عزيزتي بقايا الحمد لله على سلامتك اسعدتنا عودتك
وان شاء الله تكون اخر الغيبات .
(قلوب محرمه على النسيان )هل معناه ان الابطال محرم عليهم ينسون الماضي وبالذات ماجد ومها هل راح يجي يوم
ويتخطوون الماضي وينسونه والا بتنتهي الروايه وقلوبهم
مانست شي مع ان الماضي اللي من بينهم اهوا منصور .
ماجد ومها حب من اول نظرة لكن كل واحد ماعرف انه حب الثاني لاماجد يعرف ان مها تحبه ولامها تعرف ان ماجد يحبها والسبب النصيب والقدر ومنصور اللي فرقهم وبعدهم
عن بعض وبنى حاجز ماراح ينكسر من بينهم الا بتنازل من احد الطرفين منصور سبب لهم التعاسه واهوا عايش واهوا ميت فرقهم يوم تزوج مها واخذها من ماجد وفرقهم بعد موته يوم خلى ماجد يشك فيها بس هل منصور يعرف ان ماجد يحب مها قبل ماياخذها عشان كذا عبى مخ ماجد شكوك
وكلام سيء عنها والا منصور سوى كل هالشي عشان يبعد الشكوك عن نفسه عشان ماينفضح عند اهله فرمى العله في مها يعني منصور عذبهم حي وميت .
مهاليش ماتدافعين عن نفسج وعن سمعتج ليش تخللين ماجد
يشك فيج اكثر ليش ماتقولين له الحقيقه ليش ماتقولين له عن تصرفات منصور يوم تزوجج وعن خياناته لج ليش تخلين نفسج متهمه ومنصور بريء مع انج تعرفين ان ماجد يشك فيج وموضي بعد تعرف بس ماجد مو راضي يصدق موضي بس انتي لو قلتي له كل شي يمكن يزول الحاجز اللي من بينكم واللي صار ليلة زواج سارة ورفضج له راح يبني حواجز اكثر اهوا يظن انج رافضته وماتبقينه مايعرف انج خايفه منه خايفه تستسلمين له في لحظة ضعف واهوا مازال شاك فيج والماضي واقف بينكم لاتتركينه يامها تمسكي في ماجد اكثر اهوا محتاج لج فهميه ليش قلتي له لا فهميه انج مورافضته لان كل اللي يصير من حقه كزوج
واذا منعتيه فانتي تغضبين رب العالمين قبل اي شي .
ماجد ماجابج معاه الا لانه مشتاق لج ومحتاج لج وصعب على اي رجال انه ينرفض من قبل زوجته من غير سبب يحس بالجرح والمهانه والرجال اهم ماعنده كرامته .
ماجد ومها هل راح يتخطون اللي صار وبيكون شي عادي والا بيبني حاجز اكبر واكبر وبيظلون عايشين مع بعض بس عشان الجوري .
ماجد ومها لازم واحد منكم يتحرك ويقدم على اول خطوه
في كشف الماضي او على الاقل انسوا الماضي شوي وعيشوا حياتكم طبيعي كااي زوجين .
مها حاولي تهتمين في نفسج شوي عشان ماجد كله لابسه نقاب حتى ماتتعدلين له ولاتتزينين له ترى مهما كان اهوا رجال من حقه يشوف زوجته في ابهى حله واجمل طله
المسكين قاعد يطالع نقش الحنه ويتحسر انج ماحطيتي لج حنه في ليلة زواجكم معاه حق الصراحه والا اهوا مايستاهل ترى ماجد محتاج لج يامها انج تحتوينه وتحسين فيه اهوا مو النوع اللي يشتكي حق احد فليش ماتجلسين معاه وتخلينه يتكلم حاولي تقربين منه ولا تكونين سلبيه ساعات احس ان سارة اكبر منج في تصرفاتها واجرئ منج وبنشوف بقايا وش مجهزة لنا في البارت الجديد اهم شي يابقايا ابعدي (اللاه واختها ) الزفته عن طريق ماجد شكلهم يخططون على كبير ويبقون ياخذون الرجال من مها الله ياخذهم .
بقايا ناطرين البارت بكل حماس.
وجه الصباح

[COLOR="deepskyblue"][/COLOR]تدرين تو دريت عن الرؤية ما كنت دارية عنها

اولا كلامك بعض منه عجبني والبعض الاخر احببت ان ازيد عليه بعض الرتوش

حياة مجتمع كامل فى أشخاص معدودين .. ونسيج حياة متكامل فى أرواح معينة .. فيها الطاهر وفيها الخبيث .. فيها الطيب وفيها المسكين .. فيها الأنانى وفيها اللى يعطى بدون حساب ..
فيه شخصيات برزت .. إما بسبب تفانيها وكونها شخصيات نادرة والعثور على مثلها كنز .. مثل ماجد .. ومها ..
فعلا هذا اللي شفته بالقصه لدرجه اني قلت انه من الخيال مو من المعقول انه فيه ناس تصل الى هذة الدرجه من الكمالية بس لمن قارنتها في بعض الاشخاص اللي اعرفهم شفتهم قلة او بالاصح في هذا الزمن صاروا ثلة ينعدون على اصابع اليد الواحده


