كاتب الموضوع :
silence sound
المنتدى :
الارشيف
الجزء السادس
أحبك أكثر..من الأمل..!!
في صباح يوم آخر..
أبو امل: ما ادري يا ام امل.. الي اعرفه انه طارق منوم في المستشفى وجاته جلطة..
ام امل: طيب ما قالو السبب..؟؟
ابو امل: قلتلك لا..
ام امل: وحتقول لأمل؟؟
ابو امل: ايوه لازم تعرف .. يمكن تقولنا على سبب الطلاق لو كانت عارفة شيء..
كانت امل في غرفتها مضجعة ترتدي شرشف الصلاة وتمسك بمسبحة وتذكر ربها..
كانت تسبح في بحر من الهموم والإحساس بالضياع..
ابو امل: كيفك يا امل..
امل: الحمد لله..
ابو امل: سمعتي الي صار؟؟
امل: ايش..
ابو امل: طارق في المستشفى وجاته جلطة..
امل: طارق؟؟!!!!
ابو امل: ايوه طليقك طارق..
امل: طيب ليش؟؟
ابو امل: انا جيت عشان اسألك ليش؟؟
امل: يعني يا بابا انا الي مرضته؟؟!! انا ايش عرفني ليش؟؟!!
ابو امل: يا بنتي كل شيء ممكن يتصلح.. لكن نجلس كده مو عارفين شيء.!!
امل: والله يا بابا الي اعرفه قلته..
ابو امل: طيب مين خالد؟؟!!
امل: يا بابا والله عمري ما سمعت بأحد اسمه خالد..!!!
ابو امل: شوفي يا امل.. اعترفي دحين احسن لك.. عشان لو عرفت بعدين انه لك علاقة بواحد اسمه
خالد.. والله العظيم راح انحرك..
امل: انا يا بابا..!!! انا تشك في..!!وتنحرني..!!؟؟؟؟
ابو امل: هذا الي بيدي..
امل: شكرا يا بابا.. بس صدقني هادا الي عندي.. ولو شايف انه بنتك ممكن تعمل شي غلط.. ابقى
انحرني من دحين..
ابو امل: لا انا بنتظر طارق يقوم من المستشفى وراح اعرف كيف اتصرف..
امل: "وافوض امري الى الله والله بصير بالعباد"
_____________________________________________________
استيقظ هشام من النوم.. يشعر بقليل من الإرتياح.. ربما لأنه خرج من عزلته ليلة البارحة.. ارتدى ملابس
العمل وقرر الذهاب..
نزل هشام من الدرج .. وجد هيام ووالدته يتناولون الإفطار..
صالحة: هلا والله بنور عيوني..
هيام: الله لا يحرمنا من هالطلة..
هشام: بس خلاص احرجتوني.. هيام مع مين رايحة..
هيام: هنادي ومجدي بيمروا عليا..
هشام : خلاص كلميهم لا يجوا.. انا بوصلك..
هيام: من عيوني .. انا اتمنى اليوم الي ترجع توصلني فيه..
هشام:بس خلاص بلا دلع..
صالحة: دحين اختك تتغزل فيك وتقلها بلا دلع؟؟!!
هيام: شايفة يا امي.. يعني عشاني احبه..
هشام: ترى راح ابطل..
هيام: لالالا تكفى الله يخليك.. والله خلاص قول الي تبغاه..
هشام: يلا اتأخرنا..
هيام: يلا يا ماما.. مع السلامة..
صالحة : مع السلامة .. الله يوفقكم ويبلغكم مقصودكم..
في السيارة فضلت هيام التزام الصمت حيال الموضوع الذي اثر على حياة هشام وقلبها رأسا على
عقب..واكتفت بالحديث عن الجامعة ومتابعة كفرات السيارات وهي تدور..!!!
هشام: يلا انزلي ياست البنات..
هيام: راح ترجعني انت..؟؟
هشام: لو لقيتي احد ارجعي معاه ولو مافي.. كلميني.. اوك..
هيام: اوك.. سلام..
هشام: سلام..
____________________________________________________
.
.
خرج أمجد قبيل الصباح.. يتمشى على البحر.. يبث ما به من هم.. او على الأقل ما اسماه هو هما.وجد
امجد نفسه متجها نحو ذلك المكان .. وبالتحديد تلك البقعة التي ارتمت فيها اماني..!!كان يفكر بوالده..
وبها..
مشاعر متضاربة تحيط به.. وكأنه قد جاء هنا ليشكو لها مخاوفه على والده..
وكأنه يلجأ لحضنها.. أدرك في ذلك الوقت انه متعلقا بشدة بأماني..
