روعه نورتي القصه بطلتج
وماادري مااظن في بارت اليوم بس بحاول يكون فيه باجر
عشان يكون طويل شوي

الله يحيج اقدار

تسلمين يا الغاليه والله يسمع منج

وعلى التدخل عادي اخذي راحتج يا الغلا


مشكوره على المرور نورتي

الجزء الثالث

مشعل في الدرب عشان بروح محل الكوفي الي دايم يتواعد فيه مع مرام
رن تلفونه و جاف الي متصل اهو صديق عمره رد عليه بدون نفس : الووووو
عيسى : احلى الو اسمعها في حياتي اشفي الحلو معصب علينه افا اشدعوه تعصب علي وانا الي احبك واموت فيك انا حبيبتك و زوجتك
مشعل ابتسم لاكن سو روحه ان معصب : خير اشتبي وعن الثقالة الدم
عيسى : افاا انا ثقيل دم احين صرت ثقيل دم خلاص ماابيك طلقني
مشعل : هههههههههههههههههه الله يعقل عليك من يوم يومك خبل
عيسى : احم احم ادري خبل ومرتبت الشرف بعد جنك في السياتره على وين ؟؟
مشعل : اي طالع عندي مشوار بس اخلصه ابي اجوفك اوكي
عيسى : اوكي تم على الساعه 10 ونص تعال لي الدوانيه عند الشباب
مشعل : خلاص تم


في بيت بو خالد

ام خالد : شوق يمه ماحاجيتي اختج اتجوفينها وتسالين عن اخبارها يابنيتي حاسه انه البنت مو مرتاحه وانتي جفتيها شلون قبل الزواج عايفه كل شي
شوق : والله يمه مااتصلت واخر مره جفتها من بعد الزواج لاني وايد انشغلت ويا اليهال لانه كان قيس وايد مريض و قعدت اعابله
في هل لحظه دخل عليهم ابوخالد ومعاه سامي : سلام عليكم
شوق وام خالد : وعليكم السلام ورحمة اللله وبركاته
قامت شوق تحب راس ابوها : يبه كيف حالك واخبارك عساك تكون مرتاح وبخير
ابوخالد : بخير يا بنيتي وانا بكون بصحه دام بناتي بخير
ابتسمة له شوق وفي هل اثناء يه خالد يركض و يطيح على يده
شوق : شوي شوي لاتتعور وتعور بابا عود
ابوها : خليه يا بنتي والله اني مشتاق له
خالد : بابا ابي الوح الحديكه ماما ماتخليني الوح كله تدلو عقب عقب ( بابا ابي اروح الحديقه مام ماتخليني اروح كله تقول عقب )
بوخالد : ولا يهمك باجر اوديك الحديقه ولا تزعل جم خالد عندي
خالد : بث انا
ام خالد تقوم : شوق قومي وياي نروح نبرز العشى حق ابوج وريلج
قامت شوق : يمه لاتعبين روحج الخدم بجهزون كل شي وانا بوقف على راسهم انتي استريحي
سامي : شواقه عيل وين قيس
شوق : راقد فوق في الحجره وخليت الخدامه وياه تباريه
سامي : حبيبتي اذا ماعليج امر ابي كاس ماي
شوق : ان شاء الله من عيوني الثنتين


نرجع حق مشعل الي وصل حق محل الكوفي وراح على المحل الي دايم يقعدون فيه و حصل مرام قاعده هناك
مشعل : مساء الورد وعطر الشوق مساء الحب مساء مايليق يتمسى به الا الاحباب
مرام مبتسمه له : مساء النور قلبي
مشعل قعد وتم يتاملها : قمر قمر
مرام مسوي عمرها تستحي
مشعل : آخ ياقلبي مااقدر على الي يستحون
مرام : حبي انا مستعيله ممكن تعطيني الي اتفقنه عليه
مشعل طلع بوكه وعطاها الي اطلبته مرام : مشكور حبيبي يا الله باي مااقدر اتاخر على البيت ومشت عنه
مشعل : تحملي بروحج واذا وصلتي البيت طرشي لي مسج او اتصلي اوكي غناتي
مرام : من عيوني

قام مشعل وطلع من محل الكوفي عشان يروح حق عيسى و يقعد سوي ويا الشباب
واهو في الدرب شغل اف ام وكانت اغنيه عيضه القوس قوسك


------
القوس قوسك والسهام سهامك ... مالي على رمش(ن) تسله قوه ...
انا اسيرك واقف(ن) قدامك ... واللي تبا تسويه فيه سوه ...

