كاتب الموضوع :
دموع يتيمة
المنتدى :
الارشيف
السلام عليكم
اعذروني اني تأخرت عليكم لكن والله عذري معي الله يعيني ان شاء الله
الجزء الحادي عشر ]
[ البارت الأول ]
ليس للدهر سلطان على الحب!
ايفا شندلر))
هو من درى قامت شيطانه ولا عاد هجدت !! ... وركب راسه ستمية عفريت !! .. أنا سكت واحترمت شيباته و حفيدته أول !! .. بس والله ألحين مانيب ساكت له !!! ... استعصى عليه النوم ذيك الليله !! ..
و أول ما أذن الفجر .. على طول لبس ملابسه ... وطلع من بيتهم ... وهو عارف وين وجهته !! .. راح لـ ذاك المسجد عشان يصلي !! .. وبعدها يخلص شغله !! ...
طلع أبو ناصر من بيته قبيل الإقامه بشوي !! ... أول مره يتأخر كذا ... بس تذكر سوالف امجاد وبدور معاه ... تنفس الصعداء وهو يشوف أمجاد رجعت معهم ... واعجبت بالغرفه !! ... ما يدري ليه ارتاح لمن شافهم الثنتين عنده !! ... هم حفيداته !! ... هم مثل عياله بالضبط !! .. ما يدري ليه زاده الحنين لهم ... يمكن لأنه حس إنه مقصر عنهم !! ...تذكر فهد ولمياء ومشاري ولجين و الوليد و ابرار وزياد ... هذولا كلهم احفاده ... دوم عاشوا مع بعض وحس فيهم ويحبهم .. وممكن إنه ماقد صرح بذاك الحب إلا من يعرف ابو ناصر يعرف مقدار حبه العميق لأبنائه واحفاده !! ... أمجاد وبدور انحرموا من اهلهم ... وعاشوا مع ناس أغراب !! .. على الأقل بالنسبة له !! ...
صلوا الناس ... وبعدها انفض الكل لبيته ...
طلع ابوناصر من المسجد وهو رايح بيته مشي .. لأن بيته قريب .. سمع صوت احد يناديه .. لف وشاف عبدالعزيز .. عبدالعزيز !!! .... انصدم من وين جايه هذا ؟؟ ... وقف ابو ناصر يطالع بعبدالعزيز وهو جايه ... سلم عليه عبدالعزيز سلام سريع ... حس ابو ناصر إنه عبدالعزيز عنده شي ... ولا وش جايبه هنا يصلي .. وبيته بحي بعيد كثير من هنا !! .. ...
عبدالعزيز وهو واقف مع ابو ناصر : ألحين ماتقولي وش عندك ؟؟؟ ...
تفاجأ ابو ناصر من ذي اللهجه ... عبدالعزيز ماعمره تكلم معه كذا !! ...
ابو ناصر وهو يطالع فيه : وش عندك يا عبدالعزيز !! ...
عبدالعزيز وهو يتكلم بجديه : انت اللي وش عندك .. يومنك تخطب امجاد لولد عمها عشاني جيت كلمتك فيها ؟؟؟ ...
ابو ناصر تفاجأ لجرأة عبدالعزيز اولا .. وثانيا لأنه عرف!! .. ومن دون أي ربكه أجاب : مالك دخل في عايلتنا يا عبدالعزيز ؟؟؟ ...
عبدالعزيز وشياطينه مولعه : اقول ريحنا ... كل شوي عايلتنا وعايلتنا ؟؟؟ .... من متى انت اهتميت للموضوع ؟؟؟ ... وسالفة العناد مالها داعي يابو ناصر ؟؟؟ ...
ابو ناصر عصب : وش تقصد ؟؟؟ ... يعني بتاخذ البنت غصب عنا !! ...
عبدالعزيز وهو مضيق زوايا عيونه من العصبية: لا منيب ماخذها !! ... بس انت وش تحس فيه بالله وانت تغصبها على ولد عمها !! ...
ابو ناصر يبي يقهره : ماغصبتها على ولد عمها !!!... هي تبيه !! ...
عبدالعزيز بجديه : لا عاد تضحك علينا يابو ناصر .. ترا عيب اللي تسويه!! ..
عيب !!! ... عبدالعزيز يقولي عيب !! .. وانا كبر جده !! .. جاي ولد امس يعلمني العيب !!! ..
ابو ناصر بعصبيه وهو حاس بعرق في راسه ينط : يعني أنا اكذب !! ..
عبدالعزيز بقهر: والله محد يحب الجرجرة والمرمطه غيرك !! ... وما بأصدقك لأن امجاد كانت موافقة علي وانا داري !! ...
ابو ناصر هنا قامت شياطينه وانقهر إن عبدالعزيز يدري ويعرف إن أمجاد باقي تبيه !! ..
ابو ناصر : عبدالعزيز (بعصبيه وحب يقهره ) انت الحين ومسوي كل هذا عشاننا رفضناك !! ..
عبدالعزيز فتح عيونه وقال بجدية وبعيونه ألف نظرة احتقار و نظرة ازدراء و نظرة كبرياء !! : من زينكم نناسبكم !!! .. (هالكلمة صدعت براس ابوناصر وخلت عرق ينط براسه) .. انا كنت أبي اتزوجها هي ...(ونبرة صوته ارتفعت) وقلت بنفسي هذولا اهلها ربي ابتلاها فيهم لازم نتحملهم معها !!! ...
ابو ناصر و السكر مرتفع عنده : صدق إنك ما تستحي !! ..
عبدالعزيز بسخريه وتهكم كبير : الحيا تركناه للي يحشم الناس ... ( ويقوله بجدية اكثر وعصبيه أكبر ) بس تدري إني اكثر تحسفت عليه وشو (وطالع بعيون ابوناصر اللي تستشيط غيضاً) إني جبت اعمامي وأهلي اللي يسوون قبايل .. وجرجرتهم لناس ما (وسكت عبدالعزيز وماكمل ) ..
طالعه ابو ناصر بغيض والسكر والضغط مرتفع عنده : ناس وش فيهم ؟؟؟ ..
عبدالعزيز طالعه من فوق لتحت وقاله بعد ماحط عيونه بعيون ابوناصر: أنت أبخص بنفسك يابوناصر !! ..
أبو ناصر بقهر و غضب يزلزله على هالصبح : جايني على هالصبح عشان تقولي هالكلام يا ولد حامد !! ..
عبدالعزيز بعصبيه : إيه جاي اقولك إياه .. انا كنت بروح لولدك المحترم راكان .. بس انا متأكد إن الكل في يدك أنت !!! .. (بسخرية) وعيالك مالهم لا كلمة ولا راي !! ..
أبو ناصر يبي يتكلم يبي يقول العصبية معمية عينه وبصيرته فحب يجرح عبدالعزيز ..
ابو ناصر : اسمعني يا عبدالعزيز .. زواج محنا مزوجينك أبد .. و لا ترجع تحاول!! ..
عبدالعزيز انقهر ورد الله من هالشايب اللي يبي يفقع قلبه!! : انت اللي اسمعني .. انا بتزوج وقريب إن شاء الله .. انا بس جيت اقولك شغل البزران هذا .. واقهرك و مدري إيش !! ... ما يصلح !! .. عيب على رجال احفاده اطول منه يقول هالكلام !!! ...
ابو ناصر .. اللي يحس إنه بيطيح بجلطه من كلام عبدالعزيز من القهر ... الله ياخذه هالولد !! .. ما اقول كلمة إلا ويرد علي بعشر !! .. ما تعوق معه كلمة !! .. صدق إنه ما يستحي !! ..
بعدها لف عبدالعزيز يبي يروح ..
وكأنه تذكر شي ويبي يقوله.. فـ قال بسخريه بعد مارجع لأبو ناصر : انا متأكد إنه بعد كلامي هذا .. بأسمع بعد اسبوع زواجها على ولد عمها ذا !!! ...
وبعدها راح وركب سيارته و مشى .. وسط نظرات ابو ناصر الغاضبة والناقمة عليه ... راح لبيته وهو يحس إنه مايشوف من العصبية !!! ...
أما عبدالعزيز وهو رايح لبيتهم .. حس بأشياء كثير في نفسه خرجت .. أعوذ بالله من الشيطان .. وش خلاني اتهاوش مع ذا الشايب !! ...مو لو رحت لأبوها كان ابرك <<< شياطينه باقي ما ركدت !!! ..
تذكرها ... حس أشياء كثيرة تعقدت بروحته ... وحس بالحزن عليها أكثر من عليه !! ..
يا اجمل الحزن .. لدموعك سلام
من حبيبٍ ... بقى منه الكلام
وين انا منك .. غربني الزمان
وخانني النور ... وابعدني الظلام
لو بعزيك ... سالت دمعتي
تدري الدمع في حبك ... حرام
لو بواسيك ... مايكفي الهوى
ولو أبي ... عذر مايكفي الغرام
أعطنى من عذابك يا البعيد
صرخةٍ ... تجعل ظلوعي حطام
آه ...لو في يدي أبكي معاك
قطرةٍ مادرى عنها الغمام
***
دخل ابو ناصر بيته وهو معصب ... ومهوب شايف اللي قدامه من العصبيه ... سمع صوت امجاد وبدور في المطبخ .. وكأنهم يسولفون ويضحكون ...
