كاتب الموضوع :
دموع يتيمة
المنتدى :
الارشيف
باقي على سفري بضع ساعات بس قلت لازم اوفي بوعدي وانزل البارت اللي وعدكم فيه
[ الجزء العاشر]
[ البارت الثاني]
شفت موتي وانا حي
والسبب هم فرقاك
ارفق بحالي شوي
قلبي ما طاع يسلاك
أطلبك دامني حي
تحفظه لي ويفداك
(راشد الماجد)
على الغداء .. كانوا كلهم متجمعين على الوجبه .. بعد ما نزل عبدالعزيز وسلم عليهم ...
عبدالله وهو ياكل : اقول عبدالعزيز اخبار سفرتك ؟؟؟ ...
عبدالعزيز وهو يبتسم : حليوه .. الحمدلله على كل حال !! ...
مضاوي : بس زين إنك جيت ...
منى وهي مبسوطه إنه عبدالعزيز جا : اقول عبدالعزيز .. نبدا بموضوعنا ؟؟ ..
عبدالله وهو يتدخل : أي موضوع ؟؟ ..
مضاوي وهي تضحك : عبدالعزيز بيخطب ؟؟ ..
خديجه واللي كانت قاعده معهم قالت بابتسامه : قريب إن شاء الله ...
كح عبدالله يوم قالوا عبدالعزيز بيخطب ...
عبدالعزيز يضحك : عطوه مويه لا يموت ...
عبدالله وهو ياخذ كاس العصير اللي قدامه وشربه ...
عبدالله وهو يطالع : ألحين لاحظوا إن الكل يدري إلا أنا ..(متفاجأ) من متى هالكلام ؟؟ .. وكيف ؟؟ ..
منى تضحك : واحنا متى نشوفك ؟؟ ..
عبدالعزيز مبتسم : من جد ماقالت لك أمي ؟؟ ...
عبدالله يطالع أمه بعتب : الله يهداها أمي .. دايم تنسى إن عندها ولد اسمه عبدالله ..
ماتت ضحك منى من كلام ولدها عبدالله .. صدق دايم تنسى تقوله ..
عبدالعزيز وهو يطالع أمه تضحك : ماهقيت من امي تنسى ؟؟ ...
عبدالله وهو يطالع بخالته خديجه اللي كانت جالسه جنبه : محد يذكرني والله إلا خالتي خديجة ..
منى تضحك : عبووود !! ... صدقني ما أنساك ؟؟ .. بس الموضوع توه ماصار شي !! ..
عبدالله يبتسم ويكمل الموضوع : صح من هي العروسه ؟؟؟ ...
منى تبتسم : توقع ...
مضاوي تضحك : وحده ما تتوقعها !! ...
خديجه تقرب له : من جهة اعمامك ؟؟ ..
عبدالعزيز كان يضحك وهو يطالع عبدالله اللي يطالعهم مستغرب ..
عبدالله مستغرب : احلفوا ؟؟ .. بعد كلكم تعرفون من هي ؟؟ .. (قام مسوي معصب) لا لا الوضع لا يتحمل أحتج انا !! ...
تسحبه خديجه وتقعده : عبدالله اقعد !! ...
منى قعدت تضحك وهي تطالع بولدها ....
عبدالله مسوي زعلان : اضحكي يا منى وش عليك .. مو إنتي هنا من كبار القوم .. وتعرفين كل شي !! .. مو أنا ولا احد يفكر فيني !! ..
عبدالعزيز يكلم اخوه : الله يهداك وش فيك زعلان ؟؟ ..
عبدالله وهو ياكل (يستهبل) : أبي حقوقي !! ... أبي حق الاعتراف إني من هالعائلة ؟؟ ...
عبدالعزيز يضحك : تنكت .. ولا تحاول !! ..
عبدالله يضحك :احاول ياخي ... بلاك منت حاس فيني !! ..
عبدالعزيز ضحك عليه ولف على مضاوي : مضاوي وش فيه هالولد .. مهوب صاحي من قام !! ..
مضاوي تضحك وهي تطالع عبدالله : تعرف قل النوم !! .. يسبب تهيج في المخ ويخليه يفصل !! ..
منى تضحك : هاه اقول عبدالعزيز انت واختك .. ترا ما اسمح لكم على عبووودي هذا آخر العنقود !! ..
عبدالله ضحك :يله .. اول الدعم قطرة !! ...
بعدين كمل عبدالله بجديه : من جد والله من خطب عبدالعزيز ؟؟ ..
عبدالعزيز ضحك : توقع ؟؟ ..
عبدالله استغرب من اخوه اللي كان كأنه راضي عن هالخطبه وكأنه اول مره يخطب .. أمجاد تلاشت !! .. معقول !! .. والله يا عبدالعزيز ما ينعرف لك !! ...
عبدالله : خل عني التوقعات وماتوقعات .. باللهي مين ؟؟؟ ...
عبدالعزيز : من انساب محمد !! ...
عبدالله فتح عيونه : جد!! ..
منى بابتسامه : أكييييييد !! ...
عبدالعزيز : وش رايك فيهم ؟؟ ...
عبدالله : ناس ما شاء الله عليهم .. لو قعدت من اليوم إلين بكره ما توقعتهم !!
يكمل كلامه عبدالله بجديه : بس من جد عز الله عرفت تختار !! ...
مضاوي تضحك وتقول بفخر : هذا اختياري .. شوق انا اللي اخترتها !! ..
عبدالعزيز وهو يضحك ويكلم مضاوي : انتي .. ولا امي ؟؟ ..
مضاوي تطالع بأمها و تلف على أخوها : امي .. بس لقت تأييد شديد مني !! ...(وقعت تضحك)
عبدالعزيز بمزح : انقلعي أجل ..
