.................................. |[•• الــورقــة السابعة عـشـر ..! ]|
------------------------------[ .. تعبـــــــت يآآ دنيا الشقا عزتالي ... ~


لا حشى ماقلت حظي صار ميت
هو انا لي .. حظ حتى إنه يمووووت


******
******************
************


*
*
*
ـــــــــــــــــــ
اليوم: الأحد ..
التاريخ: 25 / 6 / 1426 هـ ..
المكان: الملحق ..
الوقت: 9:45 مساءً..
ـــــــــــــــــــ
( عبدالله )
دخلت الملحق توني مخلص اللمبة اللي كانت بالحوش ..
أول مادخلت كان ابراهيم يطيح .. طآح على حافة الطاولة ..
عقب ماسمعت صوت ارتطام خشته بالخشب ..
سمعته يتألم بقووة : آووع ..
قام وهو حاط يده على وجهه .. إما خشمه او فكـة .. على طول وقف .. وأنا وقف شعر جسمي لـه .. وماقدرت ابلع ريقي .. أو الغصة اللي وقفة في نص حلقي ..!
وقفت قدامه ابي اشوف وش جاه ابي اساعده ..
عبدالله : ابراهيم بسم الله عليك .. ورني وش جاك ... [ سألت بصوت أعلى وانا انتبه للدم ] وين جـآ ذا الدم منه ..؟؟!
ابراهيم ضاغط بقوة على فمه وخشمه .. يمنع الدم أو من الألم .. وعيونه ماتناظر مكان معين ..
بدر يحاول يشيل يدين ابراهيم : شل يدينك عشان تقدر تتنفس ..!
كان الدم غصب يطلع من بين يدينه ..
مد لنا محمد مناديل ..
على طول ابراهيم يوم حس انه خلاص موقادر يتنفس مشى طالع ..
طلعت معه على طول .. وانا اأشر لهم ( لا يطلع احد ) ..
ابراهيم وقف عند المغسلة .. نزل يدينه وانكب دم ... يكفي يجي كيس كامل من كيس المستشفى !! ووخ ..وجلس يكح .. وأنا واقف اطالع ..
لون المغسلة اساسا ابيض .. بس صار احمر ..!
طالعت وجهه ابي اشوف من وين الدم هذا !؟ كان من خشمه اكثر شيء .. بس كان يكح دم .. أو يمكن يستفرغه استفراغ ..!
كان مكشر بقوووة .. فتح الموية وبدا يغسل يدينه .. وغسل وجهه ..بس مازال خشمه ينزف .. جبت له مناديل .. وانا واقف عنده .. ابي اساعده بس أووب عارف ...
غسل وجهه .. وغسل وجهه ..وبانت ملامحه اكثر ..
عبدالعزيز واقف عند باب الملحق ..
تكلم بصوت مرتجف : أووب زين تغسل شيء ينزف ...!
ابراهيم صلب طوله .. وآخذ مناديل ..
وانصعقت وانا اشوف خشمه .. كآن .. كان .. كاان مورررم بشككل .. أوووف وش هذا ..!
مسكت وجهه خايف يلتفت للمرايه .. : ابراهيم .. خل نرووح للمستشفى تكـفى ..!
رفع المناديل لخشمه .. وحطه على خشمه وفمه من غير لايمسح شيء .. كنه يبي المناديل تمتص الموية وبس ..!
نزل المناديل .. وكان فيه دم ..
جا عبدالعزيز وقف جمبه .. : ماوقف ..! خل نروح للمستشفى ..!
عبدالعزيز يقدم ابراهيم شوي يحثه : يلآآ يلآآ ..
ابراهيم تكلم اخيرا بصوته المتغير : طيب خل البس نعالي ..
تركه عبدالعزيز .. راح لبس نعاله اللي كانن عند باب الملحق .. وانا بعد رحت البس نعالي ..
فيما طلعت انا وابراهيم كان عبدالعزيز في سيارته ينتظرنا .. ركب ابراهيم ورى .. واشر لي عبدالعزيز اركب معه ورى ..
ركبنا .. وشغل عبدالعزيز .. ومشـى عبدالعزيز مستعجل ..
ابراهيم كان متسند وكنه رافع راسه شوي ... : عبدالعزيز ..
عبدالعزيز التفت لـه ثم رجع يناظر الطريق : نعم ..
ابراهيم : لـحد يدري من اهلي .. تكفى ..!
التفت له عبدالعزيز : ان شاء الله .. ابراهيم .. [ أشر له بيده .. وهو يطالع طريقه ويرجع يلتفت لـ ابراهيم ] قدم شوي .. نزل راسك .. لا يدخل الدم منداخل .. وانت المفروض تتطلعه ..
قدم ابراهيم ونزل راسه ... بدا يكح .. ويطلع دم ثقيل شوي .. كنه قطع ..
عبدالعزيز متوتر وهوو يسوق : المفروض معنا ثلج ...
مديت يدي وخذت مناديل من قدآم ... وعطيتها ابراهيم ...
وصلنا للمستشفى .. وقفنا عند باب الطوارئ ...
عبدالعزيز: انزلوا فيما اوقف سيارتي في اي مكان ..
فتحت الباب ونزلت بسرعة .. رايح افتح الباب لا ابراهيم ..
بس هو فتحه قبلي .. والمناديل على خشمه ..
سألته : ماوقف ..
جاوب برفعة كتووف دلالة على ما أدري ..
دخلنا الطوارئ ..
قلت للي في الاستقبال وانا ماسك ابراهيم : دكتور الله يخليك ..!
جا ممرض ومسك ابرراهيم ودخلنا عند سراير الطوارئ ..
جت دكتورة انا طلعت عيوني من جدها ذي ..
ابراهيم يشد علي بقبضة يده اللي كانت على يدي ...
صرخت وانا معصب : أقووولتس نبييي دكتووورةةة ...!
حسيت بصدمتها .. ولا من جدك يعني تبينّـي أخليك أنتي تعالجين ابراهيم ..
ابراهيم يشد علي بقبضة يده اللي كانت على يدي ...
ابراهيم يشد اكثر مما خلاني اتوتر ..
انقهرت من كل شيء وصرخت من غير ان ارعي تركيزي لأي شيء حووولي : نبي دكتوووورة أقولتس ..
كانت واقفة تناظرني من غير لاتسوي شيء .. ووش تبـــييييي ذي .. أووف .. لاحول ولاقوة الا بالله ..
تكلمت بالهداوة : دكتووورة ...
انتبهت للغلط .. أووخ هههههه ..
صححت لنفسي وانا احاول احافظ على موقفي قوي .. تكلمت بصوت عالي شوي : ابي دكتوووووووووووووووررر ...!
تاففت وهي تلتفت لورى وتمشي .. شافت دكتور ..
