كاتب الموضوع :
silence sound
المنتدى :
الارشيف
الجزء الخامس..
في ظلال اجنحة الطيور..!!
هيام: ايش فيه ..؟؟ اتكلمي بسرعة ...
هنادي: بابا.. بابا.. بابا ياهيام..
هيام: ايش فيه ..؟؟ بابتك ايش فيه؟؟..
هنادي: نقلوه عالمستشفى.. جاته جلطة..
هيام: ايش؟؟؟؟؟؟؟؟؟ جلطة..؟؟؟؟!!!!
هنادي: هيام انا مو متحملة انا تعبانة وخايفة مرررررررة.. ابغى اموت..
هيام: هدي نفسك .. ان شاء الله ما فيه الا العافية.. لاتخافي ربي راح يقومه بالسلامة..
هنادي: بس يقولو حالته صعبة..
هيام: الجأي لربك بدل البكاء الي ماله داعي وربي ما يخيب ظنك..
هنادي: خايفة يمووت..
هيام: لا اذكري ربك.. انتي ليه ما رحتي المستشفى.؟؟؟!!
هنادي: نقله امجد ومجدي ومعاهم ماما وانا ما لحقتهم... ياربي خايفة يموت وما اشوفه...
هيام: هنادي انا راح اصحي هشام ونجيك.. يلا اهدي وصلي عل نبيك..
هنادي: آسفة يا هيام..
هيام تقاطعها: اقولك البسي بسرعة ربع ساعة واحنا عندك.. سلام..
هنادي: سلام..
______________________________________________
تطرق هيام الباب على هشام الذي كان مستيقظا كالمعتاد.. بخفة..
هشام: ادخل..
هيام: هشام حبيبي انا عارفة انك تعبان.. بس مالنا غيرك..
هشام: ايش فيه.. ؟؟؟ خير..
هيام: ابو هنادي تعب ونقلوه عالمستشفى وهنادي لحالها في البيت ومافي احد يوديها..
هشام: لا حول ولا قوة الا بالله.. حالته خطيرة؟؟
هيام: يقولو جلطة..
هشام: يلا البسي بسرعة .. الله يستر ويطمنهم عليه.. واكتبي لماما ورقة وعلقيها على الباب..
_______________________________________________
خلود: أيمن .. الساعة ثلاثة.. وراك دوام..
أيمن:دقايق بس باقي شوية..
خلود: الفلم ده شفناه مية مرة.. خلاص انت عارف النهاية..
أيمن: خلود .. خليني اكمل .. شوية بس..
تنهض خلود من مكانها وتتجه نحو التلفاز .. وتغلقه..
أيمن: انتي ايش سويتي؟؟!!!
خلود: قوم يلا نام..
أيمن: انتي مجنونة.. ملقوفة.. انا اصلا عايش مع وحدة مجنونة.. نفسي ارتاح شوية بس.. يالله..
خلود: أيمن.. أنا..أنا.. أنا مجنونة..!!!
أيمن: ايوه مجنونة وستين مجنونة.. بعدي عن وجهي ..
ذهب أيمن لغرفة النوم وهو يكمل صراخه وتضجره.. لأن خلود اطفأت التلفاز!!
أما خلود حاولت ان تحبس دموعها .. وفشلت.. وقفت منهاره.. تبكي بحرقة..
استلقت على الاريكة ونامت..
_______________________________________________
هشام لمجدي: طيب الدكتور قال شيء؟؟
مجدي: اخر شي قاله .. انه الجلطة غطت القلب بكامله.. وانه لو مااستجاب للعلاج
خلال الساعات الجاية لازم يعملو عملية..
هشام: اممم.. ان شاء الله ربي ما راح يحوجه لعملية .. ويقوم بالسلامة..
مجدي : آمين..
________________________________________________________
هيام لهنادي: ايش الي صار..؟؟
هنادي: من امس وهو متضايق ومو راضي يكلم احد.. وجاء اليوم وحالته تعبانه..
