[CENTER]ـــــــــــــــــــ

اليوم: الخميس ..
التاريخ: 18 / 8 / 1423 هـ ..
المكان: غرفتـي في بريدة ..
الوقت: 7:45 صباحاً..
ـــــــــــــــــــ
( عبدالعزيز )
حـسيت بأحـد يناديني .. وأنا في ظلام النيام ...
.. : مـسؤووليتي ... يااا مسؤووليتي قــم ..
تـحركـت شـوي ثـم فتحت عيوني .. كـان عمي ناصـر واقف عند وحدة من الادراج .. ويستكـشف اللي فـيه .. مما يثبت انـه رايق ..
غصبت نفسي استقعد ..
عمي ناصر بابتسامـه عريييضـة : صباااااح الـخـير مسؤوليتييييييي ...
حـكيت راسي .. وأنا احاول اصحصح .. وبصوت خشـن .. تـوي قايم ياناس : صباح الـنور ..
عمـي يجـي يسحـبني وويوقفني .. وهو مليان طـاقـه : قـم قـم .. بروح أنا وياك الحين للمزرعـة ... اليوم أنا بطـبخ لـهم الغداء .. يلا يلا يامسؤوليتي ..
قـمت .. ورحـت الحمام .. وطلعت .. وتلبست .. ثـم آخـر شـيء آخذت لـي ملابس زوود .. لأنـي ابسبححح في البركـة ...
وقفت قـدام المرايـه .. آآخ يالمرايـة ... ودي آقصـد فيها .. تدرون ان الشمع مازال فيها .. الكلام مازال موجود !؟
حـفظـته من كـثر ما اقراه ..
رتبت شـعري اللي يبي من يقـصـه ..
فاجأني عمي ناصر اللي دخل فجأة وجرررنـي : يلآآآآآه غطـيتَ على الحرييييم ... [ وسكـت ثم على طول تكلم يوم تذكر] ياامسؤووليتي ..
.. : اصبر اصبر .. آباخذ الكيسـة بـس ..
دفنـي للدرج ..: دحدر .. أنا بجيبها وينه به!؟
نزلت راسي وانا اضحك : ههههه .. على السرير ..
عمي ناصر وهو بيلتف عشان يرقى : دحدر افطر بجيك الحين .. لا نتأخـر .. ماندري وش بلمزرعـة !
هزيت رأسي وأنا انزل .. رحـت للملحـق .. لأنـي اتوقـع فيه وحدة من حريم عمانـي .. فـ بنفطر حنا يالرجاجيل بروحنا والحريم بروحهم ...
جلست انتظر الفطـور اللي اشم ريحـته الحين ..
كنت جالس طاوي رجليني وموقفهن في نفس الوقت .. وفي وسطـهن كانت يديني ..
شـتسوي عبير الحـين .. اتوقـع انها منغثــه من الاوضاع هناك .. الله يعينها .. والله قبل اروح قالت كلااام .. يعوور القلب ...
×××××
كنت جالس على الكمبيوتر وأحـووس ..
ما انتبهت لـ عبير اللي دخلت الا لمـا سمعتها بنبرة حزينـه : والله مالك حـق تروح وتخليني ... بروووح معكـم ...
كـنت نااسي .. بس يوم تكلمت ذكـرتني .. التفت لـها ابرر : والله ياعبير .. الـروحـة جـت فجأة ...
عبير : وفجأة ثانيـة أصير رايحـة معكم .. عادي وش فيها ..
حـاولت اوسـع صدرهـا شـوي وبابتسامة شطانـه : استقعدي لـ عبدالرحمن وحرمـته .. لا عشا بروحهم ولا غدا ولا شـيء .. وطـول الوقت لازقـة في خششهم ..!
عبير منقهرة : والله هذا اللي خذناه منك أنت وعبدالرحـمن .. هـو اعرس منأ ونسانا منـا .. وأنت شكينا لك منـا .. ونحشت للقصيم منـا .. وطـول عمركم ما منكم فايده يالعيال .. ماعندكم الا النحـشـه .. من البيوت ..
استغربت من كلامـها : من وين متعلمـه هالكلام ..
عبير وهي تضيع نظرتها وتحرك يدها بلا مبالاة : متعلمته من اللي متعلمته منه .. ماعليك مني ..
بلعت ريقي بملل من الحالة ... وكطـريقة عشان افتك من حنتها .. : خلاص بكلم عمي ناصر .. [ واطالع في عيونها بتحذير] عادي عندتس تروحين من دون أخوتس وحرمـته يعني ...
عبير مازالت بنبرة الـلامبالاة بس الحـين غلب عليها الأسـى :عادي ماتفرق .. أنا عشت من دون اللي فراقـه اصعب .. عشت طـول عمـري من دون أمـي .. وكمـلت من دون أبوي .. اعجـز خميس وجمـعة اعيش من دون مييين .. أخــوووي وحـرمته ...
أوووف .. يامجرمـه كـل هذا في قلبتس .. لا لا .. الوضـع ماينسكت عنه ...
ماعرفت ارد بصراحـة انا فاشل بهالأمـور .. وكتصريفه : خلاص كـلمي عمي ناصر تجين معنا ..
عبير اللي كانت ماشاء الله منتبهـه .. نبهتني : تـو أنت بتكلمـه .. والحين أنا اكلمـه ....[وبنبرة أعلى مقهورة] خلااااص طاااابت من خاطري هالرووحـة ...
وطـلعت مـعصبـة ..
وانا منصدم منها ... هذي عبير ....
×××××
قـطعت قلبي .. مدري وش آخبارها الحين ..
الوناسـة الوحيدة اللي كانت لها في البيت انا .. وانا رحـت .. ياعمرري .. تنرحــم .....
حسيت بحركـة في المجلس .. رفـعت راسي للباب .. وكان ابراهيم داخـل ومعه الفطـور... ونـصـه نيم المسكـين .. هههههه !!
تحركت لما حط الصينية على الارض .. وفرشـت السماط ..
وبديت ارتب الصحـون ..
جـا عمي ناصر ... وجلسنا نفطر ... وعقب الفطـور ..
مـشينا للمزرعـة حنا الثلاثـة ... ومعنا عمـتي أسـمـاء وحموودي وعبدالألـه .. وسديم وجود بيجـون مـع عمي عثمان ..
وفي الطريق صادفنا خالد وصالح ومعهم فيصل ...
ووصـلنا وكانت الساعـة حدود الـ تسع .. ابرهيم دخـل داخل البيت .. وأنا أوريدي .. للبركـة .. بما أن المـا للحين مابعد احتر صدق ...!!


*
*
*