روايه روعه

الف شكر لك

رواية اكتر من جميلة فعلا
بس التكملة امتي ؟

please please please
i nees the parts
and thaks

القصه رووووووووووووووووووعه حدها
تسلم هالايد المبدعه
شمس عورت قلبي مرررره احس ان عايض بيصير له دووور يمكن يرجع الديره
وتصير بينهم قصه حب الاثنين تعذبوا
الطفل محمد ما يستاهل من شمس هالبرود يعني ممكن افهم ان البدايه هي مصدومه وبعدين صار له الحين له فتره عندهم وهي مب راضيه تكسر هالثلج اللي ع قلبها
يعني لو تحاول تحضنه بتحس ان ينابيع حبها وحنانها اللي جمدهم طلال انفجروا ومالهم حد
معجبه مو عاجبتني حياتها ارخصت نفسها والحين تتجرع الثمن الله يعينها
االريم اكثر وجده حبيتها وتعاطفت معاها الله يسعدها
الله يوفقج ويعافي قريبج وننتظر اخبارج بلهفه وشوووق

تحية عطرة لكل من مر على الرواية ..

والعذر والسموحة لكل من علق .. ولم أستطع الرد عليه ..

أما بالسبة للرواية تأخرت لتأخر الكاتبة .. وليس مني ..

وهذي البارتات نزلتها الكاتبة للتو ... صدقوني أنا لم أقرأها للآن ...

وإن شاء الله تستمتعون بها ..


الفصل السادس الجزء 4



ماجد ـ انزل تعشى عندنا ..

أحمد ـ لا ما أقدر عندي شغل ..

ماجد ـ الساعه عشر شالشغل اللي عندك ؟

احمد ـ كم شغله اقضيها ..

ماجد ـ تعال يا رجال ..

سحبه ماجد من يده بعد مافتح باب السيارة ـ تعال كافي انك ما كلت في العرس .. على بالك ما ااشوفك ؟

احمد ـ ما كنت يوعان ..

دخل احمد وماجد البيت اللي كان فاضي ..

أحمد ـ وين مرت عمي ؟ خل اسلم عليها ؟ ..

ماجد ـ ما ادري بس كأن محد في البيت .. تعال المطبخ اشوف شحط لك .



ماجد كان معتمد ان البيت فاضي لان الباب كان مقفول والسيايير مب موجوده .

دخل المطبخ ودخل معاه احمد

ـ يلا وريني شلون بتطبخ .

ضحك ماجد ـ انت ماتعرف امي امي ماتخلي هالثلاجة فاضية .. الحين براويك ..

فتح الثلاجة ولقى صحن فطاير وصحن محاشي طلعهم وحطهم في الميكروويف وسخنهم وطلع صينيه من الدرج وحط الاكل عليها مع صحون وأشواك .. وفتح ثلاجة ثانية وطلع عصير برتقال طبيعي صب في قلاسين وحطهم في الصينية

أحمد ـ ماشاء الله ماكذبت يا ماجد والله مرت عمي مب مقصرة . الثلاجة عامرة ..

ماجد ـ امي تعودت علي ارجع متأخر فدايما تحط لي نصيبي في الثلاجة وأنا ما اقصر حتى لو كنت شبعاان أكله كله ما أبيه يظل وتحاتي .. أعرف انها تستانس بهالشيء ..

راحو للصالة وفتح أحمد التلفزيون وحط الصوت على آخر شيء وااثق أنه محد في البيت بينزعج منه . ورجع ماجد المطبخ يجيب فواكه ..

بعد دقيقة سمع خطوات ركض على الدري طلع ماجد في اللحظة نفسها بس ماشافته نوير وعلى بالها اللي قاعد على التلفزيون هو ماجد

ــ ماجد محمد نايم وطي الصوت شوي حرام عليك .

التفت أحمد للصوت .. ماعرف البنت اللي اول ماشافته صرخت صرخه عوده ورجعت تركض فوق وماجد مايعرف يضحك ولا يلحقها حط السلة على الطاولة ..

ـ ههههه لحظة احمد بروح اشوف نوير البنية اكيد دقت على الشرطه .. كمل عشاك ..



