/
دخل المجلس ابو ناصر ووقف قبالتهم/اسمعوا يا جماعه بكرا ملكة حاكم البراك على بنتي توق الصارم..
جلس فهد و همس لولده ناصر/دبر لي فحص طبي بكرا لتوق وحاكم..
ناصر بضيق لانه غير راضي ومضطر ان ينصاع لأمر ابيه/يبه اعتبر التقرير الطبي موجود ولدي فهد موظف بالمستشفى اللحين اكلمه ويضبط امورنا..
،
حاكم رفع راسه وهو يتلقى التبريكات والتهاني.. ويرد بمجامله.. وقلبه يرجف من الخوف ان تكوون بنت غير التي يريدها.. سيتوقف قلبه من كثرة انقباضاته ..وهو يتذكر لمست يدها. ويمني نفسه ان يرجع يلامسها من جديد..
كل الامور تجعله يفكر بها.. بهذه الاثناء تذكر أمه التي طلب منها البحث له عن زوجه ولم ينتهي بحثها..
الآن تزوج.. ولا يعلم كيف تكون زوجته لا شكلها ولا شي.. هي مجهوله بالنسبه له.. هنا خاف ان تكون البنت "البكايه".عندها سيُصدم.. .
بالجهه المقابله يجلس حمد يرمقه بحقد ، ويحسده على توق ويتمتم بداخله( اخخخ يالقهر لو تزوجها واحد من عيال عمها كان هي قريبه مني.. لكن تتزوج واحد من قبيله ثانيه.. هذا اللي يغبن.. لكن ماراح يمنعني منك الزواج يالحبيبه، بالعكس).<<حمد اقرب ما يكون للشيطان..
اخوة منال تركوا المجلس .. وتبعهم بعد قليل ابو مها وهياء.
بجاد ببتسامه/حي الله النسيب الجديد
حاكم ارتاح لابتسامته ولوجهه البشوش/تحيا وتدوم..
بجاد وهو يربت على كتف حاكم/عز الله انك كفو يا حاكم.. ولو هي ذبيحه ماعشتك
حاكم/كفوك الطيب..
جلسوا يتجاذبون اطراف الحديث.. اما البقيه ذهبوا و ناموا بعد العشاء ..
،
.
،
.
،
.
،
.
في مكان اخر.. *
شيهانه واقفه بخيمة المجلس ويدها على رأسها دليل وجود مصيبه غير مصدقه كلام تميم/انت وش تقول يالخبل
تميم وهو يعدل نسفة شماغه/الله يسامحتس يا عمه..افاا انا خبل… الرجال توه مكلمني وهو عند العرب.. يقول معشينه الليله وبيجي بكرا او بعده ان شاء الله
شيهانه لم ترتاح للخبر/الله يستر من هالروحه.. وش وداه للآل صارم ..عسى خير يا ربي
تميم بجديه و قليل من العصبيه/عمتي اليوم كني شفت زول بنت برا الخيام.. ان كان عندكم احد من بنات عماني خلوها تحششم.. وش هاللبس اللي تطلع به
شيهانه تذكرتها لانها لم تقل للشباب عنها/هذي سلهام بنت عمك سعود
تميم انصعق لم يصدق وشعر ان الموضوع فيه لبس/انتي صاحيه؟!!.. عمي سعووود جااايب وحده من بناته هنا..غريبه!! طيب ليييه؟
شيهانه بحزن على سلهام وتخاف من تميم ومواقفه ضد البنات، لم تحبذ ان تشوه سمعت سلهام وفضّلت ان لا تفصح عن سبب وجودها هنا وحتى "الشايب" سكر ع الموضوع وتناساه/المسكيينه مو وجه بر وبهذله.. الله يهدي ابوها بس
تميم بلامبالاه وحاجب مرفوع بحده/خليها هنا احسن لها من هياتتها بالبحرين
شيهانه استغربت/وانت وش دراك انها كانت بالبحرين
تميم شعر انه "جاب العيد"،تذكر ذات مره انه كان مع زوجته السابقه بالبحرين و رأوها متبرجه مع شاب بالمول وزوجته عرفتها حينها.. وطبعاً سلهام اصلاً ليست مهتمه بالحجاب ولا تعرف تميم لحظتها..!!
شيهانه استغربت سرحانه/هيي وين وصلت،شلون عرفت انها كانت بالبحرين؟!!
تميم وهو ينفض صورتها التي يحتقرها من مخيلته/كانت تدرس هناك بجامعة الخليج
شيهانه استغربت اكثر منه/وتعرف عنها.. انت لا يكون تراقبها ،
تميم نسي نفسه و تكلم من بين اسنانه بحده/عمتي ترى طاريها يزعجني.. ووجودها هنا منرفزني اكثر،اقسسم بالله اني اتمنى اني اقدر اضربها واربيها.. وانا قادر.. اصلا هالبنت ماتتحجب ولا تتغطى عن الرجال
شيهانه خافت ان يكون هناك شي كبير لاتعرفه/انت وش تعرف عنها بعد؟ علامك تتكلم وكأنك شايل بقلبك،
تميم صد بضيق وغيرة رجل شرقي على عرضه الذي يشعر بأن هذه البنت ساوته بالارض.. ،
. ترك عمته واقفه مكانها و طلع يتمشى وينفس عن ضيقه ويقول بخاطره( دام ان عمي جابها هنا بقشها فأكيد 100% انها جايبه العيد.. وبدال ما يذبحها رماها عند عمتي في البر، ههه مفكر هالبر منفى!! )
شيهانه ضلت مكانها سكتت وهي مازالت مستغربه وهي ترى تميم يتركها وعليه ملامح الغضب.. اصبح بداخلها استفهامات عن ماضي سلهام ومليون استفهام عن كيفية معرفة تميم بها، رددت بضيق/الله يستر من اللي جاي
…
.
