كل المآسي تنتهي بالموت وكل المهازل تنتهي بالزواج
الجزء الثامن عشر

بيت أم جاسم
1ونص الليل
__________
ريم بفرحة : وأخيييراً شفت حمود معرس
هديل تبتسم : ما صدقنا يا اختي
أسيل : عقباالنا
ريم : آآآمين
هديل : ما صدقت جابوا ليها طاري العرس
ريم : يا اختي نأمن مستقبلنا لا نظل عوانس
أسيل تساسر ريم : شفيها عذايب ساكته ؟!
ريم ترد عليها بنفس الوتير: ما ادري يمكن مستحية
أسيل : يمكن
هديل : ريا وسكينة شفيكم تتساسرون ؟
ريم : سلامة قلبج
يتكلمون لكن ما تدري ويش يقولون وكأن أصواتهم تجي من بعيد الي صار ليها في هاليوم واجد ..عمات أول مرة تشوفهم.. بنت عم ما تطيقها.. وملجتها وهذا الي خلى بنت عمها تكرهها أكثر ..تبي تختلي بنفسها تبي ترتب أفكارها قالت ليهم
عذايب : تصبحون على خير
هديل + أسيل + ريم : وانتي من اهل الخير
راحت حجرتها وحاولت تنام لكن النوم جافاها .. أول مرة يصير فيها هالشي .. لكن منها هي تهورت وجذبت بس علشان تقهر سماح لكن الجذبة انقلبت عليها وهي الي طاحت فيها .. تبي تتكلم ويه خدوج لكن ما عندها تلفون الحين حست بقيمة التلفون لو هي ماخذة تلفون مثل ما قالت أمــ .. خالتها .. حست بشوق ليها لو هي وياها ما صار الي صار تبيها جنبها تبيها تضمها وتسمح على راسها تبي تسمع صوتها الي يهديها تبي حضنها الدافي تبي تلمها وتقول ليها شكثر اشتاقت ليها تبي تقول ليها حتى لو ما كنتي امي الي ولدتني انتي امي الي ربيتيني وما عرفت ام غيرج انتي امي الي حضنتني من قساوة الدنيا
سالت دمعة حارة على خدها ومسحتها بكل عنف ما بتخلي دموعها تسيل ومحمد بتتفاهم وياه

في بيت سامي
7 الصبح
__________
بينات : ويش قالوا ؟
محمد: اليوم بيتصلون له
بينات : مشكور محمد لو ما انت ما ادري شراح نسوي
محمد : انا قلت له يشتغل معانا ما رضى
بينات : يقول ما يبي واسطات
محمد : هذي المشكلة .. الحين ما في شي بدون واسطة
بينات : أوكي الحين بيصحى مع السلامة
محمد : مع السلامة
دقايق ويرن التلفون
راحت بينات وردت عليه
.... :السلام عليكم
بينات : عليكم السلام
.... : هذا بيت سامي الــ ..
بينات تبتسم وعرفت ان خطتها تنفذت : اي لحظة شوي
أخذت التلفون وعطته سامي وانتظرته يخلص المكالمة
بينات تسوي روحها ما تدري : خير
سامي بفرح : قبلوني يا بينات
بينات : مبرووك حبيبي .. متى بتبدي الشغل ؟
سامي : من اليوم .. اوكي بروح اجهز للشغل
بينات : أوكي واني بسوي الريوق
فرحت لفرحة زوجها وقالت في خاطرها : شكراً محمد

بيت أبو ناصر
في نفس الوقت
________
منصور : ناصر ما شفت سماح ؟
ناصر : لا ليش ؟
منصور : بس جذي
ناصر : أكيد نايمة
منصور : أطق باب غرفتها ما ترد
ناصر : يعني وين بتروح ؟ أكيد في غرفتها .. تلقاها البارحة سهرانة
منصور : يمكن .. انزين شرايك نطلع نتريق ؟
ناصر : انت عطالي بطالي انا وراي شغل
منصور : الي يقول الحين كلش ما بيمشي الشغل بدونك
ناصر : شي طبيعي وراي مرضى أعالجهم
منصور : اوكي روح عالجهم ولا تنسى تعالج روحك
ناصر يهز راس اخوه: لسانك يبي له قص
منصور : انزي خلاص روح لا يطير المستشفى
ناصر : ولا يهمك قوم نتريق برا
منصور : تدري انك احسن اخو في الدنيا
ناصر : ادري
منصور : بروح اشوف سماح اذا بتجي ويانا
ناصر : أوكي

