كاتب الموضوع :
معاميريا
المنتدى :
القصص المكتمله من وحي قلم الاعضاء
الجزء السادس
(( غصه على غصه))
علــــــــــــيـــــــــاء
تركتني العنود بروحي بعد ما جت لها وداد اخذت الفستان لبسته وانا احاول اسكر السحاب سمعت احد يطق الباب سألت
:- من بالباب؟
جاني صوت ندى :-انا ندى ...جهزتي؟
ومن غير ما ارد عليها فتحت الباب وقلت لها بقلة حيله
:-ما عارفه اسكر السحاب
ابتسمت ومدت يدها وسكرته بعدين مسكتني من كتوفي وخلتني اواجها
ارتسمت على وجهها نظره غريبه ابتعدت خطوتين على ورى وقالت
:- ما شاء الله تهبلين ...عندها حق سعاد ما تخلي ساره تشوفك إلا حتى هم بيندهشون (رفعت راسها وحطت عيونها في عيوني)صراحه صراحه
بعد ما لبستي صرتي شي ثاني (ابتسمت) صرتي احلى
رديت لها الابتسامه ندى غريبه ساعات احسها تكرهني وتحقد علي وساعات احس فيها حنيه غريبه تجاهي ...رفعت راسي ووجهي احمر من الحيا ما اتحمل احد يمدحني سألتها:- من ساره؟...من جيت وانا اسمع اسمها
ردت ندى وهي تفتش على شي :- وين جزمتك لبستيها ؟؟(ومسكت يدي وجلستني على الكنب وقعدت قبالي عقب ما رفعت فستاني علشان اوريها الجزمه)ساره هذي تصير بنت عمتي ام ماجد صديقه وداد والعنود و....(ترددت كأنها تشاور نفسها بعدين قالت) اخوها ماجد متكلم على وداد يبي يخطبها...بس هذي هي ساره
وقفت وقالت:- بنزل تحت بسلم على الجماعه و بشوف الترتيبات وبرجع لك
هزيت راسي وابتسمت طلعت ندى وظليت قاعده بروحي بس هالمره ما في شي يشغلني عن التفكير ااااااااااه يا ربي خايفه والله خايفه من حياتي الجايه و من خالد و اخذت نفس علشان لا اصيح غمضت عيوني وحاولت افكر في اشياء ايجابيه فقلت في نفسي انا بكون وسط اهلي صحيح بعيد عن جدي بس قريب من ابوي اخواني خواتي (وبعدت عن تفكيري ام طلال يعني اذا امي ماتتقبلني اكيد زوجة ابوي ما بتحبني رغم ان تصرفاتها ما تدل على هالشي) وانا جذي فتحت عيني على ضحكت ندى :-هههههههه نمتي ؟؟اصحي ترى عقب شوي بيجيبون الدفتر توقعي عليه
فتحت عيوني على وسعها وفتحت فمي وتحولت ابتسامتي الى ذهول:-ليش هم لحقوا يملكون؟؟؟
ضحكت ندى على شكلي وقالت :-هههههههه شكلك تحفه(مسكت ضحكتها وكملت بجديه) نسيت طلال يقول نزلي عند باب المجلس الشيخ يبي يسمع موافقتك
مسكت يدي ووقفتني وانا بعدني ما استوعب الموقف وكل الي قلته:-هاا
ابتسمت ندى :- ذكرتيني بيوم ملكتي (مسكتني من يدي وكملت )يلا ترى ما في وقت للسوالف ترى فشيله نتأخر على الشيخ
سحبت يدي من يدها وقلت وانا ااشر على فستاني :- انزل للشيخ جذي؟؟
فستاني كان طويل لونه تركواز قطعته حريريه ضيق من فوق ومن عند الحوض يتوسع... عند الصدر في حركة تكسيرات ومن تحت الصدر في كرستالات طبعا هو علاق وعلاقه من الكرستال بس المصيبه ظهر الفستان مفتوح على شكل مثلث وفيه اكسات من الكرستال
طالعتني ندى وهي ماسكه ضحكتها وقالت :-انتي بتكلمينه من ورى الباب
وشدتني من يدي ومشت واول ما وصلنا لباب الغرفه قلت لها:-ندى هاتي شالي استحي طلال يشوفني جذي
طبعا ندى ولا اهتمت لاعتراضي وقالت :-ما في داعي وثانيا هذا انا طلال بيشوفني اجل اروح البس عبايه لان فستاني قصير وعلاق
قلت لها بترجي وانا امشي وراها:-بس انا مو متعوده البس جذي غير ان ظهر الفستان عاري
بس ندى ما اهتمت ولا كاني اتكلم وظلت ماسكه يدي الى ان وصلنا عند المجلس تركت يدي ودقت الباب لحظتها حسيت اني ما عدت اقدر اوقف
فسندت جسمي على الجدار طلع طلال وشاقه وجهه الابتسامه تكلم بس ما سمعت وش يقول وما انتبهت الا ندى تهمس في اذني وهي تدفني
:- ردي على الشيخ يكلمك ؟
طالعت ندى وكاني صحيت من حلم وقبل ما ارد عاد الشيخ سؤاله
:- انتي علياء بنت يوسف بن سلمان ال... ؟
حلقي جف فرديت عليه بصوت مبحوح:-نعم
سأل الشيخ :-يا بنتي خالد بن مشعل بن سلمان ال... يبي يتزوجك موافقه ولا لا ؟
هني حسيت ان صوتي ضاع مني وان جسمي ضعيف وكان سخونه صابتني كرر الشيخ سؤاله وهالمره قدرت ارد:- ايه موافقه
تكلم الشيخ بس ما سمعته وش يقول وما وعيت إلا وندى ماسكتني تبي ترجعني الغرفه
خـــــــــــــــالـــــــــــــد
قضيت يومي بعيد عن الكل بحجة ان عندي مشاوير اسويها قبل الملكه
بس الحقيقه اني كنت ابي افكر على راحتي بعيد عن الجميع افكر شلون اتخلص منها انا ما ابي اربط مصيري بمصير وحده تحب واحد وتكلمه بعد!!... يمكن يكون طلال صدق انها تكلم امها بس انا لا ...شلون اتزوج وحده كانت تفكر انها تهرب علشان واحد تحبه...انا لازم اشوف لي حل
سحبت نفس قوي وسندت راس على الكرسي اااااااه المشكله اني بين المطرقه والسندان محصور بزاويه ...ما ابيها لكن ما اقدر ارفضها
...الصداع بيفجر راسي مديت يدي على درج السياره علشان اخذ لي حبة بندول وشفت هناك مفاتيح سيارتها مسكتها وجلست اتأمل شكل التعليقه جزمة رياضه سماويه ما ادري ليش احتفظت فيها وما رديتها
مسكتها في يدي وضغطت عليها بقوه ما اقدر اتراجع عن خطبتك
...ما اقدر اخذل ابوي وانزل راسه الارض ما اقدر اذل عمي واذبحه برفضي لبنته في هالوقت ...فتحت يدي ورجعت اتأمل التعليقه وكلمت نفسي بصوت عالي
:- والله ما اخليكي تفرحين برفضي (رجعت ضغطت على التعلقه) ماني خالد اذا ما ربيتك من جديد (اعجبتني الفكره ابتسمت)وبنشوف يابنت عمي (جا على بالي طلال غمضت عيني وتنهدت وقلت وكأني اكلمه)
