كاتب الموضوع :
دموع يتيمة
المنتدى :
الارشيف
[الجزء الثالث]
[البارت الثاني]
بعدها بكم يوم...
جــاء الوليد و سلطان يزورون أبو ناصر وأم ناصــر...
بالخيمة<<<<مكانهم الوحيد خخخ...
الوليد:شخبارك يا جده؟؟؟...
أم ناصر بإبتسامة بشوفتهم:بخـــير الله يسلم حالك...
سلطان(واللي كان عادي يكشف على ام ناصر ومعتبرها مثل عمته)...
سلطان:والله يا ام ناصر من زمان ما شفتك فقلت لهالمصطول خل نمر عليك...
الوليد يطالع بسلطان بإستغراب:مصطول؟؟؟...لا ياجده يضحك عليك هو اللي لصق فيني يبيك لمن عرف إني جاي أزورك...
أم ناصر تبتسم:فديت سلطان داريه عنه...واصل..مهوب مشاري الزفت لا يسأل..
سلطان بإبتسامة رضا:يا جعلني ما خلا من أم ناصر...
أم ناصر وهي تصب القهوة...
سلطان وهو ياخذ الدلة منها يتميلح:عنك يا أم ناصــر...لا تتعبين عمرك...
أم ناصر:تسلم يا ولدي...(تكلم الوليد)إلا شخبار أختك أبرار مع خطيبها؟؟؟...
الوليد يطالع سلطان:جده الله يهداك لا تقولين أسماء بناتنا قدام الأغراب...
ضحك سلطان بخبث وهو يمد القهوة للوليد...
أم ناصر:وش فيك على سلطان...تراه مننا...
سلطان بدفاع وكأنه طفل:وهي صادقه أنا منكم...
أم ناصر تكلم سلطان:إلا شخبار اختك فاتن يا سلطان وش مسويه؟؟؟..عاد زواجها مابقى عليه شي؟؟؟..
سلطان يطالع الوليد اللي كان يضحك يعني اقتصيت منك:اختي تمام...
و رجعوا فيها كانهم أطفال توهم ببداية مراهقتهم..يعني عيب الواحد يقول اسم اخته....
أم ناصر: بلغ سلامي لأمك الخايسة اللي ما عاد شفناها من شهر..
سلطان يعقد حواجبه:الله يهداك أمي خايسة؟؟؟..على الأقل احترمي وجودي وإني ولدها..
ضحك الوليد عليه...
أم ناصر تضحك:وش فيك يا سلطان؟؟؟..أمزح معك وأنا امك...
سلطان يضحك ويشرب قهوته:الله يهداك هذا مزح؟؟؟...
الوليد يكلم سلطان بضحك:عاد جدتي في المزح ولا صعيدي...تعطيك على الجامد..
ضحك سلطان...وضحك معه الوليد...
أم ناصر واللي ماعجبها كلام الوليد:أقول يا الوليد لو تسكت يكون احسن لنا كلنا...
أم ناصر تلف على سلطان:أنت للحين بالجامعه؟؟؟؟...
سلطان يفتح عيونه ويطالعها بحذر:لا إن شاء الله هذا آخر سنه لي...
أم ناصر:عيب عليك...تراك صرت شايب وللحين ماتخرجت...
سلطان:وين شايب الله يهداك وعمري ماوصل لـ25 سنة...
أم ناصر بإستنكار:لك تدرس في هالجامعه 7سنوات...وش ذا؟؟؟...
الوليد يتطنز:والله ولا تقول الأخ دارس طب؟؟؟...
سلطان يرجع شماغه على ورى وكأنه يصرّف الموضوع:ياخي وش تبي؟؟؟...
الوليد:لي متخرج وأنا معك بالدراسه 3 سنين...ياخي استح على وجهك...
سلطان:بلا مقارنة...أنت أكبر مني يا الوليد...
الوليد يطالعه بسخريه:اكبر منك انا يا حبيب ماما بأربع شهور بس...
سلطان:المهم أكبر مني...
الوليد:عيب عليك ياخي...أنت ألحين قاعد تدرس مع بزارين...أصغر منك بكثير..
سلطان يطالع بأم ناصر اللي كانت تناظر باهتمام:خلاص ياخي لفها..
ضحك الوليد من تعابير وجه سلطان...
ويلف سلطان على ام ناصر:أقول يا عمه وين عمي أبو ناصر ماشفته؟؟؟..
أم ناصر:من صلى العصر ما رجع..أكيد راح يسلم على أحد...
سلطان:خســـاره والله كان ودي بشوفته...
كان سلطان(25 سنه)مملوح بس اللي يميزه طوله الفارع وشخصيته الحلوة ودمه مره خفيف..
أما الوليـــد (25سنه)فكان أملح من سلطان بس سلطان أطول منه ورهيب وشخصيته شوي شريرة...
.
.
.
كانت بدور تطالع من الزجاج العاكس من الدور الثاني على الحوش كان الزجاج العاكس تشوف اللي برى بس من دون مايشوفونها بالنهار اما بالليل فهو العكس..
أمجاد طالعه ومعها قوطي بيبسي تشربه:وش عندك مرتزه هنا؟؟؟...
بدور وهي تطالع:امجاد تعالي شوفي من هذول اللي واقفين مع جدتي؟؟؟..
أمجاد تقرب منها وتطل..شافت جدتها واقفه ومعها اثنين شباب واقفين يكلمونها مبين من هيئتهم إنهم بيطلعون...
أمجاد تخمن:اممممم شكلهم عيال عيالها...
بدور تطالع اختها وهي فاتحة عيونها على الآخر:يعني عيال عمنا؟؟؟...
امجاد وهي تطالع فيهم برى وتتمعن فيهم:ايــه..بس شوفي جدتي كيف معهم؟؟..
بدور وهي تطالع جدتها بغيض:معهم الضحكه شاقه الوجه..
