صباحكم سكر صباحكم عسل صباحكم شهد مكرر
والاحلى صباحكم ان شاء الله دافي ومشرق ويفوح بريحه السعاده
حبيت اقول لك البارت وصل
والبشاااااره تراه طوييييييييييييييل
وان شاء الله ما يكون ممل
وفي انتظاركم
واللحين اخليكم مع البارت
ميما

((الفصل الخامس عشر))
( اماني مجنونه)


وما نيل المطالب بالتمني ......ولكن تأخذ الدنيا غلابا
يمكن كلنا متفقين على هالشي كل امنيه علشان نحققها لازم نسعى اليها
لكن هل كل امنيه تستحق منا العناء ؟؟؟.....واذا كانت هل تحقيقها راح يرضينا ؟؟؟
طبعا اذا توقفنا مع انفسنا واجهناها بهالسؤال.. هل فعلا حنا نبي هالشي؟؟ ...اكيد بتكون الاجابه فرحه لتحقيق الامنيه ....لكن لمن تكون هالامنيه امنيه مجنونه نتخيل ان تحقيقها هو الحل فساعتها اشك ان النتايج تكون مرضيه .....على العموم معظم ابطالنا يسعون وراء امنيه من هالنوع ...هل بينجحون في تحقيقها اولا ؟؟؟
وأذا تحققت هل بيرتاحون ؟؟


تـــــــــــــــــركـــــــــــــــــــي


لا زالت اعصابي فالته صحيح اني ارتحت لمن عرفت انها رافضه عرض ماجد بس بعد انا للحين ما شفيت غليلي فيه ....كسرت خاطري وهي تبكي لكني ما بينت هالشي ... من طلعنا من بيت عمي وانا في فكره تلعب براسي واناوي انفذها بس كل شي يعتمد عليها وحنا في الشارع كلمت العنود
:- هدأت بنت عمك ولا للحين ؟؟
ردت العنود :- هي اللحين احسن ...بس ما قلت لنا وين بنروح ؟؟
ناظرتها من المرايه الاماميه كانت تمسح دوعها من تحت البرقع :- اول بنتكلم وساعتها بقول لكم وين؟؟؟
ردت وداد بحده :- وانا ما بيني وبينك كلام رجعني البيت
حطيت يدي على راسي وقلت :- على راسي بس عقب ما نخلص مشاويرنا
همست شي في اذن العنود اللي قالت :- تركي وداد تعبانه وتبي ترتاح فعلشان خاطري اجل مشاويرك لوقت ثاني وخلي الكلام لبعدين
وقفت السياره عند احد المطاعم وقلت :-نزلوا
طبعا ما تحركوا من مكانهم فقلت اوضح نقطه مهمه للكل :- هو احد الامرين اما تجلسون وتسمعون وبعدها نقرر نكمل مشاويرنا او لا ....او نرجع لكن ساعتها بتكلم مع عمي وطلال
وما اظن ان في حد ساعتها يقدر يلومني
طبعا كلماتي جابت نتيجتها كنت متوقع انها رغم رفضها لعرض ماجد الا انها ما تبي احد يعرف عنه فنزلت مع العنود ....اخترت وحده من الكباين وطلبت لهم شاي اخضر علشان يهدأون وانا طلبت تركش كوفي علشان توقف راسي
العنود :- طيب وش الكلام المهم اللي بتقوله ؟؟
رديت وانا افكر في الخطوات اللي ناوي عليها :-بس يجي الطلب بنتكلم ما احب كل شوي احد يقاطعني
وفعلا عقب ما وصل طلبنا قلت عقب اول رشفه :- العنود وماني بحاجه لموافقتها على اي شي لكن يا بنت عمي وان كنت اليوم مسؤل عنك في هالمشوار الا اني بحاجه اسمع ردك

ما ردت على في الاول لكنها عقب شوي قالت وبهدوء :- ليش انت وش ناوي عليه ؟؟
تنهدت وسندت نفسي على الكرسي اللي مقابلهم ثنتيناتهم :- كل شي يعتمد عليك كل شي
ورجعت ارشف من قهوتي وقلت والفنجان في يدي :- ما بقول وش اللي خلى ماجد يتجرأ ويطلب طلب زي كذا....ولا بقول انه تجاوز حدوده ويستحق انه يتعاقب ....لـــ

ما كملت لان وداد قاطعتني :- وش قصدك باللي خلاه يتجرأ ؟.....ليكون انت بعد مثله تفكرني سهله ورخيصه ...او لاني مخطوبه له خلاص صار من السهل وبهالحجه التعدي على كرامتي
وطلب اشياء مهينه .... او انه لمن اهاني اعطاك الحق في اهانتي ؟؟؟

ما توقعت ثورتها فقلت اقاطعها :- يعني ما سمعت شي من هالكلام توجه له او لاخته (رفعت يدي علشان ما تقاطعني مره ثانيه ) وبالمناسبه ما قلتي انتي وش ناويه تسوين عقب ما ....وباستخدم كلماتك تعدى على كرامتك وطلب اشياء مهينه ؟؟؟

ردت وليتها ما رت كنت متوقع عقب هالثوره تقول قلعته وما ابيه واذا هذا اولها ينعاف تاليها او في اسوء الاحوال ما لك دخل لكنها قالت :- مو هو يبي ردي ؟؟؟وراح يوصله ردي عن طريق اخته ....و

قهرتني ما ناقص الا تدور له الاعذار... وين راح لسانها اللاذع اللي ما رحمني رغم اني ما اخطيت وما تقبلت عذري ... ايه مو هذا ماجد خطيبها ويمكن بعد حبيبها مو تركي المغرور
الـ..... اكيد تلاقيها بتوجه له عتب خفيف ويمكن تزعل منه بس لانه خبرني وطبعا الكل يعرف ولا تركي .....على طول قطعتها وقلت بكل ثقه
:- شوفوا انتي وهي ... اذا ماجد غلط وطلب شي ما يجوزه لا الدين ولا المجتمع فساره بعد غلطت ...والله في وحده متزنه و....(هزيت راسي ما ابي اغلط عليها ) تساند اخوها في سالفه زي ذي وبكل اريحيه تلعب دور الوسيط ....هذا بدل ما تلومه وتوجهه ...ومثل ما هو غلطان وبياخذ جزاه هي بعد غلطانه .

