رواية(القدر جمعني بك)

السلام عليكم اليوم جبتكلم تكملة القصة..

نرجع شوية ورا قبل مايبدا الليفل الجديد لأنو نسيت اقولكم انو شهد تعرفت على بنت سعودية من جدة زيها كان اسمها نورة وفي يوم استلام النتايج حقت الليفل والحمدلله الكل طلع ناجح كان يوم في امريكا يسموه easter eggكان يوم الجمعه وكان المعهد كل يوم استلام النتايج يسوي بيتزا بارتي بعد لما الطلاب ياخدو النتايج ياكلو بيتزا..فدا اليوم جات تيتشر لكل الطلاب وقالت انا خبيت ايقز في كل المعهد وجواتها شوكولاته واللي يجمع اكتر عدد يفوز هنا الكل طبعا انتشر عشان يجمع وشهد بتجمع وبتحوس وبتدور الا يجيلها فيصل وهوا معاه بيضات كتييير

فيصل:شهد شوووفي وش معي.
شهد:الللله أيش دا كلووو من فين جبتو اديني شويه.
فيصل:لأ مافي هذول انا جمعتهم.
وجلست شهد تلحق ورا فيصل عشان يديها بس مهو راضي.
نزلو تحت عشان يشوفو مين الفايز الا كان في واحد برازيلي مجمع بيضات مررة كتير..
فيصل:شهد خذي ذول البيضات انها ليك بس مدي يدك على تحت لحد يشوف.
شهد انبسطت مررة انو فيصل اداها البيضات حقتو عشان تفوز وقالتلو مررة شكرأ.

جات التيشتر تعد البيضات واللي فازت طلعت شهد والهديه كانت شوكولاتات هههههه شوكولاته كبيرة على شكل دب وشوكولاتات صغيرة.
بعد لما خلص الدوام كانت شهد متفقه مع نورة يروحوا يلعبو بولينق مع اصحابهم ومنهم عبدالعزيز فلمحت فيصل جالس لوحدو

شهد:فيصل احنا رايحين نلعب بولينق تبغى تيجي؟
فيصل:والله ماادري الحين صلاة جمعه وبستنى الروميت حقي يجي ياخذني ونصلي سوا.
شهد:اوكي ازا تبغى بعد الصلاة تيجي عادي ترى وتقدر تجيب الروميت حقك معاك.
فيصل:اوك بشوف كيف.
شهد:اديني رقمك طيب عشان ازا وصلنا هناك اكلمك.
واعطى فيصل شهد الرقم حقو..
مااعرف ليش اعطت شهد فيصل رقمها بكل سهولة وعادي يمكن عشان مستصغرتو انو اصغر منها فكأنو اخوها أو يمكن عشان ارتاحتلو..
وراحوا الكل للبولينق وهناك دقت شهد على فيصل...
شهد:ألو فيصل فينكم؟
فيصل:الحين نجي احنا بالطريق.
شهد:اوك
الا بعد شوية دخل فيصل ومعاه صاحبو خالد..

خالد كان من جدة عمرو 23 سنة قد شهد كان وسيم ماشالله ابيض وشعرو طويل بني ناعم طولو متوسط اقرب للقصر وكان جسمو لانحيف ولاتخين كويس..

شهد سلمت على خالد ونورة كمان,وفيصل وخالد سلمو على عبدالعزيز..
هنا راحت شهد ونورة الحمام الا نورة تهرج مع شهد..
نورة:ايش دا ماشاللله مررة مزز اللي معانا فيصل وخالد وعبدالعزيز.
شهد:هههههه بالله عجبوكي,خلاص اسكتي يلا خلينا نخرج نلعب.
خرجوا وبدأو لعب وهنا جلست تدردش شهد شويه مع خالد لانو كانت تحب لما أحد جديد يجي تتعرف عليه..
شهد:ماشالله انتا كنت معانا في المعهد صح؟ افتكر شوفتك.
خالد:ايوة بس خلصت من زماان وجالس ادور قبول في الجامعات.
شهد:الله يعيينك ,بكالوريوس ولا ماستر؟
خالد:لا بكالوريوس ان شالله,انا درست سنة وشي في جدة بس ماعجبتني الجامعه هناك فقررت اسافر.
شهد:اها انتا انضميت للبعثه؟
خالد:لا لسه بدرس على حسابي.
شهد:اها زيي انا كمان على حسابي,انتا كم عمرك؟
خالد:23 وانتي؟
شهد:وانا كمان في أي شهر؟
خالد:ديسمبر.
شهد:اها زيي كمان.
وهما بيلعبوا الا فيصل بيحسد شهد ويقول ايش ذا بتدخلين الكور كل مرة.
شهد:قول ماشالله حرام عليك لاتحسدني.
وكل شويه شهد بتدخل كور وفيصل يحسدها.
شهد:خالد شوف صاحبك دا خليه يوقف حسد.
خالد:هههه خلاص فيصل هدي على البنت.

وبدأ اللعب شهد يخرب وماسارت تدخل الكور كويس الا شدت شعر فيصل ههههههه قالت كلووو منك..
شهد:صح افتكرت خالد شوف ايش فزت اليوم بشوكولاتات.

خالد:أيوة حكاني فيصل انو هوا اللي خلاكي تفوزي.
شهد:ايوة الله يسعدو اداني البيضات حقتو وخلاني افوز على البرازيلي هههههه.
.خلصوا لعب وجلسوا يقرروو فين يروحوا
فيصل وخالد:فين تبغوا تروحوا؟
شهد:امم مدري ايش رايكم؟
فيصل:نروح سيتي ووك؟
شهد:اوك ماعندي مانع وسألت اصحابها الاجانب وبرضو قالوا اوك.

في دي الخرجة كانت صحبة فيصل البرزايليه معاهم بس خلاص العلاقه بينهم خربت وسابوا بعض فماكان في حوار كتير بين فيصل وصحبتو..
برا في المواقف اتفقوا مين يركب مع مين..

خالد:شهد ونورة انتوا اركبو مع عبدالعزيز لانو احنا السيارة حقتنا صغيرة وانا جالس بدخن.
شهد:اوك.
في السيارة دق جوال نورة..
نورة:شهد الحقي اخويا حسان بيدق عليا؟ايش اقولو؟
شهد:عادي ردي عليه.
نورة:الو ايوة حسان احنا دحين رايحين سيتي ووك.
حسان:طيب انا بجي معاكم.
قفلت نورة الخط من اخوها وكانت خااايفة مررة.
نورة:ياربي انا قلتلو انو مافي سعوديين اولاد معانا حيهزأني.
شهد:خلاص لاتخافي نقول انو قابلناهم بالصدفة في السيتي ووك وانهم سألونا نقدر نمشي معاكم واحنا قلنا عادي لانهم كمان اصحاب البرازيليين.
نورة وشهد فهموا الكل دي الخطة عشان لايخربوا شي واكتشفوا نورة وشهد انو فيصل وخالد اصحاب حسان اصلأ.
شوية راحوا السينما بيحجزوا على فيلم الا وصل حسان اخو نورة وماعجبو الوضع ابدأ الا نادى نورة على جمب..هنا كانت شهد بتهرج مع فيصل وخالد وقالولها تروح تلطف الجو شوية..
شهد:حسان معليش لاتزعل ترى شوفناهم صدفة وهما اللي طلبوا يمشوا معانا وماقدرنا نقول لا لانو اصحابهم كمان اللي معانا.
حسان:انا اعرف الاولاد دولا مو طيبين وماعجبني انكم ماشيين معاهم..
نورة:خلاص وي قلتلك مو مخططة للوضع دا خلاص خلينا نروح مع الناس لايحسبوا سارت مشكلة.
حسان:طيب انا اتفاهم معاكي بعدين في البيت.
وهما بيمشوا الا شهد بتحس انو مويه بتنقط على ملابسها اكتشفت انو انكبت المويه في الشنطة الا شهقققت لااا..الكل طالع ايش في؟
شهد وقفت على جمب وقالت:الموية انكبت على شنطني.
وجلست تفضي شنطتها الا اول مافضتها خرجت الاي باد وجوالين بلاك بيري .
على طوووول ماصدق فيصل وعلق:ماشاللله ذا كله عندك أي غنيه.
شهد:هههههههههه بالله اسكت محد نق عليا الا انتا اول في البولينق ودحين هنا.
وجلست تنفضها وتمسحها.

شوية اعتزرو فيصل وخالد انهم محيقدرو يكملو الفيلم ومضطرين يروحوا عندهم كم شغله..حست شهد هنا انو السبب حسان اخو نورة ومو حابين يخربوا الجو اكتر..
بعدها بشوية حسان ونورة راحوا كمان ومن بعدها نورة ماسارت تخرج مع شهد هههههه اكيد اخوها منعها وشهد ماتعبت نفسها ولزمت تخرج مع نورة عشان اخوها القلق..
خلص اليوم على خير ونرجع لليفل الجديد اللي بدأ..بعد ماخلص اليوم حق أول يوم ليفل جديد..عدا كم يوم الا فيصل ارسل مسج لشهد..

فيصل:شهد الحقيني شوفي لوسيانا وش قالتلي..
لوسيانا صحبة فيصل البرازيليه او بالاحرى صحبتو القديمة..
شهد:ايش ارسلتلك عسى خير؟
فيصل:مرسلة انه تاخرت الدورة عليها؟وانها خايفة وشايلة هم.
شهد:ظيب ويعني؟
الا استوعبت شهد وشهقت:ياااخبل انتا ايش سويت ياويلك من اهلك.
الا هنا فيصل يضحك ويرسلها كذبة ابريل ذي.
شهد:حقدت على فيصل وقالت طيب انا اوريك..

