....... |[•• الــورقــة التاسعة عـشـر ..! ]|
----------------------------------[ .. بنام ياتنهيده الصدر تكفين ..~


ليه كِل ما تِقتِرب منّي / أخاف
و ليه كِل ما تبتِعِد عنّي أصيح ~
ليه أحسِّ بـلا حنانِك بالجَفاف !
و ليه وَرْقي في خريفِك مآ يطيح ..


*
*
*

*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: أسياب المستشفى ..
الوقت: 1:25 ظهراً ..
ـــــــــــــــــــ
(ابراهيم)
حطيت الجوال على اذني بعد ما ضغطت الزر الأخضر ..
وهمست : نعم ..!
سعود تكلم بحماس : السلآآم عليكوووووم .....!!
رديت بهدوء : وعليكم السلام ...!
سعود مستغرب : وش فيه صوتك .. توك قآيم ..!
كنت بقول ايه بس ماحبيت اكذب : لأ بس مشغول شوي ..!
سعود مليان طاقـة : أفأ .. مشغول أجل .. وش مشغلك ..!
رفعت كتوفي : أبد مشغول مع عيال عمي وعيال خالتي .. تعرف قبل أمس جاي .. توني مابعد سلمت عليهم كلهم ..!
سـعود : أها .. طيب بقولك .. أهلي .. بيجون لـ مكة .. تعال معهم ..
استغربت .. وانصدمت : أوووما ..
سعود : اي والله .. تدري لأني سابقهم لمكة عجبتهم الجـيـه .. عشان تسذا انا حجزت لك من الرياض على مكة على طول ..!
: هه هههاااهااا .. العب على غيري .. أصلا مكة مابُه مطار ..!
سعود : هههههههههه .. ايه عارف .. بس ابختبر ذكائك ..!!
رديت وانا ابي افهم وش المطلوب : طيب وبعدين ..!
سعود مستغرب : ابراهيم وش فيك .. من جدك زعل يعني ..!
سحبت نفس : لأ من هبالي اللي خذته من أخوي .. وأنت اكيد عارف وش انا اقصد ...!
سعود يتكلم في شيء ثاني : والله اني وله عليك يا ابراهيم .. حتى اني قاعد افكر وش اسوي عشان اشوفك بس ما ابي ارجـع .. فقلت خل نعزمه على مكة .. تعال لمكة تكفـى ..!
ابراهيم : انا قايلك بروح معك بس مارضيت .. خلك تحمل قرارك ..!
سعود : أنا أول من تحسف وابي اصلح الغلط .. تعال عشاني ..!
سكت ماقلت شيء .. ما ابي ارووح خلاص ..! غصب هي ..!
سعود : اسمعني .. اليوم صل العصر ورح لبريدة .. والثلاثاء امي وابوي واخواني بيجون لمكة ... تعال معهم .. اعزدب ( اعقب ) ابوي بالطريق ....
ابراهيم : يعني انا الحين مكتوبن لي اروح للرياض هالاسبوع بالذات .. ولا اصلي على الملك فهد .. لأ بصلي عليه ماعلي منك ..
سعود : تعال نصلي أنا وياك عليه في الحرم صلآة غائب ..!
: لأ ماودي .. ووووو بعدين ..
سكت كنت بقول عبدالعزيز بالمستشفى .. بس أنا ما ابي اهلي يدرون اني بالمستشفى واروح أنا اقول عن ولد عمي انه بالمستشفى .. سكت وانا ادوور عذر ثاني ..
سعود : بعدين وشو ...
تنهدت : بعدين أنا ماقلت لك لا تزهم ... يآآخي تراك قاهرن من يومك بالقصيم ..
سعود : طيب تعال لمكة ومالك الا رضاك ...!
سكت شوي افكر : وعد ..!
حسيت سعود ابتسم : وعد ..!
استهبلت : لأ رغد احسن .. !!
سعود ضحك : ههههه .. طيب وش بقول .. متى بتجي .. !!
سألته : من أساسا بيجي لـ مكة ..!؟
سعود : مدري كلمت امي انا .. يعني اتوقع امي وابوي ورغد وريان .. وامي لطيفة اتوقع يعني .. بس هذولي اتوقع انه اكيد ان شاء الله .. بس مدري ان كان به زوود بيجي .. الله يحييهم ترا ..!
سألته : طيب وعد .. وعيال عمي محمد .. عماتي ..!
سعود : مدري والله عنهم ولا عن امي بعد .. بشووف وبرد عليك ..!
جاوبته : طيب خلاص .. بس ما اتوقع اجي بكرة ابدن ..!
سعود : طيب مايخالف بس اهم شيء تجي ..
ابراهيم : ان شاء الله ..
سعود : جزاك الله خير فرحتن ..!
ابتسمت بهدوء من غير لا اعلق ..!
سعود : طيب .. مــع السلامة ...!
ابراهيم : مع السلامة ..
سكـرت ..
واستدرت راجع للغرفة .. قبل اوصلها وصلني صوت عمي ناصر يسأل : وش اخباره يادكتور !؟
الدكتور يجاوب : لا الحمدلله .. يعني مجرد ارهاق .. سوء تغذية .. انخفاض في مستوى السكر بدمه ..! يعني الموضوع بسيط .. ينتهي المحلول ان شاء الله وتقدرون توكلون ...!
تقدمت لهم ..
ناصر بابتسامـة شُـكر : شكرا دكتور ..!
الدكـتور : العفـو واجبنا ..!
راح الدكتور .. وقبل يدخل عمي ناصر للغرفة سألته : عمي وش قال فيني ..!
ابتسم عمي : يمدحك .. يقول على انك نزفت دم كثير .. الا انك عوضت في وقت قياسي ماشاء الله .. يقول متوقعين أنك عشان تعوض يبيلك 24 ساعة عندنا .. لكن من أول مغذي وأنت ماشاء الله نشيط ..!
ابتسمت : الحمدلله ..!
دخلنا .. عمي يتوجـه لـ عبدالعزيز ..! وميل رأسـه لـه : يقول سوء تغذيـة ..! [ وسأله ] وش رايك أنت ..!
ابتسم عبدالعزيز وماقال شيء ..!
عبدالله : طبيعي اتوقع لأنه امس ما تعشى .. وما استبعد انه عقب غداه !!
انصدم عمي : لا عاد ..!
استغربت .. سألتهم وأنا منصدم : ماتعشيتوا على العشاء !!!
التفت لـي عمي : بالله .. تكـفى اهجد ..
قلت اوضح كلامي : ما تعشيتوا العشاء اللي عزمتكم عليه ..
بدر يضحك : ينكت !!
طالعت عبدالعزيز اللي ببساطـة ابتسم ..!
عبدالله يجاوب : بالله كيف نتعشى وانت اللي عازمنا .. من ويين ...!
درت بعيوني وانا امر على عبدالعزيز بالتمويه .. ابتسمت : خلآآص الليلة ان شاء الله ...
عبدالله اعترض : لا لا .. حنا نبي نستانس ونفلها .. بس ماراح نقدر اليوم بالذات ..
ابتسمت فاهم قصده : خلآص آي يوم يناسبكم ...!
عمي يطالع ساعته : وش رايك تخليها غدا احسن !! عشان مرة وحدة ينشط عبدالعزيز ..!
طالعت عبدالعزيز : وش رايك ..!
عبدالعزيز رفع كتوفـه : براحتـك .. العشاء عشاك ...
عمي يطالع ساعته مرة ثانية : انا بروح ألحين ..
قبل يكمل كلامه سألته : والغداء ..!
ناصر: لـ لا لا .. بروح عند عيالي .. اتغدى معهم ...!
رديت اغصبه : لاوالله عمي تغد معنا الغداء اللي ..
يقاطعني : لا والله يا ابراهيم اخلي عيالي بروحهم .. وبعدين خلاص كبرت على طلعة الشباب .. منول انا عزوبي وعادي ..! الحين لا خلاص .. المهم لا أوصيكم في [ يأشر براسه على عبدالعزيز] شيخ الغفر ..! خلوه يتغدى ..
هزيت راسي : ان شاء الله ..!
وطـلع تارك الامور بين يدينا .. وعادي لو نفصل المحلول ونطلع .. محد بيدري .. بس عشان عبدالعزيز ننتظر ..!
*
*
*


