بعد يومين ..

الغالية ـــ وين محمد ؟؟

شيماء ــ في البيت ..

الغالية ــ شيماء ..صار لس ثلاثة أيام مارحتي بيت ريلس ..

شيماء ــ أتصل فيه يقول لي ماله داعي تيين .البنات عند جدتهم ..

الغالية ــ ليش ..هو متزوجس علشان البنات بس ؟؟

ارتبكت شيماء ..الغالية ما تدري أن مافي ارتباط بين شيماء ومحمد غير البنات ..

شيماء ـــ لا ..يعني ما أشيل هم أكون بقربكم ..هاليومين..

الغالية ـــ هاليومين عدوا ..ردي لبيت ريلس ..

شيماء ــ انا تميت هنا علشان أمي ..ما حبيت أنها تكون بروحها ..شفيس ؟؟ من سافر أحمد وانتي صايرة نمرة ..ما تحبين أحد يكون قربس ...

الغالية ـــ لا ..بس هالاسبوع كان سيء جدا بالنسبة لي ..ما ارتحت فيه وما درست ..أحس ..أحس أني مخنوقة ..وشوفتس هنا ..ومحمد ما يسأل عنس ..غريبه ..

شيماء ــ الغالية ..محمد بيني وبينه تلفونات ..بس أكلمه بروحنا ..ولاتبيني أكلمه قدام أخواني ؟؟

الغالية ــ روحي بيتكم ..وارتاحي ..أمي حمده في عيوني ..

شيماء ــ تسلم عيونس ..

اتصلت شيماء ف الدريول وطلبت منه أنه يجهز السيارة لانها بترجع البيت ..

****************************



ليلى ـــ هاي ..

بومشعل ــ اهلين ..من يوم ما تعرفتي على هالبنت وانتي كل يوم معاها ..

ليلى ــ يبه انا مو كله اشتكي لك من وحدتي ؟؟ هالبنت ارتحت لها وايد ..والحمدالله بيتهم ما يبعد وايد عن بيتتنا ..وهي صراحة روعه ..

بو مشعل ـــ زين ..تساعدج على جهازج اللي انتي محتارة فيه ..

ليلى ــ تصدق يبه ..ذوقها حلو أنا عاجبتني ملابسها وايد . كلاسيك وروعه ..في ذوق في الالوان والتصاميم ..

بومشعل ــ زيين ..اخوج وين؟

ليلى ــ من ...مشعل ؟؟ ما أدري ..انا من الصبح طلعت رحت لسعاد والحين يلا رجعت ..تصدق يبه أنا ما شفت مشعل من اول امس ..

بو مشعل ـــ أنا مثلج انشغلت اليومين اللي راحوا بتكميل أثاث البيت بعد ما قص اخوج ويهي قدام الناس ..

ليلى ـــ يبه ترى الاثاث اليديد روعه أحلى من أثاثنا ..

بو مشعل ـــ علشان تعرفين ذوق أبوج ..روحي شوفي أخوج ..لايكون انتحر ..مالنا خلق له ..

اضحكت ليلى ــ اسم الله عليه ..

طقت الباب على أخوها ..

ليلى ــ مشعل ..انت داخل ؟؟

مارد عليها افتحت الباب شوي شوي ..كان نايم على الكرسي وساند ريوله على المكتب ولابس بيجامته ومتكتف ..باين عليه ماحلق لحيته من يومين ..استغربت ليلى شاللي مغير حاله ...التفت حولها وبدت تتأمل ..

شهقت ..كانت لوحة مسنوده على الحامل ..لوحه كامله والكمال لله ..بألوانها ودقتها ..طالعت أخوها وهي مب مصدقة ..طالعت اللوحة مرة ثانية ..تحركت وبالغلط طيحت علبة الالوان ..اللي صوتها دوى بالغرفة فاخترع مشعل وقام من نومه ..

ــ من..

ليلى ــ أنا أختك ليلى ..

ليلى تحركت وخذت اللوحه وطوتها ..

مشعل ــــ هييه ..انتي شتسوين..خلي اللوحه ..

ليلى ـــ مشعل أنت تعرف اللوحه هذي لمين؟؟

مشعل ـــ أكيد أعرف .لوحه لوحده من أجمل ما خلق ربي ..

ليلى صرخت فيه ـــ هذي اللوحه لسعاد ..هذي اللي رسمتها هي سعاد المنقبة ام العكاز اللي شفناها في المطار ..حرام عليك ..

طالعها منصدم ومسك اللوحه ـــ وين بتاخذينها ؟؟

ليلى ــ انتي سمعتني؟

مشعل ــ صار لي ثلاثة أيام مواصل ليلي بنهاري يلا رسمتها ..تاخذينها بهالبساطة؟؟

ليلى ــ مشعل انت رسمت بنت منقبة ..ماترضى حد يشوف وجهها ..شلون اذا رسمت شعرها وملامحها وجسمها ..أصلا وين شفتها ؟؟؟

مشعل ـــ أنا دخلت عليها البيت بالغلط ..وهي ما تحركت من مكانها ..كان على بالي انها ما تتحجب مثلج..

ليلى ـــ مشعل هد اللوحه ..

مشعل ــ وانتي ليش مهتمة فيها وايد ..

ليلى ـــ البنت ملتزمة ..حرام اللي تسوييه ..

مشعل ــ انا ما سويت شي ..ومافي شي يثبت ان هالصورة لها هي ..

ليلى ـــ مشعل ..خاف الله ...انت رسمت البنت كوبي ..حتى في طول شعرها بالضبط ..حرام عليك ..أي واحد من أهلها لو يشوف الصورة بيعرفها على طول ..

مشعل ـــ ليلى ..ما أقدر أتخلى عن هاللوحة ..لأنها أول تجاربي في اللوحات الشخصية ..ومن الذاكره ..هذي اللوحه بالنسبة الي ..الموناليزا ..

ليلى ــ كان لازم تسأل ..مالك حق ترسمها جذييه ..مالك حق هد اللوحه لانادي ابوي ..

ماطاع مشعل يهد اللوحة ..

ليلى ـــ انت تعرف ابوي ناطر عليك زلة ..وصدقني لاعرف بالموضوع ما بيصير خير ..خليني أنا أتكفل بهاللوحة ..

مشعل ـــ شيبتسوين فيها ؟؟

ليلى ــ بحرقها ..

ــــ لا ...لا تحرقينها ..

ليلى ـــ مافي حل ثاني .

مشعل ــ في ..قولي لها انج انتي اللي رسمتيها ..

ليلى ـــ أكذب عليها؟؟

مشعل ــ أنت موهوبة بالرسم ..وأنا بموت لاصار شي للوحه ..على الاقل تعطينها صاحبتها ..وتوقعينها باسمج ..

ليلى ـــ وأنا ايش يضمن لي انك ما بترسم مرة ثانية صورتها من الذاكرة؟؟ خصوصا انك رسمتها بيدك ..وأنت تعرف ذاكرة اليد .

مشعل ـــ ..................................................

ليلى وهي مرتبكة ـــ مشعل ..يالله ..مشعل ...حرام عليك ..هذا الي سويته يمكن يدمر البنت ..

مشعل ـــ احرقيها لوتبين بس فكيني من محاضراتج ..

ليلى ـــ أتمنى أنك تعتبر ..

وأول ما تبي تطلع خذ منها اللوحة بسرعه وقال ـــ أبي أتزوج هالبنت ..

انصدمت ليلى ..وطالعت له مو مصدقة ..

ليلى ــ هذا الحل في نظرك علشان ما تحرق اللوحة ؟

مشعل ـــ ليلى ..أنا عاجبتني البنت ..عاجبني حشمتها و تحفظها ..

ليلى ــ انا ما ادري ..بس كل مرة تطالع لهاللوحة ..صدقني انت ترتكب اثم ..

مشعل ــ أرجوج . ..أنت آخر وحده تنصحين .

ليلى ـــ شقصدك؟

مشعل ــ لما تحطين حجاب على راسج تعالي وكلميني عن لآثام ..

دفعها بره وصكر الباب ..

*****************************

دخلت البيت .. كان مظلم ..فتحت باب غرفة محمد ..كان نايم ..صكرت الباب بشويش علشان ما يحس عليها ..وطلعت لغرفتها فوق ...

خذت دش سريع ....وأول ما طلعت من الحمام كان واقف عند الباب .اخترعت ..

ـــ بسم الله الرحمن الرحيم .. محمد ..خرعتني ..

محمد ــ سمعت صوت في البيت ..ما كان قصدي افاجأج ..

شيماء ـــ اييه ..من قبل شوي رجعت مع الدريول والخدامة ..شفتك نايم ,,,مو من عادتك تنام هالحزة ..

محمد ـــ كنت تعبان ..أنا قلت لج ..نامي في بيت أهلج البنات ما بيون اليوم ..

شيماء ــ ليش ..انت متزوجني علشان البنات بس؟؟

محمد ـــ ..........................

شيماء ـــ محمد أنت ليش ساكت؟؟ رد علي ..

محمد ـــ تعرفين ليش تزوجتج ..تزوجتج قبل لايحتاجون البنات لج ..

شيماء ـــ ما أعرف ..نسيت ذكرني ..

محمد ـــ وليش طاري في بالج هالموضوع ؟

شيماء ــ لان هذي مو عيشة ..أنا هنا مربية بس ..واليوم اكتشفت هالشي ..

محمد اقترب منها ـــ قلت لج تزوجتج قبل لايحتاجون البنات لج ..

شيماء ــ محمد ....افهمني ..

محمد ــ أنا فاهمج ..بس ..أنت فاهمة اللي تقولينه؟؟

شيماء ـــ أنا ..أنا خجولة منك ..وما أدري شلون بفسر ..

محمد ـــ تبين الطلاق ؟؟ أنا جاهز..

انصدمت شيماء ..طالعت له والدموع في عيونها ..وهزت راسها بلا ..

محمد ـــ خايفة تحملين لقب مطلقة؟

شيماء ـــ خايفة أعيش من دونك ...

هالجملة اصدمت محمد ..طالع لها مستغرب ..

محمد ـــ بس أنتي في الاول ما كنتي تبيني ..

شيماء ـــ بس الحين ماعاد لي غيرك ..

محمد ـــ مافهمت .....يعني للحين مجبورة علي؟

شيماء ـــ اعتقد كل شي واضح ..أبي حياتنا تتغير ..أنا مب سعيده ..وأنت مب سعيد ..

محمد ـــ قلت لج ..ما بعتبرج زوجة لي ..لين ألقى رضى منج ..وأحس أنج تحبيني الحب اللي أحبج إياه ..وقلت ما بجبرج ..

مسك شعرها المبلل ..كان بارد ..هز شوي وقال

ـــ جففي شعرج لاتمرضين ..

باس راسها ..وطلع عنها ..شيماء غرقت في دموعها ..أي رجل هذا اللي يقاوم غريزته ..علشان مبادئه ..اذا يحبني كل هالحب ..شلون يقدر يتحكم في تصرفاته قدامي ..هالشي مايقنعني ..وفي نفس الوقت ..محيرني ..يعني أنا ما أجذبه؟؟؟





*******************************

مشعل ـــ ليلى ..أنا آسف ..

ليلى ـــ لا تعتذر ..كلامك صحيح امية في الامية ..

