عندمآ آستخررت الله
ب وجودگ في حِيآتي
ھمست :
إن گآن خيراً
فَ أجعله معي (دائما )
وإن گآن شــراً فَ أجـعل فيّه
آلخير( ثــم )إجععَله معي دائمآ..!!
""""
الساعه 6 المغرب/
العنود: بصراخ ,بنات اصحو الساعه 6 >>تسحب البطانيه من فوق نوره
وكملت/آحلام يالله عشان تساعدوني على العشاءء عندنا>>واقفه عن راسي..
طلعت العنود لغرفة ساره وندى بعد ماتاكدت اننا صحينا ,
لبست نوره وانا لسى خادره على السرير
ماشبعت نوم ,تذكرت عناد وريم اليوم الظهر وابتسمت حمدلله...
انها ماقالت له اذا رجعت الرياض براحتهم ..!!
قمت وغسلت وجهي بمويه بارده ابي النوم يطير ,
لبست تنوره قصيره وبلوزه وحطيت كريم وروج
ومسكره وحددت حواجبي ولبست عدسات وعدلت شعري وطلعت...
طاحت عيني على ريم وشلت عيني بسرعه وانا رايحه للمطبخ ,,,
سلاااااااام>>وانا داخله مع الباب
العنود: تعالي جابك الله سوي جريش على ماخلص السلطات وكملت// تكفين بسرعه..
البنات كل وحده اخذت شغله حتى نوره ...
رفضت تجلسس مع الحريم وجاتنا بالمطبخ تساعدناا..؟؟
الساعه وحده بعد ماخلصنا ونظفنا الاستراحه نمنا ,,,
آول يوم فالعيد كان متعب جدآ...!!
صحتني امي 11الصباح وهي تقول ان الغداء عندنا..
( يعني اليوم الثاني بالعيد عند راكان) على ططوول صحيت ولبست
بنطلون جنز اسود وبلوزه كت موف ضيقه من عند الرقبه
وواسعه في منطقه الخصر وعلى نهايتهاا ضيقه , شلت شعري بربطه كالعاده
اذا اشتغلت مااحب شعري مفتوح , ماحطيت ولا شي رحت للمطبخ حتى البنات ماصحيتهم,,
بديت اجهز اغراض الغداء ,جوني البنات على 12 وساعدوني حتى ريم كانت معهم ,
حنا متعودين نساعدبعض يعني مستحيل تشتغل وحده لوحده والباقيات فاضيات ,
تربعت الساعه ثلاث بعد ماخلصت بالصاله وانا اقوول:
آآهـ ياظهري وه وه بينكسرظهري بينكسر>> وانا امسك ظهري
ساره: ههههههههه عجوووز
احلام اليوم عجوووزز>> هووباا على الكنبه
نوره: اثاريني بنتٍ سنعه ماتعبت>> معهاا كوب مويه
ندى: بروح انزل العدسات ماعاد اشوووف وبرقد..>>رايحه للغرفه
العنود: اخذيني معك >>قايمه معهاا
قمت من عند البنات وانا اقووول بروح ارقد واللي تقرب مني بكسسر رجلهااا..؟
نوره: سووووسو سويره الشينه بتخمدين ولا جالسه>> تناظر فيهاا
ساره: لا مافي نوم بجلس ليش اذا ناويه تجلسين معي بروح ارقد>> مشغوله بالجوال
نوره: لا انا ناوويه ارقد>> تصرف
تركتهم ورحت لغرفتي ولبست بجامتي ونمت خلال ثوان...!!
صحيت مع صلاة العشاءء ومالقيت بالغرفه احد استغربت الباب مسكر والاصوات عاليه
صليت ودقيت على نوره وقلت لهاا تعالي,
جاتني نوره وقالت ان العشاءء الليله عند عمي ابو عناد
هاوشتهاا على انها ماصحتني >>تقول خليناك لاانك تعبانه ..
لبست فستان قصير اسود وتعلقيه طويله فضي وحلق سوية مكياج خفيف وروج احمر ,
عطر وكريم وطلعت ,
لقيتهم مجتمعات كلهم بالصاله حتى الحريم الكبار وجدتي,,
سلااام> وانا طالعه من الغرفه .
جلست جنب نوره وحطيت رجل على رجل..