علشان اقدر احافظ عليها لازم اشد عليها وما اخلي لها الحبل على الغارب تكلم ذا وتحب ذا
على اذان المغرب كنت في الاستراحه صليت وتوني بجهز نفسي إلا والشباب كلهم عندي مزح وغشمره طبعا مسكوني تعليقات واول ما دافع عبد العزيز عني التفتوا له وهات يا تعلقات وضحك بس تلفون من ابوي قطع عليهم وقاموا يجهزون انفسهم ويشوفون ترتيبات الملكه
وعقب صلاة العشا دخلت عند الرجال جلست وعن يميني ابوي وعمي وطلال جلس عن يساري ما قدرنا نتكلم من زحمة الناس اللي تسلم
وكلها دقايق ووصل الشيخ وطلب انه يسمع موافقة البنت بنفسه فراح معه طلال لحظتها التفت لتركي وقلت له
:-علامك ؟
ردعلي وعلى وجهه ابتسامه مزيفه :-ولا شي ما فيني الا العافيه
حطيت يدي على كتفه وقلت:- تركي انا عارفك زين وجهك يقول ان في
شي مضايقك
ابتسم على جنب وقال:- ولا يهمك يا خوك اليوم انسى كل شي وخليك في فرحتك
بابتسامه زائفه قلت له :- انسى كل شي ولا انسي اخوي ترى انت من رديت من برى وانت حالك غييييير (قلت ابيه يضحك ) ليكون سليطين
على حق يوم انه قال انك تحب وحده بريطانيه ومنت قادر على فراقها
ضحك وادري انها من ورى قلبه وقال بوعيد:- افاااااا يا خالد تصدق على اخوك ...وسليطين دواه عندي اللحين اروح له
قام تركي وشوي بس ورجع طلال مع الشيخ جلسوا جنبي ملك الشيخ وعطاني عقد الزواج اوقع عليه مسكت القلم بقوه لاني حسيت انه بيفلت من يدي ضاق نفسي وارتفعت حرارتي حسيت اني اوقع على موتي بس ... اذا ما وقعت بحكم على نفسي واهلي بالذل والمهانه حاولت استرخي وما اشد على اعصابي ووقعت ...لاحظ طلال ارتباكي فهمس باذني
:- لهدرجه العزوبيه غاليه (غمز بعينه)ترى دفعنا لك فيها دره ما لها ثمن (ابتسم بمكر وواصل ) باخذ الدفتر علشان القي نظره ثانيه على العروس
وقبل ما ياخذ طلال الدفتر قال له عمي:-طلال روح مع اولاد عمك علشان تشوفون وش صار على العشا
اعترض طلال :- بس يبه انا باخذ الدفتر للعروس توقع عليه
اشر عمي على فيصل وقال :- هذا اخوك بيوديه (وكمل يخرس أي اعتراض)المكان كله حريم واذا رحت انت بتتأخر على ما ياخذون لك طريق لكن فيصل غير
هنا قلت لطلال بابتسامة تشفي :- روح القي نظره على العشا (وكملت علشان اقهره)وانا بكلم العنود عندي سالفه معها
تظايق طلال وناظرني بنص عين:- بيجي اليوم اللي اخليك تشوفها بمواعيد
طلع طلال واستأذنت من ابوي اني بكلم في التلفون طلعت بعدت شوي
عن الازعاج ودقيت على العنود
علـــــــــيــــــــاء
للمره الثالثه قامت ندى علشان تطل على فارس قلت لها قبل ما تطلع
:- بدل ما تروحين وتجين عليه هاتيه ينام هني
ردت ندى وهي تسمع الدق على الباب:-اللحين غرفتك بتمتلي من البنات وازعاجهم فلو جبته هنا بيصحى(فتحت الباب ودخلت سعاد ونجود اشرت عليهم ندى وقالت) نعم وش تبون؟ مو العروس لازم محد يشوفها!!
قالت سعاد وهي تأشر على نفسها بغرور:- بس حنا مو أي احد(ابتسمت وكملت وهي ترقص لي حواجبها)نبي نشوف العروس وهي توقع
قالت ندى لسعاد :-اذا تبين تجلسين هنا اول طلي على فارس صحى ولا لسى
بوزت سعاد وراحت اما نجود وقفت قبالي و قالت :-واو بتجننين اخوي اذا شافك كذا(عضت على شفتهاوغمزت بعيونها)
والله انك روووووعه خاطري اشوف ردة فعل بعض الناس
احس ان وجهي احمر بس استغربت من كلامها وسألت :- من بعض الناس؟
وقبل ما تنطق نجود قالت ندى :-ما عليك منها (ناظرت نجود ) طلال بيجيب الدفتر علشان توقع عليه علياء فإذا ما عندك جلال او عبايه هنا
توكلي على الله وروحي من هنا
دخلت سعاد فقالت لها نجود وهي تتصنع البكى :- سعوده شفتي اختك تطردني
سعاد هجمت على ندى :- لا يا عيوني كل شي ولا نجود ليش تطردينها؟
ندى ولا اهتمت :-انتي بعد الله معاكي نزلوا تحت جهزوا الشريط حق زفت العروس إلا اذا تبونها تنزل كذا سكيتي
نزلوا البنات وعقب شوي دق الباب ودخل فيصل وبيده دفتر الزواج
سلم واول ما رفع راسه وشافني صفروقال:-الله الله وش هالزين
والله انك شي
ابتسمت بخجل ورديت عليه:-مشكور رفعت من روحي المعنويه
التفت لندى وقال لها:-ندوش عادي خالد يشوفها كذا ما يصير له شي؟
ولع وجهي ودق قلبي بقوه من سمعت اسمه اما ندى ضحكت وقالت لفيصل:-والله انت اللي صار لك شي (اخذت الدفتر من يده ) نسيت انك جاي علشان هذا
اخذ الدفتر منها فتحه عطاني القلم واشر على الورقه وقال :-وقعي هنا
حسيت برجفه في كل جسمي جف حلقي وحسيت بطنين باذوني وغشاوه على عيني ما كنت اشوف الورقه والقلم يهتز في يدي ما حسيت الا ندى قاعده جنبي وماسكه كتوفي وتناديني بهمس :- علياء ... علياء (انتبهت لها والتفتت للخوف اللي في عيوني) اخذي نفس وسمي بالرحمن التوتر شي طبيعي حتى انا عانيت منه يوم ملكتي وزواجي
ابتسمت لي وحطت القلم في يدي سميت بالرحمن ووقعت اخذ فيصل الدفتر وباس راسي وقال :-واخيرا وقعتي مبروووووك (راح طيران للباب ) بروح قبل ما ابوي يزفني على التأخير
وقفت ندى وقالت :- مبروك وعقبال الزواج(تنهدت ) بروح اشوف فارس اكيد صحى وبنادي وداد والعنود علشان ينزلون معك تحت
طلعت ندى ولحظات بس وتدخل وحده كانت لابسه فستان احمرعلاق قصير لعند الركبه مكسر طبقات وعند الصدر مشغول بذهبي
شعرها اسود فاحم فيه خصلات ثلجيه رافعته على فوق عيونها واسعه
وبشرتها خمريه ناعمه كانت فعلا جميله تسألت من تكون معقوله تكون ساره!!