دخل عليهم المطبخ وشافهم يحضرون الفطور .. لأن اليوم اول يوم دراسة بعد الإجازة .. وهم بيواصلون للجامعه !! .. شاف امجاد ماسكه براد الحليب بيدها تبي تحطه بالصينيه ...
امجاد بابتسامه : يله جدي الفطور جاهز ؟؟؟ ...
بدور وهي واقفه عند المايكرويف وتحمي الخبز : يله جدي !! .. (تبتسم) جهزنا الفطور وبأروح اقوم جدتي ...
ابو ناصر معصب : خلو عنكم ذا الفطور ... واسمعيني يا امجاد مشاري ولد عمك بتاخذينه وملكتكم بعد اسبوع !! ...
امجاد كانت متجمده وهي تسمع كلام جدها !! ... طالعته بعيون اختفى بريقها !! ... وتطالعه بصدمه !! ... وين كلامه معها امس بأنه ماراح يصير إلا اللي تبيه !! ... شكله كان يضحك علي!! .. أما بدور انصدمت وطالعت بأختها تترقب ردة فعلها !! ...
أمجاد تطالع جدها وبآليه تقوله : أكيييد تمزح !! ...
ابو ناصر بضيق : هالأمور مافيها مزح !! ... مشاري اليوم ولا بعد 10 سنين منتي ماخذه غيره !! ...
أمجاد وصوتها بدا يروح : طيب وكلامك أمس إنه ماراح يصير إلا اللي يرضيني ؟؟؟ ...
ابو ناصر وهو يتحكم بانفعالاته : مشاري محد بيرضيك غيره !! ...
أمجاد حطت البراد وطلعت من المطبخ تركض ... كانت دموعها تسابقها جدي حطمني باللي يسويه معي !! ...
بدور وهي منقهره : جدي احنا ما تفقنا كذا ؟؟؟ ...
ابو ناصر صرخ بوجهها : بدوور !!! ....
انكمشت بدور في ملابسها ... جدها رعب لي عصب !!! ... ينسى كل شي !! ...
بعدها طلعت بدور من عنده ... أما هو .. وهو معصب تذكر عبدالعزيز !! ... ماعاد إلا يجيني واحد كبر حفيدي فهد يحاسبني على أفعالي !! ... طالع بالمطبخ قدامه شافهم مجهزين الفطور !! ... تنكد على هاليوم اللي بيبدا بالمشاكل !! ...
رجعت صباح مرهقه من الجامعه على الظهر !! ... واول ما دخلت للبيت .. شافت بنت اخوها لمار قاعده تلعب بالصاله تفاجأت فيها ... راحت سلمت عليها .. وهي تدخل إلا تسمع صوت بالمجلس الداخلي .. راحت تستطلع شافت محمد اخوها و مرته اروى .. وابوها وامها ...
صباح وهي داخلها مبتسمه : هاااايات للحلوين !! ...
محمد يضحك : يعني بس تقصديني انا !! ...
صباح ضحكت : إييه بس انت يا المزيون ...
محمد يبتسم لأخته : يا حبي لها اختي تحب تحسسني إني حلو ...
راحت صباح وسلمت على ابوها وعلى امها واخوها و اروى ... بعدها راحت تقعد جنب ابوها ..
صباح وهي تمسك يد ابوها : اقول يا الغالي ...
ابو محمد يبتسم لها : آمري يا عيني ...
صباح ضحكت : تسلم لي عيونك الحلوة .. بغيت اقولك عن طلعة البر ...
ابو محمد بابتسامه : قولي اللي تبين يا صبوحتي ...
صباح : عادك عند كلامك عن اعذار الجامعه ...
ابو محمد تذكر : إييييه .. زين منك إنك ذكرتيني ...
صباح بابتسامه : اجل ياليت تخلص الاعذار بدري عشان يطمئن قلبي ...
ابو محمد وهو يضم بنته لجنبه : طمني قلبك الصغير !! ... لا تهتمين بهالسالفة أبد !!! ...
ام محمد مبتسمه : صباح ما بتخلص الجامعه إلا وقلبي منفقع منها !! ..
صباح ابتسمت لأمها وقالت لها : يا عين ابوي لا تشيلين همي .. بنتك قدها وقدود ...
ام محمد ماقدرت إلا تضحك من صباح تعرف تسكتها ..
اروى تكلم صباح : عاد شدي الهمه لطلعة البر ...
محمد تذكر وكلم ابوه : اقول يباه ...
ابو محمد : سم ..
محمد : سم الله عدوك !! ... بس حبيت إنه بطلعة البر يجون معنا انسابي لو بغيت !! ...
اروى اللي كانت تدري إنه اللي اقترح هالاقتراح عبدالعزيز !! .. ابتسمت ابتسامه ما قدر تخبيها ..
ابو محمد واللي انحرج من وجود اروى : هلا بأنسابك ... حياهم الله ...
صباح وهي تطالع بأروى : يا السووووسه انتي !!! ...
اروى تفاجأت : انا ...
صباح تضحك : إيه انتي ... بالله عليك ليه تجيبين اهلك .. عشان تروحين مع اختك !! .. وتتركيننا !! (ورفعت صباح حاجب يعني كشفتك )
اروى ضحكت : انقلعي .. والله مهوب انا اللي اقترحت هالاقتراح ابد ...
ام محمد تكلم صباح : صبوحتي قومي غيري ملابسك لأنو بنحضر الغداء الحين ...
قامت صباح من عندهم .. وراحت تغير ملابسها ... وبعدها نزلت لهم للغداء ... وتجمعوا الكل على الغداء وسط اجواء اسرية حميمة .. مع سوالف صباح عن الجامعة ... وكلام ابو محمد مع محمد عن طلعة البر .. وسوالف أم محمد واروى عن الأهل والأقارب !!! ..
***
هل هذه هي الوعود الزائفة !!
هل هذه الأماني التي تم تأميمها لها !!
هل هذا – كلام رجال – مثل ما يقولون !! ..
ما امداه يكمل 24 ساعة من كلامه إلا ويغيره !!
جدها اللي حست بملاطفته لها يوم كانت ببيت ابوها .. ليه يتغير ويغير كلامه !!!... أصلا لو ما قالت لها بدور عن راي خالتها منى بأنه أفضل لها بأنها ترجع بيت جدها ما كانت رجعت !! .. تأملت في الغرفة اللي شرتها بدور كانت أنيقة .. سريرين منفصلة !! .. لونها أبيض لؤلؤي سرير كان مرتفع .. وسرير كان منخفض عن سابقه بشكل رااايق .. والكومدينا المتوسطة بينهم كانت مستطيلة متوسطة الطول ما بين السريرين .. والدولاب نفس الفكرة شي طويل وشي أقصر بدون أبواب .. يعني كانت الاغراض مكشوفة .. والسجادة كان لونها أخضر تفاحي مموهة الاطراف .. والابجورة كانت عامود طويل لونه أخضر والأضاءة بأعلاه تنور بشكل رايق .. وبعض الأكسسورات الخطيرة على التسريحة اللي كانت بسيطة والمراية منفصلة عن القاعده مشكلة طاولة غير مرتبة اطوال الاضلاع !! ... كثير كان حلو شغل بدور ... منتي هينه والله يا بديّر !! ..
أمجاد ما كانت تعني لها هالغرفة أي شيء !! ... فيها حزن .. وفيها ألم ... وفيها قهر !! .. تعرف زين إنه لولا سالفة ارتباطها بمشاري .. كان قد صارت علاقتها بأهلها من أروع ما يكون .. والدليل تحسن علاقات بدور .. عسكها هي تماما !! ... قعدت تفكر وهي تقلب جوالها بيدها .. ومترددة تتصل بمشاري وهي اللي قد خزنت رقمه عندها !! ... متوترة !! .. ماتدري وش تقوله !! ... كانت تحاول تنتظر يمكن ما يصير شي !!! ... بس لو صار والله ما أسكت أبد !! .. تذكرت كلام مشاري يوم قالها اللي طلعك من بيت جدي بينتهي !! .. هو صدق ولا بعد يكذب الثاني مثل جدي !!! ...
دخلت عليها بدور وهي مبتسمة : أمجاد !! ..
أمجاد طالعتها بنظرة : خير !! ..
بدور وهي مبتسمة كانت باقي لابسه عباتها توها جايه من الجامعة عكس امجاد اللي عيت ما تدوام !! ...
بدور وهي ماسكة الباب : عندي لك مفاجأة ؟؟؟ ...
طالعتها أمجاد من دون نفس : وشهي ؟؟؟ ..
إلا ينفتح الباب وتشوف ملاك خويتها داخله ومعها سجى وهم يضحكون ... وااااااو وش هالمفاجأة !! ..
أمجاد قامت وهي مو مصدقة : ملاااااك !!! ... وسجوي !! ...
سلمت عليهم وخمتهم ... وبعد السلام الحار والعناق ... قعدوا سوالف وضحك ..