أمجاد:وانتي صادقه..شوفي كيف عيونها مهوب مبينه من كبر الإبتسامة.. مهوب احنا تقولين لمن تشوفنا يركبها ستمية عفريت..
بدور وهي تضحك من تعليق امجاد:والله صدقتي يا أمجاد.(وترجع تطالع فيه برا) شوفي هذاك المملوح كيف جدتي معه؟؟؟<<<تقصد الوليــد...
أمجاد تطالع فيهم:مين تقصدين؟؟...القصير؟؟؟..
بدور وهي تبتسم:هو مهوب قصير...بس بلاك هذاك الطويله الهبيلة معه...
أمجاد تضحك:ههههههههه لا والله بالعكس هذاك طوله حلووو مره..وهذاك طوله عادي..بس الطويل مو حلو نفس العادي..
بدور وهي تشوف سلطان ميت ضحك:من جد دايم الطوال مهابيل شوفي كيف يضحك...
أمجاد تتطنز:الله يرجه هالبعيـــر....لو طاح من يشيله..
بدور اللي ماتت ضحك:هههههههاايي حلوة بعير...
امجاد تبتسم وهي تشرب البيبسي:أحس لو يسمعني والله ليذبحني... بس بيني وبينك حلو طوله..(بحزن)يذكرني بطول عبدالعزيز بس احس عبد العزيز اطول منه شوي
بدور وهي تحاول تمنع طهور حزن بدى يتسرب للأفق:طيب من تتوقعينهم؟؟؟...
أمجاد:مين؟؟؟(وتأشر على الشباب)تقصدين هذول؟؟؟...
بدور تهز رأسه بإيـــه...
أمجاد وهي تحط أصبعها على فمها المصكر بطريقة إنها تخمن...
امجاد:امممم الطويل فهد ولد عمي...والثاني أتوقع إنه أخوه اللي اصغر منه ناسيه وش اسمه يا مشعل يا مشاري اللي هو؟؟؟..
بدور وكأنها مو متقنعه بكلام أمجاد:لالا فهد اللي أعرفه شايب وهذول باقي شباب..
أمجاد:أجل الطويل ما ادري...والثاني المملوح أتوقع ولد عمي مشاري او مشعل...
بدور صكت الستارة...لمن شافت الشباب طلعوا..وجدتها داخله البيت داخل..أما امجاد فسحبت بدور ونزلت تحت..
بدور:وين رايحه؟؟؟..
أمجاد:خل نعرف من هم؟؟؟...أبي اعرف توقعاتي صح ولا خطأ؟؟؟؟...
نزلوا ولقوا جدتهم توها قاعده بالصالة..راحوا وقعدوا على جنب شافتهم جدتهم وناظرتهم بنظرة ازدراء بس هم ضحكوا صاروا يتسلون بحركات جدتهم..وبعد مرور فترة صمت ماهيب قصيرة..أمجاد فيها تشرب البيبسي وبدور تراقب الأجواء..استغربوا لمن جدتهم طلعت نظارة طبية مبين منها إنها نظارة قراءة وقعدت تقلب بالكتب القديمة اللي كانت بالمكتبة..استغربوا لأنهم توقعوا إنها اميه لا تقرى ولا تكتب..ما قدروا إنهم يعلقون غير كلمة(أحـــلى يا المثقفة!)..
امجاد تبي تكلم جدتها:أقول جده كان هنا فيه رجال صح؟؟؟...
ناظرتها جدتها من تحت النظارة ورجعت تطالع بالكتاب...
أمجاد واللقافة اشتغلت:طيب من كانوا هنا؟؟؟....
أم ناصر بعصبية ومبين إنها زعلانة:وش دخلك...لك وجه تحكين أنتي وأختك؟؟؟..
بدور تتدخل:وش دخلني انا ألحين؟؟؟..
أم ناصر بعصبية وهي تصك الكتاب من يدها:والكنبة اللي سحبيتها من فوق على كيفك؟؟..والأبجورة اللي سرقتيها أنتي وأختك؟؟؟...
أمجاد وهي تحبس ضحكتها:رجــاء جده لا تقولين سرقنا...ترفقي شوي فينا..
أم ناصر:اترفق بعينك ان شالله...على بالكم هذا بيتكم تلعبون فيه على كيفكم؟؟؟...
بدور بعصبية على دلع:يعني يرضيك أنام على الأرض وكل يوم أقوم وظهري متكسر؟؟؟....
أم ناصر بإصرار:ايه يرضيني..تستاهلين أكثر...
بدور تبي تحر جدتها:أجل يحق لي آخذها...
ام ناصر بعصبية:بترجعينها يا بديّر...بترجعينها ورجولك فوق رقبتك..
بدور بعناد وبدلال تبي تقهر جدتها:ما راح أرجعها إلا لمن تجيبين لي سرير...
أم ناصر تضحك بسخرية:ههه ضحكتيني يا بدير...سرير بعينك ماتستاهلين أحد يتعنى لك ويجيب لك سرير...
أمجاد تبي تغير الموضوع:جده..صدق من اللي كان هنا؟؟؟...
ام ناصر تبي تقهرهم:اللي كان هنا عيوني الثنتين..أعز اثنين على قلبي..الله يخليهم ياليتهم بدالكم يــــا..ولا خليني أسكت أحسن..
بدور اللي انقهرت:تكلمي وخذي راحتك يا جدتي طلعي اللي بصدرك علينا...
أمجاد وهي تبي تعرف من هذولا وماهمها كلام جدتها عنهم:طيب من هم؟؟؟...
ام ناصر:يعني يهمك يا امجاد تعرفين؟؟؟...
امجاد وهي تحس بالحرج قعدت ترقع الموضوع:لا بس أبي أعرف من اللي يصيرون عيوني جدتي؟؟..<<<ترقيعه محترمة خخخ
ام ناصر بفخر:هذا الوليد الله يحفظه...وسلطان يابعد قلبي ولد صديق ابوناصر...