وثقت في قلبك وطيب انسامك .. ماظن تظلم وانت فيك امروة ...
قلبي رهيف ولا يروم هيامك ... توه تعلم كيف يعشق توه ...

قلب(ن) قطفته لا ترص احكامك ... خفف على قلب(ن) حتمت بجوه ...
يفداك لكنه يشيل احلامك ... ملكك ولا لي منه غير انخوه ...

بك زين من راسك يـ لين ابهامك ... والليل ياخذ من صباحك ظوه ...
ما يحجب الويه الصبوح الثامك ... طلتك دايم يالحلى محلوة ...

وصل الدوانيه بعد ربع ساعه وطالع ساعته كانت تشير على 10 الا ربع
مشعل : سلام عليكم
ردو الموجودين : وعليكم السلام
راح حق عيسى الي قاعد ويا مجموعه من الشباب
عيسى : الا مجدم توقعت تتاخر
مشعل : بسرعه خلصت المشوار
عيسى : ها تلعب كوت بو اربعه
مشعل : اكيييييييد وهذي فيها كلام
قعدو يلعبون كوت
على الساعه 11 ونص انسحبو مشعل و عيسى كانو مغلوبين 3 واحد ومسكين مشعل اهو الي طول الوقت كانت في يده البته ( الورقه)
عيسى : ههههههههه وعليه اكثر واحد نقعت في يدك البته(الورقه)
مشعل : جب جب انته مافيك خير تشتري على الاقل بخمسه
عيسى : ماتعطيني شي عدل اقول اليوم خل المدام تسوي لك مساج لانه يمكن يدك طاحت من كثر ما تخبصها
مشعل : اقول انطم وياالله اقلب ويهك وروح بيتكم
عيسى : هههههههههههههههههههه واذا مارحت شنو بتسوي واهو يحرك حواجبه
مشعل رفع النعال وبلحقه لاكن عيسى راح يركض بسرعه و مشعل وقف محل : ههههههههههههههههههههههههههه الله يعقل عليك صج صج خيخه
عيسى : خيخه ولا شجاع اهم شي ما احصل تبزخ ( طراقات )
مشعل : يا الله فمان الله بروح البيت وراي دوام باجر
عيسى كان صوب سيارته : فمان الله تحمل بروحك
كلن ركب سيارته

شذى : منور ....... منوووووووور
منار ولا ماعطتها ويه ومندمجه في الفلم و تاكل جبس
شذى : هههههههه الاخت وايد متاثره
منار : اصصصصصصصصصصص ولا كلمه
شذى خذت المخده و رمتها على منار
منار : ويعه انتي شفيج (و احذفت المخده عليها) ماتخليني احد يطالع وه عنبوه شل اوادم محد يخلي الواحد يطالع
شذى قامت بسرعه وخذت جهاز التحكم و غيرة القناة و حطته على اغنيه انا ولا عارف حق تامر حسني
منار : وعييييييي فريها ماابيها
شذى قامت تقلد وحده وياهم اهي بويه ومعجبه في منار وكل ماتجوفها تغنيها لها قبل منار تحب الاغنيه بس من يوم ماقامت البويه تغنيها اكرتها
شذى : منور حبيبتي انا احبج واموت فيج انا ولا عارف انا مالي والي جرالي بحبك
منار قامت تلحق شذى عشان اطقها فقامت شذى تركض ومنار تلحقها في هل لحظه اصتدمت شذى بجسم صلب و رفعة راسها

مشعل : عمييييييه ماتجوفين
شذى منصدمه ولا ردت عليه
ويتاهم منار : بسم الله انته متى يييت
مشعل : انتوا شل ازعاج صوتكم واصل لين برع عبالكم يهال انتوا ولا بعد ماحصلتو الا هل حزه حق ينونكم ابي اعرف هل ازعاج عشان شنو
منار وشذى تمو ساكتين ويسمعونه
مشعل : هي انتوا احاجيكم انا ردو
شذى ومنار ساكتين
مشعل : حشى لو الطوفه ردت وحست على دمها ومشى عنهم
شذى ومنار : ههههههههههههههههههههههههه بل بل حريجه
منار :: توج تدرين هههههههه
ارجعو عند التلفزيون وقعدو يطالعون فلم ثاني لين الساعه 2 وكل وحده اركب وراحت حجرتها تنام

