كاتب الموضوع :
أحلام أنثى
المنتدى :
الارشيف
رد: رواية وصرت اجمل أحلامي
شكررررااااا لكل من رد علي بالصراحة حمستوني اكمل و ياليت اشوف ردودكم دائما واتمنى ان اي احد يقرا يرد علي برأيه وكمان متى تحبون البارت ينزل اي يوم وشكرا مرة ثانية احبببكككممم
البارت الثاني
بعد ما رجعت من الجامعة ونامت شوي صحت وهي حاسه بنشاط وسوت لها قهوة اللي متعوده عليها من يد امها كل يوم وجلست في الصالة قدام التلفزيون وقدامها القهوة والحلا ذكرت امها وجلستهم مع بعض وخنقتها العبرة, نفضت هذه الأفكار من راسها وحاولت تتناسها لقت لها برنامج حلو وجلست تتابعه شوي وسمعت صوت الباب
طلال: انت ليش جالسه هنا
ديما باستغراب: ليش فيها شيء
طلال: ايه فيها شيء انا ليش حطيت غرفتك عند باب الشقة عشان ما أشوفك في البيت
ديما: بس انا ما دريت انه ممنوع اجلس بالصالة
طلال: والحين دريتي ياليت ما اشوف وجهك وتجلسين بغرفتك
ديما والدموع بعينها: ان شاء الله
طلال:انتبهي كل اسبوعين تصير عندي السهرة ما ابغا اشوف رقعة وجهك
بعد هذا النقاش دخلت غرفتها وقفلت عليها الباب وبكت غصب عنها جلست تبكي تقريبا نص ساعه وبعدها غسلت وجهها وحلفت بداخلها انها تكون اخر مره تضعف وانها ما تسمح لاحد ينزل دموعها
............................................................ .................................
في السعودية
ام ديما: والله ان البيت ما ينبغا بعد ديما وبدت دموعها تنزل
ابو ديما: اذكري الله يا بنت الحلال ديما راحت في نصيبها ولا تنسين ان هذا طموحها والبنت كبرت وهذه احسن فرصة جت لها الولد ابوه معروف وعنده خير ما شاء الله وهذه حكمة ربنا ان وحيدتنا تبعد عننا لكن ان شاء الله في الاجازة نروح لها
محمد: جد بنروح عند ديما بالاجازة
ابوديما: ايه ان شاء الله بس شدو حيلكم وباذن الله اخذ اجازة واسفركم وثم ارجع وامسك الشغل ويجيكم يزيد
محمد: اجل بروح اعلم الشباب
"عائلة ديما"
زي ما عرفنا ديما البنت الوحيدة بين 3 اولاد اللي هم:
(يزيد) الأخ الأكبر عمره 26 سنة متخرج ادارة اعمال ويشتغل مع ابوه في الشركة "وراح يكون له نصيب من روايتنا"
(ديما) زي ما تعرفنا عليها وعمرها 24 سنة
(نايف) عمره 21 سنة ما همه في الدنيا الا سعة صدره فكاهي وخفيف دم هو ويا اخوه محمد ما يتفارقون ودخلوا نفس التخصص اللي كان وبجدارة يناسبهم اللي هو اعلام
(محمد) عمره 20 سنة زي ماقلنا وين ماتلقون نايف تلقون محمد وتخصصه اعلام بعد
............................................................ ...............................
مرت الأيام والأوضاع في هدوء نسبي ديما تطلع الصباح تتمشى في الممشى القريب منهم وتمر السوبر ماركت اذا احتاجت شيء وترجع الشقة تقفل على نفسها الباب ولما الحين ما شرت لها شريحة للجوال اللي معها والجامعة الى الان ما ردت عليها مع انها كانت تشيك على الايميل كل يوم
............................................................ ...............................
ديما بعد ما سمعت طق الباب قامت وفتحت الباب وكان طلال
طلال: اسف اذا ازعجتك بس اهلك قبل شوي اتصلوا لي وقلت لهم في الحمام اذا طلعت تكلمهم خوذي كلميهم
ديما: اوكي شكرا
بعد ما انتهت ديما من مكالمة امها اللي كانت سؤال عن الاحوال عالسريع لان ديما ما بغت طلال يتعطل عشانها
طلال: انت ما معك جوال؟
ديما: الا معي بس ما عندي شريحة تعرف ما عندي الا سعودية وخربت لما جيت هنا.
طلال: خلاص انا نازل الحين اشتري لك وحده
ديما: شكرا ماله داعي تتعب نفسك انا انزل بعد شوي اشتري لي.
