كاتب الموضوع :
dali2000
المنتدى :
القصص المكتمله
الجزء الاول ..
<( الفصل الثاني )>
بعد انتهاء الدوام المدرسي .. الزين خذها السايق من المدرسه ..
اول ماوصلت البيت دشت الصاله وهي تركض ..
الزين : السلام عليكم ..
الكل : وعليكم السلااام
راحت الزين لامها وباستها على راسها : شلوونج يالغاليه ؟
ام محمد : بخير الحمدالله انتي شلوونج ؟
الزين وهي ميوده بطنها : والله مييته من اليووع .. قوليلي شنو غدانا اليوم ؟
ام محمد : مسويه لكم مجبوس لحم ..
الزين : يــمــه .. تدرين اني ماحب العيش ..
بو محمد : يبه الحين اللي يسمعج اتحجين مايقول بنت عرب .. في احد مايحب العيش ..
الزين وهي ماده بوزها : أي أنـــا ..
فهد يبي يقهر الزين : يبه انت مو عارف .. هاذي طخة الفاست فوود .. يعني تبي باستا أو مقلي أو مشوي ..
الزين واهي زعلانه : اسكت انت ماحااجيك
فهد يستهبل : افااا .. لييش ؟ يهياج قلبج تزعلين على أخوج الغالي وتوأمج ؟
الزين : أي .. جفت امس تميت تتناحس وياي .. خليتني انزل جدام الريايل ببجامه وانا اصيح
فهد يحط ريل على ريل يبي ينرفز الزين : محد قالج اتبمبعين جنج وحده من اللي في دعايات الجبن هههههاااي ..
دانه : تيينوو .. فهووت اقول انتي بقييه .. " زينو .. فهود يقول انتي بقره"
فهد ميت من الضحك ..
فهد : دانووووه وييين البقرره ؟
دانه اتأشر عالزين : اكاوووه ( كاهي )
الزين عصبت اطالع فهد والشرار يطلع من عيونها .. بس قررت تسكت احترام لابوها ..
بو محمد وهو يكلم فهد : عيب عليك شهالكلام اللي قاعد تعلم اختك الصغيره ..
فهد : يبه آسف ..
بومحمد وهو ملتفت ناحية الزين : يبه مره ثانيه حطي بالج وسئلي اذا في احد قبل لا تنزلين .. وثاني شي حتى لو شنوو صاير لا تعليين صووتج..
الزين : يبه والله اناا ماعلي صوتي .. بس فهوود هالمره نرفزني.. اذا اخووي مايي وياي عشان اشتري الاشيا اللي احتاجها من عيل اللي مفروض ايي وياي؟ وثاني شي عباله اني للحين ياهل يتناحس وياي > اطالعه واهيه مستحمقه حدها ودها تكفخه < ويخررعني بالقطوه اللي عنده
بو محمد : فهد هاذي اختك انت الحين مو صغير هاي بدال لا تكون سند لها .. يبه لازم تتحمل فيها .. وبسكم من الهواش والمناحس انتو مو يهال الحين ..
فهد وهو يبتسم حق ابوه : انشاءالله يبه .. مايصير خاطرك الا الطيب ..
بو محمد : انزين وين محمد .. الغدى بيبرد ؟
دانه تمسك ثوب ابوها عشان يشوفهاا : بابا حمووتي قالي اقولك عنته شغل ..
بو محمد تضايق شوي : لا حول ولا قوة الا بالله .. الله يهداك يا ولدي شغل حتى حزت الغدى .. انزين فهد روح ناد هنوف وعبدالله
فهد قام من مكانه وهو يتحلطم بصوت واطي .. كله فهد فهد . اففف مآآدري زيوون آم كشه شفآآيدتهآآ في الحيآآه .
بومحمد سمع فهد يتحلطم .. فر ويهه ناحية ولده وهو معصب : شقلت ؟
فهد ارتبك : هاا .. لا لا .. ولاشي ..
حطوا الغدى .. الكل كان ياكل الا الزين .. أكتفت بالسلطه .. والعصير ..
