ابداع ما شاء الله اعجز عن الوصف الرواية روعة كاتبتنا مبدعة و متألقة ورائعة رحم الله والدينك .

أبدعتي أبدعتي مررررررررررررا

ربي يسعدك ويرضى عنك

والله يرحم والدك ويجبر قلبك

وباااااانتظار الاحداث الجاية بحماس
والحماس الف للرواية الثانية😍😍😍😍

صباح الخير ..اخباركم ..شكر من قلبي لكل من ردت تحت البارتات اللي طافت ..ولعيونكم بنزل لكم بارت موقت لين اكمل الباقي واللي يجهز على طول نزلته …وعندي سوال مهم من اكثر ثنائي اعجبكم.. مهره وفهد ..ولا..ملاك وصقر .. رايكم مهم عندي


تفصلو البارت
~
~
~
~


-/البارت المئه /-

رواية ريح المطر (للكاتبة شغف
ادعو لوالدي برحمة والمغفرة..

لبيه ياريح المطر والسما غيم..
ولبيه ياصوت المطر بعد غيبه ..

الجدة صيته جالسه بوسط الصاله وترحب / حي الله ام طلال نورتي دارنا
ام طلال ترد بموده ومحبه /الله يبقيك وينور حياتك
جت مهره معها القهوه وهي تبتسم / زارتنا البركه
ام طلال ترد بذات الابتسامه / الله يبارك فيك
الجدة صيته بهتمام / وشلون عيالك عساهم بخير ؟
ام طلال تاخذ الفنجال من يد مهره اللي مادته / بخير وبعافيه يالله لك الحمد
ام ابراهيم جت تمشي وترحب من غير نفس/يا مرحبا حي الله من جانا
ام طلال تقوم تسلم عليها/ الله يبقيك شلونك وشلون من يعز عليك؟
ام ابراهيم تجلس/ طيبه طاب حالك
ام طلال تجلس هي بعد وتدخل بالموضوع اللي جت عشانه / والله قبل اجي سالت عنك وعن مريم كانكم هنيه بجي واذا انتم بيت ابراهيم انتظر لين ترجعون

ام ابراهيم باستغراب / ماجيت الا اليوم امريني بس؟
ام طلال تهتف بثبات/ انا جايه يا ام عقاب لك ولام ابراهيم ولام عبدالله بطلب نسبكم ونخطب شوق لولدي طلال على سنة الله ورسوله
الجدة صيته ابتسمت بفرحه / ونعم فيكم و بنسبكم والله لونها بشوري ماترده لاكن الشور شورها وشور اهلها
ام ابراهيم ترد بخباثتها المعتاده/ ونعم بطلال بس والله مادري عنها يا وخيتك هي لها نصيبن معلق وتنتظره عاد الله يكتب الخيرة

مهره وجدتها طالعو فاطمه بصدمه من وقاحتها
وام طلال سالت بحسن نيه / يعني هي مخطوبه ؟
الجدة صيته ترد بحزم مختلط بغضب / لا ماهي مخطوبه ابد يا ام طلال خلي الرجال يكلمون الرجال واذا لكم نصيب تاخذونه
ام ابراهيم بنيه كايده / والله مادري كلمو الشيخ فهد كان عطاكم ترا الله عطاكم
ام طلال ترد بموده / الله يكبر قدركم خلاص اعلمه هو وخواله يروحون لابو عقاب وابو ابراهيم
الجدة صيته تهتف برضا وهي من داخل تغلي من فاطمه وحركاتها / اي ابد ارسليهم والله يحيهم
ام طلال توقف / يالله اجل تمسو على خير
الجدة صيته وقفت معها/ تو الناس تعشي معنا
ام طلال تبتسم / تعشا معكم العافيه مع السلامه

من طلعت والجدة صيته لفت لفاطمه اللي تبادل نظرات التحدي هي ومهره / انتي وش انتي قاطعت ارزاق الله يقطع راسك
فاطمه وقفت / افا ياعمه تدعين علي ؟
الجدة صيته سالت بحده / تبين توقفين نصيب شوق هو بيجيها احسن من طلال؟
فاطمه ردت بذات الحده/ نصيبها كلنا عارفينه وانتي من حطيتيه براسها لين كبرت عليه
الجدة صيته تسكتها بزفرة / اص وقص نصيبها ماهو باللي انتي تبين وكلن اخذ نصيبه

شوق دخلت بعد ماسمعت حديثهم وفجرتها بوجيهم /وانا اقول لك من الحين يا جدة غير فهد ماراح اخذ لو جلست عمري كله من غير عرس
مهره وقفت وراسها بدا ينبض بشده من الغبن / فهد ما خذاك وهو عزابي تبينه ياخذك الحين وانا عنده؟
شوق تطالع فيها بنظره حاده / ليش وانتي منو عشان توفقين بوجيهنا؟
مهره ردت بثقه مدروسه / مرته وعمود بيته واوقف بوجهك وجهه بعد
شوق طارت عيونها / انتي تحدين الشيخ والله لياخذني وراح تشوفين ؟
مهره بحلف واثق / والله ماراح ياخذك لو حفرتي الارض بيديك ورجليك
فاطمه بغضب و انفعال / ياخذها غصبن عليك هي عطيته قبل لا يعرفك وبتجي على راسك رضيتي ولا انرضيتي
الجدة صيته رفعت عصاها بشده / ان جت على راسها حرام حرم لتجي حتى انتي على راسك المره

فاطمه انتفضت بشده / تبين تزوجين محمد بعد هالعمر ياعمه ؟
الجدة صيته تلوي ذراعها بالكلام / اي ازوجه و لا تنسين انك ماجبتي له الا ولد وبنت وقفتي عن الضنا وانا اللي وقفته عن الحريم عشانك ولا تخليني ارجعه لطير يلي
شوق بعتاب / تبين تحرميني من حلم عمري يا جدة توقفين مع بنت اخوك ضدي يا حفيدتك ؟
الجدة صيته تزفر عليها/ لونك مكان بنت اخوي مارضيت عليك برديه كيف تبيني ارضا على وصيتي ؟

فاطمه راحت لجناحها بغيظ وشوق عطت مهره نظره ولحقت ورا جدتها ..

الجدة صيته لفت لمهره اللي امتلت عيونها بدموع / لا يهمونك والله لاغير تاخذ طلال غصبن عليها وعلى جدتها هالضايعه
مهره ترد وهي نادمه ومتوتره/ يا جدة انا خايفه من فهد لو يعرف بالكلام اللي قلته والله ياخذها عناد
الجدة صيته تنهدت بضيقه / وانتي ليش تحدين
و تهددين وانتي عارفه طبع رجلك ويباست راسه
مهره بزفرة / غصبن علي ولعن النار بصدري
الحدة صيته تهديها / تطمني ماراح يصدقهن فهد خابرن علومهن
__________________________

ملاك متمدده على السرير وعيونها بالسقف وهي تمسح بكف يدها على بطنها وتمتم بذكارها
رفعت كفها و باستها مع نزول دمعه حاره على خدها وهي تشعر بحزن غير مفهوم من عرفت ان صقر بغيب بدبي شهرين صح ان حتى وهو هنيه بعيد عن عينها بس كانت تشعر بقربه لقلبها من قرب البيت لبيتهم
تعترف لنفسها انها اشتاقت لحضنه و لنفاسه ولهمسه الدافى بس مازالت مجروحه منه كثير من سالفة الحمل وجرحها زاد من هجومه عليها قدام الجميع

قطبت جبينها من ذكرى هجومه و سالفة الخطبه جمال كيف خطبها وهو مايعرفها بس ماهو غريب عليها سمعت فيه بس وين ومتى اسم (جمال )
مر عليها وهي ذكيه ولا يخفاها شي بس ماعطت الموضوع اهميه كثير ؟..اعتدلت جالسه وهي تشهق بعنف. (هو هو الدكتور اللي دخل علي اذكر الممرضه قالت دكتور جمال يومه لو عرف صقر والله ينهى حياتي يارب استر يارب )

