خلصت الجزء وقلت انزله...

الجزء التاسع عشر....

جيكت على ساعتي ....لالالا المحاضرة راحت علي ...شكلي مب يايه افلح
نزلت ركض من على الدري ...جفت شلة الانس يالسين يفطروا على سوالف وضحك ..وانا المسكينه متاخره...
جمان:صباح الخير على الناس الرايقه...ردوا علي بصوت واحد...صباح النور والسرور على الحساد...اشرتلهم بيدي باي ..وسرت صوب الباب ...بس سمعت ناصر يزقرني
ناصر:جمان...شو رايج تخلين ميعاد توصلج
جمان:وليش ها كله
ناصر :بفهمج لمن تردي
جمان:انا متاخره متاخره...وهاي ويلسه..يله قول شو السالفه
سارة:خيبه ..خيبه...كل ها لقافه
طلعت لساني ....وقلت:بترفع عن الرد عليج..ورفعت راسي وقلت ...احم احم
سارة:عدال ...عدال ..ليطيح نصج بس
ناصر: عنبو داركن ...حشموني شويه
نزلت راسي ..اوني استحيت ...سمعت ضحكة ميعاد..ادريبها كاشفتني ..رفعت راسي ..وجفت ناصر يضحك
ناصر:جي انتي مستحيه يعني..والابتسامه شاقه الحلج
جمان:ابتسمت ابتسامه هبله..
ميعاد:الحمد لله على نعمة العقل بس
جمان:جني الا عطيتكن ويه ...سايره محاضرتي ابرك لي
ناصر:انتظري ميعاد بتوصلج
جمان:حتى نسيتوني السالفه..وليش ميعاد توصلني
ناصر:لانج معاقبه وبنفس الوقت تحت المراقبه لمدة اسبوع
جمان:والعثره..كل ها الكلام لي
ناصر:عيل لمنو ...جمان خلج سيريس شويه...انا مب عايبني سياقتج وجم مره منبهنج ما تسوقين بسرعه ومن غير صوت الاغاني الي تصدح سيارتي تقولي كزينو مب سيارة ...وبما اني طيب ..براقبج اسبوع ان اصطلبتي بالسياقه عطيناج السيارة والليسن ..ولا دونما ذلك ميعاد ولا سارة يوصلونج
جمان:ارجوك كله ولا حرمتك ..اسميني جنها سلحفاه لمن تسوق ..والغم تمسك السيد اليسار ..عاد تعالوا سمعوا الهرنات
سارة:على الاقل لحد اللحينه ما سويت حادث ...الباجي على غيري
ناصر:حو انتو الاثنيه الواحد ما يعطيكن ويه ...سيروا توكلوا على دواماتكم
جمان:ان شاء الله سيدي..سلام تعظيم
ميعاد:الله يعينه الي ياخذج ...يقول ما خذ ياهل مب حرمه
جمان:يبوس يده وش وافاه..اني وافقت عليه
ناصر:مضيعات المذهب ..استحن على ويهكن..الحشيمه زينه


اول ما ظهرن ميعاد وجمان قلت لناصر
سارة:بسالك ناصر...اشقايل ام ربيعتك ما تراعي سنها
ناصر:منو ام ربيعتي..اصلا منو ربيعتي ..ما احيدني راعي ربيعات
سارة:منو غيرها مضيعه المذهب ..ناديه...
ناصر:ردينا طاري يلي
سارة :معلوم نرد لسالفتها...بالله عليك..اشقايل تمد يدها وتسلم عليك...لا وتقول تراك شرا ولديه الي ما يبته...هي تفضفض من صوب وامها من صوب
ناصر:ساره ..شو ياج ..تراها ما سوت شي ..سلمت علي وسارت بدربها
سارة:احلف انت بس...ومنو الي يلست تقول..يا ولدي احنا حريم بروحنا ببيتنا ...ربي ما رزقني بولد ...وانت تعرف ها الزمان الواحد اذا ما وراه ريال يضيع وانا امك...انا اعتبرك شرا ولديه...فيا ولدي لا تقطعنا ...شويه وتقولك تعال اخطب بنتي
ناصر:اي خطبه واي خرابيط...مب زين سؤء الظن ...بعدين لو سيرت عليهم ..من كسب الثواب بس
ساره:ناصر تبى تموتني ...صج انكم الريايل ينقص عليكم بسهوله...شو ما عندها اهل ..شرا ما اهم مدبرين حالهم من زمان يدبروها اللحينه
ناصر:اول كان ريل ناديه عندهم..بس اللحينه هي تطلقت
ساره:يا ويل حالي...يعني هي مطلقه ...وطبعا يالسه تلف وتدور علشان تاخذك...ضعتي يا سارة
ناصر:شو رايج بالمره ..تولولي وتشقي ملابسج...يا سوسو يا حبيبتي ...يا نظر عيني ...يا حياتي..يعني كل وحده مطلقه ..على قولتج تلف وتدور على شباب علشات تعرس
سارة:مب قصدي جي..بس هي جي..الكتاب باين من عنوانه
ناصر:سارة..شو تبين اللحينه
سارة:ما اباك تسري عندهم ...
ناصر:شو جليل اصل ..الحرمه يت لعندي ...وبعدين تراني مب ياي اسري صوبهم ..مجرد اتصال اسال ام ناديه..اذا ناقصهم شي يبون حايه اماره..فيها شي هذه بعد
سارة:بالمره ما فيها شي ..شكلك تبى تطفربي...الله يعيني على الايام اليايه


مستحيل الي يالسه اسمعه...يعني زياد كان يقص علي...زياد ما قالي كل شي ...ما قالي اي شي عن علاقته بالجوهرة....جفت على تلفوني وكان اتصال من زياد...اول ما رديت سمعت صوت وحده تصارخ...استغربت منو هذه ..وبعدين سمعت صوت زياد...شكله متصل فيني بالغلط ...بس الكلام الي سمعته خرسني...حطيت التلفون على الاسبيكر ..لاني مب قادره اسمع الكلام بروحي...
زياد:جوان اهدي ..خلينا نتفاهم
جوان:مستحيل ...نتفاهم...كيف ما تقولي انه حرمتك هنا
زياد:ما كان عندي خبر انها هني ..انا عرفت من يومين بس
جوان:وليش ما خبرتني...ليش تخليني بها الموقف السخيف..يعني كل شي من بينا انتهى خلاص
زياد:جوان الي فيني كافيني ..لا تزوديها علي
جوان:اشقايل ما ازودها عليك...الموضوع كله بيدك...لا يكون تحبها يا زياد..وكنت تقص عليه
زياد:الي بيني وبين جوري ..وصية ميت ...قدر..واقع...اي شي ثاني بس مب حب...بعدين انا متى جفتها ولا عرفتها علشان احبها...صح اني احبج ..واني ما اقدر استغنى عنج .. ولا اقدر اعيش من غيرج..بس ما اقدر اتخلى عن جوري...ما اقدر اظلمها ...وضعها شرا وضعي...هي ما اختارتني بارادتها ..انا كنت قدرها ..يعني الي بيني وبينها وصيه ولازم تتنفذ...تعرفي شو طلب مني ابويه لمن يى اخر مره..قال ما اوصيك على جوري يا زياد..خلها بعيونك تراها يتيمه
الجوهرة:يعني علشان وصيه ..وعلشان هي يتيمه...نضيع الي بينا ...تباني انسى الشخص الوحيد الي حبيته...تذكر كيف امايه كانت تعصب لمن اروح معاك للدكتور النفسي ..تذكر لمن كانت تبى تدخلك بمدرسه خاصه ...تذكر شو قلتلها ..اذا سار لمدرسه داخليه بسير معاه...كنا نذاكر مع بعض...تذكر ايام الامتحانات..كنت اسهر معاك بالليل بالرغم من اني مخلصه الي علي ...بس ما كان يهون علي اخليك تذاكر وتسهر بروحك... تذكر لمن كنت تقولي ليش ما عندج صديقات شرا غيرج من البنات..تذكر شو قلتلك...قلتلك انك معوضني عنهم ..صح ابويه كان ما يخلينا وحدنا وملزم على امايه تكون معانا حتى وقت مذاكرتنا ...بس انا ما كنت اجوف غيرك بالغرفه ....تذكر لمن قررت انك تسكن بروحك...حشرت الدنيا عليكم ..بس انت علمتني طريقة ...ارواحنا تكون جريبه بالرغم من بعد اجسادنا...كنا كل يوم على الساعه 10 بالليل ..كل واحد يقول للثاني تصبح على خير..كل واحد يقول الي بخاطره صوب الثاني ..بالرغم انه ما كنا نسمع بعض ..بس انت كنت تقول ..التقاء الروح اعظم من التقاء الجسد...كيف تباني انسى رسايلك الي تحطهم بمكتبي كل يوم صباح..كيف تنسى رسايلي الي احطهم لك بنفس وقت رسايلك ...كيف تباني انسى انه شرينا نفس الصندوق علشان نحتفظ فيه رسايلنا ..لدرجة انه اتفقنا نحطه بنفس المكان ..كل واحد يحطه بالصوب اليمين من السرير ...وتقول في النهايه قدر..وصيه...اذا انت استرخصت الي بينا فانا مستحيل ارخصه..اذا كنت تحبها كنت انا الي بظهر من حياتك ..لانه الي يحب مستحيل يجرح..بس انت ما تحبها ..ما تحبها...وانا ما راح اسمحلها تاخذك مني...سامع ..ما راح اسمحلها..اصلا هي وحده ما عندها كرامة كيف ترمي نفسها على شخص ما تحبه ..كيف هي الي تركض وراه...بس الي سوته مب غريب ..لانه وحده عاقه نفسها على ناس وعايشه معاهم من غير ما يقربولها...يتوقع منها اي شي ....وحده ما فيها حياء ..بس شو تترجى من وحده امها هنديه كانت تخدم ببيوت الناس
رميت موبايلي ..ويلست اصرخ شرا المينونه...شو الي يالس يستوي بي ...حد يقولي منو الي قالي ايي لندن ..كنت مرتاحه ..مرتاحه اني ما اعرف شي ..مرتاحه اني ما كنت اعرفه هو...بس اللحينه احس عمريه شرا الغبيه ..شرا المخدوعه...كنت اتامل في يوم من الايام انه بنعيش شرا غيرنا من الازواج ..كنت اتامل انه الحب بيي بينا في يوم من الايام ..بس بما انه شعوره تجاهي وصيه وينفذها ...يعني مستحيل يكون في امل ..والي دمر الامل كامل ..انه اصلا يحب وحده ..يحب وحده ..والله يا الجوهرة انا عندي كرامة ...والله اني استحي ..والله اني مب فاصخه الحياء ...بس الضروف هي الي حدتني يا الجوهرة ..هي الي حدتني ..حرام عليج تقولي عني جي ..حرام عليج تقولي جي عن امايه ...شو سوتلكم ..ذنبها انها كانت هنديه ..ولا ذنبها انها كانت فقيره..خدمت بيوت الناس علشان انا اعيش ..اسوم ما كان قصدي ادمر الي كان بينها وبين زياد..اصلا ما كنت اعرف..والله ما كنت اعرف
اسوم:جوري حرام عليج اهدي..لا تسوي جي بنفسج...
جوري:الصندوق...لازم اجوفه
اسوم:جوري شو تبين بالصندوق
جوري:هو الي اقدر اواجه فيه زياد..واقدر اطالبه بالي يالسه افكر فيه
اسوم:وشو الي يالسه تفكري فيه
جوري:بخبرج بعدين..وين سويج سيارتي
اسوم:شو تبين تسوقين السيارة وانتي حالتج جي...
جوري:ارجوج اسوم ..والله مب قادره...خليني بحالي...خليني بحالي ..ويلست اصيح بصوت عالي
اسوم:اهدي غناتيه ..اهدي ..قومي صلي ركعتين ...وان شاء الله تهدي..وانا بروحي بوصلج شقة زياد
الحمد لله احس عمريه هديت شويه من بعد ما صليت..بس الي براسي بسويه بسويه...جفت اسوم واقفه وهي تبتسملي
اسوم:نمشي
هزيت راسي بمعني هيه...

