االجزء الرابع....

من عقب الموقف الي استوى بالدوام...وانا معتزله العالم...كل ما احاول انسى ...وارد ثقتي بنفسي...واقول اني قويه واقدر اواجه الناس...الى انه تي مواقف وانهار...وتتعب نفسيتي ..واعتزل الدنيا وما فيها...وايلس طول اليوم..اردد نفس الجملة...انا شو ذنبي...شو سويت بدنياي...مالي ذنب يا اوادم ليش تاخذوني بذنبه...وينك يا اخوي.وينك يا عزوتي...وينك يا الي تخليت عني....طردتني بنفس ليلة زفافي...ما فكرت عند منو اسير...ما فكرت اختي اشقى تتصرف...ما كان لها حد غيرك...والله ما بنساها لك يا اخوي...وبردها لك..بس خلى الزمن ينصفني بالاول...فتحت التي في علشان اغير من نفسيتيي الدمار...يلست اتابع المسلسل الي يعرضوه بال ام بي سي بس بالي مب معاي....كنت لافه راسي صوب التسريحة وانا شارده...بس شد انتباهي الصوت الصادر من التي في ..صوت عرس..لفيت راسي ...واول ما يى عيني على فستان ابيض ..وكوشة...يلست اصرخ بصوت عالي ..وانا احط اديني على اذوني عسب ما اسمع شي...حرام عليك يا التي في ...حتى انت معاهم ضدي...حتى انت ...هاجمتني الذكريات بصورة غير طبيعية...صراخ ام المعرس..الكراسي وهي تطيح....الحريم الي يلبسوا عبيهم...

الله حياة الجامعة وايد حلوة...صح انها متعبة من محاضرة للثانية ...بس ها لمجرد شهرين بعدين ببدى حياة المختبر...والتجارب...ما كونت صدقات لحد اللحينه...يكفيني سعاد بهاي الفترة...هي من امس تحاول انها تعرفني على الجروب الي معاها ...هي من النوعية الاجتماعية وعندها طريقة سريعة بتكوين الصداقات ...اما انا فمن النوعية الي بالصعوبة اندمج مع الناس...وبعدين العدد الاكبر من الطلبة العرب الي اهني فري...واذا مب فري سوالفهم غريبة..ويمكن انا الغريبة وشخصيتي صعبة...كل شي جايز...بس الي استغربت منه ...وشد انتباهي ...انهم يسلمون باليد...اقصد البنات...لما يسلمون على الريايل عادي يصافحون باليد...يى على بالي معلمتي ...ما ادري اي صف بالضبط بس اكيد بالثانوية...واتذكر وحدة من الطالبات سالتها ...اذا انها انحطت بموقف صعب وكان لازم انها تمد يدها شو تسوي...واذكر انه المعلمة قالت ...حاولي انج تشدي كم قميصج لحد ما يوصل لاطراف صبعج وتسلمي عليه ..يعني بين يدج ويده قماش...واذا تقدرين استخدمي التيشو...انا شخصيا ..احاول قدر ما اقدر البس قفاز بيدي اليمين...والوضع هني مساعد...اقصد البرد...واذا اضطريتي اعتذر بطريقة لبقة ...واقوله انه ها مب شي شخصي...بس ديننا ما يسمح بالتصافح بين المرأه والرجل...وين العيبه ولا الغلط ...بالعكس هو راح يتفهم موقفج بمنتهى اللباقة...اصلا انا امس تعرضت لها الموقف لما سرت صوب مكتب البروف المشرف علي دراستي ...هو مد يده ...وانا كنت ناسيه الجلافس بالكلاس..فاعتذرت وشرحتله السالفة...وهو بمنتهى البساطه اعتذر وقال سوري ما كنت اعرف هاي الاشياء عن دينكم...وراح احاول اتثقف عن دينكم...يعني انتي مب مجبوره انك تتنازلي عن دينك ...عسب تكسبين الطرف الاخر...ما تقولين ها مب خليجي يعني عاي...ترى بالنهايه هو ريال...والدين هو الدين سوا كنت ببلادج ولا كنت بره بلادج...دينج هو الي يسيرج...مب انتي الي تسيرنه على ما يناسب هواج...ما تاخذين من الدين الاشيااء الي تعيبج وتي على هواج...وترفضين باجي الاحكام...