انتبهت انها قاعده تتأملني مثل ما تأملتها وكأن فيني شي ما عجبها
طالعتني باستعلاء وقالت:-انتي علياء ؟
ما عجبني اسلوبها فما رديت لكنها كملت:- وقعتي خلاص؟ (اندهشت وش هالسؤال وقبل ما اقول أي كلمه واصلت) على العموم انا جيت علشان اوصيكي عليه تحملي فيه حطيه بيعونك وقلبك خليه ينساني
ما فهمت شي او ما حبيت افهم شي لكن سألتها:-انتي من؟ ومن هذا اللي اخليه ينساش؟
انمسحت من على وجهها علامات الحزن والمسكنه وقالت بغرور:- انا ساره اللي قلب خالد ينبض باسمي وروحه مربوطه بروحي...
حسيت مثل الضربه على راسي ما صدقت اللي اسمعه يحبها؟؟!!
طيب ليش يتزوجني ؟ ليش يذبح روحه ويتزوجني؟ معقوله يكون مجبور...لا ما اصدق صاحب العيون الجليديه ينجبر على شي!!!!!
طالعتها وقلت لها وكبرياء الانثى هو اللي يسيرني:- شوفي اللي فهمته
انش تحبين زوجي موالعكس(ما ادري شلون طلعت مني كلمة زوجي)
ولا تخافين خالد بعيوني
قالت بغضب وقهر :- الظاهر ان فهمك على قدك انا خالد هو اللي يحبني ويتمناني واذا منتي مصدقتني اسألي العنود ووداد(وطالعتني بغرور )
اصلا هو كان خاطبني ولو ما رديته ما خطبك
جرحني كلامها اذاني اصابني فمقتل مهما يكون انا عروس بيوم ملكتها
عرفت ان زوج المستقبل اللي المفروض تكون كل دنيته ما يحبها ولا راح يحبها لان قلبه اهداه وحده ثانيه ورغم احساسي باالانكسار
رديت وانا امثل دور الواثقه رغم اني من الداخل انزف:-
اسمعيني زين يا بنت الناس مو انا اللي اسأل الناس عن زوجي
يحب ولا ما يحب وما اظنه خطبش الا لانش بنت عمته
(ابتسمت بسخريه )هذا اذا خطبش لاني ما اصدق انش ترفضين
واحد تحبينه لدرجة انش تهدرين كرامتش و توصين زوجته عليه
كلام قلته علشان اطعنها مثل ما طعنتني وانقذ بقايا كبريائي وكرامتي
اللي نثرها كلامها مثل ذرات الغبار والظاهر اني اصبتها في الصميم
لانها طلعت وسكرت الباب بقوه من غير ما تقول ولا كلمه
ســـــــــــــــــــاره
استغليت فرصة ان البنات مشغولات بالترتيب لزفة العروس وتضييف الناس وتوني برقى فوق لقيت فيصل يسأل وين العروس رحت وصلته لغرفتها اللي عرفتها من كلامي مع العنود استنيته لمن طلع ومن بعده
ندى... تيقنت انها لحالها... دخلت عليها تأملتها كانت جميله بشكل خلاني انحبط هذا نقطه كان من الممكن تكون في صالحي وراحت علي...
كنت بانفجر فيها من القهر لانها السبب في ان خالد يلغي خطبته
تقدمت منها ومثلت دور الحزينه المسكينه المحبه وقلت لها
:- وقعتي خلاص؟على العموم انا جيت علشان اوصيكي عليه تحملي فيه حطيه بيعونك وقلبك خليه ينساني
سالتني من اكون وكانت هذي فرصتي الي انتظرها فقلت لها بكل ثقه
:- انا ساره اللي قلب خالد ينبض باسمي وروحه مربوطه بروحي...
كان قصدي ازرع الشك في عقلها واخرب عليهم من اولها لكنها قهرتني
لمن فسرت كلامي على اني انا اللي احبه
فقلت علشان احسسها بغلطها وأأكد على ان خالد يحبني ويبيني
:- الظاهر ان فهمك على قدك انا خالد هو اللي يحبني ويتمناني واذا منتي مصدقتني اسألي العنود ووداد(صحيح انهم ما قالوا انه قال في يوم انه يحبني بس كان يهتم في اخباري ولمحوا انه كان ناوي يخطبني كملت )
اصلا هو كان خاطبني ولو ما رديته ما خطبك
كذبت هو ما خطبني رسمي ولا انا حلمت في يوم اني ارده رغم تشدده بس كان لازم اقول كذا علشان اهز ثقتها بنفسها واعرفها ان خالد ما فكر فيها إلا لاني رفضته لكن ردها اثار غضبي واللي قهرني انها ولا تأثرت بالعكس كانت واثقه من نفسها وفوق هذا اهانتني طلعت وسكرت الباب بقوه عل وعسى افرغ شي من اللي في صدري
:-ساره ؟!! وش جابك هنا
رديت على وداد اللي صدمني ظهورها قدامي :-ابدا جيت ادور ندى من جيت ما شفتها غيرمره
ردت وداد وكانها مو مقتنعه بكلامي :-ندى كانت طول الوقت مشغوله بعلياء وفارس
جاوبت باستنكار :-علياء ؟!!! غريبه ما توقعت ندى تهتم فيها
ردت وداد وكأن كلامي ما عجبها:- ليش ما تهتم فيها؟...علياء مهما يكون اختنا فمن الطبيعي اننا نهتم فيها
ناظرت العنود اللي وقفت جنب وداد وقلت :- ادري انها اختكم بس قلت انكم راح تاخذون وقت الى ان تتعودون عليها ...بس الظاهر انها قدرت تستولي على اهتمامكم مثل ما استولت على اشياء ثانيه مو من حقها
ردت وداد بحده :-وش تقصدين ؟ وش اللي استولت عليه ومو من حقها؟
العنود تدخلت مسكت كتف وداد وقالت لها:-ساره ما تقصد شي بس استغربت من سرعة تأقلمكم معاها وما عبرت صح (ناظرتني بلوم وقالت) ياساره هذي اختهم وش بيقولون الناس لو ما اهتموا فيها
العنود كانت تبي تهدء الوضع بس انا كنت مقهوره وابي افرغ حرتي في أي شي ومن غير ما افكر او احسب حساب لكلامي قلت للعنود:-
إلا اقصد ما تشوفين شلون ردت علي وهذا ما كملت معاهم اسبوع (التفتت لوداد وقلت وانا ااشر على نفسي) انا يا وداد تكلميني بهالطريقه علشان بنت نجاة تراها مثل امها جت هنا علشان تاخذ خالد مني
وداد ما تحملت مني ونفظت يد العنود من على كتفها وتقربت مني وقالت وعينها بعيني:- اولا اسمها علياء بنت يوسف ثانيا من متى خالد لك علشان تاخذه منك ؟ اصحي يا ماما ما في شي اسمه خالد ساره لانه صارخالد علياء... وقبل ما تشوفين شلون اكلمك شوفي انتي شلون صرتين تكلمينا
اربكتني وداد ورديت ادافع عن نفسي:- انا مثل ما انا اكلمكم عادي
وبالنسبه لخالد انتو تعرفون انه كان يبي يخطبني و........