نوره: ماتلحظين اننا كلنا عادي الا انتي متكشخه >> وتغمز بعينهاا
عارفه وش قصدهااا ..
آحلام: والله حبيبي انا وحده متعوده على كذاا آهم شي اناقتي >>
رغم اني احس شكلي عادي ومو متكشخه على قولتهاا..؟
ساره:عطرك خفي عليه ريحته واصله سابع جااار>>تتمسخر تتكلم وتناظر بندى
آحلام: هاذي تكلمني>>اكلم نوره
ندى: لا لا تلكمني انا توي متعطره >> تناظر فيب طرف عينهاا وتضحك
نوره: يالله شمري عن كفوفك العشاءء عند عناد>> بصوت واطي
ضربتهاا بقوه وانا اقول انطمي امي تسمعك >> امي كانت قريبه من نوره والظاهر
انها سمعتهاا , حتى نوره خافة وصارت تسأل البنات سمعو صوتها ولا لا...؟؟
الساعه 10 ونص استحيت كل البنات قامو مع ريم للمطبخ الا انا ,
نزلت جوالي على الكنبه ولحقتهم,
دخلت المطبخ وانا اقووول...
ريم خدمه شي>> مستحيه منهاا
ريم: امممم ايوه تكفين تعالي ساعدي نوره عشان نخلص بسسرعه ,,,
ساعدت نوره وجهزنا معهاا الاغراض طلعت على صوت عناد بالسيب
قريب من المطبخ وهو ينادي ريم,
جلست بالصاله وشويه جوني البنات وندى تقول:
آحم آحم ليه طلعتي>>جالسه جنبي
احلام: وش رايك اجلس والرجال جاي ياخذ العشاءء >> باستفهاام
ندى: ياشيخه حنا عارفين ان عناد ماراح يدخل وخصوصآ انه يعرف اننا بالمطبخ ..؟؟
آحلام: ماطولت السالفه معهاا خايفه امي تحس بشي بعد كلمة نوره وامي من النوع اللي ينقد
يعني بتجلس تذكرنيهاا الين ولد ولدي....؟؟
* مراليوم الثالث للعيد بشكل عادي وبكره ملكة نوره واحمد...
الساعه 12 بغرفة نوره تجمعناا وكانت العمه نوره مسويه قناع
لوجهها وتبيني احطه ,هوووبااا فوق سريرهاا
وبديت اظهر مواهبي , دق الباب وماعطوني فرصه اقول ادخل ...
دخلت المسيره بقيادة ساره ومعهاا وساده وجوالهاا ولابسه بجامه والله واعلم ناويه تنام معناا هالليله.,,
بعدهاا العنود والغريب ان معهاا كيس وفي نفس الوقت وساده بعد...
ندى ختمت المسيره وللمره الثالثه على التوالي معهاا وساده ...
وانا اناظر فيهم حطيت الدفعه الاولى من الخلطه على عيون نوره >
المفروض ابداء واحط على الخدود واتدرج على بقية الوجه*_*
بس نسيت وضربت بالخلطه على عيونهاا
جلسو الثلاثي المرح بشكل مؤدب على سريري>> وانا اناظر فيهم قلت
نوره شوفي من جانا وشوفي وش جايبين >>اقصد الوسايد
نوره: آحلام انا ماشوف شي الكهرباء طفت >> نسيت الخلطه
وماكلفت نفسي اناظر لهاا قلت/ احووول بسرعه شوفي الهوانم وش مسوين ..؟؟
نوره: يابنت انا مااقدر الشوف اللي حطيتيه على عيوني ويش ..
ذكرت الخلطه وناظرت فيهاا..!!
آآوووف ماعليش ياقلبي بس حساافه ودي تشوفين بنات عمك وش مسوياات.>>وانا اضحك
جلست رغم ان الخلطه مغطيه عيونها تمامآ *)*
نوره: الشرهه علي انا اللي خليتك تلعبين بوجهي احد يحط خلطه على العيون ..
بالله جاني حرامي كيف انحاش>> تفكير سليم*_*
نزلت راسها على الوساده وانا اقول:
خلاص خلاص بحط الخلطه كامله واذا غسلتيهاا تشوفينهم >>وبديت احط الخلطه
ساره: بنات انا مع احلام>> فتحت عيوني بقوه وناظرت فيهاا / وش تقصد
العنود: انا مع نوره.........؟؟
>> نوره على طوول جلست وهي تقول : اسمعو عويذ الله من شركم
انا عندي شبكه ولازم انام زين>>فهمت قصدهم..
