السلام عليكم ورحمة الله وبركاته
طابت أوقاتكم بكل خير ..قدمت بارت السبت وقراءة ممتعة

القطرة الثانية عشر"



فرنسا 2017



فتح عيونه ورأسه بينفجر من الصداع

وهو مايدري وينه وبأي مكان ومن اللي جابه

هنا ..جلس وهو يحاول يتذكر ..مايذكر الا

ان فيه شخص حاول يخرجه من منزل حسن

وحاول يتخلص منه وقاومه وبعده مايدري

ايش صار ..نظر للمكان الغريب وهو يفتح

شنطته يبحث عن جواله بحركة سريعة



"لاتعب نفسك جوالك معي"



لف لمصدر الصوت وبعصبية

"مين انت وليش جبتني هنا"



ببرود نطق"خلك هادي ولا تسبب مشاكل"



بصراخ وهو يحاول يتقدم له ومايقدر لوجود

قيود برجله اليسرى مربوطه بالسرير

"ايش اللي تبي مني"وبعصبية "فك رجلي"

بهدوء نطق وهو يجلس"لا "

بعصبية وصراخ "قلت لك فك احسن لك"

"افك رجلك وانت كذا منفعل"

اخذ نفس وهو يجلس"طيب بجلس هادي

قل لي السبب اللي جبتني هنا ومن انت"

"السبب حسن قريباً بينتهي"

بصدمة واستغراب"كيف"

ابتسم بإنتصار"تقدر تقول ان القبض عليه

قريباً"

بخوف نطق"اذا قبضوا على حسن بيقول لهم

عن مكاني"

"لاتخاف عشان كذا انا جبتك عندي وياليت

ماتطلع خلال هالايام وتكون هادي"ووقف

"بقفل عليك لأني مااضمنك يمكن تقول لحسن"

وتوجه بيطلع..

بسرعة نطق وهو يكرهه الاماكن المغلقه ومايقدر

يجلس فيها فترة طويلة"لا ماراح اقول له بس

اتركني تكفى"

خرج بدون ان يرد عليه..وسط صرخات بدر

منادي له ليخرجه ..





الرياض 2017



الساعه 5 م..

من الظهر ..وبعد الخبر اللي صدمته فيه

هديل وهو يفكر حتى ماقدر ينام رغم التعب

والنوم لكنه ماقدر ينام من التفكير بياسر

وليش بيتزوج الآن ومن بنات عمه ابو ثامر

اكيد فيه سبب...وقف وهو يخرج من المنزل

حتى ياسر مايدري وينه ومايرد على اتصالاته..

ركب سيارته وهو يعاود الاتصال بياسر..

وبعد عدة محاولات رد عليه وبعصبية

نطق"(انت وينك ليش ماترد علي..وبعصبية

ياسر لاتعصب فيني وتجنني..وزادت حدة صوته

ياسر انا سالتك وينك ..طيب ..ارسل لي الموقع)

واغلق وهو يمسح على وجهه بغضب..







جده 2017



عند ماجد ويسمع له وهو مصدوم..

كيف يكون عنده شخص خائن وبمنزله

والى الان ماهو مصدق ولا مستوعب

وبهمس"ماجد انت متأكد"

بهدوء نطق"الى الآن ماني متأكد لكن الشكوك

كلها عليه"

بقهر نطق"طيب ياعبدالرحمن والله مااترك عايش"

"لا ياسعود بتتركه عشان نوصل لبدر"

بعصبية نطق"اتركه وبالنهاية يصير شي

اندم عليه"

"بإذن الله ماراح تندم لكن هو الوحيد اللي

بيوصلنا لبدر"

زفر بضيق وهو يشرب كأس ماء

"بقول لك شي "

بإستغراب"اللي هو"

بحزن نطق"وصلوا لعزام بالرياض وحاولوا قتله"

بصدمه وخوف"وصار له شي"

تنهد ورد عليه"لا الحمدالله قدر ينقذ نفسه منهم"

زفر بإرتياح"الحمدالله ولا عرفهم"

"للاسف لا"





الرياض2017



وصل لمنزل عمه وهو متنرفز ومعصب

ومتقرف من الحي وصغره ..نزل من سيارته

وهو يتحسب بداخله على ياسر..طرق الباب

وبعد دقايق فتح له ياسر..

ببرود وهو يفتح الباب للآخر"ليش جيت"

اعطاه نظره وهو ينظر للمنزل بقرف

"بالله هذا مكان ينجلس فيه"

رد ببرود "بتدخل حياك بترجع بسلامتك ماطلبت

منك تجي"

تقدم بخطواته وهو يتبع ياسر اللي واضح

حافظ المنزل كله ودخل ووقف بنص الصالة

مصدوم من وجود جده عبدالله وخاله عبدالعزيز

ونطق "صاير شي"



نطق جده بإبتسامه وهو يأمره يتقدم

"خالد هلا تعال"

تقدم وهو الى الان بصدمته وخايف يكون

صار شي وسلم على ثامر

وجلس وهو يهمس لياسر

"فيه شي"

ابتسم ياسر له"جدي خطب لي"

فتح عيونه على الآخر وهو ماهو مصدق

وبصدمه وبهوت ملامح وجه نطق

"خطب لك "

نطق خاله عبدالعزيز بإبتسامه غصب طلعت منه

"جينا نخطب لياسر"

صمت خالد بصدمه وهو مايقدر يقول شي

بوجود ثامر..رغم غليانه من الداخل ومسك

نفسه احترام لوجود جده...



بعد عشر دقائق ..استأذن الجد وابنه

عبدالعزيز وخرجوا وخرج معهم خالد ويتبعه

ياسر ...

قبل يركب السيارة نطق بغضب"جدي صدق

انت خطبت له"

ابتسم الجد"اي ليه"

مايدري يضحك او يبكي من القهر وبإستهزاء

"جدي انت شايف عمره كم ودراسته"

بعدم مبالاة"عادي يدرس وهو متزوج مافيها

شي"وركب السيارة...

نطق عبدالعزيز بهدوء"خالد لاتضيق نفسك

والله يستر من هالخطبة اللي جت فجأه"

ورد بعد مناداة والده له"ياللا ياعبدالعزيز

تأخرنا"وبأمر لياسر"ياللا حرك"



يشد على شعره بقهر وعصبية وهو

ينظر للحي"هذا اكيد جن رسمي"

وفتح باب سيارته..لكنه وقف بعد ماتذكر

شي ..اكيد ثامر خطط لكل شي عشان

يأخذ كل شي من ياسر ..يعرف حركات

الناس هذهِ ..ورجع بيتكلم مع ثامر ودخل

وهو يزفر بعصبية ياسر تجاوز حدوده

ووقف وهو محتار مايدري اي باب يدخل

معه"انا من وين دخلت قبل شوي مع هذا

او هذا"وبغضب نطق"حسبي الله على عدوك

ياياسر ماترك فيني عقل"..ووقف بعد ماسمع

صوت بنت تصارخ ومعصبه وشكلها غير موافقه

على الزواج وابتسم بسخرية وهو يتراجع

"اي تجي منها افضل"وخرج لخارج المنزل.....





صدمها ثامر بالخبر جلست بعد ماتعبت من

الصراخ وحلقها يألمها مازالت متعبه..وبسخرية

وهي تمسك رأسها من الصداع"ثامر انت من

جدك بتوافق ياسر تسرع ومازال صغير ومنى

ماهي وجه زواج الآن"

بهدوء نطق"الزواج ماهو عند العمر اذا الشخص

قادر ومهيئ نفسه مافيه مشكله"

كحت بتعب وهي تنطق بعصبية

"الا فيه مشكله اذا ....وماكملت بعد ماانتبهت

لمنى تنطق بصوت هادي...



"انا ماني موافقه"



لف لها بصدمه ونطقت سارة بفرح توقعت ان

منى توافق على طول وتسرع وزفرت بإرتياح

"اي هذهِ اختي اللي اعرف "



نظر لها ثامر بحيرة وخرج..كيف يرد ياسر

اللي ماقصر معه بأي شي..لولا الله ثم ياسر

كان ضاع..ساعده بمشروع الكفي..والآن منى

ترفضه..صح انه مصدوم من خطبة لمنى وماتوقعها

ابد..