هالمره قاطعتني العنود :- هذا انتي قلتيها كان يبي لكنه غير رايه وخطب بنت عمه(ناظرتني بنظره غريبه وكملت)وصار من حقها خلاص ... (سكتت شوي) ترى وداد على حق انتي تغيرتي كثير يا ساره ما عدتي مثل اول.....
ما نطرت ردي مسكت وداد وقالت لها :- خلينا نروح لزوجة اخوي
دخلوا ثنتينهم الغرفه وتركوني في الممر لحالي ناظرت مكان العنود وداد الخالي صدموني صحيح اني بالفتره الاخيره انشغلت وما عدنا قراب من بعض مثل اول ...بس مو لدرجة انهم ينصرون وحده مثل علياء علي
نزلت تحت وقعدت جنب امي وانا افكر ...العنودويمكن قالت هالكلام لاني كنت المح لها ان خالد مو ستايلي واني علشان اقبله لازم يفك شوي ويصير فري مو كل شي لا تسوين وما يجوز وما يصير...لكن وداد
صار لها مده متغيره علي واللحين جايه تفضل بنت نجاة علي لكن ما عليه يا وداد (قلتها بوعيد)ما بعديها لك ...وبتشوفون ان خالد طول عمره وبيظل خالد ساره ...انتبهت على صوت امي تناديني
:- وش فيك وجهك متغير؟ و وين رحتي كل هالمده ؟
ابتسمت لامي :- ابد سلامتك ما فيني شي ...بس رحت اشوف بنت نجاة
امي فتحت عيونها على وسعها :- رحتي لها؟!!(ارتسمت نظرات الحنان على وجهها) ليش يا بنتي؟ وبعدين لا تقولين هنا بنت نجاة يمكن وحده من اهلها تسمعك غير ان خالك اذا درى بيزعل عليك
لويت فمي على صوب :- ما يهموني اهلها في شي... بس ان شاء الله علشان خوالي بس ما بقول بنت نجاة
تغير مزاج امي وقالت :- شوفي شلون نوال ولطيفه (تأشر على ام طلال وام خالد) يتحفون فيهم ... اللي يشوفهم يقول انهم مناسبين شيوخ مو عيال فقر
رديت على امي :-ولا تهتمين بعدين بيندمون اذا سوت فيهم مثل ما سوت امها
عجبها كلامي وقالت :-اي والله بكره يندمون
شوي بس إلا شريط الزفه يشتغل ...والكل وجه انظاره للباب يترقب دخول علياء
خـــــــــــالــــــــــــــد
على عكس أي عريس كنت متمني ان المبارك ما يخلص وابي اجلس مع الشباب لنهاية السهرة وما اطلع من عندهم إلا الى فراشي...بس مثل أي عريس العروس شاغله تفكيري...طبعا أي عريس يفكر شلون هي عروسته ويمني نفسه باحلى الامنيات ...لكن انا لا انا عارف شلون راح تكون علاقتي معاها واللي شاغلني شلون اوضح لها حدود علاقتنا و....
قطع حبل افكاري صوت تركي يقول لي :- خالد وين رحت ؟
رد عليه طلال :- يعني وين ...اكيد عند العروس (غمز لتركي )بس تدري ما يلوق له السرحان والهيام علشان كذا ماله داعي يشوف العروس
ياريت ما اشوفها لكن رديت على طلال بحده:- بشوفها وماني مستني اذنك
ضحكوا ناظرتهم بمعنى اهجدوا فقال لي تركي :-خلاص يابو الشباب ولا تزعل اللحين تشوفها (والتفتت لطلال وعلى وجهه ابتسامه واسعه ) قوم خذ له طريق ...الله لا يبلانا اذا خالد كذا اجل انت وش بتسوي
قام طلال وقال باستهبال:-انا بس يخلص الشيخ من كتب الكتاب بروح عندها لا تحلمون اجلس معكم
وقفت طلال وقلت له :-عاد انا ما ابي ادخل على الحريم يا ريت تكون في مكان لحالها (وعلشان اقطع سلسله التعليقات اللي بتنزل على مثل المطر كملت )علشان جدها يقدر يسلم عليها
هز طلال راسه وقال :- عندك حق بدق على ندى علشان يدخلوها المجلس(واتجه ناحيه ابوي وعمي وخبرهم بالسالفه وطلع وهو ماسك جواله في يده )
دخلنا المجلس انا وابوي وعمي وجدها واخوانها طلال وفيصل تقدمت ناحيتها كنت اناظر الارض ما ابي اشوفها ....باقي يمكن خطوتين واوصل لها...شميت ريحت عطرها وانحبست انفاسي ريحه ناعمه حلوه بس قويه اجبرتني ارفع راسي لها صدمني انها ما كانت تناظرني لا ...كانت تناظر اللي وراي... ولفت نظري انها لابسه جلال اخضر مطرز بخيوط ذهبيه على كبره...سحبت نفس وشديت على نفسي قربت اكثر ...مسكت يدها اجبرتها بهالحركه تناظرني ...كان في شي بعيونها بس الوقت ما سمح لي افسر وش هو كتمت النفس ما ابي اشم ريحتها غمضت عيوني وبست جبينها بعدها زفرت نفسي بقوه وقلت لها كلمه يتيمه :-مبروك
في هاللحظه تقرب عمي منها حضنها وباس راسها رفعت راسها له ابتسم لها وحضن وجهها بين كفوفه وقال لها:-مبروك يا بنيتي ...اللحين بس حسيت انك رديتي لحضني وان كانت فتره وتطلعين من بيتي بس
قاطعه ابوي وهو يمسك يدها ويشد عليها يناظرها وكلامه موجه لعمي وهي المقصوده فيه:- تطمن ترى علياء بنتي وفي عيوني وما بتطلع من بيتك إلا الى بيت ابوها
باس ابوي راسها وبارك لها ابتسمت له ورفعت عيونها للي وراهم لجدها ...قرب منها ومد يده لها وبدل ما تصافحه رمت نفسها في حضنه
ضمها بقوه باس راسها وقال لي:- ترى بنيتي امانه برقبتك... اكرمها ولا تزعلها... وان ابكيت عينها بحزن في يوم بكون انا خصمك وما بيشفع لك عندي لا ابوك ولا عمك (رفع راسها عن صدره وقال لها بابتسامه )لا تبجين وانا ابوش
قالت له وهي تمسك دموعها لا تنزل اكثر :- لا تخليني يبه خذني وياك
ضحك جدها ومسكها من كتوفها وقال وهو يأشر علي :- وتتركين هالوجه علشان تقابلين هالشيبات؟!!!!
