كاتب الموضوع :
#الكريستال#
المنتدى :
القصص المكتمله من وحي قلم الاعضاء
رد: كنا فمتى نعود ؟
أخيراا الرد هيييييييييييح
نقول بسم الله ..
فتحت ملف وورد وأحس الرد بيتحول لمعلقة عمرو بن كلثوم هع
من الحين أحذرك .. استعدي للصداااااااااااع
نبدء بالرجالة.. جلجول ونوق
ما شاء الله البنات حمسوني وتقريبا كل اللي بكتبه نزل بمشاركات متفرقة :فيس كان نفسه يكتب رد طويل اهيء:
طبعا واضح اني من حزب جلوي .. أصلاً اسمه معجبني من الأول وهاسا يكفي
أوك أشوفه غلطان ببعض الأشياء بس يظل معذور لأن نوق زودتها بتصرفاتها من لما ردها ومن قبل لا تعرف بسالفة الحيلة أصلاً .. ثم انها مخطئة وبقوة بإعطاء أبوها الأوراق بالماضي ثم سكوتها وعدم محاولتها التبرير بأي شكل من الأشكال.
طيب انتي اعطيتيه اوراق متأكدة انها بتثبت له فشل قضيته
فجأة الدنيا ولعت حتى لو ما عبد الله كسب شي من ورا السالفة كلها
وصارت مشكلة لها اول ما لها تالي واغلب ظني ان فعلا فيه اوراق قدمت للمحكمة ثم ان ذيبان حلها بينه وبين ولده وانسحبت القضية
وش المتوقع من جلوي ومن كل أعمام حضرتك؟ يوقفون يصفقون للي انتقذتهم من الجرجرة؟ ولا هم عالمين للغيب مثلا يوم انهم بيدرون ان الاوراق مهيب اللي راحت المحكمة مهيب نفسها اللي كانت عند جلوي؟ او يوثقون ان نيتك خير؟
ترا ان كان فوزية الله يرضى عليها واثقة فصراحة تفكير الرجال ومشاعرهم بالمواقف اللي نفس كذا غير وغير بقووة بعد!!
غلطاانة جدا جدا انها تعتمد على حب جلوي وحسن نيته في الايمان ببراءتها كذا بدون لا تحاول هي تثبتها .. وحتى خوفها انها تموت مخيطية بنظر الكل لما جاتها الازمة ما كان دافع لها انها تغير أسلوب تعاملها مع الوضع اللي هي فيه.
أقولك شي ثاني
فيه سبب مختلف عن هذا اللي يخليني اتحامل على نوق
شايفة انها ضعييييييفة جدا وثقتها بنفسها عدم وخصوصا بموقف نفس موقف القرصان هذا .. معلش بس مكان حضرتك ما بينتظرك بطريق مفروش بالورود
اذا ما بادرتي وحاولتي ترجعي لمكانتك سواء عند اهلك او عند جلوي فليش تتوقعين منهم يفسحون لك المجال او حتى يعاملونك برفق؟
بروودها الشديد لما سبها جلوي قدام حريمه فقعني
أكرررره الضعف أكررههه عااااا
ويوم جت تستقوى استقوت ع الاشخاص الغلط بوقت غلط وبطريقة غلط بعد!
("أبعد ياجلوي أنا أتقرف منك "
جلوي ما أستوعب كلمتها الجارحه لرجولته : تتقرفين مني ..!
.
" الله ياخذك عني وأرتاح .. الله ياخذك "
)
صراحة انا مدري هو كيف تحمل كلامها بالموقفين اللي فوق .. حتى لو من قهرها تتكلم ما توصل لذا الدرجة!! ياا قهري وانا اقرا كيف بالمسكين جلجول ؟؟
وبعد موضوع التعبير اللي فوق ما بنسى اذكر ان نوق أكيد أكيد انظلمت لا يوجد شك في هذا وان كريسس طيوبة وبتعوضها بسس صراحة شفقتي عليها مساوية للحقد اللي أكيد مؤقت لين تتعدل وتمشي على الصراط المستقيم
البنوتات اللي يقولون ان تقريع فوزية لجلوي دليل على خطاه بحقها زين ما هي لومت على نوق انها ما قدرت أخوها وانه ما تدين ودفع مبلغ وقدره مهر وشرا بيت الا باغيها ويحبهاا !!
اممم
فيه شي بقوله ومدري .. هو نوع من الشطحة
أولا عندي فضول اعرف كيف كانت حياة نوق قبل الزواج من عبيد لان ما اظن انها طولت زوجة له قبل وفاته .. شيء ما يخبرني انها تعرضت لعنف كسرها صدق ..
