[الجزء الثامن]
[ البارت الأول]

الحب امرأة ورجل وحرمان
(بلزاك)

الجزء الثامن]
[ البارت الثاني]


الحب عند المرأة نار مقدّسة ، لا تشتعل أمام الأصنام !!
(حسن حافظ


رابع يوم العيــــــــــد
ببيت عبدالعزيز
الساعه 8 بالليــــل
[عزيمة ببيتهم]

كان أول الجايين لـ بيت عبدالعزيز .. ام خالد وبنتها ياسمين ... وبعدها بدقايق تلتهم أروى اللي دخلت مع ام محمد وبنتها صباح ... وأخيـــــــــراً جات مشاعل مرة خالد ... وكانت قعدة العائلة رائعه جداً تلفها أجواء حميميه دافئة ...

ياسمين وهي تلوي خصلة من شعرها حول اصبعها السبابه : اقول صبوحة ...
صباح وهي تبتسم من سالفة اروى : هاه !!! ...
ياسمين وهي تعدل جلستها وتقرب لجهة صباح : تراني زهقت !!! ...
صباح وهي باقي مبتسمة للحريم ومن دون ما تلف على ياسمين : مو كثري !!! ...
ياسمين وهي تهمس لها : قومي نتمشى بالبيت بدل قعدة الحريم الكبار هنا ...
صباح تبتسم : يله .. بس انتظري شوي خلي تخلص اروى سالفتها ...
والتفت ياسمين لسالفة اروى .. وكانت اروى تسولف بحماس عن مغامرتها هي واختها بلندن قبل ماتتزوج محمد ...
أروى بحماس : وكان نروح انا واختي لـ حفلة كانت هناك لـ رأس السنه ... وكنت هذيك الأيام ادرس ...
بعدها لفت ياسمين وقالت لـ صباح : مدري احس السالفة فيها نصب ...
صباح وهي متفاعله مع السالفة : انا مرة اخوي ماتنصب ... مرة اخوك تنصب ممكن !!! ...
ياسمين لفت على مضاوي اللي كانت توها داخله من برا وباقي لابسه عباتها : هلا والله ...
ياسمين تبتسم لها وتقوم لها : هلااااا والله ... توك جايه يا الخايسة واحنا هنا من زماااان !!! ...
مضاوي وهي تسلم عليها بمرح : والله كنت عند وحده من خوياتي وتوها اعتقتني لوجه الله يوم قلت لها إن اعمامي متجمعين عندنا !!! ...
ياسمين ومسويه منقهره : يا سلام !!! ... المفروض إنه من السناعه ماتروحين دام بيجوكم ضيوف !!! ...
مضاوي بابتسامة : انطمي ... لحد يسمعك ...
صباح لفت : كلن سمع (تضحك) ... لا تحاولين !! ...
مضاوي ضحكت ونزعت الشيلة من راسها وسلمت على الباقي ...
مضاوي تكلمهم : اعذروني والله تأخرت عليكم ...
مشاعل تضحك لأنها كانت رايحة مع مضاوي : شوفيني احسن منك ... طلعت قبلك ...
مضاوي وهي تضحك لها وتمزح : هذا لأنك سنعه ... وانا رفلة ...
ضحكت ام خالد : بسم الله عليك ... إلا زينة البنات والحريم كلهم ...
مضاوي ابتسمت بجمال لمرة عمها : تسلمين ... (تكلم الجميع) استأذن اعدل شكلي المعفوس واجيكم ...
ياسمين : متأكده إنه شكلك معفوس !!! ... (تغمز لها ) قمر والله ... ليتني وانا كاشخه يجي شكلي مثلك بس !!!
مضاوي ضحكت وطلعت للدرج الواسع وهي تبدو صغيرة الحجم مقارنة بفخامة الدرج الكبير المتربع وسط المنزل ...
بعدها لحقتها ياسمين فوق ... : مضاوي بأطلع معك !! ...
لفت عليها مضاوي وهي تقريبا قطعت اكثر من الدرج : حياك البيت بيتك !!! ...
ياسمين كانت زهقانة وخصوصا من سوالف الحريم وماتستملح اروى .. ويوم جات مضاوي انبطست لأنها حست بالفرج ... وخصوصا صباح مستمتعه اكثر منها بسوالف الحريم ...
وطلعت فوق مع مضاوي وهم يسولفون : اقول ياسمين الكل جاء !!! ...
ياسمين : سمعت عمتي منى تقول باقي بيت ابو صالح ما جو !! ...
مضاوي فتحت عيونها : عزمتهم !!! ...
ياسمين تضحك :الله يخلف عليك .. عندكم جمعه ببيتكم ولا تدرين من بيجي !!! ...
مضاوي : انا على بالي بس انتوا اعمامي يعني ...
ياسمين : واخواني و كل اعمامي جايين !!! ...
مضاوي وهي تدخل غرفتها الكبيــــــــرة : انا شايفة خديجة تشتغل من الصبح على هالعزيمة !! ...
ياسمين وهي تدخل وراها غرفة بنت عمها الفخمة : مبروك جية خديجة ... والله تصدقين من زمان عنها ...
مضاوي ابتسمت لها وهي تخلع عباتها وتقطها على السرير : احسها مننا .. ما نقدر نستغني عنها ...
ياسمين تضحك : إيه والله ...
اتجهت مضاوي للغرفة الثانية للدولاب : خليني بس أشوف وش ألبس ...
طالعت ياسمين بغرفة بنت عمها .. قد دخلتها كثير .. بس أول مره تتأملها .. كانت روعه يغلب عليها اللون الزيتي .. والذهبي !! .. كانت روعه وفخامة نقوشها الجدارية والسقف اللي تتدلى منه ثريا تتشعب في السقف وكأنها أغضان كروم العنب !!! ... روعه دقيقة في التصميم ...
مضاوي طلعت لـ ياسمين لابتسامة : وش رايك مو أحلى من قبل شوي ؟؟؟ ...
انتبهت لها ياسمين : والله كله حلو ... بس هذا يليق بعزيمة عشاء أكثر !!! ...
مضاوي وهي تتكلم بفرح : وانا اقول كذا ؟؟؟ ...
راحت مضاوي لـ التسريحة وعدلت شوي بالميك آب وقوة بالكحل ... وبالاخير طالعت بنفسها نظرة أخيرة ... كانت لابسة تنورة ضيقة إلى نص الساق على جاكيت بني قصير تحته قميص بيج .. كانت روعه ... بالأخيـــــــر أنهت لمساتها بدهن العود الأصيل ... وحطت منه ورا اذنها وعلى رقبتها وعلى ظهر كفيها وفركت ظهر كفيها على بعض ..
تطالع بـ ياسمين بالمرآيه : تعالي أحط لك !! ...
ياسمين وهي تطالعها بتقزز : وععععععععع أكره دهن العود تكفين !!! ...
فتحت عيونها مضاوي : ليــــــــه ؟؟؟ ... بالعكس يجنن .. وخصوصا إذا كان خالص مو مخلط !!! ...