هل عبدالعزيز فعلا منتشي بخطبته الجديده !! .. ولا يتصنع ؟؟ ... هل هو فرحان لأنه متأكد إن العائلة الجديدة بتفتح أذرعها له بلهفه .. فهو كما يشرفهم سيشرفونه !! .. لكن ..
ليه الحب يضعفنا !! .. وليه الحب يكسر بداخلنا كبريائنا !! .. وليه يعجزنا عن آخذ حقوقنا !! .. ولكن حبنا الكبير واللا متناهي .. والحقيقي .. وأشدد الحقيقي !! .. يخلينا ننسى شي اسمه رد اعتبار!! .. و يمسح من قواميسنا كلمة انتقام !! .. لنبتعد بقلوبنا وارواحنا .. ونبكي بمقدار !! .. وبعدها نتابع حياتنا وبأعيوننا بقايا دموع !! ...
عبدالعزيز ماينسى كرهه لـ أبو ناصر .. مو هو السبب !! ... ولده امعه وراه !! .. هو يقدر يرد اعتباره !! ... بس متأكد لو إنه فعل .. جزئيا امجاد ستضرر !! .. ولذلك الله لا يرده رد اعتبار لو تجيها منه شكت ابره !!!!! ... وفعلا كما قال جورج ساند (كلّما ازداد حبنا تضاعف خوفنا من الإساءة إلى من نحب) !! ..
***
بالعصر ...
كانت بدور طالعه مع جدتها .. رايحه تشتري لها غرفة جديدة معها .. وهم بمحل الأثاث ..
ام ناصر وهي تكلم بدور بضيق : ماله داعي الغرفة الجديدة !! ..
بدور وهي تتفرج على سرير مع كمودينا تابعه له : وش عليك يا جدتي تنامين على سرير مو مثلي على كنبه !! ...
أم ناصر : لا تقعدين تكذبين علينا .. امجاد اختك راحت وانتي نايمه على السرير !! ...
بدور وهي تلف عليها : وإذا رجعت امجاد ؟؟ .. وين انام انا بالله ؟؟؟..
ام ناصر : توك قايله لي اليوم الصباح إنها مهيب راجعه بتقعد ببيت ابوك ؟؟؟ ...
بدور انقهرت من امجاد وانقهرت اكثر إنها علمت جدتها ! : امجاد تخبص !! .. كلها كم يوم وتعقل ..
أم ناصر تبي تحرها : تقصدين إن اختك خبله ؟؟؟ ..
بدور بابتسامه مصطنعه : تقريباً !!...
إلا يجيهم اللبناني ..
اللبناني العامل بالمحل : اهلين آنسه ..
أم ناصر ترد مع إنه كان موجه كلامه لـ بدور : أهلين ..
بدور ترد : اهلين !! ..
أم ناصر وهي تكلم العامل : معليه تعطينا يا ولدي سرير بنّاتي !!! ..
بدور تتدخل وتكلم جدتها : وشو جده سرير ؟؟؟ ...
ام ناصر تكلمها : فيه عندك دولاب وتسريحه !! (بعصبيه) مالها داعي التكاليف الزايده ..
بدور بعصبيه : انتي شايفه الغرفة القديمه اللي شكلها من العصر العثماني !! .. من جدك مانغيرها !! .. لا اسمحي لازم تتغير !! ...
اللبناني وفيه ضحكه من هوشتهم : ألحين ممكن توضحي طلبك مشان ساعدك ..
ام ناصر وهي تكلمه وتطنش بدور : ورنا الأسرّه لو سمحت !! ..
بدور بضيق وهي تكلمه وتطنش جدتها : الغرف الكامله لوسمحت !!! ...
أم ناصر تلف على بدور وتهاوشها : بدووور !! ..
بدور تكلم جدتها بعصبيه : نعم !! ..
أم ناصر : الحين جاي يكلمني انتي وش فيك ناطه ؟؟ ..
بدور بضيق : هو اول ما جاء قال آنسه !! .. وانتي بالله شايفه نفسك يا جده آنسه ؟؟ ...
ام ناصر : انثبري ..
اللبناني وهو يضحك : مشان الله هدوا بالكون ..واللي بدكون تشوفوه بتشوفون !! .. بس كرمالي ما تتخانقوا !!! ..
بدور عصبت وطنشت هاللبناني : اقول تدرين يا جده انتي روحي شوفي مع اللبناني وانا بأروح اشوف الغرف اللي أبيها ..
وراحت بدور من عندهم ...
ام ناصر عصبت .. واستفرد فيها اللبناني ..
اللبناني وهو مبتسم : بتقدري مدام تشوفي الاسرّه المنفردة لو حابه !! ...
أما بدور وهي رايحه تتفرج ... جاها ذاك المصري قام من المكتب وجاها ...
المصري وصلعته تبرق : اهلن وسهلن بك يا آنسه ..
بدور وهي تحاول تكون هاديه : اهلين ...
المصري : محتاقه حاقه . انا هنا بالخدمه .. لوعايزة تشوف الحاقات القديده اللي
بدور تقاطعه يوه ذا المصري وش بيسكته : ورني الغرف ..
المصري بابتسامه خبيثه : هو انتي حضرتك عروسه قديده ؟؟ . لوعايزة تشوفي حاقات حلوة
بدور تقاطعه بضيق أكبر : لا ماني بعروس .. لسى ماتقوزتش !! .. بس يا افندم لو عاوز تورني الحاقات الحلوة .. دنا عايزة اشتري غرفه ليا انا واختي !! ..
سبحان الله دايم اول ما تتكلم مع مصري لازم تقلب معه مصري .. ولو من دون قصد !! ..
المصري طالعها باهتمام وفيه ضحكه : ما شاء دنتي عارفه المصري كويس !! ..
بدور تستهبل عليه وقعدت تضحك : دنا ستي مصريه !! ..