،
.
،
جالسه بخيمتها تعبث بشنطتها وهي على حافة البكاء.. وتتمم بداخلها (ياررربي وش هالعيشه.. فيه ناس للحين ساكنه بالبر!!. انااا اسكن بالبر ؟!! لييه وش ذنبي؟ ماقترفت ذنب يستحق هالرميه السخيفه هذي.)
بعد قليل اخرجت لها ملابس وتنهدت بقلة حيله وهي مازالت تحدث نفسها(بالله شلون بتسبح اللحين هااه.. فيني صيحه وقهر مكبوت)
دققت سلهام بالشنطه ،و لاحظت ان هناك شيء ما تحت جلد الشنطه ..وكأن احد وضع لها شيء.. لأن التي جهزت شنطتها اختها الاصغر منها.. بأمر من والدها.
دققت اكثر ولاحظت ان هناك فتحه صغيره و ادخلت يدها لتخرج هذل الشيء وتفاجأت انه هاتفها القديم ..وتذكرت ان والدها اخذ هاتفها وايبادها وكل شي يخصها من الاجهزه وكسرها امامها. لكن اختها أخفت لها هذا الجهاز القديم،ابتسمت بدمعه( حبيبتي ريومه )
..فتحت الورقه الملصقه فيه بلاصق..وقرأتها( سلهاموو حبيبتي بشتاااقلك واااجد الله يسامح ابوي ويسامحك بعد.. هالتلفون حطيت فيه شريحتي جوالي الكشاف حق الجامعه.. فيه ارقامك اللي تبينها مثلما تركتيها ماغيرت شي،اتصلي فيني اول ما تلاقينه او دزي مسج.. على فكره من حظك الشريحه فيها شحن 55ريال..وهذا رمز الـ sim ****)
سلهام تنهدت وهي تحاول ان لا تبكي لانها "قويه" ولكنها بكت بإحباط.. وهي ترى كل لبسها بناطيل لا تعلم كيف ستدبر نفسها.. لا يوجد سوى فستانين ناعمين لكنها قصيره يستحيل ان تلبسها هنا..
بل حتى عبائتها لا تصلح ،صحيح هي لاتهتم بالحجاب لكن امها نبهتها ان اعمامها اناس ملتزمين عكس والدها "غريب الاطوار" ..
تذكرت حبيبها الذي رُميت في الصحراء بسببه هذه الرميه بسبب حبها له واصرارها عالزواج منه… اخذت الهاتف وقررت ان تتصل به ، علّه ينقذها من هذه الورطه ليس عندها حل غير هذا الحل ما دام ان والدها غير مكترث بها.
شغلت الجهاز لترى شحن البطاريه وابتسمت وهي تراها فل ..اخذته ولبست "شيلتها الخفيفه" وطلعت لبرا. مستغله ظلام الليل..
اتجهت بعيداً خلف" الوايت" الذي تركنه شيهانه بالعاده خلف خيمة المطبخ ..وبهذه الطريقه ابتعدت عن مسامعهم..
ارسلت رساله الى اختها لتطمينها.. وبعدها بحثت عن رقمه الذي حفظته بالجهاز وابتسمت وهي ترى اسمه "هيثم" وتقبّل الشاشه،
اتصلت بالرقم وانتظرت الاجابه منه، وانتظرت.. وخافت ..واخيرا رد وتكلمت هي بصوت يرجف/ألووه هيثم
بالجوال رد هيثم بسعاده/هلا سوسو حبيبتي وينج فقدتج يالغاليه شنو انتي للحين بالسعوديه؟
سلهام بصوت يغص بالبكاء/هيثم حبيبي انت شايف الرقم عندك يعني اكيد للحين بالسعوديه.. حبيبي انا ضعت ضعت
هيثم استغرب/انتي شتقولين،وين ضعتي؟ كلمتي ابوج عن الخطبه؟
سلهام وهي تمسك الجوال بيدين مرتجفتين/كلمته ياهيثم وياليتني ماكلمته..عرف ان بيننا علاقه و فهمها غلط..
هيثم حاول تهدئتها/عادي انزين انا بخطبج ليش يسوي جذي..انا احبج سلهام ماقدر استغني عنج، متى بترجعين؟
سلهام/وانا بعد يا عمري اموت فيك..بس ماقدر ارجع.. ابوي رماني في البر عند اهله وما اعرفهم ولا اعرف انا وين
.. مقهووره يا هيثم.. اخذ جوازي وكل اجهزتي..احس اني بموت هنا يا هيثم تعال اخذني الله يخليك
هيثم تردد وتغيرت نبرته/شنو.. البر !!، ماتوقعت ابوج بهالتخلف ليش يسوي فيج جذي
سلهام خافت الشحن يخلص وهي ما شبعت منه/هيثم حبيبي بلييز الله يخليك تعال.. <<<انقطع صوتها
..شعرت بيد تسحب الهاتف منها و رجل طويل يقف أمامها و نظراته مخيفه وكأنه سيقتلها..
اسندت ظهرها على الوايت"التنكر" من شدة خوفها ودموعها تنزف وصوت مبحوح من البكاء/يممه ..شتبي مني انت؟
تميم وهو يزم شفايفه بغضب شديد و بقمة ثورته/كنت حاس ان عمي ما رماك هنا وعافك الا وراك مصيبه..
سلهام فقدت القدره على الكلام وهي ترى كمية الغضب على ملامحه، انكمشت على نفسها من شدة الخوف/..
