\\

هلا وغلا قلبووو

من زمان منتظرهـ البارت الجديد


وأعذريني ما رديت على الجزء اللي قبل بس تعرفين رمضان ومشاغلهـ

باااارت جوناان

تسلم الأيادي يا رب

,,

مالت على لولوهـ الحقيرهـ حسبي الله عليها كلش ولا نجوووود قلبي حدها <<مقهورهـ واجد

والله هذا السواد اللي بقلبها ..

وأشكـ أن ذي الأشكال بتوقف عند حدها دامها قامت تجرها قدام الله وخلقهـ أكيد ماراح تتركها بحالها

جوودي <<أدلعها بكيفي

ولا تشيلي بقلبكـ حسابها عند ربها

,,

بندر صدق بيبتلش بخزامى وربي ماتستحي كيف تغازل رجال وأهو موب باغي يكلمها

ولا بيبتلش بعد ببسام من قالهـ يقولهـ عن اللي بقلبهـ بيجننهـ ومراح يتركهـ

يا خوفي يزل لسانهـ

,,

ريناد وربي نكتهـ ههههههههههههههه

أجل بحمار عور خخخخخخخخخخخخخخ

بس هذي حلات مرحلة المتوسط كلها رجهـ
,,

مشاعل وربي فرحت لها ذا سلطان متسلط عليها بس نحاسهـ

ومتحمسهـ من اللي على الجوال<<ما أبي أستبق الأحداث

أما أسترجالها كشخصيهـ بس أعرف بنت كشكل عاجبها الأسترجال أما أخلاقها ما شفتها عند البنات العاديات

بس يارت ترجع بنت البنت حلاتها بنعومتها

,,

ريم قلبوو عجبتني يوم وقفت لولوهـ عند حدها

أحس هي القلب الكبير للعيلهـ تحرص على نجود وتوجهـ ريناد يسلم قلبها الأبيض

بس ما صار لها أكشن كثير

,,

زياد يا قلبي ليش الهم

متى تنسى زوجتكـ خلاص الله يرحمها بتدفن نفسكـ بالحياهـ عشانها وهي ميتهـ

,,

الدكتور غازي والله موب هين قاعد يقز بالبنت وأشكـ أنها فوز

,,

نورهـ الله يصبرها كسرت خاطري بجد

والله يسخر لها خطيبها خالد

,,

أتمنى ما نسيت شئ

وبانتظاركـ قلبوو متحمسهـ مرهـ

\\

تر ضي غروري
سلمتي على هالتحليل الأكثر من روعه
و معذوره يا قلبو عارفه مشاغل رمضان






الحلقة الثانية عشر

كان قد إتفق أبو زياد مع أبو ريّان على أن يكون السفر بإحدى الباصات مع إحدى الحملات لأن أبو ريّان لا يستطيع أن يذهب قبل أو بعد يوم الثلاثاء و لا يستطيع أن ينتظر بالمطار فيوم الأربعاء هو آخر يوم للخروج من السكن فلا مجال لتضييع الوقت بإنتظار ما هو غير مؤكد و لأسباب أخرى أيضاً
.
.
الساعة 12 و نصف ظهراً
في بيت أبو ريّان
عزوز يبكي و يجرّ ثوب أبيه : يبا أبي أروح أبي أروح معكم أمانه ودني معكم أبي أروح
أبو ريّان : الله يهديك يا عزوز أنت عندك بكره مدرسه ما يصير تروح و أوعدك إذا خذت الأول على الفصل أوديك للعمره
عزوز : لا أبي أروح مع ريم أبي أروح معكم
ضلّ عزوز يبكي من غير أن يرضى أبيه أن يذهب معهم
.
.
في بيت أبو ريّان
في غرفة ريناد
ريناد : وين عباتي الجديده و ينها ؟
ريم : يا ألله منك يا ذا البنت ترى أزعجتينا لا تخليني أهوّن و ما أروح معك شوفيها هناك عند سريرك
يا ربي منك يا ذا البنت إلى هالحين ما نزّلتي شنطة إحرامك
رينادو لا تجننين فيني
ريناد : طيب طيب لكن ريم يعني لازم ألبس هالعباه والله كأنها خيشة رز
ريم : إسمعي اليوم و إلاّ بكره بتلبسينها و مصيرك تتعودين عليها
ريناد : طيب ليه يعني ألبسها ؟؟ مشاعل أكبر منّي و عباتها على كتفها ليه يعني ألبس عباه على راسي ؟؟
ريم : ريناد لا تجادلين والله ما يسمعك واحد من أخواني إن تعرفين وش يحصل لك إلبسيها و إنتي ساكته و خيرتك بتعرفين قدر عباة الراس
دخلت نجود عليهم و شنطتها على كتفها و شايله غطاها بيدها
نجود : السلام عليكم
ريم + ريناد : و عليكم السلام
ريناد : نجود وين جوري؟
نجود : ببيتهم
ريناد : كيف هي قالت بتجي
دخلت جوري : أبرا كدابرا هنا جوّاره
سلّمت جوري على ريناد و ريم
نجود : ريم كل الشله يسلمون عليك لكن كلمي نوره مدري وش فيها أمنتني تكلمينها قبل تروحين عاد إنتي كلميها ok ألحين بااااااي بأروح أقط هالشنطه حشى جبل جبل مهي شنطه
ريم : يلاّ أول ثانوي الله يعينك طيب أنا رايحه أكلم نونو و إنتي ريناد لا تنسين نزّلي شنطة إحرامك
.
ذهبت ريم لتحدث نوره الحزينة التي طلبت منها أن تدعي لها و لخالد في سفرها و وقت رؤيتها للكعبة
.
.
كانت رحلتهم عند الساعة الثالثه لكنهم ذهبوا قبل ذلك بساعه
.
.
بسّام : خلّصتوا ترى ما هي بيومين ما له داعي هالأغراض ذي كلها
ريناد و هي تلبس عبايتها الجديده : إمودين هدايا لصديقات شهد و عهد ما يصير نروح و إيدينا فاضيه
بسّام : لا ما دام كذا ما أقدر أقول شيء طيب وش فيك مع هالعباه كأنك ضفدع ههههههههههههههههههههههههه
ريناد : لا تضحك يوم إنه كذا ليه قلتوا لي ألبسها ؟
بسّام : إيه لبسيها عدل مهوب كذا كأنك عجوز إمضيعه أهلها ههههههههههههههههه وين ريم تساعدك ؟؟؟
ريم : كأني سمعت إسمي
شافت أختها
هههههههههههههههههههه وش إمسويه بنفسك الله يقطع شرّك
بسّام : يلاّ لا نتأخر على عمي مساعد
أم زياد و نجود نزلوا على السلّم
أم زياد : إنتبهوا على أغراضكم و فلوسكم و خلّوا الحافظات بجنبكم عشان لا جيتوا تفطرون و إنتي يا ريناد لا تجننين عمك خلني أسمع إنك جننتي فيه بس
ريم و هي تساعد ريناد في لبس غطوتها : إن شاء الله لكن هالخبله مدري عنها
ريناد : الخبله إنتي
نجود : يا عيني إللي هاذي أولها كان الله بعونك يا ريم
بسّام : إخلصوا إخلصوا علي
.
.
و بعد أن و دّعت الفتاتين والدتهما و أختهما و الخادمات ذهبتا مع أخيهم لعمهم الذي كان بإنتظارهم
.
.
.
عند موقع الحملة
الآن تشير الساعة لـ 40 :2 م
ريناد : وين الباص ؟؟ و وين إللي بيروحون معنا ؟
عمهم أبو ريّان : شوفي يا ريناد ترى السفر بالباص يبي له طولة بال لا تستعجلين إشوي و بيجون الناس
ريم : طيب ما بقى إلاّ إشوي و يأذن العصر و لا شفنا لا الباص و لا الناس ليه ؟؟
عمهم مساعد : لا تستغربون عادي حتى ممكن ما يجون إلاّ بعد الصلاة
ريناد : يووووووووووووووووووووه بعد الصلاه يووووووووه
ريم تقبص ريناد و تساسرها : عن التهاويل هه
ريناد : إيه عاد لا تقبصين
بسّام : صح عمي بكره بنطلع نقنص بنروح لنا من الظهر و بنرجع بالليل يلاّ بتروح عليك لكن لا رجعت تروح معنا إن شاء الله
عمه : إن شاء الله الأسبوع الجاي أروح معكم لكن لا يدري عزوز إنكم بتروحون و إلاّ بيسوي لكم سالفه
إستمر الحديث عن البر و القنص
أذّن المؤذن لصلاة العصر
ريناد : أذن العصر و لا أحد جاء
عمهم : طيب خلنا نروح نصلي بالجامع إللي قريب من هنا ثم نرجع
راحوا وصلّوا بالجامع
بعد الصلاه توجهوا للموقع
و إشوي إشوي بدأت الناس بالتجمع الآن سأصف لكم مواقع خلق الله بالباص لمّا إنطلق من الدمام