المصري وهو فرحان (كنها بتقرب له ألحين) : بقد !! ..
بدور تضحك : آه .. وهي من الصعيد !! ..
بدور دعست معه للآخر .. ودها تضحك .. والله لا يهين المسلسلات المصريه اللي تربينا عليها !! ..
المصري يضحك : والله دا اهل الصعيد اقدع ناس !! ..
بدور تضحك : متشكر يا بيه .. بس لو تأدر تفرجني على الحاقات الحلوة المعروضه بمعرضكم ده ؟؟؟
المصري وهو تقدمها بابتسامه ويمد ذراعه بطريقة (الليدي فيرست) : تفضلي ..
بدور تضحك و بطريقة شريهان تمشي : ميرسي !! ..
وهي ماشيه مع المصري ويوريها الغرف .. وقعدت تتقدم بين الغرف .. احتارت تختار غرفة .. اول مره تنزل لسوق الأثاث لحالها .. يا تروح مع امها .. أو مع أمجاد !! .. ياكره امجاد لو حاولت تتمرد !! .. تصير شينه !! ... بدور اجزمت بنيها وبين نفسها إنها ما تطلع من المحل إلا وهي مختاره لها غرفه .. حد جدها متحمس و جدتها مهيب معارضه ... وهي تتمشى وتتفرج مع المصري إلا تلتقي مع جدتها اللي كانت مع اللبناني وشكل جدتها حايمه كبدها من ذا اللبناني !! ..
ام ناصر جات لبدور : بدور امشي ...
بدور وهي متملله : جده خليني اشتري على راحتي .. لا تربكني بالله !! ..
ام ناصر وهي زهقت : لنا ساعتين بالمحل .. امشي المغرب بيأذن خلاص وبيصكون المحلات !! ..
المصري وهو يتدخل بابتسامه غبيه : أهلييين بأهل مصر كلهم !! .. <<< الاخ قاط اذنه معهم وعلى باله إن ام ناصر المصريه يوم نادتها بدور بجدتي !! ..
ام ناصر وهي ماتدري وش يخربط عليها : وش تقول انت ؟؟ .. ذاك رفيقك صج راسي .. لا تجي تكمل الباقي !!! ...
المصري ما فهم وش تقصد ... بس حس إنه بدور كذااابه وطالعها نظرات ..
بدور خافت وجرت جدتها على جنب ...
بدور وفيها ضحكه : جده خلاص اخترت الغرفة !! ..
ام ناصر : اكيييد !! ..
بدور وهي مرتبكه لأنها للحين محتاره فيه كم غرفة اعجبتها !! : إيه صدق .. إنتي روحي اقعدي على ذاك الكنب ..
أم ناصر وهي تطالع بساعتها : 5 دقايق لو ماخلصتي !! .. ياويلك !! ..
بدور تضحك وهي متوتره : طيب ...
راحت ام ناصر قعدت على الكنب ...
وبسرعه بدور راحت تمشي بسرعه وهي متوترة بقوة .. طبعا والنشبه المصري كان معها !! ..
بدور وهي تكلمه : أبي هذي الغرفة ...
وبعدها راحت لـ عند الابجورات ..
واختارت كم ابجورة ..
وبعدها راحت لقسم الاكسسوارات للغرف .. واختارت اختيار عشوائي جدا .. بس احلى مافي الموضوع اختارت اشياء غير تقليديه ..
وام ناصر قاعده إلا يجيها ذاك اللبناني ..
اللبناني بابتسامه : لو سمحتي مدام .. انتي جالسى على كنب للعرض .. وممنوع الجلوس .. فلو تقدري تقومي !! ..
ام ناصر وهي حاسه بقلة ذوق هاللبناني : اقول انقلع !! ..
اللبناني وهو منقهر من ام ناصر ومن فظاظتها : لو سمحتي ..
تقاطعه : اقول وخر عني !! ..
وبعدها بثواني يأذن للمغرب .. ليبدأ المحل حالة استنفار .. وخروج الزبائن القلائل منه ...
بدور جات وهي حايمه من المصري اللي معها : جده خلصت ..
المصري : المحل دلوقي بيتقفل .. بعد صلاة المغرب بإزن ربنا بنرقع نتفاهم ...
ام ناصر : طيب بكم الغرفة ؟؟ ...
المصري وهو معه آلة الحاسبة ويحسب بكم مشتريات بدور .. لمن قال السعر انصرعت ام ناصر منه !! ..
ام ناصر وهي معصبه : من جدك أنت ؟؟؟ .. اقول نقص بالسعر ..
بدور تهمس لجدتها برجاء : جده وش ينقص بالسعر !! ..
ام ناصر تهمس لها : خل نكاسره .. الله عليه ذا النصاب غرفة وحده وبياخذ فيها هالسعر كله !! ..
بدور وهي تحاول توطي صوتها : جده هالمحل أسعاره ما تنزل .. أصلا هو يتبع لمؤسسه مو على كيفهم العمال هنا ينقصون او يزيدون بالسعر !! ..
أم ناصر تكمل المصري وتطنش بدور : اقول بتنقص ولا ماراح نشتري من عندك ؟؟ ..
بدور تقاطعهم باعتراض : جده !! ..
اللبناني يتدخل (وهو منقهر من ام ناصر) : الاسعار موحده خالتي !! .. بدك اهلين فيكي .. مابدك بكفيك !! ..
ام ناصر : اقول ..
بدور وهي تسحب جدتها : خلاص جده (تلف على المصري) بعد الصلاة بنجي ندفع لك ..
وطلعوا من المحل .. وام ناصر بس تسب فيه هالمحل و في عماله ... واول ماركبوا السيارة ..
بدور تكلم السواق : روح اقرب مسجد ..
