جودي
هلا فيج حبيبتي
اسفرت وانورت
وتشكرين على تفهمج للموقف اساسا كنت عارفه ان اغلبيه القراء المتابعين ما راح يفهمون غلط
بس بعد ما ابي احد يزعل مني


من المتصل هالبارت بتعرفين

وبتعرفين شلون خالد بتوصل له الحقيقه
البارت الجاي


لكن وش راح تكون ردود افعالهم هذي عاد انطري فيها البارت اللي عقب


حمد وهاجر نطري عليهم شوي

اعذب التحايا
ميما

وهذا البارت وصل
تمنياتي بقراءة ممتعه
وان شاء الله يعجبكم


اترككم مع البارت

ميما

((الجزء الرابع عشر ))
(جمرات في القلب)


عمركم حسيتوا انكم بين المطرقه والسندان ....وان احلى الخيارين مر؟؟؟
عمركم حستوا انكم لازم تقررون بين امرين ....وبداخلكم تتمنون لوفي خيار ثالث؟؟؟
عمركم جربتوا تقبضون على الجمر ؟؟؟
عمركم حسيتوا ان صدركم ضام بين ضلوعه جمره ؟؟
بعض ابطالنا راح يطرون يختارون بين اثنين وهم عارفين انهم بهالخيار يقبضون على جمر يلهب نار .... وبعضهم في جمره اساسا قاعده تسعر في قلبه فيشوف نفسه مدفوع دفع لهالتصرف ......لكن هل خيارهم راح يكون خيار صحيح ؟؟؟ وهل هالدافع او التصرف راح يلقى القبول؟؟؟
وهل من الممكن ان تشفى الحروق ومن غير ما تترك اثر؟؟؟



نـــــــــــــــــــــــدى


كنت قاعده في الصاله قبال شاشه التلفزيون وفروسي نايم بحضني ...وطبعا ما نام الا عقب ما هد حيلي...مليت اليوم طول النهار وانا لحالي وكل تفكيري في الرياض تمنيت لو اني هناك مع البنات اكيد طوال الاسبوع فرفره في الاسواق ....راح بالي لطلال وارتسمت ابتسامه على شفايفي اكيد اللحين طاير من الفرح واكيد مو عارف ينام وتلاقيه مزعج الكل بكلامه عن ملكته وعن العنود ...صحيت من افكاري على صوت الباب دخل عزيز وقلع شماغه ورمى جسمه على الكنبه جنبي التفت له بابتسامه
:- وعليكم السلام والرحمه ....كلنا بخير الحمد لله
ناظرني بعيون مرهقه وقال :-اففففففففف اليوم كان متعب وما فيني حيل حتى اتكلم
سألته :- طيب انت اكلت شي ؟؟
رد وهو مغمض عينه :- لا انا ما ابي شي غير اني انااااااااااااااااام
انا عاذرته بس بعد انا ميته ضيق وملل وما صدقت يجي احد اجلس معاه
:- معقوله بتنام من اللحين ؟!!! لسه بدري (طلبت برجى ) اقعد معاي شوي
وقف :- ندى هذي مو سالفه اقول لك تعبان تقولين اقعد
فتحت عيوني :- طيب شوي شوي ليش معصب
تنهد بقوه :- شوفي نفسك وش جالسه تسوين يعني بدل ما تقولين لي حبيبي قوم نام وارتاح
تقولين تعال اشغل وقتك بسخافات
هذا وش فيه ما صارت مره في حياتي طلبت منه يجلس معاي :- انا يا عزيز الجلسه معاي
سخافه (دمعت عيني ) غير انها اول مره اطلب منك هالطلب