رغم كل ما يحيط به.. الا ان صورتها لم تغب عن باله..!! زاد شوقه لها .. وتمنى لقاءها..
وبينما امجد يفكر ويتأمل.. تذكر فجأة..!!
نعم.. تذكرت..
"أنا اشوفه كل يوم فترة يمر من هنا .. هو قصده يصدمها..!!"
كان والد اماني يهذي بهذه الكلمات حينما كان يجري نحو ابنته وهي ملقاة على الأرض..
ايقن امجد بأن عائلة اماني تسكن هنا لا محالة.. او على الأقل يأتون هنا يوميا..
أحس براحة شديدة.. وعادت الإبتسامة لمحياه.. بالرغم من قلقه الشديد على والده.!!
وتوجه للمدرسة..
__________________________________________________
هيام: هلا .. ام احمد..
ام احمد: هيام؟
هيام: ايوه انا هيام..كيفك يا ام احمد..
ام احمد: الحمد لله .. انتي كيفك.؟؟ وكيف صاحبتك هنادي..؟؟
هيام: والله بخير يا ام احمد.. هنادي.. مسكينة ابوها في المستشفى تعبان شوية..
ام احمد: الف سلامة عليه ما يشوف شر ان شاء الله..
هيام: امين الله يسمع منك يا خالة..
ام احمد: طيب انا حبيت اسأل عنكم.. وياريت لو فيه فرصه نتقابل وتعرفيني على الوالدة..
هيام: ان شاء الله ليش لا.. في اقرب فرصة راح اكلمك..طيب ياخالة بس عشان الدكتورة جات.. مضطرة
اقفل..
ام احمد : طيب مع السلامة وسلمي على هنادي..
هيام: مع السلامة..
قفلت هيام الخط واقد ارتسمت ابتسامة لطيفة على شفاهها.. متعجبة من ا نام احمد لازالت تذكرها
وتذكر والدتها التي لم ترها قط..!!
_____________________________________________________
حاتم: كيف حالة بابتك اليوم؟؟
أمجد: كلمناه في الليل عالمستشفى .. الحمد لله حالته اتحسنت كثير .. يمكن يخرجوه اليوم..
حاتم: ماشاء الله تبارك الله.. الله يتمم بشفاءه..
امجد: امين..
حاتم: وانت اش فيك متنكد كذا؟؟
أمجد: لا.. مافيني شيء..
حاتم: اقول.. فيك شيء..
أمجد: رجعت افكر فيها يا حاتم..
حاتم: ياربي.. اماني لسه.. يا بابا انت تحبها.. روح واخطبها وريحنا..
أمجد: لو اقدر .. بس المشكلة الوضع ما يسمح..
حاتم: انا ما قلتلك دحين..خلي ابوك يخرج بالسلامة.. وافتح الموضوع مع اهلك..
امجد: ما ادري يا شيخ.. نفسي تختفي من مخي وارتاح..
حاتم: يا عمي مالك ومال الحب.. استمتع بحياتك.. اطلع معانا وتنسى ابو جدها..
امجد: حاتم لو سمحت انت عارفني انو من حق الشغلات هادي.. لو تبغى صداقتنا تستمر.. لا تجيب سيرة
خرجاتكم هادي قدامي..
حاتم: خلاص... خلاص.. لا تعصب..
امجد: لو سمحت..
حاتم: هلا تركي..
تركي: اش فيكم شوية وتضاربو؟؟
امجد: خويك يبغاني اخرج معاه في خرجاتو التعبانة..
تركي: اتركك منه غبي... الين يجي في يوم من الأيام وأخته تخرج معاهم..
حاتم: بدينا نغلط..
تركي: لا نغلط ولا شيء.. يا حبيبي كما تدين تدان.. وبراحتك..
أمجد: خلاص اقطعو السيرة.. انتو كلما تتقابلو تضاربو..!!!
تركي: امجد معليش ما جيت زرت ابوك في المستشفى بس والله انت عارف ماعندي سيارة..
امجد: عادي ياتركي.. انت عارفني ما افكر..
تركي: انت اطيب من قلبك مافي..
حاتم: وانا الحيوان..
تركي: يا بوية صلي عالنبي.. مين قال عنك حيوان..؟؟!!!
حاتم: شوفو انتو ايش بتقولو؟؟
تركي: ايوه يا حاتم.. احنا ماغلطنا عليك.. بس والله خايفين عليك.. رائد وشلته ما راح ينفعوك.. يابوية انتو
بتضحكو على البنات.. بتلعبو عليهم..
