ام احمد اقنعت احمد انه يسافر قبل لا يملج ويرد ويملج وهو مرتاح البال ..وبالفعل سافر احمد ايرلندا عشان يكمل باقي اوراق انتسابه ويخلص شغله ودور له بيت وحصل له بيت حلو وصغيروون وقريب شوي من جامعته ..وطووول هالاسبوع وام احمد تلمح حق ام محمد عن سالفة نورة واحمد بس ام محمد حليلها على نياتها وما فهمت عشان جييه قررت ام احمد ان قبل ما يرجع احمد من السفر بالسلامه بتسير وبتخطب نورة رسمي ..بالنسبه حق سالفة عيسى ف محمد ماطاع في البداية بس مع الحاح عيسى وامه طاع في الاخير لان عيسى باقيله شوي وبيتخرج ومرة ثانيه نط لهم خالد وقال انه يبى يعرس بس طبوه وما سووله سالفه وتم هو مغيظ عليهم واونه زعلان و من جهة ثانيه هو فرحان حق اخوه وايد وايد لانه بيعرس وبيكمل نص دينه ..


#في المستشفى #

منى وامنه سوو العمليه بعد موافقة ابوها اللي يت في وقت متاخر لانه تردد وايد وكان خايف على بنته ..خليفه يوم درى انصدم وانصعق وماطاع في البدايه بس بعد تفكير طويل رظى....

العمليه نجحت ومنى وامنه الحمدلله صحتهم اووكي ..بوطارق يوم درى ان بنته في المستشفى احشتر عليهم وسوالهم حفله ..ليش مايخبروونه وهو ابو امنه ؟؟ طبعا خبروه عقب ماسوت العمليه وصارت صحتها احسن ..امنه يوم درت ان منى هي اللي تبرعت لها بكليتها جذبت الخبر وما صدقت ..لكن بعدين يوم يابولها منى على كرسي متحرك عقب العمليه بيومين عشان تشوفها وتسلم عليها تاكدت من هالشي ..

امنه طباعها تغيرت كليا عقب اللي استوالها التغيير الوحيد الملاحظ اللي صار انها بدت تشل سور العداوه اللي بينها وبين منى و تبني سور يديد من المحبه والصداقه .. وكانو كلهم يحسوون انها بتتغير وبتصير غير عقب مده ..

خليفه وهو ماسك ايد امنه : هاه امنه ..ناقصنج شي هنيه ؟؟

امنه وهي مبتسمه: لا مشكور خليفه ..بس متى بطلع من هنييه ؟؟ مليييت ..

ام طارق: وابوي عليج وين مليتي ؟؟ نحن كلنا عندج وتملين ؟؟

طارق بخقه: يكفي انج مجابلة ويهي الحلو خخخخخ

امنه: هههههه ..عيل وينهم سلطان ومها ماشفتهم موووليه ...

بوطارق: سلطان واقف خاري ويامها ..

امنه: خلووه يدخل ابى اشوفه هو ومها ..

كلللللللللهم بطلو عيونهم وطالعو بعض ..معقووووله ..هالاثنين اللي امنه ما تدااانيهم ..الحين تبى تشوفهم ؟؟؟سبحاااااان مغير الاحوال ...

طلع طارق عشان يزقرهم وطبعا كان ردة فعلهم مثل اللي كانو داخل واكثر ..دخلو سلطان ومها ..مها على طول سارت ولوت على امنه وتمت تصيح ..

طارق وهو متفشل لانها صاحت جدام خليفه: خلاص مها .. امنه الحمدلله الحين بخيير ..

وسارت مها يلست عند ام طارق وهي بدورها يلست تهديها

يوم يا دور سلطان قرب من راس امنه وباسها عليه وقال وهو مبتسم: الحمدلله على سلامتج...زيغتينا عليج ..

امنه: هههه الله يسلمك ..

امنه ضحكت بفرح وحست بقدرها عند اهلها ..عرفت انها تسوى الكثييير بالنسبه لهم .. وبدورها هي طلعت محبتها لهم وحست انها تحبهم اكثر عن نفسها ...