وفيه شخصيات برزت لكونها أنانية وجاحدة بطريقه أو بثانية .. مثل منصور ..
للاسف كثير وكثير منهم يتمادون وكثير منهم يلحق عمره
وفيه شخصيات برزت لطهارتها ونقاء قلبها اللى ما يشيل ولو شال فللحظات سرعان ما يرجع كل شئ لطبيعته مثل النهر الجارى ما يعكره طين .. مثل ساره وروضه ..
الزعل والغضب لابد منه في الانسان ما فيه انسان نقدر نقول عنه عمرنا ما شفناه غضبان بالعكس لابد في يوم يمر حتى لو كانت ضيقه بسيطه تمر عليه ويحس فيها وهالشي هو ملح الحياة "" ولنبلوكم بشي من الخوف والجوع ونقص بالاموال والاولاد "" هذا دليل من كتاب الله عز وجل

وفيه شخصيات كانت شي وصارت شي ثانى والسبب موقف أو حدث غير مبادئها مثل نوره أم محمد .. ونوف ..
وفيه شخصيات عميقة .. حكيمة لكن .. ممكن يخونها الوقت وتخطى مثل موضي ..
كثير ناس في حياتنا مثل هذا النموذج ممن الشخصيات


أضواء على أحداث الجزء الأخير ..

مجتمعنا يحكمه الدين والعادات .. لكن هالشي ما قدر يمنع شذوذ البعض عن نواميس المجتمع ذاته واللى صار قاعده للاسف .. الشرف والكرامة أشياء ما تتجزأ .. والرجل العربي عموماً غيور على شرفه ولو كان هو فى نفسه منحرف .. لسبب بسيط أنه يشوف نفسه وعرضه شي .. وأعراض الناس شي ثانى .. يعنى يمارس انحرافاته على الغير وما يسمح لأحد يتجاوز سور بيته .. قمة التناقض صح ..!!!
قمة الكلام الصحيح وراح يظل لغز على تصرفات الرجل الشرقي ليه يرضى على نفسه انتهاك حرمة غيره واذا جا غيره وانتهك حرمته جعل سابع ارضه عالي سماه


هذا لو كان منحرف هالشكل فما بالكم لو كان شخص سوي .. يخاف الله قبل كل شي ..
ماجد .. وترسبات الماضى اللى تعمى نظره .. وكل ما حاول يبعدها ترجع تغشيه من جديد .. رجل .. وغيور .. وعلى من .. على مها .. الحب اللى ما انكتب له .. ضاعت منه مره .. وماراح يسمح للشي هذا يتكرر .. ولو كان الثمن راحته وسعادته ..
حبه لها انقلب بسبب الماضى إلى سيطرة وتوتر .. وصدام دائم على أتفه شي .. يمكن مفكر أنه بالطريقه هذى يقدر يسترجع الباقى منها .. من مها الملاك اللى شافها بيوم وعشقها وهو ماعرفها .. لكنه نسى .. أن اللى بيحفظ نفسه بيحفظها برقيب والا بدونه .. وان اللى يبي يسوي غلط لو قفلت عليه الف باب راح يخطي .. وأشباح الماضى وأكاذيبه تعيش وتزدهر فى ظلال الشك وانعدام الثقة ..
للاسف والاسف الشديد كثير منا يبني مستقبله ويعيش حاضره على الماضي واحداثه وما يكون حكيم وذكي بعقله يلعبها صح انه ياخذ حكمة الموقف الماضي ويترك الباقي لا للاسف كثير يعكسون الايه ياخذون الموقف ويترك الحكمه والدرس اللي صار لهم ويكملون في حياتهم بنكد وهم وتردد


" انتى ما تستحين .. مافي وجهس حيا .." زعق عليها .." احترم نفسك .." قطعته بسرعه .." وانتى خليتيى فيها احترام .. واقفة تغازلين عيني عينك .. ما خليتي لى حشيمة ولا قدر .. ولا حتى لابوس اللى مربيس .. " فتحت مها عيونها بقوة .. " حاسب على كلامك .. وانا ان ما حفظت عمرى والا ماحفظتنى انت .."