عبدالله لاحظ ان الزين مو قاعده تاكل : الزين .. أكلي .. عيب تقعدين وانتي موو قاعده تاكلين .. شنو يعني مو عاجبتج النعمه اللي الله ماعطنا اياها ؟
الزين عصبت لانها تحس عبدالله واايد يتكلم جنه اكبر من سنه ويتدخل في اشيا ماله دخل فيها : عبدالله .. اكل وانت ساكت ماعليك مني ..
عبدالله بلامباله : كيفج ..
الززين عصبت ازيد : ادري أن .. " قبل لا تخلص كلام فهد عطاها نظره انها تسكت "
فهد يبي يفتح أي سالفه ويا ابوه : امممم .. يبه .. شخبار الشغل ؟
بو محمد : الحمدالله ماشيي الحال ..
فهد استغرب : يبه قبل كم يوم أسمع محمد يتكلم في التلفون ويا بوعبدالعزيز ,, واستنتجت من كلامه ان عندكم مشاكل بالشغل ..
بو محمد يحاول قد مايقدر يجنب اهله ان يعرفون بمشاكل الشغل : والله يايبه ماعرف شنو اقولك .. بإذن الله بتنحل
أم محمد : دانه ,, هنوف ,, عبدالله ,, يلاا شبعتوا ؟
عبدالله : أي الحمدالله ..تسلم يدج يأم محمد ..
أم محمد : بالعافيه ..
هنووف : خووش طبخه يمه .. تسلم يدج ..
أم محمد : الله يسلمج حبيبتي ,, بالعافيه ..
دانه : مامييي نمنم يميي .. أسلم ددج ((يمه الاكل حلو .. تسلم يدج ))
أم محمد : فديتهاا بنتي الصغنونه .. الله يسلمج يالحلوه .. يلاا عيل كلكم رحوا فوق غرفكم ..
دانه : اووتيي ماما ككووو (( اوكي ماما ثنكيو ))
الكل يضحك على كلام دانه ..
فهد : هههههههه ياعمري عالحجي الانجليزي ..
دانه طقت فهد على ريله بالعدال : تب انت .. انا ماحاجيتك " تقلد الزين "
ام محمد : دانه عيب قولي آسفه لأخووج ..
دانه راحت عند فهد وباسته : توولي فهووتي (( سوري فهودي ))
ام محمد :يلا هنوف اخذي اختج ووديها فوق .. وعبدالله انت بعد روح غرفتك ..
عبدالله : ان شالله ..
الكل تموا ساكتين لين ما راحوا اليهال فوق ..
ام محمد : الحين اليهال محد .. قولي شفيك يالغالي قلبي مادري ليش مو مرتاح .. وحاسه ان السالفه وايد عوده
فهد : يبه انا المفروض اوقف وياك واساعدك في الشغل حالي من حال محمد .. انا بهد الدراسه وبشتغل معاك في الشركه
الزين حبست ضحكتها في هالموقف ..
بو محمد : فهد .. انت آخر سنه الحين .. خلص المدرسه بعدين تعال اشتغل وياي وادرس في نفس الوقت .. بس الحين سالفة انك اتهد المدرسه شيلها من بالك ..
فهد مو عاجبه الكلام : يبه بس انت محتاجني .. ولازم اوقف وياك
بومحمد : اخوك وياي مب مقصر .. انت كلها سنه وتكون وياي ليش مستعيل ؟
الزين تبي توري ابوها انها بعد تبي توقف وياه : والله يبه لو اانا اقدر جان يت واشتغلت وياك
بومحمد : لايبه .. مارضاها عليج .. انتي تشتغلين وسط الريايل والهنود .. اللي يسوى واللي مايسوى يكلمج .. لا يابنتي انتي مكانج معززه مكرمه في البيت .. احنا شغلنا كلش ماينفع حق نسوان ..