ياسمين : مضاوي ارحمينا !!! ... وقسم بالله احس كبدي حامت تراني ما احب هالأشياء !!! ...
مضاوي وهي تضحك لها من المرآية : أجل تحبين العطورات الفرنسية !!! ...
ياسمين بنبرة دلع وابتسامة : آها !! ...
مضاوي لفت عليها : تدرين يقولون إن الفرنسيين اخترعوا العطور عشان يتجنبون يتحممون !! ..
ياسمين : وععععع الله يقرفهم ... متخيلة ريحة عفن واحد مهوب متسبح ويحط عطر وعععععع
ضحكت مضاوي : الله يرجك بس ... يله انا نازلة ...
ياسمين وهي تروح للتسريحة : بس أعدل شكلي واجيك !!! ....
مضاوي وهي طالعه : خذي راحتك يا بنت عمي ...
راحت ياسمين تطالع شكلها بالتسريحة الكبيرة .. إلا تشوف صباح داخله !!! ...
ياسمين : وش عندك جاية ؟؟؟ ...(تلف عليها) مو عاجبتك سوالف الحريم !!...
صباح وهي تضحك : والله سوالف اروى مع اختها تضحكني !! ... (بنبرة أسى) ليت عندي اخت !!! ...
ياسمين فتحت عيونها : وش قصدك يا حيوانة ؟؟؟ ... وانا وين رحت ؟؟؟ ....
ضحكت صباح وهي تقهقه : يوووووووووووه نسيت عنك ...
ياسمين : كلي $$$ ... حيواااانة !!! ...
صباح وهي ميته ضحك : خلاااااص ما تسوى هالكلمة علي ...
ياسمين وهي تعدل شعرها العجري : صباح تراك مره نحفتي .. ياخبلة اطلعي من النادي اللي انتي داخلته !!! ... ترا منتي محتاجته !!! ...
صباح وهي تطالع جسمها بالمراية وحاطه يدها على خصرها : أحس يبي لي تكه وخلاص ؟؟؟ ..
ياسمين : وين خلاص ... انتي شوي وتختفين ؟؟؟؟ ... صايرة هيكل عظمي ... وبعدين من اللي دخل فكرة إنك تنحفين اكثر !!!
صباح وهي تمرر يدها على فستانها البنفسجي الغامق الماسك على جسمها كان كمها ثلاث ارباع وصاير هاينك وإلى الركبة قماشه من الصوف ولابسه تحته هيلاهوب اسود وكعب شوكه عالي بنفسجي ... ومسويه شعرها القصير كله استريت ... وحاطه مناكير سوداء ...
صباح وهي حاسه محد مؤمن بأفكارها : الحين الهزال صاير موضه ؟؟؟ ... وش يدريك انتي ؟؟ ...
ياسمين : انثبري .. والله جسمي طبيعي بس من اجي جنبك ... احس صايرة دوووبا ...
كانت ياسمين لابسه بدله رسميه كحلي خطيره .. وتحتها هاينك رمادي ...
صباح : طيب اخلصي علينا وتعالي ننزل ...
ياسمين : طيب بس اخلص هاللمسات وانزل ... (حطت لها شوية بلاشر وزادت القلوس) ..
ياسمين تطالع بعطور مضاوي الكثيرة : شوفي بنت عمك عندها هالعطور الحلوة ... وحاطة دهن العجايز ... والله حالة !!! ...
وتعطرت لها بعطر وطلعت مع صباح ... وبدل ما ينزلون قعدوا يحوسون بالبيت ... طالعين نازلين كنهم بنات 8سنين !!! ... ودخلوا فوق غرفة عبدالله ولد عمهم ...
صباح وهي واقفة عند الباب : امشي خلينا نطلع !!! ...
ياسمين : ياربيه هالسماعات مسوية لي اغراء ...(بنبرة طفولية) ابي زيها !! ...
وراحت عند سماعات كبيــرة يمكن توصل لنصها ... وراحت تتلمسها بأصابعها .. مره خاقه عليها ..
صباح تضحك : احنا لازم نقرا عليك ... انهبلتي ..
ياسمين تضحك : انثبري (وراحت شبكت الاستريو بسماعاته الضخمه) واخذت الريموت وشغلته ...
صباح وهي متكتفه : اللهم مستعان !!! ...
ياسمين وهي تضحك : خلينا نشوف وش موجود (وعلت الصوت إلا أغنية اليسا ايامي بيك) واااااو اغنية اليسا !!! ...
صباح تضحك : خطيرة الاغنية !!! ... شكل عبدالله شرا البومها !!! ...
علت الصوت ياسمين بالغرفة ... وبدا الصوت يعلى ويعلى ..
صباح تطالع ياسمين : والله إنك مجنونة !!! ..
ياسمين وهي عاضه على شفتها السفليه وتهز راسها دليل ترنمها مع الأغنية : عاجبتني الأغنية !! ...
جات صباح وجرت بنت عمها : امشي الله يفشلك ... ماتعرفين تمسكين نفسك ...
ياسمين ضحكت : حالتي ميؤوس منها !!! ...
طلعوا الثنتين وراحوا للبلكونة الكبيرة وفتحوا بوابتها وطلعوا يطلون كان الجو بارد .. وروعه وخصوصا القمر كان مكتمل ...
................ : احم احم ...
لفوا الثنتين بخرعه إلا يشوفون سديم جايه ...
استغربت ياسمين منها إنها جات !!! ..
صباح : هلا سدووومة !!! ...
ياسمين : يامرحبا ويا مسهلا ...
سديم ابتسمت لهم : هلا فيكم يا بنات ولد عم ابو ابوي !!! ...
ضحكوا البنات منها ... وبعد ما سلموا عليها .. حست سديم من نظراتهم إنهم كأنهم يسألونها عن سبب جيتها لهم ؟؟؟ ...
سديم باحراج : اول ما قعدت قالت لي عمتي منى اطلعي فوق للبنات .. وبعدها قالت لي الشغالة إنها شافتكم جايين هنا !!!
ضحكت لها ياسمين : لا عادي زين إنك جيتي !! ...
سديم ضحكت : اكيد زين ... ولا سدومة الحلوة يحلصكم تجي !!! ..
دقتها صباح : انثبري .. ترا واجد واثقة بنفسك !!! ...
سديم وهي ترز نفسها بمرح : الثقة زينة ...
ياسمين تستهبل : زينة ولا شينة ...
صباح طالعتها يعني ترا ماتضحكين ...
فجأة لفحت نسمة هوى باردة طيرت شعر البنات ...
غمضت عيونها سديم : برد بنات ..
صباح وهي توخر الخصل من وجهها : يا زين البرد زينااااه ... ليت السنه كلها برد !!! ...
ياسمين : إيه والله يا ليت !! ..
صباح : تعالوا نتفرج على الجو ...
وراحوا تسندو على اطراف البلكونة الدربزين الجبسي ... وطالعوا بحديقة المنزل الكبيرة وشافوا البيت والسيارات وكل شي ...
