كاتب الموضوع :
همس الليالي
المنتدى :
القصص المكتمله
"*" الجزء الرابع عشر "*"
*+*خلاص يكفي .. لا تجيني ولا اجيك .. الافضل ابقى في حياتي لحالي.. اللي جا لي منك يكفي والله يخليك .. وانا اتحمل كل اللي جرى لي ..*+*
على صوت محمد بورحيمه كانت نورة تعاتب نفسها وتلوم نفسها على انها عطت فرصه حق انسان ثاني انه يتلاعب بقلبها وباحاسيسها .."بس ليش سوى فيني جيه؟ ليش جذب علي وما قالي الصدق؟ اكييد كان يباني انا اللي اتعلق فيه وبعدين هو اللي يغدر فيني ويسوي فيني مثل فهد!!"..هذا كان تفكير نورة.. اللي كانت فاهمه احمد غلط.. احمد اللي عمره ما غلط عليها وما قالها كلمة تجرح شعورها وتخليها تزعل منه.. احمد اللي عرفها وحبها ..وزاد حبه لها في قلبه يوم ورى يوم.. بس خلى هالحب كامن في قلبه وما بّينه حقها عشان ما يخسرها.. بس هو في لحظة ضعف خسرها.. ويوم خسرها خسر قلبه اللي كانت نورة ساكنه فيه بدون ما تدري.. آآآه صدق يوم قالوها.. صعبه تحبه وهو ما يدري فيك ..
دخلت شيخه على نورة وشافتها معلية على الصوت وحزينه ..
شيخه: نواري فديتج شو بلاج؟
نورة وهي تقصر صوت المسجل : مابلاني شي ..
شيخه: لا انا اعرفج زييين .. قوليلي منو مزعلنج ؟
نورة: محد مزعلني ..
شيخه: ليكون زعلانه من وعد .. لان امس يوم كانت هنيه كان شكلها مب عايبني ..
نورة: وعد؟ لا مب زعلانه منها وليش ازعل منها ؟؟ هي ما سوت لي شي ..
شيخه: انزين يالله قومي بنسير دبي ..
نورة: ليش؟؟؟؟
شيخه:شو ليش بعد ؟ عرس طارق عقب يومين وانتي بعدج ما شريتي ولاشي .. قومي يالله
نورة: انزين الوقت ما بيسد عشان افصل ..
شيخه: لا لا تفصلين بنشتري جاهز ..يالله قومي ..
نورة: انشالله ..
#في بيت سلطان الشامسي #
احمد كان يالس في الحوش ودموعه تنزل على ويهه.. حتى انه ماله خاطر يسير المستشفى ويداوم.. مب عارف شو يسوي.. عقب ماعرف من وعد ان نورة بتوافق على فهد.."يعني شو؟ خلاص خسرتها؟ كله مني.. كله منيييي.. لو اني ساكت هذاك اليوم جان ما استوى اللي استوى ..آآآخ يا قلبي.. والله اني بدونج ما اسوى ولا شي يا نورة "
وكان تيلفون احمد يرن ويرن وهو ما يرد عليه لين ما انتبه ويوم شاف رقم نواف ما حب انه يرمسه وهو بهالحاله بس ما قدر يطنش لانه مهما كان ربيعه ويمكن يكون محتاج له في أي شي
نواف: الووووو
احمد وبصوت متغير : مرحبا نواف ..
نواف وهو مستغرب: مرحبتين يا بوشهاب .. شحالك ؟
احمد: الحمدلله وانت شحالك ؟
نواف: بخييير وسهاله ..بوشهاب خير شو بلاه صوتك جيه ؟؟
احمد:لا ماشي مزجم شوي تعرف تغيير الجو بعد ..
نواف: أي تغيير جو ونحن بعدنا في الصيف ..انا المفروض اللي ازجم ههههههه
احمد : لا مادري بس جيه مزجم شوي ..
نواف: هيييه سلامات ماتشوف شر ..
احمد: الله يسلمك ..
نواف: اقولك يا بوشهاب ..انا والشباب بنسير العزبه ونباك تخاوينا ..
