كاتب الموضوع :
♫ معزوفة حنين ♫
المنتدى :
القصص المكتمله
عقد حواجبه وهو يسمع اللي صار..حنا وين عايشين؟؟
مافيا وسلاح وقتل...كل هذا هنا..
سكر الملف الل بايده..
الدكتور:طيب الحين بعطيك ابره ..
ليلى:ليش؟؟ دكتور صدقني مااحتاج
الدكتور:ليلى انتي انسانه واعيه وفاهمه..انتي مافيكي شيء بس مجرد صدمه..بعطيك ابره علشان تتريح اعصابك..كنتي طوال الوقت شاده عليها..والحين تعبت..على الاقل لين تروح الرجفه اللي بأطرافك..
ليلى:مابي ابره..ابي بس قران..انا اعرف نفسي..وماتهدى الا اذا قريت قران..واذا ماهديت..يحقلك تعطيني ابره..
افحمته..
الدكتور:اوكيه اتفقنا..
ليلى:طيب ..ابي ..اتطمن...على زوجي..
الدكتور:الحين بتجيك الممرضه وتطمنك عليه..تبين شيء ثاني
ليلى:ابي ادق على اخوي..
الدكتور:التلفون بجنبك..واذا احتجتي مساعده الممرضه موجوده..
ليلى:مشكور
الدكتور:لاشكر على واجب...
وطلع...
************************
سمعت اذان الظهر وهي لازالت بسجادتها...
رددت ورى مؤذن المزرعه المصري...وقامت للشباك وهي تردد وراه...
ضيقت عيونها عن اشعة الشمس اللي اتسلطت عليها...وطالعت بكل شيء حولها...
جزء من المزرعه باين..نخيل واشجار..نقلت نظرها لقسم الرجال..مساحات خضراء واسعه..
حدائق ورود بكل الالوان والانواع...ملعب كرة سله....شلالات اصطناعيه..ونافوره كبيره بين الفيلا والملاحق...
سبحان الله..المنظر بالظهر مو لهذاك...عكس الصباح..والعصر..
انتهى الاذان وشافت سليمان يمشي وشكله مهموم...عقدت حواجبها...
تابعته لين دخل للمسجد اللي على طراز الاولين..شعبي...
تراجعت عن مكانها وراحت لمصلاها...صلت اربع ركعات قبل الظهر((تحرم وجهك من النار))
وصلت الظهر ..وصلت ركعتين بعد الظهر...
شالت جلالها وسجادتها وحطتهم فوق السرير...ورجعت للشباك...
طالعت بالمسجد وشافت عمال المزرعه يطلعون..وبعدها طلع سليمان والمصري يسولفون مع بعض...
ضحكت يوم شافت شكل المصري...بزي صعيدي وشوارب كبيره اسمر وسمين..ماهو شين بس ماهو حلو..
اااه تذكرت اول ماجاء يشتغل هنا..كانت توها راجعه من لندن واستقرو بالسعوديه..يووه اول ماسمعنا الاذان وصوته انهبلنا عليه...
كان صوته جنان..وصرنا لازقين بالشباك بس علشان نشوف المزيون..اللي اكيد مثل صوته..
اااه ايام راحت..نفضت هالذكريات الحلوه عن راسها ورجعت تطالع بسليمان...
وابتسمت وهي تشوفه كيف يضحك مع المصري...سليمان حلم اي بنت بالعالم..رجل بمعنى الكلمه...
ثقيل الا مع سلمى...رزين عاقل كلمته مسموعه الكل يتمنى يماشيه..يعتمد عليه وسمعته ماعليها غبار..
والاهم انه عايش سعيد مع سلمى...عمري ماشفتهم متزاعلين ..تحبه ويحبها...
اعطت ظهرها للشباك وراحت للسرير وانسدحت عليه...
ميساء:من يقول ان الحب قبل الزواج ينتهي بعده؟؟...سليمان وسلمى..الظاهر من انخلقو وهم يحبون بعض...
ههههه تحفه هالسليمان...كان لازق بعمي ابو فيصل بس علشانها..مافارق بيتهم لحظه...حتى اذا جو يسافرون اختلق اي حجه وسافر معهم...
