كاتب الموضوع :
no123
المنتدى :
الارشيف
الجزء الخامس عشر
أمانه..مو قهر..!
.
.
راكان: طلبتك قوم..والله خاطري اسأله عنها ..شكله تزوجها وعنده عيال منها بعد
خالد: خل عنك اللقافه..انت معرفتك فيه ماتتعدى سنه دراسيه وحده..صرت تمون تسأله تزوجتها ولا لا
راكان: بس انا ياخي كنت طرف مهم في قصة الحب هذي
خالد:والله انك بياع كلام..ماعندك في الحب ماعند جدتي ]
(قام راكان من الطاوله ومارضي خالد يقوم معاه وراح لطلال اللي كان مشغول بالتلفون ويصارخ ومعصب..وقف راكان قدامه وهو مبتسم ..)
طلال: اسمع يا شادي انا حذرتك لو تصرفت بهالشكل مره ثانيه ماراح اقدر اغطي عليك زياده..الحين روح شوف شغلك..مع السلامه
راكان مازال مبتسم وواقف قدام طلال يبي يشوف يتذكره ولا لا..التفت طلال للجهه الثانيه وماانتبه لراكان وصار ينادي على سيكورتي الأمن عشان يستعدون
لبداية العرض..اللي كان عباره عن معرض الكترونيات مستضيفه المجمع عشان يعرفون الناس بخدماتهم..شوي وصار راكان محجوز في الزحمه هذاك ينادي
وهذاك يسأل واللي شايل بيده الاسلاك حقت مكبرات الصوت ويسمع طلال يصارخ ع المصري المسؤول عن توزيع النشرات
طلال: يا سمير الله يرحم لي والديك العرض بقى عليه نص ساعه وانت ماوزعت المنشورات ..؟
سمير: حاضر يابيه..بس مالهاش لزمه ..الناس كلها تعرف ان النهارده العرض ..وأهوه زي منتا شايف الكراسي كلها مليانه..عايزين احنا ايه
أكتر من كدا؟
طلال:عايزين زحمه ياباشمهندس..سوي شغلك وبدون هذره ..
انسحب راكان بهدوء من بينهم ورجع للطاوله عند خالد وهو مبتسم..كان شريط ذكرياته مع طلال يمر قدام عينه..معقوله هذاك الطالب الهادي اللي كان قمة الشغب عنده
انه يكتب اول حرف من اسم اللي يحبها بالمزيل على الطاوله...الطالب اللي كنا ناخذ حلول الواجب منه ويوم يسألنا الاستاذ ليش كل حلولكم متشابهه واخطائكم وحده ..نقول "احنا نحل واجباتنا مع بعض في الفسحه"
مع اني ماكنت اخذ كتبي من الدرج للبيت..الا ان طلال كان يجي قبل كل امتحان ويعرض علي مساعداته ..كان طيب لدرجة ان الكثير كان يستغله..وهادي وخجول وذكي ومتفوق..سبحان الله وهذا انا اليوم
اشوفه انسان ثاني..يحب السيطره قيادي صاحب شهاده عليا ..يصدر الأوامر والكل يقول له "حاضر أستاذ"..
راكان:فعلا لكل مجتهد نصيب
خالد:وشو؟
راكان: اشوف فادتنا الدجه بالثانوي الحين
خالد: انت وش تقول؟..الحين سلمت ع الرجال ولا لا..طيب عرفك؟
راكان: لا ياخي ماسلمت عليه ..اقول لك شكل الولد مو بسيط ..اسمعه ينفخ في هذا ويأمر هذاك وكأنهم شغالين عند أبوه..
خالد:وليه ماسلمت عليه؟
راكان:ماقدرت شفته مشغول قلت مو وقت معارف قديمه وذكريات
خالد: احسن لك ياخي وش تبي فيه..تشمته فينا هههههه
راكان: أشمته فينا؟..ليه وش قاصرنا انت ووجهك
خالد: ولاشي بس انا طالب لغه عربيه لي 7 سنين وانت موظف عادي على بند الأجور خخخخ
راكان: رح زيين..انا هالوظيفه اشتغل فيها رضوه لأبوي..ولا انت تعرف اني صاحب مكتب عقار وهذا شغلي الحقيقي
خالد:ياعمي طير..لو وافق عمي انك تدخل العسكريه كان الحين انت منفي ع الحدود لامكتب ولا وظيفه...
راكان: والله طموحي ادخل العسكريه
خالد:شكلك متأثر بجيمس بوند وودك بأكشن..
راكان: وليه ماتقول اني احب وطني
خالد: وش رايك اجيب لك علم المملكه ذاك ..واقعد غن "سارعي للمجد والعياء"من هنا لبكره..اما انا بروح للبيت راسي مصدع ومالي خلق هياطك الوطني هذا
راكان: وين تو الناس؟
خالد:اشوف عجبك الوضع..قم بس
ترى قسم واصله معي لـ هنا " ويأشر على راس خشمه"
راكان:وش في اخلاقك قلبت فجأه كذا..توك وش زينك
خالد: مافيني شي ..يالله مشينا
قام راكان وهو مستغرب من تصرف خالد وعصبيته المفاجئه..ركبوا السياره وكان راكان هو اللي يسوق اول مادخل خالد السياره قام يتعوذ من الشيطان التفت راكان له وفي تعابيره استفاهم وعتب على خالد..
وعلى اسلوبه العدائي معاه
راكان: وش فيك ؟
خالد: فيني ارتجاج في المخ مع كسور في الاضلاع وثقوب في الرئه والقلب ..وميت لي سنه وسته شهور وتسألني وش فيك؟
راكان: اعوذ بالله من لسانك هذا..ترى البلاء موكل بالمنطق..ممكن يصير لنا حادث الحين وكل اللي قلته يجي فيك صدق..وبعدها ابيك تضحك على نفسك وانت ميت
خالد: اضحك على نفسي وانا ميت ؟
-حاول خالد يمسك ضحكته واكتفى بالابتسام-
راكان: انت لك كم يوم منت عاجبني
خالد:مانيب عاجبك ..هيه ترى انا مو "ندى"..منت جاي تخطبني عشان لازم اعجبك
راكان: انت ليه صايره اخلاقك تجاريه..قسم انك موطبيعي وفيك شي..
خالد:ان عاد سألتني "فيك شي"بتسمع كلام مايعجبك
راكان:طيب..فيك شي؟
خالد بتنهيدة غضب: استغفر الله العظيم
,
,
(كان خالد يقلب الجوال في يده وفيه غضب وقهر مو طبيعي..فتح مره ثانيه ع الرساله اللي جاته من تولين في المقهى بالوقت اللي راح راكان يسلم على طلال فيه..وهذا اللي خلى خالد يتعكر مزاجه وتصير
نفسيته خايسه..وراكان مازال يسأل نفسه .."وش فيه قفّلت معاه مره وحده ..تركته خمس دقايق ورجعت لقيته مو طايق أحد..؟")
الرساله
اقتباس:
(هناك إمرأتان بحياة كل رجل شرقي..تتمثل فيهما "عرضه ..وشرفه..وكرامته..ورجولته"..
هما "الزوجه والأخت"..فأيها الرجل الطاهر..أي مستقبل مع النساء ترجوه ..وزوجتك المستقبليه "لعوب"...وأختك "خائنه" لك ومع اقربهم منك..وكن واثقاً اني لا اتحدث من دون يقين)
.
.
.