قامت تدور بالجناح بتوتر ورعب (وش اسوي لو درا وين اروح لازم اتخبى عنه هذا مجرم ولا يرحم معقوله يذبحني لا مستحيل هو يتنفس حبي اصلاً ياخبله يحبك بس لا عصب انعما يذبحك بعدين يستوعب فعلته )

خذت جوالها بتردد فتحت حظر المكالمات عن اسم صقر ودقت عليه رن رنه رنتين وسكرت قبل يرد وهي ترمي الجوال على السرير بقهر من تهورها (مجنونه مجنونه كيف ادق عليه في عاقل يفضح نفسه؟)

شوي وسمعت جوالها يرن رفعته شافته صقر رجع الاتصال عليها مره ومرتين وهي طنشته وقلبها يدق بقوه ورعب شوي وصلتها رساله منه /ملاك يرحم طالب ردي علي فيك شي انا طالع من الدوام وجايك بس طمنيني لادخل بقرب شاحنه بسببك …

ملاك عضت شفايفها (هاه ارتحتي جاك طاير ماعنده وقت )؟
طبعت رسال ورسلتها /صقر كنت بقولك ابعد عن حياتي خلني اعيش بسلام ..
رد عليها / وانا وش سويت غير اني حبيتك ملاك انا لا ارتحت وانا عزابي ولا ارتحت وانا متزوج ذوقتيني انواع الحرمان عذبتيني وانتي صغيرة وانتي كبيرة..

ملاك تنهدت بوجه من كلامه وهي تطبع رساله
ثانيه / انا مالي دخل بعذابك انت اللي معذب حالك بحب وحده ما كانت تبيك صقر اللي يربطني فيك الان روح بينا فقط واتمنى لا عاد تضايقني باقي حياتي ..

جاها رده /تراك مانتي بحل باللي تسوينه فيني بس تدرين وشو اتمنى باقي عمري تبين تعرفين؟؟
طبعت رساله باستغراب/وش؟؟
صقر رد عليها مفجرً/ اتمنى ان اعيش باقي عمري بنزاع حبك من قلبي عشان ارتاح ومنيتي الثانيه اني
ما حرمت اميره على نفسي عشان اعيش مع انسانه تومن بالحب ..

ملاك من قرت كلامه انفجرت باكيه وهي تحط له بلوك وترمي الجوال بقهر (حقيرررر)


عند صقر كان صافط بجنب الطريق من يمين وينتظر منها رد على اخر رساله بس تاخرت وعجز لا يصبر رفع الجوال وعاد الاتصال زفر بغضب وهو يضرب السكان بكف يده(بنت الذينا رجعت البلوك ليش تدق من البدايه تبي تلعب بمشاعري على كيفها )

صقر عاد قرات الرسايل بينهم ندم شديد الندم على اخر رساله طبعها يعرف ان ملاك نار كبرى يروح يزيد اشتعالها هز راسه باسا وهو يحرك سيارته متجه البيت يبي ينام عشان رحلة الصباح لدبي …
_____________________________________

بديوان….
فهد وعمانه وقفو بتوديع طلال وخواله ثنين اللي جايين يخطبون له ومحمد طلب منهم يعطونه مهله يشاور البنت ويرد لهم خبر من طلعو لف لفهد
بتسال/ شرايك يا ابو عقاب بطلال ؟
فهد رد بثبات / والله والنعم فيه رجال حافظ بيته
و امه وخوانه وهو اللي يكد عليهم واللي يحفظ اهله اعرف انه بيحفظ بنتنا
ابو نواف بتايد لكلامه / انشهد بالله انه رجال ونعم فيه
محمد تنهد براحه / الله يهديها وترضى فيه
فهد رفع حاجبه / وليش ماترضى فيه هو بيجيها احسن من ولد منصور ؟
محمد هز راسه بنفي / لا بالله الزمن هذا قليل اللي فيهم الخير
ابو نواف بتسال/ الا عبدالله متى بتخطب له؟
محمد مسح لحيته البيضا / لاخلصنا من موضوع ولد منصور بروح انا وانت وابو عقاب لبيت ابو خليل ونخطب بنتهم
فهد قطب جبينه/ بنت ابو خليل؟
محمد بتسال / ليه شفيهم يا بوك ناس مايعيبهم شي الا فقرهم
فهد هز راسه بنفي / لالا الفقر مايعيب احد والنعم فيه بس استغربت
___________________________

الساعه 11 ليلاً ..

فهد من دخل البيت الا فاطمه بالحوش واضح تنتظر من مده عرف ان عندها شي لذالك وقف بنتظارها وهو يشوفها تقترب له / يمسيك بالخير يا بو عقاب
فهد رد بهدو/ مساء النور امري يا ام ابراهيم تبين شي؟
فاطمه بحزن متصنع / يا ابو عقاب جت اليوم ام طلال تخطب شوق لولدها وانا قلت والنعم فيه بس هي عيت وقامت تبكي تقول انا يتمه و بتغصبوني على العرس

فهد قطب جبينه /ماحد غاصبها الراي الاول والاخير لها بس تعطينا سبب مقنع ليش ماتبيه ولد منصور مافيه شين يعيبه ؟
فاطمه بمكر نسائي/ مادري عنها تقول ماهو نصيبي انا بنتظر نصيبي المعلق لاخر العمر
فهد نفخ عليها بحده / فاطمه اكسري الهرج

فاطمه بكت بتمثيل / والله ماهو بيدي هذا كلامها واللي زادها تحدي مهره تقول اللي تبينه ما تطولينه وانا اللي اوقف بوجهك وجهه
فهد عطاها نظره / انتي وش تقولين ؟
فاطمه بحلف /والله هذا سمع اذني واذا مانتي مصدقني حلف ام عقاب ونشدها

فهد شطفها وهو يتجهه لداخل وهي تمشي وراه من دخل الصاله الا شوق بوجهه و تنتخي فيه / تكفى يا ولد عمي لا يغصبوني على العرس انا بوجهك
فهد انتفض من الحميه / ماحدن يغصبك وراسي يشهم الهوا كان ماتبينه من بكرا ارده
شوق تمسح دموعها /الله لايخليني منك
جاهم صوت الجدة صيته الصارم / والله لتاخذه غصبن عليها

فهد لف لجدته بصدمه الا مهره واقفه بجوارها بنص الصاله ورد بصرامه اعمق / كلمتي ماثنيها يا ام عقاب كان ماتبيه والله ما تاخذه
مهره عطته نظره قارصه وهو عطاها نظرت توعد
والجدة صيته ردت بجزع / تبي توقف نصيبها اللي كبرها اعرسو وعيلو وهي جالسه عندنا
شوق بكت بتمثيل / ليش ماتبوني عندكم متكاثرين من وجودي ؟
فهد رد عليها بحزم من غير لا يناظرها / شوق البيت بيتكم ماحد متاكثر منكم وطلال ماحدن غاصبك عليه لاهو ولا غيرة

مهره ماقدرت تحمل كلامه اكثر لانها راح تنفجر عليه قدامهم وتعرفه ماراح يسكت يغسل شراعها لذالك تجاوزته وطلعت جناحها

فهد لمحها بنص عين وهي طالعه تنهد بضيقه وهو ينهى النقاش / معك يومين استخيري وردي علينا ولا تفكرين ان احد راح يغصبك على حياة ماتبينها
الجدة صيته تهتف له بزفرة / الحقني للجناح
فهد طالع بجدته اللي راحت جناحها وهو يسمع صوت فاطمه / الله ينصرك مثل نصرك ليتيمه

فهد مارد عليها وراح ورا جدته دخل الجناح وهي تامره بحزم / سكر الباب وراك
فهد سكر الباب وتقدم لها / امري ؟
الجدة صيته تطالعه بحده / تبي تكسر حلفي ياولد عقاب بعد هالعمر ؟
فهد رد بذات الحده / حلفك على راسي بس العرس ماهو غصيبه ماتبيه بكيفها
الجدة صيته بزفرة / واذا هي ماتعرف مصلحت نفسها نمشي ورا شورها ماجايها بعد هالعمر احسن من طلال لو تطير وتوقع
فهد ينهى النقاش/ هذي حياتها وهي حره فيها ولا حدن له حق يغصبها
الجدة صيته تحط عينه بعينه مباشر/ وليش ماتبيها تاخذه لا تكون حاطها براسك؟؟