وقبل ما ترد قلت له :- تكرم هالشيبات ...وبنت عمي بحطها في عيوني وبغمض عليها
ابتسم لي وبارك لي هو وابوي وعمي وطلعوا تقدم فيصل وبارك لها ومسك يدها وقال لي :- خالد لا تعرس بسرعه ترى نبيها معنا شوي في البيت
ضحك طلال بصوت عالي وقال لي وهو يرفع حاجب :-والله معاه حق اخوي مثلك مثل غيرك ما في زواج قبل ما تخلص دراسه
مسكتها من كتوفها وقربتها لصدري وانا احس برجفتها وقلت علشان اقهر طلال :-ولو بعد احسن من غيري (غمزت له ) على الاقل انا تملكت وغيري يتمنى
طلال اخذها من يدي وقال :- اترك اختي حسبي الله عليك.... اللي تسويه ممنوع ما تشوف وجهها شلون صار احمر
ضحكت على طلال وناظرتها كان الحيا كاسنها من ساسها لراسها وعاطنها حلى فوق حلاها وقلت له :-اختك هذي تصير زوجتي (اسطنعت الجديه وكملت ) اذا ما تركتونا انت واخوك لحالنا ب...
ما كملت جملتي ودق جوالي شفت المتصل العنود ابتسمت بمكر ورديت وانا اناظر طلال :-هلا وغلا بالعنود كل الغلا
ردت العنود :-علينا هالكلام انا كل الغلا ولا العروس
ضحكت على طلال اللي تنح من سمع اسم العنود وقالت العنود
:-ايه اضحك علي على بالك هالحركات تمشي علي ...المهم نبي ندخل نبارك لك
رديت عليها باهتمام :-من اللي بيدخل ؟
عددت العنود :-انا ونجود وامي وخالتي ام طلال وعمتي ام ماجد وخوات العروس وساره
ما ادري ليش ضايقني ان ساره تدخل وتبارك لي فقلت لها:- انا كذا ما رحت مكان ...اقول لك ما بدخل على حريم تقومي تدخلينهم كلهم علي
ضحكت العنود بربكه وقالت :-بس هذولا مو كلهم لسى اهلها من البحرين وبعض معارفنا وجيرانا القراب وترى كلها دقايق وبنطلع
قلت لها وانا لاوي فمي على جنب :- طيب لكن على شرط بس محارمي اللي يدخلون
قالت العنود ومبين على صوتها الارتباك :-الصراحه استحي اقول لخواتها لا تدخلون وساره مقدور عليها بس اخاف عمتي تزعل
ما كنت حاب اطول غير ان الوقت مو وقت نقاش فقلت باصرار:-
بس المحارم.... يلا كلها دقيقتين وتعالوا
سكرت السماعه وقلت لطلال :- يلا يا ابو الشباب اتركني مع حرمتي لحالي غير ان الحريم بيجون اللحين
ابتسم طلال وقال :-مردك لي (وغمز لي ) اما لحالك هذي دام فيها حريم فردد يا ليل ما اطولك
طلع طلال مع فيصل والتفت لعلياء واشرت عليها تجلس وجلست جنبها كان الكنب لشخصين بس من النوع الصغير ورغم انها جلست في اقصى الكنبه الا انها كانت قريبه حيل مني حسيت بتوترها فقلت لها من غير ما اناظرها :-اهدي يا بنت الحلال اللحين يجون الحريم ويقولون اني مسوي لك شي
رفعت راسها ناظرتني واول ما التفت لها نزلت راسها وقبل ما تقول أي كلمه سمعت دق على الباب وقفت بتروح للباب لكني مسكتها من يدها حاولت تسحب يدها لكني شددت من قبضتي وقلت لها:-اجلسي هذولا
اهلي واهلك يبون يباركون لنا
حسيت انها ما استوعبتني علشان كذا شديتها وجلستها جنبي ما يفصل بينا أي مسافه وحسيت برجفتها ولا اراديا مسكت يدها احاول اهدئ من رجفتها وانا ارفع صوتي واقول:- تفضلوا حياكم
دخلت الوالده وتقريبا كانت تركض بتجاهي ضمتني باست خدي وقالت والدموع مغرقه وجهها :- مبروك يا بعد عمري
وقفت لها وان لا زلت ماسك يد علياء وقفتها معاي مسكت يد امي بستها وبست راسها وقلت لها :-عسى عمرك طويل يا يمه ...عسى الله يخليك لنا تاج على روسنا
حطت يدها على خدي وقالت من بين دموعها:-الله يعطيني من العمر اللي افرح فيك وفي اخوانك واشوف عيالكم حولي (تركتني وسلمت على علياء باست خدودها وقالت لها) مبروك يا بنيتي ومن اللحين اوصيك على ولدي تراه زوجك راعيه وطيعيه وتحمليه
ابتسمت علياء باست راس امي وقالت بصوت واطي:-الله يبارك فيش..ان شاء الله ياخالتي من عيوني
قلت للوالده :-ايه كذا احد يوصيها علي من الصبح والكل يوصيني عليها وناسيني
ضحكوا الجماعه وردت نجود:-خلاص ولا يهمك كلنا بنوصيها عليك ترى يا علياء كل شي ولا خالد هذا عند امي وابوي في كفه والباقي في كفه
(قربت مني وكملت )غير انه اغلى ناسي ...