جلس بالحوش وهو يفكر بحيرة ..

عزام وياسر طلب منه يأخذ رأي سارة وموافقتها

مبدئياً عشان يتقدم لها رسمي..ومنى وياسر

زفر بضيق مايبي يجبر خواته على شي

ومايبي يرفض ياسر بعد اللي سواه له..

قطع عليه تفكيره ..صوت طرق الباب

ذهب اليه وفتح وهو مصدوم من اللي عند الباب



"السلام عليكم"



بهت وهو ينظر له ومازال مصدوم من جيته

وبقلق نطق"وعليكم السلام"وترك له مجال يدخل

"تفضل حياك"

"لا اسمح لي ابيك بموضوع ضروري وياليت

مايكون هنا"







فرنسا 2017



الساعه 7:40 م



كلهم قدامه ومنزلين روسهم من الخوف..

من صراخه وعصبيته ...واي احد يوصل

له يركله برجله وهو واصل اخر مراحل العصبية

بدر ومايدري وينه مختفي له ساعات

وجواله مقفل..

بعصبية وهو ماسك ياقة احدهم وبصراخ

"ماتقولي وينه "

بخوف وتلعثم"م مادري من العصر ماهو موجود"

بصراخ وهو يدفعه للخلف"كيف ماهو موجود"

نطق بخوف وهو ينهض من الارض"اي ماهو موجود

ماادري وينه"

تركهم وهو يسبهم ويتلفظ عليها بألفاظ سيئة

وهو يفور من العصبية والغضب اين ذهب

معقوله يكون خانه وتركه او صاير له شي

ضرب رجله بالارض وهو يصارخ

"وين ممكن يكون وين"وعاد الاتصال عليه

لكن جواله مقفل...







جده 2017



الساعه 10:00 م..



يجلس بصمت وسط ضحكات معاذ وعزام

ويبتسم بسعادة لسعادتهم..عزام نفسيته

تتحسن للافضل عن قبل..ووجود معاذ عنده

اراحه كثيراً ..نطق بعد صمت "معاذ"

نظر لعمه بإبتسامه "هلا"

بهدوء نطق"بكره تداوم مع عزام بالشركة"

بصدمه وهو ينظر لعمه"ليه طيب ووظيفتي

مو قلت.."

بضيق نطق"للاسف انه وصل قرار فصلك

قبل يومين وماقلت لك ماابي تتضايق"

وصل له الخبر كالصاعقه ماهو مصدق

وظيفته اللي تعب فيها وسوا كل شي عشان

يدخل فيها يخسرها ووقف وهو ضايق

"عن اذنكم"وخرج..



تركه سعود براحته وبعده يذهب له ويتطمن

عليه..وسأل عزام"علومك انت"

ابتسم لوالده "علومي بخير واذا تبي تسعدني

اكثر توافق على..."

قاطعه وهو يعرف اللي بيقول له وبضيق

"عزام ايش قلت لك ماقلت تنسى هالموضوع

ولاترجع تفتحه معي مرة ثانيه"

يعرف والده مستحيل يقتنع الا بعد عدة محاولات

وسكت ولكنه سيحاول في وقت اخر لإقناعة..





بعد ماخرج من عمه والضيق يسيطر عليه

ذهب للحديقة ووقف وهو ينظر لبركة السباحة

ماهو مصدق خسارته لوظيفته زفر بضيق

وهو نادم على انفعالاته وتسرعه بكل شي

من قبل مايبي يتوظف بأي شي من شركات

وفروع العائلة لكنه الان مضطر يذهب مع

عزام غداً..يعمل ولا يجلس عاطل..







الرياض2017



الساعه 11:00م

من بعد مقابلته وكلامه مع خالد وهو متضايق

ويفكر معقولة الكلام اللي قاله له يكون صدق

لكن مستحيل ياسر يكون بنفس هالتفكير

يعرف ياسر ويمكن خالد قال هالكلام له

عشان يبعد ياسر عن منى..لكنه ارتاح

من رفض منى..ومتضايق على رده فعل ياسر

اذا اخبره ..لكن مافيه الا هالقرار ويرتاح

منها يضمن حياة اخته وراحتها ..بالزمن

هذا مااحد يضمن حتى الاخو..

زفر بضيق وهو يتوجه لغرفة خواته طرق الباب

وبعد سماحهن له بالدخول دخل"السلام عليكم"

"وعليكم السلام"

جلس على الكرسي المتواجد بالغرفة

"منى انتِ يوم قلتي لي انك ماانتِ موافقه

مقتنعه"

نطقت سارة بجدية"اي ياثامر ومستحيل اوافق

انا حتى اذا هي موافقه اولاً انت تعرف اللي بين

اعمامي والعائله هذهِ والافضل نبعد عن المشاكل"

تنهد بضيق وهو يرفع يده لشعره"اي افضل حتى"

وبعثر شعره بتشتت"حتى خالد اليوم قال لي ان

ياسر ماهو مستعد واستعجل بخطبته ومازال

صغير وقال كلام كثير صدمني"

ابتسمت بسخرية وهي تنظر لثامر

"طبعاً بيقول خالد كذا عشان تبعد عن ياسر ولانه

مايبي هالزواج يتم"واكملت بهدوء"لكن ياسر اذا

يحبك ماراح يقول شي على الرفض وبيقتنع"

نطقت منى بعد صمت"واذا عاد صار شي بيزعل

علاقتكم ماعندي مانع اوافق"

رمقتها بنظره وهي تنطق بغضب"مستحيل تضحين

بنفسك وحياتك عشان اي شي اذا زعل فهذهِ مشكلته

انت كلمه وتفاهم معه"

وقف "طيب"وخرج من الغرفه بحيرة مايدري كيف

يقول لياسر..دخل غرفته وهو يرسل لياسر بالواتساب

ليتأكد هل هو نايم ام لا..وبعد ثواني اتاه الرد من

ياسر "مرحبا بك"

"ياسر"

"آمر"

"مادري كيف ابدا معك لكن منى رفضتك"

وبعد ثواني وثامر ينتظر على اعصابة

وصل له رد ياسر

"لعل في الامر خيره مافيه مشكله"

ارتاح ورد "ماانت زعلان ولا تضايقت"

ارسل له "ليش ازعل او اتضايق اللي بينا

شي كبير واذا هي مالها رغبة فيني ليش

اكبر الموضوع والله يوفقها"

ارسل له"الحمدالله طمنتني"

"انا كنت ابي اتزوجها عشان علاقتنا تكبر

واذا هي رفضت لعل بالامر خيره"







وقف وهو يفكر قرار خطبته لمنى كله عشان

سارة اذا خطبها عزام توافق والا ماهو ناوي

يتزوج الآن..لكن للاسف منى رفضته..خرج

من غرفته بيكلم عزام...وبعد عشر دقايق اغلق

من بعد مااخبره برأي سارة....

"بعد ثلاث ايام"


جده2017

الساعه 7:00ص
خرج من المنزل..بيذهب لدوامه وهو
خارج لفت انتباهه..وجود ملف منزل على
سيارته...اخذه وهو مستغرب ويلتفت لرجاله
كل واحد مكانه..نظر لعبدالرحمن وهو
يتمنى يقطعه قطع على خيانته لكن مجبر
على الصبر ..عبدالرحمن هو الوحيد اللي
يوصله لبدر..اخذ الملف معه وركب سيارته
فتح الملف وانتبه لورقة بأول الملف مكتوب
فيها(اتمنى اني ساعدتك وهذا واجبي
وانا معك وهذا كل مايخص حسن اللي
تعتبرونه ميت وهو عايش)..اغلق الملف
وهو يفكر من يكون اللي مرسله معقوله
بدر لا مستحيل ..عبدالرحمن كيف لا
اكيد فخ اخر له..يوصل مكان عمله ويفتح الملف مع ماجد...