الكل يدري بحبهم لبعض..ومبسوطين لهم...اااه حتى زواجهم كان اسطوري...لابقين على بعض...يمكن علشان اسمائهم لها دور؟؟؟
سلمى وسليمان
نفس الحروف..بس زيادة ي ون ...معقوله الاسماء تلعب دور...؟؟
ليلى وناصر..مافيه الا حرف واحد..اجل يمكن المعاني؟؟
ليلى نشوة الخمر..ههه صدق من شافها سكر..
امم وناصر..واضح اسمه..بس مافيه علاقه بينهم...
خالد..من الخلود والثبات..
ميساء..الميلان..
ومايجتمع الثبات مع الميل..
عبير ريحة الورود...
وفيصل..السيف...
والسيف محتاج شيء جامد حتى يقطعه...ومافي علاقه بين الاثنين...
ههههههه والله اصلح اخصائية علاقات زوجيه...
والله اني رايقه...افف شسوي الحين؟؟؟ادق على فهد يجي ياخذني..والا انتظر مصيري...
رفعت راسها من السرير ومدت يدينها على بطنها وبدت تتحسسه...
معقوله اكون....لا لا...وليش لأ..
ان شاء الله يااارب..على الاقل يكون لحياتي قيمه..وربي يعوضني فيه خير...
ياااارب...التفتت للباب اللي يندق..وسمعت صوت خالتها..
تجاهلتها..وحطت راسها على المخده ونامت..او حاولت تنام...
*******************
مسك ايدها ومسح على راسها..ودمعه شفقه تحررت من عينه..
قال وهو ماشال عينه عنها
حسام:الله ياخذه شمسوي فيها؟؟؟..حسبي الله عليه..والله ماخليه..لو ادخل السجن بسبته بس اخذ حقها..امي شلون لودرت..والله تموت بحسرتها..صدق انه مو ادمي ولا فيه ذرة رحمه..بنته يسوي فيها كيذا..اااه بس لو ذبحته غيوض..كان افتكينا منه..
مؤيد:حسام لاتخاف..الحاله بيدي..صدقني مارح يقدر ياخذها ..اوعدك..
حسام:مارح تقدر تسوي شيء..هذا يطلع منها زي الشعره من العجين..وياخذها قدام عيونا..
مؤيد:اعتمد علي ياحسام...مارح يقدر..
تنفس بارتياح..وابتسم للدكتور
الدكتور:مشكور يادكتور فيصل..دنتاه اللي انقزته..
غمض عيونه بتعب..وتنهد
فيصل:الله ستر..الحمد الله اني لحقت عليه...
الدكتور:بس ماأولتليش..هو متضارب مع حد؟؟؟
فيصل:لا عادي..تعرف مزح الشباب..ولعب الكوره...
الدكتور:اخوك لو ماقبتهوش بالوأت المناسب كان الله يرحمه..الله يادكتور فيصل داه نزييف والنزيف خطير..
افرض كان عنده فأر دم..افرض ان النزيف صعب السيطره عليه..
قاطع الدكتور..
فيصل:يادكتور عارف..الحمدالله على كل حال..
عن اذنك..
طلع من غرفة الاسعاف..ودخل ايده بيجيبه...
فيصل:افف حتى جوال مامعي...اخاف بس يطلعون من المزرعه ويشوفون سيارة خالد...لحوول شهالبلشه..
تلفت حوالينه..مافيه احد المستشفى فاضي...
رجع للغرفة اللي فيها اخوه..وجلس بكرسي جلد مو مريح جنب السرير..
**********************
دخلت المستشفى جنب اخوها عبدالمجيد وعبايتها مفتوحه ومتحجبه ومغطيه بس شفايفها...
التفت عليها عبدالمجيد وهو يجاريها بالمشي
عبدالمجيد:اسمعي مابي اي حركه حريميه..مو ناقص هو
ميلت فمها مقهوره
تماضر:وشهي الحركات الحريميه يامحامي زمانك؟؟؟
وصلو للاصانصير وضغط على الزر
عبدالمجيد:حركات الدموع والاهات ..ولا مالك خبره فيها..
انفتح الاصانصير وادخلو مع بعض..