*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: ملحق عبدالله ..
الوقت: 2:45 ظهراً ..
ـــــــــــــــــــ
( عبدالعزيز )
دخلت الملحق توني الحمدلله مغسل يديني من الغداء اللي انا شاريه الله يغنيني .. هم مازالوا يأكلون وهم يسولفون ... بديت العب بنكاشة الاسنان بين سنوني .. افقرتن يا ابراهيم على قـولَـكْ ..!!! الله يصلحـه ..
طـنطن جوالي برسالة .. طلعت جوالي وكانت من عبدالرحمن : ( السلآم عليكم .. ابي اشوفك العصر تعال للبيت .. )
طيب اوكي .. سكرت الجوال وحطيته على جنب وانا اكمل لعب في سنوني ...
تدرون اللي كانوا امس موجودين لحظـة ماعزم ابراهيم .. ناديناهم اليوم .. هم معزومين عاد ..
تدرون وش اللي يقهر .. انهم يقومون من الغداء الله يعافيك ويغنيك يا ابراهيم ويكثر خيرك .. أووم القهر .. انا اساسا استاهل ليش اتحدى ابراهيم ..
محمد يقوم من الغداء : الله يعافيك يا ابراهيم على هالغداء .. عقبال مانعزمك بمناسبة سلامتك .. بس بعد ماتفك منقارك .. وينبت شاربك ..!
ابراهيم وهو يجمع السماط اللي فيه صحون بلاستيك .. : انقلع انقلع .. يتطنز بعد ..!
ساعده عبدالله بما انه صاحب البيت .. وطلعوهن برا في الزبالة .. رجع عبدالله بصينية فيها شاهي وبدا يصب ..
وخالد ومحمد بدوا لعب سوني .. واللي يفوز يباري بدر .. وحنا جالسين نتفرج ..
ابراهيم عقب ماغسل جا وجلس عندي : بصراحـة ياعيال عمي وعيال خوالي .. وخالاتي .. أن هذا الغداء من [ يطق على ظهري ] عبدالعزيز الطائي ..!
محمد مستغرب : عبدالعزيز الطائي !!
عبدالله يضحك وهو يوزع البيالات : على وزن حاتم الطائي ..!
ابراهيم يسحب نفس : وعليه فإن الدعوات تككون لـه ... والله يغنيك ويكثر خيرك ياولد عمي ...
بدر : يااامجرم .. بغديكم وبغديكم .. قل بيغديكم ولد عمي ...
استقعدت وانا اوضح السالفة : لأ هو أصلا كان بينا تحدي .. واللي يغلب يعزمكم على عشى على اساس انه منه واللي يدفع الثاني ... وهو اللي غلب ماشاء الله ..!
ابراهيم : بس لاني اخو نورة .. علمت انه من مخباتك الله يغنيك ..!
عبدالله ينفخ ريشه : ما ابعدتَ .. طالع علي أنا ولد خالك ..!
ابراهيم : اقول ألفقه بس ..
عبدالله : على طاري ألفقه .. وشلون اقنعك الدكتور تحلق شاربك ..!
بدر ضحك .. شرير بدر !!
ابراهيم يلتفت : تهقـى البلى من اسم بدر ..!
انا فاهم قصده .. يقصد بدر هذا وبدر ولد عمتي ..!
جاوبته : لا تحكم على اثنين .. احكم على ثلاثه مثـلآ ..!
جاوب بتكشيرة : والله عندنا واحد بالكلية .. هو مدري وش تخصصه .. بس انه حول هالسنة حاسب وصار يدرس معنا ... واسمه بدر .. [ بدى يشكي وهو مكشر ] ياا قسم بالله أووب قادر اهضمـه .. سااااذج الى ابعد حد .. تحسـه غبي ووو مدري وش
بعد ..
عبدالله : أقوووووول .. خل الرجال بحاله .. في القصيم وجايه اجر من الرياض ..
ابراهيم مبتسم : طلبيه خاصة ..! ههههههههه !
عبدالله : ماقلت لي بس .. وشلون حلقت شاربك بالله ..!
ابراهيم يستهبل : جاب ولاعـة .. وجـك جـك [ وهو يسوي نفسه يشب ولاعة عند شاربه الغير موجود ] .. وتششششششششش ..
عبدالله : لا لا .. أقصد وشلون اقنعك ..
ابراهيم يستقعد : الله يسلمك على هالسؤال الوجيه جدا ..أول شيء جـا .. ذب البالطـو عند رجليني .. داخلن على الله ثم عليك .. طـــلــــبـــــتـــك يا ابراهيم .. نخيتك .. تكـفى .. [ قطع اسلوبه باسلوب القاء شعري ].. تـكـفـى نخـيـتـك حـطـهـا بـيــن قـوسـيـن (
ماظـن غيـرك يستحـق انـي انـخـاه) انـــــا اقــاســـي فـــــي حـيــاتــي أمريين .. [ قصع القصيدة وهو يتكلم باسلوب ثاني وهو كنه يفهم عبدالله ] نخااااني تدري وش يعني نخاني .. نخوة حمية .. مدري نخوة ميانة .. بس شكله نخوة طـب !! .. ووكل كلمة للترجي قاله
.. أرجــوك وبلييز .. وووكلمات صعبة ما امداني احفظهن .. وكان يو هلب مي ومدري وشو ..
عبدالله يضحك : ههههههه .. حـشـــــى ...!
ابراهيم يستهبل : آيـه وش تحسب ..!
عبدالله يهز راسه وهو يضحك على خفيف ..: ماتخلي طبعك سبحان الله ..!
ابراهيم : عااد انت و سؤالك ما ادري وش كنت تبي غير هالاجابة يعني ..
عبدالله يبرر سؤاله : لا من جد اسأل كيف اقنعك ..
ابراهيم يجاوب بجد : كلمن بالعقل .. وأنا حبيب طـعت ..!
عبدالله حامت كبده من هبال ابراهيم : أنا آسف اني سألتك ..!
ابراهيم : لا ابدن حياك الله .. وبعدين اعتذر لنـفسك ..!
عبدالله مستغرب : اعتذر نفسي !!! .. لـيه وش شايفني ..!
سألت عبدالله بعد ما مليت من حوارهم : وينه عبدالملك .. راح يغسل ولا عاد جـا ..
عبدالله يجاوب وهو يصب بيالة لـ مدري مين : آيه دق عليه عمي وناداه .. وراح ..!
طبعا مشى الوقت .. وكل واحد يهايط على الثاني .. أذن .. ورحنا كلنا نصلي .. الا ابراهيم يقول بيصلي في البيت ...
بـعد الصلاة أنا رجعت للبيت .. لأن عبدالرحمن يقول ابي اشوفك ..
اشتاق لي !!
دخلت غرفتي .. جلست على سرير ..
وانسدحت اتحرى لـ عبدالرحمن ..!
*
*
*