فهد صر على اسنانه / لو ابيها اخذتها ولا شاورت احد ولا تحسبيني جاهل حركات بنت اخوك وحنها على راسك
الجدة صيته بتحكم مدروس / بنت اخوي شاريتك وماهي مرخصتك لغيرها انت اللي لا ترخص فيها واترك شوق وجدتها عنك
فهد يحاول يتماسك / شوق لو للي خاطر فيها اخذتها من مبطي وانتي اكثر وحده عارفه و كنتي تحنين على راسي ليل ونهار
الجدة صيته ترفع كتوفها/ يمكن حلت بعينك الحين ؟
فهد بحزم / لو حلت بعيني اخذتها وغير هالكلام ماعندي

الجدة صيته فجرتها/ ماراح اسمح لك تحط على راس مهره مره يا فهد
فهد بتهديد صارم / لا تحطين راسك انتي ومهره براسي لا تخلوني اخذها عنادن فيكم
الجدة صيته انتفضت / انت صاحي تبي تكسر الضعيفه عشان يباست راسك ؟
فهد بذات الصرامه / الضعيفه على قولتك بتوقف بوجه فهد يالي حتى الانشناب ماتجرو يقفون بوجهه

الجدة صيته بتوجس / فاطمه قايله لك شي؟
فهد رفع حاجبه بذات التوجس / يعني كلامها صدق مهره قالت كذا ؟
الجدة صيته بتوتر / يامك من حر مابجوفها تقوله بس كلام عندهن تبي تذللهن
فهد يتجه الباب / تصبحين ع خير
الجدة صيته جلست على الاريكه بهم/ لاحول ولاقوة الا بالله



فهد دخل جناحه وكانت القنبلة تنتظره مهره غاضبه لابعد درجه / معك خيارين يا فهد يا انا يا هي ؟
فهد تقدم لها بثبات / اجل فهد اللي بتوقفين بوجهه
يا بنت ناصر ؟
مهره من شدت الغصب مامسكت لسانها / اي والله ماتخاذها لو طرت وقعت انت وهي

فهد طارت عيونه بصدمه ودمه فار بالغضب وهو يتقدم ويسحبها مع شعرها / وانا ولد عقاب تحداني مره ؟!!
مهره انفجرت بالبكا / اهى اهى
فهد عطاها كف باطن كفه ورجع كف ثاني بظهر
كفه وهو يردف / عنادن فيك باخذها واذا فيك خير وانتي بنت ناصر على سن ورمح اوقفي بوجهي ؟
مهره شدت جيبه بقوه وهي منهاره بالبكا/ والله ماتاخذها تفهم ؟؟
فهد دفها بقسوه وهو يصرخ بشده / والله لاكسر لك ظهرك فيها والعيال اللي ماجبتيهم هي اللي بتجيبهم

مهره شافته كان ناوي يطلع جنت جنونها تقدمت و وقفت بوجهه /فهد قسم بمن احل القسم كان سويتها لاهج من الديرة
فهد ابعدها عن وجهه بتحدى / سويها وهجي كان فيك خير
مهره ركضت وقفت قدامه وظهرها بظهر الباب وهي تنفس بشده ورعب / ماتروح لها لو تنثر دمي
فهد اقترب وعيونه تقدح شرار / ابعدي عن الباب لا دفك واكسر عظامك

مهره متاكده انه لو راح وطلب شوق مستحيل يتراجع فهد كلمته وحده وهي مستحيل ترضى يصير هالشي لو دفنها تحت التراب / ماراح ابعد ماراح ابعد
فهد صرخ فيها بصوت عالي / اقول لك ابعدي
مهره بكت بحرقه / فهد لا تقهرني واليتيم فلا تقهر
فهد هزته الكلمه لكنه رد بتحكم حازم / ابعدي يا مهره
مهره زاد بكاها / طالبتك ياولد عقاب تراني بشاربك لا تروح لا تروح

فهد سكر عيونه ورفع راسه لسمها سحب له نفس عميق وزفر بشدة وهو يفتح عيونه ويناظر بعيونها
صد عنها و راجع لغرفة التبديل وهي طاحت بالارض عند الباب ولمت ركبها وبكت بشدة ..

عند فهد من دخل غرفة التبديل ضرب كفه بالحيط بقوه وهو يتنفس بسرعه استعاذ بالله من الشيطان وبدل ملابسه ورجع للغرفة النوم شافها على وضعها جالسه عند الباب وضامه نفسها وتبكي بشهقات متواصله كان بوده يضمها له و يهدئها بس ثبت مكانه بمكابره و بتعد لسرير وهو مشتعل بالغبن منها ومن نفسه

هي بعد ماتاكدت انه دخل فراشه تطمنت وراحت تغسل وجها وتبدل ببجامة نوم حرير رجعت و دخلت الفراش متمدده وراه و عيونها تجول على ظهره الصلب وكتوفه العريضه وهي تتخيل شوق تشاركها فيه وتنام بحضنه ويغرقها بوساته ..جنت جنون مهره من مجرد خيال كيف بالواقع لو حصل راح تفقد عقلها اقتربت له لين لزقت فيه من ورا دخلت يدها من بين ذراعه وصدره وضمته لها بقوه وهي دافنه راسها
بظهره

فهد سمعها تمددت وراه وهو ماسك نفسه بقوه عنها كلامها لاحد الان يغلي براسه هو اللي كلن يهابه ويمشي على شوره تجي هي تحداه و تهدده ماكنت ولا راح تكون …قطع حبل افكارها ذبذبات جسدها الناعم يلتصق فيه وحضنها الدافي يشده بقوه وكانها تقول لا تخليني انتفض من داخل بشدة ولاكنه ماوضح لها
و لا تحرك بقى ثابت متصلب مكانه

مهره اقتربت زيادة وكفوف يدها على صدره و حطت شفايفها عند اذنه بهمس موجع / فهد تكفى لا تذبح القلب اللي حبك
فهد صمت ولا رد عليها /…
مهره بذات الهمس الموجوع / اذا تبي فرقاي سوها والله راح اطق واموت من القهر
فهد سحب له نفس عميق وهو صامت/…
مهره رجف صوتها / فهد ضمني بحضنك
فهد رد من بين اسنانه / مهره خليني انام احسن لك وللي
مهره باصرار / بس ضمني محتاجه حضنك
فهد طنشها ولا رد ولا فعل/…
مهره تعيد وتزيد برجا / فهد تكفى بس ضمني بس

فهد ماهانت عليه رجائا المتواصل لف لها وناظر بعيونها الغارقه بدموع لثواني تنهد وهو يسحبها بسرعه ويحضنها وهي انفجرت بالبكا القوي على صدره وهو زاد حضنها بقوا مسح على ظهرها ونزل باس خدها بوسات متواصله رفعت عينها له تناظر بعيونه الناعسه وهو بادلها النظرات هتفت له بصوت ذايب / انت للي و ماتنازل عنك الا اذا دفنتني تحت التراب ذاك الوقت تراك بحل خذ بدال الوحده اربعه
فهد عطها نظره قويه وهو صامت /…

مهره رفعت نفسه شوي عشان توصله و دمجت شفايفها بشفايفه بجرائه مثيرة غيبت فهد عن وعييه واستجاب لها ابعدت منه وهو رجع وسحبها بقوه وهالمره هو من غيبها عن وعيها بطريقته الخبيثه ..
____________________________
يوم جديد ..