تميم باحتقار وسخريه/اجل تبين فزعة حبيبتس هيثم هااه!! تحسبين ان مسألة هروبتس من هنا مثل الحياه ببيت ابوتس هااه و الا مثل الهياته في البحرين !!.. يالوصخه يالـ… ابي اعرف انتي ماتستحين؟ اكيد ماتستحين.. لان وحده متهاونه بحجابها وماتغطى من الرجال اكيد معدومة حياء
سلهام زادت دموعها ونزلت راسها بانكسار وهي البنت صاحبة الشخصيه القويه "المتمرده" والمعروفه بذكائها لكن ليس هذه الليله وليس بدون سند، فلا ملجأ لها بعد الله.. فاكثر الناس قرباً لها قد رماها في الصحراء.. فبمن تستنجد؟!! ضلت صامته.. وتتلقى كلماته القاسيه..
تميم مد يده وثبت وجهها بشراسه بقبضة يده القويه ورفعه تجاهها بعنف/اللحين مسويه انك مستحيه هااه!!! ..اللي مثلك يموت ازين له،قوليلي من هذا هيثم هاااه منهووو؟
سلهام حاولت ترد ولكن لم تستطيع وهو يثبت فكها بقبضته،،ودموعها بللت وجهها من شدة الألم .
تميم حرر وجهها من قبضته و تكلم من بين اسنانه/من هو هيثم؟
سلهام بقوة عين ووقاحه رغم قسوته وألمه لها/هيثم حبيبي.. وقرريب بيجي وبروح معه وافتك منكم
تميم اسقط الهاتف من يده و داس عليه وجعل منه قطع صغيره لا نفع منها ورجع اليها مجدداً و احكم قبضته حول عنقها وتكلم من بين اسنانه وعيونه الحمراء وقد نسي نفسه، فهي ليست من بقية اخواته، لكن كونها بنت عمه فهو يظن ان امرها يعنيه ايضاً/اقسم بالله لا اربيك يالوصخه، و معترفه بعلاقتك يا قليلة الشرف، انا ادري انك ما تتحجبين ولا تتغطين نفس البنات السنعات والا ما شفتيتي تجرأت عليتس، انا بربيتس.. و
سلهام قاطعته و حاولت تصرخ لكن لم يسعفها صوتها المبحوح/ااااه عمممتتي الحقـ..
تميم أغلق فمها بقوه مفرطه/اللحين انا دايخ وبروح انام وانتي صدعتيني ..ولكن انا بدبر موضوعك دواك عندي يا سلهام..تربيتك على يدي أنا ان ما قلعتك من هنا ماكون تميم.. لكن مو لحبيبك هيثم.. لا بزوجك واحد في بالي، وليته يقبل فيتس بعد ..، تفوووه
تركها بعنف و ذهب بعدما كسر الجوال تكسير واحرق قلبها بما فيه الكفايه .
جلست سلهام و اسندت نفسها على "تواير الوايت" الضخمه وهي تبكي بحرقه وقهر، متحسره على هاتفها
شعرت بأن هنا نهايتها لا محاله، .احباط العالم يكتسيها..
رفعت راسها للسماء ودموعها تسيل،
تشعر بحاجه مُلحه لأمها ذلك الصدر الحاني الذي انهار لدى خروجها من البيت… و تعب السنين ووثيقة التخرج التي لم تستلمها الا من فتره بسيطه، و الحياه المترفه ودعتها.. هنا النهايه يا سلهام.. لابد ان تقصيرها تجاه ربها هذا هو نتيجته.. فهل يكون العقاب الذي ينتظرها "تميم".. تساءلت مراراً هل سيحاول كسرها.. ان حاول فقط ان يكسرها حينها ستظهر له سلهام العابثه لا محاله..فالآن ليس لديها ما تخسره اكثر مما خسرت..
سمعت صوت كلب ينبح من بعيد.. وفزعت من مكانها و اتجهت للخيمه تركض ورأت عمتها شيهانه قادمه من خيمة الجد..
شيهانه استغربت حالتها/سلهام وش فيك يا بنتي
سلهام بوجه مبلل بالدموع ألقت نفسها بحضن عمتها وهي تجهش بالبكاء بدون ان تتكلم..تريد فقط حضن أم يحتويها..
شيهانه رحمتها وضمتها محاوله ان تهديها/انا حاسه بوجعتس ..ابكي وطلعي اللي بصدرتس..البكاء في بعض الاحيان راحه..
.
،
.
/
/
،
اليوم الثاني..
بالمحكمه..بحضور بو حمدان والشهود الباقين.. تمت الملكه.. و اصبحت توق زوجة حاكم على سنة الله ورسوله..
خرجوا من المحكمه وحاكم بيده دفتر "عقد النكاح" الاخضر..ولا يعلم ماذا يخبئه القدر..
الكل ذهب بعدما بارك له وهنأه..
بو ناصر ابتسم على مضض/مبروك يا حاكم..
حاكم بابتسامه صغيره/الله يبارك فيك عمي..
بو ناصر/منتظرينك انت وجدك والاهل علشان تحديد الزواج
حاكم خائف من نقطة الاهل وبالذات جده لو عرف/اكيد يا عمي اكيد… يلا فمان الله
بو ناصر/فمان الكريم.
.،.
.
،
ركب سيارته ..ادار محركها.. والتفت على يمينه وابتسم.. كانت تجلس هنا.. ياترى هي توق او غيرها.. هي زوجتي او لا.. ألف سؤال وتخيل في مخيلته.. كلها تتبخر ويبقى التساؤل.. (وش اسوي لو طلعت وحده ثانيه)..
تنفس بعممق واكمل طريقه.
،
.
.
بيتهم..
دخل بو ناصر وهو يحاول يبتسم ومعه اولاده و كل واحد فيهم عابس وعاقد حواجبه..
بو ناصر اتجه لها بابتسامه ابويه حانيه/مبروك يا توق.. صرتي زوجه يا حبيبت ابوك
توق تجاهلت نظرات اخوتها التي تتهمها بالخيانه واتجهت بعينيها لابيها/الله يبارك فيك يبه
اتجه ابو ناصر بتعب صوب السلم يبي يصعد لغرفته/بروح اقيّل شوي لا احد يزعجني.