تماضر:الحين المشاعر صارت حركات...صدق من سماكم وحوش..حتى الوحوش تحس..انتم جدران..
ضحك بصوت عالي وهو يشوف شكله بالمرايه..
كانت تبكي بصمت..وهي تشوفه مغمض عيونه ولا هو حاس فيهم...
وبجنبها عمها وفراس...
حط ايده ورى ظهرها وقال بلهجه محببه..
ابوفراس:خلاص يكفي بكا..الحمدالله هو عايش..ومافيه الا العافيه..
فراس:نوال قومي ارجعي للبيت وارتاحي..
نوال:مابي..بجلس عنده..
ابوفراس:بس انتي تعبانه ولازمك راحه...
نوال:مو مرتاحه الا اذا كلمني وسمعت صوته..
انفتح الباب ودخل عبدالمجيد وتماضر..
سلمو وبسرعه راحو للسرير...
حبت راس اخوها وحطت ايدها على شعره وبدت تمسح عليه..وهي تمنع دموعها تنزل..
وهو اكتفى بمسك ايده لثواني والتفت على فراس..
عبدالمجيد:الحمدالله على السلامه..انتبه لنوال...حتى الدلوعه هنا..الحمدالله على السلامه..
ماردت عليه ..
فراس:زين انك جيت انا راجع للبيت..وطالع بلبسه..شكلي تحفه بهالبجامه..
وقف ..نوال تطلعين معي..
اشرت براسها لا
******************
العصر
0
0
0
المغــرب
0
0
0
وقف عند الباب ونادى عليها...ماردت..رجع نادى وهو يدق الباب...
كانت تسمع ازعاج واصوات..تقلبت بالفراش..وتقلبت...بس الازعاج مو راضي يروح..قامت من نومها وحوالينها الظلام..
الا من نور خافت متسلل من الشباك بفعل اضاءة الخارج...
صحصحت اكثر وهي تسمع ابوفيصل ينادي عليها...
حطت ايدها على فمها وهي تتثاوب..بعدت الحاف عنها وراحت تفتح الباب...
ابوفيصل:ميساء...ميساء يابنتي افتحي الباب...ميووسه..
انفتح الباب..
وطلعت بجلابيتها الناعمه واثار النوم باين على ملامحها..
ميساء:هلا عمي..معليش كنت نايمه...
انبسطت يوم شافتها وقالت بمزح وهي تضمها
ام فيصل:ابوفيصل على طول تفتحيله ..وانا خاااالتك شقيقة امك ..ماتفتحيلي؟؟؟
ابوفيصل:اناا غير..ولا كيف ياميوسه.؟؟
ابتسمت بحب
ميساء:كلكم غالين علي..واسفه كنت نايمه ومادريت انكم تطقون الباب...
ابوفيصل:معذوره اذا السالفه كذا...يلا يابنتي جهزي غريضاتتس نبي نرجع للرياض..الا اذا ودتتس نجلس هنا؟؟؟
ميساء:لا بكيفكم..الحين اجهز...
ابوفيصل:طيب اذا جهزتي تعالي لجناحي ابيتس بكلمة راس..
حست بقلبها يطلع من صدرها..
ميساء:ان شاء الله...
تركها وراح
ام فيصل:تبين مساعده؟؟؟
ميساء:لا خالتي مشكوره..الله يلعن الشيطان ماصليت لا عصر ولا مغرب..لايكون اذن العشاء بس؟؟؟
مدت ايدها وقرصت اذنها
ام فيصل:مفوته كل هالصلواات؟؟؟؟
عقدت حواجبها وكرمشت ملامح وجهها وسوت نفسها تتألم..
ميساء:مادريت اني نمت..الحين اتركيني علشان الحق اصلي..
تركتها وهي تضرب كتفها بخفه
ام فيصل:اول ماتخلصين الحقينا بالجناح سااامعه..
مسكت ايد خالتها
ميساء:اذا على اللي صار
قاطعتها
ام فيصل:ولاااا كلمه نتناقش بعد ماتخلصين فيه امور لازم تتوضح...مابي اسمع شيء الحين اذا خلصتي تعالي..وتركتها..
