المنتدى :
القصص المكتمله
وجه المرايا للكاتبة بطة
مرحبا  راح انزل اليوم لكم هذة الرواية وياليت يكون فيه تــفاعل
وجـــه المرايا.. للكاتبة بطة
"*" الجزء الأول"*"
(نوروووووو يا نورة نشي يابنتي نشي).. كان هذا صدى صوت شيخه ينسمع من فوق الدري يعني اللي طالع على الدري ولا واقف تحت بيسمعه.. وطبعا كانت هذي هي الحاله كل يوم عشان توعي بنتها او بالاحرى اختها الصغيره اللي تربت في كنفها وتعتبر مثل بنتها.. شيخه كانت اخت نورة الكبيرة وبمثابة امها اللي انحرمت منها يوم كان عمرها 5 سنين بس الله عوضها بالحنان والعطف باختها شيخه اللي كانت عايشه وياها في بيت ابوها بعد وفاة امها وابوها في حادث مؤسف ويا ريلها وعيالها وحرمة ابوها الطيبه ام محمد..
نورة: انشاءالله يامي انشاءالله الحين بنش (وطبعا مناك الاخت متلحفه وتعبانه من السهر والدراسه) شيخه:يالله يابنتي وراج امتحان يالله بيفوتج.. ويوم تسمع نورة سيرة الامتحان تنقز من فراشها وتربع في الغرفه جنها مينونه وتتخرطف باللحاف وتطيح على ويهها وتربع تتجهز حق الامتحان والكشه تسلم عليكم.. اووه نسيت اخبركم عن نورة.. عمرها 18 في ثالث علمي مستواها الدراسي متوسط ومرات يضعف لانها تهمل غصبن عنها وتيلس تلعب وتشاغب في الحصص وهي بكل بساطه فتاة بسيطه وايد يعني وااايد حبوبه وعلى نياتها تحب تنكت وتضحك دوم واللي يشوفها يقول هذي البنت عمرها ما عرفت شي اسمه حزن ولا نكد بس اللي يناظر عيونها بيحصلها مليانه حزن واسى من الناحيه الشكليه كانت نورة متعقده لانها من يوم ما هي صغيرة ويزقرونها يالدبه مع انها عاديه جدا لا دبه ولا ظعيفه وكان عليها جمال طفولي وتحب وتعشق شي اسمه اليهال.. تطلع نورة من حجرتها وطبعا كالعاده راسها في الكتاب تراجع حق امتحان الفيزيا وهو اخر امتحان من امتحانات الثانويه العامه وتحصل في ويهها ولد اختها شيخه البكر اللي يشبهها في الشكل والصفات وهم في نفس العمر ونفس المرحله الدراسيه..
عبدالله : نورووو هاه شو خلصتي الكتاب ؟
نورة : عبود وخر عني والله سهرانه عليه عيوني طلعت وباقيلي درس وبخلص..
عبدالله وهو يضحك : ههههههه ياحليلج يالمصريه شو ناوية على التسعين؟؟
نورة: هاهاهاي وخر عني ويا راسك وبسك طنازة..
وينزلون هم الاثنين عشان يتريقون ويا شيخة وام محمد (أم شيخة)..
نورة + عبدالله: السلام عليكم ويسلمون عليهم وقعد عبدالله عشان يتريق بس نورة واقفه وعلى اعصابها وتقول:عبوود يالبتامبه بسك اكل ياالله ورانا امتحان..
عبدالله يطالعها بنص عين وهي واقفه على راسه :ورانا امتحان؟ نورو اليوم اخر يوم والله امس ما زخيت الكتاب ههههههههه من الفرحه ماعرفت ادرس..
نورة وشوي وبتصيح : اييييه يالله بسرعه عندي اسئلة حق البنات..
وطبعا عبدالله من النوع اللي يحب يفور دم نورة ويرفع ضغطها: من زود الشطارة وااااههه..
نورة ترقع عبدالله بالكتاب وتقوله: يالله نش جدامي وروحو هم الاثنين كل واحد صوب مدرسته ودعت لهم شيخه وام محمد بالتوفيق..
في مدرسة نورة وعقب ما خلصوا آخر امتحان من امتحانات الثانويه العامه طبعا نورة كانت مستانسه وناسه ما تنوصف حتى انها شوي وبترقص من الفرحه ومرتبشه ويا ربيعاتها اللا محدودات طبعا ماشاءالله عليها كانت اجتماعيه وتحب تكون صداقات وايد سواء في المدرسه او على الانترنت اللي كانت تعشقه بشكل فظيع..
وعد: نوراي فديتج متى بتيين بيتنا؟؟ عاد خلصت الامتحانات وماتقدرين تقولين لا.. (وتغمز لها)
نورة: والله مادري انا شاورت امي وما عندها مانع اني ايي بيتكم بس بشوف متى بفظى..
سلامة :يالله على نورووووه مستويه بزبس ومن اونها عاد.. (كل البنات تمو يضحكون على نورة)..
نورة وهي تضحك: لا بزبس ولا شياته انا بس تعرفين من زمان ماشفت اخواني وعيالهم وولهانه عليهم وااااايد..
وعد: اوكي خلاص يوم بتلقين عمرج فاظيه خبريني وحياج الله في أي وقت..
واتيي من بعيد امنه.. امنه كانت بنت عم نورة وكانت من النوع اللي رافع خشمه فوق وما ينزل عمره وكانت اشطر عن نورة بوايد (الله يخلي المدرسين الخصوصيين (ودايما امها تقارن بينها وبين نورة في كل صغيره وكبيره..
امنه : هاااااااي غيرلز ..
نورة ووعد وسلامة: وعليج السلام والرحمه..
امنه: المفروض تردون علي بهااي (وتضحك هي وشلتها المفلع على قولة سلامة)
جان ترد عليها سلامه: الناس يقولون السلام عليكم يالمثقفه..
امنه وهي تنطش سلامة ولا جنها تكلمت وتطالع نورة بنص عين: الا نورة ما خبرتيني شو ناوية تدخلين؟؟ الجامعه ولا التقنيه.. انا متاكده انه خيارج بيكون التقنيه لانج مممممم ما بتييبين في السبعين..
نورة ساااكته وتبتسم ومن داخلها نار تحرق قلبها واول ما بطلت حلجها تبى ترمس وترد عليها جان تقول سلامة: حبيبتي اللي على راسه بطحه يحسس عليها ونورة بتييب في السبعين وفوق السبعين وبتدخل الجامعه ان شاءالله..
امنة طالعت سلامة من فوق لين تحت: محد رمسج..
وخلاااص قامت الحرب العالميه المعتاده بين سلامة وامنه ونورة ووعد يحاولون يهدون الوضع اما ربيعات امنه فطبعا ماقصروا واقفين يضحكون ..
وعد وسلامة هم اقرب الصديقات حق نورة وكل وحده غير عن الثانيه يعني وعد هاديه وحلوه وناعمه وكل شي تحبه مرتب ومنظم اما سلامة صح انها كانت جميله بعد بس كانت شيطانه وتحب تسوي مقالب في ربيعاتها وما تداني شي اسمه امنه لانها دوم تغلط على ربيعتها نورة وطبعا ما كنت ترضى عليها .
نرجع لبيت ام محمد ..
ام محمد : شيخه فديتج دقي حق نواف شوفيه في أي حزة بيي اليوم من بوظبي؟ عشان تعرفين محمد مستعيل يبانا نسير لهم اليوم قبل باجر
شيخه: ان شاءالله خااالوه الحين بدقله
ام محمد: بارك الله فيج يابنتي.. تبتسم شيخه وتروح تتصل حق اخوها الصغير نواف..
نواف عمره 22 سنة وسيم لاخر درجه طويل وحنطي البشره وعيونه عسليات وبنات اهله مستخفات عليه وخصوصا امنه ..عايش في بوظبي يدرس في التقنيه ويشتغل في نفس الوقت يعني معتمد على عمره قرر انه يطلع من البيت من كثر المشاكل بينه وبين اخوه العود محمد.. ونواف ونورة كانو عيال بو محمد الوحيدين من حرمته الله يرحمها ام نواف ..
رجعت نورة وعبدالله من الامتحان وهم الاثنين بروحهم سووا حفلة في السيارة.. مشغلين الرباش ونورة مستانسه وميته من الضحك على عبدالله اللي يرزف وايوول بالعصا في السيارة وشوي وبيدخل العصا في عين الدريول وطبعا شكله الله لا يوريكم ..وصلو البيت وطبعا يوم دخلو سلمو على شيخه وام محمد ونورة طارت على كومبيوترها وعبدالله راح تلبس وجهز اغرضه وراح وياربعه صوب العزبه لانه كان يعشقها بشكل جنوني ويحب جو البر وهالسوالف ..
نورة طبعا دخلت النت وعلى طول بطلت الماسنجر والمنتدى ودق سوالف ويا سلامة ووعد وربيعاتها اللي متعرفه عليهم من النت وطبعا الخبال على كيف كيفكم.. تدخل عليها شيخه وتقوم نورة من على الكرسي وتحبها على ايدها..
شيخه : اليوم عقب المغرب تجهزي وتلبسي عشان بنسير بيت عمي ناصر..
نورة تستأذن من ربيعاتها على النت وتسكره وتبطل حلجها وعيونها وتقول: لييييييييش؟!!!
شيخه: شو ليش بعد بيت عمج وانتي من متى ما زريتيهم.. كله تتحججين بالامتحانات والدراسه والحين خلاص خلصتوااا ..وبعدين لا تنسين نحن رايحين نخطب امنه حق نواف.. انتي تعرفين انها محيرة حقه من زمان..
نورة بعصبيه: بس يامي انتي ادرى وحده بنواف وانتي تعرفين انه ما يطيقها ولا يدانيها بعيشة الله..
شيخه تنزل راسها: ادري يا بنتي والله ادري بس تعرفين اخوج محمد هو اتفق ويا عمج على كل شي واليوم نواف بيوصل بالسلامه من بوظبي ..