وأنا منقهر واطالعها .. كلمت الدكتور اللي شافته .. عجبني انه منزل راسه ...
بعدين جا لأبراهيم ..
كان ابراهيم خلاص انهد حيله .. تركني وكان بينسدح .. بس مارضى الدكتور .. وهو يعطي الاوامر للممرضة .. تآخذ دم .. وتركبله الغذاية ..
سألني : عطني اسمه وعمره !؟؟
جاوبت : ابراهيم بن سليمان الـفلآآني .. 19 سنة ...
سألني مرة ثانية : عنده سكر او شيء !؟
جاوبته : لا ابدن ..!
الدكتور: طيب رح عطهم بياناته في الاستقبال .. وووو .. تقدر تنتظرني برآآ ..
انسحبت : ان شاء الله ..
رحت للاستقبال وعبيت كل البيانات المطلوبة ..
ثم رحت جلست على كرسي كان من ضمن مجموعة كراسي .. موجودة في السيب ..
دخل هاللحظـة عبدالعزيز .. يتلفت .. أشرت له ..
جا وجلس .. وسأل وهو خايف : هاه وش صار ..!؟
جاوبت : عنده الدكتور .. أنا تركتهم ..
عبدالعزيز متوتر : الله يستر بس ..
نزلت راسي وأنا ادخل يدي في شعري .. : والله كانت طيحته تعوور القلب .. كله ولاخشمه ... والله كان يخووف ..
عبدالعزيز : أنا من شفت طيحته وانا متوقع اي شيء ..
رن جواله .. طلعه من مخباته وهو يقول :الله يستر بس ...!
آي والله .. الله يستر ...
ميل الجوال لناحيتي عشان اشوف المتصل .. وكان مكتوب : سعود ..
ضغط صامت : ما اقدر ارد ولا اقدر اكذب عليه ..
خذت نفس .. وانا احاول اكون متفاؤل وأنا خايف وبقوة ..
أول مرة ابراهيم يجي للرياض من غير اهله .. بالعادة يجي مع سعود .. وأمه ,, وأخواته .. الا هالمرة ..
واتوقع اول مرة يروح لمكان بروحه من أول ما اخذ الرخصة .. الله يستر بس ...
*
*
*
ـــــــــــــــــــ
اليوم: الأحد ..
التاريخ: 25 / 6 / 1426 هـ ..
المكان: شقة من شقق مكة ..
الوقت: 9:55 مساءً..
ـــــــــــــــــــ
( سعود )
استقعدت وانا مستغرب من ابراهيم .. من جده هذا مايبي يرد ...!
جربت ادق على عبدالعزيز .. يرن ويرن ويرن .. ونفس الشيء مايرد ..
رن جوالي .. فزيت .. بس تراخيت يوم شفت المتصل بيتنا ...
رديت : السلام عليكم ورحمة الله ..
أمي : وعليكم السلام ورحمة الله .. وشخبارك يمة ..!
سعود : بخير الله يسلمتس يمـه أنتي وش اخبارتس !..
امي : بخير ولله الحمد ..
سعود : يمة جربتي تكلمين ابراهيم ..
امي : عن وشو !؟
سعود : عن روحتكم مكة ..!؟
امي : لا ماقلت له .. انت قلتلي انك انت بتقوله ..!
سعود : ادق عليه مايرد ..!
امي : تراه في الرياض هو ..!
سعود : ايه ادري .. كلمته انا بين الصلاتين ..! قلتله عندنا لك مفاجأة .. وتكلمنا واجد آخر شيء يقول لاعاد تدق .. هههههه .. رفعت ضغطه ..
امي : ياعميري هو .. من يوم انه بذا عندنا وهو مرتفع ضغطه من ابوك .. أوب مخليه ينوم ولاشيء ... آخر شيء راح للرياض ..
تنهدت .. : تصدقين حتى ازهم على عبدالعزيز مايرد ..
امي : يمكنهم رايحين لمكان ومايبون بـه ازعاج .. وماقدروا يردون ولاشيء ..
سـعود : صح يمكن ..!
ياحليها امي تدور له عذر .. مادرت ان زعل ..!
رجعت اسألها : الا اقول يمـة ..! متى ناوين تمشون لـمكة ..!
امي : انا قلت لابوك .. يقول الثلاثاء زين ..!
سعود : آيه مايخالف اجل .. على الثلاثاء احتريكم اجل ...!
امي : ايه يمـة .. ابوك يصووت .. تبي شيء قبل اقول مع السلامة ..!
سعود : لآ ابد .. سلآآمتس ..
امي : مع السلامة ..
سعود : مع السلامة ,,
وسكرت الجوال ..!
وعلى طول موسيقى البطارية المنخفضة .. مع صورة البطارية ..
قمت بشحنه .. وانتبه لـ غباء محمد أو سلطان واحد منهم .. ناسي جواله في الشاحن ..!
يقاله انه بيشحن جواله قبل يروح ونسى الجوال بكبره ..!
فصلت جواله وشبكت جوالي ..
ورحت طالع .. ادوره .. طلعت من الشقة .. وضغطت الزر المخصص عند اللفت .. ( او الاصنصير ) ...
طبعا حنا حدود الخمسة .. جينا لمكة يوم الخميس ..
هم قرروا ينزلون الطايف .. جدة ويتمشون شوي ..
اما انا مابي قلت لهم يروحون وانا بقعد .. عاد قالوا مانبي نخليك بروحك .. عآآد من هنا جت فكرة اني ادق على امي واقولهم يجون .. فهذا شجعهم يروحون ويتركوني .. المهم اهلي بيطيح عنهم هم كبير بما اني سابقهم انا .. يجون ويلقون الشقة
مستأجرة والحمدلله ..
انفتح باب اللفت .. ودخلت .. ضغطت على صفر .. وانا اتسند على جدار اللفت العاكس .. تنهدت .. آخخ .. من جدك يا ابراهيم وين عقلك .. يمكن ماترد المرة الاولى .. والثانية .. بس كذا فوق خمس اتصالات ماترد ..
والمشكلة انه في الرياض .. يعني ماراح يدري ان اهلي بيجون مكة الا من الجوال .. يالله ان تسان اتصلنا على وعد .. صح وعد يمكن تقوله ..
انفتح باب اللفت عند الدور الاخير والاقي سلطان يهز رجله وهو ينتظر اللفت .. كان بيدخل .. بس انتبه لي ..
مديت له الجوال ...: لآآ تصير مهمل مرة ثانية ...!
يآخذه وهو يضحك : هههه ان شاء الله ...
كملت طريقي للحرم .. بما اني نزلت .. وسلطان رجع لهم يركض .. شكله مأخرهم ...
*
*
*