فتحت فمي وانا اقول انتي بتنامين معي >>ااشر على ساره ويديني ملطخه بالخلطه..
انصدمت بندى تقول>> وانا بعد / وترفع يدهآآ...
نوره جالسه وعيونها ووجهها مغطى بالخلطه وتقول >>برآآ
العنود: آهبي تتكلم وماعندهاا وقت تطرد..
جلست مع نوره على السرير وانا حاطه يدي على وجهي وانتظر
نوره تخلص مدة خلطتهاا عشان نتفاهم معهم,
نوره تتوعد فيهم وتحلف انهم ليطلعون من الغرفه بالطيب ولا بالغصب...؟
الهوانم جالسات وحاطات الوسايد على سريري ساره تلعب بالجوال والعنود
ماسكه كيس مدري وش سالفته وندى
تناظر باظافرهاا وداخله جو..؟؟
عشر دقايق وراحت نوره تغسل وجههاا وانا مطمنه على الاخر
وواثقه بقدرات نوره على اخراجهم من الغرفه....؟؟
وقفت عند التسريحه تناظر بخشتها وهي تقول>> يازين النور زينااهـ *_*
لفت وحطت يدينها على خصرها وقالت:
عسى ماشر ليه وسايدكم معكم غرفتكم محتله مثلآآ...*_*
ساره بكل ثقه>> لابس بنرقد عندكم فيهآ شي>> تسأل ندى والعنود
العنود + ندى: بصوت واحد لاوالله مافيها شي>> اتفاق تام..
كنت اضحك منهم وبسرعه انكتمت على صوت نوره: احلااام انطمي *_*
آن شاءالله ماطلبتي شي>> راعو انها معصبه)(
يالله انقلعوو على غرفتكم بنام>>بصوت هادي تخوفهم
نوره طل وقدرات نوره طل> قامت ساره ونزلتني من فوق السرير
ووقفت جنب نوره وانا اطالع فيها....؟؟
وراحت ندى خلف سرير هي والعنود واسحبو الاسره ولصقوهاا ببعض
ورتبوا الوسايد وصارت الاسره كآنهاا غرفة
نوم كامله , هوووووووووباااااااا كلهم فوق السرير..
العنود: شفتو ياغبيات كذاا تكفي الشله كلهاا >> وتنقز على السرير
ندى: انا بالوسط والله مااحب الطرف >> وتاخذ وسادتها وتحطهاا بالنص..
ساره انا هناا تقصد على الطرف >>وكملت// نوره واحلام هنااا تأشر على مكان صغير بالطرف الثاني..
نوره: والله ماقصرتو عساها بموازين حسناتكم/ حمد االله انهم مانسونا>>تكلمني
ضحكة وانا اقول: نوره انا على الطرف والله مااجي بالنص>>
ورحت حجزت الطرف الثاني بسرعه
نوره: مستغربه مني ومقهوره منهم...؟؟
نوره: بنات برآآ >> للحين عندهاا امل
ساره: اقول انطمي وتعالي ارقدي الليل سرآ>> مجهزه بترقد
جات نوره مكسورة الجناح ورفعت البطانيه ودخلت بالنص وهي تقول :
الله يصبرني على اليومين اللي باقيه معكم >>تضحك
ندى: وحده تطفي الانوار بنااااااااات بنااااام >> شين وقوي عين&_&
نوره: حسبي الله ونعم الوكيل ربنا على الظالم والمفتري مغطيه وجهاا بوسادتهاا
العنود: خير ماتشوفين >> بعصبيه
رفعت راسي بشوف وش تقصد وشفتها فاتح الكيس ومطلعه
انواع الكريمات ومنزله بلوزة البجامه ومخليه
بدي مغطي منطقة الصدر بس وتدهن جسمهاا ..