حاطه راسي على ريول امايه...وهي تمسح على راسي...وتتخبرني عن ربيعاتي...وعن شغلي ...وبعدين تسكت...ارفع راسي واجوفها تدعيلي ...والدمعة واقفه بطرف عينها...وايلس امسح على دمعتها...امايه فيها شي...مخبيه علي شي...وايد تسرح...ووايد تسير صوب بيت خالتيه ...مب من عوايدها...هي كانت تسري صوبهم كل يومين...بس اللحينه صايره كل يوم تسير...وزيارات مؤيد كثرت صوبنا ...وابراهيم وايد يسرح...نيلس نكلمه بالساعات وهوساكت...رفعت راسي عسب اجوف ويه امايه ...جفت اليرح الي على حاجبها ...عبارة عن خياطه ...حطيت يدي فوق اليرح...
اماية:بعدج تذكرين اليرح ...ولا نسيتيه
غصون:اشقى انساه يا امايه ...وكان اول مرة واخر مرة ابراهيم يصرخ علي
يلست اتذكر الحادثة...اتذكر الياسمينة المزروعة بحوي بيتنا ...وكان مزوع يم اليدار ...يعني اذا تبى ياسمينه لازم حد طويل ولا جبير ييبه لك..وفي يوم قررت اني ايب الياسمينه بروحي...ركبت السطح ...وكان ابراهيم ياييب هنود يرفعون طول السطح ...قبل ما اخطف الياسمينه...تزحلقت ...وكنت خلاص بتزحلق..لولا اني يودت اليدار الي كانوا الهنود يشتغلون عليه ...ما انتبهت انه مب ثابت اصلا...وتحركت طابوقة من اليدار وطاحت...الا واسمع حد يصرخ ويقول دم ....امايه كانت يالسه تسولف مع ابراهيم ...واول ما سمعت الصريخ ...سارت تربع صوبهم ..وهي تركض تعثرت وطاحت على ويها ...والحوي كان فيه رمل وي حصى صغار بس حادة....وانشق يبهتها صوب الحاجب...وانا اول ما جفت امايه تنزف ..سرت ركض صوبها ..بس هي سارت صوب مدثر الي راسه منشق وينزف...ابراهيم عطاني محاضرة وقاطعني يومين ...كنت وايد اصيح ...اباه يكلمني هو كان ابوي ...قبل ما يكون اخوي...لحد امايه ما سارت صوبه وطلبت منه يسامحني...ومن عقبه وانا كل ما اجوف مدثر ..اقوله انت اكثر شخص انا اكره بالدنيا ...جفت فجوره يايه صوبي ركض...لميتها بقوله لصدري ...ويلست ابوسها ..هاي بنتي مب بنت اخوي...ترقد معاي...وتاكل معاي ...وتذاكر معاي...اصلا هي ما تزقرني عمو...لا ماماتي
فجر:ماماتي ..جوفي سالم يضاربني
غصون:وينه مسود الويه ...سيري زقريه جان ما بعته بسوق السمج...عيل يضارب بنتي الدلوعة...
امايه:يا ذا العلم..حاطه راسج براس ها اليهالوا
غصون:وبحطه براس امه....جان زعل بنتي
امايه :وابوي على منكرج...
سمعنا صوت حد يحمحم ...
مؤيد:السلام عليكم
اول ما سمعت حسه ...رديت السلام بصوت واطي ..حتى ما ظنتي امايه سمعته...قمت من على ريولها ...وبوست راسها...وسرت صوب ابراهيم وبست راسه ...جفته يحرك راسه بمعنى لا حول ولا قوة الا بالله ...متى راح تتغيري...وركبت الدري ...ولا جنه ها اخوي الي حدر صوبنا...هو الي يبى جي يا ابراهيم...هو الي رسم الحدود من بيننا...خلي ولد خالته ينفعه