بيت أم خالد
________
ندى تنادي: يمه وينج ؟
أم خالد : في المطبخ
راحت ندى المطبخ : يمه وين هدى ؟
أم خالد : نايمة
ندى : بروح أشوفها قبل لا اروح الشغل
راحت ندى لأختها وانصدمت بالي شافته
وجه اختها شاحب شحوب مو طبيعي ومرجعة وحالتها مأساوية
صرخت ندى : يمه
ارتاعت من صرخة بنتها وراحت تركض : شصاير ؟
ندى : يمه هدى ما ادري شفيها
أم خالد : بنظفها وبتصير زينة
ندى : يمه شوفي لونها صايرة صفرا لازم نوديها المستشفى
أم خالد : بتتأخرين على شغلج
ندى : مو لازم اروح اليوم
انتظرت امها أخذوا هدى للمستشفى

بيت فيصل
8 الصبح
________
هنادي : ما ادري ويش اسوي يا فيصل دلال معاندة ومو راضية تغير رايها
فيصل: حاولي فيها
هنادي: أمس طول الوقت وانا احن على راسها انت لو تشوفها بس هزأتني
فيصل يبتسم : أفاا دلالو دلة الجاي تهزأج
هنادي : تخيل .. من صاروا عوناتها حمران والشرر يطلع من عيونها خفت على عمري وسكت
فيصل : ان شاء الله خير
هنادي : ليش ناصر ما يخطبها ؟
فيصل : ما تجوز الخطبة على خطبة
هنادي : وويش بتسوي الحين ؟ دلال موافقة ومو راضية تغير رايها مع اني احس انها وافقت بس علشان تحرق قلب ناصر
فيصل: ابي اعرف شلون تركيبة عقلها
هنادي تبتسم:الغباء متوارث في العائلة
فيصل: بلا اهانات لو سمحتين ويا الله مع السلامة
مشى فيصل ولحقته هنادي
هنادي : زعلت حبيبي
فيصل يبتسم : وانا اقدر .. حبيبتي حاولي تقنعين اختج المجنونة
هنادي تبتسم : اوكي

شقة سالم
9ونص الصبح
________
قامت تدور في الحجرة الي هي فيها أول مرة تشوف هالحجرة هي في وين ؟ هذي مو حجرتها ويش صار فيها ؟ راحت للباب وحاولت تبطله لكن الباب مقفول قامت تضرب على الباب وتنادي تبي أحد يبطل ليها الباب قعدت على الارض وتبجي بحرقة قلب تذكرت ويش صار ليها البارحة قالت في خاطرها : الله يلعنك يا خالد يا النذل
سمعت صوت المفتاح في الباب وقفت تستعد لهجومها على خالد لكن الي فتح الباب مو خالد واحد غير : أنت منو ؟
سالم بخبث : أفا نسيتيني ؟
سماح : وينه النذب الحقير ؟
خالد ورا سالم : تقصديني ؟
سماح : الله يلعنك
مسك ايدها بقوه لدرجة انها حست ان ايدها بتنكسر: هد ايدي
خالد : كنت انتظر هاللحظة من زمان
سماح : انا شسويت لك ؟
خالد : اسألي ابوج
وقفت بقوة تحاول تضربه لكنه كان اسرع منها ودزها على الجدار وقال باستهزاء: الحين بنشوف شراح يسوي اذا رجعنا له بنته الطاهرة العفيفة
سماح : بفضحك وبجرجرك في المحاكم
خالد : حبيبتي هذا الشي أبداً مو لصالحج .. اوه نسيت اقول لج عندي مكالماتج وفيديو الي صار البارحة اكيد الناس تبي تشوف بنت صاحب أكبر شركة في البلاد
سماح تصرخ : أكررهك
خالد : لكن مو هذا الكلام الي قلتيه البارحة .. جاو


