كاتب الموضوع :
معاميريا
المنتدى :
القصص المكتمله من وحي قلم الاعضاء
((الجزء الخامس عشر))
(تحديات)
لمن تؤمن بفكره معينه ساعتها تقاتل وتتحدى الكل علشان تحقيقها .... وأكيد راح تلاقي اللي يساندك علشان توصل لخط النهايه ....بس لمن تكون الفكره مجنونه او مضره او حتى جبانه
فأكيد بتتزايد العقبات قدامك وساعتها فعلا بتحتاج لانك تتحدى الكل.....
بس الشي اللي فعلا استغرب له هو ليش في بعض المواقف ما تظهر روح التحدي الا علشان نحطم انفسنا ؟!!!!!!!!
بعض ابطالنا راح يتحدون علشان يتخلصون من الالم اللي يعصر قلبهم ....لكن هل سينجحون ؟
واساسا هل كلهم اذا فازوا بالتحدي فعلا بيرتاحون ؟
طـــــــــــــــــــلال
ما صدقت اني اخلص مشاويري بهالسرعه و لحقت ارجع البيت قبل اذان الظهر تحممت ولبست استعدادا لصلاه الظهر نزلت الصاله لقيت وداد توها داخله من الباب سألتها
:- ها وش الاخبار قلتي للعنود ؟؟وش ردت عليك ؟؟
اشرت على وحده وراها وقالت :- هذي هي عندك اسألها بنفسك
ورقت لغرفتها وتركتني مع العنود في الصاله لحالنا قربت من العنود اللي تراجعت للخلف ما حبيت اخوفها فقلت لها
:- العنود انا كنت ابي ......
قاطعتني بانها قالت بصوت هامس
:- ممكن تبعد شوي ؟
انتبهت اني ساد عليها الطريق لفوق ابتسمت
:- اول توافقين على طلبي (ومن غير ما استنى ردها ) العنود وش رايك نخليها ملكه و زواج مره وحده؟
رفعت راسها بحده وقالت بصوت مهزوز من الانفعال:- مستحييييل
وتفادتني ورقت لفوق بسرعه صحيح ان خالد قال لي ان العنود مستحيل توافق بس بعد صدمني ردها ...يعني توقعتها تفكر شوي او حتى ترد علي عن طريق وداد ...بس بعد ضحكني رد فعلها رغم انها ما قالت غير كلمه لكني حسيتها تختزن بداخلها الاف المشاعر... توتر وانفعال وخجل ....( خساره لو بس وقفت شوي كنت اكيد باقنعها )...طلعت من البيت لقيت سياره تركي برى (اوه يعني العنود ما بتجلس عندنا ) قربت منه سلمت عليه ولفت نظري انه متضايق حيل
:- لا تقول ان الحريم اتعبنك في السوق
حاول يبتسم:- ابدا وتراهم ما خلصوا مشاويرهم
اتكيت على دريشه السياره وقلت له :- ولا يهمك انت ارتاح وبكره انا بوديهم
ضحك :- ريح حالك لا انا ولاانت سلطان بيتكفل فيهم
بوزت :- يعني اللحين فضى سليطين
قربوا خوات تركي من السياره فقال :- زين اخليك علشان الحق ارجعهم البيت واصلي واروح لاشغالي
كنت بابعد بس حبيت اشوفها فطولت السالفه مع تركي:- طيب بس الليله اكيد بتجينا ؟
خساره نجود هي اللي جلست قدام وما سمعت من كلام تركي غير نهايته
:- .............عازم الربع وبسهر معاهم
خلاص مالي نفس اطول كلام بس علشان ما يحس تركي قلت
:- رتب مع ربعك على عشا متأخر ...وتعال هنا اول (غمزت ) ولا تفوت عليك منظر ماجد الليله
ضم تركي حواجبه مستغرب :- ليه وش فيه ماجد؟
ابتسمت :- ابد غار مني ويبي يتملك بسرعه ..والليله بيجونا يحددون موعد الملكه
جمدت ملامح تركي وراح اللون من وجهه وكأنه صعق بهالخبر وفتح فمه بيقول شي لكنه تراجع استغربت حاله وقبل ما اسأله وش بك قال بصوت مبحوح
:- ما اظن بس بحاول ...يلا في امان الله
رفعت ظهري وسلمت عليه توجهت لسيارتي وانا بالي مشغول فيه يا ترى وش فيه تركي معقوله شكوك خالد صحيحه وان بين تركي وماجد شي ؟....يعني المفروض انه يفرح لصديق عمره بدل ما يعبس كذا ...ركبت السياره واتجهت للمسجد وانا فكري وبالي مشغول بشي واحد
العنوووووووود واللي بسويه ( رفضتي نعرس اللحين وهذي نقطه لك ...لكن بنشوف وش بتسوين يوم الملكه ) انعشتني الفكره وخلتني طول اليوم في حاله من الروقااااااااااااااان
خــــــــــــــــالــــــــــــــــد
ما ادري كيف قدرت اخلص الاجتماع مع بو نادر وانهيت كل شغلي معاه ...احس راسي بينفجر خلاص رديت الفندق واخذت لي شاور وحبتين بندول نايت وحاولت انام لكن القلق والتوتر كان اقوى من الحبوب علشان كذا طول على ما اخذ مفعوله .....اخ للحين يتردد كلامها في راسي ما توقعت ان نهايه حوارنا تكون كذا ....اول ما تكلمت حسيت بتعاطف معاها ولمن بكت حسيت بالندم حسيت باني جرحتها واهنتها حسيت اني كسرتها إلا حرقتها بشكوكي ...لكن تماسكها في البدايه خلاني احسبها قويه بس لمن انهارت عرفت شكثر هي ضعيفه وهشه... شعورغريب دفعني لاني اضمها مو علشان تهدأ لا ....ضميتها علشان تتطمن وعلشان ما تذوبها حراره الدمع علشان تحس بالدفى علشان تحس بنار الندم اللي تكويني علشان تعرف انها لي وبسسسسسسسسسسسس.....لدرجة اني اعتذرت ...ايه اعتذرت يمكن ما يكون اعتذار صريح بس انا كنت اعتذر كنت اقول لها من ورى كلامي اني ما شكيت وما اهنت الا كدفاع عن كرامه تنزف نيران حولت قلبي الى رماااااد ..... الكرامه اللي جرحها ما التئم حتى عقب اللي قالته
كرامتي وغروري كرجل اللي هدتها لمن قالت انها مغصوبه علي يعني رافضتني وهالمره غرست خنجرها للاخير حتى وصل للعمق وحركته بقوه في الجرح وهي تقول بكل بساطه
:- خالد احنا ماننفع نكون مع بعض .......خالد طلقني ........