ام ناصر وهي تكلم بدور بعصبيه : وش فيك انتي لا تفهمين ولا تعرفين ؟؟
بدور تحمست ولفت على جدتها اللي جالسه جنبها : ليه ؟؟.. من وين بالله تبين اشتري الغرفه ؟؟ ..
أم ناصر وصوتها يرتفع : من جدك تقطين هالسعر كله في سرير ودولاب !!! ...
بدور عصبت : يا جده .. بالله بكم تبيني اشتري الغرفه ؟؟؟ ...
ام ناصر وهي لـ أول مره تسوي نفسها ديموقراطيه : قلنا اشتري غرفة .. وقلنا خذي من الزين .. بس إنتي المشفوحه (بنبرة احتقار) صدق إنك ماتنعطين وجه ..
بدور وعفاريتها قامت من جدتها : لحظه .. اللي يسمعك يقول خذيت لي غرفة من ذهب !! .. ترى انا يوم شريت راعيت السعر عشانك وبعدين منتي اللي بتدفعين جدي اللي بيدفع !!! ..
ام ناصر وهي تهددها : شوفي يا أم الشر لو ماعدلتي اسلوبك معي ولا ترى والله لأقول لأبو ناصر عن اسلوبك الزفت وإنه لا يشتري لها هالغرفة لك ؟؟ ...
بدور وهي مبققه عيونها : والله ؟؟ ...
ام ناصر بثقه : ما بأحلف .. بس ترى كلمتي ماتنعاد يابدور ولا تتغير !! ..
بدور في خاطرها (من جد .. جدتي كلمتها كلمة رجال ما تتغير ! ) : جده الله يهداك وش فيك (غيرت اسلوبها بدور << داهيه )
ام ناصر : انتي خبله ما تفهمين الغرفه غاليه !! ..
بدور وهي تقرب من جدتها : جده الله يخليك تكفييين وافقي (حبت راس جدتها بالغصب وجدتها تحاول توخرها ) ..
أم ناصر وهي معصبه : وخري عني ..
بدور وهي تتمسكن و تترجا : تكفين الله يخليك .. طلبتك .. الله يخليك يا جده لـ جدي تكفين تكفين ..
السواق وقف عند مسجد : ماما هذا مسجد !! ..
ام ناصر وهي نازلة : يله امشي خلي ننزل نتوضا ونصلي ..يمكن شياطنينك تهجد !! ..
بدور برجاء وهي تنزل من نفس باب جدتها : جده طلبتك طلبه .. إنك تشترين لي هالغرفة !! ..
ام ناصر من دون اهتمام : يصير خير ..
بعدها صلوا في المسجد .. وبعد ما صلوا طلعوا للسيارة ولقوا السواق موجود فيها بعدها تحركوا ورجعوا لنفس معرض الاثاث .. طبعا بدور صجت جدتها طول الطريق بإنها تشتري الغرفة .. تطلبها بأسلوب منكسر .. لأن اسلوب التحدي ما ينفع مع اجدادها .. وهذا اللي اكتشفته !! ..
ام ناصر وهي واقفه عند بوابة المعرض : شوفي يا بدور لازم ينقص لنا ذا المصري من السعر .. وشهو له هالسعر كله بغرفه وحده !! ..
بدور برجاء : جده تكفييين !! ..
ام ناصر وهي تقترح لها حل ثاني : وش رايك ماتخذين لك سرير واحد ما شاء الله عندك..
تقاطعها بدور : جده تفكيييين والله خلاص احبالي الصوتيه انقطعت ونشف حلقي وانا اطلب (باعتراض) ما يصير والله لو اطلب منك وشو ؟؟ ..
ام ناصر وهي تدق جوال : خليني اشوف بأدق على ابوناصر واقوله بالأول ..
وقعدت ام ناصر تكلم ابو ناصر وتحاول تبين له إن السعر غالي .. بس شكله ماعنده مانع ..
ام ناصر صكت من ابو ناصر ولفت على بدور : يله امشي ندخل ذبحنا البرد برا في الشارع ..
بدور : قبل لا ندخل وقبل لا يصير أي شي .. طلبتك يا جده طلب .. إنك ماتكاسرين بالسعر !! ..
ام ناصر بعصبيه وهي تتهم بدور بالسذاجه وقلة العقل : يا خبلة ذولا يشفطون الفلوس من دون داعي ..
بدور وهي متفشلة من جدتها اللي تفكيرها من عصر ألف وحطبه : يا بعد كل اهلي يا جده ويا بعد روحي .. إنتي نور حياتي !! .. إنتي ماما وبابا .. إنتي أنا !! .. طلبتك يا الغاليه لا تحاولين تكاسرين طيب !! ..
ام ناصرو هي تكلم بدور : الله كل هالمدح عشان غرفة !! .. صدق الدنيا مصالح !! ..
بدور في خاطرها مصالح مفاسد المهم تمر هالغرفه بسلام : جده .. ما يحتاج امدحك إنتي تعرفين مكانتك الكبيرة عندي .. ماله داعي اقول !! .. صح ولا انا غلطانة ؟؟ ..
ام ناصر وهي تنتشي بنفسها : اكيييد اعرف ..
بدور وهي بتدخل مع جده : يا حبي لك والله !! ..
وبعد ما دخلوا استقبلهم المصري بابتسامه : اهلن بالستات .. هاه عازوين الغرفة لسى ولا إيه ؟؟ ..
ام ناصر بضيق وبلهجه مبينه الإعتراض : إيه نبيها جعلك اللي مانيب قايله ..
المصري وهو كأنه درى إن بدور تكذب عليه لا جدتها مصريه ولاهم يحزنون ..
المصري وكأنه يبي يتأكد من كذبها وإنه تراني كشفتك كلم بدور : وإنتي يا ست الكل لسى ..
تقاطعه ام ناصر وهي منقهره يمون يتغزل فيها : اقول روح جهز الغرفة بالتريلة الحين بنشلها معنا بدل ما تقعد تتغزل لي في بنات خلق الله !! ..
