كاتب الموضوع :
دموع يتيمة
المنتدى :
الارشيف
[ الجزء التاسع]
[ البارت الثاني]
كلن يعود لأصل جده ومرباه
راعي الشرف يشرف والأنذال يهبون
الفرع من عوده شرابه ومسقاه
والحنظله مره لو تشرب مزون
الطيب كايد والمناعير تقواه
والهون هين تدفع النفس وتهون
ناس على كسب المراجل مضراه
وناس على كسب الفشيلة يضرون!!
(خالد الفيصل)
صك الجوال منه وهو مستغرب ... أومتفاجأ .. معقوله عبدالعزيز يصير عديلي !! ... ما يدري هو فرحان أو دهشته خربت فرحته !! ... يالله ما اسرع عبدالعزيز في الخطوبة .. معقولة عشان خطيبته انخطبت ... راح وخطب ورد اعتباره !!! ... ما يدري .. بس كان متأكد مثل ما اسمه محمد .. إن عبدالعزيز كان شاري هذيك البنت لو يصير اللي يصير !! ... بس شكل الله كاتب إنه مافيه نصيب بينهم !! ...
جات له اروى : محمد ...
لف عليها وشافها تقعد جنبه على الكنبه الطويله بصالة بيتهم ..
محمد وهو باقي مرسوم على وجهه الدهشه : هلا ...
أروى تتأمل ملامحه : وش عندك ؟؟ ... (ترفع حاجب) وش صاير ؟؟ ..
محمد وهو يسند يده على خده ويلف عليها : خبر صعقني ... مستغرب منه ..
أروى ووجهها تغير : هو حلو .. ولا شين ؟؟؟ ...
محمد يفتح بعيونه : حلو .. بس بتستغربين أكيد !! ...
أروى : محمد وشو تراك شوقتني (قربت منه أكثر) ؟؟؟ ...
محمد وهو مبتسم : عبدالعزيز ولد عمي بيخطب !!! ...
أروى وفتحت عيونها أكثر : من جد !! ...
محمد : والله ...
أروى وهي متشوقه أكثر واكثر : بسرعه ... مين هي بالله ؟؟؟ ....
محمد وهو باقي مبتسم : توقعي ؟؟ ...
أروى وهي تحاول تفكر : مين ... بسرعه قول ...
محمد وهو يقولها المفاجأة : يبي يخطب نسيبتي العزيزة !! ...
اروى تحاول تستوعب الموضوع ... وش قاعد يقول ... ومين يقصد !! ...
أروى وهي مستغربه بقوة وعيونها مفتوحه دليل الدهشه : تقصد ...
محمد يكمل عنها بابتسامه كبيرة : اقصد اختك شوق ؟؟؟؟؟؟ ...
اروى تضحك باستغراب : تقصد شوق يبيها عبدالعزيز !! ...
محمد يضحك : وعبدالعزيز بيصير عديلي !!! ...
اروى وهي تضحك مع محمد : وش هالخبر اللي يفرح ؟؟ ...
محمد يحذرها بمرح : شوفي لا تقولين لأحد .. لأن عبدالعزيز مسافر ألحين .. وللحين الموضوع بس كلام .. هو قالي قبل لا يصير شي .. وحتى قالي لا تقول لأحد .. بس قلت لك ..
اروى وهي مبسوووطة إن اختها بتاخذ من نفس عايلة زوجها: وش عنده طيب ما يبي احد يدري ...
محمد : والله ما ادري ... بس هو مسافر وللحين ماصار شي رسمي ...
اروى وهي مبسوطة : هالخبر يجنن ... والله يفرحك يا محمد مثل مافرحتني !!!...
***
كانت الحزة ظهيرة ... لم تكن الشمس ساخنه .. بل كانت دافئة للأجواء الباردة ... وكانت قاعده مع اخوها تحاول تحتك فيه وتبني علاقه فيه ...
وهم قاعدين بغرفته ومنسدحين على الأرض ومعهم دفاتر تلوين والوان ...
أمجاد وهي تلون معه : ألحين يا زياد وش اكثر لون تحبه ؟؟؟ ...
راح زياد وطلع لها اللون الاصفر من علبه الالوان .. وبابتسامة واسعه : هذا !! ...
أمجاد تبتسم وهي رافعه حاجبها : اصفر ... مغرور ما شاء الله عليك ...
قعد يضحك زياد على اخته ... ما يدري وش يقول ... بس الاطفال دايم فيهم طاقات ضحك كبيرة !! ...
أمجاد تبتسم له : طيب الاصفر لون وشو (تأشر على الرسمة اللي بالدفتر التلاوين) وش نلون بالاصفر في هذي اللوحه ؟؟؟ ...
زياد طالع بالصفحه السادة من الألوان .. واللي تمثل بحر و شمس مشرقه ...
أشر على الشمس وقال بضحكه حلوة : هذا ...
أمجاد ابتسمت له : يا بطل ... طيب وش هذا الشي ؟؟؟ ...
زياد يضحك : هذا الشمس ...
امجاد تضحك وهي تعدل له نطقه : هذي شمس يا زيودي .. مو هذا ... الشمس مؤنث حبيبي ..
فجأة دخلت عليها رحاب ... أكثر شي تكرهه أمجاد برحاب هو دخولها كذا دائما عليها من غير احم ولا دستور .. مافيه احترام ولا اعتبار للموجودين ...
رحاب تتكلم من دون نفس : تعال زيودي !! ...
أمجاد وهي ترفع حاجبها : انتي ما تعرفين تفتحين الباب مثل الأوادم !! ... تطبين فجأة من دون ما تدقين الباب .. وش هذا ؟؟؟ ..
رحاب تتكتف : تعالي طقيني احسن !! ...
أمجاد تبي تحرها : عيب اطق وحده كبر جدتي واعلمها الادب !!! ...
رحاب انقهرت : انتي على بالك بزرة ؟؟؟... تراك منتي بصغيرة ...
أمجاد وقفت بعد ما كانت منسدحه جنب زياد : ياربيه وش فيك أنتي علي ؟؟ ...
رحاب بقرف : مقرفتني في حياتي ...
أمجاد عصبت : تكفيييييييين ياللي انتي مسويه لي جو في حياتي !! ...
رحاب : على الأقل ما جيتك وطبيت عليك بحياتك ...
أمجاد فهمت قصدها إنها مقهورة من سكنها معهم ...
امجاد تبي تحرها زيادة : اسمعي يامرة ابوي ... إذا كان قصدك إن سكني معكم مزهقك فأبشري إني على طول ساكنه معكم (ببرود ينرفز) على قلبك قاعده حبيبتي !!! ...
رحاب حقرتها من فوق لتحت : قلة حياء ...
أمجاد ترد عليها : قلة ذوق ...
رحاب تأشر لولدها يجيها : حبيبي زيودي تعال ... لا تخرب اخلاقك امجاد وتخليك وقح مثلها !!! ...