حاتم: احنا ماجبرنا احد هم الي يجوا..
امجد: بس هم ما يجوا الا بعد ما تسو فيها انكم مثاليين .. وراح تتزوجو..
وانكم بس تبغوا تشوفوهم.. وماراح تسوو لهم شيء.. وبعد ما يجو.. تعملو الي تبغوه..
يا اخي انت وراك اخوات.. وراك زوجة.. حافظ عليهم..
حاتم: ما ادري.. الله يتوب علي..
تركي: آمين.. حاتم لاتزعل.. انت لو ماتهمنا ومحبك ما كلمناك..
حاتم: عارف.. اصلا انا بدونكم ايش اعمل..
امجد: يلا الأستاذ جاء.. سلام يا تركي..
تركي: سلام..
________________________________________________
هشام من المكتب:الو هلا زياد..
زياد: والله حرام عليك .. يومين انا ادور عليك .. شغلتني.. لو ما امك قالت انك بغرفتك كان جنيت.. وجوالك
مقفل..
هشام: والله تعبان يا زياد.. مو قادر انام..
زياد: يا هشام خلاص الي صار صار.. ربك عالم بنيتك ونيتها..
هشام: بس يا زياد انا الي رضيت انها تروح..
زياد: انت حاولت .. وهي اصرت.. وانت بعدين عرفت ليش اصرت.. يعني انت ما غلطت..
هشام: والله ما ادري.. كل شوية افتكر حاجة.. الذكريات بتتعبني..
زياد: هشام.. ليه ما تتزوج..؟؟
هشام: اتزوج..؟؟؟!!!
زياد: اكيد تنساها ..
هشام: مستحيل انساها.. زياد انا حبيتها وعشقتها حد الجنون..اخذت عقلي كلو..غير كده انا ماراح اتزوج
الين هيام تتزوج..
زياد: كده انت بتتعب نفسك زيادة وبس.. اقول لمن تخرج العمل كلمني.. انا مشغول دحين.. ولازم اشوفك
طيب.. نتغدى سوا...
هشام: اوك نتغدى سوا..
___________________________________________________
أيمن: الو حبيبتي..
خلود: هلا عيوني..
أيمن: كيفك؟؟
خلود: دامك بخير .. انا بخير..
أيمن: يارب يخليييكي.. اقول..
خلود: هلا..
أيمن: لا تطبخي..اوك..
خلود: لييييييييييش؟؟
أيمن: ياشين اللقافة.. خلاص اطبخي..
خلود: لالالا خلاص ماراح اطبخ..
أيمن: في لك مفاجأة..
خلود: ايش هيه؟؟
أيمن: برضه.. تتملقف..
خلود:ياسيدي خلاص والله سكتت..
أيمن: ايوه كذا..
_________________________________________________
هيام: هنادي.. اشتريلي موية الله يخليكي...
هنادي: طيب يا دوووبة..
نورة: هلا هيام.. كيفك؟؟
هيام:والله بخير .. انتي كيفك؟؟
نورة: الحمد لله.. جات هنادي اليوم ها..
هيام: أي والله جات.. ايش تستفيد لو غابت ما راح تقدم ولا تأخر..
نورة: الله يشفيه لها ..
هيام: امين..
هنادي: هلا نورة.. خذي الموية يا هيام..
نورة: هلا حبيبتي .. كيف ابوكي؟؟
هنادي: الحمد لله حالته بتتحسن.. ويمكن يطلع اليوم من المستشفى..
نورة: الحمد لله على سلامته.. ربي يتتم بشفاؤه..
هنادي :امين..
نورة: يلا اسيبكم .. واروح ادور على روان..ماشفتوها..؟؟
هيام: لا والله اليوم ما شفناها..
هنادي: والله طيوبة البنت دي..
هيام: اخ.. نفسي الله يهديها.. هنادي.. مين راح يرجعنا اليوم...؟؟
هنادي: غالبا مجدي..
هيام: اممم .. مجدي..
هنادي: ليييييش؟؟ ما عادتك تسألي..
هيام: لا ولاشيء.. بس عشان لو هشام سألني..
هنادي: اممم... هاد مجدي يتصل.. يلا قومي..
هيام: يلا..
___________________________________________
تركي: سلام عليكم..
ابو تركي: وعليكم السلام.. كيف المدرسة؟؟
تركي: الحمدلله.. تمام..
ابو تركي: يلا يا ولدي.. شد حيلك هادي التوجيهي.. لازم تجيب معدل عشان تدخل طب ولا هندسة..
تركي: ان شاء يا ابوية .. ابشر..