ملاك : يا الخايسة ليه ما دوامتي اليوم ؟؟ ...
أمجاد بابتسامة من دون معنى : تعرفين اكشنات جدي اللي ما تخلص !! ...
ضحكت سجى وهي تشوف بدور مدخلة لهم الغداء اللي جايبنه من ماك !! ...
أمجاد قعدت تضحك وتأشر على الغدا اللي بيد بدور : وش هذا ؟؟؟ ..
بدور وهي تضحك : لا تحطين ببالك إنه لك لا حبيبتي هذا عشان ملوكه وسجى !! ..
سجى المفهيه واللي كانت تتأمل الغرفة : واااااااااااااااو ذوقك يا بدور راااايق ...
ملاك وهي تطالع : من جد جد خطيييييييره !! ...
بدور وهي ترز عمرها : احم احم انا بدور مو حي الله !! ..
ملاك تضحك بعد ما تذكرت الموقف : فاااتك يا امجاد قبل شوي ؟؟؟ ..
امجاد واللي من جد انبسطت بجية خوياتها : وشو ؟؟؟ ..
ملاك تضحك وهي تفصخ عباتها : شفت جدتك ؟؟ ورحت سلمت عليها قعدت تسأليني إني انا خويتك قلت لها إيه .. (وقطت عباتها على السرير وجلست عليه) تخيلي تقولي زين إنك جيتي عشان تذاكرين لأمجاد لأنها اليوم ما دوامت تعبانة ههههههههههههه على بالها إني ما ادري !! ..
بدور تضحك وهي تاكل لها من البطاطس : صدق وتجيك ملوكه الخبلة وتطلع رواية جايبتها معها وتقول إيه انا جاية اشرح لها هالكتاب هههههههههههههههه .. وجدتي تقولها مشكورة يا بنتي ..
سجى تضحك : بدور قولي وش قالت لملاك هههههههههه حسيت اختي مصرية ..
بدور ماتت ضحك وحتى ملاك قالت بدور : يوم جات ملاك بتطلع فوق معنا قالت لها جدتي كم بتاخذين على الحصة ميتين ريال مو زين هههههههههههههههههههههههههه ..
ملاك تضحك : اما جدتك يا إنها عفوية ودمها خفيف ههههههههه ماني مصدقة إنها هي اللي تقولون سوالفها !! ..
بدور وهي تضحك : باقي هتلر ما شفتيه !! ...
سجى وهي تقعد جنب بدور : قطع يا بدور انتظرينا شوي !! ...
أمجاد تضحك : من جد بدور المشفوحة !! .. انتظرينا ..
ملاك تضحك : يعني بتاكلين ..
أمجاد وهي تقرب معهم و تضحك : أكيييد على بالك يعني بسوي حركات اضراب معكم !! ..
وقعدوا البنات سوالف وضحك .. وبعدها بساعتين طلعوا ... كانت جيتهم شي يرد الروح .. وش أحلى من إن يكون الانسان بقمة حزنه ويظن إنه وحيد .. فجأة يشوف اخوانه واصدقاه حوله .. يحاولون يبينون له إننا معك .. ينتشلونه من براثن الحزن .. ويبعدونه عن الهموم .. ليرى السعاده تبحر من أعينهم لعينيه .. وليرى أنهم معه .. يسعدونه .. ويسعدهم .. يظلون سوا .. مهما كان فيهم حد فرحان .. وأحد زعلان .. لازم اللمة الحلوة تجمعهم .. ومن الأشياء اللي لا تقدر بثمن هي الخل الوفي .. فإذا انحرمنا من الحبيب .. فالله لا يحرمنا من الخل الوفي !! .. يظل شمعة أمل لنا في الحياة !! ..
كان مشاري راجع من الجامعه بعد صلاة العصر ... شافه ابوه وناداه ... استأذن منه مشاري إنه يروح يبدل ملابسه ويجيه ... وبعد ما طلع ..
أم فهد تكلم زوجها : ليه تبي تكلمه ألحين !!! ...
أبو فهد بجديه : إيه ...(بسخرية) أجل بكره !! ..
أم فهد انقهرت : لا يا ناصر مهوب الحين !! ..
لف عليها ابو فهد وهو مستغرب وقال بنبرة عصبية : اجل متى برايك يا سلوى !!! ..
ام فهد بتهكم : افجعه مثل اول مره وخل الولد يهج منا !!.. منت صاحي لو بتكلمه الحين !!..
قويه يا ام فهد !! ..
ابو فهد تكلم بعصبيه: ابوي يقول يبي الملكة بأسرع وقت .. يقول يبيها بعد أسبوع !! ..
ام فهد فتحت عيونها : انا داريه بس وش خلاه يفتح هالموضوع واحنا متفقين إنه يتأجل للصيف !! ..
أبو فهد قد قال السالفة لأم فهد .. بس مستغرب وشو اللي خلى ابوه يطالب تعجيل الملكة بهالسرعة !! .. ابو ناصر و درءً للمشاكل - اول مرة يسويها – ما قال لهم عن جية عبدالعزيز لأن السالفة بتكبر وبتدخلون فيها عياله .. وبيتدخلون فيها اعمام عبدالعزيز وبترجع تنفتح السالفة من جديد !! ... و عنده حي الله سالفة امجاد وعبدالعزيز بدت تنطمر من سوالف الناس !! ..
ابو فهد يكلم مرته باستغراب : حتى انا والله مدري ليه ولا حتى اخوي راكان !!! ..
ام فهد مستغربه : عمي فيه شي مو معقوله يقدم السالفة كذا !!! ...
.
.
بدل ملابسه مشاريه وهو طالع من غرفته شاف لجين طالعه من غرفتها ...
مشاري يطالع لجين : غربية منتي نايمه !! ..
لجين وهي تمد لسانها بمرح : وغربية انت ما نمت !! ..
مشاري ضحك : مدري توني جاي من الجامعة ولقيت ابوي يقولي تعال يبي يكلمني !! ..
لجين فتحت عيونها : وش عنده ؟؟ ..
مشاري وهو مرهق : ما ادري .. بروح اشوف وش عنده ؟؟؟ ..
لجين بابتسامه : ينفع اجي ؟؟؟ ..
مشاري يستهبل : حي الله سيرلانكا كلها مو بس انتي !! ..
لجين انقهرت : انقلعععع !!! ..
ضحك مشاري ونزل على الدرج ونزلت وراه لجين وهي بس تسبه وهو يضحك عليها ..
راح وجلس قبال ابوه .. وجلست جنبه لجين .. أشرت ام فهد لـ لجين تروح .. بس لجين كنها حست إن الموضوع يخص امجاد دام امها تدخلت ... ولفضولها طنشت امها أو بالأصح سوت نفسها ما تشوفها !! ...
ابو فهد واللي ما يعرف المقدمات – كعادة عايلتهم – وعلى طول حاول يدخل للموضوع بصفة لبقة !! ..
ابو فهد : مشاري وش رايك لو تقدم ملكتك على بنت عمك !! ..
ام فهد طارت عيونها بـ لجين : لجين قومي !! ..
ابو فهد سكت وما تكلم خصوصا بعد ما عرف بموقف بنته عن الملكة فحس وجودها ماله داعي ..
مشاري بهدوء : لا تقوم لجين ... خليها تقعد !! ..
ام فهد : بس ..
يقاطعها مشاري : يمه يا الغالية ... خلاص خليها تقعد هي اختي و لزوم تعرف ...
تنهدت ام فهد وهي تتوعد لجين بنظراتها ... بس لجين ضحكت لأنها هي انتصرت وقعدت ..
أبو فهد يكمل : هاه ما قلتي لي رايك ؟؟؟ ..
مشاري يطالع في ابوه : في ايش يباه الله يسلمك ؟؟؟ ...
أبو فهد : رايك في لو انك تقدم ملكتك على بنت عمك !! ...
مشاري ضحك : رجعنا على هالموضوع !! ... مو قلنا بالصيف نرجع نفتحه !! ..
ابو فهد بجدية : بس ابوي يقول ما يبي البنت معلقه كذا !! ... يعني لازم ملكة !!...
مشاري مستغرب : كيف معلقة والكل داري إنها خطيبتي !!! ..
ابو فهد : مشاري لازم تملك على بنت عمك !!! ..
مشاري بجدية : بس انا باقي ادرس !!! ...
ابو فهد وهو بدا يفقد اعصابه : كيف يعني !! .. مالها دخل دراستك بالملكة !! ..
مشاري انصدم من كلام ابوه ...
مشاري بجدية : يباه فهمني وش خلاكم تفتحون الموضوع واحنا متفقين إن الملكة بعدين !! ..
ابو فهد : ابوي يقول إن الملكة الحين افضل و الزواج بعدين !!!! ..
مشاري بسخرية : اخاف جدي يقولي بعدين يبي الزواج قبل الصيف !! .. والله حاله !! ..
ابو فهد : مشاري !!! ... كيف الحين وش رايك ؟؟؟ ...
مشاري يطالعه بنظرة : طيب والمطلوب مني ألحين !! ..
ابو فهد استغرب وطالع بمرته اللي ساكته وما تبي تتكلم أو تتدخل ...