على اذان الفير قامت شذى تصلي وعقب ماصلت راحت المطبخ تشرب ماي سمعت باب الجناح يتبطل ودخل مشعل وراح غرفته و اهي ارجعت ونامت لين الساعه 11 ونص وقامت تتسبح و تتلبس لانه اليوم الخميس
وكل خميس يتيمعون مشاري وزوجته ومشاعل وزوجها و في بعض الاحيان ايون بنات عمهم


بعد ماطلعت من الحمام كانت لافه شعرها وتمت جدام الكبت مده عشان تختار لها شي اخر شي طلعت تنوره بيضه توصل لين نص الساق و تي شرت لونه اصفر فيه رسمت قلوب بلون وردي ولبست صندل ( وانتوا بالكرامه ) لونه ابيض وفيه ورود صفره و لبست حلق بلون ابيض و استشورت شعرها و سوت بعض الخصلات كرلي و خط عينها بقلم الكحل و حطت مسكرا و شدو لون اصفر و قلوس لون فوشي بلمعه وتعطرت

وانزلت وفي طريقها جافت معشل الي كان لابس جينز ازرق و حزام على رسمة تنين و تي شرت لونه اسود ومن الخلف رسمة تنين بلون فضي و التي شرت كان ضيج يبين عضلات جسمه ولابس جزمه( وانتو بالكرام) لونه اسود

تجاهلته و كملت دربها نزلت جافت ام مشاري تحط البخور وتبخر البيت
شذى : صباح الخير يمه كيف اصبحتي وراحت تبوس راسها
ام مشاري : صباح النور هلا يمه انا بخير وانتي كيف اصبحتي
شذى : بخير دامج بخير يمه تبين مساعه مني
ام مشاري : لا يا بنتي استريحي الخدم بسوون كل شي
شذى : يمه وين منار
ام مشاري : اكيد بتحصلينها فوق ولا راقده كل عاده
شذى : عن اذنج بروح لها
و في هل لحظه وصلت مشاعل مع زوجها طلال
مشاعل : اففففففففففف واي تعبت خلاص يا الدبه نزلي ذبحتيني واهي تكلم بنتها ونزلتها على الارض بنتها عيت تنزل وتبي امها تشيلها وتمت تصيح
مشاعل : يمه يمه وينج
ام مشاري : هلا يمه يتو
مشاعل : اي تونه
وراحت تسلم على امها وتحب راسها و مدت جنان يدها حق يدتها عشان تشيلها
ام مشاري : هلا بغلا روحي هلا بريحة هلي وطوايفهم
مشاعل : الا وين البنات
ام مشاري : اكيد بتحصلينهم فوق
مشاعل فصخت العبايه و نادت جانيت عشان تعلقها
وعدل ثيابها كانت لابسه بنطلون جينز ازرق وتي شرت حفره اسود وفوقه شيفون اصفر و لابسه حلق لونه اصفر واسود وصندل ( وانتو بكرامه ) باللون الاصفر والاسود و قاصه شعرها على طوله


في المجلس عند الرجال كان في المجلس مشعل ومعاه طلال و ياهم عم مشعل جمال ( بو طارق )
بو طارق : شخبار معرسنه ؟؟ شرايك بالزواج حلو صح
مشعل : والله تمام يسرك الحال اهو مو بس حلو الا راحه نفسيه واستقرار و طبعا احصل دلع وفي نفسه ( حلو طل الا هم وغم )
طلال : الا شنو اخر اخبار الشغل وياكم انا هل ايام عندي مشاكل وايد في الورشه بسبب العمال
مشعل : انا كل شي تمام وانته يا عمي
بو جمال : والله تمام والحمدالله على كل حال
وتم يسولفون عن الاشغال ومشاكلها


( بو طارق ( جمال ) متزوج من ام طارق ( حنان ) متزوجين من 15 سنه وعندهم طارق 12 و عثمان 10 و فاطمه 7 )


عند النسوان البنات نزلو وانظمو الي ام مشاري و ام طارق
بعد ماسلمو قعدو البنات بروحهم في صوب وام مشاري وام طارق في صوب
ام طارق : ها ياخويتي شخبار العروسه وياكم
ام مشاري : والله عسل البنت وادب واخلاق وماعليها كلام ولا تنسين اهي بنت صديق المرحوم الله يرحمه و نعرفها من يوم ماانولدت
ام طارق : الله يوفقهم في حياتهم