(وفي الرياض..كانت ريناد تكلم تولين جوال من أمام برج المملكه )
ريناد: مو ضروري
تولين: الا ضروري ونص..تجين الرياض وماتطلعين للأبراج
ريناد: ماابي ..حاولت امي وفيصل فيني اطلع معاهم بس رفضت
تولين: والحين انتي قاعده لحالك
ريناد: ايه..المجمع باااارد ..ومدري وش فيهم يطالعون فيني كذا تقول اول مره يشوفون كائن بشري
تولين: مين ؟
ريناد: القطاوه
تولين: وين لقيتهم ؟..لاتقولين بالمجمع!!
ريناد: اي مجمع انتي تحسبيني بقعد تحت انتظرهم حتى يخلصون نزهتهم الرومانسيه..طلعت من المجمع برى ولا ادري وين انا الحين
تولين: وليش طلعتي؟
ريناد: اقول لك المجمع بااااارد
تولين: اقول يالضب الصحراوي ..انتي عندك جلد مضاد للحراره بسم الله عليك
ريناد: وجع قولي ماشاء الله..
تولين:الا جد وش شعورك الآن وانتي في حضن الطبيعه مع القطاوه وتحت سماء الرياض
ريناد: وإنها لكارثه..
تولين: وشو؟..أبووووك ياللغه العربيه اللي عندك من شدة فصاحتها احس اني بالعصر الجاهلي خخخخ
ريناد: ويحك..ثكلتك أمك يافتاه ..تباً..تباً
تولين: ههههههههههههههه أي أم اللي بتثكلني !!
ريناد: اقول تولين كأن واحد يغازلني
تولين: كيف شكله ..حلو ولا شين..بسرعه قولي وش قاعد يسوي بالضبط ..الو بسرعه وش سوى ؟
ريناد: تعوذي من أبليس ..شوي شوي..خليني أركز..أحسه انسان تعيس
تولين: ايه هذي البدايه ينكسر خاطرك عليه بعدين تصير قصة حب وحدك انتي اللي تندعسين فيها
ريناد: يابنتي وش هالألفاظ ..ترى الحب مو معركه وشوت وتدعيس وشد شعور..انتي مين علمك الحب ؟
تولين: واحد راعي زار خخخخخ
ريناد: ماأستبعد قسم بالله هههههههه
تولين: هاه راح ولا لسى موجود؟!
ريناد: موجود..بس قاعد بين فتره وفتره يقول شي
تولين بحماس: وش يقول؟
ريناد: قسم بالله مدري..ودي اقول له ارفع صوتك ..
تولين: عجوز ماينشره عليك..اجل تبينه يغازل وهو ماسك المايكرفون
ريناد: والله حتى شكله مدري كيف صاير بس اسمعه يهذر ..اموت وأعرف وش قاعد يقول ..احس بقهر
تولين:طيب بسكت انا ..وانتي ركزي معاه شوفي وش يقول
ريناد: اوكي
تولين: ...
ريناد:...
تولين : هاه وش قال
ريناد: ماقال شي..ماأمداه حسبي الله عليك
تولين: ههه خلاص اجل ماهو من نصيبك
ريناد:يالله تولين بدق على امي اشوف وين صاروا..الظاهر نسوني
تولين:اوكي حياتي دقي علي اذا رجعتو للشقه
ريناد: ان شاء الله ..بااااااااي
تولين: بااااااي
(بمجرد ماقفلت ريناد الجوال..قرب منها الرجال وهو مبتسم..سوّت روحها مو شايفته واستمرت تلتفت يمين ويسار تحاول تحدد مكانها جغرافياً.. .)
؟؟:عفواً أختي أي مساعده؟
ريناد:ايه ..
؟؟: تأمرين على عيوني ..تفضلي
ريناد: شفت الزباله هذيك اللي جنبها القطاوه..روح قط نفسك فيها
؟؟: انا ادري انك مو بكفوا احد يطالع فيك..حدك هالقطاوه يالـ كائن البشري >>سمع مكالمتها مع تولين اللي تقول فيها ان القطاوه تطالع فيها خخخخ
ريناد: والله انهم انظف وأشرف منك ياقليل التربيه..بتروح من وجهي الحين ولا انادي لك الأمن>>صار كل شي بجسمها يرتجف من الخوف والقهر .وهذي أول مره بحياتها تقول شي زين عن القطاوه
لأن كل اللي عرف "ريناد" يعرف انها أكبر عدوه لهم..وكانت تتمنى تترشح لأنتخابات البلديه عشان تعطي مكافآت ماليه لكل مواطن يذبح قطوه ..
؟؟:على فكره ترى مازلت أشك انك كائن بشري..
(مشت ريناد ..بدون ماترد عليه .والمشكله انها ماتعرف تروح لوين ..بس قررت تترك المكان واللي فيه عشان لاتكبر المشكله ويصير مالايحمد عقباه..بس تفاجأت بنفس الصوت يمشي وراها)
ريناد بينها وبين نفسها: الله يلعنك يالنشبه ..هذا وش يبي الحين
؟؟:لو سمحتي..
ريناد:..
؟؟:يالكائن البشري..
ريناد بعصبيه : انا انادي لك الشرطه الحين.. ورفعت جوالها وبدت تفتح رمز القفل وهو يحسبها تدق ع الشرطه فعلاً
؟؟:تراك تمشين غلط الباب الرئيسي من هناك
..لحظه صمت..وقفت ريناد..والتفت بهدوء عليه.ولأول مره تشوف خشته كيف صايره..
ريناد وهي تأشر: من هناك
؟؟: ايه امشي حتى توصلين لذيك النخله وخذي يمين تلاقين الباب قدامك
ريناد: طيب شكراً
؟؟: ايه الحين صرتي كائن بشري ..ومهذب بعد
(حاولت تمسك ضحكتها ومشت عنه وراحت مثل ماوصف لها وفعلا دخلت ..وصارت تدور عن المصعد ويوم لقته قعدت تفكر " ياربي اي دور أروح؟"..كانت معاها وحده مصريه فسألتها)
ريناد: لو سمحتى المطاعم بأي دور؟>>المشكله مكتوب بجنب كل دور وش فيه في المصعد
المصريه:معرفش واللهِ..بس ممكن بالدور ال12 او ال16 مش متأكده>>وطلعت المصريه أغبى منها
ريناد: طيب انتي وين رايحه الحين؟<<أبو اللقافه ياناس
المصريه: المول
ريناد: اوكي..شكراً .وعذراً على تطفلي <<ماسكه معاها اللغه العربيه من جد
بس طلعت المصريه طلعت معاها وصارت تدور بالمول ..وتتفقد جوالها كل شوي بإستغراب" وش فيهم محد دق علي ..لهم ساعتين ..لايكون طاحو من فوق البرج خخخ..لا سم الله على امي
..يمكن ابو سامر طاح وامي تتفرج عليه وهو "يسقط من الأعلى " هههه اللاه ونااااسه..بس وش فيني اتكلم فصحى.."
.
.
(وفي الاستراحه..)
مشعل: خالد شفيك؟؟ترى كل واحد له همومه ومشاكله..بس لايطلع غثاها على اخوياه
خالد: ياخي اللي مو عاجبه لايكلمني ويعتبرني ماجيت الاستراحه من الأساس
مشعل: لا ياخي ..ماتبينا نتدخل لاتجي الاستراحه من الأساس..قم رح بيتكم ..ومحد بيشره عليك
خالد: مشعل انت وشفيك حاط راسك براسي..