**************************
جلست على كرسي التسريحه وهي لابسه برموده جنز غامق وبدي كوكتيل حرير فوشي وصندل فوشي ومجعده شعرها..
اخذت القلوس بلون الفوشيا الصارخ وحطت منه وهي تطالع انعكاسه بالمرايه..مشغول بقراية كتاب...
نزلت القلوس ومسكت الكحل وهي تقول علشان ينتبه عليها..
عهود:اليوم مؤيد ماكلمك؟؟؟
كان مراقب كل شيء تسويه..وحاس بحركاتها..
ماشال عينه عن الكتاب
سالم:دقيت عليه وعطاني مقفل...هو بالعاده يستلم يومين؟؟؟
وزعت البلاشر بشكل سريع وبخت من عطر استيلا وقامت من الكرسي وراحت له وهي تقول
عهود:بعمره ماسواها..ههههه..وتعمدت تجلس بجنبه..
استغرب ضخكتها ورفع عينه عن الكتاب
سالم:شفيك تضحكين؟؟؟
ابتسمت بمكر..خليتك بالغصب ترفع عينك..هين ياسلومي ماشفت شيء..
عهود:تذكرت..انت ناسي ان مؤيد من دخل الطب وهو مو عندنا توه بس تصالح مع ابوي فشدراني انا عن دوامه...
يمكن عادي يستلم يومين..
نزل الكتاب من ايده
سالم:انا نازل..
عهود:ليش تنزل..جبت القهوه والشاهي هنا..خلنا نروح للمجلس..
سالم:نزليها بنروح نتقهوى مع عمي..
وقفت ومسكت ايده ووقفته معها..
عهود:طيب تعال ابي اوريك شيء هناك...
سالم:وشو
سحبته معها ودخلته للمجلس وقفلت الباب ودخلت المفتاح بجيب بنطلونها الخلفي...
طالع فيها ببرود
سالم:ليه قفلتي الباب؟؟؟
عهود:كذا مزاااج بتجلس معي يعني بتجلس معي...ابوي وامي طالعين يتمشوون ..
ومسكته مع ايده بنعومه وقالت بدلع وهي تجلسه على الكنب وتجلس جنبه وتاخذ فنجان قهوه
عهود:تراني مااكل..ولا اخووف...وصبتله قهوه..
اخذ الفنجان منها
سالم:بس انا سمعت غير كذا...
مسكت خصله من شعرها وطالعت فيه..
عهود:سالم..مامليت ..يعني من عيشتنا..ماتعبت
اخذ رشفه وبعدها رشفه وهز الفنجان وهو يعطيها
سالم:انا قلتلك..اصبري كلها اسبوعين وان شاء الله تطلع نتايج عمي سليمه...
نزلت الفنجان بعصبيه
عهود:وش بتسوي يعني؟؟؟
سالم:اكيد بطلقك..لاتخافين..
عهود:اووووه سااالم خلااااص تراك زهقتني لاتسوي نفسك كأنك مظلوم وكأني انا اللي طالبه الطلاق...
سالم:ماجبت شيء من عندي..
عهود:طيب يعني بتطلقني لاني انا مابيك صح؟؟؟
سالم:صح
عهود:وانا ابيك الحين...
سالم:وانا ماابيك...
عهود:مايهم..صرت متعوده على تجريحك..
تنهد
سالم:انت اللي تجيبينه لنفسك...ماغصبتك تعيشين معي
هزت راسها بملل واخذت قطعة حلا بيتي بيدها ومدتها لفمه اللي استقبله بدون اعتراض
عهود:اللهم الهمني الصبر...
بلع الحلا دفعه وحده وقال وهو رافع حاحب
سالم:يلهمك الصبر لين تطلقين؟؟؟
ابتسمت على جنب وهي تاخذ قطعه حلا ثانيه وترجع تحطها بفمه..
عهود:شرايك بالحلا شكله عجبك..تراني انا اللي سويته بيديني علشان سالم حبيبي..
ذوبها بفمه قبل لايبلعها..واشرلها تصب قهوه..وقال وهو ناوي يطفشها
سالم:ماجاوبتي على سؤالي...يلهمك الصبر لايش بالضبط؟؟؟
مسكت ترمس القهوه بيدها اليسار والفنجان بيدها اليمين وصبت القهوه ..
