كاتب الموضوع :
معاميريا
المنتدى :
القصص المكتمله من وحي قلم الاعضاء
الجزء السابع
((حيره!!))
نــــــــجـــــــود
ما صدقت ان خالد طلع وان علياء صارت لحالها ...وقبل ما تجي علياء لنا رحت لسعاد وقلت لها
:- سعاد يلا خلنا نروح لعلياء خاطري اعرف وش قال خالد لها
ضحكت ندى وقالت :- لا تحلمون تقول لكم ...مع اني ما اعتقد ان خالد بيقول شي
ابتسمت وقلت لها :- هو صحيح ان خالد جدي ومو رمانسي بس شكل علياء مو شوي ((غمزت لسعاد)) اكيد حركته
ردت سعاد :- ما عليكي منهم انا بجي معك
التفتت وداد على العنود وقالت :-الظاهر حنا بعد بنروح معهم ...لاني
اتوقع علياء تستحي تجلس وسط الحريم
وافقتها العنود وندى بعد اما ساره قالت :-اذا كذا انا بجي معكم ((رفعت كتفها وبررت )) ما احب اجلس مع الحريم لحالي
ابتسمت لها العنود ومدت يدها لها اشارة يلا مشينا...ودخلنا كلنا المجلس على علياء اللي كانت تلعب في تلفونها رفعت راسها لنا وابتسمت في وجهنا جلست سعاد جنبها على الكنب والباقي جلسنا على الكنب اللي قبالها سعاد لفت انتباها الجوال اللي في يد علياء وقالت
:- الله وش هالزين ((غمزت)) جوال جديد واخر موديل... لا تقولين هديه من المعرس
ابتسمت علياء بخجل وهزت راسها علامة نعم وكملت سعاد
:- طيب ممكن اشوفه ؟؟
مدت لها علياء الجوال وقالت :- تفضلي ... وبالمره سجلي رقمش
عاد انا هنا ما استحملت نطيت عند سعاد اشوف الجوال وقلت لعلياء
:- وانا ما تبين رقمي ؟((وبوزت )) والله ناس وناس
فتحت علياء عيونها على وسعها وقالت :- لا ابدا بس يا عيوني
خالد سلمني الموبايل وفيه ارقامكم وما ناقص غير ارقام خواتي
رفعت حاجب وقلت :- ايوه امممممممم ... وبطاقه بعد
سجلت سعاد رقمها وبعدين دقت على جوالها من جوال علياء واول ما شافت الرقم صفرت :- وفاتوره بعد((واشرت علي)) مو مثلنا كل شوي نشحن
تدخلت وداد :- على بالكم هي بزر مثلكم ... اكيد بيكون فاتوره ((وناظرت سعاد )) دقي على جوالي خليني اسجل رقم علياء
والغريبه ان ندى قالت :- وانا بعد
اما علياء ردت :- ولا تنسين تسجلي ارقامهم عندي
سعاد ناظرت ساره وقالت :- ان شاء الله ...وانتي ساره ما تبين رقم علياء
الكل التفت لساره يستناها تجاوب لكنها بكل برود قالت :- لا ما لي حاجته
ما عجبني ردها وقلت لسعاد :- سعوده وش فيك يكفي ارقام الحبايب
ولا تبين تملين الجوال ارقام وبس
العنود خزتني بنظره بمعنى زودتيها وسكتي احسن لك وقربت من علياء
وسألتها :- اذكر ان جوالك القديم كان بيدك وينه اللحين ؟
ما ادري ليش علياء اول ناظرت ساره بعدين قالت:- ابدا ... كان فيه خلل
واخذه خالد علشان يصلحه .
