كاتب الموضوع :
فيتامين سي
المنتدى :
القصص المكتمله
رد: عشق بلا قيود للكاتبة شخصية خيالية
8)) عِشق بِلا قُيود..!
.
.
مدخل:
قيل قديماً عند البدو.. إذا صادف رجل إمراء في مكان ما وصرخت… فإفزع للرجل وانقذه هو "كناية على عِظَم كيد المرأه"..
ولكن الحاصل مازال كيد المرأه هو الأقوى والقائم تأكيداً لما قاله ربنا في كتابه في وصفه لكيد المرأه..!!
،
.
،
..
الاحداث السرديه*
اراد تحريك المياه الراكده ،حاول جاهداً جمع اعمامه بجده تحت سقف واحد في بيته.. ولو لليله.. سينهي موضوعه مهما كلفه الامر.. لن يلتفت لرفض احد..بعد ان أذاب جليد العلاقه مع جده..
اجتمع الكل في بيت حاكم الابن..
على غير العاده الجميع في المجلس ولكن ينقصهم تواجد "ابو تميم" كعادته مسافر..
بعد الاستقبال والقهوه والحديث عن الاحوال.. نظر الجد الى اولاده مبتسماً ثغره وسط بياض لحيته الطويله/الله يبارك في حاكم اللي خلاني اشوفكم حولي.. سوى خير والا انتم مافيكم خير
ابو عناد وهو ينظر لساعة جواله بتملل/الله يسامحك يبه
الجد/يا مسفر انت بالذات ماشفتك من شهرين ..والله ان عيالك اطيب منك.ترى الدنيا ماتسوى تراكض وراها.
سكت ابو عناد وتمنى لو انه لم ينطق بكلمه….
الجد التفت ليرى تميم قد شرد بعيداً/تميييم
تميم التفت اليه/سمّ يبه
الجد/ الليله منت خالي.. وش فيك؟..وش علوم ابوك
هو لا يستطيع التفكير سوى بما اصاب وهو "خسارته بسبب عبث تلك الماكره/ابخير طال عمرك..
الجد بعدم رضا عما يفعله ابناءه/عسى عسى..
تميم تذكر الموضوع الذي يود اخبار جده به ونطق/جدي..وش بغيت اقولك..
الجد باهتمام/اسلم يا تميم..
تميم اردف/ ترى محماس ابن دحيم اتصل بي ويبي يزورك وبيتكلم معك بموضوع يخصه..
الجد استغرب ماذا يمكن ان يريد منه "محماس" تاجر الاغنام ولكن لم يفكر بشيء/حيّاه الله بأي وقت
في هذه الاثناء كان حاكم يهم بأخذ الدلّه ليصب القهوه من جديد..
بو عناد بفضول/الا يا حاكم ما علمتنا وش العلم اللي تبي تقوله لنا
فاهد اخو عناد اتجه لحاكم فهو يحترمه ويقدره.. اخذ منه الدلّه/والله مايصب القهوه غيري ياحاكم.. انت استريح انفداك
حاكم ابتسم له/فداك اللاش..هذي الدلال وهذي الفناجيل
العم هاجد وهو يستعجله/وش العلم يا حاكم
حاكم جلس وبهدوء/بصراحه يا عمامي انا جمعتكم اليوم ابي ابلغكم بخبر المفروض انكم تعرفونه من زمان..
بو عناد/وشهو
الجد ضل منصتاً وهو يعرف ماسيقول حاكم.. لأنه سبق و اخبره بكل شيء..واخذ موافقته..
حاكم/انا من فتره تملكت على بنت فهد الصارم..وحبيت اني اقولكم الخبر بنفسي.. وقررت بعد اني اسوي العرس قريب..
عم السكوت للحظات.. العم هاجد تذكر جرحه في مقتل ولديه وقرر النهوض والخروج من بيت حاكم..
لحق به بسرعه واستطاع ايقافه قبل الخروج من المجلس/صدقني يا عمي انا متزوجها قبل تصير المشكله..