بدور بإزدراء:وولد من هذا سلطان يا حظي؟؟؟...بينا قرابة؟؟؟...
أم ناصر واللي ماتتقبل كلمة من بدور:لا مابينا قرابة وأنتي وش دخلك يا السوسه..
بدور تبي تقهر جدتها:اجل ليه كاشفه عليه..وداخله جو معه تضحكين وهو مهوب من محارمك ولا عيالك..ترى حرااام اللي قاعده تسوينه..
ام ناصر بعصبيه:وأنتي قاعده تراقبيني يا ام الشر؟؟؟؟...
بدور بعصبيه:لأ...ليه وش قالولك أنا؟؟؟...بس شفتك بالغلط من فوق؟؟؟..
أم ناصر بإصرار الشياب:إلا اكيد إنك قاعده تجسسين علي أنا وعيالي..
امجاد وهي تقطع كلام جدتها:خلاص يا جده هدي...ماله داعي كل اللي قاعدين تقولينه...
بدور بدلع:أصلا مالت عليهم من رجاجيل...يحومون الكبد من جد...
أم ناصر:والله إنهم يسوونك انتي وأختك...
امجاد بدهشة:وش دخلني الحين قاعده تسبيني؟؟؟؟....
بدور بترفع:أصلا هم مايسوون شعره من شعري(وهي تمسك خصلة من شعرها بغنج)....
أمجاد مع أختها:ايه والله من هم؟؟؟...استغفر الله خلي أسكت وما أحش لا أكسب ذنب على ناس مايستاهلون...
ام ناصر انقهرت من أمجاد:ليه مهوب عاجبينك يا أمجاد؟؟؟..(بشراسة)ولا محد يملى عينك من بعد عبد العزيز؟؟؟؟...
أمجاد تطالع جدتها وهي مفتحه عيونها على الآخـر؟؟...أول مره تجيب جدتها لها طاري عبد العزيز؟؟...ما تحملت امجاد على عبد العزيز...
امجاد بربكة واضحة فيها:وش دخل عبد العزيز الحيــن؟؟؟؟...
ام ناصر وكأنها انتصرت عليها:حبيب قلبك أنتي وأمك بعد من؟؟؟...
أمجاد وهي تهز رجلها بتوتر وتخربط:أتوقع إنه ذا ماله دخل في ذا؟؟؟...
طنشتها أم ناصر لمن حست نفسها منتصرة عليهم...وبعدين رجعت فتحت الكتاب اللي بيدها وقعدت تقلب صفحاته بحماس...أما أمجاد قعدت تشرب باقي البيبسي بتوتر واضح بغت تقوم بس حست إنها بتبين لجدتها إنها محرجه مرررره...ففضلت القعدة أما بدور فقامت من بعدها وهي تتأفف وطلعت لحجرتها فوق....
بعدها شغلت أمجاد التفزيون وقعدت تتفرج عشان تغير جو ومع إنها تفر بالمحطات لكن بالها مع عبد العزيز!!..عبد العزيز هو غاب عشان جدتها تقعد تذكرها فيه؟؟؟ وليه تقارنها فيهم؟؟؟..وهي تفر حطت على قناة العربية وهي ماتحس بأي شي من حولها انقطاع تام عن العالم الخارجي...وما حست إلا بصوت جدتها تناديها
أم ناصر وهي مركزة على التلفزيون:أمجاد...وش مكتوب على الشريط الأحمر تحت بالتلفزيون؟؟؟
فتحت عيون أمجاد وقعدت تقرا وهي مستغربة:اشتباكات بين الجيش الإسرائيلي وبين حماس في القدس(وبعدها لفت على جدتها مستغربه)جدتي أنتي ماتقرين؟؟؟..
أم ناصر بغير اهتمام:أنا؟؟؟...وش يعرفني بالقرايه؟؟؟؟...
أمجاد وهي فاتحه عيونها وبفمها ضحكه ماسكتها:طيب ليه الكتاب بيدك ونظارات القراءة ما دامك ماتقرين؟؟؟؟...
أم ناصر بابتسامه وتناست الهواش اللي قبل شوي:لا بس أتفرج على الصور..و النظارة عشان أناظر زين تعرفين النظر مو لذاك الزود...
هنا انفجرت أمجاد تضحك بصوت عالي ملى أنحـــاء البيت...
***
بيت أبو الوليـــد..
أم الوليــد تسولف مع بنتها:والله حالة بنات اخوي ماهيب عاجبتني...
أبرار بقهر:مين! أمجاد وبدور...احسن يستاهلون..
أم الوليد بغيض: من اللي يستاهلون؟؟؟..أبرار عيب عليك...
أبرار بامتعاض:يمه هم اللي شايفين أنفسهم...وشفتيهم هذاك اليوم كيف خشومهم بالسقف!...
أم الوليد:ولو..لا عاد أسمعك تقولين كذا...بعدين هم مساكين يعني اللي فيهم مكفيهم..
أبرار:مساكين؟؟؟.... جدتي ذاك اليوم تقول إنهم سكاكين مهوب مساكين...
أم الوليد:الله يهداها أمي...لأنهم بنات نادية قعدت تكرههم كذا... وما فكرت لحظة إنهم يصيرون بنات أخوي...يعني احفادها مننا وفينا...عايلتهم احنا...
أبرار:طيب ليه تكرههم؟؟؟...
أم الوليد بحزن:عشان مشاكلها من زمان مع نادية أمهم..كانت نادية شخصيتها قوية وما تحب الغلط..وكانت أمي شديدة..وكان هذا الشي مسبب تنافر بينهم..عكس مرة أخوي ناصر أبو فهد مرته طيبه ومسالمة وإن قالت لها أمي شيء يكدر الخاطر أو أي شي تسكت وما ترد..مثل آخر مره تجمعنا عندها لمن قالت أم فهد إنه بنات اخوي اللي فيهم مكفيهم..قامت أمي بوجهها بس كانت الحرمه حكيمه وما ردت على أمي عكس لو كانت نادية كانت بترد عليها الكلمة بكلمتين...