مشعل: الحين انا اللي صرت "الكخه" ..وماعدت أعجبك
خالد:قم مشعل مو قدام الشباب...قم ابيك بشغله برى
محمود: ياشباب اذكروا الله ماله داعي ..انتوا اخوان
خالد: خير انت وش تبي ..الا تبي تسويها مشكله..احد قالك بقوم اتضارب معاه
(انحرج محمود ..واخذ الشاهي وراح للمطبخ)
مشعل: انا في سيارتي اذا تبي تتكلم الحقني
خالد: يالله شوي وبجيك ..بس بعطي راكان مفتاح السياره عشان يرجع لحاله..بجي معك
.
.
(وفي السياره..)
مشعل:انا ماقلت الكلام هذا الا لمصلحتك باخالد..انت قاعد تخسر كل اللي حولك بتصرفاتك هذي..
خالد: وش اسوي يامشعل ..اقسم بالله اني كاره حتى نفسي..
مشعل: مااعتقد بتكره نفسك..كثري..انا مريت بتجربه صعبه جدا..ولاني قادر اطلع منها..تجربه كسرتني وجرحتني بشكل ماتصوره..لكن مابطلع ضيقة فشلي على اخوياي
اللي ياما ساندوني ..ووقفو معاي..ولاعمرهم جرحوني ..بخسر كرامتي اللي قاعد ادافع عنها بكل شي
خالد: حصل شي جديد معاك..او مع أهلك؟
مشعل: لا الحمدلله اهلي امورهم مستقره..بس اكتشفت اني جزء من لعبه كنت مستعد اوهبها كل حياتي
خالد: مين تقصد؟..هذيك اللي تغني
مشعل: اسمها تولين ياخي..وش فيك منت متذكر منها الا انها تغني
خالد: والله صوتها كان حلو ههه..خير وش سوت؟
مشعل: تخيل..بعد كل اللي سويته لها..بعد كل ذيك المشاعر والعطاء..والحنان اللي كنت ماانتظر منه مقابل مثل باقي الشباب..تقول لي انت مو من مواخيذنا لانك عبد ومالك أصل
خالد:ههههههه الله يهداك وانت رحت تبي تتزوجها ..انت صاحي ولا مجنون؟.!!
مشعل:تضحك انت ووجهك..بلاك ماجربت الحب ..ولا ماكان رديت علي بهالكلام
خالد: اسمح لي مشعل.. الحين تبيها تصدق انك تحبها لشخصها..طبيعي تفكر انك ممكن تبي تتزوجها عشان فلوسها..او جمالها..وهذا الشيئين انت فاقدهم ..عشان كذا متعلق فيها
لكن لو جاها واحد "وسيم " وغني" وعطاها لو جزء من مشاعرك..راح تخق عليه وتتزوجه وتعطيه اللي يبي..التكافؤ في جميع العلاقات مطلوبه..والحب من دون تكافؤ مستحيل
لأن كل طرف يحس بمسافه عن الثاني..هي تحس انها تشفق عليك..وانت تحس انها كثيره عليك..وهالشعور ماينفع لحبيبين..!
مشعل: لا ..انت ماتعرفها ياخالد ..ذي وحده حقيره ماتفكر بالزواج ابدا..
خالد: انا مو جاي ادافع عنها لأني مااعرفها ابداً..ولا ادري شلون تفكر..لكن علاقتكم كانت فاشله من الأول..وانا قلت لك هالشي..ومااقول هالكلام لان ناقصك شي..بالعكس
انت حلم كل بنت بس تكون من مستواك..حب بتكافؤ ..وشوف كيف بتلاقي اللي بتستحق مشاعرك
مشعل: خالد..انت أول صديق حقيقي لي..عمري ماحسيت معاك اني ناقص شي..ولاعمرك عيرتني او استحيت من رفقتي..كنت أعتز فعلا بوجودك في حياتي..ومثل ماتعرفني ..انا
عمري ماطلبت منك شي..او اذيتك بشي..كنت فزعتك لو احتجت..ونصيرك لو احد غلط عليك..كنت يدك اليمني في كل شي..ومازلت للحين..بس طلبت ياخالد..رد لي كرامتي
ولاتخليني اعيش مهزوز طول عمري
خالد: مافهمت..وانا وش بيدي اسوي؟
مشعل:ابيك ترد لي كرامتي منها
خالد: أنا؟؟؟
مشعل:ابعطيك رقمها وهي من اول احسها معجبه فيك وتسألني واجد عنك..انت "وسيم" و"غني"..يعني على قولتك حلم حياتها وبتقدر تقنعها تحبك..ابيها تتعلق فيك زي ماتعلقت فيها
واذا وصلت لهالمرحله من الحب ..ابيك تتركها بقسوه وتقول لها" منتي كفو اتزوجك يابنت الحرام"..اذا هي شايفه الزواج لازم يكون "بالأصل والفصل" لازم تعرف بعد ان الزواج يكون
"بالشرف والعفه"
خالد: من جدك؟..متوقع اني ممكن ارضى أساعدك؟
مشعل:قبل ترد علي وتقول موافق ولا لا..شوف حجم الثقه اللي عطيتك اياها..انا مااخترتك الا لانك كفو حق هالمهمه
والوحيد اللي اعرف انه مايبيع صداقاته عشان "بنت"..تكفى ياخالد..
خالد: انت تقول هالكلام لانك متأثر بهالسالفه..بس بعد ماتهدا راح تنساها وتصير آخراهتماماتك ووقتها بتنشب هالبنت في حلقي أنا ..لا ياخوك طلعني منها واللي يرحم والديك
مشعل:خالد..مافي شي متأكد منه ..زي انتقامي منها..فلاتدور اعذار ..انتي تبي تساعدني ولا لا؟
خالد: ايه ..لكن..
مشعل: خلاص اجل برسل لك رقمها وابدا من اليوم
(وصل خالد البيت وهو يفكر بكلام مشعل..وهو عارف انه لايمكن يكون وسيلة انتقام لصاحبه..بس كان يحاول يهديه ..ويكسب ثقته عشان لايروح لواحد غيره ميخاف الله في البنت وتكون ضحيه
ثانيه لاستبدا د مشعل ونزواته..ولأن خالد كان مشغول تفكيره برساله "تولين" هالبنت اللي مايعرف انها نفسها صاحبة مشعل اللي يبي الانتقام منها..حاول يدق عليها يفهم منها وش تقصد
بزوجته واخته..وعن أي "يقين" تتكلم)
وصلت رساله لجواله ..قام مستعجل يفتحها يحسب انها من تولين..لقاها بطاقة اعمال من مشعل بالرقم
وكانت الصاعقه...!
لفت نظر خالد تشابه الارقام الاخيره من جوال تولين وجوال البنت اللي تدق عليه
فتح الاسماء وكان حافظ رقم تولين بإسم.."ب" وبمجرد مااتصل ع الرقم تحول الرقم لأسم "ب" وهذا يثبت انها تولين هي نفسها البنت اللي اتهمته في شرف اخته وكانت تحاول تهز ثقته في نفسه
وفي أهله..عرف يفسر هي من وين اخذت رقمه وتذكر كلام مشعل يوم قال"انها معجبه فيك" ..وفهم ليه صوتها ماكان غريب عليه وحاس انه سامعه قبل..
توضحت الصوره كلها قدامه..وحس قديش كان غبي..وفهم غضب مشعل ورغبته في الانتقام..وبدا يقتنع بالفكره أكثر وأكثر لانه يبغى ينتقم لنفسه أول ولصديقه بعد..