نهيل تهز ملاك النايمه مع كتفها /يامك قومي صار الضحى وانتي بعدك راقده ؟
ملاك تفتح عينها بكسل/ يوم خليني تعبانه
نهيل انتفضت برعب/ شفيك ياروح امك وش متعبك
ملاك اعتدلت جالسه / ارهاق بس
نهيل تجلس جوارها / وجهك كله منفوخ انتي باكيه ؟
ملاك ماقدرت تماسك نزلت دموعها وهي ترتمي بحضن امها / اهى اهى
نهيل شدت عليها بحنو وهي مصدومه/ تكلمي شفيك يعورك شي ؟
ملاك فجرتها من اعماق قلبها / يومه سافر وخلاني بيغيب شهرين بعيد عني

نهيل طارت عيونها بدهشه / من تقصدين صقر ؟
ملاك بالم خافت / اي صقر مافي غيرة
نهيل بوجع / يامك انتي صاحيه ولا فيك شي فراقاه خير
ملاك تنهدت بذات الالم / يومه تعبت تعبت
نهيل بغرابه / مدامك تبينه ليش انحشتي عنه؟
ملاك بتعب / كنت ابي السلامه
نهيل تنهدت / تبين اكلمه لك ؟
ملاك انتفضت برعب / لالا وشو تكلمينه ؟'
نهيل بحيرة / اجل وش تبين بضبط ترا مايهون علي اشوف دموعك واسكت
ملاك صمتت /…
نهيل تمسح ع شعرها/ قولي للي اذا انتي خاطرك برجعه له انا اسعادك

ملاك ردت بثقه / مستحيل ارجع له
نهيل بحيره اعمق/ ليش مستحيل وانتي توك تبكين عليه ؟
ملاك وقفت بحرج / يومه كل اللي صار هذا هرمونات حمل
نهيل بامومه/ ارجعي له وتعوذي من الشيطان
ملاك بصرار وعناد / والله مارجع له لو بذل كل جهده

نهيل تطالع فيها وهي طالعه هتفت لنفسها
بخفوت (والله وعرف كيف يجيب راسك والد مطلق )
____________________________

ابو صالح يتقهوا ويسال ام صالح بتوجس/ هو صقر سلم عليك قبل يسافر ؟
ام صالح ترد بقلب ذايب / اي ودعني ومشى بيبطي هالمره الله يحفظه
ابو صالح تنهد بضيقه/ قلت له بروح اكلم بنت عمك يمكن الله يهديها وتروح معك وعيا
ام صالح بعتاب / ليش تشاوره كان رحت لها يمكن تصلح الامور بينهم
ابو صالح بياس / هو ماكلمنا ولا قال رجعوها وحالف اني ماروح لبنت عمه للبيت يقول لو جلست العمر كله

ام صالح بحزن عميق / انا حاسه ان ورا هالولد شي ليش مايبي عيال ؟
ابو صالح بذات الاحساس/ والله حتى انا ونشدته بس هو يقول عشانها مادري هو صادق ولالا؟؟
ام صالح بوجع / الدنيا اوجعته كثير والله لونه عايش عزابي اهون من حاله كذا
ابو صالح رد بحزم / من طبوعه وعناده الله يصرفهن عنه

دخل فالح سلم وهو يسال/هدى وينها ؟
ام صالح ترد / بالحمام تجي الحين
فالح يطالع ولدها ويبتسم / يا ماشاءالله عن ولديهم احسن من شيفة عمر
ابو صالح رد بتقصد /عقبالك بعد هالبنات يلفاهن ولد
فالح هز راسه /الله كريم
جت هدى وهي تجلس / فالح وين عزيزة مامرتنا اليوم ؟
فالح تنهد / راحت لاهلها تقول بتغير جو هي وبناتها
هدى تغمز له / وش سالفة الطقوم والورد ؟
فالح طارت عيونه / وانتي وش دراك ؟
هدى انفجرت بضحك / اشوف حالاتها واتس مزعلها يومك جايب لها هالدنيا؟
فالح ضحكً/ انتي مايفوتك شي

ام صالح بتدخل /ليش هو بينكم شي ؟
فالح رد بهدو / مشكله بين كل للازواج والحين حليناها
هدى تضحك بنغزى / اكيد بتنحل على كل هالهدايا
فالح يزفر عليها /هب يا وجهك قولي ماشاءالله
هدى زادت ضحك /تف ماشاءالله

ابو صالح يقوم / اتركو السوالف اللي مالها داعي و قومو توضو لصلاة
فالح ابتسم / بنتك حسوده كفانا الله شرها
ابو صالح ابتسم / خذ فضلتها
هدى طارت عيونها / افا يابو صالح وانت بعد تتهمني ؟
ابو صالح يتجه الباب / شوفة عيني يا بوك
فالح قام وهو يضحك / تستاهلين
ام صالح بندا /فالح لاكلمك صقر انصحه يامك يهدي من افكاره وسواسه
فالح بحنيه /صقر ماعليه انتي اللي لا تشيلين همه الرجال تمر عليهم مشاكل اكبر من كذا ويتجاوزونها
ام صالح لمعت عيونها / اخوك في شين موجعه ولاحدن حاس فيه لاكن الله العام مافيه
_____________________________

الجدة صيته تسال مهره السرحانه بغموض /يامك ماتبين تقولين وش صار البارح بينك وبين رجلك ؟
مهره طالعتها بارهاق نفسي / بالقوه قدرت امسكه كان ناوي عليها
الجدة صيته تنهدت بهم / ماعليه لا تشيلين هم وانتي الحين ما ينخاف عليك تعرفين له
مهره بياس/ يا جدة والله فهد عنيد وشديد ماقدر عليه خايفه من تصرفاته
الجدة صيته تهز راسها بذات الاياس /لاحول ولاقوة الا بالله

مهره بروح مهمومه /شوق هالمره هي وجدتها ناويت عليه وياضنتي يصير اللي يبنه
الجدة صيته بصرامه /يهبن وانا ام عقاب والله ياشوق لتاخذ طلال غصبن عليها
مهره شوشت /كيف وش بتسوين؟
الجدة صيته ردت بثقه/ عندي الشي اللي يكسرهن و يلوي ذراعهن اهدد فاطمه بعرس محمد وهي بتذل وتاكل تبن هي وبنتها ويزوجنها غصبن عليهن

مهره بتسال / وانتي صدق بتزوجين عمي محمد ؟
الجدة صيته تهز راسها بنفي / لا يامك انا اذا ماجمعت مافرق بس بذللهن عشانك
مهره ابتسمت /يا عل عيني ماتبكيك

جاهم صوت فهد وهو ينادي بثقل / احم احم ياولد
الجدة صيته /اقلط يا فهد
فهد دخل وعيونه تنتقل بين الثنتين انحنى وحب راس جدته / صباحك خير
الجدة صيته ترد بمومه / صباحك نور اجلس تقهوا
جلس فهد بجوارها ومهره قامت تصب له فنجال وتحط قدامه التمر / اجدع

فهد اخذ له فذة تمره وكل منها بهدو وهو يحاول مايناظر بمهره يشعر من داخله بضيقة من نفسه كيف بادلها ليلة البارح الاحضان و كيف هي قدرت تجذبه لها ودخلته بجو ثاني بعز غصبه مستغله نشوته فيها هاذي صار ينخاف منها عندها جرائه زايده…

الجدة صيته / شلون الشغل ؟
فهد رد بركاده وهو يرشف من فنجاله / زين يالله لك الحمد
الجدة صيته تطالع بشاشة التلفزيون / الحمدلله
فهد بنبرة متحكمه / ترا بنت سعيد بتجي عندكم هنيه بالبيت لين اتفاهم انا مع خوانها
الجدة صيته بغرابه / جهير تجي عندنا وتبي تبطي ولا كيف؟
فهد رد بذات التحكم/ مادري على حسب المهم جهزو لها جناح خاص فيها

مهره كانت تسمع وهي مصدومه بتجي عندهم بالبيت ولها جناح خاص وش هالوقاحه اللي عندها تنتخي برجال غريب ضد خوانها يمكن تكون جايه وراسمه على شي معين جهير ماتهرول عبث ومهره تعرف بعجابها لفهد وتمنيها له لاكن مارح تسمح لا اي مخلوق كان ياخد نصيبها منها تخلص من شوق
تطلع لها جهير ؟…