احمد: اسمحلي يا نواف .. والله تعبان شوي ومب قادر اطلع من البيت ..
نواف: دام ان السالفه تعب ومرض .. عيل مسموح يالغالي وما تشوف شر مرة ثانيه ..
احمد: الشر ما ايييك ..
نواف: تتحراني صدقتك؟ يالله قول شو عندك؟ انت صوتك مب عايبني واكيد فيك شي.. يعني مب معقوله عشان زجام ما تروح تداوم في المستشفى؟
احمد وهو منصدم : وانت شدراك اني ما داومت ؟
نواف: مصادر خاصه ههههه .. انزين خبرني شو صاير؟
احمد : مب صاير شي .. مثل ما خبرتك بس زجام ..
نواف: انزين عيل تعال ويانا العزبه عشان اصدق ان مافيك شي ..
احمد :اووكي خلاص .. بلقاكم في العزبه..جيه زين ؟؟صدقت ان ما فيني شي ؟؟
نواف: ههههههه هيه يالله عيل نترياك هناك.. وترى لا تخاف العشا علينا ..
احمد: دام جيه عيل انا بسبقكم ..
نواف:هههههههه قوووول جيه من اول شي انك ما تبى اتيي عشان ما تييب العشا وياك يالزطي خخخ
احمد:الحمدلله يوم انك فهمت ههههه
نواف: ههههههههه والله انك عجيب وانت مزجم هههههه
احمد :اوكي عيل بلقاكم في العزبه ..
نواف: حياك الله ..
&-_.في دبي._-&
#في السيتي #
نورة كانت سايرة ويا شيخه وشوق اللي كنت يايبه بناتها وموديتهم عشان يلعبون ويا عيال شيخه وفاطمه.. وطول الوقت نورة كانت ساكته ومالها حس على غير عادتها.. كانت نورة يالسه تتذكر اول مرة عرفت فيها احمد وكيف كان طيب وياها.. كانت تحاول تقنع عمرها بانه هو جذاب وقص عليها بس هي عارفه انه عكس اللي كانت تفكر فيه ....
شوق: شو رايكم ناخذ العشا من هنيه ؟؟
شيخه: والله فكره حلوه .. انتو يلسو هنيه وانا بسير باخذ العشا ..
شوق: لا انا بسير ويا فاطمه وبييب العيال .. نورة بتيلسين ولا بتيين ويانا؟
نورة: لا انا ابى ايلس شوي ..
فاطمه : اوكيه انتي يلسي في الكوفي شوب اللي في دبنهامز .. ونحن بندق لج وبنخبرج نحن وين ..
شيخه: عيل بنحط اغراضنا عندج ..
نورة: اووكي ..
وسارت نورة ستار بكس ووياها الاغراض.. قبل لا تدخل نورة الكوفي شوب وقفت شوي في مكانها وتذكرت ان احمد كان يموت على ستار بكس وكيف كان دايما يغايظها يوم يسير.. وهي داخله الكوفي شوب كانوا فهد وهزاع توهم طالعين وفهد دعم جتف نورة بدون ما يقصد وطيح منها كل الاغراض ..
فهد: اسف .. اسف اختي ... تفضلي ..
نورة كانت مب طايقه عمرها ويوم شافت فهد حست بظيق اكثر .. فهد ماعرفها لانها متغشيه: لا عادي يا فهد ..
فهد بطل عيونه : منووه ؟؟ نورة ؟؟
هزاع وهو يتكلم بصوت واطي : منو هاي ؟؟
فهد: هزاع انت اسبقني تحت وبعدين انا بلحقك ..
هزاع: هههه اوكيه بس لا تطول..
فهد تم واقف في مكانه مب مصدق ان نورة هنيه وياه في نفس المكان ..سارت نورة ويلست في مكان مخشوش شوي وعقت غشوتها وطلبت لها كوفي ولا سوت حق فهد أي سالفه ..فهد سار ووقف عند طاولة نورة ..
نورة رفعت راسها : نعم ؟؟
فهد: ممكن ايلس ؟؟
نورة: والله الطاولات تارسة المكان .. تروم تيلس أي مكان تباه ..
