البارت السابع والثمانين,,,
/////////////////////////////////////////
خالد/مشاعل..
لفت له هي والحريم اللي معاها..
خالد/تعالي ابيك شوي....
قامت وهي تمسح دموعها اللي كل مامسحت حست انهم قاعدين يزيدون....
يوم قربت صوبها مسكها من كتفها ومشاها جنبه لين طلعوا من المستشفى وظلوا يمشون برى,,,
خالد/مشاعل قوي ايمانك...محد فينا عجبه اللي صار بس هذا حكم الله واحنا ماعلينا اعتراض عليه يابنت الحلال,,,,,
مشاعل كانت تبكي بهدوء.....
خالد بحنان/صدقيني يامشاعل كلنا نحب فواز وتحسفنا يوم سمعنا بالحادث...وهذا انتي شفتيه وسولفتي معه الظهر وماشفتي شي يخوفك خلاص هونيها...
مشاعل ببحة/بس مو كل النتايج طلعت....
خالد/واذا يعني...احمدي ربك لاصار فيه تشوه بخلقته وكاهو يشوف ويسمع ويتكلم هاذي مو نعمة بالنسبة لك؟
مشاعل بحزن/الحمدلله.......
خالد/ يالله مسحي دموعك مايصير تبتدي الزيارة وتدخلين تشوفينه بدموعك....بتحرجينه وبتحسسينه بشي مايبي يحس فيه؟بيتضايق لمى يشوف دموعك يامشاعل,,,
مشاعل وهي تمسح دموعها/غصبا عني ياخالد والله مو قصدي.....
خالد وهو يمسح دموعها/قوي نفسك يامشاعل علشانه مايصير يشوفك منهارة ويتعب فوق تعبه...ان شاءالله الحين نشوف الدكتور ويقول انه بخير الحمدلله ويرخصونه قريب لو مافيه شي ...
مشاعل بتنهيدة/وش معنى ليلة العرس بالذات ياخالد؟ليه ماصارت قبلها ولابعدها؟ليه ..
قاطعها خالد وهو يضمها لصدره/اذكري الله ولاتخلين الشيطان يدخل براسك ويدخلك افكار سودة؟
يوم حضنها ظلت تبكي بحرارة اكبر وهي حاسة ان شحنات البكي عندها زادت بمواساته ...ماعرف شيقولها اساسا حتى هو دموعه صارت تنزل وهو يشوفها بها الحالة...الله يصبرك يامشاعل ويخف عنك ها المصيبة اللي ماكانت على البال ولافي الخاطر,,,
//////////////////////////////////////////////////////
بزاوية ثانية بالمستشفى وتحديدا بجهة المصاعد..
كانت نورة قاعدة قبال المصعد تماما بعد ماقامت مشاعل وياسمين طلعت مع نواف قبل شوي وجت تبكي هنا براحتها...
ماهي قادرة تتصور مشاعر مشاعل بها اللحظات ولا جزء منها حتى...
لو كانت هي بها الموقف وش كان صار فيها ياترى؟؟؟!!!!!
شي رهيب ماممكن تتخيله ولا بالاحلام حتى؟
الله يصبرك يامشاعل ويخفف عنك يافواز ويردك لها بالسلامة...
بليلة العرس عاد؟؟؟وش ها الحظ؟؟؟
رفعت راسها يوم سمعت صوت يناديها...
كان فارس واقف وهو جايب لها مويه...
فارس بحنان/خفي على نفسك شوي يانورة..انتي الواجب توقفين جنبها تواسينها مو تزيدينها؟
نورة بحسرة وهي تشاهق/مو قادرة اتصور ربع مشاعرها اللي قاعدة تمر فيها...والله حرام...
فارس/قولي الحمدلله على كل حال هذا قدر ربك وهو اللي كاتبه؟
نورة/الحمدلله ياربي....
فارس/شربي لك شوية مويه وهدي وبعدها قومي جلسي معها لاتتركينها بروحها انتي جاية هنا تشوفينها وتواسينها وتخففين عنها مو تقعدين انتي بجهة وهي بجهة وتفتحون مناحة وعزا..
اخذت منه المويه وشربت شوي وقامت ..
صارت قبالها علطول ...يوم شافته واقف قبالها حست بالحسرة وبالخوف بنفس الوقت...
