كاتب الموضوع :
بقايا بلا روح
المنتدى :
القصص المكتمله من وحي قلم الاعضاء
اقتباس :-
المشاركة الأصلية كتبت بواسطة وردة الزيزفون  |
صباح الخير ............ تسلم ايدك على الرواية الجميلة ............ احببت الروايات القطرية من اول رواية قريتها للكاتبة تحفة فنية الله يرحمها وللكاتبة طرماء وثرثارة وعشقتها حتى الثمالة لما قريت للرائعة المبدعة انفاس قطر
اسلوب شيق وممتع لكن فقدت حليب الكرك الي تعودت عليه بالروايات القطرية هههههههههههه.........المهم نجي للرواية والشخصيات على الرغم من امني حبيت الرواية الا اني مااستسغت البطلة الاساسية ابدا احس انها اعطت للاحداث كأبه غير طبيعية بسبب تفكيرها المتناقض
مها على الرغم من انها لها تجربة سابقة بالزواج وعلى الرغم من انها ام بس متناقضة جدا يعني تنصح اختها بشيء وهي اختها الكبيرة القدوة تسوي عكسه والعن منه بعد
طيب لما نصحت اختها المجبورة مثلها على الزواج انو هذي كتبة الله وقسمة ونصيب ليه ماقالت لنفسها ليه تغضب ربها بتصرفاتها حتى لو ماجد واهله ظلموها بس هي تصرفاتها العن منه عن جد مستفزة وتفسر كل شي على كيفها
من اول ماخطبها الرجال اول شي اعطاها مهر وكأنها بنت بنوت لا واكثر من مهر اختها الي ماسبق لها الزواج وايش الي سوته العاقلة الفاهمة تروح تصرف على اختها من مهرها ليه عاد لو كان هالمهر مو موجود ماكانت اختها دبرت حالها بالي عندها ...............
بينما الي دفع هالمهر وعطاها اياه مااستاهل منها تشتري له قطعة مثل العالم ليه ماخافت بيوم تفشل اهلها وتنزل راسهم بالارض بتصرفاتها بصراحة هالتصرف اعتبره صغر عقل
وحتى تطنيشها لزوجها وتقصيرها بواجباته سنة كاملة ماكفتها تبغي تستمر بطريقتها والي يقهر اكثر لما سمعت انو بيتزوج خير ان شاء الله شلاقي منها علشان مايتزوج عليها والله تحمد ربها واحد مثله تزوجها وتحمل بنتها والله هي من لها بعد امها وابوها
صح هو ظلمها وماقصر بس هي السبب بضعفها وسكوتها عن ناصر النسونجي يعني الي كان يسوي الحرام تعطيه حقوقه وماتقصر معاه والي ماناظر غيرها مافكرت تعطيه ريق مثل العالم تبات بغرفة بنتها وهو عايش عزابي
وفوق كذا بتموت اذا تزوج غيرها والله الشرع ماحلل لها انها تترك زوجها وتحرمه حقوقه لو غيره مااهتم فيها ابد مثل ماهي ام الرجال يبغي عيال بعد
واكثر شي قهرني لما سمعت بمرضه راحت تركض له بعد ايش لو مات وهو زعلان منها سواء بمرض او غيره مافكرت كم ليلة العنت من الملائكة لانو زوجها نام غضبان عليها حتى برمضان ماتعدلت اي عبدة وهي ترتكب كل يوم ذنوب مو ذنب واحد .............
بصراحة ماحبيتها احسها انسانة جدا معقدة وماعندها دافع للحياة حتى على الرغم من النصايح الي كانت تجيها ولابين بعينها اي شي ...........وجهة نظر لاغير
اما ماجد انسان متسرع على الرغم انو عارف بلاوي اخوه حتى لو قبل الزواج بس يدري عنه اجل ليه مو مصدق فيه بعد موته وماله حق اصلا يطرد مها من بيت زوجها ...............بس على الرغم من هالشي ماكان يعاير مها ولا قصر عليها ولا حسسها انو تزوجها وهي ام وهو او ل مرة يتزوج كان رجال والنعم فيه حب الجوري من قلبه وماقصر عليها وحسسها انو ابوها ومااعترض على اي شي يخصها ومع ذلك مها ماقدرت هالشي منه
على الرغم من الفكرة الغلط الي اخذها عنها بس مع ذلك ماانكر حبه لها وهي ماساعدته كل ماقدم خطوة هي بعدت الف .......... اعجبني فيه بره لاهله ومحاولة كسب رضاهم حتى لو على حساب نفسه
وتعب كثير بحياته وبمرضه الي ماخبر احد عنه وماشاف الراحة الا بعد ماوصل للموت بسبب الكئيبة مها
سارة اهون من اختها بس نفس الحال فيها شوية انانية وعناد بعد ماحبيت بعض تصرفاتها .......... بس على الاقل تجيها لحظات تكون اعقل من مها وخصوصا لما جهزتها بدون ماتدري والا كان فشلت اهلها قبل نفسها بعد زواجها بخلاقينها الي بتاخذهم معها والكل عارف انو اندفع فيها مهر مو قليل
احمد حلوة شخصيته وقدر يكسب قلب سارة بسرعة وماعاش نفس معاناة ماجد وحلو انو زواجه منها لانو اعجبته مو للانتقام ........