في دا الليفل كانت شهد تحب تجلس ورا..الكلاس طبعأ كان كلووو سعوديين وأولاد مافي بنات الا شهد ووحدة برازيليه حالها حال نفسها لانو الكل يطنشها كان ويجلس يهرج بالسعودي..
في كلاس القرمر التيتشر كانت مع نفسها تهرج والكلاس كلوو مع نفسوو يهرج..طبعأ سعوديين فاشلين في كل مكان مو حقين دراسة..
بعد لما خلص اليوم اتفقت شهد مع اصحابها يروحوا داون تاون ديزني وهيا برا بتستناهم الا كان فيصل جالس وجات صحبتو لوسيانا وقالتلوا انو احنا رايحين داون تاون ديزني تبغى تيجي معانا فقال فيصل اجي ماعندي شي.

وهما في السيارة يدق جوال شهد..
شهد:الو ايوة فيصل.
شهد:وينكم؟احنا وصلنا قبلكم.
شهد:خلاص قربنا بس تاخرنا عبال مااستنينا التاكسي.

كانت سيارتين اللي راحت داون تاون ديزني عشان كانوا 12 شخص رايحين هناك..
فداون تاون ديزني كان مافي شي ماسووه راحوا اتفرجوا على المسرح واكلوا ايس كريم وجلسوا يتمشوا فيها وجا الليل وجلسوا يقولوا فين يروحوا يتعشوا..
قروا يتعشوا برا داون تاون ديزني لانو مطاعهم مهي مررة كويسة وقرروا يروحوا أوليف قاردن مطعم ايطالي..
في المطعم جلس فيصل جمب شهد وجلسوا يتكلموا الا فجأه فيصل يسال شهد

فيصل:شهد انتي تحبين أحد؟
شهد وهيا مفجوعه:ايش دا السؤال ليش يعني؟
فيصل:ماادري بس عيونك تقول انك في علاقه
شهد وهيا تضحك:لا ماني في علاقه ولا حاجة وفي نفسها تقول ايش الملقوف دا.

دارت هروج بينهم كتيرجلس يحكي فيصل عن حياتو في الرياض وخرجاتو مع اصحابو وكيف وحشتو الحياة هناك وجا وقت الرجوع للبيت..
هنا طبعأ عشان العدد كتير لازم برضو يرجعوا في سيارتين فشهد قالت انا بيتي قريب مرره من هنا وفيصل قرر يركب في نفس السيارة اللي حتروح فيها شهد لانو بينزل في السكن حقنا يقول عندو اصحاب هناك..
تاني يوم في الصباح تاخرت شهد عن المعهد وماحضرت اول كلاس عشان سوت حادث هيا ولمى بس كان حادث بسيط محد انضر..

دخلت شهد الكلاس وجلست الا شويه الكل يسألها اشبك تاخرتي؟
شهد:سوينا حادث بس الحمدلله.
هنا دخل فيصل وكان مبسووط ويضحك اووه جيتي ليش تأخرتي؟
شهد:سوينا حادث.
فيصل فاطس من الضحك أي حريم أكييد.
حقدت شهد على فيصل وقالتلو اسكت خلاص محاحكيك..
عدت الايام وسار فيصل يدخل الكلاس ويجلس ورا جمب شهد وشهد كانت تضحك تعرف انو بالعنيه جاي يجلس جمبها..

خليني أوصفلكم شكل شهد وفيصل عشان الين دحين ماوصفتلكم شكلهم أبغاكم تتحمسوا شوية..

شهد كانت سمرا وطولها بالنسبة للبنات كويسة تعتبر مهي قصيرة ولا طويلة..جسمها كمان كان كويس أقرب للنحف..شعرها كان بني كيرلي قصير الين اخر رقبتها..عيونها كبيرة وكانت تتميز بعيونها الكل يمدح فيها..وجهها بيضاوي وفمها صغير كانت لزوزه تعتبر..

فيصل كان برضو اسمر سمارو كان على برونز..طولو متوسط اطول من شهد بشوية..نحيف مررررة بس كان معضل شوية..شعرو كدش طبعأ قد جبتلكم سيرة انو كدش عيونو صغيرة لونها بني ويلبس نظارة طبيه لانو نظرو شوية ضعيف كان عندو غمازات اللي طفش شهد بيها وهوا يوريها ويقولها عندي غمازات وانتي ماعندك..برضو فيصل كان يعتبر كيوت..

في دي الفترة كان عبدالعزيز لسه يكلم شهد وعلى تواصل معاها وهما بيهرجوا على البي بي..

عبدالعزيز:شهد ممكن اسالك سؤال؟
شهد:أيوة ممكن تفضل.
عبدالعزيز:إنت تحبين أحد يعني في علاقه مع أحد؟
شهد:لا ليش؟
عبدالعزيز:اوك أنا ودي أقولك شي.
شهد:عسى خير ايش؟
عبدالعزيز:انت ممكن تعجبين أو تدخلين علاقه مع واحد أصغر منك؟
شهد:امم انا ماابغى ادخل في علاقه أصلأ.
عبدالعزيز:ليش؟
شهد:عشان أنا مو حقت حب وكدا وبعدين أنا جايه هنا عشان انبسط مافيا لوجع الراس.
فهمت شهد هنا انو عبدالعزيز يلمح عليها وانو معجب فيها بس قفلت الموضوع ماحبت تديه أكبر من حجمو..

في دي الفترة حكت شهد لمى عن فيصل وقالت لازم لازم اعرفك عليه عشان تشوفيه مررة دمو خفيف..كانت شهد في الافترنون يوم تخرج مع هناء تتغدا ويوم تخرج مع أصحابها الأجانب تتغدا وكان فيصل يروح يتغدا معاهم كمان كل يوم..

جا الويك اند واتفقت شهد مع صحبتها البرازيليه اللي تعرفت عليها قبل كم يوم في المعهد انهم يروحوا الملاهي فقالتلها طيب..وهما خارجين الا يجيها مسج من فيصل..

فيصل:هلا شهد,شلونك؟
شهد:الحمدلله كويسه أنتا كيفك؟
فيصل:بخير,رايحه مكان اليوم؟
شهد:ايوة رايحة دحين انا وجولين الملاهي وأصحابنا الباقيين.
فيصل:اممم ولا قلتي ولا حاجة,ماتبيني أجي عرفت.
شهد:ههههههههه لا والله عادي ازا تبغي تيجي تعال .
فيصل:لاباين ماتبيني أجي فماقلتي.
شهد:خلاص بلا هبل وي مو قصدي كدا يلا تعال عادي.
وراحت شهد وجولين الملاهي وأصحابهم الأجانب الباقيين وهناك قابلت فيصل وخالد.
شهد:أهلين,كيف حالكم؟
خالد وفيصل:الحمدلله بخير أنتي كيفك؟
شهد:الحمدلله كويسه,تأخرت عليكم؟.
خالد:لا عادي.
شهد:ايوة وايش سويتو اليوم؟
خالد:واللله كنا في القهوة قبل شويه نعسل وعشان عسلت على جوع حاس اني دايخ.
شهد:صح نسيت اعرفكم دي صحبتي جولين.
شهد:أقولكم في لعبببه مرررة حلوووة لازم نلعبها كلنا تعالوا أوريكم هيا..

وصل الكل مكان اللعبه وجلست شهد تشرح اللعبه كيف..دي اللعبه يلعبوها 3 أكتر شي اسمها sky coasterأول شي يربطوك بحبال وبعدين يخلوك تنسدح على بطنك كأنك بتركع وتمد رجولك عادي على ورا لانو الحبال تكون مثبتتها بعدين يقوموا يرفعوك لفوق لأعلى شي وبعدين نسحب الزر وتقوم فجأه تنزل على تحت بأقوى ماعندها مررة حلوة تخوف بس ممتعه ركبتها قبل كدا.

خالد:انا عن نفسي ماابغى العب حاس بدوخه.
فيصل:وانا ماابغى وهوا بيمزح مع جولين.
Faisal:if u ride this u gonna die
Shahad:don't believe him,he's just kidding.
Julene:okay nouf,if I die it'll be ur fault.
شهد:طيب يافيصل خوفت البنت كدا يلا خلينا نلعب .

وراحوا يلعبوا ولما جوا يطلعوا فوق شهد قالت هيا اللي حتتحكم بالزر اللي ينزلهم كان فيصل في النص وكانت شهد على يمينو وجولين على يسارو وبداوا يطلعوا على فوق مرررة وبدأ فيصل يخوف جولين وجولين خاايفة مررة وشهد كانت خايفة بس ماحبت تبين انها خايفة كفايه فيصل ماقصر وبيخوف جولين ولما جا وقت تسحب الزر نزلو على تحت الا دي اللحظة خافت جولين مررة وشهد سارت بس تضحك على جولين..
لما نزلوا من اللعبه راحوا يشوفوا شريط الفيديو اللي صورهم وهما بيتفرجوا الكل بيضحك عشان جولين كانت مررة خايفة..بعد اللعبه خالد قال لازم يروح تعب وفيصل مضطر يرجع معاه عشان ماكان عند فيصل سيارة كان يروح ويجي مع خالد.بعد لما راحوا يجي مسج لشهد من فيصل..

فيصل:معليش والله كان نفسي أجلس بس تعرفين ماعندي سيارة ولازم أرجع مع خالد.
شهد:لا عادي وي مافيها حاجة.

خلص اليوم والكل رجع البيت وعدا اسبوع وطبعأ في الكلاس يوميأ فيصل وشهد يتضاربو ويرفعوا اصواتهم ولا كأنو التيشتر في كأنو جالسين في بيت او شارع ..جا الويك اند التاني وكان يوم الجمعه الا فيصل يرسل مسج لشهد..