ابو فهد يكلم مرته : سلوى ما تشوفين ولدك ؟؟؟ ..
مشاري يطالع بأمه : وش فيها أمي ؟؟..هذا انت يا يباه تقط الكلام وتخلي امي بوجه المدفع !!..
ام فهد ابتسمت لكلام ولدها : وانت صادق والله !! ..
أما لجين كانت متوترة من اللي تسمعه وخايفة !! ...
مشاري يتكلم : الحين يباه وش المطلوب مني !! ...
ابو فهد اندهش : مو انت المعرس ؟؟؟ ..
مشاري وهو موقف وبابتسامة واسعه – مرهقه - :حلو حلو .. زين انك اعترفت إني المعرس وكل شي بيدي ... خلاص انا بأروح اشوف الموضوع مع جدي بعدين!!! ...
وبعدها دخل ينام إلين صلاة المغرب ... اما لجين طلعت من عندهم وقلبها يضرب بشدة شكل علاقتك يا لجين خربت مع بنات عمك قبل لا تبتدي مضبوط !!! ...
أما ام فهد وابو فهد قعدوا يتناقشون في الموضوع يحاولون يوصلون لـ شي .. سواء من طلب ابو ناصر بتعجل الملكة وانتهاءً بردة فعل مشاري الغريبة !!! ...
***
مع طلعة الصباح .. وشروق الشمس .. كان هذا هو اليوم المنتظر لعايلة اهل عبدالعزيز لطلعة البر !! ... وخصوصا البنات اللي كانوا مره متحمسين لهالطلعة ... كانوا الشباب سابقينهم للمخيم .. ومضبطين الجو هناك ... وكانت اول السيارات اللي تحركت سيارة ابو خالد مع زوجته .. ومعهم تحرك خالد ولده ومرته مشاعل ... أما اهل عبدالعزيز فكلهم طلعوا مع عبدالله منى ومضاوي وحتى خديجة راحت معهم .. واهل بيت ابو صالح راحوا .. وبيت ابو فلاح اهل سديم بعد طلعوا ... أما عبدالعزيز فتأخر لأن كان عنده شغل بمكتبه .. واجل الروحه معه جلوي لأنه كان عنده محاظره لازم يعيطها الشباب بالجامعة ويخلص !! ...
الجو كان حلو وبارد ... مره رااايق و منعش ... وخصوصا مع الخضرة الجميلة بالصحراء ..
وكان المخيم حلو وفخم ... ومقسم على وحدات .. جزء للنساء .. وجزء للرجال .. وفيه مخيم للمطبخ .. ومخيم مخزن لهم .. ومخيم للنوم وللقعدة ... وجايبين معهم باث روم (الله يكرمكم) لوريال متنقل ونظيف .. عشان حريمهم يرتاحون وهم بعد ... وجايبين خدم وطباخ ومعهم سعودي عامل شخصي عندهم اسمه (فرحان) يقومون على خدمتهم ... وابو خالد ارسل قبلها بيوم بعض الابل والبعارين حقته .. لجل تسوي جو لهم .. والمكان المخيمين فيه كان موقع استراتيجي بمنطقة خضراء والجو روعة ..
ببيت ابو محمد ..
صباح وهي لابسه وخالصة : اووووفففف نبي نروح ترا طفشت ؟؟؟ ..
ياسمين واللي كانت نايمه عندهم من اليوم اللي قبله : اسكتي (بقهر) ليتني رحت مع اهلي ..
صباااح انقهرت : كلي تبن الحين بنمشي ..
وطلعت صباح من غرفتها وراحت تنزل تشوف اهلها .. فـ شافت أمها شافتها قاعده وتسولف بكل اريحيه مع ابوها ولا كأن وراهم طلعة !! ..
صباح وهي تشوفهم قاعدين تحت وهي كانت فوق الدرج : قولوا والله ؟؟؟ ..
ولفوا عليها فوق ..
ابو محمد يضحك : وشو ؟؟ ..
صباح وهي تنزل الدرج درجتين درجتين بسرعة : أقووووول ما وراكم طلعة حبايبي ؟؟؟؟ ...
ام محمد تضحك : الحين بيجيب محمد السيارة من المعرض ..
صباح وهي وصلت لآخر درجة وصوتها راح من القهر : وللحين انتوا حضرتكم ما جبتوها ؟؟ ..
ابو محمد وهو يسمع صوت بوري برا ابتسم : هذا محمد شكله جاء ..
صباح مقهورة : حرام عليك يباه الكل مشى .. وحتى عمي عامر ابو ياسمين مشى ؟؟؟ ..
ابو محمد يضحك وهو ينزل فنجان القهوة من يده : خلاص مشينا (يقوم) نادي خويتك يالله .. يقولون من اصبح افلح !! ..
صباح تضحك : علم نفسك يباه اول !! ..
ابو محمد قام وهو يضحك وسوى نفسه كأنه بيلحق صباح .. أما صباح هربت من ابوها وهي تضحك ..
صباح وهي طالعه الدرج لفت عليهم وقامت تطلع الدرج على ورا : اقول يبه يله ... وانتي ماما ..
ام محمد تحذرها : صباح لا تطلعين كذا بعدين تطيحين على راسك ؟؟ ..
ابو محمد : صباح ..
إلا يسمعون صوت الباب انفتح ويشوفون محمد داخل وهو يلعب بالمفتاح ..
محمد وهو يقط المفتاح على ابوه : تفضل طال عمرك المفتاح هذا هو والسيارة جاهزة والسواق قاعد يحمل فيها الاغراض الحين ...
ابو محمد وهو يفحص مفتاح اللاند كروزر اللي طالبه من محمد : لاهنت يا محمد ..
محمد بابتسامة : ما طلبت شي يا الغالي (يطالع صباح) وانتي يا خبلة لا تطيحين على راسك ..
صباح وهي وصلت خلاص لآخر الدرج (بابتسامه) : اقول تو الناس تجي يا الحبيب !! ..
محمد ضحك : مادرينا طال عمرك إننا تأخرنا عليك .. طالبين منك العذر والسموحه ..
ضحكت صباح ولفت وراحت لغرفتها ... عشان تقول لياسمين وتاخذ أغراضهم ويمشون ...
فتحت باب غرفتها الكبيـــــــــرة والفاخرة .. وشافت ياسمين قاعده تحوس بشطنتها _شنطة صباح_ ..
صباح صرخت وهي تضحك تبي تخوفها : وش تسوين ؟؟؟ ..
فزت ياسمين ورفعت راسها وهي مخترعه : وجعععععع خرعتيني (وحطت يدها على قلبها) ..
صباح وهي تقرب منها وتمشي حافيه على الموكيت السماوي الفاخر اللي غاصت رجولها بين شعيراته : وش قاعده تسوين بشنطتي ؟؟؟ ...
ياسمين تضحك : اشوف وش حاطه لنا فيها ؟؟ ..
ضحكت صباح وهي تقرب منها : هههههههههههههههههه حلوة لنا ؟؟ ليه وين شنطتك ياحلوة ؟؟ ..
ياسمين تأشر على شنطتها الكبيرة الرمادية تودز واللي ملقيه على سرير صباح الكبير باهمال : هذا هي .. بس خلاص مليانة اغراض ..
ضحكت صباح : انا شايفتك من امس داحستها اغراض !! .. (راحت صباح لشنطة ياسمين الكبيرة وراحت تفتحها وتشوف وش فيها ) ...
صباح وهي تقلب اغراض ياسمين بين يدينها : مصاصات !! .. علوك !! ... ريد بول !! .. (رفعت عيونها لياسمين ) ياسمين شريت حلويات كثير والحين بتشيلها الشغالة من المطبخ للسيارة ليه حاطتهم هنا !! ..
ياسمين تضحك : يختي اغراضي ذي ..
صباح ضحكت ورجعت تتفرج على الاغراض : آي بود فون .. ام بي فور !! .. جوالك واللي مليان اغاني ومزازيك !! .. هاند جل .. نظارتك الشمسية .. والكريمات حقتك الغبية !! ..
ياسمين انقهرت : عن الغلط ..
صباح تضحك : قلت هالشركة لا تاخذين كريماتك منها .. والله كلها زنك وحديد .. أشياء ثقيلة على البشرة !! ..
قامت ياسمين وسحبت شنطتها من صباح : انقلعي وخذي أغراضك ومالك شغل فيني ..
ضحكت صباح وراحت تلبس شراب و الجزمة السبورت حقتها ...
ياسمين راحت تعدل شعرها عند التسريحة واللي كان مفكوك على طبيعته الخصل الملفلفة والغجرية الرائعه : صباح بيجون اهل اورى المخيسة !! ..
صباح واللي كانت قاعده على الارض تلبس الجزمة اليسار بعد ما خلصت من اليمين وتعقد ربطتها بقوة لا تنفك : إيه بيجون .. وانتي المخيسة .. وش فيك عليها وربي اروى طيبة ..
ياسمين تضحك وتلف على صباح وتتخصر : بس انا ما احبها .. يالله كذا في الله !! .. تنرفزني هالآدمية !! ..