فرنسا2017
له ثلاث ايام وحالته حاله يخاف من الاماكن
الضيقة والمغلقه..يتخيل اصوات وصدره
قابض عليه بألم ..مرعوب ..واضع رأسه
بين رجوله وهو ينطق بخوف ويحاول
يبعد كل شي عن مخيلته"بدر اصحى على نفسك
انت بخير ومافيه اصوات مافيه شي"
ورفع رأسه وهو يسكر اذنيه بيديه..
مايبي يسمع شي ومايبي يتذكر شي
مافيه لا اصوات ولا شي لكنه..يتخيل
كل ماكان بمكان ضيق ومغلق ولوحده يخاف
ومايقدر يعيش فيه..يتذكر بداية ايام مراهقته
وتعذيب حسن له وكل شي صار له ..شد
على اذنيه وهو يصرخ بألم"افتح الباب
وبهستيريه وهو ينظر للغرفه برعب
"بندر بندر اخوك يتعذب وينك انت"
ووضع رأسه بين رجوله وهو مرعوب
ويكلم نفسه ....





ذهب يركض ..للغرفة الموجود فيها بدر بعد
مكالمة بندر له ..وعصبيته عليه بعد ماقال انه
مقفل على بدر له ثلاث ايام..ماكان يعرف ابد
انه يتأثر من الاماكن..كان يدخل عليه بكل
وقت وجبة ولاحظ انفعاله وعصبيته وتوقع عشان
يخرج ...فتح الباب وهو مرتبك ومتوتر وبصوت
خائف بعد ماانتبه لحالته ووضعيته
"بدر انت بخير"
رفع رأسه ونطق بسرعه
"تكفى طلعني من هنا مااقدر اتحمل اكثر
والله بموت اذا ..."
قاطعه وهو يفك قيد رجله"بطلعك من الغرفه
لكن توعدني ماتطلع خارج المنزل"
وقف بسرعه وانفاسه تسارع
"طيب طيب"وخرج بسرعة من الغرفه وهي
يأخذ نفس ونبضات قلبه ترتفع..




له ثلاث ايام وهو على اعصابه ماترك
مكان يذهب له بدر مابحث عنه..حتى جواله
مغلق ..وين ممكن يكون ومعقوله هرب وتركه
بحث بكل مكان ماله اثر..وحتى رجاله
بحثوا..ذهب للمطار وسأل وماترك اي شي
مكان يمكن يخرج معه خارج فرنسا الا بحث
عنه فيه..غير موجود...بغرفة بدر وبعثر كل شي
موجود..ملابسه وبعض اغراضه موجوده..حتى
جواز السفرموجود..وهويته المزورة موجوده
تأكد انه ماهرب وانه ماهو بخير..


جده 2017


بعد ماخلص قراءة الملف وكل شي يخص
حسن وتأكد من بعض المعلومات اللي حصل
عليها موخراً هو وماجد عن حسن..
خرج من مكتبه..وذهب لمكتب ماجد طرق
الباب ودخل
"السلام عليكم"
"وعليكم السلام"
وضع الملف على مكتب سعود "لقيت الملف هذا
على سيارتي وانا طالع للدوام"وجلس
"شكل اللي فيه صحيح"
اخذ الملف وهو يفتحه"يخص حسن"
وقرا اول ورقه على الملف"مين اللي ممكن يبلغ عنه"

هز كتفه بحيرة"ماادري والله لكن شكله فخ لنا"
يقرأ الملف بتركيز وبعد نطق"مااتوقع لكن يمكن
نقول من الاشخاص اللي كان يتعامل معهم وصار
بينهم خلاف"وبعد ماقرا معلومة اخرى
"مافيه الا حل واحد نسافر لفرنسا ونتأكد"
"فكرت بكذا ومع السفارة السعودية والسلطات
الفرنسية والشرطة هناك نقدر نقبض عليه"
واكمل بتنهيده"لانه يتاجر بالمخدرات بفرنسا
اكيد"
"طيب بحجز لنا بأقرب فرصه"ووقف
"بتأكد من الملف الموجود عندي بقضيته
وبعدها بحاول احجز لنا بأقرب رحله لفرنسا"


الساعة 5 م...

وضع رجل على رجل وهو يبتسم بفرح بعد
مابلغه عبدالرحمن ان سعود اخذ الملف
"باقي القليل يابندر وكل شي بيكون بيدك"

"تكلم نفسك عساه خير"

رفع رأسه لأحمد وبسعادة نطق
"خير خير"وابتسم "لابس ملابس رياضيه
بتروح مكان"
"لا على اساس نقدر نطلع على راحتنا"
وبضيق نطق"وزني زايد شوي وبمشي"
ضحك بصوت عالي"هههههههههه وزنك زايد حرام
عليك مااشوف انه زايد وانت هو انت ماتغيرت"
رفع حاجبه لفوق"والله تو شايف بالميزان"
وقف وكأنه تحمس يمشي مع أحمد
"طيب وانا بمشي معك اجل حديقه كبيره
ومانستفيد منها"
انحنى يربط سبورته "عبود طيب"
مشى بخطواته "نايم"ووقف"طيب الجو مو
كأنه حار شوي"
"اذا مره حار نرجع"
بإشتياق لإيطاليا وجوها"اخخخخ بعد الاجواء
الزينه جده ورطوبتها"


الرياض 2017

خرجت من غرفتها بعد ماطلبت منها والدتها
تنزل لماهر..وهي مستغربه له ايام ماكلمها ولا
ارسل لها..وفجأه يجي بدون مقدمات..ماتخفي

شعور الخوف وعدم الارتياح لزيارته..القت
نظره اخيره بالمرآه الموجوده بالصاله على شكلها
وهي تتقدم ذاهبه لمكان وجوده بالمجلس...


يجلس معه جدته وعمته نورة وهو ينتظرها مايخفي
اشتياقه لها ..ماسك جواله وكل شوي يرفع نظره
ينتظر دخولها ..

"كلمت معاذ اخباره"
رفع راسه لجدته وهو يبتسم"اي وبأخر الاسبوع
بروح له انا وحاتم"
"لا لاتروحون له هالاسبوع ياغير تضيقون
عليه ويمكن ماهو مستأنس بجده"واكملت بحزن
"اعرف معاذ مايرتاح ولا يستأنس الا معكم"
نطقت نورة بتأييد لكلام والدتها
"كلام امي صحيح على الاقل انتظروا اسبوعين
عشان يتعود "

"السلام عليكم"

نظر لمكان دخولها وهو يبتسم تبدو
اجمل اليوم..وعلقت نظراته عليها

شعرت بإحراج وخجل من نظراته لوجود
والدتها وجدتها وبتوتر وهي تجلس بجانبه
وتهمس"ياليت تغض بصرك شوي ماتشوف امي
وجدتي"
ابتسم وهو ينطق بخٌبث لإحراجها وهو يقبل
خدها "اخبار حبيبتي"
وقفت نورة بإحراج وهي تنظر لوالدتها اللي
نطقت بهمس"عيال اليوم مافيه حياء"ومسكت
ضحكتها بعد ماسمعت كلمة والدتها ونطقت
"يمه ماودك نطلع شوي تمشين عشان رجولك"
ومدت يدها لها تساعدها على الوقوف
"المشي زين لك"وخرجن...