مهره وقفت بغيظ / وهي ماعندها اهل يضفونها عشان انت تدخل و تضفها؟؟
فهد واصل حده منها رفع راسه و طالعها بنظره حارقه / انتي ماهو شغلك تفهمين؟
مهره ناظرت بجدتها / عاجبك بيجيب مره غريبه عندنا بالبيت ويبي اسكت ماتدخل ؟
الجدة صيته كانت على وشك الرد لولا ان فهد وقف بغضب / بنت لا توصليني اقصاي تراي متحملك فوق طاقتي
مهره بذات الغضب / وانا بعد متحمله اكثر منك بس لا هنيه وبس
فهد كان بيتقدم لها بشراره بس جدته وقفت
و مسكت ضراعه/ استعذ بالله من الشيطان ياولد

فهد يحاول يبعد جدته اللي شادته بقوه وهو ياشر على مهره بتهديد صارم / قسم بالله ان تدخلتي بشين مايخصك مره ثانيه مايصير لك خير
مهره لمعت عيونها بدموع / جهير ماتجي بيتي وغير هالكلام ماعندي
فهد يصرخ فيها وجدته مازالت تشده / اص ولا كلمه هذا ماهو بيتك وانتي ضيفه عليه حالك من حالها وحال غيرها
مهره صعقت من كلمته وهي تاشر على نفسها / انا ضيفه ؟

فهد يرد بصرامه عميقه / اسمعيني عدل بنت سعيد بوجهي وان سمعت انك ضايقتيها قطعت راسك
الجدة صيته بتدخل / اهدا خلاص بنت سعيد حياها الله اللي بوجهك بوجهنا
مهره اتجهت لباب / كيفك يا فهد لو تبي تجيب القبيله كامله بكيفك

فهد يطالعها مقفاها وهي طالعه ويهتف لجدته بعصبيه/ هاذي انجنت رسمي على بالها بتمشي كلامها عندي
الجدة صيته شدت كفه / يا فهد مهره متعلقه فيك وكل خوفها تجي وحده وتاخذك منها
فهد بحده / وانا بزر عشان تاخذني منها ؟
الجدة صيته تهديه بجديه / هي اللي عقلها عقل بزر وفاقده الحنان والقته عندك
فهد رفع حاجبه بعدم اقتناع / حنان عندي انا ياجدة انتي تمزحين ؟

الجدة صيته بجديه/ لاوالله اني صادقه لونك تضربها بس من داخل تحن عليها لين تعودت عليك.
فهد ينهى النقاش اللي عجز يدخل راسه / المهم انا بطلع عندي شغل جهزو لضيفتنا جناح
الجدة صيته بتسال/ متى بتجي؟
فهد يتجه الباب/ اليله يروح يجيبها راجو

____________________________

بعد العصر ….

نهيل تسال ملاك بتردد/ انتي متاكده بتروحين لهدى ؟!
ملاك تربط شعرها / اي يومه ماجيتها من ولدت وهاذي فرصتي مدام صقر سافر
نهيل بتردد اعمق/ وش دراك انه سافر يمكن اجل سفرته؟
ملاك بتاكيد / لا شذى تقول طيارته الفجر يمدي قد طار
نهيل باستسلام / الله يحفظك بس انتظري حصه تروحون سوى
ملاك تطالع الساعه المعلقه بالحيط/ تاخرت ودي نروح و نرجع قبل المغرب
نهيل بحرص / اي انتبهو تعشون حتى لو حلفو عليكم
ملاك تهز راسها برضا وهي تاخذ نقابها بيدها /حاظر

دخلت حصه وهي شايله اياد وراها امل اللي فتحت لها الباب وشايله سلات حلا هتفت باستعجال / سلام هاه ملاك جاهزة نروح؟؟
ملاك طارت عيونها/ هدي خذي نفس شهيق زفير شفيك طايرة ؟
نهيل تبتسم من لسان ملاك وهي تمد يدها
لحصه / عطيني ايودي يسلم على جدته

حصه تعطيها اياد وهي ترد / وش اسوي تاخرنا قبل يجيهم احد
ملاك تلبس نقابها /وش جايبه معك ؟!
حصه تاشر على الاغراض اللي تفتش فيهم امل / كم بكس حلا وهديه لولدها
ملاك تبتسم / زين انا سويت لها قهوه وطلبت لولدها هديه عساها تعجبها ماعرف وش اختار

نهيل تبوس بياد وهي ترد عليها/ لا تبيض الوجهه هديتك ماقصرتي
امل برجا /يومه تكفين تحمست بروح معهم
نهيل برفض / لا انتي عرسك بعد كم شهر عيب
امل تنهدت بضيقه /يالله العافيه
ملاك بتقصد / اخوك ولده ما يبون يصبرون لين تعدي سنويت ابوي
نهيل ترد بزفرة/ صبرو لين طلعت من الحداد و اخرو شهرين زياده خلاص عاد ماهي طواله
حصه تايدها/ اي والله صحيح ماقصرو
ملاك بزفرة احد / غصبن عليهم اجل يعرسون بحداد امي ؟
نهيل تنهى النقاش/ روحو بس لناس وخلو السوالف بعدين
حصه تاشر لملاك / يلا



بيت ام صالح…
شذى ترتب الطاوله بحماس وفا تراقبها بغيظ /اللي يشوف شذى يقول بيجونا ناس فخمه ولا امرا ماهو اهل عمي طالب
شذى طالعت فيها / واهل عمي طالب اللي تنطقين اسمه تقل ماهو عاجبك ماهو بناس ؟
وفا بتطنز / ناس بس اقل من اي ناس
هدى بحده / وفا عيب تكلمي معهم بحترام لاجو بلا قلة ادب؟
وفا تحط رجل على رجل / اصلاً زين مني ان قمت وسلمت عليهم تبين اتكلم معهم بعد!؟

ام صالح تكلم وهي كانت بعالم ثاني ولا سمعت كل اللي دار بينهم / بنعلم ابوك ان ملاك هنيه وكاد يكلمها ويهديها الله وترجع لولدي المتقطع عليها
وفا بزفرة / تبين مطلق على سن ورمح يكلم ملاكووه ؟
ام صالح بغضب/ وليش مايكلمها ماهي بنت اخوه ومرت ولده ونبي نصلح بينهم
هدى طنشت وفا / انا معك يومه بنعلمه يمكن ربك يهدي بينهم
ام صالح تاشر لصبا اللي جالسه تتابع فلم/ صبا جيبي جوالي
صبا تقوم / حاظر

شذى مبتسمه / اكيد ملاك مارح ترد جدي تستحي منه
وفا من بين اسنانها/ والله ماتستحي من احد وتذكرو كلامي
ام مهند تنهى النقاش/ كل شي بوقته حلو تجي ونشوف

جابت صبا الجوال وام صالح كلمت ابو صالح وعطته خبر ومن انهت الاتصال وهدى تسالها /وش قال ؟

قطع عليهم طق الباب قامت شذى تركض وفتحته وهي ترحب بعمق/حي الله ملاك يا مرحبا تفضلي
حصه طارت عيونها/ العن هالوجهه وانا ماني ماليه عينك يوم ترحبين فيها بروحها؟
ملاك انفحرت ضحك وشذى انحرجت / لا والله ماهو قصد كذا بس من الفرحه
حصه بزعل متصنع / ابعدي عن الباب بس الله يخلي للي بنات عمي يرحبون فيني ماهو با انتي
شذى تطالعها وهي تدخل وهمست لملاك / اختك علامها زعلت؟
ملاك مازالت تضحك/من خبالك المهم ماعلينا منها بعدي عني بادخل انا وكرشتي
شذى تبتسم بحب /تفضلي انتي وكرشك سعيدين بجيتكم

دخلت ملاك والكل رحب فيه بحب الا وفا حتى ماقامت تسلم عليهم حصه لاحظت بس شطفتها وهي تسال/شلون ولدك يا هدى عساه مبروك
هدى ابتسمت /الحمدلله بخير عقبال عندك تجيبين ليود اخو
حصه تهز راسها برعب / لالا من غير شر ولاده ماعاد ابي
ام مهند تبتسم / لا تخفون ملاك بالولاده تراها سهله مثل اكل الحلاو لا تحاتين
ملاك صمتت والحديث كله ماهو عاجبها بذات بوجود عمتها اللي تفحصها من جلست /…
وحصه كشرت / مثل الحلاو اي صدقتي
هدى بكلمه مدروسه / الله يسهل عليها ان شاءالله وتجيب لنا شيخ العائله