لو يصير لها نفس اللي صار لمشاعل وتخسر فارس وش بيصير فيها؟؟؟
دق ناقوس الخطر عندها بقوة وقالت بهمس خايف/فارس..
فارس وهو يتقرب اكثر/حبيبي...
نورة وهي تبكي/انا خايفة,,,
تقرب منها اكثر وحضنها شوي بس هي زادت بدموعها وقالت بخنقة/ماابي اخسرك بيوم من الايام....
فارس/نورة انا لك وانتي لي وان شاءالله مانفترق يارب...لاتاخذك الافكار لبعيد وتشتتك....
نورة/اذا خسرتك بحس اني ضعت بها الدنيا,,,
ضمها لصدره اكثر واكثر....
///////////////////////////////////////////////////////
عبير احتاست تاخذ رقم نوف من عند منو.,,,
الاكيد مو عبدالله لانه طالع داخل وماهي قادرة تطل بوجهه ولامن عمها ولامن عمتها ولامن مرام اللي جالسة جنب حصة,,,,
ولامن نورة اللي مع فارس ولامن مشاعل اللي طلعت مع خالها يتمشون ويسولفون برى,,,,
أي ماكو غير ها البزارين مشعل وسعد اذا قدرت تحصل الرقم عندهم بيطلع خوش الخوش,,,,
لامن حس ولامن درى,,,,ولابيقولون لااحد انهم عطوها الرقم ولااحد يدري ان رقم نوف عندها علشان تكون هي اللي وصلت الخبر,,,,
راحت عندهم وهم واقفين قبال الكافتريا يناظرون بالرايح والجاي,,,
عبير/مرحبا..
رفعوا راسهم,,
سعد/هلا,,,,
عبير/ماعندكم فلوس يابابا وجعتوا تبون شي....ياحرام كان قلتوا لي وانا اعطيكم؟
مشعل باحتقار/أي مو رزقنا عليك لان؟
عبير ناظرته وسكتت..
سعد/منو انتي!!
عبير/شكلكم ماعرفتوني وانحرجتوا مني...لاانا قريبتكم انا خطيبة عبدالله ولد خالتكم,,,
مشعل/أي اللي دايم يقولون عنك عقرب رمل؟
عبير انقلبت معالمها وقالت بحقد/منو اللي يقول خالتي ولانوف ولامشاعل ولاحصة؟
سعد/مو يمكن مرام هههههه
عبير/ماقلت لي منو اللي يقول؟
مشعل/جتني البارح على الايميل وش رايك؟
عبير/............
سعد/اجل تبين تتصدقين علينا!!يبى احنا ندفع لك ولااهلك بعد ونعيشكم احلى عيشة...احنا واقفين بس ننفس الحزن اللي بقلوبنا شوي,,,
عبير/ليش وش عندكم ياترى مزعلكم وشاغل تفكيركم ومضايقكم,,,,
مشعل/يعني بذمتك احد من الموجودين ماهو متضايق على اللي صار؟
عبير/على قولتك كلنا ماتمنينا ها الشي يصير...بس مانقدر نعترض.....
الا بسئلكم الاقي عندكم رقم نوف زوجة تركي,,,
ناظروا في بعض وبعدها قال سعد/وش تبين فيه؟
عبير/لا بس مغيرة ارقامي ومانقلته معهم وعندي ثلاثة ارقام شاكة فيهم قلت بشوف اذا اللي عندكم مطابق للي عندي,,
مشعل/أي طلعي جوالك مو مشكلة...
طلعت جوالها وسط اعتراض سعد..
سعد/ليه بتعطيها اياه..
غمز له مشعل وقال/اسكت مالك شغل...
عبير وهي تناظر بسعد/وش عندك انت علي ماتبيه يعطيني اياه؟
سكت سعد وماجاوب ونقلها مشعل الرقم وابتعدت عنهم يوم اخذته..