وقفت بعصبية ونطقت ووجهها تكسوه الحمره
"ماتستحي انت"
وقف وهو مقابل لها ويمسكها لتجلس
"زوجتي وكيفي وماسويت شي حرام "وهز كتوفه
تقلد صوته وهي تنطق بسخرية
"زوجتي وكيفي وبعصبية"احرجتني وعند..."
وضع يده على شفتها يمنعها من الكلام وهو
ينطق ببرود وينظر لعيونها"ليه انتِ كذا انسانه
ماعندك ذوق والا فيه وحده تستقبل زوجها كذا"
دقات قلبها تخفق من قربه لها ونظرات عيونه
وانفاسه المنتظمه وهو ينظر لها وبتوتر نطقت

وهي تتراجع للخلف بإرتباك"ماهر"
يشعر بتوترها وارتباكها وهو يمسح على وجهها
بخفه وينطق بسخرية "كملي ليه سكتي"
بلعت ريقها وهي تتلفت "ماهر بعد عني"
بعناد وهو يبعد خصلات من شعرها الطويل
المغطي نص من وجهها"كذا احسن"
ماتتقدر تتحمل قربه اكثر متوتره وحرارة جسمها
ترتفع ونبضها يزيد وجهها ازداد حمرته وبتلعثم
وهي تحاول تبعد عنه ووقفت بتهرب"بجيب القهوة"
منع ابتسامه على طرف شفته"مابي قهوة "
ومسك يده"اجلسي بكلمك بموضوع "
جلست وانفاسها تتسارع وهي تحاول تبعد
نظراته عنه ونطقت بصوت عالي بعد ماقال
لها حددت زواجنا الاسبوع القادم"نععععععم"
ضحك لصدمتها ونطق ببرود وهو يقف
"حددت زواجنا الاسبوع القادم وحجزت كل شي
وطبعت الدعوات ووزعتها بعد وكل شي سويته"
تمنى تقتله على بروده ونبرة صوته من جده هذا
يتكلم كذا والوقت كيف بيكفيها اسبوع ايش
بتجهز خلال اسبوع وبإنفعال وهي تقف نطقت
"ماهر انت من جدك تقول بعد اسبوع "
ببرود وهو يعدل شماغه بيخرج"اي وجيت اعطيك
خبر ماشاورك"

تقدمت له بسرعه قبل يخرج وهي تمسك يده
وبصدمه"وقف "
وقف بدون ماينظر لها ويشعر ببروده يدها
على يده"هديل انا قلت اللي عندي والباقي عليك"
ولف لها بسخرية"مايحتاج كل هالانفعال والعصبية
زواج رجال فقط "



تحاول تستوعب اللي نطق فيه وهي تفتح عيونها
على الاخر مصدومه منه ومن بروده وبهمس
"زواج رجال"
"اي زواج رجال فقط "وبضحكه نطق
"لان مافيه وقت "وتقدم منها وباس خدهاعلى
السريع وبتهديد"وخليني اشوفك مدخله جدي
او خالد او اي احد هذا زواجي وانا اقرر" وخرج...
تاركها واقفه مصدومه من خبر الزواج المفاجئ
والزواج اللي بدون نساء ..وصديقاتها
ووووو ..جلست على الكنب وهي بصدمتها
مو من حقها تفرح بزواجها وتسوي زفه بإختيارها
وتعزم صديقاتها ليوم فرحها وضحكت بسخرية
وهي تكلم نفسها"عاد مين الزوج ياحسره يسوي

اللي يبي بكيفه..ورجعت تفكر لا لا مو بكيفه اهم
شي عندي انا مااحد يتكلم عني ..اووه كيفهم
خليهم يتكلمون ويق...

"هديل صاير شي ليش تكلمين نفسك"
وقفت بإرتباك وهي تنظر لوالدتها وتحاول
ماتوضح لها شي "لا بس كنت افكر ماهر يقول
انه حدد الزواج بعد اسبوع وزواج رجال"
ابتسمت لها "اي له اسبوع قايل لنا"
بصدمه وقهر"وانا ليش مااحد قالي"
بتبرير لها"كنت متوقعه عندك خبر"
بإستهزاء وهي تخرج وتنطق بعصبية
"موعد زواجي وانا اخر من يعلم ايش
هالعالم هذهِ"







جده 2017



تمشي بخطوات بالصاله ومعها كوب عصير

وانتبهت لباب الصاله الرياضيه مفتوح ..

هزت كتفها بإستغراب وهي تذهب

متوجه له..له فتره ومااحد يدخل الصاله الرياضيه

بمنزلهم..الا فقط والدها اذا كان معصب ومتضايق

دخلت وهي تتوسط الصاله وتنظر لجود عليها

ملابس رياضيه وسبورت والسماعات بأذنها

على الة المشي ...

وبإستغراب وهي تتقدم بخطواتها

"لا صاير بالدنيا شي جود ورجعت للرياضه

والتمارين"



انتبهت لدخول وجدان وتحرك شفتيها بالكلام

لكنها ماسمعت لوجود السماعات وقفت الاله

وهي تمسح على جبينها بفوطتها وتنزل

السماعه"تكلميني"

"اي غريبه ايش اللي طرى عليك وجيتي هنا"

اخذت نفس من التعب والمجهود اللي بذلته

"كذا من زمان ماسويت تمارين ولا رياضه

وطفشت قلت استغل وقتي"

قربت منها ووضعت يدها على الاله

"اي حلو "وشربت من عصيرها

"ابوي خرج مع امي "

بخوف نطقت"امي فيها شي"

ابتسمت "لا شكلهم اشتاقوا لبعض اكثر ووجود.."

قاطعتها جود وهي تشغل الاله بتكمل"الله يهنيهم

وخويلد لايكون معهم"

"لا مع عزام ومعاذ بجناح معاذ"

"طيب بيتأخرون اهلي"

هزت كتفها"ماادري بس قال لي ابوي انتبهي

لخالد بنطلع وبنتأخر"وبحزن"كم لهم ماطلعوا

مع بعض ولا استأنسوا وابوي كله مشغول

فينا"

"مايحتاج تقلبينها حزن ابوي هو اللي ضاغط

على نفسه بزياده "

بإستهزاء نطقت"وكل هالضغط مو عشان راحتنا"

ووقفت "اذا خلصتي انا بالمجلس بروح اجهز لنا

قهوة وحلى"وخرجت....



كملت رياضتها..ووقفت بعد ماانتبهت لجوالها

يأشر باسم هديل ..ردت وهي تلهث جراء المجهود

اللي بذلته"هلا هدول"....





الرياض 2017



ابتسم بسعادة وفرح وهو ينظر لخواته

وفرحهن بعد مااعطى كل وحده 500

البارح كسب من الكفي وتوزعت بينه وبين

زملائه بالشغل وكل شخص حصل على 1000

ريال ..يعتبر جيد نوعا ما باليوم طلع بملغ كذا

..

"عاد بإذن الله اخر الاسبوع نطلع مكان تغيرن

جو"

بفرح وهي ماهي مصدقه"صدق ثامر بتطلعنا"

ابتسم"بإذن الله اذا ماحصل عارض منعني"

نطقت سارة بعد تذكير"الا ثامر قدمت على

الوظايف التعليمية ترى اليوم فاتح التقديم"

تنهد بضيق"اي قدمت والله يرزقنا لكن قليل

احتياج التربية الخاصه"

"الله يكتب لك منهن نصيب"

"امين "ووقف"جدتي مو كأنها تأخرت بغرفتها"

وذهب لغرفته..فتح الباب ودخل وانتبه لها تقلب

بأغراضها قبل رأسها وهو يبتسم"اشوفك

مشغوله"

تربط الاكياس وتفتح بعضهن وهي مشغوله

"اي بعطي ام سعود وام يوسف من الحناء

وقطع الثياب هذهِ"

اخذ كيس من يدها"عطيني اساعدك"

"لا لا يابوي خلهن عنك"ونظرت له

"انت عندك فلوس ترى عندي 800 كان تبي"

"ماتقصرين معي اللي يكفيني"

بصدق وهي تدعي له"الله يرزقك من فضله"







جده 2017...



بعد مااغلقت من هديل واخذت شاور بعد

التمارين والرياضة..ذهبت لوجدان

دخلت وهي تنطق"تدرين ماهر حدد زواجه

الاسبوع الجاي"

بصدمه نطقت"اما"

جلست واكملت بإستهزاء"لا وزواج رجال بعد"

بصدمة اخرى"ليه"

هزت كتفها وهي تمد يدها وتأخذ قطعة حلى

"ماادري عنه غبي"

صبت لها وجدان قهوة ومدتها لها

"قهر كنت متحمسه له"وبإستفسار

"كأنه استعجل ابوي بيروح مع ماجد"

بإستغراب"وين بيروح"

"لفرنسا يقول مهمة عمل اليوم على الغداء

قال لنا"

شربت قهوة"غريبه بالعادة مايتركنا اذا سافر"

"اقولك مهمة عمل"

بشك"مهمة عمل ولفرنسا "





استأذن من معاذ وخرج لمشعل ينتظره عند

المدخل..

"وين طالع"

ناظر له بسخرية"نعم "

"عزام انت تعرف ابوك ماتطلع الا.."