ملاك تناظر بعمتها ام صالح اللي معلقه عيونها الدامعه فيها من دخلت ولا نطقت بحرف واحد
هدى شافت نظرات امها الحزينه ونظرات ملاك المتوتره وغيرت الموضوع / شلون عمتي متى طلع حدادها
حصه ترد بهدو / مابقى لها شي 3 ايام
ام مهند بموده / الحمدلله هانت الله يكتب اجرها
شذى تقوم تقهويهم وهي تسال/ حصه ليش ماجبتي ايود
حصه تنهدت براحه / خليني اتحرر منه شوي
صبا بزعل / وتجلسون امل عنده ؟
حصه تضحك /لاوالله هي اللي جالسه تقول مستحيه
هدى بتسال/ حددو عرسها
حصه ترد / باقي بس قريب
الكل /الله يوفقها

طق الباب وجاهم صوت ندا رجولي بالغ شديد البلوغ / احم احم يا بنات
فزو البنات / تعال يوبه حياك ماعندنا الا بنات عمي طالب
دخل ابو صالح بترحيب/ حي الله بنات اخوي يا هلا ومسهلا

قامت ملاك وحصه حبن على راسه وعلى يده وهن يشمن ريحة ابوهن فيه لاكن يدعن القوه قدامه
سالن عن صحته و اخباره وهو يجاوبهم بمحبه صادقه ولا هو غافل عن الحزن اللي يحتويهن ويحتويه جلس وبعد كل وحده جلست مكانها بحترام

شذى تصب له فنجال /تقهو ياجد من قهوة ملاك
ابو صالح ياخذ الفنجال ويبتسم وعيونه على حسنها وحسن ملامحها وهو مايلوم ولده لو طار عقله فيها رد بثبات / ياجعل تسلم يمناك يا عمك
ملاك ابتسمت / الله يسلمك
ابو صالح بهتمام /شلون امكم عساها خلصت الحداد؟
حصه ردت بهدو /باقي لها 3 ايام وتخلص ان شاءالله

ابو صالح هز راسه بكتمه وهو عاجز عن الرد موت اخوه كمل اربعة شهور وسبع ايام /…
هدى حست فيه وهي تغير الموضوع مثل كل
عاده بس هالمره بطريقه متعمده / يوبه لاجا ولد صقر وملاك ماهو تغليه اكثر من ولدي ؟
ابو صالح انتفض بلهفه/ الا والله اني اقوله من الحين قدامك انتي وخواتك ولد صقر اغلا من عيالكم كلكم
ام منهد بتجاوب معهم / ليش ولد صقر بذات ؟

ابو صالح ناظر بملاك اللي رافع راسها بثقه رغم
الالم الداخلي /يابوك صقر رحوم و كريم وراعي فزعه ولاحدن يقدر يسوي سواته
حصه طالعت بملاك اللي فهمت نغزات عمها وبناته براسهم موال وحصه دخلتهم بسالفه ثانيه / الا ياعم شلون السكر معك عساه ما يرتفع؟؟
ابو صالح فهمها بس تجاوب معها بذكا/ مرات يابوك بس لا ضقت وانا للي كم يوم اهوجس ولا انام اليل و يرتفع معي
حصه بحنيه /لا تفكر صحتك اهم من كل شي

ابو صالح فجرها / كيف مافكر وولدي وبنتي كل واحد منهم بديرة ماهو مستوي حالهم حتى على وجه ضنا مشرتك بينهم

ملاك تنهدت بعمق وهي صامته /…
ام صالح بمحاوله / بيرجعون ان شاءالله ويستوي كل شي بينهم على خير
ابو صالح لف لملاك بحزم/ يابوك انتي وش مزعلك منه اخطا وخذا جزاه وش تبين بعد وهو حاظر باللي تطلبينه
ملاك ردت بهدو ثابت / ابي سلامة راسك وراسه انا مرتاحه كذا
ابو صالح بحده /لا مانتي مرتاحه لا تحسبيني اجهل الامر ولا هو بمرتاح غير ذابحكم العناد والتكابر
ملاك حطت عينها بعينه / ياعم كانك تعزني سكر على الموضوع
ابو صالح بصرار/ مافتحته وانا بسكره ترا فراقكم كذا ياثر على ولدكم اصلحو مابينكم قبل يلفاكم

ملاك بصرار اعمق / ولدنا ماهو ضايع ولا حنا اول ناس ولا اخر ناس تفرقو وبينهم عيال في الاكثر منا ثلاث وربعه
ابو صالح تنهد بضيقه/ تعوذي من الشيطان ولا تظلمين نفسك وللي بطنك ولا صقر والله ماهو هامني كثركم
ملاك زفرة بوجع / ياعم طالبتك لا تضغط علي بالكلام
ابو صالح استلمها /يابوك كان للي قدر عندك ارجعي له ودحرو ابليس اللي بينكم

وفا وقفت بزعل من رجا ابوها المستمر ومن عناد ملاك المنرفز لها وراحت للغرفه بصمت/…
و ملاك ترد وهي سافهه حركت وفا ولا همتها / ياعم قدرك على راسي من فوق والله لونك طالبني ادفن نفسي بالجمر ماردك لا كن الرجعه لصقر مستحيله
ابو صالح انتفض / لا يابوك لا تقولين كذا انا طالبك
ملاك وقفت وحبت على راسه / انا بوجهك لا تزيدني هم فوق همي
ابو صالح ضم راسها / ابد يابوك الراي رايك وشور شورك

ام صالح نزلت دمعتها بكسرت خاطر وهي كانت متامله ان ابو صالح بيقدر عليها وترجع لولدها اللي تعرف ان لا ليلة ليل ولا نهاره نهار يسكنه هم غويص بينه وبين نفسه ولا هو قادر يصرح فيه لاحد ؟ …
________________________________

طق الباب فتحت الخدامه ودخلت جهير والكل قام يرحب فيها بمجاملة الا مهره سلمت على الجميع وسالت عن اخبارهم وسالو عن اخبارها وهتفت بحرج / العذر من الله ثم منكم بس انا جيت دخيلة عند ابو عقاب

الجدة صيته بعقل وثقل / وصلتي يامك البيت بيتك وانتي بنتنا وحياك الله
جهير بمودة / الله يبقيك ويطول عمرك
فاطمه بتسال خبيث / هو انتي رجلك ماهو بسجن ؟
جهير ترد عليها/ قصدك طليقي الا بسجن الله لايرده
فاطمه بتعمد / اجل جايه دخيله من منهو ؟
جهير ودها تقوم تقطع لسانها بس ردت بهدو
متصنع / من خواني الله يصلحهم يبون يزوجوني واحدن ثاني غصبن علي
الجدة صيته بتوجس/ وليه ماتبين تعرسين يامك ؟
جهير ردت بتنهد ضايق / مثل الاول واحد صوير واحد قليل خير وانا ابي للي واحدن يشيلني ما يرميني

مهره عطتها نظرة وشاحت بوجها بصمت /…
وشوق ردت بخبث / ومنوين نجيب لك اللي يشيلك وانتي يالله تشيلين عمرك
جهير طارت عيونها/ وش قصدك ؟
شوق ترفع كتوفها / قصدي البكر مالقت المواصفات اللي تبينها وانتي يا مطلقه تشرطين
جهير فار دمها و فاطمه تبتسم وهي تكمل مع
بنتها/ وهي صادقه بزمن هذا الوحده تبي الستر بس
الجدة صيته تنحرهن/ اسكتن ولا كلمه المره ماهي جايه تدور رزقها عندكن عسا مالكن رزق

مهره شعرت بسعادة الله حطها بينهن خلي يشتغلن بانفسهن عنها بس اللي ذابحها وكاسر سعادتها
انهن يدقن بالكلام بينهم عشان زوجها كل وحده تبيه لنفسها وهي وينها من كل هذا يتناقرن على رجال قدام زوجته شي غريب ماحد حاس بالنار اللي مشتعله فيها وخايفه من طريق الخطر ان راحت يمين شوق وجدتها وان راحت يسار جهير ونيتها ….