،
عم السكوت لحظات..
… شعرت انها انها يجب ان تذهب لغرفتها وتتركهم.. فالجو المتكهرب بين اخوتها لم يناسبها فكل منهم بعيونه لوم واتهام…
عبدالرحمن بغيض اتجه لها بنظراته وهو يعض على اسنانه/مبسوطه اللحين؟.. نزلتي راسنا عند العايله.. خليتينا سالفتهم
توق استغربت هالكلام، لماذا يلومها ووالدها هو من عرض الزواج على حاكم وهي تحملت و نفذت كلامه/سالفة من؟!! عبدالرحمن انت وش تتكلم عنه
بجاد حاول ابعاد عبدالرحمن عنها/يا ولد ابعد عنها هالكلام معاد منه فايده، هي صارت زوجته
عبدالرحمن تكلم بحده من بين اسنانه/بتدفعين الثمن يا توق.. وبتندمين بعد
توق شعرت بغصه وهو يكلمها بهذه النبره/ماتعلمني اي ثمن اللي بدفعه؟!.
عبدالرحمن وهو يرمقها بغيض/ماقاهرني الا انك مستهينه في اللي سويتيه ومستسهله الموضوع
توق نفد صبرهامن هذه هالاتهامات السخيفه/انتم شفيكم علي كل اللي سويته اني وافقت ابوي وما احرجته.. اصلا ابوي اعطى الرجال كلمه قبل لا انا اوافق.. والبنات كلهم رفضوا.. مستحيل اني افشل ابوي.. افهمووني
عبدالرحمن بنظراته الناريه/اعجبك شكله هاه؟!.. كل الخطاب تتشرطين وترفضينهم وهم من قرايبنا وناس تسوى.. وبالنهايه تتزوجين ولد البراك بسهووله وبهالسرعه الله يفشلك يا شيخه
توق اكتفت من حرق الاعصاب منه وقررت تركه ماتجادله العقيمه..
عبدالرحمن اشتاط غضباً وهي ذاهبه/وين رايحه تعالي مابعد انتهيت..اسسمعيني ززين يا وويلك ان ماطلبتي منه الطلاق،
توق توقفت والتفتت عند كلمة طلاق و نظرت اليه مستغربه انه يراها لعبه او قاصر تفعل ما يملى عليها، و تكلمت بعقلها/طلاق ماني طالبه من حاكم طلاق.. اتق الله، كيف تبيني اطلب منه هالطلب بدون سبب شرعي مقنع؟! عبدالرحمن حط عقلك براسك ..واترك هالموضوع ازين لك ولي..انا ما راح اوطي راس ابوي علشانك
بجاد اقتنع بكلامها ولكنه ما أبدى رأيه.. قرر يسكت بسلبيه..
عبدالرحمن بوعيد/اووعدك يا توق ماراح تتهنين بهالزواج اووعدك..
توق تجاهلته واكملت طريقها لغرفتها وقفلتها متجاهله العالم.. ما زال والدها بصفها. لن تفكر في احد. .
كل ما تفكر فيه حالياً… اللحظه التي ستبدأ فيها حياتها الجديده، وبقلبها خووف لا تستطيع انكاره من قادم الأيام.. كيف ستتزوج شخص لا تعرف عنه شي!! كيف لها بعد كل من تقدموا لها كلهم تتزوج ولد البراك!!
شعرت وكأن القدر يسوقها نحوه،…
.
،
.
،
.
بمكان ثاني.بالمستشفى… *
في غرفة الانتظار امام العياده..
يجلس تميم و ينتظر خروج جده من غرفة الاشعه.. وسمع نغمة هاتفه ونظر الى الرقم ببتسامه ورد/هلا يمه
بالجوال/السلام عليكم تميم
تميم عرف نبرة صوتها وعقد حاجبيّه/خير يا صيته ليش متصله
صيته/تميم بغيت استاذن منك.. ابي اروح للـ..
تميم قاطعها/مافيه
صيته/تميم انا اقصد. .
تميم قاطعها بصرامه/صيييته.. انقلعي ورجعي الجوال لأمي يا وويلتس لو شفت مكالمات لغير رقمي عند أمي.. وعلمي اختتس لاجي امردغكم اللحين..
صيته بضييق/طيب..
تميم سكر الجوال بدون ان يسلم…
اعاد الهاتف المحمول لجيبه وهو يكتم غيضه وغضبه،يستحيل ان يثق في بنت مهما كان ،تميم نوع خاص من المتشددين،..
تذكر الذي حدث البارحه بينه وبين سلهام ومكالمتها.. وجملتها التي جعلت عقله "يودي ويجيب" وهي تقول بوقاحه وقلة أدب [هيثم حبيبي.. وقرريب بيجي وبروح معه]
تمتم بداخله وهو يرص على اسنانه( الله لا يخليني. كان خليتك على هواك يا سلهام)
،
.
.
،
قاربت الشمس على المغيب..
بعد مشوار وتعب طريق.. وصل حاكم لأهله.. أوقف سيارته وضل جالساً فيها قليلاً وهو يفكر هل يخبر جده عن زواجه الآن ام لا!!
لو قال له هل سيغضب؟.. ام انه سيتفهم السبب والظرف الذي تزوج بهما.
شعر ان تفكيره اصبح مشوش.. خلع شماغه بضيق وغلغل اصابع يده في شعره ..
في البدايه سيذهب الى عمته.. ما دام ان الجد ليس متواجد في خيمته ولا حتى "الصفيف"..
اتجه ناحية الخيام وهو يخلع نظاراته.. توقع انه سيلاقيها هذا الوقت تُعد الشاي او "الكرك" في المطبخ..
دخل وهو يرى اخرى غيرها واقفه وهي تدير ظهره وتلبس بنطلون اسود وبلوزه بيضاء واسعه وشيلتها على رقبتها وشعرها منثور على ظهرها..