ام طارق: الحين خلصتوا بيتكم انتو ؟؟

خليفه: هيه عموه ..بس باقيلنا شوية اغراض ..

امنه: خليفه ..ممكن اطلب طلب ؟؟

خليفه: انتي تامرين يا امنه ..

امنه: ما يامر عليك ظالم ...(قالت بخوف)خل نتم في بيتكم ..

خليفه وهو عاقد حياته : أي بيت ؟؟

امنه: بيت اهلك ..

خليفه وهو منصدم: ليييييييش؟

امنه: بس مابى اطلع من هناك ..

خليفه نزل راسه بياس وقال: انزين وبيتنا ؟؟شونسوي به ؟؟

ام طارق تدخلت: هيه والله صدقه ..وبيتكم ..جييه هي لعبه تطلعون من البيت وتردوون ؟؟

بوطارق وهو يرمس ام طارق بلهجة عصبيه: خلهم يا حرمة روحهم بيتفاهموون ..انتي شلج..

امنه: بيعه ولا اجره وبتييك منه فايده ..

خليفه بحييرة : اممم ..مادري ..بس هب وقته نرمس في هالامور الحين ..وانا ماباج تفكيرين في اييي شي غير صحتج وبس ..فهمتي ؟؟

امنه وهي مبتسمه: فهمت ..

بوطارق: مها ..سلطان..طارق..يالله يا ام طارق روحنا ..

امنه:ليييش يا ابويا يلسو ..بعدكم ما يلستو ..

بوطارق: وين نيلس يا بنتي ..هل ريلج يبوون اييونج ونحن يالسين هنيه من الصبح ..يالله يالله ..

خليفه: عمي هلي ياو وسلمو على امنه من عقب العمليه ..استريح ..

بوطارق باصرار: لالالالا ..يالله قومو ..

طارق: انشالله ..

سلطان: يالله امنه تامرين بشي؟؟

امنه: سلامتك سلطان ..مها ..وينها نواري ليش مايت؟؟

مها: هي كانت بتيي ويا خالوه ام محمد اول امس بس خالوه ما خلتها ..

امنه :ليييييش؟

مها: شافت ان الغرفه مستويه زحمه ..

امنه: انا رمستها امس وقالتلي انها بتي اليوم ..

ام طارق: يامج اليوم بيونهم ضيوف ..وما بتتفيج ..اكييد بتييج باجر ..

امنه: هييه اذا جييه زيين ..ولهت عليها الدبه..

وطلع بو طارق ويا عياله وحرمته واول ما طلعو كانت ام سيف يايه ويا بنتها لطيفه عند امنه تتطمن عليها بعد ماكانت يالسه عند بنتها منى وخلت حريم ولدها عند منى ويت عشان تشوف امنه ..


#بيت بو محمد#

ام محمد كانت يالسه ويا شيخه وتسولف وياها وتتخبرها عن البلاد اللي سافرت لها ..

ام محمد: يااحييج والله يابنتي يوم طلعتي واستانستي ..

شيخه: والله تمنيتج تكونين وياي يامايا ..

ام محمد: ههههه انا وين والسفر وين ..خلني يالسه هنيه اريح لي ..اقولج اليوم ام احمد بتيي تزرونا ويا بناتها ..

شيخه بفرح: يا حلييلها ام احمد ..حياها الله ..عيل نورة ما خبرتني ..

ام محمد بصوت واطي: نورة ماتدري انهن بييون ..

شيخه حست انه في شي : ليش شو مستوي ؟؟
ام محمد: مادريبها ام احمد يامج ..تلمح لي على نورة ..شكلها الابتخطبها حق ولدها احمد ..

شيخه وهي عاقده حياتها: بس انا سمعت عيسى يقول ان ولدها مسافر ..

ام محمد: هيه فديته ..وهي تحاول تلمح لي من يوم ماسافر ..

شيخه :ليكوون بعد ؟؟

ام محمد: مادري..هي لين الحين ما فتحت وياي الموضوع ..بس شكلها اليوم يايه وبتفتحه ..