ام تركي: احط الغداء..؟؟
ابو تركي: ايوه يلا بسرعة متنا جوع..
تركي: بابا.. ابغى اقولك على حاجة..
ابو تركي: اتفضل.. خير..
تركي: ماراح تعلمني سواقة السيارة..؟؟اصحابي كلهم عندهم سيارات..
ابو تركي: اممممم..طيب ان شاء الله بعد الثانوية.. ابشر..
تركي: بس ..
ابو تركي يقاطع: تركي..!! خلاص انا قلت بعد الثانوية..
تركي: طيب..خلاص..
ابو تركي: فين رايح؟؟ الغداء..!!
تركي: اتغديت مع اصحابي..
ابو تركي: الله يوفقك..
.....
ابو تركي لأم تركي: شفتي الزمن ايش عمل فيا؟؟!!
ام تركي: ليش خير ؟؟
ابو تركي: آآه.. تركي.. فتح لي موضوع السيارة..
ام تركي: طيب ..انت علمه..
ابو تركي: يعني منتي عارفة البير وغطاه.. لو علمته.. من فين راح اشتريله سيارة..؟؟!!!
ام تركي: انت علمه.. وبعدين ربنا راح يفرجها..
ابو تركي: ماادري ياشيخة.. هادا ولدي الوحيد .. وابغى اعمل له الي يبغاه..
وكمان ابغاه يشد حيله بالثانوي.. عشان لا يكرر مأساة ابوه..
ام تركي: لا تشيل هم .. الله يوقف معاه..
ابو تركي: يارب..
_______________________________________________-
أيمن: نورت السيارة يا روحي..
خلود: منورة بصاحبها..
أيمن: اليوم كم يا عمري؟؟
خلود: ما ادري..ليييش؟؟
أيمن: هيه شفتي .. انا احبك اكثر.. مسويه انك تحبيني.. وطلعتي حتى عيد زواجنا مو فاكرته!!
خلود: طيب يا شطور اتفضل هدية زواجنا..
أيمن: معقولة..!!! مجهزة هدية كمان..!!! لو درت الدنيا كلها ماراح الاقي زيك..
قد ما اعمل انتي احسن مني .. الله لا يحرمني منك ولا من حنانك..
خلود: شفت اني احبك اكثر.. انا فاكره من بدري ياقمر.. واشتريت الهدية كمان..
أيمن: الله يخليكي ليا..
______________________________________________
الدكتورة علاء: اهلا مي اتفضلي..
الدكتورة مي: اوك.. نروح نفس المكان امس..
علاء: طيب خلاص.. احقيني وانا وراكم..
مي: اوك ..سلام..
في المطعم
مي: اكيد طبعا بعد ما كذبت عليك . واكتشفت انها اغتصبت واتزوجت وعندها بنت كمان.. انت تركتها وهيه
تبغى ترجعلك دحين..
علاء: لا..
مي: لا؟؟ ايش صار؟؟
علاء: بعد ما عرفت الموضوع.. قفلت منها.. والدنيا سودة في وجهي.. تذكرت اهلي والناس.. وايش راح
يصير بالمستقبل.. كنت احبها.. وبنفس الوقت ما ابغى اتزوج كده..
مي: طبعا أي رجل غيرك من لازم يفكر بالطريقة هادي..
علاء: كنت مشوش ومتوتر.. وحزييين.. جلست اسبوع وانا في حالة. لادوام.. ولاشيء.. واهلي حسوا انه
في شيء خطير.. وكنت احاول اخفي حالتي عنهم..
بس الوضع كان صعب.. مشاعر متضاربة .. احبها وما ابغاها..تعبت مررره..
المهم.. في يوم.. اتصلت عليها.. ردت وصوتها كان رااااااااايح..
علاء: الو..ايمان..
ايمان: متصل تتشمت.. ولا بتشتم..
علاء: ايمان..
ايمان: خير..
علاء: ايمان.. انتي كذبتي عليا..
ايمان: مو بيدي.. انا آسفة..علاء انت مو مجبور عليا.. بس انا احبك.. سامحني..
علاء: ايمان.. من اليوم.. لوسمحتي..
ايمان: رجوك ..لا تقولها .. قفل بوجهي وبس..
علاء: من اليوم ورايح .. انتي حتكوني زوجتي واميرة بنتي..
....
انتهى الجزء السادس...
اتمنى يكون عجبكم..
آسف على التأخر..
انتظروني بأجزاء قادمة..
|
31-07-08, 03:19 AM
،،
جديد مواضيع قسم الارشيف
العرض العادي