نورة: ونواااف؟؟ يدري عن هالسالفه؟ ا ا اقصد يدري انكم بتخطبونها حقه رسمي اليوم؟
شيخه : ماظني عشان جيه خالوه ام محمد هي بترمسه
وتطلع شيخه من عند نورة اللي تحولت فرحتها بانتهائها من الامتحانات الى غصه وحزن وتذكرت اخوها نواف حبيب قلبها الحنون اللي ما يرفض لها طلب حتى لو طلبت عيونه.. نواف كان يدري بمخطط اخوه محمد ورفض هالشي اللي سواله مشاكل كبيرة بينه وبين محمد ...شو رايكم هل بيتقبل نواف مفاجأة اخوه محمد ونورة شو اللي بيدها تسويه عشان ما تقول حق نواف اي شي يزعله؟!!
"*"الجزء الثاني "*"
بعد ما طلعت شيخه من عند نورة كان حال نورة الله لا يوريكم زعلانه ومتظايجه لانها تعرف ان امنه مب هي المناسبة حق اخوها نواف ..
على طريق بوظبي العين.. نواف كان في سيارته وطاير من الفرحه انه راجع حق دار الزين عشان يشوف اخته نورة اللي وله عليها من الخاطر لانه ما شافها من شهرين.. وولهان اكثر على حب حياته.. وكان يسمع اغنية ميحد (لا تذكرني بحبك ياغناتي.. لا تذكرني بماضيك الجميل.. في صدى ذكراك بجّزر حياتي ..مستحيل احب غيرك مستحيل).. ااااااااه.. طلعت هالآه من قلب نواف اللي كان ومازال ينبض بحب بنت خالته سارة اللي ماكانت تعرف عن شعوره لانه من النوع الهادي واللي مايحب يطلع اللي في خاطره ومحد كان يعرف هالشي الا نورة وطبعا هو ما خبرها بس عرفت هالشي من عيونه كل ما ناظرت سارة يوم اتيي بيتهم .
= = = = = =<في بيت محمد>= = = = = =
محمد وحرمته مريم يالسين في الصاله محمد يقرى الجريده ويشرب الشاي ويا مرته ويدخل عليهم ولدهم الكبير عيسى.. عيسى عمره 21 سنة بس اللي يشوف شكله يقول اكبر من سنه.. طوييييل وعريض وقلبه حنون لاخر درجه..خجووول.. واللي كان يميزه ابتساامته الساحره اللي كانت ما تفاارج ويهه.. كان ملجأه الاول والاخير عمته نورة ..
عيسى : السلام عليكم
محمد+مريم: وعليكم السلام والرحمه هلا بعيسى
مريم : هلا والله بولديه ..شحالك حبيبي ؟
عيسى واونه استحى : بخير يامايه شحالج انتي ؟
مريم : بخير يعلك الخير وما بيكتمل هالخير غير يوم اشوفك معرس واقف على الكوشه
عيسى يضحك : أي معرس واي كوشه يامايه الله يهديج .. انا بعدني صغير على هالسوالف هههههههه
محمد : لا صغير ولا شي ريال شطولك شعرضك وتقول صغير قم يالله قم تراك وايد تتدلع على امك .. وانتي ليش تدلعينه هالكثر ....
محمد عمره 48 سنة قاااسي وقلبه متحجر ما يعرف شي اسمه رحمه.. مع انه عكس ابوه الله يرحمه اللي كان قلبه ما يعرف غير الطيبه ..طلباته اوامر واللي في باله يسويه غصبن عن الكل وطبعا حليلها مريم كانت هي اكثر ضحاياه معاناة لانه كان موريها الويل في معاملته لها.. كلم عمه ناصر بخصوص امنه ونواف من غير مايشاور حد وبالتاكيد انه ما بيشاور ولا بياخذ براي أي حد ..
طلع عيسى متظاايج من بيتهم وماعرف وين يروح غير بيت يده عند عمته نورة.. الكل كان يعتبر نورة ان عقلها اكبر من سنها لان الكل يرتاح يوم يكلمها ويفتح قلبه لها على طووول .
في بيت بو محمد ..
وصل نواف البيت ونورة اول ما شافته من دريشتها نقزت وركضت على الحوش تستقبله.. ونزل نواف وكانت لحظة ولا اروع لوت عليه نورة وهو حضنها بكل الحنان اللي في قلبه وشيخه وام محمد يطالعونهم من دريشة الصاله اللي تطل على الحوش ..
نورة وفي عينها الدمعه : نوااااف والله ولهت عليك وااايد .. جيه شهرين ما تسال عني ولا جني اختك.. وخر عني ماحبك ..
نواف :ههههههههههه يعني انا اللي اموت فيج ...
نورة تصد عنه وفيها ضحكه وصيحه في نفس الوقت ..
نواف: فديت نواري من لي غيرج انا .. تعرفين الامتحانات والشغل وانتي كان وراج امتحانات بعد ..بس هاه بشري شو سويتي ؟
نورة: اول شي دش سلم على امايا شيخه واميي عايشه و بعدين بخبرك وبنسولف على راحتنا ...
دخل نواف وسلم على شيخه وام محمد ..
شيخه : الحمدلله على السلامه نواف
نواف : الله يسلمج غناتي .. هاه شو الغدااا؟؟؟؟
نورة تطالعه بنص عين : ول عليك .. توك واصل وتسال شو الغدا ؟؟
الكل ضحك
ام محمد : هههههههه توك واصل يا ولدي ريح شوي وبنحط لك الغدا ..
نواف يحب راس ام محمد : ان شاءالله يا ااغلى ام في هالكون ..
كانت ام محمد هي اللي ربت نواف يوم كان صغير وكان يعتبرها انه هي امه الصدقيه
نواف : نواااري .. تعالي غرفتي عشان تخبريني شو سويتي في امتحاناتج ..
نورة : حاضر يافندم جااايه على طوووووووووول
تمو كلهم يضحكون على نورة.. وطلع نواف فوق عشان يريح من الطريق وقبل ما تلحقه نورة يوم تاكدت انه دخل غرفته سالت شيخه ..
نورة : امايا امايا .
شيخه : هاه غناتي بغيتي شي؟
نورة : هيه ليكون بتخبرين نواف الحين ؟؟؟
شيخه : لا انا قررت اني اخلي امي هي اللي تخبره تعرفين هي اللي تمون عليه ..
نورة تطالع ام محمد واللي كانت تزقرها امي ..
نورة : امي دخييلج لا تقولين له دخييلج رمسي محمد وقوليله ياجل هالشي
ام محمد : نورة يابنتي انتي ادرى باخوج محمد يوم انه يصر على الشي او يحط في باله شي .. ما يحط حساب حق أي حد ...
نورة : بس ...
ام محمد :بس شو يا نورة ؟؟
نورة تطالع شيخه وتطالع ام محمد بنظرات حزن ..
نورة : ماشي خلاص .. سوو اللي تشوفونه ..بس انا اقولكم من الحين اذا طلع نواف من البيت وما رد له عرفو ان محمد هو السبب وانا ما بسامحه على هالشي .
وتربع نورة على الدري رايحه صوب غرفة نواف وحصلته يتسبح في الحمام وتمت تترياه لين ما يطلع ويوم طلع بينت له انه مافي شي وتمت تسولف له عن الامتحانات وعن ايام الدراسه والسهر هي وعبدالله وتم نواف يضحك عليهم ..
في نفس الوقت دخل عيسى بيت يده وسلم على يدته وعمته شيخه وعلى طول طلع فوق يوم درى انه عمه نواف هنيه عشان يسلم عليه ولقاه هو ونورة يالسين يضحكون ويسولفون .
عيسى : وانا اقووووووول ليش منورة العين اتاري النور كله هنيه ..
نواف : ههههههههه بس عاااد عن الحركات ...
عيسى يسلم عليه وعلى نورة ويقعدون سوالف وضحك بس نورة حست انه عيسى في خاطره شي وياي عنده سالفه ....
= = = = = =<في بيت ابوطارق .. العم ناصر >= = = = = =
الكل كان يتجهز وامنه كانت تنتظر هاليوم بفارغ الصبر انهم يخطبونها حق نواف وترفضه بس عشان تحرق قلب نورة وتحرها.. بس هي ماكانت تدري انه نواف رافض هالشي وحاطه في بالها انه ميت عليها ....
ام طارق: امنه فديتج يالله قومي تجهزي الحين بيوون بيت عمج احمد
امنه: امايا ترى انا ما بطلع الا يوم يطلبون هم وبفكر بعد ..
ام طارق تطالعها بنظرة يعني هيه صح وايد : انزين يالله اشوف جدامي تراج وايد مصختيها.. بفكر اونه.. شو تبين يقولون عنا العرب هاه ... لا لا انتي شكلج ناويه على شر
امنه وهي تضحك بخبث : ههههاااااااي لا ناويه ولا بنوي وانتي بتشوفين اللي بيصير ...
طارق : امووون اموووون
امنه وهي خايفه : لبيه هلا طارق
طارق بعصبيه : قولي والله بس انتي؟ العرب بيوون وانتي واقفه تتضحكين جيه ..وبعدين كم مرة قايلج لا تضحكين هالضحكه الشينه فشلتينا .. صوتج واصل برى
امنه تنزل راسها وهي خايفه ولا نطقت بكلمه وحده ..
طارق اخو امنه الكبير عمره 25 خاطب بنت خالته نوال وطبعا كانت بينهم قصة حب.. طارق شديد وااايد ويا خواته امنه ومها اللي اصغر عن امنه .. بس طيب ويا حبيبة قلبه نوال ومايرضى عليها أي شي ..
= = = = = =<نرجع لبيت بو محمد>= = = = = =
طلعت ام محمد فوق عشان ترمس نواف في السالفه وطلبت من عيسى ونورة انهم يخلونهم بروحهم بس بطريقه غير مباشره.. طبعا هم فهمومها على الطاااير .
