( الجزء الثاني عشر )

يُسمعني.. حـينَ يراقصُني
كلماتٍ ليست كالكلمات
يأخذني من تحـتِ ذراعي
يزرعني في إحدى الغيمات
والمطـرُ الأسـودُ في عيني
يتساقـطُ زخاتٍ.. زخات
يحملـني معـهُ.. يحملـني
لمسـاءٍ ورديِ الشُـرفـات
وأنا.. كالطفلـةِ في يـدهِ
كالريشةِ تحملها النسمـات
يحمـلُ لي سبعـةَ أقمـارٍ
بيديـهِ وحُزمـةَ أغنيـات
يهديني شمسـاً.. يهـديني
صيفاً.. وقطيـعَ سنونوَّات
يخـبرني.. أني تحفتـهُ
وأساوي آلافَ النجمات
و بأنـي كنـزٌ... وبأني
أجملُ ما شاهدَ من لوحات
يروي أشيـاءَ تدوخـني
تنسيني المرقصَ والخطوات
كلماتٍ تقلـبُ تاريخي
تجعلني امرأةً في لحظـات
يبني لي قصـراً من وهـمٍ
لا أسكنُ فيهِ سوى لحظات
وأعودُ.. أعودُ لطـاولـتي
لا شيءَ معي.. إلا كلمات

" نزار قباني ":::::::::::::::::::::::::



( بيان )

بعد ماشفت بشار عند لحصان .. لحقته وانا اصرخ ..
اول ما وصلت له .. كان لحصان قريب منه .. اول ماجيت بمسكه حسيت بيد تدفعني وتمسك بشار وتركض فيه بعيد عن لحسان الي كان هايج .. رفعت جسمي عن الارض بصعوبه من لالم الي احس فيه برجلي بسبب طيحتي على الارض ..
اول مارفعت راسي لقيت باسل حامل بشار وجاي صوبي : صار فيج شي ..؟؟
بيان : لا مافيني شي .. بس بشار تعور ؟؟..
اشوي ولا الكل متجمع والخوف منرسم على وجههم ..
ام غريب : اشصاير .. اشهالصراخ ..
ام باسل : يمه بيان اشفيج ..
جواد : رجلج تنزف ..
طالعت رجلي وشفت بنطلوني كله دم .. ماكنت منتبه ..
مدى : من شنو .. واشفيه بشار ليش كنتي تصرخين باسمه ..
باسل ماكان يبي يقول لهم سالفة لحصان عشان مايخوفهم : مافيه شي .. مثل ماتشوفونه .. بس هالغبيه كانت تلعب معاه وطاحت ..
جواد : زين شيل اختك مابتقدر تمشي من رجلها ..
لهالدرجه خايف علي .. لوصج خايف علي ماعملتني بهالجفاء .. وعذبتني بتجاهلك لي ..
ماحسيت الا على يد باسل ترفعني من الارض .. ودخلني لداخل الصاله .. حطني على الكرسي ورفع طرف البنطلون بيشوف الجرح ..
انا كنت مغمضه عيني لاني ما استحمل اشوف الدم .. يجيب لي الوعة ويمكن استفرغ ..
باسل : لا شكله جرح بسيط .. حنان تعالي شوفي اختج ولا ممرضة على الفاضي ..
حنان : زين قوم خل اشوف .. بنين .. عدكم اسعافات اوليه ..
بنين : اي دقيقة بجيبها ..
طلع باسل وظلو معاي البنات ..
بعد ماخلصت حنان من تطهير الجرح
ولفته : بس فتحي عينج يالخوافة خلصت ..
جوري : انتي اشسالفتج كل يوم والثاني مشدخة بروحج ..
بنين : العوابه وما اتسوي ..
بيان : محد غيرج اعوب يالخسفة ..
مدى : اشهالكلمات السوقيه ..
بيان وبنين : بالعدال ..
مدى : الا صج اسمع بشار يقول ان لحصان بغى يدوسه ..
بيان : اي ترا كل هالفلم الهندي عشان ننقذ ولدج .. بس باسل ماحب يخوفكم فقال اني كنت العب معاه ..
مدى : الحمدالله ماصار فيكم شي ..
بيان : كل هذا وماصار شي .. وجرح رجلي ..
مدى : عادي فدوى عن ولدي ..