هاجد وقد بانت على ملامحه الغضب والحزن/اعتبر ان ماعندك عم اسمه هاجد..<<<خرج مسرعاً ولم ينتظر رده.
بو عناد/عاد مالقيت غير ذوولااا..!! لا تنتظر منا شي وانت ماخذٍ منهم
حاكم التفت عليه وجمعهم بالرد/لا تخافون انا ماني منتظر منكم معونه ولا حتى راي هذا بس للمعلوميه ،..كل اللي ابيه منكم انكم تحضرون الزواج بهدوء وهذا واجبي اني ادعيكم انتم اهلي وعزوتي..اما اللي يفكر يخرب زواجي ترى ماهو مرحب فيه.
بو عناد/انت تبيعنا علشان بنت غريمك؟!!
حاكم بجديه وهدوء/زواجي ماله دخل بالثأر اللي انتهى..عمي مسفر اي كلام بموضوع قديم مابي،اللي عنده نيه قشرا لا يحضر.
بوعناد اكتفى من حديث الماضي ووافق حاكم رأيه ويبدو ان الجد ايضاً لامانع لديه،هو ليس مهتم بمن تزوج ومن طلق ولو كان يهمه لأوقف ابنه عند حده/الله يبارك لك هالزواج ومنك المال ومنها العيال ان شاء الله، دامك انت مرتاح توكل على الله والله يوفقك
حاكم ابتسم ابتسامه صغيره/الله يبارك فيك عمي و مشكور
عناد بابتسامة خبث/مبروووك يابو برااك،حظك يكسر الصخر.. سمعت ان بناتهم حيل زينات هو صدق يا حاكم زوجتك زينه؟،اكيد انك شفتها.
حاكم اتجه له بنظراته الناريه ومسكه من ياقة ثوبه ونفضه بقوه بسبب سؤاله الوقح ومن بين اسنانه/عناااااد
تميم وقف بينهما وهو مشمئز من سؤال عناد، فمهما كان الحديث عن محارم الناس ليست من شيم البدو/تعوذوا من الشيطان يا جماعه
تركه حاكم وهو يزم شفتيه بغضب/لو انك منت بمجلسي يا عناد علي الحرام ما يفكك مني احد..
عرف عناد خطأه و اتجه له معتذراً مهما كان فإن حاكم صاحب قبول لدى الجميع ويحظى باحترامهم، حاول تقبيل رأس حاكم ولكن حاكم رفض وابعده و هو يعتذر/السمووحه يا بو برااك والله مغير امازحك بس، شفيك حساس الله يهديك
حاكم لم يحب اطالة الموضوع الذي يأتي بسيرة زوجته وجمالها، مادام اخذ اذن جده للزواج.. فليس ملزوماً برأي آخر/انتهى الموضوع..خلاص..
تميم التفت لصقر/شفيك جااالس قم صب الشاهي
صقر وهو يشير ليده المكسوره/بيدي؟!!
تميم/يوووه نسسسيييت.. فاااهد قوووم انت
ضلوا يتبادلون الاحاديث… اما الجد تذكر الماضي الجميل.. وملامح تلك الفاتنه التي تركته وتزوجت بصاحبه.. هي نفسها الآن "جدة توق" ،
لم يجد بُداً من ان يبارك هذا الزواج وان كان مُكرهاً..لم يريد لحاكم ان يعيش على ذكرى توق ويظلم زوجة اخرى.. كما حدث له هو..
/
هي تكالبت عليها الضغوط، لم يقف احداً بجانبها بعد سقوط والدها سوى راجس وراجس لم يضل طويلاً سافر اليوم وودعته بقلبها.. مالعمل؟..
هي متفائله بطبيعتها، مادامت قد تزوجته، فليس لأحد عليها سلطه.. تظن انها مجرد ايام ويسترجع والدها عافيته و يتم زفافها من ذلك الحبيب وتتخلص من كل ما يعكر صفوها..