ضحكت صباح وقامت : يا بنت خلي المرة في حالها .. (وراحت قدام المرآيه جنب ياسمين تعدل شكلها) ..
كان شعرها قصير تصل خصلاته الأمامية إلى عظمة ذقنها الصغير ويبدا يقصر إلى ما يصل مدرجات قصيرة ورا وكان بلون العسلي الكراميل ...
صباح وهي تمرر اصابعها بشعرها وكانت لابسة بنطلون جينز وتي شيرت لونه بيج من مس سيكستي وبيدها جاكيت عنابي : يله يا بنت سرينا ...
ياسمين تضحك : قصدك فلحنا ..
وراحت صباح تاخذ شنطتها الموسكينو الملونة واللي تتميز بجنون موسكينو .. ولبست شيلتها وعباتها وطلعت مع ياسمين اللي كانت لابسه بنطلون جينز وتحته بلوزة كم طويل من مارني ملونة خطييرة وبيدها جاكيتها الجينز واللي كان موديله ترقيع من عند الاكواع والظهر .. وبيدها عباتها اللي لبستها وهي نازله مع الدرج ..
***
بالبــــــر وبالتخييم ..
منى تكلم ام خالد : اقول جميلة وين ياسمين ؟؟؟ ...
مضاوي تضحك وهي تصب لها من القهوة : أكيد مع عمي سعود بتجي هي وصباح مع بعض ..
ام خالد ضحكت : مثل ما قالت مضاوي .. بس مدري ليه تأخروا ..
مشاعل واللي كانت قاعده معهم : دايم عمي سعود كذا .. يجي متأخر..
منى : إيه والله يجي وهو رايق مهوب احنا .. بسرعه بسرعه .. كن المخيم اعوذبالله بيطير علينا ..
شعاع (ام سديم ) : إيه والله يا ام عبدالعزيز إنك صادقة ... اليوم زوجي ابو فلاح مقومني قبل صلاة الفجر (مفتحه عيونها) وش حادنا على هالقومه والتعب ؟؟ ..
سديم وهي قاعده جنب جدتها ام صالح : حلاة البر في الصباح .. عشان كذا نجي مبكر احلى ..
سديم تقوله الكلام رياءً لجدتها .. ولا هي لا تحبو البر ولا تدانيه !!
ام صالح ضحكت : صح على سدومة حبيبة قلبي !! .. (تكلم الحريم ) حلاة البر والتخييم الصباح وإنك تطلعين قبل ما تطلع الشمس ..
شعاع تضحك : بس احنا مطولين هنا يا عمه ..
ام صالح : كلها يومين .. ليه نضيع شي علينا ...
ام عبدالعزيز ابتسمت : على قولتك خالتي .. كلها يومين حلو نستغلها كلها .. بس النوم سلطان ..
ام صالح تضحك : انتي يا ام عبدالعزيز تقولين هالكلام ؟؟؟ .. ما اصدق خبري فيك نشيطة ..
ضحكت ام عبدالعزيز من ام صالح ... العجوز العفوية واللي مافيها حركات تنقد مثل باقي العجايز !! ..
.
.
أما عند الشباب .. واللي كانوا شابين الجمر .. ومجهزين القدوع والقهوة .. كانوا سوالف وضحك ..
ابو خالد يكلم عبدالله : الحين ما بيقدر اخوك يجي ابكر من الظهر ..
عبدالله اللي كان جالس جنب طلال ومساعد : لا والله .. هو بيخلص وبيجي مع جلوي ..
ابو خالد يبتسم : الله الله .. إن شاء الله لي جا باقي الشباب تطلعون للقنص ؟؟ ..
ابو صالح : للحين ما جا ابو محمد وينه ؟؟ ..
خالد ضحك : اكييد هم بالطريق ألحين .. عمي سعود يحب يمشي على هونه !! ..
ابو خالد يستفسر : إلا بيجون انسابه متى ؟؟ ..
خالد : والله مدري .. بس ماهقيت بيجون بدري ..
ابو خالد : الله يحييهم ..
ابو فلاح يكلم اخوه مساعد واللي كان جنبه عبدالله : ما كانت الطلعة عائلية ؟؟؟ ..
مساعد وعبدالله ضحكوا ..
مساعد يضحك : علمي علمك ياخوي !! ..
عبدالله ضحك : ابو فلاح مابه غريب إن شاء الله !! ..
ابتسم ابو فلاح ورجع الكل سوالف وضحك ..
***
وهم جايين بالسيارة انواع الوناسة .. وخصوصا إن ابو محمد مشغل المسجل لهم على الآخر .. وهذا الشي خلى البنات ينبسطون كثييير ...
ياسمين وهي طابه بين ابو محمد وام محمد (تمون) وقاعده تعدل السي دي عشان توصل للأغنية اللي تبيها ..
ابو محمد يضحك : الأغنية ما تخلص إلا وانتي مغيرتها يا ياسمين ..
ياسمين تضحك وهي ترجع لورا وتسند ظهرها : معليه عمي بس خلني اضبط الأغنية اللي أبيها ..
ابو محمد وهو يسمع الاغنية اللي شغلتها ياسمين واللي كانت اجنبية ...
ام محمد تضحك : مشغلتهم هالخبلان !! .. ياكرهي للأجنبي ..
ابو محمد يضحك : اهم شي فاهمه وش يقولون يا ياسمين ؟؟؟ ..
صباح واللي كانت منزلة الشيلة على كتفها ولابسه نظارتها الشمسية من ديور واللي كانت كبيرة وكانت عدساتها كبيرة ترتفع لفوق حاجبها وتوصل لنص خدها بس شكلها غاوي على قولة اخوانا الاماراتيين ..
صباح تضحك : اييييوووااا اتحدى ياسمين تعرف وش يقولون ههههههههههههههههههههه ..
ياسمين تفشلت وانقهرت : والله اني اعرف بس الانقليزي .. (تضحك) غيره ما اعرف ..
والاغنية كانت لـ جسيكا سيمبسون .. وانواع الدجه ... وخصوصا إن الكل كان فاتح دريشته .. وابو محمد من يشوف البنات منبسطين ينبسط وحتى ام محمد .. وكانت الفتحه اللي بسقف السيارة مفتوحه ونور داخل عليهم من كل جهه ...
صباااح وهي تطلع يدها من الدريشة وتضحك : وناااااااااااااسااااااااااااه
ياسمين تضحك وهي تطلع راسها بكبره وتطالع بمرة عمها من المرايه الجانبية برا وتضحك ولمن شافتها مرة عمها قعدت تضحك ...
ويعلي الصوت ابو محمد .. وصايره السيارة كنها سيارة شباب مراهقين مع هالصوت العالي للأغاني ...ما كنها سيارة شايب ...
صباح تتقدم لعند ابوها وتطل على جنبه لأنها جالسه وراه وبدلع قالت : بابا ابي اطل من فوق !!! ...
ام محمد فتحت عيونها وهي اللي كانت كاشفة ولابسة نظارة شمسيه : اقول وش كبرك !! .. اقعدي بس إنتي ناسية إننا باقي بشارع عام !! ..
صباح برجاء على شوية دلع : بليييييز !!! ...
ابو محمد بحب وهو يبتسم : اطلعوا صبوحه وانبسطوا ...
ام محمد لفت مستغربة : سعود !! ..
ابو محمد يضحك : بدرية خلي البنات ينبسطون ..(يكلم البنات) فلوها يا بعدي !! ..
ياسمين وهي مبسوووطة : ياحبي حباااه لك يا عمي !! ..
وقاموا البنات وطلوا من فوق السيارة ... وسرّع بالسرعة ابو محمد .. ياسمين طلت من دون ما تلبس شيلة وشعرها طاير مع الهوى ومع صوت الأغاني أنواع الفلة وحتى صباح نفس الشي وشعرها القصير طاير كله على ورى عكس ياسمين اللي كان طاير بكل اتجاه .. وكانت صباح ماسكه شيلتها من اطرافها بيدها الثنتين ورافعتهم فوق مثل العلم وشيلتها ترفرف ...
ياسمين وهي تضحك وتحس الهوى منعشها : احلى فيديو كليب مسوين هههههههههههههههه ..
صباح وهي تضحك : من جد هههههههههههههههههههههه ..
ابو محمد يضحك وهو يشوف رجول البنات عنده !! ... عكس ام محمد اللي خايفة لا يكون حد تأخر ويشوف بناتهم !! ..
فجأة إلا يسمعون البنات صوت بوري من وراهم بصورة متكررةو قوية ... وتلف صباح وراهم وتشوف سيارة اخوها محمد !!! ...
صباح تصرخ بياسمين : محمد اخوي وراااناااااااا !!! ...
ياسمين لفت وهي ماسكة نظارتها الشمسية لا تطير من الهوى إلا تشوفه جد ... يا فشلتي شافني ولد عمي وانا كذا من دون شيلة !!! ... وبسرعة ومع بعض دخلوا البنات داخل السيارة .... وانتبه لحركتهم ابو محمد .. وبسرعة وطى صوت المسجل ...
ابو محمد : وش فيكم ؟؟؟ ...