العنود اللي كانت تسمع لنا قالت :- تركي ...انا ابي اعرف انت وش ناوي عليه بالضبط ....وعذرا بس اذا كان ماجد وساره غلطوا انا وش دخلي بالموضوع

حطيت يدي على الطاوله وسندت راسي :- دخلك انها صديقتك مثل ما هي صديقة بنت عمك
وانتوا الثنتين بتسوون مثل ما اقول لكم ...اول شي ارقامكم هذي بتتغير وما راح توصل لساره
وثا.....
قاطعتني وداد :- ومن قال اني بغير رقمي ؟
قرصت بعيني ورديت بحده :- انا...انتي مستوعبه وش اللي ممكن يصير لو ما استأذنتك ساره
وفاهمه وش معنى انها تستأذنك ؟؟
تراجعت وسندت ظهرها على كرسيها وقالت :- ولو .... انت ما لك حق علي

نرفزتني طلعت الجوال وقلت :- طيب يا بنت عمي..انا مالي حق ...اختاري من الاحق علشان يتصرف طلال ولا عمي يوسف

حطيت الجوال على الطاوله وكتفت يديني انتظرها ترد وابتسمت لمن قالت
:- وعلى فرض غيرته ...وش بقول للبيت ليش غيرته وساعتها أكيد الكل بيعرف باللي صار

ابتسمت ابتسامة انتصار وقلت :-قولي ان جوالك تكسر ولا طاح في الماي والبطاقه احترقت
علشان كذا طلعنا هالمشوار تشترين لك جوال(اشرت على العنود )وانها طلبت مني استخرج لك بطاقه ولها بعد ..

تدخلت العنود :- طيب بطاقه لها ويمكن يصدقون لكن انا؟؟ليش
ابتسمت واناارفع الجوال واتصل على واحد من الربع يشتغل في الاتصالات :- لانها ارقام مميزه (رد على سعود فقلت له ) سلام هلا بمطول الغيبات
رد علي بضحكه :- وعليكم السلام أنا مطول الغيبات ولاانت القاطع
ضحكت :- وش اسوي والله كل ما يكون عندي وقت واروح عندكم الديوانيه اسأل عنك يقولون مسافر
سعود :- ايه اضحك علي وقول ان هالمكالمه لله ما وراها شي
ضحكت:- افااااااااااا يا سعود اللحين انا ما ادق عليك الا لحاجه ؟؟؟وانا اللي اقول بعزمك على عشوه محترمه الليله
سعود اللي اهم شي بطنه قال :- والله انا حاضر لك بس اهم شي العشا دسم ويستاهل
ابتسمت :- اجل جوع حالك علشان تقدر تاكل ترى الليله عازمكم على العشا بمناسبه رجوع عبد الله من بريطانيا ولا يفوتك ترى راجع بالحرمه من هناك

ضحك سعود :- عسى مهي بجانيت
عفست وجهي :- سديت نفسي الله يسد نفسك جانيت عاد ....الرجال عنده ذوق تزوج مريم اللي كانت معنا في كلاس مستر جون بيرل .....المهم انا بغيت منك رقمين وعلى ذوقك
ابتسم سعود :- رقمين عاد ...ليكون اللي ما سويته في لندن بتسويه هنا
كشرت :- ليش تحسب الناس مثلك ...هذولا للاهل وتكفى ابيهم في اسرع وقت
سعود بكل ثقه :- الليله الرقمين بيكونون عندك ....بس ما قلت لي وين العزومه؟
ابتسمت :- لا تخاف انا بنفسي بمرك
سكرت الجوال وقلت لوداد :- وهذي البطاقات بتوصلكم الليله ...واللحين بنروح تشترين لك جوال جديد بدل اللي خرب

وطلعنا من المطعم على اول محل نزلت لحالي ورفضت ان اي وحده منهم تنزل معي نقيت احدث جوال وبلون بناتي ورجعت بالكيسه عطيتها للعنود توصلها لوداد اللي فتحت الكيس تدور على الفاتوره لانها قالت
:- بكم ؟؟
طنشتها لكنها اصرت فقلت :- ما بينا حساب ....واعتبريه هديه من العنود
وطلعنا لمشوارنا الاهم والاصعب


علــــــــــــــيــــــــــــــاء


اول ما انفتح الباب وبانت ثوبه منه حسيت بجسمي كله يرجف تقدم مني ومد يده يصافحني
:- السلام عليكم ...صباح الخير
بلعت رقي واستجمعت قوتي علشان ارفع راسي له كان مبين على وجهه الارهاق والتعب معقول اللي قاله طلال؟ ومعقول اللي بقوله بيريحه ؟واذا ريحه انا..برتاح او لا؟؟ رديت وانا احس بحراره كفه ابتدت تتسرب الى جسمي ونقلت لي احساس غريب خلى قلبي يرجف وبلذه فسحبت يدي
:-وعليكم السلام ...صباحك نور ...تفضل
اشرت عليه يقعد وقربت منه صينيه الريوق وقلت
:- تفضل ولو انها مو من مقامك
ابتسم ابتسامه صغيره لكن مؤثره :- انا من الجوع مستعد اكل اي شي ...وفي عيوني هذي وليمه
ما رديت عليه لكن سألته :-تشرب شاي ولا عصير
:-شاي احسن علشان يهدأ الصداع شوي
صبيت كاس الشاي وحطيته قدامه رفعت عيني لعينه كان واضح عليهم التعب .... الظاهر انه مثلي لا تعشى ولا نام شغلت نفسي بان اسوي له سندويشات وقدمتها له اخذ وحده منهم وناولني اياها :- ما احب اكل لحالي ... وما يصح ما تاكلين مع ضيفك