أبرار:طيب وش دخل هذا بطلاق وكره جدتي لنادية مرة خالي القديمة؟؟؟...
أم الوليد:كانت أي مشاكل تصير بينهم يدخلون أخوي راكان أبو زياد فيها تجي امي تشكي من مرته من ناحيه...وتجي نادية تشتكي من جور أمي لها... وكان ضايع بينهم بين حبه لنادية مرته...و أمي..المهم كانت المشاكل تكبر بينهم..إلين وصلت لطريق مسدود..في النهاية هربت نادية من أخوي وطلبت الطلاق..حاول أخوي معها بس للأسف كانت مصممه على رايها...وطلقها وهو دايس على قلبه كرهها وكرهتها امي أكثر(هو يحصل لنادية مثل أخوي؟)وبعدها وبأقل من 3 شهور زوج أبوي أخوي من مرته رحاب..رحاب اللي كانت توها متخرجة من الجامعة وكانت مجبورة تتزوج من أخوي واللي اجبرها أبوها..كانت مجبورة وانصدمت من الواقع إنه اخوي مهوب قادر ينسى نادية زوجته الأولانية..وصدمها أكثر ببداية زوجها إنه قالها إنها مستحيل توصل لمكانة نادية بقلبه...
ابرار بصدمة:الله؟؟؟؟ قالها خالي راكان هالكلام؟؟؟؟...
أم الوليد بقهر:تخيلي؟؟..قالها واذكر إني انا اللي تدخلت واصلحت بينهم ببداية زواج رحاب كانت مشاكلها مع اخوي انا اللي احلها بس بعدين بدو يحلونها بعيدين عني بصراحة أنا فرحت...لأني حسيت إنهم بدو ينسجمون مع بعض..بس اتضح إنهم بدو حياة آلية..مافيها أي مشاعر..بس بعدين قالت لي أم فهد إنه صارت حياتهم أحسن من أول بكثير..بس مشكلة رحاب مع أخوي إنها ماهيب قادرة تفهمه..ولا هو بعد فاهمها..بس ألحين أحسن من اول بكثير..
أبرار:طيب ليه نادية تطلقت؟؟؟...
أم الوليد:غرورها..وكبريائها..ما خلتها تتحمل عيشتها مع أهلي..و بعدين عشان عيشة أخوها معها ماكانت أمي راضيه فيها وناديه قالت أخوي يتيم وماله مكان إلا عندي...تهاوشوا بعدها أخذت نادية أخوها وهربت منهم..وشرت لها بيت لها هي ووياه..
أبرار:طيب أنتي راضية باللي صار أمجاد وفصخ ملكتها؟؟؟..
أم الوليد بحزن: ويشهد علي ربي إني ماني راضية...كان خلو البنت تتزوج والله يستر عليها...
أبرار:وآنتي صادقة يمه...
قعدت تفكر أبرار بخالها و بطليقته نادية...بس اللي أكثر من هذا كله... قعدت تفكر بأمجاد و بدور... ليه هالكره بينهم؟؟؟...وليه شوفة النفس هذي اللي مالها داعي...
***
الساعه 8 الليل...
قعدت تناظر نفسها بالمراية وهي بكامل أناقتها..طالعت شوي بالميك آب حقها وزادت من قوة الروج بشفايفها بعدها طالعت نفسها بإبتسامة رضا..واتجهت للكمبيوتر وشبكت فيه السماعات الكبيرة اللي شاريتها لهذي الخنبقة حقتها وشغلت الطقاقات(أفضل مطربين عندها هع) وحمام جانا مسيان..بهاللحظه تنفش شعرها..وقعدت تردح(هوايتها المفضلة)..تردح بحماس وتطق أصبع و تطيح هز بعدها مع أغنية يا مستجيب الداعي بصوت الطقاقات اللي أفضل عندها ألف مره من صوت محمد عبده...
مر اخوها من جنب غرفتها وسمع هالعرس اللي مسويته بغرفتها قعد يتعوذ من ابليس منها ومن زيرانها بعدها دق الباب بقوة...
بندر يتطنز: ياسمين ياحلـــــــــوة...
وهي أبد...لا تزال تحيي حفلتها!!...
بندر بقوة أكثر يدق الباب ويعلي صوته:يــاسمــــين يا البقــــــرة...
وما وعى إلا هي فاتحه الباب بقوة وتسندت عليه وقالت بعصبية...
ياسمين معقدة حواجبها:كم مره قلت لك يا البثر لا عاد تقولي يا البقرة...
بندر وهو يطالعها بإستغراب:قلنا يا حلوة ما رديتي...بس لمن قلنا يا بقرة على طول رديتي...
ياسمين بتكشيرة:اخلص علي وش تبي مع هالخشة..
بندر يطالعها بإستغراب:ألحين أبي اعرف وش عندك كاشخه(بإستفسار) فيه احد بيجي ولا بعد ما تخلصين من احياء حفلتك الخاصة بتروحين لأحد؟؟؟..
ياسمين:لاني رايحه مكان..ولا احد بيجيني...يعني لازم الواحد لمن يكون كاشخ لازم يكون عنده شي؟؟؟...
بندر يتطنز:آه عرفت...آنتي قاعده تحضرينهم ألحين بهالعرس اللي مسويته...
ياسمين وهي تحط يدها على خصرها:أحضرهم بعينك...
بندر يضحك:عاد أنتي وياهم عيش وملح كل يوم محضرتهم..على فكرة تراك تسوين فيهم آجر لمن تجمعيهم وتفرحينهم شوي..المشكلة آنتي تجمعينهم من هنا بالأعراس اللي تسوينها لهم و بعدها تبلشينا فيهم...
ياسمين بعصبية:لو سمحت انقلع...ولا تدري انا الغلطانة لمن قاعده معك للحين...