عند البنات
مشاعل : اخ يا شذوي انتي ماتدرين تره ريلج اخ منه كان ماتتم بنت الا يطقها وبعد ابوي على طول يهاوشه و يطقه وبعد مايتوب كان شيطان ومشكلجي كان كله يطق فيني وفي منور
منار : اي والله كان شراني ولا بعد اذكر مره لما كان عمره 14 كان يتسلق الشجره و قاعد يلقط لوز ماوعينه الا الغصن انكسر وطاح وانكسرت يده في ذاك اليوم ابوي عصب عليه وطقه
ويسوي له انته ريال وتسوي جي اشخليت حق اليهال
مشاعل : هذي ولا شي من الي يسويه اذكر مره كان عندي لعبه اهو عصب علي وخذاها فلتها عن الكلب الي كان عندنه تميت اصيح وكان يقول لي اذا تبينها لحقيها
شذى كانت ساكته وتسمعهم
مشاعل وكانها تتذكر موقف : ايي بعد تذكرون لما شذوي كنتي هني و يهد عليج الديج (ديك) ههههههههههههههه واي الي يجوف ويهج ذاك اليوم يقول جايفه يني هههههههه اتذكر تميتي تراكضين وتصيحين و تصارخين
شذى عصب : جب جب مااحب احد اييب هل طاري
مشاعل ومنار :هههههههههههههههههههه
منار : ولا بعد عقب لما يود مشاري الديج راحت عطت مشعل كف على ويهه ههههههه اتذكر عصب كان يبي يكفخها بس مشاري امنعه
شذى كانت تكره هل سيره قامت عنهم وراحت اقعدت مع فاطمه تمت تسولف وياها وتلعب معها في الالعاب
على الساعه وحده وربع وصل مشاري ومع زوجته وعياله
رهف : السلام عليكم
الكل : وعليكم السلام
دشو احمد ومحمد وسلمو على الكل و على طول راحو يلعبون ويا اليهال وكانت اسيل تمشي مع امها وماتبي احد يلمسها
منار : شفيها ست الحسن ماتبي احد يلمسها
رهف : بنتي ماتبي سبلان يجيسونها
منار : افاااااااا احين انا سباله
رهف : لالا مو انتي
منار : عيل
رهف : محد اسوله حبيبتي روحي سلمي على يدوه
اسيل : مابي
ياتهم شذى و اهي حامله جنان : اسوله حبيبتي تعالي وياي بعطيج حلاوه
راحت لها اسيل وباستها
شذى : جفتي تحبني واتييني
منار : مو عشان سواد عيونج مصلحه
شذى : مو يايبته من ابعيد واهي تطالع منار
منار : مالت عليج خلني اروح حق حمودي حبيبي و اوديه الالعاب واهي تعيب عليهم
مشاعل : اقول بعد لاتردين تمي وياهم احنه مانبي يهال ويانه سمعتي
منار : مالت عليكم كلكم
رهف : ها عروستنه شخبارج محلوه اليوم واهي تغمز لها
شذى استحت ونزلت راسها : عيونج الاحلى

رهف كانت لابسه جلابيه راقيه بلون وردي ويتخلله اللون الاخضر وكانت جنان فيها
رهف بيضه وحلوه وجسمها مليان و متوسط الطول

ام مشاري و ام طارق راحو يباشرون على الغدى ورتو كل شي و على الساعه ثنتين الا جهزو كل شي ونادو البنات وحطو حق الشباب في غرفة الطعام الخارجيه و البنات في الغرفه الداخليه
بعد الغدى البنات اطلعو في الحديقه عشان يراقبون اليهال واهم يلعبون و يسولفون اما ام مشاري وام طلال قعدو في قعده في الحديقه مكن الحصير


عند الشباب قاعدين يلعبون كوت بو اربعه
كان مشعل و مشاري فريق
و طلال وبوطارق في فريق
مشعل : اليوم مابنقوم الا واحنه غالبين
طلال : حريمتكم
مشاري : اقول عن الهذره ولعبون وبتجوفون في الاخير من بفوز اكيد احنه


