السلام عليكم ورحمة الله وبركاته ..
مساءءءكم خير وسعاده يارب ,, بكل بساطه آعشق الروايات // وقررت اكتب وانزلهآ هنآ
أذا اعجبتكم كملت واذا ماعجبتكم وقفت ويادار مادخلك شرر ,,
أبي رايكم وتوجيهكم اذا فيه شي ناقص ,, ومستعده اسمع منكم سوا سب او مدح
لي عوده اذا اعجبتكم ^_^
,
,
,
مقدمة الرواية ..
آحلام بنت العشرين سنه .. ثاني سنه جامعه ,رومنسيه ,هادئه ,حنونه
تسكن مع والدتها واخوانها الخمسه ..
آخوانهآ.. راكآن 31سنه خاطب ,سطام 27 سنه..,سعود 23 سنه..,خالد18 سنه ..,فصيل 13 سنه..
يسكنون العاصمه الرياض ..
والان اترككم مع احداث الروايه //
كانت حياتي سعيده جدآ اعيش مع امي واخواني في بيت مليء بالحب والحنان رغم غياب والدي
كنت اتسابق انا واخواني على ارضاء امي , جعلت أمي محور حياتي قررت أن اريح
أمي وارد لها جزاء من تعبها , في عمر العشرين سنة اصبحت مسئولة عن كل شغل البيت طبخ غسيل تنظيف ..
نظمت جدولي على اني اداوم 7 الصباح وارجع 3 الظهر انام واصحى المغرب وابداء اعمالي ..
اصبحت امي مسئوله عن وجبة الغداء فقط ,, اخلص شغل البيت الساعه 11 وادخل غرفتي
في غرفتي أكون
احلام ثانيه آحلام الرومنسيه الحالمه ,اسهر على الروايات والخواطر والشعرر ,
آحلم بقصة حب رغم رفضي التام لزواج ..
في بداية الصيف تغيرت حياتي والسبب قرر راكان بأنا نصيف بالطائف مع آعمامي ,,
حاولت ارفض لاأني ماأحب التجمعات كثيير
آحلام: راكان تكفى مانبي نروح الطايف ..
راكان : لييه عماني مستاجرين استراحه والبنات كلهم هناك ..
احلام : راكان انت تعرفني ماحب الزحمه والتجمعات هاذي!!
راكان: بالعكس يمكن فالبدايه بتطفشين بس اذا تعودتي بتستانسين..
سطام : اصلآ عمي مزعجنآ كل يوم يدق على راكان .
راكان : ترى حنآ متاخرين المفروض من الاسبوع اللي راح نكون هناك ..
رضيت بالامر الواقع وانزلت السوق , جهزت شناط السفر وأكد علي راكان أنا بنطول هناك
اخذت كل شي احتاجه معي ملابس اكسسوارات شنط جزم ادوات مكياج
روايات ..
وصلنا الطايف المغرب وكانو مسوين عشاء لنآ .. أجواء غريبه علي استراحه كبيره مليانه ناس
من سنه او اكثر ماشفتهم , ,,
نوره: احلام انتي معاي انا وساره وغدير بالغرفه ..
احلام: ابتسمت وآنآ أأشر براسي موافقه ..
اخذت شنطة أمي وشنطتي ودخلتهآ الغرفه واخذوني البنات في جوله داخل الاستراحه
بقيت سهرانه معهم الين 9 الصباح ..
تأقلمت مع الجو سهر الين 9 ونوم الين العصر حسيت اني مرتاحه من المسئوليه لـ أول مره
مر اسبوع وبنات عماني يتجمعون كل ليله بغرفه على قهوه وحلى ومكسرات وسوالف وضحك ومقالب
آمآ انآ حنيت لرواياتي وصرت اقراء من بعد الفجر الى 9 او 10 الصباح / رغم تذمر بنات اعمامي الواضح ..؟
في يوم من الايام صحتني نوره العصر وهي تقول..
نوره : آحلام قومي بنروح آحنآ والبنات نـتمشى بالاستراحه
آحلام: والعيال قصدي الشباب ..!!
نوره: ماعلينا منهم , طفشنا وحنا محبوسين هنا ؟؟
احلام: لا أنا مابي اروح اخاف راكان يهاوش..!!
نوره: اجل اخمدي ياخوافه..