بس اللي كان مثير استغرابه هي وش دراها عن زوجته المستقبليه ..وعلى اي اساس حكمت انها وحده لعابه..هو صحيح لمياء عليها حركات مو مضبوطه وعشان كذا خالد مايبي يرتبط فيها..
لكن محد يعرف سلوكها الا شخص قريب منها ويعرفها زين..بعدين وش جاب طاري اخته وليه تقول عنها خاينه وتحدد بعد شخصية الطرف الثاني..وانه قريب منه..
الف سؤال وسؤال كان يدور براسه وكان واثق من اجابه وحده ان تولين ماتعرفه بس من مشعل..فيه طرف ثاني مجهول بالسالفه..!
كان خالد من الصدمه بإكتشافه يضحك شوي..ويسرح بالجوال..ويرجع يضحك ويقول بصوت عالي "افا يابنت الكلب هذي انتي؟!"..حتى قرر انه يتصل فيها ويحاول يعرف منها مين الطرف الثاني..وبيكون الانتقام أصعب
لأن بينهم هوشات سابقه وصعب جدا ..انه يقنعها بالحب بعد كل ذيك الشتايم والتحقير اللي لقته منه
.
.
من رحل عني وانا احس بـ صداع !
وكل ما اتذكره / فيني يزيد
بس يا رأسي .. تراه انسان باع ..
انت توجعني وهو عايش سعيد !!
.
.
(بنفس الوقت كانت تولين تنتظر اتصال ريناد عليها ..وفاتحه اللاب توب وقاعده تسولف مع ندى ع الماسنجر..دق الجوال..واستأذنت من ندى على اساس ان المكالمه من ريناد و
طلعت من الماسنجر..)
تولين:نعم
خالد:نعم الله عليك
تولين:نعم
خالد: قلت نعم الله عليك
تولين:ادري سمعتك بس لسه مو مستوعبه ..تسمح لي اقول نعم مره ثالثه عشان أتأكد؟
خالد: نعم الله عليك مره ثالثه.كذا اوكي؟
تولين:فجأه صرت أليف..لايكون صحيت من النوم وحسيت انك انسان وبديت تتصرف على هالأساس..تراك تحلم..الحيوان عمره مايصير إنسان..
خالد:الله يسامحك
تولين:الظاهر يبي لك وقت حتى تستوعب غرائزك الحيوانيه..وتتصرف بموجبها
خالد:ماتلاحظين انك تتفلسفين واجد ..ومن دون داعي؟
تولين:ومدام مو عاجبتك فلسفتي وشوله داق علي
خالد:أصلا انتي وأشكالك لايمكن يعجبوني في شي أبداً..وانا داق أبي أعرف شغله وحده ..أنتي من عطاك رقمي..وليه أنا بالذات من بين كل هالعالم تبين تكلميني
تولين: شوي شوي على روحك يا انطونيو بانديراس..
خالد: لو سمحتي..انا مو داق اسمع تعليقاتك السخيفه هذي..ولا رأيك فيني..أنا ابغى جواب واحد..مين عطاك رقمي وليه طلبتيه؟
تولين: وليه متأكد إني طلبت رقمك وأحد عطاني اياه..ممكن اكون وحده من اللي ترقمهم بالمجمعات..وحده من اللي في الاشارات شافت بلوتوثك وكتبت الرقم..
خالد: انتي تعرفين عني أكثر من الللي مفروض تعرفه وحده من المجمع ولا الإشاره..وبلاش نستخدم مع بعض هالأساليب الملتويه ونكون صريحين اكثر
تولين:خايف؟
خالد: من ايش..من رسالتك مثلاً؟
تولين: رسالتي أثرت فيك مايحتاج لها كلام..ولا ماكان دقيت
خالد: والله ماهزت فيني شعره ..ورسالتك اثبتت لي انك ماتعرفيني بالشكل اللي كنت متوقعه ...بس تظل المعلومات اللي عندك أكثر من انها تتوفر عند وحده عاديه
تولين: انا قلت لك انا مااتكلم الا من يقين..
خالد:اولا انا انسان غير مرتبط لاشفهي ولا رسمي..وماعندي خوات من الأساس
تولين: هههههههههههههههههههه
خالد: ..
تولين:طيب ..براحتك..بس سلم لي على ساره ونجود..وولدها حمودي ..تصبح على خير
خالد: تعالي هنا
تولين بصوت ناااااااعم : وين ا؟
خالد:....
تولين: وش فيك استحيت ..ترى بس ابي العب بأعصابك ههههه..
خالد بإبتسامه:مو مهم..بس انتي وش علاقتك بساره ونجود ؟..
تولين: شوف بعترف لك بشغله بما انك كسرت خاطري هالحين
خالد: حلو ..اكتشفت لي خاطر عندك
تولين: قسم بالله منت طبيعي اليوم ..المهم ..انا كذبت عليك في الرساله
خالد: بأيش كذبتي؟
تولين:كنت بس ابي اقهرك ولا ساره أشرف من الشرف نفسه
خالد:اهااااااا..واللي مثلك يعرف وش هو الشرف
تولين:....
خالد:الو
تولين:....
خالد: والله مو قصدي ..
تولين بإختناق:وليه مو قصدك.قد قلت قبلها اشياء كثييييره..بعضها ماينقال لوحده كافره..جات على هذي ياخالد؟
خالد:انتي تدرين اني مااقصد كل اللي قلته..صح؟
تولين:خالد
خالد: نعم
تولين:لاعاد تدق على هذا الرقم ..أبداً..
خالد: واذا دقيت؟
تولين: بضطر أغير رقمي..وانا ماابغى اغيره لانه هديه من الوالد الله يرحمه
خالد: ابوك ميت؟
تولين:مع السلامه
طوط..طوط.طوط
(قفلت تولين الجوال ..ورجعت ع اللاب توب فتحت المنتدى اللي مشاركه فيه وبدت تكتب في صفحة مذكراتها ..وبدون شعور حست ان انفاسها ضيق..واصابعها ترتجف وهي تتنقل بين الحرف والثاني
وهذا جزء من اللي كتبته تولين في هذاك اليوم ..)
اليوم: الخميس
التاريخ:6_7_1428
هناك حيث تختفي ملامحنا وسط ضبابية الدموع..هناك حيث لا أجد من الرجال غيرك..ولاتجد من النساء أنثى تستحقك مثلي..هناك حيث نلتحف الغيم بطهارة المطر..لا اكون بعينك ساقطه
ولاتكون في عيني مجرم حب..أحتاج لذاك المكان المغلف بالنقاء حتى لا اتنفس الخطيئة من هوائك..حتى لاتحرقني بالدموع كلما تحدثت اليك..حتى لاتصفعني بالرذيله كلما اشتقتك حبا وولعا ودفئا
قل لي بربك ؟..الا يشفع لي عندك هذا الضياع..ولدت من رحم أم مستأجره..ومن صلب أبٍ طاغي ..نزفت سنيني التسعة عشر على أمل واحد..لقلبٍ واحد..كنت أنت أختياري الوحيد
لمحت في عينيك وجعاً يشبه ألمي..وفشلا يأبي الأعتراف كفشلي..لمحت فيك "العمر"..أتصدق هذا؟..عشتك في خيالاتي أياماً..وحين حلمت بلحظة حقيقه واحده
تداعى الحلم الوردي فأستوى بالأرض..