اخذتها من يده وحاولت اكلها لكن التوتر والترقب عندي كان احد من الجوع فما قدرت اكل وهو نفس الشي ما مد يده عزمت عليه :- اذا مو عاجبك اسوي لك غيره
لكنه اشر علي وقال :- عاجبني وصدقيني جوعان ....لكن ما تعودت اكل وانا تعبان (مسك ذقني ورفع راسي لين صارت عينه بعيني وكمل ) وطلال قال ان راحتي عندك

صعبه والله صعبه اني اكشف نفسي بهالطريقه وخاصه ان عارفه اني اذا تكلمت ما بيكون علشان اخفف حمل عن ظهري لا بيكون دفاع عن النفس وانا ما احب اني اكون موضع شكوك علشان ادافع عن نفسي بس بعد هذي فرصتي علشان اعرفه من هي علياء واحترت من وين ابدأ لكني في الاخير اخترت ابتدي من البدايه
:- خالد انت وش معلوماتك عن امي ؟
كان مبين انه استغرب من السؤال لكنه رد :- تزوجت عمي مده وعقب خلافات تطلقوا

نزلت راسي وانا احرك كاس الشاي في يدي :- وما قالوا لك ان سبب هالخلافات طبيعة امي التملكيه والانانيه (سحبت نفس من الصعب ان تنتقد امك ) يعني ما تحملت ان يكون لابوي زوجه غيرها رغم انها هي الثانيه ...ما تحملت انها تطلب من ابوي شي ما يوافق عليه
وهذا ادى الى انقلاب مشاعر امي تجاه ابوي وهله اللي هم بطبيعه الحال انصاره

فرك خالد عيونه وجبينه :- ما ني فاهم وش دخل امك في......(ما كمل وواضح انه غير رايه عن اللي بيقوله لانه قال ) بس المرأة بالذات في امور الحياه الزوجيه تحكمها في اغلب الاوقات عاطفتها واكيد انقلاب مشاعرها تجاه الكل كان رد فعل على الطلاق

ابتسمت ابتسامه ساخره :- بس امي تشوف ان قبولي فيك خيانه لها وعصيان لها ....لانها تعتبر الامر حرب قائمه وان موافقتي عليك انضمام لحزب العدو ....وجدي كان يعرف انها بتحكم على الامر بشكل غير عقلاني علشان جذي لمن خبرها بأمر خطبتي خبرها على اساس انه امر منتهي وحذرها من التدخل(نزلت دمعه من عيني حاولت امسحها قبل ما يلاحظها خالد)
لكنها اتصلت فيني يومها تبيني الغي امر الخطبه كلها لان الامر في نظرها خيانه لها وطلبت مني اترك كل شي وارد البحرين(ساعتها ان سيل من الدموع يهدد بالنزول لكني كبتها وكملت ) وحتى لمن قلت لها اذا رديت وين اروح قالت لي اجي هني في بيت جدي (اخذت نفس علشان اقدر اطرد الالم من صدري ) كانت تبيني افشله قدام الناس كلها وبكل بساطه اقول له استقبلني في بيتك لان امي ما تبيني عندها

خلاص احس ان قوتي كلها انهارت وما عاد فيني حيل اتحمل اكثر كنت ابي ابكب و بحرقه لكني حاولت اتماسك :- تبوني اقول لكم هذي امي متصله تقول انها تكرهكم وانها مو راضيه على زواجي وفوق هذا ما تبيني ولا تتحملني لاني بكون ازعاج لزوجها ولاني من ريحة ابوي
تبوني اقول امي ما تحبني ما تبيني ..ما تبيني

ساعتها ما حسيت الا بحرارة الدمع اللي جرى على خدي وشهقه طلعت غصب عني وفي لحظه حسيت بدفى الكون كله يلفني لكن ريحه عطره نبهتني الى اني في حضنه وسمعت همساته الدافيه تقول
:- بس حنا نبيك و.......
رفع راسي وامرني :- عليا ناظريني (وما ملكت غير اني اطيعه طالعته ومسح بكفه دموعي )
دام اني حي ما ابي اشوف هالدموع و............
قاطعته وانا ابعد نفسي عن حضنه الموقف احرجني وحسسني بضعفي وانا ما ابي اضعف قدامه مسحت دموعي وقلت :- اليوم تعال على الغدا الكل راح يكون موجود وامي من ضمنهم
قابلها وشوف بنفسك

ابتسم وقال :- بس عاد ابي اذوق طباخك ؟!!
ما حبيت اعلق غير ان في موضوع لازال معلق بينا :- اما بالنسبه لسالم

انقلب وجهه وتحولت الابتسامه الى عبوس غمض عيونه بقوه وعصر جبينه براسه وقال
:-راسي بينفجر ....ما عندكم بندول اكسترا يهدأ هالصداع شوي ؟

وقفت :- بلى شوي واجيبه لك
رحت ورجعت بحبتين بندول اكسترا وكاس ماي وقلت :- بس اول كل شي ترى مو زين على معده فاضيه
مديده :- واللي يعافيك ....عطيني اياها