بند احمد التلفزيون ومسك الشوكه وهو يبتسم ...





طلع ماجد وأول مايبي يدخل غرفتها سمعها تصيح قال قبل لا يحاول يفتح الباب عشان ماتخترع ـ نوير انا ماجد .. افتحي الباب ..

فتحت الباب وعيونها حمرا من البكي وماسكة الاباجورة في يدها

ضحك ماجد ـشفيج يالخبله ماسكة الاباجورة هو فيلم مصري ؟ ؟

نوير وهي ترتجف ـ في ريال تحت ريال غريب !!

ماجد ـ والأباجورة بتحميج يعني ؟ صج هبله .. هذا ضيفي ..

نوير ـ ضيفك ؟ ومن متى تييب ضيوفك لنص الصالة ؟ شبلاك يا ماجد ؟والله اني بغيت انجلط !

ماجد ـ شفت البيت مقفول والسيايير محد قلت اكيد طالعين ..

نوير ـ ولو .. والله اني اخترعت .. الحين ضيفك الغريب جافني فضيحة !!

ماجد ـ البسي شيلتج وتعالي تحت ...

نوير ـ انت شتخرف ؟

ماجد ـ هذا ولد عمج احمد يالخبلة !! .. مب غريب تعالي خرعتيه بكشتج تعال سلمي عليه وارجعي لحمودي ..

نزل ماجد وهو مبتسم وانصدم لما لقى الصحن تقريبا فاضي ـ ماخليت لي شي ؟

أحمد ـ كنت يوعان صراحه .. وبعد الخرعه اللي خرعتني اياها اختك .. صار عندي هبوط في السكر ! والله عليها صوت .. اسعاف مب بنت !

ضحك ماجد ـ بس عاد .. هذي نوير ما ارضى عليه..

أحمد ـ والله طبخ امك ماشاء الله عليه . ..

نزلت نوير وقالت مستحية ـ السلام عليكم .

رد أحمد وماجد ـ وعليكم السلام ..

قال احمد ـ ليه غيرتي الدراعه ؟ البيج احلى ..

طالع له ماجد معصب ـ احمدوه ..

استحت نوير وفكرت (شفيه هذا قاط الميانه كانه يعرفني طول الوقت )) .

نوير ـ شلونك أحمد والوالدة والاهل ؟

احمد ـ عايشين ..شلونج ؟

ـ الحمدالله بخير ..عن اذنكم ..

ماجد ـ اذنج معاج ..

أحمد ـ بدري وين رايحه .. تمي .. ترى مليت من اخوج مقابله طول الوقت ..

ماجد ـ احمدوه اصطلب .

احمد ـ ماجذبت من الساعه اربع وانا مقابل ويهك حتى سالفة يديدة ماعندك !

ماجد ـ وليش من قالك اني رويترز مجابل ويهك اونسك بالاخبار ؟

نوير ـ محشوم اخوي .. بس محمد نايم .. بروح اتم يمه لين تجي امي من بيت الريم .



طلعت نوير فوق وماجد التفت لأحمد ـ كأنك مصختها مع اختي ؟

احمد ـ بنت عمي وكيفي عندك مانع ؟ بس انت مطيح مع ربابوه سوالف كل ماركبت سيارتي ؟



ماجد ـ يه شسوالفه الله يرجك ؟ كل اللي اقوله شلونج شخبارج وترد بخير حتى ماتسألني عن لوني !!.

ضحك أحمد ـ مايحتاي لونك اصفر مخضر مايبي لها سؤال .. انزين .. أنا خلصت العشا مابتمد يدك ؟

ماجد ـ ما بي عشا بعدين ماتم شي حضرتك زطيت الاكل كله .. هذا وانت ماتشتهي حتى عصيري شربته الله يهديك بس .. بعدين انا كلت من البوفيه وتعشيت زين بس انت اللي ماكلت شي . .

احمد ـ يا اخي كنت متضايق لقيت واحد من ربع اخوي وخبرني عنه سالفه ارفعت ضغطي ... خليني ساكت عن الفضايح بس ..

ماجد ماحب يضغط على ولد عمه فقال له ـ قوم زين نروح للميلس اسوي لك شاي وقهوة .. ونسولف هناك ..