سعد/اهبل انت هم يقولون مو زينة اكيد بتدق على نوف وتركي وتقول لهم اللي صار....وهم مايبون يقولون لنوف وتركي؟
مشعل/يكون ماادري يعني؟
سعد بعصبية/ويوم تدري ليش حضرتك عطيتها الرقم بالله؟
مشعل بثقة/أي بس لازم تحدد أي رقم بالضبط اللي عطيتها اياه؟
سعد/ليش انت عطيتها أي رقم؟
مشعل بنفس الثقة/انا ماافرق بين اسم نوف وبين اسم نواف وبالغلط لاحظ عطيتها رقم نواف يعني مو بقصدي؟
قالها وضحكوا اثنينهم مع بعض,,,
////////////////////////////////////////////////////
في مجمع النور بالمدينة,,,
تركي/يعني السوق ورانا ورانا مامنها مفر؟
نوف باعتراض/انت سئلتني وين ابي اروح وانا قلت لك يوم ماكنت تبي تجيبني ليه سئلتني؟
تركي/فكرت ان احنا بنمشي وبنسولف مو بنشتري وبنتشرى وبيضيع وقتنا؟
نوف/يااخي انا قبالك وانت قبالي وطول الوقت نسولف مع بعض وين المشكلة ؟بعدين ترى تسوقنا يضيع لنا الوقت اذا ماتدري؟
تركي/ياسلااام.
نوف/تركي علامك ماخبري فيك بخيل كذا...يعني حلوة اروح لهم ويدي فاضية مااشتري لهم شي..
تركي/يابنت الناس ماقلت لك شي بس بعدنا والله تعبانين لارحنا البلد اشتري لهم اللي تبينه مو كفاية انك بالفندق ماتنامين وبسرعة تفزين لي,,
نوف/خلاص تحملني الليلة بس وبكرة من نرجع شرقيتنا بروح داري مو رايحة معك غرفتك؟
تركي بتهديد/عيديها ثاني اشوف ترى ماسمعت؟
وقفت مكانها وابتسمت له..
تركي/يالله عيديها..
نوف/حبييبي وش رايك بالشنطة البيج اللي وراك اخذها لمشاعل تناسبها مو؟
تركي/بالله!!!
نوف/هههههههه
تركي/حريم اخر زمن..
نوف/لاحبيبي لسه الازمان اللي بتجي ورانا اقوى منا..
تركي/من قل مصايبكم انتوا عاد؟
نوف/حرام عليك وش مسووين احنا؟
تركي/سئلي نفسك؟
نوف/ليه انا بعد داخلة بالحسبة؟
تركي/طبعا...
نوف/اووووف...وش مسوية انا بعد!!
تركي بهمس/خليتيني احبك؟
نوف ناظرته بحب وبعدها قالت/وهاذي جريمة ياتركي؟
تركي بثبات/واكبر جريمة بعد....تعرفين وش معنى كنت بالفترة اللي طافت اشبه بمجنون بسببك؟
نوف/أي بس انا ماقلت لك تعال حبني وصير مجنون؟
تركي/مو هاذي مشكلتنا ان احنا نحب بدون اختيار وبدون أي مقدمات...لحظة بس ونشوف نفسنا ضعيفين ومو قاوين نسوي شي...
صارت تمشي جنبه وتفكيرها شبه شارد وقالت له/تركي من متى كنت تحبني؟جاوبني بصراحة؟
تركي بصدق/ماافتكر متى بالضبط؟بس اللي اعرفه ان كل يوم يزيد تعلقي فيك؟
نوف/طيب مو لاني ساكنة معك بنفس البيت جاك شعور انك تحبني لاني شي جديد بالبيت ؟
تركي/لاابدا...
نوف/يعني شي تصادفه طول الوقت,,,
تركي/عندي بالعمل من كل البلدان حريم يشتغلون معي بنفس الدائرة الامريكية واردنية والمغربية ومن كل مكان..ليه ماوحدة شدتني لها وخلتني احبها وانا قبالهم طول الوقت؟
نوف/اللحين انا بضطر اطلع من السالفة الاولى علشان ادخل بها السالفة شنو يعني معك من كل مكان حريم يشتغلون معك؟
تركي/أي ووين المشكلة؟ارامكوا هاذي يابابا من زمان وهي كلها حريم وين الجديد؟
نوف/اعتراض.....