استمرو البنات بالخروج كل عصر لحوش الاستراحه واحيان مايرجعون الا المغرب
نوره كل يوم تمدح الاجواء براا تقول حوش كبير فيه نخل وفيه العاب ومجلس شعر/ ومشب لنار
في يوم قررت اطلع معهم وندمت من قلبي ,,كان المكان مليان بعيال عمي وعماني والحريم الكبار ماقدرت اتحمل
وخليت نوره ترجعني لقسم الحريم ..!!
تفاجأة براكان يتصل علي بعد العشاء
احلام: هلا راكان..؟؟
راكآن:الوو سلام..
آحلام: هلا والله..!
رآكآن : آحلام وينك ..
آحلام : بالغرفه ..ليش!!
رآكان : اليوم رحتي مع البنات لنخل ..؟؟
آحلام: ايووه فيه شي!!
راكان: لا بس مره ثانيه لاتطلعين الا اذا انا فيه خلاص..؟
احلام: راكان صاير شي..
راكان: لا لا بس مابيك تطلعين قدام الرياجيل ..
آحلام: طيب طيب
راكان: تبين شي..؟
آحلام: لا تسلم
راكان : يلآ مع السلامه
آحلام:....................
تأكدت من مكالمة راكان ان فيه شي غلط ولاأني مارتحت لطلعه رفضت محاولات البنات تمآمآ ,,
وفي ليله جمعتنا غدير الساعه ثلاثه الفجر في غرفه وهي فرحانه وبصوووت واطي
غدير: تدرون من بيجي بكره ..؟؟؟؟
نوره : بيجي هنا الاستراحه ..؟؟
غدير: أييييييييييييييييهه
البنات: من من ..؟؟
غدير: عنآآآآآآآآآآآآآآآآآآآآآآآآآآآآآآآدد..
استغربت ردت فعل البنات ليش فرحانين واذا عناد بيجي
سألت نوره
آحلام: نوره وش فيهم ..
نوره: بنات عمك ماتعرفينهم ,,ادعي لهم بالصلاح بس/ وهي تضحك!!
لحقت نوره لغرفتنآ ..
آحلام: نوره عناد ولد عمي صالح ..؟؟
نوره: ايه
آحلام: طيب وش الغريب اذا جاء ..!!
نوره: هم قصدهم شي ثاني ..؟
آحلام: وش قصدهم..
نوره: يبغون يشوفونه..
آحلام: قلت آدب / قلتهآ بكل عفويه !!
نوره: آحلام ترى هاذي حركات البنات يمكن لانك عايشه بعيد عنهم وماعندك خوات ماتعرفين الحركات هاذي ..؟
آحلام: لا اعرف حركات البنات بس هاذا ولد عمهم ..المفروض يستحن شوي ..!!
نوره: تبين الصراحه مو هم بس حتى انا ودي اشوفه ..
آحلام : هههههههههههههههههههههههههه توي جالسه اسبهم اثاريك اعبر منهم ..
نوره: آحلام انتي قد شفتيه ..؟؟
آحلام: لا ماحصلي الشرف .
نوره : ييوووو ه ياآحلام يجنن جمال ورجوله وكل شي..
آحلام: هو كبير صح ..ليش ماتزوج؟؟
نوره : لا حرام عليك عمره 28أو29 ,, تخيلي مايبي يتزوج ويقول اذا تزوجت بتكون من برا الجماعه
يعني مايبي منا يابنات عمه ..؟
آحلام: ياربي حنآ اللي ميتين عليه ..؟؟
نوره: أنا ميته وربي آآه بس..
آحلام: نوره وش معجبك فيه احسه مغرور..
نوره: لا ي آحلام آنا اعرفه بدوي بدوي ومتواضع .. 24 ساعه فالبر ويعشق القنص
أنتي ماجيتي السنه االلي راحت لزواج اخوه ..؟؟
آحلام: لا ماجيت ..؟؟
نوره: تدرين انه هو اللي مزوج اخوه اللي اصغر منه ..!
آحلام: طيب ليش ماتزوج ..
نوره: يقول اتزوج واجيب لي وحده تجنني وين رايح ومنين جاي ..
آحلام: حمدلله على النعمه معقد ..
نوره : ماأسمح لك / وهي تضحك..؟؟
اليوم الثاني سمعت /اهل حايل جايين / الف مره ,أستنفار غريب لي كم يوم فالاستراحه اول مره اشوف
التنظيم هاذا "
الساعه 6 كانو البنات كاشخين , حسيت بأحساس غريب ليه كل هاذا ومين الشخص اللي يستحق اعمل هاذا عشانه ..!!