وقامت تبي تصك الباب بوجه أخوها بندر إلا يمسكه بقوة ويقول بعصبية...
بندر بعصبية بس بمزح:عيب تصكين الباب بوجهي..أنا اخوك الكبير..
ياسمين بسخريه:أخوي الكبير..أقول روح مناك أكبر مني بسنة وغاثني بهالسنة والله بعض الأحيان احس إني أكبر منك...
بندر:ولو عمري الحين 23 سنه يعني بقى 7 سنين ويصير عمري 30...يعني كبير غصب عنك...
ياسمين:اووووه منك وراحت تبي تصك الباب...
إلا يكلمها بندر بمزح:أقول يا ياسمين لقيت لك وظيفة...
ياسمين لفت عليه:لا تشيل همي يا قلب أمك..روح القى لنفسك وظيفة أول..وخلني اول أتخرج من الجامعه اللي باقي لي فيها سنتين وبعدين تعال دور لي...
بندر يضحك:لا عادي وأنتي تدرسين..لقيت لك وظيفة تحمين الطيران للطقاقات بالزواجات..
ناظرته بحقد اخته وقامت صكت الباب بقوة وهو ميت ضحك..اما هي فميته قهر وما لقت إلا تعلي الصوت أكثر...قلعته هالبثر ابو دم ثقيل..ورجعت تقدم لوحتها الراقصه اللي ما اسرع مانست اللي صار واندمجت بالرقص قدام مرايتها الحبيبة...
ودقي يا مـــزيــــكــــا؟؟؟!!!!!....
.
.
بعدها بساعة مر عبدالعزيز على بيت عمه أبو خالد..مر على عمه يسلم عليه..و لأنه يبيه بموضوع ضروري..ولمن كان داخل صدفه شاف خالد توه جاي..وبعد السلام...
عبد العزيز وهو داخل مع خالد:أقول وش عنده أبوك؟؟؟...
خالد يهز كتوفه: ما ادري..لا تستعجل كلها دقايق وتعرف...
ابتسم عبد العزيز...ودخل وهو بالحوش دق جواله وقف وقعد يكلم أما خالد لمن شافه يكلم تركه ودخل داخـل للمجلس و شغل التلفزيون على الرياضيه يشوف وش آخر اخبار ناديه (النصــر) اللي له سنين ماخذى بطولة!...
.
.
ياسمين كانت طالبة من المطعم وتنتظر طلبها بعد مانزلت من عرسها اللي مسويته ..شافتها ام خالد..
أم خالد:وش عندك قاعده هنا؟؟؟...
ياسمين:طالبه من المطعم...وأنتظر الطلب...
أم خالد بعصبيه:ومن مين استأذنتي؟؟؟...
ياسمين بدفاع:من ابوي...وقالي على كيفك...
أم خالد بحذر:لا تطلعين تاخذين طلبك بحالك...خلي الشغالة تطلع معك..أو اخوك يستلمه بدالك...
ياسمين بملل من هالإسطوانة كل ماطلبت من المطعم:اوكيشن مامي..
أم خالد تطالع بنتها من فوق لتحت:أنتي لازم تلعبين بعمرك كذا كل ما رقصتي؟؟..
ياسمين تضحك:عشان تنفتح نفسي وأنا أناظر شكلي وأنا أردح...
أم خالد وهي رايحة المطبخ:طيب انتبهي ترى ولد عمك عبد العزيز بيجي...
ياسمين باهتمام:ليه وين هو؟؟؟...
أم خالد:يا البقرة...باقي ما جاء...بس هو جاي..
ياسمين بامتعاض:يوووووووه وش فيكم ماسكه معكم اليوم بقرة؟؟؟..
ما ردت أم خالد وراحت وهي تبتسم من كلام بنتها...
وماهي إلا لحظات ويدق الجرس..ضحكت ياسمين وهي تركض اكيد المطعم..وهي تركض قعدت تتحسس جيب بنطلونها الجينز الضيق بوجود الفلوس.. طلعت من الباب الرئيسي وهي على بالها عبد العزيز ماجاء باقي..وهي تركض ما انتبهت لوجود عبد العزيز وهو يكلم جوال وحتى هو ما انتبه لها الا لمن سمع صوت خطواتها وهي تراكض قريب منه..لف وهو على باله بندر أو خالد..وما شاف إلا آنثى بكامل اناقتها الشبابيه تركض من عنده وهي مهيب منتبه..ما احتاجت المسالة لتفكير أكيــد إنها ((((ياسمين!!))))
ياسمين بعد ما وصلت لبوابتهم الكبيرة وقبل ما تفتح الباب وقفت شوي وعبد العزيز ما حب يطالعها فغض طرفه عنها...اما ياسمين وهي واقفة قعدت تفكر وتتكلم بصوت واطي...
ياسمين:يوووه صدق إني مطيورة...ليه ما رديت من داخل من على الباب؟؟؟...لا يكون بس عبد العزيز ولد عمي؟؟؟...
بعدها سندت نفسها على الباب وقالت بصوت عالي وكل هذا عبد العزيز يسمعها وهو مبتسم غصب عنه..دمها خفيف..
ياسمين بصوت عالي:من على الباب؟؟؟...
وجاها الرد إنه المطعم..ارتاحت وهي تحط يدها على صدرها وقالت بصوت عالي (أشـــوى!!!)...
ياسمين وهي تاخذ الطلب:كم الحساب؟؟؟..
العامل الفلبيني:56 ريال مدام...
ياسمين وهي صاده عنه:مدام بعينك إن شالله...قول آنسه..وشو 56 ريال؟؟؟ اقول خذ مامعي إلا خمسين وانثبر..
العامل بعصبيه:كلاس...خد فلوس إنتا وجيب طلب...
ياسمين بعصبيه:والله مارجعته وانا ميته جوع...طيب انتظر لحظه بأجيب 6 ريال وأجيك يا القعيطي...