ولأول مره منذ خلقت اتمنى ان لا أكون "أنا"
لأول مره منذ خلقت اتمنى أن اكون "ساره"..!
.
.
.
الضياع ..\ احيان مخرج من عنا
والدموع احيان تخذلها ..\ اليدين !!
سو نفسك مادريت ...\ بْحزننا
بس مو تدري ..\وتتركنا سنين !!
.
.
ابراهيم: يمه نادي رنا من الصبح ماشفتها
ام ابراهيم: ولا انا ياوليدي البنت اعتزلت العالم من انخطبت
ابراهيم: لايكون احد غاصبها ع الزواج؟
ام ابرهيم: لحد غاصبها ولاشي..بس تعرف البنات يتوترن في هالفتره والوحده تصير نفسيتها شينه وماتبي احد يحارشها حتى لو مزح
ابراهيم: ماشاء الله عليك يمه ..خبره ...ماالومك متزوجه ثلاث مرات هههههه
ام ابراهيم:هههه الله يقطع ابليسك..انا ماتزوجت الا ابوك ..بس ابوك قد طلقني وردني بعد ماقضت عدتي..ورجع طلقني وردني قبل ماتنتهي عدتي وذي مافيها زواج
ابراهيم: يعني تزوجتي مرتين مو ثلاث..وطلعت ظالمك انا هههههه
ام ابراهيم بتنهيده: اييييييييييه ياوليدي محد تعب كثري فيكم..شفت الموت مع ابوك ..كان مايتعاشر ايده علّمت على كل مكان بجسمي..كان اذا ماعجبه الغدا حطني بالغرفه اللي فوق السطوح
بدون كهرب ولا ماء..ولايسأل علي الا اذا جا ينام ..ويوم حملت فيك اخذت عهد على نفسي اني اعيش عشان أربيك ولا ماعاد لي خاطر في هالحياه من تزوجت أبوك..وزاد الله رزقني بأختك
رنا..وبعدها بفتره حملت بأخوك رائد اللي مات وهو عمره سبع سنين..كانت صدمة ابوك شديده عليه ..وأول مره بحياتي اشوف ابوك يبكي...ومتأثر بهالشكل..وبعد مامات اخوك
رائد تغيرت معاملة ابوك لنا كلنا..وصار يخاف يفقدنا وحس بالفراغ اللي تركه موت رائد في البيت..
رنا: السسسسلام عليكم..وش فيكم قاعدين بحصة تاريخ
ابراهيم: هلا هلا..هلا بالعروووووووس هاه كيف النفسيه
رنا: اي نفسيه..احد قالك اني موسوسه ولا اخاوي جن
ابراهيم: اقول لك يمه هالبنت مو وجه سحا بالمره..والله ماطراها التوتر لامن قريب ولا من بعيد
(للمعلوميه رنا انسانه جدا جدا خجوله..بس مع اهلها والناس اللي تعرفهم انسانه طبيعيه ومنفتحه )
رنا: حرام عليييييك..رح اطلع غرفتي شف كيف حست ابو الدولاب من القلق مدري وش البس اذا جو اهل عبدالعزيز بكره
ابراهيم: مو كأنك تلمحين على شي؟
رنا:ايه تكفى ودني السوق..والله ماعندي شي البسه..بالله ترضى على اختك تطلع مو شي..وهي العروس..!
ابراهيم: حاشا وكلا..
رنا: فديتك انا..والله لو منك بالعالم اثنين كان الكره الأرضيه بخير
ابراهيم:طيب وين تبي تروحين اي سوق؟
رنا: صحارى مول..
ابراهيم: وهذا وينه؟
رنا: إبراهيم عاد بلا استهبال..لك سنه وانت تداوم بهالسوق في محل التلفونات والحين تقول مااعرف
(انحرج ابراهيم وحاول يتذكر هالمكان..لكن حس بنظرات اخته اللي انكسرت من جات عينها فعينه)
رنا بينها وبين نفسها: الله يقطع لساني ..صدق اني ماانعطى وجه
ابراهيم : ايه ايه تذكرته<<وهو ماتذكر ولاشي بس قال يمكن اذا ركبت السياره ومشيت بالشوارع اتذكر هالمكان
رنا: والله صدق..يييييييييياسلام..اجل انتظرني شوي بلبس عباتي واجي
ابراهيم: يالله انا بنتظرك في السياره
(وفي السياره..)
رنا: ابراهيم بسألك سؤال وابغاك تجاوبني اياه بصراااحه
ابراهيم:اسألي
رنا:انت للحين تحب لمياء؟
أبراهيم: لأ
رنا: يعني مافي تعلق عاطفي من اي نوع تجاهها
إبراهيم: لمياء هذي قصه وانتهت..مراهقه كانت عنيفه بالنسبه لي..لكن حالياً طلبت من الوالده تدور لي بنت الحلال ..وعدتني تخطب لي في ملكتك اذا لقت وحده تعجبها
رنا:من جدك تتكلم؟
إبراهيم: ليه هالأمور فيها مزح؟
رنا: على قد ماانت اخ عظيم..على قد ماانت حبيب فاشل
ابراهيم: بالعكس الشخص الاستثنائي هو اللي ينسحب من المعركه وهو في قمة انتصاره ..وانا هذا الشي اللي سويته تخليت عنها وانا في عز حبي لها..
رنا: طيب وش تفسر روحتك لها في الشرقيه؟
ابراهيم:لحظة ضعف
رنا: ومو خايف تحيك لحظة ضعف مشابهه لما تتزوج وحده غيرها
ابراهيم: وقتها بيكون عندي من يقويني ..ويخليني انساها
رنا: اقول ..انت وين مودينا؟
ابراهيم: لحظه ..شوي
(وقف ابراهيم قدام محل دونات دانكن..وقعد يطالع باللوحه والمحلات اللي جنبه وهو مستغرب وش جابه هنا..وانفجرت رنا تضحك وهي تناظر لعلامات الاستفهام اللي مرسومه على وجهه)
رنا: ابراهيم.!! ههههههههه..وش جابك هنا؟
إبراهيم: تضحكين هاه..الشرهه ع اللي جابك
رنا:ههههههههه وتقول لي نسيتها وماعاد تفكر فيها
إبراهيم: الحين وش دخل هالسالفه بتضييعي الطريق..انا من اول ماطلعت من البيت وانا والله مااتذكر صحاري هذا ..بس قلت اجرب حظي واشوف يمكن اتذكر وانا افرفر بهالشوارع
رنا: من جدك ماتتذكر هالمكان؟
إبراهيم: أي مكان؟
رنا: سبحان الله !
إبراهيم:..
رنا:شوف قلبك قبل ذاكرتك وين جابتك..وتقول لي نسيتها ولاعاد تعني لك شي..الظاهرانك ماتعلمت الدرس زين
ابراهيم: خير هالمكان فيه شي متعلق فيها..ولا ايش بالضبط؟
رنا: تتذكر يوم تأخرنا بالجامعه لأن السواق تعطلت سيارته وماجا ياخذنا..هذاك اليوم مارضت لمياء تدق على اخوها راكان يجي ياخذها وتخليني لحالي ..وانت دوامك ماينتهي قبل ساعه
فقررنا ننتظر ساعه وندق بعدها كلنا سوى عشان تجي سياراتنا بنفس الوقت..وسبحان الله دقت لمياء على اخوها وكان نايم ولا رد ع الجوال..فأضطرت البنت تجي معانا..مع انها كانت
مستحيييييه مرررررره منك..وماتبي تركب السياره معاك لأن تو علاقتكم بدت..عاد انت هذاك اليوم كنت مجنون ماعليك من احد..اخذتنا وجيت هنا وشريت لنا دونات وكوفي كانت ايام
شتا اللاااااااه كانت ايام تهبببببل..ومن بعدها صرنا نتعمد نتأخر ع السواق عشان يروح ونجي سوى مع بعض..وتجيبنا يوميا هنا..كانت ايام حلوه..
