كاتب الموضوع :
همسة عشق
المنتدى :
الارشيف
الجزء الثالث
القلب راح مع روحة الغالي ..
محمد : يمه انتي لا تفكرين في هالسالفة ان قايل لج من قبل مستحيييل اتزوج عقب سارة .. عن اذنج يمه عندي اشغال مع السلامة
ام محمد بحزن : الله يسلمك
هذي مو اول مرة تفتح وياه هالسالفة وكل مرة يقول هالكلام .. من بعد ما ماتت سارة حبيبته وخطيبته كان يوم عرسهم وكان محمد طاير من الفرح وأخيراً بيجتمع ويه الي يحبها لكن القدر لعب لعبته واخذ منه حبيبته وبدل ما يصير الفرح صار الحزن ومحمد من داك اليوم وهو شايل فكرة الزواج من راسه لأن ما في انسانة ممكن تحتل مكان سارة الي ملكت قلبه وراحت ومن يوم وفاتها حلف انه ما يحب وحده غيرها وخلى حواجز بينه وبين الناس تغيرت شخصيته من الانسان الرومانسي الى الانسان العملي الي ما يهمه إلا شغله وبس .. امه كل يوم تفتح وياه سالفة الزواج لكن كل يوم يقول نفس الكلام القلب ملكته وحدة مستحيل تملكه غيرها .
ريم : صباح الخير
ام محمد : صباح النور
ريم : شخبارج مامتي ؟
ام محمد تتنهد : الحمدلله على كل حال
ريم : شفيج مامي ؟
أم محمد : أخوج معور لي قلبي
ريم : ويش سوى ؟
أم محمد : ابيه يتزوج واشوفه مستانس ويه اسرته
ريم : اماه تدرين ان محمد عقب الي صار له مستحيل يتزوج انتي اكثر وحدة كنتي تدرين شكثر محمد يحب سارة
أم محمد : وهذا الي معور قلبي اكثر كل يوم اشوفه يموت
ريم : بعيد الشر عنه
ريم في خاطرها : الحمدلله ما فتحت الي سالفة امس
أم محمد توها متذكرة : تعالي ريمو
ريم في خاطرها : شكلي حسدت روحي
ريم : هلا مامي
أم محمد : أمس شسويتي في سماح ؟
ريم ببراءة : ما سويت شي
أم محمد : عجل ويش هالعصير الي عاطتنها اياه ؟
ريم : اماه هذا عصير شايفته في واحد من المنتديات وشكله حلو قلت دام سماح ويانا اسويه اخليها تذوقه
أم محمد : عجل ليش البنت طلعوا عوناتها على برا ؟
ريم : ما ادري اماه انتي شفتيني اشرب منه وما صار فيني شي يمكن هي ما عجبها
<< كلام البارحة تدربت عليه
أم محمد : والله ان هالبنت داخله قلبي يا ليت محمد يتزوجها
ريم انقهرت بس ما بينت لأمها : اماه متى ما يبي يتزوج بقول لكن خليه على راحته مرده بيتزوج
أم محمد : يعني اخليه على راحته الحين ؟
ريم : اماه لا تضغطين عليه بعدين هو منه ومن نفسه بجي يطلب منج تخطبين له
ريم في خاطرها : وهذا وجهي اذا قال يبي يتزوج ولا من الي دشت قلبها ؟ سماحو السوسة يمه اسمحيلي كللش ما عندج ذوووق
ريم : بس اماه لا تفكرين فيه محمد مو صغير
أم محمد : الي قده عندهم اولاد
ريم : يمه بعده صغير توه 25 سنة
أم محمد : على الاقل بس نخطب له
ريم : بس اماه سديها سيرة
أم محمد بشك : ليش انتي ما تبينه يتزوج ؟
ريم : امبلى ابيه يتزوج وافرح في زواجه لكن يا ماما يا حبيبتي جيفه تبينه يفرح وانتي تضغطين عليه ؟ انتي تبينه يفرح ما تبينه يعيش في هم خليه على راحته
أم محمد : متى يجي يقول لي اخطبي لي
ريم : ان شاء الله قريب
أم محمد : ها ريمو ما عليج امتحانات ؟
ريم : للحين ما بدينا ماامي بليييز خليني ارتاح شوي
ام محمد : شدي الهمة كلها سنتين وتتخرجين
ريم : شكلي ما بتخرج الا إذا طلعت روحي
ام محمد : ما اوصيج على المراجعه
ريم : يصير خير
<< يعني ما في امل ارااجع
بيت جدة محمد
10 الصبح