ودوبها ماما بتقوله ايش فيك؟... طاح واغمى عليه.. ونقلوه.. وصار الي صار..
هيام: الله يعديها على خير..
هنادي: انا حاسة انه في شيء كبير .. الله يقومه بالسلامة ويجعله خير..
_______________________________________________
امسك علاء بجواله .. واتصل على ايمان..
علاء: ايمان..
ايمان: ايوه..
علاء: كيفك؟
ايمان: تعبانه ياعلاء..
علاء: من ايش؟؟
ايمان: من بعدك..
علاء: جربتي الألم الي كنت احسه..
ايمان: كافي ياعلاء.. خلاص.. ابوس رجولك .. سامحني وانسى..
علاء: صعب انسى..
إيمان: آسفة .. والله آسفة.. كفاية ..
علاء: ايمان ممكن اطلبك طلب..
ايمان: اتفضل..
علاء: ما عاد تتصلي عليا ولا ترسلي شي..
ايمان وصوتها قد غطته الدموع: لا.. لا تقسى عليا.. انا ما اقدر اعيش من دونك..
اقبلني عند رجولك.. بس لا تتركني..
علاء: ارجوكي لاتضعفيني.. انا ما ابغاكي..
ايمان: علاء .. انت كرهتني؟؟
علاء: ..آآ.. احنا ما ننفع لبعض..
ايمان: علاء.. كرهتني؟؟
علاء: لا..
ايمان: تحبني؟؟
علاء: ايمان انا ما اقدر اجاوب.. سلام..
ايمان: علاء لا.. ارجوك لا تقفل.. بس جاوبني واعمل الي تبغاه..
علاء: ايوه احبك خلاص..
ايمان: خليك معايا.. بجنبي..
علاء: ايمان.. انا مضطر اقفل.. سلام..
ايمان: علا..ء..
توت .. توت.. توت..
اغلق علاء الخط.. وهو يتمنى ان يقتل نفسه لأنه اعترف لها بأنه لايزال يحبها...
خلد للنوم وفي باله هم كبير...
________________________________________________
هيام: خلاص ياهنادي.. الحمد لله اطمنا عليه يلا قومي لازم ترتاحي..
وتلتفت لوالدة هنادي: يلا يا خالة.. انتو تعبتو خلاص الحمد لله مافيه الا العافية..سمعتي الدكتور ايش قال..
هنادي: لا انا ابغى اجلس هنا عشان لو احتاج شيء..
هيام: ماراح يدخلوكم عليه يعني ماراح تستفيدوا شي.. بس تتعبوا نفسكم قومو وبكرة بالصباح نجي ان
شاء الله..
ام هنادي: قومي يا بنتي الله يرضى عليكي روحي مع هيام.. انا لازم اجلس..
هيام: يلا يا هنادي..
هنادي: يلا امري لله..
_________________________________________________
هيام: يلا هشام ماشين..
هشام: يلا..
هشام لمجدي وامجد: يلا انتو كمان جلستكم هنا ما راح تستفيدو منها.. ارجعو وارتاحو عشان وقت ما
يحتاجكم تكونو مرتاحين.
مجدي: قوم يا امجد.. روح معاهم..انا شوية بأخذ امي وارجع..
أمجد وكانت حالته تثير الذهول.. لايفضل النقاش والكلام.. : طيب..
ركب امجد مع هشام وهنادي وهيام بالسيارة..
هشام لأمجد: هدي نفسك وروق ان شاء الله ما فيه الا العافية..
أمجد والدموع تنهمر منه بصمت: يارب.. بس انا خايف..
هيام: لا تخاف يا امجد ربي يخليلكم هوه..
امجد بإرتباك: ان شاء الله..
نظر هشام في المرآة لهيام التي كانت تجلس خلفه .. نظرة تبدي استنكاره لكلامها مع امجد..!!!
شكر امجد هشام على تعبهم معهم .. وكذلك هنادي تشكرت من هيام..