نواف يطالع ام محمد : امايا ...خير شو بلاج ؟؟؟
ام محمد : ماشي يا ولدي بس حبيت ارمسك في سالفة
نواف: خير ليكون فيصل ولا حمد فيهم شي ؟؟؟
ام محمد : لا لا مافيهم الا العافيه بس بغيت اقولك ان اليوم عقب المغرب بنسير بيت عمك ناصر ...
نواف وهو منصدم : بيت عمي ناصر ؟؟؟
ام محمد وهي خانقتها العبره: اخوك محمد اتفق وياهم على كل شي واليوم بتسير تشوف امنه
نواف : لالالالالا محمد يباله حد يوقفه عند حده ..
ام محمد : لا تقول جيه هذا مهما كان اخوك العود وفي مكانة ابوك الله يرحمه
نواف بعصبيه : في مكانة ابوي !! في مكانة ابوي ويبى يدمر حياتي
ام محمد والدموع تنزل من عينها : هو ما يبالك غير السعاده
نواف: أي سعااده هاي أي سعااده .. !!!!
ام محمد : بس يا نواف لا تسوي بعمرك جيه.. واسمع رمسة اخوك العود وطيعه ..
نواف وهو معصب وخلاص وصل حده : امايا اذا ماتبيني ارجع البيت مرة ثانيه بطيعه وبسوي اللي يباه
وطلع نواف من غرفته وهو معصب.. نورة وعيسى طلعو من الغرفه على صوت صراخ نواف.. نورة حاولت توقف نواف لكن هو شل ايدها من على جتفه وطلع صوب سيارته ..
نورة وهي تهدي ام محمد :امي خلاص خلاص هدي شوي ..
عيسى واقف مايعرف شو يسوي ..
نورة تصرخ عليه : عيسوووه الحق نواف شوفه وين بيسير دخييلك بسرعه بسرعه يالله
نواف ركب سيارته مب عارف وين يروح ويدوس الريس ويطلع بسرعه من البيت ..
ويركب عيسى سيارته ويلحقه وهو مرتبك ومب عارف راسه من ريوله ويلحق على نواف وياشر له يوقف له عند الدوار ..ويوقف نواف وهو خلاص ويهه مستوي احمرر من كثر ما هو معصب ..عيسى ينزل من سيارته ويسير يركب ويا نواف ..
عيسى : بلاك جيه ؟؟؟ شو استوى !!!
نواف ساااكت ومايرد عليه .....
عيسى : نواف .. شو قالتلك يدووه ؟؟؟ شو مستوي ؟!! ليكون عشان الدوام ل.....
يقاطعه نواف :ماشي .. ماشي خلاص .... يالله انزل وارجع بسيارتك انا الحين برجع البيت ..
عيسى وهو مب فاهم السالفه ..: !!!!!!!!
نواف يطالعه وبعصبيه : يالله انزل..
نزل عيسى وركب سيارته ورجعو اثنينتهم لبيت بو محمد
ام محمد كانت تصيح وخايفه على نواف لا يستوي فيه شي وشيخه ونورة يحاولون يهدووونها.. اما نورة فكانت تتقطع من داخلها وخاااااايفه على اخوها عن يستوي فيه شي ..
يدخل عليهم نواف وتقوم ام محمد وتلوي عليه وهي تصيح بحرقة..
ام محمد : نواف دخيلك عشان خاطري اسمع كلامه هالمرة ولا تعاند ...
نواف : ان شاءالله يامايا انشاءالله بس عشان خاطرج انا بسير وبشوف شو نهايتها ويا محمد
عيسى كان واقف وعرف ان ابوه في السالفه وقال في خاطره : الله يعينك يا نواف .. الله يعينك على اللي بييك من ابوي ..
نورة طالعت نواف وقالت : نواف .. وقبل ما تكمل ..
قطع نواف رمستها وقالها : سيرو يالله كلكم تلبسو عقب صلاة المغرب بنسير بيت عمي ناصر.
الكل استغرب من تصرف نواف واولهم نورة اللي قالت في خاطرها.. خلاص اخوي ناوي على عمره بالهلاك دام انه بيوافق على بنت عمه .. وبيتخلى عن حب حياته ساره..
= = = = = =<في بيت الخاله وديمه >= = = = = =
جواهر : ساااره سويييييييييييييييره بطلي الباب ..
جواهر اخت سارة الكبيرة عمرها 23 وتشتغل في بنك وكانت تبين من تصرفاتها الطايشه انها اصغر عن سارة بعشر سنين مع ان الفرق بينهم بس 3 سنين
سارة: جوااهر حرام عليج .. ما تخلين الواحد في حاله .. خليني ابى ارقد .. جلبي ويهج
سارة عمرها 20 سنة وطالبه في السنه الثانيه من جامعة زايد.. كانت معروفه بطيبتها وبجمالها الفتان وبهدووئها الواضح ..
جواهر : بسررررررررعه بطلييييي بخبرج شي
سارة تقوم وتقول في خاطرها : امري لله .. مافي مفر منها
بطلت الباب وقالت : خير شو صاير؟
جواااهر: صباح الخير يا مدلل
سارة بكل برود : والله انج فايجه ..الحين هذا هو الشي اللي تبين تقولينه حقي؟ اقول بس خليني ارجع اكمل رقادي ..وترجع سارة وتتلحف مرة ثانيه
جواهر تمت تلعب بشعر ساره وتغلس عليها.. وقالت: ساروووه تعرفين انه ولد خالوه نواف بيخطب بنت عمه امنه اليوم؟
سارة مستغربه :!!!!!!!!!!!!!!!!
جواهر: هيه بلاج جيه تطالعيني ؟ اليوم بيسير بيشوفها وبيتفقون على كل شي
سارة تنش من مكانها : بس نورة قايلتلي من قبل ان نواف ما يبا امنه
جواهر: والله يباها ما يباها مشكلته.. تعالي انتي ليش تسألين ليكون حن قلبج وطلع الحب اللي كان مستخبي ههههههه
سارة تضرب جواهر بالمخده : سخييفه يالله جلبي ويهج وخليني اكمل رقااادي
جواهر طلعت من الغرفه وهي تضحك على اختها وهي طالعه شافت اخوها الصغير مايد وهو يلعب وطبعا ما خلته في حاله هههههههه غلست عليه لين ما قالت بس
مايد وهو يصيح : ابى كورتي يالحراميه ..
جواهر وهي خاشه الكورة ورى ظهرها : اي كورة؟؟
مايد : جواااهر بخبر عليج ماما
جواهر عطته الكورة ولوت عليه وهي تضحك : فديتك انت والله انت الوحيد اللي مستحمل خبالي في هالبيت
وتمو يضحكون هم الاثنين ,,,
: اووووهوووووو شو هالحشره ؟؟؟
جواهر سكتت ورفعت راسها : صح النومّ
فهد: صح النوم هاه .. اي نوم انامه وانتي واعيه جنج ينيه .. حرام عليج علي دوام الليله خليني ارقد شوي
جواهر تمت تضحك على اخوها فهد اللي سكر باب غرفته ورجع ينام .
فهد اخو جواهر وسارة وعمره 22 كبر نواف بالضبط وله نفس الصفات الشكليه ونفس طباع نواف بس كان شوي جريء.. كان جماله يلفت النظر في اي مكان يكون هو موجود فيه لانه بدون ما يكشخ كان حلو وشكله كشخه ..جواهر وسارة كانو دااايما يغايظون نورة فيه ويطلعون نكت عليهم وهي تضحك عليهم لانهم من سنة اكتشفو انها تحبه ومخبيه هالشي في قلبها ومب طايعه تخبر حد وهي الحين تقريبا نست هالحب عقب ما عرفت ان فهد مب هو الانسان اللي بيفهمها وتفهمه لانه صعب المنال وتفكيره صعب شوي ..
= = = = = = < في بيت العم ناصر >= = = = = =
كانو الريايل في الميلس عمهم ناصر وعياله طارق وسلطان اللي كان بعده في ثاني ثانوي وسعد اخر العنقود اللي عمره 12 سنة ومن بيت بو محمد كان محمد حاضر وعياله عيسى وخالد الاصغر عن عيسى بسنتين واخو محمد الوسطاني فيصل عمره 38 اللي كان ماشي اطيب منه والكل يشهد انه وارث طيبته من ابوه وكان ياي ويا حرمته وبناته واخوهم الثالث حمد وعمره 27 سنة اللي متزوج من كم شهر وطبعا نواف اللي كان قاعد وساكت ولا جنه هو المعرس وكلهم يتفقون شو بيسوون والميلس مستوي حشرة ماشاءالله لان الكل كان يرمس ..
بوطارق: شوف يا بوعيسى المهر وهالسوالف خلو الحريم يتفقوون على هالاشياء ..
محمد: والله كل اللي تامرون فيه نحن حاظرين ..
بوطارق: هاه يا نواف شو قلت؟
نواف سرحان وسااااكت.. جان يدزه عيسى ويقوله : اييه عمك يرمسك
بو طارق يضحك : المعرس مب ويانا.. هاه شو الراي ؟
نواف : اسال بو عيسى الراي رايه والشور شوره
الكل لف على محمد وطالعه بنظرة وعرفو ان نواف مغصوب على هالشي واولهم فيصل اللي كان محمد مفهمه ان نواف موافق وماعنده أي مشكله ..
محمد وهو مرتبك: افا عليك يا نواف عمي يسالك عن رايك مهما كان انت المعرس ..
نواف: مادري اللي تشوفونه سووه
طارق يهمس في اذن حمد : بلاه نواف؟ متظاايج من شي؟
حمد : والله علمي علمك ....بمكن محمد مسمعنه كم كلمه
بوطارق عرف انه في شي بس ماحب يظن ظن السوء : خلاص عيل توكلنا على الله والملجه الخميس الياي
نواف هنيه كان خلاص خانقته العبرة ويقول في خاطره : الله يسامحك يا محمد الله يسامحك
وعيسى يالس يطالع عمه وما بيده حيله انه يسوي شي ..