فيصل:هلا شهد,شلونك؟عندك شي بكرة الصباح؟
شهد:أهلين الحمدلله أنا كويسه,انتا كيفك؟لا ماعندي شي ليش؟
فيصل:الحمدلله انا بخير.وش رايك نروح داون تاون ديزني ونتفرج موفي؟
شهد:اوك أسال جولين ازا هيا فاضيه بكرة وأردلك خبر.
فيصل:أوك.
سألت شهد جولين وقالتلها على الفكرة وجولين قالت انو ماعندها مانع.
شهد:فيصل خلاص اوك جولين وافقت متى بكرة بس؟
فيصل:يعني على 9 او 10 من بدري.
شهد:اوك نتقابل في ستاربكس.
فيصل:اوك انا استاجرت سيارة يسير نروح بيها.
شهد:اوك.
وجا الصباح تاني يوم وراحت شهد وجولين ستاربكس يستنوا فيصل يجي كان الوقت 10 الصباح الا تدق شهد على فيصل..
شهد:فينك؟
فيصل:أنا قريب خلاص.
شهد:طيب اسمع تبغى حاجة من ستاربكس؟
فيصل:اوك أطلبيلي على كيفك.
شهد:عادي تشرب فرابتشينو؟
فيصل:أي.

وطلبتلو وطلبت لنفسها ولجولين الا شوية دق فيصل الجوال وقال انا برا..هنا شهد قالت لجولين انو هيا تركب قدام فقالتلها جولين اوك.
وركبوا السيارة وراحوا على داون تاوزن ديزني ودخلوا الموفي وطبعأ فيصل جلس في النص كالعادة وخلص الموفي وقالوا بيروحوا يتفرجوا موفي تاني بنفس التذكرة محد حيدقق بس ماعجبتهم الافلام اللي معروضة فقروا يخرجوا..
شوية الا يجي خالد بالصدفة ومعاه صاحبو حسن وصحبتهم البرزايلية وسلمو على شهد وفيصل وجولين وقالوا انهم كمان جايين يتفرجوا موفي فقالوا خلاص كلنا ندخل سوا..
هنا فيصل قال انا بروح المطار أودع صحبتي البرازيليه ريتا عشان اليوم سفرها والكل يستناني اخلص واجي..الكل قالولو طيب ودخلو هما يتفرجوا الفيلم..

خلص الفيلم وخرجوا لقوا فيصل دوبو جاي من المطار وجالس يحكيهم كيف بكيت واصحابها بكيوا وحضنتو وهوا مابكي هههههه وقال يلا مو جيعانين فين تبون تاكلون؟
الكل قالوا مدري خلينا نركب السيارة ونقرر..كان برضو هنا سيارتين سيارة فيها فيصل وشهد وجولين والتانيه فيها خالد وحسن وصحبتهم البرازيليه وقررو يروحوا فدركرز..

راحوا المطعم واتعشوا واتفقوا يروحوا القهوة يعسلو فجولين بتسأل شهد حتروحي معاهم فقالت شهد لا هيا ماتقدر لازم ترجع البيت من الصباح وهيا برا البيت فقررو يرجعو جولين وشهد وبعدين هما يروحوا القهوة..
في السيارة دي المرة رجع خالد مع فيصل لانو باع سيارتو ووصلوا جولين اول البيت وبعدين شهد ولما طلعت شهد البيت اكتشفت انها نسيت جوالها فقامت على طوول اخدت جوال لمى وجلست تدق تدق محد يرد الا شويه تسمع صوت سيارة وتنزل على تحت وتلاقي فيصل جاب جوالها وتقولوا شكرا بركة انتبهت..
في دا اليوم قررت شهد انو بكرة لمى تخرج مع فيصل وخالد تتعرف عليهم وقالتلها لمى اوك..جا تاني يوم وكان يوم دوام فراحوا داون تاون ديزني يتفرجوا موفي مع خالد وفيصل ولين كانت في الدي كير..
وصلوا داون تاون ديزني وهنا شهد بتعرف لمى على خالد وفيصل وفيصل كان مررة مكسوف..

شهد:ياحركات تسوي مكسوف ها وانتا من جمبها اصلن.
فيصل وجهو حمر واستحى مررة.شلونك لمى؟
لمى:الحمدلله كويسه انتا كيفك؟وكيفك خالد.
خالد:الحمدلله انا بخير.
فيصل:الحمدلله بخير.

جلس الكل يهرجوا شويه وبعدين دخلو الموفي ولما دخلو كانت لمى بعدين شهد بعدين خالد بعدين فيصل,فيصل قال لخالد خليني انا اجلس جمب شهد عشان احشها قامت شهد قالت لخالد لا اصحححك تغير مكانك خليك جالس هنا..

للأسف الفيلم كان في لقطات مش ولا بد واستحوا لمى وشهد مررة ولمى جلست تقول:كلوو منك في أحد يختار فيلم كدا مع أولاد؟
شهد:انا أيش عرفني انو الفيلم كدا ها.
هنا طبعأ فيصل سحبها نووومة على الفيلم وكل شوية يصحى ويقول فلمكم المسخرة ذا.
خلص الفيلم وودعت شهد ولمى خالد وفيصل وهزأت لمى شهد عشان الفيلم وقالتلها فشلتينا.
لمى قالت لشهد خالد مو مريح مرتحتلو مررة اما فيصل أهبل ومن ججد دمو خفيف.
شهد:لا عادي خالد مافيه شي.
لمى:ماأعرف بس وجهو مو مريح.
جا تاني يوم في كلاس الافترنون كان في اختبار وكانت شهد بتغش من الكتاب الا شوية فيصل قال
Faisal:teacher she is cheeting?

هنا شهد فرصعت عينها وانفجعت من فيصل كيف قال كدا وحقدت وجلست طول الكلاس ماتكلموا والحمدلله التيتشر ماسوا حاجة لانو شهد انكرت انها غشت.

مافي أي تعليق على القصة؟لايكون ماعجبتكم؟

خلص الكلاس وعلى طول خرجت شهد ولا فكرت تطالع في فيصل او تكلمو بعد حركتو البايخة اللي سواها ورجعت البيت وعلى العصر كدا جاها مسج من فيصل..

فيصل:انت زعلتي اليوم؟
شهد:أيش رايك يعني؟بعد لما فشلتني قدام الكلاس كلوو وقدام التيتشر.
فيصل:بس أنا مو قصدي عادي مزح ذا.
شهد:لا طبعأ مو مزح هبل دا.

وحاول فيصل يلطف الجو بدون مايعتزر انو يضحكها خصوصأ انو عارف أنو شهد تضحك على أي شي ..ومشي الموضوع تمام ورجعت الأوضاع بينهم عادي..

فيصل كان شخص ازا غلط على احد حتى لو كان متأكد في قرارة نفسو انو غلطان مستحيل يعترف بخطأو أو يتأسف بس كيف الواحد يعرف انو غلطان ؟لما تلاقيه يجلس يفتح هروج ويحاول يضحك اللي زعلو هنا تاكد انو حاسس بخطأو وجالس يصححوا بدي الطريقه..
جا الليل الا عبدالعزيز كلم شهد..

عبدالعزيز:شلونك شهد؟
عبدالعزيز:الحمدلله أنا كويسة انتا كيفك؟
عبدالعزيز:الحمدلله بخير.
عبدالعزيز:شهد ممكن أقولك شي؟
شهد:تفضل.
عبدالعزيز:ممكن أشوف صورتك بدون حجاب؟
شهد:نعم لا طبعأ ليش ان شالله؟
عبدالعزيز:شوفي شهد بقولك شي,ترى أنا من زماان وانت عاجبتني وداخله مزاجي ونفسي اتعرف عليك اكثر وأكون قريب منك.
شهد:عبدالعزيز أنا قلتلك أنا مو حقت علاقات وحب ووجع راس انا جايه هنا انبسط وبس وبعدين لاتنسى انتا اصغر مني ب3 سنين.
عبدالعزيز:عادي انا حبيت مرة وحدة أكبر مني.
شهد:انا ماليا دخل بس انا ماابغى.
عبدالعزيز:طيب مافي أمل يعني.؟
شهد:لا خلينا أصحاب أحسن.
عبدالعزيز:طيب وريني صورتك بدون حجاب يقولون أنك حلوة بدونه.
شهد:ههههه مين قالك؟
عبدالعزيز:ماراح أقولك بس وريني.
شهد:لا مافي مني موريتك,وخلاص لو سمحت قفل عالموضوع.
عبدالعزيز:طيب.

وجلسوا يهرجوا شويتين كمان وعبدالعزيز ادى خبر لشهد انو شهر كمان وحيسافرو لأانو جا القبول خلاص..
بدأ موعد الفاينل يقرب بقي يومين عليه والكلاس خايفين لايرسبوا تاني واتفقوا انهم يغشو من بعض طبعأ ..

فيصل:شهد انت بتجلسين جنبي عشان اغش منك.
شهد:مني فاهمه تحسبني ايش انا.

في الكلاس دا كان دايمأ فيصل يتريق ويحش في الحجازيين وعلى كلامهم وكانت شهد تعصب وتجلس تدافع وتحش في النجديين وتقول لواحد معاها في الكلاس اسمو عبدالله يدافع معاها عن الحجازيين ويحش في النجديين..زي ماقلتلكم في الليفل دا الكلاس كان كلوو سعوديين ماعدا وحدة برازيليه وكانوا ماخدين الليفل لعب التيشتر تشرح وهما هروووج ولا كأنو وفيصل سار كل يوم يجي ويجلس ورا جمب شهد وهاتك هرووح وحش ويضحكها في مرة من المرات جلست شهد توري اللي جمبها صور اخوانها وشاف فيصل الصور.وفي دا الليفل سار فيصل يخرج مع شهد وأصحابها يتغدى كل يوم.

فيصل:ماشالله تتشابهون,وعيونكم كمان تتشابه وحلوه.
شهد:شكرأ.

جا موعد الفاينل والكل خايف وطبعأ شهد جلست جمب فيصل زي مااتفقوا مع بعض وبدأت التيتشر توزع أوراق
على الطلاب وجلست شهد جمب فيصل زي مااتفقوا وبدأ الاختبار والكلاس كلوو جلس يغش من بعض بطريقة غبيه والتيشتر حاولت تنبهم بس مافي فايدة وشهد جلست تجاوب وتأشر لفيصل على الاجوبة وماكانت تحسب انو التيتشر انتبهتلها وخلص الاختبار وكانت مبسوطة مررة انها حلت كويس قالت الحمدلله لانو الليفل دا لازم تعدي الفاينل عشان تنجح..
رجعت البيت شهد على طوول بعد الاختبار عشان كان وراها سفرة لنيويورك خططت ليها هيا ولمى عشان شهد كان نفسها تروح تشوف نيويورك لما وصلوا هناك الجو كان مررة باارد..