صرخ :- اوهووووو مو اول مره تجر ثاني مره
انزعج فراس من صراخ ابوه فصحى وظل يبكي وطبعا هالامر كالمعتاد يزعج عزيز
:- سكتي ولدك تراه صدع راسي
ضميت فراس لصدري وانا اهمس في اذنه بشويه كلمات تهديه واول ما رجع يهدأ قلت لعزيز
:- مو انت اللي صحيته من صراخك وثانيا مثل ما هو ولدي تراه ولدك
ما اهتم للي قلته عطاني ظهره ورقى الدرج ...طفيت التلفزيون وحملت فراس لغرفته نزلته في سريره وجلست جنبه اتأمله(( اساسا مو مصبرني على اطباع عزيز الحاده الا شيئين ولدي ومعرفتي ان عزيز من داخله طيب وحنون ....بس المشكله الكبيره انه تربى على ان اي شي يطلبه ينوجد وما تعود على الرفض واذا احد رفض طلبه ما يهدأ الا اذا نفذ له طلبه ....وكل هالدلال من خالتي ام عبد العزيز الله يسامحها ..هذا كله ليش انه ولدها البكري الله يعين لوان ما عنده اخوان صبيان )) قمت من عند فراس وتركت الباب اللي يفصل بين غرفته وغرفة نومنا مفتوح سحبت لي بجامه ودخلت الحمام ....طلعت عقب شوي وعزيز غرقان في النوم أو كنت اظنه نايم ...تسحبت ودخلت في الفراش توني بحط راسي على المخده وبغمض عيوني الا عزيز ملتفت لي يقول :- اقول نامي جنب ولدك احسن
قعدت ومسكته من كتفه :- عزيز وش قصدك ؟
رد بكل برود :- خلك عند ولدك الى ان تغيرين رايك
اخذت نفس علشان ما تنزل دموعي وحاولت امسك اعصابي :- بس يا عزيز حنا اكثر من مره تناقشنا في هالسالفه وقررنا اننا ........
قاطعني :- انتي قررتي لكن انا بعدني على رايي ...اتركي المانع
نزلت دموعي :- بس يا عزيز خاف الله فيني فراس بعده صغير ....وانا اقول خله لمن ...
قعد على حيله :- وانا اقول ما بصبر الى ان يكمل سنتين ....وتراني احذرك انك قاعده تعصيني
في شي من حقي
وقفت ولبست الروب وقلت بعصبيه مخلوطه بالدمع :- ومن حقي بعد اني ارتاح شوي ...ومن حق فراس انه يلاقي الحنان والاهتمام ...مو احمل عليه وهو بسن 6 اشهر وساعتها اكيد بينهمل
ابتسم بسخريه :- هه هذا لانك مو قد المسؤليه يا مدام ....ولا غيرك ربى توم
صحت قهر:- غيري مو انا يا عزيز ...وانا ماقلت ما ابي عيال انا قلت نأجل هالمسأله شوي
دار لي ظهره ونام :- وانا اقول ما بستنى ...ومن هنا الى ملكة اخوك ابي اسمع قرارك وبعدها انا بتصرف
حز في قلبي تجاهله لي غير اني خايفه من سالفه بتصرف ((ااااااااااه ما اقساك يا عزيز هانت عليك العشره وتطردني من غرفتنا )) طلعت ورقدت في غرفه فراس وما قدرت انام وكل بالي مشغول مع عزيز ...وش اسوي له علشان يقتنع ويرضى ؟؟ واذا ما رضى يا ربي معقوله
اطيعه واحمل في هالوقت ؟؟....ناظرت فراس ...بعده صغير يا عمري واعرف نفسي في الحمل والوحام ما انطاق على طول تعبانه وما اقدر حتى ارفع راسي .... يا ربي وش اسوي
اخاف اطيعه وساعتها ولدي وين اوديه عند امي في الرياض وانا في الشرقيه ولا عند ام عبد العزيز اللي ما تقدر تتحرك من المرض وكبر السن ولا اترك ولدي في يد الخدامات ما ادري
وش يسوون فيه ...... واخاف اظل معنده مع عزيز وما يقتنع وساعتها ربي يغضب علي
ااااااااااااه يا ربي انا مو حمل كذا ابد ...بكيت قهر وذل ومهانه من اللي يسويه عزيز فيني
حسيت ان التعب هدني لكن ماقدرت انام ...لان ما في حد يقدر ينام على سرير من جمر وشوك
وهذا اللي كنت حاسته


خـــــــــــــــــــالد


كنت ناوي اقفل الجوال واطنش لكن اول ما شفت المتصل طلال قلت ارد عليه اعرفه ما بيتركني الا اذا رديت عليه اعرفه كل ما يشغل باله شي يجافيه النوم وساعتها لازم يسهرني معاه
ولان مزاجي متعكر ومالي خلق شي رديت برود
انا:-نعم ؟
طلال بنفس ضايقه :- السلام عليكم
انا:- وعليكم السلام
طلال :- خالد اجل اشغال البحرين وارجع
انا:- ما اقدر
طلال :- كنت عارف انك بترد كذا ....اجل اسمع انا بكره على التسع ونص بكون في المطار ابيك تجيني
انا:- طيب طيب ....على الساعه تسع بكون موجود
طلال :- .الصراحه كنت ابيك في موضوع ملكتنا انا والعنود ...... انا ابي الغيها
وقفت بسرعه وصرخت :- نعم !!!!!!!!!!!!
ما لحق طلال يرد علي لاني واصلت :- انت واعي للي انت تقوله ....انت انجنيت
رد بكل هدوء:- واعي لكل كلمه انا اقولها .... انت اهدا واسمعني
هذا مو عاقل عقب اللي قاله يبيني اهدأ:- يعني تبي تقول لي عقب ما جهزتوا كل شي وانطبعت الكروت للمعازيم ويمكن نصهم اذا مو كلهم وصلتهم الدعوه تجي تقول لي غيرت رايي وما ابي اختك وتبيني اهدأ ..... شوف يا طلال انت ولد عمي وصديقي لكن مو على حساب اختي ومشاعرها وكرامتها فهمت
ساد الصمت من بينا شوي بعدها قال لي طلال :- انت اللي ما فهمت ...انا عمري ما بسمح
لاحد مهما يكون يهين العنود او يحط من كرامتها ...وصدقني اللي يهينها ما بيرضيني غير دمه

ضغطت على اسناني وغمضت عيني بقوه :- باين يا ولد عمي وهذي اولها تبي تفضحنا وتنكس روسنا
سمعت تنهيدت طلال :- لا حول الله هذا ظنك فيني وانا اقول ما حد بيناصرني غير خالد
وقلت اجيك البحرين علشان ارد معك وتوقف معاي قدام ابوي وعمي
حسيت بالم فضيع في راسي وكأن الي سوته اخته ما يكفيني فجا اخوها واغلى انسان على قلبي يكمل علي :- في كل شي انا معاك يا طلال الا هذي انا اول واحد يوقف ضدك
.... رغم انه يعز علي اعطي اختي للي ما يقدرها
ردطلال بحده :- افااااااااااا انا ما اقدرها ؟!!!! اصلا لو ما كنت اقدرها واحبها ما كنت فكرت اني الغي سالفه الملكه واسويها عرس مره وحده
كأن احد ضربني على راسي :-هااااااااااااا وش تقول ؟!! يعني انت ما تبي تتخلى عن العنود ؟

ضحك طلال :- فالك ما قبلناه ...اتخلى عن روحي ولا اتخلى عنها
ضحكت على غبائي وعلى حركة طلال فيني :- طيب واذا قلت لك انا مع ابوك وعمك واقول مثلهم اول املك وعقب ما تخلص البنت دراسه اعرس
انصدم طلال :- اللحين اقول لك انا ما اقدر اصبر على فراقها اكثر من كذا تقول
اقعد سنه بس مملك ...تدري انا بكره عندك ولاني بتاركك الا اذا اقتنعت