وش تبي من المطعون غير انه يصرخ ويأن فقلت وانا احاول اني اكون هادئ
:- نعم!!!وش قلتي
وعادتها مره ثانيه وهالمره حسيتها طعنه في الروح :-طلقني ...حنا مستحيل نقدر نعيش مع بعض
خلاص ما عندي قدره على الاحتمال الصبر نفذ هذا اذا واحد يقدر يصبر على الالم وهو ينازع الموت ليش احس بالموت ما ادري كل اللي عرفته انه الم لا يطاق في راسي وصدري ما قدرت اصرخ لكن الغضب والاصرار واضح في صوتي المنخفض
:- طلاق مافي يا بنت عمي
استفزتها لهجتي وعدم انصياعي لرغبتها فطعنتني مره ثانيه
:- بس انا ما ابيك ...يعني بتعيش مع وحده ما تطيقك تكرهك ؟؟
اعماني كلامها عن اني اتكلم بمنطقيه وخلاص اصلا ما عاد للمنطق مكان
:- مو مهم انتي وش تبين او ش تحسين المهم اني طلاق ماني بمطلق
ما تراجعت ولمع في عيونها تحدي اكبر
:- ليش هو غصب ...ولعلمك اذا ما بتطلق من نفسك بتطلق غصب عنك ...بقول لابوي و.....
عندها قدره جباره على تعذيبي وهالمره صرخت ومن غير احساس
:-اللي ما طولينه بايدك واصليه برجلك ....والطلاق لا تحلمين فيه ولعلمك زواجنا عقب شهرين (صديت بطلع قبل ما ارتكب فعل اندم عليه وقلت وانا صاد عنها )وصدقيني كل غلطه او حركه مستفزه بتقصر المده
.....يمكن اكون قسيت عليها ويمكن اكون اخترت الاسلوب الاسوء ويمكن اكون ارتكبت غلط
في ردة فعلي وتعاملي مع الموضوع يمكن ما كنت منطقي او موضوعي .....لكن من متى يفكر الشخص في الاسلوب الافضل لانقاذ روحه من الهلاك
ليش اعتبرها روحي لا لا ....انا جالس ابالغ كل السالفه انها جرحت كبريائي وغروري واثارت روح التحدي في داخلي ....ثانيا هو الزواج لعبه علشان الطلاق يجي بهالسهوله ..هذي خلاص صارت حرمتي يعني لي لي انا وبسسسسسسسسسسس..... صحيح ان الزواج مو غصب ولا تعايش بالجبر مع الطرف الثاني ....بس انا اعرف انها مستحيل تكون لغيري مهما يكون اللي بيعترض طريقي......ريحتني هالفكره او الحبوب اخذ مفعوله ما ادري لاني عقب كذا نمت ولا حسيت بشي حولي........