مشعل ـــ يعني ما زعلتي؟؟

ليلى ـــ لا ..المفروض أزعل .بس ..كلامك صحيح ..وأنا قررت أتحجب ..

مشعل ــ صحيح؟؟

ليلى ــ أييه ..وهالقرار كنت أفكر فيه من وقت ..سألت جراح وافق بدون تردد .وقال لي أحسن .

مشعل ــ أنا فرحان لج وايد ..وهالشي لمصلحتج ..خذي ..

ليلى ــ ايش هذي؟؟

مشعل ـــ لا تستعبطين ..هذي اللوحة ..سوي فيها اللي تبينه ..أنا أقول لو تخلينها عندج ..

ليلى ـــ ليش؟؟

مشعل ـــ أنا قررت أتزوج ..عندي مبلغ محترم في البنك يمشي حالي ..

ليلى ــ وتتزوج ...................؟؟

مشعل ـــ سعاد ..أنا أحب سعاد ..من اللحظة الي شفتها فيها وهي ما فارقت خيالي ..

ليلى ــ تذكر في المطار شقلت؟؟

مشعل ـــ أذكر ..ان يمكن تحت هالنقاب شكل ثاني ..بس سبحان الله ..كأن اللي صار معاي يقول لي أن افكاري غلط ..ومبادئ كلها تافهه ..

ليلى ـــ صراحة .أنا عاجبتني وايد ..أنا في اليومين اللي راحوا تعرفت عليها ..وأشوفها نعم الزوجة لك .ولايقة لك ..عندها موهبة حلوة في كتب الخواطر ..

مشعل ـــ صحيح؟؟ يعني تشوفينها الانسانه اللي بسعد معاها ؟

ليلى ــ اعتقد ..بس اعاقتها ..

مشعل ـــ اعاقتها ؟؟ هي معوقة من ولادتها؟؟

ليلى ــ لا ..صار لها حادث من مدة قصيرة ..

مشعل ــ يعني ما في شي وراثي ..وبعدين ..فيها أشياء وايد تشفع لها ..

ليلى ـــ بس هي مو من نواخذنا ..

مشعل ـــ شلون يعني؟؟

ليلى ــ أهلها من قطر ..ومتحفظين وايد ..يمكن ما يرضون فينا لأنهم ما يزوجون الا من جماعتهم ..

مشعل ـــ لاتخرعيني ..أنا البنت عاجبتني ..وما أبيها تطير من يدي ..أرجوج شوفي رايها ..اسأليها بكره ..

ليلى ــ أنا أقول لك يمكن ..حط هالاحتمال في بالك ..

مشعل ـــ بقول لابوي ..وأنت ما شايفه شي على أخلاقها ..ولامميزاتها ..صح ؟

ليلى ــ لاء ..ما شفت البنت ممتازة ..أحسن من وفاء ..

مشعل ــ وفاء؟؟ لاتقولين ..أبوي للحين يبي يزوجني وفاء؟؟

ليلى ـــ لاتنسى بنت أخوه الوحيده ..

مشعل ــ تعتقدين أبوي بيوافق على سعاد؟؟

ليلى ـــ أنت اللي بتتزوج سعاد مب هو ..إلا إذا..

مشعل ــ إذا ايش؟؟

ليلى ــ تدخل ..وأنت تعرف أبوي .يكبر الامور شلون ..

مشعل ــ الحين خلي اللوحة عندج ..ولين بكره يصير خير ..

********************************

دخل البيت وهو مبتسم في وجهه جده ..

تميم ــ السلام عليكم .

بو سند ـــ وعليكم السلام ..أهلا بحفيدي ..شالزيارة الغريبة ؟ وين هلك؟

تميم ــ يدي أهلي سافروا البحرين .. يحضرون عرس عمتي .أنا ما أبي أسافر ..

بوسند ــ اييه ..تذكرت ..قالت لي أمي بس نسيت ..

تميم ـــ وين أمك؟؟

بوسند ـــ استح وشو أمك هذي؟ شايفني ياهل؟؟ وبعدين هذي يدة أمك ..نادها يدتي ..

تميم ــ يدي السموحة منك ..أنا كنت أمزح معاك ..وين يدتي وخالتي الجازي ..

بو سند ــ يدتك في بيت خالتك عايده ..وخالتك في غرفتها ..ما طلعت منها ..من ..روح لها ..حاول أنك ترفه عنها ..

تميم ــ وأنت يا يدي ؟؟

بو سند ــ أنا بطلع أييب عشا ..

تميم ـــ أنا بطلع لخالتي الجازي في غرفتها ..

طق الباب ..دخل ..

كانت الغرفة مظلمة ..فتح الليت وفتحت الجازي عيونها ــ بند الضو ..يعور عيوني ..

تميم ــ خالتي ..شلونج ..

الجازي ـــ تميم ؟

تميم ـــ خالتي أنت بخير ؟؟ ليش انتي جذييه؟؟

الجازي ــ تعبانة ..

تميم ـــ قومي اليوم أنا بتم معاج ..

الجازي ــ تميم خليني نايمة ..

تميم ــ خالتي ان ما قمتي ترى أطلع وأفحط في الشوارع ..

الجازي ــ بس أنت ما تسوق سيارة ..

تميم ــ أسوق بس ما عندي رخصة ..اذا تبين تتحملين المسؤولية خلج نايمة ..

الجازي صرخت فيه ـــ شفيك؟؟ شتبي مني خليني نايمة ..لاتغثني ..

تميم ــ الحين أنا أغثج؟؟ زين خلج نايمة ..

طلع من الغرفة معصب ..

الجازي فكرت شوي شلون ياها قلب تصارخ على تميم جذي ؟؟

قامت من سريرها ..ونزلت تحت ..

كان تميم جالس في الصالة يقلب في قنوات التلفزيون ..

قربت منه .ــ تميم انت زعلت مني؟؟

تميم مارد عليها ..

الجازي ـــ تميموه ..تزعل مني؟؟أنا خالتك أقرب وحدة لك ..تزعل مني؟؟

تميم طنش وتم يطالع التلفزيون ..

الجازي ــ في هالحالة ..أنا اللي بسوق ..هالمرة مو عندي رخصة ..لا ..وبعد ما أعرف أسوق وأي شي يصير لي وللي في بطني بيكون مسؤوليتك ..

ضحك تميم على خالته وطالع لها وهو مبتسم ـــ خالتي من متى ما مشطت شعرج؟؟

الجازي ــ من أمس ..ها ..طاح الحطب ..

تميم ــ خالتي أنا ما أزعل منج ..بس كنت أبيج تطلعين من الجو اللي كنت فيه ..فطلعت من الغرفة وأنا واثق امية في الامية أنج بتلحقيني ..

الجازي ــ ايه ..يعني قصيت علي ..

تميم ــ اكزاكلي ..

الجازي ـــ أنا بروح غرفتي ..

مسك يد خالته ـــ لا ..لاتروحين ..يدي راح ييب عشا من بره ..خلينا ننطره ..

الجازي ــ الحين أنت تطالع ايش في التلفزيون؟؟

تميم ـــ خالتي حسافة ما عندكم دش ..كان شفتي البنات الحلوات..

الجازي ضربت تميم على راسه ـــ بنات حلوات؟؟ ماراح تطالع إلا القناة الاولى بس ..

تميم ـــ خالتي ..أنا شبعان من التلفزيون شرايج نلعب كوتشينه؟؟

الجازي ــ ماعندي كوتشينه ..

تميم ـــ أجل شعندج؟؟

الجازي ــ لعبة؟؟ماعندي في البيت ألعاب ..بس تدري ..تذكرت , جابر كأنه نسى له شنطه هنا ..

تميم ــ أي صح ..قال أنه نسى السوني ..خالتي خلج في مكانج بروح لغرفة أمي أكيد موجودة فيها ..

الجازي ـــ تلاقيها في الكبت ..

اختفى تميم دقايق ..ورجع ..

هذي هي ..تعرفين تلعبينها ؟؟

الجازي ــ بتعلم ..

تميم ــ في دسك فايتنغ وفي دسك كورة ..

الجازي ـــ أيهم أسهل؟؟

تميم ــ الفايتنغ ..بتتعلمين بسرعه ..

الجازي ـــ ركبها ..على ما أروح المطبخ أييب لنا شغلاتت نتسلى فيها ..

تميم ـــ اوكي ناطرج ..

********************************

دخل أبو سند البيت وهو يسمع ضجة غريبة ..شاف الجازي وتميم قدام التلفزيون ..

الجازي وقفت احتراما لابوها وتميم سوى نفس الشي..

طالع الجازي لابسه ثوب أبيض قطني مزين بورد وردي وشعرها رافعته لفوق..وشكلها مبهدل ..وأول مرة يشوف الجازي شكلها مبهدل ..طالع الصالة كانت اللعبة موقفة والشيبس والكوافي والعصاير في كل مكان ..

ابو سند ــ لو أدري تميم يطلعج من حالتج ..كان يبته لج من زمان ..

تميم ـــ يدي ماتصدق شسويت يلا اطلعت من الحالة اللي هي فيها ..تلعب معانا؟؟

بوسند ـــ قتال ؟؟ جاهز..

تميم ـــ عاد يا يدي تدري أني غلبت الجازي عشرين مرة ولامرة تبي تعترف بخسارتها ..

بو سند ـــ عيل روح نزل العشا من السيارة على ما أغلب الجازي ..

تميم ـــ يدي خليني أساعدك ..

بوسند ـــ لا ..روح نزل العشا ..وأنا بغلبها لك ..

تميم ـــ يدي ..أنا واثق فيك ..لا تنغلب وتدمر سجلي في الفوز ..

الجازي ـــ اييه متشطر على مبتدئة ..بس الحين أراويك شسوي في سجلك ..

تميم ـــ خالتي هذا أبوج ..ماتبين تغلبينه علشانه مبتدئ ..

الجازي ـــ توكل ييب العشا ..

بوسند ـــ انا مو مبتدئ ..عندي خبرة من اللعب مع جابر ..

الجازي ـــ وأنا اللي استانست اني لقيت حد أغلبه .

بو سند ـــ حطي لنا مرحلة جديدة ..

وبدو يلعبون ..

دخل تميم وهو شايل العشا بيده ..

الجازي ـــ غلبني أبوي ..طلع أسرع مني ..

تميم ــ خالتي قلت لج لاتطالعين اليد وأنت تقاتلين احفظي وين أماكن الازرار ..يدي .

وهمس في أذن جده شي ..بوسند تجمدت ملامحه ..

بوسند ـــ قلطته الديوانية؟؟

تميم ـــ أي ..

الجازي ــ من؟؟

بوسند ـــ واحد ..ماتعرفينه ..

الجازي ــ اذا ما أعرفه ليش ما قلتوا اسمه قدامي ؟؟..

بوسند ـــ تميم اقضي على خالتك ..بروح الديوانية ..خلي الصبي ييب الشاي والقهوة ..

تميم ـــ أنا بجيبهم يا يبه ..

بوسند ـــ لا ماله داعي ..خلي الصبي ..تلاقيه في الغرفة اللي بره ..

الجازي ما كانت مرتاحة من هالضيف ؟؟ وليش أبوها متوتر ..