ابتسمت :- طيب على فرض انا اقتنعت ....ما سألت نفسك العنود وش بيكون رايها؟؟
سكت طلال شوي بعدين رد :- تدري انا بكلم وداد اللحين تشوف ردها بعدين نتناقش في الموضوع
صرخت عليه :- تعال يالمجنون ... انت شايف الساعه اللحين كم ؟ انا اقول اجلها لبكره وكذا كذا انا برجع السعوديه قبل موعد الملكه وساعتها نتكلم في ذا الموضوع

انا متأكد انه ما اقتنع لكنه قال :- اللي تشوفه بصبر لبكره ....وخلاص ماله داعي تجيني المطار
بجلس هنا اكمل تحضيرات الملكه احسن

ركبت السياره وسندت راسي على السيت وقلت :- طيب انا بكره وراي قومه من الصبح
ضحك طلال :- لا تحاول ما ني بتاركك
نزلت راسي على السكان :- بس انا تعبااااااااااااااان وابي ارتاح
كالمعتاد حس طلال ان تعبي ما له علاقه بالبدن وانه تعب الروح فقال
:- سالفة عليا ؟اسمعني يا خالد اذا ضليت كذا عايش على فكره انك مجبور عليها وانها سبب حرمانك من ساره فـ........
قاطعته :- يا ريت السالفه جت على كذا (اخذت نفس بقوه وزفرته اهه حاره ) تعرف زين اني عقب ما كلمت ابوي تناسيت انهم اجبروني عليها ....وساره ما ادري اذا كنت بتصدقني اولا
ما كانت في نظري غير مثال للمرأه اللي تصلح تكون زوجتي ....وثورتي في البدايه بس لانهم
حرموني من اختياري وفرضوا على شخص مجهول ...اما اللحين فهي ما تعني لي اكثر من كونها بنت عمتي

اظن ان طلال تحير لانه قال :- زين ليش الضيق انا اشوف انك بكذا بديت توزن الامور بشكل صحيح وتجتاز العقبات اللي كنت انت واضعنها ....وعلى حسب معرفتي بعليا المفروض انك اللحين على الاقل على الاقل عرفت انها زوجه مناسبه لك

كنت ناوي اداوي جراح كرامتي بنفسي واقفل عليها صدري من غير ما احد يعرف عنها شي بس خلاااااااااااااااص فاض فيني وماعدت اتحمل اكثر وما لقيت نفسي غير وانا اقول لطلال
عن اكثر شي حارق قلبي ومشعل النار فيني عن اول مكالمه لها سمعتها وادعيت اني ما سمعت منها شي وعن الخسيس النذل ولد جيرانهم... اول ما خلصت كلام حسيت ان في احد شاركني همي وفي احد حاس فيني ومقدر المي وحيرتي لكن لازال ثقل الهم مثل ما هو ماذي روحي
لكن طلال رد بشكل مغاير للي توقعته صحيح ما كنت متوقعه يلوم اخته او حتى يصدق عليها
بس ما توقعته يلومني
:- اذا تبي كلمة الحق يا خالد سمعها مني للاخير مثل ما سمعت منك وحطيت طين وعجين على قلبي علشان ما اهادك على اللي قلته عن اختي تراك اذا ما كنت واعي انت تتهمها في شرفها واخلاقها ولو ماني عارفك زين كان بيكون لي معاك تصرف ثاني .....يا خالد انت غلطااااااااان
....انت سمعت مكالمه من طرف واحد يعني ظنك ممكن يكون خاطئ غير ان المكالمه ممكن تحمل الف معنى غير اللي فهمته ....وانت غلطتك انك اتهمتها من غير ما تسمع تبريراتها للموقف وهذا شي انت عدته اليوم يعني انا ما بقول انك سمعت غلط ...ولا بفسر الموقف على كيفي لكن .....
قاطعته :- طلال انت منت حاس فيني ...لمن تكون الحرمه موضع الشك اختك يمكن تكذب نفسك وتقول انك غلطان ...لكن لمن تكون زوجتك وقبلها بنت عمك ...فساعتها ما بيكون عندك وقت تفكر هالتفكير وكل اللي بيخطر في باللك الم كرامتك المهدوره واستغفالك والحط من قدرك ومن قبل من؟؟ من قبل لحمك ودمك

رد طلال بنفس هدوءه السابق :- شوف انا ما باخترع مبررات ولا بعذرك لانك مهما يكون غلطت في حق عليا لمن ما سمعتها لكن الغلط مدروك والسالفه محلوله
زاد الم راسي وحسيته بينفجر وتمنيت انه يكون في حل فعلا
:- وشلون تنحل
سألني :- انا اعرف ان عندك بكره اجتماع مع بو نادر ...متى بيكون هالاجتماع ؟؟
ما فهمت وش علاقه الاجتماع بالموضوع لكني رديت :- الساعه عشر
تنهد :- طيب اجل بكره من الساعه ثمان تكون عند عليا وتسمعها وش تقول وما له داعي تتكلم
ابتسمت بسخريه :-وانت تتوقع انها تقبل تتكلم معاي او اني اقدر اتحمل اللي بسمعه
ردطلال :- غصب عنك وعليا ما عليك منها انا بتفاهم معاها وانت ما عليك الا انك تكون عندها الساعه ثمان ...ويلا مع السلامه بحاول انام عقب ما غثيتني

سكر الجوال وخلاني لحالي تتقاذفني موجه جديده من الافكار جالس اناظر البحر وافكر في كلامه... معقوله لو سمعتها بلاقي راحتي ؟؟او ان المي وجرحي بيتسع ؟؟
وفي الحالتين كيف بتصرف ؟؟والاهم هي كيف بيكون رد فعلها وكيف بتتصرف ؟؟
وحتى اذا كنت غلطان ياترى بيرضيني تبريرها ؟بيريحني ؟بيغسل همي ؟
ولا بيحملني هم جديد ؟!!!