توني واصل الدوام ...دخلت مكتبي..السكرتير دخل بعدي وقال الاجتماع بيبدا بعد شويه...اخذت اوراقي ودخلت قاعة الاجتماعات...جفت ربيعي سعيد وهو مدير قسم الماليه بالشركه ..الاجتماع استمر لمدة ساعتين ..لانه خلاص نهاية السنه فلازم نراجع كل شي...
سعيد: ما بغينا نخلص
سالم:جي وانت مدير وتتحلطم..شو بقيت للموظفين
سعيد:ما علي من حد ...ابى انزل اجازه...تعبت من اجواء البيت
سالم:شو مستوي بعد..بيتكم وحده حاره
سعيد:صدقت...امس عيوزنا يت تزورنا
سالم:ولا تقول ابوك كالعاده راغها بره البيت ...
سعيد :تصدق في اب يروغ امه ...جم مره نصحته ... تراها جنتك..بس يقولي هي الي دلعت بنت عمك وجوف شو كانت النتيجه..شردت مع حبيبها..
سالم:وهي شو ذنبها..جان هي شردت مع حبيبها ..امه شو ذنبها..وبعدين ابوك الله يهديه...مب ياي ينسى ذي السالفه
سعيد:يقول هي وايد كانت مدلعتنها وكانت ما ترضى حد يرفض لها طلب...وابويه مستحيل ينسى السالفه..والدليل الحكره الي مسوينها على خواتي..اخاف بس من كثر الكبت بينفجروا غلط...بروحي مستهم على اختيه الي بالحامعه..مب عايبني تصرفاتها ..
سالم:لا حول ولا قوة الا بالله...الله يعينك صراحة..
سعيد:تصدق وصلتها بيت عمتيه ...هي عصبت ويلست تقول ليدتيه ..جم مرة اقولج لا تسيري بيته ...جان يباج ييج ...ويدتيه يلست تقول..ولديه ومشتاقتله ..صايرلي 6 اشهر ما جايفتنه يا بنيتيه ..اخوج قلبه جاسي با بنيتيه...جاسي..يلست اهديها وابوس يدها ...الله يسامحك يا ابويه ..متى قلبك يحن وتعرف انه الي تسويه فيها بيي عليك..تعبت من كثر ما انصحه ..يالس اخطط اتزوج بس علشان اسكنها عنديه...بس الوالده حالفه انه اي حد يزورها ولا يسكنها عنده انها ما راح ترضى عليه ليوم الدين..شو ها الوهقه يا ربي..بين الوالدين ويدتيه..ما ادري شو اسوي
سالم:الله يعينك ..الوضع صعب ..بس معقوله اللحينه ابوك يروغ امه بس لانها كانت مدلعه بنت عمك
سعيد:على كلامه ..ويقول انها هي الي حيرتها لاخوي عبدالله الي من بعد ما سمع سالفه شردتها حلف على ابويه انه ولد عمي سامي ما ياخذ ختيه نورة...ولا اني اخذ اسماء بنت عمي
سالم:وهم شو ذنبهم
سعيد:شو تقول بس..خليها على الله


توني ظاهره من الكوفي ..خلصت محاضرتي وسرت اشرب كوفي اتيت راسي شويه ...لمن وصلت جريب من باب القاعه..سمعت ربشه بالداخل ...شو اليوم ...دقيت الباب ودخلت ...جفت بنات الجماعه كلهم ملتمات وسوالف وضحك..وانا اقول محد يسوي فوضى غيرهن ..بس لفت انتباهي الورود الي على الطاولة..يا اوادم ..شو اليوم..شي مناسبه وانا ما عندي خبر...شكلها اميرة فهمت علي لانها قالت ها الورود كلها لحمد...ما دريتي انه مسوي حادث امس...حشى ما يتخبى عليهن شي ..شكله حمد محبوب الجماهير وانا ما عندي خبر...
جمان:منو الي خبركم انه مسوي حادث
اميرة: خليفه..لانه حمد كان ساير صوبه لمن سوا الحادث
والعثرة ..الشباب صايرين شرا البنات ..ما يروموا ييودوا شي بداخلهم..خيبه
لفيت راسي اجوف بوكيهات الورود..اسميني احسدك يا حمد ..كل ها لك...سمعت اميرة تقول للبنت الي يالسه حذالها..
اميرة:جفتي بوكيه الورد الي يبته ..بالله عليج ..مب احلى بوكيه
خيبه...بنات مضيعات المذهب ..بعدها مفتخره..جنها الا مسويه انجاز..على شو فرحانه امي ..على سواد ويهج
البنيه:صراحة..ذوقج لا يعلى عليه..
مرة ذوقها لا يعلى عليه...ما اجوف شي مميز بالبوكيه...سمعنا صوت الباب ..ومن بعده دخلوا الشباب ..وكلهم ملتمين على حمد..خيبه من متى ها الحب لحمد...ما علي منهم ..كنت ناويه اطلع ورايه محاضرة...بس سمعت اميرة تقول لربيعتها ..
اميرة:تراهني ..انه على نهاية السمستر بكون مخطوبه لحمد...
صراحة رديت ريوس ...ويلست على الكرسي...شو مخطوبه لحمد...لا وبعدها تراهن..يا ماما مب زين تراهنين ...
البنية:بس اميرة مب حلوة تعقين عمرج على الريال
اميرة:ومنو الي قالج اني اعق عمريه على الريال..هو الي بيخطبني وباقناع منه بعد...ساميه ..ما ابى مصيري يكون شرا مصير اختيه صاكه السبعه والثلاثين وبعدها ما عرست..يعني عانس..كله لانها كانت محيره لولد عمي..وبعد ما شردوا من البلاد .. ما يى حد يخطبها ..
البنيه :بس ها نصيبها يا اميرة..وانتي ما تعرفي شو مكتوبلج....
اميرة: لو تعرفي كيف وضعنا بالبيت ..جان رحمتينا..الكبت والضيق الي عايشينه لا طلعات ولا زيارات ..كله بسبب بنت عمي ..الله لا يبيحها ..وبعدين انا مب يايه اسوي شي غلط...ما رحت عنده وقلتله تعال اخطبني ..ولا يايه اعق عمريه عليه ..ولا يايه اكلمه بالتلفون..بس احسه معجب فيني ...
ثريك مب هين يا حمد..مطيح قلوب العذارى...وحليلها اميرة ماخذه بعمرها مقلب..عيل حمد معجب فيج...خلوني اجوفه وينه روميو زمانه ...خيبه شكله سمع رمسة اميرة..لانه كان يالس على الكمبيوتر الي حذا اميره...لا والاخ كشخته متر...معقوله حمد معجب باميرة...عيل ليش يى وخطبني ...اصلا مستحيل يكون معجب فيها


كارهه عمري ...من بعد جوفتي ليوسف وانا احس انه في اي لحضه في مصيبه راح تستوي ..وصلت المكتب..جفت بوكيه ورد وينبه صندوق ...نفس البوكيه ونفس الصندوق الي طرشهم سيف لي بالمره الماضيه..طبعا ما اقولكم كشختي ..من بداية فمي لنهايته...اهم شي عندي البوكيه ..ولا الصندوق ما هامني ...بعد ما شميت البوكيه...يودت الصندوق وبديت افتحه...حصلت داخله ورقه...استغربت ..بعد ما قريت الورقه ...جنه حد كب علي ماي بارد..شو بارد..ثلج مره وحده..والله قلبي كان حاس ..انه يوسف ما راح يخلينيه بحالي ...وبعدين شو قصده بها الرساله....احس عمريه مسويه ذنب ويالسه اتعاقب بيوسف...لا ها الشي ما ينسكت عليه...لازم اقول لناصر ولا لسيف..ها اليوم مطرش رساله ...الله العالم باجر شو بيطرش...بتصل بسارة واخذ رايها..بس تلفونها مسكر..شو قصده بعد... بنفس تاريخ اليوم وبعد 10 او 9 اشهر ولا تبين بالضبط..راح تندمين على حركتج السخيفه..شو ها الالغاز .تلفوني يرن ..التلفون طاح من يدي ..بعد الكلام الي قاله سيف..مستحيل نفس التاريخ ....

سمعت صوت ....طراخ...رفعت راسي وجفت خالي فيصل ...عطى جوان صفعه ..اصطدمت ..خالي عمره ما مد يده على جوان..هاي دلوعته...سمعته يصارخ عليها ويقول
الخال فيصل : كله ولا انك تنزلين من مستوى الناس...كله ولا تحكمين على الناس من مستواهم..كله والالفاظ الدنيئه...هاي مب تربيتي ..انا ما ربيتج انج تقللين من قيمة الناس ...ويله فوق ..ما ابى اجوفج جدامي اللحينه
خالي يلس على الكرسي وهو يمسح على ويه...ويلس يستغفر..
خالي:اول مره بحياتي اندم اني ما راقبتكم بنفسي..واني خليتكم تتمادوا بمشاعركم...المفروض لمن يت تخطبها كنت احط النقاط على الحروف ..كنت ارفض على طول..وما اعطيها امل..ما هان علي نظرة الرجاء الي بعيونها ...والنتيجه..انها تباك لنفسها سواء بالطيب او بالغصب
زياد: سامحني يا خالي...خليتك بها الموقف... انا الغلطان... انا المفروض كنت امنع مشاعري من التمادي..انا المفروض ما كنت اسمح لقلبي يحبها....ما ادري نسيت ولا تناسيت اني متزوج...كان المفروض اسمع الكلام وارد البلاد من زمان...بس يا خالي ها مب بيدنا (اشرت على قلبي) ..ما نقدر نتحكم عليه ...متوهق يا خالي ..شور علي ..انا بين حبي لجوان ..وبين اني ما ابى اظلم جوري ..فلو اخترت جوري...معناته اني بتخلى عن جوان..يعني بتخلى عن قلبي ..عن قطعه مني ..لانه قلبي ملك لجوان ...هي الي متربعه العرش فيه ...كيف اتخلى عن الهوا الي اتنفسه...عن الي خلتني احب الحياة واستمر فيها...عن الي خلتني اوصل للي انا فيه اللحينه ....صدقني يا خالي ما بضمن عمري اني راح احبها في يوم من الايام... وطول عمري بحس اني اخونها ...واذا تركتها بحس اني خنت الامانه ..خنت وصية ميت ..ما اقدر اخليها تحس عمرها وحيده وهي اصلا وحيده ....بحس طول عمري اني ظلمتها وخليتها تواجه ها الدنيا الصعبه بروحها..وتواجه كلام الناس الجارح وحدها ..بتركها جسد بلا روح...
سكت لمن سمعت تلفون خالي يرن ...سمعته يقول ...جوري ربع ساعه وبكون عندج...شو تبى جوري من خالي...شو قالت ..خلى ويه خالي يستوي جي ...


موعدنا يوم الجمعه..باذن الواحد الاحد

الجزء العشرون:

يالسه جدام المرايه وامشط شعريه...يبالي اقصه مليت منه ...بس ياليتني اقدر ..امايه موصتني ما المسه على قولتها انه الشعر يخاف من المقص فاذا قصيته ما راح يطول مرة ثانية ...عاد ما خرافات ...يا الله منو الي يصدق انه مر على ييتي للندن سنتين...مرت علي ايام ما كنت اتخيل اني بقدر اكمل الحياة من بعدها...لولا خالي فيصل واسوم ..ولا انا حتى الماستر مب كنت ناويه اكمله ...سمعت اسوم تصارخ ..
اسوم:جوري..جان ما ييتي تاخذي حور ببيعها
جوري:بيعيها جان ما بعتج قبلها
اسوم:جوري ما غيرتي رايج..عطيني اياها..يا ناس فديتها
جوري:تشطري وعرسي ويبي مثلها
اسوم:على حطه ايدك يختي
ايوا ..الي في بالكم صج..حواري..بنتي...دنيتي... حياتي....علشانها كملت الماستر.. صح بالبدايه زعلت ويلست اصيح اخر شي كنت اتوقعه اني اطلع حامل .اتذكر لمن رحت العياده ..واول ما قالت الدكتورة حامل..يلست اصيح ..يلست الدكتورة تهديني وتقول لا تصيحين شكلج مب متزوجه وقالت مب مشكله بسويلج عملية اجهاض ..ولا جنه شي صار..بققت عيوني عليها..الحمد لله والشكر على نعمة الاسلام بس..ضليت اسبوعين بغرفتي ما طلعت منها ابدا..واسوم كانت تحاول تتطلعني من الي كنت فيه..يلست تقولي ..ربج رازقج بنعمة غيرج يتمناها ..يدفعوا الي وراهم والي جدامهم علشان يكون عندهم بيبي...وبعدين انتي دوم تقولين انج وحيده ربج عطاج بيبي يكون هو كل اهلج..صدقيني ما راح تعرفين قيمتها الا لما تجوفينها جدامج ...هي الي تخليج تحبين الحياة ...تسوين المستحيل علشان تجوفينها تبتسم...تعرفين يعني شو الواحد يكون عنده هدف ..غايه..يحس الحياه حلوة..يحس انه وقت التشاؤم راح وولى...وانه لازم يعيش بالدنيا علشان سعادة احبابه...وبالفعل حواري هي الي كنت اباها ..هي الي خلتني احب الحياة ...هي الي خلتني اجوف الدنيا بمنظور ثاني....بمنظور يديد..منظور الام..الي مستعده تسوي ..اي شي..اي شي..علشان ظناها يحس بالسعادة...
سمعت تلفوني يرن ..عرفته خالي فيصل ..مسوتله رنه خاصه..ربي يحفظك ويطولنا بعمرك..لازم يوميا يتصل ويطمن علينا...ويحن علي ارد ..بس انا مستحيل ارد لندن ..ما اريد ادمر حياة زياد والجوهرة...اتذكر في اليوم الثاني من كلامي مع خالي اتصلت فيني الجوهرة وطلبت تجوفني ...يلست تقولي عن حبها لزياد وعن حب زياد لها..ويلست تترجاني اني اطلع من حياتهم...لا مب ضعف مني ..اني انسحبت من حياته..بس هو كان الحل الصحيح..هو الوضع الصحيح ..وجودي في حياة زياد من البداية كان غلط... انا اصلا ما جفت زياد بعد اخر مرة يى عندي الشقه وطلبت منه يطلقني ..هو ضل مصر انه ما يطلق..وانا ضليت مصره اني ما ارجع له ..وخالي كان المتورط وسطنا ..اتذكر محاولاته انه نرد لبعض..كل ما كنت اجوف على ويه اعرف انه دايس على قلبه ..ما يبى يظلمني ولو على حساب سعادة بنته....وبعد اسبوع قررت اني اسافر لمنطقه غير عن لندن اكمل فيه الماستر ...الحمد لله انه الدراسه كانت باديه من شهر ..سرنا انا واسوم لانها حلفت انها بتكون معاي باي مكان اروح..رحنا بالجامعه بالمنطقه الثانية وكلمنا المسؤول عن الماستر ..والحمد لله كان في مكانين شاغرين ....سبحان الله ربي لمن يسكره من صوب يفتحه من صوب ...طبعا زياد لما عرف بقراري ..حشر الدنيا ..وقالي مستحيل اطلقج ومستحيل اخليج تسافرين لمنطقه ثانية من غيري..بس انا رحت لخالي لاني اعرف تاثيره على زياد ...ترجيته انه يطلب من زياد يطلقني ..كان اصلا من المستحيلات اني استمر معاه من بعد المكالمه ومن بعد ييت الجوهرة لي...زياد حاول جم مره ييني الشقه بس انا ما كنت افتحله الباب ..وجم مره ياني الكليه بس انا كنت اتهرب منه ..ما ابى اجوفه..ما ادري اذا هو ظلمني ولا انا الي ظلمته ..قلبت حياته فوق تحت....بس الي اعرفه اني من البداية ما كنت لزياد..وهو ما كان لي...فتركت الجمل بما حمل على قولتهم...اتذكر اليوم الي يى خالي لعندي وقالي انه زياد يقولي سافري يمكن نفسيتج تتعدل ويمكن تعيدين حساباتج وتعقلين ...قلتله خالي استحلفك بالله اطلب من زياد يتركني بحالي ..قوله اذا على وصية ابوي محمد فانا اعفيه ...ولو ابوي محمد كان مويود..جان مستحيل يخليني على ذمته وانا ما اباه ...بس هو رفض يطلقني ..وجم مره يى لعندي بالمنطقه الثانية بس نفس الشي ما سمحتله يجوفني ولا يكلمني...مب لاني ما اقدر اواجه او حتى اني اضعف وارد له..لا زياد ما كان له تاثير قوي علي..احنا اصلا ما مدانا يكون للواحد تاثير على الثاني ..كل الي عشته مع زياد يومين...بس انا وايد ممتنه له لانه عطاني شي عوضني عن كل سنين الحرمان الي عشتها عن اهلي الي انحرمت منهم ..عطاني حواري...يا فديت روحها ..تصدقون انها مب ماخذه مني غير عيوني ..ولا هي كوبي بسيت من ابوها ...يبتها بالشهر السابع ...اسوم تقولي اكيد طلاقج من زياد هو السبب ..لانه اليوم الي ربيت فيه هو اليوم الي طرشلي زياد ورقة طلاقي ...بس انا كنت متوقعه اني بربي بالسابع لانه الكتورة الي كانت مشرفه عن حالتي قايلتي قبل انه لازم اسوي عملية ربط ...طبعا حور ضلت بالمستشفى ...وانا رديت البيت بعد يومين...وكنت طول اليوم اروح ايلس عندها ...وبعد ما استقرت حالتها ..يعني بعد جي شهر رخصوها ...خالي ضل اسبوعين معانا وما رضي يخلينا بروحنا ..حتى انه الاسبوع الي بعده ياب حرمته معاه...ضلت معاي اسبوعين ..لاني ما كنت اعرف اتعامل مع بيبي صغير ...

الله يهديج يا سارة ...ناويه تدمرين بيتج بايدج...توه ناصر ظاهر من عندي..والله اني راحمه اخوي..حالته حاله من بعد ما سارة سارت بيت اهلها وخذت يمان معاها ..خسفه ناويه تضيع كل شي من بينهم..جم مره افهمها انه ناديه وشيخه يبونها من الله ..فلا تعطيهم الفرصة بس اكلموا منو سارة...كله تقول اكيد ناصر يحب نادويه ..وناوي يخطبها ...وتقول هي بروحها جافت اكثر من مرة ناصر واقف عدال بيتهم ..يكلم امهم...لا وتقول انه شيخه جم مره مورتنها فيديوا ناصر يكلم ناديه...وعلى قولتها انها اخر مرة جافت ظرف على مكتبها ..فيه صور ناديه وناصر وام ناديه...يالسين بميلس بيتهم..وهو ميود يد ناديه..طلبت من عندها تيب الصور واجوفهم اكيد تركيب... تقول انها ما حصلت الظرف بجنطتها...مستحيل ناصر يسوي جي... ..قلتلها ها شغل شيخه ما يبالها ذكاء ...بس شيخه ضلت تحوم وتذن على راسها ..لحد ما قررت في يوم من الايام انها تروح بيت اهلها ..يمكن تتعدل نفسيتها ...جم مره كنت ناويه اقولها انه ناصر اذا تخلى عن حب حياته علشانج ..فايشقايل يخطب ناديه..بس ايود لساني باخر لحظه ...اتصلت عليها ..وقلتلها ابى اجوفج بالكوفي شوب ...وينها هذه لازم تتاخر بروحي مب طايقه نفسي الي فيني مكفيني ...القاها من وين ولا من وين بس...هذه وصلت ..
ميعاد:واخيرا تشرفتي ..اخت سارة
سارة:شو اسوي ..يمان خبلبي
ميعاد: فديت الطاري..يا اني متوله عليه حدي...حرام عليج الي تسويه يا سارة ..مب زين تحرمين ولد من ابوه...والله لو تجوفين اشقايل ناصر ضعفان ونفسيته تعبانه ..بترحميه
سارة: انتي اكثر وحده تعرفي شو ناصر بالنسبه لي...والله اني مشتاقه له...مشتاقه لصوته...مشتاقه لطيبته ...بس يا ميعاد احس نفسيتي تعبانه ..لازم ابعد ..اخاف اجرحه يا ميعاد...
ميعاد:اذا مشتاقه له..ليش ما تردين ..وبعدين معقوله تشكين بناصر..معقوله بعد كل ها السنوات ما تعرفين ريلج..ما تعرفين مقدار حبه لج
سارة:انا متاكده بحبه لي..مثل ما انا متاكده بحبي له...بس انا تعبانه يا ميعاد..احس نفسيتي واصله للحضيض...
ميعاد:جوفي ...امس طول الليل وانا افكر بوضعكم...ويا ببالي خطه نسويها ..صدقيني من بعدها ما راح تجوفين ناديه ولا شيخه مرة ثانيه
سارة:ريحي قلبي..الله يريح قلبج وبالج يا ميعاد..ويبعد يوسف من دربج
ميعاد: لا تذكريني يا سارة...انا لحد اللحين حاسه في شي راح يستوي الشهر الياي
سارة:ترى في شي حلو راح يستوي ..راح تعرسين
ميعا:سارة عن السخافه...انا لحد اللحين الموضوع مب داخل براسي..انا بعد ما قلت لسيف عن رسالة يوسف...اليوم الثاني يى ويه كله جروح ولمن سالته قال انه تضارب مع يوسف...بس كلام يوسف غريب..يقول الشهر الياي ..راح تنصدمين صدمة عمرك..وراح تبوسين يدي علشان اخذج....
سارة:خليه عنج يوسف..تدريبه من ايام الجامعه وهو خريش...وكلامه كله شرا ويه
ميعاد:الله يستر يا سارة


اف تعبت منها احسها ياهل ..الي تباه لازم اسويه ..واذا ما سويته معناته تزعل شهر ..ومن غير تفكيري يمين وهي تفكيرها يسار..ماشي توافق من بينا ...كله تبى تفرض رايها ..احسها بس تبى تعرس باي شكل من الاشكال علشان تهرب من سجن ابوها...وما عندها سالفة غير ..اختي تغار مني ..لاني انخطبت وهي الجبيرة ..ما ادري اشقايل تقول جي عن اختها...كل ها ببلعه بس سالفة يدتها ...هذه قويه..تقول انها ما جافت يدتها من سنه ..وانها كل ما تي بيتهم يروغوها..شو ها العايله الغريبه ...في ناس جي بالهدنيا ..الله يعيني عليج يا اميرة...توني داش البيت ..يا دوبني مسكر باب الحوي..الا واسمع الجرس..اف ما فيني ارد وافتحه...اول ما بطلت الباب ...تتوقعون منو الي كان عند الباب ..ايوا ..جمان...الله يا جمان مهما قلت الكلمات ما راح توفي شوقي لج...مهما قلت لج وبكل لغات العالم ..اني احبج ..بعده ما راح يوفوا بالي بداخلي لج ....ياما حاولت انساج ..ياما حاولت احذف كل اوراق الشعر الي كتبتهم عنج ...بس ارد اكتب لج مرة ثانية ..ليش سويتي جي جمان...لحد اللحين مب راضي اصدق ..المشكله اني جفت الدليل بعيني...

اتصلت على ناصر ..وبلغته برفضي ..ما ابى اعرس ..الي ياني من حمد ....ومن ربيعه كرهني بالريايل ..اكرهم كلهم..اذا حمد الي متربيه معاه من وانا صغيره ..يشك فيني ..اشقايل اثق بغيره من الريايل...ليش جي نياتهم خايسه...ليش ما يصدقوا يسمعوا شي عن البنيه يصدقونه ...وليش الكلام الفاضي والي يمس السمعه حتى وان كان غلط ينتشر بسرعة البرق....في شي اسمه بالدنيا ستر...الله يسامحك يا حمد ..ما همني حد ..ولا همني الي قاله ربيعك خليفه عني..ولا الي تبلاه عني..الي قاهرني انك صدقته...انت يا حمد اخر شخص بالويود كنت اتوقع تصدق الي انقال عني...اي اكتشفت اني احبه ..مب بس احبه الا اموت عليه..بس خلاص شو الفايده...كل ما اتذكره..الدموع تتيمع بعيوني ..مشتاقتله ..ما جايفتنه من بعد الي صار ..ومن بعد ما ودرت الجماعه...اتصلت علي خالتي ام سالم تبانيه اسري صوبهم تقول ريم تباني..علني فداج يا ريم ..هي الوحيده من ربيعاتي الي ما تخلوا عني ..بالرغم من طلب حمد لها انها تتركني ..بس هي قالتله اذا انت صدقت الي سمعته ..انا مستحيل اصدق شي شرا جي عن جمان...يا ربي اشفيها ..يا رب ردلها صحتها..يا رب..هي بعد 5 اشهر من عرسها مرضت كثير ... عمران وسالم وسعود ما بقوا مستشفى ما ودوها..صح اني تفاجات بردة فعل سعود ما توقعته بيهتم فيها..لانه ريم وايد كانت تجرحه..بس الي اصله طيب ينبان وقت الشدايد..وهو بان معدنه ...ما ادري ليش عندي احساس انه عمتها مسوتلها عمل...جم مرة نصحتها طلعي من بيت خالتج مالج فيه حايه سكني بروحج بشقه..بس ما خذت بنصيحتي...الاسبوع الماضي سارت العمرة ...ومن بعد ما ردت مرضت زياده..خالتيه ام سالم تقول انها كانت تدعي في العمره اذا فيها عمل يظهر ...وصلت صوب بيتهم ...بس اول ما جفت الي عند الباب ...حسيت ان الزمن توقف ...حسيت ما حد بالدنيا غيرنا ...حسيت عمريه كنت مريضه واللحينه بس شفيت...حسيت عمريه كنت مضيعه روحي واللحين لقيته....ييت اتكلم بس حتى الكلام ضاع ...صوتي راح..وحسيت ويهي يالس يتبلل بس ما ادري من وين يالسه تي المايه ...رفعت اديني الي يالسه ترتجف امسح فيهم عيوني...سمعت صوت خالتيه تهلل وترحب فيه..قلت جمله وحده لحمد وظهرت بصعوبه بعد..حسافه يا حمد حسافه...وطوفته