هشام لهيام في السيارة: مالها داعي كلمتك لأمجد..
هيام: بس كان تعبان..
هشام: بس هادا ما يخليكي تتكلمي معاه.. انتي عارفة انه ما المفروض تكلميه..
هيام: آسفة.. ما تنعاد ان شاء الله..
عاد الجميع لمنازلهم.. بعد يوم متعب ومؤرق.. في انتظار صباح يوم جديد بما يحمله من خير وشر..
________________________________________________
خلود: أيمن .. أيمن.. قوم يلا الدوام..
أيمن: الساعة كم؟؟
خلود: سبعة ونصف.. شوف ملابسك معلقة على الباب..
أيمن: البس بنفسي..؟؟!!
خلود: معليش تعبانه ابغى انام..
أيمن: اممم.. طيب..
تذكر أيمن الليلة الفائتة وتذكر صراخه عليها لمجرد انها اطفأت التلفاز..!!
خرج من الحمام.. وارتدى ملابسه.. اقترب منها..
أيمن: خلود حبيبتي.. خلود..
خلود: نعم, ناقص شي..؟؟
أيمن: زعلانة؟؟
خلود: هه.. وايش تفرق...؟؟
أيمن: تفرق كثييير.. انا ما اتحمل زعلك..
خلود: صح عشان كده الفلم كان يستاهل صراخك عليا..
أيمن: خلود انتي تعرفيني .. والله ما قصدي بس كنت منفعل شوي..
خلود: أيمن ارجوك .. انت اتأخرت على العمل وانا تعبانة ... بعدين نتفاهم..
انا عادي.. ما يهم ازعل ولا انحرق..
أيمن: لا..
خلود تقاطع: أيمن.. ارجوك.. اتركني في حالي.. ما اقدر اتكلم..
أيمن بندم: طيب .. ريحي بالك يا الغالية .. وانا اسف.. سلام..
خرج أيمن لدوامه.. وهو يتمنى لنه لو قتل نفسه... قبل تلك الليلة..
__________________________________________________
الدكتورة مي: دكتور علاء.. والله معليش هذاك اليوم.. بس الوالد كان بينتظرني..
علاء: لا .. ابدا .. ما في أي مشكلة..
مي: اوكي متى نكمل مره شوقتني اعرف قصتك..؟؟
علاء: اممم.. بعد الدوام ممكن اعزمك على الغداء.؟
مي: اوكي.. خلاص بس اعطي اهلي خبر..
علاء: تمام..
_______________________________________________
نورة : هلا هيومة.. فين هنادي اليوم..؟؟ ماجات معاكي..
هيام: والله هنادي ابوها تعب امس ونقلوه عالمستشفى وما قدرت تجي..
نورة: بجد.. ايش فيه سلامات؟؟
هيام: جاته جلطة.. الله يعينه..
نورة: جلطة.. !! الله يقومه بالسلامة ويعين اهله.. مسكينة هنادي .. طيبة والله..
سارة: مين معاه جلطة..؟؟
هيام: اهلا سارة.. ابو هنادي.. امس تعب..
سارة: اف.. الله يقومه بالسلامة.. وهنادي.. ياقلبي عليها تلاقيها فحاله...
نورة: اكيد .. هو الي بيوصلها.. دائما..
سارة: هلا بروان.. حبيبة قلبي..
نورة: فينك اتصل عليكي ما تردي..
روان: بتغلى..
نورة: طيب ياروان.. انا اوريك..
روان: تعال هنا.. اقصد تعالي هنا.. ههههه .. ياحبي انا ما ازعل منك.. كلو الا انتي..
سارة : احم احم .. نحن هنا..
هيام: عن اذنكم يا بنات.. مضطرة امشي..
نورة: على فين؟؟
هيام: عندي محاضرة.. سلام..
كلهم: سلام..
سارة:شكلها استحت.. هههههه
ههههههههه...
هيام لنفسها: يالله ... الله يعينهم على نفسهم هدول البنات.. الله يهديهم..