الزين : ادري يبه .. بس بعد كان ودي اساعدك .. انزين يبه .. يعني انت معترض على سالفة الشغل ؟
بومحمد : أي .. لأن انتي مو قاصرج شي .. مافي ابو يرضى بنته تختلط ويا الريايل
الزين حست جنه احد يصب عليها ماي بارد !! : يبه .. يعني هلون معناته انك مابترضى اني ادرس في الجامعه ؟
بومحمد : لا يايبه انا ماقول جذي انا اللي اقوله درسي وسوي اللي تبينه اهم شي تحافظين على اخلاقج .. وماتختلطين بالريايل .. يعني كل اللي ابيه انج اذا بتدرسين في الجامعه .. تدرسين في جامعة للبنات بس ..
الزين في قلبها أي جامعه اللي فيها بس بنات ؟ : فديتك يبه .. انشالله بصير دكتوره وأرفع راسك ..
بو محمد : دكتوره مره وحده ؟
الزين تبي تمهد لابوها سالفة الاختلاط في الجامعه : أي يبه .. انت تدري اني شاطره وميولي كلها صوب الطب .. وكليات الطب بذات مافي منها كليات للبنات بس .. واهو صحيح الشغل بعد بيكون فيه نوع من الاختلاط بس هاذي زمنا يا يبه ..و انت طبعا مابترضى اتخلى عن حلم حياتي عشان اقعد في البيت اشتغل واطبخ ؟ انا بصير الدكتوره الزين بنت فاضل بن عبدالعزيز اللي ...
" الزين ماخلصت كلامها الا تقاطعها امها .."
ام محمد : بومحمد انت لحد الحين ماقتلي شصاير ..
بو محمد بضيق : السالفه ومافيها يالغاليه .. انا عندنا نقص في العمال .. لأن واحد يشتغل عندي راح كلم العمال .. واقنعهم يطلعون من الشركه بحجة ان احنا مانعطيهم حقوقهم ..
فهد عصب وبطل عيونه : شنوو ؟ أي حقوق ؟ معاشاتهم احسن من معاشات اللي يشتغلون في الحكومه .. اجازات وتعطيهم ومو مقصر عليهم في شي .. شنو يبون ازيد من جذي ..
بومحمد وهو يتنهد : يطالبون ان نزيد بعد رواتبهم .. المشكله الكبيره مو بس النقص اللي عندنا بالعمال .. المشكله الاكبر ان كل الفلووس اللي كنت اطرش الهندي يحطها في حساب الشركه .. كان ياخذهم والحين اهو شارد ولا بعارف شلون اوصله . . والشغل واايد متراكم علينا .. ومو عارفين شنسوي .. بس الحمدالله بوعبدالعزيز واقف وياي .. وانشاءالله وضع الشركه بيتعدل لما اول يدخل شريك وياي ..
الزين : بس يبه مايصير جذي .. يصير شريك وياك وانت اللي مأسس الشركه وواقف عليها .. ايي اهو يتشارك وياك عالجاهز
بومحمد : مو عالجاهز .. لاتنسين المشاكل اللي عندنا مو سهله .. يعني اذا بو عبدالعزيز اذا مادخل وياي شريك .. الشركه بتنكسر ..
واهو مو طالب الا نسبه بسيط بالنسبه حق اللي بيسويه .. 25% بس !!
الزين : بس يبه ؟ يعني ان تعتبر 25% مو وايد
بومحمد : بالنسبه حق الديون والقروض اللي علينا .. والمشاكل اللي بتنحل بشراكته اكيد مو وايد ..
الزين مو قادر تستحمل تسمع ازيد : اوكي انا استأذن ..
بومحمد : وين يبه ؟ قعدي ويانا شوي
الزين : ودي يالغالي بس تعرف .. ابي اروح ادرس باجر علي امتحان وايد مهم .. تامرون بشي ..
الكل : سلامتج ..
بومحمد : الله يوفقج يابنتي .. درسي عدل ..
راحت الزين غرفتها وتركت امها وابوها واخوها على نقاشهم ..
الزين بطلت الكتاب .. بس ماكانت قادره تستوعب ..
صكت الكتاب وخذت التلفون واتصلت في بنت عمها ساره .. ساره عمرها 19 سنه .. واهي والزين وايد قراب من بعض ..