صحيت من النوم على صوت جوالي تنبهت للوقت فتحت عيني على الاخر
:- معقوله نمت تقريبا يوم كامل
حسيت ان جسمي متكسر وما فيني قوه تجاهلت المتصل ورحت على طول علشان اتحمم وصليت كل الصلوات اللي فاتتني استغفر الله اول مره اسويها خلصت من الصلاه فتحت جوالي اللي كان مليان مكالمات لم يرد عليها من تركي وطلال و.....رفعت حاجب عليا
توني بدق عليها بشوف سبب اتصالاتها لكن منعت نفسي هي اللي تبيني وانتبهت للمسجات وحده من طلال
((وينك اتصل ما ترد ....المهم العنود ما واففقت على فكرتي ..وانا ناوي ....ولا اقول تعال بسرعه وانا اقول لك ))
ابتسمت هالمجنون متى بيركد اخاف اذا زوجناه يجن زياده
فتحت المسج اللي بعده وكان من تركي
((ضــــــــــــــايق مررررررره ...احس اني بختنق يا خوي ....خالد تعال تكفى تراني احس بيومي قرب))
الهواجس لعبت في دماغي وابليس يوسوس في صدري وش فيه تركي؟؟ اتصلت عليه لكن جواله مغلق اتصلت على البيت ردت العنود
:- نعم ؟
وحشوني وبالذات العنود من سافرت وانا اسمها اسمعه من طلال يوميا وهذا اللي خلاني اشتاق لها اكثر
:-السلام عليكم ...هلا بالعروس
واضح انها استحت لان نبرتها انخفضت وصارت اقرب للهمس
:- وعليكم السلام ...اخبارك واخبار عليا
زفرت كل الحراره اللي بصدري :- تمام (وعلشان ما تسأل عنها اكثر قلت ) وينه تركي
العنود :- في الشركه على حسب علمي ليش ؟؟؟
ما حبيت اقلقها :- ابدا بغيته في شغل وجواله مغلق ....خلاص راح ادق عليه في الشركه
سكرت من العنود ودقيت على مكتبه لكن ما في اي رد
رميت الجوال وقمت اجهز شنطتي خلااااص الليله برد السعوديه سكرت الشنطه الا جوالي يدق من جديد لقيت المتصل عليا كنت بتجاهلها عقاب للي سوته بس ما قدرت رديت عليها ببرود
:- نعم ؟
ما تكلمت مره ثانيه قلت :- نعم ؟داقين خير ان شاء الله ؟
جاني صوتها الهامس :- اليوم زواج جاسم .... ابي اروح الصالون وبعدها الصاله
كنت ابيها تطلب اذني بصراحه فقلت :- ما فهمت وش المطلوب ؟
ما على صوتها لكن نبرتها شابتها شي من الحده :- مهما يكون لا زلت زوجي فقلت اخذ اذنك
ما ادري ليش ابتسمت :-مع من بتروحين ؟
سكتت بعدها قالت :- مع واحد من عيال خالي
سألت :- لحالك مع ولد خالك ؟
تنهدت :- لا مع بنات خالي
يعني مو عاجبك اني اسأل طييييييب يا عليا :- ومتى بتروحون ومتى بتردون ؟
ردت وهي تحاول ما تبين انزعاجها الواضح :-بنروح عقب ساعه الصالون واول ما نخلص بنروح العرس لكن متى نرد هذي على حسب الوقت يمكن وحده يمكن اكثر ويمكن اقل
على طول قلت لها :- لا تروحين
ردت بحده من صدمتها :-نعم ؟!!انت وش..
ما كملت لاني قلت :-لا تروحين مع حد انا باخذك كل مشاويرك
عليا :-بس انا وعدت البنات اكون معاهم و........
قاطعتها بتأنيب :- المفروض ما تواعدين قبل ما تشاوريني ...وترى البنات بتكونين معهم في نفس المشغل وفي قاعه الاعراس بعد ...جهزي حالك اقل من ساعه وانا جاي
سكرت الخط من غير ما استنى ردها اساسا انا تكلمت اكثر من اللازم ..أووووه تذكرت اني لازم ارجع السعوديه باسرع وقت ..بس لو تركي يرد واعرف وش فيه بالضبط ... غير اني من خوفي على تركي نسيت عليا مو معقوله ارد السعوديه واتركها هنا خاصه عقب اللي قالته امس ...لكن بكره باذن الله بكون هناك
هــــــــاجــــــــــر
ما لي مزاج عروس وطقطقه لكن بعد علشان خاطر عليا بس جيت والقهر اني قعدت انطرها اكثر من ساعه في القاعه ....ولمن شرفت حضرتها لفت على خلق الله تسلم عليهم ....وبعدين فكرت تجي عندي سحبت الكرسي اللي جنبي وقالت
:-هلا هجور ...من متى انتي هني ؟؟
رديت ويدي على خدي :- صارلي ساعه ...وحضرتش توش واصله
دزتني بكوعها :- الا المزاج معتفس وش صاير ليكون حمد له دخل في السالفه ؟
طالعتها بنضره بائسه :- افففففففففف راسي يعورني من الصبح وانا افكر شلون اتخلص منه مو عارفه وش اسوي وين ما اطقها عوجه
ابتسمت :- عاد هجور للحين هالفكره البايخه في راسش !!
طالعتها بنص عين :- فكره بايخه هاااااااا عجل تبينه عقب اللي قاله اوافق عليه واخليه يفرح انه مشى كلامه علي !!
مسكت عليا يدي وقالت بجديه :-وعلشان تحدي سخيف تخربين على روحش (كنت بتكلم بس نضرتها منعتني وحطت صبعها على راسي )فكري عدل وش عيبه حمد علشان ترفضينه
(وغمزت )غير ان القلب يعشقه واذا على التحدي اذا تزوجش وعرفش زين اكيد بيندم انه خطبش بهالطريقه وساعتها سوي فيه اللي تبين
حلوه الفكره اتزوجه واعرفه ان الله حق وما يتجرأ ويتحداني بس بعد مؤلم اني اتزوج واحد ما يحبني وماخذ مسأله الزواج تحدي والقهر اني احبببببببببببه وعلشان ما تصر عليا على فكرتها اكثر غيرت الموضوع
:-حلو الاسود عليش (حركت حواجبي )الا ماقلتين وش قال خلودي لمن شافش؟؟
تحولت بسمتها الى عبوس وقالت :- ما قال شي اخذني من البيت للصالون من غير ولا كلمه ورجعت البيت ابدل وهو نطر بره وطلعت له ونفس الحال وكل اللي قاله قبل ما انزل اذا خلصتين دقي علي
غمزت :- على هالكلام الا شكلش ينطق الحجر ....بس الظاهر خايفه من الحسد ولا اللي صار مشفر
ضربتني على كتفي ودزتني :- صدق انش قليله حيا ....وثانيا وين بيتكلم والاخ يزعم زعلان من عقب ما تهاوشنا امس... مو كأنه هو الغلطان وعلى باله انه اذا سوى جذي بتنازل
هذي شتقول وش هالالغاز :- اي هواش وانتوا توكم مالكين ... وش هذا اللي ما بتتنازلين عنه؟؟
اعرفها عليا ما كانت تبي ترد وعلشان تسكتني قالت :- مو وقته بعدين اقول لش
وطبعا ما عرفت شي لاننا رجعنا البيت قبل وانصدمت يوم ثاني لمن عرفت انها رجعت السعوديه..... بس الحلو انها جتني من السما الطريقه اللي ارد فيها على حمد وغصب عن خشمه بعد .....