امجاد ترد عليها وصوتها مرتفع : الوقاحه تركناها لأهلها ...
قام زياد وطلع مع امه وهو يطالع بأمجاد نظرات عذبتها ... امه هالعله لو تقعد كذا عز الله عمره ما بيصير اخوي !!! ...
بعدها راحت امجاد للصالة وقعدت على التلفزيون تتفرج عليه وهي متنرفزه من رحااب !! ...
***
باليــــــــــوم الثاني ..
بعد ما صلت المغرب كلمت بدور سجى وملاك على التليفون مناوبه ورا بعض ... كان المطر الغزير برا ينزل .. ومعطي اجواء روعه باردة ورطبة !!! ...
وبعد ما صكت بدور وقالت لهم عن اختها امجاد وش سوت .. او بمعنى اصح شكت لهم ... حست إنها ارتاحت لأن ملاك واختها سجى رايحين يكلمون امجاد يتهاوشون معها ... ماتدري ليه ترتاح لمن توجه كل الناس على امجاد اختها ... تستاهل !! ... ولا احد يسوي سواتها وتروح لمرة أبوها برجلينها !!! ....
نزلت تحت كانت زهقانة وميته طفش ... لمت شعرها ورفعته فوق بكليب .. حست إنه طال شوي عن نص ظهرها .. والقصه خربت لمن طال ... قررت إنها تروح تقصه قريب أقصر وطبقات أكثر ... اول ما راحت الصالة ما كانوا اجدادها موجودين .. تذكرت إنهم أكيييد بالخيمه برا ... دايم هم يطلعون برا ويقعدون بالخيمه ... ما يحبون البيت كثير .. تذكرت الجمر اللي شابينه فيها والقعده الحلوة وسط هالاجواء الباردة الصقيع .. كان الجو مره جووونان .. واول ما فتحت الباب كان الجو بارد والمطر يشتد ويشتد ... طالعت كان ظلام و قطرات المطر تنزل وتنط بقوة من ضرباتها على الأرض !! ... ورائحة التراب مختلطة بجو المطر ... يالله يا حلو المطر .. بغت تطلع وتروح تركض لأجدادها بالخيمه بس تأكدت إنه ماراح توصل إلا وهي مبلله بالمطر !! ... لو فيه مظلة !! ...رجعت دخلت وصكت الباب .. قالت اقعد هنا احسن .. ولمحت بالصالة فروة جدها !!! ... ضحكت وخذتها .. حطتها على راسها مثل عباية الراس وراحت تركض للخيمه وهي تضحك وخصوصا شكل أكمام الفروة واقفه وطالعه كأنها قرنين غزال !! ..
أول ما دخلت الخيمه ضحكت وهي تنزل الفروة على كتوفها : سلاااااااااااام !!! ...
لف عليها جدها وهو يطالعها باستغراب : هلا ببدور !! ...
ام ناصر تطالعها : وش طلعك بالمطر ؟؟؟ ...
بدور وهي تروح تقعد جنب جدها : زهقانة داخل .. قلت اروح اقعد مع جداني ...
ابو ناصر ضحك وهو يتلمس فروته اللي على كتف حفيدته : ما شاء الله متى شريتي هالفروة يا بدور ؟؟؟ ...
ضحكت بدور باحراج ورفعت حاجبها : والله متسلفتها يا جدي ...
كانت بدور بتفصخ الفروة ...
ام ناصر تستدركها وتكلمها : لا تفصخينها برد ما تشوفين لبسك خفيف !! ..
ابو ناصر وهو يعطي بدور كوب حليب بالزنجبيل كان على الجمر اللي كانوا متحلقين حوله ...
ابو ناصر : خذي هذا يمكن يدفيك ...
بدور ابتسمت وخذت من جدها الكوب : تسلم جدي ...
بدور ماهيب مستغربه اهتمام جدها ... بس مستغربه من جدتها !! ...
ام ناصر تكلم بدور : وش عندك اليوم نايمه للعصر يا بدور ؟؟؟ ...
ضحكت بدور ايوووووه هذي جدتها اللي اعرفها !! ..
بدور تكلم جدتها : طفشششش ... مافي شي ...
ام ناصر تكلمها : قلت لك تعالي معي أمس لبيت عمك ناصر وعيتي !! ..
بدور بجديه : من جدك يا جدتي اروح بعد اللي صار !! ...
ابو ناصر بحزم : وش اللي صار ؟؟؟ ...
بدور تكلم جدها بجديه بس ماتدري ليه تهابه ياربي يخوفني !! : يا جدي تدري عن أختي ..
ابو ناصر يسأل عنها : الحين وش في راسها قاسي ؟؟؟ ...
بدور ما تبي تتجادل مع جدها : مدري عنها ...
ابو ناصر يكلم بدور ويغير الموضوع : الحين ليه انتي تقولين طفش ومارحتي امس تلعبين مع لجين !! ..
ضحكت بدور على جدها .. يوم يحطهم كبار ... ويوم يحطهم صغار !! ...
بدور تضحك : ههههههههههههههههه نعلب حريم ... ولا نلعب جيران !! ...
ضحك ابو ناصر : وانا وش يدريني عنكم !! ...
بدور تطالع بجدتها : انا قلت لجدتي امس نروح لعمتي ابتسام نقعد معها بس هي عيت ... (تبرر بدور ) يعني مسكينه عمتي بنتها تزوجت وماعندها احد ... قلت خلينا نروح نواسيها !! ...
ابو ناصر يكلم زوجته : إيه صح ليه يا دلال مارحتوا لابتسام ؟؟ ...
ام ناصر : امس رحت لولدي ناصر .. وابتسام إن شاء الله بكره !! ...
ابو ناصر يلف على بدور : وبتروحين لعمتك .. ما شاء الله آثرك طالعه راعية واجب يا بدور ..
بدور بنفسها ( إييييييييييه مره راعية واجب !! ) ... ومحد يدري وش في قلب بدور !! ...
ام ناصر تضحك : طالعه على جدتها بالواجب ما شاء الله عليها .. ولا الباقي مدري من وين جايبته !! ...
ماردت بدور وماتبي تعكر مزاجها .. وخصوصا إنه بكره فيه روحه لبيت الوليد !! .. راحت تبحر بخيالها .. بالوليد .. طيب الحين انا افكر فيه .. هو زين يفكر فيها !!! ... ياربي من كثر التفكير حست بحبه طلعت براسها !!! .. اكره التفكير .. وخصوصا بموضوع عقيم مثل كذا !! .. يعني كل ماتفكرين فيه أكثر يعورك راسك .. ويطلع لك ألف تحليل وتحليل .. والنهايه تكتشفين نفسك رجعتي لنقطة البداية .. لأن ماتعرفين وش يفكر فيه الطرف الآخر .. على الأقل لو فكرة وحده بس !!! ...
ابو ناصر وهو يطالع ببدور : اقول بدور وش فيك سرحانه ؟؟؟ ...