*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: قسم عبدالعزيز ..
الوقت: بعد صلاة العصر مباشرة ..
ـــــــــــــــــــ
( عبدالرحمن )
طلعت من المسجد .. وركبت سيارتي راجـع للبيت ..
أول ماوصلت ماكانت فيه سيارة عبدالعزيز ... وقفت سيارتي برا .. ودخلت مع الباب الصغير .. بس ابتسمت وأنا اشوف سيارته مدخلها .. بس لأ يمكنه مع ابراهيم .. لأن سيارة ابراهيم أووب موجودة .. يمكن !.. توجهت لـقسمـه .. طقيت الباب المفتوح
ودخلت .. كانت لمبات غرفته مولعة ... طقيت الباب .. ودفيته .. لقيت عبدالعزيز منسدح على سريره بالعرض ..! رجلينه واصله الارض .. وهو مستلقي براحـة .. دخلت .. ما اتوقع امداه يتعمق في نومته من اللمبات المولعة ..! ولابس ثوبه ..! دخلت
شوي .. طالعته .. حسيت أن نومته من بعد تعب .. أو يمكن غفوته .. أقومـه ؟.. ولا اغطيـه واخليه ؟.. لأ اقومه يعدل رقدته واخليه .. باين انه ماكان ناويها نومه ..!
قعدت على السرير .. يوووخ من زمان ماقومته .. مجرد ماقعدت على السرير .. حـس فيني وفتح عيونه ..!!
عقد حواجبه وقعد ..
ابتسمت متفشـل : ازعجتك ..!
عبدالعزيز وهو عاقد حواجـبه : لأ .. اقلقتني ..!
غصب ضحكني : ههههههه .. اقلقتك ..! .. لا لاتقلق الموضوع سهل .. بس وش كنت بقول .. آيـه .. عمي سليمان وعياله بيروحون مكـة .. وبتروح وعد بعد .. وبحآول في شذى تروح يعني .. أنت بتروح معهم ؟! .. ولا وش ودك ..!
عقد حواجـبه يركز: وأنت !؟
جاوبته : لأ ما اقدر .. لأن اجازتي بنص سبعة .. والحين اللي مأجز خالي عبدالمحسن .. صعبه كلنا نأجز .. ولا كان ودي والله ...!
حك رأسـه : مدري الموضوع يحتاج تفكير ..! طيب واذا مثـلا شذى ماقدرت .. عبير بتخليه تروح مع حرمتك ..!
جاوبته وانا ادري الموضوع شوي صعب : مع عمها هي .. وبعدين ان شاء الله انك بتروح وبتصير أنت معها .. وان شاء الله اقوى شذى بعد..!
هز رأسـه : افكر وارد لك ..!
نبهته : اسمعني فكر وقرر بسرعة لأنهم بيمشون بكرة .. عشان يمديك تروح للقصيم بعدين تروح معهم ..!
رفع رأسه : لأ نروح من هنا على طول على مكة ..!
اعطيه الحرية : على راحتك بس احسن تصيرون مع بعض في نفس الطريق ...
سألني : طيب من بيروح ..!؟
جاوبت وأنا احاول اتذكر مين بيروح : عمي سليمان وعياله .. وعمتي اسماء ووو امي لطيفة .. عمي ناصر مدري عنه .. وعمي عثمان بعد .. تخيل ان اللي محمسهم ان سعود سابقهم ..!
سألني : وعمتي هيا طيب ..!؟
عقدت حواجبي افكر : ما أدري اتوقع هي بالشرقية رجلها يداوم ..! لذلك ما اتوقع تروح ..!
ابتسم : شكل الروحـة فـلة ..!
ابتسمت لابتسامته : آيـه حتى انا اقوله .. وش اسمه .. كلم ابراهيم وشـف وش يقول .. ان كان ودك تروحون انتم وياه على طول من هنا لمكة ولا اللي تبون ..
تثاوب : خلاص كلم ابراهيم انت وقـله .. واللي يقوله نزينه ..!
قمت : آيــه طيب .. بس فكني هاه ...!
جاوب وهي يحرك البطانية : لا بس رايه احيانا سديد ..!
طلعت : طيب بكلمه وبشوف .. وشكلي انا اللي بقرر ..
عبدالعزيز : شغل المكيف تكـفى ..!
استغربت انه وده ينوم .. شغلت المكيف .. يمكنه امس سهران مع ابراهيم .. طفيت اللمبات وطلعت ..
والجوال على اذني انتظر ابراهيم يرد ..
رد : هــلا ..
طللعت من قسم عبدالعزيز داخل للصالة : السلآآم عليكم ..!
ابراهيم : وعليكم السلآم والرحمة ..!
حاولت اركز في صوته كنه متغيير .. : وش آخبارك عساك طيب ..؟؟!
جـاوب : الحمدلله الله يسلمك .. أنت وش أخبارك ..!؟
جاوبته : بخير الله يسلمك .. أقول ابراهيم ..
ابراهيم : سـم ..
تكلمت بصراحة : سـلآمات كـن صوتك متغير ..!
ابراهيم كالعادة يستهبل : ايـه تعرف جوكم الجامد .. طبعا أنا جاي من منطقة استوائية لمنطقة متجمدة للأسف ما انتهبت ان الاجواء غير .. فـ هذا اللي صار ..!
ضحكت : ههههههه ... تـسـتـهـبـل أنت !!؟
ابراهيم ينكر باستهبااال : لآآآآ .. من يقوله ..!
ضحكت مرة ثانية : ههههههه .. أقول .. مشغول !!؟
ابراهيم : لا ابدن .. آمرني بس ..
عبدالرحمن وقفت عند الدريشة : لا بس عندي حتسي ابقوله لـك .. تجي .. أو اجي او اصبر اليمن تجي ولا اقوله الحين ..!
ابراهيم : لا مافيني صبر .. قـل وش عندك اسمعك ..
سحبت نفس استعد اشرح لـه .. والله يعين وبس ...
*
*
*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: ملحق بيت امي سارة ..
الوقت: 4:25 مساءً ..
ـــــــــــــــــــ
(ابراهيم)
تنهدت وأنا اسمعه يتكلم عن روحة مكة .. بدينا بالواسطات .. طيب ياسعود أنا ماقلت لـك خلاص بجي .. والله انك صاير ترفع الضغط ...
طبعا رجعت اعيد الكلام اللي قلته لـ سعود اقوله لـ عبدالرحمن .. انا بروح بس أووب الثلاثاء .. يمكن الاربعاء او الخميس ..!
قال مايخالف .. اتفق مع عبدالعزيز وأنتم على كيفكم ..
هذا موجز المكالمة .. على بالي عنده سالفة ..
سكرت الجوال ودخلته مخباتي ..
عبدالله يبي يتطمن : هاه بـشـر !!
التفت لـه : بنـيـه ..!
عبدالله : افأ ..! ..
هزيت راسي وانا ودي اهون عن الروحة !!
زفرت : أوفففففف .. ياشين الواحد لامنه احتار ..!
عبدالله : مافيه شيء في هالدنيا الا وله حل سبحان الله .. ما خاب من استخار ولا ندم من استشار ..!
التفت لـه : على طاري ماخب من استخار .. داري أنا منول أحسبه حديث ..!
عبدالله : ايه انا حاس انه مجرد عبارة ..!
رجعت بي افكاري لروحـة مكة .. مدري اروح انا وخشمي الجميل .. ولا اقعد واخلي الروحة تروح علي .. مدري حسيت ان الروحـة ماتناسبني ...
عبدالله يسأل يبي يتطمن : طيب .. وش اللي محيرك ...!
جاوبت وانا من قلبي محتار : ياخي ابي مكـة .. بس ماودي اروووح ..!!
عبدالله يضحك على خفييف : هههههه .. وش نزين يعني ... نجيبها لـك ..!
حاولت اشرحله اكثر : ياخي ابي اعتمر .. ابي اجر .. من قل ذنوبي يعني .. بس يآخي مستصعب الوضع مع خشمي وو حـآلة .. والدكتور يقول تعال بعد اسبوع ..!
عبدالله يقترح : رح شاور الدكتور جرب ..!!
تنهدت : تدري .. بشوف عبدالعزيز وش يقول وبنسوي اللي يقوله ..
عبدالله يسألني : طيب لو قالك وش رايك وش بتقول لـه ..!
التفت لـه : بقوله رايي من رايك ..!
عبدالله : عبدالعزيز أصلا يثق فيك .. وأووب قايل شيء وانت في الموضوع .. أنت ابراهيم عاد ..!
حكيت ذقني وانا افكر في كلامـه .. فـعلا هذا عبدالعزيز .. مافي شخصيته امارة .. شخصيـته انقيادية اكثر .. لا ومعي بعد ..!!
سألت ابراهيم : طيب وش رايك أنت ..!!؟
عبدالله وهو يرفع حاجب : أحد تحصله مكة .. ويقول لأ ..!!!؟
تنهدت .. : عاد تخييل اروووح للقصيم .. وأجهز اغراضي من هناك .. ونمشي لـ مكة .. يووووه يابعده !!
عبدالله : عااادي ياخي أووب انت اساسا جاي للرياض تعتبر مسافر .. كمل سفرتك لـ مكة عاادي !
حاولت افهمه : لأ مكة غير الرياض .. مكة له اشياؤُه .. والرياض بعد ..!
قمت بسرعـة بقرار اسرع .. : الهمـة بس .. تآمر على شيء ..
عبدالله مستغرب : بسم الله عليْ ..! لا سلامتك .. الله يسهل دربك بـس !!
مشيت طالع : كنه طردة ..!
عبدالله يضحك : لا والله .. أووب قصدي ..!
طلعت من غير لا ارد عليه .. طلعت .. بس انصدمت مالقيت سيارتي .. طقيت جبهتي .. : الله يصلحك ياعبدالعزيز ...!
رجـعت ودخلت .. ناديت عبدالله : تـعال ..!
فيما قام انا طلعت من الملحق وطلعت للشارع .. هو لحقني .. ثم سألني : وش عندك ..!
ابراهيم : ابيك توصلن .. مامعي موتر ...!
ماعارض .. ركبت ووصلن بطلب مني للورشـة .. آخذت سيارتي .. ودفعت لهم .. وشكرت عبدالله .. ورحت لبيت عمي محمد الله يرحمه ...
دخلت سيارتي داخل بما ان الباب مفتوح .. وكآن عبدالرحمن هو اللي فاتحـه بيطلع .. ضرب لـي بوري ..وقفت سيارتي بمكانه .. ورحت لـه على رجليني ..
قبل يسألن انصدم : أوووه .. وش هذا ابراهيم ..!
جاوبته بهدوء : هذا واقي .. عشان لا ينكسر خشمي .. بس ممشوخ مشخ بسيط ..!
عبدالرحمن : لاه لاه لاه .. ولا ادري عنك ولا شيء ..
كذبت استغفر الله : توي جاي من المستوصف ملزقينه لي ..!
عبدالرحمن منصدم : كل ذا عشان مشخ ..!
كملت كذب : آيـه بليغ شوي .. وســع صدرك يارجال ..!
عبدالرحمن يكمل استجواب : وين شاربك طيب ..!
استهبلت عليه وانا ماودي اجاوب جواب صدقي : عند الحلاق .. وش عندك .. موقفني .. تبي الرخصـة !!
سألني وهو يتذكر : لأ ما ابيها .. بس وش كنت بقول .. أيـــه .. وش قررت ..!
عقدت حواجبي وانا انتبه لوعد معه وبنته .. وومدري ميييين ورى !!
سألت مستغرب : وين رايحين ..!
عبدالرحمن يرفع حاجب : شغلنا حامي بحامي .. نسيت وش انا قايل لك ..!
عقدت حواجبي مستغرب : لـمكة !؟
عبدالرحمن : لأ .. لبريدة .. ومنها لـ مكة ..!
بغيت احسدهم على شغلهم المضبط : مــاشــــاء الله ...!
عبدالرحمن يسألني : هاه وأنت وش قررت !؟
جاوبته : لاحقكم ان شاء الله ..!
عبدالرحمن وهو يريوس : الله الله بـ أخوي لاتنساه ..!
رفعت صوتي لـه : أفأ عليييييييييك ..!
طلع من البيت .. وانا على طوول على قـسم عبدالعزيز ..
*
*
*