*
*
*
ـــــــــــــــــــ
اليوم: الأحد ..
التاريخ: 25 / 6 / 1426 هـ ..
المكان: انتظار المستشفى ..
الوقت: 10:15 مساءً..
ـــــــــــــــــــ
( عبدالعزيز )
بديت اهز رجلي بتوتر .. : ياخي تأخروا ...
عبدالله : يمكنهم ما اهتموا يعلمونا .. وبعدين هذا خشم ياخي ....
حطيت مرافقي على ركبي وانا حاط يديني على رقبتي ومنزل راسي ...
رفعته وأنا اتسائل بقهر : من كان السبب ..!
عبدالله يسحب نفس : لو تحاول تطلع من السبب .. كان ماتلقاه .. تقول من البداية انا يوم اجيب الطاولة ولا بدر يوم يجيب الفيديو ولا اللي مسجل يوم انه سجل اجبر بدر انه يطويه ويخليه على جنب .. ولا عمي عبدالرحمن يوم انه يستقعد الا ذيك
اللحظة يجيب البويبينات .. ولا اللي اتصل وخلَّ ابراهيم يقوم يرد عليه .. ولا ابراهيم من الاساس ليش يجي من الرياض .. ماراح تقدر تقول ان فلان هو السبب ... هذا كان مكتوب له .. هو جاي للرياض عشان يطيح هالطيحة ..! [ يحط يده على كتفي ]
لاتفكر هالتفكير تكفى ...
هزيت راسي .. جا الدكتور ناحيتنا ..
وقفنا على طول ..
سأل : وش قرابتكم لـه !؟
جاوبت : أنا ولد عمه ..
جاوب عبدالله : وأنا ولد خاله ..!
رفع حاجب مستغرب ..: طيب وين اخوانه .. أو ابوه ..!
جاوبت : في القصيم ..!
عبدالله بنباهه : ليش فيه شيء مهم يادكتور !؟
الدكتور : لا ابدن .. آآ بشكل عام ... ابراهيم عنده كسر في الانف .. والحمدلله انكم جبتوه اول ماطاح .. يمكن لوتتاخرون يكون بعدين تحتاج انكم تسوون عملية عشان تعدلون عظمة الأنف .. لأنها بتأثر على شكله .. [ آخذ نفس وحنا منصتين ] أنا ما
اقدر يعني احكم على حالته الآن .. يعني احتاج انتظر شوي ... في أشياء احاول اتأكد منها ان شاء الله واطمنكم ... [ هز رأسـه ] عن اذنكم ...
راح وانا اطالعه .. واطالع البالطو الابيض اللي يتحرك من حركته السريعة .. وأنا احاول استوعب الجمل اللي قالها .. مجمل كلامه ان خشم ابراهيم انكسر ..!!! وش يعني ...! متوقع انه نزيف بس يعني يحتاج تدخل طبي يوقفه بس ... كسر مررة وحدة ...!
جلست على حافة الكرسي اللي وراي ..
والتفت لعبدالله اللي تكلم : لازم نعلم أحد اكبر منا !!
حاولت اركز معه بذهني الشارد : هــاه ..!
تكلم بصوت اعلى شوي : أقول لازم نعلم احد أكبر منااا ...!
جاوبته بصراحة : بس هو يقول لـحد يدري ..!
عبدالله : على كيفه ..!!
سألته محتار : طيب من نقول له !!
اقترح : اخوك عبدالرحمن مثلا ..!
اقترحت بشيء ممكن يكون اضبط : وش رايك اكلم عمي ناصر ..!
عبدالله يأيد : خلاص .. عمك ناصر حلو وخصوصا انه دايم يطيعكم ..!
طلعت جوالي .. واتصلت عليه ..
رد وعنده ازعاج وكان يضحك ..: هههههه هـلآآآ ..
ضاق صدري اني بضيق صدره : السلام عليكم ...!
رد : وعليكم السلام .. ارفع صوتك تراني ما اسمعك زين ..
بلعت ريقي وأنا احس ان حنا مالنا داعي .. المفروض نعرف نتصرف ..
في جزء من الثانية هونت : ماعندي شيء .. كنت احسبك فاضي ... بعزمك على العشاء يعني .. بس شكلك معزوم ..!
عمي ناصر : هههه ... الله يجزاك خير .. بس غريبة يعني تدورني وأنت عندك ابراهيم ..!
حسيت قلبي عورني .. لا ابراهيم أووب عندي ..!
: خلاص اجل عمي انت محجوز بكرة على الفطور .. حتى عزايمك بالحجز ماشاء الله ..!
عمي يستهبل : لأ لازم تنسق مع وكيل اعمالي .. تدور لك وجبة انا فاضي .. و بعدين افكر ..!
ضحكت بهدوء وأنا مالي خلق : ههههه .. طيب ماعلي انا كلمتك وحجزتك ..!
عمي : لا لا ابد ماعليك لو تبي اجي اتعشى معك الحين !!
رديت : لأ بكرة خلاص ..
عمي باستجابة : بكرة بكرة ..
أكدت عليه : الصبح هاه ..!
عمي : مايخالف .. أنت تآمر بس ..
.. : جزاك الله خير .. مـع السلامـة ..
عمي : ويآك يارب .. مع السلامة ..
سكرت وسألني عبدالله اللي كان متسند : ليش ماقلت له !؟
بللت شفايفي : لأن ...! [ وسكت افكر ..
جاوبت : لأن كان عنده ازعاج وجو يوحي بالوناسة .. مابغيت انكد عليه ..! [ والتفت له وانا ارفع حاجب ] وش بيسوي زود على اللي سويناه ..؟؟ نسويه حنا الحين ..!
عبدالله عاقد حواجبه على خفيف : هو يدري وش يسوي ..[ يرز عمره عقب ماكان متسند ويحط يده على رجلي ] بس ماعلينا ... أحس لازم نشوف ابراهيم ونشوف وش عنده ..؟!
عجبتني الفكرة قمت : قم قم يلااه ..
قمنا مشينا ندور الدكتور ..لما لقيناه ابتسم : أنتم للحين هنا !؟
عبدالله : آيه دكتور .. ودنا نشوف ابراهيم ..!
طالع ساعته .. وابتسم اكثر : معليش .. تأخرتوا في الطلب .. تعالوا بكرة .. وان شاء الله اخليكم تشوفونه .. [ وابتسم اكثر يطمنـآ ] ان شاء الله انه طيب .. لا تخافون ..!
سأله عبدالله بشيء غاب عن بالي : طيب أقدر ارافق معه أو اي احد ..!
الدكتور : أولا .. المستشفى مزحوم .. ومانقدر نخلي فيه مرافق مع كل مريض .. صعبة يعني .. وووثانيا ابراهيم الحمدلله مايحتاج احد يرافق معه .. طيب هو ..!
قهرني .. يآخي فهمني كلامك !!
تكلمت بانفعال شوي : طيب مدام انه طيب .. طلعووه معنا ..
الدكتور : ما اقدر .. وبعدين وضع ابراهيم للحين ماتأكدت من حالته 100% .. ننتظر ان شاء الله على بكرة .. نسوي تحاليل عشان نتأكد أكثر انه طيب .. [ يغير اسلوبه بهدوء اكثر ] وبعدين اتكلم معك باسلوب منطقي اكثر .. عشان تفهم كلامي ..
ابراهيم أووب طيب لدرجة انه يطلع .. ولاهو مريض لدرجة انكم تخافون عليه هالكثر .. والحمدلله ان شاء الله يطلع على بكرة .. بـ بـ بإذن الله يعني ...!
هزيت راسي : ان شاء الله ... طـ
يمسكني عبدالله وهو يقاطعني : شكرا دكتور ..
يجرني نطلع ..
طالعت عبدالله منقهر : ياخي خلني افهم وش يقووول ذاا ..!
عبدالله يحاول يقنعني : هو أفهم مني ومنك ..!
طلعت من بوابة الطوارئ : يقههر قسم بالله .. حتى ماخلانا نشوفه ..!
عبدالله يمشي وراي : وسع صدرك .. بكرة قريب .. وبعدين ابراهيم بيطيب بدري لو شفتَه ...!
التفت له وانا معصب : آيــه يأثر على نفسيته .. ويفرح أن فيه ناس مهتمين فيه .. أووب كافي أن أمه وأبوه وأخوانه محد يدري منهم عنه .. مغيير حنا .. وماطلينا عليييه بعد ..!
كان يطالعني مفتح عيونه بقووه منصدم ... التفت بسرعة لقدام ومشيت للسيارة معصب ومقهور ..
شيء قسم بالله يقهر .. تخيلوا مكسور خشمه .. ومحد من أهله طـل عليه ..!
حسبي الله وكفى ..!