قربت مني علشان تلمني لميتها ومسحت على راسها وقلت لها
:-الناس كلها في كفه وانتي من بعد امي وابوي في كفه
ابتسمت وقالت :- مو هذا اللي مصبرني على التفرقه (وناظرت امي وهي تبتسم ببرائه طبعا امي طنشتها واتجهت نجود لعلياء ضمتها وقالت )
مبروك ....ما اوصيك خلي لي شوي من قلبه مو تاخذينه كله
احمرت علياء وقالت بهمس:-هذا اذا قلبه مو مملوك لحد
لفتت انتباهي عبارتها اللي حتى نجود ما سمعتها استغربت كلماتها حسيت انها مو جايه من فراغ وقبل ما احط في بالي أي احتمالات انشغلت بالعنود اللي باركت لي وقالت بعتب :-
الله لنا نجود في كفه والناس كلها في كفه ...وانا وين رحت
لميتها في حضني وقلت في اذونها :- انتي في من يعزك اكثر من الناس كلها انتي ناس وقلب وروح طلال ...شفتي ان نجود معزتها اقل
دفتني ووجها احمر وهمست للعنود :-زوجك قليل ادب (رفعت صوتها وقالت ) لا تغرك شدته ترى على قد ما هو جبل في الشدايد على قد ما هو حنون وكريم في مشاعره مثل ما هو كريم بماله ...وبامكانك تملكينه
قالتها وكانها تقصد شي حسيتها تلمح لي واللي اثار دهشتي علياء بردها لانها قالت:- ما انكر ان خالد رجال ينشد فيه الظهر ومثل ما قلتي واكثر
بس ما اظن ان اخوش يخلي احد يملكه وإن اسكنه قلبه
اكيد بنت العم وراها شي شكلها مو خاليه ولازم اعرفه انتبهت على صوت خالتي ام طلال تبارك لي وتقول
:-مبروك يا ولدي ... ومثل ما امك وصت علياء عليك ...انا اوصيك عليها تحمل فيها ...وانت تعرف معزتك عندي ولو ما هي من بناتي كنت بوصيها عليك
ابتسمت طول عمرها ام طلال صاحبة واجب وحنونه حيل وما حنان طلال الا نقطه في بحر حنية امه وهشاشة مشاعرها يمكن يكون كلامها اثر في
الكل بس في شخصين كان تأثرهم اكبر من غيرهم وكل واحد منهم كان رد فعله مختلف عن الثاني الاول علياء اللي وجهها احمر وعيونها امتلت دموع عضت على شفايفها وتقدمت من ام طلال باست راسها ويدها وقبل ما تقول أي كلمه مسحت ام طلال دمعتها وقالت لها
:- مو وقت البكى لا يخرب مكياجك
هنا قالت عمتي ام ماجد :-عاد اللي يسمعك يام طلال يقول البنت يتيمه ما عندها ام ... واظنها مثل امها ما يحتاج توصين عليها الا لازم نوصيها على خالد
الكل اندهش واستنكر رد عمتي واول من تكلم هو امي :-والله يا ام ماجد اذا جيتين للحق المفروض كلنا نوصيه على بنت عمه (احس امي شددت على كلمة بنت عمه) بس وش تقولين في قلب الام
لوت عمتي ام ماجد بوزها وقالت من دون نفس:- ايه عندك حق (ومدت يدها لي وصافحتني ) مبروك يا خالد واتمنى انك ما تركت الذهب لاجل التراب
سمعت شهقة كانت صادره من وحده من الحريم اللي متغطيات بس ما ميزتها من تكون... لكنها شهقه هزتني من الداخل يمكن يكون كلام عمتي هو اللي احس فيه بس انه ينقال بهالطريقه البشعه وقدام الكل لا
... شهقه نبهتني لان علياء تسمع اللي ينقال وما ادري ليش نطت في راسي صورة جدها...واول تصرف خطر في بالي اني قربتها مني وحاوطت كتوفها وقلت لعمتي وما ادري شلون نطقت بهالكلمات
:- صادقه يا عمه... انا تركت عزوبيتي اللي بسعر الذهب ...علشان دره
...دره ثمينه ونادره ...وانتي ادرى ياعمه ان جواهر عمي بو طلال ما لها مثيل ولا بها شوايب ...والدليل انك تسعين تمتلكين وحده منهن
سمعت صوت سعاد المميز يقول :- صح لسانك يا ولد عمي والله ان كلامك هو الدرر ...وما يستاهل الدره الا اللي يحفظها ويصونها ويقدرها
وانا اشهد ان محد غيرك يستاهلها
راحت نجود لسعاد ضمتها وهي تقول :- والله صرنا نعرف نقول كلام كبير!!
العنــــــــــــــــــــود
كنت متوقعه ان اليوم بيكون الطابع المسيطر عليه التوتر بس ما توقعت اللي صار ... ساره اليوم مو على بعضها ... فضولها وسؤالها عن علياء ما توقعته وبعدين موقفها الغريب عند غرفة علياء اليوم ...ما توقعت ساره تقول هالكلام كانت تصرح ان خالد ملكها وكلامها يوحي انها ناقمه على علياء ...طبعا انا عارفه ان ساره كرامتها تنزف من سمعت خبر خطبة خالد لعلياء لكني توقعت انها ما توضح هالشي ...خاصه انها في الفتره الاخيره كانت دائما تقول عن خالد انه معقد وانها ما تبيه بس علشان ما تكسر قلبه بتقبله اذا غير من اطباعه...كلام كان يقهرني بالذات ان هذا الكلام او بالاصح اراء ساره ما تحولت لهذا الاتجاه الا بعد تعرفها على صاحباتها الجدد......وداد كانت الاكثر غرابه
انفعالها على ساره كان مبالغ فيه اللي يشوفها يقول ان علياء اختها اللي تربت معاه مو وحده توها تتعرف عليها من اسبوع
اذكر اننا عقب ما نزلنا علياء وانشغلت مع اهلها ووسط مبارك الحريم
اخذت وداد على جنب وقلت لها
:-وداد وش عندك على ساره؟ اكلتي البنت بقشورها
وداد ولا كان الموضوع هامها:- ليش ما سمعتي وش قالت ؟ هي اللي جابته لنفسها
سحبتها من يدها لعند المطبخ وقلت لها:-سمعتها بس البنت معذوره اللي تحبه خطب وحده غيرها ..وفوق هذا اعز صديقاتها(واشرت عليها وعلى نفسي ) بدل ما يخففون عنها جالسين يدارون العروس
وهنا ردت على وداد رد صعقني ما توقعته منها:- ليكون انتي مصدقه ان ساره تحب خالد (شافت شلون بطلت عيوني وكملت )هي كانت تحبه بس كان فعل ماضي ...والله نسيتي كلامها عنه (وقالت تقلد ساره ) صحيح ان خالد وسيم يهبل وشخصيه تشد بس معقد لا تروحون لا تسوون ما يصير ما يجوز وانا ما اتوزج واحد كذا ...اذا يبيني يغير من نفسه خله
كووووول(ورجعت للهجتها وتكلمت بجديه ) بذمتك مو تفكير تافه حتى سعاد ونجود ما يقولون هالكلام
حاولت ادور عذر لساره فقلت :-ادري بس بنت طول عمرها تعرف ان خالد لها وبلحظه يوقولون لها اخذ غيرك اكيد بتكون ردت فعلها قويه
يعني مثلا لو يقولون لي طلال خطب وحده غيري اتوقع اموت
ردت وداد وعينها في عيني:- بتموتين قهر ايه... بتبكين ايه لكن ما بتسعين للعروس والله اعلم وش تبين تقولين لها...وطبعا هذا لانك تحبين طلال بس ساره ماتحب خالد
اندهشت من تفكير وداد وقلت :-وداد لا تظنين ...وساره قالت انها كانت تدور على ندى ...ولا تخدعين نفسك انتي تعرفين ان ساره تحب خالد
ما اهتمت وداد وردت علي بجفاف :- انا ما اظن انا متيقنه والدليل نظرات ساره وعلياء لبعض...(مسكت اذنها وقالت )سمعيها مني يالعنود ساره ما تحبه ساره غرورها وانانيتها صورت لها ان خالد ملكها ولانها ما تحب احد ياخذ حاجتها تصرفت بهالطريقه
ما اقتنعت بكلام وداد او ما بغيت اقتنع وقلت لها :- وداد وش اللي بينك وبين ساره وانا ما اعرفه ؟؟