تركي/على وشو؟
نوف/ماابيك تشتغل مع حريم,,,,زوجي وكيفي...انقل دائرة مافيها حريم؟
تركي/كلهم فل....لازم يشتغلون معي حريم يالله شغلي حروبك؟
نوف/اوووف يعني من اليوم بنبدي هواش؟
تركي/أي وش ورانا عاد؟
نوف/طيب حلوين هم؟
ضحك عليها وهز راسه وتفشلت بس قالت بسرعة/سؤال مااعتقد اجابته صعبة؟
مسك يدها وقال بثقة/بالنسبة لي عيوني ماتشوف الا اللي واقفة جنبي بس!!!!
ابتسمت له برضى وكملت معه مشي وهم يسولفون,,
//////////////////////////////////////////////////////
في غرفة فواز وقت الزيارة,,,
دخل ابو سالم وام سالم وبعدهم عيالهم و ابو سعد وام سعد شوي وطلعوا علشان لايطولون عليه وفارس ونورة وبعدهم ابو تركي وام تركي وعبدالله وخالد كانوا اخر ناس دخلوا له علشان تجي له مشاعل,,,
يوم شافتهم طالعين مسحت باقي اثار الدموع اللي فيها علشان لايشوف انهيارها مثل ماقال لها خالد وتضعفه اكثر وتتعبه فوق تعبه,,,,
يوم دخلت ماقدرت حتى تسلم ,,كان تقريبا بنفس الشكل اللي شافته فيه الصباح ماتغير فيه شي,,,,
جلست جنبه على الكرسي ويوم شافها جالسة وعيونها بالارض وهي بعيدة عنه ناداها بنفس صوته الي يميزه بس مع شوية تعب..
فواز/مشاعل....
رفعت راسها تناظره وهي حاسة ان دموعها بتخونها باي لحظة وبتنزل,,,
فواز وهو يتصنع المرح/خلاص عفتيني شبعتي مني وجلستي بعيد ؟
ماقالت شي ولاحركت ساكن..
بحنان تعبان قال لها وهو ياءشر على فراشه اللي جالس فيه وقال لها/تعالي بقولك شي,,,
قامت من مكانها تقربت منه بس بدون ماتجلس رفع يده لها ومسكتها بسرعة,,
فواز/مشاعل جلسي هنا ابي اشوفك عدل,,,,
جلست قباله على طرف السرير وهي بعدها مخنوقة بعبرتها وحاسة انها بتنفجر باي لحظة,,,,
مسك يدها وقام يناظر في الحناء اللي منقوش فيها وقال لها/الله يجنن,,
سحبت يدها بنرفزة منه ليش ماتدري..
حست انه قاعد يكذب عليها وعلى نفسه انه قاعد يتصنع ويجامل علشان لايحسسها بشي...
تنهد بقوة وتنهدت هي وراه بعد وقالت بهمس/انا اسفة مو قصدي..
فواز/مشاعل...ادري خربت عليك ليلتك وصباحيتك وكل فرحتك..
مشاعل وهي تمسح دموعها/بالدنيا عندي سلامتك واني اسمع صوتك وماانحرم من نعمة وجودي قربك,,,,,,
وبعدين انت وش يدخلك,,,,,انت مالك شغل بللي صار,,
تنهد بقوة ومافهمت سبب تنهيدته,,,,
فواز/انا بكرة الصباح بطلع من المستشفى؟
رفعت راسها وقالت/ليه؟
فواز بضيق/لانه مافي شي يستاهل اني اظل هنا ...ها السرير في غيري احوج فيه مني!!