قاطعه وهو يطنش كلامه"مشعل عند الباب

ينتظرني"

"طيب على الاقل استأذن من ابوك"

دون ان ينظر له "مشعل بيدخل معي ماني

رايح"..وبأمر للحارس يفتح الباب

"افتح الباب "واشر لمشعل يدخل

دخل مشعل بسيارته وركنها على جنب

ونزل وهو يبتسم"السلام عليكم"

سلم عليه"وعليكم السلام..اخبارك"

"بخير"

تقدم معه"بنروح للملحق عندي لك كلام"

ابتسم "وانا ليش متحمس"

دخلوا الملحق "بقول لواحد من الحراس يجيب

لنا قهوة"

"لا لا متقهوي وبعد ابوي يقول لاتأخر بنطلع

بعد شوي للبحر"وجلس"اي قلي تحمست"

جلس وهو يأخذ نفس مايدري كيف يبدا

وبتوتر نطق"مشعل انا احب"

فتح عيونه على الأخر وبهمس"تحب"

بتوتر وهو يمسح على شعره"اي "ومسح على

وجه"يوم كنا بالرياض...وقال له كل السالفة

وسط صدمة مشعل الصامت والمستمع له..

اكمل بهدوء"وهذهِ كل السالفه وابوي رافض

طبعاً وانا قلت لياسر يأخذ موافقه مبدئيه"

وبتنهيده نطق"وشكل البنت ماتفكر بالزواج

عشان جدتها واختها"

بحيرة وهي مايدري كيف ينطق او يقول له

شي"عزام مو كأنك استعجلت يوم قلت لياسر

وانت تعرف عمي سعود(يقول له عمي كحترام

له)..اذا قال لا لا"

زفر بضيق"انا ابيك تساعدني"

"انا اساعدك كيف"

"ابوي وعمي ماجد مو قالوا بيسافرون"

نطق بإستغراب"اي"

"نروح الرياض واخطبها رسمي"

بسرعة نطق"لا لا مستحيل ياعزام "

بقهر نطق"وليش مستحيل"

"عزام انت من جدك على الاقل انتظر شهر

شهرين وبعدها كلم عمي بيوافق لاتستعجل"

تنهد "انتظر"

وضع يده على يد عزام وبجديه نطق

"عزام رضى الله من رضى الوالدين واذا انت

سويت شي بدون رضى والدك ماراح تتوفق"

واكمل"انت انتظر وبعدها اقنع عمي واذا لزم

الامر انا اكلم عمي سعود"









الرياض 2017

الساعة 8:00 م..



من ليلة الاستقبال ..وهي تحاشى الجلوس

بمفردها معه..واغلب وقتها تنزل عند عمتها

ام سامي..ماتبي تصير قريبه منه ولاحظت

ضيقه ..لكن ماتبي قلبها يتعلق فيه اكثر

هي ابد ماكرهته وتحاول تقنع نفسها لكنه

امر فوق طاقتها ..ماتقدر تخرج حبه من قلبها

لكن الاهم عندها كرامتها..وتحاول قد ماتقدر

تعطيه حقوقه كامله كزوج..وتقوم بواجبته

مخافه لله لأكثر..لكنه ماطلب شي منها

وصرخ وقال لها ان مستحيل يطلب شي بدون

رضاها..لبست عباتها بتنزل لعمتها واستغربت

منه له ساعتين خارج عن المنزل..اخذت جوالها

بتخرج وانتبهت له يدخل

"وين بتروحين"

ببرود وهي تلف طرحتها"انت سلم بالاول"

بعصبية نطق وسط استغراب ريما اللي

خافت من نبرة صوته"سألت وين بتروحين"

"بنزل لعمتي "وخرجت بسرعة ودقات قلبها

سريعة خوف منه ..

رمى شماغه بعصبية على السرير وهو

ينطق بقهر"طيب ياريما تاركك براحتك لكن

شكل كلام سامي صحيح ماينفع اسكت كذا

واتركها براحتها"







وصلت للدور الارضي وهي تنادي بصوت خفيف

مستغربه من عدم وجودها بالصاله كعادتها

سمعت صوت خارج من المطبخ ..وذهبت له

وبصدمة نطقت بعد مارأت عمتها تقطع بصل

"عمه انتِ بتطبخين"

لفت لها بإبتسامه"ريما"

تقدمت بخطواتها وهي تأخذ البصل منها

"وين الخدامه"

ابتسمت لها "اتركيه عنك انا بسوي لعمك عشاء

تخبرين مايأكل اي اكل"

بإعتراض وهي تنزل عباتها"انا اسويه"

نطقت بسرعه"لا انتِ عروس"

غسلت يدها وهي تأمرها تخرج من المطبخ

"والعروس ماتطبخ اجل اترك تطبخين وانا

موجوده..الله يهديك "

"ماهو متعبني ياامي"

ابتسمت لها بحب واحترام"ايش اللي يحب عمي

وانا اسويه وانتِ اطلعي عن المطبخ ارتاحي

بغرفتك "

ابتسمت لها بحب وهي تدعي لها

"الله يرضى عليك "واكملت"سوي خضار

بس انتبهي لايطلع الملح "وتقدمت بتخرج من

المطبخ

"تأمرين آمر"وتذكرت ونطقت بسرعه وهي

تقدم"طيب سامي وسامر ايش اسوي لهم

عشاء"

لفت لها"الخدامه مسويته"

"طيب"ورجعت للمطبخ ..كملت تقطيع البصل

واخذت الخضار وقطعتهن على السريع..

وبعد عشر دقائق ...وضعت الخضار

على الفرن ..ولفت بعد ماحست بوجود احد

معها بالمطبخ ...



واقف من بعد ماخرجت امه بدقائق وهو يتأملها

ومتكتف ويبتسم رغم عصبيته لها قبل تنزل

"ليش تطبخين وين الخدامه"

بإرتباك من نظراته "عشاء عمي"

تقدم وسحب كرسي وجلس

"ماتوقعتك تطبخين بالعادة المعلمات مايطبخن"

اغلقت غطاء القدر وهي تنظر له بسخرية

"صراحه توي ادري"

ضحك وهو يحرك الفازه الموجوده على الطاوله

"اممم صح ترى بنسافر"

بإعتراض وهي تسحب كرسي وتجلس

"الدوامات بعد اسبوعين وانت..."

قاطعها قبل تكمل"ليش مااخذتي اجازه"

وكمل "بعدين اسبوعين باقي حلو طيب"

ماتبي تسافر معه وبهدوء نطقت

"الاجازة رفضوا حاولت ورفضوا حتى على

حسابي ورفضوا"واكملت وهي تشد على

اصابعها بتوتر"وامك لوحدها تعرف حنان رجعت

مع زوجها"

"امي ماهي لوحدها"ووقف"امي من قبل ماتجين

وهي الحمدالله مكفيه نفسها والخدامه موجوده

وسامي موجود "وبرود نطق"لكن بإختصار قولي

مابي اسافر معك"

بلعت ريقها وهي تقف"صح ماابي اسافر معك"

"براحتك"وخرج عن المطبخ....

تقدمت بتخرج وراه ..لكنها وقفت وهي تتراجع

كيفه يزعل يرضى ليش اهتم له..واذا اهتميت

وبالنهاية تركني مااحد بيخسر غيري...



في منزل الجد ابو عبدالعزيز..يجلس الجد

وبينه ابناء ابنته خالد وياسر وهديل...

"قلت لي ياياسر ان البنت رفضت"

نطق خالد بإرتياح"صدق رفضت"ونظر لياسر

"من البداية خطبتك استعجلت"

بهدوء نطق"مافيه نصيب"

نطق الجد "لعل بالامر خيره"ونظر لهديل

بإبتسامه"انتِ ناقصك شي ماانتِ عاجبتني

فيك شي"

اكمل خالد بضحكه"لايكون عشان ماهر حدد

الزواج الاسبوع الجاي"

نطقت بقهر"ليش زواج رجال فقط"

نطق الجد بإبتسامه"ولا يهمك تبين تعزمين

صديقاتك "ومااكمل كلامه بعد مانطقت هديل

وهي خايفه من تهديد ماهر"لا لا خلاص بما

ان ماهر قرر خلاص "

"الله يوفقهم"

وقفت بعد ماسمعت امها تناديها"امين"وذهبت

لأمها وهي تقف عند الباب"هلا"

نطقت بسرعه وهي تستعجلها"تعالي معي

ماهر مرسل فستانك"

بصدمه وهي تقف بمكانها "فستاني كيف واللي

انا طلبت من..."