فهد :ابى ايلس هنيه ..
نورة: اوكي فالك طيب ..
وقامت نورة وشلت اغراضها وسارت ويلست على طاولة ثاني ..فهد تم واقف ومنصدم من ردة فعل نورة.. حس انها بعدها زعلانه منه من حركته.. بس حاول يوهم عمره بانها زعلانه ومتظايجه من سبب ثاني ..فهد سار ويلس ويا نورة على نفس الطاولة بكل ثقه ..
اما نورة لزت كرسيها على ورى وقالت بظييج: افففففف يا ربي .. ابى اعرف شو تبى مني ؟؟
فهد: شو بلاج يا نورة ؟؟ حد مزعلنج ؟؟
نورة: محد مزعلني ولا شي ..
فهد: عيل وينها نواااري اللي اعرفها.. اللي الابتسامه ماتفارج ويهها ؟؟؟
نورة (وهي تبتسم بالغصب ): هاه جيه زين ؟؟ خلاص ارتحت ؟؟
فهد(وهو مبتسم ): انا مرتاح بوجودج وياي ..
نورة: انزين ..
فهد: نواري .. انا اسف على الحركه اللي سويتها .. والله ما قصدت اني ازعلج ..
نورة: انا مب زعلانه ..
فهد: اكيييد ؟؟
نورة (وهي ترد بدفاشه ): هيه هيه اكيد ..
فهد:زين الحين ارتحت ..
نورة كانت ساااكته ومافيها ترد على فهد و تقول في بالها : هيه صح وااايد عقب اللي سويته فيني ..
فهد: انتي يايه ويا منو ؟؟
نورة: ويا امي وحريم اخواني ..
فهد: هيييه واكييد بتييون بيتنا ؟؟
نورة: سرنا وسلمنا على خالوه وديمه وبعد شوي بنرجع العين ..
فهد:افا لا لا مايصير ترجعون العين في هالوقت ..
نورة: يااربي .. فهد الله يخليك ممكن تخليني بروحي ؟؟؟ الناس يطالعونا ..روح ربيعك يترياك..
فهد: الله ..والله اسمي طالع مثل العسل من ثمج ..
نورة (وهي مبطله عيونها ): صدق ان ما عندك سالفه ...
وقامت نورة وشلت اغراضها وهي معصبه وواصل حدها من فهد.. اما فهد فقال في خاطره: حركات البنات ..اكييد مستحيه مني وتسوي هالحركات ..
يوم نزل فهد عند السياير ..
هزاع (وهو يغمز ): منو هاااي يا مسود الويه هاااه ؟
فهد : ايييه .. اييه هاي بنت خالتي ...لا يروح فكرك بعيد ..
هزاع: ليكون اخت نواف ؟؟؟
فهد: هييه يايه هي واهلها يتسوقون ..
هزاع: ايواا.. وانت بصفتك شو تيلس وياها ؟؟
فهد: بصفتي ولد خالتها وخطيبها قريبا ..
هزاع وهو مبطل عيونها : احلف؟؟؟؟؟ بذمتك ؟؟؟
فهد: ههههه هيه شو بلاك ..
هزاع: فهد بيعرس ؟؟؟ فههههد ؟ لا لا انا اكيد احلم ههههه
فهد: وباجر حلمك بيستوي صدق ههههه
نورة سارت صوب الملاحف وتمت واقفه في الكورنر ودموعها في عيونها.. تحس انها مثل الطير المجروح اللي اييون الناس ويرشون عليه الملح عشان يبرى ..نورة مب طايعه تقنع عمرها بانها ارتاحت وحبت احمد.. تحاول تتغلب على شعورها اللي هزمها واستسلمت له ..
وشوي ورن تيلفونها ..
شوق: نواري؟؟ وينج ؟؟
نورة(وصوتها متغير ): انتو وين وانا بييكم ؟
شوق: نحن صوب المطاعم .. يالله تعالي نترياج ..
نورة: اوكي ...
شوق: شيخه .. ترى نورة مب عايبتني هاليومين ..
فاطمه: هيه والله شكلها متغير وويهها يقول انه فيها شي ..
