كاتب الموضوع :
dali2000
المنتدى :
القصص المكتمله
بعد كم شهر ..
ألفـ الصلاة والسلام عليك ياحبيب الله محمد .. كلللوش .. اغنية الزفة مالت راشدالماجد تشتغل النسوان تيب .. والكل مستانس .. الا الزين وناصر .. حتى عبدالعزيز اللي المفترض انه ماخذ الزين بس عشان يشفي الغليل اللي ذاخره في قلبه من ناصر .. ويحرمه من اللي يحبها .. بالضبط مثل ماسوى فيه وحرمه من حبيبته يوم راح وخرب على عبدالعزيز وقال لاخو وضحى ان عبدالعزيز كله ويا بنات ومو محترم .. وسمعته وسمعة اهله في البحرين مو زينه .. كان مستانس !! " ..
الزين واقفه وهي ترتجف من الخوف وميته من الصياح .. عبدالعزيز واقف ومستغرب من صياح الزين اللي مو عارف سببه.. ام الزين تهديها .. على بالها ان بنتها تصيح لانها بتفارقهم .. وكذالك كان ظن الجميع ..
ام الزين لاحظت استغراب عبدالعزيز وقالتله : لا تستغرب .. ترا اليوم مو سهل بالنسبه لها .. وكل هالصياح لانها خايفه من انها بتفارقني فديتها ..
عبدالعزيز ابتسم وهو حاس ان سبب دموعها شي ثاني .. يمكن سببه انها للحين تحب ناصر .؟
الزين تصيح وترتجف .. ومافادت محاولات امها لتهدئتها .. لانه محد يدرى عن سبب صياحها والالم اللي بقلبها غير مريم وعايشه اللي من عقب حادث ناصر اللي سواه ناصر ردوا ويا بعض نفس ايام المدرسه .. واكثر .. كانوا واقفين يضبطون دخول الزين ويا عبدالعزيز الى القاعه
مريم تهمس لعايشه : اناا ابي افهم .. دام انها ماتبيه ليش وافقت وخذته ؟
عايشه : عمرها ماكانت بتاخذ ناصر .. ودراستها ماكانت بتقدر تكملها لان وضع اهلها مابيتعدل الا بعد فتره لين ماتستقر اوضاع شغلهم .. ولا تنسين بعد ان عبدالعزيز ولد رفيج ابوها اللي ساعد محمد في ان وضع شركتهم يتعدل .. بدون لا ياخذ مقابل .. شلون محمد كان بيقوله لا .
مريم : مسكينه رفيجتي ..
عايشه : انزين .. الحين خله البنوتات الصغار يدخلون .. بعدهم سيده دانه تدخل .. ويا هاي اللي يصير حق عزيز .. ووراهم الزين وعبدالعزيز ..
ام الزين : يلا بسرعه الاغنيه تشتغل ..
عايشه : يلا بنات دشوا ..
" البنات الصغار دشوا وكل وحده فيهم شايله شمعه .. ولابسين فستان بنفسجي فاتح وشايلين شمووع .. "
مريم تعدل ثياب الدانه .. وقريب عبدالعزيز .. " كانوا يشبهون العروس والمعرس .. ولابسين مثلهم "
عايشه : يلاا الحين انتو دخلوا ..
عبدالعزيز مسك أيد الزين وهو يبتسم ابتسامه عريضه .. ماكان سببها انه قاعد ينتقم من ناصر.. لكن كان سببها احساسه بأنه اخيراً سوه شي زين في حياته يوم انه قرر يتزوج وحده من ديرته .. وعلى دينه .. بدال المسيحيه المفتله اللي كان بياخذها .. فالزين حتى لو انها كانت تحب ناصر قبل لا تتزوج منه .. اهي بنيه خلوقه ومأدبه ومافوقها فوق .. والكل يمدح في اخلاقها وتصرفاتها .. عبدالعزيز كان منعجب في الزين من اول ماشافها قبل لا يدري انها تحب ناصر .. وأول مادرى ماكان ناوي يأذيهم حتى لو انه كان منقهر يوم شاف ناصر وياها في الغرفه .. لسبب ماكان يعرفه .. يمكن كان حب من اول نظره .. او .. او ..