ياسمين بنظرة حالمة : روعه مكان البلكونة قدام البيت ... احنا بلكونتنا الغبية على جنب تطل على المسبح ...
سديم هي مستندة وشعرها البني العسلي نازل على اطراف وجهها : كل الاماكن حلوة ...
صباح برومانسية : على قولتك !!! ...
ياسمين وهي تطالع السما : تجنن السما النجوم واضحه ... كنها ليله صيفيه مع إن الجو بارد ..
طالعت صباح بالسما وشافت النجوم تبرق والقمر مكتمل وسرحت بعيد : اذكر يوم كنت صغيرة كانوا يقولون مو زين الواحد يعد النجوم يقولون يطلع له ثآلول !!! ...
سديم تضحك : صح .. وبعض الاحيان يقولون تطيح اسنانه !!! ...
صباح تضحك وهي متفاعله مع السالفة وتلف على سديم : واحنا مساكين ودنا نعد ومو قادرين ...
ياسمين : تذكرين صباح يوم مره قعدنا انا وانتي وعبدالله (فز قلب سديم) نسولف عن النجوم ..
صباح تضحك : عاد هو سوى فيها الشجاع وعدها ... واحنا نقول له لا تعدها احسن لك ...
صباح وهي تميل براسها على جنب برقة : كانت أيـــــــــــام !!! ...
سديم ووجهها محمر : طيب صار فيه شي عبدالله ؟؟؟ ...
ياسمين من دون ماتلف لها : طبعا ما صار فيه شي ...
صباح وهي ترفع نظرها للقمر : بنات شوفوا القمر زين تحسونه مشوه صح ؟؟؟ ...
طالعوا فيه البنات ... وقعدوا يدققون إلا طلع كلام صباح صدق ...
سديم تضحك : يا شيخه احسه كوكب قديم وكله جبال !!! ...
صباح وهي تتأمله وعلى شفتها ابتسامه : بالعكس احسه وجه حرمه عجوز (وتأشر بيدها) شوفي هذا مو كنه خشم ؟؟؟ ...
ياسمين تطالع بالقمر وتتأمله : صادقه والله صباح .. بس كنه واحد يضحك !! ... ويطالع على جنب !!! ...
صباح ضحكت باستغراب : لا عجوز ... شوفي هذا خشمها ...(وتدقق) وهذيك عيونها ... وشوفي فمها وشلون معبسه !!!...
ياسمين وهي ترفض الفكرة : لا وجه واحد يضحك ... حتى رجال ... شوفي هذيك ابتسامته !!! ...
صباح وهي تطالعها بقهر : هذا طرف وجه العجوز ... وهي تطالع فينا ... مش على جنب !!..
سديم وهي تتأمل : مافيه وجه لا عجوزة ... ولا واحد يضحك !!! ...
لفت عليها صباح ومالت عليها : وين عيونك انتي ؟؟؟ ... ماتشوفين هالعجوز ؟؟؟ ...
ياسمين تضحك : هههههههههههههههههههههه حلوة سديم ... مسوية حل وسطي !!! ...
سديم تتأمل القمر : انا ما اشوف فيه إلا جبال ... واحس داخله شي يتحرك !!! ...
.
.
تحت عند الحريم ... كانوا الكل قاعد ... ويسولفون يضحكون وخصوصا أم سديم جايه وام صالح جدة سديم جايه والكل سوالف ...
مضاوي وهي قاعده جنب مشاعل : اقول شعولة (بهمس) وش فيها ام صالح تطالعيني كذا !! ..
مشاعل طالعت بأم صالح اللي تسولف وعيونها معلقه على مضاوي ...
مشاعل وهي تضحك بصوت واطي : يمكن عشان سالفتك مع ولدها جلوي !!! ...
مضاوي وهي تكشر وتقرب اكثر لمشاعل : هذا موضوع خلصنا منه أكثر من 3 سنين !! ..
وبعدها بدقايق جات الشغالة تقول إن العشـــــــــاء خالص ..
منى وهي تقوم بابتسامة لبقة : يالله ... الله يحييكم على العشاء .. واعذرونا على القصور ..
وقام الكل وهو يشكر بمنى .. وتوجهوا للعشاء ... وراحت الشغالة تنادي البنات للعشاء ...
.
.
.
عند الرجال كانوا قاعدين سوالف ... وكان الجو وناسة ... وسعة صدر ...
جلوي يكلم محمد : وينك ما شفتك ايام اللي طافت ...
محمد : والله شغل ... وحالة إلا انت وينك ؟؟؟ ...
جلوي : جيت بس مالقيتك ؟؟؟ ..
عبدالعزيز وهو قاعد جنب خالد قعد يسولف معه ... ودخلوا الشباب بالسوالف ... وكان الجو ممتع جداً ... بعدها قاموا للعشاء ...
.
.
.
وبعد العشاء ... اللي الكل اثنى عليه ... كان الجو بدا يحلى .. وخصوصا عند البنات ...
صباح وهي تمدد على كنبه فوق بالطابق الثاني بعد نوبة ضحك طويلة : تهبل النكتة ...
سديم تضحك وتقعد وتمدد رجليها بحيث إنها صارت متشابكة مع رجول صباح وهي قاعده على الطرف اليسار من الكنبة .. بحيث صباح يمين ...
سديم تضحك : أما فيه نكتة تجنن قالي عليها عمي طلال ...
صباح وهي تطالعها بابتسامة : وشهي ؟؟؟ ...
سديم وهي تضحك : يقولك في فيل خرطومه قصير ليه ؟؟؟ ...
صباح وهي تحاول تتماسك من الضحك : طاح عليه ؟؟؟ ...
سديم تضحك : لأن امه فلبينيه هههههههههههههههههههههههههههههههه ...
صباح وهي تضحك :ههههههههههههههههههههههههههههه وه بطني بطني .. ماني قادره ..
طلعت لهم فوق ياسمين وبيدها كاس عصير: وش عندكم هجيتوا ماعاد شفتكم ؟؟ ..
صباح وهي تطالع بسديم وفيها ضحكه : هالبنت فاصله قصم بالله !! ...
سديم وهي تطالع بكاس العصير بيد ياسمين : أبي !!! ... ابي عصير !!! ...
صباح وهي تطالع بياسمين : وانا بعد ابي ...
ياسمين وهي تطالعهم بخوف وهي تحاول تخفي الكاس بجنبها : يمه منكم قولوا مشالله ...
صباح تستهبل : هب عليييييييييك ...
ياسمين : قولي مشالله يا ملعونة ترا بأغص الحين من عيونكم !!! ...
صباح : طيب قومي جيبي لنا ... عشان ما اعينك ههههههههههههههههه ...
قامت ياسمين وصوتت على الشغالة ... وبعد ما جات الشغالة قالت لها تجيب لهم اثنين عصير لصباح وسديم ... وبعدها بدقايق جات الشغالة وبيدها صينية العصير ومعها بعض الحلويات والفطاير ...
صباح وهي تعدل جلستها : شبعانه والله بس ابي عصييير ...