ردت ندى باستغراب :- ما له داعي يصلحه ما دام عندك جديد
ابتسمت علياء :- عندك حق بس هو شافني متعلقه فيه علشان بعض الاشياء المحفوظه فيه فما حب يكسر بخاطري واخذه علشان يصلحه
عاد هني انا وسعاد مسكناها تعليقات وسالناها بحشريه واضحه :- الا ما قلتي وش قلتوا ؟
وقبل ما ترد علياء قالت ندى :- وانتوا وش عليكم ؟ وبدل الهذره اللي ما لها معنى روحوا زهبوا لها عشى
ردت سعاد عليها :- طيب طيب ... ثواني والعشى يكون عندكم
وصينا الشغالات على العشى وكان عشاء هادئ خالي من الاحاديث لاحظت ان علياء ما اكلت الا كم لقمه وتوقعت ان السبب توتر العروس ليلة ملكتها خلصنا العشى والكل انشغل بالسوالف ندى مع ساره ووداد مع العنود وانا وسعاد قعدنا نسولف جنب علياء اللي ما كانت معانا فسألتها
:- علياء اللي واخذ عقلك ...وش فيك كل هذا تفكير في خلودي
ردت وكانها توها صاحيه من النوم :- هااااا... لا ابد بس افكر في هاجر رفيجتي معقول للحين ما اتصلت علي ؟
ردت سعاد بلا مبالاة :-عادي يمكن تكون مشغوله ولا عندها ضرف ...واذا انتي قلقانه عليها كثير دقي عليها
نزلت علياء راسها ورفعت ايدها تلب في شعرها وقالت :-ايه بس انا مو حافظه رقمها ومن الربكه عطيت خالد موبايلي بالبطاقه
قالت سعاد :- بعد محلوله دقي على خالد وقوليله انك نسيتي بطاقتك في الجوال وبيطرشها لك
طبعا من قالت سعاد اسم خالد عم الصمت المكان والكل ركز انظاره على علياء اللي قالت :-ايه بس استحي ادق عليه و.........
عاد انا ما استنيت علياء تكمل تبريراتها ومديت يدي على جوالها وقلت وانا ادق رقم خالد :- لا تستحين انا بكلمه
واول ما طاحت عيني على الاسم اللي ظهر على الشاشه قلت وانا اغمز:- اكيد بتستحي مو الاخ طلع اسمه ((لهيب الروح ))
وقبل ما تبتدي التعليقات رد خالد على اتصالي وتكلمت قبل ما ينطق باي كلمه :- هلا باخوي هلا بلهيب الروح
دزتني علياء وقرصتني في نفس اللحظه اللي رد خالد علي فيها وقال
:- لهيب الروح ؟ !!! من متى هالدلال قولي وش تبين؟؟
غمزت لعلياء وقلت :- هذا الكلام قوله للي التهبت روحه من رؤياك
(هالمره قرصتني علياء بقوه فصرخت) ااااااه خذ كلم زوجتك المتوحشه.
رميت الجوال في حضن علياء وبعدت عنها قبل ما تسوي فيني شي
وقلت للجماعه وبالذات ساره اللي من سمعت اسم خالد بطلت عيونها
وبان على وجهها القهر من سمعت اسم خالد في جوال علياء
:- يلا يا جماعه نخلي البنت تكلم زوجها على راحتها من غير عواذل
وقفوا البات وطلعنا كلنا من المجلس وتركنا علياء لحالها
((علـــــــــــــــــــيـــــــــــــــــاء))
يمكن لمن غيرت اسم خالد الى لهيب الروح كنت قاصده اغيض ساره
بس ما توقعت الامر يجي بهالسرعه ولاتخيلت الموقف يكون محرج بهالطريقه والمصيبه ان نجود وهقتني مع خالد رفعت التلفون من حضني بلعت ريقي وغمضت عيني ورديت على خالد
:- سلام.خالد انا....
قاطعني وقال:-شوي شوي ... وعليكم السلام واللحين قولي وش اللي تأمرين عليه
حطيت يدي على رقبتي وميلت راسي على جنب كاني بابعد التوتر بهالطريقه :- ما يامر عليك ظالم خالد ...انت اخذت موبايلي وبطاقتي فيه وانا
سمعت صوت ضحكته وبعدها قال :-ادري وصدقيني انا قاصد البطاقه مو الجوال ولا صدقتي اللي قلناه لطلال
اخذت نفس قوي هالمكالمه شكلها بتستنفذ كل طاقتي الباقيه :- لا بس انا انتطر مكالمه من رفيجتي واخاف تدق علي وتزعل اني ما رديت عليها
سكت شوي وبعدها قال:- جوالك ما فيه أي مكالمات لم يرد عليها ولا مسجات جديده ... واذا على صديقتك ما اظنها تزعل عليك في يوم ملكتك
رديت كمحاوله اخيره :-طيب عطني رقمها وانا ادق عليها من الموبايل الجديد
ما صدقت انه قال :- طيب وش اسمها عشان اعطيك الرقم
ابتسمت واخيرا فرجت :- راح تلاقي رقمها تحت اسم ((نصي الثاني))
ما ادري ليش حسيت من رده ان الجو تكهرب :-
نصي الثاني ؟ لقيته هذا رقم جوال ...وما قلتي لي ضروري تتصلين ؟
ما عجبتني لهجته لكني رديت :- اكيد هذي اعز رفيجاتي واغلاهم على قلبي
رد بجفاف :- واضح مو نصك الثاني الا وش اسم نصك الثاني ؟
حيرني طلبه لكن هي لحظه وادركت اللي يدور في باله فقلت له بغضب
:-انا ما اسمح لك تظن فيني ولمن اقول ان هذا رقم رفيجتي فأكيد هذا رقمها ... ويكفي الى هني ورجع لي موبايلي.