العامل:شوف إنتا بيت كبير...كيف مافيه فلوس؟؟؟...
ياسمين تتعوذ منه:قل أعوذ برب الفلق...حاسدنا على بيتنا...وش قالوا لك فاتحينها صدقه جاريه فلوسنا...
العامل الفلبيني مقهور:اوووه إنتا ليش بخيل؟؟؟...
ياسمين:بخيله في عينك إن شالله..ألحين باجيب لك بخشيش زيادة..داريه من البداية إنك تبي فلوس زيادة مالت عليك وعلى صباح اللي دالتني عليكم تقول إنتوا مطعكم مافيه أحسن منه..و مالت علي أنا بعد معكم اللي مصدقتها الخبلة...
كان عبد العزيز يبي يمر من البداية لازم يقابلها..خصوصا إنه دخل بالحديقه وهو يكلم وبعد عن الممر الرئيسي المؤدي للبوابة..وهو لمن بيروح للمجلس لازم يطلع على الممر اللي واقفه عند البوابة الرئيسيه ياسمين..وكان يضحك من كلامها وما انتبه إلا على صوت ياسمين وهي تكلم العامل..
ياسمين:انتظر لحظة بأجيب لك باقي الفلوس وبأرجع...
وهو شايفها رايحه...راح للعامل اللي ينتظر برى وكمله باقي الفلوس وعطاه زيادة عشان لمن سمع إن ياسمين بتزيد للعامل...
العامل يبتسم:شكرا...إنت كويس مافيه سمسم مثل مدام بخيل...
ضحك عبد العزيز:طيب و لا تطولها وهي قصيرة...
وهو يكلم العامل إلا تجيه ياسمين من ورى وهي على بالها إنه خالد مع إنه عبد العزيز أطول واعرض من خالد بس كان بينهم شبه من بعيد..وهي على بالها إنه يحاسب عنها...
ياسمين تضحك:شوف مو على بالك مكمل الستة ريال بتآكل معي أنت ومرتك مشاعل الدبة اللي ماتشبع..روح اطلبوا لكم مطاعم الرياض وش كثرها ولا انتظر ولد عمك يجي وكل معه..عاد امي مسويه جريش بتفرحون فيه...
عبد العزيز وهو يمشي من عندها وعيونه على الآرض ومبتسم..
عبد العزيز غاض عنها وبفمه ابتسامه:عليك بالعافيه مانيب مآكل معك..
حست ياسمين بمثل اللي انصفقت كف.. ومو أي كف؟؟؟... تحس إنه شعرها وقف مثل أشواك القنفذ... ياويلييييييييي هذا عبد العزيز؟؟؟؟؟؟....وش أسوي؟؟؟؟؟؟؟؟...وش اللي هببته أنا ألحين؟؟؟..وكيف هذااااا يصييييييييييييير؟؟؟....
وقعدت تناظر نفسها وهي متكشخه...لاااااااااااااااااااااااا.....وش هالموقف السخييييييييييييييييييييييف؟؟؟...قعدت متجمده مكانها..إلين ماسمعت صوت باب مجلس الرجال الداخلي يتصكر دليل إنه عبد العزيز دخل...ركضت على طول داخل لا يشوفها أحد واقفه بمكان ماله دااااااعي...وياحلاااااااااااااااااوه حاسب عني بعد هذا اللي كاااااااااااااان قاااااااااااااااااااصررررر!!!!!!...
.
.
دخل عبد العزيز المجلس وهو يضحك...من جد نكته هالبنت...
خالد:وش فيك متأخر؟؟؟....ياخي كل هذي مكالمة...
عبد العزيز يضحك باقي من ياسمين:تقدر تقول مكالمة مهمة...
خالد:المهم اليوم مباراة النصر مع الإتحاد...
عبد العزيز يضحك:أجل الإتحاد بيفوز عليكم...
خالد:أعوذ بالله تفاول علينا بشي زين...
عبد العزيز بطنازة:اهم شي انتبهوا لا تنزلون الدرجة الأولى..اهم شي قعدتكم بالممتاز..وإنكم تفوزون على الإتحاد قويه حدكم تفوزون على الخليج أو أحد..
خالد: عبد العزيز...اقول لا يكثر بس...
ضحك عبد العزيز من شكل ولد عمه...يا حليله نصراوي متعصب...
.
.
قعدت تاكل ياسمين من أكلها وهي متوترة..يافشيلتي..يا فشيلتي من ولد عمي..وش بيقول عني؟؟..أكيد قعيطيه؟؟؟...اكيد مجنونة؟؟؟...اكيد ميته عليه؟؟؟...
أم خالد بعصبيه:ياسمين كم مره قلت لك لا تستلمين الطلب لحالك؟؟؟...
ياسمين تطالع أمها:آسفه يمه آخر مره...
أم خالد: آخر مره بعينك يا ياسمين...كم مره نبهتك...
ياسمين:خلاص يمه الله يهداك...إذا كل هذا عشان تبين تاكلين معي الله يحييك...
ام خالد بقرف من غباء بنتها:لو أبي آكل بآكل...بس ماتخافين يسرقك العامل؟؟؟..
تذمرت ياسمين من خوف امها الزايد عليها...
ياسمين:لا تخافين علي...محد مشلحني من عند الباب...تراني بنت رجاجيل...
ام خالد بتحذير:ما تسمعين بالمصايب اللي تصير...
ياسمين:لا تقولين سالفة كنتاكي لأني اغتثيت منها لو إنها أكل كان زوعته...
أم خالد:يا قليلة الأدب احترمي النعمة اللي قدامك..
ياسمين تضحك وهي تشوف مشاعل مرة خالد جايه لهم:هلا مشمش تبين تاكلين..
مشاعل وهي تقعد:لا الحمدلله..بآكل من جريش خالتي..
ياسمين تضحك:على طاري الجريش..تصدقين إن صباح تاكله مع مايونيز..