اسمع بينهم آسمه .. آسمع اسم امه وكأنهم ناس مانعرفهم , كنت آقول لنفسي طيب هو زيه زي اي أحد من عيال عمي الباقي
ليه الاهتمام الزايد"
دخلت اخذت دش بعد ماتأكدت من وصولهم لبست فستآن وردي قصير واكسسوارات رصاصي
لبست عدسات رصاصي وحطيت روج وردي وشلت شعري القصير بطوق وطلعت وأنا أجزم ان هاذا مو عشانه ولا عشان امه ..
""
كثرة طلعات بنات عمي بحجة النخل والجو الحلوو ..وكل ليله أسمع مغامراتهم , أحيانآ اضحك وحيآنآ اهاوش
كان لي جوو وكان لهم جوو ..بعد 3 ايام من مجي عناد وآمه جاتنآ اخته المتزوجه من برا جماعتنا..
في يوم من الايآم قررو الرجال نطلع البر , وفعلآ اخذنآ الذبيحه وطلعنا وصلنآ الساعه 3 العصر في مكان قمة فالجمال
كانو عيال عمي منتشرين حوالينا وقفت جنب نوره وانآ اقول
شوفي شوفي الجمال على اصوله أشرت على سطام ..
نوره: ماشاءالله والله اخوك مزيون ..
قول ماشاءالله وجعع/ وآنا اضحك
نوره: قلنآ ماشاءالله ..
قبل المغرب كان فيه تحدي بين الشباب بالسلاح حاطين شارة واللي يخسر هو اللي يطبخ العشاء..
وقفت مع البنات اناظر فيهم ,شفت عناد لـ أول مره تصرفاته حركاته ضحكته طريقة لفت شماغه تخليني اقول معهم حق البنات
في كل كلمه قالوهآ ..؟؟!!
ساعه كامله وهو قريب منآ ماناظر فينآ بعكس بقيت الشباب اللي كانو يناظرون بالدقيقه..
حسيت أني سخيفه وأنا واقفه اناظر فيه أنسحبت بكل هدوء ورحت لـ أمي وجلست معهآ على الفرشه؟
جاتني ساره وانا جالسه مع امي
ساره: آحلام قومي عمي مطلق يبغانآ
آحلام: يبغى من ..!!
ساره: يبغانآ حنآ البنات ..؟
آحلام: وييييييين ..؟؟
ساره: على الفرشه ..
آحلام: عند الريجيل
ساره: ايوه البنات هناك وجدتي هناك بعد ..
آحلام: انا ماني رايحه ..؟
ساره: صدق والله !!
آحلام: ايوالله خير الريجيل كلهم هناك ..
قالت أمي: روحي لاتفضحينآ فـ عمك ..
لا يمه والله لو تقطعوني كل عيال عمي هنآك ..
ساره: عمي آحلام عيت تجي
عمي مطلق : قلتي لهآ اني أبغاهآ
ساره: ايه بس تقول ماتقدر..
عمي مطلق: فيصل روح ناد اختك..
فيصل: آحلام عمي يبغاك
آحلام: قله أذا راحو الريجيل اجيه
فيصل: ياويلك منه بيهاوشك..
آحلام: خله يهاوشني انت قله وبسس ..
فيصل : عمي تقول اذا راحو الريجيل اجيه ..!
عمي مطلق: الريجيل منهم عيال عمهآ , منول البنت تصب القهوه على عمهآ وعياله ,راكان رح نادهآ..؟
راكان: آحلام فيصل مهو قال عمي يبغاك ليه ماجيتي ..؟؟؟
آحلام: راكان انت شايف الجمهور اللي عند عمي والله مقدر اروح ,,
راكان: تعالي تعالي أنا معك ,خلاص عمي لزم فيك ..
قمت مع راكان وانا كل جسمي يرجف مابي ارووح الله يهدي عمي ..؟؟
شفت البنات واقفين قدام عمي والشباب جالسين كلهم موجودين , راكان يضحك واسمع عمي يقول
افا وأنا عمك ماتسمعين كلامي , ماعلقت ..
