[B] الحلقه الأربعــــون

((1))

[.. مجرد زياره ..!!..]

سارا

دخلنا بيت خالتي مع ود اللي كانت واقفه على البوابه بتستقبلنا .. ههههه ..
ود :ياحيا الله من جانا تو ماتباركت ...
وقطعت جملتها اللي عجزت تكملها ..
ود :المهم اني فرحانه بجيتكم اقلطوا تفضلوا بروح اجيب لكم العصير اللي سويته لكم ..
ملاك :تعالي انتي ووجهك وين رايحه من صدقك بتشربينا شي انتي مسويته ..
ود:بتشربنه غصب عنكن انا ماتعبت نفسي عشان تردني ..
وراحت قبل ماتسمع ردنا ..
رميت عباتي اللي لحقتها عباة ملاك ..
ملاك :غريبه وين خالتي ..
سارا :يمكن راحت تصلي التراويح بالمسجد ..
ملاك :توقعين
سارا :أكيد لأنها قالت انها ماهي طالعه اليوم ..
ملاك :وووووووود وين خالتي ..
سارا :وين تصرخين ماهي سامعتك حسبالك ببيتنا نسولف مع بعض وكل وحده منا بغرفه ..
ملاك :تصدقين احسبها تسمعنا ..
سارا :ماأستغرب هالشـي عليك لأنك هبلا ..
طنشتني ملاك وراحت تشغل تلفزيون ..
وانا خطفتي لي مجله وجلست اقلب فيها ..
ثواني بس وجتنا ود ومعها صينيه عليها ثلاث أكواب كبيره عصير فيها مزازات شــي ووراها شغاله تدف عربيه مليانه من مالذ وطاب ..
سارا :اللحين خالتي وين ..
ود :جدتي شيماء راحت تصلي التراويح بالمسجد ..
وجت بتوزع علينا العصير .. سألتها بالشك ..
سارا :اللحين هذا انتي اللي مسويته ..
ود :ايه انااا عندك شك انسه سارا ..
ورمتني بنظره تخوف .. اضطريت بعدها اخذ العصـير ..
بس ملاك تعذرت تقول توني شاربه بيبسي .. وانا طحت فيها ..
واذا كان عندي واحد بالميه شك انها هي اللي مسويته اللحين صرت متأكده ميه بالميه انه سوات يدها ..
سارا :وععع وش ذا تكرم النعمه ..
ود:اشربي وانتي ساكته .. انا مسويته لكم مو عشان تنتقدين المره ذي طعمه مومقبول المره الجايه ينقبل ..
ملاك :ليه مقدم على العسكريه ..
ود :لامقدم على البحريه ..
قلت انا مد رجولي وحطها بحضن ود ..
سارا :ياملغكن ..
رمت ود رجولي بقوه وهي تصرخ ..
ود :قليلة ادب ووصخه ..
فجأه قامت ملاك ..
سارا :تعالي وين رايحه ..
ملاك :وش دخلك بروح الحمام تجين معي ..
سارا :ههه لاروحي لحالك ..
وبعد ماراحت ملاك سألتني ود ..
ود :وش فيك لازم تلصقين فيها انتي
..
سارا:ايه عندك مانع اختي وتوأمي وحبيبة البي ..
ود:طيب ليش مارحتي معها ..
رزعتها برجلي ..
سارا :تنكتين انتي ووجهك ..
ود :عمى بعينك وش ذا رجل ولامرزبه ..
سارا:خلصتوا اختبارات ..
ود :لاتونا ماقررنا نختبر ..
سارا :ليش ..
ود :كذا تعرفين بنات الأهليه متبطرين مايبون امتحان بالرمضان والمعلمات ماعندهن مانع ..
اهااا يازين الدراسه اللي كذا مالت علينا بس ..
دراسه بالغصب وكرررف وبالأخير نرسب وهم ترفيه ولعب وناسه وبالأخير ينجحون ..
سارا :طيب داومتي اليوم ..
ود :لاا وماراح ادوام بالرمضان لاحقين على الشقى ..
اوب اوب هذي بالله عليكم هذي دراسه .. وينك ياوعد تسمعين خخ كان تنهبل علينا المهبوله ..
ود :اقول سوير عن اذنك بروح اجيب جوالي نسيته اولى بالحديقه كنا جالسين هناك قبل ماتروح جدتي للصلاه ..
سارا :اوكي طسي بس ارجعي ترى مأحب اجلس لحالي ..
طلعت من هنا ود ودخلت خالتي ..
سارا :اهلين خالتووووووو اشتقنا لك ... كل عام وانتي بخير ..
خالتي :وانتي بخير ياحياتي وش اخبارك ..
سارا :الحمدالله بخير ..
خالتي :وين ملاك ..
سارا :ملاك راحت لدورة المياه اللحين بتجي ..
بس ملاك ماجت ولاود كنت احاول اندمج مع خالتي بس اللي قدرت عليه عشر دقايق بعدين ماقدرت احس بديت اضيع وين راحت ملااااك يالناس تأخرررت حيل ...

((2))

[.. الملآآك ..]