= = = = = = < في ميلس الحريم >= = = = = =
دخلو الحريم وسلموا على بعض وكانت نورة يالسه تسولف ويا مها اللي كانت عكس اختها امنه في كل شي ونورة كانت متغصصه وشوي وبتنفجر من الصياح عليهم بس كانت تسوي عمرها انه عاادي وانها فرحانه ..
ام طارق تطالع نورة بنص عين وهي تنغز فيها : اقوول الا نورة بعدها ما انخطبت؟
ام محمد : لا بعدها والله ..
شيخه : بعدين نورة بعدها صغيره على العرس والمسؤوليه..
ام طارق: لا صغيره ولا شي .. هي بس تتدلع شوي
نورة تطالعها وتقول في خاطرها .. يااا ربيي انا المينونه اللي ييت
مها تهمس في اذن نورة : ماعليه نواري انتي تعرفين امي وحركاتها استحمليها شوي ..
نورة : لا عادي فديتج .. خلها تاخذ راحتها ..
ام محمد وهي تحاول تغير السالفه : هاه عيل وينها العروس نبى نشوفها ..
ام طارق وهي تبتسم : ان شاءا لله الحين بتنزل .. يا مها
مها: لبيه
ام طارق : سيري زقري امنه خلها تيي تسلم على الحريم
مها: ان شاءالله الحين بسير
= = = = = = < في غرفة امنه>= = = = = =
مها: اموون غربلج الله !! ليش ما تلبستي ولا تعدلتي؟؟
امنه بكل دلع : هههههه كيفي
مها: اييه الحريم تحت يتريوونج من الصبح ... يالله بسرعه تلبسي ونزلي
امنه: ما هموووني ..
مها معصبه ومبطله الحلج ... سكتت ونزلت وخبرت امها باللي صار.. امها استاذنت من الحريم اللي حسوا انه في شي وخصوصا نورة اللي كانت حاطه في بالها ان امنه بتنقز من الفرحه وبتيي تربع عند الحريم.. وسارت تقنع امنه بس للاسف ماطاعت وقال حق امها انا ماباه ومب موافقه
ام طارق: ياللي ما تستحين على ويهج ..عيل يوم ابوج سالج ليش قلتي انج موافقه هاه؟ وين اودي ويهي الحين وين اوديه؟؟!! انتي تبين نوروه تتشمت فيج؟
امنه وهي تضحك باستهزاء وجنه العيد: يامايا عادي غيرت رايي ولا ما يحق لي اغير رايي؟! وبعدين انا ما غيرته الا عشان احرق قلب نورة اللي الكل ميت عليها.. مادري على شو والله انا احلى عنها بمليوون مرة واحسن عنها بعد ..
ام طارق: حسبي الله ونعم الوكيل فيج.. حسبي الله ونعم الوكيل ..انتي ما ينفعج غير اخوج طارق ..
وهنيه امنه عاد ماتت من الخوف وحست انها بتاخذ نواف غصبن عنها.. لانها تعرف انه اخوها ما عنده ون تو على طول بالعقال.. بس حاولت تجمع قوتها وتواجه اخوها ..ونزلت ام طارق وزقرت طارق من الميلس وخبرته.. طلع طارق حق امنه يتفاهم وياها
وفي هالوقت كان نواف سرحان في عالم ثاني.. يفكر ويقول: هاي اخرتها يوم اني غبي وماعرف اتصرف لو اني قايل حق فهد هذاك اليوم اني ابى سارة جان ما كنت يالس بينهم.. ويقطع تفكيره اخوه فيصل ..
فيصل : نواف
نواف : هلا فيصل
فيصل: نواف انت موافق على اللي يصير ولا محمد مدبر كل شي بروحه؟
نواف طالع فيصل بنظرة انه كلامه صح وسكت ..
فيصل: انا كنت عارف انه يبى يمشي اللي في راسه وما بيسوي حساب حق أي حد.. بس انت ليش ما خبرتنا من قبل الله يهديك؟
نواف وهو متظايج : انا توني اليوم رجعت من بوظبي وخبروني السالفه ..
في نفس هالوقت طلع طارق يتفاهم ويا امنه ..
طارق: شو هاا اللي اسمعه من امي؟
امنه:...... ساكته وهي خايفه
طارق: صح اللي سمعته ولا لا؟؟؟
امنه وحاولت تبين قوتها على طارق: هيه صح الكلام اللي سمعته
طارق يطالعها وهو خلاااص شوي وبيذبحها : انتي شو بلاج؟ هاه تبين تفظيحناااااا .. هاااااه
امنه: طارق دخيلك انا فكرت وخلاص مابى اخذ نواف ..
طارق: اصلا نواف ريال ما ينعاب وكامل مكمل وكل بنية تتمناه .. بس انتي مالت عليج تبين كل شي غير عن الناس ...
امنه : يعني شو بتغصبووني عليه؟
طاارق سكت وطالعها من فوق ليين تحت وطلع عنها ..نزل طارق عند الريايل وزخ ابوه على طرف وخبره.. ابوه كان وايد مدلع امنه لاخر درجه وما يرضى عليها اييي شي ..
بوطارق حق طارق : خلاص برايها
طارق وهو منصدم : شووووه !! ابويا شو هالرمسه وقوم عمي ؟؟
بو طارق : ماعليك انا بتفاهم وياهم كله ولا امنه ..
طارق: بس يا بويا ...
بوطارق: لا تيلس تبس بس لي الحينه يالله طوف طوف جدامي..
طارق منقهر من امنه اخته ومن تصرف ابووه اللي مدلعها زياده عن اللزوم وهالدلع قااهر طارق وااايد ..
نرجع حق نواف وفيصل ..
نواف: ااه يا فيصل مادري شو اسوي الحين مادري .. ماباها والله ماباها ..
فيصل:لا اله الا الله ..لا اله الا الله .... والله مابيدي شي اسويه الحين يا نواف..
حمد يتدخل : نواف .. فيصل.. خير شو صاير!!
فيصل : استوى اللي كنا خايفين منه يا حمد
حمد: لاا حوووووول .. بعده محمد حاط دوبه ودوبك .. والله اخاف يسويلك نفس سالفتي ويا فاطمه
حمد تزوج فاطمه غصبن عنه لان محمد عرف انه يحب وحده غير وحلف امية يمين انه ما يتزوجها.. وزوجه حق فاطمه (مرته حاليا) وهي اخت مريم مرته وطبعا سار خطبها حقه بدون ما ياخذ رايهه وحمد ما يقدر يقوله اي شي لانه اخوه العود مهما كان وهو من النوع اللي يسكت عن حقه دايما ..
محمد شافهم متيمعين وقال اكيد عندهم سالفه ويتفقون علي (الحمدلله والشكر شاك في نفسه) وحاول انه يلفت الانتباه ..
محمد: انزين يا عمي عيل خلاص الملجه الاسبوع الياي ان شاءالله
بوطارق مب عارف شو يرد عليه وطبعا هو ما يرضى على بنته انها تاخذ واحد غصبن عنها حتى لو كان ولد اخوه ..
محمد: !!! عمي ناصر شو قلت ؟؟
بو طارق: والله يا محمد.. ماودي نستعيل بالملجه لين ما البنت تشوف نواف ونواف يشوفها واذا عيبته وعيبها يصير خير.. وتعرف انه ماودي اظلم حد بهالزاوااج ...
الكل انصدم من كلام بو طارق.. واولهم نواف اللي شوي وكان بيقوم بيحب راس عمه ويلس يدعي في خاطره انها ما توافق عليه ومحمد اللي نزل عليه كلام عمه مثل الصاعقه.. وحاط في باله ان عمه عقليته نفسه وما بياخذ براي البنت.. بس طلع بو طارق راعيها
= = = = = = < نرجع حق ميلس الحريم >= = = = = =
ام محمد حست ان في شي: ام طارق فديتج خلي امنه على راحتها اذا ما تبى تنزل اكييد مستحيه وهذا شي عادي ..
ام طارق : لا بس امنه شوي تعبانه من الامتحانات تعرفين اليوم كان اخر يوم و..
شيخه : برايها يالغاليه ماعليه برايها ..
ويتصل عيسى بتلفون امه مريم ويخبرها انهم يتريونهم برى ..ويستاذنون الحريم والريايل .. وكل واحد يروح بيته ...
= = = = = = < في بيت بو محمد>= = = = = =
نواف كان في غرفته ودخلت عليه نورة ...
نورة : نواف ..
نواف رفع راسه وعيونه كلها حزن وشكله كااااان تعباااااااااااااان
نورة: نواف .. ليش وافقت على اللي استوى اليوم وطعت محمد ؟
نواف يطالعها ويعني هو ما فهم شو قصدها ...
نورة تكمل: وسارة ؟؟
نواف بطل عيونه على الآخر وكان قلبه شوي وبيوقف ..
نواف: بلاها سارة؟ شو صاير؟
يا ترى شو بتخبره نورة عن سارة؟؟.. وشو بيكون موقف امنه.. تعتقدون ان طارق بيغصبها انها تاخذ نواف؟ ونواف شو موقفه من كل اللي يصير؟!!
"*"الجزءالثالث"*"
نورة: بسم الله عليك يا نواف شوبلاك نقزت في ويهي جيه مرة وحده ..
نواف: اقووولج شو بلاها سارة .. يالدبه شو صاير؟؟!
نورة وهي مستغربه من تصرفه وهي اللي حطت في بالها ان نواف نسى هالشي بس حبت تجس النبض: ما بلاها شي .. بس انت ما تباها ؟
نواف طالعها بنظرة وانسدح على شبريته : يعني انتي حق شو تبين توصلين ؟
نورة وهي تضحك: والله انك حركات انت وهي كل واحد يكابر على الثاني ..
نواف فز من مكانه ومسك نورة من كم بجامتها وهي تحاول تنش : ليش شو قالت عني ؟
نورة تضحك وتطالع السقف تبى تفور دم نواف
نواف : نورووه بتخبريني ولا افرج من الدريشه الحين !!
نورة: ههههههههههههه عشان اسويلك خندق هنيه في البيت
وتمت تضحك وهو خلاص يبى يضحك بس يبى يعرف سارة شو قالت عنه ..