في مؤسسة محمد
10 الصبح
________
محد اخذ رايه خطبوها وملجوا ومحد سأله اذا هو موافق او لا .. وللحين مو مصدق انها وافقت .. يمكن هي بعد ما اخذوا رايها .. تنهد بألم وقال في خاطره وينج يا سارة ؟ تعالي شوفيهم شسووا فيني ليتج معاي انجان الحين احنا عايشين في سعادة .. لو انتي معاي ما دخلت عذايب ولا غيرها في حياتي فرق بين سعادتي يوم خطبتج وبين حالتي الحين
دخل مصطفى وعطاه الملف الي يباه وقال بكل طيب نية : مبروك يا استاز
خزه محمد بديك النظره ومن خوفه قال : عن ازنك يا استاز
ويش ذنب هالمسكين تحط فيه حرتك ؟ ذنبها هي .. هي الي وافقت لو ما وافقت انجان الحين هو بألف خير .. لكن ما عليه بعدين يتفاهم وياها

بيت أبو هنادي
11 الصبح
__________
دلال : يمه هنادي ما جت ؟
أم هنادي :لا . ليش ؟
دلال : أبيها تجي معاي علشان اشتري فستان للملجة
وأخيراً اقتنعت تروح تشتري ليها الفستان ابتسمت ام هنادي وقالت : ألحين اتصل ليها واقول ليها
دلال: أوكي وانا بروح اجهز
ربع ساعة ووصلت هنادي
دلال : يالله نروح علشان لا نتأخر
هنادي : تسوين هالشي علشان تبين تقنعيني انج موافقة ؟
دلال ببرود : لا أسوي هالشي لأن عقب جم يوم ملجتي
هنادي : ما بتم هالملجة الا على رقبتي
دلال : للأسف ما بتحضرين الملجة
هنادي تهز أختها : اصحي يا دلال لمتى بتظلين على هالحال ؟ تعتقدين بهالطريقة بتنسين ناصر ؟
دلال : اذا ما تبين تجين معاي مو مشكلة بس خليني اروح لا يتأخر الوقت
هنادي : لمتى تتهربين ؟
دلال : اتهرب من شنو .. انتي شقاعدة تخربطين ؟ نسيت ناصر من زمان .. ناصر ما يعني لي اي شي انتي الي اصحي يا هنادي ناصر صار من الماضي وعقب جم يوم ملجتي على واحد غيره واذا انا اختج وتعزيني اتمني لي الخير
هنادي بخبث : أوكي بجي معاج لكن بستأذن من فيصل
دلال : أوكي يا الله بسرعة

بيت سامي
12 الظهر
__________
دخل سامي والشرر يتطاير من عيونه
بينات : أهلاً حبيبي
سامي : انتي بأي حق .....

الجزء التاسع عشر
الحب تضحية

بيت سامي
12 الظهر
__________
دخل سامي والشرر يتطاير من عيونه
بينات : أهلاً حبيبي
سامي : انتي بأي حق تطلبين من محمد يوظفني ؟
بينات : سامي انا ....
سامي : لا تجذبين ادري انج طلبتي من محمد
بينات : لكن ..
سامي : ما ابي اسمع تبريراتج
بينات : اسمعني
سامي : ليش انتي ما سمعتيني من قبل ؟ ليش ما فهمتيني قبل لا تتصرفين هالتصرف اللامسئول ؟ بينات تزوجتيني وتدرين اني على قد حالي ومحد غصبج على الزواج والحين تسوين جذي ؟ ليش ؟
بينات : سامي افهمني .. تعبت من نظرات الانكسار الي اشوفها بعيونك .. مو انت سامي الي اعرفه .. سامي الي اعرفه ما يستسلم
سامي : تدرين بحركتج هذي خليتيني استسلم .. خليتيني احس اني انسان ما له اي قيمه .. انتي الي كسرتيني يا بينات .. (( طالعها بنظرات انكسار و عدم تصديق )) : ما توقعتها منج
وطلع بهدوء بعكس النار الي تلتهب في قلبه