مشاري ( انسان هادئ و في حاله و مايحب المشاكل و انسان متفهم وايد بس فيه ربشه بس على المزاج يعني الينون مايطلع الا نادر يعني وقت يكونون في المزرعه )

مشاري : انا بروحي بسبعه
مشعل : جوف لاتروح والا انته واثقه ترها بتييني عقب
مشاري : لاتخاف اثق فيني
بو طارق : اقول شرايكم بعد كل واحد يقول اوراقه حق الثاني
مشاري : هههههه والله ياعمي ودي بس الهوى ضدي

رن تلفون مشاري وكانت رهف متصله
مشاري : عن اذنكم لحظه وبرد
طلال : اقول مرتك هني وياك وانته مجابلها 24 ساعه انثبر محلك احسن لك اذا رجعت البيت كلمها
مشاري : ياشين اللقافه اقول اذا انته اتصلت الحكومه لاترد اوكي
طلال : ايي عشان تبيتني برع البيت انت ماتعرف اختك
مشاري هههههه بس خلاص عيل وراح بعيد شوي ورد : هلا روحي امري تدللي
رهف : هلا قلبي مايامر عليك عدو بالصراحه ماابي شي
مشاري : عيل ليش متصله ادري اكيد وحشتج و مشتاقه لي
رهف تكابر : لالا انا متصله بس عشان اسئلك لين متى بنتم
مشاري : يعني عشان بس جذي متصله ولا شي ثاني
رهف : بصوت مو مسموع عشانك واحشني موت
مشاري : اخخخخ ياقلبي ويلوموني في حبج
رهف : مشارييييي
مشاري : عيونه
رهف : اقول باي بروح حق البنات
مشاري : قولي تبين تشردين
رهف : هههههه اي ابي اشرد باي احبك
مشاري : وانا امووووت فيج و باس التلفون آه ياقلبي احبها

مشعل يه من وراه تحب من تخرع مشاري
مشاري عصب عليه : وانت حضرتك شتبي
مشعل ببرائه : جفت طولت وقلت اجوفك
مشاري : وحضرتك من متى واقف
مشعل : بس توني من هلا روحي امري تدللي
مشاري : بطل عينه لا صج احلف ويوده من اذنه عيب استح على ويهك قول لي شسوي فيك
مشعل مسوي روحه مثل اليهال : بابا انا اثف اخل مله

قطعهم طلال : ها انتوا شنو تسوون
مشاري هد اخوه
وراح حق عم يقعد وياه
طلال مسك يد مشعل : انته مرتاح في حياتك
مشعل : اي ليش
طلال : انته تركت مرام
ظل مشعل ساكت ومارد
طلال : مشعل سكتوك يدل على انك ماتركتها يا اخوي مايصير حرام تظلم البنت وياك وانته تعرف عدل انك هل بنت امك مابترضى عليها ولا احد من الاهل وخل البنت تروح في طريجها ولا تعلقها
مشعل : طلال الله يخليك لا تتدخل في حياتي وانا اعرف اشلون امشيها
طلال : كيفك بس انا حبيت اقول لك
مشعل : مشكور وماقصرت


البنات راحو غرفة منار وشغلو لهم شريط اغاني وتمو يرقصون و يسون لهم جو والي تمثل على الاغنيه يزعم اهي الي تغني ولا بطله الي يغني عليها المغني
بعد صلاة المغرب كلن راح بيته وتمو منار وشذى بروحهم
وام مشاري بعد طلعت راحت بيت الجيران عشان اليوم في محاظره اسلاميه واهي تحب تروح
قالت للبنات يروحون يواها بس منار عارضت وقالت لا نبي نتم في البيت وهناك قعدة حريم واحنه بنتملل
منار : شرايج نروح برع الحديقه و نطلب لنه شي وناكل صوب حمام السباحه
شذى : لا جوفي شي احسن
منار : هذي احلى شي الصراحه
شذى : اوكي نروح نسبح ونستانس عقب نطلب لنه شي ناكله


بدلو ولبسو ملابس السباحه
وراحو عند الحمام السباحه و خذو معاهم مسجله وشرط اغاني
عشان يسبحون ويرقصون

وفي نفس المكان كان معاهم شخص ثالث
كان مشعل يتمشى في الحديقه ويفكر في حياته وفي كل شي وسمع اصوات

