال اشرت له وحده من الممرضات على غرفة المعالجه بعد ما قال لها انها حاله حروق نزلني على سرير المعالجه وطلع برى الغرفه عقب شوي دخلت دكتوره مصريه كشفت على الحرق عالجته بصمت وبعدها سألتني وهي تكتب شويه ادويه على الوصفه الطبيه
:- الحمد لله ان حرق بسيط لا هو الحرق ده من ايه ؟؟
كنت متوقعه ان اي دكتور بيسأل هالسؤال فقلت :- ابدا كنت رافعه كاس كوفي ولد اختي يركض قريب مني ...صدمني وانكتت القهوه علي
سلمتني الوصفه وقالت :- اه كده طيب مش مشكله هو مجرد احمرار عاوز له كده كم يوم ويروح ...وده مرهم تحطيه على الحرق مرتين في اليوم ..وكمان دي حبوب مسكنه تاخديها لمى تحسي بالالم
سالتها وانا اطالع في اسماء الادويه واستغرب من الصيادله شلون يعرفون يفكون هالشفره
:- زين دكتوره بس الحروق هذي وبالذات اللي في صدري ورقبتي راح تترك اثر ؟؟
وقبل ما ترد دخل خالد بعد ما استأذن وسأل عن حالتي ردت عليه نفيس الردود وبعدها قالت له
:- وما تخافوش الحروق مش حتترك اي اسر لو انتزمتي على العلاج
وقبل ما تطلع التففت لخالد وقالت :- الحمد لله على سلامه المداد يا استاز
رد خالد وعينه مركزه علي :- الله يسلمك (طلعت الدكتوره وساعتها قال ) هاتي الوصفه اصرفها من الصيدليه و...............
قطع كلامه دخول نجود اللي ضمتني وهي تتحمد لي بالسلامه
نجود :- الحمد لله على سلامتك اشوى ان الحرق سطحي (طالعت خالد ) اظن اننا بنرد البيت على طول مو ؟؟
ابتسم لها خالد ابتسامه كنت حابه انها تكون موجهه لي لانها ابتسامه خاليه من اي معاني مخفيه وراها :- اول شي خليني اقول لزوجتي الحمد لله على السلامه (قرب مني ونزل راسه وطبع قبله دافييييييييييييييييه على خدي وقال بصوت تغلبه البحه ) الحمد على السلامه يا عمري ( ومسك يدي وطالعني وكأنه يدور على شي ) تقدرين تمشين ؟؟
ابتسمت له ابتسمت لعيونه :- اكيد اقدر ترى الحرق مو في رجولي
غمز وهمس في اذني :- طيب ممكن اتأكد
حسيت ان درجة حرارتي ارتفعت وان اذوني قبل خدودي حمروا وما رديت والظاهر انه استمتع باحراجي لانه كمل بهمس :- اختاري اما توريني مكان الحرق او تخليني اتأكد ان رجلك ما فيها اي حروق
نزلت راسي وغمضت عيني وكل اللي قدرت اوقله هو :- خالد جوز عني
ضحك والتفت على نجود :- خللك جنبها دقايق اصرف الدوا اول وبعدها نمر بيت عمي ننزل عليا هناك وبعدها نرد البيت
فعلا ما طول خالد على ما رجع لنا ركبنا السياره وهالمره نجود سبقتني وركبت ورى فاضريت اني اكون جنبه ما لحق يحرك السياره الا موبايله يرن عقد حجاته وطالعني
:- جوالك معك ؟
استغربت سؤاله :- لا نسيته
اخذ موبايله وعطاني اياه :- ردي اكيد يبونك
اخذت الموبايل وانا مستغربه بس اول ما شفت ان المتصل ((العليا )) عرفت ليش عطاني اياه رديت وقبل ما اتكلم وصلني صوت خالتي ام عبد الملك
:- ساعه علشان ترد الله يهداك ؟؟المهم وش اخبار عليا ؟؟
ابتسمت وقلت بهدوء :- بخير عساش بخير
انذهلت :- عليااااااااااا !! شعلومك يا بعدي وين خالد عنك ؟؟وش قالوا لك المستشفى ؟؟
رديت بنفس الهدوء والابتسامه ما فارقتني :- الحمد لله الحرق سطي شويه احمرار ويروح
وخالد جنبي تبينه ؟
سمعتها تحمد الله :- الحمد على سلامتك يا بنيتي ...ايه عطيني اكلمه ؟؟
عطيت خالد موبايله :- خالتي ام عبد الملك تبيك
اخذه مني وقال والابتسامه شاقه حلقه :- حيا الله الصوت وراعيته ....امري يا بعد خالد وروحه
ام عبد الملك :-.......................