سديم : حتى انا ... يوه ماقصروا والله ...
ياسمين وهي تقعد بينهم وتضيق عليهم ...
صباح وهي متضايقة من ياسمين : يا بنت الكنب وش كثره قاعده بيننا ... تضيقين على خلق الله ليه ؟؟؟ ...
ياسمين : أبي قربك (تستهبل برومانسية) ...
صباح وهي تضحك : انقلعي !!! ...
سديم وهي تضحك : بنات وش مواصفاتكم لفارس احلامكم ؟؟؟ ...
صباح وهي تطالعها : وش طرا ذا الموضوع براسك ؟؟؟ ...
سديم وهي تطالع بالتلفزيون البلازما المعلق بالجدار : هذا السبب ...
طالعوا بالتلفزيون .. إلا كان تيم حسن مسوي معه لقاء ...
سديم : يا ملحه هالرجال !!!! ....
صباح وهي تطالعه: هو زوين ... مو لهذاك الزود مدري وش عند البنات متسدحين عنده !!! ...
ياسمين وهي تطالع التلفزيون : هو حلو ما انكر هذا الشي ... بس هالجمال ما يستهويني !! .. احب الجمال العربي ... هذا جماله اجنبي ... بس نبرة صوته تعجبني ...
قد صباح تتسمع لصوته : إيه والله صوته ابن الذين يجنن مو على وجهه !!! ...(لفت على سديم) انتي ابدي فينا وش مواصفات فارس احلامك ؟؟؟...
بابتسامة افتتحت كلامها سديم وبحماس : أبيــــه مو كبير علي يعني ابيه بعمري ...
ياسمين : وعععع .. ما يصلح المفروض هو اكبر ...
سديم : يعني اكبر مني بسنه سنتين مو اكثر !!! ... أبي اعيش معه شبابي ... أبي كل مرحله بحياتنا نعيشها انا وياه الثنين ...
ياسمين تطالعها باهتمام وبعدين هزت راسها بالنفي : كلامك صح ... بس مجتمعنا ما يصلح ابد ... ممكن برا يصلح بس هنا أبد ما يصلح ..
سديم : احنا عششنا براسنا كلمة ما يصلح ... ممكن يصلح ليه لأ ؟؟؟ ... المهم خلوني اكمل لكم .. أبيه يكون مزيون مثلي ... يعني شين ما ابي ...
صاحت صباح : اووووووووووه يا الغرور ...
ضحكت سديم : المهم وأبيـــــــــه يكون طيوب وشخصيته تشبهني .. وما ابيه غامض .. وما ابيه يكون مغرور ... أبيه يكون متواضع ... وأبيد دمه خفيف .. ويناسب طبقتي الاجتماعيه وياحبذا يكون من قبيلتي !!! ... <<< محد انتبه إنها توصف عبدالله ^_^
ياسمين تضحك : هههههههههههههه حلوة يا حبذا !!! ....
صباح : اوه كبرنا على هالكلام من زمان ما تكلمنا فيه ... انا عن نفسي قبل عمر 25 سنه ما ابي اتزوج ... أبي انبسط بحياتي ... وما ابي ارتبط بأحد ألحين ...
سديم : غربية دايم البنات متلهفات للزواج ... غريبة إنتي ...
صباح بجدية : متلهفات للحب !!! ... واحنا هنا بمجتمعاتنا مافيه حب إلا تحت اطار الزواج !! .. مسكين الحب والبنات هنا ... محرومات !!! ...
سديم وهي تعترض : بالعكس يا كثر اللي يحبون بعض قبل الزواج ؟؟؟ ...
صباح : صح صادقة ... بس هالحب ما يستمر ؟؟؟ ... ويمكن بس اللي بيقدرك لو تحبينه يا يكون ولد عمك أو ولد خالك !!! .... وغيرهم لو درى إنك تحبينه تطيحين من عينه !!! ...
ياسمين وهي تتذكر: صادقه ... تذكرين سالفة هيام اللي معنا بالقسم ؟؟؟ ...
صباح بابتسامة : ايوا ... هذي حبت لها واحد ويوم جاء خطبها وقالت له تركها !!! ... يا حياة الشقا !!! ... حتى الحب ادرجوه تحت الحرام !!! ....
سديم وهي تفكر : صح صادقين ...(بابتسامة) طيب وش مواصفاة فارس احلامك ياياسمين ؟؟ ..
صباح وهي تضحك بمكر : ما عليك من هذي الماسوشيه !!!
سديم تطالع باستغراب لـ ياسمين وفيها ضحكه : انتي ماسوشيه ؟؟؟ ...
ياسمين ووجها محمر : صبااااااااحوه يا تبن !!! ... بدينيا نروج الاشاعات !!! ..
سديم وهي تحس طلبات ياسمين غريبة ومتشوقة تسمعها: طيب قولي لنا وش مواصفاته ؟؟؟ ...
ياسمين وهي تبتسم بخجل : أكيد بتقولين إني انا حالة نفسية ..
سديم وهي تضحك : ماراح اقولك ... يله قولي !!! ...
ياسمين بعد فترة صمت تكلمت بمرح : أبيــــه تكون شخصيته قوية مره وابي اكون أهابه لدرجة إني ما اقدر احط عيوني بعيونه !! .. وأبيه كل شي يقولي لأ لأ !! .. ومايعطيني وجه(ابتسمت للبنات) وأبيــــه مايفكر فيني .. أبي حتى الكلام قدامه ما أقدر اتكلم !! .. ويوقف قلبي لي شفته جايني .. أبي اكون ادنى اهتماماته ... ما أبي اكثر من كذا !!! ...
سديم وهي فاتحه عيونها على الآخر : منتي بصاحية ...
ضحكت صباح بصوت عالي : قصدك معتوهه هالبنت !!! ...
سديم وهي مستغربة : البنات يبون واحد يداريهم ويحطهم بعيونه .. وانتي (تطالعها باستغراب) غريبة والله !!! ...
ياسمين تضحك : ما الغريب إلا الشيطان ... انا باختصار ابي شخصية سي السيد !!! ...
سديم تضحك : لو يسمعونك اللي يطالبون بحقوق المرأة هنا بينفونك !!! ...
ياسمين بثقة : بس لو دروا من ابوي بيتراجعون !!! ...
سديم تطالعها باستغراب : والله من جدك تتكلمين ولا تمزحين !!! ...
ياسمين وهي تضحك : والله من جد اتكلم ... أبي مثل ما قلت لك !!! ...
سديم وهي مهوب مصدقة : عش رجبا ترا عجباً !! ..
ياسمين وهي تضحك : عجبا يصك جبهتك !!! ... وش اسوي انا كذا اتمنى !! ...
سديم تضحك : وانتي يا صباح قولي إنك تبين مثلها ؟؟؟!! ...
صباح وهي تصلب ظهرها أكثر وترز عمرها وتقول بثقة : أبيـــه يكون رجال بمعنى الكلمة وكلن يقدره (وبثقة واضحه من عيونها) بس عندي يصير (وتدور خاتمها) خاتم بإصبعي !!! ...