مرت لحظات صمت قطعتها مشاعل بحيرة وهي تقوله/وانت مالازم تريح كم يوم؟يعني غير الكسر اللي برجلك مافي شي لازم يكون تحت الملاحظة؟
اكتفى بانه يناظرها,,,
انفجرت تبكي يوم مارد عليهاوقالت من بين بكيها/فواز رد علي,,,وش فيك؟لاانت راضي تقولي ولا صاحبك راضي يقول لنا شي,,,,ولاانت راضي تروح مستشفى ثاني,,,ابي افهم بس ليه؟
حيرها صوت تنهيدته القوي وحست ان في شي ماهي فاهمته وهو مخبيه عنها,,,,
مشاعل ببكي قطع قلب فواز/اقدر افهم اللي صاير شنو يافواز؟
فواز وهو صاد وجهه عنها/وش اللي صاير ماصاير شي يابنت الحلال,,,
مشاعل /بلى في...بس انت ماتبيني ادري....لإن شي خطير صاير..لاتخاف بتقبل كل الامور مهما كانت اهم شي انك جنبي اشوفك واسمعك وتكلمني وتسمعني وتشوفني,,,,
تنهد وفضلت انها تسكت لانه مايبي يقول اللي عنده,,,
بعد فترة صمت مرت حط يده على يدينها وقال لها/روحي الليلة نامي وارتاحي يامشاعل وبكرة انا بس اطلع من هنا بدق لك؟
مشاعل ضحكت بمرارة وقالت له/اروح ارتاح؟ليش أي راحة بتجيني وانت تعبان أي راحة؟وبعدين شلون اتركك تطلع من هنا وانا مو جنبك انا بظل معك حتى لو منعوني مايهموني,,,
فواز/مشاعل تكلمنا بها السالفة وخلصنا روحي الليلة البيت ارتاحي ,,
مشاعل/أي بيت فيهم حدد؟
صدمه سؤالها ماعرف شيقول لها,,,,وش معنى ها السؤال يعني يامشاعل ليش؟؟
مشاعل بنفس المرارة/بيت ابوي حلفت ماادخله وابات فيه وانا بحمايتك وتحت مسؤليتك,,
وبيتك ..اللي هو بيتنا تعاهدنا ندخله سوى مهما كانت الظروف وانا عند وعدي!!
فواز/ليه تبين تعانديني وتتعبيني اليوم يامشاعل؟
مشاعل/وانا شسويت؟
فواز/خلاص روحي مع اهلك,,,,انا ماابيك تقعدين بروحك بالبيت قلبي مابيطمني عليك؟
مشاعل/ومن قال اني بظل هناك وانت مو معي قلت لك ماادخله بدونك يافواز وماحدخله بدونك بعد,,,
تنهد وقال بشوية نرفزة/وماتبين تروحين بيت اهلك ؟؟؟بالله وين بتظلين هنا بصالة المستشفى على بالك اني برضاها لك؟
سكتت وحست بقمة انفجاراتها وصلت طاحت دمعة وبعدها دمعة وبعدها شهقت شهقة وانفجرت تبكي...
تنهد بقوة وجرها من يدها لعنده بالقوة وهي ماقاومت اصلا وطاحت بحضنه,,,
كانت تبكي بقوة وبشكل مو طبيعي..وسكر عليها بيده وهو حاضنها وكانت عيونه تدمع مع بكيها..
مايبي يقسى عليها وهم بها الموقف وعارف ان اللي فيها مكفيها بس ماهي قادرة تفهمه هو خايف عليها لااقل ولااكثر بس ماقدر يوصل خوفه لها بالشكل المطلوب,,,
فواز بحنان وهو يغالب دموعه اللي طاحوا من عينه/مشاعلي...
زاد بكيها وحاولت تقوم بس يده شدت عليها ومنعتها تقوم,,
فواز/تقومين من حضني؟ماتبيني؟
رفعت راسها شوي وقالت له بخضوع/اللي تبيه بيصير ولايهمك...
صار يمسح دموعها بيدينها وهو يكلمها بحنان وهمس/مو قصدي ازعلك والله موقصدي....بس انا خايف عليك..
هزت راسها على انها متفهمة وهي اصلا كانت تبكي..
فواز/حبيبي....خلاص لاتزعل...وش تبي قولي اللي تبيه بيصير....
رفعت عيونها له وشافته يبكي ودق قلبها ....وش اللي بيخليه يبكي يعني.....
غمضت عيونها ورجعت فتحتها وغمضتها من جديد ورجعت فتحتها...تبي تكذب الشي اللي جالسة تشوفه مو معقول فواز يبكي؟ليه؟؟وش فيه؟وش اللي صاير وخلاه يبكي وهي ماهي عارفته؟
فواز/وش تبين؟اللي تبينه بيصير؟
مشاعل/ابي اظل جنبك لاتقولي روحي أي مكان ابي وين ماتكون انت اكون قربك واداويك انا بنفسي...
فواز/وتمسحين دموعك وتهدين اذا صار ها الشي؟
مشاعل/أي...