ردبكل برود ولا كأني قلت شي :-صدقيني اذا نصك الثاني دق راح اخليك
تكلمينه ... وقبل ما اسكر ما قلتيلي هذا غير لهيب الروح ؟
كنت ناويه ارد بغضب وهياج واطالب بموبايلي بس صعقني سؤاله واربكني وما عرفت وش اقول:- هم ...لا هذا غير ...هذا هذا .........
قطع جملتي الغير مفهومه وقال :- مو مشكله اشوفك اذا دق نصك الثاني
وساعتها يصير خير يا بنت عمي...
سكر الخط وقعدت يمكن ربع ساعه ابحلق في التلفون احاول استوعب الي صاراخيرا طالعت الساعقه لقيتها قربت على 12 والاخت هاجر ما تسهر الى هالوقت اكيد نامت ونستني وانا سويت لي سالفه علشانها وانا على هالوضع دخلت ندى وعلى وجهها ابتسامه عريضه
:- زين انك خلصتي مكالمتك ..واللحين قبل ما اروح انام تأمرين على شي؟
رديت لها ابتسامتها وقلت :-ما يامر عليك ظالم ...انا بعد ودي انام
ضحكت :- تنامين لسه بدري!! يعني بالعاده العروس ما يجيها نوم .
رديت عليها :- عاد انا غير احس ان جسمي كله متخدر وابي انام
هزت ندى راسها بتفهم وقالت :- يلا اجل وانا اللي اقول اني الوحيده فيكم اللي بنوم من بدري
وصلتني ندى للغرفه وراحت على غرفتها وانا ما صدقت بدلت ملابسي ومسحت المكياج ونمت على طول على عكس توقعاتي اني ما بقدر انام
لكن التعب هدني وخلاني ما اقدر اقاوم وانام
((خــــــــالــــــــد))
كنت قاعد وسط الشباب لمن دق جوالي وشفت ان المتصل عليا
استأذنت من الشباب ورحت عند المسبح ورديت عليها اثار استغرابي ان نجود هي اللي كلمتني وعلق في دماغي اسم لهيب الروح معقوله يكون اللي فهمته صح وان عليا استبدلت اسمي في الجوال بلهيب الروح
طيب ليش ؟ووش معنى هالاسم ؟او معقوله يكون اسم لشخص ثاني واقنعت البنات انه لي حطيت يدي على راسي ابي اوقف هالسيل من الافكار اللي اثارت اعصار من الحيره بداخلي وهنا فتحت جوالها اللي كان صامت واول شي فتحت قائمة الاسماء اللي ما كانت كبيره ومليانه اسماء بنات وكم اسم ذكوري مثل ابوي ابو محمد ابوي ابو طلال
خالي بو جاسم عمي بو عيسى وهذا اظنه جارهم الشيبه اللي وصل اليوم علشان يحضر الملكه.........المهم ما كان في اسم محير غير نصي الثاني
شفت الكالمات المستلمه والصادره اغلبها الى هالرقم معقوله تكون فعلا صديقتها او شخص ثاني وهي قاعده تستغفلني اوقات المكالمات كانت لا تسمن ولا تغني من جوع صحيح مافي مكالمات في وقت متأخر بس هذا ما ينفي انه رقم ولد ....واساسا اذا ما كان رقم ولد اجل من اللي كان يكلمها في المطبخ يبيها تهرب علشانه؟
فتحت الرسائل الوارده كلها رسائل عاديه تهنئه بالعيد والنجاح واكثرها من نصي الثاني وكانت من ضمنها رساله لفتت نظري
((سلام يا قلبو ...ادري انش متوتره ...بس ولا يهمش بكره اشوفش
وصدقيني اذا تكلمتين بترتاحين ....الا صحيح ما قلتين خلودي حلو ولا جيكر(جيكر =قبيح) سلامات))
اكيد هذا ولد وش يحسب اصغر عياله يقول خلودي ااااه انا لازم اوقفها عند حدها لا وشغاله لقاءات بعد
كنت ناوي اسكر الجوال بس قلت يمكن اشوف رد الرساله في الرسائل المرسله وما لقيت شي يلفت النظر غير رساله وحده الى نصي الثاني
((سلام هجور تكفين تعالي ابيش ضروري ))