نواف: نوراااي دخيلج خبريني يالله عاد ..
نورة وهي مبتسمه ابتسامه خبيثه هاها: هي كانت تمدحك هذاك اليوم ..
نواف وخلاااص قلبه يدق بسرعه بسرعه: أي يووم بالضبط ؟؟؟؟؟
نورة : تذكر يوم عزمونا على حفلة جواهر وكلنا روحنا دبي ..
نواف تذكر هذاك اليوم انه شافها بالصدفه بس هي ما كانت تدري وكانت ما شاءالله عليها تسكت من جمالها وتولع بحبها زياده.. وسرح وتم يتذكر هذيج اللحظة اللي ما فارقت ذاكرته..
نورة : حوووووه وين سرحت ..
نواف انتبه وتم يضحك على عمره : انزين نواري شو قالت عني بالضبط ؟
نورة : مممم ماشي قالت ماشاءالله عليه نواف كبر واستوى ريال ولا جنه كنا نلعب مع بعض يوم كنا يهال ..
نواف هنيه خلاص استااانس من الخاطر ولا جنه توه متنكد من سالفة خطوبته.. وابتسم
نورة : ايواااااا شعليييييييك مدحوووك يا نواف ههههههههه
نواف: ههههههه الله يغربل ابليسج يا الدبه ..
نورة وهي تبتسم : نواف .. والله لو ادري انك تحبها كل هالحب جان خبرتها ....
نواف: نورااي جب ولا كلمه انا ماباها تاخذ عني فكره غلط ..
نورة : ههههه ليش انت بنت تفكر جيه وياراسك ..هههههههه صدق انك سالفه اصلا كلنا نعرف ..
نواف وبطل حلجه : هاااه شوووه؟ مننو يعرف؟؟ ليكون سارة تعرف؟
نورة وهي بعدها تضحك عليه : ههههههه لا ما تعرف بس حست بهالشي لانه جواهر شكلها تعرف هالشي هههههههه
نواف وبانت عليه الراحه : ياااويلج اذا خبرتيها يا نوروووه .. فهمتي ؟
نورة : انا ابى اعرف ليش ما تباني اخبرها ..
نواف حاول يتهرب: نورااي انا اخاف انها تعرف وبعدين تكون حاطه في بالها اني شرات اخوها ...
نورة وهي ما استوعبت شي ..
نورة : نواافوووو ايييه شو يالس تخربط انت الظاهر خرفت يوم خبرتك انها مدحتك ههههههههه
نواف دزها من على الشبريه : هههههههههه يالله يالله سيري رقاد
نورة : هين يا نوافووو تخبي علي انا .. ماعليه ماعليه مابكون دبووه اذا ماطلعت الرمسه من عيونك ..
نواف: انزين يالدبه تصبحين على خير ويالله رقااد مب على النت فااهمه ..
نورة بمكر : اسفه ههههههه المنتدى في انتظاااري نياااهاااا ههههههههه
وتطلع نورة من عند نواف وهي تضحك وهو في عالم ثاني.. سارح بفكره بعيييييييد ويفكر في سارة .. وفي نفس الوقت خايف انها تعرف بحبه وترفضه لانهم رابين مع بعض وبينت له اكثر من مرة انها شرات اخته بدون ما تعرف انه هالشي بيجرحه او بيعذبه من داخل ..
نورة راحت ويلست على النت وطبعا الاخت مشتطه في المتندى وفي الماسنجر ويا ربيعاتها اللي كل وحده حاطه اواي وتحاول ترمسهم وتغلس عليهم ..نورة كانت لها شعبيه واااسعه في المنتدى والكل يحبها ويموت على سوالفها الللي تضحك وكانت تمووت على حل مشاكل غيرها وكان لها فترة ما دخلت المنتدى ..كان وياها في المنتدى مرااقب كان دايما حاط دوبه ودووبها واسمه جرح الزمن (طبعا نك نيمه) ودايما يرفع ضغطها ودايما يطلع عنها مواضيع تضحك بس هي كانت تضحك دايما عليه وترد عليه برد احلى واقوى هههههه.. يوم دخلت المنتدى انصدمت وحصلت انه مطرشلها رساله خاصه.. وكانت اول مرة يطرشلها رساله خاصه لانه معروف بين الاعضاء انه مستحييييل يطرش أي رساله خاصه او انه يعطي ايميله حق اي حد.. المهم كان محتوى الرساله كالآتي ..
(السلام عليج اختيه قطوه ..شحالج؟ عساج بخير!! والله خوفتينا عليج يوم انج غبتي جيه مرة وحده.. عاد قلنا درسي حق امتحانات الثانويه عامه عيل حق امتحانات الجامعه شو بتسوين هههههه.. اتمنى انج تكونين بخير وتردين لنا سالمه..اخوج جرح الزمن) ..
نورة منصعقه وترمس عمرها بصوت عالي: ول!! جرح الزمن مرة وحده ههههههههه اكيد هاي خدعه منه عشان يطلعني مصخره في المنتدى بس ماعليه بكون احس منه وبسوي عمري عااادي ..ردت نورة على رسالته برساله كان محتواها ..
(تسلم اخوي جرح الزمن على الرساله اللي صدمتني شوي وفرحتني وايد بسؤالك عني في غيبتي ..انا رجعت حق المنتدى واتمنى اشوف مواضيعك الحلوة .. وهاااه لا تنسى تنافسني في المواضيع خخخخ.. اختك قطوة)
جرح كان موجود في المنتدى واستغرب من ردها اللي شافه في نظره انه ناعم وحلو واللي دل على ذوق نورة وعلى شخصيتها المرحه وشوقه اكثر انه يتعرف عليها اكثر واكثر لانه اعتبرها غامضه وايد عقب رسالتها.. وهو ما كان متوقع هالرد منها لانه من ردودها الدفشه على مواضيعه حس انها دفشه وطاايشه شوي هههه..
في نفس هالوقت نورة كانت تتريا رده وهي محترقه وتتحرقص هههههههه وتقول في خاطرها يالله رد يعلك .. يالله يالله
ورد عليها برد احلى وهي من صوب ثاني ترد ويتبادلون الرسايل الخاصه وطلعو هم الاثنين من المنتدى وكل واحد عرف شي بسيط عن الثاني.. وحتى انهم ما تبادلو الايميلات ..
طلعت نورة من النت وهي رايحه فيها من النوم والتعب.. بس تمت تفكر وايد في جرح الزمن وقالت يا ربي شو سالفته.. من كلامه في الرسايل حسيت ان وراه سالفه.. الا اعرفه لكن رجعت وتعوذت من ابليس وقالت: بلا لقاافه هههههه وضحكت على عمرها ورقدت ..
اليوم الثاني اول ما بطلت نورة عينها لقت ويه عبدالله في ويهها وقالها : بووووووووووو
عاد هي من الخرعه قامت وكفخته على عينه وتم يضحك عليها
عبدالله : يالدبه يالله بلا كسل نشيييييي اباج تخبريني شو استوى امس .. امي تقول استوت اشياء واشياء ..
نورة وهي تصرخ وحاطه المخده على راسها : اطلع برىىىىىىىىىىىىىىىىىىىىىى
عبدالله : ههههههههههههههههه لا ما طلبتي شي انا تام هنيه على راسج لين ما تقومين يالله بسرعه
نورة وهي تطالع ساعتها وكانت 9 الصبح : حرااام عليك يالظالم .. ابى انااام اليوم الجمعه
عبدالله : محد قالج تبققين عينج في الكمبيوتر امس .. يالله نشي ترى هاااه ما بنوديج العزبه ويانا ..
نورة وهي فازة من شبريتها :انزييييين افف الحين بنش ..
نورة كانت تموت وتسير العزبه لان خبالها هي وعبدالله كله يطلع وهم هناك المهم قامت نورة وتبلست وصلو الظهر ومشوا سيارة الدريول وسيارة اخوها نواف ولحقوهم هناك اخوانها فيصل وحمد وطبعا محمد كان نحيس وما كان يروح هالاماكن واذا راح ينكد عليهم كالعاده ....
نورة كانت مشغوله ويا بنات اخوها فيصل ..نور وعمرها 10 سنين وفوز اللي عمرها 8 سنين وخلود الي بعدها ما كملت الا سنه ونص .. وطبعا هذيلا كانو بنات فيصل اللي الله ما ارزقه غيرهم ..عبدالله كان يسوق البانشي على العراقيب وكل شوي يركب حد بالدور وطبعا ذل نورة لين ما خلاها تركب ..
نواف وفيصل وحمد كانو يالسين يشربون القهوه وكان هذا حال ا لحريم بعد اللي كان ناقص قعدتهم مرت محمد مريم المسكينه ..
فيصل يسال نواف : اقووول ترى عمي شكله ناوي يكنسل وما يعطيك بنته امنه ..
نواف: والله ابركها من ساعه ... محد بيرتاح غيري
فيصل:ههههه ول لهدرجه ماتدانيها ...
نواف : مب اني ما ادانيها بس يافيصل محمد يبى يغصبني على البنت وانا ماباها
حمد يدزه : عيل منو تبى هااااه !!
نواف ابتسم وسكت ..
فيصل : الله يغربل ابليسك يا حمد ههههههههههه اكيد ما بيخبرك ..
وتمو الشباب ينكتون ويضحكون ومن بعيد شافو سيارة عيسى وكان عيسى يستانس على قعدة اعمامه وعماته ويلسوا سوالف .. طبعا محمد ماكان يدري لانه لو يدري جان راحو فيها كلهم .
نورة يت عندهم وسلمت عليهم : السلام عليكم يا جماعه ..
الشباب: وعليج السلام هلا والله بنواااري
عيسى: نواااري شو بلاها عيونج حمر جيه ؟
نورة وهي تحك عيونها : هذا كله من عبود يالس ويفحط علينا وياراسه هههههههه
كلهم تمو يضحكون على شكلها ..