شيخه: يالله انشالله خييير ..انا بسير ازهب لهم الفواله واحطها في الميلس ..

ام محمد: برايج فديتج ...

وسارت شيخه تبى تسوي اللي ناويه عليه ويوم طلعت تلاقت ويا عيسى عند الباب ..

شيخه بفرح: هلااااا عيسى ..شحالك ؟؟

عيسى وهو ايوايه عمته: بخيير وسهاله ..شحالج عموه؟؟

شيخه: بخير ربي يسلمك ..هاه خبروني انك اشتغلت ؟؟

عيسى: هيه ويا ابويا ..

شيخه: وشو انشالله مستانس ومرتاح في شغلك ؟؟

عيسى : وين ارتاح وخلود 24 ساعه يالس يحن على راسي ههههه

شيخه: هههههه يا حليله هالكتكووت بعد اشتغل ؟؟

عيسى: هههههه هيه .. يدووه داخل ؟؟

شيخه: هيه داخل فديتك ..اقرب ..

عيسى: تسلميين عموه..

ودخل عيسى داخل واول ما سلم على يدته يلس عدالها وسالها بفضول : هاه يدووه ..شو صار على موضوعي ؟؟

ام محمد : وابوي عليك يا عيسى..بلاك متحرقص جييه ؟؟ اركد شوي ..

عيسى: يدووه الله يهدييج ..شو اركد بعد ؟ انا ابى املج الحين عشان اول مااتخرج اعرس على طول ..

ام محمد طالعته بنص عين : شو هالانانيه بعد ..يمكن البنيه تبى تكمل تعليمها ..

عيسى: ومنو قال اني ما بخليها تكمل ؟؟ بتكمل غصبن عنها بعد هههههه

ام محمد:مافي شي بالغصب ياعيسى ..

عيسى وقفط : اححم انزين ..المهم شو صار ؟؟ حصلتيلي بنية ؟؟

ام محمد : مممم والله نورة تقول انها حصلت لك وحده زينه ..وتمدح فيها ..

عيسى بطل عيونه : منو هي ؟؟

ام احمد: ربيعتها ..وعد ..

اول ما قالت ام محمد اسم وعد نش عيسى بدون ما يحس وباس راس يدته بالقو من فرحته وقال وضحكته شاقه ويهه : خلاص موافق ..

ام محمد ما تحملت شكل عيسى الغبي : هههههههه يالله بالستر ..الحين المفروض البنيه اللي توافق هب انت ..

عيسى بارتباك وفرحه : اااه لا يعني موافق على البنت هههههه

ام محمد: ههههه الله يهديييك ..

عيسى: انزين يدووه متى بترمسينهم ؟؟

ام محمد: مادري والله ..هم بييونا اليوم ..

عيسى بفرح: والله ؟؟؟ عيل رمسي امها اليوم ..

ام محمد :لالا شو ارمسها اليوم بعد ..الحرمة يايه تزورني اقولها والله ابى اخطب بنتج ؟

عيسى: عيل باجر ..

ام محمد : بشوف ..

عيسى :يدوووووه لا تشوووفين ..

ام محمد :هههههه خلاص خلاص برمسها باجر اذا الله راد..

عيسى: فديييييييييت يدووتي انا ..

ام محمد: اخخخ منك ..اذا بغيت الشي تسوي المستحيل عشان تاخذه ..

عيسى: ههههههه يدووه عاد انتي ما تعرفين اني دوم اتفدااج ؟؟

ام محمد : صح ..ههههههه

وشوي ولا نزلت نورة من فوق وهي لابسة بيجامتها وماسكه اوراق ويالسه تدعي على استاذ الانجليزي مالها ..

عيسى: طاااعو الشكل هههه يالله سيري تلبسي ..

نورة بعصبيه: وين تباني اتلبس وانا عندي بروجكت هالزفت ..

ام محمد: سيري تلبسي ..خالتج ام احمد بتيي تزورنا اليوم ويا بناتها ..