*
*
*
ـــــــــــــــــــ
اليوم: الإثنين ..
التاريخ: 26 / 6 / 1426 هـ ..
المكان: شقة ناصر ..
الوقت: 8:25 صباحـا..

ـــــــــــــــــــ
( ناصر )
طلعت من الحمام عاقد حواجبي .. عليه لسان ذا الولد .. رفع ضغطي الله يصلحـه .. مزززززززعج .. لا أنا نمت ولا أمـه ..
اطلق منبه في العالم ذا الولد ... ياربي .. عمره شهرين وهذا صوته .. وش بيصير لا كبر شوي ...
دخلت الصالة وكانت أمه ترضعه ..
دخلت وانا منقهر منه : وبس .. يوم قومنا من النوم سكت .. طار نومنا وبس ..!
ردت أمـه وهي تناظر الساعة : ثمان وزود زينة ..!
قعدت على الكنب : كـل شيء زين الا دون السبع .. [ عفطت وجهي وأنا احكي بقرف ] وووووخ .. كله الا قومة الدوام ...
آخذت الريموت وقبل أشغله تكلمت سارة _ أم ولدي _ : مفصولة التوصيلة ..
رجعت الريموت حيث كان : بلاش تليفيجون .. نجلس نسمع بعض اصرف .. [ بديت اسولف ] على طاري نسمع بعض .. سبحان الله .. الناس يخترعون أشياء واكتشافاات وومدري وشو .. وبعدين يكتشفون ان القرآن سبقهم .. عاد ذيك المرة أقرى
تفسير سورة التوبة في آيـه [ حاولت اتذكرها .. ولو الشاهد بس ..] أممم المنافقين لما كانوا يسبون الرسول صلى الله عليه وسلم ..[ نزلت راسي احاول اتذكر الايه والله لو هنا سعود ولا ابراهيم يمكن يذكروني !! رفعت راسي لما تذكرتها ] "الَّذِينَ يُؤْذُونَ
النَّبِيَّ وَيَقُولُونَ هُوَ أُذُنٌ " الشاهد من الاية انهم قالوا أُذن ..
سارة متفاعله معي : آها ..
كملت : يعني يستمع لهم .. سبحان الله .. الحين يسوون دورات فن الاستماع والانصات ومدري اييييش !!.. والله معلم البشرية معلمهم كـل شيء .. بس ماعندك أحد .. مافيه طلااب ..!!
سارة تقوم وتعطيني ولدها : امسك اروح اصلح شيء نآكـله ..!
آخذه : آيــه تكفين ..
وبديت احـآول العبه : آيه استانس .. وش عليييك .. شبعاان ..!
بس الشيخ سحب !! أفأ .. من أولها يا ابراهيم أنا أبـوك .. ازعجنا وآخرتها ينووم ...
بديت اسولف عليه وهو مغمض : ألحين بالله عليك من حنجرته هذي اللي في رقبتك !! قسم عليك صوت .. يزعج اللي ماينزعج .. تنفع صفارة انذار تصدّق .. والله ترضعك أمك مكبِّر !! ياعليك صوت .. ماشاء الله ..سلفنياه يوم اهوش به على الطلاب ..
بس أوووب الحين .. في الدراسة .. بعدي ولدي !!
رن جوالي فجأة برسالة وقطع سواليفنا .. استغربت .. اخمن لـ ولدي: أكيد الاتصالات .. مافيه غيره هذا عزيزي العميل .. وقت دوامهم .. فاضين ماعندهم شيء .. قالوا يله نرسل للعلماء ...! [ انتبهت لغلطي وانا استنكره ] للعلماااء !! هههه ..
للـعـــمــــلآآآءءء .. آيـه أنا اصلا أُصنَّف من العملاء ...[ استنكرت غلطي مرة ثانية ] للعملاء ... ياااحيل الله يا ابراهيم .. ان بغيناها علماء جت عملاء وان بغيناها علماء جت عملاء .. بس حط في بالك يا ابني .. ان ابوك عطاه ربي من العلم مالله بـه عليم
..!
جت سارة بصينية أولـى : ( وما أُوتيتم من العلم الا قليلا ) ..
رفعت راسي لـها : بس أهم شيء أُوتيت ..!
سارة تصلب طولها عقب ماكانت منحنية توصل الصينية للأرض : وش دراك .. يمكنه أووب علم ..
طالعت ولدي وانا استهبل عليها : صح يمكنه ضمير ..! اووب شرط انه عَلَم ..!
قمت وانا احط ولدي مكاني .. رحت وغسلت يديني وأنا ادندن .. رجعت للمطبخ وسألت : فيه خبز ..
شهقت : هــآآ .. لأ ..!
هزيت راسي بأسـى : سـنعة ..!
سارة : وش دراني خرشني ولدك ..!
ابتسمت وانا اسمع كلماتها : ملاحظة أننا صرنا نتكلم عربي ..! [ استنكرت كلمتي وانا انتبه للغلط ] عربي !! هههههههه .. اقصد مثل اهل الرياض ..! وش فيني انا ..!
سارة وهي تشيل الشاهي من على الفرن : آيه عادي .. من عاشر القووم !!
طلعت معها : المهم انا رايح اجيب خبز .. آآم .. لاتفطرين عني ..!
وانا طالع سمعتها ترد بـ : ان شاء الله ...
طلعت من الشقة .. نزلت تحت ... طلعت من العمارة .. وقطعت الشارع اللي قدام العمارة .. ومشيت الى ماا قبل نهاية الشارع .. عند الخباز .. ونمسك سرى .. كان قدامي 2 ... هندي .. وسعودي .. عاد الهندي .. او العامل مدري وش جنسيته ..
أوب مآخذ بريال ولا اثنين .. بـ 14 أو حولها .. قسم مدري وش يسوي فيها .. هو واللي على شاكلته .. يشتري الظاهر لكل عمالة الرياض !!
بس على غير العادة خذ بريالين .. يمكن هذا دور ثاني .. ماشبعوا وجو يآخذون مرة ثانية .. اللي بعده خذ بريالين بعد .. وانا خذت بـنص ..! على قولته .. مايسوى ماسك سرى .. رجعت للعمارة ..وللشقة ..
وكانت سارة ع السفرة تتنتظرني ..حطيت الخبز : بسم الله ...!
بدينا نفطر .. بسواليف عادية .. وكنا نآكل على اقل من مهلنا ..
رن جوالي : صاير اليوم مهم أنا ..
قبل اطلعه من مخباتي انقطع .. طالعت الشاشة .. كانت مكالمة وحدة وورسالة فتحت الرسالة ..!
ويوم شفتها من عبدالعزيز .. ضربت جبهتي ... يامخي !!
كان في الرسالة : ( السلام عليكم ..
هذه الرسالة آلية ولا تقم بالرد عليها .. هذه الرسالة فقط لـ " تأكيد الحجز " )
ابتسمت آسف والله نسيتك .. تركت الخبز ودقيت عليه .. وأنا بيني وبينكم ما استبعد ابراهيم يرد .. لأني احس اسلوبه هذا ..!
استمر يرن يرن يرن يرن .. اليمن آخر شيء .. انقطـع .. قمت واقف ..
سألتني : وين !!؟
جاوبتها : والله عبدالعزيز عازمن على الفطوور ونسيته ..
دخلت الجوال في جيبي : المهم انا برووح له الحين .. ووو يمكن .. ما اجي اتغدى ..!
رحت اغسل وانا اسمعها : تريحني ..!
طليت عليها : قلت يممممممككككككن !!!
سارة تشيل الصحون : يمكن يعني اكيد ..
بشكل سريع .. رحت آخذت شماغي وتعطرت .. طلعت ..
بسرعة نزلت وانا اتصل عليه : رد يآخي رد ..
وصلني صوته : نعم ..
.. : السلآآم عليكم ..
هـو كنه معصب : وعليكم السلآم .. هلا عمي ..
استغربت اسلوبه : كنك نسيت الحجز ..
استهبل علي : لأ ألغيته ..!
ركبت سيارتي : لأ مافيه انتهت المدة .. خلآآآص .. افتح الباب بس ..!
أشغل السيارة وامشي وأنا اسمع في صوته ضحكة على كلامي : مفتووح مفتووح .. ادخل على طول أنا بالملحق ..!
وأنا امشي بسرعة : يلآآ جيتك .. مع السلامة ..!
جيتك مع السلامـة ..!!! حلللوة .. لايسمعني احد ..!
عبدالعزيز : حـياك الله ..
سكرت .. وأنا عالق بالزحمة ..
مضـى من الوقت عـشر دقايق ...
مـضـى من الوقت ربــع ساعة ...!
مـضـى من الوقت 10 دقايق ثانية ..
وأخيرا .. انسليت من الزحمة لمنعطف حارتهم ..
اعوذ بالله .. أكثر من النص ساعة في زحمة !!
وقفت عند بابهم ..
نزلت .. ودخلت مع الباب الكبير .. اعتقد فتحه عشان يبيني ادخل سيارتي .. بس مآأبي ..!
صـووت : عبدالعزيز .. يـاهوووه ..!
استغربت ماطلع لي احد .. تقدمت للملحق ... وقبل ادخل طلع عبدالعزيز منصدم .. مستغرب .. متغير وجهه .. مدري وش فيه ..
سألته مستغرب وأنا اشوف الجوال بيده يرن ..: وش فيك !!
كان يطالعني منصصددم .. مسكته رفعت صوتي : عبدالعزيز ... وش فييييييييييك ...!
جاوب وهو كـنه مسـبوووه : مـ مــ يقول عبدالله ... مـآآآت !!!
انصدمت : مآآآآآت .. منهو اللي مآآت ...!
ماقدر عبدالعزيز يستمر واقف ..قعد على الدرجـة وهو ينزل راسـه ويدينه على وجهه .. وجواله تركه يطيح في حضـنه ..
وأنا ابي جواب .. سحبت الجوال .. وانصدمت .. وانا اشوف الرسالة ......
وأول مرة أحس ان قلبي بينفجر .. من الــ .. مدري ....!
انا لله وإنا اليه راجـعون ...!
*
*
*
**
*
ألقاكم ... مع الورقة الثامنة عشر بـ بإذن الله ..!!
.......
............................................إِمضاءْ ...
.......................................كُتلَـةْ جُــرُووح || ...