ملاك

حطت عيني بعينها وبكل قوه قلت لها ..
ملاك :انتي مالك دخل فيني وعمك ماهو بزر صغير بلعب عليه ..
ود :ملااك حرام عليك وخري عن طريق عمي ليش تخربين عليه حياته هو يحب شووووووووووق ليش ماتفهمين ..
ملاك :اللي أفهمه شـي واحد وليد لي يعني لي ..
ود :انتي غبيه متخلفه ترى هذا مولمصلحتك عمي يلعب على الف بنت واللي يحبها وحده انتي بتخربين على نفسك وعلى عمي وش بتستفيدين .. ماتخافين انه يأذيك ..
ملاك :لا ماأخاف .. وكلامك ماراح يخوفني وقولي لشوق اللي مرسلتك تنسحب هي احسن لها لأنها ماعرفت ملاك زين .. ومثل ماخليته عمك يكرها طول الوقت اللي راح بخليه مو بس يكرهها لايذبحها ..
ود :ملااك حراام عليك انتي مو نجسه ليش تسوين كذا ..
ملاك :لأني احببه ..
ود :بس هو مايحبك يحب شوق ومن سنين مو بس من اليوم ..
ملاك : بلييز وخري عن طريقي واذا كنتي تحبيني صدق مثل ماتقولين خليك بصفي ..
ود :حرام عليك والله حرام لاتسوين كذا انتي طيبه لاتخربين على نفسك بالتصرفات هذي والله الدنيا وصخه ماتستاهل انك تسوين كذا لاتضيعين نفسك ..
ملاك :ووود لاتعلمين خالتي او سارا وبس هذا اللي ابغاه منك ..
طالعتني بقهر وقالت ..
ود :بقول لعمي انك تلعبين عليه ..
ملاك :بتكذبين عليه ..
ود :ماأكذب ..
ملاك :الا تكذبين أنا احبه ماألعب عليه ..
ود :بس هو يلعب عليك ..
ملاك :أنتي مالك شغل انا بالستين داهيه ..
ود :وبتخربين بيت شوق ..
ملاك :ود انتي وش تبغين اذا عمك رضى على نفسه انتي مالك دخلل ..
ود :حقيرررررررره ..
ولفت وراحت لبيتهم تركض .. يعني كان لازم تجي وتخرب علي اوووف اللحين الوليد اكيد راح يوم سمع صوتها الشينه .. اووووووف ماكان ودي يصير هالموقف مع ود بس هي اللي تدخلت وش لها تجسس علي وعلى حركاتي .. لاوسامعه مقابلتنا اللي قبل الحيوانه ياهي سوسه .. بس انا اعلمها كيف تدخل بشئون غيرها .. استغفرالله وش هالتفكير لااامستحيل اسوي لود شــي هي ماتستحق مني هالمعامله بس لوسوت شــي بعطيها قرصة اذن ..
وليد لي يعني لي .. وليد املي الوحيد بالحياه .. اللي بينتشلني من حياة الفقر والضياع ..
وليد فيه كل احلامي الحبيب الوسيم والزوج الغني والمستقبل المضمون بتشبث فيه باسناني .. ومثل ماأزحت شوق من طريقي .. لاباقي شــوي بس وازيحها .. واخلي وليد يجي زحف على ركبه لبيت اهلي يخطبني ..
بس اللي يقهر تمسكه فيها حتى بعد ماعرف انها خاينه قذره وصخه كل هذا ماخلاه يطلقها مأدري كيف يفكر .. غبي فعلاً غبي ولاهو رجال لو كان رجال كان سوى مثل ماسوى خلف يوم درى ان ريم تخونه .. يطلقها ..
حسيت بالجوال اللي عطنياه وليد من أسبوعين يهز بمخباتي ..
وليد :ملاااك ماأقدر أشوفك اللحين ..
ملاك :بلعنه ..
وقفلت الجوال بوجهه .. هين ياوليد انا اللي بوريك معك شهر اذا ماخطبتني والله لأسحرك يالحيوان ... وخليك ماهو تحبني وبس تصير مجنوني وتكررره شوق واهل شوق وامك اللي جابتك ..
رجعت بالسرعه للفيلا خالتي من زمان انا طالعه ياحياتي ياسارا اكيد خايفه علي ...
وأنا داخله كانت هي طالعه ..
سارا :ياحماررره وين كنتي ..
اخذت نفس طويل وشهقت ..
ملاك :كنت مع ود تهاوشنا وراحت للبيتهم ..
سارا :مالت عليكن تطلعن تلعبن وتخلني ..
لاياحياتي ياسارا خليك كذا لعبنا ابد مايصلح لك ..
ملاك :ملل مانبسطنا من حوبتك اكيد وين خالتي جت ...
سارا :ايه كنت احسبك ماتبين تشوفينها يوم طولتي ..
ملاك :لاعادي انا نسيت واكيد خالتي نست ..
ودخلت وسلمت على خالتي اللي كنت تهاوشت انا وياها بعد ماترك جواد سارا هوشه كبيره وتلفظت عليها مع انها كانت تحاول تهديني وتقولي انها هي بعد ماهي راضيه باللي صار .. بس مش مهم اللحين لازم اكسب حولي ناس كثير .. وجوادوه بيتزوج سارا غصبً عنه لو اسحره هو الثاني عشان يعرف يترك اختي بذيك الطريقه ويخلي الناس تكلم عنها ..