:::::::::::::::::::::::



( سيف )

غاط في احلى نومه .. من بعد تعب الشغل ... الا اسمع صوت يخترق اذني ... وجسم صغير قاعد على صدري .. فتحت عيني ببطئ وماكان ودي افتحها ..
لقيت زهور في وجهي وهي تصرخ ..
زهور : قوم .. قوم انت كله تنام ..
رفعتها عن صدري وقعدت على السرير : نعم .. امري اشبغيتي ..
زهور : ابي حنون ..
سيف : حنان !! اشتبين فيها ؟؟
زهور : بس ابيها .. مليت من وجهك ..
سيف : اقول .. .. طلعي بره احسن لج ..
زهور : مابي مابي .. خذني لحنان ..
يالله انا شنو سويت في حياتي .. عشان تبليني فيهم ..
استغفر الله .. والله بيطلعوني من طوري ..
زهور : انت ماتسمع .. ابي حناااااااااااااااان .. ابي حنااااااااااااااان ..
سيف : بس .. تعالي كلميها في التلفون ..
زهور : هات .. وبقول لها اتجي تاخذني من هني وتفكني منك ..
سيف : صج لي قالو .. محمول ويترفس .. جب بس جب ..
عطيتها التلفون بعد خليته على لسبيكر ..
حنان : الوو
زهور : الوو .. حنان ..
حنان : اي من معاي ..
زهور : انا زهور .. ماعرفتيني ..
حنان : هلا حبيبتي .. شخبارج ..
زهور : زينه .. بس تعالي خذيني ما ابي اقعد مع سيفوه ..
خزيتها عشان تسكت بس مافي فايده ..
حنان : ليش .. شمسوي فيج ..
زهور : كله يضربني .. ويصرخ علي .. ويحبسني في الحجره .. ولايعطيني اكل ..
سيف بصدمه : الله ياكبرها عند ربي ..
حنان : هذا انت .. شمسوي في البنت ..؟؟ حرام عليك ..
سيف : الحين انتي مصدقتها .. ترا كل الي قالته خرط من عندها ..
زهور : لالا انا ما اجذب .. تعالي اخذيني ..
حنان : ان شاء الله حبيبتي .. الحين بجي .. مستحل اخليج مع هالوحش ..
سيف : وحش هااا .. اقول انقلعي زين .. والله مافي وحوش في هالدنيا غيركم ..انتو اصلا خطر على المجتمع .. ما ادري شلي بلاني فيكم ..
سكرت التلفون في وجها ..
وطالعت زهور بقهر : الحين انا اضربج .. واصرخ عليج .. وحابسج في الحجره هاااا ..
زهور وهي تركض للباب : اييي يامجرم .. يا وحش ..
سيف وانا الحقها : تعالي .. الحين بوريج الاجرام على اصوله ..


::::::::::::::::::::::

( جواد )

دخلت البيت وجسمي كله متكسر ومو طايق عمري .. ادور سريري عشان انام وانسى كل هالعذاب الي عايشة فيه .. ويمكن انام وما ارد اصحى وافتك من كل هالحياة ..
وانا في طريقي لدرج وقفني الكلام الي سمعته من الصاله .. قربت عشان يوضح الصوت واسمع عدل ..
بس صدمني الي سمعته ..
ام جواد : متى بتكتب البيت الكبير باسمي ..
ابو سجاد : قريب بس انتي انتظري علي اشوي ..
ام جواد : لا مابنتظر .. ومن باجر تروح المحكمه وتكتبه باسمي ..
ما قدرت استحمل ودخلت عليهم : اي بيت الي تبينه يكتبه باسمج ..
ام جواد : مالك خص ورح غرفتك .. ولاتتدخل ..
طنشتها وكلمت ابوي : بتكتب بيت امي ام سجاد باسمها ..
سكت ولا رد ..
ام جواد : اي عندك مانع ..
جواد : اي عندي مانع .. والبيت مابينكتب باسم احد .. وحرام عليج الي تسوينه .. اشتبين في بيتهم .. ماظل شي ما اخذتيه .. مابقى الا هالبيت وبعد بتاخذينه .. خافي ربج ..
ابو سجاد : انت ماتستحي تكلم امك بهالطريقة ..
جواد : اي ما استحي .. ولا الي يقول كلمه الحق في هالبيت يطلع قليل ادب ومايستحي ..
ابو جواد : اطلع على غرفتك احسن لك .. لا اتصرف معاك تصرف ثاني ..
جواد : تصرف هذا الي طول عمري انتظره ..
انت ماتدري ان الي تسويه حرام .. كفايه موب سائل عنهم وتاركنهم طول هالسنين .. لاتصرف عليهم ولا تشوفهم .. والبيت الي راس مالهم بتاخذة ..
ابو سجاد :صج اني ما عرفت اربي .. اطلع بره .. اطلع بره بيتي ..
جواد : طالع من غير ماتقول .. هالعيشة الي في هالبيت ما ابيها ..
جيت بطلع بس وقفني صوت جوري الي واقفة على الدرج ودموعها على خدها ..
: جواد لاتروح ..
جواد : ما اقدر اقعد بعد .. خلاص ما اقدر استحمل ..
جوري : جواد عشاني .. ما اقدر اعيش بدونك ..
طلعت من غير ما ارد عليها .. لاني لوظليت اشوي .. بغير رايي وبظل معها .. وهالشي ما ابيه .. خلاص ما اقدر تعبت من هالعيشة ..