ضحك خالد بقوه :- والله ان هالكلام من قلبي
ام عبد الملك :-.........................
خالد تغيرت ملامحه للعبوس :- اقول لك بس على شرط ؟؟ موافقه ولا لا ؟
ام عبد الملك :- .................................
خالد :- كل اللي اعرفه من نجود ان ساره تعمدت تحرق عليا
الظاهر ان ام عبد الملك قاطعته :-...............................
خالد :- والله ما صار لي وقت اسألها بس اللي اعرفه ان عليا مستحيل تكون غلطت عليها
وترى يمه هذي مو اول مره تهين حرمتي وانا اقسمت بالله اني ما بعديها لها
ام عبد الملك :-............................
خالد :- كذبت على حرمتي تقول لها اني خطبتها قبل وانها ردتني وما اعرف بعد وش حصل باضبط والظاهر ان رد عليا ما عجبها فمدت يدها على عليا قدام الكل ....انا يا يمه تنهان مرتي قدام الناس ومحد يدافع عنها ترضين يمه (طالعني وكمل ) قلب خالد ينداس وما يرد له اعتباره
والله يمه لو هي مره ما سامحتها كيف وهي ثنتها
ام عبد الملك :- ...........................
جالد :- اول شي ما ابي اشوفها في البيت ومثل ما اهانتها قدام الكل تنطرد قدام الكل
ام عبد الملك :-...........................
خالد :- استني مو اللحين كلها خمس دقايق ونكون عندكم يلا في امان الله
سكر خالد والتفت لي :- عليا ليه ساره سوت كذا؟؟ واللحين اب الرد
بلعت ريقي احترت اقول اللي صار بالضبط ولا ....وما كان في وقت للتفكير خاصه تحت الحاح
خالد فقلت باختصار :- البنت ذبحتني من تشوفني قعدت تتغزل فيك وترمي علي كلام يمين وشمال وتصرح اكثر مما تلمح اني اخذتك منها وهي اللي لها الحق فيك وانك تحبها وما اخذتني الا لانها رفضتك من قبل وانت خطبتني عقابا لها (حسيت بسخونه على خدي دمعت عيوني من غير ما احس ) تقول انك تحبها ومستحيل تفكر في غيرها تقول انك وان كنت بعيد عنها بالجسد لكن قلبك وروحك وياها
ابتسم بسخريه :- بس هذا ما يخليها تحرقك وهالكلام ان كان بيغيظ حد فالمفروض انه يغيظك
ما استحملت انه يبتسم واكيد في داخله يضحك علي وسعيد ان حبيبته تبادله نفس الشعور ولولا غروره كان اكيد تراجع عن نواياه تجاهها :- اي مو لان كلامها يقهر اول مره قلت لها انها كذابه وان من المستحيل وحده تحب واحد هالكثر ترفضه وتجي يوم ملكته توصي زوجته عليه ....يعني وبكل بساطه ان اللي تحبه ما يحبها وهي اللي راميه نفسها عليه ....علشان جذي مدت يدها علي
حسيت ان شي في نظرته تغير ما ادري كأنه استرجع شي في ذاكرته او قاطعني وقال
:- في يوم الملكه ؟؟علشان كذا ما قلتي عن .....(كأنه توه تذكر وجود نجود فكمل ) والمره الثانيه ؟؟
صديت عنه وطالعت الشارع من الدريشه :- ما تحملت وقاحتها وقلت ادبها فصفعتها وقلت لها انها لو تكلمت مره ثانيه عن زوجي اني راح اجرها من شعرها وأطردها من بيت ابوي وبيت عمي اللي هو بيت زوجي وقدامك ....فكان ردها انها حرقتني
ضحك خالد بقوه :- ههههههههههههههههههههههه(بصعوبه تماسك ) طيب شوفي انا اقول لك نفذي كلامك يا بنت يوسف تراها عادتها وبيت زوجك بيتك (ضحك مره ثانيه ) بس من غير شد شعور ترى البنت ماهي محرمه لي
هــــــــــــــــــــــاجـــــــــــــــر
انصدمت يوم جاني سالم حامل صينيه القهوه اللي جابها من المجلس وهو يقول لي
:- يلا يا عروس وديها المطبخ
اخذت منه الصينيه وانا لاويه فمي :- بلا عروس بلا بطيخ ....انا لحين ما وافقت