فواز/ماتبكين خلاص لو مهما صار اذا ظليتي جنبي؟
ترددت تقول أي ولاتقول لا....سؤاله او طلبه غريب بس قالت بسرعة/أي...
فواز/خلاص اللحين اكلم حسام يسويلي خروج ونروح بيتنا مع بعض وشتبين بعد!!!
مشاعل بصدمة/الحين تطلع من المستشفى؟
فواز بثبات/قلت لك قعدتي مافيها أي شي جديد اللي بسويه هني بسويه بالبيت وماابي شهر العسل ينقلب لك روحة وجية على المستشفيات,,,,
مشاعل/انا راضية اروح واجي بس اهم شي سلاماتك.....
//////////////////////////////////////////////////////
في غرفة نواف وياسمين,,,
كانت متسندة على سريرهم وتفكيرها شارد ونواف جالس على الكرسي يناظرها,,,
من رجعوا من المستشفى وهم ملتزمين الهدوء,,,
وضع مشاعل مأثر حييل في ياسمين وها الشي احترمه فيها لانه هو بنفسه كان متاءثر منه,,,
مو شي سهل معاريس يقضون ليلتهم بالمستشفى ومحد يتمناها لاله ولالحبايبه,,
يوم دق جواله رفعوا اثنينهم راسهم...
صوت التلفون صار يخوف,,,,,
قام له وشاله وهو اصلا كان قريب منها...
جلس على طرف السرير قبالها وناظر بالشاشة وقال/ رقم غريب ..
ناظرت فيه وحست بالخوف...عادة ما الارقام الغريبة تحمل لنا اخبار سيئة..
يوم رد على تلفونه صارت تناظر بوجهه وبمعالمه علشان تستشف منه نوعية الخبر اللي بيجيهم,,
نواف/نعم..
عبير/هلا...
نواف/نعم...
عبير/.........كانت تحاول تركز بالصوت هذا مو صوت تركي بس الرقم رقم نوف منو بيكون رد عنها ياترى؟
نواف/خير في شي؟
عبير/هذا مو رقم نوف؟
نواف بحدة/لا غلطانة مو هذا؟
قالها وسكرها بوجهها ورمى الجوال جنبه وقال/ناس فاضية صحيح....
ماعلقت ياسمين باي شي...بس ظلت تناظره ورفع راسه لها والتقت نظراتهم..
كانت بين فترة وفترة تمسح دموعها اللي تنزل وها الوقت كانوا دموعها لسه باقين فيها..
تقرب منها اكثر ومد يده ومسح دموعها باصابعه وقال بهمس/انتي الحين ليه تبكين؟
ياسمين برعشة/ليش منو سمع عن اللي صار ومابكى ؟
تنهد وقال/هذا امر الله؟
ياسمين بحسرة/مسكينة مشاعل بدايتها لها كانت هم وتعب وضيقة خلق ومستشفيات؟
نواف/لاتعترضين على حكمة ربك ماتدرين وش اللي كاتبه لها بالايام الجاية؟
ياسمين/..............
نواف/خلاص هدي...انتوا اصلا المفروض توقفون جنبها وتواسونها مو تزيدونها وتبكون معها وتكملون لها الفجيعة والمصيبة...خلاص شي صار واستوى لااحنا ولاانتوا ولااي احد بها العالم يقدر يرد قضاء رب العالمين,,,,
انتوا ادعوا له وبس....ها البكي مو زين هو اذا شافكم كذا بيتضايق....
ياسمين/............
نواف/خلاص ياسمين..
ياسمين بتحسر/ماابي احس بلي تحس هي فيه...لو احط نفسي مكانها مااتحمل والله اموت!!!
تقرب منها وضمها لصدره واول ماحطت راسها على كتفه قامت تبكي...هي اصلا مقهورة منه بس ها اللحظات حست انها بحاجة احد يواسيها وكاهو قاعد يواسيها الحين تركت السالفة اللي شاغلتها على جنب وجلست تفكر بللي بيصير لمشاعل الحين وتتناسى هي وش بيصير لها مع رجوع ريم لحياة نواف من جديد؟؟؟
//////////////////////////////////////////////////////
ام مشعل/ها وضحى شكلك ذبلانة؟
وضحى/لالا انا بخير,,
مشعل/لو انتي بخير ليش خليتي خالد يردك وماجلستي لين انتهت الزيارة؟
وضحى/بس كانت معي دوخة لاني طلعت من الصباح بس الحين الحمدلله صرت بخير,,,,
ام مشعل/اسوي لك شوية زهورات ولا شي يعدل لك مزاجك؟
وضحى/تسلمين يابنت عمي والله مالها داعي انا مافيني شي...