:::::::::::::::::::::::

انا عيوني حرمت غيرك تشوف .. والقلب حرم غيرك يحب ثاني

كف الدموع وابعد الشك والخوف .. والقلب لك يا بعد عمري مواني

دخيل قلبك سوعاد فيني معروف .. لاتذرف دموعك تبعثر كياني

اضحك انا لضحكتك مشتاق وملهوف .. يامن غرامك عن زماني خذاني

ويامن بحبه صرت مغرم ومشغوف .. ياخل غيرك حرمت عيني تشوف

.. والقلب غيرك حرم يحب ثاني ..


( مدى )

قاعدة مع امي وبنين في الصاله بعد الغداء ..بشار يلعب بره في الحديقة ومعاه الشغاله .. وابوي راح مكتبه ويوسف يريح في غرفته .. وغريب غايب .. ومكانه فاضي ..
مدى : يمه .. ما اتصل غريب اليوم ..
ام غريب : بلا .. اتصل .. ويسلم عليكم كلكم ..
بنين ومدى : الله يسلمه ..
اشوي الا اسمع صوت ابوي يناديني من المكتب ..
مدى : يمه ماتدرين ابوي يبيني في شنو .. كنت متوقعه انه بيناديني لان اليوم نظراته لي غريبه .. شكله صاير شي ؟؟ !!
ام غريب بتسمت : روحي له وبتعرفين ..
مدى وهي رايحه للمكتب : الله يستر .. انتو وراكم شي جايد ..
وصلت للمكتب وطقيت الباب ودخلت بعد ما اذن لي ابوي ..
ابو غريب : تعالي يبه قعدي ..
رحت قعدت على الكرسي الي مقابل ابوي : خير يبه ..؟؟
ابو غريب : كل خير ان شاء الله .. سمعي يبه انا لابلف ولا بدور .. في واحد متقدم لج .. اخلاق ومال وجمال واصل.. ومو ناقصة شي ..
نعم .. !! ماسمعت عدل .. لا مو ماسمعت مو قادره اتصور والفكره مو راكبه في مخي .. في احد متقدم لي .. انا .. !!؟؟ مستحل .. ما ابي اتزوج واعيد ماساتي للمره الثانيه ..
رديت على ابوي بثقه : يبه مو موافقة .. لو من يكون .. وبليز .. لحد يفتح معاي موضوع زواج مره ثانيه ..
وقمت بطلع بس وقفني صوت ابوي : قعدي مكانج .. لاني ما خلصت كلامي ..
قعد برضوخ احتراما لاابوي ..
ابوغريب : فهميني ليش .. ماتبين افتح معاج سالفة الزواج ..
مدى : لاني ما ابي .. ولي شفته من فواز كفاني وزيادة .. والحين ما افكر في اي شي غير بشار ..
ابو غريب : اولا اصبعج مو سوى .. وثنيا .. انتي لحد الحين صغيره والمستقبل قدامج .. وبشار محتاج اب ..
مدى : الله يخليكم له انت واخواني .. مو مقصرين معاه ..
ابوغريب : ما اقول لا .. بس انا مو دايم لج ولا لولدج .. واخوانج .. في النهايه كل واحد بيكون له حياته الخاصة ..
مدى : ومن قال لك .. ان هلي متقدم لي راح يكون مثل الاب لبشار ..
ابو غريب ابتسم : اظمنه لج ..
مدى باستغراب : تظمنه لي !! شلي يخليك واثق كل هالثقة ..؟؟!!
ابو غريب : لان هالشخص محل ثقة .. وراح يحب بشار ويهتم فيه اكثر من اخوانج بعد ...
مدى : يبه ! .. من هو؟؟..
ابو غريب : باااااسل ..
لالا باسل .. مستحيل !!.. مااقدر اصدق .. بااااااااااااسل !!.. ليش شيبي مني .؟؟!!.
اكيد عشان بشار لاحظت انه متعلق في وايد .. واكيد تقدم لي عشانه .. عشان يكون قريب منه .. مجنون يضيع حياته ويتقدم لوحدة مطلقة عشان ولدها .. هذا اكيد مجنون ..
مدى : بعد مو موافقة .. ولانه باسل .. يزيد من رفضي ..
ابو غريب : ليش شنو شايفة على ولد خالتج !؟؟
مدى : مو شايفة الا كل خير .. ومافي شي يعيبه .. بس انا ادري بالسبب الي خلاة يتقدم لي ..
ابو غريب : شنو ؟؟
مدى : عشان بشار .. لان وايد متعلق فيه ..
ابو غريب : وين الغلط في كل هذا ..
مدى : يضيع حياته ويتزوجني ..عشان بشار !!
ابو غريب : ما عطيتيني اي سبب مقنع يخليج ترفضين .. وسمعي روحي صلي استخاره .. والي بيريحج .. بوافق عليه من غير اي نقاش ..
مدى : يبه .. اشلون اصلي استخاره وانا ما ابي هالشي من الاساس .. الناس تصلي اذا كانت محتاره .. وانا مو محتاره .. انا رفضة ..
ابوغريب وبدا يعصب :.. مدى سوي الي قلت لج عليه .. لا تخليني اغصبج واسوي شي اندم عليه ..
مدى : ان شاء الله .. بسوي الي قلت عليه .. بس اذا ما ارتحت .. ياليت محد يفتح معاي هالموضوع مره ثانية ..
وطلعت .. وانا ضايعة .. و متشتته ..انا اتزوج مره ثانية .. مو قادرة اتخيل .. ولا المصيبه باسل .. ما ادري هذا اشلون يفكر .. صج مجنون .. !!



