كاتب الموضوع :
نسايم نجد
المنتدى :
القصص المكتمله من وحي قلم الاعضاء
اشكر الجميع على وجودهم ورددوهم ( باقي كثير على النهايه ) واوعدكم احاول انزل رواية جديدة لاني مستمتعه بالصحبة الطيبه
البارت الحادي والخمسون
بالطائف
ركبو السياره بعد ما حطو اغراضهم وصلو للمكة ودخلو الحرم بعد العشاء اعتمرو وانتظرو بالحرام لصلاة الفجر صلو وبعدها ارجعو لطائف
وكلن دخل لغرفته ومن التعب نامو
اليوم الثاني
بالديره
ام جاسم نايمه وكل دقيقه تصحى تطمن على جاسم وهي نايمه سمعت ونين وهمهمه
فتحت عيونها شافت ولدها يهذي بكلمات غير مفهومه مافهمت منها الا انه ينادي هند
نزلت من سريرها وقربت منه وحطت يدها على راسه وانفجعت من حرارته المرتفعه
قامت ودخلت المطبخ اخذت ماء بارد وخافض للحراره ورجعت له
ام جاسم بحزن / قوم يمه اشرب علاج حرارتك مرتفعه
جاسم يهذي / هند وينك احبك تعالي هند هند
ام جاسم اعتصر قلبها وجع على ولدها
اخذت فوطه وبلتها بالماء البارد وحطتها على جبينه الي انتفض من برودة الماء
اسندته على ذراعها وغصبته يشرب الخافض
وهي موجوعه من ولدها بسبب عشقه الي دمره
غصب عنها بكت بمراره ام جاسم في نفسها / العشق يهد الرياجيل يويل قلبي عليك يولدي علاجك رجوعها لك لكن الشكوى لله هند عنيده مستحيل ارضى لك المذله وخليك تلحق وراء الي بايعتك
عند فيصل
ترك بيت نواف ورجع لبيتهم ما يبي يثقل على اخته وهو منسدح على سريره افكاره مثل كل ليله تطير لبريطانيا قرر هاليومين يسافر لبريطانيا لانه بيفتح فرع لشركته هناك هذا الشي سر ماقاله لاحد عارف انهم بيرفضون وبيعاتبونه وهو مو ناقص
فكر بكره يسافر لديره يتطمن على امه وجداته ومشتاق لجاسم وفاقده كثير وبعده بيسافر
في بريطانيا
بعد ما خلصو عشاء ارجعو للبيت مبسوطين وفهد الارض مو شايلته من الوناسه
دخل عبد الرحمن وعدنان غرفة فهد بينامون فيها ونوره دخلت غرفت غاده بتنام فيها
فهد جالس بالصاله قرر يكلم صلاح يفرحه
رفع جواله واتصل على صلاح
عند صلاح
كان منسدح على سريره متضايق ومخنوق وندمان بسبب تسرعه مع غاده يبي يعتذر منها يمكن يرتاح لكن خاف انها تصده وتهينه لكنه بيحاول يمكن يرتاح من تانيب الضمير سمع صوت جواله رفعه شاف رقم فهد مكان له خلق يرد رجع الجوال للكمودينه وقف صوت الجوال حوله على الصامت
عند فهد
لما مارد عليه صلاح تاكد انه نايم قرر بكره يقوله بالجامعه
تمدد على الكنبه في الصاله دخلت عليه غاده بعد مابدلت ملابسها واخذت شور
غاده / سلام يامعرس
طالعها فهد وبابتسامه / وعليكم السلام
غاده / للحين ما نمت وراك جامعه
فهد / من فرحتي طار النوم من عيني
غاده / اذا الخطبة سوت فيك كذا اجل الملكه وش بتسوي فيك
فهد بسرحان / غدويه تتوقعين بداوم بكره بالجامعه وشوفها
غاده بجديه / فهودي اركد لا تشوفها ولا تكلمها الا بعد ما تملك مستحيل اسمح لك
فهد بابتسامه / بل اكلتيني ما يسوى علي سؤال
غاده / مدري عنك واحد مطفوق
فهد بحب / والله اني عاقل وصابر كل هالسنين وكاتم بنفسي الله يخليك لي لولا الله ثم انتي كانت استمريت بعذابي ومحد درى فيني
قربت من وجلست على الكنب الي قدامه
غاده بحزن موجع / مستحيل ادري انك تتوجع من الحب واجلس اتفرج عليك الي اكتوى بالحب وذاق الحرمان مايبي غيره يذوقه
فهد حس بوجعها لو بايده سوى المستحيل ويرجعها لفيصل لكن مهما كان كله ولا كرامة اخته
قامت غاده / فهودي بنام وراي جامعه
قامت من عنده ودخلت غرفتها وانسدحت جنب خالتها نوره وغصب عنها بكت وجع وقهر على الحب الي ضيعته
نوره حست فيها سحبتها وضمتها لصدرها
نوره بحنان / نامي يمه الله يفرجها عليك
غاده كانها ماصدقت رمت نفسها بحضن نوره وصارت تنتحب كان ميت لها غالي
نوره اوجعها قلبها على نحيب غاده / يمه خلاص اوجعتي قلبي
غاده بشاهق / مشتاقه لماماتي
نوره رفعتها عن صدرها / متى ما بغيتي تشوفينها تعالي معنا احنا بعد ملكت فهد بنسافرلها
غاده سحبت نفسها من حضن نوره وتسندت على السرير ووجها كله دموع مدت لها نوره كرتون الكلينكس اخذت منه ومسحت دموعها
غاده بابتسامه / صدق خالتي
نوره / ايه هي الحين بالطايف مع غاده وخالد
غاده بحزن / ما قدر الاسبوعين الجايه عندي امتحانات
نوره / هند بتجيك ما تقدر تصبر عنك بعد ماربي يفرج كربتها
غاده بشوق / ياليت خالتو وربي ذبحني شوقي لها
نوره بحب / الحين تعوذي من الشيطان ونامي وراك جامعه وبعد الجامعه ورانا مشوار طويل بنجهز لملكة فهد
غاده بابتسامه / ان شاء الله خالتو
رجعت لحضن نوره بعد مارتاحت نفسيتها نامت
ليوم الثاني
بالطايف
صحت هند على صوت اذان الفجر قامت من سريرها وجسمها مكسر ورجولها توجعها بسبب كثر المشي