هـــــــــــــــاجـــــــــــــــــــر


وطيت على يد ابوي وبستها وقلت :- واذا قلت يبه انا حمد هذا نفسي عايفته ما ابيه ؟؟؟؟؟؟؟
سحب ابوي يده ومسح على راسي وقال بلهجه حانيه :- ليش وش فيه حمد وش يعيبه ؟
بلعت ريقي وش اقول اللحين وشلون ارد على ابوي لكن اخذت نفس وقلت
:- حمد ما عليه قاصر ومثل ما قلت على دين وخلق بس
سكت ما عرفت اكمل لكن ابوي قال :- شوفي يا بنتي صدق ان الزواج مو غصب والراي والشور لش ...لكن بعد انا ولي امرش ومن حقي اسأل عن السبب لمن ترفضين واحد
مثل حمد ما يعيبه شي وكل واحد يتمنى يناسبه

يا ربي ابوي صعبها وما اعرف وش ارد عليه وفجأة خطر على بالي اني اقول
:- انا ما انكر يبه ان كل بنت تتمنى رجال مثل حمد بس بعد ما في حره ترضى على نفسها يزوجونها رجال ما يبيها
عبس ابوي وقف :- ومن قال ان حمد مايبيش او اني ارضى لش بهالشي ؟؟
خفت لا ابوي يعند ويقلب علي وساعتها يجبرني عليه فقلت
:- يبه انت تعرف مثلي ان حمد ما جا يخطبني الا عقب ما كلمته انت من بعد اللي صار مع سالم
قاطعني ابوي :- يمكن اكون قلت له يملك عليك بس ما جبرته وهو ما اعترض اصلا واليومين اللي اخذهم كان يفكر فيهم شلون يقنع اهله بالخطبه وهو بعده ما كمل دراسه وانا اقول رجال مثله ما ينرد

طالعت ابوي وحاولت معاه للمره الاخيره :- لكن انت تدري يبه ان الجيران سمعوا اللي صار بين سالم وحمد واكيد يبه تلقاهم يتكلمون .....واذا وافقت اكيد بيقولن ان اخوها على حق ولا ليش يجي يخطبها وهو بعده ما خلص دراسه وهي وافقت على طول ؟....لكن اذا رفضت بينقطع كلام الناس وبيقولون ما رفضته الا لان ما بينهم شي

سكت ابوي يفكر في كلامي وحسيت انه استساغ الفكره وانه بيعدل عن رايه لكنه قال
:- شوفي يا هاجر كلام الناس ما يخلص والزواج يبه حياة ومستقبل وعمر ما يصير نقرر فيهم على حسب كلام الناس لاننا جذي بنخسر واجد وانا اشوف انش تبعدين عن راسش هالافكار ....والاحسن تصلين استخاره وعسى الله يهديش للاحسن

وتركني وطلع من غير ما استفيد شي وكأنك يا بو زيد ما غزيت تضايقت حاولت انام يمكن ظليت على هالوضع ساعتين بعدها استسلمت وفكرت اتصل على عليا طالعت موباليلي لقيت اني ومن غبائي ما شغلت الشاحن شغلته ورحت اتسحب على الدرج اشوف اذا في احد في الصاله او لا ولمن شفت المكان خالي نزلت ورحت عند التلفون ودقيت على عليا
طولت عليا على ما ردت
:- هلا واخيرا ....وين كنتين ما تردين على
رديت من غير حماس :- ابدا هني بس نايمه
طالعت الساعه لقيت انها 1 فقلت امزح :- من اللحين نايمه ؟؟(ورفعت حاجب ) زين ما تبين تعرفين وش صار اليوم

الظاهر اني ما حركت فضولها لانها قالت :- وش رايش بكره تمريني وتقولين وش صار بالتفصيل
تنهدت :- يعني ما تبين تسمعيني ؟؟وثانيا انتي تعرفين ان سويلم مسوي لي حظر تجول

ردت عليا بصوت مبحوح :- ما اظن اخوش يمنعش عقب ما جا حمد يخطبش ...غير اني ما اقدر اجيكم لان خالد مانعني من دخول بيتكم ؟
نسيت موضوعي ورديت بحده :- نعم؟؟؟خير ان شاء الله ؟؟؟ ليش السيد خالد ما يبيش تدشين البيت ؟؟
تنهدت بضيق :- اسألي اخوش
على طول تذكرت منظر سالم وكلامه فقلت :- يعني السعودي اللي تهاوش مع سالم هو خالد ؟

ردت عليا :- تهاوش!! ليش هو اخوش الجبان اصلا قدر حتى يواجه خالد هو ما تحمل رفسه
وشرد
ضحكت وقلت :- وليش تهاوشوا ...اقصد رجلش ضرب سويلم

قالت لي عليا على الموقف وشلون كلمها سالم وان خالد سمعه وانها مقهوره من سالم اللي حطها في هالموقف مع خالد:- تصوري يا هاجر ...ان خالد على باله ان بيني وبين اخوش شي
ولا شلون يتجرأ ويقول لي هالكلام واللي زاد الطين بله اني بكل غباء طلعت من البيت من غير اذنه وكأني اتقصد الغيه

هديتها وقلبتها مزح علشان اغير مزاجها :- يا عيني كل هذي غيره الظاهر الولد خلاص ذاب وما عاد يشوف غيرش
تنهدت عليا :- اي غيره اي خرابيط الا قولي غيظ قهر حقد و.........الم
ابتسمت :- الم ؟؟وتقولين مو غيره مو لو ما تهمينه ما تألم
سكتت شوي بعدين ردت :- اهمه لاني بنت عمه واسمي مقرون باسمه لا غير ......يا هاجر لو شفتينه وهو يطق سالم او حتى شلون يهدده كنتي عذرتيني ساعتها تمنيت اني ما انوجدت
...لو شفتي شلون ما كان طايق حتى يكلمني وشلون غصب نفسه وكلمني ...كانت عيونه مليانه ما ادري عتب ولوم و......... ذبحني يا هاجر لمن صغرني واحتقرني لمن ...