شيخه: والله تعبت وانا اسالها شوفيج ؟؟ تقولي ماشي ...
فاطمه: ليكون تظايقت من سالفة فهد ؟؟
شيخه : أي سالفه ؟؟
شوق: هيه ما دريتي هههههه هذاك اليوم خالوه وديمه قالت انها تبى نواري حق فهد ..
شيخه وهي مستانسه : صدق؟؟؟ ليش محد خبرني ..
فاطمه : هيييه وهي قالت ان فهد هو اللي قال حق امه انه يباها ..
شيخه : ههههههه يا حليلج يا نورة ..
شوق: بس مادري احسها ما بتوافق ..
شيخه: لا لا انشالله بتوافق .. فهد ريال وما ينعاب بس ماعليكم خلها شوي وهي بترد نفس قبل واحسن ..
شوي ولا يت نورة عندهم وييها مخطوف لونه ..
شيخه (وهي زايغه ): فديتج نورة .. شو بلاج جيه ؟؟؟ مريضه ؟؟؟
نورة(وهي تبتسم بالغصب ): لا والله مب مريضه .. بس متظايجه شوي وابى ارجع العين بسرعه ..
شيخه: انشالله انشالله الحين بنرجع ...نواف حبيبي سير استعيل طلبنا ..
نواف: انشالله يامي ..
فاطمه: اقووول .. الا هذا مب محمد اللي واقف هناك ؟؟
شيخه : محمد اخويا ؟؟؟
نورة لفت وشافت اللي ماعمرها شافته.. محمد واقف في محل ويا وحده روسيه ويالسين يتشرووون ...
شيخه وهي تشهق : هييييييييييييييي ,, محمد ؟؟؟ منو هاي اللي وياه ؟؟
شوق: منو هاي ؟؟ شكلها وحده روسيه من هالخايسات ..
نورة(كانت مب مصدقه ) : لا لا هذا يمكن مب محمد .. يمكن واحد يشبهه ..
فاطمه(وهي معصبه ): إلا هو.. اخخ عليك يا بوعيسى.. الحين مريم شو مقصره فيه وياك عشان تسوي فيها جيه ؟؟؟
شوق: قومو قومو يالله طلعنا قبل لا ايي حد من اليهال ويشوفه وباجر يغلط جدام مريم ..
شيخه(وهي تحت اثر الصدمه ): انا بييب العيال وبلحقكم ..
&-_.في العين._-&
#في بيت العم ناصر #
امنه كانت حابسه عمرها في الغرفه ومب طايعه تظهر وحلفت انها ما تظهر اذا ياو اهل خليفه..
امنه شافت تيلفونها طايح ومسكته ودقت حق خليفه ..
خليفه: هلا والله بالعروس ..
امنه وهي معصبه وواصله حدها: عرووس في عينك.. اسمعني يا خليفه والله اذا يت اليوم ويبت اهلك وياك بجتل عمري ,,
خليفه(بكل بروووود ): حياتي امنه لا تسوين بعمرج شي.. انا ماقدر اعيش بدونج.. صبري يوم بيي جتليني وبعدين جتلي عمرج.. نحن لازم نموت مع بعض ..
امنه : ااااااااااااااه والله انك مينون وما تفهم الرمسه ... انا اكرهك اكرهك انت متى بتفهم اني اكرهك ؟؟؟
خليفه :هههههه حياتي انتي انا مينون فيج.. وانا احبج.. امووووت فيج.. يالله حياتي انا لازم اتلبس واتكشخ عشان اليوم بشوفج.. وانتي حياتي ما يحتاي انج تتلبسين ولا شي انتي حلوة في عيني حتى لو كنتي مبهدله ..
امنه (وهي تصيح ): خليفه الله يخليك افهمني .. انا ماباك .. ماباك ..
خليفه(بدون أي احساس ): وانااباج تفهمين اني اباج.. وباخذج .. تعرفين شو يعني باخذج ؟؟ يالله حياتي .. باي باي..