بيت أم جاسم
12ونص
_________

قاعدة في حجرتها وتضرب أخماس بأسداس وقفت قبال المنظرة و قالت لروحها : تدرين انج غبية ؟ شوفي وين طيحتي روحج بس علشان تقهرين أم أربعه وأربعين ألحين هي قاعدة مرتاحة وانتي الي ورطي نفسج .. تدرين عمري ما شفت وحدة بغبائج
دخلت عليها ريم : شفيها العروس تكلم نفسها ؟
عذايب تبتسم ابتسامة من ورا قلبها: لا ابارك لروحي
ريم : يحق لج اخذتي زينة الشباب بعد شتبين اكثر من محمد ولد جاسم .. تدرين عذوب حدددي مستانسة وأخيراً حمود خطب .. تدرين عقرب الجبل كانت حاطة عيونها عليه لكن هو كان يحب سـ ..
تذكرت انها قاعدة تكلم خطيبة أخوها وخرت واجد حجي : قمت أخربط في الحجي
يعني !!! كان يحب وحدة .. لكن وينها ؟ ليش ما تزوجوا ؟ وألحين فهمت ليش أم اربعة واربعين معصبة .. كانت مخططة عليه وانا خربت تخطيطها .. لكن اموت واعرف من الي يحبها ووين راحت ؟ ما عليه يا ريوم الايام جاية ومردج بتعترفين
جت أسيل تركض ودموعها على خدها : ريم وين امي ؟
ريم انفجعت يوم شافتها تصيح : أسيل شفيج ؟
أسيل : وين أمي ؟
ريم : ما ادري يمكن ويه امي العودة لكن شفيج ؟ عسى ما شر ؟
أسيل تصيح : أمي ... أبووي .. (( وراح صوتها من الصياح ))
ريم : كلمات متقاطعة شصاير ؟
أسيل : أبوي .. طلق أمي
شهقت ريم أما عذايب راحت لأسيل وضمتها : هدي حبيبتي
أسيل : شنو اهدي ؟ أقول ليكم ابوي طلق أمي
ريم : هذا أحسن ليكم
لفت عليها أسيل وصرخت بوجهها : حتى لو كان ما يحبنا .. حتى لو كان أسوأ ابو بالدنيا يظل أبونا تفهمين يعني شنو أبو ؟
طلعت من الحجرة معصبة وراحت تدور أمها
عذايب : الله يهداج يا ريم أحد يقول جذي ؟
ريم : هذا الواقع أحسن شي صار في حياة عمتي طلاقها
عذايب : حتى لو .. المفروض ما تقولين لأسيل جذي .. ألحين هي تمر في حالة صعبة
ريم : والي يسلمج .. الي يسمع الحين هي عايشة معززة مكرمة في بيت هالابو .. مو كأنها توها من جم يوم طالعة من المستشفى لأن أبوها كفخها لين ما قالت بس
عذايب : الحجي معاج ضايع
ريم تجر عذايب : أقول تعالي أبي أشوف ردات فعلهم
عذايب : بدل ما تواسينهم
ريم : ان بجوا ما عندهم سالفة وعمتي تبيها من الله
ضمت بناتها وظلت تمسح على روسهم
ريم تساسر عذايب : البقى براسكم
عذايب تضربها بجوعها : بسج تطنز
ريم : الي يشوفهم يقول أحد ميت
عذايب : حرام عليج .. لو كنتي مكانهم شراح تسوين ؟
ريم : لو كان ابوي مثل أبوهم وحاشاه أبوي يكون مثله انجان أسوي لي عرس داك اليوم
سمعت صوت سيارة وقالت في خاطرها : أكيد عريس الغفلة
عذايب : عطيهم شوية خصوصية وخلينا نروح حجرتي
ريم : والله فلم هندي بس ناقصته الاغاني