استغفر الله العظيم تستري يابنت >>وانا فاطسه ضحك
نوره سمعت تستري يابنت ونست النوم بتشوف من اقصد>>رمت الوساده وجلست
ول ول ول ول هاذي وراهآ متبرجه >>نوره
انا وندى يسمع شهيقنا الاصم من ردة فعل نوره..؟؟
ساره رفعت البطانيه وهي تقول: وش فيكم...؟
لا لا لا حنا مااتفقنا على كذاا اهم شي الاخلاق>>ساره وهي تغطي عيونها بيدها
العنود: وش فيكم اول مره تشوفون احد يحط كريم وبعدين انا متستره اخمدو وخلوني اركز اي كريم
يحط اول...>> ورجعت تكمل على قولتهاا
قامت العنود بعد ماخلصت وطفت الانور والبنات الباقين مالهم صوت الظاهر نامووو ,,
استعديت انا بعد لنوم على صووت شخير بنات عمي....!!
xxxxxxxxxxxx
صحتنا نوره الساعه 2 الظهر وبعد الغداء رتبنا غرفة نوره لاننآ مواعدين كوافيره
لبنانيه تجينا بالاستراحه بعد العصر ...!
عرفنا من ساره ان خوال عناد وصلو لطايف واستاجرو شقه قريب من القاعه ونفس الحال
خوال نوره, خوال احمد جايين من البارح وساكنين عند جماعتهم هنا بالطايف..
على الساعه 5 جتنا الكوافيره وبدت في ساره لانها مستعجله وتبغى تروح للقاعه بدري..
خلصت ساره وراحت مع امهاا للقاعه ومع الحريم الكبار كلهم حتى امي ,
ومابقى بالاستراحه الا انا ونوره وندى والعنود وريم..
بدت الكوافيره تجهزنا وخلصت العنود وريم وراحو مع عمي بعد صلاة العشاءء للقاعه..
الكوافيره المتخصصه بنوره بدت فيهاا من بعد المغرب بالمكياج ثم التسريحه..
انا وندى كنا عند المساعده لهاا وكان مكياجنا ناعم جدآ رفضت تسوي لي تسريحه رغم محاولات ندى
طلبت منهاا تنزل مقدمة شعري على الجهة اليسرى وتشيل شعري من الجهة اليمنى ,,يعني اغلب
الشعر نازل على وجهي من الجهةاليسرى ومغطيه..؟
فستاني كان آصفر قصير الين فوق الركبه بشوي وضيق ,مع اكسسوارات وردي باليد اليسرى وحلق وردي
وجزمة كعب وردي وشنطة يد وردي, سوية مكياج كامل وركزت على الكحل ولبست عدسات سماوي..
وحطيت العطر والكريم والمرايه ومناديل والجوال بالشنطه ولبست عبايتي ورحت لنوره...؟؟
نوره كانت غير غير بكل ماتعنيه الكلمه من معنى آنوثه طاغيه حتى اسلوبها وكلامها ونظراتها فاجأتني..
انحرجت من تركي لانه هو اللي جاينا بياخذنا للقاعه وماقدر عمي يجي..
مامعي وقت ادق على احد من اخواني ولا اقدر
أخر تركي وهو جالس ينتظر ,ندى تقوول عادي يابنت بنروح مع نوره ..
وربي وقفت عند باب الاستراحه وانا ارجف ماابي اروح معه بس البنات والظروف اجبرتني,
نسيت اني ااكد على خواني يجون
ياخذوني وتوقعت عمي هو اللي يجي لنوره ,,
تركي ملىء عيني وهو يستقبل نوره يااااه الموقف غير حسيت باحساس
غريب عباية نوره كانت مع ندى
ولاننا خايفين على التسريحه رفضنا تلبسهاا الا عند باب الاستراحه ,
عند باب الاستراحه كان واقف تركي,انا وندى
كنا نمشي خلف نوره وهي لابسه الفستان الاحمر ونشيل الذيل دخل تركي عند الباب وهو يبتسم ,,
سلم على راس نوره وهي اصغر منه وقال:
مبرروووك يابخت احمد باختي >> يضحك ويناظر فيهاا
تركي كاشخ يحق له ملكة اخته والواقف ورا نوره ندى يعني الرجال في قمة فرحه..