أم خالد ومشاعل بقرف: مايونيز؟؟؟؟....يعععععععع الله يعز النعمة...
ياسمين تضحك:والمصيبة تحط بعد معهم عسل؟؟؟؟....
أم خالد متقرفه حدها:عسل؟؟..الله يقرفها هالـ صباح مالقت إلا عسل ومايونيز..
مشاعل مستغربة:من جدك تتكلمين ولا تمزحيـــــن؟؟؟....
ياسمين تضحك وهي تأشر على التليفون:دقوا عليها إذا ما انتوا مصدقين...
أم خالد وهي مو متخيلة الطعم كيف جريش مع مايونيز وعسل؟؟؟؟...
أم خالد:بنت عمك ماهيب صاحيه... من قصت شعرها قصت مخها معه...
قعدت تضحك ياسمين...بس من داخل كانت للحين متفشلة من عبد العزيز... يا فشيلتي...ياريت ربي خذاني قبل لا يصير اللي يصير..أو...ياليت كانت صباح بدالي؟؟!!..
.
.
بعد العشـــاء بالمجلس...
أبو خالد:وأنا قلت لك أول يا عبد العزيز عشان اشوف رايك؟؟؟...
عبد العزيز وهو منحرج من كلام عمه..يخطب له بنت عمه؟؟؟...صعبه مره؟؟؟..
عبد العزيز وهو يطالع خالد اللي كان ساكت ومنصدم من الموضوع..
عبد العزيز باحراج واول مره يبان عليه..لدرجة إنه يطالع بالأرض وبعدها طالع بعمه يكلمه..لأنه من الإحترام يكلم عمه وهو يناظر فيه دليل اهتمامه بالموضوع..
عبد العزيز:بنت عمي والله أعتبرها مثل أختي..وعمري مافكرت فيها زوجة...
أبو خالد وهو مو مقتنع بكلام عبد العزيز:صباح بنت عمك مهيب اختك..فيه فرق..
عبد العزيز يرفض الموضوع:صباح كبرت وأنا أعاملها على أساس اختي الصغيرة
أبو خالد:بس مهيب اختك..ولمن بتخطبها بتتغير نظرتك هذي لها..
عبد العزيز يبتسم بسخريه:ياعمي الله يعزك ما بخطبها ولو كنت أبيها كان قلت لك..
أبو خالد بغيض:ليه مهيب معجبتك بعد خطيبتك الأولانيه؟؟؟..
انصفق وجه خالد من كلام ابوه..وش قاعد يخربط أبوي..يعرفه لا عصب يقعد يقط بالكلام يمين ويسار..طالع بولد عمه عبد العزيز وشافه يضحك؟؟؟..استغرب من ردة فعله..توقع يحمق..أو يتضايق..بس طلع العكس..
عبد العزيز يضحك:الله يهداك انا شفت صباح عشان احكم بينهم؟؟؟...
ابو خالد:والله لو يسمعك عمك ابو محمد ليزعل ليه مايبي بنتي؟؟؟...
عبد العزيز اللي كان ماخذ الأمور بأريحيه:وانت الصادق ليه ما خطبت لي بنتك ياسمين يا عمي لو تبي؟؟؟؟...
خالد ما بقى شوي وإلا ينفجر..
خالد عصب من كلام عبد العزيز:ليه إن شالله يا أخ عبد العزيز..شايفنا نحرّج على بناتنا؟؟؟...
عبد العزيز يهدي خالد بإبتسامه:أنا مابرضاها على بنات عمي..وهد يا خالد ترى الموضوع ما يستاهل...
أبو خالد واللي ماخذ الأمور بشكل جدي:لو لك خاطر بـ ياسمين اخطبها يا ولد اخوي وما تلقى بابنا مصكر؟؟؟..
عبد العزيز:يا عمي لو كان لي خاطر ببنات عماني كان خذيت منهم بس والله هم بحسبة خواتي..وعمري مافكرت بوحده منهم كزوجة..
خالد معصب:و أصلا حد عطاك خبر إنهم يبونك؟؟؟...حتى هم مايبونك؟؟؟..
عبد العزيز اللي قلب الموضوع جد:انا مافتحت الموضوع...عمي اللي فتحه وقلت الصدق...ولا الصدق هالأيام يزعل يا ولد عمي؟؟؟...
أبو خالد:خالد خلاص اركد..وأنت يا عبد العزيز كيفك أنا قلت لك وانت براحتك..
كانت لهجة ابو خالد مبينه إنه زعلان..ومعصب..وموصله معه...تنكد عبد العزيز من قلب على اللي صاير..بس هم اضطروه يقول كذا..يعني مستحيل يجامل عمه على حساب حياته الخاصه..وبعدين هم اللي فاتحين الموضوع معه!!..
عبد العزيز يجس نبض عمه:لا يكون زعلت مني؟؟؟..
أبو خالد يناظر التلفزيون وهو معصب:لا مانيب زعلان...
خالد قام وهو طالع لحقه عبد العزيز...
بالسيب اللي عند المجلس...
عبد العزيز صرخ: خـــالــد...
لف خالد عليه...
خالد معقد حواجبه:نعــــم...
عبد العزيز عقد حواجبه الثاني وبلهجه مستنكرة:لا تقول لي إنت بعد زعلان؟؟؟...
خالد يرفع حواجبه:مانيب زعلان..ارتاح يا عبد العزيز...
عبد العزيز يرجع شماغه وراه ويتكتف:والله؟؟؟..مانت زعلان؟؟..ماتشوف خشتك وعيونك كيف تطالعني..على العموم بأقولك تراني ماغلطت..وأبوك هو اللي فتح الموضوع معي.. وكنت موجود وما أتوقع إني غلطت لمن قلت ما أبي صباح...
خالد وهو ينفجر: أبوي كلمك عن صباح( وبلهجه كلها غيض) مو أختي..فمالك داعي لمن تتكلم عنها..