قعدت قباله وضميت قبضتي عليهم :- اول اسمع (دقيت على هاجر واول ما سمعت صوتها حطيته على المايك ) سلام هجور شخبارش

ردت وكانها توها صاحيه من النوم :- وعليكم السلام ما يسرش الحال
كنت ابي اتطمن عليها لكن مو وقته فسألتها :- حبيبتي بقول لش امس لمن اخوش جاني عند السيار قال لي شي غريب ما فهمته

اكيد سيرت سالم ضايقت هاجر لانها ردت :- وش قال سويلم الله لا يسلم فيه ولا عظمه
ترى هو سبب اللي انا فيه
لمحت ابتسامه على وجه خالد لهالدرجه مضايقه سالم ومستانس ان اخته تدعي عليه فقلت
:-حرام هجور ما يجوز تدعين
لكن مزاجها كان متعكر فقالت :- عليا اختصري وخلش من اللي يجوز واللي ما يجوز وش قال ؟؟
قلت لها عن جملته :- يقول لي لو كنت اعرف انش توأم روحي ولمن عصبت عليه قال اني فهمته غلط لان توأم روحي اسمي في الموبايل

تنهدت هاجر وتأففت :- يعني النحيس ما صدقني الا عقب ما سوى لش سالفه هذي يا طويله العمر انا مسجله رقمش البحريني باسم توأم روحي وخبرش اليومين اللي فاتوا حرز على موبايلي حوله صامت وتركه في غرفته ولمن رجعتي البحرين وحاولتي تزعجيني بمكالمتش
انتبه الاخ ان المتصل اسمه توأم روحي وكان بيرد عليش وبيهزأش لكن الله ستر والشحن خلص ولمن سالني قلت له انه رقمش ....وهذي السالفه كلها

رفعت حاجب لخالد وطالعته بمعنى اقتنعت وارتحت لكنه اشر انه يبي يقول شي
فقلت لهاجر :- لحظه حبيبتي اسمع كأن ينادوني ( رجعت الموبايل لوضع الهاتف وسكرت على السماعه وهمست لخالد ) نعم وش تبي ؟؟
قال بكل برود :- اسأليها تحت اي اسم مسجله رقمك السعودي
استغربت ما فهمت وش الفايده من هالسؤال بس ما حبيت اطول على هاجر وعلشان يسمع بنفسه الاجابه رجعته على السبيكر وسألتها لكنها ضحكت وقالت
:- تطمني سالم مستحيل يشك في الرقم السعودي او حتى يفكر فيه لاني مسجلته تحت اسم ام الوليد
عصبت عليها :- شنو ...ليش ان شاء الله شايفتني جدتش ؟وشمعنى الوليد ؟
ضحكت :- اهدي شوي ....ترى مسيرش بتجيبين عيال يزعجونا ....وخبري خالد يسمونه ابو الوليد
كحيت وارتفعت حرارتي كل مني انا اللي احرجت نفسي على طول ودعتها وسكرت الخط
وما رفعت راسي لخالد اللي سمعته يقول
:- يعني ماله داعي نغير الرقم لكن الرقم البحريني خلاص الغيه

ما عجبني تحكمه فيني وقت بتحدي :- بس انا ما استغني عنه وما اقدر ....
ما كملت لانه قاطعني :- عليا الولد هذا ممكن يكون اخذ رقمك وساعتها بياذيك بالمكالمات الغير مرغوبه وغيرها وانا ما ارضى انك تتعرضين لمواقف زي كذا ورقمك السعودي مدول وتقدري
تستخدمينه هنا

يمكن يكون كلامه مقنع لكني لازلت مقهوره منه ومن اتهامته وحتى عقب ما سمع كل شي بدل ما يعتذر قاعد ويتأمر علي خلااااص لازم يعرف حدوده واني مو عبدته يأمرني ومن غير نقاش يبيني اطيعه انا انسانه لي كياني واذا كانت حجته اني زوجته لازم يعرف انه ما بيملكني غير بانه يحترمني :-ما ترضى لي مواقف مثل هذي ولا شاك اني ممكن اكلمه او ارد عليه واسايره

ما ادري ليش طالعني بغضب وبسرعه تحولت الى نظرة حزن وبعدها قال بصوت التعب ما قلل من نبره الثقه فيه
:-عليا يمكن الكل يشوف اني غلطان ومالي عذر حتى انا نفسي
لمن عرفت حقيقه الوضع جالس الوم نفسي لكن عمرك جربتي تعيشين تجربتي تسمعين الشخص اللي بترتبطين فيه واللي المفروض بيكون شريك عمرك والشخص اللي شرفك وسمعتك وكرامتك قبل اسمك بيرتبط فيه يطعن فيك حي في مكالمه لو سمعتيها من طرف واحد بتحسينها مكالمه بين محبوب ومحبوبه ......عليا ترى اللي سمعته يجرح الحجر الصم فشلون كرامة بني ادم (غطى وججه بكفوفه وكمل ) عليا ترى كرامتي المجروحه والاهانه اللي حسيتها من ورى المكالمه خلتني اعمى عن اني انظر للامر بعقلانيه ومنعتني اني اجلس معاك مثل هالجلسه قبل .....يمكن ما تعتبرين كلامي هذا عذر مقبول بس انا مستعد اسوي اللي يرضيك

ما توقعت ان الفرصه تجيني لعندي وبهالسهوله فقلت وانا ما ابي افكر في اللي قاله
:-وانا ما يرضيني اني ارتبط في شخص بدل ما يكون سندي وحمايتي يكون هو اللي يطعني في صدري ويهيني كل ما سنحت له الفرصه وبدل ما يصوني ويحفظ كرامتي هو اللي يهيني ويبهذلني ويرخصني في كل مره اشوف نظره الاتهام في عيونه (طالعته وياريت ما طالعته لان نظراته اللي تمثل ثورة غضب مكتومه سلبتني كل شجاعتي لكني ضغطت على نفسي وكملت ) خالد احنا ماننفع نكون مع بعض (بلعت ريقي )خالد طلقني ........