طلال: لا مكانها اصلا مو قريب مرره وانا رايح لهاذيك الجهة اصلا
ديما: اوكي اللي تشوفه
............................................................ .................................
قررت ديما تطلع من البيت تغير جو خاصة انها محبوسة بهذه الغرفة صار لها كم يوم ,تذكرت سواليف نورة عن هذه المدينة وكيف ان الواحد ما يمل من السياحه فيها فقامت لبست وطلعت من الشقة وهي نازلة من العمارة قالت خلني اتصل على نورة اسألها وين اروح خاصة انها ماتعرف أي شيء غير الممشى والسوبر ماركت
نورة دق جوالها وشافت الرقم من خارج السعودية فتركته وشوي انتبهت كانه مفتاح الامارات وردت بسرررعه اكيد هذه ديما
نورة: الو
ديما: هلا باحلى الو في الدنيا
نورة: هلا والله باهل الامارات كلهم
ديما حست ان الروح رجعت لها بعد ما سمعت صوتها: نوووررة وحشتيني
نورة: يا حبيبتي انت اكثر والله بشري عنك وش اخبارك ؟
ديما: الحمدلله كل شيء تماام والله توني شاريه الشريحة انت اول وحده اكلمها
نورة: الحمدلله هاه وش صار على الجامعة رحتي لهم
ديما: ايه رحت لهم اول ما وصلت وقالوا لي بيردون عالايميل بعد ما يشوفون السيرة الذاتية واذا قبلوا فيه مقابلة شخصية على اساسها انقبل او لا
نورة:الحمد لله كويس ان شاء الله خير اهم شيء ا تتضايقين لو ما صار اللي تبغينه ما تدرين وين الخيرة فيه
ديما: ان شاء الله بس انت عارفه ما بقا على الفصل الثاني شيء وودي لو انقبل ابدا فيه وما انتظر السنة الجايه, المهم نسيتيني وش متصله عشانها انا طالعه الحين وين اروح؟ ابغا اشوف شيء حلو بما انها اول طلعه لي
نورة: ليشد ديما وين زوجك ؟ وبعدين انت ما قد طلعتي ابدا ؟
ديما: يوووه نوير بلا تحقيق سالفه طويلة اذا رجعت كلمتك المهم علميني شيء اروح له الحين
نورة: والله قلبي ناغزني عليك
ديما: اقول بلا حركات عجز اخلصي علميني وين اروح
نورة: امممم شوفي روحي دبي مول مرررة يجنن خاصة النافورة ولا تنسين صوري عشان توريني اياها بعدين
ديما: خلاص اوكي بلا كثرة حكي انا راكبة التاكسي مع السلامة
نورة: شف الجاحده بس يالله عشانك غاليه بمشيها وتراني انتظر اتصالك بالليل
ديما: طيب طيب بااااي
نورة:انتبهي لنفسك استودعتك الله
قالت ديما لصاحب التاكسي يروح دبي مول وهي متشوقة تشوف الاماكن اللي نورة كلمتها عنها وخاصة النافورة اللي شافتها بالصورة وفي هاللحظة كانت ناسية كل اللي صار لها ومستمتعه بمنظر العمارات اللي كل وحده تقول انا اطول من الثانية
............................................................ .................................
طلال كان بالشقة يجهز للسهرة اللي عنده الليلة رن الجرس طلع بيشوف مين لكن قرر قبل ما يفتح يبلغ ديما انها ماتطلع طق بااب الغرفة ومحد رد عليه فتح الباب مالقا احد فتح باب الحمام كمان ما فيه احد قال اكيد انها طلعت وانبسط انها مو موجودة تمنى انها ما ترجع قبل الفجر ابدا عشان مايشوفونها الشلة طلع من الغرفة وفتح الباب وزي ما توقع الشلة وصلت وبدأت سهرتهم كالمعتاد
............................................................ ...............................
ديما كانت مستمتعه وهي تدور في هذا المول الكبير وتكتشف كل زاوية فيه خااصه وانها عاشقة للماركات العالمية اللي متوااجد اغلبها في هذا المول بعد ما تعبت توجهت لمكان النافورة ولاحظت ان الناس بدئوا يتجمعون وكان باقي 5 دقائق على عرض النافورة دورت لها مكان تقدر تشوف فيه زين وبدأت النافورة تتمايل على أنغام اغنية I will always love you كانت ديما منسجمة تماما مع الاغنية وتراقب تناسق حركات النافورة معها ما حست بالوقت ابدا الا لما سمعت تصفيق الجمهور مما يعني انتهاء العرض تمنت ان العرض ما وقف ابدا تلفت حواليها شافت كافيهات دخلت واحد منهم تنتظر العرض الثاني بعد نص ساعه جلست تقلب المنيو وبعدها قررت تطلب شيء تعرفه عشان ما تتوهق ^_^ طلبت موكا وقطعة كيكة , اثناء ما هي تنتظر الطلب كانت تطالع اللي حولها لفت نظرها ان ولا شخص جالس لحاله الا هي الكل على الأقل جالس معاه شخص واحد حست قد ايش هي فاقدة اخوانها خاصة يزيد اللي قريب منها ودائما معها ونايف ومحمد اللي ما تحلا الجلسة الا بوجودهم ولا شعوريا مسكت جوالها واتصلت على يزيد.