بدور ترجع للواقع وتكلم جدها : هاه مافيني شي !! ..
ابو ناصر يجس نبضها : ناقصك شي ومستحيه تطلبينه ؟؟؟ ...
ام ناصر وهي تصب لها كوب ثاني حليب : وش ناقصها يا حسره .. مافي شي ناقصها !! ..
بدور انقهرت من جدتها اللي تدخلت : إلا ناقصني !!! ...
انتبهت بدور لنبرة صوتها اللي اترتفعت !! ...
ابو ناصر بعد فترة صمت : وش ناقصك ؟؟؟ ...
بدور تشكي لجدها : يا جدي ابيك تركب لي دي إس ال ...
ابو ناصر وهو مستغرب : وشو ذا السي دس ال ؟؟؟ ...
ضحكت بدور : دي إس إل يا جدي ... هذا حق الانترنت .. ابيك تدخله لنا !! ...
ام ناصر عصبت : الانترنت ما يدخل بيتي ... لا تدخله في بيتنا يا فهد هذا حق الفساد !! ...
بدور عصبت : وشو فساد يا جده ؟؟؟ ...
ام ناصر ومسويه فاهمه النت : هذا الانترنت اللي يفضحون فيه العالم اعرفه ... (معصبه) ماني مدخلته بيتي هذا حق الفساد و الفضايح ...
بدور انقهرت بس مسكت اعصابها عشان قدام جدها : جدتي الله يهداك من يقولك إن النت كذا ؟؟ ..
ام ناصر مصره على موقفها : إيه بكره ندخله بيتنا .. وبعدين تنتشر صورتك في الانترنت ويشوفونك الناس وننفضح !! ... لا لا ما يدخل !! ...
بدور انقهرت وتبي تقهر جدتها : بس انا مدخله النت الحين ..
ابو ناصر يكلمها : كيف تدخلينه ؟؟؟ ... (مستغرب) ومن جابه لك ؟؟؟ ...
بدور تحاول تشرح لجدها : معي جي بيه آر آس وهذا يشبك عن طريق شريحة الجوال !!! ...
ام ناصر نطت : نشرتي رقم جوالك ؟؟؟ ...
بدور انقهرت من جدتها اللي مسويه ام العريف : لا يا جده .. بس النت يشبك عن طريق التليفون ولا الجوال !! ...
ام ناصر : لا لا ما يدخل وبآخذ شريحتك منك !! ...
بدور انقهرت : جده وش فيك ؟؟؟ ...
ام ناصر عصبت : تبين تفضحينا انتي ؟؟؟ ...
بدور يارب صبرني على هالتفكير : جدتي حبيبتي من قالك هالكلام ؟؟؟ ..
ام ناصر : كل الحريم يقولونه .. والجيران يقولون لي عن فضايح الانترنت ..
بدور تكلم جدتها : والله على حسب استخدام الوحده له ...
ام ناصر : حتى لو ... مافيه ...
ابو ناصر يكلم بدور : لازم هذا اللي تقولينه عشان الانترنت ؟؟؟ ...
ام ناصر فتحت عيونها : ابو ناصر !!! ...
ابو ناصر : يا ام ناصر لحظه خلي نشوف وش عندها ...
بدور تكلم جدها : من جد يا جدي والله لازم ؟؟؟ ....
ابو ناصر : على خير إن شاء الله ... (يكلم بدور) بس تبين هذا سي دل (تخرَبط) هذا اللي تقولينه ؟؟ ..
بدور ابتسمت لجدها : إيه ...
ابو ناصر يستفسر عنه أكثر : طيب هو لازم عن طريق التليفون ؟؟؟ ...
بدور تستهبل وتضحك : يصلح عن طريق الاقمار الصناعيه .. لو تبي على الاوربت ركب !!! ..
ام ناصر وكأنها تبي تتأكد : ومايحتاج تليفون بيت ولا جوال ؟؟؟ ...
بدور تضحك : لا ما يحتاج ...
ابو ناصر وهو يحزم رايه : خلاص اركبه على الاوربت !!! ....
بدور فتحت عيونها بقوة !!! ... من جده جدها يتكلم ... هي قالتها مزحه !! ... معقوله بتصير صدق !! ...
قام جدها ...
ام ناصر : وين رايح يا فهد ؟؟؟ ...
ابو ناصر وهو يشوف المطر خف برا : بروح للمسجد ما بقى على صلاة العشا شي !! ...
بدور تكلم جدها وهي تطالع ساعتها : باقى يا جدي أكثر من نص ساعه !!! ... اقعد معنا ...
ابو ناصر : لا بروح أقعد اتسنن لين الصلاة.. وبعد الصلاة بأطلع لمشوار ...
ام ناصر وهي خايفه على شايبها : تسوق بهالجو ؟؟؟ ...
ابو ناصر يطمن عجيزته : لا بأخليه السواق يوديني ما اشوف زين بهالأجواء !! ...
ام ناصر وهي مرتاحه : كذا ازين لك ... ولا تنسى جوالك .. تراك دايم تنساه ...
ابو ناصر وهو يتحسس جيب ثوبه الشتوي : لا هذا هو جوالي بجيبي !! ...
وبعدها ودعهم وطلع ...
قربت بدور من جدتها وهي تلم الفروة أكثر عليها .. يوووه تذكرت ما اعطت جدها فروته بهالجو صدق إني ما استحي !! ... وقعدت تتقهوى من القهوة مع جدتها ويسولفون ... فيها هوشات وانتقادات حاده بينهم ... بس لا تزال القعده جميله !! ...
بدور وهي تفك الكليب وتسولف مع جدتها (ماعندها إلا جدتها تهذر على راسها) : ودي اقص شعري يا جدتي !! ..
ام ناصر : مجنونة تقصينه أنتي ؟؟؟ ...
بدور تتشكى لجدتها وهي تتلمس شعرها اللي انساب على كتفها : بس طال وخربت قصته ؟؟ ..
ام ناصر : بالعكس طالع زين ... وش حلاة البنت وشعرها طويل ...
بدور تكلم جدتها : بس هو مزهقني ... طبقاته خربانة ... لأنه طال ... وساح على بعض ..
ام ناصر وهي تمد يدها وتمسك خصله من شعر بدور الناعم : شعرك حلو ... لا تعلبين فيه يا الخبل !! ..
بدور انقهرت من جدتها : مانيب خبله بس طفشت ودي إني قصيته بعرس ابرار زي امجاد ما قصرت من شعرها وقصت غرتها !! ...
ام ناصر : انا عندي فكرة أحسن .. روحي جيبي المقص وتعالي انا اللي اقص لك شعرك واساويه لك !! ..
بدور : اخاف تخربينه يا جده ...
ام ناصر بثقه : الحين الفلبينية احسن مني !! .. على الأقل انا ببلاش !! ... الحين هم ياخذون من شعوركم وياخذون فلوسكم !!! ...