*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: غرفتي ..
الوقت: الخامسة مساءً ..
ـــــــــــــــــــ
(عبدالعزيز)
حسيت بـه يهزني : قـــــم بلآآآ كـسـل ... يالكسرة ..!
تحركت شوي .. وأنا احرر يديني من تحت البطانية .. وعاقد حواجبي .. ابي اركز .. وش حنا ووين حنا ..! قمت قاعد .. : وش السالفة ..!
ابراهيم : السالفة ان حنا بنروح لـمكة وانت بذا نايم ..
ابعدت البطانية : قررتوا اجل ..!
استهبل ابراهيم وانا مالي خلقه : لأ بنروح وحنا ماقررنا وش رايك بالحركة الخنفشارية ...!
قمت واقف ... ورحت للحمام من غير لا ارد ..!
,, بعد ماطلعت .. كان هو يكلم عمي ناصر .. سكر ..
بعدين شرحلي : أخوك راح لبريدة .. وهذا عمي مـشـى .. الناس كله بتخلي الرياض من عقب الملك فهد الله يرحمـه ..!
زادت تشكيرتي : تستهبل ..!
ابراهيم : لا والله من جـد .. الهمام ياولد عمي الهمام .. عمي وراح مع حرمته .. وحتى أخوك .. ويلا أنا وياك بنروح .. يلا يلا بسرعـة تجهز ..!
وطلع تاركني .. وبس يقرر من غير لايشاور .. يالله مايخالف .. نشوف وش آخرته ..
ومثل ماقال بديت اجهز لـروحـة مكة ...
بعد صلاة المغرب .. كنا متجهزين .. على دربنا رحنا سلمنا على عبدالله واللي عنده .. ثم توكلنا على الله ..
رحنا لبريدة .. الموكب الثالث على قولة ابراهيم ..
اللي كان طول الوقت وهو يخربط علي .. يقول مالي قعدة بالرياض من عقب الملك فهد ..!
عليه استهبال ودي آخذ عنه نصـفه ..!
بس احسن يسولف ولا يقعد يهوجس .. وآخرتها نكون بخبر كانا ..!
ابراهيم يسألني : تدري وش سووا الرومانيين لما عبروا البحر المتوسط ..! ( فكروا قبل تقرأون الجواب )
عقدت حواجبي مستغرب من سؤاله .. بس تكلمت اصحح لـه : رومانيوون أوب رومانيين .. لأنها فاعل ..!
ابراهيم يكشر : يوووه ..جانا فيصل رقم اثنين ..
استهبلت وانا اتهرب من الاجابة : فيصل ابو اثنيييييين ..!!؟
ابراهيم يستهبل : لأ سامي الجابر احسن ..! المهم بس تدري ولا لا !؟
جاوبته : لأ .. وش سووا ..!
ابراهيم يرفع حاجب : نشروا ثيابهم في الشمس ..!
كشرت : يااااباااائخ ..!
ابراهيم ضحك فجأة : هههههههه .. باااائخ .. هههههه !!
طالعت الطريق : تدري لو اني اسوق واسمع جوابك كان ادحدر بالموتر .. واقلبه ثلاثة آلاف قلبه ..!
ابراهيم يكمل استهبال : ثلاثة آلاف قلبه .. ولا ثلاثة آلاف رئتـه ...! هه هه ..!
يووووه .. حطيت يدي على عيوني وأنا انزل راسي : لأ ما استحمل .. [ رفعت راسي لـه ] .. البلا ماصار من القايلة .. البلى صار من مسـكة الخط ..!
ضحك ابراهيم : هههههههه .. شفت عاد .. عاد من الرياض لبريدة وتسذا صار لي .. اجل اذا مسكت خط مكة وش بيصير ..!
اعترضت : لااااااا انا بمسكه ان شاء الله ..!
ضحك ابراهيم وماعلق ..
وبدى يمضي الوقت .. ووقفنا نصلي العشاء .. بنص الطريق ..
*
*
*

*
*
ــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: طريق الرياض بريدة ..
الوقت: 8:25 مساءً ..
ـــــــــــــــــــ
(ابراهيم)
سلمت عن اليمين .. ثـم اليسار .. وقمت .. وابتسمت لما استدرت .. وشفت أن اللي وراي أوب اثنين وبس .. صاروا حدود السبعة ..!
يعني انفع اجي مثلك ياسعود ..اول ماكبَّرت كان وراي عبدالعزيز وواحد ثاني .. والحين وراي سبعة الحمدلله ..
طلعت من المسجد .. ورحت للمحطة اشري لي شيء ارووق عليه بالسيارة ...
رجـعت للسيارة .. وعبدالعزيز كان معه كتاب يقرى فيه .. ما اهتميت .. كلمت سواقة .. وانا ادندن ..
من بعيد انتبهت لأنوار بريدة وعنيزة ...
عند المفرق .. خذت يمين ودخلت بريدة ...
وقفت عند باب امي لطيفة .. لأن مابه مكان عند بيتنا .. نزل عبدالعزيز .. ونزلت انا بعد ..ورحت ماشي لبيتنا ... وأنا اشوف عنده سيارة اخوي خالد .. وعبدالرحمن .. وسيارة ابوي بعد ..
دخلت والباب كان مفتوح ..
في المجلس كانوا جالسين يتقهوون ..! دخلت سلمت عليهم ... هبلتهم بخشمي ...
وكالعادة يعني .. ابد مشخ بسيط .. ومن هالكلام ..
بعد سين وجيم وازعاج .. تركتهم وانا ادخل اسلم على امي .. وناوي ارقد .. طبعا آخر مانمت بالمستشفى ..! والله يعين عاد ..
قبل ادخل الصالة .. وصلني سؤال وعد : هو من البداية وش مروحـه ..!
توقعتهم يتكلمون عني .. لذلك وقفت اسمع ..
جاوبت امي : آبـد .. رايح يبي ماء زمزم ..!
ركزت احاول افهم وش يقصدون ..
وعد تسأل مستغربه ..: يمـه السرطان يفرج فيه زمزم ..!
انصدمت .. سـرطـان .. سرطان آيــش ..!
امي تنهد : هذا سعووود عاد .. وبعدين وينتس من حديث الرسول صلى الله عليه وسلم ( ماء زمزم لما شرب لـه )..
وعد تبرر : على بالي العين والحسد بس ..!
امي تصحح لـه : هذا الما المقري بـه ..!
تسندت على الجدار وانا احاول اربط الكلمات ببعض .. سرطان .. سـعوود ... مويـة زمزم .. لأ .. مستحيل ...
دخلت الصالة .. وانا اقوي نفسي للمواجـهه ..
ناديت امي وانا اقوي نبرتي شوي : يـمـة ..!
اول مارفعت راسها وانصدْمَت .. ماقدرت اسأله ولا اسوي اي شيء ..!
نزلت راسي وانا اسلم بصوت واطـي .. وامشي .. رايح لغرفتي تاركهم ..
لازم ارتاح عشان بكرة بنروح لـمكة .. بس من وين ارتاح ولا كيف ..!!

*
*
*



*
*
*


**
*
ألقاكم ... مع الورقة العشرون بـ بإذن الله ..!!
.......
............................................إِمضاءْ ...
.......................................كُتلَـةْ جُــرُووح || ...

*
*

.................................. |[•• الــورقــة العـشـرون ..! ]|
------------------------------[ .. ليتها الأيام تهدى والسنين ..~


يآ ليتني بقيت بـ ضيق .. " بطنكـ يآ يمه "
ولآ 00 طلعت و ضآق بي ~ < وسيع هآلكون!