تميم ـــ خالتي الحين أجي ..

طلع بره . ورجع ..

الجازي ـــ تميم ..من الضيف ..

تميم ـــ واحد ..ماتعرفينه ..

الجازي ـــ بذمتك واحد ما اعرفه؟؟

تميم ـــ ما ادري يمكن سامعه عنه ..

الجازي ـــ من ؟؟

تميم ـــ خالتي دام يدي ما قالج أنا نا أقدرأقولج ..خلينا نلعب ..

الجازي ـــ اوكي ..

*****************************

***********************************

الجازي ـــ يبه ..من كان الضيف؟

بوسند ـــ كان واحد ..شوفي الجازي ..خليني اليوم أفكر ..وبكره بشرح لج كل شي ..

الجازي ــ بكره اليمعه ..بتروح لخواتي ..

بوسند ـــ معليش ..متى ما أروق بقولج ..

الجازي ـــ انشاءالله خير ...

بوسند ـــ الجازي ..روحي نامي ..الاسبوع أشك أنج كليتي عدل ولانمت عدل ..اذا مو علشانج ..علشان هالمساكين اللي طحتي في جبدهم ..

الجازي ــــ أنا طحت في جبدهم؟؟ يبه يعني أنا طح في جبدك ؟؟

بوسند ــ صدقيني ..من عنادج ..ومو وارثة هالعناد من حد غريب ..مني ..روحي تيسري ..خليني أنام لا أشكيج لأمي ..

ضحكت الجازي ـــ يبه ..يدتي نامت أول ما ارجعت ..

بوسند ــ أصحيها من النوم أذا ما رحتي ..

الجازي ــ تصبح على خير يبه ..

بوسند ـــ وأنت من أهل الخير ..

طلعت الجازي ..ابتسم بو سند ..الجازي ما يخيب احساسها ..لكن ..الله بيعوض عليها قريب ..قريب .. *************************************

سعاد انصدمت من كلام ليلى ..
ـــ لكني عاجز .

ليلى ـــ العجز بالتفكير .مب في الاعاقة الجسدية ...

هالجملة سمعتها سعاد في مكان لكنها ما تتذكر وين بالضبط ..

سعاد ــ أنا عاجزه في التفكير..عندي بعض الاحيان مشكله في الاستيعاب..

ليلى ــ بالعكس..ما شفت وحده في ذكائج ..لولا التأتأة البسيطة الي عندج واللي لاحظت أنها اختفت في هالايام ..

سعاد ــ الفضل لج ..اندمجت معاج ..وتغلبت عليها..لكن..عندي عجز في المشي..وعجز في التفكير..بعض الاحيان لما أتعب,,يوقف عقلي عن استيعاب أي شي..

ليلى ـــ كلنا جذييه ..مافي حد يفكر صح وهو تعبان ..وانا خلال هالاسبوع ..استمتعت وايد برفقتج ..حتى جراح غار مني ..صرت ما اتكلم معاه وايد ..

سعاد اضطربت ..الحين حست في موقف خلفان ..الحين ..حست أن كل شي غلط .. شلون مشعل الوسيم والصحيح جسميا يتزوجها ؟..هي مثل ما قال خالها وهو يمازحها ..سيارة معطوبة ..

ليلى ــ أخلي أبوي يتقدم ويخطبج من خالج؟؟ صدقيني ..أنا أحب أنج تكونين معاي ..ومشعل ..صراحة يستاهلج ..

سعاد ـــ لا ...مشعل يستاهل وحدة أفضل مني ..

ليلى ـــ سعاد ..بلييز فكري ..بسألج رأيج يوم الخميس اللي ياي ..

سعاد ـــ بيكون يوم عرسش ..شتفضين له ولا شتفضين ..

ليلى ـــ فكري ..أرجوج ..أنا موجودة لين يوم الخميس بعدين بسافر ماليزيا مع جراح شهر عسل ..أنا أعطيتج أطول مدة ممكنه تفكرين فيها ..

سعاد ـــ بفكر ,,لكن لا تتأملين وايد ...نسبة الرفض بتكون خمس وسبعين في المية بسبب الظروف والتقاليد ..

ليلى ـــ أنا عندي أمل قي الخمس وعشرين في المية الباقية .

سعاد ـــ الخمس وعشرين بتصير خمسه في المية لاسباب خاصة فيني ....

ليلى ــ أنا متفائلة جدا في الخمسة بالمية ..

سعاد ـــ عجزي قتطع من هالخمسة في المية أربع ..فالامل بيكون واحد في المية ,,

ليلى ــ ياساتر ..في بعد ضرايب ما حسبتيها؟؟

سعاد ـــ فيه .. نص هالواحد الباقي ..أخصمه لصالح التفكير لازم أفكر ..

ليلى ـــ حبيبتي ..أنا متفائلة جدا في هالنص ..وياليت ظني ما يخيب ..

سعاد ـــ بقولش يوم الاربعاء ردي ..

ليلى ــ وأنا ناطرة على أحر من الجمر ..الحين الساعة عشر لازم أرجع البيت ..

سعاد ـــ ليلى ..فرحت لش وايد لانش تحجبتي ..وهالشي اسعدني بصورة ما تتخيلينها ..

ليلى ــ صراحة ..لولاج في حياتي ..كان مافكرت في التحجب إلا لما أكبر ..لكن الحمدلله ..الله هداني على يدج ..ويد مشعل اللي.. حطاني في موقف ..كرهته ..

سعاد ــ اعذريني ان تطفلت..أي موقف؟

ليلى ــ موقف ..لاوافقت على الزواج بمشعل ..بقوله لج ..لاتستعجلين على رزقج ..

سعاد ـــ انتي من صدق متفائلة في هالخمسة من امية؟

ليلى ــ احساسي ما يخيبني ..وهي عندي مثل المية في المية ..

**********************************

شيماء كانت مب مرتاحة ..شي مخليها خايفة و مكتئبة ..محمد في غرفة صالحة ..البنات يلعبون قدامها .لكن ليش قلبها ناغزها بهالطريقة .؟؟

ـــ ماما ..تي..

طالعت راني اللي كانت شايلة صينية الشاي..

ـــ حطيها بعيد البنات يلعبون هنا ..

ـــ أوكي ماما ..

حست انها متضايقة بالمرة..ومافي سبب لضيقها ..مسكت التلفون تتصل في امها .

ـــ آلو ..ناصر امي قريبة منك؟

ناصر ــ وعليكم السلام ..

شيماء ـــ اييه ..السلام ..أمي قريبة منك؟

ناصر ــ أمي راحت لبيت خالي .

شيماء ـــ متى ترجع؟

ناصر ـــ في الليل بييبها .

شيماءــ ناصر ..ولا خلاص..

ناصر ــ قولي شتبين؟

شيماء ـــ ما ابي شي..

ناصر ـــ لازم تقولين شتبين ..

شيماء ـــ لا .بس كنت ضايقة ..قلت تمرني نسولف شوي..

ناصر ـــ وين ريلج عنج؟؟

شيماء ـــ موجود ..بس..ضايقة ..ما ادري السبب ..تعال ..

ناصر ـــ اوكي..نشوف شتعرفين تطبخين لاني ناوي اتعشى عندكم ..

شيماء ــــ حياك . بعشيك أحلى عشا ..بس تعال ..

ناصر ـــ اوكي ,,بيي ..مع السلامة ..

شيماء ــ في حفظ الله ..



وراحت المطبخ وفتحت الفريزر وطلعت يدام ....حطته في الماي يلا يحل وبعدين تسوي الكبسة اللي يحبها ناصر ..

فتحت الثلاجة وشافت شناقص ..بعدين طرشت الدريول ييب لها اللبن ..وبعض الاشياء الناقصة ..

****************************



في وسط انشغالها في الطبخ سمعت صوت ضجة في البيت ..طلعت من المطبخ وشافت ناصر داخل يلعب مع البنات ..

شيماء ــ أهلين ..حياالله ناصر ..اللي ما يزور اخته الا بدعوه على العشاء .

ناصر ـــ بديتي تمنين علي؟؟ لا تخليني أرجع من وين ماييت..

شيماء ــ وأهون عليك .؟

ناصر ــ لا ما تهونين ..خلاص سماح .. وين ريلج؟؟

شيماء كانت بتقول له في غرفة صالحة ..بس اسكتت ..

ــ بناديه ..استريح شوي..

كانت تبي تطق الباب وبعدين ذكرت ان ناصر هنا ولازم تتصرف طبيعي..شيقول عنها اذا شافها تطق لباب على زوجها في غرفتهم؟

دخلت الغرفة وكان ماسك اوراق ويقرأ..

شيماء ــ محمد ..ناصر هنا ..

حست ان قلبها منقبض..وهو يطالع لها ..لاول مرة من هذيك الليلة ..

قام من على الارض..

ـــ لاتخلين اليهال يدخلون ..شغلي ما ابي يخربونه..

هزت راسها وبدت تجمع الاوراق من على الارض..طالع لها ــ شيماء شتسوين؟؟

شيماء ــ أشيل الورق علشان اضمن ان اليهال ما يوصلون له .

محمد ــ ما طلبت منج انج تشيلينه طلبت منج انج تقفلين الغرفة علشان اليهال ما يدخلون ..

لهجته كان فيها استخفاف ..لكنها اسكتت ..طلع من الغرفة وراح وين ناصر ناطره ..معقول هذا محمد اللي وجهه لها الكلام؟؟ ليش؟ والله الليلة ما بتنام في الغرفة هذي ..اعذريني ياصالحة ..لكن محمد مصخها ..شالت اوراقه وثيابه وكل شي له في الغرفة .. بسرعه وحطتها في كيسة واطلعت الطابق الثاني ورجعت قفلت باب غرفة صالحة ..للأبد ..وخذت المفاتيح ..وسبير المفاتيح وخشتهم ..

طلعت للممر اللي بين الصالة والغرف ..وسمعت محمد يقول

ـــ يا اخي اختك دايما جذييه ..

ناصر ـــ شلون دايما جذييه؟؟

محمد ــ منعزلة ..البيت مايدخله غير اختي خلود ..حتى امي ماقد مرة شيماء اعزمتها على عشا ولاغدا ..ولاخذت لها شي من تزوجنا ..

ناصر ـــ وانت ليش ما تقول لها ؟؟

محمد ـــ انت تعرف شيماء معتزة بنفسها شلون ..لادخلت معاها بنقاش لازم تاخذ الموضوع بحساسية ..انا صراحة ماقصرت على امي وامس اخذت لها خاتم وقلت لها مني ومن شيماء وشيماء طبعا ما تدري ..

شيماء من اسمعت هالكلام عصبت ..محمد ..على أي اساس تقول هالكلام؟ اذا انت ما تتغدى في البيت أصلا ؟؟امك ما اكثر ماعزمتها وكرمتها . والخاتم ادري عنه بس ماجات مناسبة اقولك فيها اصلا انت متى تجلس معاي؟؟البيت ماتدخله الا علشان تنام وتاكل ..كأنك في فندق ..

ردت قربت تسمع سوالفهم ..