موضي حبيتها بصراحة هي وحتى زوجها انسانة فاهمة قلبها نظيف وطيبة وزوجها مثلها لايقين على بعض
نوف ابد ماحبيتها ولا حبيت تفكيرها المريض خير حاطة واحد ببالها الا تبغيه يتزوجها ليه يعني ناسية انو الزواج قسمة ونصيب حقدت على مها وعلى روضة بس علشان فهد الي مافكر فيها بيوم صدق غبية
روضة عجبتني هالبنت اعقل من اختها وقهرتني مها لما ذمت فيها عند سارة اختها وماشفنا من البنت شي بالعكس عاطية الرواية نكهة حلوة مو مثل مها والله عطاها انسان طيب مثلها مع اننا ماتعرفنا على فهد كثير بس المواقف الي طلع فيها كانت حلوة
لولوة واختها شهالوقاحة وقلت الحيا لاحشمة ولا احترام لهدرجة ى اختها بايرة تدور فيها من مكان لمكان تعرضها على ماجد حتى ليلة زواجه لو فيها خير مارضت تلاحق رجال متزوج
وماعجبني ماجد لما خلاها تركب معها وتجلس جنبه خير هي مو محرم له ومايجوز يشم عطرها قريب منه ويضحك معاها لو يبغي كان خلى زوجته او وحدة من خواته تجي معاه عجبهم والله بكيفهم هذا الدين والشرع والالعن من هالشي انو بشهر رمضان شهر العبادة والله امه العجوز تحده على المنكر بشهر رمضان وهي جاية من صلاتها قمة التناقض ماادري ليه يتعبون حالهم او يسوون الي يعجبهم من الدين ويطبقونه والي مو بكيفهم يرموه ورى ظهرهم
ابو محمد انسان اناني جدا زوج مها لولده الصايع ماخاف ربه فيها يبلش بنات الناس بولده الي ماقدر يربيه لو وحدة من بناته كانت بنفس موقف مها هل بيرضاها
وغير كذا شهالقلب الي عليه حفيدته من ولده الميت ماشافها ولا فكر يشوفها لاهو ولا زوجته ماخافو ربهم في ظلمهم لهاليتيمة استغفر الله بس ويوم عرفو انو الخطاطيب عليها ماارضاه ابو محمد الا يدبسها بواحد من عياله ماكفاه الاولي
حسبي الله عليه وعلى انانيته وتفكيره
الرواية على الرغم من طولها الا انها كانت تمشي على وتيرة وحدة ونمط واحد ماحسيت انو فيها عنصر المفاجئة الغير متوقع للاحداث والي قلبها بغمضة عين
بس مايمنع اني حبيت فكرة الرواية واسلوبها ..............ماشاء الله عندك قدرة على ربط الاحداث وتنسيقها مابين الحاضر والماضي بدون مايأثر على تركيز القارئ وهذا شي يميزك ويميز روايتك ..........
اتمنى تتقبلي ردي برحابة صدر ومااكون غثيتك برايي في انتظار جديدك
|
صباح الورد على الزيزفون ..
وهلا عزيزتي .. الله يسلمس من كل شر .. سعيدة جداً برأيس فى القصة وردس اللى مريت عليه كذا مره عشان أعقب عليه بس ما قدرت لضيق الوقت ..
ماشاء الله تحليل مفصل للشخصيات والأفكار أعجبنى بكل ما فيه وإن كنت أخالفس في بعض النقاط ..
مها .. شخصية يمكن تشوفينها كئيبة .. ويمكن هالشي صح لكن شخصية واقعية .. بكل ما فيها من تناقض وخوف وتردد
حالها من حال الاف البنات اللى تزوجوا فى مجتمعنا .. مشاعر بريئة عذراء تنتظر الفارس اللى يشيل عنها الورق السولقان الملفوفة فيه مثل ما يقولون .. كان أول نصيبها منصور _ مش ناصر _ ولد عمها اللى صبت فيه كل عواطفها بدون ما تفكر لحظه هل يستحقها أو لا ... لكن صبتها لأنه كان الطريق الصح والحلال .. حبته وقامت بواجبه و واجب أهله ومع ذلك .. كان يخون .. هالخيانة اللى تكررت كذا مره كانت سيف كسر أنوثة مها وزعزع ثقتها في نفسها وهويتها كإنسان .. إيش كان ناقصها عشان يدور عليه براا ..!!! وكونه ولد عمها ربط لسانها وما قدرت تفضحه .. لأنها بنت ناس ومتربية تحملت على أمل أنه بيوم يتغير .. لكن كان الموت اسرع ..