نورة بطلت عيونها وشهقت : صدق ؟؟ وعدوو السباله ماخبرتني ..

عيسى بعصبيه: سباله في خشمج يالدبه ..

نورة بطلت عيونها: خيبه ..

عيسى: ليش تسبين خطيبتي ؟؟

نورة تمت مبطله عيونها وتطالع ام محمد اللي تضحك على عيسى المعصب وتقول في خاطرها "فظح عمره ويلس هالمينون .."

نورة وهي تحاول تسكته :هييييي عيسسسسوه ؟؟

ام محمد :يابوك البنت بعدها ما وافقت عشان تسوي جييه وتقول خطيبتي ..

عيسى وضحكته شاقه ويهه: ولو ..المهم انكم رمستو عنها عشاني ..

نورة وفهمت ان ام محمد خبرت عيسى بالخبر الحلو وقالت بمكر : ايووه ايووه ..

عيسى وهو يتصنع البراءة: شو ؟؟

نورة: من الحين تدافع عنها ..عيل لوخذيتها شو بتسوي ؟؟

عيسى: مالج خص خخخخ

نورة: هههههه ماعلينا ..امي متى بييوون ؟؟

ام محمد : عقب شوي ..

نورة وهي متدودها : انزين انا سايرة اتلبس الحين ..

وسارت نورة تتلبس على عيله ولا يا على بالها تفكر في سبب هالزيارة المفاجئه من ام احمد ويا بناتها ..لانها دووم اتيي روحها بدون وعد وحمده ..بس هالمرة بتيي وياهن ثنتيناتهن ..وحتى وعد ما خبرتها في الجامعه ..


&-_.في دبي ._-&

هزاع كان يحاول يقنع فهد بانه يجدم عرسه شوي لانه صدق مستعيل ويبى يعرس اليوم قبل باجر ..وبالفعل فهد وافق انه يخلييه على طول عقب رمضان ..يعني في اجازة عيد الفطر ..ويوم شاور ميرة طبعا ما اتكلمت ولا قالت اي شي لانها ان قالت أي شي تعرف اللي بييها من فهد .. فهد كان واايد جاسي وياها ويعاملها بجفا ..ونادر مايقولها أي كلمة حلوة ..حتى انه اتفق وياها انهم ما يرمسون بعض في التيلفون ليين ما يعرسوون لانه ما يبى يرمسها ويتذكر الجرح اللي جرحته ياه ..

جواهر باحتجاج: مابى مابى مابى ..

فهد وهو مبطل عيونه: يالنخله شو ها بعد ؟؟ يالسه تناقزين جنج ياهل !! قري مكان واحد ..

جواهر :مابى ..شو على كيفكم هو تجدموون العرس ؟؟

فهد: جب يالله ..ريلج مستعيل ..ولا انا عادي عندي ..

جواهر وبدت تعصب: انا مابى عرسي يكون قريب ..

ام فهد: وابوي عليج يا جواهر..شو هالرمسه بعد ؟؟انتي خلصتي اغراضج وجاهزة حق العرس من اليوم بعد ..

جواهر وهي شوي وبتصييح :امايا انا مابى اطلع من هالبيت بسرعه ..اففف والله ليشوف هزاع ..

فهد :خيبه ..اماايا بنتج ناويه على الريال ..

جواهر عفست ويهها ومسكت تيلفونها وسارت فوق عشان ترمس هزاع وفهد وامها ميتين من الضحك عليها على شكلها ..

هزاع اول ماشاف رقم جواهر تشقق وعرف ان فهد خبرها بالخبر وهي متصله فيه تسبه ..يعني يعرف انها بتحتج .بس هو هب قادر يصبر عنها ..

هزاع: فدييييييت هالصوت ياربي ..

جواهر وهي معصبه: جب ..

هزاع: وااااااههههههه ..اول شي وقبل لا تسبين ..شحالج ؟؟

جواهر: هب بخير انزيين ..

هزاع: افااا ..ليش حبيبتي ؟؟

جواهر: ليش تسوي جييه ؟؟؟ انت شاورتني من قبل وانا قتلك لا ...