محمد ـــ الله يرحمها صالحة كانت مضيافة من الدرجة الاولى ..بحياتها ما قصرت في حق احد تذكر يا ناصر العزومات اللي حضرتها ؟؟

ناصر كان جالس وهو منحرج من اخته ..شلون ياشيماء تقصرين في حق ريلج؟ اما شيماء ماقدرت تسمع أي شي زيادة فكرت في نفسها ..محمد ..شالكلام ..مرت من قدامهم وراحت المطبخ .. محمد ارتبك ..ماحس فيها ..كانت في غرفة صالحة لايكون اسمعته ؟؟

خلصت العشا .. وحطت السفرة ..اللي كانت عامرة بكل شي ..

شيماء ـــ راني . شيلي الاكل اذا خلصوا ..

راني ـــ يس ..

ادخلت الصالة وكان ناصر ومحمد يسولفون ..تحاشت نظرات محمد ..لها ..

شيماء ـــ انا بطلع فوق ..

ناصر ـــ ماقلتي لي انج متضايقة وتبين تسولفين معاي؟ ؟

شيماء ـــ ناصر انا مصدعه شوي ..وانا متأكده ان محمد ما يقصر ..

طلعت الطابق الثاني وصكرت الباب على نفسها ..وانهارت تصيح ..

محمد ـــ تهقى انها اسمعت؟

ناصر ـــ لا ما أعتقد .هي لما اتصلت فيني قالت لي انها متضايقة ..وياليت لو اسمعتك ..تعتبر وتتسنع وتصير مرة سنعة ..

محمد ـــ بس اخاف تزعل ..انا ما اقدر على زعلها ..

ناصر ـــ الله الله.ماعرفنا لك ...كل هذي معزه؟؟

محمد ابتسم وفي قلبه يقول يارب ما اسمعت ..

دخلت الخدامة ـــ بابا عشا.

محمد ـــ تفضل يا ناصر ..

********************************

ـــ أعتقد مافي نصيب ..

ليلى ــ ليش؟؟ما وصل يوم الاربعاء للحين ..

سعاد ــ ليلى ..في حياتي شخص ثاني ..

ليلى ــ أنت مخطوبة؟؟

سعاد ــ لا ..لكني احب شخص ثاني ..

ليلى ــ لايكون ابن عمج؟

سعاد ـــ لا ..ابن الجيران ..واهله يصيرون لابوي من بعيد ..تدرين ..تقريبا ابن عمي .. جدي وجده عيال عم ..

ليلى ــ ليش ما خطبج ؟

سعاد ـــ لانه خطب وحدة ثانية ..

ليلى ــ يعني حب من طرف واحد ؟؟

سعاد ــ لا ..بالعكس ..أ..ما ادري شلون أشرح لش..

ليلى ــ قولي لي كل شي ..

سعاد والمعت الدمعه في عيونها ـــ كنت الكبيرة بين أخواني وأخواتي ..كنت أحلى وحدة وأشطر وحدة ..الدلال كله كان لي ..شي طبيعي أكون مغرورة . كنت أشوف أنه من حقي أني أكون مغرورة ..كان هو .ابن الجيران ..كنا دايما نلتقي الصبح ..أنا أروح للمدرسة ..وهو يروح للمعهد اللي يدرس فيه ..طبيعي ..كل يوم ..في يوم ..كنت في ثاني ثانوي وعمري 17 سنة ..كان آخر يوم في المدرسة ..اقترب مني وسألني ..ان كان عندي مانع انه يتقدم ويخطبني ..مسكين أكيد كان هذاك اليوم أسوأ يوم مر عليه ..

ليلى ـــ ليش؟؟ أنت شقلتي له ...

سعاد ــ اللي ما قلته لش أنه كان مقعد ...

ليلى ــ مقعد؟؟ معاق ..على كرسي ..

سعاد ــ اييه ..

ليلى ــ وشكان ردج؟

سعاد ــ قلت له لاتطالع فوق وأذا تبي تتزوج ..دور لك وحدة في نفس مستوى نظرك ..

انصدمت ليلى ـــ حرام ...هذا الكلام ..

سعاد ــ أدري ..قاسي بمعنى الكلمة ..اختفى خلفان من حياتي ..انزوى بعيد عن الناس ..وفجأة ..حن قلبي له ..ماندمت على جملتي له قبل لكن اليوم الندم بياكلني ..اشتقت اشوفه كنت كل يوم اشوفه . وأحس مثل السجين يطعن قلبي .. ومع الوقت اكتشفت اني حبيته ..والكلام اللي قلته ماكان الا غرور ..وصرت مجنونة فيه ..لكنه انجرح وانهان مني ..انا ذليته و عيرته باعاقته ..

ليلى ـــ يمكن ضميرج انبج ومحبتج هذي ماهي الا شفقة؟

سعاد ـــ لا ..كافي اني احس ان روحي انتزعت من مكانها كل ما اشوفه ..كافي اني كل يوم لما اصحى الصبح اركض للشباك ..على امل اني اشوفه ..ولما صار لي الحادث قالت لي اخته انه يا في الليل ..وتطمن علي ..رغم اني فقدت الذاكرة مؤقتا ..وما مر وقت طويل ..اعلنوا خطبته ..اعلنوا خبر وفاتي ..مب خطبته ..رقصت في الخطبة ..رغم جروحي ..وموت روحي ..ماحبيت انهزم ..وهذا تصرف منعت فيه كلام الناس وذبحت روحي فيه ..

ليلى ـــ يعني انتهى من حياتج.

سعاد ـــ لا ..ما انتهى ..شوفي ما اقدر اتزوج اخوش ..وقلبي ملك لغيره ..اليوم أنا في موقف خلفان لما طلب الزواج مني ..أخوج اللي بصحته وعافيته ...يتزوجني أنا ؟؟

ليلى ـــ لا ..لاتقولين هالكلام ...انت زينة المزايين ..

سعاد ـــ لا ..انا ناقصة ..هذا غير أن قلبي وروحي ومشاعري ملك للانسان اللي احبه ..أهديتها له ..وتركتها عنده ..ذكرى ..

ليلى ـــ يعني ما في أمل ؟؟

سعاد هزت راسه وصبت شوي من القهوة لليلى ..

ـــ مشعل انسان حساس ..راقي بفنه ..أنا ما أستحقه ..سجلي ما يسمح لي أني ألوث حياته ..شخص واحد دمرته ..وأنتهى بي الحال اني نذرت نفسي له ..مهما صار ..

ليلى ــ حسافة ..كنت ابيج تتزوجين مشعل..

سعاد ــ مشعل بيلاقي في يوم البنت اللي يحبها ومايستبدلها باي شي في هالدنيا ..

ليلى ـــ لكن خلفان تركج..مو لازم تنسينه؟

سعاد ـــ لا ..حتى لو ما تزوجت لاخر عمري ..قلبي فيه انسان واحد ما ببدله باي شي في هالدنيا ..

مرت بينهم فترة صمتت ..بعدين طلعت ليلى فستانها وراوته لسعاد اللي انجنت على تصميمه ..كان راقي جدا ..وكلاسيك وهالشي هو ذوق سعاد كلاسيك ..

*********************************

الحلقة التاسعة والثلاثون ..

***************************

ـــ شيماء افتحي الباب ..

شيماء ــ ما أبي ..

ـــ شيماء وين مفتاح غرفة صالحة ..

شيماء ــ صالحة الله يرحمها ..

محمد بنفاذ صبر .. ــ وينه ؟؟

شيماء ـــ مو موجود ..قطيته .. ..

محمد ــ شالكلام ؟؟ واغراضي؟؟ واوراق شغلي؟

شيماء ــ تلاقيها في الغرفة الثانية ..اذا ما تدل أدليك طالع يمين الباب الاول على ايسار ,,

محمد ـــ يعني انت متعمدة تخبين مفتاح الغرفة ..

شيماء ــ صالحة الله يرحمها ..وخلاص ..مب عدل تنام في غرفتها لآخر عمرك حابس نفسك بذنب أنك ظلمتها .

محمد ـــ والفرق اللي سويتيه انج خليتيني أنام في غرفة فاضية مافيها إلا سرير واحد ؟؟ على الاقل غرفة صالحة فيها ذكرى صالحة ..فيها ريحتها ..هاتي المفتاح ..

شيماء ـــ لا ..غرفة صالحة تمنعك عنا ..غرفة صالحة استأثرت فيك لنفسها ..خلتك ماتعرف شي حولك ..ماتحس فينا مثل قبل ..حرام عليك ..البيت صاير كـأنه فندق ..أنت في صوب وحنا في ناحية بعيدة عنك ..

محمد بلهجة تهديد وهو يطق الباب بقوة ـــ افتحي الباب لا أكسره .. و

شيماء استسلمت وفتحت له الباب ..جلست على السرير ..

محمد ــ انت انانية ..ومايهمج إلانفسج .

شيماء ــ أنت الاناني ..بخلت بنفسك عني وعن بناتك ..غبت عن البيت وآخرتها صرت تشكيني لأخوي ..

وماقدرت تمسك دموعها..

محمد ــ أنت سمعتي؟؟

شيماء ــ اييه سمعت .. لعلمك ..أنا أعزم عمتي هنا كل ثلاثة أيام تتغدى معانا .. وحتى عمي يي معاها ..وأكون مسوية سمك ..لانهم يحبونه وايد ..أمي أعزمها وأخواتي ..أما أخوي ناصر فكنت ما ألاقيه علشان كذا استغرب عزومتي له , أنت دايما مو موجود ..دايما عند ربعك والانايم في غرفة صالحة ..وتتغدى دايما في الشغل ولاتهتم للغدا اللي أتعب كل يوم وأسويه ..كنت بنفجر قدام ناصر .لكن لاني أحبك ماقلت شي ..بس علشان ما تتفشل ..والا الكل يشهد لي أني مراعية البيت والبنات بضمير .حرام عليك ..والله أني تعبت تعبت ..حرام عليك ارحمني ..أنا انسانة ولي مشاعر ..كلنا زعلنا على صالحة ..وأنا أكثر وحده لأني السبب في عذابها ..حرام عليك يامحمد..حرام عليك والله انك تعذبني ..

شيماء تمت تصيح ..شيماء مانتبهت انها قالت لمحمد الكلمة اللي ينتظرها من زمان ...وانتبه لها هو ..شيماء كان على بالها انه قالت هالكلمة في نفسها ..لكن قهرها وحزنها خلاها تنطقها ..دون ما تحس ..

صكر الباب محمد وطالع لها وهو مبتسم ...

ــ وأخيرا ؟؟

شيماء طالعت له ودموعها على خدها مب فاهمه شي ..

ــ وأخيرا ياشيماء اعترفتي انج تحبيني ..

جحظت عيون شيماء ..وحطت يدها على شفايفها مب مصدقة ..شلون انطقت ها ..

محمد ـــ أظن أني مابحتاج مفاتيح غرفة صالحة الله يرحمها .

شيماء ـــ مــ..اا..ليـ..؟؟؟؟؟؟؟؟؟؟

ضحك محمد وهو يشوف ارتباكها ..قلبه كان ملك لها من اللحظة اللي شافها فيها ..انسانة لها جاذبيتها ..وتقدر تطلعه من قمة غضبه لاهدأ مايكون ..أو العكس ..مسك يدينها ..ونزلت راسها مستحية منه ..رفع راسها وابتسم ..وهي قالت في قلبها فديت هالابتسامة ..وابتسمت له ..