((3))

[.. اخرج من حياتي ..]

ضحى

حنا مو عار ولابصمة سودء تشوه سجل مبارك باشا الشـريف .. عشان يطلب مني عن طريق عساف افندي اني اذ بغيت احضر مناسبة العيله ماأخذ نوره معــي .. ليش هالنوره ماهي بنته اللي رماها مثلها مثل أي شـي مايهمه ..
عساف :الله يخليك ضحى عدي هالموضوع وخلينا نزل نوره عند خواتك ونروح للعزيمه وبلاها هالمشاكل ..
ضحى :كلامي واضح ماني برايحه لأي مكان الا بالنوره .. واذا موعاجبك مو لازم اروح ..
عساف :انتي تدورين المشاكل بس يسرا وصتني الف مره اني ماأجي بدونك ..
ضحى :عساف انا ماأحب اعيد بكلامي ..
عساف :يعني معنده ..
مارديت عليه ..
عساف :حلو مو لازم تروحين ..
صرخت عليه وانا اشر على الباب .. خلاص بديت افقد اعصابي حسبي الله عليه هو واخته وابوي ..
ضحى :طيب ممكن تفضل ..
طالعني بنظره غريبه ..
عساف :شلون ..
صرخت ..
ضحى :تفضل بررررى بيتي يتعذرك ..
هز راسه وكأنه متوقع اللي بقوله ..
عساف :بتفضل برى بس بأخذ هذي معي ..
وسحب شدن اللي كانت حاضره الموقف من اوله مع يدها وطلع فيها وهي تصارخ تبغاه يتركها وتستنجد فيني بس انا ماسويت شـي لأني عارفه وميقنه قبل الفجر بيكون راجع فيها .. بس يحلم أدخله بيتي بعد سواته ذي ..
سحبت نورا معي ورحت اغسل بالملابس اللي لها اسبوع مكومه واخذت كل ملابس الباشا الوصخه وحطيتها بكيس زباله عشان لاجاء ارميهم في وجه مع بقية ملابسه ..
رحت بسرعه لغرفتنا فتحت الدولاب وطلعت كل ملابسه ورميتها بكيس زباله وفتحت الأدراج وبديت اطلع باقي ملابسه وأحطها وشمغه وكل شــي يخصه .. فجأه بديت حس رجولي ماهي قادره تشيلني جلست بركبي على الكيسه اللي رميت فيها ملابسه وسندت راســي على الدولاب والدنيا تفر فيني وخلاص ماني قادره اشوف شـــي ..


((4))

[ .. ياتفارق ياتحب ..]