الباص من الخلف

حرمه حرمه شاب حرمه حرمه
صعيدي مصري مصري مزعج مصري
ريم فارغ لشهد أبو ريّان مصري
فارغ لأهل بقيق فارغ لعهد ريناد
شايب عجوز هندي مع طفل حرمه هنديه

سلم للباب الخلفي
بنت صغيره أمها الحمام عزكم الله

ولد صغير أبوه

..................إلخ قصدي إلى المقدمة

بدأ الناس بأخذ أماكنهم و وزعت عليهم وجبات إفطارهم
ركب رجّال شايب : كلن يتفقد ربعه
ثم يأشر على الكرسيين الفارغين إللي قدّام ريم : هنا مكان أهل بقيق إللي بتمرونهم يلاّ ألحين فمان الله
ريم تناظر ساعتها و إلاّ الساعه أربع و ربع الباص كان زحمه
( بنفسها : والله حاله لا و جايين من الساعه ثنتين)
(ريناد بنفسها : ما بغوا يمشون يوه الله يعيني على هالهنود إللي قدّامي يحسبون نفسهم عالبحر متمددين إشوي و تحط راسها بحضني مدري أرفسها )
المصري المزعج يكلم بالتلفون : لا ء لا ء أنا ؤلت والله ما حصلش كده
.......................
المصري المزعج : أنا رايح أعمل عومره و اول ما أرقع حوريلك هوه
..............
المصري المزعج صايره معه مشكله و متفاعل : لا ء لاء كامان بيكزب عليّ الموفتاح كان معاه أنا مش عارف ليه بيعمل معايا كده لكن بزمتك أل عني كده ؟؟
....................
المصري المزعج : أه و ؤمال أنا سبت البتاع الزفت ده ......
(ريم بنفسها : الله يعينّا على هذرتك والله إللي بياكلها عمي مساعد )
ريم سرحت بفكرها و هي تشاهد رمالاً لطالما عشقتها
ريناد و صراع مع غطائها الجديد و إستغرابها من الجو العام
أبو ريّان و إنزعاجه من مقعده و من ذلك المصري
و بعد ساعتين تقريباً
وصل الباص عند محطة بقرب بقيق أذّن المؤذن
نزل الناس ليفطروا
ألقى أبو ريّان نظره على المحطة فلم يجد غرف
و لأن أبو ريّان من عشّاق البر ذهب مع بنات أخيه لرمال البر الذي أحاطت بالمحطه و كان معهم ثلاث عوائل أيضاً
ريناد : عمي مساعد المكان هنا ذكرّني بمنزلة جدّي بـالبر
ريم : من زمان عن البر الله على الصمّان و النعيريه
عمهم مساعد : إيه أذكر سنه من السنين رحنا للصمان و كانت مفروشه بالخضار و نتمشّى من روضه لروضه و كل يوم نجمع من هالفقع و نقنص مع طيورنا إيه قالها عبدالله الظفيري
يــــا محلا الصمــان مع هدّت الطير
و فنجال ن أشقر بين ربع ن نشامه
ريم : الله الله يا زين الصمّان إللي يعرفها يكتب دواوين عز الله إنه صادق و إلاّ صوت أم سالم أول ما يصحى الواحد شيء يشرح الصدر
.
.
و بعد السوالف و الصلاة ( طبعاً جمع المغرب و العشاء ) إتجهوا ناحية الباص
أخذ الجميع مكانه
الآن ركب الباص رجل بدوي قح و زوجته
(ريم بنفسها : ذولا هل بقيق أكيد لكن ليه جايين كذا؟؟؟ ما بدينهم شيء وين أكلهم وين شاهيهم و قهوتهم؟؟؟
ذولا شكلهم ما يعرفون شيء عن السفر)
كان أبو ريّان ماسك دلّة القهوه و يصب للي حوليه
ثم صب القهوه لرجل بقيق و لمن أراد من المصريين و للشاب البدوي بالخلف و للشايب إللي قدّام أهل بقيق
كما أن الشاب البدوي الذي بالخلف أصبح يوزع التمر على الناس
و أصبح الكل يقتسم لقمته مع الآخر
و بعد ساعتين تقريبا ريم قدّمت لعمها إشوية سمبوسه و بريد رول و اللقيمات و من هالأكل الطيّب
حسّت ريم إن أهل بقيق ما معهم شيء و إن الجوع بداء بهم لأنهم أول ما ركبوا مثل ما قلت ما كان معهم شيء غير شنطة يد الحرمه و كيس من بقالة المحطة فيه فصفص ( حب )
رجل بقيق شعر بالجوع فلم يجد سوى فصفص (حب ) أكل منه و لكن جوعه بان عليه و على زوجته
شعرت ريم بذلك
قالت لعمها فأمرها بأن تضع لهما من اللقيمات و السمبوسه و خلافه في محفظه
رجل بقيق إنبسط من أبو ريّان و صار يشكر و يمدح بالبنات يفكر إنهم بنات أبو ريّان و اكيد إنهم مثل بناته و اكثر
بعد ذلك ريم بدأت تكمل ختمتها
أمّا ريناد تكلّم الهنديه : هيه إنتي ترى عيب إشوي و تنامين بحضني وش هالكلام ترى ما صارت
الهنديه ما فهمت شيء
ريناد : والله البلشة ذس إز رونق رونق رونق غلط يا مراه غلط
إشوي و تنامين بحظني
( من التعصيب مش عارفه وش تقول )
ريم لاحظت إن عمها متضايق من جلسته و حاط راسه على الكرسي إللي قدّام و ظهره تحدّب ما هان عليها عمها
فقالت له : عمي مساعد تعال هنا تمدد و أنا بأروح عند ريناد
أبو ريّان : لا ابد إجلسي مكانك
ريم : والله إن تجي هنا
و كتب ربي يوقف الباص عند محطه فراحت ريم عند ريناد و عمهم راح مكان ريم و تمدد بالمقعدين و المصري صار بجنبه مقعد فاضي
....
...
..
.
كلّمت ريم الهنديه عشان ترجّع كرسيها على قدّام و بعد أن أخذ الجميع الوضع الجديد
ريم طلّعت مسبحتها و صارت تسبح سبحانك لا إله إلاّ أنت إني كنت من الظالمين و أستغفر الله و أتوب إليه أمّا ريناد طلّعت المصحف و صارت تقرأ
رجل بقيق نزل للمحطه و جاب معه عصيرات و فطاير
قدّم لأبو ريّان و من معه شيء منها
رن جوال ريم و إلاّ أمها تتطمن عليهم و بعد ربع ساعة تقريباً صحى أبو ريّان من النوم بعد التعب و صار يصب قهوه له و للرجال إللي كان عاجبته القهوة ( رجل بقيق )
ريم تكلّم ريناد : عدّلي عباتك على راسك و البرقع خيطه رايح على جنب عدليه
ريناد : والله بلشه أحس نفسي فيه كأني مجنونة و العباه كل إشوي طايحه أبي مشبك عشان أشبكها براسي
ريم : تنكتين إنتي و وجهك صدق هبله
يرن جوال ريم : هلا وغلا
عهد : السلام عليكم
ريم : و عليكم السلام
عهد : هاه وينكم فيه ؟؟
ريم : تبين الصدق مدري لكن سمعتهم قبل إشوي يقولون إنّا عدّينا الرياض
عهد : يلاّ أهم شيء مبسوطين و إلاّ ؟
ريم : الحمد لله قدّامنا هندي و زوجته عندهم بنت تجنن تهبل بسم الله عليها و بجنبنا واحد بدوي بدوي بدوي و زوجته شكلهم أول مرّه يسافرون و ورى كله مصاروه و عمي و خلق ما شاء الله
عهد : يلاّ الله يسهل دربكم و كيف أبوي ؟؟
ريم : الحمد لله بخير إنتوا كيفكم ؟؟
عهد : بخير كيف ريناد؟؟؟
ريم : ريناد مع عباة الراس و البرقع كأنها مجنونه
و تضحك بشويش