شال ماجد الصحون وحطها في المطبخ ولحق بأحمد ..



أحمد أول مايلس ـ من هذا اللي سلمت عليه وتميتوا تسولفون ؟

ماجد ـ أي واحد ؟ سلمت على وايد . .

أحمد ـ اللي كان لابس نظارة .. وأطول منك شوي .. شايفه بمكان بس مب ذاكر ..

ماجد ـ هذا ناصر . .

أحمد ـ ناصر ..ناصر ريل ..

ماجد ـ ايه .. ريل خالتي ..

أحمد ـ الكاتب ؟

ماجد ـ ايه شفيك بلمت .. قلت لك عنه ..

أحمد ـ انزين يا أخي عرفه علي قوله هذا ولد عمي يمكن يفيدني بأبحاثي ..

ماجد ـ شأبحاثه الله يخليك الريال مب فاضي وراه سفر . .وميالس عوده مب فاضي لك ..

أحمد ـ للحين خالتك ماقالت لك عنه ؟

ماجد ـ هذا قرارها .. وهي بكيفها ..

صب لأحمد الشاي وحطه جدامه ووسحب بيالته وجلس مقابل التلفزيون ..

أحمد ـ والله لو اني منك ودريت بطيح مسكت .. ولا بحاجيها عمري كله ..

ماجد ـ أحمد .. أنت مابتفهم .. لو احد مفضل عليك طول حياتك .. وزين معاك ويتفداك بروحه لو اتخذ هالقرار الشخصي وأخفاه عنك هل بتنسى فضله معاك ؟ وأخلاقه ومواقفه وتنبذه ؟ ؟ لا طبعا بعدين هي مب صغيرة .. هي ناضجة وهالقرار في يدها بس ..

أحمد ـ بس تزوجته ولا عبرتكم ولا خبرتكم ..

ماجد ـ لو تزوجته وراحت معاه بزعل حزتها .. لكن الحالة اللي هي فيها تفشل صراحه ولا كأنها متزوجه ..كله معانا .. أستغرب متى تشوفه ؟ بعدين هي قايمه في امي وفي خواتي .. والريال اصل وطيب وكرم .. واكبر دليل انه يا لميلسي هنا قبل الزواج وقال لي وأخذ اذني .. ماعدني ياهل مثل ماعدتني خالتي وامي .. وماخبروني ..

أحمد ـ شكلك شايل عليهم ..

ماجد ـ لا ... أنا عاذرهم .. معجبه موقفها غلط .. ليش قبلت بشروط السرية ما ادري .. بس هذي حياتها وهي ابخص فيها .. وهي مب ياهل عشان اوقف في طريقها انسانه متعلمة وسيدة اعمال ..



أحمد ـ ما أدري يا ماجد من وين تيب طولة البال.. لو اني مكانك كان كسرت الدنيا ..

ماجد ـ اي طولة بال ..كان عندي خمس أمانات الحين صاروا اربع .. الحين انا عندي اربع خوات افكر في مستقبلهم .. وفكرة ان معجبة تزوجت ريحتني شوي .. انها على الاقل مشت في حياتها في يوم بتعلن عن هالزواج وبتعيش مع ريلها ... ابوي وصاني في خواتي .. وبيني وبينك .. زواج الريم ريحني لأن أذا الريم تزوجت أكيد في فرصة لخواتي ..



أحمد ـ اي على الطاري ..ترى انا بحير النوري..

ماجد عقد حياته والتفت لأحمد ـ ها ؟

ابتسم أحمد ـ مافيها شي بنت عمي وابيها وانا مطول في جامعتي .. انطرني ثلاث سنوات ..

ماجد بحيرة ـ وابوك ! ..

أحمد ـ اذا في حد شايل هم بنات عمي أكثر منك فهو ابوي .. صدق انه مايبين بس تراه بين فترة وفترة يسألني عنك وعن خواتك اذا تزوجوا .. ويوم طلق طلال الله يرحمه شمس ابوي مسكين بغى يروح فيها راح لبيت طلال وتهاوش معاه ..



تفاجأ ماجد لهالخبر فأكد له احمد ـ يمكن ابوي شايل على عمي ثامر شوي انه ماطلق امك ,, بس اولا واخيرا انتم عيال اخوه .. ومن عرضه ..