وكانت هذي الليلة ..هي ليلة العمر بالنسبة لشيماء ومحمد ..اللي أجلوها وقت طويل ..الوقت اللي احتاجوه بالضبط علشان يعترفون بمشاعرهم لبعض ..

********************************

مر الاسبوع بسرعه..مثل العمر..غمضة عين ..سعاد احضرت عرس ليلى ..وانتبهت لنظرات مشعل .. وليلى بعد ماعرفت برد سعاد احرقت اللوحة واخذت عهد من مشعل أنه ما يرسمها مرة ثانية . وكان درس قاسي لسعاد ...الجازي ارجعت لفهد ..ارجعت وهي في قمة سعادتها وشاركتها سعادتها دلال لما عرفت باللي صار لها ..ندى للحين تعاني من التعب ونزلة البرد ..صدرها كان يذبحها لكنها تكابر ..والسعال اشتد عليها ..وهي مطنشة ..كل فكرها مع ناصر .. ورافضة تشوف دكتور وحالتها النفسية ساءت ..وصارت طريحة الفراش ..ماتتحرك منه ..أما محمد وشيماء ..عاشوا أحلى أسبوع من تزوجوا لليوم ...

دلال ــ شخبار فهد معاج ؟؟

الجازي ـــ الله يسلمج بدت صحته ترجع مثل أول ..اليوم بستأذن مبجر ..لاني خليته في البيت بروحه ..

دلال ـــ ياهل حشى مب ريال قارب عمره السبع وثلاثين ..

الجازي ـــ هذا فهد ..حبيبي وماي بيبي وماي لايف .. ومثل ماقال عبدالحليم ..افرح واملى الدنيا أماني لا أنا ولا أنت هنعشق ثاني ..

دلال ــ ايوا ..الجوز اليوم مستطربة ..انشاءالله دوم ..

الجازي ــ أنا ما أصدق أننا قربنا من الاجازة ..أحس أني مقيده في المدرسة ..

دلال ــ عاد خلصت المنهج؟

الجازي ــ تقريبا ..بقى كم درس من الفصل الاخيير ..

دلال ـــ انا بختمه اليوم ..

الجازي ـــ صج؟؟ ياحيج ..

دلال ـــ بعطيج نص حصصي ..علشان تلحقين تراجعين للبنات ..

الجازي ـــ مرسيه ..صراحة محتاجتهم ..والموجهه تبي تحضر لي درس ..

دلال ــ أنا حضرت لي مرتين هالفصل ..

الجازي ــ أنا في مصيبة .. البنات عندهم مشكلة في فصل من الفصول ..أخاف تسألهم فيه ..شكلي بدرسهم فيه بحصة من حصصج ..وحصصي الاساسية اكمل المنهج .
سهر الليالي
25-06-2004, 16:30
دلال ــ لاتوترين أعصابج ..انشاءالله يمديج انج تسوين كل شي .

الجازي ـــ ندى متى ترجع؟؟

دلال ــ ما ادري .المفروض انها تكون ارجعت هالاسبوع لكنها تأخرت ..

الجازي ــ وسعاد ..ماسمعت عنها شي من الحادث ..وأدق على تلفونها ماترد ..

دلال ـــ سعاد في الكويت ..رحلة استجمام ..اتصلت فيني ..

الجازي ـــ وشيماء ؟؟

دلال ــ شيماء آخر مرة شفتها في عزا ابوها ..هي نفسها .ماتغيرت ..

الجازي ـــ الغرفة فاضية ..تذكرين لما كنا جمعه ونسولف في كل شي ..

دلال ــ الجوز ..كنا بنات ..ماشايلين هم شي ..نهذر في فلانة وعلانة ..لكن اليوم ..أنا تزوجت وانتي تزوجتي و شيماء تزوجت ..كل وحدة صار لها حياتها ..صار لها مسؤولياتها الخاصة ..يا سبحان الله ..شوفي في سنة تغيرت ظروفنا شلون ..شوفي الزمن شلون التف فينا ..حتى ندى وسعاد ما اسلموا من هالتغيرات ..وطرت في حياتهم اشياء ماكانت على البال ولا على الخاطر ..

الجازي ــ صج ..ندى المرحة فجأة صارت مهمومة ..وسعاد الحادث غير لها حياتها ..شيماء صارت ام لثلاث بنات في اسبوع أنتي تزوجت شخص مثل مايقولون طلع من العدم ..وعندج بنت ..وأنا ..بصير ام بعد كم شهر ..فجأة حياة البنات والاغاني ماصار لها معنى ..بالأحرى ماعندنا لها وقت .والزمن دار فينا وحيرنا ..وقصتنا تنفع رواية باسم ..الزمن ..

دلال ــ لا .هي قصتنا ..لازم نسميها بشي يرمز لنا ...خليها نساء في هذا الزمن ..

الجازي ــ وانت دايما سارقة أفكاري ؟؟

دلال ـــ وأنت دومج تتناحسين معاي ؟؟ .. عاد ماشفت بيتج انتي وفهد ..

الجازي ــ بسيط ..أجرناه بثلاثة آلاف ريال ..شعبي من طابق واحد ..وأربع غرف ..ما أدري شسوي في هالاربع غرف .أنا غرفة ويالله وايد علي ..

دلال ــ والخدامة ؟؟ عندج خدامه؟؟لانج تحتاجينها ..

الجازي ـــ للحين ماوصلت ..بتوصل بعد اسبوعين ..حاليا الخدامة تيي العصرية من بيت ام فهد ..ترتب البيت ..لكن الطباخ أنا أطبخ ..لكن فهد في الاسبوع اللي راح جرب حظة ..فمنعته من انه يدخل المطبخ بعد اليوم ..فديته ..

دلال ــ مسكين يالس في البيت لاشغلة ولا شي ..ماقلتي لي متى بيشتغل ؟؟

الجازي ــ قريب ..بس يستعيد عافيته يبدأ في وظيقة مدير العلاقات العامة في وزارة من الوزارات ..هذاشغله الاصلي ..وعنده خبره واسعه في هالمجال ..بس لازم علشان صحته .. يسوي فحص دوري وياخذ كيماوي بين فترة وفترة علشان يتجنب رجوع المرض ..حبيبي ..الله يحفظه من هالشر ..

دلال ــ الله يوفقكم ..ويبعد عنكم الشر ..

الجازي ــ من الصبح وأنا أهذر عن فهد ..وانتي ماقلتي لي عن عبدالله ..شخبارج معاه ؟؟

دلال ــ مجرد ما تبدأ عطلتي بنسافر ..

الجازي ـــ وين ؟؟

دلال ـــ ما أدري ...باريس أو دبي أو سوريا ..ما حددنا .

الجازي ــ على خير انشاءالله .

مرت صفاء قدام الباب طالعت من داخل ولا سلمت ..طلعت على طول .

الجازي ــ .هذي صفاء ..شفيها شايفة عمرها تدخل كأن محد غيرها في الغرفة ..

دلال ـــ يمكن علشان عيونها خضر؟

الجازي ــ هذي ندى عيونها خضر ..ماكانت شايفه عمرها علينا .

دلال ـــ ندى ..تقارنين ندى بهاي ؟؟ندى متواضعه ..ندى ماكانت شايفة نفسها علينا ..

الجازي ــ صج والله ..هي خالتها متزوجة لبناني؟؟

دلال ــ اييه..بس ماخذ الجنسية الكندية ..

الجازي ـــ قالت لي مرة ان عيونها لجدتها اللبنانية ..أم أمها .

دلال ـــ ايه ..وقالت لي ان أخوانها بناتهم عيونهم خضر مثلها بالضبط .

الجازي ــ ياه ....والله اشتقنا لها ..

طقت الباب بنت وأعطت دفترها لدلال ..

طلعت البنت ..دلال ــ هذي البنت من اشطر الطالبات عندي في الرياضيات ..

الجازي ــ هناء علي؟؟ مب شاطره في الفيزيا ..المفروض اللي شاطر في الرياضيات يكون شاطر في الفيزيا ..

دلال ــ عاد ..يمكن تكره المادة ..

الجازي ـــ لا ..مب معقول ..ما اكثر ما تقول انها تحب حصص الفيزيا ..بس مافي درجات ولامشاركات تقنع انها شاطره في الفيزيا .

دلال ــ جربيها في سؤال ذكاء ..أنا اكتشفت ذكائها بهالطريقة ..هي مهملة ما تدرس ..لكن لما اعطيتها اهتمام خاص ..وشجعتها ..اكتشفت انها ممتازة .

الجازي ــ ببدأ معاها بهالطريقة .رغم اننا في الوقت الضايع ..بما اني بخلص المنهج معاهم في هالاسبوع ..

****************************

ندى ــ لازم أسافر ..

سمر ــ والله ما بتسافري ..صار لك أسبوعين مريضة ارحمي حالك ..ارتاحي ..

ندى ــ سمر ..تعبت من الراحة!

ضحكت سمر ـــ في حد يتعب من الراحة؟ كافي انك مابدك تروح لطبيب ..وكله عم تاخذي هالمسكنات ..

ندى ــ تعبانة نفسيا ..تعبي النفسي أقسى علي من تعب جسمي ..ما أتحمل أبقى هنا يوم زيادة ..

سمر ــ هلأ بجيب لك الخليوي تبع عبدالهادي ..وكلمي فيه أخوك عبيد وقول له ..

ندى ــ شلون ما فكرت جذييه ؟؟ بليز ..هاتيه ..

ــ آلو عبيد ..شخبارك؟

عبيد ــ أهلين ندى .أنا بخير انتي شلونج ؟.شفيه صوتج تعبان ؟؟ من طول الغيبات ياب الغنايم ليه تأخرتوا ..

ندى ـــ شوي شوي علي ..خليني آخذ نفس .

عبيد ــ تعالي ..في مفاجأة تنطرج ..

ندى قالت مترددة ــ عن ناصر ؟؟

عبيد ــ أيا الساحرة من قالج ؟؟

ندى ــ سمعت ..

عبيد ـــ وها العروس شرايها ..

ندى ـــ علشان جذييه اتصلت ..أكيد مريم بترفض .

عبيد ــ وشدخل مريم في الموضوع؟؟

ندى ــ عبيد ..مريم مب العروس ؟؟

ضحك عبيد ضحكة بطت أذن ندى ..

ـــ يالخبلة أنتي العروس !!

ندى من الصدمة ما قدرت تفهم ــ لا ..مريم خطبها ناصر .

عبيد ــ لا ..خطبج أنتي ..وحنا كلنا موافقين وأولنا يدتي فطيم ..ناصر يستاهلج ..يلا عجلي ..

ندى ماقدرت تتكلم ..حست بخجل شديد من اخوها ..

ــــ مافهمت متى وشلون؟

عبيد ـــ خطبج من ثلاث أسابيع ..وحنا قلنا ما بنرد عليك إلا اذا يات ندى ..لكن يدتي تدخلت وقالت ناصر لندى وندى لناصر ..

بدت الامور تتوضح في مخ ندى ..يعني كان يلعب عليها ؟؟ كان خاطبها وياي يحرق لها أعصابها ؟؟

ندى ــ محد قال لي ..

عبيد ــ زين شالكلام اللي قلتيه عن مريم وناصر ..