شهد:لو أعرف أنو كدا مررة برد ماكان جينا..
لمى:أيوة والله انك صادقة خسارة محننبسط كتير.
شهد:يلاأيش بدنا قدنا جينا خلاص.
راحوا التايم سكوير اول يوم لانو كان الوقت ليل فمايمديهم يروحوا مكان تاني..
شهد:اللله مررة حلو التايم سكوير.
لمى:ههههه أيوة رهييب نيويورك مررة حلوة.
راحوا تمشوا شوية وتعشوا ورجعوا البيت عشان ينامو تعبانيين وراهم صحيان بدري تاني يوم..
تاني يوم الصباح دوبها مفتحه عينها ش
هد الا جوالها يدق وتطالع تلافي فيصل وتقول عسى خير ان شالله..
فيصل:هلا شهد,شلونك؟
شهد:الحمدلله كويسه أنت كيفك؟
فيصل:بخير,شهد ترى أنا التيشتر رسبتني عرفت أني ناقل أجوبتي منك بس مدري لو انت كمان رسبتي ولا لا.
شهد:قوووول واللله اديني هيا طيب اكلمها.
Shaah:heey teacher.
Melly:heey shahad,I saw u&faisal cheeting,so u'll not pass this level..sorry for that
Shahd:who els failed?
Melly:I cant tell u.
Shahd:okay teacher.

هنا ادت التيتشر السماعه لفيصل وزعلت مررة شهد انها حتعيد الليفل وانها صحيت على الخبر دا..

فيصل:معليش وسعي صدرك ولاتزعلين لو انا منك انقل من المعهد المخيس ذا.
شهد:لا ايش انقل انتا كمان مابقيلي شي.
فيصل:انبسطي بس ولاتزعلين وفليها في نيويورك.
شهد:اوك ان شالله.
راحت شهد تقول للمى انها رسبت.
شهد:لمى تخيلي التيتشر رسبتني انا وفيصل عشان غششتو.
لمى:قوولي والله,هبله انتي كمان ماانتبهتي؟
شهد: لا ايش دراني انا بالله انها جالسه تراقب.
لمى:خلاص لاتزعلي نفسك ولا حاجة خلينا ننبسط وعادي بالعكس عشان تتعلمي مرة تانيه تنتبهي.

راحوا يفطرو في أي هب وبعدين راحوا تمثال الحرية وتمشوا الين ماجا الليل ورجعوا الفندق.عدا اليوم التاني كمان على خير وحاولت تتناسى شهد وتبسط نفسها لانها جايه تنبسط مو جايه تتنكد.هنا طلبت شهد من فيصل البي بي حقو بدل ماهما جالسين عالرسايل..برضو تاني تصرف جريء من شهد اول شي طلبت رقم فيصل وبعدين البي بي حقو ليش سوت كدا برضو ماتعرف..
وخلص الويك اند ورجعوا للوس انجلوس تاني ونامت شهد عشان بكرة كان بداية الليفل الجديد..

كلم عبدالعزيز شهد وقال انو سفرو بعد يومين وبكرة مسوي حفلة في بيتو وعزمها..اعتزرت شهد منو انو ماتقدر تيجي بيت نو سعودي وايش دا مايجي وايش يقولوا الناس وحالت انها تخليه يغير المكان بس مارضي فماراحت العزيمه..

وهيا داخله المعهد وبتطلع تروح تاخد الجدول الا اكتشفت انو الشهر دا عشان الأغلب رسب بسبب الغش والناس اللي نجحت وسارت في الليفل معاهم فسار عدد الطلاب كتير ففتحوا كلاسين ودي المرة فصلو شهد عن فيصل هوا في كلاس وهيا في كلاس وهيا طالعه قابلتو

فيصل:وهوا متفشل الله يفشلك شوفتي رسبنا.
شهد:ايوة شوفت.
فيصل:يلا انا بروح الكلاس.
شهد:اوك وانا كمان.

قبل سفر عبدالعزيز جا المعهد ياخد كم ورقة واول مالمحتو شهد هربت ودخلت الكلاس مافيها ليه فسافر بدون ماتودعو..

دخلت شهد الكلاس وانفجعت برضو لانو كان مليان ماكانت تتوقع انو كدا.. في دا الليفل كان كلاسات الافترنون يتجمعوا الكلاسين سوا لانو كتير طلاب ماكان عندهم كلاس في الافترنون...فكانت شهد تشوف فيصل..

عدا اول اسبوع وجا الويك اند وهنا كالعادة خرجت شهد مع فيصل ومعاهم صحبة شهد جولين فجالسين يقولوا فين نروح فقرروا يروحوا مكان قريب من المعهد عشان يكون قريب من بيت جولين..
جلسوا يمشوا فيصل وشهد وجولين ويهرجوا مع بعض وكان بينهم حواار طويل استمر ساعتين بما أنه شهد وهيا بتنقلي القصة مهي فاكرتو كولو فحاضطر اني الخلصلكم هوا..

سألت جولين فيصل وشهد عن الزواج عندهم وكيف الناس يتزوجوا..حكتها شهد انو في زواج عن حب ازا الولد حب البنت يروح لأمو ويقولها أنو بيخطب البنت دي او انو يعرف اختو على حبيبتو ويسير انو البنت جايه من طرف اختو,وحكتها انو الزواج التقليدي الام تجلس تدور على الولد على عروسة تشوفها في فرح أو تكون تعرفها قبل كدا..وحكتها عن الشوفه كيف لما الولد يجي مع اهلو عشان يشوف البنت قبل مايخطبها انو البنت لازم تكون لابسه طويل ومحتشم وازا اعجبو ببعض تتم الخطوبة وفترة الخطوبة يتعارفوا على بعض البنت والولد وفي ناس وازا عجبوا بعض يتفقوا على الزواج وازا لا كل مين يروح في طريق..

هنا جولين قالت لشهد وفيصل انو انتوا مررة قريبين من بعض وشكلو حيسير بينكم حاجة فقالت شهد لا احنا اصحاب بس مو اكتر من كدا فسألت جولين فيصل ازا اعجبت فيك بنت ايش تسوي..فيصل قال انو ازا جات بنت وقالتلوا كدا مايقدر يردها عادي يستمر معاها..حتى لو مو عاجبتو..فشهد وجولين قالوا لا لو مو عاجبتك عادي تقول لا فقال لا مااقدر..
هنا شهد قالت في نفسها مع نفسو دا مسوي فيها هههههه..فقالت جولين هنا طيب لو جاتك شهد وقالتلك احبك ايش تسوي تمشي معاها؟معليش انو جالسه اكتب الحوار بالعربي مع انو كان بالانجلش بس انو اسهل حيكون الكتابه بالعربي..
سكت فيصل وماجاوب قامت شهد قالتلو أحبك هنا احمر وماعرف ايش يقول وضحكوا شهد وجولين على ردة فعلوو وقالتلو شهد بس كنت بشوف ايش ردة فعلك..

هنا وللمرة الأولى اعترفت شهد انها على علاقه مع واحد في السعودية اسمو عماد وانو علاقتهم اخر فترة متدهورة مو قد كدا بس انو حتى لو ساءت الاوضاع بينها وبين عماد ماتفكر تحب تاني خلاص لانو جربت ومافيها لوجع الراس..
قالت جولين طيب لو جاكي فيصل وقال انو معجب فيكي ايش حتسوي؟قالت شهد انو حتقول ماابغى وخلينا اصحاب بس احسن وهنا طلب فيصل من شهد تمسك يدو ..هنا فيصل جلس يقول لجولين انو يفضل الزواج التقليدي بس لو انو حب وحدة ويبغى يتزوجها ممكن يعرفها على اختو ويسير انها جايه من طرف اختو حتى لو كانت اكبر منو عادي ماعندو مانع..خلص الحوار على كدا وراحوا يتعشوا الا قابلوا صحبتهم البرزايليه وجات تتعشى معاهم خلصوا عشا وقالت شهد انها حترجع البيت كلمت التاكسي فقالت جولين وصليني البيت معاكي..

فيصل:وش جوك ترجعين الحين؟
شهد:خلاص اتاخر الوقت وانا من زمان برا لازم ارجع..
فيصل زعل واتضايق بس ماقدر يسوي حاجة..

رجعت شهد البيت ونامت عشان بكرة وراها صحيان بدري حتروح ديزني مع لمى ولين..جا الصباح والكل لبس وجهز وتوجهوا لديزني طبعأ شهد كانت مررة مبسوطه رغم انها راحت ديزني قبل كدا بس هيا شايفة ديزني شي واو وجميل جدأ..قضوا وقت ممتع ورجعوا البيت تعبانين وناموا لانو بكرة بداية اسبوع جديد..

جا بداية الاسبوع وشهد كانت في الكلاس الا ينفتح الباب ويدخل ولد جديد الكلاس سعودي طبعأ وباين من شكلو انو من أولاد الرياض داخل ومو عاجبو شي.وشوية تيجي المديرة حقت المعهد وتديه الكتب..
شهد وكان جمبها ولدين سعوديين:ماشالله مين دا اللي داخل وتاني اسبوع والمديرة بنفسها تديه الكتب مررة يقهر.
ماردوا على شهد لانهم مايعرفوا مين..

سيف من الرياض عمرو 21 سنة كان يدرس في المعهد بس نزل السعودية اجازة 3 شهور فشهد ماكانت تعرف انو هوا من زمان هنا لانو هوا سافر من هنا شهد جات المعهد..جاي يدرس على حسابو وسارتلو مشكلة مع المعهد والملحقيه لانو بينقل من المعهد والمعهد مو راضيلو فراح سوا مشكلة في الملحقيه فالمعهد سارو كويسين معاه مررة..الولد كان متوسط الطول..نحيف بس عريض شويه..اسمر شعرلو كيرلي بني شعرو كان مررة جييد..كان كيوت الولد..