وسكر خليفه التيلفون في ويهها وتمت امنه تصيح ومن القهر اللي هي فيه كسرت المرايا اللي جدامها,,,,
#في بيت محمد #
مرو الشباب على بيت محمد عشان عيسى يسلم على امه اللي ماشافها من اسبوع وحاط في باله انها بعدها زعلانه عليه وماتبى تشوفه.. ومع محاولات خالد فيه انه يرجع بس عيسى ما صدق خالد وحس انه اذا رجع البيت بيظايق امه ..
عيسى(وهو خايف ): خالد.. امي مب في البيت ؟؟
خالد: عيل وين سارت ؟؟انا اليوم الصبح طالع من البيت وهي كانت يالسه هنيه في الصاله ..
عيسى: مااادري ...
نواف: يمكن سارت بيت يدك عند خوالك ؟؟
عبدالله: هيه انا اتذكر ان فاطمه حرمة خالي حمد قالت انهم اليوم كلهم بتيمعوون ..
عيسى: انا لازم اشوف امي والله ولهت عليها ..
خالد: ولهت عليها هااا؟ ويوم اقولك تعالي وياي تقولي لا هي مب فاظيتلي ..
عيسى: خويلد لا تيلس تلوم فيني .. بروحي متلوم فيها على حركتي ..
نواف: خلاص استهدي بالله يا عيسى وبنسير بيت يدك وبنشوفها هناك يالله ..
عيسى : يالله ترى والله اذا فيها شي بموت ..
عبدالله: مافيها الا كل الخير لا تيلس تفاول عليها ..
ويوم سارو بيت يدهم ما حصلوا حد هناك غير البشاكير ويوم سالوهم قالولهم انهم كلهم في المستشفى عند مريم ..
مريم كانت سايره بيت اهلها وهناك ما قوت انها تتحمل عذاب محمد من صوب وفراق ولدها وظناها عيسى من صوب ثاني وطاحت عليهم ووودوها المستشفى ..عيسى يوم درى حس انه مب قادر يوقف على ريوله.. وعلى طول سارو المستشفى ..وفي المستشفى يوم دخلو الغرفه شافو مريم طايحه على السرير وساااكته مالها حس وخواله كلهم متميعين حواليها ..اما مريم فاول ماشافت عيسى دموعها ملت عيونها اللي ماشافته من اسبوع وولهت عليه.. وقامت ويلست ..
مريم: عيسى .. وليدي .. فديت عمرك والله ..تعال ..تعال
عيسى وهو يبوس ايدها ودموعه تطيح بدون ما يحس فيها: امايا فديتج.. سامحيني..سامحيني والله ما اعيدها واخليج روحج مرة ثانيه ..
مريم: فديتك يا عيسى.. والله ولهت عليك وعلى شوفتك.. على ضحكتك وعلى صوتك في البيت ..البيت بدونك ما يسوى شي.. مايسوى شي ..
عيسى: فديتج يامايا ... خلاص والله ما اطلع من البيت ولا افارقج ولا دقيقه ..
خالد وهو يبوس راس امه ودمعته في عينه: ليش جيه يامايا ؟؟ ليش تسوين بعمرج جيه ؟؟
ويتدخل خاله الكبير ابراهيم : هذا كله من فعايل ابوكم .. هاللي ما يقدر هالحرمه المسكينه اللي متحملتنه طول عمرها ..
خالد: خالي .. انت تعرف ابويا زين وعلى كثر ما عمامي يرمسونه ما يسمعهم ولا شي ..
ابراهيم :خلاص يا مريم تطلقي منه بدال هالعيشه اللي عايشتنها وياه ..
مريم وهي معصبه : لالا..طلاق لا.. انت تبى تدمر بيتي؟ تبى تضيع عيالي؟ عيالي محتاجين حق ابوهم.. صح ياعيسى؟ صح يا خالد؟ قولوله.قولوه انكم ما تقدرون تتصرفون بدون ابوكم ..
خالد وعيسى تمو ساكتين ومنزلين رووسهم ..
ابراهيم : شفتي حتى عيالج مب طايقينه .. ابى اعرف انتي ليش متحملتنه ؟؟
مريم تمت ساكته وتصيح ومب عارفه شو ترد على اخوها ..