اتصلت هيام على جوال هنادي..
هيام: الو هنودة حبيتي كيفك؟
هنادي: طيبة الحمد لله..
هيام: كيف بابتك..؟؟
هنادي: آآه .. ما ادري خايفة ياهيام..انا في المستشفى لسه ما خرجوه من العناية المركزة..
هيام: لا تخافي ربي يقومه بالسلامة..
هنادي: يارب.. هيام..
هيام: ها عيوني..
هنادي: ماراح انسى وقفتك معايا..
هيام: لا تقولي كده يا بنت.. ابوكي هو ابويا.. وبعدين انا ما سويت شي..كلنا اخوات..
هنادي: الله يخليكي ليا ولا يحرمني منك..
هيام: ولا منك.. يلا انا داخلة المحاضرة.. طمنيني على بابتك.. اوكي..
هنادي:اوك .. سلام
هيام: سلام..
________________________________________________
حاتم يتصل على امجد..
حاتم: الو .. فينك يا ولدي.. غايب.. ولا الحب عمل فيك كده..
امجد: هلا حاتم.. اسكت يا شيخ جاتنا مصيبة..
حاتم: خير لا تفجعني..
امجد: ابويا امس جاء بالليل .. وفجأة تعب.. ونقلناه المستشفى .. يقولو جلطة.. وهو في العناية المركزة..
حاتم: لا ياشيخ .. بالله جد؟؟
امجد: يعني بدي اكذب عليك انت كمان..
حاتم: لا ما قصدي.. الله يقومه بالسلامة.. طييب ورحت له اليوم؟؟؟
امجد: انا في المستشفى .. قالو بيخرجوه من العناية ولسه ماخرج للآن..
حاتم: يلا ربنا يطمنا عليه.. خلاص انا راح امرك بعد الدوام عالمستشفى..
امجد: اوك .. سلام..
حاتم: سلام..
________________________________________________
علاء: يلا نروح يا مي...؟؟
مي: اوك يلا انا الحقك مع السواق اوك..
علاء: اوك..
في المطعم...
مي: طيب بس نكمل من محل ما وقفنا ..
علاء: طيب شوفي ياستي..
مي: اخر شي قولته انها كانت تنتظر اتصالك..
علاء:لا, انا حسيت كده..
مي: طيب كمل..
علاء: قررت اني اخطو للأمام.. وقلت لازم اتكلم..
وفي يوم اتصلت وردت..
"علاء: ايمان؟؟
ايمان: نعم.. ممكن اعرف انت مين؟؟ وايش تبغى ؟؟ وكيف جبت رقم بيتي واسمي؟؟
علاء: شوفي انا راح اقلك على حاجة... اتمنى انك ماتزعلي.. ولا تستعجلي..
من حقك تقولي لا.. وصدقيني ماراح تشوفي وجهي ولا راح ازعجك ابدا..
ايمان: خير بس بسرعة الله يخليك..
علاء: شوفي انا طالب طب.. كنت في المستشفى الي اتنومتي فيها.. وشفتك وعجبتيني.. واخذت رقمك..
ايمان: انت الي كنت تجي الغرفة كل شوية؟؟
علاء: بالضبط.. انا هوه..
ايمان: وايش تبغى مني.. الآن؟؟
علاء: ابغى اتعرف عليكي اكثر.. لأنك صراحة من هذيك الأيام ما فارقتي بالي..
ايمان: بس انت ماتعرف عني شي..!!
علاء: عشان كده احب اتعرف عليكي اكثر..
ايمان: بس انا ما اقدر..
علاء: ليش ما تقدري.. احنا لو ناسبنا بعض ممكن يكون بيننا مستقبل حلو..
ايمان: بس ما ابغى اتزوج بهادي الطريقة..
علاء: انا ما طلبت منك تعملي شي معايا او نخرج سوا.. انا مجرد ابغى اتعرف على شخصيتك.. وتتعرفي
على شخصيتي ولو عجبتك وكنا متوافقين .. راح اخطبك..