وتدرين، بالاول يوم جلوي يستعجب من جسمها وهي تقول انها بتظل كذا الى ان يشاء الله جا ببالي انها مريضة .. يعني شي كنقص هرمون الغدة الدرقية او زيادة الكورتيزول او ماا شابه مدري ليش صراحة :فيس يستعد للهرب: << مدري كم شي بيضطرني افكر بالهرب لين اخر الرد صراحة
نجي لجلوي
صح يا اخ انا بصفك ومؤيدة لك قلبا وقالبا بس هذا ما يمنع انك أخطيت وأخطاء كبيرة بعد بداية من الطلاق اللي فعلا فعلا كان رد فعل مبالغ فيه والتجريح اللي صاحبه وقتها تستحق عليه طراق محترم وحتى الاسلوب الغبي اللي اتبعته علشان تخلي هبول اللي فوق تنطق عقب الزواج.
صراحة انا مدري وش علاقة انك تحملتها مدري كم سنة وما جبت منها عيال بطلاق في موقف لا يمت بصلة لا لعيال ولا لتحمل شخصة اعشت انت وهي تحبون بعض اصلا ولا واحد فيكم اخطا على الثاني..
كل فعوله شاملة الحيلة (الخسيسة) اللي احتالها عشان يرجع نوق له كوم وذا الكلمتين كوم وصراحة اشوف انها اذا تدور سبب يستحق زعل فعلا فما في غيرهم.
أشوفه كان محتاج يتنازل عن الكبرياء الرجولي اللي ما له داعي ويعتذر لها في بعض المواقف بعد الزواج خصوصا سالفة الجرجرة هذي لكن بنفس الوقت ردود فعله مش غريبة بالنسبة لشخص يعشق عششق وما حصل غير خيانة (على اعتبار ان باقي السر ما انكشف) ثم صدود وتجاهل وتغير جذري بعدها.
ال الفيزياء يقولون (لكل فعل رد فعل مساو له بالمقدار ومضاد له بالاتجاه) ورد فعل جلوي بكل المواقف جا مناسب لفعل نوق اللي اصلا كبير باعتبار مكانتها عنده.
يقول انه حاول يردها ولا افلح ليش ؟ عبد الله وقفله مثلا؟ طبعا غير أمه ونوروه بس كذا حسيت خصوصا من انفعال عبد الله الزائد ومطالبته الغريبة بانهم يرجعون البنت في اللحظة اللي رجعله فيها عقله.
بالنسبو للزواجين اللي تزوجهم
إذا حطينا بالاعتبار ان عمر عبد الله ولده الكبير 7 فهو ما تزوج غير بعد مرور ثمان سنوات على طلاقه لنوق وبما انه كان يحاول يردها فوارد جدا انه تزوج بعد ما عرف بزواجها هي وبالتالي يكون افتراضي الاول وجود فارق زمني بين طلاق نوق وزواجها من عبيد وهالفارق اثر فيها افتراض مقبول.
فيه شي محيرني بالنسبة لزواجاته
ليش حسنا ما عندها غير عبد الله اللي عمره سبع سنين؟ يعني فرضا تزوج الجازي لانه يبا ولد ثاني، اظن فاصل اربع سنين بين الولدين يعني تقريبا ثلاث سنين بين حمل والثاني كافي جدا لحسنا حتى ترتاح .. معقولة عندها مشكلة ما اضطرته يخضع لزن جديد من امه ومن نورة اللي ما استبعد انها اللي رشحت الجازي ويتزوج ذا العوباا؟؟
صراحة هي شرق وحسنا غرب
واحدة ما شاء الله طيبة وأخلاق وهدوووء والثانية حية من تحت تبن الله يستر منها ومن اللي تخطط له ..
وعاد اللي مثل جازي أكبر خطر على عيالها ومدري باي مناسبة كان مخليها على ذمته بحجة منصور اصلا وكل من اعترض على طلاقها اعترض بسبب منصور.. معلش بعيدا عن نوق بس ما احد يشوف طريقتها مع حسنا وعبادي؟! هذي أصلا بتربي ولدها على كره اخوانه قبل اي شي ثاني!!
وشي توني الاحظه
جلوي بكره على عمه اللي مفروض بهذل العيلة والثاني على ابوه.. علامة هذي؟؟
نرجع مرة ثانية لسالفة الأوراق.
طيب فيه شطحة جت ببالي صراحة بس شطحة من قلب ذا المرة..