كل الغضب والحب والغيرة تحول إلى عنف .. وهذا المتوقع عند غياب العقل .. ما أبرر للعنف مهما كان السبب .. لكن نرجع لأصل المعاملة واصل الأنسان .. صالح والا طالح عشان نقدر نحكم وما نظلم .. قليل اللى يمسك نفسه عند الغضب .. لكن اللى معدنه طيب لو ظلم وتهور وضرب .. يرجع بتأنيب ضمير .. وأسف يملاه لأنه تجاوز حد فاصل بين الانسان وعزكم الله الحيوان ..

مد ايده سحب نقابها وشيلتها بيده اليسار " وصلت فيس تقولين لى ذا الكلام .." وماحس بعمره الا ويده اليمين تفك ايدها وترتفع وتضرب خدها فى نفس اللحظه اللى طاح فيها نقابها على الارض وبقى طرف شيلتها في يده .. تردد صوت الكف فى المكان .. وتناثر شعرها على وجهها من قوة الصفقه .. لحظات تجمد كل شي .. ايد ماجد .. وجه مها .. التفتت عليه ببرود .. واثار اصابعه على خدها وأذنها " ارتحت .." لفت عنه وطلعت فوق بدون صوت .. وتركت بقاياها عنده .. نقاب على ألأرض .. وطرف شيله في يده ..

رفع ماجد شيلتها يشوفها .. شلون قدرت أسوي كذا .. وشلون قدرت أمد ايدي عليها .. ايدي اللى عمرها ما انمدت على مره .. تنمد عليها هي بالذات .. قط الشيله جنب النقاب على الأرض .. وطلع مايشوف قدامه ..
""" ليس الشديد بالصرعه انما الشديد حين يمتلك الغضب """ قالها الرسول عليه الصلاة والسلام فنحن المسلمون اعطانا الله سبحانه وتعالى اعظم المناهج والدورات في التربية والسلوك فقد ارشدنا لحلول عديده لعدة حالات ومنها الغضب صحيح انه اباح الضرب في الاسلام لكن لكن في حالات قله حتى انه جاء بها اخر الحلول وليس اولها



روابط العائلة تحكمنا بأكثر من طريقة .. والحياة الزوجية سر .. اذا ذاع انتشر .. صار سوس ينخر فى جسد العلاقة المقدسة بين اثنين .. وسبحانه خلق البشر وهو أعلم بتفكيرهم .. عشان كذا .. كانت المواقف الزوجية واللى يدور بين جدران البيت الواحد أسرار كبيرة .. وحرمة نقلها وافشائها عظيمة .. بغض النظر كانت الشكوى والنقل بهدف الاصلاح أو الفضفضة .. الأمر مرفوض ومكروه من أساسه .. لأن كل ريح تمر تاخذ من أساس هالرابطة شوي .. وكل كلمة تزيد تنتهك خفايا اثنين .. وتكّبر الهوة بينهم وتزيد الجفا وممكن تسبب خلاف عميق بدل ما تصلح الوضع ..
كانت مها الحافظه لأسرار بيتها .. من قبل .. والساتره على زوجها مهما كانت عيوبه .. وغلطة ماجد كان ممكن تدمر بيتهم لو هالسر انكشف .. لكنها الانسانة المؤمنة بقضاء الله .. وأنه ما يظلم عبيده .. خلاها تغض النظر عن اللى صار .. عاقبته بأسلوبها .. لكنها ماكشفت ستر بيتها .. وبالشكل هذا كبرت فى عينه أكثر ..

وصلت بيت عمها ودخلت للصاله وشافت عمتها وبناتها كلهم قعود حولها .. والجوري راقده على الكنبه .. " مساكم الله بالخير .." سلمت عليهم .. دنقت على راس عمتها تسلم وهى بعباتها ونقابها .. وقفت لها روضه ونوف يسلمون .. " ما شاء الله عليكم ما تأخرتوا .." قالت لها روضه .." لقيت كيسة الاغراض اللي نبيها فى الكرسي اللى ورا عقب ما نزلنا الجوري .." ردت مها .." وشفيه ماجد .." سألتها نوره ,," مافيه الا العافية .. ليش وش فيه يمه .." لفت مها على عمتها وهى ترد عليها .. بدون ماترفع نقابها ..
دائمه لي في الحياة شعار اخذته من شعر اذا ضاق صدرك عن سرك فصدر من استودعته اضيق
انا لا اسعى للقول بانني اؤيد الكتمان لا بالعكس لكن في امور الزوجية فانا من انصارها حتى عن اقرب الناس لي لانه من الممكن ان تقول شيئا بسيطا قصدك فيه لكن الذي يسمعك من الممكن ان يفهمه بالخطا او يسمع جزءا منه فتع المشكله هنا ببساطه الامر لذا يجب في امور الزوجين ان نضع حد لها ليس من حق اي شخص كان التدخل بها حتى لو كان في سبيل الاصلاح فهو اخر الامر عندي