في لحظه شفت الكل يناظر في تمنيت الارض تنشق وتبلعني , اقترح عمي علينا انا نسوي العشاء
بدون تدخل الحريم وقال اذا سويتوه انتم على النار ولا تدخل معكم احد لكل وحده منكم 500 ريال
تكلمو البنات وناقشوه وانا ساكته , كانو الشباب يعلقون ويضحكون توترت زياده ..؟
انتهى الموضوع ورجعنا للفرشه وانا كارهه نفسي فعلآ ماتمنيت اوقف قدام عيال عمي رغم اني كنت لابسه عباية كتف
ومغطيه عيوني ..!!
ماأتفقنآ مع عمي وطبخو الرجال العشاء "سهرنآ الين الفجر ورجعنآ الاستراحه..!!
""
آم عناد : ريم دقي على أخوك وقلي له أمي تبغاك ..؟
ريم : يمه الظاهر عناد طلع ..
آم عناد: لا لا فيه دقي عليه وخليه يجيني فـ الدكه عند النخل ..
عنآد: هآآآ ميمتي زهمتي علي ..
آم عنآد : تعال اجلس ..
عناد: ياغالي والطلب رخيص جلسنآ ..
آم عناد : عنآد بنات عمك كل وحده تقول الزود عندي خلني اخطب لك منهم ..
عنآد: لاآآآآآآآآ يمه أنا ماابغى زواج مرتاح كذاا ..!!
آم عنآد: أنت شفت بنات عمك ماعجبك ولا وحده ..
عناد: لا ماعجبني منهن احد واذا تزوجت بأخذ من برآآ
آم عناد: ياخوفي يجي عمرك 30 وانت عزابي,,
عناد: يمه فديت راسك لاتشيلين هم زواجي , تامريني شي العيال ينتظروني..!
آم عناد: لا روح لهم مابي منك شي ..
عناد: أفاا لايكون زعلانه ..
آم عناد: الله يهديك ويرزقني شوفتك معرس ..
عناد: آمين ,, ايه كذا ياميمتي ادعي لي وخلي العرس عنك / يضحك ..
""
دقيت على سطام اذكره بوعده لي أنه يمشيني فالطايف ويوديني الاسواق ,,
آحلام: لووووووو
سطآم : هلا وغلا
آحلام : مساءءءك ورد
سطآم : أووف وش صاير بالدنيآ , آحلام اخلصي وش تبين ,..
آحلام: وجع كاشفني ,, اممم لا بس حبيت اذكرك بوعدك انك تمشيني ,,
سطآم: أهآ وأنا اقوول مساء الورد وراهآ شي / يضحك
آحلام: سطام وعد الحر دين ^^
سطام: خلاص من عيوني بكره الخميس جهزي الوقت اللي تبين ,, آمي بتروح معنآ..؟؟
آحلام: لا ماتوقع .. طيب بعد المغرب بدق وياويلك لو تكشت في ,,
سطآم : افاا أنا اسويهآآ
آحلام: آحم آحم ياكم من مرهآ سويتهآ ..,,
سطآم : بكره اثبت لك اني رجالٍ عند كلمتي ..
آحلام: اوووك نشوف ,, يلآآ باااااي
سطآم : مع السسسلامه ..
اليوم الثاني جهزت وكنت فرحانه أني بطلع من الاستراحه وبشوف شوارع وأسواق الطايف ,,
دقيت على سطام بعد المغرب مباشرة وقال اطلعي أنا برآ .. طلعت شفت آعمامي جالسين فالدكه وعيال عمي وأخواني
اشر لي سطآم وقام وراح لسيارة لحقته فتحت باب السيارة وركبت ,, وقلت
سطآم ليش ماقربت السياره / مابقى آحد ماشافني ..؟؟
سطآم : أنشاءالله عمتي آحلام المره الثانيه ,,
رجعنآ الساعه 11 بعد ماستانسنآ ولفينآ الاسواق وتعشينآ برآ
أحمد : سطآم وين رحت .. العيال يتحدون فـ الباصره ,,
تركي : سطآم ياورع تعال اللعب بداء ...
سطآم : وسعووو وسعووو
تركي : كل هاذا فالسووق كان امرحتوو هناك ..
سطآم : تراهآ كلهآ ثلاث ساعات مشيت وخيتي فيهآآ
نايف : حنآ بعد عندنآ خوات ومامشيناهم ..