*

.................................. |[•• الــورقــة الثامنة عـشـر ..! ]|
------------------------------[ .. عزَّ الرِيَآضْ الْحَبِيبَةُ يَا بَحَرْ جِدَّة ××|


تنـفـس الـصـبـح بـيــن الـضـيـق والـشــده
انـفــاس مستـوحـشـه وانـفــاس مـذعــوره


كنـه لبـس ثـوب مـن لـون المـسـاء قــده
و الاّ حـــداه الـمـسـاء عـنــوه واخـــذ دوره


مـاشـال فــي صـــدره المـكـتـوب مـــن وده
لـو هـي علـى وده ابطـى مـا ظهـر نــوره

والله مـــامـــرنــــي مـــثــــلــــه ولا اعـــــــــــده
الاّ صـــبــــاح الـــبــــلاد تـــقــــوم مــبــتـــوره

امـسـت عـلـى نـــار والاعـصــاب مـنـشـده
واضحت تلقى العزاء في موت اخو نوره

الـفـاجـعـه مـوجــعــه والـبــيــض مــســـوده
فعـيـون مــن شــاف فيـهـم قـمـة ســـروره







******
******************
************
*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: الملحق ..
الوقت: 11:00 صباحاً..
ـــــــــــــــــــ
( عبدالله )
متسند .. وموقف رجل .. والثانية ممدودة .. ومتركي على المركى .. واحرك جوال ابراهيم بين يديني ... مكشر ... وانا تلعب بـي الهواجيس .. سرحان وعيوني بالأرض .. أول مرة أحس بأني خايف .. أو خايف .. أووو خآآآآيف .. آآخ ...
دخل بدر : السلام عليكم ...
رفعت بصري له .. ثم رجعته للأرضية : وعليكم السلام ..
جـآ بدر وجلس جمبي .. : يآخي قدرت تنوم ..؟
تنحنحت .. اعدل صوتي : يعني !!
بدر : والله اقلقنا امس ...! بالحسرة نمت انا ...
تنهدت : ننوم على اخبار زفت ونصبح على اززفت ...!
استقعد منصدم : ليه وش صاير !!!
التفت له .. وطالعته .. معقولة مادرى يعني : محد قالك ...!
جاوب : لأ محد قالي ..! وش صاير !!؟
التفت عنه : خبر شين !!
بدر خآيف ومنفعل : طيب وشوو !!
استقعدت .. طالعته وتكلمت بصراحة : مـقدر اقوله ...!
بدر انقهر : والله حلوووة .. اجل ليش من البداية تقلقني وتعلمني ان فيه شيء شين صاير !!؟
جاوبته بصراحـة : احسبك داري ...!
بدر مازال معصب : أحسبك داري .. صار عذر لكل شيء .. قلي ياعبدالله وش صاير ...!
يقهر .. قسم ترا اللي فيني مكفيني .. تكلمت بهدوء : بدر الله يخليك .. ما ابي اجاوب ..
بدر يقوم : براحتك ..!
طلع وتركني .. غمضت عيوني وأنا احس اللحظة اللي سمعت فيها الخبر تتكرر .. وانا اسمع الصوت مرة ثانية في أذني :
( بسم الله الرحمن الرحيم
بيان من الديوان الملكي
ببالغ الأسى والحزن ينعى الديوان الملكي باسم ولي العهد الأمير عبد الله بن عبد العزيز وكافة أفراد الأسرة و نيابة عن الامة السعودية خادم الحرمين الشريفين الملك فهد بن عبد العزيز حيث وافته المنية بعد مرض عانى منه {إنا لله وإنا إليه راجعون}.
تغمده الله بواسع رحمته وغفرانه وأسكنه فسيح جناته وخلفه في هذه الأمة بتمسكها بعرى دينها القويم وحفظها به وجزاه الله عن الإسلام وهذه الأُمة وأمة الإسلام عامة خير الجزاء.
وقد تقرر الصلاة على خادم الحرمين الشريفين الملك فهد بن عبد العزيز يوم غدٍ الثلاثاء بعد صلاة العصر في جامع الامام تركي بن عبد الله في مدينة الرياض. إنا لله وإنا إليه راجعون. )
كنت واقف قدام التلفزيون ومنصدم .. وأبي اي معجزة أو آي شيء يصير بس اللي سمعته مايصير ..
ابي اموت أنا .. وانت ياأبونا خلك لشعبك ...! أنت ابونا .. تكفى لا أتيتم مرتين ..
كنت لحظتها ابي اي شيء يصدّق او يكذب .. ماكنت مستوعب ابد .. آخر شيء ارسلت رسالة لـ عبدالعزيز .. وللحين مارد يأكد علي .. بس قالي عمي عبدالرحمن أنه صدق ..
فجأة حسيت بأحد واقف عند باب الملحق .. فتحت عيوني والتف لـه وكان بدر ...
جا معصب : عبدالله .... عبدالله .. عبدالله رجـــااءً لاتلعب باعصابي اكثر .. مالقيت احد اسأله .. علمني يآخي .. وش صاير ..!
طالعته بهدوء : ماتفهم .. أقولك أنا ما.. أبي .. أقووولك !!
جلس .. تكلم بهدوء يستعطفني : عبدالله اللي صار صار .. وخلآآص ... لانقعد في ذيك اللحظة اللي صار فيها الشيء الشين على قولتك .. ونخلي الدنيا كلها تقفل في وجيهنا ...!
بللت شفايفي بتوتر ..
كمل : عبدالله .. أدري انه شيء وصار وباين من وجهك انه كـآيد .. بس [ سأل بتردد ] ابراهيم صاير فيه شيء !!
وزعت نظراتي في ارجاء الملحق وانا اجاوب : لأ ..!
رجـع يسأل : طيب واحد من عماني ...
قاطعته قبل يتفاول عليهم : قلتلك يآخي .. ما ابي اقول ..
بدر عصب : يعني اذا ماقلت سبحاان الله فجأة تصير كذبة ولا مقلب من واحد من ربعك .. والله ياخي اللي صار خلاص صار .. قـل ياخي خلصني لاتعوور قلبي أكثر ..
عصبت وانا منقهر منه : لآآآ أقول واتعذب مرة ثانية مثل ماسمعته ..... [ ناديته ] بــدر .. [ تكلمت بصراحة ] أنت مااشفت القناة الأولى والثانية .. كلهاااا قرآآآن ... وش يعني !! ماتفتح التلفزيون أنت ....
بدر حسيت كل شيء فيه لآآن ( صار ليِّـن ) .. طالعني بهدوء .. : وش يعني !
كملت بهدوء وأنا ارمي ظهري على المسندة اللي وراي : يـعـني .. الملك فهد ... الله يرحمه ...
وعلى طول حطيت يدي على فمي .. احاول اثبت كفي من الرجـفة ... وأنا اهز رجلي بقهر وتوتر ...
هو ماتحرك ولاسوا شيء .. ماقدرت استحمل .. قمت .. طلعت ..
وقفت قدام المغسلة ... وأنا منزل راسي .. أحاول اهدى ...
بلعت ريقي .. خذت نفس ...رفعت عيوني للمراية .. وشفت وجهي .. وعلى طول تجمعت دموع في عيوني .. غصب عني تعبرت .. ونزلت راسي .. وفتحت المويـة .. وغسلت وجهي بقووة ...غصب صحت ووجهي مبلل بالموية .. حسيت بقهر اوو خـووف
.. هذا الملك فهد ... والله الله يرحمك ...