هزاع :شواسوي ..والله مافيني صبر ...

جواهر: هزاع الحين تتصل في فهد وتخبره انك غيرت رايك ..سمعت ؟؟؟

هزاع: اسف هههههه

جواهر بصوت مخنوق: هزااااااع ..حراام عليك ..

هزاع: ههههه فديتج والله ..ابىاعرف الحين انتي ليش هب طايعه ؟؟اغراضج وخلصتيها .. وقسمنا اللي في البيت خلص ..وانتي روحج اثثتيه على كيفج ..عيل شو بقى ؟؟ مابقى غير اني اخذج من بيت اهلج ..وانا ودي اليوم ايي واخذج ..

جواهر سكتت شوي وقالت :هزاع والله قلبي ما يطاوعني اطلع من بيت ابوي ..

هزاع وهو منصدم :شووووه ؟؟

جواهر: خلاص مابى اعرس..

هزاع انصدم اكثر واكثر " بلاها هالخبله ..شو تقول ؟؟ "

هزاع: جواهر انتي شو تقولين ؟؟

جواهر: اقول خلاص مابى اعرس ..

هزاع سكت شوي وقال عقبها بهدووء: يعني ما تبيني ؟؟

جواهر وهي تصارخ : شو هالرمسه بعد ؟؟

هزاع: عيل ليش تقولين مابى اعرس ؟؟

جواهر: انزين خلاص خل نسكن في بيت ابوي ..

هزاع: حلفي بس ؟؟

جواهر: والله ..يالله هزااع بلييز ..

هزاع: بلاج انتي استخفيتي ؟؟

جواهر: والله استخفيييت يوم اني بطلع من عند امي وابويا ..

هزاع سكت شوي وعرف جواهر ليش مسويه هالحفله ..

هزاع: جواهر ..انا اعرف ان ما يهون عليج تطلعين من عند امج وابوج ..بس هذي سنة الحياه ..ولابد بيي اليوم اللي بتطلعين فيه من هالبيت ..

جواهر :ادري بس ..

هزاع: بس شو ؟؟ جواهر والله ادري وحاس فييج ..بس انتي لازم تتقبلين الوضع ..

جواهر: انزين اجل العرس ..

هزاع: ههههههههه ولاجني توني معطنج محاظرة ؟؟؟

جواهر:ههههه يالله هزاع ..

هزاع: مااشي .. وعرسنا عقب رمضان ..شاتي ام ابيتي ههههههه

جواهر: اكرهك ..

هزاع: هههههههه ادريبج تحبيني وتموتين فيني ..

جواهر: وايد مصدق عمرك ؟؟

هزاع: هيه هههههههه

جواهر : ههههههههههه سبال ..

هزاع: سبال ..بس احبج ههههههه

وتمو جواهر وهزاع يرمسون ويسولفون وهزاع يقنع في جواهر انه يكون موعد العرس نفسه الموعد اليديد وطبعا غصبن عنها بتوافق عشان خاطر هزاع ..مع انها طلعت له مية حجه وقالت كيف بيزفونا انا وميرة مع بعض .. وهو فهمها بان فهد بيدخل وبياخذ حرمته قبل وعقبها هو بيدخل وبياخذها ..


&-_. في العين._-&

طلع عيسى من بيت يدته وهو طاااااااااااير من الفرحه حتى انه ماسار بيتهم واتصل في نواف واعزمه على العشا بهالمناسبة وطبعا نواف مايدري شوالسالفه بس اذا السالفه فيها عزوومه يالله على طوول يربع ..

ام احمد يت بيت ام محمد ويا بناتها ومن اول ما يت يلست تسولف ويا ام محمد وتتخبرها عن امنه ..

ام احمد: هييه وحليلها بنت ناصر ..تستاهلون سلامتها ..

ام محمد :الله يسلمج من كل شر ..

وشوي ولا نزلت نورة وهي لابسه تنورة جينز كحليه وقميص سماوي حللو وطالع شكلها كييوت ..

ام احمد بفرح: هلا هلا والله بنورة ..