الـــــــــــــــــــعنـــــــــــــــــــود


انا طبعا فاهمه تركي ولو وداد تركت عصبيتها شوي بتلقى ان تركي عنده حق يعني مو عوايدنا ولا طبعنا ولا حتى مستساغ او حتى مشروع ان الرجال يكلم غريبه قبل ما يملكون
وكون ماجد تجرأ وفكر في هالشي ومع من ؟...مع بنت خاله فهذا معناه ان حتى مروه وغيره على محارمه ما عنده ...ومن حق تركي يتصرف بهالطريقه اساسا المفروض ان وداد تشكره انه ما كبرها وخبر اخوها او ابوها وحاول يلملم الموضوع ....صحيح اني في البدايه شفت انه تصرف مبالغ فيه انه يغير ارقامنا بس لمن فكرت فيها لقيتها معقوله لان ساره اليوم جت لوداد وطلبت منها بدون تردد او حتى احساس بالذنب اذنها علشان تعطي رقمها وصورتها لماجد وجايه فرحانه باخوها وجرأته والقهر انها تشوف الامر غايه في الرومانسيه بدل ما تنصحه وترفض الامر بشده ...والصراحه عنده تركي حق يغير الارقام لانها ممكن تحت الحاح ماجد تعطيه الرقم وهالمره من غير ما تشاور وداد ....انتبهت للطريق اللي حنا فيه اعرفه
سألت تركي بشك :- حنا وين رايحيين بالضبط
ما جاوبني وكل اللي قاله:- اتصلي على ساره سأليها وين هي فيه اللحين
استغربت ليش يسأل عنها ولاني مو حمل عصبيتعه اتصلت عليها
:- سلام
ردت ببرود :- هلا
سالتها :- الا ساره وينكم فيه اللحين ؟
ردت بدون نفس :- يعني وينا فيه عقب حركات اخوك البايخه ؟....ردينا البيت وانا كنت ناويه اقضي يومي في السوق
ما عرفت شلون ارد عليها فقلت اختم المكالمه :- اجل اخليك يلا مع السلامه
سكرت الجوال وناظرته :- تقول في بيتهم
رد :- تمام اجل اللحين بنروح عندها
توترت وش يبي فيها؟ وش ناوي عليه ؟ مو بيغير الارقام ومانعنا نعطيها االارقام خلاص وش يبي بعد ؟؟؟سألته
:- تركي ليش نروح لهم خلاص اللي صار صار وانت بتغير الارقام....يعني ما له داعي نكبرها وحنا ما نبي احد يعرف شي

وقف السياره حذا بيتهم والتفت لي وقال :- اسمعوني زين انتم بتروحون لساره وش بتقولون لها مو شغلي بس المهم ما ابيكم ترجعون السياره الا وكل صوركم اللي عندها في يدكم

شهقت :- وهذي شلون نسويها ....تركي ترى البنت اكيد بتزعل وبتخبر عمتي وساعتها ....

قاطعني :- بتزعل يمكن لكن اذا خبرت امها عن سواد وجه اخوها وانها موافقته على طلبه اكيد ساعتها امها بتزعل منها وبتطلب منها تكتم الامر

ناظرت وداد وما عرفت بسبب غطاها هي وش تفكر فيه فقلت اترجى تركي
:- بس صعبه والله صعبه يعني على الاقل اتركنا اليوم نفكر شلون نجيب الصور من عندها بدون ما نخلق حساسيات و.........

لكن تركي ولا كانه يسمعني دخل سيارته داخل البيت ووقف السيارة عند باب الصاله وقال
:- يا تنزلن اللحين وترجعن بصوركن او المهله بتكون علشان غيركم يتصرف
(ناظرني) انتي تتوقعين طلال وانا اتكلم عن اهدأنا اذا عرف عن اللي صار بيرضى بوجود صورك او صور اخته عندها ....والشيبان لو عرفوا ساعتها مو بس يجيبون الصور الا يحرمون عليكم التصوير بعد

تخيلت فعلا لو عرف طلال او ابوي وش راح يكون رد فعله ولا خالد اذا كان تركي اكتفى بكذا فخالد اذا عصب ممكن يسوى كل هذا وبعد مايرضيه فقلت لوداد
:- وداد ...
ما كملت لانها فتحت باب السياره وقالت :- مالنا راي مو اليوم حنا عبيد اخوك
نزلت وسكرت الباب بقوه
دخلنا وكانت عمتي في الصاله وقدامها دله القهوه وتمر قربنا منها سلمنا عليها وسالناها عن ساره فردت عمتي
:- من رجعت مع اخوها على طول رقت لغرفتها ومنها ما نزلت (اشرت على الكنبه جنبها ) اجلسوا اللحين انادي الشغاله تناديها لكم