لما عرفت شهد الولد مين افتكرت انو فيصل قلها انو في واحد مررة فله حيجي يدرس معانا في نفس الليفل..
عدا كم يوم وسمع سيف انو في بنت سعودية في الكلاس جلست تقول مين دا اللي عندو واسطة وجاي يدرس تاني اسبوع لا والمديرة بتديه الكتب بنفسها فقرر يرجع ويجلس ورا عشان يشوف ايش القصة..

جا يوم وكان الكلاس عندو اختبار ميد تيرم قرمر وهنا سيف تورط ومو عارف يحل فسارت شهد تغششوا وبعد لما خلص الاختبار مررة شكرها وقلها انقذتيني من بعدها سارو اصحاب يهرجوا ويتكلمو عادي وحكاها مشكلة الملحقية..

جا يوم الأربعاء ودا اليوم كان أولاد المعهد يتجمعوا على العصر ويلعبوا كورة في ملعب جمب المعهد فطلب فيصل من شهد انها تيجي وتتفرج عليهم فوافقت وراحت مع صحبتها جولين..الجو كان مررة حار وشهد طفشت ماكانت تحسب انو الوضع كدا ممل فلما خلصوا لعب جولين قالت لشهد تعالي معايا انا بروح ستاربكس فقلها فيصل لا تعالي معايا انا فاحتارت شهد تروح مع مين بس قررت تروح مع جولين بالسيارة لانو فيصل حيروح مشي..

وصلوا شهد وجولين قبل فيصل وطلبوا الا فيصل وصل وطلب وجلس معاهم ماطولت جولين مررة واضطرت انها ترجع البيت وهنا جلست فيصل مع شهد وجلسوا يهرجوا في مواضيع كتيرة..

فيصل:حكيني عن قصة حبك وليش تدهورت العلاقه بينك وبين اللي تحبينه؟
شهد:مافي حاجة بس هوا ليه فترة مطنش وخايف يتعلق اكتر وفي النهاية نسيب بعض.
شهد:وانتا تحب؟صح انتا عندك صحبة برازيليه ليش سبتها؟
فيصل:ماكانت تعتبر صحبة فعليه بس العيال تحدوني عليها انو اتعرف عليها وتعرفت عليها.
شهد:وليش سبتها؟
فيصل:جا اسبوع مررة انشغلت فيه وقلتلها انو بنشغل وحسبت انو طنشتها فسابتني والحمدلله جات منها.
شهد:اها طيب وقبل ماتتعرف عليها ماكنت في علاقه؟
فيصل:الا بس لما جيت امريكا بدات علاقتنا تخف شوية مع اختلاف الاوقات وكل مين مشغول فشوية شوية الين ماسار أحد يسأل عن التاني.
وجلسوا يهرجوا في مواضيع تانيه الا شوية..
فيصل:شهد ليش ماتعترفين انك خاقة علي.
شهد:ههههه انا خاقة عليك مين قال.
فيصل:باين ياخي اعترفي.
شهد:مرررة مع نفسك قلك خاقة..
وجا التاكسي وقالت شهد يلا انا بروح برجع البيت..

في الليفل دا احياننا كانوا الكلاسين يتجمعوا سوا كلاس شهد وفيصل ويسير بين الكلاسين مسابقات وكدا وفي كلاس الافترنون كانوا شهد وفيصل يجلسوا جمب بعض كالعادة..في مرة من المرات كان فيصل جالس يكتب في دفترو ومتحمس الا تجر الدفتر منو شهد وتنفجع من الكلام اللي كاتبوا كان كاتب كلام شعر وحب وفي الاخير كاتب اسمو واسم شهد ..انحرج فيصل مرة انو شهد قريت الكلام وحمر وجهوا وسحب منها الدفتر وهنا شهد قالتلو مع نفسك.
جا اليوم التاني وخرجت شهد وجولين برا المعهد وقررو مايرجعوا البيت يجلسوا شوية الا كلمت شهد فيصل.

شهد:انتا فين؟
فيصل:توي خارج من المعهد.
شهد:طيب انا وجولين جمب محل الايس كريم تعال معانا.
فيصل:اوك.

جا فيصل ودخلوا يشترو ايس كريم وهنا طلعت شهد الاونو حقتها وقالت يلا نلعب جلسوا يلعبو يلعبو وجا المغرب وقالت جولين انو لازم ترجع البيت فقالتلها شهد وتسيبيني لوحدي؟قالتلها جولين انو معاكي فيصل وقاموا ضحكوا وقالتلها من جد لازم ترجعي؟قالتلها ايوة لازم..راحت وجلسوا كالعادة شهد وفيصل لوحدهم وهرووج الين ماجا الليل ورجعت شهد بيتها..
تاني يوم في كلاس الافترنون كان في اختبار كل اتنين مع بعض فكانو شهد وفيصل مع بعض وجلسوا يتضاربوا هنا قال التيشتر ليهم انكم انتو الاتننن لو تزوجتو حتتطلقوا على طول وهما بيضاربو على الورق جات يد شهد على يد فيصل بس على طول وخرتها وقالتلو خلاص مححل معاك انتا بس تتضارب وراحت تحل مع احد تاني الا لما خلصوا حل وسلموا الاوراق للتيتشر وجا البريك شويه جلس يغني فيصل اغنيه فيها احبك مهي فاكرتها شهد والا كلم شهد بي بي ..

فيصل:انا مررة خاق على جلستك لاتتحركين..
شهد قريت وانفجعت على طووول قامت وخرجت برا وسارت تقول وجع ايش الجريء دا.
رجعت الكلاس وكتبلها فيصل:قولي أحبك..
قامت رفضت شهد قام رجع غنى تاني الاغنيه فقالتلو شهد خلاص اسكت..
خلص اليوم ورجعوا البيت الا فيصل كلم شهد بي بي..
فيصل:اليوم لما جات يدك على يدي حسيت بشعور مررة غريب وحلوو وخقيت صراحة حتى جلستك خقيت عليها..
شهد:خلاص ممكن تسكت..
فيصل:يعني مااعبر عن شعوري؟
شهد:لا مايحتاج خلاص.
فيصل:طيب ماتقدرين تجين الحين ستاربكس انا مع جولين.
شهد:أشوف كيف واردلك خبر..
الجو كان مطرة قويية ومهي راضيه توقف..فقامت ردت شهد لفيصل انو ماتقدر تيجي بسبب المطرة..
تاني يوم الصباح ولمى وشهد ولين ركبوا السيارة الا يجي بي بي لشهد..

فيصل:هلا شهد شلونك؟
شهد:الحمدلله انتا كيفك؟
فيصل:الحمدلله,ماعندي أحد يوديني المعهد عادي تمرين علي؟
شهد:دقيقة اقول للمى.
شهد:لمى فيصل ماعندو احد يوديه المعهد عادي نمر عليه ونوديه؟
لمى:ايوة عادي خودي الوصف منو يسير انزل لين وامر عليه.
واخدت شهد من فيصل الوصف ومرو عليه وركب وسلم وكان مررة مكسوف..
شهد:ياعيني على الادب والكسوف ترى مررة مو قابلك..

كانوا مشغلين اغنيه لعبدالمجيد مليون خاطر الا فيصل يكتب لشهد اهديلي الاغنيه ذي..قريت شهد كلامو وماردت عليه ووصلوا المعهد ونزل فيصل قبل شهد عشان محد يحس انهم جايين مع بعض..

جا الأربعاء وكالعادة دا اليوم اللي يلعبوا الاولاد فيه كورة ..

فيصل:شهد ها بتجين المباراه؟
شهد:لا المرة الاولى جيت وطفشت مني جايه.
فيصل:اذا مابتجين انا محأروح.
شهد:بلا عبط روح ايش دخلك فيا.
فيصل:لا ماابي منك رايحة انتي.
شهد:اوك براحتك.

قرب موعد الفاينل مابقي شي والكل خايف انو يرسب تاني ويعيد خصوصأ فيصل لانو دي المرة الرابعة اللي يعيد فيها ويبغى ينجح..في دي الفترة قويت العلاقة بين شهد وسيف وساروا بس يشوفوا وجه بعض من غير مايتكلموا يبدأو يضحكوا الاتنين من دون سبب..
جا اليوم التاني اللي هوا قبل يوم الفاينل وفيصل قال لشهد انو يبغى يذاكر معاها وقالتلوا طيب خلاص في الكلاس الاضافي ان شالله..

جا الكلاس الاضافي وجلست شهد جمب فيصل وجالسه تشرح تشرح تشرح الا شوية قرب فيصل رجولو من رجول شهد وسارت رجولهم لاصقة في بعض الا هنا شهد تحس بشعور غريب جسها كلو اتكهررب وفي نفس الوقت مهي قادرة توخر رجولها لانو عاجبها الوضع..وخرت شوية تجيب ورق ولما رجعت قربت تاني وبرضو رجولهم قريبة من بعض..هنا احمر وجه فيصل ولاحظت شهد عليه بس ماعلقت لانو الكلا في وجلست تكمل شرح..خلص الكلاس وماخلصوا مزاكرة ..