من الهبل اللي فيني كنت احسبه يتكملم عن رائد نسيب لولوه لكن سالم صعقني برده
:- خلاص ما عاد لرايش لزمه حمود من الغيره ققفل عليش وابشرش ترى الملكه يوم الخميس الجاي
عقلي رافض انه يستوعب او يفهم سالم :- سويلم بلا مصاخه ترى ما احيب المزاح في هالامور
ضحك سالم :- كيفش لا تصدقين اللحين ابوي يجي ويعطيش العلوم
حسيت من جملته ان السالفه صدق لكن شلون والمكالمه و......سألت سالم
:- ترى ما لي مزاج اصلا شلون يحددون موعد الملكه وانا ما وافقت الا رايي المبدئ كان الرفض
سالم ما كان يعرف اني رفضت حمد طالعني بحده :- وليش ان شاء الله رفضتينه هااااااااااااا؟
خفت يعصب ويشدني من شعري وساعتها ما اطول منه حق ولا باطل واكيد ما بيسمعني
:- انا ما قلت اني رفضته انا قلت رايي المبدئ يعني حتى بعدني ما فكرت
ابتسم سالم :- خالاص ريحناش من التفكير والملكه قرييييب
قلت وانا ابي اعرف شلون صارت هالسالفه :- انا ابي اعرف شلون ابوي وافق على تحديد الملكه مكن دون ما ارد عليه خبر
وقالي سالم كل اللي صار ساعتها حسيت ان الضغط والحراه ارتفعت عندي وان اباليس العلم كلها محاوطتني ركبت غرفتي وقررت اتصل عليه اليوم ما بنام قبل ما اعرف ليش سوى هالحركه النذله فيني لازم اعرفها حدوده ولازم خلاص ما عاد فيني صبر وتوني بدق عليه الا امي تناديني حاولت اتماسك واهدي من اعصابي نزلت وشفت امي وجنبها ابوي في الصاله
اشر ابوي اجي اقعد جنبه
:- تعالي ابغيش في سالفه
اعرفها اكيد يتقول لي عن سوايا حمد قربت من ابوي وانا ادعي انه رافض لتصرفات حمد لكنه صدمن لمن قال :- تدرين يا هاجر ان حمد ولد خالتش رجال ما ينعاب وا ينرد وانا من قبل كلمتش عنه وانتين ما اعترضتين عليه ....وتذكرين انش قلتين انش ن تبينه لانه ما جا خطبش من نفسه ؟؟
ما رديت انتظر اخرت كلامه فهزيت راسي اشارة موافقه على كلامه فتابع
:- واليوم حمد كان عندي في المجلس وخطارنا اللي كنت انتضرهم طلعوا خطاطيب
قاطعته امي :- خطاطيب !!! وحمد ولد اختي ؟؟
ابتسم ابوي لها :- ايه خطاطيب لهاجر...و ولد اختش حتى ما نطرني يسمع ردي وعلى طول نط قدام الجماعه وقال لهم ((البنت مخطوبه لي وملكتها يوم الخميس الجاي ......وتراك انت وجماعتك معزومين ))....يعني ولد اختش ضمن بتش لانه قدام الرجال قال انه خطبها وحدد بعد الملكه (والتفت لي ) الصراحه انا في الاول زعلت منه لاني ما رديت عليه وعتبت عليه لاني في كل الحالات ما برضى بخطبه على خطبه .....لكن سمعيني يا هاجر زين انا خلاص ما في يدي ان ارده عقب ما ربطني بكلمه قدام الرجال ..وترى يا بنتي انتين رفضتينه من قبل لانه ما جا خطبش من نفسه ...وانا اقول لو انه ما يبيش كان ما سوى اللي سواه ...ترى ما في رجال يربط نفسه هالربطه مع وحده ما يبيها
نزلت راسي وقلت باستسلام :- اللي يريحك يبا سوه وانا راضيه فيه
لكن طبعا حمد مستحيل اخليه لازم ابرد حرتي فيه والليله قبل اي شي انسحبت بهدوء ورحت غرفتي واتصلت عليه واول ما رد وقبل ما يقول اي كلمه هجمت عليه
:- انت مخلوق من ويش ما تحس ما عندك مشاعر اقول لك ما ابيك اقابل الموت ولا اقابلك
تقوم بكل بساطه تجي تقول قدام العلا والملا اني مخطوبه لك والملكه يوم الخميس
على عكس صراخي رد بكل بروده العلم :- الا كلي احساس ومشاعر وعلشان جذي اشفقت على الولد المسكين اللي كان بيرتبط فيش فضحيت وتنازلت وقدمت خدمه للبشريه باني اتزوجش