التلفون يرن بس محد يشيل .. تمت تتصل ورا بعض اكثر من 6 مرات ..
ناصر سمع التلفون يرن .. ماعرف من اللي متصل .. لأن اخته مسيفه الزين باسم " قطوتي "
ناصر : قطوتي ؟ والله ساروه بعد فنتق .. خله اشيل بقولها ان ساره محد ..
الزين : ألووو .. تتكلم واهي تصيح .. سارووه بمووت تخيلي ابوي عنده مشاكل وايد في الشغل.. وانا مجابله الكتاب ابي ادرس مو قادره كل ما ايي ابطل الكتاب اتذكر اللي صار ويا اخوج .. اكيد عرف الحين اني احبه اففففف .. ياربي شهالبلااوي اللي انا فيها
ناصر في حالة ذهوول تاام هاذي اكيد الزين
الزين استغربت من سكوت ساره : سارووووه وينننج ؟
ناصر : احم .. السلام عليكم
الزين في قلبها صوت من ذي .. ليكون طاقة الرقم غلط : ووو عليك ..م السلام .. مسامحه اخووي الرقم غلط
ناصر تكلم بسرعه قبل لا تسكر الزين الخط : لاااااااا نطري .. زين انا ناصر ولدعمج
الزين ترتجف (( شسويت انا مو كفايه موقف امس الحين بعد درى اني احبه .. شنو هالقهر .. امس يمكن جذب روحه والحين تأكد )) تكلمت بصوت واطي : مسامحه نصوري !! (( بعد نصووري شفيني اناا !! )) قصدي ناصر ..
ناصر استانس : لا الكلمه القبليه احلى
الزين مو عارفه شنو تقول : آسفه ماكنت ادري ان التلفون عندك .. بس اعتقد ان المفروض ماتشيل تلفون اختك وتحترم خصوصيتها
ناصر : مسامحه وحقج علي يابنت العم ..
ناصر : الزين ..
الزين : نعم ؟
ناصر : قولي تم ؟
الزين (( شيبي ذي الحين :s)) : ليش ؟
ناصر : انتي قولي ؟
الزين : تم .. آمر ؟
ناصر : ابي اكلمج اليوم عندي كلام ابي اقوله لج .. لا ترديني
الزين : كلام شنو ؟ اذا عندك شي قوله الحين ؟
ناصر : انا الحين مستعيل بس عندي شي ضروري لازم تعرفينه ومايحتمل يتأجل .. وبصراحه ماقدر اوصله مع ساره .. ممكن اكلمج عقب شوي ؟؟
الزين ودموعها على خدها بسبب الموقف اللي انحطت فيه " اكيد بيقولي اني حسبت اخته وهالكلام ياربي شهالورطه "
ناصر ينطر رد من الزين ..
ناصر : هااا شقلتي ؟
الزين (( شنو اقوله الحين ؟؟)) : اممم
ناصر : شقلتي
الزين قالت لا شعورياً : اوو,اووكي
ناصر : انزين عيل اكلمج عقب نص ساعه ..
الزين تروح عند المنظره .. توها مستوعبه اللي صار .. بيي شسووي .. آآه ياربي شنوو بيقول ؟ اكيد بيقولي اعتبرج مثل اختي .. اففف شهالموقف السخيف اللي انحطيت فيه .. ليش تميت اتحجى مفروض انطر لين ماسمع صوت ساروووه .. انزين شنوو الحين بيقول عني لاني رضيت اني احاجيه .. الحين عباله اني اكلم صبيااان .. ياربي شسووي.. الزين راحت وقعدت عالسرير .. تفكر لين ماصارت الساعه 6 ونص .. ساعه مرت وينك ياناصر ؟ تقولي نص ساعه والحين ساعه مرت والتلفون مارن .. شكلك مابتتصل خير شر .. خله اقوم اصلي المغرب وأنام ابرك لي ..
__________________
|
04-08-10, 02:14 PM
قصة مشاوير الزمن للكاتبة تاج راسكم
جديد مواضيع قسم القصص المكتمله
العرض العادي