علـــــــــــــــيــــــــــــاء
اساسا ما كنت ابي ادق عليه بس فكرت اني اهدي الامور شوي يعني مسأله الطلاق اكيد ما بتم وقلب الصقيع معند فخليني اسير الامور على الاقل هني واذا رحنا السعوديه ساعتها بابتدأ الحرب اللي لازم اخوضها واكسبها بعد ..... توقعته يتكلم يقول اي شي وان كان اعتراض على اي شي لكنه ابد طول الطريق ظل ساكت وما سمعت صوته غير لمن رد علي وقال انه بياخذني كل مشاويري .....جاسم من سمع ان العروس جاهزه اصر ان الزفه تكون من وقت ودخل عقبها بربع ساعه بس وما طول وطلع واخذها ....اسرع زواج حضرته يعني بالعاده يخلص العرس على الوحده او الثنتين لكن جاسم ما صارت الساعه 11الا خلاص اخذ عروسه وطلع
وبما ان هجور طلعت عقب ما شافت العروس وباركت لها فما بقى احد اقعد معاه فاضطريت ادق على خالد في الاول كان الخط مشغول وفي المحاوله الثانيه رد
:- نعم ؟
كان واضح ان مزاجه للحين زفت رديت بهدوء :- خلصت ممكن تجيني اللحين
خالد بنفس المزاج :- انا موجود برى...لا تتأخرين
وسكر الخط من غير ما يسمع ردي لاااااا مصخها على باله ان هالحركات ما تغيض يسكر الخط في وجهي ....عاد هالمره ما بسكت له ..... ركبت السياره حتى ما سلمت وهو ولا على باله كان مشغول في موبايله والظاهر ان محد يرد عليه لانه تأفف بحده وقبل ما يضغط على زر الاتصال جاه اتصال رد عليه
:-هلا
الطرف الثاني :-.............................
خالد بايتسامه مصطنعه :-زين بس لا تاكلني ... وانا كلها كم ساعه واكون عندكم
الطرف الثاني :-.......................................
خالد :- ما في داعي اجلس اكثر من كذا ...اشغالي وخلصتها (ميل فمه بحركه ساخره )واخاف اذا طولت غيبتي تبهذل الدنيا
الطرف الثاني :-.........................................
خالد بعتب :-افاااااااااا يا طلال انا ما لي لزمه ؟؟ واذا كذا ليش متصل فيني ؟
طلال :-..............................................
خالد وعلامات الدهشه على وجهه:- جد؟!! متى ؟؟
طلال :-.....................................
خالد :- الله يبارك لهم (سكت شوي بعدين سأل ) الا ياطلال انت اليوم شفت تركي ؟
طلال :-.....................................
خالد :- ما ادري مشغول بالي عليه وكل ما اتصل فيع الاقي جواله مغلق
طلال :-........................................
خالد :-تدري الوضع كذا ما يطمن خاصه انه مرسل لي يقول (طالعني بعدين قال ) نتكلم في ذا الموضوع بعدين ...كلها كم ساعه وتلقاني عندك بالسعوديه يلا في امان الله
سكر الخط التفت لي وقال :- الليله ماجد خطب وداد وحددوا ملكتهم عقب ملكه طلال ....