اخذ العبايه من يد ندى ولبسهاا نوره ورمت الطرحه وطلعت مع الباب وهو يشيل ذيل الفستان,
تركي رغم الطنخه والهيبه والرزه والجمال بكل تواضع يشيل فستان اخته,,
ندى ذوبان تااام لدرجة انهاا ماسكه يدي اليمنى وضاغطه عليهاا بقوووه
حسيت الدم بيتوقف والسبب هي,,
فتح الباب وركبت نوره قدام وشال الفستان وسكر الباب وهو يقول:
يالله يابنات عمي حياكم الله فسيارتي المتواضعه >>فرحااان
ركبت ندى خلف تركي وركبت انا خلف نوره ,
المشوار من الاستراحه الى القاعه ربع كانت صمت مطبق
نوره مستحيه من تركي وانا وندى مستحيل نتكلم , تركي اول ماركبنا قااااااال:
مبرووك ياخيه عقبآآآآآآآآآآلي>> وهو يشيل مراية السياره لفوق عشان مايشوف اللي بالخلف..؟
دخل السياره داخل القاعه ونزلنا للقسم الخاص بالعروسه وصوووت الاغاني يلج بالمكان..؟
تركي نزل نوره ودخلها الغرفه وتصور معهاا وطلعت انا وندى رحنا لغرفه فاضيه
ونزلنا فيهاا ورحنا للحريم بالقاعه الكبيره..
مشينا على الجسر وانا مبتسمه وماسكه شنطتي بيدي اليسرى , حسيت بشي من التباهي او الغرور مدري..!
بس ماطول كثير هي اللحظه اللي كان الكل يطالع فينا وبعدين رجعت لتواضعي وبساطتي..
وانا واقفه مع البنات على الكوشه تمنيت اشوووف مهاا , تحرك جواي شي ابي اشوفهاا ,,,؟؟
نزلت ل امي وجلست معها هي وخالتي وجدتي,
ساعه مرت على وجودي بالقاعه وانا جالسه مع خالتي
وتاركه البنات على الكوشه , شفت ريم تمشي على الجسر رايحه للبنات
ورجعت اضحك مع خالتي واسولف,
بعد 5 دقايق شفتها نازله من على الكوشه وتناظر بتجاهنا , وقفت الاغاني فجأة ...
خالتي: آحلام وش فيهم لايكون الزفه>> وتناظر في..؟؟
آحلام: لا مستحيل ولا نادوني البنات>> مستغربه
لفيت اشوف ريم وين راحة شفتها مقبله علي ..؟؟
قبل لاتوصل عندي سالتهاا وش فيكم بصوت عالي...؟؟
وقفت وحطت يدها على كتفي وهي تقول:
ماعليش باخذ حلومه دقايق>> قلت اكيد صاير شي ..
وقفت معهاا وانا مستغربه البنات واقفين يناظرون بتجاهناا..؟؟
مسكة يدي اليسري وشبكتها بيدهاا وقالت تعالي...
مافكرت بعناد ولا ان ريم اخت عناد كان كل همي شبكة نوره وانها تمشي تمام...
الكل تقريبآ يناظر في انا وريم آول ماطلعنا على الجسر شغلو البنات اغنيه ..؟
> حسيت انها حركه من ريم
خصوصآ انها تمشي حبه حبه حبه وتناظر في وتبتسم وتقول:
ابتسمي هاذي الزفه الاولى>> وتبتسم
ابتسمت على خفيف وانا اناظر فيهاا وجسمي يرجف ليه سوت كذااا.....؟؟
رقصت مع ريم وانا مجبوره و مجامله لهاا والشله الفاسده متعاونين علي
يصفقون ويصارخون ويصفروون ,,,
بعد ماخلصنا رقص مسكتني ونزلتني معهاا قلت بصوت واطي وين رايحه قالت :
ابيك تسلمين على جدتي وخالاتي >>وتغمززز لي
عدلت شعري بيدي اليسرى وهي ماسكه يدي اليمنى بالقوه ورافضه تفكهاااا..؟؟
وقفنا عند طاولت خالاتها وسلمت عليهم ,
وراحت تعرفني عليهم وصلت عند عند عند >>> مهآآآآآآآآآآآآآآ
ابتسمت لي وابتسمت لهاا وكانت اخر وحده لفت ريم وهي تعرف بي
ريييم: احلام بنت عمي وخطيبة عنااااااااااااااااد..........؟؟؟
ابتسمت >> وانا حاااقد على ريم بقووووه واتحلف فيهاا بصدري..؟؟
من زود الميانه رجعت معي لطاوله ووقفنا بنص الطريق وهي تقوووول:
يالملعونه واضح انك عجبتي جدتي >> مااااسكه يدي
آحلام: ريم فكي يدي بصووت واطي وانا اشد على سنوني
تضحك وتقول: خلاص انتهت الزفه هاللحين افكهااا ....!!