عيسى :خالي خلاص.. خلو امي على راحتها.. امايا حبيبتي ارتاحي ولا تعبين عمرج.. ولا تفكرين في أي شي غير في صحتج ..
خالد: خالي تعال شوي بغيتك برى ..
ويوم طلعوا ..
خالد: والله يا خالي ابويا موريها الويل .. ويوم نقولها ليش متحملتنه ما تطيع تخبرنا ليش ...ياخالي امي تخاف من ابويا وااايد ..
ابراهيم : ماعليه يا خالد ابوك وانا بتصرف وياه ... وان ما خليته يطلق امك مابكون انا ابراهيم..
نواف وعبدالله كانو يايين من بعيد ..
نواف : هاه يا خالد شو الوالده الحين ؟؟
خالد: الحمدلله بخير وباجر بيرخصونها ..اقولكم اسمحولنا انا وعيسى ما بنقدر نسير العزبه وياكم ..
عبدالله: افا عليك يا خالد نسير العزبه وامك بهالحاله ؟؟ لا لا خلاص بنكسل ..
خالد: تسلم يا عبيد من طيب اصلك ..سمحولي بدخل عند امي شوي ..
نواف: مسموح واذا بغيت أي شي تيلفون واحد وبكون عندك ويا عبدالله ..
عبدالله : لا لا انا بتم هنيه ..بتم ويا خالد ..
خالد: تسلمون والله ..
نواف: اوكي عيل انا بسير البيت عند امي لان محد عندها وقوم شيخه والحريم سايرين دبي ..
وروح نواف ..ويوم وصل البيت تذكر نواف انه مواعد احمد انه يسير العزبه وما بيلقى حد فاتصل فيه عشان يخبره بانهم كنسلوا السيرة ويمكن يمر عليه ..
دخل نواف داخل وحصل ام محمد يالسه وتطالع التلفزيون بروحها ..
ام محمد : مرحبا بوليدي حبيب قلبي نواف ..
نواف: هلا والله باغلى ام في هالوجود كله .. شحالج اليوم ؟
ام محمد : بخير يعلك الخير ..الا وين عبدالله وعيسى وخالد عنك ؟ مب قلتوا انكم بتسيرون العزبه ؟؟
نواف: هييه كنسلنا والله ..
ام محمد: لييش؟
نواف ماحب انه يقول حق امه عن سالفة مريم وغير السالفه على طول ..
نواف: المهم يامي انا ياينج في موضوع مهم ...
ام محمد: خير يا نواف؟
نواف: خير ..امي انا اباج تخطبين لي ..
ام محمد : اخطب لك ؟؟ مب انت ما بغيت امنه ؟؟
نواف: ههه لا يامي لا انا ابى وحده ثانيه ...
ام محمد : ومنو هي ؟؟
نواف: امممم .. سارة ..بنت خالوه وديمه ..
ام محمد افرحت واستانست من الخاطر: صدق؟ صدق يا وليدي ؟؟ والله نعم ما اخترت فديت سارة جمااال واخلاق وادب ..
نواف : هيه صدق .. واباج تخطبينها لي في اسرع وقت ..
ام محمد : بس ..
نواف:بس شو ياامايا ؟؟ محمد ؟؟؟؟
ام محمد : هيه يابوك .. بعد مافينا على المشاكل وعوار الراس ..كفايه اللي صار هاذيج المرة..
نواف: لا لا تحااتين يامايا .. وبعدين طارق قالي ان امنه انخطبت وملجتها الخميس الياي ..
ام محمد وهي مبطله عيونها : صدق ؟؟؟ وليش ما خبروتني ام طارق.. انا توني مبنده من عندها ..
نواف: مادريبها .. بس الله يخليييج يامايا ..اباج تخطبينها لي باسرع وقت ممكن ..
ام محمد : هههههههه انشالله تباني الحين ارمس امها ؟
نواف: والله ؟؟؟؟؟؟؟ يالله دقيلها الحين ..
ام محمد: هههههههه دومك مستعيل .. مب زينه العيله يا وليدي ..ماعليه انا بشاور شيخه وباجر بتصل في ام فهد وبخبرها ...