لكن وداد قالت لعمتي :- ما لك لوا يا عمتي بس حنا بنطلع لها غرفتها

وتركنا عمتي ورحنا لغرفة ساره وقفت على الباب ودقيته جاني صوتها من داخل الغرفه
:- نعم ؟؟
رديت بهدوء :- انا العنود معي وداد
ومن دون ما نسمع جواب فتحت باب غرفتها وبايتسامه ساخره قالت
:- يعني جيتوني عقب الفلم اللي سواه تركي
ما عجني لا اسلوبها ولا كلامها فقلت :- مو حنا جينا بطلب من تركي
رفعت حاجب :- ليش؟ لا تقولين فكر وعرف ان ما له دخل وان الامر عادي واحد بيخطب وحده ويبي يعرفها زين قبل ما يملك عليها
ساعتها بس انفجرت وداد في ساره وقالت :- عادي ...عادي اكلم واحد ما يحل لي ؟؟وعادي تعطينه صوره لي ؟؟ من متى الحرام صار عادي ؟؟ويا عمري اللي يبي يعرف اللي بتزوجها يسأل عنها ...وتعالي هنا اخوك ليكون من المريخ عشانه ما يعرفني ويبي يتعرف علي ....ودامه يبي يشوفني ليش ما طلب يشوفني الشوفه الشرعيه بدل ما يطلب يتمقل في الصور

فتحت ساره عيونها على وسعهم ما توقت ان وداد تثور عليها كذا فقالت برود
:- هدي نفسك ...ودام الامر مو عاجبك ليه ما رديتي علي هناك ؟ ولا انتي ما كنتي بتمانعين لو ما عرف احد بالامر ولمن عرفوا جايه.....
ما كملت لان وداد قاطعتها وقالت :- ما رديت لاني ما حبيت اسوي فضيحه في مكان عام
وردي اذا تبينه ترى ....
قاطعتها ساره :- اوهوووووووو يعني ما تبين تسوين فضيحه وما تبين تكلمينه او تعطينه صورتك خلاص عرفنا وش بعد ناقص

هالمره انا تكلمت :- نبي صورنا
تخصرت ساره :- وشو ؟؟وليش يعني ؟؟
رديت بنفس الهدوء :-اقول لك تركي هو اللي جابنا بس علشان الصور ولو طلعنا من غيرها الامر بيكبر وبيوصل لابوي وعمي واكيد ساعتها بيوصل لابوك وعلشان الموضوع ينلم عطينا الصور
عضت ساره على شفتها وقالت بقهر :- كل الصور في الدرج بس والله بتندمون على هالحركه
فتحت الدرج واخت انقي صورنا وحتى الصور اللي تجمعنا فيها و وداد ساعدتني اما ساره فضلت ساكته ولا حركت ساكن واول ما خلصنا قالت
:- خلصتوا ؟؟
هزيت راسي اشاره نعم فقالت :- اجل طلعوا ولا عاد ترجعون مره ثانيه
تقدمت ووصلت عند الباب لكن وداد قالت لساره
:- قبل ما اطلع وصلي هالرد لاخوك قولي له وداد ما يمهرها اللي يبخس قدرها وهو ما عرف قدري....فما له داعي يتعني ويخطب
الغريب ان ساره ابتسمت وقالت بخبث :- ما راح اوصل شي ....ولعلمك ماجد الليله بيحدد مع ابوك موعد ملكتكم بعد ملكة طلال (ضحكت بسخريه )وساعتها رفضيه على راحتك

سحبت وداد من ذراعها وانا حامله صورنا في كيسه والحمد لله ان عمتي ما كانت مكانها لمن نزلنا وعلى طول طلعنا لسيارة تركي اللي ما كان فيها استغربت وين راح لكن وداد قالت وهي تأشر على جهة المجلس
:- مو هذا تركي مع ماجد ؟
التفت لهم وكان واضح رغم المسافه ان الاثنين ماسكين في بعض ويصارخون على بعض
وسرعان ما فلت تركي ماجد على الارض وكلمه وهو يأشر بصبعه كأنه يهدده وبعدها رجع السيارة واول ما شافنا قال
:- جبتوا الصور ؟
اشرت على الكيسه اللي عندي وقلت :- جبناهم ...(ترددت لكني في الاخير سألته )تركي انت وش عندك مع ماجد ؟وش قلت له ؟
تجاهل سؤالي وقال :- وين تحبون تروحون البيت او بيت عمي
رديت :- بيت عمي ....نزل وداد وناخذ نجود ونرجع بعدها البيت
حرك السياره وقال :- بس لا تتأخرين لان وراي شغل لفوق راسي
وفعلا نزلنا عند بيت عمي طلبت من وداد تنادي نجود لكنها قالت
:- نزلي انتي ناديها
ترددت بعدين قلت لها :- اخاف في احد و......
فهمتني فردت :- طلال مو هنا وامي اللحين تلاقينها اما في المطبخ او تجهز حالها لصلاه الظهر في غرفتها ....


نــــــــــــــــــــدى


قعدت من الصبح لقيت فراس لازال نايم بسته ورحت غرفة النوم ونفس المنظر عزيز نايم بنفس الوضع اللي نايم فيه ولده تسحبت علشان ما اوعيه وعلشان ما اشوف النضره اللي انرسمت في عينه البارحه فتحت الكبت ونقيت لي تنوره سوده لتحت الركبه وبدي احمر بربع كم دخلت الحمام وبعدها طلعت لقيت عزيز صاحي ومشغول يجهز له ثياب قربت من الكبت وقلت
:- انت اخل تحمم وما بتطلع الا هدومك جاهزين
رد من غير ما يفسح لي :-بس الزوج يبي اكثر من هدوم جاهزة يا بنت يوسف
تعلقت عيوني فيه :- وانا وش مقصره فيه ؟؟
التفت لي ومسك كتوفي :- تبين تحرميني من العيال يا بنت يوسف
غمضت عيني وبلعت ريقي :- شلون تقول كذا وفراس مو ولدك ؟
فلتني تركي وقال :- بس انا ابي له اخو
هالمره انا مسكت وجهه بين ايديني :- اخو؟؟ ولد يعني ...طيب لو جاك بنت
ابتسم وقال :- باذن الله وحوله بيجيني ولد ...بس انتي طيعيني
ما حبيت اهدم فرحته لكن ما اقدر اكذب عليه :- انا على طول تحت شورك وحتى في هذي كل اللي انا طالبته الوقت
انطفى نور الفرحه من عينه وماتت مثل ما ماتت الابتسامه على شفته وقال بحده
:- الوقت ما اقدر اعطيك الا لغايه ملكة طلال وبعدها يا ندى بنشوف وش بيصير
(دار ظهره واتجه للحمام )وجهزي حالك بنروح بيت هلي امي تسأل عنكم