:::::::::::::::::::::



( جوري )

كنت قاعدة في غرفتي وادرس .. بس سمعت صوت امي تناديني ..نزلت لها ولقيتها قاعدة في الصاله ومعها مي ..
قلت لها وانا واقفة : نعم يمه بغيتيني ..
ام جواد بابتسامه لجوري ماتطلع الا نادرا : اي .. تعالي بغيتج في سالفة ضرورية ..
الله يستر .. انا من شفت ابتسامتها قرصني قلبي ..
رحت قعدت جمبها : خير يمه ..
ام جواد : ترا حددنا يوم ملجه اختج على ابو راشد ..
الشايب .. وععع .. بس كيفها اهي اليي تبيه ..
قلت لها وانا اغتصب الابتسامه : مبروك ..
مي بخبث : الله يبارك فيج .. عقبالج ..
ابتسمت ولا رديت وقمت .. بركب فوق ..
ام جواد : على وين ..
جوري : بروح غرفتي ..
ام جواد : ليش انا لحد الحين مافاتحتج في الموضوع ..
رديت قعدت مكاني : تفضلي يمه ..
ام جواد : في واحد متقدم لج ..
طالعتها باستغراب : من؟؟
ام جواد : ابو محمد .. الي قلت لج عنه .. صديق ابو راشد خطيب اختج ..
وقفت على حيلي من الصدمه : يمه!! انا مو قلت لج مستحل اخذ هالشايب .. واصلا اهو من وين عرفني ..
ام جوري : اختج عطته صورتج وشافها وعجبتيه .. وبيجي يتقدم لج رسمي ..
جوري بعصبيه : من سمح لكم تعطونه صورتي .. وقولي له لايتقدم ولايتعب نفسه انا ما ابيه ..
مي : انتي تحمدين ربج انه تقدم لج ..
جوري : حامده ربي من قبل ما اعرف اشكاله ..
مي : لانج وجه فقر .. مو وجه نعمه ..
جوري : الحمدالله راضيه.. وعايشه في خير ابوي .. ولا اركض ورا لرجال ..
مي عصبت وقامت بتصطرها بس جوري مسكتها من معصمها : لاعيوني هذاك اول .. الي اخليج تمدين يدج على .. ولول تحول ...
ام جواد : جوري تركي يد اختج .. وانتي روحي غرفتج وانا بتفاهم معها ..
جوري : لاتتفاهمين معاي .. ولا غيرة .. الموضوع منتهي بالنسبه لي ..
ام جواد عصبت : موب كيفج .. وبتاخذينه غصب عنج ..
جوري بعناد : لا مابخذة .. ومحد يقدر يجبرني ..
فجاء مالقت الا يد امها تنطبع على خدها : لاطولين السانج يالخايسة .. وكلامي بيمشي غصب عنج ..
جوري ودموعها على خدها : موبكيفج .. عندي ابو واخوان اهم الي لهم كلمه علي اما انتي لا ..
بعد الجمله الي قالتها فارت اعصاب امها .. جرتها من شعرها .. وضربتها بكل وحشيه ..
: يالخايسة انا مالي كلمه عليج صج ماعرفت اربيج ..
جوري وهي تحاول تبعد عنها وتكلمت بصعوبه : ومن قال انج ربيتيني اصلا .. انا ما ربتني غير امي ام سجاد .. ويوم بعدتيني عنها ربيت نفسي بنفسي .. محد رباني ..
زاد ضربها .. بعد الكلام الي قالته ..
: صدقيني بعد الكرم الي قلتيه .. لخلي ملجتج باجر وقولي نورة قالت ..
جوري : موب كيفج .. وماباخذة لو تنطبق السماء على الارض ..
ام جواد : بتاخذينه .. والملجه باجر ..
ودزتها على الارض : وبنشوف كلام من الي بيمشي ..
قمت من على الارض بصعوبه .. وركضت على غرفتي ودموعي على خدي: بنشوف .. بنشوف ..
دفنت راسي في مخدتي وانا اكتم شهقاتي .. شسوي شسوي .. وينك ياجواد .. ليش رحت وخليتني ليش .. من الي بيدافع عني وبيمنعهم من غصبي على هالزواج من !! ؟؟ من ..؟؟!
مسكت تلفوني واتصلت عليه بس كالعاده مغلق ..
جوااااااد ارجع .. ارجوك .. ارجع !!


:::::::::::::::::::::
احبـــــــــــــــــــــــــــك
نـــعـــم احـــبـــــــــــك
لا تتـــعــجـــب ولاتـــنــدهـــــــش
لا نــي احـــبـــــــك
انت يامن زلزلت كيـــــــــــانـــي...
وبعــثت الحيـــاة في جســـــــــدي...
انت يامن هيــضت مشـــــاعـــري...
وانرت دربـــــــــــي...
انت قمـــر ليــلي الحالك...
وشمس عمـــري اليــــافع...
احــــــبــــــــــــــــــــــــــكـ...


( حنان )