رجعت لطاولتنا وجلست مع خالتي ...؟؟
خالتي: وش فيه وجهك قلب لونه هاذي ريم اخت عناد..؟؟
>> وتطالع بريم وهي مقفيه
آحلام: فتحت المويه وشربت شويه وطلعت المرايه اتاكد
من مكياجي وحطيت رجل على رجل >>
وانا اطالع بالشله وحاقده عليهم وحده وحده.....؟؟
الساعه12 كانت زفت نوره بعد مالبست الدبل هي واحمد
وتصورو وقفنا انا والبنات على المدخل حق العروسه
بسلات ورد كل وحده معهاا سله فيها ورد انا معاي ورد اصفر وندى آحمر
ساره ابيض والعنود وردي نمشي ثنتين عن يمينها وثنتين عن يسارهاا وننثر الورد
ونزغرد ونصفر ونصايح ,
نوره نظراتها الناعسه كانت تقوول انها ملاك ماهي بشر ,
جلسناهاا على الكوشه ورقصنا لها ,,
اخر شي ودعناهاا كنا نمشي خلفهاا ونردد مع الفنان الاغنيه بصووت واحد...
رحنا معها للغرفه وتصورنا واكلنا من الترته ولعبنا شوويات على كوشتها هي واحمد,,
بدو الناس يسرون وحتى نوره وامها رجعو للاستراحه ,,
جدتي وام العنود راحو مع عمي ابو العنود والعنود بقت معنااا,,
حاولت امي اني ارجع معها هي وراكان بس البنات طلبوهاا ابقى معهم ,,
مابقى بالاستراحه الا ريم ومريم وامهم ووكانو بالقاعه الكبيره , وام ساره ,,,؟؟
الساعه 2 الفجر تجمعنا انا وساره والعنود وندى على الكوشه وصرنا نرقص انواع الرقص
مابقى رقصه ماجربناهاا ونضحك ونعلق ,, العنود كانت في قمة اناقتهاا
لابسه فستان اسود ضيق طووويل وله ذيل وعاري , واكسسوارات فخمه فضي
وكعب فضي ومسويه مكياج روووعه ,,
جلسنا نستهبل على الجسر ونرقص , صاحت العنود ولفينا لها ..
شفتها طايحه من فووق الجسر ورحنا لها ركض بالبدايه كانت تصيح
وماسكه ساقهاا وتبكي بصووت عالي
انفجعناا وحاولنا نجلسهاا ثواني واغمى عليهاا جبنا مويه بارده ورشينا وجهها عيت تصحى ,
خفنا وماعرفنا نتصرف حاولنا نشيلهاا ماقدرنا هي طويله وجسمها مليان ,
راحت ساره تركض دخلت جوواا بتقوول للحريم ,
جوال ندى يدق ناصر فتحت الخط وحنا نصارخ,توقعنا انهاا ماتت ندى قالت لناصر ,
انهاا طايحه والظاهر ماتت وهي تبكي
ناصر كان برآ عند باب القاعه ينتظر ندى تطلع ..
دخل جوا وهو يقول لبسيها عبايتهاا بسرعه انا داااخل..
ندى تبكي وانا ابكي وساره غطت داخل وماندري وين راحت ,
العنود شكلها وهي طايحه بس يخوف وكانها ميته ...