سطآم :أنا مدلع أختي أحد عنده مانع ,,
عنآد : احسن ياسطآم تعجبني لاتفكر فيهم ,,
سطآم : أفآ علاك آنآ اعجبك,,
العبوو العبوو ناوي الليله اسحب فيكم ..
xxxxxxxxxxxxxxxxxxxxxxxxxxxxxxxxxxxxxxxxxxxxxxxxxx xxxxxxxxxxxxxx*
سمعت أن عنآد جاب أرانب فالاستراحه وكانو البنات يتكلمون عنهآ وراحوو وشافوهآ طلبت من نوره تروح معاي
الساعه عشره الليل بشوفهآ
آحلام: نوره أبغى اشوف الارانب تعال معاي..
نوره: أنا مصورتهآ ب جوالي تعالي شوفيهآ ..
آحلام: لاآآ أنتم تشوفونهآ على الواقع وأنا اشوفهآ صوره ,,
نورره : ههههههههههههههه ليه مارحتي معنا العصر لهآآآ
آحلام : يووه يانوره العصر العيال فيه ,,
نوره: واذا العيال فيه ترى هم عيال عمك..
آحلام: عيال عمي على عيني وراسي بس ماحب اطلع قدامهم ,,,!!
تأكدنا ان العيال برآ ورحت أنا ونوره للارانب أشكلهآ تاخذ العقل اكثر من12 ارنب نوره تقول أنهآ لصاحبه ,,
جلست عندهآ وصورتهآ راحت نوره وجلست فـ الدكه الين أخلص بوابة الاستراحه مفتوحه والدكه بعيد عني ماأشوفهآ
وأنا منسجمه سمعت صوووت يقول بنت ...؟؟
وقفت بسرعه وأنا اناظر خلفي/ يمه فجعتني ..!!
شفت عناد ماقدرت أتكلم ولا بحرف ,,
عنآد: وش تسوين ..!!
آحلام: ................................
عنآد: هي بنت وش فيك ..
آحلام: بعد صعوبه / مافي شي ..,,
عنآد: طيب ليش جالسه عند الارانب ..
آحلام: كنت أشوفهآ .. وانا اتكلم ماادري هو يسمع صوتي ولا لا,,
جات نوره وأنقذت الموقف,,,
نوره: ماعليش طفشناك كل شوي جايين نشوف الارانب ..
عنآد: لا عادي بس انتم ماشفتوهآ العصر ,,
نوره: الا كلنآ شفناهآ غير آحلام ,,
شافني وأنا اأشر لنوره خلينآ نرجع ..
عنآد: أجل شوفوها براحتكم انا جيت أحط عندهآ اكل وراجع ,,
نوره: لا لا خلاص حنآ رايحين ,,
رجعت وانا اهاوش نوره ليش تركتيني كله منك ,, وهي تضحك وتقول لو دريت اني بشوفه
مارحت لدكه ..؟؟
(عنآد)*
طلعت من الاستراحه وركبت سيارتي وقلت لراكان اللي كان ينتظرني بـ السيارة
عنآد : رآكان آعتذر لي من اختك لقيتها قبل شوي عند الارانب وشكلهآ خافت مني,,
راكان: ليش ويش سويت لهآ..؟؟
عنآد : ماسويت شي والله بس ناديت بصوت عالي ووقفت تناظر في مابغت تهرج..
راكان : الله يسامحك تراهآ خوافه ,,
عناد : والله مادريت انه هي
راكان : ياويلك لو تشكي منك , ضاربك ضاربك..
عناد : ترى الدلع الزايد مهو زين للبنت ,,!!
رآكان : الا احلاام تستاهل أني ادلعهآ وادللهآ ,,
عنآد : راكان هي ليش ماتطلع مع البنات ماشوفهآ تروح وتجي معهم ..
راكان : آحلام ماتحب التجمعات , وتستحي من الريجيل / وتبي الصراحه انا فرحان كذا مابيهآ تطلع وخصوصآ قدام عيال عمك ,,
عناد : ايه عاد العيال اذا شافوو البنت تنقلب احوالهم ..
راكان: عشان كذا مابيهآ تطلع لهمم ..!!
21-02-17, 02:49 AM
عناد حايل يعشق أحلام نجد،للكاتبة/ ديرتي نجد وأنا قمرها،سعودية(مكتملة)
رد: عناد حايل يعشق أحلام نجد،للكاتبة/ ديرتي نجد وأنا قمرها،سعودية(مكتملة)
جديد مواضيع قسم القصص المكتمله
العرض العادي