عبد العزيز بعصبيه وهو يضيق زوايا عيونه:أنا قلت كذا عشان يحس أبوك بإحساس عمي ابو محمد إنه لا يقعد يكلمني عن صباح وينسى ياسمين؟؟..
خالد بعصبيه:ابوي كان يبي مصلحتك..وماله داعي تتكلم عن ياسمين وبالنهايه تقول ما تبيها...
عبد العزيز:الله يجزاه خير عمي إذا يبي لي الخير بس قلت له هذا الكلام عشان يعرف لو إنه بأغير رايي بأخطب اختك..بس الموضوع انتهى...
خالد معصب وهو يتنفس بعصبيه: مع هذا كله ما يحق لك تتكلم عن أختي...
وبهاللحظه يطلع أبو خالد من المجلس...وهو اللي سامع نقاشهم كله اللي كان واصله بالراحه لأن صوتهم عالي..
أبو خالد يكلم خالد:..خالد...ترى عبد العزيز ولد عمك ومننا وما اتوقع إنه غلط...
عبد العزيز يطالع ولد عمه:على العموم استأذن...
وبعدها طلع عبد العزيز...
ابو خالد يكلم خالد بعصبيه: ما توقعت عقلك صغير كذا...
خالد مقهور: ما شفته كيف يتكلم؟؟؟... من جد يقهر...
ابو خالد يطالع ولده: عبد العزيز كان يقصد بكلامه إنه ما يبي بنت عمه وماله داعي أجبره عليها...
خالد بغيض:ما أجبرته انت...بس اقترحت عليه..
ابو خالد يبتسم بسخريه:خلك ذيب يا ولدي..افهم الرجاجيل بنظرة ماله داعي اشرح لك..
ابو خالد يكمل لمن شاف ولده يطالعه يكمل الباقي..
أبو خالد:عبد العزيز وقف علي من البداية..يعني زي مايبيني اجبره على بنت عمه صباح مجامله لعمه..حطني بموقف اخوي ابو محمد يعني بأرضى اجبر ياسمين ازوجها من واحد مايبيها مجاملة؟؟؟...
وصلت الإشارة لمخ خالد...وفهم قصد عبدالعزيز...
ابو خالد يناظر خالد ولده: عبد العزيز ماخلى من اخوي حامد الله يرحمه شي..من شكله إلى افعاله إلى مرجلته...(ويفتح عيونه بشدة) واعتبر عيال عمك اخوانك ولا تقعد حساس من ناحية اهلك منهم...لأنهم اشد خوف عليهم منك...
***
دخلت وقعدت تطالع عيالها وتفاجأت باللي تشوفه...
أم فهد تصرخ: مشاري يا الخبل من جدك تتصارع مع أختك؟؟؟...
مشاري اللي كان ماسك أخته لجين مع يدينها ورى..وبيده الثانيه ماسك شعرها...
مشاري يضحك بمكر: وش فيك يمه...قاعد ألعب معها؟؟؟...
لجين وبعيونها دموع:يمااااااه خليه يفكني...
أم فهد واللي تمسك الشبشب بعد ما فصخته:مشاري يا العله فكها حسبي الله عليك...
مشاري وهو يطالع وجه أخته:يا حليلها..تستاهل أحد قالها تخرب جهاز الدي في دي..
لجين بعناد:كيفي بفلوس أبوي..مهوب بفلوسك..
وما انتبه مشاري إلا الشبشب مار من عند وجهه..وقعد يناظر أمه إلا هي تلقط شبشبها الثاني وتبي ترميه...فك أخته وقعد يضحك...
مشاري وهو يهرب من أمه:الحمدلله إنه التصويب عندك ماش...ولاكان راحت عيوني فيها...
أم فهد بغيض:كيفها تخرب الجهاز...تحرقه...تنقعه بمويه...أنت وش دخلك؟؟؟..
مشاري واللي يتكلم بشي ثاني:نصيحه أخويه إذا بتصوبين ركزي على هدفك..
لجين:عليك فيه يمه..الحمدلله والشكر شنبات على الفاضي..والله إني اولى فيهم منك..
وما خلصت لجين جملتها إلا تصك شبشب أم فهد فيها...وتصرخ بقوة آآآآآآآآآآآآآآي
أم فهد:وجع ياللي ما تستحين وش هالكلام؟؟؟...
وما تحس لجين إلا بشريط فيديو صاك فيها وتناظر إلا مشاري... ومالقت وسيلة غير تهج لغرفتها فوووووق بعد هالقصف الجوي المسلح من أخوها وأمها مع بعض
مشاري بعصبيه:والله لأوريك يا السريلانكيه..كلمتك ماهيب معديه بالساهل..
وكان بيلحقها..بس حلفت عليه أمه إنه يخليها..ودواها عندها..
كان دايم يعايرون لجين بالسريلانكية بسبب نحافتها الشديده وسمارها..مع إنه كان حلو لأنه لون واحد بلون بيوت الطين القديمة..بس كانت مثل(العيره) لها..وطبعها الشين هو إنها صاحبة لسان طويل(مثل اختها لمياء) بس أخلاقها حلوة..عمرها 17سنه وهي تدرس ثاني ثانوي علمي...
***
اليوم اللي بعده دق خالد على عبدالعزيز يعتذر له عن اللي صار بينهم باليوم اللي قلبه...
خالد:والله يا عبدالعزيز ما قصدي شي...
عبدالعزيز:لا ماصر شي...
خالد:لا بس امس يوم طلعت من عندنا كان شكلك زعلان..
عبدالعزيز:خلاص انتهى الموضوع يا خالد..
وبعدها قعدوا يتناقشون..وما صك خالد من عبدالعزيز إلا لمن تأكد إنه خلاص ما عاد بينهم شي..
***
|
01-07-08, 05:57 AM
جديد مواضيع قسم الارشيف
العرض العادي