قام ابراهيم يدندن بصوت منخفض وهو يشغل السياره راجع للبيت..
ايام حلوه كانت أيام حبك..
رنا:والله صوتك حلو :)
ابراهيم: كانت تقول لي كذا
رنا:ياحليلها ههههههه كانت تحبك من جد
ابراهيم:تصدقين ..قاعد اتذكر كل شي صار هنا..
رنا:افكر اعزمها على ملكتي؟
ابراهيم بإهتمام: انتي ماتقولين تزوجت كيف بتعزمينها
رنا: وخير ان شالله اذا تزوجت..صديقه عازمه صديقتها وين المشكله
ابراهيم: تتوقعين ترضى؟
رنا: هذي علمها عند الله ادق عليها واشوف
ابراهيم:مين تزوجت؟
رنا: مدري..مدري..الحين فكنا من هالسالفه..ليه راجع البيت منت موديني السوق؟
ابراهيم: مع كل هالمصايب اللي تذكرتها اليوم ..لا ياوخيتي ماظن فيه سوق
رنا: لاتزعل نفسك ياخوي وان شالله تلاقي اللي أحسن منها..والحب تجارب..ممكن يتكرر أكثر من مره لكن البقاء للأقوى..
ابراهيم: وياخوفي لمياء تبقى
رنا: واذا تأكدت من بقائها يكون لنا كلام ثاني
ابراهيم: كيف يعني؟
رنا: بعدين تعرف..!
(كانت رنا توهم ابراهيم ان لمياء تزوجت حتى تتحقق من صدق حبه لها..لأن البنت مو لعبه عنده متى مااشتاق تكون له حبيبه كلمها ومتى ماحس انه غلطان تركها..على كثر ماكانت تحب اخوها
كانت بعد مخلصه لصداقتها مع لمياء..هي تعرف ومتأكده ان بدايتهم كانت غلط..بس توقعت ان النهايه أهم..وبتكون صح..لكن لسى الحكايه ماانتهت..ولسى فيه أمل ..يفهم إبراهيم
ان الحياه بالحب هي الشي الوحيد اللي يستاهل الواحد انه يضحي بأي شي كرماله..بس لمياء اللي واضح جداً عليها انها نزعته من قلبها ونزعت معاه طيبها وصدقها وبراءتها وعفويتها..
هل بترجع لو طلبها القرب والحب سوى؟)
.
.
.
إلمس يدي .. شف كيف ترجف الى الحين
اتصدق ان الحال هذا .. من العام ؟
حسيت .. كن آخر لقانا من سنين !
مع إني أحضن صورتك .. كل ما أنام
.
في بيت نوف ..كانت عازمه ساره عندها ع القهوه..وعزمت كل البنات بس ريناد اعتذرت لانها مسافره وتولين نفسيتها تعبانه ولاتبي تطلع وندى العروس في عالم آخر واما سمر فهي لاهيه بزحمة
بيتهم
ساره:انا خلاص قررت قرار نهائي اعتزل مشاهدة الأفلام الهنديه
نوف:شوفي لو قررت الشحروره صباح تعتزل الغناء بصدق انك قررتي تعتزلين الأفلام الهنديه
ساره:ايه صح ..هذيك شفيها ماتموت؟
نوف: استغفر الله ..مدري وش فيها تحب الحياه لهالدرجه
ساره: شفتها مره بالتلفزيون في حفل توزيع جوائز مدري شنو..والله مو قادره تتحرك حتى عيونها من كثر ماهم مشدودين مو قادره ترمش
نوف:الله يختم لنا بخاتمه حسنه..ودي اروح اشد شعرها النايلون واقول لها "ترى واضح قسم بالله انك ولدتي مع الفراعنه بنفس اليوم"
ساره:ههههههههه..انا مدري هذول اللي يقولون انها حلوه..شفت لها افلام وهي صغيره والله مو حلوه جسمها كان عريض كأنها رجال..مدري وين الجمال فيه؟
نوف:فيه رجال يحبون اللي تجيك عريضه كذا..الا على طاري الافلام شفتي المسلسلات اللي عطتك اياها تولين
ساره: هذيك اليابنيين مدري الكوريين..ايه شفتهم
نوف: كيف حلوه؟..تنصحيني اشوفها؟
ساره:انا بصراحه ماعجبتني احس اني قاعده مع شغالات وانا اتفرجها
نوف:اقول انتي ذوقك طايح من عيني من يومك تقولين شاروخان يهبل
ساره: اقول على شحم انتي وعبدالرحمن الشمري اللي تقولين احد صافقه بطاوة بيض على وجهه..
نوف: اها بس..ماتقدرين تتكلمين على شكله..الحين تقارنين عبدالرحمن الشمري بشاروخان؟؟
ساره: اقول لاتسمعك لمياء الحين ...عاد هي أكبر محاميه عنه
نوف: لايكون هي بعد تحب الهنود مثلك؟
ساره: اووووه ..انا ولاشي عندها..هذيك مستودع أفلام ههههههه
نوف:مدري ليه احس اللي يطالع افلام هنديه ..انسان ساذج ..ينضحك عليه بسرعه
ساره:ومدري ليه احس اللي يطالعون (Saw)ويقولون انه مو فيلم رعب..ناس ماعندها احساس
نوف:مو رعب ..هذا أكشن
ساره: الحين اللي يشق بطن الثاني ويطلع منه مفتاح مو رعب؟
نوف: لأ مو رعب هذا أكشن
ساره: اقول واللي يرحم والديك فكينا من هالسالفه..
نوف: الا صحيح ..وش أخبارها بنت عمك هذيك اللي جات الجامعه
ساره: لمياء؟
نوف: ايه..أعتقد لميا
ساره:ماعندي الا هي أصلاً..ايه بخير وهمها الوحيد انها ماتخليني بخير
نوف: ليش وش تسوي معك؟..شكلها طيوبه وأخلاق
ساره: باقي تعرفينها على حقيقتها لما تلتحق بجامعتنا السنه الجايه
نوف:مدري بس احسها مسكينه
ساره بعصبيه: يعني ايش بتعرفينها أكثر مني؟..هذي وحده شايفه نفسها ع العالم ..وتموووت غيره مني
نوف: ليش تغار منك وش قاصرها؟
ساره: تغار على اخوها مني..ماتحب تشوفه مهتم فيني
نوف: وش دخل اخوها بالسالفه..بعدين هو للحين مهتم فيك؟
ساره: ايه للحين ..وش اللي تغير يعني؟
نوف بسخريه:اللي تغير اشياء واجد..أولها انه خطب وحده غيرك ولو مهتم كان انتي الأولى مو لأنك بنت عمه بس لأنه مهتم فيك على قولتك
ساره:يعني تقصدين اني كذابه..وأدعي هالشي؟
نوف: يووووه..شوف كيف فهمتيها؟..لا طبعا مااقصد كذا..بس الوضع غريب شوي..تقولين اول تغار منك بعدين تقولين تغار على اخوها مني..وانتي مابينك وبين اخوها شي
عشان تغار؟
ساره: قفلي ..قفلي هالسالفه..ماابغى اناقش أحد فيها
نوف: براحتك..بس بقولك شي..ترى ندى تتضايق من حركاتك هذي..ومانبغى نخسركم عشان شي تافه زي كذا؟
ساره: أي حركات؟
نوف: يعني كلامك عن راكان ..وكأنه حبيبك مو بس ولد عمك..ترى خلاص الرجال صار في مقام زوجها
ساره بإنفعال: وشو زوجها..ترى لسى ماملكت عليه ولاتزوجته..وبعدين بالطقاق فيها ..انا ماادعيت شي..هذي حركات "زوجها" على قولتك..اذا مو عاجبتها تصرفاته
لاتتزوجه..