بدور كانت تمسك ضحكها لا تنفجر قدامهم .. وكان واضح من صوت نفسها المكتوم ضحكها ..
المصري : وحده وحده .. بالأول تدفعوا المبلغ وتاخدوا فاتورة على المشتريات وبعدها نتفاهم على تحميل الأثاث (وبابتسامه يقول) وعلى فكرة بيكون التحميل مقانا ً !! ..
ام ناصر بحده : معصي تاخذون ريال واحد على الشحن !! ... هذا اللي ناقص ..
بعدها كلمت ام ناصر بدور وهي تعطيها جوالها : اقول طلعي لي رقم الوليد من الجوال ..
بدور وهي تاخذ الجوال من جدتها وجهها مولع من الحيا : ليه ؟؟ ..
ام ناصر : بعد ليه عشان يجي يدفع ويتفاهم معهم !! ..
بدور وهي منقهره : خييير !! .. وليه بالله إحنا اللي ماندفع !! ..
ام ناصر : هالمسائل يبي لها رجال ..
بدور وهي منقهره من هالفكر : ليه وش فيهم الحريم ما يقدرون يخلصون معاملتهم بأنفسهم !! ..
ام ناصر وهي تكلم المصري : انت روح ماتشوفنا نتهاوش !! ..
المصري انقهر وراح ..
ام ناصر رجعت تكلم بدور بغيض : اقول إن ما كلمتيه الحين ما فيه غرفة (ولفت ام ناصر يعنني بأروح ) ..
بدور مسكت جدتها ولفتها وبرجاء قالت : خلاص يا جده سوي اللي تبين !! ..
ام ناصر : زين إنك بديتي تفهمين وعقلتي !! ..
بدور تكلم جدتها وهي مقهورة من الوليد بعد اللي صار ذاك اليوم : جده اسمعيني الوليد وش دخلنا فيه .. مو لو اكلم ابوي احسن يجي !! ..
ام ناصر : لا مسيكين تجرجرينه .. اجل دقي على مشاري !! ..
بدور مقهورة : بعد سوالفه مع امجاد !! .. لا والله ماابي اشوف خشته ولا اسمع صوته ولا ابيه يسوي لي معروف !!! ..
ام ناصر انقهرت : الله يقطع ابليسك !! .. اجل دقي على فهد !! ..
بدور وهي معصبه وفيها نبرة استفسار : اخو مشاري الكبير !! ..
ام ناصر وهي ترفع صوتها من القهر : قولي مهوب عاجبك بعد ؟؟ .. اقول سرينا بس صدق ماتنعطين وجه !!! ..
بدور وهي تمسك جدتها برجاء : لا عاجبني .. ومكيفه عليه بعد !! ..
وفعلا دقت على فهد وكلمته جدتها .. وبعدها بربع ساعه جاء .. وتفاهم مع المصري وشروا الغرفة وهم طالعين .. قالهم الغرفة بتوصل لهم بكره الصباح !! .. بدور انبسطت ولاحظت على فهد ولد عمها الصرامة .. وتذكرت زوجته زينة !! .. ياكرههم عائلتنا .. أبي اشوف واحد طبيعي !!! ... تذكرت الوليد وكرهت نفسها !! ..
***
راحت تشيك على التحضيرات .. ماتدري ليه علاقتها بخالتها صارت شوي باردة .. وشوي رسميه .. يالله وين كانت علاقتهم .. ووين صارت ؟؟ ... حست بالعبره ... هذي اخت امك يا نادية ... هذا اخت امك العنود !! ... هذي باقي اهلي .. وهذي خويتي .. وهي من ربت اخوك فيصل يوم كنت لاهيه بـ راكان واهله !! .. هي من احتوتني يوم تخلوا عني اهل زوجي واهلي ميتين .. ياربي ساعدني .. ابي ارجع معهم مثل اول .. بس مشكلة عبدالعزيز وامجاد مالها حل !! ...
سمعت صوت الجرس يدق .. خلت الشغالة تروح تفتح .. ونزلت تستقبلها في صالة الاستقبال .. أول ما دخلت منى مسحت دمعه من عيونها ناديه ... وراحت تستقبل خالتها اللي جايتها ...
نادية وهي تسلم على خالتها : يا هلا تو ما نور البيت ..
منى وهي تطالع نادية بابتسامه ممزوجه بتعجب: هذا من اللي مسويته بنفسك ..
ناديه تحاول تضحك : ههههههههههههه وش مسويه انا ؟؟ ..
منى : اسألي نفسك ..
نادية : والله يا خالتي ..
تقاطعها منى وهم يدخلون : لا تحاولين تبررين احنا عشرة عمر يا نادية ..
تلحقها ناديه وهي تضحك مجامله لخالتها مع أنها تتصبب حرجا منها !! ..
اول ما دخلت منى للصاله شافت مهند وسلمت عليه .. وبعدها قعدوا نادية ومنى ام عبدالعزيز وبعد ما قامت نادية بواجب الضيافة مع خالتها .. وكأنها تحاول تكفر عن معاملتها الجافه لها أو الباردة !! .. خالتي فاهمتني وهذا اللي يقهر !! .. ما يمديني اخش عنها شي ابد !!! .. طبعا ام عبدالعزيز منى خلت الامر يمشي عادي وقعدوا يسولفون عادي جدا جدا ... وبعدها تقريبا بنص ساعه بدت تدخل منى بالمحذور مع نادية !! ..
منى بابتسامه واضحه معانيها : اقول ندوي .. اخبار امجاد وبدور ؟؟ ...
نادية تبتسم وهي تحاول تصب بيالة شاهي لخالتها : بناتي آه .. بخير ...