دخلت الحمام اخذت شور وتوضت وصلت ولبست لبس الشغل بداوم
نزلت كان البيت هادي دخلت المطبخ طلبت من الطباخه فطور خفيف و كابتشينو
وصلت لغرفة خالد طقت عليهم الباب فتح لها خالد وعيونه كلها نوم شافها لابسه ومتجهزه لدوام
خالد بطفش / ياله صباح خير
هند / ياليت تقوم تفطر وتروح معي لشركه
خالد بقق عيونه / يالظالمه الساعه 5 أي دوام واي خرابيط
هند بعصبية / لك عشر دقائق القاك بالصاله ولا متلوم الا نفسك
خالد بطفش / يصبر ايوب على بلواه
تركته هند ورجعت لصاله جلست على الكنب وطلعت من شنطتها ملف فيه اوراق لصفقات تدرسها وهي منغمسه فيها دخل عليها خالد وهو طفشان
خالد / صباح الخير على الازعاج
هند وعيونها في الاوراق / صباح النور على الكسول
قرب منها وجلس / حرام عليك انا كسول ماجينا الا الفجر وتعبانين
انتي ما تتعبين انا ياله اتحرك من وجع ارجولي وانتي فازه من الفجر
وكمل بحنان / ارحمي نفسك لا تدفنين عمرك بالشغل ومخليته لك هروب
رفعت نظرها فيه / خلك من الخرابيط والكلام الي بخيالك وتعال راجع معي الاوراق فيه صفقه مهمه لازم نكسبها بتنقل شركتنا نقله كبيره
قرب منها وجلس بجنبها مدت له بعض الاوراق
اخذها منها
خالد بخوف / هند هذي الصفقه كبيره ممكن تضيعنا لخسرناها
هند بقوة / ليه اطالع بالجانب الشين وناسي الجانب الزين اذا ربحناها بتكون شركتنا اقوى شركه ولها اسمها بالسعوديه وبرا وبتدعم شركتنا بابريطانيا ودبي
خالد مرعوب / واذا خسرناها بتنسف كل شركاتنا ونصير على الحديده وممكن تنسجنين و بتصيرين مديونه
هند بثقة / خالد اذا بنقدم الجانب السيئ على الجانب الحلو بعمرنا مراح نتقدم خطوه وحده
خالد بجديه / خايف ياهند احنا بالبر تقدرين تتراجعين
هند بجديه / مستحيل اتراجع اتفقت مع الشركه ومندوبينها بيجونا هالاسبوع وبعطيهم الموافقه وباذن الله بكسبها
خالد بعصبيه / مجنونه وجنونك بيضيعنا
هند بعصبية / خالد ما يحتاج كل هالعصبيه احنا بالسوق مثل ما نتوقع الربح نتوقع الخساره
خالد بعصبية / يا برودك ياهند
هند بقوة / تعرفني احب اغامر والي براسي مستحيل احد يغيره
خالد / ابوي يدري
هند بعصبية / اياني واياك تقول لخالي مو ناقص الصفقه تخص شركاتي شركة خالي بعيده عنها واذا خسرت خسرت بالحالي وتدمرت الحالي مالكم أي علاقه
خالد بعصبيه / مبسوطه وانتي تقولين هالكلام
هند قاطعته بعصبيه / خلاص خالد لا تتعب نفسك بالكلام الي براسي سويته ولا راح الومكم اللوم بيصير علي
خلود حبيبي قلبي واحساسي يقول اني بكسب الصفقه باذن ربي
خالد باستسلام / ان شاء الله
هند بجديه / اليوم لازم نسوي اجتماع بندرس الصفقه بالاجتماع لكن فيه شغلات سريه مستحيل اطرحها بالاجتماع اخاف تتسرب المعلومات وهذا الي مابيه
وهم يتكلمون دخلت عليهم الطباخه وقالت لهم ان الفطور جاهز
دخلت هند وخالد غرفة الطعام جلس واكلو اكل خفيف لان بالهم مشغول بالصفقه
خالد / الحمد لله شبعت يله قومي بروح لشركه
هند / خلودي ما كلت شي
خالد بعصبية / الصفقه سدت نفسي
هند بابتسامه / عاد انا فتحت نفسي
خالد بعصبيه / لو بجلس معك ببرودك بتجلطيني
هند بحب / في عدوينك
قامت هند ودخلت الصاله واخذت شنطة اوراقها وطلبت من هنديانا تلحقها بشنطة لاب توبها
في الرياض
قام فيصل من النوم دخل توضاء وطلع للمسجد يصلي الفجر رجع طلع لغرفته جهز شنطه صغيره فيه لبس له يكفي ليومين ركب سيارته بيسافر لديره
في الديره
ام جاسم طول ليلها سهرانه تراقب ولدها صلت الفجر وقومته توضا وصلى بالبيت ورجع لفراشه ونام
يوم شافته نام حست بتعب ونامت
على الساعه 7 قام جاسم بكسل وتعب وطلع للحوش ينتظر العمال بعد ما وصلو نسى اوجاعه ووقف يراقبهم ويساعدهم يبي يحط لمساته بمدرسة هند اليوم بيستلم المدرسه من غير تشطيب ومن بكره بيبداء التشطيب يحتاج لساعات اكثر
جاسم في نفسه بتعب / ياليت يا روح جاسم ترحميني وتتصلين مشتاق والشوق ذبحني قول لي وينك وربي لجيك واسرق شوفاتك مثل العاده شهر وانتي غايبه عن عيني لكن ماغاب طيفك عني كل ليله اشوفك نايمه جنبي
وتذكر الابيات الي تحكي معناته وكررها في نفسه /
ألقى خيالك في خيالي واضمه
وأشوف طيفك بين رمشي وعيني
يمرني طاريك عجل والمه
من لهفتي تسبق عيوني يديني
مثل العبير يفوح عطرك واشمه
في لحظة تسوى بقايا سنيني
أحتاج لك حاجة وريدي لدمه
ترد لي روح تروح وتجيني
وهو يراقب العمال بدت حرارتة ترتفع لكن حاول يقاوم حس بتعب جلس على المرجيحه تذكر عشقها للمرجيحة انسدح بمكانها الي تعشقها ناسي الشمس الحاره
عند ام جاسم
صحت من نومها التفتت مكان ولدها لقته خالي
تاكدت انه عند المدرسه قامة بحزن لبست عبايتها وتسترت وطلع للحوش