وقفتها :-بس بس يا جولييت كل هذا عرفتيه من عيونه وتقولين ما احبه !!!! ولا تقولين انها مجرد ثوره كرامه وكبرياء لان صوتش يقول غير جذي....وبكره بكون عندش وساعتها بنتكلم على راحتنا

ردت برجا :- هاجر لا تسكرين خلش شوي ...ترى ماني عارفه انام خاصع عقب اللي قررته

استغربت في العادة تقول اذونها عورتها واني اهذر على الفاضي لكني استسلمت:- وش هذا اللي قررتيه ؟؟
ردت بغموض :- مو وقته وصدقيني بتعرفين قبل غيرش
عرفت انها مستحيل تعلمني فغيرت الموضوع :- زين سمعي اهم شي .....
وقلت لها عن كل اللي صار لي اليوم الى لحظة اتصالي فيها وكملت :- والظاهر اني ما لي غير اكلمه بنفسي
ردت عليا :- اولا من وين بتجيبين رقمه ؟ثانيا فكري زين مو يمكن هالفكره تنقلب ضدش ؟
ثالثا والاهم ان ابوش على حق وانا من رايه وفكري زين قبل ما تتهورين وفي ذمتش وش بتقولين له ؟؟

رديت بانزعاج لانها كانت ضد فكرتي:- رقمه موجود في دفتر الارقام عند امي وهذا ما في اسهل من الحصول عليه لان امي تتركه في الصاله عند التلفون ...وما اظن ان الفكره بتنقلب ضدي لان اللي بقوله اكيد بيخليه يتراجع عن خطبتي بنفسه
احبطتني لانها قالت :- وما فكرتين في عمي وش بتكون ردة فعله اذا جاه حمد وقاله له خلاص ما ابي بنتك ؟
حكيت راسي انا فعلا ما فكرت في هالنقطه فقلت :- من اللحين لبكره بشوف لي دبره في هالسالفه (وقلبت الموضوع ) ما قلت لش سالم وش قال
ردت بلا مبالاه :- يعني وش بيقول اخوش غير كلام يسد النفس مثل وجهه

ابتسمت بمكر وقلت لها عن اللي قاله لمن سألته من طقه وفوق ما توقعت ثارت عليا وقالت بحده :- يخسي الا هو الـ............ ما ابي اوسخ لساني علشان واحد مثل هذا ما يعرف وش معنى الرجوله وعمره بيكون رجال ....واللي يتكلم عنهم تراهم احسن منه وما هو الا اقل من تراب رجولهم الا هو الوسخ اللي نعولهم انظف منه ....وخالد هذا اللي مو عاجبه يسوى بلد من اشكاله وتراه عمه وتاج راسه وان كان خالد ما يقبل يكون على راس واحد مثل هذا

ضحكت عليها من قلب :- شوي شوي لا تنفقع مرارتش السعوديين وقلنا هذولا اهلش وانتي على حق...لكن خلودي لا تقولين ان السالفه بس لانه ولد عمش وان رجال وكفو ....ترى انا عارفتنش زين واعرف ان قلبش اللي ثاير على سويلم الله لا يسلمه اللي باليني وبالي الاوادم بس لانه كان يقصد خلودي

وعلى اخذ ورد بيني وبين عليا انا احرق اعصابها كل ما قلت لها انها تحب خالد وهي
وبكل اصرار تنفي هالشي واخر شي قالت
:- انا اصلا ما قلت غير الحق وهذي شهاده فيه لكن بعد مستحيل انسى او اسامحه عقب ما جرحني وشكك فيني

كنت برد عليها لكنها قالت ان في مكالمه جايتها من اخوها



((وداد))


طلعنا للسوق من الصبح علشان نلحق على الوقت خاصه ان العروس معنا كانت طلعه عاديه استمتعنا فيها لكن الغريب فيها ان تركي من ركبنا الى اللحين ما يتكلم الا اذا سألوه خواته او طلبوا منه شي وكانت ردوده مختصره على غير عادته في انه ياخذ ويعطي معهن ....كنت بسأل العنود وش فيه اخوش ؟....لكن تراجعت اخاف يسمعنا ويحسب اني مهتمه فيه
والظاهر ان السالفه مو لافته نظر احد غيري ....طبعا سعاد ونجود نقوا لهم فساتين وما بقى احد غيري اساسا انا احب اخيط في هالمناسبات وما احب الجاهز بس الله يسامحهم الوقت ما يسمح وزين ان العنود قدرت تخيط لها فستان راح يجهز قبل الملكه بيوم ....اخذت العنود على جنب في المحل علشان انقي لي فستان وسألتها
:- وش فيه اخوك اول مره اشوف هالمغرور قافل فمه ولا بالعاده مصدعنا من ظرافته ؟

ناظرتني العنود من تحت البرقع بعتب :- حرام وداد لاتقولين عنه جذي ترى والله تركي حباب وما في منه اثنين .... ويا ريت ادري وش فيه كنت على الاقل شاركته همه
بطلت عيوني :- همه؟؟
سحبت نفس :- ولو انه مو الوقت او المكان المناسب بس الظاهر ان في مشكله او سوء تفاهم بين تركي وبين حد
قطبت حواجبي مستغربه :- حد مثل من ؟؟ومشكله من اي نوع ؟؟
التفتت العنود تتأكد ان تركي بعيد وما يسمعنا :- ما ادري نوع المشكله يعتمد على هالحد من يكون ...وانا شاكه انه اما يكون واحد من ربعه او ......... وحده ما خذه قلبه وهي ولا على بالها
ماادري ليش ضايقتني فكره ان تركي يحب وحده وما حبيت ابين هالشي فشغلت نفسي باني انقي لي فستان ....خلصنا شراء وباقي لنا نشتري جزم طلعنا من المحل وكان يكلم احد في الجوال التفتت للعنود وسأل:- وين بتروحون اللحين ؟؟
اشرت العنود على محل احذيه قريب وقالت بندخل هنا بنشوف
ناظر اسم المحل وذكره وقال :- طيب استناك