نوف بزعل: لاتنافخين طيب..
ساره: معليش نوف آسفه ..بس والله قهرتيني..وش يعني اخسركم ومدري ايش..انا ترى مثلكم مو فاهمه شي..بس أحاول أفهم هو ليه يتصرف معاي بهالطريقه اذا ماكان يبغى يتزوجني
نوف: يمكن يحبك مثل أخته ..ويحب يتمشكل معاك ..يمكن يعجبه لما تتنرفزين..مو ضروري يكون حب بشكل ثاني مثل منتي متصوره
ساره "بغصه والدموع تتجمع بعيونها": انا ماعندي مشكله..وبالعكس فرحت لندى وراكان ..واتمنى يعيشون مع بعض حياه حلوه..بس نفس الشي ابي افهم شعوره ناحيتي..انا يانوف
مااتخيل ولا اتوهم ولا بكذب في امور زي هذي..ماطلبت شي غير اني اكون مستقره نفسيا..لكن ندى تضغط على بشكل كبير..واحسها تفسر تصرفاتي على مزاجها..مو من حقها يانوف تزعل
اذا قلت ان راكان ارسل لي مسج..لاني ماكذبت عليها..يعني حاسدتني على مسج ارسله لي وهو كله عندها ولها وحدها..بكره اذا تزوجته لاتخليه يكلمني..ولايتصل علي..ولاحتى يزور
عمه اذا كنت انا بالبيت..انتي اكثر وحده تعرفين انا قديش أحب ندى..مااحب اسولف اموري الخاصه الا معاها احسها تحتوي الكل بطيبتها..وهذذا مو قصور في باقي الشله..بس ندى مولي لوحدي
للكل..مهتمه بالكل تسأل عن الكل ماتنحاز لأحد على الثاني..وماعمرها زعلت أحد بشي منها..وبعز علي أخسرها عشان موضوع زي كذا..
نوف: بقولك سر..مع ان سمر حلفتني مااقولك بس صراحه لازم تعرفينه..
ساره:سر؟...عن سمر؟
نوف: لأ عن ندى..قالته لسمر
ساره: خير وش فيه؟
نوف:ندى تشك ان بينك وبين راكان علاقه..وخايفه توافق على راكان وتندم
ساره بفرح تحاول تخفيه:وكيف يعني؟..اقصد كيف يعني عرفت؟..مو عرفت..اقصد وشلون حست بهالشي
نوف:مافي سبب..بس من سوالفك زمان عنه..
ساره: اها..طيب ماقالت لكم تفاصيل يوم الشوفه
نوف:ماحصل شي ..بس تقول اول مادخلت ابتسم لي..
ساره بقهر:أبتسم لها؟..ليه يسوي دعاية معجون أسنان هو ووجهه
نوف: هههههههههه وش فيك انقهرتي
ساره: ماانقهرت ولاشي...بس تصرفه غبي
نوف: اجل وش تبينه يسوي يقوم يحبها ويجلسها بحظنه؟
ساره بذهول: هاه؟!
نوف: لاحق على هالأشياء بعدين ههههههههههههههه
( قامت ساره وهي تدخل جوالها الشنطه ): يالله نوف تأخرت على نجود..جات عندنا وانا طالعه..ووعدتها مااتأخر ..عاد مشتاقه مررره لحمودي
نوف: وين تو الناس ؟..وش ذا توك شربتي القهوه طلعتي؟..ع الاقل انتظري حتى نشرب الشاهي
ساره:تسلمين ياقلبي والله ودي..بس تعرفين نجود والله تزعل علي لو جا زوجها قبل مااجلس واسولف معاها
نوف:يالله اجل خيرها بغيرها ..بس توعديني المره الجايه اذا جيتي تطولين
ساره:ان شالله ..يالله ياقلبي سلمي على امك ..ونشوفكم على خير
نوف: مع السلامه
(طلعت ساره من بيت نوف ولقت سواقهم رشيد ينتظرها عند الباب دخلت السياره وطلبت من السواق يشغل التكيف على اعلى درجه..كانت تحس بإختناق وضيق..
كل شي كان مختلف بوقتها..الشوارع الاشارات لمبات السيارات ..حتى المحلات اللي تعودت يوميا تمر عليها قبل ماتروح الجامعه ..صارت تناظر للوحاتها وكأنها أول مره تشوفها
شافت أشياء جديده..بيوت جديده..كانت تدور وسط زحمة السيارات على سياره تشبه لسيارته..وتقرا لوحات السيارات كلها..كانت محتاجه لإتصاله وقتها..أكثر من أي شي..
حست بألم في كفها الأيسر وانتبهت على أظافرها اللي كانت تغرسها في يدها من شدة قبضتها..فتحت راحة كفها بهدوء وهي تناظر لآثار اظافرها..حست وقتها بأنها على مسافه ضيقه جداً
من الإنهيار..ماعاد فيها إحتمال..وصلت لمرحلة الإكتفاء من كل شي..وكل اللي بداخلها يصرخ "ماعاد بدري؟!)
-وصلت ساره البيت وكانت حاطه اصبعها ع الجرس وقبل ماتدق ..الباب ينفتح.. دفت الباب بقوه ودخلت الحوش حتى مارفعت عينها تشوف مين اللي فتح الباب..شوي الا تسمع صوت يهمس_
؟؟: بنت ..ساره
ساره وهي تلتفت ناحية الباب:نعم..
؟؟:من وين جايه؟
ساره بإستغراب: راكان؟؟..غريبه سيارتك مو برى!
راكان:جيت بسيارة أخوك
ساره: ليه وين خالد مو بالبيت؟
راكان: لأ..راح مع صديقه مشعل وجحدني بالاستراحه
ساره وهي تعطيه ظهرها متجهه لباب الصاله:تستآهل ..وربي انها قليله فيك
راكان: بدق عليك بعد الصلاه..لاتنشغلين بشي
(دخلت ساره البيت وماردت عليه..لقت اختها نجود بالاستقبال سلمت عليها وراحت يم حمودي وحظنته بقووه..وسحبها مع يدها يبي يوريها الألعاب اللي اشتراها له راكان..جلست معاه
في الصاله قدام التلفزيون وهي تسمع صوت قناة سبيس تون اللي للحين ماتغيرت جملة "سنعود بعد قليل"..كانت اللعبه عباره عن حي كامل ..اشجار وشوارع وسيارات واشارات..يركبها مع بعض
ساره: حمودي ممكن تعطيني الإشاره؟
حمودي:لأ بعدين يموت ياثر القحطاني
ساره:ليش ياثر القحطاني يموت؟
حمودي:لأانه يثوق الثياره بعدين يمشي ويمشي ويمشي وتطلع مافي اشاره حمرا توقف الناث..بعدين يصير "ويصقع سيارتين في بعض" طرااااااخ..ويموت ياثر
ساره:هههههه والحين ياسر القحطاني تارك المنتخب يلعب في آسيا .. وجاي يسوق في حي راكان اللي جايبه لك؟
حمودي: مو مصدقه..هاه..ثوفيه"يفتح باب السياره الصغيره ويحطها بعيون ساره "
ساره: أأأي خلاص عورت عيوني..خلاص شفته شفته..بس مين تحب أكثر أنا ولا ياسر؟
حمودي: كلكم أحبكم
ساره وهي تشيل عبايتها وتمثل قدامه انها زعلت عليه:خلاص لاعاد تكلمني انا زعلانه منك
حمودي وهو يلحقها:طيب خذي الشجره..بس خلي الإشاره
ساره:خلاص ماابغى شي..انت اصلا ماتحبني..تحب ياسر بس
(طلعت ساره لغرفتها وبعد ثواني..دق عليها حمودي الباب وجاب لها الإشاره وهي ملفوفه بمنديل ..المسكين يبي يسويها مفاجأه..اخذت ساره الإشاره وحطتها فوق الدولاب وكأنها حصلت على
جائزة نوبل ..مو قطعه من لعبه جابها راكان لولد أختها..)