قربت من المدرسه ما شافته تحركت جهزت حديقة الزهور شافته منسدح على المرجيحة كان حاط يده على عيونه قربت منه شافته منهك تعبان
ام جاسم بحنان / وش مطير ومجلسك بالشمس وانت مريض
استغرب من وجود امه رفع يده من عيونه وطالعها بتعب / مافيني لا العافية
مدت يدها على جبين ولدها شافت حرارته مرتفعه
ام جاسم بعصبيه / حرام عليك حرارتك مرتفعه ناوي تذبح نفسك علشان الي بعاتك الي باعك بيعه لو كان غالي
جاسم بصوت تعبان / يممممممممه
سحبت ولدها وهو استسلم لها مافيه طاقة يجادلها دخلته داخل عند جداته
جداته قلوبهن توجعهت على حاله عمرهن ما شافنه بهضعف ومتاكدات انه يكابر كاشفاته
ام راشد بحزن / جاسم اذا لجداتك خاطر عندك ارمها ورى ظهرك ورجع لنا جاسم القوي
ام موضي بكت / اترجاك يا جاسم تنساها هي الخسرانه الدنيا بتعلمها انها خسرة خسارة كبيره بطلاقك منها
جسم انتقض انه سبب وجع جداته وامه قبلهن وقلبه اوجعه انه يرد ترجي جداته الي يطلبنه مايقدر ينفذه مو بكيفه القلب ماله سيطره عليه
وانقهر انه انكشف قدامهن هذا الي كان خايف منه ان غيره يتوجع بسببه
جاسم بوجع وغصة / ادعي لي يا جده ربي يشيل حبها وعشقها من قلبي ويقويني الي فيني غصب عني
ام راشد رفعت يدها لسماء / يارب انه يعافيك ويشافيك ويكتب لك كل خير اذا حبك لهند فيه خير انه يبقيه واذا فيه شر يزوله من قلبك
ارتاح جاسم وحس بالطمانينه
جاسم بابتسامه / اللهم امين
دخلت ام جاسم وهي حزينه على حال ولدها عارفه كل شي له علاج الا العشق يذبح الرياجيل
جابت معها شوربه وكمادات وعلاج خافض للحراره
جاسم نزل راسه منقهر من نفسه انه سبب الحزن للي يحبهم
مدت ام جاسم الصحن الشوربه لولدها ضغط على نفسه وصار يشرب مدت له خافض الحراره اكله وهو ساكت
ام جاسم / من بكره بنرجع لرياض وباخذ جداتك معي وانت بتروح اولنا
جاسم بتعب / كلها يومين وتخلص المدرسه
ام جاسم بعصبيه / ماجانا من وراء المدرسه الا التعب والشقاء والمرض سلمها للعمال يكملون الباقي لهنا وكثر الله خيرك تارك شغلك ومقابل المدرسه
جاسم بترجي وضعف / يا لغاليه المدرسه امانه برقبتي يرضيك اخون الامانه اذا شفتها كاملة مالي قعده بالديره بسلمها لمحمد اخوها يكمل الباقي
ام جاسم بحزن / متى بتنتهي من المدرسه
جاسم / كلها كم يوم وتخلص بكلم محمد يستلمها مني
ام جاسم بستسلام / طيب لكن ارتاح هاليومين انت مريض لاحق على الشموس الي بتقضي عليك
جاسم ابتسم / ان شاء الله
قطع عليهم دخول فيصل الكل التفت عليه متفاجئن من جيته الغير متوقعه
فيصل بصوت الجهوري / السلام
الكل / وعليكم السلام
دخل وقرب عند جداته باس راسهن وباس امه وقف له جاسم اخذه بالاحضان انتبه لحرارة اخوه المرتفعه
فيصل بخوف / جاسم حرارتك مرتفعه
ام جاسم بقهر / تعبان من قعدته بالشموس ومقابل هالعمال
جاسم / مافيني الا العافيه بشر عنك
فيصل / الحمد الله بخير اذا تعبان بوديك المستشفى
جاسم بابتسامه / ماقصرت ام جاسم عالجتني
ام جاسم التفتت لفيصل / وانا امك شكلك نحفان وتعبان
فيصل / عزوبي داج ماعندي احد يهتم فيني
ام جاسم / وينها الجوهره عنك موصيتها عليك
فيصل / الجوهره الله يعينها مشغوله ببنتها وانا رجعت البيت
ام جاسم / وش يوديك للبيت ومافيه احد
فيصل / مايجيني النوم الا بغرفتي
ام جاسم / غريبه وش جابك وتارك شركتك
فيصل / اشتقت لك يالغالية البيت من غيرك خرابه
ام جاسم بابتسامه / اكيد حايس البيت الله يعينا على تنظيفه
فيصل بابتسامه / عزوبي ماوراي الا الحوسه والوسخ
ام جاسم / شلونها اختك وبنتها
فيصل / طيبات معليهن والجوهره مسويه حضر على بنتها خايفه عليها مني
ام جاسم / مالومها وانت تعرف تلعب الي يشوفك يقول تلعب مع كبير
ام جاسم / افطرت
فيصل / لا وين افطر
قامت ام جاسم وطلبت من الشغالات يجهزن فطور لهم كلهم جابته الشغاله وحطه بالارض
جاسم ماله نفس شرب حليب وقام من عندهم ودخل فراشه ونام
وفيصل بعد الفطور سولف مع جداته وبعدها استاذن وطلع لغرفته ونام
بالطائف
في الشركه
وصلت لشركه مع خالد الي طول الطريق ساكت ومتضايق من المشروع دخل مكتبه وهند دخلت مكتبها
طلبت من السكرتيره تسوي اجتماع طاري بتدرس المشروع
بعد دقائق الكل بغرفة الاجتماع
دخلت هند الغرفه شافتهم متجمعين وخالد واضح عليه الزعل
قربت وجلست بمكانها
هند بثقة / طلبكم باجتماع طاري حبيت اقول لكم ان الشركه بتدخل بصفقه نسبت نجاحه وخسارتها نفس النسبه اذا خسرنا الصفقه بافلس واحتمال كبير انسجن وبيكون علي ديون كبيره مستحيل اقدر اسددها
واذا ربحت الصفقه بتنقل شركاتي نقله كبيره وبتصير اكبر الشركات بالشرق الاوسط