فيصل: ويين بناااتي ليكون صار فيهم شي ..تراني بجلبه هو والبانشي ماله
حمد: لا اذا بتجلبه بروحه اوكي بس البانشي لا الله يخليك هذا انا ماخذنه حقه هههه
نواف:ههههههههههههههه لا لا هذا ماخذنه انا وياك شراكه ههههه
نورة: شراكه اونه ههههههه تقول عقار ولا عمارة ..
نواف: سكتي بس انتي ما تعرفين شي باجر يوم تكبرين بتتعلمين .. هاي سوالف كبار خخخ
نورة: فديتني كبيره اجنن وعمري 18 شو مب ساده عينك انا
فيصل يطاالعها ونظرة ابوه في عينه : يالله نورة كبرتي وصرتي حرمه وين امج وابوبي يشوفونج ..
ساد الصمت بينهم كلهم ونورة ابتسمت
عيسى : وااااااااااااااههههههه طاعو شكلها اونها استحت
نورة: ويا ويهك عيسووووه ههههههههه فديتني خجوله
وضحك الكل وكااااان الجو روعه واللي زاده روعه يمعتهم والوناسه اللي هم فيها ..
عيسى: نوراي بغيت ارمسج شوي
حمد: طااااعو هذيلا اونهم اسرار بعد .. انتو شو عندكم هاه ؟!!
نواف:هههههه خلهم هذيلا بلاك صاير جيه ملقوف ههههههه
فيصل:ههههههه هيه والله انك ملقوف وانا اشهد
حمد مب قادر يتكلم من الضحك وياشر على نورة وعيسى يعني يالله سيروا برايكم.. راحو نورة وعيسى ويلسوا بعيد شوي عنهم ...
عيسى: نوااري
نورة: عيسوه شو بلاك؟
عيسى: ابوي...
نورة : لا حول ولا قوة الا بالله ... شو بلاه ابوك ؟؟؟
عيسى: معتبرني واحد ماله أي راي ولا شخصيه في البيت..
نور: يعني انت ما تعرف انه ابوك عمره ما عبر حد .. تتذكر يوم زوج حمد حق خالتك غصبن عنه
عيسى وهو منزل راسه وكل اسى وحزن : نواااري خلاص انا قررت اني اطلع من البيت
نورة وهي مبطله عيونها : شووووه؟
عيسى: هيه اللي سمعتيه بطلع وبيي بسكن في بيت يدي ليين ما اخلص الجامعه وبعدين بسير بوظبي عند عمي نواف وبشتغل هناك.. وافتك من ابوي وصدعته
نورة: يا عيسى استهدي بالله ترى ابوك جيه وبيتم جيه طول عمره ويوم انت بتطلع من البيت هالشي ما بغيره وبالعكس بخليه يعاند اكثر واكثر ..
عيسى : والله ما يهمني بس...
نورة: وامك يا عيسى وامك ؟؟
عيسى: والله محد يغمضني غير امي هالمكسينه اللي متحملتنه ..
نورة: عيسى امك واايد تحبك وانت اكثر واحد من عيالها يقعد وياها ويفهمها عدل وين بتسير وبتخليها بروحها هاه ؟؟
عيسى وهو محتار : والله ماعرف والله ماعرف شو اسوي
نورة تحط ايدها على جتفه: عيسى صل على النبي واتعوذ من ابليس واتحمله هذا مهما كان ابوك ومهما سويت بيتم ابوك فهمتني وفكر في الناس اللي يحبوونك قبل اي شي؟
عيسى: ان شاءالله .. مشكووره نواااري والله مالي غيرج في هالدنيا انتي وامي ..
نورة والضحكه شاقه الويه : افا عليك عيسووووه انا حاظرة في أي وقت
عيسى يمزح: اونها عااد تشققت هههههه
نورة:هههههههههههههه كيفي ههههههههههههه
في بيت العم ناصر.. طارق وامه كانو يالسين في الصاله ويت مها ماسكة كتاب وتقرى فيه ...
طارق : هلا والله بالمها شحالج ؟
مها مستغربه : اهلين طارق .. بخير وانت؟
طارق: بخير غناتي .. هاه شو وينها اموون عنج ؟
مها: فوق في حجرتها يالسه تتلبس
طارق: خير وين بتسير الحين ؟
مها سكتت وماعرفت شو تقول
ام طارق: بتسير عند ربيعتها
طارق: اي ربيعه ؟
ام طارق: ربيعتها لطيفه بنت جاسم الكتبي
طارق: اهااا اوكي برايها .. اذا ماعندها حد يوصلها انا بوديها لاني فاظي اليوم
ام طارق ومها يطالعون بعض ويقولون في خاطرهم .. بلاه طارق اليوم ؟!!
طارق: الا اقول امايا اموون ما عطتكم جواب عن نواف
ام طارق: لا والله هي قالت اني ماباه
طارق: ما قالت ليش؟ شو السبب؟؟
ام طارق :تقول انها تبى تكمل دراستها وتشتغل
طارق: انزين نواف ماشاءالله عليه عقله متفتح وبيوافق على شرطها
ام طارق: مادريبها تقول ما افكر في الزواج الحينه
طارق: مممممممممم برايها عيل دام ان ابويا راضي كيفها مالي خص
نزلت امنه ولقت طارق .. وارتبكت تقولون باجر وراها امتحان
طارق : اموون يالله طوفي انا بوصلج بيت ربيعتج
امنه وهي مستغربه : اوكي اللي تشوفه
في الجانب الثاني ..
= = = = = = < في بيت الخاله وديمه في دبي >= = = = = =
ام فهد : جوااااهر ..يا جواااااهر
جواهر يايه تربع من فوق وتلهث : نعم يامايا ... امريني
ام فهد :وينج ماتردين علي .. تعالي ابى حد يقعد وياي قاعده بروحي من الصبح
جواهر: من عيوني الثنتين بس بزقر ساروه عشان تيلس ويانا
ام فهد : يالله انا اترياكم في الحديقه
جواهر طلعت فوق تزقر سارة ..سارة كانت يالسه ترتب غرفتها وبالصدفه حصلت بين اغراضها صورة حقها هي ونواف وكانت تطالعها ومبتسمه وتتذكر ايام الطفولة .. دخلت عليها جواهر طبعا بكل دفاااشه جان تفر الصورة بعيد : ساارووه وصمخ
سارة رفعت راسها ..
جواهر: ما تسمعين من الصبح يالسه ازقرج وانتي ماتردين علي
سارة : ههههه انزين بلاج جيه معصبه ومشتطه ليكون هزاع هنيه عند فهد
جواهر بققت عيونها : اييييه شو هزااع انتي الثانيه .. مالت عليه هالشين ما ادانيه لا تطرينه
ساره: بل عليج شو سوالج عشان تكرهينه جيه .. حليله والله
جواهر وهي مرتبكه وتبين انها معصبه : كيفي بس جيه ما اطييقه ..اقول يالله طوفي جدامي امي تبانا نيلس وياها في الحديقه
ساره : ههههه ان شاءالله الحين بنزل
ويوم نزلو البنات الحديقه
ام فهد : فديتج سارة عطيني الدله اللي عدالج
جواهر تطالع امها والغيره في عينها : بس فديتج حق سارة .. جواهر ما تستاهل صح ؟
ام فهد : هههههههههه فديتكم كلكم تستاهلونها والله
سارة :ههههههههه يامايا هي بس تغار .. اونها جواهر حركات
جواهر: جب جب يالله .. فديتني انا الاولى ويتفدوني اكثر عنج خخخخ ..
ساره وام فهد : هههههه
جواهر: الا امايا فهود وينه ؟
ام فهد : فهد عنده ربيعه فديته
سارة : منو مستر هزاع ؟؟
جواهر وتغيرت ملامح ويهها : انا ابى اعرف فهد شو عايبنه في هذا اللي اسمه هزاع ؟!
ياترى شو سالفة هزاع؟ وشو سوى حق جواهر عشان تكرهه وتحقد عليه هالكثر!! وشو اللي مخلي طارق رايق هالكثر وراظي عن خواته؟
"*الجزء الرابع"*"
امنه ركبت السيارة ويا طارق وطبعا كانت ساكته ولا لها عين ترمسه عقب الرد اللي ردته عليه امس وكانت خايفه يسوي فيها شي عن هالسالفه وانه ما بيسكت عنها ..
طارق: اموون .. انتي ليش ما تبين نواف ؟ خبري فيج بغيتي اول شي !!
امنه سكتت
طارق: اموون انا ارمسج
امنه: وبعديين ويا نواااف ..انا ما افكر في الزواج الحين وكنت طايشه يوم وافقت
طارق: هههههههههههه يا سلام والحين عقلتي ماشاءالله
امنه:الحمدلله انا عاقله
طارق وطالعها بنظرة: تعرفين ان ابوي قال خلاص برايا
امنه : شو يعني برايا ؟
طارق:يعني مب لازم تاخذينه .. مب غصب
امنه وهي بتطير من الفرح : قوول والله ؟
طارق: شو شايفتني مسيلمه اقص عليج .. وبعدين حووه انا اخوج العود ولا نسيتي عمرج !!