ندى وهي تبكي تقول عبايتها وين ,
ماقدرت افكر ولا اعرف وين حاطه عبايتها رحت للغرفه جبت عبايتي وعباية ندى ,,
لبست ندى عبايتها ورميت عبايتي على وجه وجسم العنود وطلعت على صوت ندى
تقووول: روووووووووحي ناصر جااااا
وقفت ورا الباب ابكي واسمع صوت ناصر يقول افتحي الباب بقوه طليت بشويش,,
وشفته يشيلها وندى طالعه معاه , جلست ابكي وجاتني ساره وريم ومريم ماجاوبت ولا على سوال من اسالتهم
دخلت في موجة بكاء رهيبه ماني قادره انسي شكلهااا..؟؟
ساره وهي تبكي تعلم امهاا وش صار وام عناد واقفه تحاول تفهم السالفه منهم ,
دقينا على ندى وسمعنا صوت جوالها على كوشة نوره ,,,
عرفو الريجيل من ام احمد ولحقو ناصر وندى والعنود , عمي ابو العنود ماعنده عيال كبار اكبر
عياله العنود وعنده ولد عمره ثلاث سنوات والباقي بنات صغار...,,,
عمي واحمد طلعو من القاعه على المستشفى ,
رحت مع خالد للاستراحه وانا ابكي دق على ناصر يبغى
يطمني بس ناصر مارد,
ساره وامهاا والبقيه جو مع عمي ابو احمد للاستراحه ,
ام العنود جنت جنونها يوم عرفت ,وصارت الصاله مناحه ,
بعد نص ساعه دق احمد على امه وقال انها بخير , ماصدقناا احمد شكلها يقوول انهاا ماهي بخير آبدآ
بعد ساعه والصياح مستمر بالصاله دخلت علينا ندى وهي في حاله يرثى لهاا,
تقوول الدكاتره يقولون احتمال كبير كسر بالرجل وبيسوون لها اشاعه ويعرفوون ,
ندى تقول ان ناصر نزلها ورجع لهم بالمستشفى...؟
ام العنود ازعجت عمي وهي تدق علاه وكل مره يطمنها , اذن الفجر واحنا على حالنا ,
صلينا ورجعنا بالصاله حتى لبس ماغيرنا ,
ساعه 8 الصباح دق عمي وقال ان عندها كسر برجلها
اليسرى ولازم جبس , دخلنا عند نوره بالغرفه وام العنود راحت مع مريم لغرفتهاا,
على عشره تطمنا عليها غيرنا ونمنا ساعتين..
مع اذان الظهر على طوول صحيناا ,,
عرفنا من مريم ان امها راحت لها وانهم جبسو رجلهاا ,
جتنا ندى وقالت بهمس ان ناصر يقول :
اذا احد سالكم من شالها من القاعه لسياره قولو احنا لاتقولون ناصر..؟
ناصر مايبغى الريجيل يعرفون انه شاف العنود او شالها
* لانه خايف علاهاا من كلام الناس ,
سألنا ندى عن العنود من لبسها العبايه خصوصآ اني بس رميتها على وجهها ,,
قالت : انها غطت وجهها بالطرحه وناصر وقفهاا وهي لبستهاا العبايه وبعدين شالهاا لسيارة..؟
العصر راحت ساره وامهاا للعنود وبعد مارجعت اخذنا منها اخبار العنود...
ناصر بعد مارجع عمي ابو احمد واهله دق على ندى وقال انه بيوديهاا للمستشفى اذا تبي تزور
العنود, ندى فرحت وطيران لبست عبايتها وقالت لـ امهااا وطلعت..
كلمت نوره ام العنود وطلبت تكلم العنود وكلمتهاا واحنا نسمع الصوت وقالت انهاا
احتمال تطلع بكره >يآآه نسيت مشاكلي مع العنود ونسيت كلامهاا حنيت عليها وخفت
عليهاا كثير , فالليل سهرنا انا والبنات وتذكرنا وش صار البارح ..
وماعدوو حركة ريم علقوو عليهاا
وقالوو لنوره عليهاا فالبداية قلت عادي بنت عمي وترقص معاي..؟؟
وكملت//
انتم بعد ممكن تسوي معكم الحركه هاذي انا قلتها من جهه ومن جهه ثانيه:
انفنح سيل من الضحك والتعليق ,,,
حاولت اضيع الموضوع وانا اسال نوره عن احمد هنا الكل سكت وناظر بنوره عجبهم
السؤؤال,, ؟؟
نوره طايحه في احمد باااشااا مدح وتقول انه سيد الرجال كلهم >> لاتعليق
الظاهر انها تعوضه عن السب اللي جاه قبل الخطبه, تقول انه رومنسي وجذاب وهادي
وكريم>> سالت ندى كيف عرفتي انه كريم>>سؤال وجيه
نوره وهي تغمض بعيونهاا جاب لي هديه >> بصووت واحد وييييييييييششششش
نوره /وجع خوفتوني قصدكم هديته ساعه>> بس ساعه تهوووسس تخبل ..