ياسمين بسرعه تمسك شيلتها وتتحجب ...
صباح تضحك وخايفة بنفس الوقت : محمد اخوي ورانا .. هواللي يدقق بواري !! ...
ابو محمد ضحك : ههههههههههههههههههه محمد ...
ويطالع بالمرآيه الجانبية إلا يشوفه يقرب بسيارته ومبينه ملامحه المعارضة لحركة البنات .. شوي إلا يدق جوال ابو محمد ..رد وطلع محمد ..
محمد معصب : الله يهداك يباه وش هالمصخرة ؟؟؟ ...
ابو محمد يضحك وهو حاط السبيكر : خل البنات ينبسطون وش فيك ..
محمد : قلنا ينبسطون بس مو كذا ... وربي كنهم مجانين توهم طالعين من شهار !! ..
صباح فتحت عيونها وش هالكلام .. عاد كله ولا السبه!! .. فطبت لعند الجوال وقعدت تصرخ ..
صباح : انت المجنون .. يا المقرود .. يا الشين .. وبعدين وش دخلك هاه !!... خلك بحالك ابرك لك ...
محمد معصب وهو ماشي بسرعه جنب سيارتهم ويشوفها وهي تشوفه ..
محمد : دخلني الباب !! ... صباح مو عيب عليك اللي تسوينه !! ...
صباح لفت عليه وخصوصا إنه من جهتها : مالك دخل .. دخلك بس بأروى ولمار !! ...
اروى اللي كانت جالسة جنبه وبحضنها لمار وورا جالسة شغالتهم ...
محمد : أوريك بس خلينا نوصل ... وحتى خويتك هالخبلة اوريك فيها ؟؟؟ ..
ياسمين فتحت عيونها ... وش عنده ذا ؟؟؟ ...
ياسمين طبت جنب صباح تتكلم :عمي راضي لنا ... (مقهورة)وبعدين ماني خبلة ؟؟ ..
ابو محمد ضحك وطفى السبيكر وقعد يشرح لمحمد ويقوله إنه هو اللي أذن لهم ...
اما اروى مهما كان انقهرت إن محمد شاف ياسمين بذاك الشكل ... وغارت عليه كثير .. وبان هالشي عليها ... بس حاولت تتجاوز الموضوع وخصوصا تدري إن محمد ما يفكر في ياسمين إلا كـ أخت مثل صباح ... بس مهما كان غارت .. وغارت كثييير بعد !!! ...
وبعد مرور تقريبا ساعه كانوا قد وصلوا للمخيم ... والبنات انبسطوا وخصوصا إن المخيم كان روعة ... والكل اجتمع على الفطور يفطرون ... وبعد الفطور ... راحت ياسمين وصباح وسديم يتمشون حولهم .. ويستطلعون المكان ... وخصوصا المطر اللي كان رشاش عليهم نزل انعش الارض وانعشهم ...
***
على الساعه 2 الظهر وصل عبدالعزيز وجلوي بسيارة عبدالعزيز الرنج روفر .. وبعدهم بنص ساعة وصلت سيارتين ... سيارات أهل اروى !!! ....
ولمحوهم البنات ...
ياسمين واللي كانت من عند مخيمهم شافت السيارات : من هذولا اللي جايين ؟؟؟؟ ...(نست عن اهل أروى)
كانت تكلم البنات اللي كانوا داخل جالسين ...
ام خالد انتبهت لـ بنتها : فيه احد جاي ؟؟؟ ...
قامت سديم و صباح بسرعه يطلون مع ياسمين ..
سديم تنتبه زين : يؤيؤ مين هم ؟؟؟ ..
إلا تشوف حريم ينزلون منها حرمتين !! ... ورجال مين هم !! ...
صباح تلف على اروى : رورو ... أهلك جااااااااو !!! ...
اروى واللي كانت تسولف مع مضاوي قامت بفرح : صدق !!! ...
صباح : والله ...
وبهاللحظة لفت منى على مضاوي ابتسمت مضاوي لأمها .. حلو أجل هالجيه الحلوة !! .. غمزت مضاوي لأمها بطريقة محد شافها إلا خديجة اللي قعدت تضحك .. وضحكت معها منى ..
أما ياسمين تأففت منهم وهمست لصباح : مو قلنا عائلية ؟؟؟ ..
صباح : كلي تبن كبر راسك !!! ... وشدخلك فيهم ..
ولحظات إلا الكل متجمع بالخيمة .. ومعهم ام اروى و شوق اختها !!! ...
ام خالد بابتسامة : حياكم الله معنا ..
ام محمد : إيه والله تو ما بتحلى القعدة بأنسابنا (وتبتسم لهم ) ...
ام اروى تبتسم لهم : تسلمون والله ... عاد تونا امس درينا عن الجية وكلم زوجي ابو محمد وعزمنا وجيناكم ...
ياسمين تهمس بصوت واطي لصباح : ما صدقوا خبر وجو طيران !! ...
منى ام عبدالعزيز بابتسامة : حياكم الله .. والله ما تدرون عن فرحتي يوم دريت عن جيتكم !!! ..
شوق اللي كان جالسة جنب اروى اختها ... لكزتها اروى وضحكت ...
ام اروى : تسلمين يا ام عبدالعزيز ... إلا شخبارك آخر عهدي فيك كان عند اروى بنتي ؟؟؟ ...
أم عبدالعزيز تبتسم : بخير ... (ولفت على شوق) إلا اخبارك يا شوق ؟؟؟ ..
شوق بابتسامة لها معنى ثاني وخصوصا بعد موضوع عبدالعزيز : بخير ..
كانت شوق مبسوطة بشكل مو طبيعي .. وخصوصا إنها درت من اختها .. إن عبدالعزيز هو ورا جيتهم وعزيمتهم ... الله لا يخليني من زوجي المستقبلي !!! ...
اروى بصوت محد يسمعه إلا شوق : ابسط يا عم !!! ... عمتك منى من ألحين مبينه إنها تحبكم !! ..
حمرت خدود شوق وببساطة ردت : ممكن تنثبرين لأني والله مستحية وواصلة معي !! ...
اورى تضحك : انقلعيييي ...
شوق لفت على اروى وقالت بصوت هامس والفرحة تتراقص في عينها ببريق ماله مثيل : فاتك قبل شوي أول ما وصلنا كان زوجك محمد و عبدالعزيز وواحد معهم مدري منهو ..
اروى : هذا جلوي ... (عرفته لأنها يوم طلعت تشوفهم اول ما وصلوا شافته مع محمد وعبدالعزيز ) ...
شوق وهي مو مهتمه فيه : المهم .. (ابتسمت بخجل) رحب فينا عبدالعزيز وشكله مره مبسوط بجيتنا !! .. يا حبي له !!! ...
أروى تضحك : ترا توه واصل قبلكم بنص ساعه !! ...
شوق بخجل : احب خطيبي المستقبلي يختي من الحين (وجهها محمر خجلا) ..
صباح تكلم شوق : شووووق اخبارك ؟؟؟
لفت شوق وانتبهت لها وحاولت تكون عادي: تمام ... أخبارك صبوحه ؟؟؟ ...
صباح تضحك : تمام ...
شوق تكلم ياسمين : اخبارك ياسمين ؟؟؟ ..
ياسمين وهي متضايقة منهم : أزقح إلا شوي !! ..
شوق تضحك : ليه إلا شوي ؟؟؟ ..
ياسمين بصوت هامس : منكم .. (عطتها كوع صباح فـ علت صوتها وقالت) امزح معك !! .. انا تمام التمام !! ..
شوق قعدت تضحك بكل طيبة: هههههههههه رهيبه ...(وتكلم سديم) وكيفك سديم ؟؟؟ ..
سديم : تمام ..
وقعد الكل مبسووووط وسوالف ... وبعدها بربع ساعة جابوا الغدا .. وتغدا الكل ... إلا صباح .. كانت قاعده على جنب وطفشانة ...
أم محمد وهي قاعدة على الغداء مع الكل : صباااح قومي تغدي !! ..
صباح متقرفة : يمه تدريني إني ما اكل لحم !! ..
طالعت ام محمد بصحن الغداء الرئيسي واللي كان خاروف ورز .. وفيه سلطة وحلى وصالونه وخضار ودجاج بالباشميل وفاكهه ... واللي كان الكل متجمع عليه ..
ام محمد بقلة حيلة : صبوحه فيه سلطة وصالونه وفواكه !! ..
صباح اشتهت الصالونة : طيب الصالونة مطبوخة بلحم !! ..
حركت ام محمد ملعقتها في صحن الصالونة إلا تشوف قطع لحم : إيه فيها (تقولها بقلة حيلة) ..
صباح انقهرت : اوووفففف قهر ..
ام عبدالعزيز : صبوحة .. كلي سلطة ..
شوق واللي كانت تاكل : ليه صباح ما تاكلين لحم ؟؟؟ ..
صباح ابتسمت لـ شوق وبضعف قالت : ما آكل لحوم بشكل عام !! ..
شوق استغربت : حتى الدجاج ؟؟..
صباح تضحك وهي تعدل سماعات الجوال بأذنها : فيجتيريال !! .. انا نباتية !! ..