الله يعينا على الي احنا فيه ..نزلت الصاله وجفت سعود يالس يقرا على ريم ...يا سبحان الله منو الي كان يتوقع كل ها يطلع من سعود...ما نعرف شو ياها ..ما كان فيها شي ..بس فجاه تعبت علينا ...لمن ودينها المستشفى ومن بعد الفحص قالوا انه عندها القولون ..وانه بسبب نفسي ..هي صابها حالة اكتئاب شديده من شهر ..بس هي مب راضيه تتكلم..حتى عمران ما تكلمه....يلست حذاها ...سالت سعود عنها ..قال شرا ما هي...جفت امايه يايه...جافت على سعود بنظرة يعني قوم من عند بنتيه...ما ادري سعود اشقايل مستحمل عيوزنا لو انا بمكانه..مستحيل استحمل او اي بيتنا....نفسي اعرف سبب كره عيوزنا له...سعود ما قال اي شي ..طلع من البيت ...
سالم:ليش جي
ام سالم:شو بعد ليش جي
سالم:ليش تكرهينه
ام سالم:وليش احبه...اقول قوم توكل ..جمان يايه
سالم:ان شاء ...بسير صوب بيت خالتيه ...متصله تبى تجوف سلطان
ام سالم:تراك مسود الويه..مب زين عليك..متى اخر مره سيرت صوبهم
سالم:شو اسوي...كل ما سرت صوبهم ..وهي ما عندها رمسة غير ميرة سوت جي ..وسلطان يحب ميرة وما ادري شو
ام سالم: وانا اشهد انه ميرة شيخه البنات...
سالم:ما قلنا شي..بس انا ريال مرتاح جي....حايه اماره ام سالم ...
ام سالم:هي ..وافق على ميرة
سالم:يا ذا الطاري الي مب راضي ينتهي...اقول عيوزنا ..انا بسري صوب بين قوم ناصر..اكيد سلطان عند امه ميعاد
ام سالم:شو ذا المنكر بعد..انت اشقايل ساكت عليه..علمه عيب يزقرها ماما
سالم:خليه على راحته..ما صدقنا تغير..ورد شرا اول


سمعت اسوم تصارخ بصوت عالي ...قبلونا ..قبلونا ...يخس ابليسج يا اسوم...بتصحين حور ما صدقت انها رقدت...
جوري:مسودة الويه ..خفي صوتج ما صدقت حور رقدت
اسوم:خلها تنش..اشتقتلها
جوري:مداج
اسوم:يختي حرام ..ام واشتاقت لبنتها ..فيها شي
جوري:وانا اشهد انج امها...المهم شو في
اسوم :قبلونا بالشركه..يعني بنرد بلادنا

ابتداء من الاسبوع الياي راح انزل جزء واحد وراح يكون بيوم الاربعاء...بسبب ظروف خاصه ..موعدونا يوم الاربعاء باذن الله

مرحبا الساع...............يتكم بعد طول غياب..وأول ما خلصت البارت قلت انزله ما هان علي اخليكم تنتظروا اكثر...
الجزء (21):


توني راده البيت...على الله تنفع الخطه...ويردوا سارة وناصر شرا قبل..ما يهونوا علي اجوفهم جي..اغلى اثنيه على قلبي...سارة ربيعتي الروح بالروح..مستحيل انسى مواقفها معاي ايام الجامعه...وناصر مب بس اخويه..هو الي تحمل مسؤليتنا من بعد وفاة ابويه ...سمعت صوت مسج..بطلته ..وجفته رقم دولي عرفته على طول سيف..ياني متولها عليه ...هانت يا ميعاد هانت باقي كمن يوم ويرد....ما ادري شو الي حادنه يسافر لامريكا ...شو يبى بالخبره وما ادري شو..تراك تقدر تكسب الخبره هنا في بلادنا....بس شو نقول..على قولته ..اي معاي شهادة خبرة من امريكا ..غير انه يكون عندي شهادة خبرة من بلادنا..شخصيا ما اجوف فيها فرق...لا من ناحية الدراسه..ولا من ناحية الشغل....ولا من ناحية الخبرة...يعني شو الفرق ترى الخبرة تي مع الممارسه ....في النهايه هي قناعات والواحد ما يقدر يغير قناعات غيره..بس في النهايه ..الاختلاف بالراي لا يفقد من الود قضيه..بس وايد طول هو قال انه بيلس هناك سنه وبيرد..بس اللحينه مر اكثر من سنه...ولما سالته يقول..انه وايد مستفيد من القاضيا الي يعطونه اياه...وانه يالس يكتسب خبرة..ويقول انتي ليش جي مستعيله على العرس..ولمن قال جي احترق ويهي..اصلا انا متى قلتله رد علشان نعرس..شو مضيعه المذهب انا...من بعد كلامه سكت ..ما فيني يرد يقول اني مستعيله على العرس..بس صراحة سنتين ملجه وايد..انا ما ادري جوري اشقايل استحملت كلام الناس..انا بس امس سمعت ام سالم تقول لجمان ...جنه اختج الا عايبنها سالفة الملجه..وتضايقت..اسميني الاوادم مب مخليني الناس في حال سبيلها..يختي وانتي ويش عليج....

شكلي بقطع اجازتي وبرد اداوم...البيت من غير سارة ويمان...جنه مسكون ..جنه ظلام...جنه نوره ضايع...يا الله يا سارة لو تدرين بمقدار حبي لج جان ما سرتي ببيت اهلج...جفت ميعاد يالسه تشرب جاي..ميعاد وحدها سالفتها سالفه...عيل حد ملجته يستمر سنتين..وكل ما اسالها تقول لمن يرد سيف بنعرس..ودامه الاخ عارف انه بيطول جي بالبلاد ..ليش ما عرس وخذاج..بس شو نقول ..بعد ما اقدر اعق اختيه عليه...بديت اشك فيه ها الريال...كل ما اتصل عليه اجوف تلفونه بيزي...يقول انه بالشغل..شو ها الشغل الي على مدار اليوم...شو نقول بس ..يله صبرنا سنتين ..بنصبر الشهر الياي...صدق ما كذبوا لمن قالوا البنات امانه لحد ما يعرسوا...
ناصر:يا الزطيه ..شو فيها يعني لو يبتي جاي لخوج
ميعاد:بسم الله ..تحمحم..قول شي ..حشى على طول..تبى جاي
ناصر:جفتج سرحانه..قلت اخرب عليج..رحمي ذا العقل شويه هلكتيه من كثر التفكير
ميعاد:اذا انت ريحت عقلك من التفكير...بعدين بريح عقلي
ناصر:وانا عقلي ما بيرتاح لحد ما سارة ويمان يردوا البيت
ميعاد:ان شاء الله جريب..ازمه وتعدي
ناصر: اللحين شو الغلط الي سويته ....الي خلى ربيعتج ..تهج من البيت
ميعاد:ناصر اي حد لو بمكانها جان سوت الي سوته
ناصر:ميعاد خلج عاجل...بالله عليج حد يسوي سواتها...ايميلي تجيكه مرتين باليوم...حتى ماسنجري ما راحمتنه..تسجل دخول باسمي علشان تعرف وي منو ارمس...موبايلي على مدار اليوم عندها..اذا وصلني مسج لو كانت هي بالمطبخ..تجوفينها يايه ركض..تقولي مصيبه مستويه..بس علشان تعرف المسج عند منو...ومن غير جم مره يايه المستشفى على اساس انها مريضه..وانا فاهم عليها..بس مطوفنه بمزاجي مكبر راسي وماخذنها على قد عقلها...والسيارة تفتشها ...شو ها الوسواس الي فيها ...بس توصل انها تشك باخلاقي لا والف لا ...عيل في وحده عاجل تقول لريلها جفت صورتك وانت ميود يد ناديه بميلس بيتهم...شو قالولها عني مضيع المذهب...ادش بيوت ما فيها ريايل...وين العقل اللحينه...
ميعاد:يا ناصر...انا ما اقول انها مب غلطانه..بس عذرها انها تحبك ...بس انت بعد يا ناصر الله هداك..ليش وايد تسير صوبهم
ناصر: اي واحد لو كان بمكاني راح يتصرف نفس تصرفي...حرمه جبيره بالعمر مستنجده فيني ..اطنشها ..وين الشهامه ..بعدين انا من عند الباب اكلمهم عمريه ما دشيت داخل بيتهم..
ميعاد:قلت بصوت واطى..والله انكم مقصه يا ريايل...بسهوله ينقص عليكم..قلتله بصوت عالي:بسالك شي حرامي يدش بيوت الاوادم من غير ما يكسر الباب ..شي ما يدش العقل
ناصر:يا ربيه من ذي السالفه الي مب يايه تنتهي..جم مره تقولكم الحرمه..انهم مب متعودين يقفلوا باب المدخل
ميعاد :بالله عليك اللحينه ها كلام منطقي ..جي حنا وين عايشين...زمن العريش والفانوس...وبعدين هي ليش اصرت انك انت الي تعالجها ..لما ارتفع عليها السكر ...
سمعنا صوت الباب ..وجفنا جمان يايه..عاد هاي مب بس قصه ..هاي روايه بكبرها...

جوري:يله اسوم تاخرنا..شكلها الطايره بتروح علينا...ما ادري هاي البنت متى تترك هاي العاده...
جفت حور تحبي ...وتقول ماما للاسوم
جوري:شو تبين اكثر عن جي..صرتي ام من غير تعب
اسوم:حلفي من غير تعب..ومنو الي كانت تسهر اليالي ..وانتي عندج امتحانات
جوري:علني فداج يا اسوم...والله انج اكثر من اختي..اكيد ربي يحبني..لمن عطاني اخت شراج
اسوم:احم ..احم..اخجلتم تواظعنا
جوري:عن تنتفخين بس...
سمعنا حور ..تقول ..حواوا
جوري:زين جي مخربه البنيه...
اسوم:خليها تعيش حياتها...
جوري:المهم خلصي خالي ينتظرنا بالسيارة...
نزلنا تحت ..وجفنا خالي وحرمته يالسين ينتظرونا .وطبعا حور اول ما جافت خالي ...يلست تناقز ..تبى خالي يحملها...وخالي فيصل على طول شالها ويلس يبوسها...
الخال فيصل:جوري شو رايج تتوكلي..وتخليني حور عندنا
جوري:مستحيل اقدر اعيش من غيرها...هي عيوني الي اجوف الدنيا بيها
وصلنا المطار ..وطبعا حور ما بقت ريال بالمطار ..الا وناقزت جدامه تباهم يشيلوها..على قولة اسوم ..مفتقده حنان الابو...اول ما خلصنا الاجراءات ..ويت اسلم على خالي فيصل ..جفت زياد وجوان..وحور طبعا اول ما جافت ابوها..يلست تصارخ بصوت عالي ..مب جنها كانت عنده قبل اسبوع....سرت صوبهم...
الخال فيصل:ما غيرتي رايج...
جوري:فديتك خالي... لا تصعبها اكثر من هي صعبه...
زياد:جوري ممكن ...اباج بكلمة راس
زياد: هاي اول مره اجوفج من بعد انفصلنا..او حتى قبل ما ننفصل..مب ياي اسالج ليش طلبتي الطلاق مع اني لحد اللحين ابى اعرف السبب .بس النبش بالماضي ..ما راح يعيده...بالعكس بيزيدنا مواجع ... انا اسف على كل الي صار...اسف لاني خليتج كل ها السنين معلقه...وفي النهايه تركتج...صدقيني مب كنت ناوي اتركج..مب كنت ناوي اخليج تواجهين ها الدنيا بروحج...حاولت اني افهمج ..مب لازم نحب بعض ..الاحترام يكفي علشان اي حياة تستمر..بس انتي كنت تتهربين مني...ما رضيتي تسمعين لي..اهم شي اللحين حور ...ما ابى احرمج منها ...بس بنفس الوقت ما اباها تكون بعيده عني...يالس افكر ارد البلاد...تعبت من الهروب ..ابى استقر ...وسكت... ها اخر نداء للطايرتكم...بينا اتصال..ان شاء الله..اول ما انزل البلاد...
جوري:زياد عندي امانه لك...كنت ناويه اعطيه لخالي ..يوصلك اياه ...اول ما تفتحه راح تعرف سبب طلبي للانفصال...
كنت ناويه اقوله عن اتصال الجوهرة ...لانها اتصلت علي بعد عرسهم باربعة اشهر ..تبشرني بحملها...ويلست تعيد نفس الكلام الي سمعته اول مره...قلتلها انا لما طلبت الانفصال..طلبته وانا مقتنعه فيه...مب يايه ارد لزياد مره ثانيه..والله يهنيكم ببعض...بس غيرت راي ...يعني شو الي راح يتغير لو قلتله..بالعكس بيب مشاكل من بينهم....شو ذنب الطفل الياي ..يعيش بوسط مشاكل..