راح صوب الحمام السباحه بس ماكان يبين
وجاف شذى واخته قاعدين يرقصون و عقب شذى اقعد و تمت تصفر حق منار
شذى : عاشوو ايوه وتصفق لها
عقب قامت شذى مره وحده ودزت منار في الماي
منار : ياالبايخه يا السخيفه
شذى : هههههههههههههه
منار : تعالي ساعدين
شذى : ماابي واهي تطلع السانها
منار : يالله تعالي ساعدين راحت لها شذى و اسحبتها منار وياها
شذى : حرام عليج
منار : عشان هل مره تعرفين شلون تدزيني

وتمو على هيلتهم لين الساعه 12
طبعا تم مشعل يراقبهم ويفكر في شذى (( اهي بنت طيبه وحبوبه بس اهي خانت ابوها وحب واحد يعني ممكن تخوني و انا بعد مو احسن منها انا قاعد اخونها بس ماادري شسوي
مااقدر اتخلى عن مرام افففففف انا ليش اتعب عمري في التفكير دام اهي ساكته خلها اذا تكلمت يصير خير )
وراح فوق عشان ينام


و بعد اسبوع في يوم الخميس كانو متفقين على روحة المزرعه
طول هل اسبوع ماصار اي احتاك بين مشعل وشذى اهي وقت الي يكون في البيت او في الجناح قاعد اهي تروح ويا منار او خالتها ام مشاري وبعض الايام تروح بيتهم و باتت ليلتين هناك


شذى تحب الخيول وايد بعكس منار الي تخاف منهم
طبعا راحو يوم الاربعه بالليل وباتو في المزرعه و اضطرت شذى تنام اهي ومشعل بغرفه بروحهم مشعل نام على الكرسي واهي على السرير
شذى قامت من الصبح لانها تحب اجواء المزرعه فتسبحت ولبست برمودا لونه وردي وفيه لون الجيوب رصاصي ضيج و لبست بوت طويل باللون الاسود وتي شرت لونه اسود مفتوح من الظهر و تحته لبست تي شرت وردي بحماه على الصدر وفي التي شرت رصاصيه قريبه من اللون الاسود من جدام رسمت بنوته على شكل ملاك بالون الوردي ومكتوب sweet angel ولبست حلق دائري و و حزام باللون الفضي و شعرها خلته مفتوح ولبست قبعه لونها وردي وفيها كتابه بالرصاصي وحطة كحل ومسكرا و شدو خفيف لونه وردي و قلوس باللون الوردي
اما منار لبست بنطلون جينز برمودا اسود ضيج و لبست تي شرت حفره بحمالات خفيفه لون بني و حزام بلون بني و لبست بوت ( وانتو بالكرامه) بني و خلت شعرها مفتوح وحطت بس كحل وقلوس ولبست نظارات عن الشمس
وكانو اول الواصلين بيت بو عادل الي اهو عم مشعل الثاني ومعاهم الجد محمد

بوعادل ( جاسم ) متزوج من ام عادل (امينه) وعندهم
عادل 29 متزوج سناء 27 وعندهم ايمان 8 و امينه 4 سنوات
محمد 20 شاب وسيم واخلاقه عاليه ومعجب في بنت عمه منار ويتمنى يتزوجها
و ريم 17 سنه

و بعدهم وصل مشاري و زوجته وعيلته و عقبهم بشوي وصلت مشاعل وزوجها طلال وكان معاهم عمتها ام طلال (خلود ) زوجها متوفي من 11 سنه و اخت طلال الوحيده الاء 16 سنه و عنده يوسف 20 و اخر العنقود حسن 14

الريايل راحو القسم المخصص لهم والنسوان قعدو في الصله الداخليه والبنات في الخارجيه