اول معارضيني خالد لانه فكر بالجانب السلبي وترك الجانب الايجابي وانا من طبعي احب اخوض المستحيل ونظرتي دايما للجانب الاجابي لو بانظر للجانب السلبي بوقف مكاني من غير لاحقق طموحاتي
مشعل ووليد ومطلق كلام هند خوفهم وارعبهم هم ما صدقو بالوظيفه والراتب السنع خافو من الخساره
مطلق / استاذه هند والمطلوب منا مدامك مقرره وبتنفذين الصفقه
هند بجديه / هذا وقتكم ابي جهد مضاعف وابي السريه والكتمان على اسرار الشركه اعتبرو نفسكم بحرب ولازم لها استعداد والقوه علشان نكسب هالحرب
احب اطمنكم اذا خسرت الشركه وفلست راح تنتقلون وتتوظفون بشركة خالي والفلل باسمكم مالها علاقة بممتلكاتي وان شاء الله لكسبنا الصفقه الراتب بيتضاعف ثلاث اضعاف مع امتيازات جديده لكل موظفين شركاتي
ارتاحو من كلامها لكن مستحيل يرضون بخسارة الشركه وبيبذلون كل جهودهم ويكسبون الصفقه مستعدين يواصلون الليل بالنهار هند لها فضل كبير عليهم مستحيل يتخلون عنها وهي بحاجتهم
تكلم مشعل / حطينا على يمناك والي تامرين فيه حنا حاضرين لو نواصل ليلنا بنهارنا اهم شي ما تخسر الشركه
هند / جعلكم سالمين هذا كان العشم وانا مطمئنه كثيررررر ان الصفقه بنكسبها
وليد / باذن الله
خالد طول الجلسه ساكت منقهر خاف يتكلم ينفجر بهند
خلص الاجتماع واول من قام خالد وطلع وبعده الموظفين هند ماحبت تجادله لانها تعرف انه خايف عليها وعلى شركاتها
في بريطانيا
قامت نوره وسحبت نفسها من حضن غاده الي كانت متمسكه بقوة بخالتها كانها خايفه تقوم ماتلقاها قامت نوره توضت وصحت غاده وطلعت لغرفة فهد تصحي عبدالرحمن وعدنان وطلعت بالصاله تصحي فهد
رجعت لغرفة غاده شافت سريرها خالي ابسطت السجاده وصلت
طلعت غاده صلت بعد ماخلصت صلاه التفتت على نوره
غاده بابتسامه / احلى نومه نمتها البارح من زمان مانمت هالنومه
نوره بحب / نوم العواف بداومين اليوم بالجامعه
غاده بابتسامه / اكيد وراي امتحان مهم
نوره / اذا جيتي بنجهز للملكه وبنشتري شبكه محترمه لندى
غاده / ان شاء الله الا خالتو ماقلتي وش رايك بخطيبة ولدك
نوره تبتسم / حبيتها وحبيت ا مها شكلهم خوش ناس
غاده / شفتي ذوقي
نوره / لا تتاخرين البسي وخلي السوالف لجيتي
طلعت من عند غاده دخلت المطبخ جهزت فطور سريع لغاده وفهد
لان عبد الرحمن وعدنان صلو ورجعو ينامون
حطت الفطور على طاولة الطعام وطلعت لفهد شافته منسدح وشكله كسلان
نوره / قوم تاخرت عن الجامعه
فهد بكسل / ما نمت الظاهر ماني برايح
نوره / واختك من بيوديها
فهد / انا بوديها وبرجع اليوم عندي محاضره وحده بعد الظهر
نوره / قوم البس لا تتاخر على اختك ولا بتوصلها بالبجامه
فهد يبتسم / لا ماوصلت اني اطلع بالبجامه
قام ودخل الغرفه طلع ملابسه ودخل الحمام الي بالصاله مايبي يزعج ابوه
اخذ ملابسه معه للحمام اخذ شور ولبس وطلع لقى غاده جالسه تفطر
فهد / انتي ما تعرفين تنتظرين لين نفطر سوى
غاده / من جدك منت بمداوم بالجامعه
فهد / كنت بداوم لكن متاخر بعد الشور تنيشطت بداوم على ان محاضرتي متاخره لكن بدخل المكتبه اجمع كتب لبحثي
غاده بابتسامه/ ترى ابشرك ندى كلمتني بتغيب عن الجامعه
فهد / خساره
غاده بعصبيه/ اياني وياك اشوفك تنطنط عندي وهي معي لملكتو بكيفكم لو تاخذها وتطلع فيها
فهد / صايره هادم اللذات ومفرق الجماعات
نوره / غاده صادقه مو معناته احنا بالغربه ننسى دينا وعاداتنا وتقاليدنا ما ترضاها لخواتك يطلعن مع الي خطبهن من غير رابط شرعي
فهد بجديه / الي قلته كله مزح بمزح انا من قبل لا خطبها وانا اتجنب اني اقابلها ومدام خطبتها مستحيل علشاني وعلشانها انا تربية ابو خالد ونوره
غاده ضربته على راسه / وصرنا نعرف نتكلم يله مشينا لا نتاخر
فهد / وش ذا اليد الثقيله اوجعتي راسي
غاده / اذكر ربي لا تنكسر يدي وراي امتحان
فهد / تف تف ماشا ء الله
غاده / قرف
نوره / خلو الجدال وصل اختك للجامعه لا تتاخر على امتحاناتها
فهد / ان شاء الله
طلع فهد وغاده للجامعه ورجعت نوره لغرفة غاده تنام
وصلو للجامعه فهد وصل غاده لمكانها وهو دخل المكتبه
تركها فهد وهي مسكت كتابها وفتحته وبدت تراجع
عند صلاح
من يوم غلط على غاده ما قابلها وندمان ومتضايق من تهوره قرر اول ما يشوفها بيعتذر لها يبي يرتاح
دخل الجامعه التفت على مكانها شافها جالسه وبيدها كتاب تقراء فيه قرب منها وهي مندمجه بالقراء اصدر صوت يبي يلفت انتباهها
سمعت الصوت رفعت عيونها من الكتاب اول ما شافت صلاح نزلت عيونها بالمكان ماهتمت بوجوه
صلاح بارتباك / غاده من جد انا اسف على الي صار ياليت تسامحيني
رفعت عيونها من الكتاب غاده ببرود / تطمن مستحيل اكون سبب فراقك انت وفهد وادمر صداقتك وفر اعتذارك