عساف


نرفزتني هالغبيه ..
عساف :خلااص شدن اسكتي ..
شدن :مااني ساكته لين ترجعني لماما ..
عساف :شدونه حياتي ماتبغين تروحين لعمه يسـرى وتلعبين هناك مع صغار ..
بدت تصرخ علي ..
شدن :مأبي ماأبي الله يأخذ يسرا وشكلها مابي اروح عندهم رجعني لماما ..
رديت عليها بعصبيه ابي اسكتها ماكان قصدي اخوفها ..
عساف :بتسكتين ولابرميك بالشارع ..
بعد كلمتي شهقت بقوه وحطيت يديها على فمها عشان تكتم صوتها .. وهي تطالعني برعب وتهز راسهاا لااا ..
وقفت السياره على جنب وضميتها ..
عساف :شدونه حبيبتي انا بابا مستحيل ارميكي بس انا أقول كذا عشان تسكتين لأني ماأبغى اشوفك تبكين ..
قالت وهي مستمره بالبكاء
شدن :لوماتبغاني ابكي رجعني لماما ..
ضميتها بقوه .. وانا اردد في بالي هذي بنتي بزينها وشينها بنتي جزء مني .. تعبت من انعدام الأحساس اللي عندي بنتي ليش ماأحس اني احبها .. ليش شعوري لها جاف ماأحس بس شعور ناحيتها اشفق عليها أحيان بس ماأحبها ما أحبها .. مثل ماأحب ضحى .. ماأحبها مثل ماأحب نوره نوررره اللي مالي من عرفتها اسبوع دخلت قلبي اللي مادخلته بنتي اللي اعرفها لي ست شهور ..
شدن :خلاص فكني ورجعني لماما ماأحبك اناااا ..
يعني معقوله شعور متبادل معقوله ماتحبني لأنها ماحست اني احبها .. وش هالشعور اللي بين اب وبنته ..
رجعتها لكرسيها وأنا اقولها ..
عساف :بنروح لمكان قريب بعدين بنرجع للبيت ..
شلت من فكري اني اروح للعزيمه اللي سببت كل هالمشاكل .. ودي افهم ليش احيان نفقد اعصابنا عشان اشياء تافهه ماتسوى نحسبها بوقت العصبيه امور مصيريه وللاسف مانحس انا تافهه الا اذا فات الآوان ...
اللحين هذي وش بيرضيها .. ضحى واعرفها زين هي خلقه ماهي راضيه عني اللحين وش بتسوي .. اصلاً هي من ايام وهي تنتظر أي شـي بس عشان تنفجر بوجهي ..
عساف :اوووووووف ..
حسيت بيد شدن تشنج بيدي ..
عساف :وش فيك ..؟!
شدن :ليش تأفف خوفتني ..
دزيتها قدامي للقسم الألعاب
عساف :طيب امشي خوذي لك ولنوره العاب ..
بعد ربع ساعه كنت اوقف سياره قدام البيت .. فتحت لها باب البيت وطلبت منها تقفله وراها ...
طاحت عيني على واحد من الكيس اللي فيها العابها ..
عساف :اوووف .. اللحين انا مشتريه لها عشان تناساه هنا ..
شلته ونزلته بالحوش وانا لاف بطلع ..
شدن :باااااااباااااااااااااااااااااا ..
شفتها جايه تركض يمي وهي تبكي ..
مسكتني مع يدي تجرني بتدخلني ...
عساف :وش فيك ..
شدن :ماما مااااما ...
ضحى وش فيها .. فكيت يدي منها ودخلت اركض ..
عساف :ضحى ... ضحى ..
جتني وهي تبكي وسحبتني مع يدي ..
شدن :هناااا ...
وأنا داخل ماحسيت الا اللي يصقع بوجهي ..
ضحى :مو قلت لك ماأبغاك في بيتي وش اللي رجعك ..
شدن :ماااااااااما ..
ضحى :اطلع برررررى ..
كانت تصارخ ويدها على جبهتها تمسدها حسيتها انها مش على بعضها ..
عساف :خلاص بطلع بس هدي نفسك ليش الصراخ اللحين ..
ونزلت أخذ كيس الزباله اللي طلعت منه ملابـسي ..
سويت نفسي بطلع بس رجعت بسرعه وقبل ماتفهم حركتي كنت اضمهااا ..
عساف :ضحى اهدي قوليلي وش فيك انتي موعلى بعضك ..
ضحى :فكني كله منك اطلع من حياااتي خلاااااااص مليت انا مليت ..
عساف :مأقدر اطلع من حياتك .. خلاص ضحى انتي جزء من حياتي وانا جزء من حياتك انتي محتاجه لي وانا محتاج لك لاتخربين حياتنا بتصرفاتك هذي ..
ضحى :انااا مأحتاج لأحد وخصوصاً انت فكنـــــي ..