*
*
*
*
ـــــــــــــــــــ
اليوم: الثلاثاء ..
التاريخ: 27 / 6 / 1426 هـ ..
المكان: بريدة ..
الوقت: بعد صلاة الفجر بعشر دقائق ..
ـــــــــــــــــــ
(عبدالعزيز)
طلعت من المسجد .. لهم حدود العشر دقايق المسلمين طالعين ..
مشيت وانا احس ان فيني نوووووووم .. كملت تسحب .. وانا اطالع .. اعتقد انه خالد جالس يركب الاغراض بالشنطـة حقت عمي ..
وعند الجدار كان ابراهيم جالس وهو متسند .. مجرد منظر ...
كملت طريقي لبيت امي لطيفة .. ودخلته .. وعلى طول فوق على غرفتي .. الاشياء اللي بغرفتي وممكن احتاج لها اخذتها وحطيتها بشنطـتي اللي مجهزها من يوم انا بالرياض .. رجعت ارتب الاغراض اللي بالشنطـة .. آخذت شنطـة ثانية رياضية اصغر ..
حطيت فيها الاشياء اللي باحتاج لها في الميقات .. من احرام وصابون وأغراضي الشخصية .. والاشياء اللي باستخدمها يوميا وآخاف تضيع ..
طلعت من الغرفة وانا معي اغراضي كلها واتمنى ما اكون نسيت شيء ..
قبل اطلع من القسم .. وافاني عبدالرحمن .. كان مستعجل وبيدخل .. مسكني ..
عبدالرحمن يحاول يتذكر : آمم وش كنت بقووول .. آيــه .. ترا شذى بتلحقكم على مكـة .. بس مدري متى الظهر العصر ما ادري بس بتلحقكم من الرياض ...
هزيت راسي : زين خلاص ..
ودخل .. وانا كملت طريقي نازل .. بيمناي شنطـة ملابسي والشنطـة الثانية لابسها على كتفي ..
أول ماطلعت من الفلة من بابنا الصغير .. شفت سيارة عمي سليمان موقفة في الحوش .. ومفتوح بابها الوراني .. وقفت مستغرب .. بس لفت انتباهي احد في المرتبة الثالثة .. أساسا المرتبة الثانية فيها حرمة .. ما أدري مين ..
حسيت باللي ورا فيه بينهم شيء .. وفجأة ..جا شيء طاير من المرتبة الثانية وضرب في الباب المفتوح .. وطاح على الارض .. طالعت وصار شنطـة يد .. فيها جيوب كثيرة وتقريبا مليانة ...
نزلت الشنطـة .. وحطيتها على الارض .. وانا مستثقلها ..
اللي ورى صفطت المرتبة ونزلت .. من شفت ططولها عرفتها .. وغصب ابتسمت .. هذي جود .. كبرَت .. وصارت تلبس عباة ..
آخذت شنطتها ورجعت تركب .. وعدلت المرتبة .. وانا كنت واقف واطالعها ..
انتبهت لـ احد يطلع من باب الفلة الرئيسي .. التفت .. وكانت عمتي اسماء .. لافه على راسها طرحتها ومبتسمـة .. وماسكة امي لطيفة وتساعدها على المشي .. غصب تفششششلت .. واكيد هي عارفة انها بنتها ..
تراجعت ودخلت الفلة من بابنا اللي كان وراي .. وبالغلط طحت في شنطتي .. آآوخخ .. أقوى فشيلة ممكن اتفشلها ... احراااج الصراحة .. اووخ ..قمت ثم تسندت على الجدار .. آحرااااااج .. ابي وجهي ياناسس ..خذت نفس عشان اهدى .. انصت
لـ ظربات قلبي .. أصلا وقفتي هنا غلط .. لازم اطلع .. وقفت استعيد انفاسي ةاضبط وضعي شوي ..
قبل اطلع دخل عمي ناصر مستعجل .. بس وقف لما شافني ..!
سألني وهو يطالعني مستغرب : وش عندك ..!؟
ارتبكت ..خلقه انا مرتبك : آآ آبد .. ولاشيء ..
يأشر لي على برى يعني اطلع : يلا يلا لا نصييف ..!
آخذت الشنطة ثم طلعت وانا منزل راسي .. مشيت الى ان وصلت للباب الخارجي .. وطلعت للشارع .. حيث سييارة ابراهيم اللي كان متسند عليها من قدام .. ويحوس بكميرته ..
تقدمت وانا احط شنطتي عند السيارة .. وقفت عنده وأنا اسأله : بأي سيارة بنروح ..!
ابراهيم رفع راسـه : بسيارتي اتوقع .. لأن أمس خالد مآخذ المفتاح وشاف زيته وشغلاته ..
كان يتكلم وانا اطالع خشمه بسرحـآن .. يوم سكت .. حطيت شنطتي اللي على كتفي على تندة السيارة ..وأنا اطلب من ابراهيم طلب : تكـفى خـل اجرب اصورك ..!
ابراهيم ماله خلق : تستهبل .. والله مالي خلق شيء يا عبدالعزيز ..
تسندت جمبـه وانا مستغرب : ليه سلامات .. أمس وش زينك ..!
ابراهيم رفع الكاميرة ويجرب يشوف شيء من بعيد من خلالها : هذا أمـس ..!
سكت وانا التفت واوزع نظاراتي .. انتبهت لـ حرمة طالعة من بيت عمي ومعها شنطـة ...
لما قربت من عندنا كلمت ابراهيم وعرفتها كانت مرت عمي : ابراهيم خذ هالشنطـة معكم .. ترا به الاحرامات حقات ابوك واخوانك ..
حط كاميرته على التندة وآخذ الشنطـة من أمـه ..
اللي سألتني : وش آخبارك ياعبدالعزيز ..!؟
نزلت راسي منحرج : بخير الله يعافيتس ويسلمتس ..!
ابراهيم يسأل امـه : وين ريان !؟
امه : نايم للحين .. يجرجر فيه خالد ..!
سألها من جديد : بيجي معنا ولا معكم ..!؟
أمـه : لا معنا مابغاكم ..!
ابراهيم يكشر مما خلا الحاجز اللي على خشمه يرتفع شوي لأن الشمع مرتخي : أحسن ..!
امه تغير وقفتها وتسأله : ابراهيم وش ذا اللي في خشمك منه .. ومتى صار .. ترا كلام اختك امس مادخل مزاجـي ..!
ابراهيم يجاوب : يمه أنتم بالأول علموني وش فيه سعود .. وعطوني اعتباري .. وساعته بقولكم انا وش فيني .. اذا صرت من الاول ما اهمكم وماقلتوا لي .. خلاص انا ما اهمكم ليش تدرون عن اللي فيني ..!
أمه تبرر : الموضوع هذا تفاهم مع سعود فيه .. أما انا امك وانت ولدي ولازم اعرف وش فيك من أول مايصير فيك أوب اخر من يعلم .. سعود يوم صخنتُه علمن .. وانت صار لك اللي صار ولا تعلمن ..! تراك رافعن ضغطي ..!
اقبل عمي : وش عندكم .. يلاا .. كلهم ركبوا يلا مشينا ..
رااحـوا وابراهيم يفتح سيارته .. ومنها يفتح الشنطـه .. وبان القهر اللي فيه لما سكر باب السيارة بقووة ونفضني .. فتح شنطة السيارة .. ورفع الشنطـة اللي عطته امه وحطها بقووة .. رحت أنا وشلت شنطتي وركبتها .. وجا عمي ناصر وركب شنطته بعد .. وكل
الاغراض اللي قالوا لنا نآخذها ركبناها ..
ابراهيم يسكر شنطة السيارة : تراني أووب سايق ..!
عمي يمشي ويركب مكان السواق : أنا أسووق خلاص ..
مشـى ابراهيم وركب جنب عمي .. وانا مشيت للتندة وآخذت شنطتي وكاميرة ابراهيم اللي نساها .. فيما كنت راجع انتبهت لـ سيارة عمي طالعة من فلة امي لطيفة .. ومليانه .. ويسوق خالد .. غريبة انفصل الثنائي خالد وصالح .. ابراهيم فتح الدريشة حقته
.. ومديت له كاميرته .. وفتحت الباب الوراني وركبت .. وابتسمت لما شفت عبدالاله اللي متسند ومغمض .. سلمت عليه وقعدت بهدوء .. وانا خآيف من عصبية ابراهيم .. غريبة ..
تنهد ابراهيم وهو يكمل حوسة في كاميرته .. وشكله يغير اعداداتها ويجرب يصور فيها .. اووخ جديدة .. توني انتبه !!
الله يعطيه خيرها ويكفيه شرها .. عمي مـشـى بالسيارة .. : يلا بسم توكلنا على الله .. يلا شباب لاتنسون دعاء السفر .. سبحان الذي سخر لنا هذه وماكنا له مقرنين وانا الى ربنا لمنقلبون .. ادعوا ياشباب ترا دعاء المسافر مستجاب ..!
ابراهيم يتنهد : الله يآخذني يااااارب ..!
عمي يلتفت لـه بقووة : وش ذا الكلام يا ابراهيم ... عيب عليك ياخي .. عشان ايش تدعي على نفسك ؟؟...
ابراهيم يتنهد وهو يمسح بيده على وجـهه : لا حول ولا قوة الا بالله ..
عمي اللي كان رايق وانقهرر من دعاء ابراهيم : الله يهديك ويصلحك يارب ..!
ابراهيم منقهر : الله لايهديني .. اذا انا قاهركم .. تراكم قاهريني قبل اقهركم ..
عمي يبلع ريقـه : ابراهيم خلاص لا تتكلم ولا اتكلم .. نسكت احسن لنا كلنا ...
وعلى قولته .. سـكتوا ..
هذي أووب أول مرة ابراهيم يدعي على نفسه ان ربي يآخذه .. اتذكر في رمضان يوم كنت بـ 2 ثانوي .. انقهر من سعود وعلى الفطور قال الله يآخذني .. بس اللي عنده سعود عرف يخليه يروق قاله بعد عمر طويل .. بعدين قاله ترا ماصايح عليك الا انا ..
ابراهيم قال آيـه الله ياخذني قبل يزيدون ..! وبعدين جلس يتكلم عن العذارى اللي قطع قلوبهن وهن جالسات يدعن ان ابراهيم يخطبهن .. بس عمي ما عرف يمتص غضبه ...
سحبت نفس .. طيب يوم كنا في رمضان كان معصب من سعود وقال اللي قاله .. طيب الحين وش اللي قاهره ..!
انتبهت لابراهيم ينزل المرتبة شوي .. ويرفع يده ويحطها على عيونه ..
أما انا دفيت شنطتي الى ان وصلت عند عبدالاله .. وانسدحت وانا اتوسدها .. وياليتني انووم بـس ..!