صلاح / انا جيتك اعتذر لاني غلطت بحقك مو لاني خايف على صدقتي مع فهد
غاده بنفس البرود / سامحتك وترى فهد بالمكتبه ينتظرك
ورجعت نزلت عيونها بكتابها صلاح انقهر من تطنيشها احترم نفسه ومشى وتركها
وهي قامت ادخلت الكلاس جلست بمكانها وكملت مراجعه
عند صلاح
دخل المكتبه شاف فهد عند رفوف الكتب بيده كتاب
صلاح / السلام وش عندك مصبح المكتبه
فهد بابتسامه / وعليكم السلام عندي بحث يبيله مراجع
صلاح / بشر وش صار بخطبتك
فهد بابتسامه / الحمد لله وافقو واليوم بسوي التحاليل اول ماتطلع النتائج نملك
صلاح بفرح / مبروك الله يتمم لك وعقبالي يارب
فهد / الله يبارك فيه احتاج همتك معي
صلاح / بالخدمه لكن مو اطنشني لاحتجتك بملكتي
فهد / شد حيلك نبي زواجنا سوى
صلاح بجديه / خلني اول اتخرج وارجع لرياض واكون نفسي ذيك الساعه افكر اتزوج تحسبني مطفوق مثلك
فهد / الحب خلاني مطفوق ومستعجل لو بكيفي خليته زواج وملكه في نفس الوقت
بيت ابو ندى
عند ندى
صحت الفجر صلت وانسدحت على سريرها تبي ترجع تنام دخلت عليها امها الي استغربت انها مانزلت
ام ندى / ليش نايمه عسى ماشر
ندى / بغيب عن الجامعه
ام ندى / وليه ان شاء الله
ندى / يمه امس خطبتي استحي اداوم اليوم
ام ندى بجديه / واذا طولتي مخطوبه
ندى / بكره اجباري اداوم عندي امتحان ضروري
ام ندى / مدامك منتبي بمداومه بطلع معك لسوق اشتري لك فستان الملكه وشغلات للحفله
ندى / ان شاء الله بعد الفطور
نزلت ام ندى ولحقتها للمطبخ جهزت الفطور افطرن كلمن السواق الي متعودات يوديهن لنشغل ابوهن عنه كلمنه وبعد نص ساعه جاء ركبن معه وطلعن لسوق
في الطائف
عنده هند
لبست عبايتها بتطلع بدري ماعندها شي طلعت لمكتب خالد شافها طالعها بنص عين وسبقها من غير لا يتكلم
ركبو السياره وهم ساكتين وخالد منقهر وساكت وصلو للبيت هند طلعت لغرفتها ترتاح وخالد دخل لغرفته
عند خالد
دخل لقى غاده جالسه وبيدها اكتاب تقراء فيه لما سمعت الباب يفتح رفعت نظرها شافت خالد واضح عليه الضيقه والهم خافت صاير شي
غاده حذفت الكتب على جنب وقفت وقربت من خالد
غاده بخوف / خالد حبيبي وش فيه وجهك مايبشر بخير طمني الله يخليك
خالد بضيقة / ما فيني شي مشاكل بالشغل ارتاحي
غاده بحب / حبيبي قولي لا تكتم بنفسك
جلس خالد على طرف السرير / وش اقولك اقول لك هند بتضيع نفسها ولا اهتمت برايي
غاده خافت / شلون بتضيع نفسها خوفتني خالد
خالد بقهر / دخلت صفقه كبيره نسبت الخساره والربح متساويه واذ خسرت تدمرت شركتها وضاعت وبتصير مديونه وفيها سجن وخراب بيوت
غاده بخوف / حاول فيها اقنعها تنسحب
خالد بقهر / حاولت لكن هذي هند موتها تمشي الي براسها لو كان فيه نهايتها
غاده / بكلمها بحاول اقنعها
خالد / لا تكلمينها راسها يابس ومصره على الصفقه
غاده / لا حول ولا قوة الا بالله تعوذ من بليس واطلع تغد ا
خالد / اعوذ بالله منك يابليس جهزي الغداء بتغدا وبنام والعصر برجع لشركه
غاده طلعت تجهز الغداء وبعد ماجهزته طلعت لغرفة هند فتحت الباب شافتها بسريرها نايمه طلعت محبت تزعجها نزلت لقت خالد جالس قدام الغداء قربت من وجلست
خالد / وينها
غاده / دخلت شفتها نايمه ماحبيت اخرب عليها نومتها
خالد بقهر / مدري شلون يجيها نوم وهي احتمال تضيع
غاده بجديه / يمكن تتهرب عن التفكير بالنوم
في الديره
عند جاسم
صحى من نومه وشاف نفسه احسن شافته امه
ام جاسم / قوم بنحط الغداء
جاسم / وينه فيصل
ام جاسم / بغرفته نايم
جاسم / اجل بطلع اصحيه
ام جاسم / انت شلونك الحين
جاسم يبتسم / اللهم لك الحمد مدام ام جاسم دكتورتي
ام جاسم بحب / قوم يمه صل الظهر تارك متاخر ماصليتهم
طلع فوق دخل غرفته وهو ينزف والغرفه مثل ماتركتها هند ماغير فيها شي
جاسم في نفسه / بقول لشغاله ترتبهم وتشيل كل شي فيه ريحتها لمتى بعيش بسراب يارب انك تقويني وترزقني نسيانها
مستحيل ارضى على نفسي اكون سبب لعذاب امي وجداتي بسبب العشق المجنون الي ابتليت فيه
دخل الحمام توضى وصلى وطلع من غرفته دخل غرفة فيصل الي كان متسند على سريره
عند فيصل
كان منسدح على سريره كل تفكيره بغاده اذا سافر لبريطانيا معقول بيشوفها لو بالصدفه لانه يجهل وينها ساكنه فيه
وجوهره ونواف رافضين يقولون شي
قطع عليه افكاره دخول جاسم عليه
جاسم قرب وجلس على كنبه بالغرفة مقابله لتلفزون
جاسم / بشر عنك وماخذت علومك بسبب تعبي
فيصل ببرود/ لا جديد من البيت لشركه ومن الشركه للبيت ان غيرت مريت على الجوهره انت الي شعلومك
جاسم بحزن موجع / شوفت عيونك العشق امرضني وسبب اوجاعي واوجاع غيري عايش على الاطلال يمقابل مدرستها رافض اني اغير كل شي بغرفتي لانها استخدمتها ونامت فيها ابي اعيش على طيف ذكرى