سكت ما عرفت وش ارد عليه فهزيت راسي باشاره نعم وكاني اقول له اني فاهمه وسامعه
بعدها قال وهو يطالعني بنظره حسيتها تبي تنفذ لروحي لكن البرقع مثل درع حصين تجاهها
:- عندك ساعه بالكثير جهزي اغراضك وبدلي هدومك لاننا بنطلع على السعوديه
استغربت وش يطلعنا في هالوقت :- بس هذا مو وقت سفر خليها لبكره الصبح احسن
رد ولا كأني تكلمت :- هذا حنا وصلنا جهزي حالك وانا بستناك في الصاله
اففففف دخلت البيت وهو وراي وصلت الصاله قلعت عباتي والبرقع ورميتها على الجلسه العربيه اللي في الصاله وانتبهت انه موجود فقلت له
:- ما راح اتأخر بجهز اغراضي وببدل هدومي وبنزل .... تامر على شي قبل ما اروح
ماادري وش اللي خلاه يبتسم لكنه قال :-ممكن اكل شي ترى صار لي يوم كامل ما ضقت الزاد
كسر خاطري فعلا كان واضح عليه التعب والارهاق تقدمت المطبخ قلت اسوي له كم سندويشه
ياكلهم على ما اجهز نفسي وتوني فتحت الثلاجه طلعت العصير والاجبان وغيرها الا هو واقف على راسي ابتسم على جنب وهو يطالعني من فوق لتحت بنضره تقيميه حبست انفاسي حسيت ان نضراته وهي تنتقل على مهل من شعري لوجهي لصدري لخصري لرجلي وترجع مره ثانيه بنفس النضره ....تحرق الدم وتهيجه بجنون لدرجه ان كل دمي حسيته اندفع لراسي واشعل خدودي وخدرتني نضرته لمن استقرت على عيوني ما كان يطالع عيوني لا ....كان يفتش في قلبي وهمس بصوت هيج جيوش الدم وخلى قلبي يدق بقوه لدرجه اني خفت انه يسمعه
:- تعرفين انك هزمتيني وسحرك تملكني (مسح على شعري بيده اليسار ورفع يدي اليمين لفمه وباس يدي لامست انفاسه الحاره جلدي وارسلت الرجفه لكياني حس بالرعشه تسري في جسمي وضمني لصدره ) وتعرفين ان سحرك اشعل الحيره والمراره في صدري
ما حبيت اضعف او انهي الامور بهالطريقه ويمكن بدايه كلامه ونضرته هى اللي سحرتني لكن اللي ردني لارض الواقع كلاماته حتى وهو يبي يقول ان لي تأثير عليه جاي يقول اني ما سببت له غير الالم والعذاب والمراره ايه مو انا الشوكه اللي انغرست في خاصرته ومنعته من تحقيق اعز امانيه انه يرتبط بساره بعدت عنه بحركه حاده وقلت
:- والله شفاك بيدك طلقني وبترتاح
حسيت شرارات الغضب طفرت من عيونه تنسف كل اللي يواجهها وقال وهو ضاغط على اسنانه
:- والله يا بنت عمي ان هذي ابعد لك من نجوم السما (وقرب مني وهمس في اذوني )
وما بيفكك مني الا الموت
حسيت ان انفاسي انسلبت مني والدنيا ضاقت بوجهي لمن ذكر الموت لكني اصريت وقلت
:- بس انا روحي ما ترضى بالمهانه والذل ....
ما كملت ابتسم بسخريه والم وقاطعني :- وانا بعد ما ارضى لك المهانه والذل...والطلاق فيه
حط من قدرك يا بنت عمي....لكن اذا تبين ترتاحين (اشر على رقبته ) اذبحيني وفي هذي ما بقول لا
حطيت يدي على فمي عاقل هذا ولا مجنون ما يحبني وروحه متعلقه في غيري ويعترف انه يتألم في كل لحظه لكن بس علشان ما يتراجع في كلمته يفضل الموت على راحته نزلت دمعت الم وحيره وقهر وطلعت وراها انه من الروح
:- انت ليش ما تشوف انه من الجنون استمرارنا مع بعض ....شلون ترضى على نفسك تتزوج وحده غصب عنك وحده ما تبيها وتتمنى غيرها ؟؟
مسح دمعتي اليتيمه ورفع حاجب :- يمكن لاني مجنون ...ويمكن لاني عاقل ...ويمكن لاني مغامر ابي اشوف سحر دمعتك وبسمتك وحنانك وقسوتك وش ممكن يسوي (ابتسم )ويمكن تكونين فاهمه غلط وتشوفين الامور معكوسه
قعد على الكرسي وقال :- انا بصلح لنفسي السندويشات وانتي روحي شوفي شغلك و........ وسيرت الطلاق تراها لمعلوماتك تقصر المده ....بس هالمره بعديها
ما كنت في وعيي كلماته شغلتني وزادت على حيرتي حيره اقلقتني وزعزت استقراري كنت مصره ومستعجله على الطلاق لكن اللحين صرت اتأرجح بين نارين مرات اتمنى الطلاق بسرعه ومرات اتمنى يكون عندي الوقت اللي اسمع منه هو نفسه تفسيره لكلامه
هالافكار كانت هي المسيطره على طول الوقت وما تركتني الا على عتبات بيتنا وهو يقول لي
:- الحمد لله على السلامه (وناظرني كأنه بيقول شي لكنه تراجع )
وانشغلت بعدها مع طلال اللي كان ينطرني عند الباب
مـــــــــــــــــــــاجـــــــــــــــــــد
يمكن خطبت دلال بس تلبيه لغربة الوالده لكن بعد ما رجع تركي من بريطانيا صرت احس اني لازم امتلكها ومحد غيري يطالها ....هو صحيح ان تركي عمره ما قال انه يحبها او حتى يتمناها لكن في الفتره الاخيره من دراسته صار اذا تكلم عن رجعته وعن عروس المستقبل احسه دائما يوصف وداد اذا تكلم عن فتاه احلامه وهالشي خلاني اتعلق فيها رغم انها بنت خالي وقريبه مني مثل ما هي قريبه منه بس شوقه ولهفته خلتني اشوفها بمنظار مختلف وخلاني اوافق امي على طلبها مباشره وكأنها تنفيذ لرغبه مدفونه في نفسي ..... وحتى اتصالي لتركي ما كان علشان اسمع منه كلمة مبروك لا انما علشان اعرفه اني قدرت اسبقه هالمره وانال الي هو يتمناه لكن رده ما شفى غليلي لانه ما اهتم وبارك لي بكل بساطه