ايمان: آسفة..
علاء: جربي ووالله لو ما عجبك الوضع ما راح تشوفي وجهي..
ايمان: عطني فرصة افكر.."
علاء لمي: بس وقفلت وقلتلها اني راح اكلمها تاني يوم اشوف رأيها..
مي تعدل نظارتها تنظر لعلاء بتعجب: وانت كنت صادق بكلامك معاها..؟؟
علاء: اكيد.. والله كنت مره متعلق فيها.. ونفسي اتزوجها..
مي : طب كمل وايش صار بعدين..؟؟
علاء: اتصلت تاني يوم..
" علاء: كيفك؟
ايمان: الحمد لله بخير..
علاء: ها فكرتي؟؟
ايمان: ايوه.. بس انا ايش يضمن لي انك ما بتلعب عليا.. وتاخذ الي تبغاه وبعدين ترميني..؟؟
علاء: عهد الله بيني وبينك .. انا ما بلعب عليكي..
ايمان: اوك .. نجرب فترة ونشوف..
علاء: طيب انا ما اقدر اتكلم كده على تلفون البيت .. اهلك..!!
ايمان: وايش تبغاني اعمل..؟؟؟
علاء: رقم جوالك..
ايمان: جوالي..!! اممم بس..
علاء يقاطع: قلتلك ماراح العب عليكي.. ولو تعبتك تقدري تغيري الرقم ببساطة وخلاص.."
علاء لمي: واعطتني رقمها..
مي: جوالها؟؟!!
علاء: ايوه..
مي: اها..
علاء: صرت اكلمها في اليوم 5 ساعات واكثر كمان.. عرفت عنها كل شي..
وعرفت عني كل شي.. زاد اعجابي فيها.. واتعلقت فيها اكثر.. وهيه بدأت تتعلق فيا كمان.. تصحيني من
النوم وتهتم فيا وبصحتي..وكل شي..
مي: يعني حبتك..
علاء: هيه ما اعترفت.. بس انا حسيت كده.. المهم اني انا حبيتها مره .. وصرت متعلق فيها بشدة..
واستمرت علاقتنا في التطور .. صرت اشوفها كل شي..
كلمت امي عليها.. واني حبيت وحده من المستشفى وابغى اخطبها..
وافقت امي بعد مناحلة طويلة.. ووعدتني انه بعد سنة بالكثير وتخطبها..
كلمتها وفرحت.. وعشنا احلى امال واحلام..
مي: طيب حلو.. وبعدين؟؟
علاء: بعد فترة.. اتصلت في يوم.. ردت عليا طفلة صغيرة.. في البداية اتفجعت..
وارتبكت..
"سألتها: انتي مين؟؟
قالت: انا اميرة.. تبغى مين..؟؟
علاء: لا .. غلطان.. مع السلامة..
اميرة : مع السلامة.."
علاء لمي: قفلت منها وانا خايف.. لأنه اول مره احد يرد على جوالها..
مي: طيب ومين طلعت..؟؟
علاء :بعد شوية اتصلت ايمان..
" علاء: ماقد حكيتي لي عن اميرة..!!
ايمان: اممم.. هادي اختي الصغيرة.. ردت عليك..
علاء: شكلها طعمة..
ايمان: ايوه حلوه..
علاء: ايمان ايش فيك مرتبكة..؟؟
ايمان: مرتبكة .. لا والله .. مو مرتبكة ولا شي..
علاء: لا فيكي شي..
ايمان: قلتلك ما فيني شي..
علاء: راح تتكلمي بسرعة .. مين زعلك يا حياتي..؟؟
ايمان: ولا احد.. بس تعبانه.."
علاء لمي: وفجأة انفجرت بالبكاء.. وانهارت.. وصارت تتكلم كلام مو مفهوم..
"لا تتركني.. اموت بعدك.. ارجوك..."
انا ما فهمت بصراحة.. صرت احاول اهديها.. وافهم منها..