كنت في الشغل وقاعدة اكلم مدى في التلفون .. احاول اقنعها بسالفة الزواج بس مافي فايدة .. راسها يابس ..
حنان : زين انتي فكري .. مايصير ترفضين جذي من غير تفكير ..
مدى : ما يحتاج افكر .. لان الموضوع منتهي عندي .. بس ابوي موب راضي .. يقول لازم اعطيه سبب مقنع .. ولا يبني اصلي صلاه استخاره ..
حنان : زين صلي استخاره وبعدين قرري ..
مدى : انتي اخوج هذا مو صاحي .. من وين طلع لي بهالسالفة ..
حنان : هههههههه الحب ومايسوي ..
مدى : سخيفة .. اي حب انتي بعد .. انا ادري انه تقدم لي عشان بشار ..
حنان : امممم .. ما اعتقد .. اشرايج تكلمينه وتشوفين شنو عنده .. ويجاوب على كل اسالتج .. مو احسن ..
مدى : روحي زين استحي .. ولا اتخيل نفسي اساله ليش متقدم لي !! لالا مستحيل
حنان : شنو فيها عادي ..
مدى : لاوالله .. ليش تفكرين كل الناس حنان ..
حنان : اشقصدج ..
مدى : ما اقصد شي .. ويلا بصلي استخارة وامري لالله .. الا ماقلتي لي شنو راي خالتي بالموضوع ..
حنان : ههههههههه .. الدنيا مو سايعتها من الفرحه اخيرا ولدها الوحيد وبجرها بيعرس .. ولا بياخذ اغلى بنات خواتها ..
مدى : اففف .. كانت خالتي اخر امل عندي .. تمنيت انها ماتوافق .. عشان اتحجج فيها ..
حنان : هههه والله ماعندج سالفة الحين تبين خالتج ترفضج .. مستحيل ..
ويلا وافقي ترا مابتحصلين واحد احسن من اخوي ..
مدى : شسوي الكل واقف ضدي ويحالول يقنعني .. حتى غريب اتصلو له وخبروه .. واتصل يحاول يقنعني .. ولا امي مالها في البيت غير هالسالفة .. والله اذا بوافق بس عشان افتك من حنتكم ..
حنان : زين عيل بخليهم يزيدون في الحنه .. عشان توافقين .. حرام عليج اخوي قاعد يتعذب .. الا صج انتي لحد الحين ماصليتي استخاره ..
مدى : لا ..
حنان : ليش شنو تنطرين ..
مدى : ما ابي .. لان اذا ارتحت لازم بوافق .. عشان جذي ما ابي اصلي ..
حنان :روحي صلي وبلا دلاعة .. يلا باي بقوم بشوف شغلي عطلتيني ..
مدى : والله انتي الي متصله .. باااي ..