بدور مترددة : ما ادري يا جده خليني افكر ... اخاف تخربينه علي !! ...
ام ناصر وهي تصب لها فنجال قهوة : كيفك يا بديّر !! .. لو تبين اقص لك الليلة ..
انسدحت بدور على جنب ورفعت راسها وهي مسندته على يدها اللي غاصت بشعرها .. وكانت مقابلة الجمر وجدتها عند راسها ...
بدور ولهب الجمر يلمع بعيونها وهي تحس بالدفا وتجر الفورة عليها اكثر : احب الشتا يا جده .. أنتي تحبينه مثلي !! ...
أم ناصر : إيه احبه ... مافيه احلى من الشتا .. وحتى الصيف زين ... كل شي من الله زين !! ...
بدور وهي تطالع النار الشابه : مشكلتنا بالسعودية ما نعرف إلا شتا وصيف!! .. الخريف و الربيع محذوفين .. ماعرفناهم إلا بالعلوم !!! .. ولا بالكراتين !! ...
ابتسمت ام ناصر : قولي الحمدلله يا بدور ...
بدور وهي ترفع عيونها لأم ناصر وبابتسامة : الحمدلله ...
***
كانوا يضحكون ويسولفون وهم جايين بسيارة سلطان ... واول ما نزلوا لبيت أبو ناصر شافوا السواق مجهز سيارة ابو ناصر وواقف تحت مظلة السيارة من المطر اللي خف وبقى مثل رشاش !! ..
الوليد يكلمه : وين جدي ؟؟؟ ...
السواق : بالمسزد .. ألحين إجي !! ... بعد صلاة ..
سلطان يتلقف : ألحين انت ليه مارحت تصلي !! .. ولا مرفوع القلم عنك ؟؟؟ ...
السواق يبرر لهم : باقي مافيه سوي آزان ...
الوليد وهو يدخل ويشوف الباب مفتوح : تعال ولا تقعد تناشب السواق على روحة المسجد !! ..
سلطان وهو داخل للبيت قعد يضحك : ما كملت لي السالفة الحين انت وش مدريك إن البنت اللي تعرفت عليها صاروخ ولا لأ ؟؟؟ ...
الوليد يضحك : شوف انا لي خاويت وحده اصرف عليها فلوسي كلها ... وعشان كذا انا ما اخاوي أي وحده!! .. وانا عندي شي اتأكد منه على حسن كشخه ونظافة البنت اللي اخاويها !! ..
سلطان : وشو ؟؟؟ ...
الوليد يضحك بخبث : شوف هو شي سخيف ... بس أنا استنبط منه المظهر الداخلي للبنت .. يعني خبرك هنا عبايات ونقابات وين نشوف البنات !! ...
سلطان يضحك : عرفت وشو ... أكيد عيونها !! ...
الوليد وهو البروفيشنال بهالأمور : العيون مهمه .. بس مو هي اللي اقصده ...
سلطان : وشو اجل .. اخلص علي يا رجال عشان اتعلم منك ...
الوليد بخبث : شوف دليلي على حسن كشخه وهندام ونظافة البنت هو أظافر رجولها !! .. يعني انت طالع بأظافر رجولها وشوفها .. يا كثر ما تشوف بنات كاشخين و مزايين بس طالع بأظافر رجولها تقول عامل نظافة .. ولا تقول كأنها راكضه في البر وجايبينها ...
سلطان مات ضحك : ههههههههههههههههههههههه والله إنك حقير .. تصدق ما خطر على بالي .. طيب لو كانت لابسه سبورت ومابانت اظافرها وش تسوي ؟؟ ...
بهاللحظه دق جوال الوليد طلع جواله وشاف الاسم : (ضحك) خلاص هو حظك يا يصيب يا يخيب ... شف روح الخيمه ولا تدخل داخل البيت ولا بيذبحك جدي !!! ...
سلطان : طيب مو بنات خالك راحوا لبيت ابوهم ... خل ندخل نسوي مفاجأة لأم ناصر !!! ..
رد الوليد : هلا والله براعية هالصوت...
ووقف تحت مظله بالحوش وتحتها كراسي قعده .. واشر لسلطان إنه يروح للخيمه وهو ساكت ...
و راح سلطان للخيمه !! ..
.
.
.
أم ناصر قاعده مع بدور تسولف وتحكي لها عن البرد وكيف هم أول متحملينه !! ...
أم ناصر وهي تسمع صوت خطوات جايه لهم : تسمعين هالصوت ...
بدور وهي تظن إنه جدها : يمكن جدي تحسف ورجع يقعد معنا !!! ...
أم ناصــر تضحك : يمكن ... الله من هالشايب !! ...
وفجأة دخل عليهم سلطان !!! ....
سلطان وهو داخل مبتسم : السلام عليـــــــــــــــكم !!! ...
ام ناصر تفاجأت يوم شافت سلطان داخل !! ... ماتدري هو طاح لها من سما .. ولا طلع لها من الأرض !!! ...
بدور أول ما سمعت صوته على طول غطت راسها بالفروة وهي منسدحه !! .. ولمت رجلينها داخل وانكمشت على نفسها وهي كان على بالها إنه مشاري !!! ...
سلطان وهو يطالع ببدور وهو مستغرب من هذا النايم !! ... توقع إنه مشاري !! ... وما خطر على باله أبد إنها بنت !!! ...
أم ناصر تحس لسانها انقطع !! ... ما تدري وش تقول ؟؟؟ .... وخصوصا سلطان اللي كل ماله ما يقرب أكثر منها هي وبدور !!!! ... تحس إنه في عرق ينبض براسها وشوي وبينفجر من الصدمه !! ....
ام ناصر وهي تبي تجمع كلمات : هـ ... هلا بسـ سلطان !! ...
سلطان قرب منها وهو يطالع ببدور : هلا بأم ناصر ... (يطالع ببدور) مين هذا النايم ؟؟؟ ...
ام ناصر وهي تطالع ببدور : هذا .. (متوترة) هذا ابو ناصر !!!!!!! ....
بدور كانت متوترة ياربي وش أسوي !!! ... كانت مغمضه عيونها بقوة وترجف موقفي سخيف سخيف !!! .. بس ما تدري ليه جاتها ضحكه بهالوقت وودها تضحك !!! ... يمكن ردة فعل عكسيه !! ... دائم الإنسان وبعض الاحيان من قوة الصدمة تجيه ردة فعل عكس المفروض .. يعني بعض الأحيان المفروض يبكي .. تشوفه يقعد يضحك ويمكن بهستيريا بعد !!! ...
سلطان قعد يضحك : هههههههههههههههههههههههه وش فيه عمي ابو ناصر صغر كذا ؟؟؟ ...
ولمن قرب خطوة وحده صرخت بوجهه أم ناصر : ارجع وراك يا سلطان !!! ...
سلطان استغرب من ام ناصـــــــر !!! ....