شوق استغربت وبضحكه فيها دهشه : يعني ما تاكلين اللحوم ابد ابد !! ..
صباح تضحك : أبداً أبداً .. ما اذكر آخر مره كليت فيها لحم !!! ...
شوق مستغربة : صدق غريبة ؟؟ ..
ياسمين واللي كانت تزط مع سديم انقهرت من شوق .. ياربي البنت مافيها شي بس مااحووبها !! ..
ياسمين وهي تهضم لقمتها : ما الغريب إلا الشيطان !! .. عادي البنت هذا طبعها !! ..
لفت شوق على ياسمين وهي مستغربه : عادي ما قلنا شي ياسمين بس استغربت (ابتسمت بلطف) على قولتك ما الغريب إلا الشيطان !! .. طيب انتي مثلها ؟؟ ..
ياسمين ترد وتحاول تكن لبقة بعد ماشافت نظرات مشاعل مرة اخوها بأنها تركد : لا آكل لحم عادي .. ولا كان ماشفتيني قاعده معكم ؟؟؟ .. (وابتسمت لها ) ..
أما صباح بالأخير خذت لها صحن سلطة و صحن حلى على قوطي بيبسي !! ..
***
عند الرجال ...
عند الرجال .. كان الكل يسولف بعد ما شالوا الغدا وتغدو ...
ابو جابر (ابو اروى) : الله يغنيكم ..
ابو صالح بحكم إنه أكبرهم سنا : بالعافية يابو جابر ... وتو ما زانت الطلعة بجيتكم !! ...
جلوي جالس جنب عبدالعزيز : اقول عبدالعزيز دايخ وفيني نوم !! ...
عبدالعزيز لف عليه : رح نام !! .. فيه الخيمة اللي جنبنا ... رح نام فيها !! ..
جلوي : اخاف ابوي يزعل !! (بضيق) ولا تدري خلني اقوم ؟؟ ..
بعدها قام جلوي واستأذن منهم وراح ينام بالخيمة الثانية ...
ابو صالح يكلم عبدالعزيز : أقول يابو حامد وش عندكم تأخرتوا ؟؟؟ ..
عبدالعزيز يبتسم له : والله أبد .. على بال ما طلعت من شغلي .. وعلى بال ماغيرت سيارتي وبعدها مريت على جلوي جيناكم على طول !! ..
ابو محمد يضحك : توقعتكم تجون بعد العصر مدري ليه ؟؟؟ ..
عبدالعزيز ضحك : لو الموضوع على هوى جلوي ماكان جيناكم إلا مثل ما قلت !! .. بس لزمت عليه نمشي الحين ..
ابو جابر (واللي كان مايعرف عن موضوع شوق بنته بشي) : أجل توكم واصلين ؟؟ ..
عبدالعزيز وهو يوجه له الكلام : واصلين قبلكم بشوي ..
إلا تكلم جابر اخو اروى الكبير : واخبار الشغل معكم يا بوحامد ؟؟ ..
عبدالعزيز ابتسم : والله الحمدلله كل شي طيب ... بس فيه الحين ضغط شوي بالشغل !! ..
جابر ضحك : اكيد الدولة الحين صايرة مشاكلها ومشاكل الشعب كثيرة ...
عبدالعزيز وهو يأيده بالراي : على قولتك .. والله شكلنا مطولين على هالحال !! ..
جابر وهو اللي تحمس مع الموضوع : وخصوصا ألحين .. تحس السعودية على وشك تغير وانفتاح كبير بيصير فيها ؟؟ ...
عبدالعزيز ابتسم وعدل شماغه اللي مسوية على طريقة فزاع : والله يا جابر كلامك صحيح .. بس أحس الانفتاح يبي له شوية صبر !! ..
جابر بجدية : بالعكس يابو حامد .. السعودية تطورت الحين كثير وتفتحت .. وفيه أشياء كانت من المحرمات .. صارت من المباحات لااا والضرورات بعد !! .. يعني متأملين خير إن شاء الله إن التغير بيصير كبير وقريب ..
عبدالعزيز ضحك وكمل بجدية : شوف الخطوة الاولى في اللي تقوله لازم تكون من الشعب!! .. يعني ترا الدولة في أشياء كثيرة تبي تسويها بس الخطوة الأولى لازم تكون من الشعب !! ..
جابر واللي مافهم عليه مره : الشعب يطالب الحين ولكن مافيه مستجيب لهم !! ..
عبدالعزيز وهو اللي فاهم بهالأمور : الدولة او الحكومة تبي تأييد لها بالتطوير اللي تبيه .. والتأييد يجي من الشعب .. وامور كثيرة مثل ما انت خابر الشعب رافضها !! ..
جابر : شوف الجرايد والتلفزيون .. كلها امور تدل على مطالبهم ..
عبدالعزيز وهو يحاول يسهل مقصده ويشرحه : يا جابر .. اللي يطالبون بالإنفتاح ..والتطوير المرافق له هم كبار الدولة .. وطبقاتها المخملية .. واللي يتميزون بثقافتهم العالية واطلاعهم على احوال العالم حولهم بحكم سفراتهم وروحاتهم .. عكس باقي الشعب من العوام اللي لا يزال متمسك بعاداته وتقاليده ويظنه إنها خلاصه ويكون ضد التغيير !! .. وضد الانفتاح لأنه يظن إن قيمه ومبادئه ودينه بتطير لو حدث هالانفتاح اللي هو معروف بداية التطوير !! ... العوام ينطبق عليهم مثل الإنسان عدو ما يجهله !! ...و فيه قاعده مثل مايقولون هي كل ما ارتفع الشخص وارتفع دخله يقل تمسكه بالعادات والتقاليد (ويبسط يدينه الثنتين كنها ميزان يد مرتفعه واليد الأخرى هابطة)والعكس صحيح كل ما نزلنا بالطبقات تجد إنه التمسك بالعادات والتقاليد أكثر .. ومثلك خابر إن بعض هالعادات والتقاليد تعادي التقدم والتطور ..و مثل ماندري 70% من الشعب السعودي من الطبقة المتوسطة أو تحت المتوسطة وهي اللي تعتبر الشريحة الأوسع في القبول والرفض .. يعني عندك مثلا أشياء كثير معادينها سواقة المرأة للسيارة !! .. عدم استطاعتها استئجار غرفة نوم بفندق إلا برجل !! .. والاطفال مافيه مراكز تعليمية على اسس تنموية لهم غير المدارس !! ... والشباب ومشاكل لافتة للعوائل فقط !! .. والقائمة تطول لو بأشرح لك !! ..
مساعد واللي كان منتبه وكلام عبدالعزيز عاجبه : إييييه والله إنك صادق لوحة [للعوائل فقط]دايم ما تبي تجلطني !! ..
ضحك عليه الكل ... وكلام عبدالعزيز عن الخطط التنموية نال استحسان الكثير فيهم ..
جابر مبتسم : فعلا كلامك صحيح يابو حامد !! ..
خالد واللي خش جو مع كلامه : فعلا .. يعني شكلنا مطولين على هالحالة !! ..
عبدالعزيز ضحك : شوف هي وحده من الثنتين !! .. يا إنك تحطهم قدام الامر الواقع .. أو تتدرج معهم إلين الوصول للي تبيه ..
خالد بقهر : شكلنا على الطريقة الثانية والله !! ..
***
بالمغرب بالبر .. والجو يشتد برودة .. والاجواء كانت تميل للرمادية ..
كانوا البنات طالعين يتمشون .. ومعهم أروى وشوق اللي نادتهم صباح ... تضايقت من ياسمين بعد صارت عادي بخاطرها(ليه اعكر علي مزاجي عشانهم !! ) ..
سديم وهي تضحك وتلم البالطوا عليها لبرودة الجو وشعرها يطير بالهوى : بنات حلو الجو .. بس اخاف من الثعابين يقولون تطلع بالليل هي والعقارب !! ..
ياسمين مستغربة وهي ماشية جنب سديم ولابسه جاكيتها ولافه عليها الشال : مدري .. أنا سمعت إنهم يطلعون بالحر وقت الظهرية !! .. أبوي يقولي كذا !! ..
صباح واللي كانت ماشية مع اروى واختها : اخلصوا علينا هي تطلع بالليل ولا بالنهار ..
شوق تضحك : خليك وسط احسن ... بالمغرب !! ..
صباح ضحكت : كلي تبن !! .. حنا مغرب الحين لا تفاولين علينا !! ..
اروى ضحكت : إيه والله !! .. تفاول شوق هالخبلة !! ..
ياسمين تبتسم : تدرون إننا بس بنقعد هنا 3 ايام !! ..
صباح بقهرر : إيييه أدري .. والله المكان رايق وروعه !! .. خسارة فيه بس هاليومين ..
سديم تضحك : يعني قريب بنرجع !! ..
ياسمين : شفتي كيف ؟؟ ..
سديم بفرح : وااااو وناسة ..
صباح مقهورة : اجل ليه طلعتي معنا دامك تبين ترجعين بهالسرعة ؟؟؟ ..