وعقب ما سلمت على ام احمد وبناتها يلست تهذرب ويا وعد ..

نورة بصوت واطي: وعدوو يالشينه ..ليش ما خبرتيني انكم بتييون ؟؟

وعد: شو اسوي والله امي محلفتني ..

نورة بطلت عيونها وحست انه في شي :ليش ؟؟

وعد غمزت لها بمكر وصدت عنها ..

عاد نورة فهمتها وكانت شوي وبتموت عليهم ..استاذنت منهم وخذت وعد وسارت فوق ..

نورة وهي مبطله عيونها وهب مصدقه: قوووووووووولي والله !!!

وعد ماتت من الضحك على شكل نورة :هههههههه من الصبح وانا قابضه عمري في الجامعه عن اضحك لاني يالسه تخيل كيف شكلج يوم بقولج الخبر ..

نورة وهي هب مستوعبه الخبر:انتي من صدقج الحين .؟؟

وعد:هيييه انتي بلاج هب مصدقه ؟؟والله انج خبله ..

نورة: شو خبله ؟؟ هالخبر روحه خبل بي ..

وسكتت شوي ويلست على السرير وويهها صايراحمر ..

وعدوهي تدزها: هاه طاحت الدودة؟ خلاص تحققت امنيتج وياج روميو وخطبج ههههه

نورة بمستحي: ههههههه خسفه ..ليش ما خبرتيني من قبل عشان اكشخ ..فششييله نازله جييه جدام امج ..

وعد وهي لاويه بوزها: جنها اول مرة تشوفج ..بس بس يالله والله شكلج طالع حلو جييه ..

نورة سكتت وسرحت وهي مبتسمه ومرة وحده تمت تضحك من فرحتها ..

نورة: وعد والله اني هب مصدقه ..خلاص يعني ..

وعد: لا شو خلاص .. باقي انا اححم شو نسيتي ؟

نورة: هههههههه لا حبيبتي حتى انتي خلاص ..

وعد بطلت عيونها وحطت ايدها على حلجها عشان لا تنسمع شهقتها العاليه ..

وعد:جذابه ..ماصدقج ..

نورة :كيييفج لا تصدقيين ..هههههههاااااااااي

وعد وهي مرتبشه: نورووه ..من صدقج ؟؟

نورة: هيه هيه ..باجر امي بترمس امج ..

وعد:قسم بالله اذا تجذبين عرفي اني ما برمسج موول ..

نورة: ههههههههه اوكي ..

وتمن وعد ونورة فرحااناات من الخاطر وكل وحده هب عارفه كيف تعبر عن فرحتها حق الثانيه ..وعقبها زقرتهن شيخه تحت عشان وعد كانت بتروح ويا امها واختها حمده ..وطبعا بعدها ما استوعبت قوة الخبر اللي ياها من نورة وتمت تضحك على شكلها يوم وصلها الخبر ..



في اليوم الثاني اول مارجعت نورة من الجامعه كانت هلكانه وتعبانه كالعاده بس مع ذلك كانت صدق مرتااحه وحاسه انها شالت هم كبير من على صدرها ...

ام محمد: تعالي فديتج تغدي ويانا ..الحين عيسى وخالد بيوون بيتغدون ويانا بعد ..

نورة: انشالله يامي ..بس ببدل ثيابي وبيي ..

ويوم طلعت نورة فوق ..

محمد بفضول: هاه يامي شو هو الموضوع المهم ؟؟

ام محمد: والله نورة يايين ناس يخطبونها ..

محمد عقد حياته : ليكون اخو سعيد؟؟انتي ما خبرتيهم يامي؟؟

شيخه: لالالا ..احمد سلطان ياي يخطبها ..

محمد بطل عيونه وهو مستغرب: احمد ..ربيع نواف وعيسى ؟؟!!

ام محمد: هيه ..

محمد:بس على حد علمي انه هو مسافر الحين عشان يكمل دراسته ..

ام محمد: هو مسافر وبيرجع عقب يومين عشان اييون يخطبون رسمي في حال اذا وافقنا ..