ريناد : هيّن مجنونة هاه مجنونه ؟؟
ريم : بلاك ما شفتي حالك قايل كيف
عهد : طيب يلاّ ما راح أطول عليكم عارفه ما تقدرون تتكلمون
ريم :إي والله و إنتي الصادقه
عهد : مع السلامه
ريم : الله يسلمك
ريم و ريناد طلعوا مصاحفهم و أخذوا يقرون يكمّلون ختمتهم و إشوي إلاّ رجل بقيق يطلّع المصحف و يقرأ
ريناد : ما شاء الله يعرف يقرأ إللي يشوفه يقول أمي زين يعرف يقرأ
ريم : إقري إقري و خلك من الهذره
ريناد : طيب لكن عطيني الجوال أبغى أكلّم جوري
إتصلت ريناد على الجوري و قالت لها كل شيء عن الباص من حين مشى إلين لحظتها
..
.
في الشرقيه
بصالة البلياردو
بسّام يلعب مع بندر
بندر : إلاّ من بيروح معنا بكره للقنص
بسّام : بيروح ريّان و قلت لفهد لكن مدري عنه يقول الظاهر إنه ما يقدر عشان التمارين و النادي
بندر : طيب و وليف ما تدري عنه ؟
( وليف 26 سنه أخو جود و فوز إنسان طيب يحب التنكيت مدرس رياضه )
بسّام : هذا إللي له أسبوع مدري عنه خلني اتصل عليه و أشوفه كانه بيطلع معنا
إتصل بسّام بوليف و إتفق معه إنه بيروح معهم
بندر : وش قال ؟
بسّام : بيروح معنا
بندر : أي طير بتآخذ معك بكره ؟؟
بسّام : شكلي بآخذ معي مطنوخ من زمان ما طلعت معه و أنت ؟؟؟
بندر : شكلي بآخذ بارود أحبه أحسه غير
بسّام : لكن إنتبه لازم تطلع بعد كذا بغيره و إلاّ بيتعودون عالدلع
بندر : لا لا ما عليك إلعب إلعب بس
إلاّ يرن جوال بندر ( بالتأكيد خزامى )
بسّام : رد
بندر : ما عليك وحده مزعجتني من فتره
بسّام : أخاف بس إللي خبري خبرك لا تقول تكلمها ترى ما يجوز
بندر : بس بس أي أكلم ما أكلم ما بغيت إلاّ أنا أفا يا بسّام ما هقيت إنك تفكر فيني كذا
بسّام : لا تزعل يا رجال نمزح ما يصير نمزح لكن ما تقول لي من تكون هالبنت ؟؟ أخوي و أبي أعرف من إللي عافسته هالعفسه؟؟
بندر : إلعب إلعب بس حشى ما يسوى علي رنة هالجوال
...
..
.
الساعة 15 : 12 ص
وقّف الباص عند محطه عشان يتسحرون الركاب الكل نزل ما عدا حرمه وحده كانت تبكي ريم كانت بتروح لها لكن ترددت و لمّا نزلت قالت لريناد : الحرمه ما نزلت مدري وش بلاها كأنها تبكي؟؟
سمعها سوّاق الباص قال لها : و ليه ما سألتيها روحي إسأليها و قولي لها تنزل
ريم تساسر ريناد : و إذا ناوين يبقونّا ؟؟
ريناد : الحمد لله و الشكر ليه فلم هندي و أنا مدري ؟؟ و إلاّ الدنيا سايبه ؟؟ روحي بس خلنا نشوف هالمراه وش قصتها ؟؟
رجعت ريم و ريناد للحرمه و حصلوها تبكي كانت مصرية كاشفه عن وجهها و كان وجهها أحمر من البكي
ريم : إختي لو سمحتي سوّاق الباص يقول إنزلي
الحرمه : مش عاوزه أنزل
ريم : طيب ما يصير كذا لازم تتسحرين و لا تبكين ترى الدنيا ما تسوى
الحرمه و هي تبكي : إمتى الدنيا تسيبني بحالي
ريم : إذكري ربك و إستهدي بالله إنزلي على الأقل غيري هالجلسه أحسن ما تتصلب رجليك
الحرمه : مش عاوزه ؤلي للسواء مش حنزل و سحوري معايا
ريم : طيب براحتك الله يفرجها عليك يا رب
نزلت ريم و ريناد حصلوا عمهم ينتظرهم تحت
أبو ريّان : وراكم ليه رجعتوا ؟
ريم : في حرمه ما نزلت و تبكي رحنا نكلمها
أبو ريّان : سمعت واحد قبل إشوي يقول إن في حرمه مصرية كل وقتها تبكي يقولون الظاهر ميت لها أحد طيب ألحين وينها ؟؟
ريم : مهي راضيه تنزل
أبو ريّان : الله يهديها طيب رحت أدور غرفه و كل غرفة أزفت من الثانيه لكن أهونهم رقم عشرين يلا إسم إننا نتسحر و نرتاح من هالجلسه والله إللي تصلبت رجلي
ريم و ريناد راحوا لدورة المياه و اللهم يا كافي شيء مش طبيعي وساخه على أصولها
ريم و ريناد ما تحمّلوا و قبل ما يطلعون نادتهم زوجة رجل بقيق و أعطتهم المصحف عشان بتدخل الحمّام أخذت ريم المصحف و إنتظرت الحرمه و أول ما طلعت أعطتها إياه
كان هذا أوّل إحتكاك مباشر بينهم
بعد كذا على طول راحوا البنات للغرفه
أبو ريّان : حيّا الله بناتي
ريم : حي الله نباك يا العم
أبو ريّان : يا الله على هالزحمه و هالمحطه إللي وقفونا عندها ما فيها من النظافة شيء الله يهديهم بس
ريم : ألحين أنظف الغرفه و أفرش لكم السجاده
ريناد : بصراحه فشلونّا هالحين إللي يجون من بلد ثاني و يشوفون هالوصاخه وش يقولون والله فشله
العم : لا في محطات أزين من هالمحطه بألف مليون مرّه لكن أكيد هالمحطه متفقه معها الحمله على نسبه
ريم و هي تبخ من بخاخ ديتول : أمحق يعني وين عمال النظافه ؟
عمهم : لا هذا و أنا إموصي الهندي ينظفها و إلاّ قبل إشوي كانت إعلوم و العشاء وصيتهم عليه و أعطيتهم فلوس زياده لكن أهم شيء النظافه
(ريناد بنفسها : إللي هذا مكانهم كيف أكلهم )
ريم : الله يعطيك العافية يا عمي لكن ترى معنا أكل يكفي
جاب الهندي العشاء و البنات يأكلون اللقمه بالموت مستقرفين أمّا عمهم مساعد فياكل من التعب و بعد السحور ريم و ريناد سوو مساج لرجلين عمهم و هو يدعي لهم و يقول : تعرفون إن عمكم أكبر خوّاف من الطيّارات
ريناد تضحك : ليه يا عمي ليه تخاف ؟
عمهم إفتشل كيف قلتها ؟: لا يعني مهوب خوف خوف يعني ما أرتاح
ريم إرتسمت على ثغرها بسمه لأنها علمت اليوم أن عمها يعاني من فوبيا ركوب الطائرة
و بعد ربع ساعة طلعوا من الغرفة على الباص و رجع الكل نفس ما كانوا بالأول ريم ورى أهل بقيق و ريناد ورى العائلة الهندية و عمهم بجنب المصري
ريم بمسبحها و كل إشوي رسايل لنوره و خلود و وضحى و هنوف تطمنهم على نفسها و وراها ذاك الصعيدي إللي يشخر شخيره يصحي النايم مسكينه جنن فيها و ما شاء الله عليه أول ما يحط راسه ينام و إشوي إلاّ رن جوّاله
و إلاّ يقول بصوت كأنه يصرّخ : و عليكم السلام
: الحمدو لله الحمدو لله
: أيوا يامّا أنا رايح أحق ( أحج )
ريم سمعت أحق و ماتت ضحك و حاولت تمسك نفسها بالموت إقدرت و بنفسها أي أحق؟؟ والله حاله حج برمضان أستغفر الله المفروض ما أضحك أكيد هذا أمي ما يفهم أستغفر الله و الحمد لله و إشوي إلاّ لفت نظرها حاجه