فيصل اوجعه قلبه على اخوه وعليه لان نفس معاناته عايش على طيف ذكرى بيسافر لبريطانيا علشانها
صحاه جاسم عن فكرة السفر لان بسفره بتزود اوجاعه بيعيش على طيف ذكرى وبيتوجع اذا خاب امله انه يشوفها
قر يرحم نفسه من المعاناة ويهون عن السفر خلاص قلبه ما يتحمل مواجع واحزان ما يبي يصير نسخه عن اخوه
طالع بجاسم باسى وحزن الي تغير كثييييييير بسبب عشقه لازم يقوي نفسه ويدوس على قلبه وينشغل عن تفكيره فيها بشركته
فيصل بوجع / لازم وغصب ننساهن على انه صعب علينا لكن لمتى ياخوي نعيش على طيف ذكرى انا موجوع ومدمر بسبها ماعاد صرت انتبه لشغلي
وانت جالس بالديره كل شي هنا يذكرك فيها لازم ترجع معي لرياض المدرسه الي تتعذر فيها اشوفها خلصت باقي تشطيبات خفيفه بكم يوم تخلص منها ترجع لرياض لازم ترمي هند ورى ظهرك مثا ماانا برمي غاده ورى ظهري نعتبرهن ذكرى حلوة موجعه
ما تدري ياخوي وش مخبيه لنا الايام اكذب عليك لو قلت لك بقدر اشيلها من تفكيري ومن قلبي لكن القلب بيد ربك احنا العشق مرض وبتلينا فيه بنحاول وربك يساعدنا
جاسم مستمع لكلام اخوه وحس براحه لازم يبداء صفحه جديده ويحذف عشقه لهند ورى ظهره
جاسم يبتسم / انزل خلنا نتغدى امي مرسلتني اصحيك تتغداء نسيتني بالسوالف
نزل لقى جداته وامهم جالسات على الارض والغداء قدامهن
قربو وجلسو ياكلون والجو كله هدوء
في بريطانيا
طلعت غاده من المحاضره حست بجوع دخلت الكفتريا طلبت فطائر وعصير واخذتهم ورجعت لطاوله
وهي جالسه سرحانه مر من قدامها واحد يشبه فيصل انتفض قلبها تذكرته نزلت الفطيره من فمها وغصب عنها صارت تبكي بصمت ودموعها شلال على خداها
عند صلاح
صلاح طلع من المكتبه ودخل الكفتريا
شافها من بعيد ونصدم وهي سرحانه ودموعها على خدها نفسه يقرب منها يواسيها لكنه خاف من لسانها
طلع من الكفتريا لفهد لازم يقوله يخاف غلط عليها احد بالجامعه مستحيل يسمح لحد يهينها وبيوقف بوجهه
دخل المكتبه لقى فهد جالس على وحده من الطاولات وبيده قلم ودفتر يلخص الكتاب الي قدامه قرب منه رفع فهد راسمه من الكتاب على جلست صلاح
فهد / ليش رجعت مو انت تقول انك مليت
صلاح / الي جابني اختك غاده
فهد / وش فيها الست غاده
صلاح / شفتها بالكفتريا سرحانه تبكي
فهد فز من مكانه وطلع من غير لا ياخذ الملخصات اخذهم صلاح وطلع من المكتبه
وصل لغاده كانت على نفس حالتها قرب منها
جلس مقابلها وهي ما حست فيه
فهد بوجع / صرنا نبكي عليه بالنهار ما يكفيك تبكينه بالليل
صحت من سرحانها وحاولت تمسح دموعها تخفيها عن فهد
فهد / لا تمسحينها خليها يمكن تنظف قلبك من حبه
غاده بوجع وصوت باكي / قولي يا فهد شلونا نظف قلبي منه والله لسمع كلامك مابي اضعف واتدمر بسبته
فهد / قومي نطلع للشقه وياليت ماتبينين شي لامي وابوي مابيهم يشيلون همك وهم كلها يومين وبيرجعون
غاده وقفت / ومحاضرتك
فهد / انتي اهم من محاضرتي بنطلع نتمشى قبل لا نرجع لشقه اذا هديتي بنرجع لشقه مستحيل اخليك تقابلينهم بهالشكل الي كان ميت لك ميت
استسلمت له وطلعو برى الجامعه وقف سيارته بعيد عن الشقه وصارو يمشون لما هدت رجعو لشقه شمو ريحة طبخ
غاده دخلت المطبخ وهي تضغط على نفسها بابتسامه مصنعه شافت خالتها عند الفرن
قربت منها / ووووواو بشقتنا ريحة طبخ
نوره / قلت اطبخ لكم اكيد مليتو من اكل المطاعم
غاده بابتسامه / وش طابخه
نوره بحب / الطبخه الي تحبينها ويحبها فهد
غاده / لا تقولين مقلوبه
نوره / وصلتي طبخت مقلبه تاكلين يدك وراها روحي بدلي وتعالي تغدي
غاده / خالي وينه ماشوفه
نوره / تعرفين خالك بدمه الشغل طلع يتطمن على شركه هند
غاده / وعدنان وينه
نوره / بغرفة اخوه نايم
فهد واقف يسمع كلامهم وقلبه يعتصر وجع على غاده تتوجع وتكابر
طلعت غاده مرت من عنده نزلت راسها دخلت غرفتها اخذت شور ولبست لبس بيتي وطلعت
طقت على باب غرفة فهد دخلت شافت عدنان نايم على سرير فهد قربت منه
وصارت تلعب بشعره / عدوني قوم مشتاقه لك يكفيك نوم
عدنان فتح عيونه بكسل / طيب بقوم كم الساعه
غاده / الساعه 12 قوم صل وتعال برا نتغدى
عدنان / مشغوله اليوم
غاده قامت من جنبه / قوم وغسل وجهك وبعدين تعال برا اسالني بنطقها سوالف وانت نايم
طلعت شافت فهد جالس سرحان بالصاله قربت منه وحطت راسها على كتفه
غاده بحب / الي اخذ عقلك يتهنى فيه
فهد ابتسم / من غيرها ( يقصدها )
غاده بابتسامه / بديت اغار منها شكلك لا تملكت بتسحب علي شكلي بقول لخالي ياجلها لا تخرجنا ليه العجله
فهد ضربها على جبهتها / علشان ادفنك بابريطانيا