تتوقعين هالصدمه بسيطه على عروس شافت حلمها قدام عينها يتشوه بخيانات زوجها .. وفى فتره قصيرة جداً قدر يهد ثقتها فى نفسها ويحول كل أحلامها إلى أوهام وكوابيس تعيشها قبل وبعد ما مات واقع ياخذ من روحها ...
طبيعي نفورها من ماجد .. كونه أخو زوجها المتوفي وكونه كان يعرف بسوايا أخوه حسب ما كانت هى تظن .. وكونه طردها من بيتها ومنعها من الحداد فيه .. وبعد كل هذا زواجه منها غصب .. ومثل ما يقولون اللى يلدغه الثعبان يخاف من الحبل .. ما قدرت تعطيه من نفسها شي .. لأنها سبق وأعطت وش كانت النتيجة ..؟؟؟ !!!
أحياناً خوفنا من الألم يكون أكبر من الألم نفسه .. ورد الفعل الطبيعي الأبتعاد عن كل ما يمكن يسبب لنا الوجع من جديد وفي هالحاله كان مصدره ماجد ..
لكل انسان مزايا وعيوب قد تزيد وقد تنقص حسب الشخص نفسه .. ونصيحتها لأختها طبيعية لأنها وإن كانت مجبورة على الزواج إلا إنها لازم تحاول تبنى حياتها صح من البداية .. وهذا الشي اللى ما قدرت مها تتجاوزه مع ماجد ..
ماجد .. تفكيره تفكير أغلب الشباب فى مجتمعنا .. ما نتكلم عن التفكير الصح واللى المفروض يكون .. نتكلم عن تفكير مجتمع ذكوري وأن الرجل شايل عيبه وأن أغلب الشباب لهم تجارب ومغامرات تنتهى بمجرد الزواج وأن هذا طيش فترة ويمضي .. رغم أنه غلط ومخالف للشرع أولاً وللعادات ومفهوم الشهامة والرجولة ثانياً .. هذي نقطه .. النقطة الثانية ماجد ما كان على علم بكل تصرفات أخوه .. كان يتوقع أن هالمرحلة انتهت من حياته قبل الزواج .. وهنا كان اللبس والشك ..
بعدين ماجد لما تزوج مها ماكان زواج عن حب أو رغبة لأ .. كان إجبار والنفس تكره اى شي تجبرها عليه ولو كان حلو وكان فى مصلحتها .. صحيح تحركت مشاعره بإتجاه مها بعد فترة لكن كانت الحواجز أكبر من أنه يقدر يتجاوزها ..
بالنسبة أنهم تركوا بنت ولدهم وما شافوها .. صدقيني هالشي أنا شفته بنفسي وفي ناس أعرفهم .. سبحان الله رغم صلاتهم وعبادتهم إلا أن مفهوم صلة الرحم عندهم ومن هالناحية متجمد ..
لولوة واختها نماذج شيئة للاسف انتشرت بشكل رهيب فى مجتمعنا مؤخراً .. الله يهديهم ويحفظ بنات المسلمين ..
بخصوص سير الرواية .. أنا بصراحه كتبت وقلت فى أولها إنها واقعية .. لأنى ما أحب أشطح بخيالي إلى درجه كبيرة مثل بعض الكاتبات .. أو غموض يلف البطل ما تنفك رموزه الا بأخر بارت .. البطل عندي انسان عادى جداً يمكن يكون اخوك او جارك أو حتى زوجك .. والمواقف حقيقية للصميم .. ما أحب أفتعل الإثارة والموقف فقط عشان الأكشن مثل ما يسمونه .. أسلوب أشوفه مناسب لي وأقدر أنسج عليه نسيج حقيقي من الحياة ..
أتمنى يكون ردي وضح ما كان غامض بالنسبة لك .. وسعيدة جداً برأيك فى القصة وأتمنى أشوف حضورك فى القصة الجديدة ..
اعذريني على تأخري ..
ومره ثانية هلا بس ..
مع خالص الاحترام لكل من مرّ ورد .. ما تعديتكم تقليل من شأنكم لا والله
لكن كان لرد زيزفون الطويل أهمية خاصه عندي ..
يعطيكم الف عافية
|
23-03-12, 11:59 PM
اسفرت وانورت واستهلت وامطرت
.هلا ومليار غلا حي الله بق بق>> فكر انا ينسى دلع انتاااااااا..هخهخهخه
جديد مواضيع قسم القصص المكتمله من وحي قلم الاعضاء
العرض العادي