" ايمان: اميرة.. هي.. ب..ن..ت..ي.. بنتي يا علاء..
علاء: ا....ي...ش؟؟؟؟؟!!!! بنتك؟؟!!
ايمان: ايوه انا اتعرضت للإغتصاب وانا عمري 15 سنة.. وجبت اميرة
وابوها واحد جارنا.. وطبعا ابويا زوجه ليا غصب عشان النسب..
وبعدين طلقني..
علاء: لييييييييييييييييييييش؟؟
ايمان: علاء سامحني.. انا ايش ذنبي.. الدنيا جارت عليا.. لاتتركني انت نسيتني همومي..ما اقدر اعيش
بدونك..
علاء: بس انتي كذبتي.. وانتي مغتصبة ومطلقة وعندك بنت..!!!!!
ايمان تشهق وتبكي بحرقة.. : شكرا على جرحك يا علاء.. انا اسفة ظلمتك..
من حقك تقتلني وتبعد عن حياتي..
علاء: بعد ما حبيتك.. !!انتي ظالمة..
ايمان: سامحني ارجوك..
علاء: سيبيني لحالي..بعدين نتفاهم.."
علاء لمي: وقفت بوجهها.. وكان قلبي بيتقطع..
مي مندهشة ومتفاجئة: انا مو مصدقة..
علاء : لا, صدقي..
مي : وايش صار؟؟
_______________________________________________
هيام وهي في المحاضرة.. تنتبه لجوالها .. رسالة جديدة..
من هنادي.." هيام الحمد لله بابا خرج من العناية وكلمته وكلمنا.. انا مرره فرحانة.."
ارسلت هيام لهنادي.."الحمد لله طمنتيني.. ربي يكمل شفاءه على خير.. انا راح اجيكي المستشفى بعد
الجامعة..."
هيام في السيارة لهشام الذي لم يخرج للآن من حالة البؤس..:هشومي توديني معليش لهنادي
بالمستشفى..؟؟
هشام : بتطولي؟؟
هيام: ما ادري.. بس ابغى اجلس مع هنادي... محتاجتني..
هشام : اوديكي واسلم عليهم.. واروح وانتي ترجعي معاهم.. طيب؟؟
هيام: خلاص اوكي..
______________________________________________
حاتم: الو..
امجد: هلا حاتم..
حاتم: كيف ابوك.؟؟
امجد: خرج من العناية وكلمناه..
حاتم: الحمد لله.. والله المدرسة كلها تسأل عنك..
امجد: عشان تعرف اني مهم..
حاتم: طيب يا مهم.. دحين انت بالمستشفى؟؟
امجد: ايوه..
حاتم: انا جي دحين.. سلام..
امجد: سلام..
________________________________________________
رجع أيمن من الدوام.. كان قد اشترى لخلود ساعة فخمة.. وباقة ورود حمراء..
وجد الغداء على الطاولة.. لشخص واحد فقط!!!
وجد خلود في غرفة النوم.. تقرأ..
دخل أيمن ولم تعره بالا.. احس بضيق شديد..
أيمن:خلود .. حبيبتي .. برضك زعلانة..
خلود: لا, سلامتك مو زعلانة..
أيمن: طيب يلا الغداء..
خلود: لا شكرا.. مالي نفس اكل..
اقترب أيمن من خلود وهو يحمل باقة الورود والهدية..
أيمن: حياتي انا اسف.. انا مالي غنى عنك.. سامحيني .. واوعدك ما يتكرر..
نظرت خلود لأيمن.. واغرورقت عيناها بالدموع..
خلود تتكلم بأسى: يمكن انا لو جبت لك ولد كان ما صرخت عليا زي كده...
انا الغلطانة..
أيمن: خلوووووووود.. لا تقولي كده.. هذا امر الله.. استغفري ربك..