تعبت من الدراسه ابى اتخرج...ابى اشتغل ..مليت من مجتمع الجامعه ومن نظرة الناس لي...تقولي جنهم جايفين شي نيس....جفت ميعاد وناصر يالسين بالصاله...اشتهيت جاي .يمكن يتيت ذا الراس
جمان:ابى جاي
ميعاد:شو ها..الاخت شرا اخوها..لا سلام ولا شي..ابى جاي
ناصر:يا علني فدا ذا الويه ...صبيلها جاي.حيى الله جمونتي الدلوعه..
جمان:هاك اول جمونتي الدلوعه
ناصر:جمان ..ما تجوفين انه الوقت المناسب علشان تقوليلنا شو استوى من بينكم
جمان:ارجوك ناصر..وغلاي عندك..ما ابى اتكلم بهاي السالفه...تعبت منها ابى انساها
ناصر:الي يريحج..بس اذا بغيتي حد يسمعج فانا حاضر
رميت نفسي بحضنه ..ناصر انا تعبانه ..مب قادره استحمل....ضايقه علي الدنيا بما وسعت ..مب قادره امثل زياده...ابى امايه ..ابى حضنها...امايه وينج..تعالي جوفي شو صار ببنيتج...امايه مب راميه استحمل نظره الناس لي ..امايه الدنيا وايد سارت جاسيه من بعدج....الناس سايرين جاسين...كانهم بس يدورون الزله للواحد...صايرين علشان يلهون نفسهم وينسون مشاكلهم يراقبون الناس ويدورولهم الخطيئه..وما هامنهم اذا كان صح ولا غلط ..اهم شي لمن يجتمعوا شي سالفه تشغلهم ويناقشوها..نسوا انه من ستر مسلم ستره الله يوم القيامه..صايره اعراض الناس لعبه بيدهم..نسوا انه كما تدين تدان..وانه العيبه عند الباب...شبابهم صايرين شرا حريمهم...ما عندهم قضيه..كل مشاكل الدنيا حلوها..خلاص فلسطين تحررت...والاسلام انتشر ...
ميعاد:فديتج جمان..بس حبيبتي ..ماحد يستاهل دموعج..مسحيهم
ناصر:خليها تصيح..خليها تظهر الي بداخلها...كل ها مخبيتنه عن اخوج...
جمان:ههه.. ما فيني شي..بس كنت متضايجه شويه...وشكلي تفلسفت عليكم
ميعاد:كل ها وما فيج شي...عيل لو فيج شي شو تسوين
ناصر:جمان ...ما ابى اجبرج على الكلام..بس حطب ببالج..ما حد يقدر يسكت حلوج الناس...حتى لو الوحده كانت محافظه على نفسها..وسمعتها الطيبه تسبقها..وعايشه معاهم بالسنين...اذا بس سمعوا عنها شي ...ومن غير حتى ما يتاكدوا منه ... يجوفوا عليها بنظره انها وحده نيسه. ..وحده عايشه حياتها من غير حسيب ولا نسيب...فيا حبيبة اخوها ..لا تهتمي لكلام الناس...وامشي وسطهم وانتي واثقه ..ورافعه راسج فوق..انتي مب اي وحده انتي اخت ناصر...احم احم
ميعاد:احلف انت بس..احلف..وانا شو بنت البطه السوده..كل ها لجمان...وبعدين شو ذا المنكر..انتي مب اي وحده انتي اخت ناصر...ماخذ على عمرك مقلب
جمان:اخويه بيترفع عن الرد عليج..انا الي برد...الي فيه حره ..يطلع بره...وطلعت لساني
ميعاد:مسودة الويه ..تطرديني...وبعدين متى تودرين هاي العاده..يا ماما خلاص راحت عليج..كبرتي
طلعتلها لساني مره ثانيه..وسرت فوق ..اريح


ما بغت خالتيه تودرني...يبالي ادور عريس لميرة..يمكن برتاح ...ما استوت حاله هذه...كل ما سيرت صوبهم ميرة..وكل ما يلست مع عيوزنا ..ماشي سالفه غيرها...وصلت مكتبي ...اكتملت المكتئب هنا..
سالم:يا اخي نفسي مره ادش مكتبك واجوفك مبتسم...يا اخي ابتسم في وجه اخيك صدقه
سعيد:ويش عليك مرتاح...
سالم:احسدني..لالا..احسدني ..بالمره
سعيد: خيبه...مستوى شرا الحريم...
سالم:شو اسوي..من كثر حنتهم فوق راسي..ما علينا..شو يديدك
سعيد:اسكت يا سالم..عيوزنا محتشره علي...تبى بنت عميه..تقول ابى اجوفها قبل ما اروح عن الدنيا..توني ياي من عندها...تقولي لا تي تزورني من غيرها...اللحينه هاي من وين ايبها..حتى ما اعرف هي باي دولة..اشقايل ايبها
سالم:لا حول ولا قوة الا بالله...والله هاي البلشه

انا لحد اللحين مستغرب من سعود ..حياته كلها شغل...حياته مبهمه وجامده..احس حياته فيها سر ...ومخبينه علينا...شرا شقته ..جامده...رسميه..ينقصها حس انثى...احس عمري تعبان مب تعب جسدي كثر ما هو تعب نفسي...توني ياي من صوب الجامعه ...واخيرا تعدلت ميزانيتهم ...المفروض انهم يطرشون اكثر الجماعات نشاطا وتميزا ...لكورس بره الدوله ..طبعا حسب تخصص كل جماعه..وها الكلام المفروض قبل سنتين..بس على كلامهم انه شي استوى واثر على ميزانيتهم ..وبما انه جماعتنا هي الي فازت بالمركز الاول ...فهم ناوين يطرشون اعضاء جماعتنا...سمعت صوت الباب ...ودش سعود وعلى طول تسدح على الصوفا..شكله تعبان ...
حمد:سعود..شكلك مريض
سعود:مب مريض ..بس مب راقد من يومين
حمد:وليش جي
سعود:هايس بالشغل
حمد:جوف اذا انت بايع روحك...فاحنا نباك
سعود:لا رد
حمد: يا خي نفسي في يوم ن الايام اجوفك تضحك من قلبك...
سعود:وانا نفسي اجوفك حمد الاولي..حمد قبل سنتين..حمد الي الضحكه ما تفارق ويه...
حمد: اه يا سعود..يبتها على الوتر الحساس...ضربتني بالصميم ...اشقايل اضحك...والي كانت سبب ضحكتي راحت... تصدق ..اسعد لحضه بعمري ..هي اللحضه الي اكتشفت فيه انه جمان تحبني..حسيت حلم حياتي تحقق..حسيت اني اسعد واحد بالدنيا...حسيت اني ملكت الدنيا ... لحد اللحينه اجوف صورتها جدامي وهي معصبه على اميرة...حتى كلهم الي كانوا بالقاعه لفوا صوبها...وهي احترق ويها ..بس تعرفها طول عمرها عندها قدره غريبه على التحكم على الوضع و التحكم على مشاعرها...ولما سالتها شو مستوي ..صرفتني وقالت سوالف بنات ...وسمعتها تقول للاميرة..رحمي عيونج ..من الصبح وانتي تطالعين على حمد... بس يا فرحة ما تمت على قولتهم ... بنفس الاسبوع ضاع كل شي....لحد اللحين مب مصدق الي جفته ...ومستحيل اسمح لحد يتكلم عنها بشي ...بس شو الي ياب جمان لخليفه..تعبت من كثر التفكير..تعبت وانا احاول اربط الموضوع....تصدق لحد اللحين الي هنا واشرت على قلبي..مب راضي يصدق الي جفته...وانا تايه بين الي جفته وبين قلبي...بس يا سعود انا جفت ثلاثه ادله...كان اخر يوم لاسبوع التصوير...كان عندنا امسيه ..والامسيه خلصت ساعه 7 ..كلهم الي بالقاعه ساروا بيوتهم ..وانا كنت اخر واحد طالع ..سرت صوب غرفة الجماعه...حتى ما اتذكر شو الي وداني هناك...وجفتهم ويا ليتني ما جفتهم...كانوا واقفين بالممر ..خليفه كان ميود يدها...كانت لابسه نفس الشيله ما ادري اللحاف ..الي شريته هديه لها على اساس انها هديه من عند ريماني...واتذكر اشقايل ريم احتشرت لمن قلت لريم انا شريته لجمان..لانه الشيله سالفتها سالفه..تعرفها ريم ...ما تحب حد يكون عنده شرا اغراضها..اتذكر راعيه المحل العيوز ..شرهت علينا وبطلوع الروح عطتتها الشيله..لانه على قولتها ها ياي شرا حزام مب لحاف.. بس ريم وراسها الف سيف تاخذ الشيله من غير الفستان..والعيوز تقول ها مب لحاف ها حزام...تصدق اني دفعت دبل السعر...بس لانه ريم قالت ...جمان بتموت على ها الالوان وبذلها...كانت لابسه نفس الشيله وهي واقفه مع خليفه...ولمن رفعت يدها ...مستحيل اتوه عن الساعه الي كانت بيدها شرا ساعه ريم انا كنت معاهم لما شروها... ولما جفت الخاتم ..حسيت الاكسجين خلص...حسيت نفسي كنت بسابع سما ونزلت لسابع ارض ...كنت عايش بدنيا ما فيها غيري وغيرها وفجاه انهار كل شي ...الخاتم انا الي مسوي ديزاينه ...على اساس انه حرفها بس هي ما انتبهت ..كان حرفي انا وسويت لريم حرفها ..بمناسبة تخرجهم من الثانويه ..لانه بين حرفي وحرفها نقطه.. ولما زقرتها باسمها..ركضت وكنت ناوي الحقها ..بس خليفه زخ يدي..عطيته بكس ..وقلتله ..انت شو يالس تسوي معاها ..وشو الي موقفكم هني وحدكم..وليش كنت زاخ يدها..كنت اصرخ عليه..وكورت يدي مره ثانيه علشان عطيه بكس..بس هو قال ..احنا نحب بعض ومن زمان...مستحيل ..اصلا جمان ما تعرفه ..فاشقايل تحبه..مسكته من كندورته ورصيته على اليدار..وقلته انت جذاب ..انا شو سويتلك علشان تسوي كل ها ...كنت ناوي اذبحه ..اصلا ما كنت اجوف ويه كل الي كنت اجوف صورتهم وهم واقفين حذا بعض ...تصدق كان بيموت بين ايديني لولا صوت الحارس الي قال هده ...وطبعا بالاداره انا وهو تكتمنا على الموضوع ...وعطونا تعهد اذا ها الشي صار بيصير طرد وما ادري شو...مب رايم اصدق يا سعود الي جفته..جم مره سالتها ..بس هي انكرت ويلست تحلف انه مستحيل تكون هي ...وفي اليوم الثاني ما بقى حد ما عرف بالسالفه...ولحد اللحينه مستغرب ..اشقايل انتشرت السالفه جي ...في البدايه كنت كل ما اسمع حد يطري سالفتهم ايلس اصرخ عليهم ..بس بعدين تعبت... جم مره رسلت ريم تسالها ..لانها اجلت السمستر بكبره ...وما كانت تظهر من البيت..بس ما كانت تقول شي لريم..شو اسوي يا سعود..تعبان يا اخوي ...تعبان...قلبي مب راضي يصدق...
سعود: تبى شوري...اطلب من ريم تكلمها ..وتحط التلفون على الاسبيكر...وواجها...وراح يتوضح كل شي..واتبع قلبك..لانه قلب المحب دليله
حمد:شكلي بسوي جي...بس تعال من متى وانت تقول شعر...افا مخبي علي مواهبك..يا ريال ما راح نحسدك
سعود:اقول حمد..اقلب ويهك


واخيرا نامت حور..فضحتنا بالطايرة..اشحلاهم عيال الانجليز مالهم حس ...صراحه المفروض يسون غرفة العاب لليهالوا بالطايرة...جفت اسوم حاطه يدها على خدها وتفكر ...
جوري:في شو تفكرين
اسوم:افكر بوضعنا..وين بنسكن..انتي حتى هلج ما قلتيلهم
جوري:بنسكن ببيت امايه...ابويه محمد كان ماجرينه ..وقبل ما اسافر المستاجرين ظهروا من البيت..بس بنسكن فيه لحد ما نحصل شقه...واذا عن اهلي فهم اصلا ما يعرفوا بسالفة انفصالنا انا وزياد...الشي الوحيد الي يعرفوه انه عندنا بنت اسمها حور..طلبت منه ما يقولهم لحد ما اخلص الماستر...ما بغيت اشغلهم بمشاكلي يكفي اني كنت مثجله عليهم من وانا صغيره...وبعدين اصلا باي حق اروح اسكن عندهم..قبل كنت حرمه اخوهم..بس اللحينه هم غرب بالنسبه لي ..تخيلي الي كانوا في يوم من الايام هلي صاروا غرب ...جفتي الدنيا اشلون مستويه غريبه..مالها امان
اول ما وصلنا ..اجرنا سيارة...ولما وصلنا بيت امايه..تيمعوا الدموع بعيوني....حسيت شريط حياتي يالس يمر جدامي...حسيت بيد اسوم يالسه تضغط على يدي...الحمد لله انها ويايه...مب بروحي بها الدنيا ..والله كريم..طبعا البيت غبار ...يلسنا ننظف وحور تلعب بالحوي...يا حبها للتراب ...
اسوم:اول مرة بحياتيه اشتغل جي..من باجر نيب بشكاره
جوري:يبالنا صراحة...ان شاء الله باجر بنسري صوب المكاتب وبنختار بشكاره ...وبنطلع سيارة..وايد شغل ورانا...لازم نخلصهم قبل ما نبدا الدوام...
اسوم:جوري ..قومي بدلي بنسري صوب السوبر ماركت...نتشرى راشن ..البيت فاضي
جوري:غايته عيل
خيبه ...فضحتنا حور ..من ساعه وهي تناقز وتصارخ ..تبى الريال الي يمشي جدامنا يشلها...لا وتزقره بابا وافضيحتاه...واسوم السخيفه ..سارت بعيد عنا تقول انا ما اعرفكم...اول ما جفت ويه الريال..يا ربيه شكله مب غريب علي...يالي جايفتنه بمكان...مد يده وقال ممكن..وشل حور...وحور تضحك ..وتصارخ بابا ...اول ما قال لحور اسمه....تبلمت بمكاني..بعدني مب مستعده للمواجهه...