في بيت يختلف كل الاختلاف عن باقي البيوت .. اختلافه مو في المظهر .. اختلافه في جو البيت .. هادئ وكأن الأشباح ساكنتنه .. ما ينسمع فيه إلا تكتكت الساعة وبحركة بطيئة خطوات تقارب للجماد قعد او بالمعنى الاصح رمى نفسه على الكنبة بتعب مسح عينه وكأنه بهالحركة بزيل التعب دار بنظراته على البيت الميت وتذكر السعادة الي كانت غامرتنه مو هذا البيت الي قبل سنتين يعج بالحياة وين أمه وأبوه قلب البيت ؟ وين اخته روح البيت ؟ وين اخوه ضحكة البيت ؟ كلهم راحوا بلحظة وحدة وما بقى إلا خيالهم والذكريات الحلوة غمض عيونه يبي يتذكر الذكريات الحلوة لكن كل الي جى على باله صورتها تذكر صوتها شكلها هدوءها تخيل في لحظة انها مدت له ايدها مد ايده لكن ما قابله إلا الفراغ . فتح عيونه بقوة وحاول يطردها من خياله شافها تمشي قدامه مسح عيونه وقال : شكلك قمت تهلوس يا عبدالله


بيت أبو ناصر
2 الظهر
_______
أم ناصر تنادي الخدامة : يا الله ميري خلي الغذا
ميري : إن شاء الله ماما
أم ناصر : وروحي شوفي ناصر ومنصور وسماح
هزت ميري راسها ومشت أما أم ناصر قعدت تنتظر عيالها على ما يجون
تجمعوا على السفرة ما عدا سماح
ناصر : عجل وين سماح ؟
أم ناصر : أكيد في غرفتها
منصور : لكن اليوم ما شفتها
أبو ناصر طالع أم ناصر بنظرة خلاها ترتجف وقالت : أكيد في غرفتها يعني وين بتكون ؟
أبو ناصر ينادي على ميري : ميري
من سمعت احد يناديها فزت وجت تركض : نعم بابا
أبو ناصر : روحي شوفي سماح
منصور يقوم : أنا بروح أشوفها
طق غرفتها مرة ومرتين لكن ما سمع رد نادى عليها لكن ما سمع جواب بطل الباب ودخل شاف سريرها مرتب وغرفتها ما فيها أي صوت طلع من غرفة أخته وهو يمشي بسرعة أو بالأحرى يركض
افزعه رجوع أخوه السريع وافزعه أكثر الكلام الي قاله
رمى أبوه القفشة الي في ايده ووقف من مكانه : اذا مو حجرتها وين تكون ؟
لف على زوجته ووجه ليها نظرات الاتهام
قالت وهي ترتجف : ما ..ما ادري
أبو ناصر : اذا انتي ما تدرين من الي يدري ؟
أما ناصر كان يتصل لأخته على تلفونها لكن تلفونها مغلق
ناصر: تلفونها مغلق
أم ناصر : يمكن عند وحدة من صديقاتها
منصور : رحت ليها الصبح ما لقيتها في غرفتها
أبو ناصر يوجه الكلام لزوجته: من الصبح مو موجودة في البيت ولا تدرين عنها
أم ناصر : شقالوا لك ؟ حارسها الشخصي وانا ما ادري
أبو ناصر : لا ترفعين صوتج علي فاهمة ؟ ما تحملتج إلا علشان العيال أما أنتي ..
قاطعته : وانا قضيت عمري وياك علشان لا يتشتتون العيال
منصور : يمه يبه مو وقت هواشكم أنا بروح بيت جدتي وبشوف اذا سماح هناك