نطقت وهي متوجه للباب "بيتأخر ذاك وماهر

جاب لك واحد"

بسخريه وهي تذهب خلف والدتها

"كان ماكلف على نفسه وجاب فستان

يعني بالاخير بنات العايله فقط"

ابتسمت لها وهي تنظر للفستان بإعجاب

"من حقه يشوفه عليك"

سمعت رساله تصل لجوالها بالواتساب

وفتحت الرساله وهي تقرا(ان شاء الله يكون

اعجبك يازوجتي العزيزة ..وعذراً ماهو نفس ذوقك

لكن انا حب الهادي والناعم)

ابتسمت بسخرية وهي ترسل له

(مره اعجبني شكرا )





ابتسم وهو يقرا ردها اول مره ترد عليه بدون

ماتسبه او تقول كلام يعصب فيه..ومايمديه

يكمل ابتسامته الا وصلته رساله منها

(تعبت نفسك بالاخير يطلع ذوقك كذا

مره خايس..متوقع هديل بنت محمد ال..

تلبس كذ)

ضغط على جواله بعصبيه وهو ينطق بقهر

"هذهِ ماهمها الا المظاهر وارسل لها

(مايليق عليك الا كذا ياهديل بنت محمد)





ابتسمت بإنتصار تعلم انها اغضبته من رده

وارسلت له(شكراً يازوجي العزيز)..واغلقت

بعد ماامرتها امها توصل الفستان للغرفه

وصلت الغرفه ونزلته على السرير وهي

تنظر له بإعجاب"والله عنده ذوق"ومدته

على السرير "اممم يبي لي البسه واصور

وارسله لجود "....واغلقت الباب ولبست الفستان

وهي تقترب من المرآه وتنظر له بإعجاب وتلمسه

"حلو اممم كأن ناقصه شي"واكملت وهي

تكلم نفسها"لكن مع الكشخه بالزواج بيطلع

الشي الناقص"واخذت جوالها وهي تصور

سنابه خاصه وترسلها لجود تأخذ رأيها.....

وبدون ماتنتبه حددت ماهر مع جود وهي

تعلق على الصورة(جود رأيك بذوق ماهر طلع

يعرف لحركات البنات وكذا)وارسلتها...

وبعده نزلت الفستان وهي تنادي الخدامه

تعلقه بغرفه الملابس......







يمشي على الدرج بعد ماعكرت مزاجه هديل

بينزل لأهله ..وانتبه لوصول سنابه من هديل

فتحها وهو يقف بإعجاب ويبتسم وعيونه عليها

ويضحك بصوت عالي"اي وتقول لي ذوقك

خايس والله وانكشفتي ياهديل"مايخفي فرحه

بعد ماعرف انه اعجبها بعد ماحطمته بردها له

وارسل لها وهو يبتسم بخٌبث....واغلق جواله بعد

ماسمع صوت والده يناديه...





بعد ماخرجت الخدامه وعلقت فستانها..خرجت

بتنزل ووقفت بعد ماانبتهت لوصول دردشه

من ماهر وهي تهز كتفها "مرسل لي ايش عنده"

وحمر وجهها بعد اللي قرأت وهي تنطق

"الله يأخذ العدو محددته بالغلط اووف يافشلتي

الحين يحسبني ميته عليه وعلى فستانه"وهي

ترجع لغرفتها ووجهها الوان "وقح *****"

ومسحت ووجهها"استاهل احسن ليش ماانتبهت"









جده 2017



تمشي بالصاله بقلق وتوتر اول مره تتوتر كذا

اهلها من العصر طالعين والى الان مارجعوا

والساعة بتوصل 9:00...معها جوالها وتأكل

اضافرها بتوتر وقلق...



"جود يااختي اجلسي وترتيني معك"



اخذت نفس ونطقت"وجدان مو معقوله يتأخرون

كذا"

بخوف نطقت وهي تقف"الله يستر حتى مايردون

وعزام مايرد علي بعد"

ماتقدر تنتظر اكثر"طيب جيبي عبايتي بسأل احد

الحراس او اقول لمعاذ"وبعصبية"سرعه وجدان"



ذهبت وجدان تركض وبعد ثواني رجعت وبيدها

عباءة جود"خوذي"

اخذت عباتها ولبستها على السريع

"انت خليك عند خالد لايصحى يخاف بعد"

وخرجت وهي تتوجه للحراس بتسألهم...

وتدعي بداخلها الله يحفظ والديها..







"سعود تأخرنا "

ابتسم لها وهو يضع يده خلف ظهرها

"ماحسيت بالوقت والله"

ابتسمت له بحب"كانت اجمل طلعه بحياتي

محتاجتها من زمان"

ابتسم لها وهو يمسك يدها ويقف ويتقدم

بخطواته وينظر لأمواج البحر

"اهم شي سعادتك وسعادة اولادي"

نطقت وهي تنظر لأمواج البحر اللي تتحرك

بسرعه مخرجه اصوات"الله يخليك لنا ولا يحرمنا

منك"وبإبتسامه نطقت وهي تنظر له

"الشغل ابعدك عني كثير"

تنهد بضيق وهو مازال ينظر للبحر

"مااراح ارتاح الا لين اقبض على بدر"

نطقت بحزن وهي تسرح مع امواج البحر

"حتى لو قبضت عليه ماراح يشفي

الجرح اللي بقلبي على فقد ولدي وضياع

حياة بنتي"







نطقت بعصبيه وهي تنظر لهم

"اسالكم ابوي خرج من العصر ومارجع

وانت..."

قاطعها احد الحراس وهو ينطق

"سعود قال لنا ان بيخرج ويتأخر غيره ماقال

شي"

اكمل الاخر"يمكن طيب جواله خلص شحنه

او سايلنت"



"مامنكم فايده"قالتها وهي ترجع للمنزل بتذهب

لقسم معاذ مافيه الا هو ...مسرعه بخطواتها

وقلبها ينبض بسرعه خوف وقلق وتوتر على اهلها...



فتحت باب جناح معاذ وهي تنادي "معاااااذ"



مستلقي على السرير وفاتح باب الغرفه ويطقطق

بجواله وهو يضحك بصوت عالي ويكلم نفسه..



"اوووف هذا ليش مايسمع لايكون ماهو هنا"

وتقدمت وهي تمشي بسرعه وانتبهت له متمدد على

السرير ..وتراجعت وهي تنادي بصوت عالي

"معااااااذ"



فز بعد ماسمع الصوت وهو يتلفت من اللي ممكن

يناديه ووقف وانتبه لوقوفها وبخوف سأل

"فيه شي"



بإرتباك وتوتر نطقت"ابوي"

بسرعه نطق وهو خايف"فيه شي"

حست بشعور البكٌاء وهي تبلع ريقها وتحاول

تنطق وهي ماسكه نفسها"من العصر خرج مع امي

وتأخروا وجواله مقفل وامي ماترد"



انتبه لنبرة صوتها وحاول انه مايخوفها نطق بهدوء

"طيب لاتخوفين نفسك يمكن الطري..."

قاطعتها "مستحيل انا حاسه ان صاير

فيهم شي"وانتبهت لصوت جوالها وهي تنطق

بسرعة"امي" وردت بخوف"هلا يمه وينكم..ليش

ماتردون..زين ..طيب ..اوك..ياللا مع السلامه"

وزفرت بإرتياح بعد ماطمنتها والدتها انهم جايين

للبيت..