ولأول مره وداد ما تجاوبني تركتني ورجعت عند الحريم من غير ولا كلمه وهذا خلاني اشك اكثر ان في شي بين ساره و وداد
وكل هذا كوم وكلام عمتي كوم حتى ان وداد ما تحملته وشهقت بقوه
لكن تصرف خالد انقذ الموقف يا لبى قلبك يا خالد اللي يشوفك يقول انك تحب علياء ما يدرون انك ما تحب تجرح او تظلم احد
حسيت اننا طولنا مع العرسان علشان كذا رحت لجهت العروس وقلت لها :-يعني لمتى بتظلين لابسه الجلال ترى حنا اتفقنا انك تلبسينه بس قدام الشياب وخوانك بس قدام العريس لا
مديت يدي علشان اخذ الجلال بس علياء شدت عليه وقالت
:- لا خليه
تدخل خالد وقال :- وانا اقول يمكن هذي موضه ان العروس تلبس جلال مثل عرايس اول
ضحكت وقلت :-هذي عروسك تقول تستحي تدخلون عليها وهي من غير شي وزوجة خالها اقترحت انها تدخل بهالجلال
ابتسم خالد بمكر وقال :-هو صحيح الجلال حلو بس انا بعد ودي اشوف اللي ورى الجلال
هنا رفعت علياء راسها بحده وباين انها انصعقت ما قدرت امسك نفسي ضحكت وقلت لها :-وش فيك ترى من حقه يشوف الزين كله
واخذت لجلال منها وقالت ببرائه :-بس انا بردانه
في هالحظه تقربت ساره وقالت :- مبروك يا خالد
ساعتها التوتر ملى الجو ترقبت رده عليها عيوني ما نزلت من عليه
حسيته انصدم اول ما سمع صوتها التفت لها لفته بسيطه والو ما شاف انها متلثمه صد عنها وقال
:- الله يبارك فيك (والغريبه انه بدل ما يحاول يطول معها في الكلام ويسألها عن احوالها كعادته تجاهلها وقال لعلياء وهو يقلع بشته )
ولا يهمك اذا بردانه هذا بشتي يدفيكي
لبسها البشت ومن غير أي اعتراض من قبل علياء اللي شب وجهها من الحيا اما ساره فحتى ما باركت لعلياء وطلعت على طول من المجلس وامها قامت وراها وقبل ما يطلع الكل اخذت البشت من على علياء وقلت:- شلون بتلبسها الشبكه وهي لابسته؟
عطيته الطقم اللي شراها لها كانت زخرفته ناعمه مزين بكهرمان
حوله فصوص الماس هادئ وحلو يدل على ذوق صاحبه الراقي قلعت علياء طقمها اللي كانت لابسته وقلت لخالد
:- ورينا شطارتك ولبس العروس شبكتها
ابتسم وقال :-والدبل ؟
ضربت على جبيني وقلت :-اوووه صح المفروض الدبل اول
لبسوا بعض الدبل وعقب لبسها خالد الطقم بمساعدتي وبعدها طلعنا وخليناهم لحالهم
خـــــــــــــالـــــــــــــد
واخيرا صرنا لحالنا بس المشكله ما ني عارف كيف ومن وين ابتدي جلست شبكت اصابعي بعضها حطيتها تحت ذقني لفيت لجهتها تأملتها
ابدا ملامحها ما توحي باللي تسويه ملامح هادئه ناعمه ناديتها
:-علياء...
رفعت راسها وردت بصوت واطي خجول:-سم
ابتسمت وقلت :- تدرين ان حجر الكهرمان يناسب لون عيونك
نزلت راسها خجلت وانصدمت من تعليقي لكني مديت يدي ورفعت راسها وقلت :-علياء في اشياء مهمه لازم نتفق عليها وقبل ما اقول أي شي عندي انا ابي اسمع منك
ما ادري ليش عرضت عليها هالعرض رغم اني تكلمت لهدف ثاني
لكنها ردت :-ما اظن ان عندي شي محدد اتكلم عنه غير دراستي يعني يهمني اني اكملها
قلت لها :-وانا ما بمنعك عن دراستك الا اذا تقصدين انك ما تبين زواج الا بعد الدراسه
سكتت ما ردت فواصلت :-موعد الزواج ما عندي فيه أي مشكله
بس انتي تعرفين ان هنا غير البحرين (انتظرت انها تعلق لكنها ردت هزت راسها علامه انها موافقتني ) يعني ما تقدري تسوقين ولازم تحطين في بالك روحه مع السواق لحالك ممنوع اقلها تكون معه زوجته
روحات السوق لحالك ممنوع وياريت يكون عندي علم باي مكان تروحينه
رفعت راسها وناظرتني بدهشه وقالت:- اولا انا ما تعودت اروح مكان بروحي وثانيا انا اخاف من السواقين ...(بلعت ريقها )لكن التقارير عن تحركاتي ليش ؟
رديت بكل هدوء:- انتي زوجتي ومن حقي ما تروحين مكان الا باذني
اخذت نفس وقالت :- انا ما انكر كلامك بس اسلوبك يوحي بشي ثاني
حسيتها عارفه ان في شي بداخلي ابي اقوله فقررت اني اكلمها مباشره
:- شوفي يا بنت عمي اللي يخليني اقول كذا هو مكالمتك في المطبخ
تذكرينها؟(ناظرتني وفي عيونها سؤال رديت عليه ) كنت موجود من بدايه المكالمه او بالاصح الجزء الاهم من المكالمه
نزلت راسها وقالت :-هذي كانت امي و........
قاطعتها وابتسمت بسخريه :-هه امك؟ امك تقول لك هربي ...يا بنت عمي خلينا واضحين ....(واصلت بانفعال )هالولد انسيه وما عاد تكلمينه انا هالمره سكت علشان ابوي وعمي واحترام لشيبات جدك بس مره ثانيه علشان نفس الاسباب ما يردني احد عن ذبحك
حطت يدها على حلقها واخذت نفس وكانها تستمد منه القوه وقالت :- وش تقول في ساره (وطالعتني بتحدي)بتنساها يا ولد عمي
صدمتني وجمدني الذهول لثواني توقعتها تدافع عن نفسها لكن ولا همها
:-علشان كذا قلتي لنجود اذا قلبي مو مملوك لحد؟
ردت بنفس الثبات ونظره التحدي :- ليش بتنكر انك تحبها ؟ ولا تحسب اني صدقت حركاتك قدام اهلك (غمضت عيونها وطالعتني بعيون حزينه ) رغم اني اشكرك على تمثيلك وردك على عمتي ام ماجد
قهرتني بتحديها لي واتهامها لي بالتمثيل انا تصرفي كان من دون تخطيط كان تصرف تلقائي لاعتبارات غير التمثيل وللاسف مشاعرها كان احد الاعتبارات اذا مو اهمها في ذيك اللحظه علشان جذي رديت عليها
:-ايه انا احب ساره بس للاسف ما عادت ساره لي خلاص فقدتها ... حبيتها رغم انعدام العلاقه بينا (ناظرتها وكاني ابي ازرع كلماتي في عقلها ) حبيتها لحياها وعفتها...
كلماتي اصابتها في الصميم والدليل دمعه يتيمه تمكنت منها وفرت من عيونها دمعه اثارت في داخلي نفس الشعور اللي خلاني اثور لكرامتها وارد على عمتي برد يرد لها اعتبارها فقلت
:- وساره اقدر انساها لاني مثل ما قلتي للعنود ما خلي حد يملكني وان اسكنته قلبي ...(اخذت نفس وسندت ظهري ) وبالنسبه للحركاتي هذي
شي ثاني لازم نتفق عليه...(ناظرتها ابي اتاكد انها تسمعني) ما ابي احد يحس اننا مو على توافق فاهمتني يا بنت عمي
سكتت وكانها تفكر في كلامي وبعدين ردت بسؤال يبعد كثير عن موضوعنا :- خالد ما دامك تحب ساره ليش تزوجتني وهذي فكرتك عني؟(وقبل ما ارد عليها واصلت ) وليش ما تبي احد يعرف عنا؟
ما حبيت ارد على اول سؤال رغم ان مسألة حبي لساره مختلفه عن الصوره اللي في راس علياء لكني رديت على سؤالها الثاني
:- ما ابي احد يعرف لعدة اسباب اولها هذي خصوصيات (وكملت وان عارف وش قصدها من ورى سؤالها ) ولا تتوقعين اني ابيهم يعرفون علشان انهي الزواج ....خلاص انتي زوجتي واي خلاف بينا يظل بينا
(سكت حسيت اني ثقلت عليها فقلت ) غير اني فعلا اشوف بنات عمي جواهر نادره وثمينه ما بها شوايب
ردت وهي تعصر جوالها :- لكنك تشوفني غير و........