جلست وهي تضع ابريق النعناع على الطاوله/هاه جود شرايك بطبخي، ترى الشغاله ماسوت شي غير تقطيع البصل
جود بحماس/روووعه.. وووينه منووول هالززين والا مخبيه الطبخ الزين لحوحو
توق كانت تبتسم حتى سمعت الكلمه الاخيره ونظرت اليها بقرف/يااااع وش حوحو ذااا… الله يلوع كبدك يا شيخه
جود وهي تضحك/كنت ادلعععه.. يعني بالله كيف تدلعينه انتي
توق وهي تمسك الابريق و تسكب النعناع بالكاسات/انا اعشق اسمه، كله رجوله ليه ادلعه بهالدلع السخيف ذا
جود ابتسمت بسخريه/واضح انه مأثر عليك ..منتي طبيعيه.
توق استغربت/كيف مأثر علي يعني.. لا تفلسفين على راسي واشربي كاستك بس
جود سردت ماحدثتها به/يعني...خلاك تركبين معه ووداك مشوار قبل يوصلك دوامك وضرب بأهلك عرض الجدار وانتي سااكته.. والمشكله كنتي راايقه ومبسوووطه!!
توق سكتت وهي تتذكر ماحدث ..والقُبله التي لم تخبر "جود" بها.. ماذا لو عرفت جود بها… ماذا كانت سوف تقول..!! ابتسمت وهي تتذكر لحظة القبله التي تريح اعصابها.. شعرت بشوق جارف هذه اللحظه.
جود شدت خصله من شعرها/هييي لا تبسمين لحالك يالخبله لوين راح عقلك
توق بهيام واضح بصوتها ولمعة عينيها/يقولون ان كل واحد له من اسمه نصيب.. اول مره احس بنصيبي من اسمي،يا عذابي من هالاسم
جود ابتسمت لها وهي تغبطها.. فهي لم تشعر بما تشعر به توق..تزوجت زواجاً تقليدي كالعاده تقريباً/الله يسعدك يا بنت عمتي.. اخيراً بشوفك متزوجه
توق وهي تضحك/محسستني انك جدتي ههه ياشيخه انثبري بس ههه
جود بنبره مازحه/جدتك و انثبر هاااه!! اجل شراايك انزل لها و لاخوانك واقولهم ترى اختكم ركبت مع خطيبها بسيارته و عزمها على قهوه و…
توق ضلت تضحك من اعماق قلبها.. حتى انفتح الباب الذي لم يكن مغلقاً بالكامل فجأه و اذا بها الجده تعقد حاجبيها/صحيح هالكلام يا توق؟!
توق وجود بلحظة خرس مؤقت،كيف صعدت الجده بدون مساعده..!!
دخلت خلفها منال وهي تبتسم بخبث/هاااي بنت عمو القاطعه
.
،
.
،
.
.
.
.
هناك في بيت حاكم..
لحظات ودخلت بابتسامتها الدافئه سيده اربعينيه انيقه،لبسها يوحي بأنها من طبقه مخمليه.. التحقت بها خادمتها توقفت وهي تنظر للواقفات باستقبالها.. زوجات اخوتها و بنات اخوتها. واختها الصغيره شيهانه.. ياااه منذ زمن طوويل لم يتقابلا/السلام عليكم
استقبلنها عند الباب كل البنات.. وسبقتهن لها شيهانه التي احتضنتها وبكت بصمت/
نوره بادلتها الاحضان بعينين دامعتين/شيهانه هههه مايصير كذا كلما تواجهنا سويتي مناحه ههه
سلمت نوره على الكل وجلست بينهم بصدر المجلس وهي تشعر بسعاده وتنظر في وجوه اقاربها لفت نظرها وجه جديد بنت صاحبة عيون ضاحكه وابتسامه مرحه/اللحين كلهم اعرفهم الا انتي.. اكيد انتي سلهام بنت اخوي سعود اللي قالتلي عنك شيهانه، صح؟
سلهام وهي تتبسم بمرحها المعهود/يب يب انا هي المزيونه
نوره بعفويه/اي والله مزيونه ما شاء الله تبارك الله.. نسخة أمآل ..اتذكرها في زواج اخوي سعود، كنا اول مره نسوي زفة عروس وكوشه ..