كثير من الأشياء الصغيرة اللى ما نلاحظها تشكل اساس حياتنا .. وهى اللى تحكم تصرفاتنا.. وهى اللى تربط بينا وبين بعض .. كلمة شكر .. أو لمسة حنان لها مفعول كبير فى تقريب النفوس وتهذيب الخواطر .. مها برغم كل شي تتمنى قرب ماجد .. بس تتمناه بالطريقه الصح .. اللى تشرفها وتحس فيها باحترام ماجد لها كانسانه وبنت عم له .. قبل ماتكون زوجة .. وغاب عن بالها .. أن مها بكل بساطة هى الثلاث مجتمعين فى جسد واحد .. وأن تقرب ماجد لها هو أبسط صورة لأحترامه لها إن ماكان حبه .. لأن الرجل لو ماحس باحترامه للانسانه اللى متزوجها كان ما فكر مجرد تفكير أنه يعطيها اسمه قبل ما يفكر يلمسها ..
اذا غاب الشخص لاحترامه لذاته غاب احترام الاخرين له اذا الانسان نفسه مزعزع الثقه فسوف يرى من حول كذلك صحيح كلامك


لف عليها وهو مركز النظر عليها .. مشى صوبها .. جف ريقها .. وماعاد فيه مجال تهرب منه .. ثبتت مكانها .. وقف قدامها .. تعالت فى راسها اصوات الفرح والخوف .. حست فى صدرها الاف القلوب تنبض في نفس الوقت .. بلعت ريقها .. مد ايده لراسها .. غمضت .. حست بشعاع النور يلمس جفونها .. فتحت عيونها .. وقابلت عيونه .. المخلوقة عشانها .. وأطياف الشوق فيها تدور .. لمست ايدينه على جسمها نار .. انفاسها ريح تضطرب .. رفع ايدينها يشوف نقش الحنه .. قربها من نار شفايفها وباسها ..


الرفض بكل صورة قاسي جداً .. ويكسر الروح كسر فظيع .. فما بالك لو كان الحبيب هو السبب .. ماجد خطا خطوة جباره بالنسبة له .. قربه من مها حطّم دفاعاته ورغبته أنه يتحد واياها فى عاطفه وحده مسحت كل شكوكه ولو مؤقتاً .. وكان ممكن تكون خطوة أولى على طريق الثقة ونسيان الماضى الأسود .. لكن رفض مها اللى كان أساسه الخوف للأسف فجّر براكين حقد جديده فى قلب ماجد صوبها .. وحطّم كبريائه اللى تنازل عنه عشان يكون قربها .. صدّ عنها .. وهالكسر ما راح يمر ببساطه ..

لا كلمة من حروفها الصغيرة الاثنين لكـــــــــــن كم هدمت من بيوت كم قطعت منم صلة الارحام كم جلبت الشكوك والاوهام والافكار الخاطئه هذه الكلمه صعب بقاموس حياتي النطق بها صديقني لمن ارفض طلب او امر ما اقولها اقول خير ان شالله اذا الله ربي كاتب ما اقول كلمة لا لانها عظيمه عندي وكبيرة وتحتاج قوة وشجاعه لها


عقد ماجد حواجبه مستغرب .. " ليه لأ يا مها .. ليه .." .. حست بأصابعه تنغرز فى لحم ذراعها .. " لأا يا ماجد .. أرجوك .." .. ضغط أكثر عليها .. حست بوجهه تغير .. اسودت النظرة فى عيونه .. " تبين تذبحينى .. تبينى أذل نفسي لس .. لا واللي رفعها سبع وبسطها سبع .. " كانت نبرته مخيفة قربها منه واجد .. حتى ما بقى بينه وبينها الا ما بين الشفه والشفه .. شافت انعكاس وجهها فى عيونه


كان زواج ساره وأحمد .. هو البسمة الوحيدة فى البارت اللى طاف .. وشعاع أمل جديد في محيط العائلة.. لكن هل راح يستمر هالأمل والا يموت مثل ما ماتت أحلام مها و ماجد ..

مشت بدون شعور من اللى يدفها صوبه .. كان أحمد واقف قدامها .. عليه بشت بيج .. كانت عيونه تبرق بالفرح .. وعلى شفايفه ابتسامه ..
صحيح هي الفرح الصغيرة التي ضوت البارت الاخير فاللللللف مبرووك لهم


اسمحلي يالعغالية اول مره اطول برد كذا على كاتبة قصة لقد اخذت جزء كبير من صفحاتك فسلمت يداك واعانك الرحمن ووفقك


قووووووووهييييييد