***


قــامت مع صلاة العشــــاء حست بخمول كبيـــــــــر ماودها تتزحزح من تحت فراشها ... إلا تدخل بدور ... وتتسلل تبي تاخذ شي من التسريحة ...
أمجاد بصوت كله نوم : بدور !! ...
بدور واللي كانت تتسحب على اطراف أصابعها وقفت ... : انتي قايمة ؟؟؟ ...
أمجاد من دون نفس : توني ...
وبسرعه راحت بدور فتحت نور الغرفة : قومي خلاص بسك نوم ...
أمجاد وهي تغطي نفسها باللحاف : كم الساعة ؟؟؟ ...
بدور تجي وتشد اللحاف من على أختها .. وتقطه عند السرير : ماتقووومين !!! ...
تكومت امجاد على نفسها وحطت يدها على وجهها من النور : بدور (حست بالبرد) بلا مصاخه واطلعي برا ... ودي ارجع اناااام !!! ...
بدور وهي متوترة ماتدري وش تقول : أقول قومي ترا عندنا اليوم عزيمة ...
أمجاد وهي تتأفف بخمووول : اووووففففف من جدك هذا مايزهق ؟؟ ..(بتعب النوم) ليه يعزمهم ؟؟ ... ليه هو مايروح لهم !!! ...
بدور : أمجاد قومي صلي العشــــــــــاء !!! ...
أمجاد تستقعد : الله يقطعك صجتيني !!! ...(تتلفت حولها بطفش) ...
بدور وهي متكتفه .....
أمجاد وشعرها حوسة على ظهرها وكتوفها : وش تبين يا ام الهول واقفه عند راسي ؟؟ ...
بدور : قومي ... (بدور خايفه ماتدري وش ردة فعل امجاد لو تدري) ...
أمجاد قامت ورتبت شعرها بيدينها .. وراحت تتوضا وبعدها صلت العشـــاء .. وبعد ما خلصت الصلاة إلا تسمع صوت كأنه يتهاوشون بس بصوت هامس .. انتبهت للأصوات إلا صوت بدور وجدتها ..
بدور بهمس وهي عند الباب : جدة مالك داعي تقولين لها ...
أم ناصر وهي تبي توخر حفيدتها : أقول يا أم الشر وخري عني ...
بدور وهي تصدها عن الباب وعيونها مفتحتهم : انتي متعمده تسوين هالحركات عشان تسمعك صح ؟؟؟ ...
أم ناصر وهي مقهورة من بدور : الله يعلك يا بدير !!! ... وخري عن وجهي ؟؟ ...
بدور انشبت عند الباب : انا اللي بأقولها خلاص ... عاد انتي اسلوبك (بتأكيد) مايصلح ...
أم ناصر تطالعها بقهر : صدق إنك ما تستحين يا قليلة الأدب !!! ...
بدور وهي متخصرة : إيه انا قليلة أدب .. وما استحي ... وماعندي دم بوجهي ارتحتي الحين !! ...
إلا تفتح أمجاد الباب وهي باقي بجلال الصلاة : وش عندكم تتهاوشون ؟؟؟ ...
بدور لفت عليها مخترعه : هاه ... أي هواش ؟؟ ... مافيه هواش ؟؟؟ ...
أم ناصر جات بتتكلم ... إلا تنط بدور وتشبك يدينها بيد جدتها وتقول بدلع : بالعكس قاعدين نسولف انا و ستي !!! ...
أمجاد طالعتهم باستغراب ... هيئتهم ما تطمن أبد أبد ...
أم ناصر وهي تفك يدها من يد بدور بقرف : وخري عني انتي !!! ...
بدور بنبرة رجاء : جــــــده تكفين !!! ...
أمجاد اخترعت : وش فيكم ؟؟؟ ... (وقعدت تقلب عيونها بينهم الثنتين) ...
أم ناصر : شوفي يا امجاد اليوم عندنا عزيمة ...
أمجاد وهي معقده حواجبها : أدري !!! ...
أم ناصر بتأكيد واضح : اليوم العزيمة هي خطوبتك من مشاري !!! ....
أمجاد وبنبرة ساخطه : إيـــــــش ؟؟؟؟؟ ...
أم ناصر وهي توخر بدور اللي تحاول تكلمها : وخري انتي عني ... (تكلم أمجاد) شوفي جدك يوم شافك لا تسنعتي ولا مشيتي معنا زين ... خلى خطوبتك اليوم والناس اليوم جايين ...
أمجاد بدهشه وهي تطالع فيهم وعلامة استفهام كبيرة فوق راسها !!! : ................
بدور تحاول تخفف عنها : ترا العزيمة بس رجـــــــال !! ... مافيه حريم !! ...
أمجاد تطالعهم باستنكار مو معقوله اللي يقولونه ....
ام ناصر بقوة وشموخ : ما ينفعك عنادك يا أمجاد !! ... لو إنك سمعتي كلام جدك ومشيتي معه بالطيب مو كان أحسن لك ...
أمجاد بنبرة هدوء غاضبة : مو من حقه يغصبني على شي ما ابيـــــــــه !!! ...
أم ناصر تعلي صوتها :شهر يا امجاد وهو يحدر ويسند فيك ولا نفعك !!! ... شهر وهو صابر معك !!!! .... شهر يا امجاد وهو يحاول يميل براسك !!! .. وانتي صخره ما تحسين !!! ...
أمجاد وهي تتقدم خطوة قدام : انا صخر يا جده !!! (نبرة صوتها تعلى شوي) أنا صخر !!! ..
بدور وهي تحسها ضايعه مو قادر تسوي شي : أمجاد ماعليك من خرابيطهم ...
أم ناصر تلف على بدور : الخطوبة اليوم رسمي ... والجماعه بيجون !!! ...
انتبهت أمجاد اليوم إن جدتها خلت السواق يرتب المجلس والخيمة والحوش والشغالة ترتب البيت بزيادة ... حست إنه فيه مناسبة ... بس قالت يمكن بيجون رجال لجدي ... بس إنه تكون الليلة خطوبتها !!! .... آخر احتمال تحطه .... حست نفسها كأنها بقمة جبال فجأة هوت على وجهها من دون أي توقع !!! ...
انتبهت لجدتها اللي نزلت ...
دخلت أمجاد بعصبية للغرفة وقطت جلال الصلاة ..
أمجاد وهي معصبة : مالهم داعي ... وش هالحركات ... وش هذا كله ؟؟؟ ....
دخلت بدور الغرفة ووقفت عند الباب : امجاد لا تحرقين اعصابك ...
أمجاد مقهورة : شلون ما احرق اعصابي ؟؟؟ ... يكفي إني سكت يوم جدتي تروج الاشاعات إني خطيبة مشاري بعرس أبرار (بعصبية أكثر) وش هذا ؟؟؟ ... كيف وليــــه ؟؟؟ .. (بدت نبرة صوتها تضعف)ليه يصير كذا ؟؟؟ ... ليه جدي يسوي فيني كذا ليــــــه ؟؟؟ ...
بدت تبكي وتصيييح من قلب : ليه جدي يسوي فيني كذا ؟؟؟ ... خلاص ما يصلح !! ... قلت له ما يصلح .. ما أبي ما أبي (وبدت نوبة بكاء مريرة) ...
جات بدور وقعدت جنبها وحطت يدها على كتفها تحاول تواسيها : امجاد تكفين لا تضيقين خلقك .. وبعدين لا تصيحين خبري فيك قوية !!! ...(بنبرة ضعف) ترا والله بأبكي الحين !! ...
أمجاد دفنت وجهها بيدينها وقعدت تصيح من قلب ... كله ولا هالموقف التافه اللي حطوها اهلها فيه !!! ...
.
.
.
راكان وهو جاي من عند الرجال يكلم أمه : خلاص درت ؟؟؟ ...
أم ناصر بضيق : إيـــــــه درت .. وبعدين ليه انتوا مهتمين مره كذا ؟؟؟ ... كل شوي جاي تسألني درت ولا لأ ؟؟ ...
راكان بنبرة عميقة : يمه لا تنسين إنها بنتي !!! ...
ام ناصر سكتت : ... أدري يا يمه ... والله ماشي مضيق خلقي وماسكني عنهم إلا إنهم بناتك !! ..
راكان يحب راس أمه : تسلمين يا الغاليـــــــــــة !!! ...
أم ناصر وهي تستفسر : هاه جاو ناس واجد ؟؟؟ ...
راكان : هو بقى فيـــــه أحد ؟؟؟ ... كلن جــــــا !! ....
ام ناصر بفرح : احسن عشان الناس كلها تدري ...
ابتسم راكان لأمه ... وبعدها راح للمجلس ...