*
*
*
*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: الملحق ..
الوقت: 11:30 صباحاً..
ـــــــــــــــــــ
( عبدالعزيز )
جالس على المركـى أهز رجلي .. وأنا عاظ على برطمي التحتي امسك نفسي لا اصرخ من القهر .. قسم احس قلبي بينفجر .. مـآعآد فيني استحمل اكثر ... طاري الموت والله يقتل .. حتى لو ماتعرفه ..! وشلون عاد لو كان احد مهم .. وغصب تحبه !!!
نزلت راسي ... ذكرني الجو المؤلم هذا بأول ايام موت ابوي الله يرحمه ... نفس الألم .. انتبهت لـ عمي ناصر واقف عندي .. رفعت راسي .. لقيته مبتسم .. ومآدن لي كأس موية ..
آخذته وشربت منه شربتين .. وحطيته على جنب ..!
عمي : عبدالعزيز .. قم .. قم لاتضيق صدرك .. هذا حال الدنيا ... تعوذ من ابليس .. وقم نفطر ...!
.. : أحم ..
عمي بابتسامة : وعاازمني على فطــور .. وحجز وسالفة ... ومتوقع القى البوفيه .. بس والله ولا حتى خبز وجبن ... تـرآآآي جوعااااان قم جب الفطوور ...
ابتسمت لابتسامته .. وقمت ..
طلعت ورحت كلمت عبير ان حنا نبي فطور .. ورجعت .. وابتسمت يوم شفت ابتسامته ..
سألني : الا ويين ابراهيم ماشوفه ..!
بلعت ريقي وانا اتذكر .. سالفة ابراهيم كلها ..
حاولت ارقعها .. : احم .. الظاهر انه نايم ..
ماكذبت .. انا اعتقد انه نايم الحين ..
عمي يهز راسه : آيــه غريبة !!
قمت مرة ثانية اجيب الفطور ..
في الحوش وافتني عبير .. أخذت الصينية منها .. وأنا اسألها : وين الشاهي ..!؟
استدرت للملحق وانا اسمع جوابها: بجيبه ألحين ..
حطيت الصينية على سؤال عمي : وين عبدالرحمن ..!؟
جاوبته وأنا اصلب طولي : في دوامه ..!
طلعت من الملحق جآيب الشاهي اللي وافتني بـه عبير ..
رجعت للملحق .. وجلست ..صبيت بيالتين .. مديت وحدة لعمي .. وخليت الثانية عندي منظر ..!
عمي يمد لي خبزة : بسم الله ..!
قطعت لي قطعه وأنا اسمي بالله وافطر .. بالعادة 15 دقيقة وانا مخلص أكل .. اذا كان معي احد .. بس اعتقد انه بيأذن العصر وحنا نآكل على أقل من مهلنا ..
عمي : حسافة ليت ابراهيم قايم .. كان ينعشنا شوي .. صح الدنيا كلها مغلدمة .. بس بعد شيء أهوون من شيء ..[ سألني يبيني اتجاوب معه في الكلآآم ] ولآآ وش رايك !؟؟
هزيت راسي : الا ..
كملنا نقنقة .. والله لا أنا افطر زين ولاهو يفطـر .. آخر شيء حط الخبزة : الحمدلله على نعمته وعافيته ..!
قـام غسل وانا شلت الصينية وانادي عبير تجي تآخذها ..
خذتها ورحت اغسل .. مع اني ماكلت شيء .. بس الله يعين .. أحس راسي يعووورني ...
رجعت للملحق وكان عمي متسند ومعه بيالته .. ويطالع التلفزيون ..!
جلست جمبه ..
بلعت ريقي : عمي ابقولك شيء ..!
سحبت نفس وانا اشوفه يهتم : سـم .. وش عندك ..!
بلعت ريقي : أمس .. [ بللت شفايفي ] مدري والله كيف يعني طاح ابراهيم على خشمه .. ووو وديناه للمستشفى ورقدووه ..!
بلعت ريقي بالحسرة وأنا أشوف عمي يعقد حواجبه وهو يعدل جلسته : وش ذا الكلآآآم !!
بديت افرقع اصابعي : اممس دقيت بقولك .. بس ماعرفت لأنك كنت مستانس ماودي اخرب عليك !!
كان يطالعني بهدوء .. : مايخالف المرة الثانية قلي ولو كنت أنا طاير من الوناسة .. في اشياء ياعبدالعزيز ماتحتمل التأجيل !! طيب وش قال الدكتور فيه !!..
بلعت ريقي : انكسر خشمه .. ووو بس .. ماعطانا علم ...!
عمي انقهر شوي : طيب ليش ماعلمتني من امس عشان اجي اخذ العلم منه ...!
حركت يدي وانا احاول القى عذر : مـ .. مآآآ .. ماعرفت .. [ جاوبت بصراحـة ] قلتلك ياعمي ..!
سألني : طيب عبدالرحمن وش قال يوم درى ..!
سألته مستغرب : عبدالرحـــمـــــن أخووي !؟
عمي بدى يعصب : لأ جدي ... [ رفع صوته ] آيــه ..!
ارتبكت اكثر والله القاها من مين ولا من مين .. : مآآ قلنا له ..!
عمي حرك يده : وش أنتم !! تصرقوووون ولا وش سالفتكم .. ماعلمتوني ولاعلمتوا عبدالرحمن !! [ سأل وهو معصب ] من علمتوا ..!
ارفع يديني : ماا علمنا احد ..!
سكت شوي يطالعني .. بعدين أمر : طيب تكلم بثقة ..!
قام : قم معي نروح لـه ..!
مشى طالع وأنا وراه .. سأل : من يدري غيرك وغيره ..!؟
جاوبت : عبدالله .. وعيال عمانه وذوولي ..
يطلع برى وهو يكمل استجواب : طيب شفتووه !؟
جاوبت : لأ مارضى الدكتور ..!
فتح سيارته وركب : خييير ..
رحت راكب قدام .. وانا في قمـة التوتر .. سألني آي مستشفـى .. جآوبته واتجـه لـه .. وأنا بدوري مسكت جوالي .. وارسلت رسالة لـ عبدالله .. مفادها ان حنا بنروح لـ ابراهيم على الله يلحقنا ..!
بس رد بعد 3 دقايق بـ : ( أنا عنده ..)