الحين نوق كانت تقول لجلوي بآخر فصل انها تحملت جهله فهل عادي أفترض أنه وقتها فعلا ما كان يعرف يقرا وبالتالي ما عرف محتوى الأوراق؟؟ يعني لا هو يقرا ولا الجد ولا عبد الله نفسه
نوق تعرف تقرا فبكذا سهل تعرف محتوى الاوراق اللي على حسب كلامها لصالح جدها مش أبوها وكان يفترض تمنع ابوها من اكمال فضيحة المحكمة اصلا.
مدري ليش قاعدة افكر ان الشخص اللي حررررض عبد الله على الامر كله من الاول كمان زور\بدل الاوراق بحيث يصير عكس اللي قراته نوق
ولنفس الاسباب اللي ذكرتها قبل اشوف ان نورة أساس الموضوع كله (هو الرد طويل اصلا فمش مهم اعيد اسبابي عشان ما يطول اكثر)
.
.
نجي لنوير .. تصدقين اذا قلتلك اول مرة تقريبا احس ان شخصية مؤنتثة تشبهني بعالم الروايات؟ ما شاء الله دائما الاقي الرجال اللي شبهي *_^
صراحة معها بكل شي من اول الرواية لو يقولون عوبة وقوية بااس ومدري وش.. طالما الحق معها فتقول اللي تباه وانا وراها بقووة..
الحين سنين يدرسونا ويحشون روسنا بقصص شجاعة الصبية في الاسلام واللي قتل ابو جهل واللي ارسله الرسول صلى الله عليه وسلم على راس الجيش واللي ما خاف من عمر واللي خطب بحضرة عمر بن عبد العزيز ثم لما نقول الحق يصدعون روسنا بما تحشمون وما تعرفون العيب والكبير والصغير وبلا بلا بلاااا
ولاجدها هذا .. كله كوم وهو كوم.. يعني زعلان من اللي ما وقفتله الا بحق وعادي مع اللي مفروض سبب البلا كللله.. يااا ربـــــــــــــــــــــــــــــي!
وبصراحة موقفها الاول مع بتار شي يرفع الرااس .. عافية ع اللي ما تركته يستهبل ويدخل بيت اللي فيه ما هم محارمه ورجاله غايبين .. صراحة يستاهل الرصاصة اللي أكلها عشان يتعظ ويعرف ان نادر الله يرحمه ما زوجه الا ذيبة ما ينوكل عشاها على قولة منصور آل كساب (الحووب هذا)
الفترة اللي أخذتها بعيد عن أهل أبوها في محاولة للتعافي هي فعلا وسيلة نفسية ناجحة جدا جدا عن تجربة << ما أقولك تشبهني؟
مرات الشخص يحتاج كتت صغير لطيف بهدف انه يقدر يرد للحياة مرة ثانية بقوة وهو مدرك بوضوح وش اللي له ووش اللي عليه وعاد شهادة أمها جت لصالحها من ناحية التغيير ..
شايفة هذا المقطع؟
(نوير تطالع أمها وهي تأشر عليها : أسألتس بالله يوم إني أنقطعت عن هالبشريه .. تسيف صرت .. تغيرت ولاّ ماتغيرت .. يمه أسبوع كامل ماأسمع طاري لا عمي منصور ولا عواد
ولا أحد .. وجدي أسلم عليه وأنا ماشيه .. قسم بالله الراحة وأنا أشهد لدرجه حسيت إني
كنت ظالمه نفسي .. ماأدري وش تسان حادني ع مقابل أحد .. والأمر بسيط ..والله مايصير حاطيني قبل في قدر ضغط ..لازم الواحد يرتب حساباته .. وأنتي يمه قلتي لي ذاك اليوم أوعدتس ماأغصبتس تقابلين أحد .. صح يمه ولا لا ..؟
أم نوق : أنتي بتذليني يابنت على هالتسلمه ..؟
نوير بأبتسامه : يمه سؤالي .. تغيرت ولا ماتغيرت
أم نوق بعد صمت : من ناحية تغيرتي إيه بالله تسني أشوف إنتس راكده ولاعاد به لسانن طويل
سحبت أخييتي راسها من على فخذي ورفعت أيديها لفوق حتى تصرخ
" الله أكبر .. الله أكبر ")
قرأته مرتين والمرتين ارتسمت على وجهي ابتسامة من الأذن للأذن كما يقال والسبب الوحيد اللي منعني من الانفجار بالضحك ان بالصدفة المرتين قرأته قبل الفجر..
تخيلي نفس الحوار بالضبط لكن بالمصري .. شي مشابه دار بيني وبين امي باجازة نصف العام الأخيرة ههه .