*
*
*



*
*
*

ـــــــــــــــــــ
اليوم: الثلاثاء ..
التاريخ: 27 / 6 / 1426 هـ ..
المكان: الخط السريع ..
الوقت: 8:45 صباحاً ..
ـــــــــــــــــــ
(ناصر)
ماسك الخط .. والشباب اللي معي نايمين .. من أول ماركبنا تهاوشنا شوي .. وناموا .. ابراهيم منسدح شوي .. آما عبدالعزيز منفررش .. وعبدالاله مسترخي شوي ومتكتف .. وسبحان الله نايم ...! الظاهر لو نعلقه بالمروحـة عادي عنده ينوم .. ماشاء الله لا اله الا الله ...
انتبهت لـ سيارة اخوي وراي .. كملت طريقي .. اتوقع هم بيوقفون ..معهم بزارين وحريم وازعاج .. وحومـة كبد .. اما انا الحمدلله معي ابراهيم وعبدالعزيز وعبدالاله ..
اذا قاموا ان شاء الله وقفنا عند المحطـة .. بس شغلة .. أوقف عند محطـة واقومهم وهو مايحتاج ..
بس ياهم ماشاء الله نايمين من قلب .. يمكن من مشوار امس !! حتى بعد يمكنهم امس سهروا ماناموا على طـول .. وبعد هم شباب مايستغنون عن نومة الضحـى ..!
بس تبون الصراحـة انا مليت من مسكـة الخط ابي احد يعقبني .. أو أقلها يجلس يسولف معي .. ابي احس بأحد معي ...
ترفقت لما قربنا من وحدة من الدير اللي على طريقنا لمكة ..!
حسيت بابراهيم يتحرك .. مل من وضعيته الأولى في النوم .. وخصوصا ان الدنيا شمس خلاص .. أو يمكن من سرعة السيارة اللي خفَّت نبهته ان حنا ممكن نكون وصلنا .. تحرك يدور وضعية مريحـة .. بس ما ارتاح .. استقعد وهو يتمغط .. انتبهت لسيارات على جنب الطريق موقفة تبيع حج وجرو .. وحركات صيفيـة ..
ابراهيم وهو يتمغط : آبــي ججججــحح ..
استغربت منه .. سألته اتأكد : هــه ..!؟
ابراهيم يتثاوب : ابي حمام اغسل ...!
استغربت ليش غير عن الجح ..!
سألته وانا اشوفه يرفع المرتبه : ماتبي جح ..!
جاوب : الا بس اذا غسلت ..!
سألته ابي اتطمن : ماعاد تبي تنوم ..!
ابراهيم يسأل وهو مبتسم : مليت بروحك ..!؟
جاوبته وانا اطالع الطريق : يعني !!
كنت ادور مسجد عشان الحمام ..
ابراهيم يرفع صوته : ابي حماااام ..
انتفضت روعني : اطق الخنزيرة يعني وابني لـك حمام .. ولا اصيرر لك حمام احسن ..!
ابتسم من شكلي : لأ طـق الخنزيرة أحسن .. لأن لو صرت حمام أنت من بيسوق بنا !؟!
جاوبته منقهر : أعلمك الحين من يسوق بكم ...
وقفنا عند جامع .. : يلاا دحدر ..
ابراهيم يلتفت لـ ورى ويرجع يناظرني : تقدم شوي واشخط عشان يقومون ..!
افتح الباب : لأ حوول بس .. أنا بقومهم ..
نزلت من السيارة .. وانا اشوف ابراهيم قاعد ماتحرك أشرت لـه على دورة مياه الرجال : هذي هي الحمامات .. قـم يلاا ..
فتح الباب ونزل .. اما انا فتحت الباب الوراني .. الأقرب لـ عبدالاله اللي قام لما فتحت الباب .. نزل لما استوعب اني جاي اقومه ..
طالعت عبدالعزيز .. اللي كان نايم على يمناه ومعطي المرتبة اللي قدام ظهره ..
ناديته : عبدالعزيز ..
ثم بديت اهزه وانا اناديـه : عبدالعزيز ..
تحرك وكان بينقلب لجهته اليسار ..
وقبل يكمل قلبته .. حسيت بالسيارة تشتغل .. رفعت راسي وانتبهت لـ ابراهيم يدعس وشخط على طول .. مما خلا عبدالعزيز يكمل قلبته غصصب .. بس الحمدلله ماطاح تحت المرتبة .. استقعد يستوعب .. بس الحمدلله ابتسم يوم انتبه انها حركة ابراهيم ..
صلبت طولي وأنا ناوي اروح للحمام : قـم قـم يلاااه ..!
عبدالعزيز مضيق عيونه : وصلنا الطايف ..
ابتسمت من سؤاله .. بس ابتسمت اكثر وانا اسمع ابراهيم يضحك ..
زين تغير مزاجـه عقب الصبح ..
ابراهيم ينزل من السيارة وهو يضحك : لأ وصلناا مكـة هههههههههههاااي ...!
تركتهم .. ودخلت داخل ....
بعديييين طلعت أول واحد وهم يستهبلون ورايقين .. وموسعين صدورهم .. طالعت السيارة طيييب اوريك يا ابراهيم .. ركبت في مكانه ..
نشوف من يسوق بكم ألحين ..!
جـا عبدالاله و ابراهيم وهم يضحكون .. اكيد ان ابراهيم هو اللي يستهبل .. جا وفتح الباب علي ..
ابتسمت لـه ابتسامـه عريضـه ..
ضحك هـو .. سكر الباب ... وركب ورى مع عبدالاله .. ضحكني .. راعي طويلة الأخ ..
وأما عبدالعزيز .. عاد اطول واطول ..
عبدالاله : اتحدى اذا عبدالعزيز مادخل الحمام مرة ثانية ..
ابراهيم مـط عمره وضرب بوري طويل .. وبعده بوري قصير ..
اطقه على يده : ازعجت النايمين ..
ابراهيم يرجع مكانه بعد المطـه : ابي النايم عبدالعزيز يقوم ..!
وأخيراا جا عبدالعزيز .. مستعجل ..
وعلى طـول فتح الباب الوراني على نياته بيركب في مكانه ..
وقف وهو مستغرب وجود ابراهيم اللي مبتسم لـه ابتسامـة عريضـة ..
عبدالعزيز مستغرب : وش فيكم ..
ابراهيم : ننتظر السيارة تمشي ..!
عبدالعزيز مازال مستغرب : كيف ..!
ابراهيم : المفتاح ومعللق .. والمكان فاضي .. حنا ننتظر احد يجي يتكرم يشغل السيارة ويمشي ..!
عبدالعزيز يسكر الباب : خلاص انا اتكرم ..
على كلمة ابراهيم : ياهووووووووه ..!
عبدالعزيز دار على السيارة وهو مبتسم .. والله انه حبيييييييييب ..
ركب .. وشغل .. ومشـى ..!
طبعا رجع .. وسألني وين اروح معه .. وخليته يرجع مع نفس الطريق اللي جيت معه ..
ومرينا من عند اللي يبيعون جح ...
ابراهيم يززعج : ابي جح ابي جح ابي جح ..! تكفووون ..!
التفت لـه : تو يوم قلتَ ابي جح قلتلك هـه .. قلتَ : ابي حمام .. خلاص وديناك للحمام ..
ابراهيم يسوي نفسه بزر : نأ نأ .. ابي دحححح ..!
عبدالاله يستهبل عليه : تبي دح ادححححـك ..
ابراهيم : لأ ابي جججححح ..!
عبدالعزيز على حبابته ترفق ووقف ..
رفعت يديني بـ ( مالي دخل ) وانا احذرهم : تراني ماراح ادفع ..
ابراهيم : أنا ادفع وياويلك تآكـل ..
ابرهيم كنه تذكر شيء .. مـط عمره .. وآخذ الكاميرة اللي رغم بعدها وصل لها .. كانت عند رجليني ..
آخذها من حزام الشنطـة حقتها ..
عبدالعزيز يسأل : من ينزل يشتري ..!
ارفع يدين من جديد : طلعوني منها ..
ابراهيم بنظرة ترجـي : عبدالعزيز تكـفى .. خلك اكبر منه وانزل ..!
طالعت ابراهيم مستغرب : بالله ..!!
ابراهيم يطلع الكاميرا ويشغلها ويجاوبني بهزة راس : وقسسسم بالله ..!
نزل عبدالعزيز ..
وابراهيم شغل كميرته .. ويرفعها عند عينه اليمنى وهو مسكر اليسرى ..
*
*
*