*
*
*

*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: غرفة من غرف المستشفى ..
الوقت: بعد صلآة الظهر ..
ـــــــــــــــــــ
(ابراهيم )
جالس على السرير متربع .. مبتسم .. واسمع سواليف عبدالله وبدر .. ابتسامتي كانت على خفيف .. المفروض ابتسم بقووة .. بس الشمع اللي حاطينه يحول دون ذلك ..!
ابشركم أني طيب الحمدلله وبطلع .. وبرووح اترووش احس اني منقرف مني الله يحوم كبدي بس !! .. والحمدلله مستانس شوي ..!
على طاري مستانس التفت لـ عبدالله اسأله : وين عبدالعزيز ..!؟
بدر منقهر تكلم بهدوء : اسولف أنا تراني ..!
عبدالله يضحك : هههه ماصدق تبلع ريقك عشان يحسب السالفة خلصت ...
تفشلت غصب .. هههههه .. شيء يضحك !! : آسف والله ماانتبهت ..!
عبدالله يلتفت لـ بدر بقووة : هذآآ دليييييييل على أن سالفتك حلووة ومشوقة ... يحتريك تسكت !! ههههههههههه !!
بدر ماكان له خلق : ماتستاهلون احد يسولف عليكم والله ..!
وسكت .. وكلنا سكتنا ..
بدر يطالع عبدالله : جاااوب على سؤاله .. السؤال اللي قطعتوا سالفتي عشانه ..!
عبدالله يلتفت لـي : آيـه مرسل لي رسالة يقول انه هو والاستاذ ناصر بيجون الحين ..!
التفت بدر لـه مستغرب .. وأنا بعد انصدمت من كلمته ...!
بدر مستغرب : الاستاذ ناصر ..! وش دخله واي استاذ !؟
عبدالله يجاوب ببديهيه : عــمّــه !!!
بدر يهول الموضوع : الاستاذ ناصر عاد ..!
عبدالله مبتسم وكنه تفشل شوي من نفسه : آيه عادي .. لـه ثلاث سنين يدرسني انقليزي !! وبعدين بعض الناس ماتقدر تناديه باسمه مهما كان ..!
هجمت بكلامي على بدر : انت ياقليل الادب المفروض تتعلم الاحترام منُه .. يعني عبدالله اصغر منك ومحتَرَم اكثر منك .. قليل ادب !!
بدر يصرف : أنت ماكتبوا لك خرووج !؟
جاوبته .. اساعد في التصريف بعد : الا .. بس يقول شوي وابجي وللحين ماجـآ ..!
عبدالله بعد ما أخذ وقته متأملني : ابراهيم شفت شكلك ..!
كشرت بأسـى على نفسي : آيـــه ..!
ابتسم عبدالله .. بديت اشرح موقفي : قمت رايح الحمام ..! واطالع المراية .. وانصدم من ذا المقنّع ..! ههههههههههههه ..! قسم بالله روعت نفسي مادريت ..!
طبعا اشرح لكم الوضع أنا ملزقين الشمع على شكل زائد .. أول شيء من خدي الأيمن ويعبر خشمي ولخدي الايسر والثاني من جبهتي الى قبل شفايفي بشوي .. بس ينفك من عند شفايفي .. حطـوا شمع ثاني عليه .. يعني خط شمع فوق شفايفي .. شارب شمعي .. ههههههههه ..! وبعد فيه شمع في جبهتي عشان يمسكه .. لأن الحواجب ماتساعد مررة ..! كل لفة اللزق بوجهي !!
طبعا ماطلع من وجهي مع هالتلزيقات الاعيوني .. وفمي والقليل القليل من وجهي .. وجهي راح كله لزق ..!
بدر منقهر مني شوي : أحسن تستاهل تصدق ..!
بهدوء .. ضحكت : ههههه .. ليه !؟
بدر : من طنازتك أمس ....!
بهدوء .. ابتسمت .. كمل بدر : وألحين انكسر خشمك وعرفت منهم عمانك ..!
ضحكت بهدوء بعد : هههه .. عماني واعرفهم من زمان .. واحد يقال له الحين الاستاذ ناصر .. والثاني عـآد .. جآيب للدنيا رجال .. يوم يقولون رجال ..!
بدر يهز رأسه وهو حاط لسانه على سنونه الامامية العلوية ويلتف للناحية الثانية يصرف ..
عبدالله يقوم واقف : قوموا قوموا خل نطلع ..!
بدر يقوم ويأيد : يلآآآ تكفون ملينا من القعدة ..!
حبيت اكسر خاطره : شفت وانا من البارح وأنا بذا ...!
بدر يهز رأسه : والله تنرحم .. قم بس قم ..!
حبيت استهبل .. قلت وانا اتبيزر : لأ مابي .. الدكتور يقول انتظر ..!
بدر : بلا استدلاخ يآآآ مـستدلخ !!
استغربت كلمته : مستدلخ !؟؟!!!
بدر يبتسم لذكرى شيء : آيــه .. هذا الفيديو .. رحت للبيت وجربه أخوي أحمد .. يقول الجواب الكافي ماقعد الاساعة وبقى من المسرحية ساعة يعني نصها الحمدلله ..!
ضحكت من الذكرى : ههههههههه .. شفته أجل ...!
بدر : لا ماشفتها بس قالي هو ..!
عبدالله يحثني على القومة وهو يحرك يده : قـم قـم الله يخليك ..!
قمت وأنا انزل رجليني عن السرير اللي على ايش مآدري ..
طالعت عبدالله مستغرب : وش فيك !! أحسك خاوي شوي ..!
بدر منصدم : بس شووي ..! من الصبح وهو كذا ..!
دفه عبدالله وحنا طالعين : أقول بس ..!
بدر بهجوم : لاتنكر !!
مشينا طالعين وحنا ساكتين ... كنا نمشي ومرت دكتورة من قدامنا .. على اثرها .. التفت لي عبدالله وضحك ضحكـة صغيرة ..
ابتسمت لضحكته وانا اسأله : وش فيك !!؟
عبدالله يقلد روحـه : نبي دكتووورة .. أقولتس نبي دكتووووورة !!
ابتسمت اكثر لذكرى ذيك اللحظـة : هههههه .. آيه وهي مسيكينة طايرة عيونه .. وأنا وش أنا قدامك !!
يهز راسه وهو منزله : مسيكينة ..!
نزلنا الدور الأول .. عبدالله يمشي جمبي وساكت .. وبدر قدامنا .. يعلمنا انه يدل !!
تحت .. أول مافتح باب اللفت .. كان الدكتور وعمي ناصر وعبدالعزيز .. مسوين مثلث ويتكلمون مع بعض .. يعني ماكان أحد واقف جمب احد .. كانوا مسوين دائرة ..! وكان الدكتور يتكلم .. وهو يطالع عمي ناصر وعلى خفيف يطالع عبدالعزيز اللي كآن
منزل راسه ومدخل اصبع الابهام في جيبه ومرخي باقي يده ..ونفس الشيء اليد الثانية .. انا ابتسمت له ... تقدمنا الى ان وصلنا عندهم .. أنا وقفت في اقرب فراغ بين عبدالعزيز والدكتور وبدر في الفراغ الثاني بين الدكتور وعمي ناصر .. وعبدالله راح دآر
ووقف بين عبدالعزيز وعمي ناصر .. بمجرد وقفتنا هذي انقطع حوارهم ..
عمي ناصر يطالعني منصدم : وش هـذآآ!؟
الدكتور يلتفت لي : كيف تنزل .. أنا ماقلت لك ابجيك ..!
ابتسمت متفشل : مليت من فوق .. قلت اجيلك أنا ..!
تنهد الدكتور .. سألته : ليه وش فيه ..!
جآوب : كنت بغير لك اللزق اللي مغطي وجهك كله ..!
رفضت وأنا احط يدي على وجهي : لا لا لا لا لا لاااااا ... خله مرتن آخرى ..!
يطالعني في عيوني : توعدني تجي بكرة اغيره لك !؟
هزيت راسي : آيه أوعدك ...!
عمي ناصر يبتسم لـي : الحمدلله على السلامـة ..!
ابتسمت لـه .. وقبل أرد عليه .. ماحسيت الا بـ شيء طايح بينا .. كـآن عبدالعزيز داخ على قدام طاح في الوسط ..!
الحمدلله كان الدكتور قريب .. على طول مسكـه .. وأنا تراجـعت وأنا اسمع الدكتور يكلم عبدالعزيز : خلك معي خلك معي ...!
وعبدالله يكلم الدكتور وهو خآآلص ( احس انه خلاص ماعاد فيه يتحمل شيء .. ) : فيه سكر يادكتور ..!
وقفت عند الجدار متفرج ... جـت ممرضة .. وبدت تسمع كلام الدكتور وأوامره ..
وقفوه شوي .. استجاب عبدالعزيز ووقف .. وهو يترنح .. دخلوه غرفة .. ورقدوه في اقرب سرير عندهم ..
صار كل شيء بسرعة .. طاح بينا وعلى طول انتبه الدكتور .. وراحوا للغرفة وانا واقف ابي استوعب ...!
جـا عبدالله وبدر لمـي بعد ماكاونوا مختبصين مع اللي صار ...
على كلمة بدر وهو معصب شوي : يآخي هد حيله أن الملك مآآت ..!
التفت عبدالله له بسرعة وأنا منصدم ..
عبدالله يطالع بدر وكنه يقول اسكت .. أول ماوقفوا عندي سألت : آي ملك ..
عبدالله اللي كآن منزل راسه رفعه وطالع بدر ..
بدر جـاوب : الملك فهد ..!
*
*
*