سأل وهو ينظر لها"طمنيني"

"جايين كان جوالها صامت وابوي خلص شحنه"

وخرجت بسرعه...وهي تركض بتخبر وجدان



دخلت بسرعه وبفرح"وجدان ابشرك بخير

كلمتني امي"

زفرت بإرتياح "قايله لك لكن انتِ خوفتيني"

جلست وهي تنزل طرحتها وعباتها

"اول مره اخاف كذا"

بضحكه نطقت وجدان"يااختي فالينها وحنا على

اعصابنا"

بضحكه ردت"والله ودي اخرب عليهم طلعتهم "

"لا عاد حرام عليك"

"مت جاني كل خيال سيئ "وفتحت جوالها

وانتبهت لسنابة هديل وبإعجاب"ماشاء الله

ونادت وجدان"وجدان وجدان شوفي فستان

هديل"

نظرت له وبإعجاب"يجنن والله ذوق ماهر"

تكتب لهديل"اي "



وقفت وجدان بعد ماسمعت صوت فتح الباب

"اهلي وصلوا"..وذهبت لهم وبإبتسامه

"ثاني مرة اذا طلعتوا وتأخرتوا لاتقفلون

جوالاتكم"

اكملت وهي تمشي خلفها وبمزح

"ثاني مره خروج من البيت مافيه وتأخير

كذا مافيه..انتم ماعندكم احساس"



ضحك بعد تقليدها له "اوووه اشوف جود

معصبه"ونزل الاكياس الموجوده بيده

قبلت رأس والدتها ورأسه وبدلع

"مره عصبت خفت يصير لكم شي "وبتقليد

لصوت والدها"الى متى وانا اتكلم مافيه لا احترام

ولا تقدير ماترتاحون لين تجننوني"

ضمها لصدره وهو ينطق"حافظه كل كلامي

شاطرة "

نطقت والدتها بإبتسامه"ليتها تطبق بالواقع"

بعدت عن والدها وبتمثيل للزعل

"حرام عليك يمه والله اطبق كل شي"

نطقت وجدان بسخريه

"اي مره"ولفت لأمها وهي تجاوبها

"ماادري والله ندق عليه مايرد"

بخوف نطقت"كيف ماتدرين"

بإستغراب وهو ينظر لهن

"فيه شي"

نطقت جود "وجدان ترى يمكن بغرفته او نايم"

"طيب بروح اشوف"

جلس سعود وهو يسأل"خالد وينه"

"نايم"

نزلت عبايتها وهي تمدها لجود

"قولي للخدامه تعلقها او علقيها "وجلست

"خالد اكل شي قبل ينام"

"اي وجدان اعطته"

رجعت بعد دقايق "طلع نايم عزام"

تنهدت بإرتياح"الحمدالله"

"ترى جايب عشاء معي من البيك اذا ماكليتن

شي"ونزل شماغه ووضعه على الكنب



استنشقت الراحه "اممممم والله جوعانه"

"تعشن ترى انا وامك اكلين"

نطقت وجدان بمزح وهي تفتح كيس من الاكياس

"كأنكم متسوقين كثير"

ابتسم "اعجبتني اشياء كثيره وماخليت بخاطري

شي"

تشم عطر وهي تغمض عيونها"الريحه بالراس"

ورشت منه



نطقت وهي تضع العشاء على الطاوله

"كأنه يشبه ريحة عطر عزام "



"هو لعزام اصلا اعرف يحبه وقليل يصير

متواجد بالسوق واخذته له"



فتحت كيس اخر "هديه لمن"

نطق سعود بسرعة"لاتفتحينها لمعاذ"



نطقت جود بسرعه بعد ماتذكرت معاذ

"وجدان معاذ شكله ماتعشى يووه نسينا"

وقف سعود وهو يأخد معه عشاء والهديه

"انا بروح له"...



"يمه كيف الطلعه واضح انها كانت جميله"

ابتسمت لها"اي الحمدالله غيرنا جو"

بمزح نطقت"عاد ليش مااخذتونا"

كملت وجدان"صادقه اجل تفلونها وحنا مسيكينات

بالبيت "

ابتسمت لها وهي تقف"خلينا نطلع يوم

بدونكم"





دخل جناح معاذ وهو ينزل العشاء على الطاوله

وينادي "معااااااذ"



خرج من غرفته بعد ماسمع صوت عمه وبإبتسامه

"هلا والله" وقبل رأسه"الحمدالله اللي جيتم

والله جود شوي وتبكي"

بإستغراب وهو يجلس"ليه قايله لك شي او مكلمتك"

جلس وهو يتذكر وقوفها وبضحكه"جت هنا وشوي

وتبكي وهي خايفه"

ابتسم"قايل لهن انا بنتأخر بس ماادري ليه

خافت"واخذ الهديه ومدها لمعاذ

"هذهِ هديه بسيطه مني اتمنى تعجبك"

ابتسم وهو يأخدها"تسلم"وحرك الهديه وبمزح

"عاد تعرفني معاذ مشفوح مااقدر اصبر

بفتحها"

وقف وهو يبتسم"انت تعشى وبعده افتحها

انا بروح بكره رحلتنا بوقت مبكر.."وبهدوء

نطق"ومااوصيك يامعاذ على اهلي وخصوصا

عزام انتبه له تعرف طالع بمهمه صعبه وماادري

ارجع منها او لا لكن اذا صار شي اهلي امانه

عندك"

بضيق وتأثر من كلام عمه نطق

"لاتوصي وبإذن الله ترجع سالم ومايصير الا

كل خير"

"الله كريم".......وخرج



اخذ العشاء وهو جائع رغم كلام عمه اللي

قال له وهو متضايق اول مره احد يوصيه على

شي ويكون بالنبرة هذهِ..نطق"الله يحفظك

ياعمي"









صباح جديد..

بعد ماودع والده مع معاذ بالمطار وهو يشعر

بضيق لأول مره يجيه الشعور هذا وكأنه اخر مره

يرأى فيها والده...زفر بضيق وكلمات والده تتردد

بذهنه"خواتك وامك امانه عندك اذا صار لي شي

انت تعرف اني متطمن لوجودك والا مااطلع لمهمه

خطيرة كذا..لكن بأخذ بثار ولدي ووطني..وكل

هذا مفتاح الوصول اليه هالشخص(حسن).."

فاق من سرحانه بعد ماهز كتفه معاذ وهو

ينطق"ياللا عزام بنرجع"

رد بضيق وهو ينظر لأخر مره للمطار

"طيب"

"كأنك متضايق شوي ايش رايك نروح

نفطر"

ماله نفس يأكل ولا يسوي اي شي ضيقه

تكتم على صدره وخوف من سفر والده

وبحزن نطق"ماودي اردك لكن والله مالي نفس"

زفر معاذ بضيق وهو يضع يديه بجيب بنطلونه

"حتى انا لكن قلت بغير مودك شوي"وبسرحان

"تصدق اول مره ماارتاح لسفر عمي"

قبضه قلبه حتى معاذ حاس بنفس الاحساس

وبلع ريقه"الله يحفظه ويرده بالسلامه"

"امين"







الرياض 2017



الساعة 6 م..

خرج من المنزل متوجه الى كفي ثامر..بعد ان طلب

من هديل ان تعلن عنه..في سنابها..قبل يومين

ومنها يتسلى مع ثامر وزملائه..بعد نصف

ساعه وصل للمكان وهو يبتسم بفرح بعد العدد الهائل

من الزوار الشباب...



"تو مانور المكان حي الله ياسر"

ابتسم وهو يتقدم"لا ماشاء الله اليوم زحمه"

"من الله ثم من بعد ماعلنت عنه الله يجزاك خير"

جلس وهو يشعر بسعادة وفرح لفرح وسعادة ابن

عمه"عاد ابي احلى قهوة عندكم"

"تبشر كم ياسر عندنا"ووقف"فيه كوكيز الطلب عليه

هائل لازم اذوقك منه"وذهب...

ابتسم وهو ينظر ثامر.."الله يرزقك"







جده 2017





الساعه 7 م



يخرج لأول مره هو وابنه واحمد بعد ان

اخبره عبدالرحمن بسفر سعود ولكن لم يقل

له انه سافر لفرنسا..فقط اخبره بان سعود سافر

ولم يخبر اي احد من رجاله عن مكان سفره

لكنه..توقع سفره لفرنسا..من اجل حسن...



يجلسان على شاطئ البحر.وسط اصوات

امواج البحر وضحكات عبدالله البريئه وفرحه

وهو يلعب بالكره بجانبهم...