لم يصدق نفسه وخرج بسرعه بعد نظره خاطفه.
تحنحن وكأنه وصل حالاً وهو يجهر بصوته/يا عممه.. يا عرررب!!
سلهام ألتفتت وهي خائفه،خافت ان يكون تميم المرعب" و رفعت "الشيله" على رأسها وهي متوتره لم تتعود بعد على العيش هنا، لكنها تأكدت انه ليس تميم/لا تدخل ،عمتي عند الابل
حاكم استغرب انها تقول عمتي وتساءل (من هاللي جااء من اعمامي وجايب اهله معه هالوقت؟!! )،
تركها ومشى..
سلهام وضعت يدها على صدرها وهي تحاول ان تهدي نفسها، شعرت برغبه في البكاء.. لكنها تعبت من كثر ما بكت وكرهت انها فقط تبكي؟.. يجب ان تكون قويه مثل السابق، الغضب والاعتراض والدموع لن تنفعها بشيء.. تنهدت(الله يهديك يبه،بالله هذي حاله راميني بوسط ناس ماعرفهم)..
سمعت صوت شيهانه ترحب بعالي صوتها، و ذهبت من خلف الرواق لترى من هذا الذي ترحب به عمتها..
تنهدت سلهام وهي تقول بداخلها (هذا بعد واحد غير تميم الخايس الله لا يوفقه!..شدعوه،مافيه جنس بنات يجون هنا!!
*شعرت بالظلام يخيم و دخلت..
،
.
شيهانه بابتسامه/وووينك يا وولد خوفتني عليك
حاكم وهو يشد الفروه على نفسه من البرد/مريت ربعٍ لي سلمت عليهم وحلفوا علي الا امسي عندهم..وخبرتس ماعندي شغل امسيت عندهم
شيهانه وهي تتخصر بيديها/اللحين انت ماخذ اجازه علشان تحوس في هالبران
حاكم ببتسامه/هواي البر يا عمه
شيهانه/انت منت قايلي انا وامك ندور لك على عروس.. خلاص العروس و لقيتها انا
حاكم بارتباك/هااه.. عروس؟!
شيهانه ضحكت من ردة فعله/شفييك كأنك استحييت
حاكم حب يمازحها لأنه يعرف انها تكره موضوع زواجها/لا والله.. استحيت هااه!! .. خليتيها سالفتك.. انا هونت ماني متزوج لين تتزوجين انتي
شيهانه وهي تمد لسانه وتحارشه/ماعلي منك ،منت قادر تغيضني.. وزواج راح ازوجك غصب عنك وارقص بعرسك بعد
اقبل الشاص يسوقه تميم ومعه الشايب..
حاكم انبسط بشوفة جده/ارررحبووواا… هذا جدي وصل وبيفكني منتس
شيهانه/لا تفرح وااجد ، لي معك حكي طوويل
اوقف تميم السياره ونزلوا وسلموا..
الشايب بوجه مستبشر/حي الله حاااكم يا مررحبا
حاكم بابتسامه/حي الله السمي
تميم وهو يسلم على حاكم/شلوونك بو براك
حاكم بابتسامه/زاان لونك
شيهانه/ادخلوا عن البرد تراني شبيت الضو ..وجهزت القهوه وحميت الحليب..
تميم وهو يضغط باصابعه هلى جبينه/امممما القهووه ياهو راسي موجعني منها.. تكفين الحقيني بها..
الشايب/ياكثر عيارتك يا هالولد.. من اصبحت وانت تقهوى
حاكم وهو يضحك/مدمن قهوه الله يشفيه
تميم ضربه على ظهره/تعال انت وش سويت عند الـ..
حاكم غمز له يسكت وقاطعه/بخير ابشرك.. ينشدون عنك
*شيهانه لاحظتهم تلخبطوا وكأن بينهم شي يخبون.. بس سكتت وهي تدخل الخيمه مع ابوها..
حاكم التفت على تميم بنظرات تهديد/خبل انت.. بغيت تجيب العيد قدام جدي
تميم وهو يضبط "نسفة شماغه"/نسيت.. بس ماقلت لي وش صار
حاكم/بعدين اقوولك خلني اروح لجدي لا يحس بشيء وانت يالله ارفع الآذن لصلاة المغرب وتعال داخل خلنا نصلي.
تميم وهو مستغرب خوف حاكم/طيب ،بس الله يستر شكلك انت اللي جبت العيد.
حاكم تجاهل حديثه ودخل..
،
.
،
.
،
.
،
في الدمام*
بيت جديد راح ندخله ونستكشف قصصه وحكاياته..
بالمطبخ تجهز الضيافه وكل لحظه تمر على الفرن وتنتظر الكيكه تخلص علشان تطلعها ..
دخلت اختها دلال تستعجلها/صيته خلصتي؟
صيته/خلاص تقريبا خلصت.اخذي هالصحون. وش فيتس مستعجله كذا
دلال اتجهت للصحون وهي تكلمها/ترى زوجة عناد وصلت مع خالتي ام عناد وبنتها سبرا
صيته بابتسامه سخريه/زوجته الجديده..
دلال وهي تتأكد من الضيافه قبل توديها/المسكينه شكلها ماتدري عن زواجاته الثنتين اللي راحوا
صيته تكره تصرفات الرجال التي بنظرها تظلم البنات/وبااقي عنده زواجات ثانيه هالمزواج.. ابو النسوان يا كرهه
دلال/هههه خلصي تعالي لا ينتظرون
صيته/طيييب خلصنا الكيكه وطلعتها تبرد شوي.. امشي قدامي نودي اللي بيدينا..
..
عند الحريم وبعد تقديم الضيافه..