ريم : واخيرا جفناج يا شذى منار وايد تسولف عنج وتقول انج ربشه بالصراحه في العرس ماقدرنه نتعرف عليج عدل
شذى : انا بعد كان خاطري اجوفج لانه منور وايد تسولف عنج
ريم : صج احم احم صرت مشهوره الكل يسولف عني
الاء : طالع ذي مصدقه روحها وايد
شذى : هههههههه خليها تصدق روحها عادي تره
مشاعل : بنات شرايكم نروح صوب الخيول
منار : لالالا مانبي خلنه محلنه
شذى : ايييييييييي تكفو خاطري اروح هناك واهي تلتفت على منار بلييييييييييييز عاد
منار : مابي سمعتي قلت ماابي
الاء : خليها تلولي الخوافه
قامو البنات كلهم ماعدى منار الي قعدت محلها
رجعت لها رهف : منور حبيبتي قومي ويانه محد بخلي الخيل ايي صوبج
منار : لا ماابي
رهف : عشان خاطري
منار بتفكير : عشانج بس بيي وياكم بس بتم بعيد
الاء : ريمو ماقلتي لي شخبار قعدت البيت
ريم : افف ملل هل عطله حدها ممله ابي اسافر بس ابوي يقول ماني فاضي لكم
الاء: شذى بتكملين الدراسه ولا بتمين في البيت
شذى : اكييد بكلم قعدت البيت تملل
الاء تحرك حواجبها : اكيد تملل دام حبيب القلب في الشغل بتمللين
شذى سوت روحها مااسامعت
شذى : مشاعل الا ماجفت جنان وينها
مشاعل : مع ابوها تبي مشعل اهي وايد تحبه ومتعلقه فيه واهو بعد يحبها
شذى : اهااا ودي اجوفها وحشتني
مشاعل : اتصلي في القلب و خليه اييج و جوفيها بالمره اتجوفينه واهي تحرك حواجبها
شذى حست بارتباك : ها لا بس عقب اذا وقت الغدى اكيد بيبونها لج بجوفها
مشاعل : ليش خايفه يجوفج القلب ويتخبل عليج ولا يخليج تردين لنه
شذى فكرت في اول جذبه : اي بالصراحه اخاف يجوفني و لا يخليني ارد

عند الشباب
مشاري : شرايكم بعد الغدى نروح عند الخيول نسوي سباق او نلعب كوره قدم فريقين تحدي
طلال : نبي نلعب كوره
مشاري : عمي بو عادل تلعب ويانه
بو عادل : لا وانا ابوك ويني وين اللعب وانت جمال بتلعب وياهم
بو طارق : اكيد بلعب فيها كلام
مشاري : جوفو طلال و عمي جمال و يوسف ومحمد فريق
و الفريق الثاني مشعل و عادل و طارق

طلال : وحضرتك مو لاعب
مشاري : حبيبي انا الحكم
الجد محمد : يابوك واحنه الشيبان شنسوي
طلال يهمس في اذن مشعل : حتى يدي يبي يلعب اهو خل يقوم اول ولا يسمع بدال لايسجل في المرمه مال الفريق الثاني بسجل على فريقه
مشعل : ههههههه لو يسمعك تتطنز عليه بيكسر العصى على راسك
الجد محمد : وانتوا اشقاعدين تخربطون سمعونه الي تقولون ماتعرفون ان عيب تتساسرون وياكم ناس
مشعل : هههههه يدي انا مالي خص هذي طلال يقول شرايك انعرس يدي اندور له جي على مره حلوه وانعرسه
الجد محمد يمد عصاه ويضرب مشعل بالعدال : يا جليل الحيا بتعرسني عقب المرحومه ولا استح على ويهك احين انا يدك تقول لي جي
مشعل : يدي مو انا هذي طلالو اهو الي يقول
طلال :ههههههههه يدي والله خوش فكره نعرسك ونفتك مكن احنه
الي في المجلس اضحكو عليهم لان اليد وايد يحن عليهم في كل شي يعني اذا اخرو الاكل ولا ارقدو وقت متاخر << خبركم الشياب شلون
مشاري : يدي شرايك بعك نعرسك على انجليزيه تره بناتهم حلوين جي شقره
الجد محمد : اخر عمري تبي تعرسني على ياهل ولا عنقريزيه بعدين تقعد تخربط علي بلغتهم
بو عادل : يبه خوش فكره و شرايك بعد نعرس انا وانته في يوم واحد
محمد : يبه بقول حق امي
بو عادل : قول حق امك
يوسف : ههههه عمي الليله بتنام برع البيت
بو عادل : يبه اليوم برز ليس محل بييك
الجد محمد : ماعندي محل ولا ابي احد اييني في بيتي يزعجني
بوعادل : افا يبه تطردني
طلال يساسر مشعل : هههههه يدي عجيب مايبي احد وان احد راح له بوو الله يعينه مايسكت كله يحن و لا بعد يبي يسولف وانته اسمع وانت ساكت لا تقول بروح مني ولا مناك ياويلك تقوم عليك القيامه اقول لاتجرب تبات عنده ترقد في الشارع احسن
مشعل : ههههههههههههههههه ولا تذكر العام لما رحنه نبات يزعم انونسه ههههه يوم خلانه جنه في معسكر لا رقده مثل الاوادم رقدنه ولا سهر و ناكل مثل مايبي ونشرب حليب و مثل ماياكل ههههههه حلفت اني ماابات عنده
الجمد محمد : مشعل
مشعل : ها
الجد محمد : اضربه بالعصى استح على ويهك انا يدك تقول لي ها
مشعل : نعم امرني
طلال يضحك عليه قام اضربه بجتفه
مشعل : جب انت
الجد محمد : شخبارك مع بنت بو خالد
مشعل اعتفس ويه : بخير بخير يسرك الحال
الجد محمد : ان شاء الله مديم ها شد حيلك ونبي نجوف عيالك
مشاري : يدي توه معرس و تبي تجوف عياله خله شوي يستانس ويا المره
الجد محمد : اقول متى بحطون الغدى تراني متريق من فير الله قمت حق الصلاه وتريقت وماكلت شي