فتحت ساره كمبيوترها لانها متفقه مع تولين ترسل لها ملف تورنت فيلم (كالهو ناهو )..لقت ندى متصله على طول صكت ندى بلوك ودقت على جوال تولين
تسألها اذا بتدخل ولا لا؟..لكن تولين ماردت..وهي تحاول تعيد الاتصال اتصل راكان وردت بالغلط ..ولا هي كانت ناويه ماترد عليه لو دق..
استحت انها تقفل في وجهه وبنفس الوقت حست انها تبغى تتأكد من مكانتها عنده..لأن كل اللي قاعد يصير حولها يثبت لها انه انسان كذاب وكل اللي قالته
اخته عنه كان صدق..)
راكان:الو..الو؟
ساره: هلا
راكان: وش فيك تقولينها من دون نفس؟!
ساره:لأني صدق مالي نفس
راكان: اجل ليه تردين علي مدام مالك خاطر تكلميني؟
ساره: تصدق لو قلت لك رديت بالغلط؟
راكان: لا ماأصدق
ساره: مو مهم ..الحين وش تبي ؟
راكان: وش أبي؟..ابي اعرف انتي راجعه من وين؟
ساره: ليه ابوي او اخوي ..ولا ..لايكون زوجي وانا ماادري؟
راكان: ساره..حبيبتي..وش فيك تتكلمين معاي بهالطريقه..مضايقك بشي؟
ساره: حبيبتك؟
راكان: عندك شك؟
ساره:وليه يكون عندي شك..ونا ابد ماعندي دافع اشك فيك..لانك منت خاطب غيري ولابتتزوجها..
راكان: انا مارح اتزوج غيرك ياحياتي..وقلت لك مليون مره هالكلام
ساره:ايه صح مو انت عندك مرض اسمه (الحول العاطفي) ..تحب وحده وتتزوج صديقتها
راكان:ساره..مااعتقد مع اسلوبك هذا اننا ممكن نتزوج
ساره : ايش؟
راكان:...
ساره: ماتعتقد ااننا ممكن نتزوج؟
راكان بخوف: انا قلت اذا استمريتي تتعاملين معاي بهالطريقه؟
ساره: انت تلعب على مين؟..
راكان:وش تقصدين؟
ساره: راكان لاترد على سؤالي بسؤال
راكان:انتي شفيك..احد قال لك عني شي ..زعلتك بشي..وش صار حتى قلبتي على كذا مره وحده؟
ساره: كيف ندى؟..
راكان: مين؟
ساره: راكان ..كيف ندى؟..عجبتك
راكان: والله انك مو طبيعيه
ساره: للمره الثالثه أسألك ..كيف ندى؟ حلوه؟
راكان: واللله ماركزت..ماانتبهت فيها الا لشي واحد
ساره بإنفعال تحاول تخفيه: وشو؟
راكان: كانت لابسه وردي وأبيض
ساره:هذا وانت ماشفتها ..حفظت الوان لبسها
راكان: هذا لأنك بنفس اليوم كنتي لابسه بلوزه ورديه وبنطلون أبيض..تتذكرين يوم كنت بالحوش وانتي تناظرين لي من روى الباب وتحسبين اني مو شايفك هههه
ساره: لاتغير الموضوع..للحين مافهمت
راكان: اول مادخلت وشفتها لابسه وردي وابيض ابتسمت تخيلتها انتي
(فهمت ساره ..ليه ابتسم اول مادخلت ندى عنده على حسب كلام نوف..وهدت شوي..حست كأن مويه بارده انصبت على قلبها..وبدت تسترخي شوي..)
ساره: وبعدين..؟
راكان: ولا قبلين..طلعت البنت وانا رجعت لحبيبتي
ساره:مين حبيبتك؟
راكان: مريم الغضبان الله يرحمها
ساره: تستهبل..انت ووجهك..شايف اعصابي تسمح حق خرابيطك هذي
(بكت ساره بعد جملتها الأخيره ..وقفلت السماعه بوجهه..وسط ذهول راكان من سلوك ساره المتغير..صار يفكر بأشياء واجد..ولعب فيه الظن ..)
راكان بينه وبين نفسه: لايكون رجع ابراهيم وبدت تستغني..لا لا..انا متأكد ان سالفة ابراهيم كذب..ساره اعرفها زين لايمكن تكلم شباب..
بس هذا هي كلمتك يعني وين المشكله تكلم واحد غيرك..!..وواضح بعد عليها انها جريئه ولا كيف تطلع بوجهك زي المره اللي فاتت وهي بكامل زينتها؟
..لا لا اعوذ بالله ..ساره لو ماتحبني وانا ولد عمها ماكان سوت كذا..بس والله شرهت عليها يوم طلعت بوجهي هذاك اليوم..!
{مو قهر
لما تصون عهد من خان وغدر
وتعتذر لإنسان عمره ماتنازل أو أعتذر
مو قهر..!
لو تقدم تضحياتك
وتعطي أحبابك حياتك
وتلقى نفسك في النهايه
أنك أول من خسر ..!}
راكان..؟..اتضح ان طريقة تفكيره ماتختلف عن بقية الشباب اللي يمثلون الاغلبيه في مجتمعنا وحسب ظهور ساره قدامه
جرأه غير مطلوبه..مع انها أبعد ماتكون عن الاستعراض..لكن هل هالموقف البسيط بيأثر على صورة ساره عنده..؟
لمياء هل بتوافق تحظر ملكة اخت ابراهيم ..وابراهيم بيترك هالفرصه تروح من يده لو حصلت له؟!
خالد ..محد فاهم شعوره..حتى هو مو فاهم وش يحس فيه مع تولين..هل بيستجيب للأنتقام لمشعل ولنفسه من تولين؟
ندى الغافله عن كل تفاصيل قصة راكان وساره..اللي قاعده تدهور للهاويه..هل بتقدر تحتوي راكان بكل جروحه ان حصل الفراق بينه وبين ساره؟
وريناد وغياب ابو سامر وأمها المفاجئ..هل لهالوضوع علاقه بالموقف الأخير اللي صار بين فيصل وبينها؟
اتمنى للجميع قراءه ممتعه ..وأنتظر تعليقاتكم
|
13-03-10, 01:43 PM
جديد مواضيع قسم الارشيف
العرض العادي