أهل بقيق ناموا لكن نومه غير عجيبه
الرجال حاط راسه على كتف زوجته و الزوجه حاطه راسها على راس زوجها
ريم بنفسها ( ؤف ألحين بتشتغل التعليقات )
ريناد تناظر بإستغراب و تقول لريم بالإشارة صوريهم
و ريم تحط يدها على عينها و تأشر عيب
ريناد بصوت واطي : لا مو عيب هم نايمين كذا قدّام خلق الله كلهم
ريم تأشر سكتي عيب
ريناد قد شافت هذا المنظر في بلاد برّا لمّا كانوا يسافرون بالعطلات لكن لأول مرّه تشوفه بالسعودية
المصري المزعج يساسر صاحبه : بوص بوص على زوق الكناري إللي هناك
الشاب بالخلف بنفسه ( يا ويلاه وش بلا الرجال نايم مع زوجته كذا ؟)
مرّ الوقت و إشوي إلاّ يصحى الرجّال سمع كم تعليق و حس بنومته الغلط عدّل إشماغه و جلسته و بعد إشوي أذّن الفجر و وقفوا عند محطه عشان يصلون صلّوا ثم إنطلقوا و على الساعه ست و نص الصباح قرّبوا من السيل ( ميقات السيل الكبير)
قال مساعد السوّاق ألحين بنحرم بعدين بندخل مكه لكن هم وقفوا عند المحلات إللي يبيعون فيها لوازم الإحرام قبل السيل بشوي
ريم و ريناد جلسوا بجنب بعض ورى أهل بقيق
طبعاً ما يحتاج ينزلون لأن إحرامهم معهم
و أهل بقيق نزلوا مع من نزل
و بعد إشوي رجعوا الركاب حبه حبه الكل رجع ما عدا المصري إللي بجنب المصري المزعج و بدأوا يسألون عنه
وينه ؟ طول علينا ؟
أخرّنا ؟ ..... إلخ
و إللي يناظر من الشباك يدوره و إشوي إلاّ الناس إللي على جهة المحلات ضحك تضحك من قلب
( تجهزوا للضحك )
أبو ريّان يناظر و يقول : وش في صاحبكم عاد من ألحين ؟؟؟؟؟؟؟؟؟؟؟
ريم و ريناد يترقبون وش السالفه ؟؟
و إلاّ يدخل عليهم ذاك المصري إللي لابس إحرامه و جالس يزبط فيه
ريم و ريناد ماتوووووووووووا من الضحك مثل ما ضحك أغلب الركاب
و المصري يقول يوم كلموه ربعه : أنا عارف لكن ؤلت أحرم من هنا عشان خاطر الزحمه
ريم تقول لريناد بشويش
( أي زحمه هو على كيفه يحرم من هنا هذا إللي بيرقعها و عماها )
و ضحك من قلب و كل وحده تسكت الثانية ريم تقبص بريناد و ريناد تقبص بريم حتى أهل بقيق حسّوا عليهم
كان منظر الرجال و هو داخل بثقه دماااااااار يضحك مسكين مساعد السواق لخبطه لمّا قال هنا نحرم
و بعد إشوي وصلوا للميقات نزل الكل إلاّ الرجال المصري
( ريم يعني يوم إنه عفس الدعوه هناك نزل هنا و عدلّها )
ريم و ريناد يمشون كأنهم مجانين ضحك يمشون و الضحك مواصل معهم و أهل بقيق كانوا يمشون قدّامهم
المهم
الحريم راحوا لجهتهم و الرجال من جهه ثانيه
ريم و ريناد كشفوا عن وجههم و سلّموا عالحرمه ( أهل بقيق )
الحرمه تقول لريم : كأني شايفتك بالكلية ؟؟
ريم : يمكن قد رحت لها زيارات أو يمكن إمشبهه علي
ريناد ( لقافه ) : ليه إنتي تدرسين ؟
الحرمه : أنا خريجة جغرافيا
ريناد و ريم : ما شاء الله
ريناد بنفسها ( والله مو باين )
ريم : طيب يلاّ خلنا نحرم قبل يروح عنّا الباص
ريناد تذكرت الرجال و صارت تضحك
الحرمه : وش فيك ؟
ريناد : المصري إللي أحرم مو راضي ينزل بيستاثم بنفسه
الحرمه : الله يهديه
دخلوا داخل يدورون لهم على حمامات ( تكرمون ) عشان يحرمون دخلت ريم بالأول و طلعت و هي ترجف
( خبركم الماي بارد هناك يقطع القلب )
و الحرمه تدور لها حمام ريناد دخلت ثم طلعت و إشوي إلاّ الحرمه هناك
ريم بنفسها ( إلى هالحين ما حصلت حمام لو أدري مسكت لها دور هنا )
الحرمه جات لريم و ريناد كانت معها شنطه شايلتها بيدها رصاصية كبيرة أعطتها ريم و راحت تدور لها على حمام ( عزكم الله ) و يوم لقته و إلا هو بعيد إشوي قالت و بصوت مسموع : ترى كل إفلوسي فيها إنتبهوا عليها
الكل صار يناظر بالشنطه
ريناد : الظاهر إنها مهي بصاحيه هاذي إللي بأستاثم فيها الظاهر ناويه توهقنا ناويه يذبحونّا هالتكرانيات والله بلوى
ريم : الظاهر إنها خفيفة عقل أو ناوية توهقنا متى تطلع و تفكنا قال إيش قالت كل إفلوسي فيها الظاهر بنروح فيها إنتبهي خلك جنبي
ريناد : وش رايك ننكبها مثل ما إنكبتنا و نخلّي شنطتها و نهج ؟؟
ريم : سكتي بس يعني حليتيها إنتي و وجهك يا ربي شوفي ذيك كيف تخز فينا و إشوي إلاّ تقترب منهم ذيك التكرانيه و تخز خز
ريم ماتت رعبه ( خلاص رحنا فيها ) تسببت فيها هالمهبوله مرّت عليها الثواني دهر و أول ما طلعت الحرمه تنفست ريم الصعداء و أعطتها الشنطه و إشوي وهم طالعات إلاّ يشوفون لهم ذيك الحرمه محرمه و بتطلع لابسه برقع و إمكحله عيونها
الحرمه تقول :خوش أحرمت الحمدلله
( هالأشكال في منها كثير لكن المحرمه ما يجوز تلبس لا نقاب و لا برقع المفروض تلبس خمار )
و إشوي و هم يمشون بيطلعون من الحمامات إلاّ تناظر حرمة بقيق بجزمة ريم و إلاّ عاليه إشوي
قالت الحرمه : هالحين إنتي بتطوفين بهالجزمه؟؟؟
ريم تناظر بريناد نظرة تعجب
!!!!!!!!!
ريم : الظاهر إنتي أوّل مرّه بحياتك تعتمرين صح ؟؟
الحرمه : إيه صح ليه ؟؟
ريم : لأن الناس ما يطوفون بجزمهم الحرم ما يندخل بجزمه الحرم يمشون الناس فيه و هم حافين لكن شيء طيب تكون أول عمره لك برمضان
.
ريم بنفسها ( والله حاله هذا و هي خريجة كليه جد على الدنيا السلام )
و إشوي و هم يمشون إلاّ الحرمه توجهت لباب الخروج قالت لها ريم : وين بتروحين
الحرمه : للباص
ريم : لا تعالي خلنا نصلي ركعتين الإحرام
الحرمه : طيب ترى ما أعرف شيء
راحوا المسجد و صلوا ثم طلعوا
...
..
.
في الباص المصري بعده على حاله ما نزل
جاووه الرجال و كلموه لكن إذن من طين و إذن من عجين
و بعد إشوي إجتمعت الناس و صاروا الرجال يلبون جهر و الحريم مع نفسهم
(( لبيك اللهم لبيك لبيك لا شريك لك لبيك إن الحمد و النعمة لك و الملك لا شريك لك ))
مشى الباص و بالطريق أخذ الميكرفون رجل مصري ملتزم كان جالس قدام و صار يشرح كيفية العمره و ما يخصها و على الساعه ثمان و نص وصلوا لمكه كان أبو ريّان حاجز عند حدى هالأبراج
دخل أبو ريّان غرفته و ريم و ريناد غرفتهم