الساعه 10 ونص ليلاً …

حطو العشاء عددت اصناف دسمه ضيافه لجهير
بامر من الجدة صيته الكل تعشا و اتجه جناحه الا مهره راحت مع جدتها لجناحها جلست بجوراها وهي ترتعش من الوسواس هتفت بخفوت / جدة انا خايفه
الجدة صيته انتفضت بحميه/ افا وانا ام عقاب وش تخافين منه؟
مهره ارتمت بحضنها من غير مقدمات وانفجرت بالبكا / يخططن عليه وقدامي يبن ياخذن حق ماهو حقهن
الجدة صيته مسحت على ظهرها بحنو / مهره يامك تسمعين نصيحتي لا نصحتك؟
مهره رفعت راسها من حضن جدتها / اكيد انا مالي غيرك

الجدة صيته رجعت راس مهره لحضنها / فهد لو يبي العرس اعرس بشور راسه و ماهو مشاور احد لاكن هو من نفسه مايبي الحريم انا امه و انا ادرا فيه يالله اقنعته بالعرس الاول تبينه يجيب الثانيه اسمعي كلامي وامسكي علمي لا تجلسين تحنين على راسه و تخلينه ياخذها عناد فيك ويجيها على راسك تراه تربيتي وعرفه باسه قوي

مهره صمتت وهي عاجزه عن الرد ولا عندها رد اصلاً/..
الجدة صيته تخفت لها / خلي نفسك زينه معه
و تقاضي عن بعض الامور اتركي الغيرة الزايدة عنك
مهره هزت راسها برضا/ بحاول
الجدة صيته بصرار /ماهو محاوله الا لازم احتويه دلعيه ماهو بس طايره فيه
مهره تهز راسها بخجل وهي تهتف لنفسها (بلاك
ما تدرين عن شي ياجدة مطيره مخ ولدك بجرائتي )

الجدة صيته عقدت حواجبها / كنه صوت فهد ولا يتهى للي ؟؟
مهره وقفت باستعجال /الا صوته من يكلم اكيد جهير ولا شوق
الجدة صيته تقوم معها / هه توي ناصحتك ماسرع تنسين العلم ؟؟

مهره ماردت عليها وهي تطلع لصاله وجدتها وراها شافو فهد واقف بصاله منزل عيونه على المسباح اللي بيده وجهير عليها عباتها ونقابها وتكلمه / انا منحرجه منكم والله العظيم بس مالي احد بهالدنيا لاب ولا ام ولا اخت بس خوان والله يسامحهم مايرحموني
فهد رد عليها بثقل / حنا اهلك يا بنت سعيد واعتبري نفسك بين اهلك وبيتك
جهير بمتنان / الله يطول بعمرك ويعزك يابو عقاب
فهد رد بذات الثقل /جزاك الله خير
الجدة صيته تقدمت / الناس لناس يا جهير ولا تحسبينا متضايقين من وجودك لا بالله انك مثل بناتنا

جهير لفت لها وعيونها راحت لمهره اللي واقفه وراها وتناظر فيها بتوعد ردت على الجدة بهدو / الله يكبر قدركم ويجزاكم خير
فهد ينهى النقاش / روحي نامي ورتاحي وخوانك لا تشيلين همهم انا اتفاهم معهم
جهير ردت بجهل متعمد / وسعد عين من ينتخي فيك الله يصلح لك عقاب ويجي لطيبك

مهره فار دم راسها من و قاحة هالادميه تمثل انها ماتعرف ان ماعندهم عيال وهي اكثر وحده تنبش ورا اخبارهم وتعرف بتاخير حملها و الجدة صيته طالعت بفهد اللي تغيرت ملامح وجهه وهو يستاذن / تصبحون على خير

مهره قبل لا تلحقه زفرت بكلمتين خافته من بين اسنانها لجهير / ماهي بزينه حركات التمثيل بوحده بعمرك
جهير صقعت من كلامها وهي تشوفها طالعه
والجدة صيته كتمت ضحكتها / روحي نامي يامك
جهير انسحبت بصمت وحرج من الجدة /…
_________________________________

نهيل بزعل شديد /عيب تردين عمك وهو شايب وش كبره عشان سالفه ماتسوى
ملاك بزفرة /كيف ماتسوى و ولده ناوي ينزل حملي وتبون ارجع له بكل بساطه
حصه بتدخل / بس اعتذر الرجال وخذا جزاه من الهجر اربع شهور ما اكفتك
ملاك تنهدت بوجع / لا ماكفتني ورجاً لاحد يتدخل بشي ماهو حاس فيه
نهيل بجزع / وشلون ماحنا حاسين فيه الا نحس فيك ونعرف بس يامك خلاص الله اكرم منا يغفر الذنب وحنا يا البشر الضعفا مانغفر؟!
ملاك وقفت /تصبحون على خير

نهيل تنهدت وهي تشوفها تدخل غرفتها/اختك هاذي بتجنني
حصه ردت بهدو / طبيعي من وهي بزر مجننتنا مادري وش كنتي ترضعينها من ورانا
نهيل تاففت / مثل مارضعكم بس هي تفرق عنكن بشيا كثيره ماهو بس بالعناد
حصه بزعل مرح / اي قوليها يا نهيل حطمينا قولي حتى بزينكن تفرق
نهيل ابتسمت غصب / الله يرجك الا امل وينها اشوفها هالايام ماتجلس معنا كثير
حصه بخفوت /تفكر بالعرس وبالحياة المقبله خلوها براحتها
نهيل تنهدت / الله يتمم لها يارب

دخل مازن وجهه مسود /وين بنتك اللي ماتستحى؟
نهيل وقفت /من تقصد .؟
مازن بحده / ماغيرها العنيدة اجل عمي بكبره يترجاها وهي تكسر شايب اكبر من ابوها هاذي ماتربت
نهيل بحده اعمق/ اقول اوقف مكانك مسرع ام الخلاقين وصلت لك العلم ؟
مازن بقهر / يومه عاجبتك سواتها ؟
نهيل تنهدت بقلة حيله/ماعجبتني بس ماقدر اجبرها اللي فيها يكفيها
مازن يتقدم لغرفة ملاك وهو يهتف بحزم / اذا ماتقدرين فيها انا اللي اقدر فيها
نهيل لحقته /مازن حدك ترا ماهو وقتك

دخل مازن شاف ملاك وامل يسولفون على سراريهم المجاوره هتف بغضب /انتي كيف تردين عمي وطلبه؟
ملاك رفعت حاجبها وهي مازالت جالسه/وانت وش دخلك؟
مازن انتفض/ وشووو وش دخلني اسمعي يا ملاك لاهنيه وبس اذا طالب راح انا مكانه وامري يمشي عليك وعلى غيرك تروحين الحين لاعمي وتعتذرين منه وترضين باللي يبي

ملاك وقفت بزفرة/ طالب ماحد يجي مكانه هذا اول شي ثاني شي اوامرك على سفيهتك ماهي علي تفهم؟
مازن بغضب حاد / غصبن عليك مدامك عندي هنيه بالبيت كلمتي هي اللي تمشي لا ذلفتي رجلك سوي اللي تبين
نهيل سالت بحزم / ليش البيت منهو بيته يا مازن ؟
مازن لف لها بذات الحزم / انا رجال البيت يا يومه ولا نسيتي ؟
نهيل بقهر / اسمع يا رجال تعتدل بالكلام معي ومع خواتك ولا اذلف برا البيت انت ومرتك

مازن بصرامه عميقه / هذا بيتي وانا راعيه وانتن تحت ضلي وتمشون بشوري
حصه بتدخل/ مازن ماله داعي تدخل بحياتها هي حره فيها
مازن بذات الصرامه / والله لو درا صقر ان ابوه طالبك ورديتيه لغير يرجع ويمصع رقبتك
ملاك بغبن منه / اذا انت خايف منه انا ماني خايفه خله يدري وفي خير يسوي شي