صار فيها .. سكرت التلفون .. ورحت بسرعة لطابق الي فيه مكتب سيفو بساله عن القضيه وشنو
فتحت الباب واول شخص طاحت عيني عليه .. بنت قاعدة الكرسي الي مقابل المكتب الي سيف قاعد وراه .. وماخذه راحتها .. وكانت سفور .. يعني لاحجاب ولا شي .. وشكلها يلوع الجبد ( جذابه ) .. اول ماشافوني لفو علي .. سيف كان عادي .. بس اهي كانت متفاجاه من دخلتي عليهم جذي من غير لا احم ولا دستور ..
رحت بكل برود قعدت على الكرسي الي مقابلها ..
البنت : ماعلموج في بيتكم لستاذان ..قبل ماتدخلين على الناس ..
حنان طالعتها من فوق لتحت : لا ينطرونج تعلميني ..
البنت : ليش ماعرفو يربو ...
قاطع عليها سيف بس عرفت شنو كانت بتقول ولو كملت الكلمه والله لمسح فيها الارض : هاها .. وقفو .. اشفيكم كل وحده قابه في الثانيه .. تعرفون بعض ..
حنان وابنت : لا ماحصل لي الشرف ..
سيف : مرام بنت عمي .. وهذي حنان ممرضة في المستشفى ..
مرام : ممرضة!! وشلون تسمح لها تدخل بهالطريقة وتكلمني جذي ..
حنان : وشلون تبيني اكلمج ان شاء الله ..
مرام : بادب .. واحترام .. وتعرفين مكانتج ..
حنان بكل بروح : عارفة مكانتي قبل ما اشوف اشكالج يا امعه ..
مرام : تسمحين طلعين بره ..
حنان : اذا صار بيت ابوج ت تعالي طرديني ..
كان سيف طول الوقت ساكت ويطالعنا ببرود ..
مرام وقفت على حيلها من القهر : سيييييف خلها تطلع بره ..
حنان : ليش ما انتي الي اطلعين ..
سيف وهو قايم من مكانه : تدرون لا انتي ولا هي .. انا الي بطلع ..
وطلع بره وخلنا ..
رحت قعدت على كرسي سيف عشان اقهرها : الحين بطلعين ولا اتصرف معاج تصرف ثاني .. ترا عاجبتني كشتج .. وخاطري انتفها ...
مرام شكلها خافت راحت عن الباب بسرعة : ياقليله الادب ...
وطلعت بسرعة قبل ما الحق وراها ... ههههههههههه الخايسة .. الحين هذا سيفوه اشلون يخلي بنت عمه تمشي جذي قدام الناس .. بس خلها اتجي هني مره ثانيه .. بطلع روحها ..


:::::::::::::::::::::::::::

:
:
:
:
:
:
:
:
نهاية الجزء





:29ps:

تنقل للأرشف

بسبب التوقف فترة طويلة


مشرفات القسم