منى وهي تطالع فيها وهي تصب الشاهي وتحط السكر وهي تحاول تلهي نفسها لا تطالع بعيون خالتها ...
منى بابتسامه وهي تحط رجل على رجل : الحمدلله .. إلا ماقلتي اخبار امجاد بعد خطبتها !! ..
نادية وهي تمد البيالة لخالتها : بخير .. والحمدلله ..
منى وهي تاخذ البيالة من نادية : كيف نادية بخير !! .. ممكن تشرحين لي !!! ...
نادية وهي ترجع شعرها ورا اذنها وبابتسامه باردة : يعني الحمدلله راضيه ومافيها شي ...
منى تطالع بنادية : بس يوم شفتها بالعرس مع جدتها ما طرت لي موضوع خطبتها !! ..
نادية وهي تتصرب عرقا من الحرج خالتها حجرت عليها : لأن الموضوع كان سر وماصار شي رسمي عشان تنشره !! ..
منى وهي تطالع بنادية بنظرة تفصح : آها ... طيب ليه جدها قال لعبدالعزيز إنها مخطوبة لولد عمها دام الموضوع سر باقي ماصار شي !! ..
نادية تبتسم وتحاول تكون عادي مع إنها مرتبكه وواضح عليها : ليه تلاقى ابو ناصر مع عبدالعزيز !!! ...
منى وهي تطالع بنظرة : إيه ولا ماعندك علم !! ..
نادية وهي تتكلم بجديه(تذكرت كلام امجاد) : ابد !! ...
منى قعدت تقولها وش صار ذاك اليوم ... نادية انقهرت مره وبان هالشي على ملامحها ...
منى وهي داخله على الموضوع سيده من دون أي تلميحات : نادية ليه تخشين علي ؟؟ ...
نادية تطالع بخالتها منصدمه وقالت تحاول تدافع عن نفسها : ماخشيت عليك خالتي ..
منى تطالع فيها وكأنها تقول (ليه تغيرتي يا نادية) : ندوي .. لو كنتي حاسه إني غريبة ومالي دخل اسأل صدقيني ماراح ازعـ ..
تقاطعها نادية : حشى يا خالتي والله السالفة مو كذا (بنبرة ضعف) إنتي ماتدرين وش انا فيه ؟؟ ..
منى طالعت بنادية .. يعني كملي ..
نادية تتكلم وهي منحرجة وبنفس الوقت مقهورة : يا خالتي .. وش تبيني اقولك .. خايفة اقولك وإنتي تعرفين يعني خطوبة عبدالعزيز لـ امجاد .. اقصد يعني مابي مشاكل ..
منى تطالع بنادية باهتمام وهي فاتحه عيونها على الآخر : يعني جدها قال إنها مخطوبة لولد عمها عشان يرد عبدالعزيز ؟؟؟ ..
نادية وهي تطالعها وكأنها حتى هي تدور على إجابه : شكل السالفه كذا والله !! .. لأن امجاد بعد مارجعت من الزواج ذاك اليوم قالولها إنه بتتزوجين ولد عمك !! ..
منى : وامجاد موافقه !!! ...
نادية بقهر على بنتها : مواقفه أو لأ ... ماعاد ينفع .. لأن الخطبة صارت !! ...
منى غمضت عيونها بقهر ... وبعدها فتحتها وطالعت نادية وبنبرة بارده : اصلا كنت متوقعه لأني يوم لقيتهم ذاك اليوم بناتك ماكان مبين عليهم الموضوع ابد ..
نادية وهي تكلم خالتها برجاء : خالتي تكفين لا تزعلين مني .. والله ما قصدي شي ..
منى تطالع بـ نادية : سبحان الله الظروف هي اللي تحكم بني آدم .. عاذرتك يا بنت اختي ..
نادية بقهر : حسبي الله على راكان واهله .. كني ماشفت منهم خير لا يوم كنت عندهم ولا يوم كنت بعيده عنهم !!! ...
منى تطالع بـ نادية وبعيونها سؤال : الحين بناتك وش صار عليهم ؟؟ ...
نادية ابتسمت بمرارة : بدور ببيت اجدادها .. وامجاد ببيت ابوها !! ..
منى وهي تطالع باستغراب : ليه متفرقين ؟؟؟ ...
نادية وهي تطالع بعيون خالتها وبعيونها ألم ام على ابنائها : بدور ماتبي تعيش عند مرة ابوها .. وامجاد مقهورة من تدخل جدها في حياتها .. خليها على الله !! ..
منى بمواساة : امجاد لازم ترجع لـ بيت جدها .. لا تتمرد ترى هي كذا بتقضي على نفسها !! ..
***
راحوا كلهم يتعشون عند راكان .. بدور راحت معهم .. وهي حاطه ببالها امجاد ترجع .. يعني بترجع !! ..
تجمع الكل بالصاله .. ابو وام ناصر .. راكان ومرته ... امجاد وبدور .. وزيودي .. طبعا سلمت بدور على امجاد اختها سلام بارد امجاد ماتت ضحك من اختها .. بعدها قعدوا الكل يسولف ..
بدور تهمس لـ امجاد : اقول امجاد تراك بترجعين معنا اليوم ؟؟؟ ...
امجاد وهي تهمس لها بالمثل : اسمحي لي ما بأرجع ..
بدور وهي مقهورة : امجاد خلاص .. درينا إنك اضربتي .. ارجعي احسن لك ..
امجاد وهي تهمس لأختها : بدور .. كولي بصلة!! .. تدرين إني زعلانه ..
بدور : بس جدي جاك !! ...
امجاد : ولو ما يكفي !! ... (لفت على بدور ) جدي قهرني على حياتي !! ..
بدور من داخله تعذر امجاد : امجاد خلاص ارجعي وبلا دلع ..
امجاد وهي تنطش بدور .. ماردت وقعدت تسمع سواليف الباقيين ..