دخلنا المحل وهو وقف عنده ما دخل معنا ما عجبنا شي وطلعنا لقيناه واقف مع ماجد وساره
سلم ماجد علينا وبعدين رجع يقول لتركي :- ما قلت لي ان بنات خالي معك ؟

رد تركي عليه :- انت ما سألتني من معي
ناظرني ماجد وسأل :- افطرتوا ؟؟
انحرجت اول مره من خطبني يكون بينا كلام غير السلام لكني رديت :- افطرنا
ابتسم وقال :- اجل انا عازمكم على كوفي ومنها تريحون شوي
ردت عليه ساره :- بس انا ما افطرت (غمزت له ) وفطوري اليوم عليك
وقربت مني وقالت :- ما قلتي لي وش شريتوا؟؟
رديت عليها وحنا نمشي للمحل ورى ماجد وتركي اللي دق جواله ورد عليه بحراره
تركي :-هلاااااااااااااااااا عاش من سمع هالصوت
:-..................................
تركي :- وينكم فيه اللحين ؟؟
:-.....................
تركي :- جد !!من متى ؟
:-.......................
تركي :- افاااااااااااااااااا والله انكم على طول في البال
:-......................
ضحك تركي بقوه :-لاااااااااا إلا هذي و الليله ان شاء الله انا عندكم

مزاجه من هالمكالمه انقلب 180 درجه الظاهر فعلا ان السالفه فيها بنت وواضح من المكالمه انها كانت بعيده عنه ولمن رجعت ردت له الروح ....لمت نفسي وش لك فيه قلعته حب ولا ما حب على راحته ....واذا كان يعرف بنات مثلها ما يسوون فهو الخسران ...والله من يتوقع ان تركي يعرف بنات ؟.....لكن الغروريسوي كل شي .............

نبهتني من افكاري ساره تسأل :- الا متى بترد عليا من البحرين ؟

استغربت اهتمام ساره وسؤالها عن عليا لكني رديت :-عقب اربعة ايام ليش تبين منها شي ؟
رفعت حواجبها مستنكره :- انا ابي منها شي !!! مستحييييييييييييييل
لويت فمي مع انها ما تشوفه وقلت :- وليش مستحيل ؟
ماردت ساعتها قلت للعنود بهمس :- الظاهر ان حبيبة اخوك رضت عليه
همست لي :- ليه وش معنى حكمتى ان عنده حبيبه ؟
رديت:- ما شفتي كيف مزاجه انقلب لمن كلمته واضح من كلامه انه يكلم بنت
قرصتني في يدي وقالت :- حرام عليك تظنين ...وثانيا ما كان مبين اذا يكلم بنت او ولد واذا فعلا يحب بنت تركي مستحيل يسوي اللي في راسك ترى تركي اذا حب ما بيكلم ويبني علاقات زي كذا لا ...تركي اذا حب بيروح من باب بيتهم ويخطبها

يخطبهاااا تركي يخطب...عورت قلبي هالكلمه ما عرفت ليش كرهت ان تركي يحب او يخطب... لا المفروض انه يضل عازب اصلا تركي ما يناسبه ان يكون متزوج
دخلنا الكوفي وجلسنا على طاوله في جنب متداريه عن باقي الطاولات باصيص من نبات الزينه وجلسوا الشباب في الطاوله اللي قدامنا تكلموا شوي وبعدها جانا سالم
:- وش تشربوا ؟
ردت نجود :- كلنا نبي كابتشينو وساره ما اعرف وش تبي
ردت ساره :- كلها كرواسون وكوفي
نزل لها ماجد وهمس في اذونها بشي ابتسمت وقالت :- طيب طيب اللحين بقول
ابتعد ماجد وصى على الطلب وجنبه تركي وهم راجعين قال شي لتركي على طول تركي عبس وجا عند طاولتنا في اللحظه اللي همست ساره في اذوني
:- ماجد يبي طلب صغيرون ....يبي شيئين طلبهم مني وانا قلت اول اشاورك ....يبي صوره لك ويبي رقم جوالك
ذي من جدها جالسه تشاورني وقبل ما ارد عليها سمعت صوت طلال بغضب يقول
:- يلا مشينا
قالت نجود :-والكابتشينو
رد عليها بحده :- اذا وصلنا البيت صلحي لك واحد
شهقت نجود :- نرجع الحين ؟؟بس حنا ما كملنا اغراضنا
رد بهدوء لكن بلهجه امره :- مره ثانيه خذوا اللي ناقصكم بس اللحين كلكم بتجون قدامي على البيت
ساعتها قرب ماجد منه وقال :- والله اذا بترجع خواتك على كيفك بس بنات خالي بو طلال خلهم يكملون اغراضهم معنا
التفت له تركي ولازالت عيونه تنفث شرار :- كلهن مثل ما جوا معي بيرجعن معي
ومشى قدامنا تقدمت نجود والعنود ووقفت سعاد لكني وقبل ما اوقف قال ماجد
:- وداد انتوا تبون تردون البيت ؟؟
ما رديت لان اللي الكلام اللي قالته ساره صدمني خلاني اغص بعبرتي ولا عرفت اتكلم لكني اخذت نفس وقلت
:- يلا يا سعاد نرجع البيت
رجعنا البيت نزلت سعاد وقبل ما انزل قال تركي
:- نجود نزلي واتنوا خلكم معي
نزلت نجود وفتحت الباب بنزل لكنه قال :- سكري الباب ترى ما تشوفين طيب
خفت من حدة لهجته وسكرته وقبل ما يحرك السياره سألني
:- وش ردك على ماجد يا وداد ؟
انصدمت هذا وش دراه :- وانت شدراك ؟
رد ببرود وهو يناظرني من المرايه :- هو قال