في غرفة البنات
ريناد إرتمت عالسرير : يااااااااااااه والله أبي أنام
ريم : إنتبهي عمي يقول إشوي و نطلع نسوي عمره
ريناد : الحين من جده الدنيا قيض والله شمس تصك الراس صك كيف نسوي عمره لا و صايمين بعد
ريم : يسهلها الله قومي بس ساعديني بترتيب هالأغراض
ريناد : بعدين بعدين
ريم : وش قومي قومي وش تبين يقول عمي لا جاء بنات أخوي ما يعرفون السنع يلاّ يلاّ تحركي و عن الدلع
ريناد : طيب ليه يعني ما نسوي عمره مع شهد و عهد
ريم : عن الهذره عهد و شهد ما راح يطلعون إلاّ العصر و تخيلي شكلك كذا و إنتي داخله على بنات السكن بإحرامك مع هالغطا و البجامه أكيد بيقولون مهابيل
ريناد : صادقه لازم نسوي العمره قبل نروح عشان نكشخ على كيفنا
ريم : دامه كذا فزّي ساعديني و بعد نص ساعه جاء عمهم يآخذهم عشان يطلعون للحرم
ريناد تساسر ريم : ألحين نجود و جوري بالمدرسة الله يعينهم
ريم : إيه الله يعينهم
.
.
و بعد قليل خرجوا بإتجاه الحرم