يزيد كان جالس مع صديقه الروح بالروح راكان رد على جواله
ديما: هلا باحلى اخو في الدنيا
يزيد لما سمع صوتها ما صدق انها هي : واخيييررراا حنيتي علينا واتصلتي
ديما:وش اسوي شريحتي خربت وتوني اطلع وحده المهم اخبارك؟
يزيد: والله الحمد لله انت وشلونك بشريني عنك؟
ديما: اللهم لك الحمد مرتاحه وكل اموري زينة وش اخبار امي وابوي والثنائي المرح؟
يزيد: والله كلهم بخير بس فاقدينك بشكل ما تتخيلينه البيت فاضي بدونك وامي مسكينة كل ما جبنا طاريك نزلت دموعها
ديما: ياحياتي تكفى يزيد طلبتك لاتتركها لحالها حاول تجلس معها قد ما تقدر واذا جيت تطلع حاول فيها تروح لخالتي والا احد صديقاتها بس ما تجلس لحالها
يزيد: لاتوصين حريص , عندك ازعاج شكلك برا؟
ديما: ايه والله انا في دبي مول وتمنيت انكم معي عشان كذا اتصلت
يزيد: وش رايك في دبي حلوة صح؟
ديما: ايه والله تجنن ما توقعتها كذا ابدا
يزيد: يوم اقول الصيف اللي راح خلين نروح لها وانت رافضه تقولين لا مو حلوة نضيع عطلة الصيف على دبي
ديما: انا ما توقعت انها كذا واصلا تحسفت لان نورة سافرت لها بالصيف ولما رجعت سولفت لي عنها تمنيت اني رحت معها وشفنا الاماكن سوا
يزيد فز قلبه لما سمع طاريها كان من زمان ما سمع عنها شيء واخر مره لمحها يوم زواج ديما
ديما: وش فيك سكت والا عشان جبنا طاري بعض الناس
يزيد: لا ولاشيء وشلون تبيني اتكلم وانت تتكلمين
ديما: ايه هين صدقتك
يزيد: غصب عليك تصدقيني مو انا اخوك وحبيبك
ديما: لا هذا اول الحين اخوي وبس
يزيد: طيب يا دبا الحين ماعاد صرت حبيبك هاه
ديما: لا وش دعوا انت الاصل
يزيد: اشوا على بالي بعد
ديما: طيب يالغيور الله يعين زوجتك عليك
يزيد: ووه بس يالبى قلبها خليها تجي واسحب عليك
ديما: طيب اجل يللا مع السلامة بروح لزوجي
يزيد: يالخبلة لاتصدقين اصلا انت سافرت وخربتي علي
ديما: انا مالي دخل كلم امي تخطب لك
يزيد: لا انا ابغا انتي تصيرين موجودة وتخطبين لي بعد
ديما: ههههههه لا تلف وتدور قول ابغاها واخلص
يزيد: وش تقصدين
ديما: زويد منيب غشيمة والا ما اعرف تراني ادري باللي في قلبك زين
يزيد اللي تضايق وحاول يصرف : الا كيف الاجواء عندكم بدبي يقولون زحمه ذا الايام.
ديما: ههههههههه صرف قد ما تبغا بس مصيرك تجيني وهي تقلد صوته "انا احب نورة وابغاها من زمان اخطبيها لي"
يزيد: اقول انقعلي لزوجك وانا تاخرت على راكان يللا مع السلامه
ديما: ههههههههههه طيب مع السلامة
سكرت ديما من يزيد وهي تفكر فيه كيف انه يخبي مشاعره ويعتبر ان الافصاح عنها ضعف , انتبهت ان النافورة بدت عرضها الثاني ووقفت تستمتع بالنظر لها
توقعاتكم, ارائكم, انتقاداتكم
سأكون بانتظاركم
|
24-01-13, 11:06 PM
جديد مواضيع قسم الارشيف
العرض العادي