موعدنا يوم السبت ..باذن الواحد الاحد

هلا..ادري اني المفروض انزل الجزء باجر..بس صراحة الظروف حدتني اني انزله اليوم...ونفس الظروف ال حدتني ما احدد يوم معين انزل فيه البارت الاسبوع الياي..ما ابى اوعدكم وما اوفي بوعدي...وان شاء الله اول ما يجهز البارت بنزله بس ما اعتقد قبل يوم الخميس...
الجزء (22):

اول ما سمعته ..يقول لحور...قولي عمي سعود...تبلمت بمكاني...منو الي قالي اي السوبر ماركت...وطبعا حور ...ما عطته ويه يلست تزقره باب..شو ها الفضايح..ما جذبت اسوم يوم قالت ..هاي البنيه محرومه حنان الابو...
جوري:حور عيب حبيبتي ...تعالي عند ماما
سعود:ما شاء الله عليها..ربي يحميها.
جوري:امين...
سعود:ويهج مب غريب علي..مب انتي جوري
جوري:يا ويل حالي ..ياك الموت يا تارك الصلاة...احم...اي انا جوري..
سعود:وهاي بنتج...
جوري:اي بنتيه...
سعود:يعني هي بنت زياد..وانا اقول ملامحها مب غريبه علي...عيل زياد رد البلاد..محد قالي..ولا يالي جفته
شو هاي النظره الغريبه وشو ذي النبرة الغريبه ..لما نطق اسم زياد...و لما عرف انها بنت زياد..شو السالفه...
جوري:اي هي بنت زياد...وزياد بالندن..ودرته وسرت صوب اسوم

استغفر الله ..شكله والله اعلم موت شيخه بيكون على يدي...اليوم اول يوم اداوم من بعد اسبوعين اجازه ...طبعا اول ما وصلت مكتبي ..شيخه انصدمت...شكلها ما توقعت اني بقدم استقالتي...يلست تسولف عن اختها ..وشو سوت ..وناصر شو سوى..كنت ناويه اصرخ عليها ..واقولها بسج..بس تذكرت خطة ميعاد..نزلت نفسي لمستواها الفكري..واضطريت اجذب عليها..وقلتلها اني بعدني ببيت اهلي...والمشاكل الي بيني وبين ناصر يالسه تزيد...وعاد يبت سوالف ..تشيب الراس ...شو اسوي ..لزوم تنفيذ الخطه...تصدقون وانا اقولها السالفه...كانت تبتسم ..وفرحانه..ما عليه انا الي بادبكم...بطلت الباب ..وجفت البيت هادي ..جي وينهم الشعب...ليكونوا راقدين...يالله يا يمان.....انكسر ظهري وانا احملك...وصلت جناحنا...جفته هادي ..رقدت يمان بغرفته..وسرت صوب غرفتنا...يتني الصيحه..ما ادري ..كيف تجرات وتركت بيتي ...كنت ناويه ادمره بايدي...كنت ناويه اضيع ناصر مني...كنت غبيه...وصدقت كلام شيخه..ابتسامتها وضحكتها ...دليل انها تبى تدمر حياتي..مع اني ما سويتلهم شي...بالعكس وايد كنت اساعدها اول ما بدت تداوم...ما عليه يا شيخه ييج يوم وتندمي انتي واختج ...زقرت البشكارة تي تساعدني..بغير ترتيب الغرفه...قبل ما يي ناصر..بسويله مفاجاه..
شو ها الحر...الواحد مب رايم ينزل من السيارة...شكلي بسوي بيات شتوي ..ما ابى اداوم...نزلت من سيارتي ..وقبل ما اوصل لمكتبي...جفت يوسف..استغفر الله يا ربي..ها شو صاير شرا البودي جارد ...خلاص وصلت حدي منه...صدق لمن قالوا ...ان لم تستحي فافعل ما شئت...
ميعاد:انت شو ما تستحي...جم مرة اقولك ما ابى اجوفك...باي لغه تباني افهمك..انا وحده معرسه...شو تبى الناس يتكلموا علي
يوسف:لا تاحتين باقي جمن يوم ..وتكونين لي
ميعاد:شو..انت شو يالس تخرف..احترم نفسك..لاناديلك السكيورتي...
يوسف:خفت صراحة..ما عليه يا ميعاد...كله بحسابه..مردج بتندمي
ميعاد:سير ولاي لاه...
ودرته وسرت صوب مكتبي..يا ربي ذا الريال مهلكني بدنياي...وبعدين شو قصده بكون له...لا ويتكلم بثقه...الله يستر


اليوم اول يوم لنا دوام...وانا بالي كله عند حور..وايد صاحت لما تركتها بالحضانه..قلبي يعورني عليها...بس ما باليد حيله...عند منو اخليها....مالي اهل...بس ان شاء الله بتتعود..انا بربي مسكت الصيحه..بس اسوم سوتها مناحه..ردتنا جم مره عند الحضانه تبى تتاكد انه حور ما تصيح...ان شاء الله ..الله يرزقها بولد الحلال الي يصونها ويعرف قيمتها...لفيت راسي اطالع عليها..انا وهي بنفس المكتب ...ها احلى شي صراحة...الي ويانا بنفس المكتب..كله تتحلطم عن مدير الشركه..تقول واحد جامد..ما عنده مشاعر..وايد استريك..ما عنده يمين ويسار...خخخ شكله مسنعنهم...وتقول اذا عندك برسنتيشن جدامه ..يشرشحك لحد ما يقول بس...وتقول انه ما يحب الحريم..وما يعطيهن ويه...وانه ربي راحمنا لانه بطابق غير عن طابقنا ...حشى ها مب مدير..مسببلهم جي رعب...يبالنا نجوفه...بعد الظهر بنسري صوب قسم الماليه انا واسوم..علشان نخلص باجي الاجراءات

يا ربي شو ها المحاضرة الممله...متى اتخرج بس..حتى ما عندي ربيعه تونسني...الوحيده ريم ..بس هي ماجله السمستر ..بسبب مرضها...من زمان ما سرت صوبها يعني من يومين..بس احسهم دهر..صح انها ما تسولف وايد...بس على الاقل في حد يسمعني...جيكت على ايميلي...وجفت ايميل من الاداره..يبلغونا عن رحلتنا الي تاجلت بسبة الظروف الماليه على قولتهم...ما اعتقد ناصر بيسمحلي اسافر بروحي...بساله اليوم..وبجوف شو رايه..مع انه نفسي اروح لانه الدفعه الماضيه وايد شجعونا ..ويقولوا وايد بتستفيدوا...سكرت لاب توبي ...وركبت سيارتي..بمر صوب ريم ...متولها عليها...

شو ها الريال الي ما يستحي ..من ساعه وهو يالس يطالع على اسوم...وهي شويه وتقوم وتصفعه...وشكله طفح عندها الكيل ..لانها قالت للريال..
اسوم:خير يا اخوي..مضيع شي بويهي
والله انج قويه يا اسوم..سفهي ويش لج فيه...
الريال:اسف ..بس مشبه عليج..ولما قريت اسمج..تاكدت
اسوم:وشو اكتشفت...ترى الذرة مكتشفينها من زمان..ما يحتاي تتعب نفسك..
والعثره..اسوم شكلها باديه تخرف..
الريال:انتي تكونين بنت عم مدير الماليه
هو قال جملته من هنا ..واسوم انقلب ويها من الصوب الثاني..وتبلمت بمكانها ...
جوري:وشو اسمه مديرك
الريال:سعيد ال..
جوري:اها..اخوي ممكن تخلص اجراءاتنا...مستعيلين
الريال:ان شاء الله
بعد ما ظهرنا من عند الريال ..واسوم ساكته ...لحد ما وصلنا مكتبنا ...
اسوم: شو ها من بد كل الشركات..اشتغلنا بنفس الشركه الي يشتغل فيها ولد عمي
جوري:جفتي الدنيا اشقايل صغيره... ...وبعدين مصيرهم يدرون انج رديتي البلاد...
اسوم:بعدني مب مستعده اجوفهم...يبالي وقت اتاقلم على وضعي هنا
جوري:ما تدرين الخيره وين..يمكن ربج يريدلج انج تعيشين معاهم..خليها للايام ..ولا تستعيلي الاحداث..
اسوم:الله يستر

من امس وانا يالس افكر بسلطان...طاري على راسه سالفه يديه..يقول ابى يكون عندي ام شرا يمان..وربايعي الي بالروضه... كان عندهم حفله بالروضه بمناسبة عيد الام...وكان من ضمن الفقرات .. فقره انه كل طفل يقول كلمه لامه ويعطيها هديه هو بروحه مسوينها ..ولما ركب السيارة ...يلس يصيح... ويقول انا ما عندي ام...كلهم عندهم...حتى امايه ميعاد ...ما تي تنام بيتنا...تقول ما يصير تنام عندنا...وتباني انا انام عندها...ليش ما تيبها تسكن عندنا..بيتنا احلى من بيتهم ...انا وايد احبها...اكثر من يمان....وقفت السيارة ..وسرت احضه ..واهديه..وانا اقول بخاطري..ما توقعت انه محتاي لهاي الدرجه لام..اللحينه كيف بفهمه انه ميعاد معرسه ما يصير تسكن عندنا...قطع علي تفكيري..صوت الباب الي تبطل بقوة...وجفت سعيد يصارخ ويقول...
سعيد:لقيتها..لقيتها...جفت الدنيا اشقايل صغيره...
سالم:بسم الله الرحمن الرحيم..واسكنهم بمساكنهم...شو مستوي ..ومنو الي لقيتها
سعيد:بنت العم المصون ..عيوزنا اليوم بتفرح ..بضمير حي بعد
سالم:ومن وين لقيتها
سعيد:طلعت تشتغل عندنا بالشركه ..وحنا بخبر كان
سالم:شو الي يابها البلاد...
سعيد:تقول انها حصلت شغل ...وتبى تستقر
سالم:عيل سير بشر يدتك...فرح قلبها من متى وهي تحن على راسك

اسوم مب طبيعيه ..ما ادري شو فيها..من يين من الدوام وهي مقفله على روحها الباب ...والدموع متيمعه بعيونها..وحتى العشا ما رضت تتعشى...ما ابى اضايقها ..بس بنفس الوقت احاتيها...احسن شي اسير عندها واطمن عليها...اول ما بطلتلي الباب وجفت ويها..خفت عليها..جنه ميت عليها حد
جوري:بسم الله....اسوم شو فيج...ليش ويهج جي
اسوم:جفته اليوم...
جوري:منو الي جفتيه اليوم
اسوم:سعيد..ولد عمي
جوري:سعيد...ومتى جفتيه
اسوم:تذكرين الاتصال من قسم الماليه...كان هو الي يبى يقابلني
جوري:وشو كان يبى
اسوم:اول ما جافني ...قال وايد تشبهين يدوه...ويلس يسالني..من متى وانا هني..وسالني عن سامي..ووين ساكنين ...واول ما قلته انه سامي بامريكا...وانا بروحي هنا...جنه ركبه يني..يلس يصارخ ..ويقول يعني انتي وين ساكنه ..واشقال مخلينج بروحج هنا..وليش ما يتي عندنا...ويلس يقول شو هي سايبه ..ولا سايبه..كنت يايه اقوله الثانيه صراحة..بس احترمت نفسي..لانه كان معصب بضمير ...ولما طلب مني عنوان سكني...استغربت ..فقلته لتكون ناوي تزورني...تعرفي شو رد علي..قالي وحد قالج اني معجب فيج...عاد حد ويغلط علي..تعرفي ربيعتج ما حد يروم ييود لسانها...قلتله وحد قالك اني منتظرتنك تنعجب فيني...طبعا سفهني ..وقال اليوم تلمي قشارج وبوصلج بيت عمتيه...طبعا عصبت عليه ..قصوره يتحكم بحياتيه..بس هو قالي..ترى اذا ما يتي برضاج..بطرشلج عمج...وعاد تعالي وتفاهمي معاه..صراحة لما قال جي بلعت ريجي..لانه يى على بالي صورة عمي..لما درى بسالفة شردت اختيه...كانوا عيونه حمر..وكان يسب ويصارخ بصوت عالي...اول مره اجوف شخص عصبي ومرعب شراه...جوري..ما ادري شو اسوي..انا ما اتذكرها عمتيه..وبعد ما اقدر اتركج بروحج..
جوري:اسوم لا تفكرين فيني ..اقدر ادبر روحي..ولا تيبي مشاكل لروحج..عمج من لا شي كارهنكم..فلا تعطيه فرصه انه يطلع حرة اختج عليج..احسن لج تسكنين بيت عمتج..ولا انج تروحين بيت عمج..بعدين يدتج اهناك..يعني لا تحاتين
اسوم:وانتي يا جوري...اشقايل اتركج بروحج...
جوري:خلينا نكون منطقيين..انا صج اباج تكونين ويايه...ثنتين ولا وحده بالبيت..بس لا عمج ولا ولد عمج يايين يخلوج تسكنين عندي..خاصة بعد سالفة اختج...وانا الله معاي...ربج ما ينسى حد...وبتمضي الايام..وبعدين لا تكوني ناويه تنسيني ..وما تيين تزوريني ..انا بسير ارقد حور ..وابى اساعدج تلمي اغراضج...