ام تميم لم يعجبها أسمها و لتغيض سلهام تكلمت/وش هالأسم المخيس ذا اماال!!
نوره بابتسامتها/عااد يا مزنه بصراحه ازين من اسمك هههه لازم تدققين يعني
دلال/هههه اي والله ازين من اسمك يمه
ام تميم نظرت الى ابنتها بحده لتسكت..
اما هي لمعة عيناها بدمعه بعد ذكر أسم الغاليه التي انقطعت عنها منذ مده طويله،لم تعلّق على رد ام تميم، اكتفت بابتسامتها المزيفه وسكتت.
لاحظتها صيته التي تجلس بجانبها وربتت على كتفها، ما باليد حيله/انا وسلهام بنقوم نساعد وصايف.
شيهانه ابتسمت لصيته/زين تسوون..
اخذتها صيته للخارج وهي تلاحظ صدرها يرتفع وينزل بشكل غريب وكأنها مصابه بضيق تنفس/سلهام شفيتس لبى قلبتس
سلهام ادارة نفسها ونطقت بنبره منخفضه/ابي أصلي العشاء..
واتجهت بسرعه لاقرب دورة مياه دخلتها واغلقت الباب خلفها.. وانهارت داخلها بالبكاء وهي تتكئ بظهرها على الباب.. ،
قد نحتمل كل شي ،الألم وفراق الحبيب ووجع الغربه لكن من ينسى فراق حضن الأم..
هي الآن معها بنفس المدينه ولكن لا يُسمح لها برؤيتها !!
فهمت صيته حزنها المكبوت ولكن اعجبها كبريائها وهي تأبى أن يرى أحداً دموعها/وش تصلي العشاء وقد صليناها كلنا ؟!!..واضح انها متضايقه وتصرفني.
توقفت صيته امام باب الحمام تريد ان تحادثها ولكنها عجزت ان تجد كلمة قد تواسيها/سلهام حبيبتي انا بسبقك للمطبخ. متى ماخلصتي الحقيني..
تركتها وذهبت لوصايف وسبرا بالمطبخ.. ساعدتها وانتظرت قدوم سلهام.. ولكنها لم تأتي..!!
سبرا باستفهام/وش فيتس بعد
صيته تناست ماحدث/جايه اساعدكم
وصايف/حبيباتي كل شي جاهز والله لا تتعبون انفسكم روحوا ارتاحوا
صيته/هههه ياززينك يا وصايف، ترانا بنات عمك اكرفينا متى مابغيتي لا تستحين
وصايف وهي تتبسم/ابي اخليكم لغسل المواعين لا تخافون
سبرا وهي تضحك/يا ششششيب عيييني وانا اقوول وصايف عسسل
صيته/هههه بصرااحه احترم تخطيطتس يا وصايف.
وصايف وهي تسأل سبرا بجديه/الا ماقلتي لي سبرا… وين فاطمه زوجة اخوك؟ماجتنا الليله!! عسى ماشر
سبرا تذكرت ماحدث/والله مادري شقولكم.. عناد طلق فاطمه
وصايف وصيته اكتفين بالصمت بذهول.. فهذه ثالث زيجه وثالث انفصال.. !!
،
.