كانت تصرخ بكلامها وقطعت ثوبي من كثر ماحاولت تخلص من ضمي لها ..
عساف :اهدي قلت لك اهدي هذي موطريقه للتفاهم ..
ضحى :خلاااص فكني وريحني منك وش تبي اكرررهك والله أكررهك ..
عساف :وأنا أحبك وأحب بنتي واحب اللي بينا وماأبي تصرفاتك الغبيه تفرقنا ..
اهتزت بين يدي تبكـــــــي ..
ضحى :ياأخي ماأبيك ولاأبي حبك اكرررهك ريحني ورووح ..
آآآه وأخيراً بكــــــت .. أخيراً حسيت أنها انســانه .. تحس تشعر تبكي تفرح ...
ضميتها اقوى بس هي ماعمرها فـــــرحت ..
ليه دايم الفرح مجافي ملامحها والكائبه ساكنتها .. وعد علي لخليها دوووم فرحانه ..
بس لويلين قلبها هالقاســـــي ..


((5))

[ .. قيس الحيران ..]

يقلب الفنجال بين يديه يرفع ينزل يقلبه وهو مو حاس بنفسه ..
اللي صار افقده كل تركيزه صدمه توووقع فكررر بـ من تكون ...؟!!!!
بس ماأهتم لشخصيتها كثر ماكان اهتمامه ليـش تسوي كذا ...!!!
وصلت توقعاته الا انها شحاده مالها اصـل .. فقيره... حتى انه فكر بكونها
موسعوديه ومقيمه بطريقة غير شـرعيه .. رغم لهجتها النجديه اللي تأكد له مليون بالميه انها سعوديه .. حط كل الأحتمالات بالراسه الا هالأحتمال الصدمه .. اللي زلزل افكاره .. معقول اخر شـي توقعه ولا هو اصلاً ماتوقع ابداً ولاجزء من الميه انها تكون من أصحاب هالبيت هم صح محتاجين بس مايشحدوون مستحيل... اللي بقى بيتأكد منه هي أيهن ..هن تسع .. لو استثنى المتزوجه ووحده ولاثنتينن صغار بقـــــى ست ..
هـــــي وحده من هالست .. شوشو اللي خطفت قلبه وجننت عقله وحده من هم .. بس هو من يتمناها ..
لها ثلاث ايام مابينت .. لازم تجي ضروري عشان يعرف من هـــــي .. خلاص ماعاد فيـــه صبـــر .. يبغى يتأكد اللي شافه كان صدق ولاواحد من أحلامه ..
ام كايد :قيس كانك منت متقهوي نزل الفنجال لتجلس تلعب فيه كنك ورع ...
رجع المركى اللي كانت متكي عليه على ورى وخلاه له مخده وغطى وجهه بشماغه ..
ام كايد :ياوليدي منت رايح تدور اخوك هاللي ماندري وين داج ..
رجع يقلب بنفجاله وكأن مايسمعها..
منيره بصوت واطي لها :يمه لاتكلمين قيس عن كايد ..
ام كايد :يابنيتي وش اسوي هذا وليدي له شهر ماأدري وينه حي ولاميت ..
منيره :كايد هذا طبعه يغيب شهور ويرجع مثل ماهو ..
ام كايد بصوت متحشرج من الدموع :الله يرده لي ويهديه .. كود بقول لجابر يدوره ..
منيره :وجابر وش يسوي يدوره نص ساعه ويرجع يقول مالقيته ..
ام كايد :ياويلي عيالي مافيهم اللي جابراً بخاطري الله يكبرك يامنير وتقوم فيني ..
وقامت بخطواتها الثقيله :بروح اصلي ..
منيره :قيس ماودك تخطب وتفرح امي ..
قيس :منيره ترى ماجلست معكم عشان تفتحون لي هالسالفه لاتسمعك امي وماتسكت اللحين وانتي عارفه اخر مره انفتحت فيها السالفه وش صار ..
منيره :والله امي تبغى لك الزين بعدين بنات جيراننا ضعيفات لوتأخذ منهن ..
قيس اللي وخر شماغه :لو اخذ منهن بس امك ماتبيني اخذ الا وحده ..
منيره :وليش ماتبي هالوحده ..
قيس :منيرره الله يخليك اقطعي هالسيره .. انا طالع اذا بغيتو شي اتصلوا..
وقام من عندها وهو متضايق اووف كل ماجلس معهم فتحوا له هالـسيره اخر شي يفكر فيه هالوقت الزواج .. اللحين شوشو هي اللي مشغله باله ..
متى بيعرف من هي متــى يخاف يصبر شـهور بعد ..
هي تختفي وتطلع وهالشـي للحين مالقى له سبب .. بس والله لو غابت اكثر من شهر ليدخل على بيتهم ويطلعها من بينهـــــن ..