الزين وعبدالعزيز دخلوا والدموع ماتوقفت عن التساقط .. طوال الوقت .. وكانت باينه للجميع .. والكل كان معتقد ان سببها الفرح او الخجل !
عبدالعزيز وهو يمشي يم الزين وهو يسمع صوت حاس بضيقتها .. والألم اللي فيها .. الشي اللي خلاه يشفق عليها .. وخذ عهد على نفسه ينسى سالفة الانتقام .. والسبب الاساسي اللي كان متزوج الزين عشانه .. ويفتح في حياته صفحه يديده .. مافيها مشاكل ويا الانسانه اللي تزوجها .. فهي مالها ذنب يدخلها في شي مالها دخل فيه ..
اخيراً .. عبدالعزيز والزين وصلوا الكوشه ... ووقت ماالزين يات بتركب فوق عالكوشه كانت بتتعثر بسبب فستانها .. لكن عبدالعزيز يودها .. واول مايودها دزته بالعدال .. عبدالعزيز تأكدت من اللي كان حاسه .. الزين صج متضايقه منه ..ودموعها سببها زواجه منها وهالشي ضايقه واايد . . ويوم ماقعدوا عالكرسي اللي بالكوشه .. شال الطرحه من على ويهه .. ولقى عيونهه حمره .. ومليانه بالدموع .. وكانت على الرغم من الحزن اللي مبين فيها .. في غاية الجمال .. الشي اللي خله عبدالعزيز يحس بالعديد من المشاعر المتناقضه .. الاعجاب .. والفرح .. والحزن والشفقه عليها .
وقالها بحنيه : متضايقه مني ؟
الزين تمسح دموعها : لاا ..
عبدالعزيز وهو يبتسم : فديتج .. لا تبجين .. ترا تقطعين قلبي ..
الزين بصوت بالكاد ينسمع ومن غيرنفس .: انشالله ..
عبدالعزيز : يلا قومي خلنا نصور .. لا يتحجون الناس يقولون انه غاصبينج علي ..
الزين تذكرت انها اهي اللي وافقت .. اهي بنفسهاا .. اهي اللي ساقت روحها الى هالطريج .. ورضت تاخذه وردت تصيح ..
عبدالعزيز حس روحه قال شي غلط بس ماعرف شنو اللي قاله .. " ليكون بيتهم غاصبيينها " : بس يالغاليه مو قصدي شي .. لا تصيحين عاد ..
الزين قامت ويا عبدالعزيز .. يصورون ويستقبلون التهنئه من اهلهم .. وطول الوقت الزين كانت ماسكه دموعها وتبتسم ابتسامه مصطنعه تحااول تخفي عن طريقها كل اللي فيها ..
ام الزين : الف مبروك يابنتي .. الف مبروك ..
الزين : الله يبارك فيج ..
ام الزين : الف مبروك ياولدي ..
عبدالعزيز : الله يبارك فيج عمتي ..
نوره يايه تركض .. وكل النسوان يطالعونها باستغراب .. وعبدالعزيز يضحك عليها ..
عبدالعزيز : عقلي .. مره شكبرج .. وتراكضين ؟
نوره : عرس اخوي كيفي ...
الزين سرحت .. وعيونها ردت امتلت بالدموع .
نوره : هيي .. بيي عزوز .. مرتك تصيح في عرسها .. شمسوي لها ..
عبدالعزيز يود يد الزين وباسها .. : مافيها شي مرتي .. بس تعباانه شوي ومستحيه مني .. " التفت عالزين " عدل ؟
الزين تهز راسها بالايجاب ..