فيصل:شهد ماخلصنا وش رايك نروح نكمل برا شويه؟
شهد:طيب ماعندي مانع..
راحوا في مكان قريب من بحيرة وهيا بتشرح وبعد لما خلصت..
فيصل:شهد بقولك موضوع.
شهد:ايش في عسى خير؟
فيصل:شوفي شهد انا مرررة مرتاحلك من يوم ماعرفتك.
شهد:طيب؟
فيصل:انت فاهمه قصدي.
شهد:لا طبعأ مو فاهمه قصدك وبعدين يعني؟
فيصل:انا مرتاحلك مررة اول مرة احس شعور كذا مع أحد أنه مره مرتاحله..أحب أجلس معك..أحب أسولف معك..أحب أخرج معك.
شهد:طيب حتى انا نفس الشعور والله واحنا اصحاب والحمدلله كويسين مع بعض.
فيصل:انا ماابي اصحاب بس أبي اكثر وانت بقيلك شهر وبتردين السعودية اجازة عشان تجددين الفيزا حقتك وتخلينها فيزا دراسة وانا ابي اعيشك اخر شهر في امريكا احسن شهر واخليك تعيشين قصة حب جميلة وحيكون حب أمريكا وبس.
شهد:فيصل انتا عارف انو انا كنت في علاقة وتدهورت وماابغى اجرب تاني لانو العلاقه الاولى تعبتني مررة وماابغى اجرب تاني..وهنا قالت في نفسها ايش حب امريكا دا يعني انا لعبه..
شهد:خلاص خلينا اصحاب بس وقفل الهرجة انا لازم اروح البيت دحين جا التاكسي..
ورجعت شهد البيت وجلست تفكر بينها وبين نفسها مع نفسوو حب امريكا وخلاص بلا علاقة بلا هم خليني كدا احسن..
جا الفجر ودق جوال شهد..
فيصل:شلونك ها بتذاكرين؟
شهد:أيوة زاكرت شوية ونومت ودحين صحيت اكمل.
فيصل:والله انا خايف مررة أرسب.
شهد: لا ان شالله كلنا حننجح.

جا الصباح والكل بيستنو موعد الاختبار واول ماجا فيصل على طوول افتكرت شهد كلامو حق أمس بس حاولت تتناساه..ودخلو الاختبار وجات الاوراق وجلسوا يحلو وخلصوا وخرجوا هنا فيصل راح مع واحد سعودي اسمو عبدالرحمن حيسافر وحيبيع لفيصل سيارتو واخيرأ حيسير مع فيصل سيارة..فيصل ادى خبر لشهد انو بيروح يشتري السيارة ويمر عليها في البيت يخرجوا لما يخلصوا وقالتلو طيب..
اشترى السيارة ومر على شهد وقلها يلا انزلي انا تحت...نزلت شهد وركبت جمب فيصل ودي المرة الاولى اللي يخرجوا فيها مع بعض لوحدهم..راحوا اتمشوا وتغدوا وبعدين وهما بيرجعها البيت..

فيصل:شهد عطيني يدك.
شهد:لا مافي.
فيصل:عطيني يدك.
شهد:لا خلاص مع نفسك قلت لا.

ولما جا يرجعها فيصل البيت قالها انا بكرة بمر عليكي بدري يسير نروح المعهد من بدري عشان نعرف نتايجنا فقالتوا شهد اوك..
جا الصباح ومر فيصل على شهد وراحوا المعهد من بدري مررة بس للأسف لسه النتايج ماطلعت جلسوا يستننو على اعصابهم ساعتين مع انو شهد متاكدة انها جاوبت كويس بس خافت..جا شوية التيشتر وبشر شهد انها نجحت انبسطت مررة..وقالوا لفيصل دقايق ودخلو وحاسوا وشويه خرجوا وقالولوا نجحت..انبسط مرررة وانبسطتلو شهد مررة وأخيرأ نجحت..خرجوا بعدها يحتفلوا شهد وفيصل ونفس الشي طلب فيصل من شهد انها تديه يدها بس رفضت ونزلوا يتغدوا في مطعم وكانت هنا شهد جالسه تزبط طرحتها بتطالع في قزاز السيارة من برا الا تشوف فيصل جالس بيطالع من الجهه التانيه يحاول يلقط شعرها وهيا بتنزبط الطرحة ..انتبهتلو شهد وضحكت وضحك هوا وقالتلو محتشوف شي..

وبعد لما خلصوا الخرجة رجعت شهد البيت ونامت من التعب خصوصأ انو خرجت من الصباح عشان النتايج.. خلص اللليفل دا بنجاح شهد وفيصل وبقي على شهد شهر وترجع السعودية ايش حيسير في الشهر دا؟حتقرأو التكملة بكرة ان شالله.

جا الويك اند واتفقت شهد وجولين انهم يروحوا سي وورلد وهما رايحين يدق عليها فيصل..

فيصل:هلا شهد شلونك؟
شهد:الحمدلله كويسة انتا كيفك؟
فيصل:بخير الحمدلله..

طبعأ شهد اول ماتعرفت على فيصل ماكانت تفهم على كلامو كتير ودايمأ تسألو أيش يعني وأيش يعني بس مع الأيام تعودت وسارت تفهم كويس..

فيصل:وينك؟
شهد:انا وجولين حنروح سيتي ووك تعال معانا.
فيصل:أوك انا جاي يسير نروح سوا بسيارة وحدة استنوني عند ستاربكس.
شهد:أوك.

ووصلوا شهد وجولين ستار بكس وشوية الا جا فيصل وركبوا معاه طبعأ شهد ركبت جمب فيصل لأنو المرة اللي فاتت اللي راحوا فيها داون تاون ديزني وخلت جولين تركب جمبو قلها مرة تانيه انتي اركبي جمبي مو هيا ..وصلوا سي وورلد وكان الجو مررة حار وماينطاق لانو جا الصيف..

شهد:اف استغفرالله مررة مررة حر نفسي افك الحجاب..
فيصل:طيب عادي فكيه.
شهد:هههههه عاد انتا ماصدقت..

واشترو التزاكر ودخلو ولعبو اول لعبه الا شوية فيصل قال انو لي جا السي وورلد فبيروح معاه شوية ويجوا..وهنا راحوا شهد وجولين الحمام وجلست شهد تزبط من حجابها بطريقة تخلي الهوا يدخل شوا فسارت مهي رابطتو وقالت ايوة كدا اهون شوية الهوا يدخل ودق فيصل وسأل عن مكانهم فقالتلوا ولما خرجوا من الحمام شاف فيصل طريقة حجاب شهد وضحك لانو سار شعرها باين وواضح ورقبتها شوية طالعه..

شهد:لاتضحك ايش اسوي مررة حر واللله مني قادرة استحمل.
فيصل:قلتلك فكي الحجاب مارضيتي.

جلسوا يلعبو شوية ولما خلصوا خرجوا وراحو يتشعوا في مكان وجا الليل وكل مين رجع لبيتو..تاني يوم اتفقت شهد مع جولين يروحوا السينما فقالتلها جولين روحي وانا اجيكي على هناك وطبعأ شهد قالت لفيصل يجي..
وصلت شهد داون تاون ديزني وكان الوقت الظهر وكلمتها جولين وقالتلها انها محتقدر تيجي مافي سيارة تجيبها فقالتلها شهد قلتلك كان مريت عليكي وقالتلها جولين خلاص المرة الجايه ان شالله..هنا وصل فيصل وقالتلو شهد انو جولين مهي جايه..

فيصل:أحسن.
شهد:حرام عليك ليش تقول كدا؟
فيصل:مااحبها.
وفيصل كان مبسوط عشان هوا وشهد لوحدهم مافي أحد معاهم.
فيصل:وش رايك نروح نتغدا قبل ماندخل الموفي؟
شهد:أوك.

راحوا الموفي وبعدها دخلو الموفي الا فيصل طلع على فوق اللي يفصل بين الكرسيين التكاية عشان يسير لاصق في شهد وطبعأ شهد بينها وبين نفسها فهمت الحركة وبدأ الفيلم وجالسين يتفرجوا وقرب فيصل شوية من شهد وشهد قربت كمان منو..وخلص الموفي وكانو بيدخلو موفي تاني الا دقت لمى على شهد وقالتلها يلا دحين امرك عشان احنا معزومين مع هناء وزوجها..

شهد:يلا فيصل انا لازم اروح ورايا عزومة.
فيصل زعل وبان على ملامح وجهو:طيب.
شهد:معليش والله بس مضطرة اروح,صح افتكرت انتا زعلان على حركة امس؟ترى والله انا وجولين كنا نستهبل عليك لما دقيت عليك وقلتلك في موضوع مهم وبعدين قلتلك بستهبل.
فيصل:لا عادي ماسار شي.
شهد:بطل حساسية انتا كمان كنت امزح معاك.

امس وفي طريق الرجعه جولين جاتها فكرة هيا وشهد انها تدق على فيصل وتستهبل عليه وتقولو في موضوع مهم ابغاك فيه انو في احد تكلم عنك ونقلي كلام وطبعأ كلووو تأليف ولما قالت لفيصل انو مزحة زعل شوية فاليوم كان شايل في خاطرو شوية..
فيصل:لا عادي خلاص ماسار شي وكان في متضايق انو شهد حترجع بدري وقالها انو بيروح يزور سيف هوا قريب من الداون تاون ساكن قالتلوا حلو يسير تتسلى معاه.
وراحت شهد العزيمة وكان فيها بنت سعودية اسمها غيداء معاهم في المعهد ماكانت تطيقها شهد لانها من يوم ماجات وهيا تحاول تتعرف على شهد وشهد تتهرب منها..جلست تهرج معاها وقالتلها انو شافت اليوم فيصل اللي معاهم في المعهد..

شهد:فين شوفته؟
غيداء:في the grove بس ماكان لوحدو معاه صاحبو واحد سعودي وجلست توصفو.
من وصفها عرفت شهد انو خالد.

وراحت البي بي وكتبت لفيصل انو غيداء شافتك اليوم وقال فيصل أي افتكر شوفتها نسيت اقولك.
وخلص اليوم والكل رجع البيت وتاني يوم كان دوامات بداية ليفل جديد..

دخلت شهد الكلاس وكان مررة مليااان ومهي مصدقة انو اخر شهر ليها وبعدها لازم ترجع اجازة دخلت جلست الا لقت فيصل جالس ولابس نفس لون التي شيرت حقها وقالت في نفسها:يااربي دايمأ دا الولد يلبس نفس الالوان حقتي والمشكلة بالصدفة ان شالله بس الكلاس مايدقق..