ام ناصر يوم شافت وجهه مستغرب حاولت تستدرك نفسها : امش نروح المجلس .. (تهمس بطريقة مصطنعه واضحه!) هذا.... هذا مشاري ... نايم !!! ....
سلطان يطالع ببدور وهو يظنها مشاري : مشاري يا الخاين !!! .... ويقول بيطلع مع اخوياه !! .. أثرك نايم بحضن جدتك !!! ...
قامت ام ناصر ... وبسرعه راحت مسكت يد سلطان وقادته يطلع معها ...
بدور كانت ترجف ... أول مره تكون قريبه من أحد كذا !!! ... أكرهني !!! ... أكرهني !!! ... زين جدتي بتقدر تصرفه !!! ... كانت تحس إنها مهيب قادرة تسيطر على أنفاسها اللي تتصاعد بصورة كبيرة !!! ...مسكت الفروة وشدتها أكثر عليها !! ...
أم ناصر وهي طالعه مع سلطان : تعال للمجلس أحسن داخل !! ...
سلطان يلف على مشاري[بدور] ويستهبل : حرام مشاري ينام برا بهالبرد !! ... مو لو أشيله واحطه بفراشه داخل احسن !!! ..
وقعد يضحك ...
ام ناصر انقهرت منه : يا حنون !! ... اقول امش معي داخل وخل عنك مشاري !!! ..
سلطان وهو رايح معها : وش عليه خاطب الولد !!! ...
وهم واصلوا عند الباب وقبل لا يطلعون طفا النور سلطان ....
ام ناصر : وش عندك مطفي النور ؟؟؟ ...
سلطان يضحك ويستهبل : عشان ينام زين مشاري هههههههههههه ...
وبعدها بدت اصواتهم تخف تدريجياً .. وهذا اللي خلى بدور تأكدت إنهم راحوا ... إلين ما تلاشت أصواتهم !! ... جمعت جرأتها وطاقتها وحاولت تكشف عن وجهها وتوخر الفورة بس خافت ... طلعت راسها تدريجيا وهي تطل وتشوف الظلام بالخيمه إلا من النار الشابه قدامها .. وكان برا بالحوش تقريبا ثلاث ارباع الانوار طافيه وكان الجو مخيف نوعاً ما ... بدور تكره الظلام !! ... شوي شوي قامت ... انتبهت لنفسها ...
يا ويلي من جدتييييي !! ... ولو جدي يدري !!! ... والله ليذبحه وانا و الكل !!! ... وانا ؟؟؟ ... وش موقفي ؟؟ .. وانا وش سالفتي ؟؟؟ ... صدق مالي داعي !! ... بسرعه قامت وراحت لبست جزمتها وحطت الفروة على راسها لأن المطر خف بكثير وبقى قطرات .. خافت احد يدخل غير سلطان ويشوفها !... وبسرعه طلعت من الخيمه وراحت تركض تبي تدخل البيت ولفت تبي تدخل من الباب الخلفي للبيت لأنها لو تدخل من الباب الرئيسي بيشوفونها اللي بالمجلس لأنه واجهات المجلس الزجاجيه تطل على الباب !! ... ما كانت تدري إنه الوليد شافها من بعيد .. كان منتبه من البداية لجدته وسلطان لمن طلعوا وراحوا للمجلس !! ... استغرب بس تأكد إنه صدق الحين بنات خاله راحوا لبيت أبوهم !! ... بس استغرب لمن شاف واحد يطلع وهو حاط الفروة على راسه بعدهم يمكن بكم دقيقه !!.. كان الحوش ظلام ... بسم الله من هذا ؟؟ ... السواق و برا ؟؟؟ ... وجدي بالمسجد !! .. مين هذا ؟؟؟ ... لا يكون حرامي ... ولا جني !!! ... بسرعه وقف بعد ماكان جالس على الكراسي ...
الوليد وهو ماشي بسرعه ورا بدور ويكلم بالجوال : اسمعي يا سمر بأكلمك بعد شوي ..... شكل فيه حرامي ببيت جدي !! ... بأشوف وارجع اكلمك ... يله مع السلامة !! ...
وبسرعه راح يمشي ورا بدور ... بدور اللي كانت تركض ... انتبهت لصوت احد وراها خافت وركضت أسرع أكثر ... الوليد يوم شافها سرعت أكثر ... سرع أكثر وراها ... وقامت تركض .. وركض وهي تروح ورا البيت وما تزال ماسكه الفروة على راسها وهي ميته خوف !!! ... هي من الخوف ما انتبهت مين اللي يلحقها !! .. بس تأكدت إنها بورطة كبيـــــــــرة !!! ...
الوليد وهو يرفع ثوبه الكحلي الشتوي ويركض وراها : وقف !! .... وقف !! .. (وهو يصارخ) ..
بدور وهي تركض حست الباب بعيد ... انتبهت للأرض واللي كانت تراب ومليانة بموية المطر حست إنها مثل الطين !! ... يالله يالله تشيل رجولها منه وتنقل خطواتها السريعه !! ...
الوليـــــد وهو يقرب منها أكثر وهو يركض : وقف يا حيــــــــوان !! ...
بدور ركضت وحست إن الطريق للبيت من ورا ظلام لمن تجي من عند باب المطبخ ..
الوليـــــــد كان أسرع منها وبسرعه مسك الفروة ... وهي على طول فكت الفروة !! ... ولمن فكتها حست إنها اسرع ... الوليد انتبه إنه بس في يده فروة !! ...
بدور بسرعه وصلت لباب المطبخ قعدت تدق الباب بقوة وهي تصرخ تفتح الشغالة الباب ...
الوليد جاها وكان ظلام وما يبان من الشخص إلا زوله !!! ....
الوليد وهو يقرب ويتأمل من هذا ولد ولااا .. بنت !!! ... بنبرة سؤال مؤكد : حرامي !! ...
بدور انقهرت : حرامي بعينك !!! ...
الوليد وقف وتراجع خطوة : مين انتي ؟؟؟ ...
بدور انقهرت : جنيه ...
الوليد تعوذ بالله منها : بسم الله ...(عرف إنها بدور) وش عندك تطامرين قبل شوي كنك حرامي ؟؟؟ ...
فتحت الشغالة الباب ... وعلى طول دخلت وخشت ورا الباب داخل بالمطبخ ...
بدور تكلمه وهي داخل وتهاوشه( حست بالأمان داخل بس هذا ما يمنع التوتر والخفقان اللي بالقلب مو هذا الوليد وقاعده تكلمه ألحين!!) : وانت وش عندك تلاحقني !! ...
الوليد انقهر : وش رايك يعني ... على بالي حرامي ...
بدور وهي داخل وحاطه يدها على خصرها وتحس إنها تقط كلام وماتدري وش تقول : حرامي !! ... تنكت انت ؟؟؟ ...