سبرا تهمس لصديقتها صيته/رووعه الحلى
صيته وهي تكتم ضحكتها/خبله انتي تهمسين علشان تمدحين حلى.. ترى ماهو اختراع
سبرا/ههههه مشكلتك دووم تقللين من قيمة ابداعك
صيته تجاهلتها وهي ترى نعومة زوجة عناد ورقتها وتهمس لصافيه/ماشاء الله على فطوم زوجة اخوتس تهبل.. اظن اللحين بيعقل وبيكتفي من الطلاق والزواج
سبرا بشك/ماظنتي..
صيته/حراام عليتس بااين حليووه وطيووبه
سبرا/هذا بلا بوك يا عقاب..هي حليوه وطيوبه ورومانسيه بعد ياعيني ..بس اخوي يطير بالوحده اول اربعه شهور وعقبها يسحب عليها
صيته باشمئزاز/يمه منه ..يهبا.. ابي اعرف وش يبي بالضبط هالمزواج
سبرا ضحكت عبى ردها العفوي/..
صيته وهي تنزل الفنجان من يدها/انتي اخوك مزواج.. وانا اخوي تزوج مره و طلق ومن عقبها تعقد من جنس الحريم لدرجة قفل علينا شوفة عينك..
سبرا رحمتها/الله يعينك اخوك احس مزودها حبتين..
ام تميم وهي تنظر لصيته وترفع حاجبها حتى تقدم الضيافه الباقيه، لكن صيته لم تفهم فقررت تتكلم/صييته ..قومي صبي الشاهي
صيته بابتسامه على نبرة امها واضح انها تنرفزت ،بس هي مافهمتها/ااامررري يمه..
،
.
،
.
،
بعد مرور ايام ع الاحداث السابقه*
الدمام.. "
الساعه 8:30
كعادتها منذ شهرين منذ ان استلمت وظيفتها الجديده..
كانت تقف امام مرآتها وتربط شعرها الطويل بشكل ذيل حصان و وتتأكد من لبسها الرسمي بنطلون اسود وقميص ابيض وجاكيت اسود.. و تضع بطاقة اسمها على الجاكيت كلمسه نهائيه وهي تمتم باذكارها التي حرصت انها ترددها دوماً.. فهي مؤمنه بأن الذكر سيحفظها من شر كل ذي شر..
اخذت عبائتها على ذراعها و شنطتها و خرجت وتفاجأت به يقف امامها لم تستطيع اخفاء رعبها منه،و هي تتساءل مالذي جعله يصعد فوق والى جناح البنات الذي لم ضل فيه غيرها والكل تزوج/بسم الله!!
حمد وهو يتكئ على الباب/بسم الله عليك خفتي!!
توق وهي تتحاشا ننظراته و كأنها لا تعرف نواياه السيئه لأن بمجرد التفكير بهذا الشيء تضيق ذرعاً فمن الصعب ان تبوح عن حركاته لأحد..لكن تدعو ربها ان يكفيها شرّه/عمي لو سمحت ابعد وراي دوام مابي اتأخر
حمد وهو يمد يده لخدها بنعومه/انا بوديك.. اشتقتلك لي يومين ماشفتك
توق ابعدت وجهها قبل ان يلمس خدها/هذا انت شفتني يلا انا رايحه مع السايق.. سلام
حمد مسكها مع انه تعود على جفولها منه/توق حبيبي
توق سحبت يدها بقوه و ذهبت/معليش مستعجله اشوفك بعدين
نزلت بسرعه تحت ولبست عبايتها وهي تمشي وخرجت مسرعه لا تريد ان يلحق بها…وتلعنه بداخلها.
ام ناصر شافت حمد ينزل من الأعلى ويمشي خلف توق واستغربت وهي تلثم بطرف شيلتها/بسم الله.. حمد متى جيت الله يهداك
حمد/اعذريني ماشفت احد قدامي.. وصعدت فوق
ام ناصر وهي تنتقد على تصرفه/الله يصلحك ثاني مره تحنحن، دستوور
طلع حمد وهو منحرج من ام ناصر ولم يستحي من نفسه ..
ام ناصر شافته طلع وفكت لثامها وتكلمت بحسن نيه/الله يهديك يا حمد من حبك لبنت اخوك لازم تصبح بها وتمسي..
،
.
وصلت البنك لم تكن مصدقه انها قد تملصت من حمد التي عرفت مؤخراً نواياه القذره، تمنت لو لديها الجرأه كي تصارحه بأنها ليست غبيه وتعرف ما يلمح له..لكت حياها يمنعها من ذلك.. ستصطبر علّه يكف أذاه عنها.
اتجهت لمكتبها في القسم النسائي بعدما سلمت على زميلاتها/..
اقبلت صديقتها المقربه وبنت خالها وهي تتبسم وفرحاانه/توووق حبيييبتي
توق انبسطت بشوفتها وقامت تسلم/هلاااا جود
جود/توو مانووور المكتب
توق/تسلمين ياعمري
جود/ايه تذكرت..
راحت مكتبها واخذت علبه زرقاء ومعها بوكيه ورد. واتجهت لتوق/مبررووك الملكه حبيبتي.. هذا شي بسسسيط بهالمناسبه..
توق ابتسمت بامتناان وهي تشوف رفيقتها تذكرتها بهديه بينما من تملكت ماشافت هديه وحده من احد حتى من زوجها، شلون تفكر انه ممكن يجيها هديه من هالبدوي/ الله يبارك فيك حبيبتي جود ماكان له دااعي
جود/كيف ماله داعي وانتي بزواجي احسن هديه جتني كانت من عندك.. بعد محد يهدي طقم ذهب وساعه بـ6000 وتذاكر سفر لتركيا… انا يدوب جبت لك طقم ذهب.. لكن ابشري بالزواج بيجيك مفاجأه تستاهلين..