سندت ظهري على الكرسي ورميت راسي على ورى وفتحت عيني اطالع السما معقوله اكون ظلمتها وفعلا كانت تبي تكلم صديقتها ابتسمت وانا اتذكرها تصرح تبي جوالها من حقها تغضب بس كون نصي الثاني طلع فعلا بنت هذا ما ينفي المكالمه اللي سمعتها ايوه المكالمه ...رحت للمكالمات المستلمه وبالذات بتواريخ تواجدها في السعوديه وكانت وحده من نصي الثاني والثانيه من امي نجاة
امي نجاة!!!كانها تتكلم عن وحده غريبه تناديها امي..معقوله تكون فعلا كانت تكلم امها ؟!! معقوله امها تقول لها هالكلام ؟!!
ولا يمكن تكون مسحت الرقم الي استلمت منه المكالمه ولغته من جوالها
بعد ما رفضت او خافت انها تهرب معاه
رجعت الجوال الى مخباي وهو على وضع صامتجلست ادلك رقبتيمحاوله مني لتخفيف الم الراس واهون على نفسي باني مهما طال الزمن بعرف الحقيقه وبكره ان شاء الله بعرف كل شي وبانهي هالحيره وثورة الاسله اللي مسيطره علي
((تــركــــــــــــــــــي))
عقب ما طلعوا المعازيم جلسنا كلنا الشباب مع بعض وكلها نص ساعه واستأذن عبد العزيز وفراس نايم على ذراعه يبي ينام خاصه ان وراه مشوار بكره والشياب طبعا كلمعتاد اول من قام ينومالتفتت لخالد وقلت
:- اللحين انا ابي اعرف صار لك فوق الساعه مع البنت وانت اول مره تتكلم معها وش تقول لها ؟
تدخل سلطان وقال :-اول مره يكلمها اكيد غثها بقصة حياته ضحك طلال وقال :- مسكينه اختي شلون قدرت تستحملك
حط خالد يده على كتف طلال وقال :- انا بكون احسن منك وما بخلي اختي تعاني وبقعد معاها اخفف عنها
مسك طلال يد خالد وقاله :- تكفى لا تكلف نفسك وتقعد معنا واحنا بنتصبر على فراقك
ضحكنا عليهم وبالذات على طلال وقطع ضحكنا جوال خالد رفع الجوال شاف اسم المتصل ابتسم وقال:- بالاذن اخلص هالمكالمه وارجع لكم
رديت عليه :- قول تصبحون على خير ... ولا تنسى تصحينا لصلاة الفجر
ابتسم وهز راسه تركنا وعقب شوي قام طلال :- يلا تصبحون على خير
رد عليه ماجد:- لا تقول انك بتنام لان خالد قام
ابتسم طلال وقال :- اكيد السهره ما تحلى من دونه غير ان وراي بكره قومه من الصبح علشان الجماعه اللي بترجع البحرين
وشوي الا سلطان متسحب بيروح يسهر مع ربعه وما بقى غيري انا وماجد وما ادري ليش ما حبيت اجلس معاه ؟
او بالاصح ادري بس ماني قادر اتقبله او اسامحه على انه اخذ وداد مني صحيح هو ما يعرف اني احبها لكنه يعرف اني كنت ناوي اخطبها
اول ما ارد من السفر والقهر انه بكل بساطه اتصل فيني على لندن علشان يقول لي
:- ابشر يا تركي بتزوج
وانا الغبي على نياتي فرحت له من قلب وسألته :- صحيح تستاهل كل خير ... ومن سعيدة الحظ نعرفها ؟ من العيله يعني؟
سكت بعدها رد علي :- الصراحه يا تركي ان الوالده هي اللي اختارتها وانا ما حبيت اردها
ابتسمت وقلت :- وش فيك تتكلم كذا ليكون العروس جيكره ؟
ردوكانه متردد يقول لي :- لا العروس ما عليها كلام ....العروس هي وداد بنت خالي بو طلال
سكت وانا بعد سكت انصدمت ما عرفت وش اقول حاولت اتكلم لكني كنت احس نفسي اغرق بانفاسي بس جاهدت وكل اللي نطقت به :-ومتى الملكه ؟
ردبعد تنهيده مسموعه:-عقب ما تخلص البنت جامعتها...هذا شرطها اول تكمل دراستها
يعني لسه باقي سنتين ليش استعجلت على ذبحي يا ماجد ؟!!على الاقل استنيت لمن يخلص كابوس الغربه وبعدين هدمت حلمي اللي مصبرني
اذكر اني همهمت بكلمات ما اذكرها قبل لا اسكر السماعه ومنها وانا احس اني كل ليله ارقد على شوك والعجيب اني كل ليله اشوف ماجد معرس وان العرس يقلب عزا....