شقة سالم
___________
خالد : وألحين شراح نسوي فيها ؟
سالم : هذي خلها علي
خالد : ابيك تخلصني منها صدعت راسي وهي تصرخ
سالم : كل شي يجي بالهداوة انت بس لا تستعجل
خالد : انتظرت طول العمر هذي اللحظة وما ابيها تروح مني
سالم : لا تخاف صديقك لاعبنها صح
خالد : اتمنى
سالم : أفاا ما تثق فيني ؟
خالد : انا جبتها لعندك وكل الي ابيه منك تخليني اشوف انكساره
سالم : أرقد وآمن



بيت أم خالد
2ونص الظهر
__________
ندى : أنا جيييت .. وينج يمه ؟
أم خالد : في المطبخ
راحت لأمها وابتسمت ليها : سلام عليكم
أم خالد : وعليكم السلام .. يا الله يمه روحي بدلي وانا بنجب الغذا
ندى : ان شاء الله يمه
راحت ندى تبدل وهي تبتسم من كان يتوقع انها بتتعود على هالبيت ؟ توها قبل جم شهر تتأفف من هالعيشة وكارهة هالبيت لكن ألحين تغيرت ديك وحدة غير مو ندى .. صار هالبيت جزء منها تحب كل زاوية من زواياه الفرق شاسع بينه وبين فلتهم لكن تعلقت في هالبيت القديم أكثر من ما تعلقت في الفلة .. هالبيت قربهم من بعض صدق الي قال ان المصايب تقرب .. بدلت وراحت لأختها
ندى : هداوي
هدى : نعم
ندى : عندي لج هدية
هدى وعيونها تلمع بفرح : حلاوة
ندى : أحلى
هدى : أثلاً أني احب اكثر شي الحلاوة
ندى تبتسم وتطلع لأختها لعبة باربي
هدى تناقز : اللاااي باااربي .. ليي اللعبة ؟
ندى : أكيد
أخذتها هدى وباست أختها : ثكراً
ندى : واذا صرتين حليوة ومطيعة بشتري لج بيت باربي
هدى : أثلاً أني احلى وحدة
ندى تبتسم : ومحد يشك يا الله خلينا نروح نتغذى
طول الغذا وهدى تتكلم عن لعبتها الجديدة وندى متفاعلة وياها أما ام خالد كانت سارحة بعيييد
ندى : شفيج يمه ؟
أم خالد تتنهد : خالد ما جى البارحة
ندى : يعني وين بكون ؟ أكيد ويه خمته
أم خالد : ما دري لوين بيوصل به الحال
ندى : يمه بتسدين نفسي عن الأكل خله يولي هو كبير ويتحمل مسؤوليته انتي لا تفكرين فيه
أم خالد : الله يستر يا ندى


بيت أبو هنادي
3 الظهر
___________
دلال : يا الله هنادي خلنا نروح السوق
طالعت الساعة وقال لأختها : مفجوعة على السوق ؟ توها 3
دلال : نبي نرد من وقت
هنادي : انزين بتصل لفيصل
دلال : والله مللتوني توج متصلة له
هنادي : انا وحبيبي كيييفي ..غيرانة ؟
دلال : عشتوووو .. الله يهني سعيد بسعيدة
راحت دلال وقعدت ويه امها على ما تخلص اختها
أم هنادي : محتاجة فلوس ؟
دلال : مشكورة يمه
أم هنادي : مو تتأخرون
دلال : انا قلت لهنادي بنطلع من وقت علشان نرجع من وقت
أم هنادي : واذا احتجتين لفلوس قولي لأختج
دلال : ان شاء الله يمه
جت هنادي : يا الله مشينا