إلا تروح ام ناصر تشيك على المطبخ وتشوف ناقص شي .. مع إنهم جايبين لهم قهوجي والعشاء من برا بالكامل .. يعني مافيه حتى نقطة شغل !!! ... بس راحت تبي تشوف يمكن نسو الرجال شي منا ولا منا !!! ... عندها احساس الحماس وتبي تفرغه بأي شي !!! ...

إلا دخلت امجاد عليها المطبخ ...
أمجاد والدموع مليانة بعيونها : كيف ياجده ترضين لي هالخطبة اللي كذا ؟؟؟ ...
ام ناصر لفت عليها : وش فيها خطوبتك ... بسم الله عليك انخطبتي من احسن الناس .. وش قاصرك ومنكد عيشتك ألحين ؟؟؟ ...
أمجاد وهي مقهورة : قولي والله !!! ... اضعف الإيمان إنك تقولين لي اليوم .. يوم اسألك بالعصر وش السالفة تقولين لي (بقهر تقولها) بيجون رجال لجدك !!! ...
أم ناصر : وانا ماكذبت ؟؟؟ ... هذا الصدق ... بس مابي تعورني لي راسي ...
امجاد : بس هذا مو من حقكم !!! ....
وبعدها تركتها ام ناصر وراحت ... امجاد انقهرت منها ... ودها لو يجيها تهج !! .. وتترك لهم البيت ...
طلعت شافت ام ناصر مش موجودة تحت ... راحت وقعدت بالصالة تنتظر يجي أبوها ولا جدها تتفاهم معهم !!! ... تذكر دقت على ابوها كم مره ما يرد ... اكييييد إنه عارف إنها معارضة !!! .. بس ماتدري ليه ما لقت غير الدموع مرسى لها ... تفرغ الحزن اللي داخلها ... الله ياخذك يا مشاري دامك حولت حياتي عذاب !!! ...