....فتناسيت وانشغلت عن وداد ويمكن فقدت رغبتي في الارتباط فيها لكن لمن رد تركي من بريطانيا رجع لي الحماس خاصه ان كنت اشوف في عيونه الم الخساره اللي ما يوضحها فعله او حتى صوته اذا ذكرت وداد قدامه ....واخرها فكرت اني اوريه ان وداد لي وبس وانها حلم مستحيل يطوله فطلبت من ساره صوره لوداد ورقم جوالها وتعمدت ان تركي يعرف هالشي
...لكن رد فعله كان مخالف لتوقعاتي توقته يتألم يعارضني يناقشني انما يسوي اللي سواه واخرتها يجي البيت ويقول لي
:- شوف يا ماجد انا ما سكت عنك الا لاني ما ابي اسوي فضايح ... لكن ان عدتها مره ثانيه صدقني ما تلوم الا نفسك
تكلمت ببرود :- اي فضايح خطيبتي وطلبت صورتها ورقم جوالها وين المشكله
ساعتها ما تحمل مني تركي ومسكني من ثوبي :-الا فيها حط من قدر بنت خالك واهانه لها ودوس على كرامتها ...واذا كنت تشوفها خطيبتك فهذا يعني انك اكثر واحد لازم يحافظ على سمعتها مو يسوي اللي سويته
رديت بتحدي وانا افك نفسي من يده :- وداد حرمتي واسوي معاها اللي ابيه وانت مالك دخل
هالمره مسك ثوبي ووشدني له وقال وهو يخنقني بتشديده على قبضته على الثوب
:- صدقني اذا تجرأت وعدتها ساعتها تحلم انك تنال ضفرها وسواياك بتوصل لخوالك وساعتها
ما حد بيردني عن ذبحك
ابتسمت بسخريه :- اصحى من حلمك ترى وداد لي مو لك وابشرك الليله انا وابوي بنروح نحدد موعد الملكه وان كنت رجال اوقف في وجهي وامنعني
هزته كلمتي لدرجه انه نفض يده عني بقوه ورماني على الارض وقال بلهجه يشوبها شي من الجنون:- وانا احذرك ابعد عن وداد لانك ما تستاهلها ...
ضحكت :- تحذرني ليه وش بتسوي!!!.... بتفضح بنت عمك وسط الرجال وبتقول اني كنت ابي صورتها ورقم جوالها وساعتها فسر لهم كيف اني تجرأت على بنت خالي وطلبت منها هالطلب
..ولا بتقول انك تحبها وتبيها لنفسك
صرخ تركي :- صحيح انك نذل وخسيس لكن لو على ذبحي ما خليتك تتزوجها
وتركني من غير ما يسمع ردي عليه وراح لسيارته ....يمكن اكون هزمته لكني لا زلت خايف منه لانه رجال عند كلمته عمره ما وعد واخلف غير انه رجال لا يستهان به وخفت انه يسوي شي رغم تأكدي اني بكلامي سديت عليه كل السبل ...علشان كذا كنت طول ما حنا في المجلس عند خالي وانا اناظر الباب اخاف ان تركي يدخل في اي لحظه ويخرب على كل شي
وارتحت انه ما ظهر طول الوقت واول ما طلعنا ملاني شعور مختلف الشعور بالنصر وهذا الشي خلاني اتجرأ واتصل عليه لكن جواله كان مغلق فبعثت له رساله
((بارك لي يا تركي تراك خسرت وفزت انا بالدره ))
وعلى الساعه وحده وصلني تقرير باستلام الرساله وبعدها صوت رساله من تركي يقول فيها
((لاتفرح تراك ما ملكتها ...وخسارتك قربت ))
هذا وش جالس يقول ليكون انجن انا خلاص بملك عقب طلال باسبوع او اثين على الاكثر وهذا جالس يهذي حاولت اتصل فيه كان مشغول وبعد عدة محاولات رد على طول قلت له
:- انت وش اللي تهذي به انجنيت ولا وشو؟؟
رد برود :- انت اللي تهذي ولا في حد يبارك لحد على وهم و حلم مستحيل يتحقق
رديت بعصبيه :- انت اللي تحلم ترى ملكتي عليها بالكثير عقب ثلاثه اسابيع
ضحك :- ثلاثه!!! كثيييييييييييير ترى حلمك ما بيطول اكثر من اسبوع
خلاص فلتت اعصابي وما عدت اتحمل :- يعني وش بتسوي خلااااااااص انا خطبتها وتحددت الملكه افهم يا بني ادم
سألني برود :- وانت ليش تبيها؟؟
سحبت نفس ورديت بغرور:- علشان اكسرك ... علشان تعرف اني مثلك واحسن منك بعد وان مو كل اللي تتمناه تقدر تنوله ... علشان تعرف اني اقدر احصل على اللي انت نفسك ما تقدر تحصل عليه
سكت تركي شوي بعدين قال :- شوف ياماجد انا عمري ما قلت اني احسن من حد ...وياريت نلت كل اللي تمنيته .....لكن وداد مستحيل تكون لواحد مثلك ما يعرف قدرها
وموتي ولا ان وداد تكون لك
ضحكت بهستيريه :-وداد ما بتكون الا لي ...وان كنت جبان ما تبي تعترف انك تتمناها وتحبها الااني اقول لك خلاااااااااااص ما عاد لك حق تقول هالكلام وهالمره بيمنعك كونها ملك لغيرك ملك لي (ضحكت ) وهذا سبب اشرف من جبنك
همس بنبره وعيد :-ما الجبان والخسيس الا انت .... وهذا انا اتحداك ترى ملكتها صحيح عقب ثلاثه اسابيع لكن العريس هو انا مو انت