سكت ماجد محتار بعدين قام حط شاي لاحمد ولنفسه ورجع يلس حذاه

أحمد ـ هي النوري تخرجت ؟

ماجد ـ شفيك قطيت الميانه شنو النوري ؟؟ اسمها نوير .. انت تعرف انها من عمرك ..

احمد ـ ادري .. بس انا لو ماصقطت كان الحين معاها في نفس السنه وانا وهي نفس التخصص لغه عربية .. وناسه !



ماجد ـ اسكت لا أصكك بالجاي على ويهك فيلم مصري هو ..

بعدين تذكر منظر نوير وهي ماسكة الاباجورة مامسك عمره وتم يبتسم ..

احمد ـ يا اخي انت صديقي !

ماجد بلؤم ـ واخوها! ولين يصير شي رسمي لاتفتح الموضوع جدامي سمعت !

احمد ـ امرا وطاعه يا .. أخوها ! ..



***********

كانت وضحى في غرفتها مجابله التلفزيون لما دخل خليفة

" مادشت اليوم ؟ "

وضحى " لا ما دشت .. صار لها كم يوم ماتدخل .. انزين انت شفيك مستهم ؟ "

خليفه وهو ييلس جنبها " سمعت من امي ان عندهم بنت اانخطبت "

وضحى " وامي شدراها ؟ "

خليفة " سمعت من يارتهم .. ما ادري شالسالفة يا وضحة بس هالبنت في خاطري وايد :"

وضحى " اشك .. بعد اللي سوته اختك منيرة .. انه بيصير شي "

خليفة " اختج هذي زين ماذبحتها !! .. .هي صافية ماجابت طاريها ؟ "

وضحى " حاولت معاها بشتى الطرق يا خليفة لكنها ما ذكرت لي اي شي.. حتى طريت اسمك مرتين مدري ثلاث .. بس ولا اثر فيها عادي .. تهقى ماتعرف "



خليفه " اشك انها تعرف .. يمكن منيروه دخلت بيت غلط ؟ "

وضحى " يارب الله يسمع منك ... صدق انها بتكون فضيحه ..تعال .. انت قسمك مايبون موظفات ؟ "

خليفة " يمكن ليش ؟ "

وضحى " صافية خبرتني انها تدور وظيفة .."

خليفة " وتبيني اوظفها عندي ؟ لا طبعا .. بعدين انا ما ارضى بالمختلط .."



وضحى " بديت تتحكم فيها ؟ ؟ "

خليفة " ايه .. انا البنت عاجبتني وايد عشان اخلاقها وتدينها .. رغم ما شفت ويهها ابدا بس من كلامك دشت خاطري .. واحاديثكم اللي تحفظينها لي احسها انسانه عاقلة تعرف الله احسن من بنت خالتج اللي كله مطيحه في الشات "

وضحى " بس حنان طيبة .. "

خليفة " انسانه وقحة وماتعرف الله .. "

وضحى " لا تحط في ذمتك "

خليفة " تعلميني فيها ؟؟ امسكي جوالي وشوفي المسجات .. تطرشها لي اول باول مع اني ما اطرش لها حرف واحد بنت ماتستحي .. .. "



استحت وضحى ببنت خالتها .. وغيرت الموضوع .. لو يدري خليفة بمسلك حنان في الجامعه كان ذبحها بيده كله كانت مع البويات والشلل السخيفة وكله على النت في الشات .. دشت المسنجر مرة ثانية .. لو تيي صافية لبيتهم خيرة والله انسانة تخاف الله ومحترمة ... يكفي ان خليفة تعلق فيها من ثقافتها وجديتها .. خصوصا بعد ما عرف انها مب راعية خرابيط .. لما كانت تتناقش مواضيع بثقافة اسلامية عالية صرح لها خليفة يومها وقال لوضحى " اظفر بذات الدين تربت يداك "



رغم اللي سمعوه عن ماضي خالتها .. وان الناس تتكلم فيهم لكن خليفه مصر على صافية .. واستخار وتأكد احساسه .. ولكنه لما شار اخته منيرة خربت عليهم كل شي ..