نوره : بووو .. ياولد .. شهالروومنسيه .. شي زوجة اخووي .. من قدج ..
الزين تضايقت ازيد .. وكانت تحاول تبعد يد عبدالعزيز لكن اهو ميود يدها بالقوه ..
عايشه : ترا شكله حليوو .. شوفي شلون يحااول يخفف عن الزين ..
مريم : راشد يقول انه واايد شيطاان .. وراعي بناات ..
عايشه : عالاقل راعي بنات .. ولا راعي صبيان .. عدل ..
مريم : بس بعد يعني .. ناصر تغير .. ليش جذي .. مسكين حالته حاله .. تدرين راشد يقولي ان ناصر من درى ان الزين بتتزوج كله قاعد في الحجره ولا يطلع ..
عايشه : اهو اللي سوى في نفسه جذي .. الا صج وين اخت ناصر ؟
مريم : مايات .. شفيج فاقده الذاكره ؟ من يوم الحادث وبوناصر وعياله زعلانين على محمد ..
عايشه : يــــه .. شفيهم ذلين ..
مريم : هيي .. حدج ترا ولدهم حبيبي ..
عايشه : حبتج القراده ..
مريم : هههههه .. انزين قومي نسلم على زيون ..
نااصر يدوور في الحجره .. مو عارف شيسوي .. مليوون الف شي يدور في راسه .. مو قادر يصدق اللي سمعه .. حاس روحه في كابوس .. معقوله بنت عمه وحبيبته بتتزوج احد غيره ؟ لا ومن بعد ؟ عدوه اللدود.." ليش اهو خذ الزين بالذاات .. شلي في راسه .. ليكون يبي ينتقم مني عن طريجهه .. آآخ ياربي شاسووي " فجأه يات في باله فكره .. " ليش ما اخذها من عنده بالغصب .. يخسي يقعد وياها في مكان واحد .. اذبحه واذبحها .. ولا اجوفهم ويا بعض .. " ناصر خذ السياره بسرعه .. وراح عند الفندق اللي مسوين فيه الحفله .. وتم ناطر عند الباب .. لي حد مايا الوقت اللي تطلع فيه الزين وعبدالعزيز ويركبون السياره ..
عبدالعزيز مو عارف شيسوي حق الزين .. حاس انه وايد مضايقهه .. وانه يمكن تكون مغصوبه عليه ! .. واكبر دليل الدموع الهمايل اللي مافارقت عينها طول اليوم .. وكان طوال الوقت يحاول انه ينسيها الحزن اللي اهي فيه .. وبدا يخطط بالفعل يوفي بالعهد اللي خذاه على انه مقرر ونسى سالفة الانتقام .. لانه الزين مالها دخل .. في اللي صار بينه وبين ناصر .. طول الوقت كان ميود يدها .. ويدلعها .. ويوم ياو بيركبون السياره بطل لها الباب .. وقال لها : تفضلي يالقمر . .
الزين ابتسمت .. بس بعد الدموع كانت تنزل من عيوونها ..
عبدالعزيز : ياحلات الابتسامه على ويهج .. صايره قمر ماشالله عليج ..
الزين : شكرا ..
وراح ركب السياره .. توه بيمشي .. الا بوعبدالعزيز .. ومحمد .. وفهد .. ياين ..
عبدالعزيز : الغاليه .. مسحي دموعج .. اكا اخوانج ويا ابوي ياين .. لتخلينهم يحسون انج متضايقه مني ..
فهد يه عند دريشة الزين : حي الله العروس والمعرس ..
عبدالعزيز : هههههه .. الله يحييك ..
محمد : بوسعوود .. هالله هالله في اختي .. تحمل فيها ..
عبدالعزيز : ماله داعي هالكلام .. تبي توصيني على زوجتي ؟
فهد : زيووون .. تحملي في روحج .. واذا سوالج اي شي .. قوليلي بايي اكفخه ..