امنه: اسفه طاارق بس والله من الفرحه
طارق: اول مرة اشوف بنية نفسج.. الحمدلله والشكر يالله نزلي ..الساعه كم تبيني ايي اشلج ؟
امنه : ماعليه امي بتطرش الدريول يشلني
طارق: لا انا بيي وبشلج
امنه في خاطرها : اففففففف يالرزة
طارق: يالله متى بتيين؟ الساعه 7 زين؟
امنه : شوووه 7 الحين الساعه 6 ونص
طارق: كيفج انا بكون هنيه الساعه 7 وان ما طلعتي بتكون هاي اخر طلعه حقج من البيت
ويروح عنها طارق وتدخل امنه بيت ربيعتها لطيفه
= = = = = = < في دبي وفي بيت الخاله وديمه>= = = = = =
ام فهد: جوااهر ... استحي على ويهج الريال ما سوالج شي عشان تحشين فيه جيه
جواهر: لا سوالي
ام فهد +سارة: هااااااااه شو سوالج ؟
جواهر:يرفع ضغطي كل ما اشوفه ويا فهود قااهرني يامايا والله قاهرني
سارة: ليش قاهرنج؟ لانه اطول عنج؟ ولا احلى منج ههههههههههههه
ام فهد: ههههههههه والله اذا السالفه جيه جان يوزتج له وافتكيت من شرج
جواهر كانت تتصنع العصبيه : امايا بس عااد وانتي ساروه جب ولا كلمه .. باسم الله علي اخذ واحد شراته
ام فهد : ليش شو فيه هزاع ما ينعاب فديته
جواهر: كل عيوب الدنيا فيه مالت عليه
ومن بعيد صوت ينادي :ام فهد .. ام فهد
ام فهد : لبيه يابوفهد
بوفهد : وينج ياام فهد دوختيني لين ما حصلتج
سارة وهي باين عليها حركات : ياعيني على الحب مانقدر هههههههه اكييه امي ما طارت يابويا
ام فهد:سويرة بس استحي على ويهج
بوفهد:هيه فديتها بعد ليش مب عايبنج ؟ ههههه احبها غصبن عن الكل هي تاج راسي
ام فهد وهي مستحيه :بوفهد بس عااد
سارة وهي تضحك : ههههههههه استحت امايا هههههههههه
والكل تمو يضحكون الا جواهر كنت تبتسم وقامت وراحت غرفتها وطبعا استغربوا من ردة فعلها
نرجع حق العين وبالتحديد حق بيت بو محمد.. طبعا عقب ما ردو من العزبه هلكانين كان في انتظارهم في البيت سعيد ريل شيخه وكان الكل يشل الاغراض من السيارة وينزلها.. وطبعا هو ما كان وياهم في العزبه بحكم شغله لانه رجل اعمال ويا مسافر ولا يتابع اعماله برى العين يعني ايي بس 4 ايام في الاسبوع عشان يشوف عياله وحرمته شيخه
نورة: الحمدلله على السلامه عمي سعيد
سعيد: الله يسلمج من الشر يا نورة .. هاه عبد الله يقول خلصتو امتحانات
نورة: هييييه والله فكه من المدرسه
نواف: السلام عليك بوعبود
سعيد: وعليكم السلام والرحمه هلا والله نواف
عقب ماسلم نواف عليه وام محمد دخلت شيخه وكانت مستاانسه بشوفة ريلها وابو عيالها الغالي واخرالناس اللي دخلو من الحوش الاستاذ عبدالله اللي كان قاعد ويتعبث في سيارة الدريول وحتى انه ما لاحظ وجود سيارة ابوه في الحوش واول ما دخل سلم على ابوه سلام حار ويلسوا الكل يسولفون مع بعض يتخبرون سعيد عن سفرته الاخيرة وعقب صلاة المغرب الكل توجه حق غرفته ..
في غرفة شيخه وسعيد ..
سعيد: هاه متى ملجة نواف وامنه؟
شيخه:والله شكلهم لا بيكون فيه ملجه ولا شي ,,
سعيد: افاا ليش؟ ليكون نواف مابغى البنت
شيخه: ياسعيد انت ادرى واحد بنواف انه مايباها
سعيد:يعني هو قال حق محمد انه مايباها
شيخه: لا ماقال بس البنت شكلها بترفض
سعيد: يالله انشاءالله يلقى بنت الحلال اللي تستاهله ويستاهلها
شيخه :ااااامين
سعيد: ونورة؟
شيخه: بلاها نورة ؟
سعيد: محد خطبها ؟؟
شيخه تضحك:ههههههه بلاكم على نواري فديتها .. تبون الفكه منها
سعيد:هههههههه افا عليج والله هي اللي ماليه علينا البيت .. عقب عبدالله طبعاههههه
شيخه : متعصب حق عبدالله بعد ههههههههه
سعيد: اكييد ولدي وبتعصب له وهي بعد بنتي بس تعرفين معزة الولد تفرق عن معزة البنت ههههههههههههه
في بيت بو محمد بس في غرفة نورة هالمرة.. كانت نورة يالسه كالعاده على النت وظرابه هي وعبدالله اللي غرفته مجابله غرفتها بس ظايفنها على الماسنجر وموريها الويل وبالتاكيد مبطله المنتدى ويالسه تطالع المواضيع وترد عليهم وفجأة تشوف موضوع وداع كاتبنه جرح الزمن واستغربت بالقو من هالشي ويوم فتحت لوحة التحكم حصلت ان في رساله خاصه واصلتها منه
(اختيه قطوة ..انا استوت لي مشاكل في المنتدى وبسبب اعضاء معينيين عشان جيه بودره والصراحه انا فرحان وايد اني عرفت انسانه مثلج.. لانج احسن وحده واطيب وحده عرفتها في هالمنتدى وهذا ايميلي اذا احتجتي أي شي وانا حاظر في أي وقت ..اخوج جرح الزمن)
كان ويه نورة في هاللحظة جنه حد صاب عليها سطل ماي بااااااااااارد.. وتقول في خاطرها الا اعر ف سالفته.. وطرشت له ايميل تبى تعرف فيها الاسباب اللي ترك المنتدى عشانها واتريته يرد عليها في نفس اليوم بس مارد.. في نفس الوقت كانت ام محمد تزقر نورة من تحت.. نزلت نورة
نورة: لبيه يا امي
ام محمد: تعالي تلفون
نورة: الو
سارة: هيلوووووو
نورة وهي تصرخ : ساااااااارووووووونه
سارة: نوراي فديتج
نورة: ويا ويهج ولهت عليج واايد وينج لا تدقين ولا تسالين
ساره:ههههههههههه هنيه والله في البيت بس تعرفين الجامعه وتعبها
نورة: والله بعدني ما جربت السنه اليايه بخبرج ههههههههههههه
سارة:هههههههههههه صدق انج وحده
نورة: انزين شخبارج وشخبار جواهر ومايد وعمي عبدالرحمن وخالتي وديمه شحالها ؟
سارة: الحمدلله كلهم بخير حتى فهد بخير
نورة سكتت وتظايجت شوي
سارة: وينج هههههههه اكيد الحين طاير ة من الفرح
نورة: وليش اطير.. شاربه ريدبول خخخ
سارة وعرفت انها ظايجت نورة : هههههههه وياويهج سوري والله ماكنت اقصد اظيجج
نورة:ههههههههه ما ظايجتيني ولا شي فديتج
سارة وحست عمرها انها زودتها: خلاص عيل تامرين بشي غناتي؟
نورة : لا لا دخيلج ابى اسوف وياج خلنا نسولف شو ورانا
سارة: ورايي جواهر الدبه هههههههه
في بيت جاسم الكتبي دخلت امنه وسلمت على ربيعتها لطيفه اللي كانت وااايد كلوز وياها واللي مادري كيف متحملتنها.. اكيد دام ن لطيفه طيبه وعلى نياتها وكانت امنه اللي تتحكم فيها على كيف كيفها .
لطيفه:ياحي الله من يانا
امنه:الله يحيييج شخبارج لطووف؟
لطيفه: تماااااااااام .. هاه اول شي خبريني شو استوى امس ؟؟
امنه وهي تضحك: عنبو قوليلي اتفضلي يلسي قبل ههههههههههه
لطيفه: يالله وهاي يلسه خبريني
امنه خبرت لطيفه بكل اللي صار وحتى خبرتها عن تصرف اخوها طارق وياها اليوم في السيارة
لطيفه وهي منصدمه: خييييييييييييييبه تخيب العدو كل هذاا يصير وتقولين لي في التلفون ماشي مهم
امنه: انا اهم شي اني افتكيت من نوافووو الخبل واخته الغبيه نوروووه والله هذا اللي ناقص اخذ اخو هااي بعد
لطيفه:اموون لا تنسين هي بنت عمج .. وماظن انها سوت لج شي عشان تكرهينها جيه هي واخوها ههههه ليكون تغارين منها؟
امنه بعصبيه: لطووف ثمني كلامج قبل ما تعقينه.. انا اغار من وحده مثل هاي شوفي انا منو وهي منو عسب ااغار منها.. اونه اغار
لطيفه استغربت : ول عليج كليتيني بلسانج .. اسفه حبيبتي
امنه وهي تصطنع الرقه : لا غناتي بس انا اعصب من هالسالفه لان الكل يقول اني اغار منها
لطيفه في خاطرها : انزين هذا هو الصدق
لطيفه: ماعليج منهم خلاص
امنه: فديتج انتي .. الا اقووول شخبار اخوج؟
لطيفه: أي واحد فيهم؟
امنه: أي واحد فيهم بعد .. خليفه
لطيفه: ممم بخير بس ابوي متلعوز وياه
امنه: ليش؟
لطيفه: ابوي يباه يكمل دراسته وهو مب طايع ..
امنه: اهاا انزين خلووه برايه هو ريال ويعرف مصلحته بنفسه
لطيفه: مادريبهم والله.. المهم خبريني انتي شو مخطط الصيف مالج
وتمت امنه تخبرها بمخططها الحافل بالحفلات والطلعات اللي مالها داعي..
خليفه اخو لطيفه اللي يكبرها بسنتين بس.. انسان فاشل بكل معنى الكلمه لا تهمه دراسه ولا شي اللي يهمه بس حبه امنه وهي كانت تبادله نفس الشعور بس كانت للأسف تتصنع هالشعور لان قلبها ولا مرة عرف شي اسمه حب.. كانت ترمسه في التلفون بالسر وحتى ربيعتها لطيفه اللي هي اخته ما كانت تعرف عن هالشي لان امنه هددت خليفه انها تودره اذا عرفت لطيفه بهالشي ..
في نفس هالوقت كان طارق طاير من الفرح والمود عال العال لانه كان متوجه حق بيت خالته عشان يشل نوال ويروحون يجهزون حق بيتهم وكانت اول مرة يطلع فيها بروحه ويا نوال عشان يتنقون الاثاث.. عشان جيه كان رااااايق وراظي عن الكل وما همه شي في الدنيا ..