انا احبك وبس يكفي.. ومو اذا غلطت عليكي مره وزعلتك معناته عشان ما جبتي ولد..!! ياما ناس اتطلقو
وهما عندهم درزن عيال.. خلاص حرام لاتتعبي نفسك اكثر..قومي يالغالية وانا اسف خلاص.. وشيلي من
بالك هادي الأفكار..
خلود: بس ..انا..
أيمن يقاطعها: لا بس ولا شي.. شوفي ايش جبت لك..
تبدلت احزان خلود.. وفرحت بإهتمام أيمن بها.. وتأكدت تقريبا من حبه لها..
وتناولوا الغداء .. ثم القيلولة.
_______________________________________________
في المستشفى ..
حاتم: أمجد .. مين هادي البنت الي مع اختك؟؟
امجد: وحده صاحبت هنادي مررررره..
حاتم: شكلها بنت ناس.. وتحب اختك..
امجد: أي والله بنت ناس..
هنادي: يلا يا امجد احنا بنروح...
امجد: وامي؟؟
هنادي: بتنتظر مجدي وترجع معاه..على فكرة هيام تبغانا نوصلها معانا..
امجد: اوكي مافي مشكلة..
حاتم : يلا يا امجد.. نشوفك على خير.. وطمني على الوالد..
امجد: ان شاء الله .. شكرا لك ياعيوني..
في السيارة..
هنادي : امجد .. لا تنسى بيت هيام.. تعرفه؟؟
امجد: ايوه اعرف الحي.. بس مضيع البيت..
هنادي: هيامو اوصفي للعلة هادا..
هيام بخجل شديد وتصدر منها ضحكة ناعمة لا تصدر الا من فتاة بنعومة هيام: امجد.. لمن توصل عند
المسجد الي في الحي.. تروح يمين..
امجد: اوكي..اوامر تانية..؟؟
هيام زاد خجلها: معليش آسفة..
امجد: ههههه.. بمزح يا بنتي .. مافي اسف احنا اخوان..
هنادي: وبعدين انت وهيه .. خلاص ما قالتلك روح يمين.. اش لزوم الكلام الفاضي..
امجد: آسف سكتت..
مدت هنادي يدها لخلف المقعدة.. وضربت هيام التي كانت تجلس خلفها..بخفة..
هيام: شكرا تعبتكم..
هنادي: لا يا بنت انتي الي تعبانكي..
هيام: مع السلامة..
هنادي: مع السلامة..
_____________________________________________
في بيت هيام..
هيام: هلا امي كيفك؟
صالحة: هلا بنتي.. كيف ابوهنادي..
هيام: لا الحمد لله احسن اليوم..
صالحة : خلاص بنروح نزورهم في الليل..
هيام: ان شاء يا امي.. الا فين هشام..؟؟
صالحة: جاء وطلع غرفته..
هيام: طيب توصي يا ست الحبايب..
صالحة : تسلمي يا قلبي..
هيام تطرق الباب على هشام..
هشام: ادخل..
هيام: اول شي معليش تعبتك اليوم..
هشام: لا عادي اصلا كنت ابغى ازورهم..
هيام: هشام انا اسفة.. كلمت امجد اليوم.. وصفت له البيت..
هشام: طيب مو مشكلة.. انا بس عشان ابغى احافظ عليكي.. وغير كده صوتك يجنن وانا اغار عليكي..
هيام: لا يا شيخ .. انا صوتي حلو..اصلا عارفة بدون ما تقول..
هشام: هههههه.. امشي يا بنت بلا غرور..
هيام: والله احبك يا احلى اخو.. الله لا يحرمني منك..
هشام: ولا منك..
خرجت هيام.. وهي تشعر بسعادة غامرة وهي لاتعلم لماذا؟؟!! هل لمجرد كلام هشام معها.. ولكنها
معتادة على مثل تلك الكلمات..
أم لأن...!!!
انتهى الجزء الخامس..
آسف على التأخر..
انتظروني..
اشكركم على المتابعة..
|
26-07-08, 08:58 AM
جديد مواضيع قسم الارشيف
العرض العادي