سديم بقلبها ( أنا جاية اتمقل في عبدالله .. مو لسواد عيونكم !! ) ..
سديم تبتسم : عشانكم جيت ... وعشان جدتي طلبتني بعد !! ..
ياسمين : آها .. أنا عني مبسوطة كذا ... بس قهر ليتنا بعد مددينها يومين .. يعني 5 ايام حلو والله !! ..
شوق تضحك : يله يا شيخة .. إن شاء السنة الجاية نطلع بدل اليومين اسبوعين !! ..
ياسمين بخاطرها (أعجبتني كلمة [نطلع! ] .. حلوة ذي هالمرة وبينفقع قلبي منكم عز الله السنة الجاية بموت منتحرة منكم لو انتوا اسبوعين بوجهي !! ) ..
صباح تبتسم وهي تحط راسها على كتف مرة اخوها اروى : دايم حنا نطلع اسبوع اسبوعين بس هالمرة ما ادري وش فيهم أهلنا ؟؟؟ ..
ياسمين مقهورة : ماتدرين يمكن خيرة !!! ...
ضحكت صباااح بقلبها لأنها عارفة ياسمين زين !! .. وقصدها بغثا اروى واهلها ..
سديم وهي تشوف الظلام بدا يظلم اقترحت على البنات إنهم يرجعون .. وبالفعل استداروا ورجعوا للمخيم حقهم ..
.
.
خالد كان واقف برا يبي يتوضا من خزان المويه .. ومعه واقف محمد و عبدالعزيز ..
خالد يضحك وهو مشمر عن يدينه : يا جماعة الموية بارده .. ينفع أتيمم !! ..
محمد ضحك : يجوز يا ولد عمي .. لكن اخاف تتحمس وتجي كل يوم تتيمم !! ..
عبدالعزيز : ما شاء الله مفتي سماحة المملكة محمد بن سعود أفتى لك يا خالد ..
خالد ضحك : يا جماعة والله إني اتكلم من جدي أتيمم الموية بارده ؟؟ ..
محمد غير السالفة من بثارة خالد : جلوي وش بلاه نايم للحين قوموه هالدكتور !! ..
خالد ضحك : تدرون والله ودي لو يوم ألقى لي وقت فاضي .. واروح احضر محاظرة لجلوي .. أشك الطلاب يفهمون منه !! ..
عبدالعزيز بجدية : يقول عبدالله اخوي إنه كان عنده خوي تخرج العام كان عند جلوي .. يقول يا إن نفسه شينه ويهابونه الطلاب !! ..
خالد مات ضحك : هههههههههههههههههههههههههههههه جلوي يا مهجدهم !! ..
عبدالعزيز ضحك : شفت كيف !! ..
لف محمد إلا يشوف ثلاث حريم ما شيات بعيد شوي عنهم ... عرف من وحده منهم إنها أمه !! .. مستحيل ما يعرفها وخصوصا من مشيتها !! ... راح لها محمد وكان متوقع إن اللي معها صباح واروى .. إلا يوم قرب عرف إن اللي معها ما يعرفهم فـ حب يتراجع .. إلا يسمع صوت يناديه ..
أم محمد : محمد تعال سلم على عماتك ..
لف محمد وراح لهم .. وسلم على عماته منى ام عبدالعزيز و جميلة ام خالد ...
محمد يسولف مع عمته منى اللي يميل لها اكثر : أخبارك عمتي ؟؟ ..
منى تضحك : تمام .. أنت اخبارك وينك يا القاطع ماعاد شفناك ولا سمعنا صوتك ؟؟ ..
محمد ضحك من عمته :والله لك حق تتشرهين علي .. بس والله إنك على بالي دايم ..
ام خالد تبتسم وهي تعدل شيلتها والجاكيت اللي لابسته بهالبرد : وش جايك اليوم تهزيء بالبنات ؟؟ ..
محمد ضحك يوم تذكر موقف الصبح اليوم وهم جايين : بلاك منتي شايفتهم يا عمه .. كنهم قرود مطلعينهم فوق السيارة !! ..
ام خالد و الكل قعد يضحك منه وقد يسولف لهم لمن انصدم من اللي يشوفه بالصبح من البنات.. وشوي إلا يجي عبدالعزيز وخالد مارين كانوا يبون يروحون للخيمة بعد ما توضوا .. إلا ينادونهم الحريم .. وراحوا وسلموا عليهم ..
ام خالد وهي فرحانة بشوفتهم : هلا بعبدالعزيز ..
عبدالعزيز يبتسم لها وهو يحاول يرجع اكمامه بعد الوضوء وشماغه اللي مرجعه لنص راسه على ورا : اخبارك يا عمه ؟؟ .. (وهو يرجع اكمامه المشمره ) وش علومك ؟؟ ..
ام خالد تضحك : والله الحمدلله على كل حال ..
خالد وهو بعد يعدل شماغه من بعد الوضوء : والله الجو بارد .. ادخلوا داخل مو احسن لكم يمه ؟؟ ..
عبدالعزيز بعد ما رجع اكمامه : اقول وش اخبار التخييم معكم ؟؟؟ .. إن شاء الله انبسطتوا ..
ام خالد : والله إنه حلو .. بس العام واللي قبله كان راقي واحلى المكان ..
محمد وهو يذكر طلعتهم العام واللي كانت مدة 10 ايام : ياعمتي طلعة العام كنا مستعدين لها من زمان عكس ذي قبلها بأسبوع بدينا نستعد ..
ام عبدالعزيز : حتى هذا المكان حلو .. وعلى ما قال محمد زين إنهم بأسبوع جهزو هـ المخيم ..
.
.
والبنات راجعين راحت سديم و صباح مع بعض للسيارات .. عشان تاخذ سديم شنطه ثانية لها من سيارتهم نسيتها .. وصباح وياسمين راحوا معها ..
صباح تضحك : بعد شنطة ثانية شكل نص عفش بيتكم جبتيه !! ..
ياسمين تضحك : ههههههههههههه إي والله .. وهذا اللي تقول ما ابي اطلع ..
سديم : ممكن تنثبرون شوي ..
صباح : يا وجه الحمار !! ... جايين معها وتقول هالكلام لنا ؟؟ ..
ياسمين مسوية بتتراجع وهي تضحك : ما عليك منها شسمه ذا وقط بحر ..
وهم رايحيين للسيارات .. كانت سيارة ابو سديم جنب سيارة عمها مساعد .. واول ماراحت وفتحت السيارة .. خذت الاغراض حقتها وقعدت تدور بالسيارة أما صباح وياسمين رجعوا للمخيم .. بهاللحظه ما انتبهت سديم لـ عبدالله اللي جاء لسيارة عمها مساعد اللي هو خويه يبي ياخذ منها اغراض موصي بها مساعد ... واول ما فتح السيارة وشافت نورها سديم ظنت إنه عمها مساعد فراحت تبي تخوفه بهالليل .. وما درت إنه عبدالله !! ..
عبدالله اللي كان فاتح باب السواق ورجوله مطلعهم برا .. وهو بهالحالة إلا تجيه سديم وتقرب شوي شوي من دون ما ينتبه لها .. حاولت تخوفه فـ جمعت حصى .. وجت للجهه اللي هو فيها وهي واقفة لعند الباب الجانبي للي خلف السواق .. ورمت اول حصاة على رجل عبدالله .. عبدالله ما انتبه وهو حايس بالسيارة .. بس اكتفى بأنه يحرك رجوله .. سديم ضحكت بصوت مكتوم .. صدق مافيه احساس بهالآدمي !! .. واخذت حصاة اكبر شوي .. ورمتها عليه بأقوى من المره الأولى !! ... عبدالله وقف من حوسته ودرى إن اللي مسوي هالحركة قاصد !! .. بنفسه ياربي من ذا الماصل اللي يبي يخفف دمه بهالحركات !! .. حب يطنش .. احسن خل يقهره .. اما سديم قطيعة والله عمي ميت الاحساس اللي فيه !! ... خلني اروح له احسن لي !! .. وقربت منه وهي تمشي عادي .. وداست على رجله تبي تعوره وهي واقفة متكتفة يعني جيتك ياللي ما تحس !! .. أما عبدالله فز من مكانه ولف عليها بسرعه ... هي من شافته ودرت إنه مهوب عمها .. صرخت ..
عبدالله اخترع منها داست رجله ومخرعته ولاا تصرخ بعد : بسم الله !! ..
سديم تتراجع وهي ضايعة علومها من درت إنه عبدالله : آ .. أنا .. آسفة وربي ما اقصد !! ..
عبدالله اللي صد عنها وحاول إنه ما يرتبك : انتبهي مره ثانية اجل الله يخليك !! ..
سديم وهي ترتجف وصوتها مبينه فيه الرجفه : كنت اظنك عمي .. عمي مساعد !! ..
عبدالله وهو لا يزال غاض البصر عنها :عادي يا بنت !! .. عذرك مقبول !! ..
وبسرعه لفت سديم لأدراجها تركض ونست أغراضها اللي تعنت عشانهم !!! ..
***
|
05-10-08, 08:44 PM
جديد مواضيع قسم الارشيف
العرض العادي