زاد هيجاني لا خلاص استخفيت رسمي :- ليش وش شايفني علشان اشفقت عليه ليكون على بالك انك تنطاق ولا تتعاشر ترى احمد ربك انك وان بالغلط قدرت تلاقي وحده مثلي
نفس البرود ولا كأن كلامي حرك منه شعره وحده :- شايفنش علة حقيقتش وحده نعومة شعرها ونحافة خصرها وبياض وجمال بشرتها الناعمه الملسه وخضار عيونها الصافيه
ما قدرت تغطي على قلت ادبها وطول لسانها وتسرعها
اكره هالاسلوب اسلوب الهجاء بهيئه مدح لكن مثل كل انثى مدحه لشكلي كان له مفعول المهدئ على اعصابي :- لااااااااااااا والله انا قليله ادب وطويله لسان واللي قلته اللحين مو قلت ادب وطوالت لسان ..وثانيا وش عليك انت اذا كنت طويله لسان او لا
تغيرت نبرة صوته احسه يبتسم :- اللي قلته اللحين تقرير واقع انتي سألتيني شلون شايفنش فرديت علش ....وثانيا انتي خلااااااااااص في حكم زوجتي يعني لي كل الحق وبشكل حصري بعد في اني اتغزل في معانيش بكيفي شلون اوصفش ...وبالنسبه لطول اللسان وقلت الادب فهذي راح تكون مهمتي وياش الا وهي تأديبش
رديت بتسرع :- وانت متخيل اني ممكن اعيش وياك ....لا يا حبيبي ده بعدك ...اصلا انت من تتكلم يرتفع ضغطي وتنفقع مرارتي وينلغي العقل عندي واهستر
ضحك هالمره :- حلو منش انش تعترفين اني حبيبش هذا اولا وثانيا لا تتحديني ترى اخليش تجربين العيشه معاي من يوم الخميس يعني هي ملكه وعرس مره وحده واظنش جربتين تتحديني قبل ....وثالثا شكرا يا عمري ما دريت ان لي هالتأثير الكبير عليش
قهرني كل ما اقلو له كلمه قلبها علي :- لا تصدق روحك ترى كلمة حبيبي كلمه وتنقال يعني بلا معنى ....وترى هالتأثير من كثر الكره لا غير
رد ببرود :- كلمه حبيبي لغيرى وان كانت بلا معنى ما تنقال مفهوم ؟؟
واذا انتين مو مصدقه يوم الخميس بتصدقين ...وادري يا عمري انش خجلانه تقولين لي احبك فتعبرين عن مشاعرش بشكل عكسي
اخر جمله حسيتها ضربتني في الصميم احسها فعلا وصف دقيق لمشاعري لكن مو بس الخجل بروحه الا الا معاه احساسي بانه ما يحبني والضروف وغروره كرجل وكبريائه ههم اللي خلوه يرتبط فيني وهذا هو دافعي لتصرف بهالشكل ....لكني ما استسلمت وقالت في محاوله مني لرفع ضغطه
:- لا مو مفهوم ....ترى بعدك ما صرت زوجي علشان تأمر وتنهي على كيفك...واستنتاجاتك كلها غلط وكل السالفه ان عمري ما اهتميت او حتى فكرت التفت لك والظروف هي اللي حكمت باني انتبه لوجودك ومن مواقفك السخيفه كرهتك
غريبه وين ردوده السريعه والجاهزه حسيت ان قلبي عورني لمن ساد الهدوء من بينا الى ان جاني رده اللي انعشني اكثر من ما اغضبني
:- مو مشكله يوم الخميس اجيب لك قائمه الاوامر والنواهي .... وبطوف هالمره كذبتش والايام بينا وراح اثبت لش انتي وش كثر تحبيني ....وعلى فكره الاوامر تقول تأدبي لكن خلش خبله
ترى جمالش وخبالش هم اللي خلوني انجن وامشي ورى قلبي علشان اخطبش
ما ادري ليش بلمت وقلت بكل عفويه :- هاااااااااااااااااااا ؟؟
ضحك وقال بصوت حنون :- هاجر ...تصبحين على خير وهالمره طلب مو امر احلمي فيني
ما عرفت ارد عليه فقفلت في وجهه
ادري انكم بتعتبون علي ان ما جبت سيرت وداد وتركي وماجد
ولا احرزنا تقدم في سالفه عزيز وندى
ولا عرفتون وش بيصير على ساره
بس ان شاء الله البارت الجاي
بيحتوى على كل هالاشياء واكثر
اعذب وارق التحايا
وفي امان الله
ميما
|
23-02-09, 11:33 AM
جديد مواضيع قسم القصص المكتمله من وحي قلم الاعضاء
العرض العادي