و أول ما مشوا بطريقهم و صكتهم الشمس
ريناد : ريم آم ثيرستي ( البنت عطشانه )
ريم : والله إن تثرستين عدل لكن كله أجر إن شاء الله
عمهم : شوفوا يا بنات إنتبهوا تفكون من بعض و إنتي يا ريم خلي جوالك على الهزاز و حاولوا تكونون وراي
البنات : إن شاء الله يا عم
و يوم قّرّبوا من الباب و صارت الناس تخلع جزمها
ريناد تساسر ريم : أقول بنحط جزمنا بهالصناديق و إن باقوها ناكلها بالشمس
ريم : يا ربي منك حطي جزمتك و إنتي ساكته
ريناد و هي تحط جزمتها بالصندوق : ترى أول مرّه ألبسها
ريم : أقول ترى ما سألتك و إذا أول مرّه يلاّ خلصي
دخلوا و ريناد كأنها نصف عمياء مع غطاها تتلمس ريم و تمشي وراها
ريم : وش فيك بتطيحيني
ريناد : ما أشوف زين
ريم : شكلك إمخليه الغطا طبقتين خليه طبقه وحده
عمهم مساعد : ألحين روحوا صلّوا تحية المسجد ثم تعالوا هنا
راح أبو ريّان جهة الرجال و البنات جهة الحريم و بعد الصلاة مشوا البنات مع عمهم بإتجاه الصحن و إشوي إلاّ شافوا الكعبه
وقفوا يدعون أبو ريان دعى لإعياله و لوالديه و لكل من طرى عليه في ذلك الوقت
ريم دعت لنفسها و لأهلها و لصديقاتها
ريناد دعت لنفسها و لجوري و من طول الدعاء ما كمّلت للباقي مشوا بإتجاه الصحن
أبو ريّان : إنتبهوا خلكم وراي
البنات : إن شاء الله يا عم
و بعد إشوي صاروا عند ((خط المرمر البني)) وهو خط بداية الطواف
وقفوا عنده و ستقبلوا الحجر الأسود و رفعوا أيديهم عمهم قولوا معي
: (( بسم الله و الله أكبر اللهم إيماناً بك و تصديقاً بكتابك و وفاء بعهدك و إتباعاً لسنة نبيك ))
بعد كذا بدأت الدعوات و كل إشوي رجال صاك الحريم و إلاّ دايس على عباياتهم
ريناد : مهي بحاله كل إشوي صاكين فينا و إلاّ يدوسون على عباياتنا
ريم : رفعي عباتك عن الأرض
ريناد : ريم و ين عمي مساعد ؟؟
ريم : إدعي إستغلي وقتك و عمي مساعد هناك عند ذاك الرجال الطويل قدام
و ألحين صاروا عند الركن اليماني
البنات : (رَبَّنَا ءَاتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ)
و لمّا صاروا في الشوط الخامس من الطواف و إلاّ تمر من عند البنات حرمه تدعي و تقول : يارب يا رب ترزقني الذرية الصالحه يا رب إنت أعلم بحالي من عشر سنوات ما جاني ...........
ثم عدّت الحرمه من جنبهم
ريناد : ريم سمعتي إللي سمعته ؟؟
ريم : إيه شفتي كيف ؟؟ عسى الله يرزقها و يرزق كل من تمنى
ريناد بدأت تسمع دعوات كثيره غير دعواتها علمت قيمة النعم ومعنى إفتقار العبد لربه و شافت الجمع الغفير عند المقام و الشيوخ حوله
ريناد : طيب حنّا في أي شوط ألحين ؟؟
ريم : في الشوط السابع خلاص
و بعد أن أنهوا طوافهم توجهوا ليصلوا ركعتين خلف مقام إبراهيم عليه السلام
بعد الصلاه
ريناد : وين عمي مساعد ؟؟
ريم : مدري
و صارت تلف براسها يمين يسار تدور عليه
و إشوي إلاّ يرن جوالها
ريم : أيوه خلصنا طواف و صلينا
................
ريم : إيه إيه شفتك خلاص ألحين نجيك
إجتمع أبو ريّان مع بنات أخوه و على طول بإتجاه المسعى في الصفا قابلوا القبلة : { إن الصفا والمروة من شعائر الله فمن حج البيت أَو اعتمر فلا جناح عليه أن يطوف بهما ومن تطوع خيرا فإن الله شاكر عليم }
.
.
ريناد : ريم نشف ريقي حتى ما أقدر أدعي
ريم : حتى أنا أبي أدعي و مش عارفه فمي جفاااااااااااااااف
ريناد : والله إللي تعذبنا
ريم : كله أجر إن شاء الله
ريناد : ألحين تلاقين جوري و نجود جالسين بالفصل مرتاحين و متنعمين بالبراد
ريم : الله يا الحسد أقول لا تضحكيني ترى ما أقدر أضحك صدق خبله
ريناد : أقول بأي شوط ؟
ريم : الرابع
ريناد : يا ربي يعني إمطولين
ريم : خلاص لا تتكلمين ترى ريقي نشف
ريناد : والله بالموت أشيل إرجولي من الأرض و النوم ذبحني
ريم : يسهلها الله
عمهم مساعد : أجل تعبتوا
ريناد : أجر إن شاء الله
عمهم : يلاّ ما بقى شيء
و إشوي إلاّ ذيك الضربة إللي جات برجل ريناد اليمنى من الخلف
ريناد و صوتها المبحوح : آآآي
إلتفتت و إلاّ الشاب إللي كان معهم بالباص بالخلف كان يدف عجوز
الشاب : آسفين آسفين
ريناد ريقها ناشف حتى ما تقدر تتكلم
الشاب بنفسه ( يا الفشله وش بتقول البنت )
مشى قدام و سلّم على أبو ريّان ثم كمل مشواره
و في آخر شوط ريم و ريناد جلسوا من التعب
عمهم : يلاّ مبروك العمره
البنات بالموت الكلام يطلع : الله يبارك فيك
عمهم : خلاص شوفوا إتوا إجلسوا هنا إرتاحوا و أنا بأروح هنا قريب بأحلق و بأجيكم لا تتحركون من هنا
البنات : إن شاء الله
راح عمهم مساعد للحلاّق وإلاّ جمع غفير ما شاء الله
.
نهاية المسعى ريم و ريناد جالسات
ريناد : الله لو يشوفوني البنات ألحين والله كان يضحكون علي تصدقين أنا كسرت بخاطر نفسي أمّا لو يمر أحد من جنبنا و يتصدق علينا
ريم إبتسمت : الله يقطع شرّك يا ريناد
ريناد : كلمي أمي كلميها خلني أقول لها عن معاناتنا لا و الضربه إللي برجلي تعورني ما يشوف هو ووجهه
ريم : أمي أكيد بالمدرسه
ريناد : عطيني الجوال بس
تتصل بأمها
ريناد : السلام عليكم
أمها : و عليكم السلام هه طمنوني عنكم ؟
ريناد : وينك يما تشوفينا تقولين جالسين شحاتات من التعب جالسين بنهاية المسعى
أمها : يعني خلصتوا من العمره؟
ريناد : إيه الحمد لله
أمها : مبروك مبروك
ريناد : الله يبارك فيك لكن والله يا يما إني من كثر ما ريقي ناشف أبي أدعي و لاني قادره
أمها : أجر إن شاء الله طيب إنتوا ألحين أكيد بتصلون الظهر بالحرم إرتاحوا لكن وين ريم ؟
ريناد : هنا خذيها
ريم : هلا يما كيفكم أخباركم ؟؟
أمها : الحمد لله إنتوا شخباركم ؟
ريم : الحمد لله خلصنا من العمره
أمها : مبروك العمره أجل متى بتروحون لعهد و شهد؟
ريم : العصر
أمها : سلموا عليهم
ريم : الله يسلمك
أمها : وين عمكم عنكم ؟
ريم : راح يحلق و هذا هو رجع
أمها : يلاّ أخليكم مع السلامه
صلوا الظهر بالحرم ثم إتجهو للأبراج و كل واحد إتجه لغرفته
قصّروا البنات من شعرهم ثم تروشوا ثم أرسلوا ملابسهم للكوي
ثم ناموا
...
..
.
في الشرقية
الساعه : 1 الظهر
بسّام يجهز لطلعة القنص
بسّام : نانسي خلصتي ؟؟ جهزتي العزبه كلها ؟
نانسي : إيه خلاص هزا ملح بهار هنا ( وتأشر على مكانهم ) و سكر شاي قهوه هنا تمر رطب هنا
بسّام : خلاص خلاص المهم جهزتيها يلاّ عطيني بس
نانسي : بسّام إنتبه من طريق
بسّام بنفسه ( يا حليلها نانسي تسوي زي أمي )
المهم شال العزبه و حطها بالجيب
صحون ما صحون
ترمسُ الماء
ثلاجه
ثلج
مويه للغسيل
حطب
.................إلخ
حط العدّه بالجيب من ورى و إلاّ بندر جاي بطيره و طير بسّام ركّبهم بالسيّارة
بندر : وش رايك نجيب طير طيرين زياده ؟
بسّام : والله مهي بشينه لكن واحد عن الزحمه خبرك ريّان معه طيره جساس
بندر : على كذا بأجيب(( ريمان))
بسّام : لكن هذا فرخ و من إسبوع كان مريض صاحي تجيبه
بندر : خله يطلع حتى لو ما إستخدمناه
بسّام : بكيفك لكن ترى بيروح بس زينه
بندر : خله يطلع من هالحكره
بسّام : طيب جيبه و أنا بأروح أجيب باقي الأغراض
راح بسّام يجيب البنادق و الدرابيل و الكاميرة
و بعد ما صار كل شيء بمكانه
بندر : عسى ما نسينا شيء؟؟
بسّام : إن شاء الله لا
بندر : طيب شيكت على السياره من بعد ما شيك عليها السواق ؟
بسّام : إيه لا و أبشرك لقيت الزيت على نهايته
بندر : إيه قايل لك لا تعتمد عليه طيب الحين إعصب راسك و خلنا نشدها
راحوا عند ريّان و حمّلوا طيره و أغراضه ثم راحوا عند وليف و بندقيته
بندر : سلامات سلامات يقولون طيرك مريض
وليف : تعبان ما يصلح خلاص بدأت به الشيخوخه صار في أرذل العمر
الشباب هههههههههههههههههههههههه
ريّان : صحيح كيف طلعت من دوامك ؟
وليف : رحت للمدير الزفت قلت له و رفض عاد طلعت و خليت القرعا ترعا
ريّان : عسى بس ما عليك حصه منّا و إلاّ منّا
وليف : لا كان عندي حصه منّاك ههههههههه وش منّا و إلاّ منّا خلّصت حصص و حتى لو كان عندي حصه لا جا القنص ما جا غيره
بسّام : أشوفك بعد كم سنه و معك أم العيال تقول هالكلام
وليف : هي خلها تجي بس
ريّان : خلها تجي أجل يعني لا جات ما جا القنص هه؟؟
الشباب ههههههههههههههههههه
بسّام : تلقونه آمري يا عيوني آمري يا بعد طوايف هلي
و تقوله لا تطلع من البيت يقول على هالخشم
ريّان و بسّام ههههههههههههههه
وليف : لا أقول لها آمري يا عين أبوي
الشباب هههههههههههههههه
ريّان : طيب وين بتقنصون اليوم ؟
بسّام : من أم البردي للدسمة لطفيح لجو سمين يعني هالخط
وليف : تمام والله إن الدسمه دسمة صيد
بندر : حتى والله البراري إللي قبلهم شيء
بسّام : صدق لكن هناك منزلة جدي يعني بيمسكنا لا طلعنا نمر عليه
ريّان : خير ما تسوي طيب عطنا يا وليف من النكت إللي عندك
وليف : يعني ناوين تضحكون
الشباب : عطنا
وليف : هذا يقول لكم في واحد مغازلجي مسمي نفسه ( منشف ريق البنات ) ليه ؟
الشباب : ليه ؟
وليف : من كثر ما يتفلون بوجهه
الشباب هههههههههههههههههههه
وليف : فيه محشش دخل على راعي بقاله قال عندك ببسي حار قال أيوه قال حطه في الثلاجه
بسّام و بندر هههههههههههه
ريّان ما ضحك
وليف : ليه ما ضحكت ؟
ريّان : سمعتها
وليف : ما يصير يقولون الإنسان لأحد قال له كلام قد سمعه لازم يسوي نفسه و كأنه أول مرّه يسمعه يلاّ ألحين أضحك سو نفسك اول مرّه تسمعها
بسّام و بندر ههههههههههه
ريّان : كمّل كمّل
وليف : أول شيء إضحك
ريّان : أقول كمّل كمّل لا أهد عليك جساس
وليف : يعني طيري مريض جلست تزعط علي خلاص أجل بأعاندك يلاّ إضحك
بندر و بسّام ههههههههههههههه
بندر : يلاّ كمّل يا رجّال
وليف : طيب طيب هذا محشش كل ما ضربوه شباب يضحك و يقول : عارف عارف صادوه صادوه
ههههههههههههههههههههههههههههههههههههههههههههه
وليف : يلاّ أخذوا هاذي هذا دكتور شغل أغاني للمجانين الكل رقص ما عدا واحد سأله الدكتور ليه ما رقصت معاهم ؟؟
قال اسكت اسكت أنا العرووووووووووس
هههههههههههههههههههههههههههههههه
و إستمر الضحك و المزح و قبل يدخلون على أم البردي
على ذاك الطريق في طعس مشهوووووور قومات سيارات لعب دبابات مد للطيور و تحديات
وليف : مروا خلنا نشوف وش عندهم ؟
بسّام : والله مدري سمعت إن هالطعس من إسبوع صارت فيه مشكله
وليف : ما علينا حنا بس نتفرّج
بندر : خلنا نشوف وش عندهم كن عندهم مد طيور
ريّان : لف خلنا نشوف
بسّام : طيب مثل ما تبون
لف على جهة الطعس و إلاّ عالم يعني أخف من قبل عشان رمضان لكن فيه ناس
و وهم يتفرجون إلاّ يجيهم ذاك الرجال مع ربعه و معهم حمام كثير
واحد منهم يكلّم بسّام : هه تتحداني ؟
بسّام : و عليكم السلام ( يعني ما سلمت و جاي بشرك )
وش تتحداني ليه وش عندك ؟
الرجال : عندي زاجل سريعه و أشوف عندك طيور هه وش قلت تتحداني
بسّام : يا رجّال لا جزاك الله خير حنّا جايين نتفرج و بنطلع
الرجال : ما قول إلاّ...
و ناظر بربعه و قال الكلمه
بسّام : وش وش قلها بوجههي كانك قدها
الرجال : سلامتك لا لا بس إنزل إنت إن كانك قد التحدي
بسّام : طيب تقول عندك زاجل
الرجال : إيه نعم زاجل
واحد من ربع الرجال : هالزاجل هاذي من سنتين و هو يشارك فيها و لا طير قدر يلحقها
الرجال : إيه يلاّ خلنا نشوف طيرك
ريّان : بسّام واضح إن هالوجيه ما لها بالخير باع
بندر : لكن يتحدى خلّه يشوف حظه لأقشر
وليف : جرّب وش خسران
بسّام : يلاّ نزلنا خله يشوف يوم إنه يتحلطم قبل إشوي والله إن يشوف عمايل مطنوخ
شباب عطوني مطنوخ
و يوم شاف الرجال الطير مهوب مثل سابقيه قال : لا هد ذاك و يأشر على ريمان
بسّام : ألحين أنت متحدي بحمامتك و أنت إللي مختارها و أنا بطيري و أنا إلي بأختاره أقول يا تهد يا تنسحب
الرجال : يلاّ بأهدها و مع السلامه بأروح لها بالبيت
بسّام : كل هاذي ثقه ؟
الرجال : إيه يلاّ مع السلامه
هد الرجال حمامته ثم عطاهم من قفاه بيمشي
و إلاّ هي حمامه سريعه طارت لبعيد طارت و طارت لبعيد
هد بسّام مطنوخ
و يطير مطنوخ فوق فوق و ورى الحمامه
وراها وراها
وراها وراها
وراها وراها
و يحووووووووووّل عليها من فوق و يحللها
بسّام : تسلم تسلم يا مطنوخ
بندر : هذا مطنوووووووووووووووووووووخ
وليف : يلاّ اليوم حمامته مهي براجعه لبيته مطنوخ ذابحها
ريّان : ما شاء الله ما شاء الله هاذي فعايل مطنوخ