نواف(وهو طاااااير من الفرحه وحس ان الارض مب شايلتنه ): فديتج والله يامايا مابعرف بدونج شو بسوي في دنياي ..
ام محمد : هيه كل هالرمسه الحلوه بس عشان بخطب لك هههههه
نواف: امايا عاد اونج ماتعرفين غلاتج عندي ؟؟
ام محمد : فديت روحك والله .. عقبال مااشوفك معرس على الكوشه ..
نواف: ويا سارة ..
ام محمد : وويا سارة ههههههه
نواف: آآمين هههههههههه ..
ام محمد : الا على طاري ام فهد .. دريت انهم يبون نورة حق فهد ؟
نواف وهو منصدم : والله ؟؟؟؟ عيل الريايل يوم كانو هنيه ما رمسوا ولا قالو شي ..
ام محمد : هيييه.. ام فهد قالتلي اشاور نورة واذا وافقت بيوون عشان يخطبونها رسمي ..
نواف(وحاس انه بيطير من الفرحه): يالله .. صدق الدنيا تركض فينا .. نواااري .. نواااري انخطبت ؟؟
ام محمد :فديتج يا نواري ..والله وكبرتي وصرتي عروس .. وينك يابومحمد تشوف نواري عروس ..
نواف: الله يرحمك يابويا .. والله لوكنت عايش الحين جان ما سوى محمد اللي يسويه فينا ..
ام محمد والدموع في عيونها : الله يرحمه ..
نواف: انزين يامايا انا بترخص عنج الحين بسير عند احمد حليله تعبان شوي وما بتاخر ..
ام محمد: احمد ولد سلطان ؟؟ فديته شو بلاه ؟
نواف: مزجم شوي وتعبان ..وبمر اسلم عليه له وحشه والله ..
ام محمد: هييه مايشوف شر .. خلاص الله يحفظك يامي ..
وفي الطريج اتصل نواف في احمد وخبره انه ياينه واحمد رحب به بس احمد كان مب قادر انه يتحمل العوار اللي في قلبه عقب اللي سواه ويا نورة وقرر انه يفاتح نواف في سالفته ويوم وصل نواف دخله الميلس ونواف كان طاير من الفرحه وحاس انه اسعد انسان في هالكون عشان امه بتخطب له سارة..وتم يخبر احمد عن السالفه واحمد كان يجاوبه بهييه .. اها .. ولا ...
نواف: احمد ؟؟ ياخي شوبلاك ؟ شو يالك جيه مرة وحده ؟؟ قمت تسرح ومتنكد .. حتى ضحكتك الحلوة ما قمت اسمعها ...
احمد(وهو يحاول يبتسم بالغصب ) : مافيني شي .. المهم وبعد شو علومك؟
احمد حاول انه يتناسى سالفته ويانورة .. بس هو الصدق انه ماكان يملك الجرأة انه يفاتح نواف في هالموضوع ...
نواف: وانشالله بيكون الفرح فرحين ..
احمد : ليش؟
نواف: ترى فهد خطب اختي ..وشكلنا بنسوي عرسنا في ليله وحده ..
نزل خبر نواف على احمد مثل الصاعقه اللي صعقته وخلته ساااكت وما نطق باي حرف ..
نواف: عيل ما قلتلي مبروك ؟؟
احمد تم ساااكت ومايرد على نواف .. ولا يتحرك ..
نواف وهو يدز احمد :احمد .. احمد ...يا بوشهاااااب ..
احمد كان ساكت ويطالع الارض ودموعه تنزل على خده البارد ...
نواف وهو خايف: احممممد .. يا احمد رد علي .. رد علي يا احمد ...
قام نواف ومسك احمد وركبه سيارته ووداه المستشفى وطول الطريج احمد ما رفع راسه ..
ياترى شو اللي صار حق احمد؟ وشو بتكون ردة فعل نورة يوم بتسمع اللي صار باحمد؟ وشيخه بتسكت عن اللي شافته يوم كانو في السنتر؟
|
20-09-06, 02:31 PM
جديد مواضيع قسم القصص المكتمله
العرض العادي