"بدر له مده ماكلمني تدري عنه"

بتحفظ نطق"اي بخير كلمني قبل يومين"

بشك وهو ينظر لبندر"فيه شي مااعرفه انا"

بدون ان توضح عليه اي ملامح نطق بثقه

"لا مافيه شي"وغير الموضوع"تصدق اني

افكر اخطف جود ونسافر بلا رجعه"

ضحك وهو يقف"شكل مافيه الا كذا "

وقف بجانبه "كل مره اقول بتهون تصعب"

بهدوء نطق"انت لو تترك حبك على جنب بترتاح

لان صعب صعب يابندر"

مسك يد ابنه ويده الاخرى كرته"ادري صعب لكن

مافيه شي يجي بسهوله وجود اذا ماكانت من

نصيبي ماراح تكون لغيري"







تنظر من شباك غرفتها بسرحان لمعاذ الجالس

امام بركة السباحه في الحديقه..وهي تفكر

ليش جالس وايش يفكر فيه..اغلقت الستارة

وهي تكلم نفسها"اكيد اشتاق لاهله الله يعينه"

وردت بعد ماسمعت كلمة وجدان اللي دخلت عليها

فجأه"معاذ"

حركت حواجبها وبإستغراب نطقت

"ليه ايش صاير له"وتقدمت وجلست على السرير

"اشوف كأن اهتمامك مبالغ فيه لمعاذ"



ابتسمت بسخريه وهي تجلس جنبها وتمسح

على مفرشها بخفيف"يعني تعرفين تفكيري من

هالناحيه"

"جود طيب عادي ايش فيها اذا تزوجتي وحبيتي

وعشتي حياتك"وبجديه نطقت"الحمدالله شي

صار لك مو بإرادتك ليش تعذبين نفسك"

بسرحان وهي تنظر قدامها

"مااحد يحس ولا يشعر باللي اشعر او احس

فيه شي يقتلني من الوريد للوريد"ووقفت وتقدمت

للمرآه وهي تنظر بوجهها"كل مافكرت وقلت بحاول

اعيش حياتي وارضى باللي كتبه الله لي اتذكر كل

شي صار لي واكره نفسي وعيشتي"

تقدمت لها ووقفت جنبها وهي تصف الاغراض

الموجوده على التسريحه"بالعكس المفروض تصيرين

قويه وتنسين كل شي تفكرين بحياتك المستقبليه

وتنسين الماضي وتتركينه خلفك انتِ بعز شبابك"

نطقت بسخرية وهي تلف ووظهرها للمرآه

"بعز شبابي لكن ايش الفايده اذا انا افقد اهم

شي تملكه كل بنت ..ايش الفايده وانا اعيش

بمسمى مغتصبه..ايش الفايده وانا اعيش جسد

بلا روح..اعيش واتعذب والمذنب يتمشى بكل

اريحيه وكل مره يفشل ابوي بالقبض عليه"

نطقت بحزن وهي تتذكر والدها

"ابوي ماقصر كل شي ضحاه عشان راحتنا"











فرنسا 2017



.........ثلاث ايام مرت وبالتنسيق مع كل

الجهات والسفارة السعودية بفرنسا والشرطة

والسلطات الفرنسية. والاستخبارات الامنيه

وبعد التأكد والتحقق من المعلومات ..

حان الان مداهمة وكر حسن

بمساعدة الشرطة الفرنسيه ...خرج هو وماجد

ومجموعه من قوات الامن الفرنسي..وتوجهم الى

مكان وجود حسن......





من بعد اختفاء بدر وهو على اعصابه ومشدد

الحراسة على منزله..وواضع كاميرات بكامل

اسوار المنزل...يجلس بالصاله وهذه رابع

سيجاره يستنشقها ...سمع صوت ركض

ودخول احد رجاله وهو ينطق بإرتباك وخوف

"الشرطة "

بصدمه نظر له وهو يتقدم مسرع للكاميرات

"شرطة اي شرطه"ونظر وفتح عيونه على الاخر

سيارات شرطه غفيره وعلى جميع اسوار المنزل

صعب ان يخرج او يهرب ..وبصراخ وهو يركض

للأعلى"بسرعه جهزوا كل شي ولا احد يستسلم

او يهرب "وركض مسرع وهو يدخل الغرفه

ويأخذ اسلحته ويضع الرصاص فيها بعجاله

"الله يأخذكم "وخرج مسرع وهو يصرخ

"اثنين يحموني بسرعه"واستعد للمواجهه....





وصلوا للمنزل..وبحراسه تامه اقفلوا جميع المداخل

والمخارج...ونزل سعود وماجد وهم يحملان اسلحتهم

وخلفهم اربع من الجنود...وباقي الجنود الكل بقي

في مكان في استعداد للمواجهه..



تقدم بخطواته بحذر وماجد بجانبه

"ماجد انتبه ترى حسن خطير وزي ماتشوف

دخولنا بيكون صعب"





ينظر بإحدى الكاميرات وبصراخ بعد ان رأى

تقدمهم"اطلقوا النار قبل يدخلون"وركض للاعلى



اطلق رصاصه على مدخل المنزل وهو يدخل

بسرعه بعد ان سمع اطلاق النار ..وماجد

اختبى في مكان اخر ...



تبادلوا اطلاق النار ...وتقدم سعود بخطوات

وهو يتلفت بحذر وموجه المسدس امامه...

صعد للأعلى وهو يتقدم بخطوات حذره

وبطيئه...يسمع تبادل اطلاق النار واصوات

طلب رجال الامن منهم تسليم انفسهم ولكن

لامجيب....



وصل للاعلى وهو يتقدم بخطوات بطيئه

وانفاسه متسارعه وتوجه لإحدى الغرف

ووقف بعد ان سمع الصوت خلفه وهو يدعي

الله بأن يحميه من كيد حسن وشره



"والله وجيت بنفسك ياسعود"ووجه المسدس له

وهو يقترب منه بعد ماطلب منه سعود تسليم

نفسه"مصدق نفسك انت ان حسن ال...

يسلم نفسه "....واطلق رصاصه استقرت

في صدر سعود واطلق اخرى سقط على اثرها

وسط دماءه ووجهه الثالثه وهو يبتسم بإنتصار ولكن

التفت للخلف بعد ماسمع خطوات قادمه وحاول اطلاق

النار ولكنه ماجد كان اسرع منه واطلق عليه..

رصاصه استقرت في رجله صرخ على اثرها



"اقبضوا عليه لايصير له شي ولا يموت

انتبهوا"



تقدموا بخطوات سريعه وهم يتوجهون لحسن

ووقفوا بعد ان وضع المسدس على رأسه لامفر

له من الهروب ولا يستطيع التخلص منهم

ومستحيل ان يسلم نفسه وبألم نطق وهو

يصرخ"ماقدرتوا علي قبل ٥ سنوات بتقدرون

علي الان...واطلق رصاصه على راسه تناثرت

الدماء في المكان وخر ساقطا على الارض

يسبح بدماءه....



نطق ماجد بسرعة وهو يركض لسعود

"الاسعاف بسرعه"وانحى على قدمه

"سعود"ورفعه

بألم والدماء تنزف منه وبصوت متقطع نطق

"ما ا ا ج جد عياا لي امانه عند ك "...........









جده 2017

سقط ماتحمله بيدها وقلبها يقبضها وسط

استغراب وخوف من ابناءها..وبدموع وهي

تقف بعدم اتزان ورؤية ضبابيه نطقت بهمس

"عزام ابوك ماهو بخير"...........







"نقف هنا"



وقفه(‏نحن نختلف فقط

في طريقة الوداع )

تحياتي دييييما

سنابي :deema99d

فصل جامد يا دييما لكن حزينة على سعود يارب يرجع لاولاده بالسلامة مافى داعى تموتيه لاجل خاطر جود.... تمنياتى بالتوفيق

قطرة رهيبة وساخنة جدا يا ديمااستقرت في اعماق قلوبنها جميلة في البداية وحزينة في النهاية اتمنى ان لا يموت سعود الظلم لا يجب ان يكون منتصر للنهاية وسعود ظلم من المجرمين لانتقامهم من ابنائة بسبب عملة ما يخالف اتصاوب بس لا يموت
مشكورة على الفصل الساخن ..... في الانتظار دائما