في اليوم الثاني وعقب ما رجع نواف بوظبي عشان ياخذ اجازته ويخلص اوراقه في الكليه عشان كانت اخر سنة له دق تلفونه وكان الرقم دولي وغريييب ويوم شافه اول شي ما بغى يرد بس رد عقب ما احترق تلفوونه من كثر ما صاح ..
نواف : مرحبا
احمد: مرحبتيييييييييييييين يالقاااطع
نواف:هههههههههههه منوووووو بوشهاااب !!
احمد: لا والله يمكن يده هههههههههه
نواف: وينك ياريااااال عيزت وانا ادقلك من يومين ولا ترد علي
احمد: هيه تراني طلعت من السكن الللي يالس فيه ويلست في فندق وخبرت عيسى يوم دقلي
نواف: ههههههه ماشاءالله عليك يالس وتتنقل من مكان لي مكان
حمد: ههههههههههههه يارياااااال والله الحين ناوي ارد البلاد مليت من هالعيشه
نواف: والله بتنور البلاد برجعتك.. الا متى الوصول ؟
احمد : خلها مفاجأه خخخخ
نواف: ههههه ياحبك للمفآجات
احمد: ههههههه ..الا اقول شخبار العروس ؟
نواف: أي عروس ؟
احمد : بنت عمك هههههههه أي عروس اونه
نواف: ههههههه خصك الله ما عرست ولا شي
احمد: عيل عيسى خبرني انك بتملج الخميس
نواف: ههههههه لا كنسلنا .. شكلهم ما بيوافقوون علي نيااهاااي
احمد : مستااانس وياراسك ... الواحد يتمنى انه يعرس وانت ما تبى
نواف: ومنو قالك اني مابى اعرس ان شاءالله بعرس .. بس اذا الله راد
احمد: لا لا شكلك ميت على العرس من عذر ماتبى بنت عمك ههههههه انزين اسمع ترى الفاتورة انت بتدفعها لان شكلها بتيي اطول عني
نواف: ههههههههههههه لا دخيلك اطول عنك.. مب ناقص مصاريف زياده انا
احمد: انزين عيل تامرني بشي ؟
نواف:سلامتك وارجع لنا بالسلامه
احمد : لا تخاف كلها يومين وبتحصلني في العين ااااه والله ولهت عليها
نواف: ههههه اوكي الغالي يالله فمان الله
احمد: فمان الكريم
احمد اخو وعد الكبير.. كان طويييييل ووسيم في نفس الوقت واللي يميزه شعره الناعم ونظراته اللي كانت تذبح البنات وفي نفس الوقت شخصيته المرحه وايد وادبه الزايد ودبلوماسيته في التعامل.. كان احمد من اعز اصدقاء نواف وعيسى ورابي وياهم من يوم ماكانو يهال .. واللي فرقهم عن بعض من خمس سنين النسبة العاليه اللي حصلها في الثانويه العامه واللي قرر انه يتوجه حق ايرلندا ويدرس الطب ويتخصص في جراحة القلب لانه كان حلمه انه يسوي شي ينفع بلاده بس الظروف كانت اقسى من هالشي وخلته يقرر انه يرجع البلاد ويكمل دراسته في الجامعه ويغير حلمه من دراسة الجراحه الى دراسة الطب العام
= = = = = = < في بيت بو محمد>= = = = = =
في الصاله كان الكل متجمع.. ام محمد وشيخه وريلها سعيد وعبدالله ولدهم واخوانه نواف اللي اصغر عنه ب5 سنين وكان معروف انه يموت على شي اسمه رقاد كله راقد وين ما يسير يرقد.. وعمر وعليا التوأم اللي كانوا توهم مكملين ال3 سنين.. وكانت نورة توها نازلة من فوق ..
نورة تبوس راس شيخه وام محمد : السلام عليكم
الكل : وعليكم السلام والرحمه
عبدالله وياشر على راسه : احم ما نسيتي شي؟
نورة وهي تلاعب عليا وعمر: عبوود يا مسود الويه انا خالتك المفروض انت اللي اتيي وتبوسني على راسي مب انا
عبد الله : الله فديتني غادي اسمر من الشمس مسوي تان مادري شو يسمونه واونه مسود .. انتي شعرفح في هالاشياء
نورة فرته بالمخده والكل تمو يضحكون عليها هي وعبدالله
سعيد : الا اقول متى نتايجكم بتطلع ؟
عبدالله : والله ما عطونا خبر بس بيطرشوون اس ام اس على التلفون
ام محمد : شو ها ام سي مس بعد ... بنسمع اساميكم من الرداو بس يالله عن المكر
نورة : هههههههه امي ترى عبود مستاانس ان عنده تلفوون ويبى يتخقق علينا فيه ..
عبدالله: تغارين ويو
سعيد : ههههههههه لا تغار ولا شي .. نواري هدية نجاحج بتكون تلفون وانا بطلعلج رقم خطير على قولتج
نورة: مشكور عمي سعيد وما تقصر
سعيد: افا عليج يا نورة ما طلبتي شي.. انا لو ادري انج تبين التلفون جان خذيتلج ياه من زمان
عبدالله: لا والله .. ابوياا انا احتج .. شوو هااااا
نورة: ههههههههههه طاعو منو يغار فينا الحين ..
شيخه : ههههههههههههههههه عبيد كلكم سوا كلكم سوا ..
= = = = = = < في بيت محمد>= = = = = =
كان محمد يتصل عدة مرات في عمه ناصر وعمه يتهرب منه مب عارف كيف يرد عليه وهالشي خلى محمد يعصب وينرفز وايد.. دخلت مريم بوجه بشوش وابتسامه ناعمه على محمد في غرفة المكتب اللي يقعد فيها اغلب الوقت ..
مريم: هاه شحالك بوعيسى؟
محمد بعصبيه: مب بخير ..
مريم: خير يا بوعيسى شو صاير؟
محمد: وين ايي الخير وعندي اخو نفس نواف؟
مريم: شو سوى نواف؟
محمد: مسود الويه فشلني يوم الخميس عند عمي والحين شكل عمي ما بيعطي بنته حقنا وبتسير حق الغريب
مريم: يا بوعيسى صل على النبي الزواج قسمة ونصيب..
محمد: قسمه ونصيب؟ شو ها قسمة ونصيب بعد ... نواف بياخذ امنه يعني بياخذها غصبن عن عينه بعد
عيسى واخوه خالد كانو يالسين يسولفوون في الصاله وسمعوا صراخ ابوهم الواصل من غرفة المكتب
خالد: اوهوووو هذا شو بلاه على امي ..
عيسى: يا حليلج يامي ابى اعرف كيف اتحملتيه كل هالسنين
خالد: والله انها متحملتنه عشانا بس .. فديتها والله لو تبى روحي بعطيها روحي وما بقول لا
عيسى: والله امي تستاهل اكثر ..وبعدين تعال انت ههههه يا سلام على الحنان الزايد.. الا اقول انت من وين تطلع هالرمسه هاه؟؟؟
خالد وياشر على راسه : من هذا اللي يسمونه العقل ههههههه
وتطلع مريم من غرفة المكتب وهي زعلانه بس يوم شافت عيالها ردت ابتساامتها وقعدت تسولف وياهم
مريم: شو رايكم نسير بيت يدكم عقب المغرب اليوم .. منها نسلم على يدتكم ومنها اودي العشا ونتعشى هناك؟؟
خالد: هييه والله يامي والله مشتااقلهم حيل .. ولهان على نواااري فديتها
عيسى: عز الطلب.. بس ابوي بيي ويانا؟
مريم: لا ابوك قالي انه معزوم على العشا برى
خالد: ول كل يوم معزوم على العشا ويرجع الساعه 4 الفير البيت .. هذا سحور مب عشا هههههه
عيسى:ههههههههه
مريم : بس خلوود استح على ويهك .. هذا ابوك لا تنسى عمرك
خالد ويحب راس امه : ان شاءالله يا احلى ام خلوود
في بيت بومحمد كانت نورة يالسه في الصاله ويا شيخه تحاتي وكل شوي تدخل ايميلها تجيك اذا رد عليها جرح الزمن ولا لا وما تحصل أي رد اتصلت حق وعد اقرب صديقاتها
نورة: السلام عليكم
ام احمد : وعليكم السلام هلا وغلا ببنتي نورة.. شحالج غناتي؟
نورة: الحمدلله بخير وعافيه وانتي شحالج خالوه ؟
ام احمد : بخير وسهاله .. هاه بغيتي وعد؟
نورة: هيه اذا اكنت موجوده
ام احمد كانت تحب تمزح ويا نورة : هي في بيت ريلها الحين
نورة منصدمه: أي ريل؟؟
ام احمد : انتي ماتدرين انها عرست؟
نورة:هههههههههه خالوووووه عااد
ام احمد : هههههههههه هاذي وعد ويالله عن الهذربه الزايده تراني اغار منكم
نورة:ههههههههههههه ان شاءالله
وعد وهي تغني: يا مرحبا يا ناعم الصوت والعود
نورة: احيا بصوتك .. عاااشو ههههههههه والله امج خطيره خخخ
وعد: ادري ههههههه
نورة: انزين المهم سمعيني لااازم اشوفج انتي وسلوووم ولهت عليكم والله
وعد: والله نحن اكثر.. انزين سمعي تعالو عندي البيت
نورة: هيه بيي بس سلووم مادريبها
وعد: اهااا.. هييييييه اتذكرت هي امس روحت دبي عند اختها
نورة: ممممم اوكي خلاص عيل بييج باجر اوكي
وعد: حلووو وانا اترياج
نورة: يالله فداعت الله
وعد: الله يحفظج
شو بيستوي يوم بتروح نورة عند وعد.. بتخبرها عن تصرف جرح الزمن الغريب؟ وشو بيكون رد العم ناصر على محمد يوم بيساله عن رايي بنته؟
|
12-09-06, 11:39 PM
جديد مواضيع قسم القصص المكتمله
العرض العادي