وعيت من ذكرياتي على صوت ماجد يقول :-هي ابو الشباب وين رحت ؟
رديت بكل برود :-ابد بس من الصبح وانا واقف على حيلي والتعب هدني وصار لازم اقوم انوم...يلا تصبح على خير
وتركته قبل ما اسمع رده
صحيت من الصبح متأخر على موعدي المعتاد وزين ان خالد صحانا لصلاة الفجر تلقت لقيت ماجد نايم طلعت اشوف باقي الشباب خالد وطلال مو موجدين اكيد راحوا يوصلون جماعة البحرين للمطار وطبعا سلطان وفيصل لسه نايمين
وبعد ما استحميت دقيت على العنود وابتسمت :- صباحو فل
ردت على بمرح :-صباحو عسل ...امر تدلل
لهجتها رفعت من روحي المعنويه سألتها :- افطرتي ؟
بكلمه وحده ردت :-لا
قلت لها :- انا ماني حاب افطر لحالي فاختاري واحد من اثنين اما تجين معاي نفطر برى او تجهزين لنا الفطور ونطر هنا مع بعض
ردت :-خساره الفطور جاهز لكن تدري تعال بفطر معاك في الحديقه في الهواء الطلق
ابتسمت وقلت لها :-صار ..بس لا تنسين تخبرين البنات ان في حظر تجول
ردت بسرعه ولا يهمك كلها خمس دقايق ويكون كل شي زاهب
........توني بحط لقمه في فمي الا جوالي يدق والمتصل خالد رفعت السماعه وبعد السلام قال :-اسمع خبر سلطان يرجع الشياب على الرياض وانت خذ معاك امي وخالتي والشغالات
سألته بدون تفكير :- والبنات ليكون ماجد بيرجعهم ؟
قال خالد باستغراب :- ليش ماجد ما رد مع اهله البارحه؟
قلت له :- لا اساسا هو لسه نايم
رد خالد علي :- مو مشكله البنات راح يكونون معاي وكلها كم دقيقه وكون عندكم ...يلا سلام
سكر الخط قبل ما ارد عليه اكلت وانا شعوري بلا ملامح ما اعرف ان كنت فرحان ان وداد ما بتكون مع ماجد ولا متضابق لانها ما بتكون معاي وانتبهت على العنود تسألني
:-وش يبي منك خالد ؟
ابتسمت ورديت عليها :- ابد بس يخبرني اننا اليوم بنطلع الرياض ويقول زهبوا حالكم لانه ما يحب يستنى
فتحت العنود عيونها على وسعها وقالت :- ليش ؟!!وش يستنى مو احنا بنكون معاك ؟
قلت لها وانا ابتسم بخبث :-لا خالد الي بياخذكم ...انا رجال زين تحملتكم في الجيه وما اقدر اتحملكم في الرده ترى خالد كلها عشر دقايق وتلقينه على راسك
وما كملت جملتي الا خالد عندنا ويقول :- يلا حركوا ترى كلها ربع ساعه وانا ماشي
العنود ما صدقت خبر وعلى طول راحت تخبر البنات لانها تعرف ان خالد على صبره عليه الا انه اذا قال فعل
جلس خالد قبالي وقال وهو يمد يده على كاس العصير حقي :- تدري اني للحين ما افطرت
ابتسمت :- ومن ماسكك هذا انت تفضلت من غير عزيمه
ضحك خالد وقبل ما يرد على جت نجود ناحيتنا وقالت لخالد وهي تحط راسها على راسه ومطوقته بذراعاته من وراه