عاد ما حر ...خسنا يا ناس ...الواحد ارحمله ييلس ببيته ولا يطلع الا بعد اذان المغرب...ضحكت على هاي الفكرة...اتخيل عمري اطلع من شغلي...جان بنموت يوع انا وولدي...لانه صالح ما يصرف علينا ..ولا يسال عنا ..حتى البشكارة الي يايبنها مانعنها انها تخدمنا...اصلا هو اول ما يجوفني يالسه بالصاله ...يحشر البيت صريخ...ويقولي فارجينا ..وما ابى اجوف ويهج....واذا جاف حمود يلعب مع عياله...يلس يصرخ عليه ويضربه....هو شو ذنبه ...اذا تبى تنتقم ..انتقم مني..لا تدخل الياهل بشي اكبر عنه...ها ياهل شو دراه بالدنيا ...لدرجه انه صاير كل ما يجوف صالح...يصيح بقوة ...ويطلب مني نسير فوق بحجرتنا ....ما عليه يا صالح...لنا رب فوق ما ينسانا...حملت حمود الي رقد بالسيارة ...وسرت صوب حجرتي ...الحمد لله ما جفت حد...كنت يايبه غداي معاي لانه صالح مانعني اكل من اكل بيته ...يلست اتغدى ببال شارد...اافكر بوضعي افكر بحمود...اللحين هو ياهل بس بعدين لما يكبر ...ويجوف تعامل خاله معاه اكيد بياثر عليه ...يعني على الاقل اللحينه ابدا ما ييلس بالبيت ...من ينش من الرقاد اسير به لمدرسة تحفيظ قران...بس عسب نتجنب صالح ..ما ادي لحد متى ...يلست اتذكر يوم ملجتي ...يوم نهاية حريتي ...ويوم بداية عذابي...اسمعهم يباركولي...على شو تباركون ...على نهاية سعادتي...على حياة بدت بجملة ...راح انتقم لاخواني...هو قالها اول ما يلسنا بروحنا ...كنت متاكده من السبب من وراه رغبته بها الزواج..وياما حاولت اشرح وافهم صالح وخواتي ...بس لا حياة لمن تنادي...وانا دفعت الثمن غالي...بحياته وعقب مماته
ايا زمان حل لك عذابي...ايا زمان حل لك ظلم...انسيت الناس من حولي واستفردت