عبدالعزيز : ها يالنسيب .. اجوفك تسوس مرتي علي ..
الزين تبتسم ..
بوعبدالعزيز : تحملوا في روحكم ياعيالي .. وهاكم .. هاي هديه بسيطه مني .. " عطى عبدالعزيز صندوق صغير "
عبدالعزيزبطل الصندوق ولقى داخله ورقة مكتوب عليها عنونا ومفتاح .. : مفتاح شنو ذي ؟
بوعبدالعزيز : هاي مفتااح بيتكم
عبدالعزيز باستغراب : بيتنا .؟؟
بوعبدالعزيز : هاي مزرعه انا شاريهاا .. وفي داخلها بيت من قبل فتره .. ويوم قتلي انك نويت تخطب بنت الغالي الله يرحمه .. يبت عمال مخصوص من اندونسيا ومن المغرب .. عشان ينحتون .. ويسون الديكورات اللي فيه .. انشالله يعجبكـ .. ولو انك تستاهل ازيد من جذي ..
عبدالعزيز نزل من السياره .. و باس راس ابوه : ماتقصر يالغالي .. والله .. يعطيك العافيه ..
محمد : والعروس .. يبيلها سياره .. " طلع مفتاح سياره اكورد " ..
الزين : ليش كلفت على روحك ياخوي .. انت بروحك ..
محمد ماخلاها تكمل : انتي اختي .. وادري اني وايد قصرت عليج من بعد وفاة الوالد .. بس وذي هديه مني لج .. ولا تحتجين ولا ترفضين ..
عبدالعزيز : محمد .. شنو ذي .. تيب حق مرتي سياره .. من اللي بيخليها تسوق اصلا..
الزين بطلت عيونها .. " شناااوي علي ذي "
عبدالعزيز ضحك يوم جاف ردة فعل الزين : سيده بطلت العيون .. اتغشمر يايبه ..
الكل قعد يضحك .. عدا الزين ..
محمد : يلا عيل مانعطلكم ..
ناصر يراقب الوضع من بعيد .. ينتظر بوعبدالعزيز وعيال عمه يروحون .. عشان يروح يسترجع حبيبته بالقوه من عند عبدالعزيز .. وأول ماشاآآف انهم راحوا .. رطض بسرعه يبي يلحق عالسياره قبل لا تمشي .. بس عبدالعزيز مشى قبل لا يلحق ناصر .. ناصر راح بسرعه ركب سيارته ولحقهم ..
في سيارة عبدالعزيز :
عبدالعزيز يحاول يلطف الجو : سمعي هاي الاغنيه لج .. " وحط اغنية ياحسين هل عندك خبر اني انا شفت القمر " ..
الزين ماقدرت تتحمل .. وانفجرت بالصياح ..
عبدالعزيز وقف السياره على جنب وصك المسجل ..
عبدالعزيز : شفيج تصيحين ؟ خايفه مني ؟ ولا مستحيه ؟ ولا شنو بالضبط ؟
الزين : انا ابي اعرف ليش تزوجتني ؟
عبدالعزيز مايقدر يقولها شنو السبب اللي كان متزوجها عشانه .. فقالها : لانج عاجبتني من يوم ماشفتج في المستشفى .. تتذكرين ؟
الزين : انزين انت تدري ان انا كنت احب نا " قبل لا تخلص الكلام "
عبدالعزيز : لا تلخصين الكلام .. لان اذا تذكرت بتنرفز .. خلينا جذي .. ونطري بنتناقش في هالموضوع اذا وصلنا البيت ..
الزين سكتت ..
عبدالعزيز لاحظ سياره وقفت ورى سيارته : هاي شفيه ذي ؟ من مساعه ورانا ؟
الزين ماتحركت ..
ناصر نزل من السياره
عبدالعزيز درى ان ذي ناصر .. ونزل من السياره ..
وتواجهوا والشرار بدا يتطاير بين عيون الاثنين ..