عهود:حبيبي لا تتعب نفسك..اسلوبك صرت متعوده عليه..واذا قصدك على الطلاق فمارح تقدر تطلقني...
ومدتله الفنجان
تناول الفنجان وهو يضحك باستهزاء
سالم:وليش مااقدر اطلق؟؟؟
عهود:كذا قلت ماتقدر يعني ماتقدر...
سالم:اذا بتدخلين عمي بالسالفه فأحب اطمنك..مارح يقدر يسوي شيء..
ضحكت بدلع وغرور..واخذت قطعة حلا ودخلتها بفمه بالغصب
عهود:لاتخاف مارح ادخل احد..انت من نفسك مارح تطلقني...ولا تسأل..كل شيء بوقته حلو..
************************
رفع راسه وهو ماسك رقبته بيدينه يدلكها وقال وهو يحركها يمين ويسار
فيصل:شلونك الحين؟؟
طالع بالمغذي اللي بيده..
خالد:من جابني هنا؟؟ وانت من متى هنا؟؟؟
طق رقبته وحس براحه مبدأيه وقف وهو يقول
فيصل:انا جبتك..لقيتك بالطريق تنزف..
خالد:وين رايح؟؟؟
فيصل:بروح اغسل وجهي..وراجع لك..
خالد:خذني معك ابي اصلي ماصليت
فيصل:الحين برسلك الممرض ياخذ المغذي ..انتظر شوي...
*******************
دخلت الجناح بعد ماطقت الباب...
ماتدري ليش تحس بالخوف..وقلبها يدق بشكل سريع...
ابتسمت لخالتها اللي اشرتلها تجلس جنبها..
ام فيصل:ميوسه تعالي جنبي...
مشت بهدوء وهي منزله راسها وجلست جنب خالتها..
ميساء:آمر ياعمي..
تنحنح وقال بصوت حنون خلاها تستكين
ابوفيصل:اللي صار اليوم يابنتي..انا ماارضاه لك..ومارح اخليه يعدي بهالسهوله..وكرامتك من كرامتي انا..
ويشهد الله اني اعاملك مثل مااعامل ليلى وسلمى...اذا مقتنعه بكلامي وعارفه غلاتك عندي قوليلي علشان اكمل..واذا لأ..
قاطعته
ميساء:والله ياعمي اني مااعتبرك الا مثل ابوي..واللي تبيه اسويه ..
ابوفيصل:يابنتي اللي صار..نزغة شيطان..وانا عارف خالد..لو هو مصدق الكلام كان ماطلع وماندري وينه...
حست براحه يوم درت انه طالع..يعني ماجاني واعتذر مني لانه مو فيه..مو لانه مصدق الكلام..
التفتت على خالتها
ام فيصل:يابنتي لاتخربين بيتك بيدك..والله اني مااقول هالكلام علشان خالد ولدي..
ميساء:البيت خرب ياخالتي..
ابوفيصل:ان شاء الله مو صاير الا كل خير...بس انا طالبك طلبه..وبشوف غلاتي عندك..
ميساء:عمي الله يخليك لاتحرجني..انت تآمر..بس اللي تطلبه صعب..
ابوفيصل:ولانه صعب ابيه...وش قلتي..تسامحين خالد...وترجعين لبيتك
ام فيصل:علشاني ياميساء..اللي صار بيتصلح..وخلاص كلن عرف غلطته وندمان..
ميساء:اللي تامرون فيه..
ابتسم وقال وهو يطلع شيك من جيبه
ابوفيصل:وهذي رضاوه مني ..وباقي رضاوه من خالد..
ميساء:مايحتاج عمي..خيرك سابق
ام فيصل:ميساء مايرد الكريم الا اللئيم
ابوفيصل:حلفت ماتردينها...
مدت ايدها واخذت الشيك بدون ماتشوف المبلغ الضخم اللي فيه..
ميساء:عن اذنكم..بروح اجهز اغراضي....
********************
|
25-12-11, 12:52 AM
جديد مواضيع قسم القصص المكتمله
العرض العادي