مازن/ ملاك انتي خابرته وعارفته صقر قليل رحمه ارجعي من طيبت خاطر لارجعك له غصبن عليك
ملاك تصرخ فيه/ تخسي انت وهو ماحدن يغصبني
مازن تقدم وشد شعرها / منهو اللي يخسي هاه؟
نهيل شدته مع ظهره / يدك ماتمدها على بناتي تفهم
مازن سحب ملاك معه /الحين تروحين لعمي وتعتذرين له ولا ترا والله باسم الله لا طردك من البيت

ملاك طارت عيونها ومافيها حيل تدافع عن
نفسها /مازن ابعد عني لا تخليني استخدم معك انت وفا سلوب العانه
مازن مارد عليها ولا امه وخواته اللي يصارخون فيه
وهو يسحبها / بيتي يتعذرك اطلعي برا
ملاك وقفت عند الباب /انت صاحي بطلعني برا البيت بهاليل ؟
مازن بتعمد / اي روحي لعمك اللي كسرتي طلبه خلي يضفك

امل تبكي برعب و نهيل تصرخ بقهر ام حقيقي/ ماااازن ابعد عنها ماهو بكيفك تطردها انت اللي اذلف لشارع
مازن بحده / يومه انا ماني مثل طالب كل ماجت وحده منحاشه ضفها لا المره الاصيله تصبر على رجلها وعلى قشارته
حصه بالم / بهاذي صدقت مانت مثل طالب و لا تنسى ان هذا بيتنا مثل ماهو بيتك تفهم
مازن رد بحزم / اقول اص ولا كلمه انتي بيتك بيت عادل مالك بيت عندي وهاذي بيتها بيت صقر وهذيك بيتها بيت بندر وغير هالكلام ماعندي

نهيل بوجع / وانا بعد اطردني خل اروح عند ماجد وامه
مازن انتتفض/ لا يومه حشى انتي راعيت البيت بس بناتك ماهن عارفات مصلحتن نفسهن خلي اعلمهن انا
ملاك باحتقار/ ليتك تعلم نفسك ولا حنا مانبي منك علم
مازن يطالعها بقهر/ وطولين لسانك بعد ؟

وفا كانت واقفه تسمع وماحد انتبه لها هي من داخل ماتبي ملاك ترجع لصقر بس الحين خذتها عناد وتبيها ترجع عشان يذبح الولد اللي بطنها واللي يربطها باخوها ويورث حلاله هتفت بتدخل / مازن اذا اختك مارجعت لصقر ونفذت طلب ابوي ترا انا طالعه من البيت

نهيل لفت بصدمه / تبين تلوين ذراعنا روحي عساك مارجعتي؟
مازن بحده / لا ماتروح انا رجال شاري مرتي ماني بايع
ملاك عرفت تخطيطهم / الحين انت تبي ترجعني بالغصب عشان وفا ماتنحاش منك؟
مازن عطاها نظره / وانتي وش دخلك عليك ترجعين وبس
نهيل برفض/ ماترجع واذا مرتك بتذلف خل تذلف بدال المره مره
ملاك ابتسمت من كلام امها وفا طارت
عيونها / تهدديني يا عمه ؟؟
نهيل ترفع كتوفها/ افهميها مثل ماتبين
وفا صرخت بقهر / انا طالعه بيت ابوي و قسم بالله يا مازن كان مارجعت اني مارجع

مازن نادها وهو بشوفها تروح لجناحها/ وفا اوقفي تبي ترجع الحين
ملاك تدفه بقهر / تبي تمشيني انت وهي بكيفكم تخسون وتعقبون
مازن لف لها و كان بيصفعها بس مسكته نهيل وهي تصرخ فيه/ يدك اكسرها لك يا حمار لا تحسبنك رجال وعجز لامدها عليك
مازن شوش فيها / تضربيني انا ؟!
نهيل بحده / واكسر خشمك بعد بناتي خط احمر والحين اذلف الحق بمرتك يمال المراره
مازن ابتعد وهو يتوعد / والله لترجع بكرا غصبن عليها ولا هذا الشنب ماهو على رجال
___________________________

مهره من طلعت من عند جهير وجدتها جلست على اقرب كرسي بالحوش تحاول تضبط نفسها وتسيطر على عصبيتها قبل تروح لفهد بعد عدة دقايق دخلت الجناح وهي تدور عليه بعيونها سمعت صوت الدش بالحمام عرفت انه يستحم رحت غرفة الملابس ولبس لها بجامه كحليه وبنطلونها مجشر حطت من عطرها الفواح ورجعت لغرفة النوم

شافت فهد واقف عند مرايه التواليت ويجفف شعره بالمجفف وبعده تقدم لها وعيونه بعيونها وهي وقفت بثبات تنتظره يتكلم لاكن ماسرع ما تجاوزها رايح لغرفة الملابس تنهدت بضيقه وراحت تمددت على السرير هو لبس لها شورت ورجع تمدد جوارها معطيها ظهره ماله خلق اليوم عليها ابد حاس
لو انها تكلمت انه راح يفجر كل طاقته فيها

مهره ماقدرت تحمل صده وهي تحاول تدور لها موضوع تكلم معه فيه بس غيرتها ترجعها لموضوع تافه/ فهد
فهد رد وهو مازال صاد عنها /نعم
مهره بتوتر/ جهير بطول عندنا؟
فهد رد بحزم بالغ/ هي على راسك ولا على ارض الله الواسعه ؟
مهره تغلي / سالت بس ؟
فهد من غير نفس / مادري شهر شهرين سنه سنتين مادري
مهره طارت عيونها برعب /سنه سنتين ليش مالها والي عشان نتكفل فيها
فهد لف لها بغضب / اعيد وزيد عليك لا تدخلين بشين مايخصك بيتي وادخل فيه اللي ابي ماتفتحين فمك بكلمه
مهره تعضعض بشفايفها بغيظ/ انت اخذني خادمه ولا زوجه ؟
فهد اقترب لها ومسك حنكها بقوه / تراك دبلتن كبدي يا مره اعقلي ولا اذلفي لبيت امك
مهره تصلبت من الصدمه وعيونها لمعت بدموع /…
فهد صر على اسنانه / المره بوجهي ماسمح لا لك ولا لغيرك يذل دخيلتي

مهره ابتعدت وهي تعطيه ظهره وتغطي نفسها بالكامل بالغطى وماهي قادره تستوعب كلمته
فهد اللي يجن جنونه لا قالت بروح بيت امي الحين يقول بكل برود اذلفي له .. حتى الدمعه من عينها تحيرت عاجزه لا تنزل وتريحها شدت الغطا بقوه عليها

فهد ندم على كلمته يعرفها على طريف الحين يهئ لها ان قال كذا عشان شوق ولا جهير يعرف صغر عقلها وغيرتها الزايده تمدد على ظهره وهو يمسح شعره على ورا يبي يرتاح ماهو قادر يستقر بحياته من المشاكل مايدري الخطاء منها ولا منه ؟.. لف يطالع بالغطا اللي مخفيها بالكامل تنهد وهو يحاول يتماسك مايبي يقترب لها عشان مايكبر راسها عليه مثل كل مره
وهو مازال مقهور على البارح انه تقبلها واستجاب لها وهي غلطانه من راسها لين ساسها مايبي يكرر الخطا
تغطا هو بعد عن البرد ونام ….


تحياتي (شغف)..

الله يغفر لوالدك ويرحمه ويجعل قبره روضة من رياض الجنه وامواتنا واموات المسلمين اجمعين

الله يسعدلي قلبك على البارت الضغيرون تسلم يدك الرواية جميلة و مشوقة

احب ملاك وصقر وحزينه على حياتهم وامكن موضوع زواج الأقارب وامراضه نادر احد تكلم عنها برافوووووو الفكرة جميلة

ومهرة وفهد بس يقهرني فهد بعناده واحيان اعتقد انه اخو ملاك من العناد ودمتي بالتوفيق ياعسل

كل الكوبلز ههههههههه
الا مازن ووفا مرة ماينبلعوووووون


ربي يسعدك مرررررا💓💓💓