في الليفل اللي راح جات 3 ايام ورا بعض وشهد وفيصل كانوا لابسين نفس الوان التي شيرتات بالصدفة كانت حتى مرة من المرات فيصل قالها وش ذا انتي تقلديني كل يوم لابسه نفس اللون فقالتلو شهد مع نفسك ليش اقلدك اصلن بس الصدف.
في دا الليفل كانت اول ماتدخل شهد تسلم على اللي معاها لانو الكلاس كلهم مع بعض يدرسوا كم شهر ليهم وكانوا يتساعدو مع بعض في حل الاختبارات والواجبات الا فيصل ماكان يجي معاهم وكان يتضارب مع شهد وخري بس مالك دخل واكتر من مرة سارت مضاربات بين شهد وفيصل انو لايصرخ عليها قدام الكلاس ويرفع صوتو بس مافي فايدة فسارت تطنشو وماتقولوا تعال حل معانا.

جا الويك اند التاني وكان في عزيمة في بيت هناء وهنا طلب فيصل من شهد انها تتصور وترسلو الصورة عشان يبغى يشوف شكلها من غير حجاب طبعأ رفضت شهد وجلس يزن يزن يزن عليها فقالتلو خلاص بكرة أوريك عالطبيعه شعري قالها طيب نشوف..
جا اخر الليل وقررت شهد انها ترسل صورة لفيصل وارسلتلو وماعلق قامت نامت..جا تاني يوم وخرجت شهد مع فيصل..

فيصل:يلا فكي الحجاب انتي وعدتيني.
شهد:طيب خلينا ننزل مكان مو هنا عشان ابغى مراية..
فيصل:شهد اعطيني يدك.
شهد قامت اعطت يدها لفيصل.
فيصل:ياللله وأخيرأ مني مصدق وجلس يبوس يدها وهيا مررة مكسوفة..
نزلوا ستاربكس وراحت الحمام تزبط شعرها وخرجت الا ابتسم هنا فيصل وجلسوا وجالس ماسك يدها..
فيصل:قولي أحبك.
شهد:لا مني قايلة.
فيصل وهوا ضاغط على يد شهد أقولك قولي احبك.
شهد:طيب عورت يدي أحبك.

دخلوا السيارة وقال فيصل لشهد ترفع شعرها على فوق وطول ماهما في السيارة ماسك يدها ويقولها انو أخيرأ ومو مصدق راحوا لمكان بعييد شوية كلوو خضار وفي كراسي ونزلو من السيارة وراحوا جلسوا على الكراسي..
كان فيصل مررة لاصق من شهد وشهد كانت مكسوووفة مررة وماسك يدها وحاطط يدو التانيه على كتفها شوية وبيطالع في وجهها وهيا بتطالع وبعدت وقالها لاتخافي محأبوس وجلس يتأملها وشوية قال ممكن أبوس؟
وهنا كانت أول بوسة لشهد مع فيصل وشهد كانت مكسووفة مررة ومو مستوعبة اللي سار أبدأ وكيف سوت كدا جا بيرجعها البيت وهيا نازلة باس يدها وطلعت البيت وقررت تحكي لمى بس مو التفاصيل طبعأ..

شهد:أقولك لمى فيصل قالي أنو يبغاني في موضوع مهم شكلو بيعترف انو يبغى علاقة.
لمى:اما قووولي والله.

شهد ماحكت لمى انو أصلأ فيصل قد فاتحها في الموضوع دا ولا شي بس لما حست انو كل شي سار جد قررت تحكيها..
طيب روحي وشوفي ايش يبغى وانتبهي ازا ماتبغي قوليلو انك ماتبغي.

شهد:ايوة اكييد طبعأ.

وهيا فوق سريرها جلست تفكر باللي سار وانو سوت شي كبير وغلط وقررت تقول لفيصل بكرة كدا..
تاني يوم كانت شهد في الجيم حق البيت الا يكلها فيصل بي بي.

فيصل:هلا شلونك؟
شهد:الحمدلله كويسه انتا كيفك؟
فيصل:انا بخير ومررة مبسوط.
شهد:اسمع ابغى اقولك حاجة,اللي سار امس غلط والله ومفروض مايسير خلاص خلينا اصحاب بس.
فيصل:من جججدك انتي تستهبلين انا ماصدقت استنى اللحظة ذي من زمان قلك اصحاب .
شهد:والله بكلمك من جد.
فيصل:خلاص يسير خير يلا خلينا نتفرج موفي اليوم.
شهد:طيب حجيب لمى معايا وانت جيب خالد معاك.
فيصل:أوك.

راحوا الموفي وسابت لمى بنتها عند هناء ..قبل مايروحوا الموفي مرو على سب وي يجيبوا اكل عشان ياكلوه في الموفي وكلمت شهد تسال فيصل ايش يبغى وقلها زي ماتطلبون جيبيلي..
راحوا الموفي ودخلو وكان فيصل جالس في النص بين شهد ولمى وطول الموفي ماهوا شغال وهوا يطلب من شهد تديه يدها وهيا رافضة وتقولوا مجنووون انتا لمى جمبنا بلا هبل..

رجعوا البيت وجلس يكلم فيصل شهد بي بي..
فيصل:ليش ماعطيتيني يدك في الموفي؟
شهد:من جدك انتا ولمى جمبنا خبل انتا.
فيصل:زعلتيني والله.
شهد:بلا هبل ناوي تفضحنا انتا.

في دي الفترة كان فيصل كل يوم يدق على شهد يصحيها الصباح..وجا اليوم التاني اللي شهد كزبت فيه على لمى انو حتروح تشوف فيصل يبغاها في موضوع ..
راحوا شهد وفيصل لنفس المكان اللي راحوه قبل امس وجلسوا يهروجوا الا خرجت شهد حلاوة حامضة وجالسين ياكلو الا خرج حبة فيصل والا الا ياكلها شهد بنفسها وشهد ترفض قام قرب منها ودخلها فمها بالقوة هههههه.
حاول فيصل يمسك يد شهد وشهد رافضة.

شهد:فيصل ترى كلمتك قبل امس من جد خلاص خلينا اصحاب معد ابغى علاقة.
فيصل حس انها من جد تتكلم:انا ماكنت احسبك من جدك تتكلمين اللي يريحك..
وتضايق وزعل فيصل وحست شهد فيه وحزنت عليه ومدت يدها تمسك يدو الا سحبها..
فيصل:لا شهد مدامك ماتبغين لاتمدين يدك.
شهد:الا ابغى اديني يدك.

وجلس فيصل رافض الين مااستسلم ومد يدو ومسك يدها وكان مبسوط وباسها تاني..
في دا اليوم حست شهد انها دخلت علاقه من جججد يعني ماينفع تتراجع أبدا خصوصأ انها قالتلوا ماتبغى وبعدين غيرت رأيها..
رجعت البيت وحكت لمى انو فيصل قلها انو معجب فيها ويحبها وكدا طبعأ ماحكتها التفاصيل ابدأ وماحكتها انهم من فترة وهما في علاقه فكزبت عليها وقالتلها انو اليوم صارحني..

لمى:واانتي طيب ايش رديتي؟
شهد:انا وافقت,انا مررة مرتاحة معاه الولد دا وأحس نفسي طبيعيه معاه.
لمى:زي ماقلتلك انتي دخلتي علاقه دحين فماينفع بعدين تقولي معد أبغى لأنو مو لعب,بعدين فيصل ولد لزيز وكيوت ودمو خفيف.
شهد:ايوة اعرف دا كلوو.

جا اليوم التاني وكلم فيصل شهد انو بيروح مع لي واخوه يلعبوا paintball وانو حيمر عليها تروح معاهم قالتلوا طيب والبس سماوي زيي قالها طيب..

راحوا يلعبوا وكان يووم جمييل انبسطت فيه شهد مررة وكان كل شوية فيصل يسأل شهد:انتي مبسوطة وترد وتقولوا ايوة خلص اليوم والكل رجع البيت ونامو على طوول من التعب..

بقي اسبوعين وتسافر شهد وكان تقريبأ كل يوم تخرج شهد مع فيصل وكل يوم تقوى علاقتهم أكتر من اليوم اللي قبلو وعلى نهاية الاسبوع التالت قررت شهد تتكلم مع غيداء وقالت يلا خليني اتعرف عليها يمكن تطلع فلة.خصوصأ انو من بعد مااعترف فيصل لشهد انو يحبها وخلاها تسحب على جولين كل مرة تقولوا خليها تخرج معانا يصرف ويقول انا مااحبها وهوا عشان مو مايحبها عشان يبغى يجلس هوا وشهد لوحدهم.

شهد:كيفك؟
غيداء:الحمدلله انا كويسة انتي كيفك؟
شهد:الحمدلله,اسمعي ايش رايك تتغدي معايا وبعدين تحضري كلاس الافترنون وانا ارجعك البيت؟
غيداء طيب بس خليني اديني اخويا خبر.

غيداء كانت من مكة كان عمرها 21 سنة خلصت جامعه وجايه تدرس كم شهر لغة وراجعه..كانت سمرا طويلة وجسمها حلوو.شعرها طوييل وكثيف أسود لونو وناعم على مموج..عيونها كبيرة سودا كانت تحب واحد وخلاص حتنخطبلو قريب امو كلمت امها وحكت شهد عن دا الشي البنت كانت كيوت..

شهد وهيا ماشيه الا يكلمها فيصل بي بي..
فيصل:وينك؟
شهد:انا رايحة اتغدا مع غيداء.
فيصل:اوك انا بجي أي مطعم؟
شهد:لاتيجي مين استنى اول اقولها.
فيصل:اوك.
شهد:غيداء عادي لو جا فيصل يتغدا معانا ؟تراه مررة فلة.
غيداء:ايوة وي عادي.

شهد كلمت فيصل وقالتلو يجي وجا المطعم وبدأ يتعرف على غيداء وطبعأ هوا وشهد انهم اصحاب قدام غيداء مو اكتر من كدا خلصوا غدا وراحوا كلاس الافترنون وبدأ فيصل وغيداء يتضاربوا ويرموا اوراق على بعض وحالة..
شهد:خلاص بلا هبل احنا في كلاس لاتسوو زي الاطفال.
ولا كأنو شهد بتقول حاجة استمرو على مضارباتهم والكلاس كلوو بيتفرج والتيتشر زي الهبلة جالسه ولا قالت شي..خلص الكلاس وجا وقت الرجعه للبيت..