يلست ارقد حور..وانا الدمعه بعيني...ما كنت ابى اكون ضعيفه جدام اسوم...كفايه الي سوته لي كل الفتره الماضيه..ما ابى ايبلها مشاكل...بس اشقايل اعيش بروحيه...اذا صابني شي..اذا طحت..اذا اغمى علي ..واذا مت..منو بيدري..وحور بتيلس تصيح ولا حد داري عنها...سمعت صوت الجرس ..استغربت..حنا ما نعرف حد هني..لا يكون سعيد ياي ..حشى مداه ..انتظر لحد باجر..طنشت الوضع..او يمكن حاولت اهرب من الوضع..ما ابى اعيش هاي اللحضه...سمعت صوت اسوم وهي تزقرني...طلعت..وجفتها تفرك ايدينها..يعني في مصيبه تنتظرني..اعرف عادتها ..
جوري:بسج تحكين يدج...ادري سعيد عند الباب ..ويباج تسيرين معاه...والله عادي اسوم ..لا تحاتيني..فكري بروحج ..رايتج بيضه ...وبعدين انا وانتي بنفس المكتب ..يعني كل يوم بشوفج ...شو تبين اكثر عن جي..
اسوم:خلصتي ...ما احيدج تحبين الكلام..حتى ما عطيتيني مجال اقولج منو عند الباب...
جوري:ليش مب سعيد الي عند الباب
اسوم:لا يا حلوه..ها واحد يقول انه يباج..
جوري:يباني انا..ما عرفتيه
اسوم:اول مره اجوفه..وبعدين خلصي ...الريال ناقع بره
جوري:تعالي ويايه...
طلعنا انا واسوم بالحوي ..نجوف منو الي عند الباب..ما احيدني حد يعرف اني بالبلاد...اول ما فتحت الباب..جفت ريال ساند ظهره على اليدار ومرفع ريل وحده ..ومنزل راسه الارض..
جوري:نعم اخوي ..بغيت شي
اول ما جاف علي..شهقت
جوري:ناصر
ناصر:اي ناصر يا جوري... اخوج ناصر..الي تربيتي معاه من وانتي صغيرة...اخوج الي كان كل هدفه بالدنيا انه يشوفوكم فرحانين ..ومب محتايين لحد...اخوج الي ياما ضحك معاج..الي ياما نصحج..الي ياما وصلج للجامعه...الي ياما ساعدج بالدراسه...اخوج الي تحمل مسؤليتكم ومن غير ما يشتكي ..اخوج الي الغريب ياي يقوله انه اختك بالبلاد واحنا اخر من نعرف..هاي نهاية العشره يا جوري..هاي نهاية تربية امايه لج..ها الي تعلمتيه من الغربه..انج تنكرين اهلج..انج اول ما اعتمدتي على نفسج..نسيتيهم ...وتكبرتي عليهم...ها يزاء الاحسان...هانت عليج جمان..الي من سافرتي وهي لحد اللحينه تيود صورتج وتقولها كل شي يستويبها ...الي بكل صفحة بكتابها كاتبه عليه اسمج...الي بكل صلاة تدعي ربها انه يحميج..ويردج بالسلامة...ولا هانت عليج ميعاد...ولا هانت عليج سارة...افا يا جوري ...هذا وانت دايما تقولين ..كله ولا جرح الجريب..لانه صعب ينسى..ولا جرح الغريب طز فيه...وبعدين وينه زياد..ومنو هاي الي بطلت الباب..شو يالس يستوي..شو ها اللخبطه بحياتج..
جوري:بس..حرام عليك...ليش تقول عني جي...انا عمري مب كنت ناكره الجميل ..ولا هاي كانت من اخلاقي...انت ما تعرف شو الي صار..وما تعرف شو الي حدني اني اسكن بروحي..ولا ايي عندكم..ما تتصور اشقايل مشتاقتلكم...تراوالك سهل علي انكم قراب مني ومب رايمه اوصلكم ...انتوا مب معرفة يوم او يومين..انتوا اهلي ..اقرب الناس لي...اقرب من روحي...عمريه ما عرفت اهل غيركم..عمري ما حسيت بالامان والحنان الا معاكم... ما حسيت بالغربه الا وانا بعيده عنكم....عمري ما حسيت بالضيم وانا بينكم ..عمري ما حسيت بان الدنيا ضايقه علي وانتوا حوالي..عمري ما حسيت بالخوف من باجر وانا بينكم... انا لو سويت شو ما سويت ...مستحيل ارد ولو شي بسيط من الي قدمتوه لي...فايشقايل تقول انكم هنتوا علي..واني تكبرت عليكم...ليتني ما سافرت ولا درست...ولا تركتكم..بس ها قدري وها نصيبي واللهم لا اعتراض...
ناصر:انتي شو يالسه تقولين...وشو ليتك ما سافرتي ...وشو سالفة نصيبي وما ادري شو..جوري انا بالغصب ماسك اعصابي..فهميني
جوري:انا وزياد انفصلنا...
ناصر:شو...ليش..وكيف..ومتى..وليش ما خبرتونا
كنت يايه ارد عليه..لانه شكله شويه وبينفجر ..واخاف يذبحني...بس جفنا سيارة يايه صوب البيت...اشر علي ناصر ادش داخل..سكرت الباب وراي وجفت اسوم واقفه ..لويت عليها ..يا الله الهمني الصبر..الي ينتظرني اعظم ...سمعنا صوت ريال ..يقول انه سعيد وياي ياخذ بنت عمه...ناصر طلب منه ينتظر ...شكله يبى يتاكد من السالفه ..لانه زقرني...
بعد ما سارت اسوم..ناصر طلب مني الم اغراضي ..وقالي مالج يلسه اهني...حاولت ارفض..بس هو ما عطاني مجال..طول الدرب بالسيارة وهو ساكت..شكله بعده مصدوم ...ومب مستوعب سالفة انفصالنا انا وزياد...وكان يحاول يتصل بحد ..بس ما يردوا عليه ..وهو واصل حده من العصبيه...سمعته يقول...الجبان مسكر تلفونه...

وبعد اسبوع............

يله يا جمان تاخرنا...شو هاي ساعه تجهز..جي حنا وين سايرين عرس...احيدنا سايرين المستشفى...شلت حور الي يالسه تناقز تبى يمان يشيلها..ذي البنيه ماشي امل منها..مضيعه السنع ..من متى اعلمها عيب تركضين ورا الاولاد..خليهم هم الي يركضون وراج بس ما منها فايده ..ما تصدق تجوف ريال ..واللحين حتى لو جافت ولد صغير ...تضيع علومها..ما ادري على منو ظاهره..ما ظنتي على امها ..ما حد غير ابوها..يبالي اسال ناصر عن ابوها ..خبركم الاخ ما تربى معانا...بوستها بقوة على خدها..يا ناس ..عسل ..عسل ..بس هي يلست تصيح..ويى هيرو زمانه ..يدافع عنها..لا بالله ضاع يمان.بسبة بنت جوري...على طاري جوري...تصدقون راحمتنها..ما تستاهل ..صغيره وحامله لقب مطلقه ..وبعد عندها بنوته...اتذكر اول ما دشوا علينا هي وناصر..شخصيا انصدمت صدمة عمري...بس ردة فعل جمان كانت غير متوقعه...توقعتها تروح تحضنها...تبوسها...لانها وايد كانت متولها عليها..بس هي يلست تلومها..وتقولها شبعتي من لندن ..ومن زياد..ويايه تغيرين جو عندنا...ولا ضميرج اللحين صحى ..وقالج لي اهل اروح اجوفهم...وركضت غرفتها...لحد اللحين مب راضيه تكلمها...مع انه جوري جم مره حاولت تكلمها..بس هي ما كانت تعطيها مجال ..والله هاي جمان وحدها سالفة..جنه جوري ناقصه الي فيها مكفيها...الي جافته ..حتى العدو يرحمها ...مصيرها جمان بترضى...اخيرا وصلت ست الحسن والدلال..

ظهرنا من الغرفه ..لانه ناصر قال اهله بره يريدوا يدشوا داخل ويجوفوا ريم...اغمى عليها من يومين..وبعد الفحوصات قالوا ما فيها شي..يمكن مجرد تعب..ورقدوها عندهم علشان يراقبون وضعها..لانها ابدا مب طبيعيه حتى الكلام الي تقوله مب طبيعي... ...عيوزنا يلست تساسرني ..وتقول ..مسود الويه نزل عيونك ..كليت البنيه...احشم اخوها ...والعثره...جي انا مفضوح...زين يوم بس عيوزنا لاحظت ...وقفي يا جمان اذا ما ادبتج ما بكون حمد..عيل تسكرين التلفون بويهي...يلست اتذكر ذاك اليوم ..الي يت بيتنا تزور ريم..اتصلت على ريم وطلبت منها تحط التلفون على الاسبيكر ...هي يلست تترجاني ما اسويلها مشاكل مع جمان..جي باكلها انا...بس هي رفضت تكلمني..وطلبت من ريم تسكر التلفون..كنت اكلمهم وانا اسوق السيارة..مطنش الدرب..وتركيزي كله على المكالمه...يلست استحلفها تقول مب هي الي كانت واقفه مع خليفه...ما كانت ترد علي..وريم كانت تترجاني اسكر الخط...طلبت من ريم تصخ..علشان اعرف اتفاهم مع جمان..وشكله من كثر انفعالي ما انتبهت انه السيارة الي جدامي ضربت بريك...وكنت اسوق بسرعه ..ضربت بريك قوي ...علشان ما اصدم السيارة...والحمد لله ما صدمتها..سمعت صراخ بس مب كان صوت ريم..ها صوت جمان..يالسه تصارخ وتقول حمد انا مب زعلانه منك والله بكلمك..بس لا تروح ..لا تموت...قلت بخاطري ..جان زين من زمان سويت حادث ..دامه النتيجه اني سمعت صوتج...وانج بعدج تحبيني...وبعد ما طمنتهم ..سالتها نفس السؤال ..بس هي سكرت التلفون بويهي...قطع علي حبل افكاري كلام عيوزنا...
ام سالم:حمد..منو ها الريال ..الي يالس يسولف مع ناصر
حمد:ها الله يسلمج...ها سعيد ربيع سالم..يايب بنت عمته تزور ريم..كانت مع جوري بالندن
ام سالم:الا اقول ناصر...جوري قررت تسكن معاكم
ناصر:اي نعم ...تراها اختنا ..وطول عمرها ساكنه معانا..يعني ما تغير الوضع..
ام سالم:اشقايل ما تغير الوضع...تراها اللحينه مب على ذمة اخوك...
ناصر:وان كان..هي عندها بنت..وانا المسؤل عنها ..لحد ما ييها نصيبها
ام سالم:اذا على النصيب..عيل بتعمر عندكم..ما ضنتي حد بيهها
:وانا اباها...وبملج عليها باجر

مرحبا الساع.............Long time no see....جوفي انا بين اني ارد على تعليقاتكم ومن بين اني انزل الجزء اليديد...بس تصدقون اني مشغوله لدرجه مب محصله وقت احك راسي ..ولو تعرفون اني سويت المستحيل وهست هياسة عمري..وانا اكتب ها الجزء كله علشان عيونكم..وان شاء الله انه ينال رضاكم...وبصراحة ما عندي وقت اني ادش النت باجر ..فقلت انزل البارت وارتاح ...bkd وعدتكم اني بنزل بارت ها الاسبوع...بس بالنسبه للاسبوع الياي ...ما ادري اذا اقدر انزل بارت ...ان شاء الله بحاول قدر المستطاع...اني اكتب شي وانزله...دعواتكم


الجزء (23)