ام مشعل تنهدت وقالت بشرود/وش ها القدر يامشاعل يابنيتي....البارحة كل الناس تحكي بعرسها واليوم هي بالمستشفى....الحمدلله ياربي....
وضحى/قدرها.....قولي الحمدلله جت على كذا....الا صدق فواز قالوا فيه شي؟
ام مشعل/والله مدري يايمه ,,,
مشعل/قايل لكم انقلوه مستشفى ثاني خاص تزورونه وقت مابغيتوا,,,
ام مشعل/هو مارضى صاحبه يشتغل هنا..
مشعل/ان شاءالله هذا اللي مايعطي وجه؟مايناسب يصير صاحبه فواز شحليله من يشوفنا يسلم علينا وهذا قالب خلقته؟
وضحى/بالله عليك صاحبه ومتعور بليلة عرسه وش تبي يسوي لك يامشعل ياخذك بالاحضان ويقولك اهلا وسهلا..
مشعل/ياخذنا ويمشينا بالمستشفى ويقول لنا وش فيه فواز ويعاملنا معاملة خاصة,,,
ام مشعل/ترى من صدق ماني فاضية لوجع راسك بروحي اللي فيني يكفيني؟
وضحى/انا محد ضيق خلقي الا ها العبير بصراحة؟جاية حق الشماتة اللهم ياكافي...
ام مشعل/اشوفها تناظر الكل بنص عين؟
وضحى بقهر/وطايحة لي بمشاعل انتي وجهك مو حلو عليه ومسكين يافواز كانها ناقصة مشاعل المسكينة؟بس انا قلت لخالد قلت له يكلم عبدالله اخته مو ناقصة شي بها الوقت بروحها منهارة واعليا...
مشعل قام يضحك....
ام مشعل/جنيت وقعدت ياحافظ؟
مشعل وهو بعده يضحك/الشرير اذا طاح في يدي يغلي دمه قولوا شلون؟
ناظروا فيه بدون مايعلقون..
مشعل/سلمكم الله جت الاخت الكريمة هاذي اللي تقولون عنها عقرب رمل وقالت انا ابي رقم نوف مضيعته لاني ناقلة ارقامي وعندي ارقام مشككة فيهم تقدرون تعطوني اياه..عاد انا عقلي اشتغل وقلت اكيد تبي تقول لنوف وتركي عن اللي صار وخالتي ماتبيهم يعرفون...قمت قلت لها غالي والطلب رخيص وعطيتها الرقم..
ام مشعل بصراخ/وانت مو عاقل تعطيها رقم نوف...اللحين شلون يدرون هناك..انت ماتسوي شي فيه خير ياولدي؟
مشعل/صبري انتي زين وكملي لسالفة؟
انا قلت اني عطيتها رقم نوف عاد؟
ام مشعل/اجل عطيتها رقم منو؟
مشعل بثقة/نواف..
وضحى/نواف اخوي؟
مشعل بنفس الثقة/أي...اذا جت وقالت لي بقولها انا ماافرق بين نوف ونواف....وش رايكم فيني مو شيطان صغير؟
////////////////////////////////////////////////////////
على ساعات الفجر الاولى ..
كانت سيارة فواز وسيارة الاسعاف اللي طلع فيها دخلوا فلته اللي بحي الدوحة بالضهران...
كانت مشاعل بسيارة فواز بروحها وسيارة الاسعاف فيها فواز وصاحبه حسام والممرض اللي طلبه يرافقه باجرة خاصة,,,,
ظلت جالسة في السيارة ماهي قاوية تنزل معهم وتشوفهم يحملونه ويحطونه فوق الكرسي ويدخلونه..
ماجاها قلب تشوفه ها اللحظة بالذات وتركتهم براحتهم لين دخلوا وبعدها قامت من السيارة وظلت تمشي لين البوابة الرئيسية...