شهد:لمى كلمتني تعبانه وقالت انها محتقدر تجيني وقالت انو اشوف احد يرجعني واجيب معايا لين في الطريق.

غيداء:تخيلي اخويا سحب عليا أنا كمان ولا بيرد عليا.
هنا فيصل لاحظ انهم حايسين مو عارفين مين يرجعهم قام دق على شهد وقالها تعالوا انا ارجعكم.
شهد:عادي فيصل يرجعنا غيداء؟
غيداء:ايوة عادي بس مو كدا قدام الناس خليه يروح بعيد واحنا نجيه.
شهد:اوك.

وقالت لفيصل يوقف بعيد وهما يجوه والا ركبوا السيارة وهاتك هروج وقالت شهد لفيصل انها تبغى تمر تجيب لين عشان لمى تعبانه فقالها طيب..
وصلوا المدرسة ونزلت شهد تجيب لين ولما ركبت السيارة لين وجهها مفجوع كأنها تقول في نفسها مين دولا اول مرة اشوفهم..
هنا فيصل قال لشهد:خلنا نروح مكان تاني.
شهد: لا وي لمى تعبانه ولازم ارجع عشان لين معايا وبعدين الجو بيمطر خلاص خليها مرة تانيه ان شالله.
فيصل:اوك.

ورجعوا البيت ومن وقتها ضربت شهد صحبة مع غيداء..جا الليل ودق فيصل على شهد..

فيصل:شهد اسمعي سيف مررة طفشني مررة عاجبته غيداء ويبي يتعرف عليها.
شهد:لا طبعأ البنت تحب اهبل انتا.
فيصل:انتي وش عليك روحوا الجيم وحنا بنجيكم كأنه صدفة.
شهد:لا لا قلتلك البنت تحب مايجي.
فيصل:انتي مالك دخل هما يتصرفون.
شهد:لاترضى احد يجي يكلمني وانا معاك في علاقة؟
فيصل:خلاص يابنتي قلتلك هما يتصرفون.

ورفضت شهد ولا قالت لغيداء تروح الجيم ولا شي..
جا الويك اند اللي قبل الاخير بقي اسبوع على سفر شهد وهيا مهي مصدقة ومستوعبة انو خلاص..
اتفقت مع غيداء وفيصل يروحوا يتفرجوا موفي..وهما في السيارة تيجي فكرة في بال غيداء..

غيداء:أيش رايكم نروح نايت كلب؟
فيصل:والله ماعندي مانع وانتي شهد؟
شهد:اوك.
غيداء:بس خلونا نروح صالون نسوي شعرنا مني رايحة كدا.

وراحوا الصالون وقالت غيداء لفيصل يجلس في السيارة مايدخل معاهم عشان مايشوف شعرها..
وهما في الصالون الا يدخل فيصل كان يسأل شهد عن حاجة وغيداء بتقول خليه يخرج وطلبت شهد من فيصل يخرج وخرج.
هنا سألت الكوفيرة غيداء انو دا البوي فريند حقك؟قالتلها غيداء لا واشرت عليا انو البوي فريند حقي..قمت قلت لا مو صاحبي فاستغربت الكوفيرة ليش شهد عادي يشوفها بشعرها وانتي لا هنا ألفت قصة شهد انو دا متربي معاها في نفس البيت فعادي يشوفها ودخل فيصل شويه الصالون وشاف غيداء بشعرها ماقدرت تهرب منو دي المرة..
خلصوا سشورة وجلسوا يزبطوا مكياجهم وركبوا السيارة..

فيصل:وش رايكم نكلم واحد يجي معانا؟
شهد:مين تقصد؟
فيصل:سيف.
شهد:لا انا مااثق في الولد دا يروح يقول عننا شي.
فيصل:لا على مسؤوليتي الولد انا واثق فيه وحق ثقه.

وافقوا شهد وغيداء وكلم فيصل سيف وقاله تعال عندي ليك مفاجأه وجا سيف ودخل السيارة اول ماركب جلس يضحك مو مستوعب انو اخيرأ حيخرج مع غيداء..

هنا الكل ضحك عليه لانو كان مسكووف وواضح عليه..
شهد:كيفك سيف؟
سيف:الحمدلله انا بخير انتي شلونك؟
شهد:الحمدلله كويسه..
سيف:كيفك غيداء؟
غيداء:الحمدلله انا كويسة.

طبعأ غيداء ماتعرف انو سيف معجب فيها ماجابتلها سيرة شهد.وسيف مايعرف انو غيداء تحب واحد..وهما في الطريق للنايت كلب جلسوا يهرجوا ..وصلوا النايت كلب وجو بيدخلوا مارضيولهم لانو غيداء ماكان عندها أي دي..

سيف:ترى انا مبسوط اني خرجت معاكم اليوم انا مااعرف احد هنا في لوس انجلوس.
شهد:وي من جدك ليش؟
سيف:والله من المعهد للبيت ومن البيت للمعهد,انا انسان اجتماعي واحب الناس بس مالقيت أحد عدل.
شهد:ايوة والله ماالومك..
راحوا لنايت كلب تاني وهنا رضيو يدخلوهم بدون أي دي..دخلوا النايت كلب وكان فاضي قليل الناس اللي فيه..جلسوا شهد وغيداء على الكراسي..
سيف:تبون نطلب معسل؟
شهد:لا مافي داعي.
سيف:طيب قوموا ارقصوا.

طبعأ شهد وغيداء مكسوفين قامت شهد ترقص مع سيف خليجي الا شوية تنكسف وماتكمل ورجعت جلست وقالتلو خلاص ماابغى..
وقامت غيداء رقصت مع فيصل كمان الا قروو يغيرو المكان يروحوا مكان تاني..بس المكان اللي بيروحوه ماقدرو يدخلوه لانو لازم يكونوا لابسين بدل وكدا وراحوا لاكتر من نايت كلب برضو ماقدرو يدخلو بدون أي دي..
تأخر الوقت وقالت شهد لازم نرجع البيت دحين ..وهما في طريق الرجعه اتفقوا بكرة يخرجوا من بدري الأربعه ولما رجعوا البيت نزل فيصل شهد وغيداء من برا عشان السكن كلوو سعوديين لحد يشك..وبعدين هوا وسيف يدخلوا السكن بالسيارة..سيف كان ساكن في نفس سكن غيداء وشهد ..

وصلت شهد غيداء للعمارة حقتهم وهيا راجعه بتروح للعمارة حقتها هيا ولمى تقابل سيف في الطريق ويضحكوا وطبعأ مسوين نفسهم انهم كأنهم ولا كانوا مع بعض..
رجعت شهد البيت وطبعأ ماحكت لمى باللي سار..شهد كانت حريصة ماتحكي لمى كل شي كانت تحكيها المخلص مو أي شي حاجة تسير لانو لو عرفت محتخليها تخرج تاني..

جا تاني يوم الصباح وصحيو بدري زي مااتفقوا ودقت شهد على فيصل تسألوا فينكم؟قال احنا جاهزين يلا انزلو واخرجو برا البوابه..
دقت شهد على غيداء وقالتلها ها جاهزة وقالتلها غيداء ايوة قالت يلا انزلي هما مستنينا نزلو والكل ركب السيارة..سيف كان مررة مكسوف لسه مو مستوعب انو سار يخرج مع غيداء وزعلان في نفس الوقت لانو غيداء كمان كان باقي عليها اسبوع زي شهد وحترجع السعودية بس هيا حترجع للأبد مو زي شهد وقال ياريتنا تعرفنا من بدري..
راحوا بيشترو التزاكر حقت ديزني من الكشكات اللي تبيعها ارخص من ديزني نفسها بس طلعت غاليه برضو..

فيصل:والله ماادفع 80 دولار على ديزني..

جلسوا يفكرو فين يروحوا وقالوا سي وورلد كان سيف وفيصل وشهد معاهم التزكرة السنوية..وقروا انو يتقاسمو تزكرة غيداء لانها ماعندها زيهم..

شهد:هبل كل السعوديين عندهم سي وورلد مني فاهمه ليش مايحتاج اصلن تروحها الا مرة وحدة.

وصلوا السي وورلد وكان الجوو حار برضو فماقدرو يطولو فيها بسبب الجو فقالوا نروح مكان تاني احسن بدل القرف دا وهما خارجين رايحين للمواقف.
.
فيصل:يلا نروح لسيارتنا.
سيف وغيداء ضحكوا انو قال سيارتنا.
شهد:ايوة دايمأ يقول سيارتنا ترى حتى وهوا معايا.
فيصل:أي سيارتنا..

نسيوا فين وقفوا السيارة وجلسوا يحوسوا ساعه كامله يدورو عليها في الحر اول شي كانوا يدورو سوا بعدين اتفرقوا كل مين يدور لحالوا شويه الا تسمع شهد صوت غيداء وفيصل ينادوو ولمحت الصوت وراحتلهم لقتهم لقيوا السيارة بس بيستنوا شهد لانو كانت المفاتيح في شنطتها..

جلسوا ينادو على سيف وماقدرو يدقوا عليه جوال لانو جوالوا كان برضو في شنطة شهد لانو ماكان سيف وفيصل عندهم جيوب في ملابسهم فحطوا كل اغراضهم مع شهد..شوية الا جا سيف وأخيرأ وركبوا السيارة بعد ماقرفوا من الحر وهنا قالت شهد ليهم دحين لازم نروح انا وغيداء عيد ميلاد لين..
سيف وفيصل جلسوا يقنعوهم يسحبوا على عيد الميلاد فقالت شهد لا وي مايجي تخيل والله تزعل لمى ومعد تخليني اخرج وصلوا عيد الميلاد واتفقوا مع فيصل وسيف انوا يكلموهم في الليل ويتفقوا فين يروحوا بكرة ان شالله..