غاده / بملكتك بتلبس ثوب ولا بدله
فهد يبتسم / اكيد ثوب لبسته بخطبتي تبيني مالبسه بملكتي الي بتصور فيها
غاده / متى بتحلل علشان الملكه
فهد / بعد ما تغداء بطلع مع صلاح اسوي التحليل بمستشفى يعرفه صلاح بيطلع لنا النتائج بسرعه
قطع عليهم دخول عبد الرحمن لحظات ودخل عدنان وعيونه منفوخه من النوم
دخلت عليهم نوره تناديهم على الغداء تغدو فهد طلع وعبدالرحمن دخل غرفة فهد بينام من الفجر صاحي وعدنان جالس بالصاله شبعان نوم ونوره وغاده دخلو غرفتهم نامت غاده بحضن نوره
بالطائف
عند هند
قامت وهي نشيطه طالعت بساعتها شافتها 3 العصر قامت مفجوعه ماصلت الظهر والعصر قريب ياذن
قامت توضت وصلت الظهر وجلست بغرفتها تنتظر صلاة العصر بتصلي وتنزل
فتحت لاب توبها تراجع الصفقة من كل الجوانب سمعت صوت الاذان قفلت لاب توبها وقامت تصلي بعده نزلت شافت خالد جالس مقابل لدرج وجنبه غاده اول ماشافه صد عنها
قربت منهم وجلست بجنبه
هند / السلام
الكل / وعليكم السلام
هند بابتسامه / بعض الناس حاقرني ولا يكلمني مدري متى يرضى
خالد / كانك عليك من بعض الناس زعلو ولا رضو كله سوى عنك
هند بجديه / مازعلتك انت صاير زعول
خالد بعصبيه وصراخ / والجنون والهبال الي بتسوينه ما يزعل انتي مافكرتي بابو وامي لاصار الشي الي خايفين منه
هند ببرود / ان شاء الله مايصير الشين ويصير كل شي زين
خالد انتفض وقام وهو معصب / لو اجلس دقيقه بتجلطيني ببرودك
طلع من الصاله وهو معصب
هند / غاده روحي الحقيه يوجعني قلبي اشوفه معصب وزعلان علي لكن انا كبيره اعرف مصلحتي فهميه هالشي
غاده بزعل / الله يعينك على نفسك
هند / ليكون بتحقريني مثل زوجك وربي لهج ما تشوفوني
غاده / وانا اقدر ولا نسيتي ان عمي ابو خالد يومين وهو عندنا وزواج هنديانا الي لك كم يوم ناسيه تساليني عنه
هند / صحيح نسيت وش سويتي مابقى شي واهلها متى يجون
غاده / كل شي تمام واهلها بيجون قبل زواجها بيومين
هند بجديه / غدويه حبيبتي لا تقصرين عليها بشي مهما كان هي بتستحي تشتري الغالي اسبقيها وشتريه لها ولا اوصيك باهلها انا هاليومين مشغوله لراسي ماني فاضيه لهالامور هذي مهمتك
غاده بحب / تطمني انتي خليك بشغلك اتركي لي هالشغلات تعرفيني اعشقها
هند بحب / ما قصرتي الا بقيتو لي غداء ميته جوع
وقفت غاده / بروح اشوف خالد قولي لطباخه تحط غداك
طلعت غاده من عند هند
عند خالد
دخلت عن خالد شافته متسند على السرير متضايق
قربت منه / خلودي حبيبي خلاص وربي اتعذب لشفتك مهموم
خالد / هند بتذحني احر ماعندي ابرد ماعندها
غاده / هي كبيره قد الي تسويه يمكن تتعلم من غلطها
خالد بقهر / هذي مو أي غلطه هذا دمار تفهمين اش معنى دمار بتعيش بفقر وبسجن لو خسرت هي تشوف الموضوع ببرود وانا احترق افكر بابوي وامي وفيها
الخبله اذا صار الجد بتصحى لكن بعد ايش بعد ما يفوت الفوت الموضوع حارمني النوم وهي مكبره مخدتها ونايمه
عند هند
كانت بالصاله تذكرت موضوع موتها قامت وصلت لغرفة خالد طقت عليهم الباب
فتحت لها غاده
هند / غاده وينه خالد
غاده / منسدح على سريره حياك ادخلي
دخلت هند شافها صد عنها / خالد اليوم تنشر خبر اشاعة عن وفاتي
طالعه وجاوبها ببرود / وغيره
هند بجديه / بكره خبر تكذيب وفاتي بكل الجرائد السعوديه وبعده بالعالميه مابي اعيد كلامي مثل ماموتوني تنشرون التكذيب
خالد يحاول يمسك اعصابه / قلت زين اوامر ثانيه
هند بعصبية / لا اذا زانت نفسيتك تعال كلمني صاير ممل طلعت وسكرت بقوتها الباب
طلعت وخالد مقهور منها وعليها
غاده بحب / خلاص وسع صدرك هند مالها غنى عنك وقف معها بدال منت محتقرها هي تحتاجك الحين لا تكابر متاكد انك تتعذب صدك لها مراح يقدم ولا ياخر الي براسها سوته وقف معها
خالد / يصير خير لا تشيلين همي وهمها مردودنا لبعض
قام من سريره دخل الحمام اخذ شور ولبس
خالد / انا طالع لشركه الي بدمرها الخبله
غاده / الله يحفظك
طلع لقى هند بالصاله تشرب عصير
قرب منها وتكلم بحزن / والله ياهند خايف علي اكثر من خوفي على نفسي
هند بجديه / ادري لكن طريقتك غلط بتعاقب نفسك قبل لا تعاقبني لاتسبق الاحداث وفر زعلك لخسرت انا عندي ثقة كبيررره اني بكسبها عمر احساسي ماخاب
خالد / هذا الي تمناه والله يعطيك على نيتك
هند / خلاص صافي يالبن
خالد ابتسم / حليب ياقشطه
هند / هههههههه انقلبنا مصروه وين كاشخ وطالع
خالد / طالع لشركه يبي لنا جهد فوق جهدنا علشان صفقتك
قربت من وضمته بحب / الله لا يحرمني منك
خالد / ولا يحرمني منك
هند / خالد عطني جوالك
خالد خير وش عندك
هند / بكلم جداتي من زمان عنهن
رفعت جوالها واتصلت على ام جاسم
في الديره