عبدالعزيز بعصبيه : خييييير ؟ شعندك لحقني انا وزوجتي " نسى الوعد اللي اوعده على نفسه وتعمد يقول زوجتي عشان يقهر ناصر " .
ناصر طلع سجين : موووو زووجتك..
عبدالعزيز باستهزاء وعدم مبالاه : روح قول هالكلام حق اللي كتب عقد الزواج ..
ناصر : انتـ لييييش تزوجتها ؟ ليييش ؟ لهدرجه للحين شايل في قلبكـ على سالفة وضحى .. والا تبي تفرق بيني وبين حبيبتي ..
عبدالعزيز رفس ناصر .. وطيح السجين من يده وقاله : تخسيي حبيبتك .. احترم نفسك .. مارضى تتكلم عن عرضي بهالطريقة
الزين نزلت من السياره وهو تصيح وتقول :بسكم هوواش ..
ناصر قام من عالارض وهو يأشر على الزين ويقول : جوف مرتك ؟ تصييح تبيني وما تبيك .. الزين قومي امشي وياي ..
عبدالعزيز عصب من قلب : يالكلب .. تقول لها جذي جداااااااااامي ..
ناصر : اهي تبيني .. شلي قلته لها .. ماقلت لحبيبتي شي غلط ..
عبدالعزيز يود ناصر من شعره رقع راسه في السياره بقوه .. وبعدين رفسه : اناا اوريك يالحقير .. حبيبتك هاا ؟ انا برويك شبسوي في حبيبتك ..
ناصر صرخ من الالم ..
الزين تطالع عبدالعزيز بخوف ..
عبدالعزيز والشر باين في عينه : دشي داخل السياره ..
الزين دخلت وناصر توه كان بيلحقهم .. لكن من الالم اللي صاد راسه مو قادر يقوم من مكااانه . .
راشد : يبه .. ناصر مادري وين راح ..
بوناصر : لا حول ولا قوة الا بالله .. اكيد راح لها المينون .. روح لحقه لا يسوي لنا مشاكل اكثر مع بيت عمك .. كفاية ان من يوم الحادث واحنا مانكلمهم ..
راشد اتصل في ناصر يسئله وين اهو .. ناصر قاله في وين .. وراشد راح يابه ..
راشد : شلي مسوي فيك جذي ؟
ناصر : عبدالعزيز ..
راشد : عبدالعزيز يطلع من راسك الدم ..
ناصر بصوت بالكاد ينسمع : رقع راسي في السياره ..
راشد : قووم خله اوديك المستشفى ..
محمد كان ينطر هنوف اخته تطلع يبي يقولها شي تقوله لامه .. وهو واقف عند باب الفندق .. طلعت عايشه .. ويوم شافها .. استخف !! " هاي عايشه رفيجة زيوون معقوووله !! "
محمد : عايشه ..
عايشه افترت تدور من يناديها .. مالقت احد تعرفه ومشت ..
محمد لحقها لي عند سيارتها : عايشه ..
عايشه افترت واهي معصبه :اووووف .. من ..
محمد : انا محمد .. اخو الزين ..
عايشه صار ويهه الوان من الفشيله ..
محمد ابتسم لها : شلونج ؟
عايشه : بخير .. خير اخوي فيه شي ؟
محمد : امم .. عندي موضوع ابي اكلمج فيه ..
عايشه : عسا ماشر .. الزين صارلها شي ؟
محمد : لا لا .. الموضوع ماله علاقه بالزين ..
عايشه : عيل ..
محمد : ماينفع نتكلم جذي .. ممكن " بتردد " اذا ماعليج امر اخذ رقم تلفونج ..
عايشه استحت ومو عرفت شتقول ..
محمد : امم اوكي .. اسف على
عايشه : 39#####
محمد : دقيقه بسيفه ..
__________________
|
04-08-10, 02:38 PM
جديد مواضيع قسم القصص المكتمله
العرض العادي