..
.
الرجال عرف من ربعه عن حمامته وشعوره ( لا تعليق )
و الشباب إللي كانوا بالطعس جاوا لبسّام يسألونه كانه بيبيع طيره لكن مطنوخ هديه من أبوه مستحيل يفرّط فيها أبد
المهم ركبوا السيارة
و إنطلقوا لقنصهم
...
..
.
بمكه البنات صحوا و تجهزوا عشان بروحون لبنات عمهم كما إستيقظ عمهم مساعد
ثم ذهبوا مع سيّارة أجره للسكن
و بالطريق عمهم مساعد : أجل الفول الطبق الرئيسي عندكم
السائق : أيوا هدا شيء مؤكد طيب أنت من وين يا عم ؟
العم : من الشرقيه
السائق : إيش طبقكم الرئيسي ؟
العم : الثريد الثريد هو طبقنا الرئيسي
ريناد بنفسها ( فول ليه ؟ وش طاري عليهم ؟؟)
و بعد إشوي
دخلت ريناد و ريم للسجن المركزي و إلاّ ما شاء الله بنات كثير سلّموا بالأول على عهد و شهد تبوس و بالأحضان
ثم سلّموا على سحر إللي إنجنّت على ريناد
بعد ذلك صعدوا بالمصعد لغرفة بنات عمهم و شافوا كيف شكلها
و العفسه إللي فيها
وتعرفوا على بنات تعرّفوا على ذلك العالم الصغير المعزول عن العالم الخارجي و أعطوا الهدايا لصاحبات بنات عمهم
و ساعدوا بنات عمهم في شيل الشنط بعد كذا طلعوا من السكن ثم اتجهوا للتنعيم ( ميقات أهل مكه ) عشان عهد و شهد يحرمون من هناك ثم راحوا للحرم
.......
.....
...
..
.
في البر