وسكر بوجهي حاولت ادق عليه مره ثانيه لكن ابد قفل جواله وما عاد فتحه الى ان استسلمت
نــــــــــــــــــــــدى
من بدايه اليوم وانا مو مرتاحه وجا عزيز وكمل علي عقب اللي قاله قدام امه طبعا طلع مع اخوه ولا همه الدمار اللي خلفه في نفسي لكن مستحيل اسكت لك يا عزيز ولا تتوقع انك بهالحركه قدرت تنتصر على او تخضعني لا تراك بالعكس زدتني اصرار وعزم على موقفي واللي سمعته بعد كذا بينه وبين اخوه الدكتور علي قهرني وخلاني مو مستحمله الاثنين عزيز
بتسلطه وانانيته وتجاهله لرغبات الاخرين واحاسيسهم ما دام الامر يرضيه واخوه على المغرور اللي شايف نفسه فوق الكل واحسن من الكل ......كنت في المطبخ مع كريشما
اشرف على تجهيز الغدا توني خلصت وكن ناويه اروح لغرفة الطعام القريبه من المطبخ علشان ارتب السفره الا اسمع صوت عزيز واخوه علي ولاني ما كنت لابسه شي يسترني رجعت المطبخ وقلت لكريشما
:-كريشما هاتي لي جلال علشان اعرف اطلع ترى بابا علي هنا
هزت راسها وقالت :- زين ماما بس اول اودي صحون غرفه اكل
وطلعت وانا جلست اسمع اصواتهم الجايه من غرفة الطعام كان عزيز يقول
:- وانت تبي تفهمني اني غلطان لمن اتمنى طفل ثاني !!
رد عليه علي :- الغلط مو انك تنجب طفل ثاني لكن انا اشوف التوقيت غلط
عزيز بسخريه :- حتى هذي يبي لها توقيت ؟
تأفف علي :- طيب انت كونك رجل مشغول وما تجلس مع عيلتك كثير ما تحس باللي اقوله لكن زوجتك كيف وافقتك ؟؟
عزيز :- زوجتي شورها من شوري وما تطلع من طوعي هذي كل السالفه
علي :- ولو اعتراض الزوجه او انها تتناقش مع زوجها ما يعني انها طلعت من شوره
دخلت خالتي ام عبد العزيز اللي قالت :- علامكم صوتكم واصل لاخر البيت ؟
رد عزيز:- ابد بس علي يبي يقنعني ااجل فكره الانجاب اللحين
ردت خالتي على ولدها علي :- اترك اخوك في حاله ...والتفت لحالك طيعني وانا من بكره اخطب لك بنت عمك .....
قاطعها علي :- الله يهداك يا يمه انا حتى لو ابي اخطب ما باخذ وحده جاهله وغير مثقفه انا ابي وحده دارسه وفاهمه
خالتي :- ومن قال ان بنات عمك مو دارسات !! تراهم اخلاق وزين وعلم مثلهم مثل حرمة اخوك
تدخل عزيز :- اسمع كلام الوالده وصدقني بترتاح
علي بسخريه :- اي ارتاح !! اذا مثل حرمتك انا ما ابيها
تنرفز عزيز :- ليش وش فيها حرمتي ؟؟
علي برود :- وحده وش اقول جاهله فهمها على قدها تفكيرها تفكيرحريم قبل ...اجل في وحده في هالزمن تقبل تنجب على طفل صغير وما تراعي انه يحتاج اهتمام ورعايه وحسن تربيه ...يا اخي اذا جابت عيال على بعض وين تلقى الوقت لكل ذا .... انا تبيني اتزوج وحده تفكيرها ما هداها على الاقل انها لسى طالعه من تجربه حمل وولاده متعبه وانها لازم ترتاح وتستمتع بامومتها على ما تفكر تنجب واحد ثاني ....لا انا اذا بخطب بخطب لي وحده مستواها التعليمي والفكري ارفع وارقى من كذا بكثير
هه يعني الاخ على باله هو الوحيد المتعلم الفاهم والواعي وهو اساسا ما يشوف ابعد من انفه ولا من وين حكم اني جاهله و..........حسبي الله عليك يا عزيز اللي خليت واحد مغرور وشايف حاله مثل اخوك يتكلم على سمعت خالتي تتكلم بس ما فهمت وش تقول لان كريشما جت ومعها جلالي والبرقع لاني اتغطى عن اخوان عزيز لبستهم ودخلت وسلمت عليهم وقبل ما اطلع للصاله نادتني خالت ام عبد العزيز
:- تعالي يا ندى سمعي علي وش يقول (والتفتت لولدها ) عيد اللي كنت تقوله
رفع حاجب وقال :- ما قلت شي غير انك اذا كنتي مصره تخطبين لي انا ما ابي من العيله انا
يا ام علي ودي تخطبين لي زميلتي الدكتوره اسيل ...وش قلتين ؟؟يا هذي يا ما في خطبه
خالتي لوت فمها :- سمعتي يا بنتي عايف بنات عمه علشان وحده تشتغل مع رجال
ابتسمت اساسا افتكوا بنات عمه والله من هي اللي بتتحمل هالكم من الصلافه والغرور
الا وحده زيه ...وهو اللي بيندم والله بنات عمه ما ينعافون جمال واخلاق وعلم مثل ما حضرته يبي قطع افكاري صوته
:- يمه هي صحيح تشتغل مع رجال بس محافظه على نفسها وعلاقتها بزملائها في حدود العمل يعني ما اخطت واذنبت وثانيا لو ما في طبيبات حريم ما كنت انتي نفسك رضيتي تتعالجين
هزت راسها بعدم اقتناع :- انا ما قلت ان بها عيب بس حنا عوايدنا ما تسمح ان الوحده تشتغل في مكان كله رجاجيل تراه عيب ومنقود عندنا ...انت ما تشوف الحريم عندنا اللي تشتغل تلقاها في مدرسه ولا مكان ما به اختلاط ... اسمعني يا وليدي والله ان بنات عمك اصلح لك ...