ندى ــ عرفت ..عرفت أن عبدالعزيز ملج على فاطمة فتوقعت ناصر يملج على مريم ..

عبيد ــ لا ..ما عليج ..مريم لي أنا وحدي ..والكل يعرف هالشي .

ندى ــ ليش خطبتها .؟

عبيد ـــ نهيي(بلغة الهنود يعني لا ) ...بس الكل يعرف هاالشي ..

ندى ــ شخبار سعد وخالد ويوسف والله مشتاقة لكم وايد ..

عبيد ــ ناطرينج ترجعين يالعروس ..وأخييرا بشوفج عروس ..أكيد بتفصلين دشداشة للعرس ..

ضحك عبيد وندى ماتت في غيظها ــ اييه وانت بتفصل الفستان .مع السلامة ..سلم عليهم كلهم .(بخبث )أولهم مريم .

عبيد ـــ تتطنزين؟؟؟ وين أشوفها مريم؟؟

ندى ــ في الأحلام ..هاهاها ..

وسعلت ندى بقوة خوفت عبيد ..

عبيد ــ انت مريضة؟؟

ندى ــ مافيني شي ..بس غبار ..

عبيد ــ غبار ؟؟متأكدة؟

ندى ــ أكيد ..أنا ما أكذب عليك ..طولت على الجوال يلا باي .

كانت ندى تتهرب من من عبيد ....

سمر ــ ها قلتي لعبيد ؟؟

ندى تذكرت ألسالفة ..وصرخت صرخة عوده ..

سمر ــ what happened ?

ندى ـــ ناصر ..

سمر ــ ناصر؟؟..........كملي ناصر شفيه؟؟

ندى ــ ناصر خطبني قبل لايجي كندا وأهلي وافقوا عليه ..

انصدمت سمر ..وفتحت حلجها متفاجأة ..

ــ خطــ..بك؟

ندى ــ أييه ..كان يلعب بأعصابي..

سمر ـــ ومريم؟

ندى ــ كان يحاول يخليني أغار منها ..

وصرخوا مع بعض مذهولات ومستغربات ..

منى ـــ لي تصرخون ؟ صوتكن واصل تو ماي رووم ..

سمر ــ ناصر خطب ندى ..

منى ــ حقيقي؟؟ ناصر خطبك؟

ندى هزت براسها باي وهي مب مصدقة ..فجأة نست مرضها ونست وجعها ..ليش ياناصر عذبتني ؟؟

ندى ـــ لازم أسافر ..

سمر ــ لكنك لهلأ ما شفيت ..

ندى ــ مافيني شي ..

قامت من السرير ..واسندت عمرها لين اوصلت لشنطتها وطلعت شنطة صغيرة ..

ندى ــ أعطيه عبدالهادي يحجز لنا بكره ..

سمر ــ لا ..ياندى مابتسافرين هالأسبوع ..

ندى ــ لاتخلوني أروح المطار وأحجز نفسي ...

سمر ــ لا ..لاتروحي ..اوكي ..بس بعد بكره ..

الي يشوف حيوية ندى ..مايصدق وجهها الشاحب والهالات السود حول عيونها ..

*********************************

شيماءــ محمد ..لا ..

محمد يمسكها من يدينها ويجرها للصالة ..

شيماء ــ اوكي ..

محمد ــ شيوم ..يلا ..تغدي..

شيماء ـــ قلت لك مسوية ريجيم ..

محمد ــ ليش ؟؟ انت شفيج علشان تسوين ريجيم ..

شيماء ــ محمد . ..لازم؟

محمد ــ اييه ..شوفي دندونة وسارة ماكلوا من سويتي هالريجيم ..

شيماء ـــ محمد ..اليوم انا بديت ريجيمي..مامداني ..

محمد ــ والبنات ماكلو من الصبح .كلي .

طالعت له شيماء ..ــ اوكي ..

وبدت تعطي البنات أكلهم ..

شيماء ــ شوف من يا ... غنديزر ..

وكانت مها يايه مسرعه وطاحت على السفره قرب شيماء ..

ــ الحلوة من بدت تمشي ..مالاحقة على شي ..كله تراكض .

شيماء ــ هذي المها ..

دانة ــ مها ما تاكل مها بس توسخ .

سارة ــ انت خايسه .انت توسخين..

دانة ــ أنا قلت مها ..ماقلت سارة .

ضحكت شيماء ومحمد على البنات اللي بدوا في معركه شرسه بالصياح والاكل ..مها خافت فركضت لحضن شيماء ..وباستها ..

ضحكت شيماء ــ أول مرة تبوسني ..بالعادة أنا كله ابوسها ولاتعبرني..

محمد ــ مها ..بوسي بابا ..

شيماءــ شفيك غرت مني؟

محمد ــ ماغرت ..أبي بنتي تبوسني ..مها تعالي بابا ..

مها طنشت أبوها وإلزقت في حضن شيماء ..محمد ضحك عليها ..والتفت لسارة ودانة .

ـــ تعالوا بوسوا بابا .

وقامت دانة وسارة تسابقوا وكل وحدة باست ابوها على خده .

محمد ــ حبيباتي ..الله يخليكم لي ..

رجعت دانة وسارة ياكلون على السفرة ..ومحمد وهو ياكل ..تفاجأ بحد يبوسه ..التفت كانت مها ..

شالها وباسها بقوة وهي تضحك ..وتقول ــ أما ..أما ..

شيماء ـ حياتي .

محمد ــ عاد من حياتج حددي ..

شيماء ــ أثنينكم أغلى من حياتي ..

محمد ــ الله شفتي ماما شتقول ...ماما تتغزل في بابا ..

مها ـــ أما ..

شيماء ــ هاتها ..تبي تخرب البنت علينا ..

دانة ــ ابي عصير .

شيماء ــ لا ..بعد الغدا ..كلوا الحين ..

دانة ــ حار ..أبي عصير .

شيماء ـ راني راااااااااني ..هاتي اعصير من الثلاجة ..

شيماء ــ محمد ..شرايك أرجع شغلي ؟؟

محمد ــ ليش ؟ قاصرج شي؟

شيماء ــ لا ..بس ..قلت البنات أقدر أخليهم عند جدتهم ..وأنا صراحة ..أحب أني أكون ضامنه شي ..للمستقبل ..

محمد ــ أنا ما منعتج ..شغلج انتي حره فيه ..مع أني أفضل أنج تكونين في البيت .

شيماء ـــ أبي رايك ..

محمد ــ كيفج .لكن المدرسة وجع راس و طلاب وتلاميذ وحصص..

شيماء ــ أنا مابشتغل هالسنة ولا السنة اللي جايه ..بشتغل السنة الي بعدها البنات يكونون اكبروا ..

محمد ــ على خير انشاء الله ..

******************************

ملل ملل ملل ..من تزوجت ليلى ورجعت سعاد لوحدتها ..ملل فظيع ..خالها يي في الليل يتعشى وينام ..وهي ماغير مقابلة هالتلفزيون وملانه ..

دخل خالها الصالة .

غازي ــ شرايش نطلع نتمشى ؟

سعاد ــ ياريت يا خالي والله الملل بيذبحني ..

غازي ــ البسي عباتش والحقيني انا في السيارة ..

سعاد ــ بس ياخالي عادتك تيي في الليل ..اليوم ياي مبجر..

غازي ـــ حرام اطلع واخذ اجازة؟

سعاد ــ لا مب حرام ..انطرني دقيقة ..

غازي ـــ اول شي في جمعية في المنطقة هذي ..بنمرها لان عندي شغل بسيط ماياخذ خمس دقايق .

استندت ليد خالها اللي ساعدها تيلس على كرسي من الكراسي المصفوفة ..

غازي ـــ خمس دقايق ..مابتأخر ..

..سرحت بخيالها ..تفكر في كل شي ..وتطالع الناس اللي رايحه ويايه ..ولمحت شخص ..عرفته ..

بكل جرأة جلس على الكرسي اللي مقابلها ..ولا اهتم لارتباكها ورفضها ..

مشعل ــ سعاد ..

سعاد انصدمت انه يعرف اسمها ..واللي صدمها اكثر أنه تعرف عليها رغم نقابها ..

مشعل كأنه حس بذهولها . ــ عرفتج من عيونج ..اللي ما بنساهم طول عمري ..(وفي قلبه اللي رسمتهم بيديني )

سعاد وقف دقات قلبها ..من الخوف ..

مشعل ــ أنا شاريج ..أبي أخطبج من خالج ..

سعاد ما تكلمت ..

مشعل ــ سعاد أنا أحبج ..وصورتج ماتفارق خيالي ..والله اني احلم فيج ..وأنا راضي باعاقتج ..

سعاد وتحاشت انها تطل في عيونه ..

ـــ أنت شتعرف عن الحب ؟؟ على أي أساس حبيتني؟؟ تعرفني؟؟ تعرف صفاتي ؟؟

وتمت تتلفت خايفة خالها يي ..

مشعل ــ أنا من شفتج قلبي نطق قال انت حلم حياتي ..واحس اني اعرف كل شي عنج ..

سعاد ــ انت ما تعرفني ..ماتعرف شخصيتي ماتعرف صفاتي ...ماتعرف عيوبي ..

مشعل ــ بعرفها بعدين مب مهم ..

سعاد ــ لا مهم .. لانها الاشياء اللي لاتزوجتني بتعيش معاها لآخر عمرك ..المظهر والجمال مب لازم ..لاني بكبر وبيذبل كل شي ..أهم شي أنك تحبني لنفسي ..وأنا ما أعرفك ..وما أقدر أحبك ..لأني ما أعرفك ..ما أعرف أخلاقك ..وأنت الشي نفسه ..أنا أتكلم من تجربة صارت معاي ..وأقولك أن في حياتي شخص ..لاتيي وتقولي احبج .وانت ماشفتني الا مرة وحده ...لان هالاسلوب الوقح مايعجبني ..وأنا لولا معزتي لليلى أختك ..كان ناديت على السكيورتي بسرعه ..وقلت انك تتحرش فيني ..

مشعل ـــ لكن يا سعاد ..

سعاد ــ لو سمحت ..أنا انسانه أحافظ على سمعتي وثقة أهلي فيني ..لو سمحت..لاتناديني ولا تكلمني لان مالك حق وياريت تنسى اسمي ..

مشعل قام من مكانه بعد ما حس أن مافي أمل انها تسمعه ..قام وهو مكتئب كلامها ازعجه ..مع انه صحيح امية في المية .لكن شلون يتزوج وحده في شخص في حياتها ..

طالعت سعاد مشعل وهو ينسحب ..وطالعت الناحية الثانية ناطره خالها يي ..ماكانت بترد على مشعل ..لكنها ماتقدر تهرب منه لانه بطيئة ..كان لازم توقفه عند حده ..لكنها للحظة حست أن كلامها كان مب مفهوم ..مشعل انسان حساس ..وكلامها كان غريب ..طبيعي مشعل يحب الاشياء الجميلة لانه فنان بطبعه ..لكن . ماتحس جهته باي شعور . يمكن في يوم من الايام يتطور لحب ..لانه طوال سنوات انفطمت على حب خلفان اللي تعرفه مثل ما تعرف نفسها ..واللي حبها رغم كل عيوبها ..