صادوا في أم البردي ثلاثه قميري و ثنين خضيري
ثم بالدسمه دسمة الصيد
صادوا سبعه زراقي
و راحوا لطفيح و صادوا فيها ثلاث قوبعات
ثم و قفوا عشان يطبخون الفطور
بسّام : اليوم بتآكلون أحلى زراقي بحياتكم
وليف : طيب أنا أبي للوالد إرطا معدته قايمه عليه و هناك إرطا بأروح أجيب لبوي
بندر : بأخاويك
بسّام : حتى أنا أبي منه لأهلي
ريّان : و أنا يعني جيبوا للكل
وليف : يعني المعده تفشت
الشباب هههههههههههههههههه
بندر : لا ناس عندهم و ناس لا هههههههههههههههه
..
.

شب ريّان النار و بدوا يطبخون
بسّام يقطع البصل و عيونه تصب أربع أربع
بسّام : والله حاله والله إن الحريم إبتلشوا بهالبصل
ريّان : يلاّ الله يعينهم لكن كم زراقي تبون ؟
بسّام : مدري إثنين ثلاث تراهم سمان و حنا أربعه
ريّان : إثنين و عسانا ناكلهم ما شاء الله كبار
إتصلت أم بسّام تستفسر عن فطور ولدها و لقاها فرصه يسأل عن الطبخه
ريّان : لا تغش لا تغش من غشّنا فليس منّا
أم زياد : هذا ريّان الله يقطع شرّه سلّم عليه و إنتبه لا توهقهم بالفطور
بسّام : لا أنا سالتك بس عشان أتأكد و إلاّ الطبخه معروفه
.
.
.
عند شجرة الرطا

بندر : شفت كيف جاي نافش ريشه حمام زاجل حمام زاجل يلاّ تعشى عليها مطنوخ
وليف : سبحان الله أغلب إللي ينفخون تلقى نفختهم على الفشيش
و الواحد المفروض ما يستهين بخصمه لأن ألإستخفاف أول الخساره
بندر : إيه والله إنك صادق
وليف : لكن بندر وش فيك ضعفت كذا عسى بس مو متحدينك و خسرت ههههههههههه
بندر : هههههههههه لا أبد الكل يقول كذا هذا من الشغل تعرف
و تنقلوا من سالفه لأخرى
( فعلاً الإستخفاف أول الخساره و إلانسان ما يستحقر غيره ما يعرف وش يحصل له بعد كذا )
رجع وليف مع بندر عند الطبّاخين
وليف : يا زين هالريحه زيناه
ريّان : طيب على هالريحه عطنا وحده كذا إمتكتكه
وليف : وحده إمتكتكه إيه هاذي سالفه صارت مع واحد أعرفه تضحك كان الرجال طالع مع أهله و هو رجال أقشر و إعياله مهي بأحسن منه أزعجه واحد من إعياله فقال له إسكت يا جحش قام قاله ولده أقول يبا الجحش شسم أبوه ( ماهو إسم والده )
الشباب هههههههههههههههههههههههههههههههه
ريّان يعني إن أبوه حمار هههههههههههههههههههه
.........
.....
..
.

و بعد ما حطوا الفطور و فطروا
راح بسّام ينزل المويه عشان يتوضون للصلاة
و بينما هو في طريقه إلاّ يصرخ ذيك الصرخه
!!!!!!!!!!!
!!!!!!!
!!!!
!




في الحلقة القادمة لما صرخ بسّام ؟؟
ما المجريات في مكه ؟؟
كيف سيكون طريق العوده للجميع ؟؟

في الحلقة القادمة
...
..
.
ماذا سيحدث مع صاحب حمامة الزاجل ؟؟
طفل العائة الهندية ؟؟؟