ثار الدم في عروقي لهالدرجه يعتقدون اني رخيصه رايح يعرض على اخته انه يبي يكلمني ويبي صورتي وهو ما بينا اي شي غير كلام يعني ما احل له او يحل لي وفوق هذا يقول لصاحبه والثاني جاي يسمع ردي رديت بغضب وحراره مثل حراره النار اللي تلهب بجوفي
:- انتم ما تحسون؟ ...تحسبون بنات الناس لعبه ...انا ابي اعرف من سمح لكم تعتدون على بنات الحمايل وتسترخصونهم و...........
ردبهدوء :- يعني انتي رافضه عرضه ؟
قهرني بروده :- ليه هو انتم تحسبوني رخيصه ولا قليله تربيه علشان اقبل عرض وقح ومشين مثل اللي عرضتوه
هاج تركي وصرخ :- لا تعمممين وهالكلام وجيه له مو لي
سكت ونزلت دموعي تجري انهار عمر ي ما تصورت اني انحط بهالموقف نزلت العنود وجلست جنبي ضمتني وقامت تهديني وعقب ما خلصت نوبه بكاي قلت لها
:- ابي انزل البيت
لكن تركي رد :- مو قبل ما نقضي مشوارنا
استغربت وش هالمشوار لكن العنود قالت :-اي مشوار الله يهداك انت ما تشوف حالة البنت
غير ان هالمشاوير كلها تتأجل
رد برود:- الا هالمشوار ...بتنزلين تجلسين قدام ولا احرك ؟؟
طبعا العنود شافت انها مو عدله تترك تركي جالس قدام وكأنه سواقنا وفي نفس الوقت مو عارفه تتركني علشان كذا قالت لي
:- وداد انا بنزل قدام ...عادي اتركك؟
لكني مسكت في يدها وقلت ومو هامني اذا صار تركي لحاله قدام او لا
:- لا خليكي جنبي


علــــــــيــــــــــــاء


الساعه اللحين سبع ونص طبعا البارحه ما نمت من اول وانا بالي مشغول احترق بافكاري وهمومي على مهل وكل ما احاول انسى او اتناسى يجي شي ويذكرني وطبعا الي خلاني اترك محاولاتي اليائسه في اني انام هو مكالمه طلال في اخر الليل ....اول ما شفت ان المكالمه منه وفي هالوقت قلبي نط من مكانه وقمت اهوجس يا ترى وش صاير يخلي طلال يدق في هالوقت
رديت على مكالمته بيد ترجف ونفس لاهث
:- هلا طلال عسى ما شر
رد بهدء :- اهلين ....حنا الحمد لله ما فينا شي بس انتم وش فيكم ؟
ارتحت شوي ان ما فيهم شي بس بعدني حايره من سبب اتصاله هالوقت ومستغربه سؤاله
:- ابد حنا ما فينا شي
رد علي :- طيب ممكن تقولين لي ليش خالد معتفس وانت مو على بعضك ؟؟
كذبت :- تلاقي الشغل تاعبه وانا ما فيني الا العافيه
الظاهر ان عنده خبر بكل شي لانه قال :- عليا اذا حبيتين تدعين انك بخير وانكم ما بينكم شي فبراحتك ....لكن خالد انا عارفه زين وعارف انه فيه شي شاغل باله ومو مريحه
ومثل ما انتي اختي وارتاح لراحتك ترى خالد اكثر من اخو ويضايقني اني اشوف الهم ماكله

سحبت نفس طويل يعني هو يغلط وانا انلام :- وانا وش دوري في هذا كله ؟؟
سكت طلال شوي بعدين قال :- ريحيه ترى عذابه وراحته في يدك
انا بكبري مخنوقه واحس ان كرامتي مهدوره بس عقب اللي قاله طلال حسيت انه يبيني اقدم روحي قربان لراحة اللي طعني :- وشلون بالله اريحه ؟؟ اذبح روحي ولا اسمح له انه يهيني ويذلني اكثر
رد طلال رد غريب :- ريحي حالك وساعتها بيرتاح
ما فهمت وش يقصد فقلت :- شلون يعني ؟؟

طلال :- خالد كرامته مجروحه وتنزف بقوه والسبب هو ذاته اللي متعبك ومبعدك عن الكل
وانا اقول انك اذا سمحتي له يشوف روحك من الداخل اكيد بيرتاح وانتي بعد بترتاحين

غمضت عيني طلال يبيني اعري نفسي وروحي قدام خالد :- انت وش تبيني اسوي بالضبط

طلال :- ولا شي ابيك تجلسين مع خالد وتفتحين له قلبك
رديت بعصبيه :- بس ولد عمك ما يبي يسمع شي انا اخاف اذا قعدت معه بدل ما يسمعني يطعني ...