*************************************

رن تلفون دلال كان مكتوب عليه (حماده )

ترددت ترد عليه ..لكنها ردت ــ آلو ..

احمد ــ الو أهلين دلال ..كم قلت بكره يحن ألقاه يزيد في جفاه .

دلال ـــ أحمد ..أهلين ..

أحمد بلهجة الصعايده ــ النفوس راضية عليا النهار دا؟؟

دلال ـــ يعني ..

أحمد ـ واذا قلت لج أن عندي لج مفاجأة؟؟

دلال ــ it depends..على نوع المفاجأة .

أحمد ــ واذا قلت لج ..ان أخوج فيصل بيسافر الدوحة اليوم خالي من الشوائب ..

افرحت دلال ــ صج حماده؟؟ صج ؟؟

أحمد ــ مادام قلتي لي حماده ..يعني ..رضيتي عني ..

دلال ـ إحمد الله ان واسطتك فيصل ..هو بقربك؟؟ خليني أكلمه ..

أحمد ــالحمدالله .. لا ..هو في الشقة أنا في الشارع ..برجع معاه في نفس الطيارة .تعالي ..شلون الغالية ؟ مشتاق لها موت .

دلال ــ أمك ما اشتقت لها هالكثر .

أحمد ــ مشتاق لامي ..بس في قلبي .قولي اخبارها .وشخبارج مع ريلج؟؟

دلال ــ الحمدالله . كلنا بخير ...اصطلح حالنا ..

أحمد ــ يعني تراضيتوا ؟؟

دلال ــ الحمدالله ..

أحمد ــ والثمن ..

دلال ــ رحلة سفر ..

أحمد ــ والله انكم يالحريم أكبر مستفيدين من أزواجكم ..

دلال ــ انا احترم حرية الراي والراي الآخر ..وهالكلام بيوصل الغالية ..بنشوف الحرية شلون بتخليها تتصرف ..

احمد ــ إياني وإياج ..أنا الحين بوقف تاكسي ..يلا ..خلي سعد ينطرنا في المطار .

دلال ــ الساعة كم توصــ...

لكن أحمد صكر التلفون بسرعه ...

عبدالله ــ من دق عليج..

دلال ــ احمد ,,يقولي انه بيرجع مع فيصل من السفر ..

عبدالله ــ حمدالله على سلامتهم ..( وكان وجهه شحب لونه )..أنا بروح لواحد من ربعي ..

وطلع بعد ما بدل ثيابه ...حست دلال انه منحرج ..أكيد يعرف شي عن فيصل ..لكن بالنسبة لها الماضي خلاص ..انتهى لازم انها ماتذكر عبدالله ..

*******************************

الكل اجتمع حول أحمد وفيصل اللي ارجعوا من السفر ..بتاكسي ..

أحمد ــ أنا أراوي دلال ..قلت لها خلي سعد ينتظرنا في المطار ..

ابراهيم ــ دلال الحين وين وانت وين ..

دخلت دلال من الباب ..

ـــ الغلط عليك أخوي ..كان لازم ما تقفل جوالك ..قبل لاتعطيني موعد رحلتكم ومتى توصل ..

أحمد ــ يعني أنا ماقلت لج ؟؟

وسلمت عليه في هاللحظة ..

دلال ـ صكيت التلفون في ويهي قبل لاأسألك ..فيصل ,,حمدالله على السلامة ..

وسلمت عليه وخذها في حضنه ..

(الكل استغرب ما عدا احمد اللي كان يعرف هو وحمده )

بو أحمد ــ شفيج كأن فيصل أول مرة يسافر ..

دلال وهي تمسح دمعه ــ أي يبه ..بالنسبة لي اول مرة من زواجي ..

بو أحمد ــ وين ريلج؟؟

دلال ــ وصلني سعد .

أحمد ــ أقول لها خلي سعد يوصلنا تروح هي وتركب معاه ..

سعد ــ أخواني الأعزاء من قص عليكم وقال لكم أنا دريول هنا ؟؟

أحمد ــ السموحة أخوي ..بس أختك ...

دلال ــ حماده ..

أحمد ــ قلت لج لاتناديني حماده ..ماني في مصر ..

دلال ــ لاتخليني أوصلها للرأي الآخر ..

عض أحمد على شفايفه ..وسكت ..محد فهم شقصدها ..

وكان الكل مجتمع ..ابراهيم وزوجته وابنهم الصغير ..سعد ويوسف وفيصل ودلال واحمد وحمده وساره وابوهم ..وأمهم اللي شافت جمعتهم وقالت ..

(( الله لايحرمكم من بعض ،انشاءالله جمعتكم على خير دايما .قولوا آميين ..))

الكل =آميين ...

وتموا كلهم في الصالة يستعرضون ذكريات الفريج لما كانوا صغار ..والبيت كان يضج بصوتهم .وتعشوا ...وماكانوا يبون يقومون فتمت سهرتهم للساعة وحده في الليل ...

* ***************************

صكرت آخر دفتر ..وقامت وهي حاطة يدها على ظهرها ..كان فهد نام ..مثل الملاك ..

الجازي ــ حبيبي ..حبيبي .أنت نايم؟

طبعا الجازي كانت تغلس عليه ..

ـــ حبيبي ..حبيبي ..حبيبي ..

صحى فهد من النوم وعيونه ناعسه ــ ها ..شفيه ..

الجازي ــ أسألك حبيبي ..أنت نايم ؟؟

طالع لها فهد ورافع حواجبه مندهش ..لف راسه وكان يبي ينام ..بعدين استوعب اللي صار ..قام ..

ــ شقلتي يالجازي ؟

الجازي ـــ أسألك أنت نايم ...

ــ لا ..أنا مب نايم ..

ضحكت الجازي وغطته ــارجع نام حبيبي ..

طبعا بكره ما بيتذكر اللي صار كالعادة ..حطت راسها على كتفه ونامت ..مثل كل ليلة ..وهي في قمة سعاتها ..

*****************************



ندى ــ سمر ..مرسييه ..كانت أفضل أيام العمر..كلها مغامرات ...وأشياء جديدة ..يارب تتوفقين انتي والمعمي على قلبه ...

سمر ــــ اش..لايسمعوك ..انتي حتى ماتقدري تسندي نفسك ..خلي عبدالهادي يوصلك للطيارة ..

ندى ــ ( وهي تكابر ) مافيني شي ...مثل الغزال ..

سلمت على منى ونهلة وخالتها زينب وصافحت عبدالهادي ..

وخطت تدفع شنطها هي وأمها اللي قالت

ــ هاتي يا بنتي .أنا أدفعها ..

ندى ــ لا يمه ...أنا استند عليها وأدفعها ..

سمر مارضت تتحرك إلا لما تتأكد أنهم اركبوا الطيارة .

بعد خمس دقايق بالضبط ..انتبهت سمر لكركبة في المطار ..تجاهلت مناداة عبدالهادي لها واركضت ..ولما اقتربت ..كانت ندى طايحه ..اغلبتها دموعها ..وكان قلبها حاس .

سمر ـــ ندى ..ندى ..

ندى ماترد ..وأم ندى مذهولة ..

ـ ندى بنتي شفيج؟؟ شفيج ؟؟

لكن ندى ماردت عليهم ....

*********************************

الحلقة الأربعون ...............والأخيرة ...

*************************



طالع الساعة ..صار لهم أربع ساعات في المستشفى ..والدكتور للحين ما طلع لهم ..عبدالهادي ــ أنا بروح أشوف الدكتور .

سمر ــ بروح معاك .

عبدالهادي ــ ماله داعي ..

سمر ــ مابقدر ..لازم أروح معاك ..

طلعوا من غرفة الانتظار ..وراحوا لوين الدكتور ..كان توه طالع من الغرفة ..ودخل غرفته ..فاستأذنوا ودخلوا علشان يسألونه عن حالة ندى .

Pneumonia)) ..

Why you didn’t bring her before? ..we couldn’t do anything for her .. I am sorry ..she was yong She was very weak..she couldn’t survive unfortunately ))

((ذات الرئة ..لم لم تحضروها من قبل؟..لم نستطع فعل شي لها , آنا آسف ..كانت صغيرة كانت ضعيفة جدا..ولم تستطيع ان تنجو ))

أول مانطق الدكتور الكلمة لسمر وعبدالهادي ..انتابتهم موجة من الذهول ..

طلعت سمر . ودموعها على خدها ..وهي تصيح بقوة...

ام ندى ــ ها ..شلون ندى ..شفيها بنتي عسى زكام خفيف ..

سمر ما قدرت تتكلم ..طالعت خالتها اللي في غرفة الانتظار .اللي قلبها على نار ..ناطره تبي تعرف أخبار عن بنتها ..الوحيده ......

ام ندى ــ عبدالهادي ..أرجوك يمه ..

منى ــ سمر ...شو صار احكي كيفها ندى ..

عبدالهادي ــ.. Pneumonia

منى ــ what?

عبدالهادي ـــ خالتي ..

ام ندى ــ شالكلمة اللي قلتوها ..وليش منى اخترعت جذييه ..شفيها ندى؟؟

زينب اسمعت الكلمة انصدمت هي الثانية ..

ـــ أختي ..

عبدالهادي ــ خالتي ..ندى كان عندها التهاب رئوي حاد..والدكتور ..ماقدر يسوي لها شي ...

أم ندى ــ شتقول؟؟؟؟؟؟؟؟...زين وينها بنتي ..

عبدالهادي ــ ...............................................

سمر كانت غارقة في دموعها ...ومنى وزينب ناطرين رد عبدالهادي ..

زينب ـــ تكلم ..وين ندى ..

عبدالهادي طالع امه وقال ــ she's gone ….

سمر صرخت بدموعها ــ خالتي ..ندى ..ماتت..........................



ام ندى كأن روحها انقبضت صرخت صرخة المفجوع

ندى .......... ماتت ......................ندى

****************************

اهتزت يد سعد وهو يسمع عبدالهادي يتكلم ..وجهه اصفر وعيونه اجحظت .. ــ أنت شتقول ؟؟؟؟؟؟؟ لا ..ما أصدق ..ما أصدق ..لايكون هذي مزحة من مزحاتها السخيفة ..

عبيد انتبه هو ويوسف وناصر على صراخ سعد ..صكر سعد التلفون ..واستند على الطاولة ..مسك بطرف غترته يمسح الدمعه اللي انزلت من عيونه ..

عبيد ـــ شفيك؟؟ عسى ما شر ..

سعد تماسك ..ووقف على طوله ..

ــ هذا كان عبدالهادي ..

عبيد انتبه لدموع سعد اللي ماقدر يوقفها ..

وقف ..هو وناصر ويوسف ..

ـــ تكلم ..عسى أمي مافيها شي ..

سعد ــ أمك ؟؟..أمك الحين الله يعلم بحالها ..

سعد كان محتاج وقت يستوعب اللي انقال له ..فطول الخبر شوي ..

عبيد ــ تكلم ..شصاير ..وليش دموعك ؟؟

سعد ــ ....................... ندى ..ندى اختك ..

ناصر التفت له ..

يوسف ـــ شفيها أختك ندى ؟؟

سعد ــ خلوا ايمانكم بالله قوي ..