*
*
ـــــــــــــــــــ
اليوم: الثلاثاء ..
التاريخ: 27 / 6 / 1426 هـ ..
المكان: الخط السريع ..
الوقت: 9:25 صباحاً ..
ـــــــــــــــــــ
(ابراهيم)
نزلت الكاميرا وانا منصدم من سؤال عمي .. لما استوعبت سؤاله .. واستوعبت ضحك عبدالاله .. انفجرت من الضحك .. وانا اتراجـع وبقوووة من الضحك ..! وانا مالي السيارة بصوت ضحكتي .. الكبيرة .. اللي غطت على ضحك عبدالاله استمريت اتلوى من الضحك الى ان سأل من جديد وهو يحك رأسه : أنا وش اللي مخليني اسألك من الاساس ..
رجعت اقعد واتوازن .. : عمي بالله وش هالسؤال .. لـحد يسمعك تكـفـى ..! الحمدلله بس ان مافيه الا انا وعبدالاله بس في السيارة ..
عمي انقهر شوي .. قال يرقع : عاادي سؤال منطقـي ..
أوومـا هههههههه : بالله بالله وين مكمن المنطـق في سؤالك .. !! [ أردد سؤاله ادور شيء منطقي فيه ] " تصوووب عليه ..! " [ اسوي نفسي افكر وارجع اعيده ] اممممم .. " تصوووب علييه ..! " ..
ما قدرت اضحك من اعادتي للسؤال : ههههههههههههههههههه .. بالله عمي كيف تجرأت تفكر في السؤال قبل لا تفكر تسألن اياو من الأساس ..!
عمي يصرف : طلع لا شعوريا .. ترا هذا تأثير قلة النوم ..
عبدالاله يعطيه عذر ثاني وهو يضحك على خفيف : وماسك خط بعد ..
تذكرت حجتي لما سمعت حجـة عبدالاله له : آيه صح صح .. اللي يمسك خط سبحان الله ينقلب رأسـه ..
رجعت ارفع الكاميرا : خل نصوووب عليه قبل يجي بس ..
خذت لـه صورة وهو ماسك جحـه ومعقد حواجبه من الشمس وشكله يناقش السـعر ..
حسيت الصورة ماكانت بذيك الجودة .. لأني مآخذه من داخل السيارة .. فتحت الباب ونزلت ..ووقفت في مكاني وأنا آخذ صورة لـ عبدالعزيز .. اللي بيمناه مآسك الجحـه وباليسرى يحوس بجيب الصدر يدوور خمسـة آريل اعتقد عشان يدفعه ..
دفع .. وآقبل يمنا ومبتسم بالرغم من حواجبه المعقودة وعيونه المرصصـة من الشمس ..! آخذت لـه صورة بعد ..!
ركبت .. وركب هو بعدي .. وحط الجحـه بينه وبين عمي ..!
حرك عبدالعزيز وهو يسأل : هاه وين نروح الحين ..
عمي يجاوب : نروح لـ بقالة نشتري شيء نفطر عليه وشي نقطع بـه الجحـة ...
وعل قـولته .. رحنا لبقالة .. نزلنا كلنا يا الأربعة ..
خذينا من كل مانشتهي .. وعمي آخذ سكاكين ..
كنا في البقالة نستهبل وفالينه ..
المهم آخر شيء قررنا نرجـع للسيارة اللي سبقنا لها عمي ..!!
حطينا الأغراض على الطاولة .. والعامل يحسب ..
حطها بـ 3 كيس يمكن ..!
العامل : تلاته واربئين ..
استغربت أو شكيت اني ماسمعت : كــم ..!
حرك الحاسبة لـجهتي عشان اشوف الرقم .. ونطـقه وانا اشوفه ( 43 ) : تلاتة وأربئين ..
صححت لـه : ثــلااثــة وأربـعـييييين ...!
عبدالاله ماكان لـه خلق .. طقني بظهر يده : ياخي من زين حتسيك عاد أنت .. عطـه وخل نتوكل ..!
قهرني .. التفت لـه : مالك دخل فيني .. وبعديييييييين انا ما معي 43 عشان ادفع ..!
استدار عبدالاله وأشر لـ عمي .. تعال حاسب ..!
بس أشر لـه عمي بـ مالي دخل .. وأشر علينا .. كنه يقول تصرفوا ..
طلعت اللي بجيبي : أنا معي 20 ..
عبدالاله : أنا بدفع ثلاث طعش ..!
عبدالعزيز اتجرنا عاد .. أو بالأصح اغنانا : أنا ادفع الباقي ..!
عبدالاله : وش عاااد ذا الباقي كـله عشرت آريل ..!
التفت لـه : بس عجزت عنه وهي عشرة اريـل ..!
عبدالعزيز : وش فيك أنت اليوم ياعبدالاله ..!
آخذ الكيس وأطلع : مانام بـس .. الله يريحني بس ..
رحت وركبت .. وعلى طول ادور بالكيس على سكين .. جـا عبدالاله وعبدالعزيز ..
ركـبوا وشغل عبدالعزيز ومشينا ..
وأنا في نص المرتبة الثانـية .. خربته وبديت اشلخ الجحـة .. اللي كانت بين عمي وعبدالعزيز ..
والمفاجأة انها حمرا على غير ماتوقعت .. وحماره يشهههههي ..!
علقت على حماره : ماشاء الله تبارك الرحمن يا عبدالعزيز .. لـو انك مشلخ الجح جحـة جحـة ما جبت لنا بذا الحمار ..
عبدالعزيز التفت لي شوي وابتسم .. بعدين بظفر اصبعه قـر الطبقة الأولى من قشرة الجحـة : شف هاللون الاخضر الفااااتح يدل ان الجحـة حمراء .. خصوصا ذا المخططات ..!
استغربت : أوو لله .. معلومة جديدة ذي ..!
عبدالعزيز يرفع يآقـة ثوبـه : اجــل .. أنا عبدالعزيز .. أووب ابراهيم .. اللي اذا فتح فـمـه قتلنا بالغبرة ..!
جاوبته : مافضيت ارد عليك [ آخذ اول شلخـة وامده لـ عمي ] سـم ..!
يآخذه مني : سم الله عدوك ..
بديت اكمل تشليخ وأنا اسمع عمي مع اول قطعة يآكله : آمممممه .. الله يسلم آنامل اللي شراها بس ..!
آمد القطـعة الثانية لـ عبدالعزيز : خـذ ..
يهز رأسـه بتكشيرة : مابي مابي ..!
استغربت : يارجااال خذ بـس ..!
عبدالعزيز يطالع الطريق وهو يحرك يده بـ لا : ماينفع لـي .. وبعدين مع مسكـة الخط ذي .. كلها انت عليك بالعافيـة ..
آحرك يدي اللي ماده آحاول اغصبه : تشتريه وما تآكـل ..
عبدالعزيز : بس بس الله يعافيك .. ماينفع لـي الجح ونا خوك ..!
نزلت يدي لما استوعبت .. انقبض قلبي بقووة .. ابسط شيء .. ينحرم منه .. جح ..! فاكهة الصيف ..
اطبقت شفايفي وانا ابلع ريقي .. كيف ما انتبهت انه فيه سكر وماينفع لـه الجح .. ومن قوات الوجـه بعد .. مخـلينه هو اللي يشتريه .. التفت لـ عبدالاله بعطيه اللي معي .. بس حضرته نـام ...
تنهدت وأنا احط القطعة اللي معي على الكيسـة اللي حاطينه تحت الجحـة ... تقهر الدنيا يوم اقرب الناس لي مصاخين ..!
حسيت بالغبنـة لـهم .. هو وسعود .. ذا سكر وذا سرطـان .. حسبي الله لا اله الا هو عليه توكلت وهو رب العرش العظيم ..
عبدالعزيز يآخذ القطـعة اللي حطيت .. ويقربه عند المكيف ..
تسندت وانا نفسي منسده ..
استغربت حركـة عبدالعزيز وهو معه قطـعة الجح ويقلبه عند المكيف ..
رجع مده لـي : ابراهيم امسك بردت الحين ..!
رفعت يدي واشرت بـ لا : لا لا ما ابي ..!
عبدالعزيز مابين يلتفت لي ومابين يطالع الطريق ..: الحين صاجنا [ يقلدني ] ابي جح وابي جح ..! وآخرتها ماتبي .. خذ والله ماتردني ..!
رفعت ظهري وآخذت القطـعة .. وعرمت اول عرمـة .. كانت لذيذة بس ماكنت اتطعم ..!
واستمريت آكل وانا احس ببرودة القطعة اللي معي كل شوي درجـة حرارة شكل .. يوم خلصت ماكله .. حركت القشرة وانا افكر وين احطه ..!
عبدالعزيز اللي فهمني اقترح : حطها في مخبات عبدالاله ..!
ابتسمت : كنك تقرى أفكاري ..
عبدالعزيز ابتسم : اقرا افكارك أنا مايحتاج تقول "تسنك"..!
التفت لـ عبدالاله الناااايم وبقووة .. هذا أولوياته في الحياة .. النوم ثم النوم ثم النوم ..!!
حطيت القشرة في مخباته .. ورجـعت آخذ حقت عمي واحطها بعد بمخبات الصدر .. وووههههه .. نتحراله يقووم .. عشان نضحك مع بعض ..!
ومشـى الوقت .. بين نآكل جح عشان عبدالعزيز .. وعشانه نعمـة وبين نتغصبه .. أنا وعمي .. المشكلة ان عبدالاله نايم ولا كان نخلص الجح بوقت اسرع ..
المهم حنا خلصنا نصه الحمدلله ...
وبعد ساعـة قام عبدالاله .. وخذ ياصجـة وتفليق بالقشر من القهر ..!عبدالاله منقهر وعارف انه انا السبب .. وما غير مستقصدني بالقشر اللي كـله في مخابيه ..
وعبدالعزيز يضحك : حراام عليكم نعمـه ..!
رديت وأنا اضحك : لا لا ههههه .. كانوا الصحابة يتراجمون بالجح ولا قال لهم شيء الرسول صلى الله عليه وسلم ..!
والحمدلله رجعت اضحك من جديد .. في هالروحـة اللي باديها بنكد ..! والله يعين ..!