خرجت من الحمام وفرحت بعدم وجود احداً امامها سوى بعض الاطفال.. خرجت لباحة المنزل علّها تتنفس هواءاً نقياً ..وجدت طفله صغيره جالسه وابتسمت لها بدمعه يائسه ،تذكرت فقدها القدره على الانجاب،مما يعني انه انكتب لها الحرمان من كلمة "ماما"..لا تعلم لماذا تفكر الان بكل ما هو سلبي ومثير للشفقه على نفسها لعن "تميم بداخلها" فهو سبب حرمانها.. اتجهت للطفله لعلها تدردش معها وتنسى ما يحزنها/وش اسمك يا حلوه؟
الطفله/وثن <<وسن
سلهام اتسعت ابتسامتها،لابد وان هذه الطفله من بنات عمها/انتي وثن مين؟
الطفله ببراءه/يوووووه انا وثن و بث
سلهام مسحت على شعرها بحنان وتكلمت بيأس ونبرة يملؤها التشاؤم/معك حق تحذفين اسم ابوك، اكيد نفس ابوي ونفس الطينه..
عادت وسن لتلعب مع الاطفال وتركتها..
ضلت جالسه على طرف حوض الزرع متأمله لعب الاطفال بألم، فشعور الحرمان الابدي قاسي… قاسي جداً..لم تكن تهتم بالاطفال وامورهم لماذا تحزن الآن وقد فقدت القدره على الانجاب.. لماذا هذا الموضوع لا يفارق تفكيرها..!
وقفت امامها والهواء يحرك شعرها وثيابها/سلهام حبيبتي
سلهام مسحت دمعتها التي كادت ان تسقط ورفعت رأسها لعمتها بابتسامه مصطنعه/هلا عمتي
جلست وهي تحدق في عينيها/كنتي تبكين؟
حاولت جاهده الابتسام ولكن صوتها المبحوح لا يساعد/لا انا كنت اتمشى شوي و..
شيهانه قاطعتها/ليه ماتزورين أمتس دامتس هنا
انهمرت دموع شوقها، لم تشأ ان يظهر ضعفها ولكنه رغماً عنها يتضح..
شيهانه/بكرا موعد ابوي.. بروح انا وانتي معه.. وبعدها بنزور امتس شرايتس؟
اتسعت ابتسامتها وسرعان ما اختفت/بس ابوي حالف ما اطب بيته ولا اشوف امي
شيهانه/مب بكيفه يحلف عن شوفت امتس .اصلا حرام عليه،هالشي مايجوز… بكرا باذن الله بعد الموعد بنروح لهم..يلا قومي نروح للناس داخل
ضمتها بسعاده لم تسطيع الرد رغم خوفها من أبيها الا انها سعيده على أمل رؤية والدتها غداً..
.
مضت الليله بسلام.. خبر زواج حاكم انتشر واتفق الجميع على الموافقه عليه ..لم يعد متواجد سوى اهل تميم.. الذين صعدوا السياره..
التفت للخلف وجدهم ناقصين/وين هذيك؟
صيته وهي مستغربه/من هذيك؟
تميم بنبره تنم عن كراهيه/بنت ابليس
ام تميم بتأييد/والله جبت اسمها..عز الله انه لااايق عليها
صيته بغضب/حراااام عليييكم.. لييشش كذاا
دلال احزنها وصفه لها ولكنها تكلمت/شمعنى فقدتها ومافقدت عمتي شيهانه!!
صيته/شاايفه دلول
صقر كتم ضحكته/يلا اسستلم التحقيق ههه
تميم بلا مبالاه/اقووول اسسكتي انتي يا دليل لا تسوين نفسك قاافطه،ترى ما دريت عنها ،ماغير عمتي كلمتني وقالت انها بتمسي ببيت حاكم،فظنيت ان بنت ابليس بتجي معنا
صيته/ومن يجي عند جلاده برجليه اكيد تبي تقعد مع عمتي وين ماتقعد
تميم التفت مره اخرى لصيته و رمقها بغضب/اشوف طايلن لسانتس، شكلها اعدتس بنت ابليس ويبي لتس تربيه من جديد
صيته خافت هذه المره و أغلقت فمها..فـ تميم حين يغضب يفقد البصيره..
ام تميم محاولتاً تهدئته/يابن الحلال امش ماعليك منهن.
،
.
،
|
11-05-15, 08:07 AM
جديد مواضيع قسم القصص المكتمله
العرض العادي