يوسف ــ تكلم انطق ..شفيها اختك؟

سعد ــ ماتت..

صرخ عبيد ــ انت شتقووول؟؟ شلون ؟؟

سعد ــ ماتت من التهاب رئوي حاد ...

ناصر من سمع الخبر كأن حد صب عليه سطل ماي بارد ..ارتجف ..وماقدر يوقف على حيله خانته ريوله ..وطاح ..

أما يوسف وجهه صار أحمر ..وطاح هو الثاني ..عبيد ماصدق ..التفت ليوسف وسعد التفت لناصر .....

*******************************



حل سكون غريب على البيت ..من ارجعت امهم ...وهم محتارين ..امهم ما تطلع من غرفتها ابد ..وغرفة ندى ..الغرفة الوحيدة اللي محد قدر يفتح بابها ..كان موتها أقسى عليهم من أي شي ثاني ..كانت الوحيدة والمحبوبة ..سعد يطالع عبيد اللي كان سرحان ..خالد في غرفته ماقدر يصدق اللي صار ..مر أسبوع وهم على هالحال ..يوسف مسكين ..ياته نوبة قلبية ..رغم أن عمره صغير ..لكن الله ستر ..فاطمة انهيار عصبي شديد ..ومريم صارت تكلم نفسها مب مصدقه اللي صار ..أما ناصر ..تذكر سعد لما قال لناصر الخبر ..ماتوقعه يهتز بهالطريقه ..طاح من طوله ..وبدى يرجف ..ومامسك دموعه ..مثله مثلهم كلهم ..وكان يمسك بقوة بيد سعد ..يبي يوقف لكنه ماقدر ..فطاح سعد معاه ..وهلت دموعهم ..مثل اليهال الصغار ..أيام العزا ..كانت أسوأ أيام مرت عليهم ..كانت لها معزة بين أخوانها ..وعمامها ..ندى ماتت ..محد يقدر يصدق ..ومحد يبي يصدق ..سعد طالع عبيد اللي دمعته هلت غصبن عليه ..الظاهر كان يفكر مثله ...حط يده على كتفه ..ماقدر يمسك دموعه ..

ــ أدري يا اخوي ..أدري ..

عبيد ــ ما ..ما ..

سعد ــ ولا انا ..ماني مصدق انها ما بتنزل من فوق في هاللحظة ..ما أقدر أصدق ..

عبيد ـــ بروح غرفتي ..ولا ..بطلع بره ..ماأقدر أحس أني بختنق ..

ناصر كان في غرفته لليوم الرابع ..ماطلع منها ..وقافل الباب على نفسه ..كان في حالة ..ما ينحسد عليها ..دمووعه غلبته ..وهو يتذكر آخر مرة شافها فيها ..والجملة اللي علقت في راسه وتتردد ...أنت الوحيد اللي في قلبي ..طيف ندى ساكن في جفونه ..كلما غمض عيونه برز له ...في اللحظة اللي تأكد أنها له ..راحت ..وأكدت له أنها ماكانت له في يوم من الأيام ..

الخبر كان قاسي على دلال والجازي ..اللي احزنوا وايد على ندى ..والبسوا الاسود لمدة ثلاثة أيام رغم أن عبدالله رفض وفهد رفض ..لكن اقتنعوا في الأخيير ..

شيماء لما درت ..البست الاسود لمدة يوم واحد لان محمد مارضى ..وسعاد . اغرقت في الدموع ..وحست أنها فقدت أنسانة غالية ..ساعدتها في أزماتها دايما ..وماقدرت ترد لها الجميل ...اللي ظل دين في رقبتها ..

غابت ندى ..ولها عند الكل مواقف لاتنسى ..غابت ..وهي الوحيدة اللي كانت ربطة الوصل بينهم ..ماتت ..وحيدة ..في بلد غريب ..ماتت وسببت الحزن لكل من عرفها ...

**********************************

ودارت عجلة الزمن ..الي محد يعرف على ايش بترسي ..و

شهر ثاني مر..والجازي بطنها كبر ..ودلال ..اكتشفت انها حامل ..وعبدالله فرح لها الشي وشالها على كفوف الراحة...

شيماء حملت ..والبيت كله كان فرحان بهالحمل .. لكن محمد علق انه ماهتم اذا ياته بنت رابعه ..المهم الام تقوم بالسلامة .

واحتفلوا بخطوبة خلود لناصر ...

وسعاد اغرقت في السعادة ...واليوم هو خلاصها لانها بترجع الدوحة أخييرا ..اشترت للكل هدايا حست انها مشتاقة للكل ..لين رن التلفون ..وكانت الهنوف البداية سلام وشخبارش وشعلومش ..بعدين فاجأت سعاد .

الهنوف ــ سعاد .خلفان أخوي كنسل خطبته بأمل ..

سعاد افرحت في قلبها وابتسمت وكانت خانقة الفرحة ــ ليش حرام أمل حلوة و..

الهنوف ــ سعود ..مو علي ..الصراحة أمل ما كانت سعيدة ..ووصل كلام لامي انها رافضة خلفان ..انها ماتبي تبتلي فيه على حد قولها ..

سعاد ــ تخسي مابقى إلا هي تتكلم عن خلفان جذييه ..صراحة خلفان هو المسكين اللي كان بييتلي فيها ..

الهنوف ـــ خليها تولي..المهم ..أناقلت لخلفان انج بتردين اليوم ..تدرين شقال؟؟

سعاد ــ شقال؟؟..(كانت تبي تتظاهر انها مب مهتمة لكنها ماقدرت )قولي ..

الهنوف ــ قال انا قلت لامي اني بخطب بنت جيراننا ..قالت لي على خير ..وقال لي قولي لها مشكورة على الهدية ..كانت أغلى هدية على قلبه ..

استحت سعاد ..لايكون قال للهنوف عن الهدية ..

الهنوف ــ سعاد ..وين اختفيت ؟؟ ..سعاد ..

سعاد ــ ها ؟؟

الهنوف ــ ها ؟ لا ..انت في عالم ثاني اللي ماخذ عقلش يتهنى به ..الحين قولي لي ..شكانت الهدية ؟؟

سعاد ــ ليش ماقالش خلفان؟

الهنوف ــ لا ..مارضى يقولي ..

سعاد ــ وأنت متوقعه اذا هو مارضى يقول لش أقولش أنا ؟؟

الهنوف ــ سعاد .. قولي لي شعورش الحين ..

سعاد ــ انا ماصدقت اللي صار ..ولاقادر قلبي انه يفرح ..

مثل اللي بينكوي بنار ..مع انه يعرف انه دوا الجرح .

لاتسأليني عن الافكار .. و لاتحطين فوق الجرح ملح ..

الهنوف ــ ليش ؟ ليش ؟؟..هذا مب حلمكم؟؟ انتي وخلفان ..انتوا مب تحبون بعض ؟؟ لازم تفرحين انه خلاص .

سعاد ــ هنوف ..أنا مب متأكدة أن خلفان يحبني ..أخاف أنه يكرهني ..الحب اللي في قلبه انقلب كرهه ..

هاللحظة ..حست بربكة عند الهنوف ..مرت ثواني ..

سعاد ــ الهنوف ..انت مشغولة ؟؟

ـــ سعاد ..

سالت دمعه من عيون سعاد لما سمعت صوته .لايكون سمعها .طالعت الباب خالها ما يا ...

ـــ لبيه ..

خلفان ــ سعاد ..كل هذي المشاعر خنقتيها في الدفاتر ..

سعاد ـــ ..........

خلفان ـــ لاتتوقعين أني كرهتج في لحظة من اللحظات ..أنا مستحيل أكرهج ..

سعاد ــ لكن ..

خلفان ـــ الدفاتر كأنها نستني كل اللي صار ..دموعج اللي خليتها على مخدتي ..كانت كافيه اني انسى كل شي ..

انحرجت سعاد ..فكمل خلفان وهو يحس يحرجها ..

ــ اليوم لارجعت من السفر ..بروح أطلبج من أبوج ..سعاد كلمة وحده وبصكر التلفون ..أنا أحبج ..

سعاد ــ خلفان ..لاتصكر ..أنا أعزك وايد ..أنا أحبك ..

وصكرت التلفون وهي تتخيل ملامح خلفان شلون ..و كلمته احبج شلون تتردد في راسها مثل الصدى ..ولقت نفسها تردد اللي قي بالها من فرح سعادة ..



((فرحة اليوم تسوى عندي كل الأيام..

اليوم القلب بيرجع لصاحبه مع كل الأحلام ..

اليوم .أنا عروس الدوحة برفع كل الاعلام ..

وأعلن وصولي بقلب غارق بالشوق والغرام . ..

اليوم ..أنا برجع ومعاي كل القصايد والهيام ..

اليوم أخيرا بترجع لروحي روح المحبة والسلام ..))



**************************

طالع الطريق الطويل قدامه ..وزود السرعه ..اووصلت اميه واربعين .. كأنه يستعجل الوقت ..الوقت اللي مر عليه أبطأ ما يكون .. بالنسبة له ماعاد للحياة طعم ..بالنسبة له ندى كانت هي الحياة ..شلون ماتت ؟؟بهالسرعه ؟؟والايام شلون مرت بهالبطء؟؟ مب عادتها ..ندى طول عمرج تفاجأيني ..طول عمري وانا منتظر هاللحظة ..بأي حق ..تحرميني منها وتروحين ....انت كنت الندى اللي يرويني ..أنا ..شجر الصحرا الظميان ...

وحط الشريط . في المسجل ..وشغله على اغنية وحيده ..تكرر نفسها ...ويغني الجسمي ...



والله مايسوى ..أعيش الدنيا دونك ..

لا ولا تسوى حياتي بهالوجود ..دامك أنت اللي رحلت وكيف بصبر ..على البعاد وكيف ...بنثر هالورود ..

ماوعدت انك تقاسمني المحبة ..وتبقى لي حب ولدروبي دليل ..بس حسافة الموت كان أقرب وأرحم ..حسبي الله وحده ونعم الوكيل ..

روح أنا راضي بغيابك يا حياتي ..هذي قسمة لي وهذا لي نصيب ..

كنت شمعه تضوي وتشرق حياتي ..انطفيت ورحت في وقت المغيب ....







انتهت .
اهداء :

إلى أغلى الغاليين
..

دلال بنت الخالة العزيزة ..وإلى أختي الوحيدة .فاطمة ..وإلى إيمان ومريم وشيوخ وأميرة ...أحبكم وايد ..

كلمتي ....

لم اتعمق في التفاصيل ..لكي لاتمتد بنا الصفحات إلى ما لانهاية ويصبح مسلسلا مكسيكيا طويلا........

القصة عن خمسة نساء..خمسة تجمعهم غرفة واحدة في المدرسة..وتفصل بينهم العديد من الكيلومترات خارج المدرسة.... بالرغم من انهم مدرسات ...لكنهم في الاصل ..نساء..لكل منهم معاناتها الخاصة ,,التي تكتمها بين جدران منزلها ..

دلال : العصبية المعطية ..,,

الجازي : كانت المحبوبة ..القنوعه ..

ندى : المتواضعه ..المرحة .

سعاد : المنعزلة..المغرورة

شيماء : الهادئة ..الحنونة ..



وانتهت قصتي ...وابتدأت قصتهن ..