***

بالمجلس عند الرجال ... كان مشاري حاسس بخيبتها !! .. وكان حاسس بكرهها العميق له !! .. وصلت له إشارات كثيرة بأنها ماتبيه !!! ... رفضت تشوفه !! ... ماحللت للحين !! .. وما تملكنا للحين !! ... تذكر يوم سأل اخته لجين ...
لجين متوترة وهي تتذكر كلام امها لها : مشاري من جد ما ادري ؟؟؟ ...
مشاري بتأكيد في عيونه : أمجاد رافضتني وانا داري !!! ... بس لجين تكلمي !! ...
لجين وهي تعطيه ظهرها وتقعد على اللاب وهي متوترة : قلت لك .. البنت اظن عادي عندها ..
مشاري يلفها عليه وبعيونه اصرار خوفها : لجين تكلمي ...
لجين بكت : قلت ما ادري ... والله من زمان عنهم ... صح انا توني شايفتهم بس علاقتنا تغيرت .. تكفى مشاري طلبتك ... لا تدخلني تكفى !!! ...(وقعدت تبكي)
انتبه على صوت ابوه يرجعه للواقع وهو يمدح فيه : ولدي إن شاء الله بيخلص جامعته هالسنه و بإذن اللي عيونه ماتنام بنشوف بعدها وش بيصير ...
ابو زياد راكان بثقة وهو يكلم الرجال اللي سأل : والله الزواج الحين مأجل إلين ماتتحسن الظروف ... ومابه احد هنا غريب ... بنت وماخذه ولد عمها !!! ...
مشاري ابتسم ابتسامة بينت غمازته ... ولف على جهة الوليد وسلطان اللي كانوا يضحكون .. كان وده إنه يقعد معهم .. بس لأن الليلة ليلته !! ... لازم يقعد براس المجلس جنب ابوه وعمه والأهم جده ...
ابو ناصر وهو منكشح فرحا : الله يتمم لنا على عيالنا بالخير بهالزواج !!! ...
الوليد يكلم سلطان : تصدق .. مشاري يستاهل الزواج ...
سلطان يضحك : ما شاء الله الولد يقول يبي الحلال (يضحك بأعلى) والله وفره له ..
الوليد لف عليه قعد يضحك : وانت صادق ... وعلى نياتكم ترزقون !!! ..
فجأة خطرت فكرة في راس مشاري .. ماتوانى لحظه في إنه ينفذها .. ويمكن هالخصلة ورثها من جدها !!! ...
بعد ما لف واستأذن من جده قام من المجلس !!! ...
.
.
......... : أقولك وين ماما ام ناصـــــر ؟؟؟ ...
الشغالة بارتباك : ماما ام ناصر فوق ...
مشاري وهو يأكد : طيب وين أمجاد ؟؟؟؟ ...
الشغالة مرتبكة مره ورايح فكرها لشي بعيد : ما فيه معلوم ؟؟؟ ...
مشاري وهو يقرب منها ويهمس لها بنبرة غضب باردة : امشي قدامي وشوفي وينها ؟؟؟ ...
الشغالة خافت وقامت تمشي ... تذكر بدور اختها خاف لا يلقاها ...
مشاري يوقف الشغالة : وين بدور ؟؟؟ ...
الشغالة وهي نظراتها تبين مدى خوفها وهي تعدل حجابها : بدور مع ماما ام ناصر فوق !!! ..
مشاري وهو يتنهد بارتياح : حلو كذا ... امشي لـ عند امجاد وخليها تنزل وقولي لها بابا ابو ناصر تحت !!! ...
الشغالة : مافيه أكذب انا ؟؟؟ ...
إلا يسمعون صوت ينادي الشغالة ...
مشاري بانتباه : مين هذي ؟؟؟ ...
الشغاله : هذا ... امجاد !!! ...
مشاري تنهد بارتياح وهو يشوفها جايتها برجولها !!! ... شكرا لك يارب !!! ...
دخلت امجاد للسيب اللي واقفة فيه الشغالة ومشاري ...
امجاد واللي توها انتبهت لمشاري ... شهقت وبغت تتراجع لورا !!! ...
مشاري بنبرة صوت عميقه لها معاني : امجـــــاد لحظه !! ...
أمجاد وهي تتراجع خطوة ورا ... وفاتحه عيونها متخرعه منه !!! ... مين هذا ؟؟؟ ... توه يستوعب عقلها إن هذا مشاري ...
امجاد شافته وبعيونها آثار دموع : توك تجي يا مشاري !!! ...
مشاري وهو يطالعها .. ويشوف هالجمال اللي واضح .. رغم الألم والدموع ... ورغم الاهمال كانت لابسه بيجاما حمرا غامقه قطنية شتوية ذات ازارير من قدام !!! ...
مشاري يقولها بحنية وهو مبهور فيها : وانتي رضيتي تقابليني ؟؟؟ ...
أمجاد وهي تطالعه كان كاشخ : مبسوط ؟؟؟ ...
مشاري وهو ما يدري وش يجاوب : وليه منتي مهتمه للموضوع ؟؟؟ ...
أمجاد وهي تصيح : وش عليك اكيد داري من زمان ... وانا توني داريه !!! ... هل تتوقع من العدل للي قاعد يصير ؟؟؟ ...
مشاري وهو يطالعها ويتفحص ملامحها : يكون بمعلومك مو انا اللي بآخذ وحده غصبن عنها ..
أمجاد تطالعها تنتظره يكمل : ..........................
مشاري يبرر له موقفه : جدي قال الخطوبة على الملأ كلهم ... ومارضيت إنه احد يقول ولد عمها ردها !!!! ...
امجاد باعتراض : أنا ...
يقاطعها مشاري بجدية : انتي بنت عمي ... ومهما يكون مابأرضى عليك بكلمة ... حتى لو كنتي عايشة كل حياتك بعيده عنا وماتعرفيني ...
أمجاد حست إنها انخرست ... امجاد تكلمي ... هذا مشاري جاك برجوله !!! ... قولي له إنك ماتبينه ... قولي ... تكلمي !!! ... محد معاكم !! ....
إلا يدق جوال مشاري ويروح ويتركها ... هي طالعت بالشغالة اللي كانت واقفة وتسجل الكلام مشالله عليها ريكوردر !!! .... وبالنهايه حتى هي انسحبت تاركه دموعها منسابه !!! ....
.
.
.
وبعد ما رجع مشاري ... وقعد بمكانه ... إلا يدق جواله مره ثانيه .. شف الرقم كان نفسه .. الوليد .. ياربي وش يبي هذا ؟؟؟ ... رد عليه ...
مشاري وهو يطالع الوليد : نعم ...
الوليد بابتسامه : ينعم عليك ... إلا وين رحت ؟؟؟ ...
مشاري وهو يطالع فيه صك الجوال ورجعه بجيبه .... ضحك الوليد ومعه سلطان ...
.
.
.
أمجاد وهي بغرفتها تصيح .. جاتها بدور بعد ما كانت مع جدتها تحاول تتناقش معها ...
امجاد وهي تصيح كلمتها بدور وهي شايفه اختها تصيح أكثر من قبل شوي ...
بدور وهي مخترعه : أمجاد وش فيك ؟؟؟ ...
أمجاد وهي تصيح : شفته يا بدور ... شفته وماقدرت اتكلم !!! ...
بدور وهي على بالها جدها : وش قلتي لجدي ؟؟؟ ... عسى ..
قاطعتها امجاد ... وهي تصيح : انا شفت مشاري !!! ...
بدور وهي متفاجأة : هاه .. شفتي مشـ .. مشاري !! .. كيف ؟؟ .. وشلون ؟؟ ووش قلتي له ؟؟؟
وقالت لها امجاد إنها نزلت تبي تشرب لها ماي ... إلا تلقاه قدامها ... وقالت لها كل شي ...
بدور وهي ما تدري وش تقول : امجاد والله مدري وش اقولك ؟؟؟ ...
.
.
.
على الســاعه 12 بالليل وبعد ما سرو الناس لبيوتهم وانتهى العشا ... راحت امجاد وسوت اللي براسها ...
بدور تطالعها وهي تلم ثيابها : امجاد اقعدي وين رايحه ؟؟؟ ...
امجاد وهي تحط ملابسها واغراضها بالشنطة : بروح وين ؟؟؟ (تلف على اختها) بروح بيت ابوي !!! ...
بدور وهي منقهره منها : تروحين عند رحابوووه ؟؟؟ ...
أمجاد وهي تحط قمصانها والبناطلين في الشنطة : قصدك اروح عند ابوي ... (مقهورة) مو مخلي جدي يتحكم فيني إلا لأني عايشه عنده ويبي يفتك مني !!! ...
....... : مين قالك إني بأفتك منك ؟؟؟ ..
لفت إلا تشوف جدها وراها ...
امجاد وهي تمسح دموعها بظهر كفها : بروح بيت ابوي يا جدي ...
ابو ناصر وهو متفاجأ : وهذا بيتك ؟؟؟ ...
أمجاد ودموعها تنزل : بيتي !!! ... واليوم اول خطوة في التقليعه من هذا البيت ...
ام ناصر من ورا زوجها : امجاد وش فيك ؟؟؟ ...
امجاد وهي تصك الشنطة وتنزلها من على السرير : بروح مع ابوي ...
بدور وهي مقهورة منها وجرت الشنطة : أمجاد بلا استهبال ...
امجاد بضيق : بدور ماني طايقة حتى نفسي ... بتجين معي تعالي .. بتقعدين كيفك !!! ...
بدور وهي متفاجأة من اختها : مجنونة !!! ...
امجاد : مجنونة .. مهبولة ... (بثقة مهزوزة) بيت ابوي هو الأولى فيني !!! ...
بدور تذكرها : و رحاب !!! ...
أمجاد وكأنها بتدخل حرب : إذا كان لها الثلث !!! .. فأنا لي الثلثين !!! ...
ونزلت لأبوها اللي تفاجأ لمن شافها ...
راكان وهو متفاجأ : هلا والله بامجاد ... تو مابتنور الدار ؟؟؟ ...
أمجاد وهي تصيح : هذا الكلام من قلبك ولا تسكتني !!! ...
راكان ضمها من على جنب وهو من جد مستغرب بس مابين لها : وش دعوة هلا ببكري !! ..
وقال لأبوه إنها بتروح معه ... وبالفعل لبست عباتها وطلعت من بيت جدها غير مأسوف عليه وعلى أصحابه ... وبعد ما طلعت أمجاد ... انتبهت بدور إنها بحاله ألحين بالبيت !!! ... أمجاد راحت وتركتني !!! ...