توق وهي تخزها ة/طيب ليه ما زرتيني وجبتي الهديه للبيت هااه
جود/اسكتي بهذلني زوجي ..قال نروح لاهله بالحسا وهدذي رجعتي من هناك من يومين.. سد نفسي من حرتي عليك
توق ضحكت/اممم خلاص عذرتك، روحي قابلي شغلك.. ترى اللحين بتجي عفااف وبتسوي لنا محاضره
اقبلت عفاف/بناااات وش صااير
كل وحده كتمت ضحكتها واتجهت لمكتبها..
جلست توق وهي تحاول تتذكر ملامح حاكم، وتضارب افكارها وحيرتها من هالزواج.. ويضيق صدرها من نظرات الكل بالعايله.. ماعدا حمد اللي صار يوريها وجهه كل يوم.. واليوم تشوفه عند جناحها مسنتر.. وصارت تمتم ( الله يكفيني شره )
.
،
.
،
.،
.
كانت جالسه تناظر بالتلفزيون بهالخيمه وضايق صدرها و هي تحس انها انتهت وان حياتها صارت بدون قيمه في هالصحراء كمية البكاء والصراخ والاعتراض مانفعوها بشيء ،خلاص يوم وراء يوم اعصابها بردت و غصب تتقبل الوضع الجديد.. كانت جالسه تطالع وهي متذمره ومتملله..
سمعت صوت عند خيمتها ينادي بنبرة صوت تريحها/سلهاام
سلهام لقت نفسها تقوم وتتجه لباب الخيمه بسرعه/هلا جدي
جدها لاحظ لبسها وهو ناقد بس عذرها كونها جديده وتربية ولده سعود ما تعجبه، ابتسم بحنيه/من امس ما شفتك ،شلونتس يا بنتي
سلهام ابتسمت تجامله/بخير يبه.. تعال اجلس تونا حاطين القهوه وعمتي جايه
الشايب لاحظها انحف منها اول ما جتهم/شفيك نحفانه انتي مريضه والا تشكين شي يا بنتي
سلهام ترددت/لا سلامتك مافيني شي..انا بخير
الشايب/عسى عسى.. طيب محتاجه شي تبين شي؟ تراني بالشوفه
سلهام ترددت انها تقوله عن اللي سواه فيها تميم بس خافت وترددت ..لانه اكيد بيسأل عن السبب وواضح انهم يعزون تميم وحاكم بالحيل وما راح يصدق فيهم
الشايب/هاااه وش تبين لا تخشين بقلبتس شي
سلهام/ابيك توريني الابل.. وو بعد ابي اشوف الخيول وتعلمني وين حنا فيه..زهقت وانا بهالخيمه
الشايب ابتسم على طلبها/ابشررري ما طلبتي شي.. البسي عباتك وشيلتتس وتعالي معي.. بوريتس كل شي هنا.
سلهام استااانست لأول مره من جتهم/ثواااني بس
،
.
،
.
واقفه مع جدها عند مربط الخيول وهي مستغربه ابتسامة ونشاط جدها وسوالفه وقصصه اللي يحكيها لها..
سلهام بعد تردد/جدي
الشايب/سمي يا سلهام
سلهام بدلع مسكت يده/انا بنتك والا لا
الشايب/الا بنتي ونص افا يا ذالعلم
سلهام مدت بوزها بدلع/طيب ليه كل واحد هنا عنده حصان وانا لا
الشايب/انا ابوك يا صبي..اللي تبين من هالخيول اخذيه ولا يكون خاطرتس الا طيب
سلهام باسته في خده/فددديتك
الشايب/ياززينكم يالبنات الله يصلحكن
سلهام ضلت متمسكه بيد جدها وهو يمشيها بين الحلال ويحكيها
قصص المكان..ارتاحت معه غير مصدقه ان هذا الرجل النبيل يكون ولده ذلك المدعو "والدها"..
اقبل من بعيد و رآها متكشفه وتحنحن/تسسستررري يا بنت
سلهام تكره نبرته المستفزه وكأنه يتعمد ان ينغص عليها دائماً ما يقول لها "تستري" وكأنها تمشي "عريانه"، لفت اللثام وصغرت فتحته..
الشايب يحب غيرة تميم لكن لا يعلم عن خباياه وعصبيته وثورته المدمره/هلا تميم..
تميم وهو يرمقها بنظرات احتقار/هلابك جدي..
الشايب/وش عندك ..
تميم/حبيت اجي اسلم واستاذن… بروح لاهلي
الشايب لاحظ نظراته للبنت، الكل يظن ان نظره "ضعف"/طيب سلم على بنت عمك والا ماتشوف
تميم يكرهها فكيف يسلم عليها وهو يحتقرها،فهي بنظره لا تساوي حفنة تراب /هلا سلهام.. شلونتس؟
سلهام بضيق "لا تطيق منه كلمه" هو لانه لا يحترمها و نظراته التي تحتقرها تكرها خاصةً بعد ذلك الموقف/بخير الحمدلله.. وانت؟
تميم ما يشيلها من ارضها/ الله يهدي الجميع
سلهام انقهرت من هالنبره وهالجمله الاسقاطيه/والله ياخذ ابليس واعوانه
تميم كان مقفي والتفت صوبها بنظراته الناريه واكمل طريقه مره اخرى، هو يعرف انها تُلمح له.. (قصدها اني بليس الوصخه هذي..معليه) !!
الشايب لاحظ النبرات الغريبه لكن لم يفكر بأي شي سيء.. كان يفي "البعير" وينادي سلهام/سلهام يابوتس تعالي أوريتس الشامخ..
سلهام استغربت تظن انه اسم شخص/من هو الشامخ هذا
شيهانه اقبلت وهي تضحك/الشامخ أسم الفحل حق الحلال هذا كله..
سلهام استغربت وهي ترى ضخامته/يعني قصدك انه هذا ذكر والباقي كلهم اناثي
شيهانه/هههه الله الله..