*
*
*
*
*
ـــــــــــــــــــ
اليوم: الثلاثاء ..
التاريخ: 27 / 6 / 1426 هـ ..
المكان: الخط السريع ..
الوقت: 1:25 ظهراً ..
ـــــــــــــــــــ
(عبدالعزيز)
سكرت المصحف لما سمعت ابراهيم يتملل : أوفففففففف ..
سأله عمي ناصر : وش فيك ..!
ابراهيم : يااخي ظلم .. أنت تقول نتناوب ساعتين ساعتين ساعتين .. عبدالعزيز قاعد اقل من الساعتين .. وانا الحين ابكمل الثلاث ساعات وانا ماسك الخط ..!
عمي مستغرب : ياكذاب .. اتحداك قاعد ساعتين ونص ..!
ابراهيم بانفعال مما ازعج عبدالاله المتركي علي ونايم : ياااحبيبي .. يعني تبيني اكمل ساعتين ونص ..! يرحم امك ارحمن ..
عمي يرفع جواله ويرد وهو يسوي لـ ابراهيم حركة اصبر شوي : هلا ..!
عمي ينصت للتوصيف : آيــه .. زين زين .. جايينكم آلحين ..!
سكر وكلم ابراهيم : ابوك يقول وقفنا نصلي ونتغدى .. تعالوا معنا ..!
ابراهيم منقهر : آخيرررا وشو عقبه ..!
كمل طريقه الى ان وصلنا لـ مدري مطعم مدري محطـه المهم في غرف اجار بالساعة .. حلو حلو ..
وقف ابراهيم سيارته على جنب .. ونزل .. ونزلنا كلنا بعد ماصحينا خيشتنا الجميلة على قولة ابراهيم .. ونزل يترنح مسيكين ..!
دخلنا داخل .. خذنا غرفتين .. وحدة للحريم والثانية للرجاجيل ..
وعمي سليمان مرة وحدة طلب غدا ..
الحريم دخلوا بغرفتهم .. وحنا يالرجاجيل رحنا للمسجد نصلي .. طبعا انا رحت للحمام .. وطلعت وتوضيت .. وعلى اقل من مهلي .. وصادف ان ابراهيم متأخر في سرى الحمام بعد .. عشان كذا آخر شيء .. رحت أنا وياه نصلي جماعة ..
صلينا الظهر والعصر جمعا وقصرا ..
طلعنا من المسجد .. ورجعنا للغرفـة ..
دخلنا وكان فيها سريرين وتبعها حمام واحد فقط .. نعمـة ..!
طبعا سرير نايم عليه عبدالاله .. ومعه عمي ناصر بس جالس .. والثاني منسدح عليه عمي .. وعلى الارض .. ريان وخالد .. دخلنا وقعدنا .. ننتظر الغداء .. اللي طوول شوي .. آخر شيء عمي قال لنا انا وابراهيم بما اننا الصغار نروح نشوف وش صار ..
رحنا وخذنا غدانا من مطعمهم البق ماشاء الله ..
آخذنا آول شيء غدا الحريم ورحنا نوديه .. أنا كنت شايل الصحن الكبير .. والصحون الثانوية مع ابراهيم وراي ..
أنا كنت مستعجل لأني ابي انزله بسرعة .. وصصلت عند غرفتهم .. وحطيته عند الباب .. متوقع الباب مقفول .. بس وللصدمة لما فتحته انفتح .. اوفففف حسيتني وقح بحركتي .. اول ما طاحت عيني على نفس الفتاة اللي شفتها قبل نمشي من بريدة وشافتني امها وانا اشوفها .. نفس الحركـة تنعاد .. أشوفها بالغلط وتنتبه امها .. وبكل رحابة صدر .. تمتص الفشيلة بابتسامة كنها تقول عادي .. انا رجعت وتركت كل شيء .. وامشي تاركهم ويوافيني ابراهيم مستغرب .. مشيت رايح لما ادري وين ..
نهاية السيب .. اللي بطوله كنت كاره اني انسان بصري .. لأن البصري ينتبه لأي شيء تطيح عينه علي حتى لو بالغلط أما السمعي يمكن مايننتبه ... أو الحسي ..
آخر السيب .. استوعبت اني امشي من غير لا انتبه .. وصلني ابراهيم ركض ..!
احرجني : وش هالاحراج ياشيخ ..وجهك عند الباب للحين ..
مشيت من غير لا ارد .. ابراهيم قسم بالله احيانا ودي انفيه من الوجود ..!
رجعت للمطعم .. ولما سألت عن صحنا الثاني .. قال .. أنه جهزه بس جا واحد طلب مستعجل وآخذه وحنا الحين نجهز لـك صحن ثاني ..
طلعنا من المطعم لأن الريحـة خلااص تخلي عصافير بطنك الطرمى تزقزق ..! مدري وش دخل طرمـى .. بس مبالغة ..
طلعت برى .. لما شفت سيارة ابراهيم ..
طلب مني انتظره بيجيب كمرته .. فيما راح يجيبها .. رن جوالي .. وكان عبدالله ..
رديت : هلاا ..
عبدالله مبتسم بهدووء : السلام عليكم ..
ابتسمت مثله .. ورديت بنفس اسلوبه : وعليكم السلاام ..!
عبدالله : وش آخباااركم وعلومكم ..
ابتسمت : الحمدلله بخير والله .. أنتم بشروني عنكم وعن الرياض ..!
عبدالله يستهبل : آآه يالرياض .. تبكي عليكم ..! [ ويتكلم بجد وأحسه يطلع لسانه ] .. والله مادرت عنكم ..!
جا ابراهيم يحووس بكميرته .. اشغلته الله لايشغلنا ..
رديت : آيـه كثر منها ..
عبدالله : واخبار وعلوم ..! وش لقيتوا مكـة ..!
استغربت سؤاله من جده ذا : مابعد وصلنا ..!
ضحك : ههه عارف .. انا من دريت انكم ماشين من الرياض للقصيم ثم رحتوا لمكة وانا قايل ماتوصلون الا اللييييييييل .. واتحدااك ..!
ضحكت : ههههه .. نبي موكب كامل يمشي .. يعني تعرف .. عبدالعزيز بن محمد اطال الله في عمره معهم يعني .. يحتاجون موكب .. سيارة ورى وسيارة قدام ..!
ضحك : هههههههه .. ترففق بس .. متى ناويين ترجـعون ..!
ضحكت : هههههههههه تونا رايحين ياشيخ .. وبعدين اذا تبي علم صح انا ما ادري .. العلم عند عمي سليمان .. بمشاورة اعضاء اللجـنة .. الموقرة ..!!
عبدالله : آيــه آجل ترجعون بالسلامـة..
طالعت سيارة ابراهيم : الله يسلمك ..
عبدالله : اتركك اجل .. واتصل علي اذا وصلتوا مكة أو الطايف ..
: ابشر ان شاء الله ..
عبدالله وصوته : ما اشغلك اجل .. مع السلامـة ..!
: مع السلامة ..
وسكرت ..التفت لابراهيم وانا كنت افكر في فكرة جنونيه ...
وقفت عنده وهو يحووس بكمرته طالعته : ابراهيم ..
رفع راسـه ..
اشرت على سيارته وبتحدي : تحداني اطمرها ..!
تقدم شوي ووقف جمبي مستغرب : مين ..!
جاوبته بابتسامة وانا اترقب ردة فعله : سيارتك ..!
ابراهيم يطالع سيارته : سيارتي ..!! [ واستبعده علي ] أووومااا .. [ وبنبرة سريعة قوية : اتحداااااااك ..!
دخلت يديني بجيوبي وافرغهن : كم لـي ..!
ابراهيم يفكر وهو مستبعدني اسويها : آممم .. وش تبي .!
رفعت حاجب وأنا أأشر براسي على كمرته : اصوورك بخشمك هذا ..!
ضحك ابراهيم : يرضيك تسذا .. اتحدااااااااااااااك اجل ..
عطيته جوالي والاغراض اللي كانت بجيبي .. من أوراق وغيره وغيره : امسك ..!
آخذ الاغراض .. وانا امسك طرف ثوبي واربطه على بطني .. وارجع شوي وافصخ نعالي .. واركض .. كانت حرارة الشارع تجبرني اسرع .. والهدف اللي قدامي كذلك .. ركضت باسرع ما تستطيعه رجليني الطويلة ..... وانا مبتسم بتحدي ... والله يعديها على خير .. ومايراق ماء وجهـي بس ..

*
*
*