((6))

[.. تضاريس وقلب ملهوف ..]

ميشو

يألهي كاد يتوقف قلــبي ..
ميشو :لقد اخبرتيني ان الباب مغلق ...
أجابتني وهي تنهض لتغلق الباب ..
سوسو :سوري حبي ميشو والله ماأنتبهت .. ماصار شــي موقف يصير بأحس العائلات ..
:سعـــاااد تعالي ابيك ..
ارتفعت يدي لتمسك بقلبي خشيت خروجه من بين اضلاعي .. يال هذا الصوت المرعب ..
ما أن خرجت سوسو من الغرفه حتى اسرعت الى الباب لأستمع للحديث الدائر بينهما..
خلف :اللحين انتي تقولين لها اللي قلته لك ..
سوسو :اووف وليش ماتكلمها انت وتقولها ..
خلف :بلاكثرة هرج قولي لها اللي قلت لك وانتي ساكته ..
سعاد :واذا ماجت ..
خلف :الا بتجي وانتي قوليلها الكلام على اساس انك تنصيحنها موتقولينه كأن احد موصيك عليه ..
سعاد :طيب .. طيب ..
صمت لم اعد اسمع شــي .. كدت اعود لمكاني حينما شعرت بـ سوسو تحاول فتح الباب لكن استوقفني صوته ..
خلف :من اللي عندك ..
سعاد :من عندنا عيونها زرق غيرها .. ولاتقول ماانتبهت ترى واضح انك عرفتها ..
عدت لمكاني بسرعه قبل ان اسمع تعليقه عليها .. بماذا سيهمني ماسيقوله وهو يوصي شقيقته على التضاريس ..
دخلت علي سوسو وهي تضحك ..
سوسو :يعني بتفهميني انك ماكنتي ورى الباب تسمعين علينا ..
شهقت بالتصنع ..
ميشو :انا بالتأكيد لااا ..
سوسو :اوكي صدقتك .. اجل مايحتاج اقول وش قال عنك .. هههههههههههههههههههههههههههه شوي لاتطلع عيونك بقولك ..
ازحت نظري عنها ..
ميشو :لست مهتمه ابداً بماسيقوله عني شقيقك الأخرق ..
ضحكت طويلاً قبل ان تبادرني ..
سوسو :قولي مهمني اخوك الخبل الغبي المتخلف الحيطه مو الأخرق ههههههههههههههههههههه ...
ميشو :اختاري احدهم لن اكرر كل تلك المسميات كببغاء عجوز فقد أحد اسنانه ..
بعد ان اطلقت تلك العباره .. كان لسوسو شوط طويل من الضحك ..
قاطعه دخول مدبرة المنزل كما امقتها تلك العجوز صاحبة العيون الصغيره الماكره ..
: Suad convicted Reddy
سعاد Well, I tell her to come:..
خرجت بعد ان اغلقت الباب خلفها ..
ميشو :لماذا تحضر بنفسها اليس هناك خادمات غيرها ..
سعاد :ماأدري عنها يمكن امي قالت لها تجي بنفسها تحسب اني بخاف منها ..
ميشو :حقاً مالذي يجعل والدتك تعتقد ذالك ..
سعاد :تعرفين يوم كنت صغيره كانت تخوفني وامي تحسب للحين على هالحاله ..
ميشو :لاتعجبني كثيراً .. اشعر بأنها تعتبر نفسها مهمه جداً في هذا المنزل ..
سعاد :اممم معك حق مسويه نفسها انها اللي مربيتنا وتمون علينا وخليفووه وأمي يعيطونها أكبر من حجمها ..
وقفت وهي ترتب ملابسها ..
سوسو :ماغيرتي رايك ..
ميشو :كلا لست في ميزاج يخولني الأختلاط بالناس ..
سوسو :طب اشوف امي اش رايده ورجعالك ..
ارحت جسمي على السرير وخلعت حذائي .. اممممممم اشعر برغبه قويه بالنووم .. اتمنى لو استطيع ذالك انام حينما يداعب جفناي النعاس بكل راحه .. انها امنيه صغيره سهله على الكثيرين ولكنها صعبه جداًعلي لأشعر ابداً بالراحه .. دائماً افكر اخطط انفذ .. ليس لدي الوقت لراحه الجسديه اوحتى النفسيه ..
آآآآآه كم اتمنى لو القي بكل هذا خلفي واسلك طريق أخر غير هذا الطريق الذي اثقل كاهلي ..
ولكني اخترت طريقي ويجنب ان امضي فيه وقريباً قريباً جداً سارتاح من كل هذا ..
بعد ان اشتت هذه العائله سأنام مليء جفوني والسكينه تحوم حولي ..
ولكن ليس قبل ان اشعل نيران الأنتقام في هذا المنزل ..
احطت الغرفه بنظره متفحصه ..
ميشو :ريما قادمه لتدمركم توخو الحذر ..
سوسو :تكلمين نفسك ..
ميشو :نعم ..
سوسو :احب فيك صراحتك .. المهم اسمعي امي من درت انك هنا حلفت انك تنزلين ..
ميشو :حقاً .. كنت اشعر أنها لاتحبني ..
سوسو :وهذي يبيلها تفكير .. هي تبغاك تنزلين عشان تشوفين وديان يقالها بتقهرك عشان رفضتي خلف .. مادرت عن ريما ..
ضحكنا على اثر هذه الجمله طويلاً ..
سوسو :تصدقين أكثر واحد متحمس لزواجه مالك أخوك..
ميشو :حقاً ..
يال للأخ لوتعلمين ياعزيزتي اني اتمني لو افتح شرياني وأتخلص من دمي الذي يربطني فيـه ..
سوسو :اممم ميشو لاتزعلين بس هو مررره يكرهك ..
ميشو :لابأس سأحزن قليلاً فقط لاتقلقي ..
سوسو :يمه منك والله لو اقولك انك تكرهين نفسك بتقولين اممم لابأس سأحزن قليلاً فقط لاتقلقي ..
ميشو :لأرى أي تسليه بما قلتيه ..
سوسو :والله اجل طلع دمي ثقيل امشي ننزل ..
ميشو :حسناً انا متشوقه كثيراً لرؤية تلك التضاريس ..
سوسو :ياجرأك بتنزلين بجنزك هالهريان وقميصك اللي أكل عليه الدهر والشرب .. وقدامك لجنة تقييم ومقارنه ..
رفعت كتافي بكل تهاون وأخبرتها بكل براءه ..
ميشو:انا استسلم قبل البدايه ..
سوسو :يامتواضعه .. تدرين ان خلف موصيني اقولها انه ماراح يصبر عليها أكثر من كذا ..
ميشو :حقاً ..
سوسو :ايوه لاويقول لاتقولينها بصيغة نقل الكلام لاسوي انك تنصحينها ..
ميشو:انتي ماذا ستفعلين ..
سوسو :بصراحه بقولها على بلاطه مالي بلف ودوران ..
ميشو :الاتخشي ان تخبره ..
سوسو :بكيفها خليها تقوله .. بقول هي فهمت كذا موذنبي انها ذكيه .. تعالي ننزل بالأصنصير ..
رأيتنا نتعدى الطابق للأرضي الا القبو ..
ميشو :ماذا هناك ..؟!
سوسو :مش عارفه مين بالقبو لحضه نشوف ..
رغماً عني شعرت بالخوف يتسلل لقلبـــــي .....

((7))

[.. يوميات وعد ..]


