كل اللي سألوا عن طريقة المحمر ( الرنيوووش ) ,, العيش الشيلاني ,, ومطفي السمج ,, تفضلوا الطرق ,,,
الصالونة ( مطفي السمج ) :
سمج هامور أو كنعد أو شعري ,, بس الهامور ألذ ( مقطع ومغسول ومنظف وتبهرينه بالبهارات المخلوطة أو الكاري مع شوية ملح ) + بصلتين كبار مقطعات صغير + ثوم وزنجبيل + ورق غار + 2 ليمون أسود + حبة فلفل بارد + 2 فلفل حار +3 طماطم أحمر مقطع أرباع ومزال القشور والذور + 2م ط تمر هندي منقوع في نص كوب ماي ومصفى + 2 م ط صلصة طماطم + كوب كزبرة خضرا مفرومة ,, ووريقات نعناع ,, شوي بس
البهارات ( 1م ص بهارات مخلوطة أو الكاري + 1م ص كمون +ربع م ص بابريكا )
_ بنتبع نفس خطوات عمل مجبوس الهامور ,, بس طبعا بدون رز ,, يعني هالخطوات ,,
_ نقلي السمج ,, نص استوا ونتركه على جنب ,,
_ نحمر البصل في شوية زيت ,, نضيف الثوم والزنجبيل ,, ورق الغار ,, والليمون الأسود,, ثم البهارات ,, وبعدين نضيف الطماطم والفلفل البارد والحار والصلصة ,, ونترك الخضار والطماطم يتسبك الى أن يذوب الطماطم وتتجانس المقادير ,, نضيف الملح والتمر الهندي ,,
وننزل السمج المقلي في القدر بهدوء ,, نضيف تقريبا أربع أكواب ماي ,, لا تحطين كمية ماي كثيرة ,, بس تتركين الماي يغطي السمج ويكون أعلى منه بشوي ,, الصالونه هذي حلاتها ,, يكون مايها قليل ,, نغطي القدر ,, ونتركه يطبخ لحد مايستوي السمج ,, وبالعافيه ,,
وهنا صاالونة مطفي السمج ,,
طريقة المحمر ( البرنيوووش ) :
_ نحرق السكر الى أن يصبح لونه مثل لون الكراميل أو أغمق شوي ,, نضيف الماي الحاربهدوء ,, ونحرك الى أن يذوب الكراميل ,, نضيف للماي شوية زيت وحلوة ( الشمر الحلو ) ويكون مدقوق شوي ,, شوية قرفة مطحونة ,, حباات هيل ,, لما يغلي الماي ,, نضيف الرز المغسول ,, بس خلي كمية الماي زايدة ,, عشاان لما يستوي الرز بنصفيه ,,
_ لما يقرب الرز يستوي ,, وهالخطوة بتتأخر شوي ,, غير عن الرز الأبيض اللي يكون نضجه أسرع ,, لأن الرز معاه سكر ,, صفيه من الماي ,, ورجعيه مرة ثانية للقدر ,,
ورشيه بشوية زعفران وقرفه مطحونه ,, ونغطي القدر بالقصدير ,, ونتركه نص ساعه غلى نار خفيفه ,, ونقدمه مع صالونة السمج المطفي والرز الأبيض وسمج مقلي ,,
_ الرز الأبيض :
الطريقة العاديه لعمل الرز ,, بس أنا لما أصفيه وهو في المصفاة ,, أرش عليه زعفران منقوع في شوية ماي ورد ,, وعند التقديم أزينه بالرمان المجفف ,, روووووعه يطلع ,,
السمج المقلي :
سمج منظف ومبهر بالبهارات والملح ,, نخليه ساعه ,و ثم نقليه في زيت حاار ,, وعلى نار خفيفه ,, حتى يستوي السمج من الداخل ,, ونقدمه ,, مع البرنيوش ( المحمر ) والعيش الشيلاني وصالونة السمج المطفي ,, واحنا في قطر لازم نقدم معاه الدهنه القطريه ,,
وهذي سفرتنا كامله ,, 
02-06-11, 09:13 AM
جديد مواضيع قسم ركن المطبخ
العرض العادي