***


دخل بيتهم كان الجو هادي !!! ... طالع الساعه كانت 2 بالليل !! ... راح شاف امه تكلم تليفون ..
ام الوليد وهي تبتسم لها : والله احنا بخير ...
راح الوليد وقعد جنبها ...
أم الوليد وهي تطالعه : تسلمين يا عمري .. مع السلامة ... يوصل إن شاء الله .. مع السلامة ..
الوليد وهو يشوف أمه تصك التليفون : اخبارك يمه ؟؟؟ ...
ام الوليد وهي باقي تطالع بالتليفون : الحمدلله ...
الوليد وهو يحط المفتاح بجيبه : من كنتي تكلمين ؟؟؟ ...
ام الوليد بابتسامة : هذي أبرار توها بتسافر ... تروح لشهر العسل ...
الوليد وهو يطالعها بنظرة : النذلة ابرار ... ولاكلمتني !! ...
ام الوليد : وليه ما تكلمها انت ؟؟؟ ...
الوليد وهو يطالع أمه باستغراب : وانتي ليه ما عطتيني اياها اكلمها اول ما دخلت ؟؟؟ ..
ام الوليد تضحك :نسيت ...
الوليد يضحك :طيب وش عندك مانمتي للحين ؟؟ ..
ام الوليد بأرق : ماجاني نوم ؟؟؟ ...
الوليد : عشان ابرار ؟؟؟ ...
ام الوليد بابتسامة حزينة : تقريبا ...
الوليد وهو يسمع جواله يرن ... : وش فيك يمه أنا موجود (وغمز لها) ..
ام الوليد عصبت : وش مستفيده منك يا حسرة ؟؟؟ ... يومك كله داج برا ... مابأستغرب لو تعيش بسيارتك !! ...
الوليد مات ضحك وهو يشوف امه : هههههههههههههه طيب أرد و أجيك ...
أم الوليد بقلق : تعال قلي عن الخطوبة اليوم وش صار فيها ؟؟؟..
الوليد آشر لأمه إنها تنتظره ...
الوليد يرد وهو يبعد عن أمه : هلا بعيوني ... وينك ؟؟؟ .... تسأليني أنا ويني ؟؟؟ ... ويني بعد كنت بخطوبة ولد خالي !!! ... ياعمري عليك ... الفال لك إن شاء الله تعرسين وازفك لزوجك ههههههههههههههههه !!! ....
ما تطمنت أم الوليــــــد لـ الوليد واتصالاته ... متأكده إنها لـ للجنس الناعم !!! ... بس مو واثقة !!! ..

مممممممممم ذالحين خلصت من تنزيل الاجزاء المنزلة وبمشى مع الكاتبة اذا نزلت نزلت عالطووووووووووول



بس اذا صاااااااااار كذا مافية ولا رد ماراح انزل شي

ويـــــــن الردود ياحلويــــــن

لعيوووووووون ناااااس غالين بنزل هالجزء اللي نزلتة الكاتبة بس والله اخر مرة اذا ماشفت ردود << تهديد ههههههه





[