جهزت ثيابه على السرير وجلست قدام المرايه انشف شعري وانا تفكيري مشغول ((متى يا عزيزبتحس فيني وبتفهمني متى يا رب متى ؟؟والله ما ني قادره متحمله احس نفسي بين نارين...نار جفاك ونار طلبك والنارين تلهب بجوفي لا هذا مريحني ولا هذا مريحني ))
رحت غرفة فراس قبل ما يخلص عزيز من حمامه جهزت اغراض فراس خاصه انا بنقضي كل اليوم عند خالتي ام عبد العزيز قعد فراس من نومه جهزت واول ما خلصت لقيت عزيز على راسي :-جهزتي ؟؟
حملت فراس قلت له :-باقي البس عباتي خذ فراس على ما البس

اخذه ودخل وراي لغرفتنا لبست شيلتي وعباتي واخذت من عنده فراس اللي اول ما شافني لابس العبايه رمى نفسه على وهو يبتسم :-ويييييييييه فدييييييييت البسمه وراعيها
عمري اللي يجننون
لوى عزيز فمه :- واضح واول الجنون تمنعيني من حقي
ما رديت عليه لانه بكل بساطع ترك المكان وطلع وحطيت يدي على فمي امنع نفسي من البكي وانا اناظر مكانه الخالي
وصلنا بيتهم دخلت الصاله لقيت المكان خالي دخل وراي عزيز وسأل الشغاله
:- كريشما وينها ماما كبير
كريشما :- ماما كبير في صاله داخليه (عزيز على طول توجه لها ساعتها قربت مني كريشما ) هاتي عبايه مال انته
ابتسمت لها :-زين امسكي فراس اول (قلعت البرقع )خالتي لحالها داخل ؟؟
كريشما تحمل فراس :- لا في داخل بابا كبير وعلي
رجعت لبست البرقع :- حسبي الله عليك يا كريشما اللحين علي داخل وتقولين هاتي عباتك

اخذت فراس ورحت للصاله لقيت عمي بو عبد العزيز جالس يتقهوىوجنبه ولده علي وخالتي قباله وعن يمينها عزيز دخلت سلمت على عمتي بست يدها وراسها ابتسمت في وجهي وقالت وهي تمد يدها على فراس :-حيا الله الحامل والمحمول هلا بالغاليه مرة الغالي وام الغالي
رديت بصوت واطي :- تسلمين يا خاله ويسلم قلبك وشلونك اللحين ؟؟
ردت باعياء :- هذا انا مع ابر السكري والرطوبه اللي خانقتنا
قام علي من مكانه وجلس عن يسار امه
:- وش لك بالشرقيه يمه هذا بيتي بالرياض اكتمل طيعيني وتعالي معي
من قرب علي بعدت عن خالتي وسلمت على عمي وجلست جنبه اقهويه
وخالتي ردت على ولدها :-ويه عاد اروح الرياض واترك بيتي انت اللي انقل للشرقيه واترك عنك الرياض
ضحك علي على امه وقال :- ما تركين بيتك ولا ما تقدرين على فراق بو عبد العزيز؟

دفته خالتي وتصنعت الغضب :-استحى يا ولد انا امك تقول لي كذا
تعذر منها وطى على يدها يبوسها :- اعذريني يمه بس والله الوحده وما تسوي يا ام عبد العزيز
عادت عليه امه كلامها :- وش لك بالهم والغثى اترك الرياض وانقل للشرقيه
ابتسم لها :-ما اقدر يمه هناك فرصتي للبروز احسن غير ان العروض اللي لقيتها هنا ما ترضي طموحي
ردت عليه :- اجل تزوج وخذ لك بنت الحلال اللي تونسك في وحدتك
قام وقف وقال :-على يدك يام علي
عزيز اللي كان ساكت نطق :- وشو ام علي قول ام عبد العزيز
ابتسم علي :- شفتي يمه ولدك مستخسر اناديك ام علي
عزيز وقف قدام اخوه وباس راس امه :-مهما يكون هذي الغاليه وما احب اسمها يرتبط في غيري
علي الي تصنع الزعل عند امه :- ما تقولين شي يمه ولا يرضيك اللي يقوله عزيز
خالتي اللي مشغوله في فراس تلاعبه قالت بدون مبالاه :- كلكم عيالي
ضحك عزيز وقال لاخوه :- شوفها ولا معطيتنا وجهه
تدخل عمي :- امك دامها شافت فراس خلاص ما يملا عينها حد
ضحك علي :- ليكون غيران من البزر يايبه
ابتسم عمي :-اذا علي انا امك من جابتكم وهي مو معبرتني لكن الدور عليكم تتعودون
(وقف )يلا لمتى بتظلون جالسين عند الحريم
طلع عمي وعزيز التفت لامه يكلمها :- يمه وش رايك في اخو لفراس ؟
رفعت راسي اللي كنت منزلته ابي استوعب اللي عزيز يقوله وخالتي قالت
:- ندى انت حامل يمه ؟؟
عزيز رد على امه :- لا يمه بس نخطط حق اخو لفراس
تدخل علي :- مو كأنه صغير ...الا هو كم عمره ؟
عزيز :- 6اشهر
ام عبد العزيز توجه كلامها لعزيز :- غريبه خبري فيكم اولاد هاليومين ما تبون عيال واجد
ولا تجيبون على بعض (ناظرتني وهي لا زالت تكلمه )يعني ندى ما تقول شي