بيت أم جاسم
3 ونص
__________
محمد: يمكن ويه وحدة من صديقاتها
منصور : ويه صديقتها من الصبح ؟
محمد: اتصلتون لصديقاتها ؟
منصور : ما نعرف ارقامهم
محمد :رحتون المستشفيات ؟
منصور : رحت قبل لا اجي هني ما لقيتها
محمد:يعني وين بتكون ؟
منصور : ما ادري يا محمد .. نتصل ليها تلفونها مغلق
جايتنها الحرة تبي تقول لأخوها عن طلاق عمتها لكن ما حصلت وقت كانت طول الوقت تسولف ويه عذايب ويوم خلصت سوالفها جى ولد عمها لأخوها وظلت طول الوقت واقفة على باب المجلس تنتظر
5 دقايق
10 دقايق
ربع ساعة
تمللت وطقت الباب طلع ليها اخوها
محمد : خير
ريم : عندي لك خبر بمليون
محمد: شنو ؟
ريم : جم تعطيني ؟
محمد : على حسب الخبر
ريم : والله يا اخي الخبر يسوى مليون لكن اشفق عليك وبقول 20 دينار
محمد : ويش فيها بنت جاسم ؟
ريم : والله يا اخي ابي ارحمك
طلع ليها الـ 20 : يا الله ويش الخبر ؟
ريم : عمتي تطلقت
محمد : الخبر قديم
ريم : أفااا ولا تقول
محمد : تقدرين تقولين كنت متأكد من الطلاق
ريم : انزين خل هالسالفة على صوب .. ويش صاير ؟
محمد : مو صاير شي
ريم : عجل ويش سالفة التلفون مغلق .. ورحت المستشفيات
محمد يخزر في اخته
ريم : والله ما كان قصدي سمعت بالغلط
طلع منصور من المجلس : أوكي اذا صار شي بقول لك
محمد : جاي وياك
مشى وركضت وراه اخته : انزين ويش دراك بسالفة عمتي ؟
محمد : ادري وخلاص
ريم : ما عليه بعدين تقول لي السالفة
محمد : اذا فضيت
ريم : محمد جاسم غصباً عنك تقول لي
محمد : بعدين نتفاهم
حست ان نظرات ولد عمها عليها رفعت عيونها لكن انصدمت بنظرات الاحتقار .. ليش يطالعها جذي ؟ خزته بعيونها وقالت لأخوها : بعدين نتفاهم



اتصل له ولد خاله وقال يبيه ضروري راح له على وجه السرعة
ناصر : خير ويش صاير ؟
فيصل : أبيك تجي معاي ؟
ناصر : وين ؟
فيصل : انت تعال معاي واذا وصلنا اقول لك
ناصر : صاير شي ؟
فيصل : لا تخاف مو صاير شي
ويوم وصلوا
ناصر : تبيني بسرعة وآخر شي تجيبني المجمع ؟
فيصل : أنت انزل معاي وبعدين نتكلم
ناصر : أمري لله

دلال : هنادي شفيج ؟
هنادي : ما فيني شي
دلال تأشر على المحل : كاهو محل وشكل فساتينه حلوين
هنادي : لا مو كلش حلوين في محل أحلى
دلال : هنادي شفيج على كل فستان تطلعين مليون عيب ؟
هنادي : ما يعجبوني
دلال : افف ساعة من جينا وانتي مو عاجبنج شي
هنادي : أقول لج امشي خلينا نشرب شي
دلال : ما ابي .. هنادي ترا مو فاضية لج
هنادي : خلينا شوي نرتاح شفيج ؟
دلال : افف
هنادي : وليش تتأففين ؟
دلال : مللتيني
هنادي تجر اختها : اقول لج امشي خلينا نشرب شي
يوم وصلوا الكافيه
هنادي : شتبين تشربين ؟
دلال : ما ابي شي
هنادي : توفرين
ظلت واقفة تفكر ويش تشتري
دلال : هنادي مو فاضية لج يا الله سررعي
هنادي : يعني تبيني اشرب أي شي ؟ لا يا عيوني خليني افكر شوي
دلال : تحبين الكابتشينو يا الله خذيه
هنادي : اقول لج ابي شي بارد
دلال بملل: هناااادي
هنادي : انزين بس لا تزفين
دلال تأشر على محل : شوفي انا بروح داك المحل وبشوف اذا عنده فساتين حليوة
هنادي : انتظريني
دلال : اذا عليج اليوم ما بشتري فستان
هنادي : يا اختي فهميني ليش مستعجلة ؟
دلال : افهمي .. اشتري فستان واكسسواراته ونعل ما في وقت
هنادي : انزين انتي روحي وانا بجي وراج
دلال : أوكي
يوم مشت اختها وقفت تتحلطم : انا قايلة له من 3 هو هني وللحين ما جى
اما الهندي الي وقف متملل يحارس طلبيتها قال ليها : شنو يبي
هنادي : ما ابي شي
ومشت عنه