ماخليتها تكمل وقلت :- اشوفك دره عليها غبره اذا نظفناها بيغشي العيون بريقها
فاجاتني بوقوفها وقالت :- مو لمن تمتلك الدره بالاول
وقفت قبالها وقلت وانا ااشر على صدري :- انتي زوجتي يا بنت عمي زوجتي فهمتي يا علياء
ما ردت علي لكني قلت لها :- نجي للمهم كلها يومين او اسبوع بالكثير اجيب لك بطاقه البنك بنزل في حسابك مهرك ومصروفك الشهري و.....
قاطعتني:- انا عندي حساب والمصروف ما له داعي انا......
هالمره انا قاطعتها:-كم مره اقول انك زوجتي وصرتي مسؤله مني
وحسابك في البحرين راح تلغينه وتحولين اللي فيه لحسابك الجديد
ودحين قبل ما اروح (اخذت كيسه كانت على جنب قريب من الكنبه فتحتها وطلعت جوال منها) هذا جوالك ورقمك الجديد خزنت فيه رقمي ورقم طلال وعمي وابوي وام طلال وامي وخواتي
طالعتني باستغراب وقالت:- بس انا عندي موبايل
اخذت جوالها من يدها ومديت عليها الجوال الجديد وقلت:- انسي هذا (وحطيته في جيبي)وهذا اللي راح تستخدمينه من يوم ورايح
مدت يدها وقالت :-هات موبايلي
رديت عليها بكل برود :-خلاص ما عدتي في حاجته
قالت برجى :-بس فيه ارقام ومسجات اشياء خاصه فيني
في هالحظه دق الباب ودخل طلال وقال:-هااا يا بو الشباب اشوفك نمت
يلا قدامي ...ترى عطيناك وجه زياده على اللزوم
ابتسمت في وجهه وقلت:-ما عليه بردها لك يا طلال
رفع يده بالدعاء وقال:- قريب ان شاء الله (وحط يده على كتفي )يلا مشينا؟
التفت لعلياء وقلت لها :- اذا احتجتين شي لا تترددين رقمي عندك (وحطيت يدي على جيبي وكملت) كلها يومين وارده
تغلب فضول طلال عليه وسأل :-وش اللي ترده
علياء سبقتني وقالت :- موبايلي (ناظرتني وكملت) خربان وخالد بياخذه علشان يصلحه
ضحك طلال وقال:-ما اخبرك بخيل يا خي بدل ما تشتري لها جوال جديد
تصلح القديم !!!!
ابتسمت وقلت :- من دون ما اعرف انه خربان جبت جوال جديد بس اختك متعلقه في القديم قلت اصلحه لها
مديت يدي لها صافحتها وما ادري ليش طولت على ما تركت يدها وقلت :-تصبحين على خير
ردت بهمس:- تلقى خير
وطلعت كملت السهره مع الشباب وكل واحد يعلق من صوب غير الاسئله الفضوليه وش قلت وش سويت كانهم حريم وطبعا كالمعتاد كانت اسئله ما لقت لها أي جواب
علــــــــــــــيـــــــــــاء
غريب هالخالد زرع في نفسي الف احساس واحساس في هالحظات البسيطه احس بالف شعور تجاهه ... احترمته خاصه بكلامه مع جدي
ونظراته لابوه وابوي...حبيت بساطته وعفويته مع طلال ... حسيت بحنيته لمن ضم نجود لصدره...حسيت بغيرته وحميته لمن رد على عمتي من غير ما يقلل من احترامه لها.... عرفت شكثر يعز اهله وعيلته
وشكثر يحترم ابوي ويقدره من كلامه لانه حتى وهو يشكك فيني ويهيني
ما رضي يعيب على ابوي..... لكني كرهت فيه ظنونه ....حسيت ان كل المشاعر اللي اجتاحتني قبل انلغت في اللحظه اللي اتهمني فيها وبكل قسوه اني احب واحد وابي اهرب معاه...كرهته لمن اعترف بحبه لساره
وجا يفرض صيطرته علي باسم حقوقه....حسسني بالاسى على نفسي
لان نصيبي من مشاعره كان الشك ...حسيت بغصه وضعف لاني بداخلي تمنيت يكون نصيبي...احترام ...حنان...لكن ما عليه مو هو يحب ساره خليه لها يشبع فيها المغروره الحقوده
فجأة انتبهت لنفسي لا ما عجبتني الفكره ... اخلي ساره وبكل سهوله تشمت فيني لا والف لا ...ما دام انه ما يبي احد يعرف اللي بينا...و مثل ما يقول انا زوجته يعني كرامتي من كرامته
وهالمره كلمت نفسي بصوت عالي
:- والله لاعرفك يا خالد من هي علياء واخليك تندم على شكك فيني
... مو بس باكسب احترامك...الا بخليك تنسى ساره (ونزلت دمعه كنت حابستها) خلاص زمن الضعف ولى وما بسكت عن حقي ...وبرد اعتباري
مسكت الموبايل فتحته شفت قائمه الاسماء كان مسجل رقمه باسم خالد
بدلته كتبت ... ((الرجل الجليدي)) لويت فمي ما عجبني فكتبت ((قلب الصقيع)) في هاللحظه دخلوا البنات كلهم والغريبه ان ساره كانت وياهم
وما ادري ليش لحظتها قررت ابدل اسمه واكتب...........
ياترى وش اختارت علياء هالمره اسم لخالد؟
وش ممكن يصير بينها وبين ساره ؟ هل بتعدي الامور على خير او لا؟
هل بتقدر علياء تبر بقسمها وتذوب(( قلب الصقيع)) قلب خالد وتخترق اسواره ؟
وداد وش اللي خلاها بهالحده في التعامل مع ساره؟
طلال عرفنا شكثر يحب العنود لكن وش بقلب العنود؟
هاجر وش اخبارها مو غريبه ما تتصل على صديقه روحها في مثل هاليوم؟
خالد وش بيسوي في موبايل علياء وهل بيرده لها؟
تركي وش اخر طريق حبه؟
اسئله بعضها راح تلقون اجابتها في البارت الجاي
واتمنى اشوف توقعاتكم
اعذب وارق التحايا
التعديل الأخير تم بواسطة معاميريا ; 21-09-08 الساعة 08:59 PM
|
19-09-08, 04:27 AM
جديد مواضيع قسم القصص المكتمله من وحي قلم الاعضاء
العرض العادي