الوليد يستهزأ بها : تمونين انتي عشان أنكت معك ؟؟ ...
حست بدور إنه صفعها كف .. وجرحها ؟؟ ... وشو ؟؟؟ ... يعني ماتعني له أي شي أكيييد ؟؟ .. مو كلامه وطريقة كلامه تدل على هالشي !!! ...
الوليد وهو يستفسر لأنه شاف سلطان دخل الخيمة وطلع منها قالها بأسلوب استفزازي وكأنها بمكتب تحقيق : انتي لقيتي سلطان ؟؟ ... (نبرة صوته ترتفع) تكلمي !!! ...
بدور بكل قهر صكت الباب وصفعته بوجهه بطريقة مذله وقالت بصوت عالي : انقلع !!! ..
الوليد حس بالمهانه قعد يتمتم بكلام ما قدر رادارها يلتقط ذبذباته !! ... بس تأكدت إنه يسبها !! .. بس مو هو حيوان !! ... وحقير !!! ... وكل شي بشع في الدنيا فيه !! ... كذا بدور قعدت تسب الوليد بنفسها ... تكرهه كره الموت لأنها تعشقه !! ... تكرهه لأنه دايم مايسرق أفكارها منها !! .. وتركهه لأنها كثر تبحر معه في احلام اليقظة !! ... أكرهك يا الوليد أكرهك .. أكرهك لأني احبك مع إني أعرف كل عيوبك !! ... أحبك يا حمااار !!! ...
.
.
دخل الوليد المجلس ... وشاف ام ناصر قاعده مع سلطان ...
ام ناصر : زين إنه توك مخلص تليفونك !!! ...
سلطان يضحك : عسى مارحت للخيمه ترا مشاري نايم هناك !! ...
الوليد وهو يحس مخربط : مشاري بالخيمه بعد !!! ... وشو حنا مكسيكين قاعدين مع بعض عادي !! ...
سلطان يستهبل : لا الناس الحين طايحين بالاتراك !! ... المكسيكين راحت موضتهم من زمن جدتي الله يرحمها !! ...
الوليد يكلم جدته وهو معصب : جدتي وين مشاري !! ...
ام ناصر ارتبكت : كان نايم بالخيمة .. وطلعنا عشان لا نزعجه ...
الوليد طلع جواله ودق : نايم هاه!! ... بأكلم مشاري !!! ...
ام ناصر عصبت وقالت بسرعه : خله ينام ؟؟؟ ...
الوليد وهو يكلم جدته : وين نايم ؟؟؟ ... هنا عندك يا جده ؟؟؟ ...
سلطان : إيه نايم عند جدته الضعيف !! ...
ام ناصر تحاول تنهي الموضوع اللي ماعاد قدرت تلمه : وش عندك تسأل يا الوليد ؟؟ ..
الوليد وهو يرد على مشاري اللي رد عليه : هلا مشاري ... (استوعب الحين الوليد السالفة أكيد بدور هي مشاري ... اكيد قالت جدته لسلطان إنها مشاري اللي نايم!! ... ألحين كيف ارقع السالفة !!) ...
على طول صك الجوال وحطه بجيبه وقعد وهو يضحك ... حس من ملامح سلطان إنه منه شك !! ... ياربي وش اسوي ألحين !! ... الحين انا فضحت السالفه اكثر !! ... أما ام ناصر انقهرت من الوليد .. حسبي الله على ابليسك دامك نبشت السالفة كنك بزر ...
الوليد يضحك وهو متفشل من غباءه : مشاري شفته نايم ... كانت الخيمه مصكر نورها ...
سلطان وهو كنه تراجع عن شكه : إيييييييه نايم هههههههههههههههه ...
الوليد وهو يحاول يغير الموضوع : مادريتوووا عن آخر خبر ؟؟؟ ...
ام ناصر وهي مبسوطة عن إن الموضوع تغير : وشو ؟؟ ...
الوليد يضحك : هيلاري صارت رئيسة أمريكا ؟؟؟ ...
ام ناصر تستخفه : باقي ما صار ... اليوم شفتها بالأخبار باقي تجمع الاصوات !! ...
سلطان يضحك : والله خطيره يا ام ناصر !! ... متابعه جيده للساحة السياسية ؟؟؟ ...
ام ناصر تضحك : إيه وش تظن !! ... بس انا ما اظن إنها هالعجيز بتاخذ الرياسه !! ...
الوليد وهو مهتم معها وبابتسامه : أجل من بياخذها برايك يا جده ؟؟؟ ...
ام ناصر بضحكه واثقه : اوباما هو الرئيس ... من يراهن !!!!! ...
وبعدها بخمس دقايق أذن لصلاة العشاء ... بعدها توكلوا الوليد وسلطان يروحون للصلاة .. أما جدتهم عيت إنهم يقومون مشاري !! ... الوليد فهمها .. وبسرعه خذا سلطان وراحوا لمسجد بعيد يصلون فيه !!! ....
.
.
طلعت بدور فوق وغيرت بيجامتها اللي امتلت طين من تحت وهي تركض ... صلت العشا ... وبعد ما سلمت ... جاتها أم ناصر لغرفتها ...
ام ناصر معصبه : عاجبك الموقف ؟؟؟ ...
بدور وهي باقي متوترة : الحين جايه تهاوشيني انا !!! .... ليه انا جريته من برا عشان يدخل للخيمه !! ...
ام ناصر وهي منقهره : الصراحة طاح قلبي يوم دخل خفت عليك !! ...
بدور طالعت جدتها ما تدري وش تكن لها جدتها من مشاعر !! ... تبي لو تفهمها بس لحظه !! ...
ام ناصر : خفت تصرخين ولا يعرفك ... عاد هو بيروح يقول لأمه ... وبتجي أمه تتنقد !! ...
بدور : مو هي خويتكم !! ...
ام ناصر : إلا خويتي ... ومثل اختي !! ... بس ما ابي احد يقول فيكم شي !! ..
اهتمام غريب ... من جدتها !!! ... بس متأكده إنها بتجي بكره وترجع تتهاوش معها !! ... جدتها وتعرفها زين !! ...
***
بعد ما صلّى العشــاء .. راح لبيت ولده راكان ... الكل استغرب لمن شافه !! ... غريبه يزورهم لأنهم دايم كانوا هم اللي يجونه ... صدق هو بعد دايم يجي ... بس هالمره مفاجأة !! ... الكل تفاجأ ... و أولهم أمجـــاد !! ...
وهم قاعدين بصالة البيت ... كانت أمجاد قاعده قبال جدها بعد ماسلم عليها .. قعدوا يتقهوون ويسولفون ... امجاد توقعت إنه بيلكمها عن موضوع مشاري .. بس ما جاب لها طاري أبد أبد .. لا من قريب .. ولا من بعيييد !! ... وهذا ريحها كثير بالسوالف معهم ... لاحظت جدها وهو يسولف مع أبوها و رحاب .. مره صاير وديع !! ... كانت اول مره تشوفه يسولف من دون ولا أمر ولا تسلط !! ... يالله كيف يقدر يجمع بين هالشخصيتين المتسلطة و الوديعه !! ... ذكرها بالدكتور جيكل ومستر هايد !! .. فقد انصهروا اثنينهم بشخصيه وحده ومن دون تحول في جدها !! ...