*
*
*
ـــــــــــــــــــ
اليوم: الأثنين ..
التاريخ: 26 / 6 / 1426 هـ ..
المكان: غرفة من غرف المستشفى ..
الوقت: 12:55 ظهراً ..
ـــــــــــــــــــ
(عبدالله)
حسيت أن حيلي انهد من كل شيء .. أولها ابراهيم .. ثم الملك فهد .. وآخرتها عبدالعزيز وطيحته .. طيّح قلبي ...! الله يهديه ..!
وكله عاد ولابدر .. اللي بالهداوة يصدم ابراهيم بوفاة الملك فهد الله يرحمه .. باريح مايمكن ...
مآدري احيانا ودي اسلفه قلبي خل يجررب الضيقة ..! أووب هو بس .. كذا مخلوق في حياتي ..
حنا الحين كلنا فيي الغرفة الا الاستاااااد ناصر ..!
أنا وبدر واقفين .. ابراهيم جالس على الكرسي .. وعبدالعزيز .. منسدح وفي يده مغذي .. محلول مدري وشو !!
دخل الدكتور ووراه الممرضة معها اغراض ووراهم الاستاد ناصر .. وقف قدام ابراهيم .. وابتسم ..
الدكتور : بما انك جالس ماعندك شغل .. خل نغير لك القطن واللي على خشمك .. ولا تجي بكرة .. تعال بعد اسبوع بس ..!
ابراهيم ماوده : وفيها بعد اسبوع بعد ..!
الدكتور : آيه .. عشانك ترآآ ..
مد الدكتور يده بيشيل الشمع .. وابراهيم رجع رأسـه .. وهو مكشر شوي : يعوور ..!
تعبت من الوقفة انا ... رحت جالس على السرير .. مما خلا عبدالعزيز يفتح عيونه .. ويبتسم لـي .. وابتسم له بعد ..
بانت لي المواجهة بين ابراهيم والدكتور .. اللي سأل ابراهيم : انا امس عورتك ..!؟
جاوب ابراهيم : لأ ..! [ سأله برفعة حاجب ] بس وش سويتوا ..؟!
الدكتور جاوب وهو فاهم لـه : بس أنا اقنعتك ..
ناصر ماله خلق : ابراهيم .. تكفى ..! .. انكتمت من المستشفى ..!
الدكتور : يلآآ يلآآ .. مـل منا الظاهر ..!
بدى يشيل الشمع .. اول شيء الشمع اللي فوق شفايفه .. وهو مبتسم بهدووء ..
وانصدمت وأنا اشوف اللي تحت الشمع .. جلد فاضي من غير شارب ..! وين شاربه ..!
ضحكت وانا اسمع صرخـة بدر : يــووووخ ...! ههههههههآآآع هههع ههههعه آهههههههههههههه ...!
عبدالعزيز يشد حيله ويقعد ..مسكت يده وقعدته .. وضحكت وانا اسمع ضحكته ..
التفت لـ ناصر ( خل نجرب الميانة ) .. كان مبتسم ..
رجعت اطالع المسرحية وهم يسدلون الستار !!
كان ابراهيم جامد بقوة لا ابتسامة ولاشيء .. ومغمض عيونه ورافع راسه شوي أسهل للدكتور .. شآل الشمع اللي في الجبهة .. وبدا يبين وجهه ..
شآل الشمع الطولي اللي على خشمه ..وللحين مابان شيء من خشمه ..
مسك القطن والشيء اللي كان حاطه على خشم ابراهيم وشآل الشمع الاخير اللي على خشمه بالعرض !!
شآل الشيء اللي يحمي خشمه .. وبآن حجم خشمه .. غصب كشرت وانا اشوفه .. بس الحمدلله أهووون من أمس ...!
الدكتور صلب طوله بعد ما انتهى .. والتفت للممرضة وخذ منها مرهم .. وبدى بهدووء يدهن خشمه .. وهو مآسك ذقنه ..
بعد ما انتهى حط قطن عليه .. وحط شيء ثاني يشكل حاجز بعد .. وآخذ لزق .. وحطـه بشكل عرضي ... وصلب طوله : وبس .. بتجي بكرة على هالدقيقتين اللي اشتغلنا فيهم ..!
ابراهيم فتح عيونه .. وتلمس شاربه الغير موجود .. : طيب غطـى ذا بشمع ..!
بدر بيقهره : من بقى ماشافه ..!
ابراهيم يتنهد : أنــا ..
الدكتور يآخذ الشمع ويسأل وهو محتار : اغطيه ..
ناصر : لأ خله .. [ يكلم ابراهيم ] والله أنك محلو من غير شارب .. بس ماتعودت ..
بدر يبي يرفع ضغطـه : الله لو يشوفك أخوك سعود .. كآن يحلف عليك ماتخليه ابد !!
قبل يرد ابراهيم .. رن جواله اللي عطيته اياه أول ماجيت .. كان مقفل وفتحه .. وهذا اول اتصال ..
ابراهيم يقوم وهو يطالع الشاشة : خلاص دكتور .. عشان هاللي اتصل ..
هز الدكتور رأسه باستجابة .. وابراهيم طلع يرد ..!
التفت الدكتور لـ عبدالعزيز وسأله وهو يفصخ الجونتيات : وأنت وش أخبارك ..!؟؟
هز عبدالعزيز رأسـه : الحمدلله ..!
قرب شوي ووقف عنده .. وانا قمت مخليهم بدى يفحصه : كـل هذا عشان ولد عمك ..!
جـاوب ناصر : كل شيء تجمع عليه .. وماهد حيله الا الملك فهد .. الله يرحمه ..!
جاوب الدكتور وهو يهز رأسه : الله يرحمه ..!
سأل عبدالعزيز : متى بطلع يآدكتور ..!
الدكتور : لا ماشاء الله عليك .. طــيب ..!
عبدالعزيز يستذكي : ابراهيم طيب ورقدتوه ..!
الدكتور ابتسم اكثر : لا بس انت طيب أكثر منه ... يخلص المحلول ان شاء الله وتطلع بإذن الله ..
آي تكفى .. مليت من المستشفى أنا .. يارب ما ادخلها مرة ثانية من غير شـــر يآآرب .... آمين ..
*
*
*

ألقاكم ... مع الورقة التاسعة عشر بـ بإذن الله ..!!
.......
............................................إِمضاءْ ...
.......................................كُتلَـةْ جُــرُووح || ...
*