شافها تمشي بتروح محل الفساتين .. يعني هذا الي خلى فيصل يجيبه هني اليوم .. علشان يقلب المواجع
ناصر : فيصل ليش جايبني هني ؟
فيصل : نغير جو
ناصر : جايبني هني علشان تقلب المواجع ؟ خلاص يا فيصل دلال بتتزوج اذا هي مرتاحة الله يوفقها
فيصل : ناصر لا تكون سلبي .. هذي هي دلال الي طول عمرك تحبها
ناصر : مو شرط كل نبيه في الحياة نقدر نحصله .. دلال وانا انتهينا هي بتبدي حياة جديدة
فيصل : لكن ..
قاطعه ناصر : الحب تضحية هي ضحت من قبل وانا اضحي الحين خلها تتزوج يمكن تلقى السعادة الي انا ما اقدر اعطيها اياها

شقة سالم
4 ونص العصر
___________
بح صوتها من الصراخ وايقنت ان محد يقدر يسمعها .. تعبت وهي تطق الباب .. تسندت على الجدار وهي تبجي بحسرة شنو الي وصلها لهني ؟ وجى الجواب اسرع مما تتوقع : غباءها هو الي وصلها لهني ثقتها العميا بخالد
قامت كأنها مجنونة تحاول تحصل ليها مخرج لكن الحجرة مغلقة طقت على الجدران يمكن احد يسمعها لكن ما يقابلها الا الصمت .. لمتى بتظل هني ؟ ووين اهلها ؟ للحين دروا عنها ؟
قامت تصرخ بأعلى صوتها :يمه .. يبه .. ناااصر .. منصووور .. ويينكم ؟
منصور كل يوم يروح ليها غرفتها أكيد ما شافها هناك ما تساءل وين راحت ؟
منصور الي استغلته الي حاولت تقلل من شخصيته الحين احتاجته ولأول مرة تحس روحها ضعيفة غبية تحتاج لأهلها .. لكن وينهم عنها ؟



بيت أم جاسم
6 المغرب
__________
واقفة في المطبخ تشرب ماي وسمعت صوته جاي من الحديقة .. كانت تبي تطلع من المطبخ لكن كلامه خلاها توقف
محمد : كل شي صار مثل ما نبي .. اهم شي تخلصنا منه .. ما اعتقد يرجع .. أكبر غلط يوم ناسبناه .. على خير .. مع السلامة
سكر التلفون ودخل المطبخ وشاف عذايب واقفة .. يعني سمعت المكالمة ؟ من نظراتها عرف انها سمعت المكالمة .. تأفف في داخله عنده مشاكل قد شعر راسه وما له خلق هواش ويه عذايب
كانت تبي تطلع قبل لا يدخل لكن فات الأوان قالت في خاطرها : اليوم ما اطلع قبل لا أقول له كلام يسم البدن
قالت وهي تطالعه بنظرات كره واحتقار واشمئزاز : اذا كنت مأساوي وتحب الحزن هذا ما يعني تدخل في حياة الآخرين وتدمرها
طلعت بسرعة كانت خايفة منه ومن نظراته .. لو وقفت أكثر يمكن يضربها !!
ما صدمه كلامها قد ما صدمته نظراتها لهدرجة تكرهه ؟ ليش ؟ هو ويش سوى ليها ؟ وبالأصل ليش يهتم بكلامها وبرايها فيه ؟

متوقفه من 2009


تنقل للارشيف لحين عودة الكاتبه