ابو ناصر يسولف : مسكين ابو رائد خوينا .. طاح طيحة قشرا بالأسهم ...
ابو زياد : إيه اظنه باع اراضي وبيوت عنده !! ...
ابو ناصر وهو يكلم ابو زياد : قلت لك لا تحط حلالك كله بالأسهم .. بصراحه الاسهم لعبه ماهيب مضمونة ..
ابو زياد ضحك : سبحان الله مره بعت أكثر من نص الاسهم عندي عشان فيه مشروع قلت بأدخل فيه ... وبعدها بيومين الشركات اللي كنت مساهم فيها خسرت فيها أكثر من راس المال ..
ابو ناصر ضحك : الصراحة اخوك ناصر عجبني يومنه مافكر بالاسهم ... وما هب بالاسهم مثل كل الناس !! ...
ابو زياد يضحك : وش عليه عنده مقاولات تشبعه ... مهوب محتاج للاسهم !! ...
ابو ناصر وهو يتذكر المؤسسه اول ما عطاها ابوناصر كانت صغيره بس بعدين توسعت : ما شاء الله عليه .. مثل ما توقعته سواها ..
رحاب اللي كانت قاعده معهم قالت بابتسامة : من شابه اباه فما ظلم !! ..
لف ابو ناصر على رحاب : الله يسلمك يا ام زياد ... (بابتسامة) إلا وين زياد ؟؟؟ ...
وما امداه يكمل كلمته إلا يشوف زياد منطلق وجايه يركض ...
زياد وهو يطب بحضن جده وهو يبتسم : انا هنا ...
ابو ناصر يضحك : بسم الله وينك ؟؟ ... بس قلت اسمك على طول طلعت لي !! ...
زياد يضحك مع جده ويقول بأسلوب طفولي : أصلن انا كنت خاش بالسيب ..(ويطالع في جده اللي منتبه له ومتفاعل معه) طيب .. وقلت لماما لمن يقول جدي اسمي بأطلع له اخوفه هههههههههههههه !! ...
ابو ناصر يضحك وهو يمسك بلطف انف حفيده : هاه!! .. طلعت منت بهين يا زياد !! ..
راكان يضحك وهو يشوف منظر ابوه مع جده : زيودي لا تزعج جدك !! ...
ابو ناصر يضحك لزياد : ماعليك من ابوك ... منت بمزعجني .. خلك هنا ..
رحاب وهي توقف : بأروح احضر العشا .. (تكلم ابو ناصر) بتتعشا معنا أكيد يا عمي !! ...
ابو ناصر وهو موافقها : مانيب راد عزيمتك ...
رحاب تبتسم مجامله : الله يحييك ...
ابو زياد : الله يحييك يباه .. تو ما بيتبارك عشانا !! ...
ابتسم ابو ناصـــر ... وبعدها راحت رحاب تجهز العشا وتبدا تحضره ...
أمجاد اللي كانت قاعده وساكته طول الوقت .. بغت تقوم تساعدها .. بس تذكرت مره قامت تبي تساعد رحاب في تحضر الوجبه ... تهاوشت معها !! ... بعدها تابت تقوم تساعدها .. وطبعا كان هذا الشي يقهر رحاب .. الأخت ضيفه ما تقوم تساعدني !!! ...
ابو ناصر طالع امجاد .. وبعدها تكلم ...
ابو ناصر : وش عندك يا امجاد ساكتة ؟؟؟ ....
أمجاد ارتبكت .. وبابتسامة باردة : ما عندي شي أقوله !! ...
أبو ناصر مستغل إنه رحاب مهيب موجودة وبهدوء قال : ما ودك ترجعين معي للبيت ؟؟؟ ...
أمجاد وهي مصره على رأيها وبعناد ماله مثيل : أنا بأقعد ببيت ابوي على طول !! ...
ابو ناصر بهدوء : ترا ما جيت إلا عشانك ...
أبو زياد يكلم امجاد : امجاد قدري جيت جدك لك !! ...
أمجاد وهي توقف :جيته على عيني وراسي ... بس رجعه معه مانيب راجعه ...
راكان بنبرة تهزيء : امجاد !! ...
أبو ناصر يتدخل : خلاص يا راكان لا تجبرها ... تبي تقعد ببيت أبوها ... البنت ما غلطت !! ...
أمجاد ما تدري ليه نبرات جدها هذي تثير فيها الكثير من البكاء والحنين ..
أمجاد وهي تطالع بأبوها بثقه : صحيح .. أنا ما غلطت !! ...
وبعدها بغت تروح تدخل داخل ...
أبو ناصر يستوقفها : أمجاد ...
أمجاد توقف وهي تطالع بجدها : هلا ..
ابو ناصر : تعشي معنا ؟؟ .. (يستفسر) ولا بتقفين وانا ضيف جاي اتعشا معكم !! ...
أمجاد واللي كانت بتدخل داخل ولا عاد تطلع لهم قالت لهم مجامله ..
أمجاد بابتسامة مجاملة : بروح اساعد ام زياد !! .. وش دعوى أكيد بتعشا معكم !! ...
وبعدها تعشوا ... وبعد العشــــاء استأذن ابوناصر .. وعيا ابو زياد إن ما يرجعه إلا هو .. وفعلا رجع ابوناصر ولده ... رحاب انقهرت من أمجاد اللي مارجعت مع جدها ... بس امجاد طنشت رحاب ... ودخلت غرفة الضيوف .. واللي قررت تصير تنام فيها وخصوصا إن الجو برد جدا وما تحتاج المكيف كثير ... صدق كان ودها تحط على التدفئة ... بس معليه ابوها اكيد بيصلحه لها !! ...
***
اليوم اللي بعده
راح مشاري بيت عمته .. وقعد مع عمته .. كانت الحزة عصريه...
ام الوليد تبتسم : هلا والله بولد اخوي ...
مشاري يبتسم : هلا والله بعمتي ...
ام الوليد : اخبارك ؟؟؟ ...
مشاري : نزقح .. إنتي اخبارك ؟؟؟ ...
ام الوليد : ماشيين بهالدنيا ...
ويدخل بهاللحظه أبو الوليد .. وسلم عليه وقعدوا كلهم سوالف مع بعض ...
ابو الوليد يضحك لمشاري : هلا والله بالمعرس ؟؟ ...
مشاري : هههههههههههههه مره وحده معرس !! ...
ابو الوليد وهو معجب بمشاري واخلاقه : ما شاء الله عليك .. عين العقل إنك خطبت الحين ..
ابتسم مشاري من دون مايعلق ...