:- خلودي عاد احنا يبي لنا اكثر من ربع ساعه ..واذا ما فيه عليك كلافه ترى امي وخالتي والشغالات زاهبات ...فوش رايك تاخذهم وحنا نرجع مع تركي
طبعا انا تكلمت قبل ما يلين خالد ويطيعها :- نجود حبيبتي انا ما راح اخذكم ....(وغمزت ) وخلي العريس يوصل عروسته حرام تخلينه مع العجايز (ابتسمت نجود وكان الفكره عجبتها وكملت )وعلشان العروس خالد بيمدد لكم المده الى نص ساعه
وقفت واخذت مفاتيح السياره وجوالي واشرت عليهم اشاره سلام
((خــــــــــــــــالـــــــــــــد))
كنت ناوي ارد بقسوه على تركي بس راجعت نفسي ليش لا وش يضرني
رفت راسي لنجود وقلت لها
:- بعطيكم نص ساعه ...وعلى طريقك نادي عليا
كان في عيون نجود سؤال ملح لكني قطعت عليها الطريق وقلت
:-خليها تجيب لي معاها عصير ...(وما ادري ليش حبيت اغيض نجود فقلت ) واذا ما جهزت اغراضها انتوا جهزوها لها
حطت نجود يدها على خصرها وكانها بتعترض على شي لكن فجأة عيونها لمعت وقالت :- من عيوني ثواني وعلياء تكون عندك
وراحت ركض وكلها كم دقيقه والقى بنت بعبايتها وبرقعها واقفه قدامي
وتقول...........
((نجـــــــــــــــــــــود))
اول ما قال خالد زهبوا اغراض علياء تضايقت وكنت ناويه اهجم
وقول ان حنا محنا شغالات وان كا واحد يرتب اغراضه بنفسه
بس فجأة خطرت على بالي فكره ان اغيض ساره وفعلا
رحت اركض ولقيت اللي ابيه البنات كلهم في الصاله فقلت بكل هدوء
:- اسمعوا يا بنات خالد هو اللي بيرجعنا على الرياض ( وغمزت لعلياء ) عنده حق ما يقدر يخلينا وعروسه معنا وعلشانه يقول لكم عندكم نص ساعه تجهزوا فيها انفسكم
ردت ساره خلى الكل يلتفت عليها :- زين اجل بروح ازهب اغراضي علشاني بجي معكم
ما قدرت اتحملها او اجاملها فقلت :- مسامحه حبيبتي بس السيارة يا دوب تشيلنا وتشيل اغراضنا
لكنها ولا همها وقالت بكل برود :-مو مشكله مو انا راح اكون مكان ندى
اللي راحت مع زوجها
رديت من تحت الضرس :- بعد السياره ما تكفي غير ان خالد ما له علم بوجودك معنا
ما اهتمت وردت بكل وقاحه :- انا بقول له وساعتها بشوف اذا لي مكان في السياره او لا....
كلها كم سلمه رقتها على الدرج وقفتها جملتي :- حبيبتي علياء خالد يبيك في الحديقه ويقول لك خذي له عصير ... ولا تخافين تراه وصانا نجهز لك اغراضك.
ساره رقت الدرج بسرعه وعلياء جلست في الصاله وعيت تروح لخالد
وعقب جهد قالت انها بتلبس عباتها وبتروح له
من اللي سبقت وراحت لخالد علياء او ساره؟؟؟؟؟
وش بتقول ساره لخالد ؟وش راح يكون رده عليها ؟
ليش خالد طلب علياء ؟ وش ناوي يقول لها ؟
واتمنى اني عقب هالغيبه ما خيبت ظنكم
اعذب وارق التحايا
|
23-09-08, 11:45 AM
جديد مواضيع قسم القصص المكتمله من وحي قلم الاعضاء
العرض العادي