كانت ام جاسم جالسه عند الجدات وجاسم منسدح بمكانه
كان جوال امه طايح جنبه شافه يدق وامه بعيده عند جداته
رفع الجوال وانتفض وهو يشوف اسمها ينور بجوال امه قام وحط الجوال بعيد عنه خاف تخونه نفسه ويرد
ورجع لمكانه وانسدح وتغطى بالبطانيه
سمعت ام جاسم صوت جوالها وقامت اخذته ردت
ام جاسم / الو
هند / شلونك خالتي
ام جاسم / بخير بشريني عنك
هند / الحمد لله بخير جداتي عندك
ام جاسم / ايه
مدت الجوال لخالتها / يمه هند على الجوال تبي تكلمك
ام راشد فرحت مشتاقه لها على الي سوته بجاسم تحبها وعاذرتها
ام راشد بحب / شلونك يمه من زمان ماتصلتي
هند بحب / بخير جعلني فداك انشغلت
ام راشد / شلون غاده واخوك
هند / كلهم بخير
ام راشد / متى بتجيني عندنا ترى مشتاقين لك
هند بحب / انا مكلمتك اقولك حجزت لكم حج مع خالتي ام جاسم وياليت يكون معكم محرم كان نفسي احج معكم لكن ربي ما كتب هالسنه يمكن تصير السنه الجايه
ام راشد بفرح / الله يجزاك خير والله ان الحج بنفسي من زمان
هند / جده عطيني جدتي
مدت ام راشد الجوال لام موضي الي كلمتها وانبسطت بالحج ودعت لها وسكرت الجوال وهن مبسوطات وفرحانات بالحج
جاسم مركز على المكالمه وقلبه متلهف ومشتاق لها نزلت دمعه يتيمه على خده
ام جاسم / اشوفك يمه فرحانه فرحيني معك
ام راشد / هند الله يفرح قلبها حاجزه لي وخالتك وانتي معنا بنحج هالسنه
موضي دمعت عيونها / الله يفتحها بوجها وينولها الي في بالها ويزرقها
ام جاسم فرحت / امين
ام راشد / لازم نقول لجاسم ولا فيصل تقول لازم يكون معنا رجال هي مشغوله ماتقد تحج هالسنه
ام جاسم / كلهم ان شاء الله بيحجون يمه ما تدرين وينها هند
فز قلب جاسم امنيته يعرف وينها فيه
ام راشد / لا والله يبنتي كل ماسالتها تهربت وغيرت الموضوع
جاسم في نفسه بوجع / وين الي بيصير قوي وبتنساها لنذكرت قدامك انتفض قلبك وين اقدر انساها وذكرها حولي وكل شي يذكرني فيها لازم ارجع لرياض ولا بموت بسبب عشقي المجنون بشد على العمال يخلصون المدرسه بهاليومين
دخل عليهم فيصل وجلس جنب جداته
ام راشد / يمك ابيك تفضي نفسك بنحج
فيصل / غالي والطلب رخيص باقي شهر على الحج يبي لنا نحجز
ام موضي / ما يحتاج تحجز هند كلمت وقالت انها حاجزه لي ولجدتك ولامك معنا الله يوفقها لكن نبي محرم
فيصل التفت على مكان جاسم شافه متغطي متاكد انه صاحي يسمع كلامهم
فيصل بقهر / مانحتاج منها شي اقدر احججكم توفر على نفسها
ام راشد بزعل / بتحرمني من بنت ولدي ترى قدرها عندي من قدركم تبيني اكسر بخاطرها وهي متعنيه وحاجزه لي ومفرحتني
فيصل / مو سالفة احرمك منها لكن احنا اولى انا نحججك لاقاصرنا فلوس
ام جاسم بعصبيه / مالك شغل بجداتك بيحجن بحساب هند وانا معهن وعن الهرج الي ماله داعي جداتك مالهن شغل بخبالك انت واخوك
فيصل حس بوجع وقف وطلع
فيصل في نفسه / صرت خبل ياغاده بسبتك وانا خبل ليه زعلت من الكلمه ولا واحد يعيش مع طيف وحده بايعته لا وبعد تحب غيره وكارهته ومنحاشه بعرسه
مر يومين على ابطالنا
عبدالرحمن ونوره بابريطانيا يستعدون لملكة فهد الي طلعت نتايجه مع ندى بالموافقه بنفس اليوم وينتظرون محمد يحضر الملكه
غاده ونوره مشغولات بالترتيبات الي بتكون في قصر ابو ندى
فهد مبسوط وفرحان ينتظر على شوق الملكه
من بعد خطبته لندى وهو مانع نفسه يشوفها بالجامعه مشتاق لها
وندى مشغوله بتجهيز نفسها وخايفه ومرتبكه كل ما قرب موعد الملكة داومت بالجامعه وفرحانه انها ما شافت فهد لانها منحرجه ومستحيه انها تشوفه
ام ندى مشغوله بتجهيزات خاصه لبنتها عزمت المعارف الي تعرفت عليهم بابريطانيا وبعض حريم السفاره
هند مشغوله بالصفقه واجلت زواج هنديانا لين يجي خالها تبي فرحتهم تكتمل مشتاقه لخالها وتنتظر جيتهم على نار
خالد ومطلق ومشعل ووليد مشغولين وصار دوامه مضاعف بالشركه
غاده تعبها الوحم والنوم والكسل وهي تحاول تضغط على نفسها وتساعد هنديانا بالترتيبات
هنديانا فرحانه وجابت اهلها عندها وسكنتهم بفلتها
جاسم خفت عن السخونه لكن قلبه مازال متعلق بهند لكن يحاول يكابر علشان امه وجداته
طلب من العمال يستمرون ليل ونهار ودفع لهم مبالغ كبيره علشان تخلص المدرسه بسرعه ويهج من الديره ومن ذكريات هند فيها
فيصل نفس حال اخوه من الشوق والعذاب لكن يحاول يكابر قرر يجلس بالديره ويرجع مع امه وجداته وجاسم
ابو بسام وام بسام كلمهم عبد الرحمن وقال لهم عن سفرهم معه لطائف عند هند لانه بيجيهم من بريطانيا على طول
توقعاتكم
نسايم نجد
|
18-12-10, 08:57 PM
<< مبسوووووطه حيل شعووووله صايرة شريررررة مع غادة ..
..
جديد مواضيع قسم القصص المكتمله من وحي قلم الاعضاء
العرض العادي