أظن الضعف اللي صابها بعد ما عرفت بسالفة العطية شي طبيعي يشبه استراحة المحارب كذا.. يعني رجال ضربته بالنار وفجأة طلع زوجها فجأة ملكت عليه وفجأة كلمها وفجأة الكل يدفعها صوبه..
أكيد حقها تاخذ فترة راحة وما أظن انها تطول على ذا الضعف ابدد
اللي صدق أنتظره هو ردة فعلها لما تشوف نادية بالحفل .. وطبعا ردة فعل البنات كمان بس نوير أكثر شي ..
جوال بتار القديم واللي يهمه جدا تحافظ عليه مدري ليش أحسه هو بعد ذكرى من نادر نفس ربطة الشعر اللي احتفظ فيها نادر ثم اعطاها لبتار .. فيه صور للاثنين مع بعض؟
نادر من اول ظهور لاسمه حسيت انه شوي مختلف عن الفكرة السيئة اللي يمكن انه ظهر بها وجا آخر فصل يثبت ذا الشي بقصته مع بتار .. أظن أنه كان حنون على أخواته بقوة لكن يمثل العكس قدامهم وقدام أبوه لمجرد حمايتهم من بطش عبد الله ولاجل يقدر يشارك بالقرارات المصيرية المتعلقة بحيااتهم بدون لا يعاند ابوه وبنفس الوقت يضمن لهم الخير.. خسارة انه راح قبل لا نعيش معه شووي هييييييه
.
.
بادي
صراحة الولد حبيته من اللحظة الأولى.. يدخل القلب حتى مع طيبته وهدوءه
كأني قرأت رد لبنوتة تستنكر رد فعله بعد رفض الجد للخطبة؟ صراحة ماني معها أبد وما أشوف انه بالغ برد فعله خصوصا مع السبب السامج اللي ساقه الجد للرفض بالأول .. أجل من وين لك مهر ثم تجيبلي اللي ما أبا قربها ؟!
بالله هذا سبب؟!
صراحة حقه يفكر بأمه وأبوه وكيف فقدهم بعدها
يعني اذا أمه وأبوه باقي عايشين وهو كبر بوسطهم كان جا يده بيد أبوه نفس ما جا مشعل وخطب بقلب جامد وكان حصل نفس الرد لان وقتها ما بيجيبها عند الشيخ ذيبان ويعكر روقانه باللي واجهته بالحق!!
ثم يجي حمد اللي ما ينبل بثمه فولة ويكب العشا كله عند فيصل وقال ما خبرت غير فيصل
على أساس الكلب الثاني هين يعني؟! تراه حرمة ما له غير نقل الحكي من مجلس لمجلس وعاد جته على ما بغاها وضرب العلاقة بين بادي وجده زود
بس صحيح واحد مخاوي فيصل وش نرتجي منه بسس ؟!
نشوف ردة فعل الجد لما يعرف بخطبة بادي أما فيصل فدواه بتار واللي سواه فيه وليته عطاه بعجرا على راسه المصدي كود يتعدل او يفطس ةنخلص من خشته اللي تقطع الما عن البيت ..
خوفي بسس ان كلام فيصل لقى له صدى بنفس بتار بعد كلام امه وابتدى يشك ان نوير وامها يدرون بسالفة العطية ويخبون عليه .. مدري ليش أشم رائحة مشكلة قادمة من بعيد والله يستر.
تدرين
أحس سر عبد الله ونوره عند بتار وظنتي إذا مساعد قدر فعلا يعرف صاحب الرقم اللي اتصلت منه نورة فتبشر باللي يفضحها وام جلوي عقبها كمان .. عاد ياا زين الموقف اذا انطقت ام نوق باللي تعرفه بعد ثم تلحلت بنتهاا وتكلمت عن محتوى الاوراق :فيس عيونه قلوب:
وبما اننا جبنا سيرة نورة وبلاويها .. حفيدة وانا نظن انها سحرت عبد الله .. لو هذا اللي صار صدق فظنتي السحر موجود بمزرعتهم القديمة بالقصيم .. ما اظن عواد ذكرها كذا عبث.
.
.
مستر عواد
صراحة فارض نفسه بقوة ذا العواد من البداية
بركز على مواقفه مع نادية لان عن مواقفه مع البنات فهم ما قصرو وقالو كل اللي كنت بقوله .