تدخل عزيز :- انا اقول يمه اخطبي له اللي يبيها واهم شي انها ملتزمه بحجابها ودينها
وهو يشتغل معها واعرف باخلاقها
ايه بالنسبه لك يا عزيز اهم شي طلبات الرجل تجاب سواء كانت صح او خطأ واللحين جاي تفكر بمنطقيه ولمن طلبت انا اني اشتغل رفضت وتحججت بالبيت ومسؤلياته يعني المدرسه تنشغل عن عيالها وبيتها وزوجها والطبيبه تقدر توفق بينهم
ما ردت عليه عمتي وسألت علي :- وطبيبه وشو بعد اطفال ولا نساء؟؟
ابتسم علي :- يعني الحرمه ما تتخصص الا في ههالمجالين ؟.....لا هذي طبيبه عظام
خالتي بدهشه :- عظاااااام !! يعني تكشف على رجال (هزت راسها بعنف )لا لا ما تصلح لك دور لك على غيرها
عبس علي ومسك يد امه وباسها :- على راحتك يا ام علي الشور شورك والراي رايك ...ولو ان قلبي ما يبيها الا هي وغيرها لا ...يعني اذا قلتي ما اتزوجها اقول لك على راسي لكن تقولين لي تزوج غيرها اقولك لك سامحيني ما اقدر قلبي ما يسمح لي
طبعا كلهم يعرفون نقطه ضعف امهم... يتمسكنون ويحسسونها انها كاسره بخاطرهم وانها بتحرمهم من امانيهم و وفرحتهم فعلى طول تخضع لهم وتنفذ رغباتهم
ناظرتني وقالت :- تظنين يا ندى ان العرب ما بتتكلم علينا و........
كسرت خاطري وعلشان اطمنها قلت :- محد راح يتكلم ترى علي رجال كبير وفاهم والرجال الحرمه تنسب له مو هو اللي ينسب للحرمه ...ويا خالتي اذا البنت اصلها طيب وعلى خلق ودين فما اظن يعيبها شي والمهم انه يرتاح لها (وكملت اقصد علي ) وعلي دكتور ما تناسبه الا وحده مثقفه ومتعلمه وفاهمه تناقشه وتحاوره وتكون ند له في الفكر
اظن انه حس اني سمعت الكلام اللي قاله عني وفهم الرساله اللي كنت قاصده اوصلها له لانه رغم غروره ما انكر حدة ذكائه وفعلا ما ضيع فرصه وقال
:- سمعتي يمه هذي حرمة اخوي فهمتني والله انها مثل ما يقول عزيز حرمه عاقل شورها ما يطلع عن شور الرجال
قهرني رده كان يقهر يعني يبي يوصل لي اني ما افهم واني ما قلت كذا الا لاني بكل بساطه تعودت ان ما يكون لي راي واني مثل الماشيه وين ما يأشر لها الراعي راحت وراه طبعا سكت وما رديت لاني اذا رديت بيتطور الموضوع وراح افرغ كل حرتي فيه وفي اخوه اللي قاعد جنبه وعلشان ما انغث اكثر انسحبت بحجة اني بروح اطل على فراس .............
وفي نفسي اتوعد عزيز اني ما بعديها له لكن اول ما وصلنا البيت عقب ما تعشينا عند خالتي انشغلت بوداد اللي دقت علي وهي تصيح تقول ان ماجد الليله بيجي مع ابوه علشان يحددون ملكتها ....في البدايه ما فهمت ليش هي زعلانه كذا وش الامر الغريب في ان ماجد يخطبها
..لكن اول ما حكت لي عن اللي سواه هو و اخته ساره انا نفسي اشتعلت النيران بقلبي ....واللي ضايقني انها صارت تصيح بقوه ما ابيه ما ابيه ....وطبعا كان من الصعوبه اني اهديها خاصه اني بعيده عنها وما اطالها فاول ما سكرت اتصلت على طلال بحكم قربه منا وقلت له يروح يطل على وداد ويطمني عليها وكل اللي قلته انه تصيح بسبب التوتر من مسأله قرب ملكتها
....لكن طلال شغله اكيد شي ثاني لانه ما عاد اتصل فيني وساعتها ما نمت الا لمن وافق عزيز انه بكره يوديني الرياض ..........
الى هنا وانتهى البارت
اعذب وارق التحايا
في امان الله
|
30-01-09, 09:58 PM
جديد مواضيع قسم القصص المكتمله من وحي قلم الاعضاء
العرض العادي