محمد: انزين وبعدين ؟؟

شيخه: يبى يملج قبل رمضان ..

محمد بحيرة: ممممم والله مادري ..

ام محمد: شوف انت شاور باجي خوانك ورد لي خبر عشان ارمس نورة ..

محمد: انشالله يامي ..

وشوي ولا نزلت نورة من فوق وتغدت وياهم وطبعا دقت سوالف ويا شيخه ومحمد وحش في الجامعه والدكاترة اللي محمد يستانس على سوالفهم ..


عقب صلاة العصر اتصل محمد في فيصل وحمد ونواف وخبرهم انه يبى يجتمع بهم في بيته وكللهم حضروا وخالد وعيسى كانو يبون يعرفون شو السالفه بس ابوهم هزبهم عشان يسيرون دوامهم في الشركه ..

عقب ما خبرهم محمد بالخبر ..

نواف وهو مبطل عيونه : احمد ؟ احمد ربيعي ؟؟؟؟؟؟؟؟

محمد: هيه ..هب هو احمد سلطان ؟؟

نواف وهو هب مصدق: هيه هو ..

حمد: انزين محمد ..اذا تبى رايي ..انا اشوف ان احمد ريال وماينعاب ..بس هو يدرس الحين..

محمد:يدرس ويشتغل في نفس الوقت ..ولا شو يا نواف ؟؟

نواف:صح ..يشتغل في المستشفى ويكمل ..

حمد:عيل خلاص انا اشوفه مناسب حق نورة ..

فيصل: بس هو يدرس في الخارج !!

محمد:انزين شيخه تقول عقب ما يعرسون بيشلها وبيسكنها هناك..

نواف وهو عاقد حياته ويفكر : وانا اشووفه يقول بدور لي بييت مناسب...

فيصل: يعني عنده بيت هناك ؟؟

نواف: هيه امس دق لي وقالي انه حصل بيت ..

محمد: نواف ..انت اكصثر واحد تعرفه زيين ..نبى رايك وعلى رايك بتعتمد موافقتنا ..

نواف: انا ما بمدحه عشان انه ربيعي ..شوفو هو الريال سيده وماعليه كلام وصلواته كلها في المسيد ..وقايم باهله ..يعني مافيه أي عيب عشان ما نوافق عليه ..

محمد:رايكم جييه ؟

حمد: انا ويا نواف..

محمد: فيصل شو رايك ؟؟

فيصل: انا مبدايا موافق ..بس الشور شور نورة ..

محمد: خلاص عيل انا برمسها وبشوفها شو بتقول ..



! I توقعــــــاتكم ^_^ I !

..بعد مرور اسبوع ..

شيخه رجعت من السفر من انه كان بعده وقت على موعد رجعتها الاصلي بس هي ما قدرت تتحمل فراق امها وعيالها وردت لهم وهي مستاانسه من هالسفرة الليش سافرتها وياريلها سعيد..

ام احمد اقنعت احمد انه يسافر قبل لا يملج ويرد ويملج وهو مرتاح البال ..وبالفعل سافر احمد ايرلندا عشان يكمل باقي اوراق انتسابه ويخلص شغله ودور له بيت وحصل له بيت حلو وصغيروون وقريب شوي من جامعته ..وطووول هالاسبوع وام احمد تلمح حق ام محمد عن سالفة نورة واحمد بس ام محمد حليلها على نياتها وما فهمت عشان جييه قررت ام احمد ان قبل ما يرجع احمد من السفر بالسلامه بتسير وبتخطب نورة رسمي ..بالنسبه حق سالفة عيسى ف محمد ماطاع في البداية بس مع الحاح عيسى وامه طاع في الاخير لان عيسى باقيله شوي وبيتخرج ومرة ثانيه نط لهم خالد وقال انه يبى يعرس بس طبوه وما سووله سالفه وتم هو مغيظ عليهم واونه زعلان و من جهة ثانيه هو فرحان حق اخوه وايد وايد لانه بيعرس وبيكمل نص دينه ..