الشايب/شوي شوي وتعلمين وتصيرين احسن من شيهانه
شيهانه بحماس تكلم سلهام/انا بحلب الخلفات اليوم بدال العامل تجين معي؟
سلهام تحمست، مع انها ماتعرف معنى خلفات /يلا..
الشايب توقف مكانه وهو يتابع البنات و مبسوط..ويتمتم بخاطره(الله يحفظكن ويسعدكن)
/
/
/
/
/
/
الدمام..
عند أمه مستلقي وراسه في حضنها وهي تلعب بشعره وتتبسم وهو مسترخي ومغلق عينيه..
… ..كان متردد "يقول لها.. او لا يقول لها".
طالت المده اكثر من اللازم.. وهو لم يعود لاهل العروس ولا قال لأهله عن ملكته...
بظنه ان اليوم الذي سيقول لعائلته عن زواجه من بنت الصارم سيكون يوم صعب جداً والارجح سيواجه مشاكل.!
شعر ان راسه فيه مليون "شغله".. و ما يشغله الآن شي وهو ما يربكه..!
ام حاكم لاحظته اطال السكوت وابتسمت بحنان/في خاطرك شي يا قليبي
حاكم يحب دلعها له يشعر وكأنه يرجع طفل اذا جلس مع أمه/احبتس يمه..
ام حاكم وهي تقرص خدوده/لو تحبني صح هالاجازه ماترووح مكاان خلك عندي يا بعد من لي
حاكم/بس تخبرين جدي ما يستغني عني
ام حاكم/ماعليع بس شوي هنا وشوي هنا..
حاكم وهو يفكر بالبنت اللي تزوجها و تركها.. غير قادر على ان يفاتح جده واعمامه ولا حتى أمه بموضوع زواجه من ال صارم..و لا يصح ان يذهب اليهم بدون اهله…من الواجب ان جماعته يكونون معه فالبنت من قبيله وهو من قبيله اخرى، ..
اقبلت وصايف ومعها السفره/يلا يا جماعه العشاء صار جاهز تبونه هنا والا بالصاله..
ام حاكم/ حطي بالصاله.. يلا حبيبي قوم تعشى يلا..
حاكم وقف بابتسامه واتجه لوصايف/لحظه وصايف بساعدك
وصايف بابتسامه/يلا مانرفض المساعده.
/
/
/
/
/
/
في بيت ثاني من بيوت الدمام.. *
بيت فهد.. بوناصر..
الكل جالس على سفرة العشاء ..
بو ناصر وهو يلتفت لمكانها/وين توق؟
ام ناصر كانت بتتكلم..
قاطعتها توق وهي تجلس/هذا انا وصلت.. السلام عليكم
الكل/وعليكم السلام
بو ناصر ببتسامة حنيّه/كيف كان دوامك بعد الاجازه
توق بادلته الابتسامه/حلو.
عبدالرحمن ناظرها بطرف عينه/ما بعد عرفنا راي ولد براك اذا دري انك موظفه.. اخاف بكرا يمنعك وتقعدين تكرفين عنده
توق تذكرت انها لم تطلب شروط بالعقد، فهي "رد جميل" ..سكتت لنعلقت/..
بو ناصر ندم انه لم يخبر حاكم عن وظيفتها علّه يتفهم،قرر تغيير الموضوع/يلا سموا بالله
ابتدأوا بالاكل.. ولكن عبدالرحمن لم يكن مع فكرة زواج اخته من ولد براك،احب ان يبدأ بمشكله/الا شخبار العريس ما طرأ عليه يجي يسأل ولا يحدد زواج ولا شي..
بوناصر بضيق/لا ما اتصل
عبدالرحمن بسخريه/الله يهديكم يبه شكلكم احرجتوا الرجال و زوجتوه توق غصب عنه. والدليل انه للحين ما جاء ولا اتصل.. بس رميتوا عليه البنت من الباب للطاقه ..
توق شعرت بغصّه وقامت بسرعه وتركت الاكل.. ما دام هذا كلام اخوها "سندها" اذاً كيف كلام باقي العائله!!
بو ناصر/تووق ما اكلتي شي
توق وهي مقهوره من تصرف اخوها/خلاص شبعت.. اسمح لي يبه
… ..ذهبت غاضبه*
بو ناصر التفت على عبدالرحمن بعصبيه/انت لسانك متبري منك.. ماتحترمني.. انا اللي زوجتها لهالرجال وحاكم كفو ويستاهلها.. ليش انت تقلل من قيمته واحترامه.. خلاص هذا صار زوج اختك وانت لازم تحترمه
عبدالرحمن وقف غاضب ومعترض/يخسي ويعقب..
خرج وتركهم..
ام ناصر بحزن/الله يهديه هالدحمي.. ضو شابه.. من تملك اخته وهو مطفشها
بو ناصر وهو متضايق/انا اكثر منهم ضيقه.. بس لا تنسون انه غصب عني زوجتها له وهو كفو لو انه بس مب من ال براك.. لو بيدي اخلص بنتي منه بس مابيدي حيله
ام ناصر/الله يعين
قام ابو ناصر/الحمدلله
ام ناصر/تبي الشاهي اللحين ولا بعد شوي
بو ناصر/مابي شاهي بروح انام وراي سفر للرياض فيه شغل لازم اسويه..
ام ناصر/يووه منت حاضر زواج ولد اخوي بكره..
بو ناصر/انا تعذرت منه ووصلته العانيه.. شغلي ضروري مقدر أأجله.. قوموا بواجبهم وروحوا
ام ناصر كتمت زعلها بابتسامه/تروح وتجي بابتسامه..
.
.
،
.*
20-04-15, 03:07 AM
رد: عشق بلا قيود للكاتبة شخصية خيالية
جديد مواضيع قسم القصص المكتمله
العرض العادي