ام الوليد وهي تمد القهوة لمشاري : إيه والله ...
مشاري يكلم عمته : ابو الوليد أول ..
ابو الوليد وهو يحلف : اقول الفنجال لك ...
اخذه مشاري ... وصبت عمته لزوجها .. وبعدين لها ...
ابو الوليد يكمل كلامه : والله الدنيا الحين فتن ... زين الواحد يتزوج بدري ويريح نفسه من الحرام !! ...
مشاري بنفسه (طالع من يتكلم !! ... على باله كل الناس مثل ولده !! ) ..
مشاري يضحك له مجامله : صح كلامك !! ...
وبعدها قعدوا سوالف ... وبالأخير سأل مشاري عن الوليد قالت له عمته إنه نايم ...
مشاري انقهر : يا عمتي ولدك ذا بيفقع مرارتي ..
ام الوليد تضحك : بسم الله على مرارتك ... ليه ؟؟؟ ...
مشاري : ألحين احنا متفقين اليوم العصر نطلع .. والاخ نايم !! ...
ابو الوليد يبتسم بهدوء : مانام إلا الظهر ... صلى الظهر ونام !! ...
مشاري يكلم عمته : ياليت يا عمتي تقومينه لي ؟؟؟ ..
ام الوليد تضحك : وليه ما تروح انت تقومه ؟؟ ...
أبو الوليد يفتح له المجال : ادخل داخل .. محد بقدامك !! ...
ام الوليد بحنين : ابرار تزوجت .. ومحد به قدامك !! ...
مشاري بابتسامه : إلا شخبارها أبرار ؟؟؟ ...
ام الوليد : تمام بخير ...
مشاري يضحك : هاه هي بشهر العسل الحين ؟؟ ...
ام الوليد بحب وهي تسولف عن بنتها : إيه ..
مشاري وبـ حب أخوي لبنت عمته : الله يوفقها ويسعدها يارب ...
أم الوليد وهي تدعي لمشاري كـ شكر لدعائه لبنتها : وانت الله يوفقك ويسهل زواجك يارب ...
ابو الوليد وهو مبتسم : آمين ...
قام مشاري وهو مبتسم : بأروح اشوف هالبعير الوليد ...
ام الوليد تضحك : بتلقى غرفته تحت .. قريبه من قسم الرجال !! ..
مشاري يضحك وهو رايح : للدجة حاطين غرفته قريبه من الباب !! ...
ضحكوا .. وبعد ما طلع مشاري ...
ابو الوليد وهو يكلم ام الوليد : الله يوفقه هالمشاري ... صدق إنه رجال طيب !! ...
.
.
وبعد ما قومه .. وقعده من النوم ... يالله قام وراح صلى قدامه بغرفته العصر ... لف وقعد يتهاوش مع مشاري ليه يقومه من النوم .. ومشاري يقوله قوم حرام صل !! ... وبعدها قعدوا سوالف ... إلين ما وصلوا لـ سالفة بدور وجدتهم .. وخصوصا الوليد قد قالها لمشاري ..
مشاري يضحك : بس ما اتوقع إن سلطان غبي لهالدرجة !! ..
الوليد وهو يفرك راسه بتعب وضحك : لا يغرك سلطان .. تراه طفل كبير !! .. ما درى ..
مشاري يضحك وقال بجديه : من الذكاء أحيانا إنك تكون قدام الناس .. غبي !! ..
الوليد وهو شك بسلطان : بس تصدق زين إننا رقعنا انا وجدتي الموضوع ...
مشاري يضحك : ههههههههههههههههههههههه اما بدور هذي حفله والله ...
الوليد يضحك : وما تشوفين وانا اركض وراها .. متحمس أمسك هالحرامي !! ...
مشاري وهو ميت ضحك : لو انا مكانها كان صكيتك بأقرب بلكه ...
الوليد وهو يفتح عيونه : ماقصرت ... شوي وبتصطرني كف !!...
بعدها الوليد تذكر : تراك انت السبب .. قلت لي إنهم راحوا لبيت ابوهم !! ...
مشاري : جدتي قالت هالكلام لأمي .. أثر قصدها بس امجاد .. وانا على بالي كلهم !! ...
الوليد : آها ... طيب ليه راحت خطيبتك !! ...
خطيبتك !! ... كلمه رنت كثير بقلب مشاري .. ولامست شغاف قلبه لـ ترن بجمسه كله !! ..
مشاري بجديه ينهي الموضوع : مثل ما قلت لك .. أكيد زعلانه ليه الخطوبة بس رجال !! ..
بعدها غيروا الموضوع .. ولبس الوليد وطلع مع مشاري لأخوياهم المخيمين هالأيام ...
***
زارتها اختها ببيتها .. وقررت إنها تقولها ... حاولت تمسك نفسها ... بس إنه اختها عندها وتسولف معها .. ماقدرت تخبي هالخبر اكثر!! ..
أروى تقول لشوق اختها : شوق ...
شوق وهي متربعه على الأرض وتطالع تلفزيون ببيت اختها اورى : وشو ؟؟؟ ...
اروى وهي قاعده جنبها : عندي لك خبرررر يطير العقل !! ...
لفت شوق وفوق راسها استفهام : وشو ؟؟ ...
اروى وعيونها تلمع : خمني ؟؟؟ ...
شوق تبتسم : لقيتي لك علاج ؟؟؟ ....
اروى حست بالحزن بس ما بان هالشي عليها : لأ ... شي ما يخصني ...
شوق استغربت : أجل يخص من ؟؟؟ ...
اروى بصوت هامس مبين إن وراه جبلّه .. : انتي !! ...
شوق وهي تعدل قعدتها وتأشر على عمرها : انا ؟؟؟ ....
أروى تضحك وتقولها لأنها ماتحملت حتى جو التشويق اللي مسويته : عبدالعزيز ولد عم محمد .. عرفتيه !! ...
شوق : إيه من ما يعرفه !! .. وش فيه ؟؟؟ ...
أروى بفرح غامر : تخيلي كلم محمد زوجي .. وقال يبي يخطبك ؟؟؟ ...
شوق انصدمت و قعدت تضحك بهستيريا ووجهها احمر : يبي يخطبني !! .. ههههههههههههههه عبدالعزيز يبي يتزوجني ؟؟؟ ...
اروى تضحك على اختها الخبله : إيه انتي ... بس لا تقولين لأحد لأن الخبر للحين سر .. وحتى قال لمحمد لحد يدري بس ماقدرت امسك نفسي ...
طبت شوق وحضنت اختها ... وكانت مو مصدقه إنه عبدالعزيز يبيها .. كانت مفاجأة من العيار الثقيل .. واللذيذ !! ... يااااااااااااه يا حلاة الدنيا إذا اخبارها كذا !!! ...
***
خجـــــــــــــل
|
21-07-08, 05:50 AM
جديد مواضيع قسم الارشيف
العرض العادي