رد عبد العزيز وهو لاغي وجودي :- بالعكس انا وزوجتي متفقين على هالشي وندى ما عندها اعتراض
لوى علي فمه وقال :- بس يا عزيز فكروا زين ترى الولد صغير وبحاجه لرعايه واهتمام
يعني المفروض تكونون اوعى من كذا و.........
قاطعته خالتي لمن شافت نظرات الاستياء وعدم الرضى على عزيز وقالت بس علشان مدللها ما يتضايق :- وانت شعليك منهم ...وانا بعد اقول احسن علشان العيال يكبرون مع بعض ويصيرون قراب من بعض (وابتسمت لعزيز )وعلى البركه يمه

لحظتها طلع علي بدون ولا كلمه وعزيز سلم على امه وطلع ولا احد حاس فيني ليش سويت فيني كذا يا عزيز يعني تبي تحطني قدام الامر الواقع تخضعني لرغباتك بطريقه مذله وكأن ما لي شعور او احساس ولا كأني ترجيتك بدل المره الف على الاقل تعطيني فرصه اجبر نفسي على الموافقه ... فرصه احسس نفسي ان لي راي مؤثر في حياتنا وان لي عندك خاطر ...مو كذا تزرع فيني شعور بالعبوديه والذل


الى هنا وانتهى البارت
قراءه ممتعه للجميع
اعذب وارق التحايا
وفي امان الله

السلام عليكم ورحمة الله وبركاته

بارت جميل جدااا ............ تسلم ايديكي ........... فيه صراحة وكشف بعض الاسرار ...... وتحدي ...... واتخاذ قرار ......... وذل ومهانة ...... لبعض الابطال ..............

بارت له وقفات متعددة ..... وقفات لها تأثير على الاحداث القادمة ............


الوقفة 1..... طلب الطلاق ......... 2..... قرار وداد بعدم الزواج من ماجد وتهديد سارة ...... 3... عراك تركي وماجد الى ماذا سيؤدي ....... 4..... قرار ندى في الموقف الذي وضعها فيه عزيز .............

خالد وعليا ...........
( مشهد الصراحة وكشف الاسرار ...... وفي اخره مفاجأة من طلب سيغير الاحداث )

جلسة الصراحة حلوة ... ووضحت الامور لخالد ......... لكن كبرياء خالد .......... منعته من الاعتذار .......... وشكه وقسوته ........... منعته من التفاهم مع عليا ........ مما ادى الى ان عليا لا تشعر معه بالامان .......... ( برغم من مشاعر وليدة منها اتجاه خالد ) مما ادى ذلك الى طلب الطلاق ......... لا اعتقد ان خالد سيقبل ذلك ... ويرفض الكلام في هذا الموضوع ........... ويحاول ان يكسبها ........


( مشهد قوي .... فيه اتخاذ قرار ............ عدم الزواج .......... وتحدي ... تهديد )

وداد ......... انقذك تركي من ماجد ( حلو المشوار طلع انه بيغير رقم الموبايل ..... فعلا بعيد النظر )


وقرارك الذي قلتيه لسارة .......... هل ستنفيذيه ؟ أم ستقعين تحت ضغط الاهل ؟



تركي .......... حلو تصرفك وغيرتك على محارمك ( بس لو كانت واحدة اخرى غير وداد هل كنت ستتصرف مثل تصرفك هذا ؟) ويا ترى ماذا حدث بينك وبين ماجد ؟ وهل سيمر الموضوع بسلام ام ماذا ؟



سارة ......... اظن ان قائمة اعدائك قد اضافت 3 اسماء اليها ..... وان رغبة في الانتقام ستزداد شراهة وخاصة عندما ينضم اليكي ماجد ...... وشكله كده لن توافق عليه وداد ... فيضع يده في يدك ( بيكونوا عصابة ) ويساعد في التفريق بين عليا وخالد ..... وانتي بتساعديه في الانتقام من تركي .... فهل ستنجحون ؟


ندى ..... ( صحيح ذل ومهانة غير مرئية ولكنها محسوسة من انسانة انهانت ... ولم يعمل لها ولا لوجودها اي اعتبار ) وضعك عزيز في وجه المدفع فماذا ستفعلين هل ستستلمين ام ستواجهين عزيز .... هل سيؤدي الامر الى نهاية الزواج ام ماذا ؟


عزيزتي ميما .......


ممكن تقولي شطح الخيال عندي ..... لكن لدي احساس انكي ستجعلين هناك رابط بين على وندى
( وسوف اترك لك التفاصيل )



متميزة ... ولكن في هذا البارت لم نعرف ما رد العنود على طلال بخصوص الزواج ... ولا ردحمد على رفض هاجر ... او ماهو تصرف هاجر مع حمد ............ وايضا مشتاقين للمشهد الذي سيجمع بين ام عليا وخالد ............


تقدمي واستمري وتميزي في رواياتك الجميلة ..... ومنتظرين البارت القادم ............

هلا حبي البارت بجنن بس لا تقولي خالد بيطلقها نحنا بدهم يتقربو من بعض شايفهم ببعدو عن بعض بس احلا شي تركي وحركاته تهبل شكله اخيرا رح يصير الي ببالو وشكرا يا عسل