طلال :- هالمره غير هالمره خالد بيسمعك والى الاخير بس على شرط ......انش تقولين له كل شي وبالذات تفاصيل مكالمتك مع امك لانها هي اللي حارقه قلبه ومسهدته .....الصراحه انه كسر خاطري وكنت بقوله كل شي ...بس انا وعدتك غير اني اشوف انه لازم يسمع هالكلام منك ...وعلشان يقدم لك الاعتذار المناسب ....وبالمره وضحي للاخ الغيور سالفه ولد الجيران اللي ماني عارف لها ساس من راس

حتى هذي وصلت طلال :- هو قالك عن اللي سواه سالم
رد :- هو ما كان بيقول شي بس عمرك شفتي احد يقبض على جمر وما يصرخ اااااه

اذا كان قابض على جمر فانا قلبي هو اللي ضام الجمره :- انا بقول له كل شي بس خليه يعرف اني ما بقبل اعتذارته واني اذا كنت بسامح فبشروطي

رد طلال :- قويه يا بنت يوسف وانا اقول انه يستاهل علشان يحرم ..... انا اللحين بروح انام وانتي بكره بنفسك قولي له هالكلام ...تراني عزمته عندك على الفطور الساعه ثمان

ومن سكر التلفون وانا مو عارفه انام اخيرا نزلت وشغلت نفسي في تنفيض الغبار من ولهيت نفسي بشغل البيت الى الساعه سبع دخلت المطبخ عقب ما تحممت ولعت فحمه علشان ابخر البيت
ولاني شفت ان عندي وقت قبل ما يجي شغلت نفسي في اني اقلي كم بيضه وحطيت الشاي على النار..... دق الجرس طالعت الساعه لقيتها ثمان بالضبط جدي اللي كان شاغل نفسه في الزرع هو اللي راح يفتح الباب وانا ساعتها ارتبكت ما عرفت وش اسوي
حملت صينية الريوق وحطيتها في الصاله ووقفت اضبط نفسي على السريع
وساعتها انفتح باب الصاله ودخل خالد بروحه



الى هنا وانتهى البارت
اعذب وارق الاماني
في امان الله

يسلموووووووووووووووووووووووووووووووووووو بس يا الله دايما بتقفلي البارت على شي هيك بيشد وبيحرق وبحرقص شو يصبرني انا على الي بدو يصير بين عليا وخالد وعلى المكان الي راح يوديهم عليه تركي وبنستناكي عنار يا عسل

السلام عليكم
الف الف شكر على انزالك الجزء وبسرعة جد قصة جميلة وسطورك رائعة وان شاء الله دوم هذا النشاط اذا نشاطك واذا نشاطنا
اولا حبيت اعلق على ماجرى في الجزء السابق عزيزتي معاميريا اعزائي القراء هي قصة تعتبر مزيج بين مجتمعين اكيد يوجد تنافر مثل ما موجود تجاذب والمجتمع الواحد يحتوي اكثر من شخص ولكل شخص ايجابيات وسلبيات وهناك من هو التافه الاراء (اسفة ) فعليه اذا اتت كلمة قبيحة من شخص تافه اعتقد انها اكبر شهادة فخر ممكن ان تصدر للشخص الذي قليت به الكلمة >>وجهة نظر
نجي نعلق على الجزء
طلال (حمامة السلام )
رائع جد تصرفه هو تكلم مع الاثنين والاثنين صارحوه ولكنه لم يتدخل بقرارتهم وبذالك سوف يساعدهم على فهم بعضهم بعض دون تدخله لانه اذا تدخل في البداية بشكل عميق سوف يبقى العمر كلها يشتغل حمامة سلامة بين اعز اصدقائه واخته اعتقد الامور ممكن ان تتحسن قليلا بينهم لان الشك صعب زواله ولكن ممكن مع الأيام يخف
ماجد وسارة
عائلة خربانة هذا لو تركي كان خاطب وداد وطلب من العنود هذا الطلب كان وقفت بوجه بس هذي سارة ألي عدها عادي مثل هذه التصرفات
لا وألي زاد الطين بلة هو يتباهى امام تركي بما طلب وكأنه يقول له انظر كيف سوف تلبي طلبي وامام عينيك اذن انت ومشاعرك الى الجحيم ونعم الصديق حقا
ولكنه سوف ينال ما يستحق بعد مشوار تركي الذي لا اعلم الى اين ننتظرك
هاجر (خطوبة الاحلام اصبحت كابوس )
يابنت الحلال المراءة او الرجل مرة واحدة يشعر بعمق الحب في حياته صعب تكرار مثل هيج تجربة وانتي اعطاك الله الحب بالحلال وتبحيثين عن مخرج يخرجك منه صحيح اصحاب العقول براحة تريثي قبل ان تندمي فالنار التي تعتقدين انك تبتعدين عنها سوف تكون حامية على قلبك ان وجدت طريقة لتدمير هذه الخطوبة وكوني فتاة عاقلة واسمعي كلام والدك
معانيرية بكل الشوق انتظرك وانتي بكامل نشاطك ودعي الاحباط جانبا
وفق الله
همسة عند قرائتي للجزء وجدت لخبطة بالاسماء وهذا المقطع هو المقصود
الشباب في الطاوله اللي قدامنا تكلموا شوي وبعدها جانا سالم
:- وش تشربوا ؟
ردت نجود :- كلنا نبي كابتشينو وساره ما اعرف وش تبي
ردت ساره :- كلها كرواسون وكوفي
نزل لها ماجد وهمس في اذونها بشي ابتسمت وقالت :- طيب طيب اللحين بقول
ابتعد ماجد وصى على الطلب وجنبه تركي وهم راجعين قال شي لتركي على طول تركي عبس وجا عند طاولتنا في اللحظه اللي همست ساره في اذوني
:- ماجد يبي طلب صغيرون ....يبي شيئين طلبهم مني وانا قلت اول اشاورك ....يبي صوره لك ويبي رقم جوالك
ذي من جدها جالسه تشاورني وقبل ما ارد عليها سمعت صوت طلال بغضب يقول
:- يلا مشينا
قالت نجود :-والكابتشينو
رد عليها بحده :- اذا وصلنا البيت صلحي لك واحد
شهقت نجود :- نرجع الحين ؟؟بس حنا ما كملنا اغراضنا
رد بهدوء لكن بلهجه امره :- مره ثانيه خذوا اللي ناقصكم بس اللحين كلكم بتجون قدامي على البيت