بما انه معجبني فما احب أفكر ان علاقته بنادية ما لها اساس شرعي صراحة وبنفس الوقت اذا هو متزوجها فكيف ما يعرف عن صلتها بابن جهمان؟
وبنفس الوقت واضح ان العلاقة فعلا قوية لدرجة انه يعرف السيارة اللي أكيد سيارة أخوها فارس يعني.
من خلال كلام جود فنادية من عائلة كبيرة وبعد ام عواد ما صرحت بانها عديمة اصل وانما انها ما تناسبهم وعائلتها مدري وش فبالتالي برجح انها صصح من قبيلة أصل ونسب لكن فيه مشكلة بينهم وبين جد عواد لامه بدليل الاوراق اللي سحب بها ابو نادية للسجن
ظنتي أم عواد كمان تجهل أصلا علاقة نادية بابن جهمان سواء هي ولا أهلها وما أظن أن أمها أخت أم بتار بالرضاع بالعكس أظنها أختها حقيقة ووقتها فعلا تكون من عائلة ..
عديل جهمان ما بيكون اي شخص كذا
صراحة ما فهمت على أي أساس أم عواد ما تريده يتزوج نادية وصراحة كمان أحسها متكبرة ورافعة خشمها زيادة عن اللازم ثم ان اسلوبها معه وطريقة لوي الذراع بالورث هذي ما بلعتها ..
ليش أحد قالك انه منتظر منك شي؟
ومن قواتها كمان جارة زوجها ورايحة لين عند البنت تكلمها؟! يا ربي عليها
عموما أظن انها بتنفجر بينهم قريب
ولا أخوه هذا اللي يريد يخطبله الاخت الصغيرة لحرمته
يعني انت أصغر منه فبتخطبله بزرة أخت حرمتك .. ما شاء الله على ذا العائلة وتفكيرها!
يلا ننتظر ونشوف وش بيصير
.
.
تقريبا كذا اقتربنا من نهاية المعلقة، قصدي الرد .. نشوف متعب
حبيته من اول ذكر له بس هذا ما يمنع ان استسلامه وطريقة تفكيره أحياناً ضايقوني .. ضعف للمرة الثانية عاا
بس ان جينا للحق الملامة اللي عليه جزئية
كان عايش حياته بالطول والعرض ثم فجأة كل شي انهار بداية من دراسته وحتى صحته وحياته الشخصية .. وبعد الكلام عن الايمان من أشخاص مش بنفس الموقف ما يكون له نفس الصدى
صح لازم اليقين والصبر لكن الانسان يبقى مخلوق ضعيف ووارد جدا تفتر عزيمته
اما عن وجود حالات اصعب فهو ما كان على صلة مباشرة مع احدهم لين صار حادث صديقه الله يشفيه وادرك الموضوع عيانا بيانا فبدء يتغير شوي.
ربطته بشيما من اول ما شفته وحتى قبل ما تقترحها امه عليه
مدري بس حسيت روحهم واحدة
صح المرتين اللي شافها فيهم مش ولا بد بس أظن بيكون لهم تأثير قوي في علاقة ذا الاثنين بعدين.
شيموو خوفها مبالغ فيه صراحة بس أظن بيكون سبب للتقارب بينها وبين متعب بعدين
المجنونة وعد هي وقفزة الارنب حقتها ومقالبها
صراحة لايقة على مشعلاني
تخيلي تمقلبه وتصور المقلب سنااب .. وقتها ياا شماتة حسن فيه
.
.
الشخصيات اللي تمت الاشارة لها سابقا وباقي ما شفنا لها أحداث رئيسية فممكن يكونون المقصودين بالاحداث الجديدة في الفصل
مساعد << اول من جا ببالي
ريان ومعاذ << ما أظن دورهم مقتصر ع الهياتة واللعب
جسار خال بتار هو كمان ممكن له دور
فارس أخو نادية
سعد أخو عواد
مرة عواد يكلم منصور وذكرو واحد اسمه (ابو مخلد) من لما قريت السالفة حسيت بيكون له ظهور ثاني وخاصة ان ما تعودت منك تذكرين شخصية ما لها قيمة
بحاول اتذكر باقي الشخصيات اللي تمت الاشارة لها بالاجزاء السابقة
بس ما أظن المقصود كان وعد مشعل لانهم ما تمت الاشارة لهم وانما ذكرو بمواقف كبيرة
.
كذا اكون خلصت مؤقتا << يسس ممكن يجي ببالي شي ثاني ^-^
نشكركم لحسن قرائتكم
والى لقاء قريب ان شاء الله .
|
02-03-17, 08:04 PM
جديد مواضيع قسم القصص المكتمله من وحي قلم الاعضاء
العرض العادي