وعد


الساعه تسع بالليل انا ومنير جالسين بالحوش وشابين نار بالجهه اللي مافيها بلاط لأن الجو بادي يبرد يعني بالليل يصير كنا بالشتاء بس بالنهار لاا الجوو حارر مره وعطش مووووت ..
كنت ماسكه عود العب بالجمر ومنير معه واحد ويخربط فيه على التراب .. وأنا جالسه اقوله سوالفي مع بنات النشاط .. وكنا نفكر سوى كيف اكل الجو عليهن وماأخليهن يسوون اللي يبن وبس انا انفذ افكاري ..
منير :لااا ياخبله لاتسوين كذا تنفضحين ..
وعد :اجل وش اسوي ..
منير :اللحين المعلمه تقول عنك كسلانه وماعندك سالفه ..
وعد :اوووووووووووف قل وش اسوي ..
منير :اصلاً انتي غبيه ولابتقولين بنأخذ حصه زياده على النشاط .. يعني من عقلك فيه معلمه بتتركم تأخذون حصتها عشان النشاط بس ..
وعد :ايه اعرفهن الأبلات نحيسات مستحيل يتنازلن عن حصصهن ..
صرخ علي ..
منير :هييييييي ترى والله بكفخك بذي على راسك ياهبلااا مو سالفة نحاسه هذي حصص اجباريه لازم تشرح فيها هذي انظمه وقوانين مو لعب بزران ..
وعد :اووه الله يلعن المدرسه .. خلاص اقطع سيرتها خلنا نسولف بالشـي ثاني ..
منير :يعني اللحين انا اللي جبت سيرتها مو كنك انتي اللي مصدعه راسي بسالفة سويرا العصلا وندووه ام كرشه ..
وعد :قلعه تقلعهن النحيسات ياعساهن للجرب ..
منير :مايصلح تسبين وتدعين حنا بالرمضان ..
وعد :والله أنك خبل حنا خلاص افطرنا من زمان ..
منير :الله يخرب راسك ذا الغبي اللحين لأفطرنا خلاص ماصار رمضان .. المفروض تمسكين لسانك عن المعصيه ليل ونهار ...
وعد :لاتسوي فيها مطوع ترى الواحد يمسك لسانه طول السنه مو بالرمضان بــس .. وبعدين توك كنت تسب بأستاذكم ابوصلعه حمزه ..
منير :الله يلعنـ ** الحقير لاتذكريني فيه .. توقعين بكره يتذكر تهديده لي ويوديني للأداره .. عاد وكيلنا ابو خشم طويل والله مايرضى الا يجي ولي امري ..
وعد :عادي وش فيها خذ ابوك حليل يمممه انا لو طلبوا ولية امري تجي ضحوه اقل عقاب تسويه لي تظربني بشنطتها لين افقد ذاكرتي ..
منير :ابوي والله مايروح يرسل قيس وقيسووه بس يدري ان الوكيل طالبه يمسح بخشتي الحوش والشارع وبعدين يروح يشوف وش يبون منه ويرجع ويتوطى في بطني ..
وعد :خلاص لانقلبها مأساه انت بكره غب وريح نفسك من كل الحوسه ..
منير :تصدقين بعض الأحيان تطلع منك افكار .. تجين نروح نشتري شورما جامبو وبيبسي ..
وعد :لحضه بروح اسرق مصروف نواف مامعي فلوس ..
ورحت اركض ..بـــــس منير ناداني ..
منير :تعال ياحراميه ان اشتري لك ..
وعد :احللللف ..
منير :كولي تبن وتعالي ..
وطلعنا لشارع ..اخذنا لنا شورما وبيبسي وجلسنا نتمشى بالحاره شفنا شلة دحيم وعزوز
سألونا عن نواف وتهاوشنا معهم وطلع علينا مطوع المسجد وهاوشنا لأنا جالسين نتهاوش قدام المسجد ... يوم شفته بس تذكرت اني المفروض ماأطلع بدون عباه بس بعد ايش كنت درت الحاره كلها طنشت وقلت ان شاءالله يغفرلي ربي لأني نسيت ..
منير :وش فيكي لايكون بتبكين عشان ظربوكي ..
وعد :ليش ورعه قدامك وانا بعد شوهت ووجيهم شفت عزوز الدب كيف صب خشمه دم يوم صقعته بكوعي خخخ ..
منير :وانتي فرحانه انتي ووجهك المفروض ظربتيه بكوعك فمه وكسرتي له سنونه اللي مثل سنون سعيدان ..
وجلس يوريني كيف اسوي ..
وعد :لاتبغى يشتكي علي ابوه الدب عند مركز الشرطه بذيك الحزه ضحى موتظربني بشنطتها وبس لاتشنقني فيها ..
منير :يمممه اختكم ذي متوحشه مره شرحت لي رياضيات واذا قلت مافهمت صقعتني بالكتاب على راســي ولاصرخاها يسبب لي رعب لاسمعته نطيت من مكاني حتى لوكنت في بيتنا ..
وعد :وأنت ليش تنقز هي ماراح تظربك انت مو اختها ..
وحذت قوطي الميرندا اللي كان على الأرض .. ووصل له وهو رماه علي وجلسنا نلعب كذا ..
منير :مأدري كذا يعني فيني شي يخليني لسمعت صوتها انرعب .. تذكرين مره يوم كنا صغار ظربتنا بعصا المكنس لأنا رحنا من بعد الظهر وماجينا الا العشاء وقالت لي انقلع ولاعاد تجي تلعب مع خواتي ..
وعد :متى ماأذكر ..
صقعني على راسي ..
منير:اصلاً انا ماعمري ذكرتك بالشي وقلتي اذكر ..
وعد :وش اسوي انا ماأذكر الأسبوع اللي فات وش صار فيه موتقول لي قبل ست وسبع وثمان سنين ..