جدة محمد اسمها عذايب لكن ينادونها ام جاسم على اسم ولدها الكبير الي هو ابو محمد تعيش في بيت شعبي بروحها بيتها كبير نسبياً في حديقة كبيرة و 5 حجر رفضت تروح بيت ولدها عقب ما توفى زوجها تحب بيتها وتحس فيه بالامان تعيش وياها خدامتها وعقب ما توفى ولدها ابو محمد طلب منها محمد تعيش وياهم لكن نفس الشي رفضت وفي العطلة يجون بنات ولدها ينامون وياها ويوم الجمعه لازم كل العائلة تتجمع في البيت
أم جاسم : حكييمة حكموو << اسم خدامتها
حكيمة : نأم ماما
أم جاسم : روحي بطلي الباب
حكيمة تهز راسها : انجين ماما
راحت حكيمة تبطل الباب وشافت محمد وطارت من الفرح
<< ترا حكيمة تحب محمد لوووولز
صارت في عيونها لمعة عجييبة وهي تشوف محمد
حكيمة : أهلاً أهلاً انت شلونك ؟
<< تعدل كلامها قدامه
محمد : هلا حكيمة وين ماما ؟
حكيمة : قاعدة في حديكة كبيرة
راح محمد عنها وهي تتبعه بنظرها تنهدت وهي تشوفه يمشي قدامها
محمد شاب في الـ 25 من عمره طويل وسيم بدرجة كبيرة اسمر عيونه كحيلة وواسعه ولونها بني غامق وخشمه طويل كأنه سلة سيف و وشعره ناعم لونه اسود مثل سواد الليل ومطولنه الاخو
محمد : صباح الخير
أم جاسم : هلا بالطش والرش وماي الورد الي بالغرش هلا بالغالي حياك
محمد يبوس جدته على راسها : شلونج ؟
أم جاسم : دامني كل يوم اشوفك انا بألف خير وعافية أنت شخبارك ؟
محمد : الحمدلله
ام جاسم : ألحين بقول لحكمو تخلي الريوق
محمد : أي ريوق هالحزة ؟ انا تريقت الحمدلله .. قولي لي انتي تريقتي ؟
ام جاسم : الحمدلله
محمد : أخذتي دواج ؟
ام جاسم : اي حكوم ما تقصر تحن على راسي لين ما اخذه
<< حكيمة تحب ام جاسم لأنها تعاملها زين
أم جاسم : إلا وين امك وريم ؟
محمد : في البيت
أم جاسم : ليش ما جبتهم ؟ خاطري اشوفهم
محمد : ما يصير خاطرج إلا طيب الحين اتصل ليهم يجون
أم جاسم : لا خلهم يمكن مشغولين
محمد : ما عندهم شغلة إلا مقابل بعض او قلت اني بجي هني انجان جوا
اتصل محمد لأمه وقال ليها تجي بيت جدته طبعاً ما صدقت خبر سحبت بتها وجوا
ريم تصرخ : حمود يا الدب هاارب عنا ها ؟
ام جاسم : هلا بالغاايبة
ريم : هذا حمود هرب عني
أم محمد تبوس راس أم زوجها : شخبارج عمتي ؟
ام جاسم : بخير دامكم بخير
ريم تبوس راس جدتها : شخبارج جدتي ؟
ام جاسم تضربها على خفيف : جم مرة اقول لج قولي امي العودة
ريم : ولا يهمج امايه العودة
ام جاسم : اي الحين مرة سنعة
ريم : أوكي ما قلتين شخبارج ؟
أم جاسم : بخير دامني شفتج
ريم : احم احم اخجلتيني حجيه صرت استحي
أم جاسم : ومن متى ريمو تستحي ؟
ريم : يعني لازم تفشليني ؟
أم جاسم : أنتي تحبين تتفشلين
ريم تغير السالفة : أنزين سمعي يقولون لج ان احنا على درايش الامتحانات النهائية يعني ادعي لي
أم جاسم : بعد شنو درايش ؟
ريم : ما ادري المدرسات يقولون لينا يا بنات انتون على درايش الامتحانات
<< قلبت ابواب إلى درايش والعجوز مضيعة
ام جاسم مع انها ما فهمت شي بس قالت : الله يوفقج
ريم : من بؤك لباب السما ياااااارب
عقب سوالف وهذرة قررت ريمو تنام ويه جدتها وطبعاً محد قدر يعترض
في بيت أم عذايب
11 الضحى
قعدت عذايب من النوم غسلت وجهها وراحت الصالة تشوف امها تفاجأت يوم ما حصلتها راحت ليها المطبخ ونفس الشي ما شافتها راحت ليها حجرتها شافتها نايمة استغربت عذبوه امها متعودة تقعد من وقت راحت بتقعد امها شافت لونها شاحب حاولت تصحيها بس امها ما صحت جابت ماي ورشت شوي على امها ونفس الشي طاحت دموع عذبوه الي عمرهم ما طاحوا ..
نهاية الجزء
تتوقعون ام عذبوه ويش فيها ؟
|
29-05-08, 08:20 PM
جديد مواضيع قسم الارشيف
العرض العادي