مشاري : ان شاء الله احين اخليهم يحطونه لك انته تامر
و اتصل حق امه عشان يحطون الغدى

ام مشاري : عيل وين البنات عشان ايون يتعذون لانه بعد شوي بنحطه
رهف : خالتي البنات راحو صوب الخيول وعقب قامو يتمشون في المزرعه
ام مشاري : رهف يمه اتصلي لهم عشان ايون
رهف : ان شاء الله
و اتصلت على مشاعل
رهف : الو شعول تقول لج خالتي تعالو عشان تتغدون
مشاعل : اوكي احين بنرجع
و صكت التلفون عنهم
مشاعل : بنات خل نرجع وعقب نكمل دوارتنه
و في هل لحظه اتصل طلال مشاعل : الوووو
طلال : احلى الو في هل عالم
مشاعل : طلالو مو احين انا ويا البنات
طلال : موااااح
مشاعل : طلول
طلال : عيونه اي حبيبي بعدين على العصر بنلعب كورة قدم ونبيكم اتيون وتشجعونه
مشاعل : افا عليك ولا يهمك اوك باي حبيبي اجوفك بعدين
طلال : باي تحملي بروحج

بعد الغدى الشباب بدلو ثيابهم وعلى الساعه 3 ونص
جي ابتدو عشان اللعبون مبارات وكانو البناات والنسوان وياهم عشان يطالعون وكل وحده تشجع فريق


شذى : بنات خل وحده اتيي وياي ابي اروح حق الخيول
منار : ليش ماتبين اتابعين المباره
شذى : لا مااحب كره القدم ولا تهمني
منار : كيفج
شذى : شعول بتيين وياي
مشاعل : اي بس لحظه بطمن على بنتي من الصبح ماادري عنها وبنروح انتي جدمي وانا بلحقج

شذى راحت حق الخيول و ركبت السرج و امتطت ظهر الحصان واهي تفتر شوي ياتها مشاعل تتمشى

شذى تتمشى على الحصان ومشاعل تتمشى صوبها
شذى : شرايج تركبين على حصان
مشاعل : لا مالي في هل سوالف بس تدرين القلب يحب الخيول
شذى : اي قلب ؟؟
مشاعل : يعني ماتدرين من اكو غيره مشعل
شذى : اهاا
مشاعل : بس تدرين كان يحب الخيل لانه ابوي يشجعه واهو دايم اذا يركب الخيل مع ابوي بس بعد وفاة ابوي ترك الفروسيه
شذى تمت ساكته ولا علقت لانه بالنسبه لها مو مهم هل شي
في هل لحظه ياتهم منار تركض و اهي تصارخ
منار واهي تلهث : لحقو لحقو اخوي مشعل ....




اتمنى ينال اعجابكم البارت

قرائه ممتعه
ابي تعليقاتكم وردودكم الي تشجع

جزء رائع

يعطيك العافيه والله يصبرني انتظر ابغي اعرف ايش صار

علي مشعل واتمني ماتتطولين علينا

قصه حلوه مره
شذى قهرتني يوم كلمه عبد الرحمن بس زين ماسوى لأنه هالشي من صالح الأثنين
اتوقع مشعل بيصيبه شي واصابته بتكون خطيره مرام بتتخلى عنه وبتنعرف حقيقتها وشذى بتصبر عليه
مع حبي دفى الكون