كنا خلاص وصلنا بيتنا بس اووف لقينا الباب مقفل لأني انا ومنير قفلناه بعد ماطلعنا ..
جلسنا على عتبة الباب ..
وعد :اللحين لو ندق من هنا لين بكره مأحد فاتح لنا الدجاجات راقدات وملاك وسارا طالعات يسعسعن ..
منير :وش رايك اركب على سيارة قيس وانط على الجدار وطب في الحوش ..
كانت سيارة قيسوووه موقفه قدام جزء من بيتنا ضاقت عليه المواقف اصلاًً هو ماكان يوقفها داخل الحاره وش عنده اللحين .. بس لحضه كن فيه احد جالس فيها .. كنت بسأل منير بس هو كان يناظر وماقال شـي خفت اقوله ويضحك علي ..
وعد:لامايحتاج خلنا نجلس نتفرج على العالم وبعدين يجن التبنات سارا وملاك ويدخلنا ..
وجاء وجلس معي على العتبه وجلسنا نفصفص ..
وحنا نعلق على الناس واكثر شيبان حارتنا اللي طالعين من المسجد .. وكل شوي اناظر بالسياره واحس فيها أحد يناظرني بسم الله الرحمن الرحيم ..
هزيت يدمنير ..
وعد :مرمر سيارة أخوك من فيها ..
منير:هبلا انتي من فيها أبليس يعني ..
وعد :مأدري احس احد جالس فيها ..
لف يشوفها وصغر عيونها وكبرها وظلل عيونه بيده وبالأخير قال ..
منير :مافيها أحد ..
يالناس والله فيها احد حتى شوفوا يناظر فيني وبيده زقاره ..
نطيت يوم شفت سيارة خالة سارا وملاك ورحت اركض بالشارع ووقفت قدامها وجلست اقفز قدامها واسوي حركات بيدي عشان توقف .. انفتحت الأبواب اللي ورى ونزلوا التوأم المهبل وهن يصرخن على :وعععععععععععد ..
كنت احسبهن يتسابقن بيصفقني بس صدمني يوم حظنتني ملاك بعدين حظنتني سارا ..
سارا وهي تظربني بقوه على ظهري ..
ساارا :اشتقت لك ياحمارررررررره ..
ملاك :انا بغيت اجن من شوقي لها كيفك ياهبلاااا ..
منير :الحمدالله والشكر يالناس العقل نعمه ..
قالت ملاك اللي جلست على مقدمة سيارة قيسوه العله ..
ملاك :العقل نعمه بكل احواله صح يعني بخفته وبجموده ..
سألتها سويرا اللي جت تجلس بجنبها ..
سارا :وش معنا جموده ..
ملاك :يعني الماده لها ثلاث حالات ..
سارا :ايه صح تذكرت عربي ودين واجتماعيات ...
وعد :لايالهبلااا رياضيات وعلوم وانجليزي ..
منير:انا ودي اكتشف وش سر خفة العقل اللي فيكن لايكون هذا وراثه أي واحد يسكن بيتكم يصير عقله خفيف ..
ملاك :هع احترم حالك عقولنا توزن بلد عربي محافظ على العادات والتقاليد .. هذي تسمى خفة دم وسر فيها انا نأكل رز كثير ونشرب شاي على الريق ..
سارا :ونأكل مع الملح خبز ..
ملاك :صح هي دي .. سارا احبك ..
سارا :وأنا كمان احبك ياروح سارا ..
ملاك :فديتك يابعد طوايف اهل حارتنا ..
سارا :والله انا اللي فديتك يابعد كل من سكن حارتنا ..
وبدن بغزلهن الماصل وانا اطالع بالمجنون اللي جالس بالسياره ..
سارا :الاصدق شو عندكم جالسين بالشارع يالأغبياء لوتبون تشحدون اجلسوا عند المسجد مو جالسين قدام بيتنا ...
ملاك :سارا يبي لك تعطيهم درس بالشحاده ..
سارا :وأنا تعطيهم درس بالتمثيل ..
ملاك :اقول خلينا ندخل بس لايشوفنا احد ويقول بنات مبارك داشرات ..
سارا :ياويلتاااه والله اللي انفضحنا بين العربان ..
ملاك :ويجي عاد مبارك معصب وهو يردد فضحتني يالـــ ..... والله لدفنكن بالحيا قبل ماتسودن وجهي بين العربان ..
سارا : لحضه خليني اتصور الموقف ..
طالعتهن باستغراب وش يخربطن ذولي ..
وعد :انتن وش تخربطن ..
سارا :هع قلتيها نخربط يعني مو لازم تفهمينها ..
صرخت ملاك فجأه ..
ملاك :ياحيوانات كم الساعه ..
سارا :الحمراء ولاالفسفوريه ..
ملاااك :المسلسل الله يلعـ ** فاتتنا ...
يووووه المسلسل صح وجلست اقفز واقولها تفتح الباب بالسرعه ..
وعلى بال مافتحت الباب ودخلنا وقفلنا الباب سمعت صوت باب سياره يقفل رجعت بسرعه افتح الباب بس ماكان فيه احد واللي كان داخل السـياره ماهو موجود شفتم والله العظيم اني كنت متأكد ان فيه احد بالسياره .. بس مين وليـش مأدري ..






نهــاية الحلقـه
عاشقة ديرتها[/B]

يسلموووووووو خيتوا على النقل الروووووعه بس بلييز نزلى لنا البارت باسرع وقت
اختك.. بلاهم مااعرفوني..

يسلموووووووو اختي على النقل الروووووعه ......

القصة جميله ....

مشكورة .....