بدور ومسويه اغراءات : ترا جدي ركب لي دي إس إل .. وشريت غرفه جديدة لنا !!! ...
لفت امجاد وهي مستغربه وفيها ضحكه : جد !! .. والله تطورت المنفوحه ؟؟ ...
بدور انقهرت : كولي تبن !! ... من جد امجاد ارجعي .. حتى امي مكلمتني وقالت لي إن خالتي منى قالت امجاد لازم ترجع !! ..
امجاد اللي وصل هالاسم لـ بلورة قلبها وطرقها بعنف : خالتي منى !!(بعيونها ضعف)قالت هالكلام !!! ..
بدور بابتسامه خبيثه : إيه والله .. ترا امي قالت لي لا تقولين لأمجاد .. بس قلت لك .. لأن خالتي منى تدري عن كل اللي صار ؟؟؟ ...
امجاد وبعيونها بريق : ووش دراها ؟؟ ..
بدور : امي قالت لها ...
أمجاد قعدت تطالع بأهلها وهم يتكلمون .. كانت تهز رجلها بتوتر وعصبيه !! ...
بعدها بدقايق تكلمت امجاد ...
امجاد تهمس لبدور من دون ما تطالع فيها : تدرين إن مشاري كلمني ؟؟ ..
بدور لفت بقوة على اختها :جد !! ..
امجاد : والله .. (بتوتر) يقول ارجعي لبيت جدي .. واللي خلاك تطلعين بينتهي!! ..
ابو ناصر يتدخل و يكلم امجاد : اقول وش عندك ساكته يا أمجاد ؟؟ ...
بدور تتدخل بابتسامة : تقولي ودها ترجع معنا ؟؟ ..
ام ناصر وهي قاعده جنب ولدها قالت بقهر : بعد ما طلعت !! .. وبعد اللي صار ؟؟ ..
امجاد جات تتكلم : ياجده بدور قاعده تتكلم من راسـ ..
إلا تقاطعها بدور : ههههههههههههههه امجاد تقولي قبل شوي .. إنها مستحيه من ابوي يخاف يزعل لو تروح !!! ..
راكان ابتسم : صدق إني تعودت عليها .. بس هي تختار المكان اللي يريحها .. ماراح انشب لها ..
رحاب وهي مولعه من امجاد : صحيح .. تروح مع اختها احسن لها !! ...
امجاد عندها الكل يتكلم إلا رحاب .. تقوم شياطينها : وانا اقول لو اختي تجي عندي هنا افضل ؟؟؟؟ ...
رحاب بققت عيونها .. هي الحين بعله .. تجيها علتين !! ... عز الله تموت ناقصه عمر!! ..
أم ناصر تنطق ولـ اول مره من جانب عاطفي عندها : بدور ما تطلع من عندي !! ..
لفت بدور على جدتها وبشفتيها ابتسامه مستغربه وواسعه !! ...
ابو ناصر يكلم امجاد : على العموم أمجاد .. تبي بيت ابوها .. بيت جدها .. تختار اللي تبي ؟؟ .. بس نفسي إنها تجي معنا .. ما يصلح اختين مشتتات !! ..
بدور بابتسامة واسعه وبثقه متجليه : خلونا نسولف .. ولـ بعد العشاء والله يانا يا امجاد لو ماترجع معنا !!! ...
ام ناصر بابتسامه كبيرة : عاد توني شاريه لكم غرفه جديده !!
طالعت بدور بجدتها لازم يعني تنسب لنفسها كل شي !! ... أما ابو ناصر ابتسم لـ مرته !! ..
راكان طالع بـ رحاب .. يعني يالله حضري العشاء !! ...
رحاب وهي توقف : يالله بالأذن بروح أحضر العشاء !! ..
***
كان يضحك على ولد عمه وعلى تنكيته ...
عبدالعزيز وهو يضحك : من جدك محمد ترا مالك داعي ..
محمد يضحك وهم بالسيارة : المهم ماعلينا .. قولي وش صار على سفرتك ؟؟؟..
عبدالعزيز بابتسامه : والله تمام .. إلا ياخي وين خالد ما اشوفه ؟؟ ..
محمد : ما ادري عنه .. آخر مره شفته قبل 5 أيام ...
عبدالعزيز : وليه وش عندك على هالقطاعه ؟؟؟ ...
محمد وهو يوقف عند الإشارة : تعرف خالد .. دمه نار ومايتحمل نفسه فـ كيف بغيره !! ..
عبدالعزيز بضحكه خبيثه : يعني مسوي لك شي ؟؟؟ ..
محمد لف عليه وبعيونه نظرة : لا ابد .. (بابتسامه) وبعدين انا اكبر منه ..
محمد يغير الموضوع : إلا ما قلت لي وش صار على خطوبتك من انسابي ؟؟ ...
عبدالعزيز وهو يعدل جلسته بعد ان كانت مسترخيه : ما صار شي .. وبعدين ما ابي شي ألحين ..
محمد : يعني كيف .. ما تبي احد يدري ؟؟ ..
عبدالعزيز بضحكه : تقريبا كذا .. وبعدين يوم كلمت ابوك !! .. قالي في طلعة للبر ..
محمد بابتسامه : قالك ابوي عن كشتة البر !! ...
عبدالعزيز وهو منبسط وهو يشوف الإشارة تفتح خضرا ويمشى محمد : إيه قالي .. عشان كذا ودي ءأجلها إلى ما بعد الكشتة ..
محمد وهو يحرك السيارة ويمشي : حلو حلو ..
عبدالعزيز وهو يتكلم بأريحيه لا متناهيه : محمد وش رايك بأنسابك ؟؟ ...
محمد لف على عبدالعزيز باستغراب : ما تعرفهم ؟؟؟ ...