بسوادك علي...ااستكثرت علي بساعه فرح..ام استكثرت علي بدقيقة

ضحك....ااصعب ما اطلبه ..ام هو

المستحيل بعينه...يكفي يا زمن...ويكفي يا الم..فانا بالنهاية انسان


ما عليه يا عيوزي انا تعقي علي نغزات ...واني خربت عليج رقادج من الازعاج الي سويته بالمطبخ...الله هداج انا بعدني ما سويت شي..يا دوبني اقول يا هادي..بس ما عليه...انتي عسل على قلبي...انتي قنديل البيت ...قولي الي تبينه ...ما راح ازعل ...اصلا قلبي ما يشيل على حد...امايه ربتني على جي..كانت دوبها تقول ...عمرك لا تشيلي بخاطرج على حد...بتعيشي سعيده طول عمرج...فديتها امايه هي ونصايحها...متولها عليها ...وعلى نصايحها ...وعلى الخرافات الي تامن بهم...لحضه بسلم على ليلى وبخبركم سالفة الخرافات...شو ورانا ...سلمت على ليلى ..وتخبرتني عن استعدادي للجمعه اليوم...لا انا نسيت سالفة الجامعة ...ما عليه الا لبسه وتغير مزاج..المهم نرجع لسالفه الخرافات...الله يسلمكم امايه وارثه عن امها كل انواع الخرافات..وبما اني بنتها الوحيده ..لازم ارث ها الارث...ها ارث العايله حرام يضيع...تقولكم امايه جان رمش عينج اليمين ...معناته في شي حلو راح يستويلك اليوم....والعكس صحيح....واحلى خرافة قالتها ...اذا يالج هيكب(حازوقه ) معناته حد يالس يتكلم عنج بالسوء ...واذا تبين تتخلصين من الهيكب...خمنيي اسم الشخص الصحيح الي يتكلم عنج ...وهو بروحه بيتوقف...حلوة هذه صح....اتذكر في مرة من المرات ...قصيت على عمري وقلت خلني اجرب خرافة اماية...يلست اخمن اسامي كل عائلتنا ...وكل ربيعاتي...حتى معلماتي الي درسوني من الثانوية للابتدائية ما سلمومن التخمين...بالنهاية يبس حلجي...والهيكب بمكانه...قلت لاماية ...امنت بالله انه كل هاي خرافه...وصلت الشقة ...والدنيا هدوء ...وين عيوزي ...ما جفتها اليوم...احس شي ناقص بدنياي...المشكلة انا اللحينه مستعيله بسير صوب قوم ليلى ...تلبست بالسريع وسرت صوب شقتها ...عرفتني على الجروب ...وكانن من مختلف الجنسيات ...تداخلت معاهم بسرعة...اصلا انا من النوعية الي اقدر اكسب ثقة الطرف الثاني بسهولة...يمكن لاني دايما مبتسمة ...واقدر اماشي الطرف الثاني ..ولو كنت مختلفه معاها بالافكار...يمعتنا كانت وايد حلوة...صراحة حسيت عمري ببلادي وسط اهلي ...وكنت انا الوحيدة الي مب معرسة وسطهم...عاد لمة معرسات....والله انه ويهي قلب لكل الوان القوس قزح...حتى احيانا اقولهم تراني مب معرسه لا تضيعوني..يكفيني عيوزي ...لا تزيدون علي ...بس ولا جني اقولهن شي ...وبعد ما تحلينا ...استاذنت منهم ..بسير ارقد واري نشه من وقت ...وهم شكلهم بيسهروا صباحي....الا هذوله مب وراهم ازواج....اول ما حطيت ريولي بالحوي...الا واجوف عيوزي يالسه على الكراسي الي بالحوي...وميوده كتاب تقراه...خلني ايلس معاها ...واجوف الكتاب الي تقراه...يا ذا العلم ..عيوزي تقرا كتاب عن كيفية كسب قلب زوجك....يا امي ها الكتاب المفروض نقراه حنا المساكين...الفقارى...مب انت ...انت بروحج مدرسة متنقلة ...ما يحتاي تتثقين...وبعدين تعالي وين تبين توصلين بشيبتنا ...رحميه ذا العبد الفقير ...هو يا الله وحسن الخاتمة...وانت تبين تكسبين قلبه ...عيايز اخر زمن

السلام عليكم
ياروردة

يارب الله يسهل عليج الدراسة ويحنن الاساتذة عليج

هسة نجي للاحداث
شوفي بالنسبة الغصون اكيد صاير شي قوي بينهة وبين اخوها وابن خالتها وهي تنظر للموضوع من جهتها وتعتقد انها صح
وهم نفس الشي يشوفون نفسهم صحهم
الام وابراهيم يردون يقربوهم اكيد يخططون لزواج غصون من مدثر اشلون اكيد معاج يحلوا الترقب

اما صالح واخته

بصراحة الله يعينه اشلون متحملة وحقها اتفكر بطفلها ومستقبله
ويبقى السؤال اين الاب

اما ميسم

بصراحة غموض
زوجها لا تعرفه ولا يعرفه ولا شايفته ولا عايشة معاها اشلون يحاسبوهة على افعاله اكيد مسوي شي كبير ومنتشر عبر وسائل الاعلام

لايكون ارهابي
ننتظر ونعرف


مياسة بصراحة مثال مشرف للبنت العربية التي تصلح سفيرة لاخلاق العرب
دمتي بود ننتظرك بشوق

لاتتأخيريين عيوني
ولا تلهيج القصة عن الدراسة
بالتوفيق غاليتي

أما ميسم حكايته حكاية يعني إذا كانت ماعاشت معه أبد ونظرة الناس لها كذا فاسمحي لي هذي مصيبة مصيبة إلا بلوى والله مشكلة!

غصون متابعه معك بإذن الله^.^

وهج ياعمري مشكلة لكنتي دارية إن حياتك خربانه من أول وش لون صدق خواتها أقنعن صالح مايعطنها الخلطة السرية
يا أخي وش دخلها هي برفض خواتها عاد آخرتها مات وخلاها عاد أخير لها صح صالح أقشر بس فيه أمل إن الله ييسر له واحد زين

مياسة هههههههه عسل أما العجوز ابداع خخخخه يعجبني أفكارها وثباتها أحس الانسان لحافظ على قيمه يحترم أكثر من الإمعه اللي ينسلخ من هويته

الله يوفقتس بدراستك