هاذي الفيلا اللي طول الوقت كانت تتخيلها وتفكر فيها...
كاهي دخلتها مع فواز بس بطريقة ثانية وبدون زفة وهلاهل...
اصلا رفضت ان أي احد من اهلها يجي معهم الليلة..وهم احترموا رغبتها....
تقربت من الصالة ودخلت بعد ماسمعت اصواتهم....
ناداها حسام وتقربت..
حسام/ماصادف نلتقي من قبل انا حسام..
مشاعل/هلا...
حسام/طبعا فواز بيظل تحت مابيقدر يركب فوق علشان كذا بنفضي له المجلس اللي هنا الصغير علشان يجلس فيه..
مشاعل/أي مو مشكلة...
حسام/انا بروح ااءمن له سرير طبي مع الممرض وطبعا ها الممرض بيظل مرافق فواز هنا علطول لو ماعندك أي اعتراض..
مشاعل/لاطبعا..
فواز/خلي السرير لبكرة الصباح ياحسام...
حسام /وكيف بتنام الليلة؟
فواز/ماحنام بظل جالس اسولف مع مشاعل لاتتعب نفسك بكرة الصباح جيبه وبعدين كاني متمدد على الكنبة ماعندي مشكلة حتى لو غفت عيني...
حسام/لاانا بروح اشوف لك واحد الحين وبطب عليك باي وقت موبكيفك...
طلع حسام ووراه الممرض وراحت تقفل الباب وراهم وقصدها تهرب عنه ..
كانت تناظره من بعيد وهو متمدد على الكنبة وشكله مو قاوي يتحرك ورجله تحت الجبيرة...
تنهدت وراحت عنده يوم سمعته يقول بضحكة/هذا كله تسكرين الباب يامشاعل....
جت قريب منه وقالت وهي تصد عنه/ها..بغيت شي..
فواز/تعالي جنبي ابي اسولف معك...
مشاعل/قول اللي تبيه انا اسمعك...
فواز بجدية/مشاعل انا بقولك كلام حساس وابي منك تفكرين بمستقبلك ماعليك مني..
مشاعل بخوف/وش تقصد؟
فواز/جاوبيني بعيدا عن كل المشاعر اللي نكنها لبعض؟
مشاعل بخوف اكبر/وش تقصد يافواز؟
فواز/تعالي خل نتكلم...قربي ليش واقفة بعيد,,,
////////////////////////////////////////////////////////
على الساعة تسع الا ربع الصباح جت عبير بيت ام تركي بعد ماشافتهم طالعين والاكيد انهم رايحين لمشاعل المستشفى لانها ماتدري ان فواز طلع فقالت فرصة تاخذ رقم نوف من الشغالة لان الرقم اكيد موجود بدفتر التلفونات...
جلست فترة وهي تنادي الشغالة اللي راحت تجيب الدفتر ولسه مارجعت وانفتح باب الصالة ودخل تركي ونوف,,
اول ماشافتهم عبير استغربت ماكان عندها خبر انهم جايين اليوم وحتى الباقين شكلهم مايدرون ولاليش بيطلعون ومابيستقبلوهم بالمطار,,,
شافتها فرصة وقامت تبكي وتشاهق وهي عاطيتهم ضهرها,,,,
لفت نوف بفزع اول ماسمعت صوت عبير وتركي وقف مكانه..
نوف بخوف/عبير وش صاير؟
رفعت عبير راسها وقالت بصدمة/نوف؟؟متى وصلتوا!!
نوف/تونا واصلين...انتي شفيك عبدالله فيه شي؟
عبير كملت بكي/ويلي على مشاعل وعلى ها الحظ اللي عليها؟ويلي على ليلة ها العرس؟
تركي بصدمة/مشاعل اختي؟شفيها؟
عبير بصراخ/ليش محد قال لكم؟معقولة يانوف ماتدرين وش فيها صديقة عمرك واختك؟
نوف بصدمة وانهيار وخوف/شفيها؟
عبير/كاهي بالمستشفى هي وزوجها صابهم حادث بليلتهم وماتهنوا؟
20-02-11, 07:12 AM
جديد مواضيع قسم القصص المكتمله
العرض العادي