عبدالعزيز يبتسم : لا اعرفهم ... (يضحك) بس اخاف يكونون مثل بنت راكان بن فهد !! .. عليهم حركات مدري وش تبي ؟؟ ...
ضحك محمد وهو يسوق بحذر لأن الشارع كان زحمة : تدري .. إن الله نجاك منهم !! ..
عبدالعزيز بابتسامة تحتضر على شفاته : على العموم الله يستر علينا وعليهم ... مادريت إنهم خطوبها لولد عمها ؟؟؟ ...
محمد وهو يدري : طيب منهو فيهم؟؟؟ ...
عبدالعزيز من دون اهتمام : زين مني عرفت ابوها وعمها وجدها !! .. تبيني اعرف باقي العائلة ؟؟ ..
محمد وهو كأنه يتذكر : اذكر فيه مجموعة من الشباب شكلهم من نفس العايلة لأن الشبه بين ..
عبدالعزيز وهو يكلم محمد : جدها ذاك الشايب !! (بقهر) تقول ودي اتطمر ببطنه !! ..
محمد مات ضحك : ههههههههههههههه من جد !! .. ولا ابوها وعمها !! .. احمد ربك إنك ماخذيت منهم ..
عبدالعزيز بنبرة باردة في لفحات حب مبطنة محد بيقدرها غير عبدالعزيز : صدقيني هي غير !! ..
محمد وهو يوقف السيارة عند محل عشان يبي يشوف له جوال جديد(بابتسامة) : اقول تراك بتاخذ خالة بنتي .. لا تزودها مدح بخطيبتك القديمة ؟؟؟ ...
عبدالعزيز وهو ينزل من الباب الثاني ويتسند على السيارة من فوق : خلني اخطب هذي اول وبعدها من حقك تزعل (يبتسم) ..
محمد ابتسم و مشى ومشى معه عبدالعزيز ...
محمد : طيب بتكلمهم هم ألحين ؟؟؟ ...
عبدالعزيز : لأ ... (وكأن فكره لمعت بمخه ألحين) محمد !! ..
محمد وقف على كلمات عبدالعزيز : هلا ...
عبدالعزيز بابتسامه : بكشتنا للبر .. (بحماس) ابي انسابك يجون معنا ؟؟؟ ...
محمد تفاجأ : يجون !!! ...
عبدالعزيز وهو متحمس وبشفته ابتسامه : إيييه يجون !! .. اعزمهم يا عمي !! ..
محمد وهو متفاجأ : تصدق ماخطرت على بالي !! .. بس كني سمعت ابوي يقول إنه يبي الكشته عائلية جدا ..
عبدالعزيز بابتسامة وهو كأنه يسكت محمد بـ رد : محمد ياخوي .. عادي انت اقترح الموضوع على عمي وانا بأوافقك .. ماهقيت عمي بيرفض انسابه يجون معنا للبر !!! ...
***
رجع من ساعه متأخره للبيت ... دخل البيت بهدوء .. طلع فوق يبي يدخل ينام ... وهو طالع الدرج سمع صوت أمه .. تتكلم مع مضاوي وتسولف معها ...
مضاوي واللي كانوا قاعدين في الصاله بالطابق الثاني : يا جعلهم اللي مانيب قايله !!! .. من جدك يمه هذا اللي صار ؟؟؟ ...
منى بقهر وهي متمدده على الكنبه : شفتي ؟؟ ... قالت لي نادية بنفسها اليوم ؟؟ ...
مضاوي : يعني كلامك صحيح .. امجاد ما كانت تدري .. وجدها بيوم العرس قال يرد اخوي بأنه يخطبها لولد عمها ؟؟؟؟...
منى اومأت راسها بالإيجاب والموافقه على كلام بنتها ...
مضاوي وهي تحط يدها على راسها وتقول بقهر : ياربي منهم .. صدق عليهم قلة ذوق !! .. وبعدين مين هم عشان يردون عبدالعزيز اخوي ؟؟ ...
منى : يا مضاوي .. خلاص امجاد الله يستر عليها .. مادام إننا بدينا صفحه جديدة وبنخطب شوق لـ عبدالعزيز .. خلاص خلصت علاقتنا بهذيك العائلة ؟؟؟ ..
مضاوي وهي مستغربه رد أمها : طيب و أمجاد ؟؟؟ ...
منى ترد بحنيه : والله يا مضاوي لو بيدي شي واحد كان سويته ... بس انا وام ناصر مانتفق .. وعمرها ماحبتني .. ولا حبت نادية .. يعني ما اقدر اسوي أي شي لهم !! ..
سمع هالكلمات عبدالعزيز ... انقهر .. وحس بالدم يفور بعروقه !! ... يا لصفاقة هـ الأهل .. ويا سلطتهم على ابنائهم الغبيه !! ...
عبدالعزيز وهو يتقدم لـ امه ومضاوي : مساء الخيـــــــــر !! ...
لفت مضاوي وهي منصدمه .. ومنى كذلك ...
منى وهي تعدل جلستها وتحاول تبين إنها عادي : هلا .. هلا بعبدالعزيز !! ..
عبدالعزيز وهو يتكلم بنبرة هادية تحمل تحتها براكين فايره : من جد اللي سمعته يمه ؟؟؟ ...
منى وابتسامه ميته على شفايفها : وشو ؟؟ ... أي سمعته ؟؟؟ ...
عبدالعزيز وهو يقبض يده بقوة : صدق اللي قلتيه قبل شوي ؟؟؟ .. إن ابوناصر خطبها لولد عمها عشاني ؟؟؟ ...
منى عرفت إن عبدالعزيز عرف .. وبهدوء استقرت .. هزت راسها بالإيجاب !! ...
***
لكم مني كل الحب والود والإخاء
|
29-07-08, 01:15 AM
جديد مواضيع قسم الارشيف
العرض العادي