ندى: بسس ساعه تشوفين حبيبي الغايب وش يجيب ي أم ساعه..؟؟
نوره/ضربتهاا بالوساده على خشتها وهي تقول: هاذي بسس البدايه اصبري
الهداياا فالزواج يالشينه ماهوب هاللحين >> ماترضى على احمد على قولتهآآ..؟؟
انا وندى مانمناا بالليل جلسنا على التلفزيون بعد صلاة الفجر جاتنا ريم
وجابت لنا توست وعصير معهااا...؟؟
وبعد ماسولفنا عن الشبكه قالت ريم: انتم جيتو مع مين للقاعه..؟؟
ندى: وهي تاكل/مع تركي ونوره>>بعفويه
ريم: غريبه ركبتي مع تركي>>تسألني
آحلام: وش اسوي غصب عني مجبوره >>وانا اكل واناظر بالتلفزيون
ريم: وانا اشووف بعض الناس معصب وزعلان >> بس والله ماصدقته
نغزني قلبي من تقصد...؟؟
ندى: من اللي زعلان >>وهي تلف ل ريم
ريم: عناد دق علي يقول احلام رايحه مع تركي وقلت لا ماكنت عارفه
>> تمط الكلام وتناظر بتجاهي
ندى: آحم آحم يغغارر البدوووي..>>تضحك
آوف يالبآآ البدوي>> ماطالعت فيهم وحاولت اكون طبيعيه..؟؟
ريم: تدرين داق علي زعلان يقول ليه مادقت على اخوانهاا >> تكلم ندى
ندى: كان قلتي له اننا كنا بنروح مع عمي>> تعتذر بنيابه عني..؟؟
ريم: انا ماكنت عارفه انكم جيتوو مع تركي/خصوصآ احلام..؟
آحلام: خلاص غيرو الموضوع ماهوب وقته>>
وانا اوضح اني ماني راضيه على كلامهم..؟؟
ندى: آآوف ليه زعلانه >> تضحك
ريم: خلاص غيرنا الموضوع ولواني عارفه ان عناد بيزعجني بأسألته..>>تناظر بنص عين..؟؟
قمت من عندهم ورحت للغرفه وانا فرحااانه بقوه قلبي آحسه بيطير من بين ضلوعي,
سيرته تسوي في سوايآ, وكلامهم عنه يربكني...!!
العصر طلعت العنود وكانت تعبانه جدآ وتتألم من قلب, فالليل سهرنا بالغرفه معهاا
وتفجأة ان ناصر هو اللي شالهاا وهاوشت ندى تقوول:
ليه مانديتي ابوي..قلنا لها اننا من الخوف ماعرفنا نتصرف وناصر كان براا ينتظر
ندى وهو الوحيد القريب من الريجيل وعرف يتصرف ..؟
سالت ندى اذا ناصر شافهاا او لا..
ندى: غطيت وجهك بس شاف جسمك وشعرك..>> وهي تضحك
هاوشت العنود وعصبت وزعلت عليناا لاننا مالبسناهاا العبايه اقل شي,
وضحنا لهاا كيف كان الوضع وبالاخير اقتنعت رغم انهاا مستحيه ومتفشله من ناصر,,
بقينا معها الين الصبح ونمنا عندهاا تحت سريرها , واحنا نسمعهاا تتألم من رجلهاا,
اليوم هو اخر يوم بالاستراحه وبكره مسافرين كل واحد على مدينته, عمي مطلق راجع لتبوك
والباقين لحايل واحنا لرياض , شناط السفر تضيق الصدر وهي مرصوصه بغرفة نوره ,,
وبكره الكل يتنمى انه مايجي ولا نفترق ,...
هم يتمنون اننا مانفترق وانا اتمنى اعرف مصيري مع آميري وملاذ قلبي.....
21-02-17, 03:31 AM
رد: عناد حايل يعشق أحلام نجد،للكاتبة/ ديرتي نجد وأنا قمرها،سعودية(مكتملة)
جديد مواضيع قسم القصص المكتمله
العرض العادي