يالسه اطالع على اسوم...فيها شي متغير..صايره اهدى عن قبل..يمكن بسبب الظروف الي تمر عليها ...ولما سالتها عن معاملة عمتها لها..تقول ياليتها لو كانت جاسيه ..كنت بتحمل ..بس تقول انها ابدا ما تكلمها..يعني مسوتلها تطنيش قوي...ولا كانها موجوده بينهم..وتقول حتى بناتها ما يكلموها ابدا...بس يدتها...ومن كلامها عن يدتها شكلها وايد تحبها وتعزها..دايما تقولها انتي ريحه ولدي المتوفي..وريحة عايلته الي انحرمت منهم...ودايما تحضنها ...وهي ترقد معاها ..وتقول حتى وهي راقده تي تقرا عليها المعوذات وتحصنها وتسير ترقد...وعمها لحد اللحينه ما يعرف بوجودها لانه ما يى يزورها...سالتها عن سعيد...قالت انها تحس انه معجب ببنت عمتها سما...وشكلها هي بعد معجبه فيه..نظراتهم لبعض تقول جي...جفت صوب ميعاد..عرسها عقب باجر..بس شكلها مستهمه..بس ما ادري على شو ...جنها تنتظر مصيبه مب عرس ...لفيت راسي صوب جمان...الله يا جمان ...ما توقعتج جاسيه جي..ويطلع منج كلام يقطع القلب...معقوله سنتين يغيروا الواحد جي...نفسي ايلس معاها..نفسي اسالها شو فيها ..عيونها مليانين حزن وهم...نفسي اخفف عنها بالرغم اني ما اعرف شو فيها ..بس هاي بنتي انا ربيتها ...انا الي سهرت عليها...كنت ادرسها ..وكنت العبها ...ليته الزمن يرد ..وارد ياهل ..همي العابي وما اعرف شي عن هموم الدنيا


احس راسي بينفجر من كثر ما افكر بخواتي ...احس كل وحده عايشه بعالمها..وبمصيبتها الي تحاول تداريه عن الثانيه..ولا على بالهم اني حاس فيهم...ليتني بس اعرف شو الي صار بجمان..وخلاها تكبر عشر سنوات جدام..حتى اسلوب كلامها والكلمات الي تعقهم...جنها وحده الدنيا مورتنها الويل...جم مره سالت حمد عن الي صار من بينهم ..ولا واحد منهم راضي يتكلم ..وفوق ها يقول لا تنسى الوعد الي عطيتني اياه...قلتله وخطيبتك...قال اصبر علي وبفهمك كل شي..بس عطني وقت...وانا شو بيدي غير الصبر..وبنجوف نهايته معاكم ...وميعاد دايما شارده وتفكر..كل ها علشان عرسها جريب..حتى ما اجوفها فرحانه...عاد المصيبه الكبرى جوري...ما انسى ذاك اليوم لما سعود سالني عن حور وعن جوري...كنت طالع من البيت ساير صوب سالم..جفته طالع ومن بعد السلام ..سالني عنهم..استغربت شو استغربت..قولوا انصدمت ...قولوا السقف طاح فوق راسي...سالته انت متاكد انهم هنا..وهو اكدلي السالفه...بس سالته عن زياد...قال انه بعده بالندن..شو هاي اللخبطه...انا متاكد نهايتي على يد زياد...مب كافي انه بعيد ولا يسال ولا يقول يي ويزورنا...حسابك معاي عسير يا زياد ..خلني بس اجوفك...خلني بس اجوف هاي وين ساكنه...خمنت انها ببيت امها ..لانه هي مالها مكان ثاني تسيرله...طول الدرب لحد بيتهم وانا اضرب اخماس باسداس...احاول اتوقع اسوأ الاحتمالات ..واسوأ شي يي ببالي انهم متزاعلين...بس ما حطيت ببالي طلاق..طلاق مره وحده...ربي رحمك يا زياد...لانك لو كنت جدامي كنت ذبحتك...انا قايل من البدايه زياد ما يستاهلها..كل تصرفاته كانت تدل على جي...بس انا موصلني حدي ..انهم منفصلين اكثر من سنه..واحنا ما عندنا خبر..اسميني غسلت شراعها جوري وطلعت حرة زياد عليها..اشقايل تسكت طول الفترة الماضيه وما تقولنا..والمصيبة كانت ناويه تسكن بروحها...والغم تقول علشان كلام الناس..وحنا من متى نهتم بكلام الناس....بالرغم من كل ها كنت مرعوب اني لما اجوفها ترد مشاعري الاوليه صوبها...استغربت من نفسي ومن قلبي..كنت اجوفها شرا اختي وبس..ما ادري اشقايل تغيرت ولا الزمن هو الي غير مشاعري صوبها...يمكن حب سارة وتعاملها معاي من بعد ما تغيرت ...ما ادري..المهم انها شرات اختي ..وها الصح...انا اخوهم الجبير...وبس...بس تصدقون كل العصبيه وكل الضيقة الي كانت فيني اختفوا اول ما دخلت جناحي وجفت التغير المستوي ..وجفت سارة...ما صدقت انها جدامي ..تراوالي يالس اتخيلها..بس هي يت صوبي..وقالت انا اسفه على كل الي صار...مب بيدي..قلبي هو الي كان يحركني..وكنت مصيفه عقلي شويه...رديت عليها وقلتلها بس مصيفتنه....شكلج كنت معطيتنه اجازة مطوله..بس هي برطمت ...يا حلاتها وهي تتبرطم ..جنها ياهل...حضنتها بقوة ..بمقدار الايام الي بعدت فيهم عني..بمقدار الحزن الي بقلبي على خواتي...بمقدار الضيقه الي فيني من صوب زياد...حضنتها وانا متاكد انها هي الوحيده الي بتحس فيني..وبتقدر تخفف عني ...سرت اجوف يمان..يا اني مشتاق له ..صج لما قالوا الضنا غير..وحبه غير..بسته ولما يت اقوم جفت سارونتي واقفه عدال الباب..اشرت عليها شو فيج..يلست حذاي وقامت تمسح على شعر يمان..وبيدها الثانيه ماسكه فيه يدي..ويلست تقول عن خطتها هي وجمان...وطلبت مني اذا سالت ناديه عنها قول لها انها بعدها زعلانه وببيت اهلها ..ما فهمت ليش كل ها..وليش يالسه تجذب هاي الجذبه..بس نظرتها الي ضيعت علومي..خلتني غصبا عني اوافق على كلامها...قطع علي حبل افكاري ..سؤال خالتيه ام سالم...لا حول ولا قوة الا بالله ..تدرون هاي ثانيه مره تسال نفس السؤال ...ما ادري شو الحكمه من ها السؤال ..بس مضطر اجاريها وارد عليها...بس الي ضايقني انه مب وقت ها السؤال ...لانه كلنا شباب ومن غير سعيد وعمران ما يعرفونا ولا مداخلين معاهم كثير..


لحضه..لحضه...شو قال سعود ..يبى يعرس ..اكيد سمعت غلط..شكلي تخبلت على نهاية عمري ..من كثر هوسي بجمان ..حتى سمعي ضاع ...بس ردة فعل ناصر ...وانفعاله..اكدلي انه الي سمعته صح...سعود...سعود يقول هاالكلام..سعود يبى يخطب..ما ادري افرح ولا انصدم...شخصيا اجوف جوري هي انسب وحده لسعود...ما حد يعرف سعود كثري..هو يموت في شي اسمه يهال...بس هو من وين يعرف جوري....ليكون بس يبى يعاند امايه ....الي جافه من امايه ..مب شويه.. على الطالعه والنازله تعايره بامه ..ومن غير الضرب الي كان ييه ...ومن غير النغزات الي تعق عليه ..احس في سر من بينهم ما يعرفه غيرهم ...وشي يخص زياد..لاني مرة سمعتها ..تقول شي عم زياد...بس ما فهمت وهي لما جافتني صخت....


رفعت راسي اجوف على جوري...جفتها تكلم ربيعتها اسماء...قلبي عورني عليها..وايد ضعفانه جنها يايه من مجاعة صومال..ومن غير الهالات السوداء الي تحت عيونها..وويها شاحب...اكيد من كثر التفكير...ما هاين علي اقرب اثنيه على قلبي اجوفهم بها الوضع...انا مستحيل ازعل منها ..او اخذ بخاطري عليها..بس يالسه اتغلى ...ادري مب شويه الي ياها..كنت اظن انها مستانسه بحياتها ..وانها ناستنا ...سنتين ما فكرت ولا مرة تينا ..واحنا كل ما كنا نبي نزورهم..زياد كان يطلعلنا اسباب من تحت الارض علشان ما نسير صوبهم..مرة دراسة جوري..ومرة مرض حور..ومرة ما ادري شو..كنا نستغرب..بس ناصر كان يقولنا خلوهم على راحتهم..اهم شي يكونوا مرتاحين ...واللحين بس عرفت ليش كل الاسباب السخيفه الي كان زياد يقولها..كانوا منفصلين وما يبون نعرف..ذكاء صراحة ترى مصيرنا بنعرف..وما حد كان ياي يمنع جوري من انها تكمل الماستر..اصلا انا مب مقتنعه من ها السبب ..اكيد في شي ثاني جوري مخبتنه علينا...ان شاء اليوم بروح اراضيها...وبعدين ميعاد مصختها..مخليه حور تتعلق بها كثير..المفروض تتعلق بي انا اكثر ..انا اكثر وحده احب امها..وبعدين هي ماماتي شرا ما هي ماماتها ...جفت صوب ريم...يتني الصيحه..الي يجوف ريم وايد يرحمها..موليه مب طبيعيه...اكيد فيها شي غير طبيعي..كلامها غريب ..تصرفاتها غريبه...مستحيل انسى ذاك اليوم..سرنا انا وجوري وميعاد عندها على الساعه 11 الصبح..وفجاه قالتلنا..ليش ظلمت بسرعه ..انصدمنا كلنا لانه الدنيا صبح فاي ظلام تقصد..خفت تراوالي انها فقدت نظرها..بس هي قالت ليش الشمس غربت بسرعه...كنا مصدومين ..كل وحده تطالع الثانيه..وجوري سارت تزقر خالتيه ام سالم تي تجوفها...اما ريم يلست تسالنا انتو منو ..وشو تبون فيني ...انا كنت اصيح ربيعة عمري ما تعرفني ...وما ادري شو صابها..ويلست تصرخ وتقول طلعوا بره...وبعدين اغمى عليها..يلست خالتيه ام سالم تقرا عليها وهي تصيح...احنا طلعنا ..وكل وحده على راسها الطير...وفي اليوم الثاني سرت اطمن عليها بس البشكارة قالتلي انها على السطح...سرت فوق ..ولما سالتها شو تسوين هنا ..قالتلي انتي منو ..وشوتبين بغرفتي..ها غرفتي ..شو غرفتي..ويلست تقول اشياء غريبه عن طفولتها..وتعيد بنفس السالفه ...وتعيد نفس الجمله ثلاث مرات...صراحة خفت ..لانه عيونها زايغه ..جنها تجوف شي مب اجوفه...سرت ركض صوب خالتيه ازقرها..ولما يت ..نفس الشي سالتها انتي منو..وشو تبين...ولما طبلت مني خالتيه ام سالم اتصل على عمران...هي يلست تصارخ وتشد شعرها وترتجف...وتقول كلام غريب عن عمران...كلام مستحيل يدش العقل...حتى عمران الي كانت تموت على الارض الي يمشي عليها...صارت تكرهه..وما تبى تجوفه..واذا جافته..تيلس تقوله كلام يعور القلب..وهو صابر..لولا انه سالم طالب منه ما يى يزورها ..ولا هو كان مرتز وبايت عند باب بيتهم ...


اول ما سمعت الكلام الي قاله سعود..تصلبت بمكاني...شو ها موضوع ينضحك فيه...لانه عطى خالتيه ام سالم ابتسامه..جنها ابتسامة نصر...شو على بالهم خواتي.مرميات بالشارع ..جي يتكلمون عنهl جدام الغرب ...سرت صوبه ..ويلست اصرخ عليه..طلعني من طوري ...كنت شرا القنبلة الي انفجرت..شكلي طلعت الي فيني عليه ..بس يستاهل محد قاله ما يحشم
سالم:ناصر اهدى...
ناصر:اشقايل تباني اهدى وولد عمك ما يحشم حد
سعود:ومنو الي قالك اني مب حاشمنك..انا اتكلم بجد ..اباها على سنة الله ورسوله
ناصر:والي يبى وحده على سنة الله ورسوله..جي يخطبها
سالم ساسرني :اهدى يا ناصر...خلنا نتفاهم..فضحتنا يا ريال


مليت منها..من الصبح وهي تطرش مسجات ..وتقول متاكد انك مب ناسي شو اليوم...حد يفهمني شو اليوم...خلوني اتذكر.. اليوم الاربعاء..واحلى يوم بحياتي..جفت جمان...ركز يا حمد .. شو دخل جمان باميره...احصر تفكيرك باميرة ...عصرت راسي وما وصلت لنتيجه...سمعت تلفوني يرن..اميرة..حد يذكرني شو اليوم..شو المناسبه...رديت عليها..ول ول ..كلتني بقشاري...ماشي احترام...كله علشان اليوم عيد ميلادها ..وانا ناسي...شو اسوى راح عن بالي...بس شو هاي مضيعه السنع...ما تستحي..تقول جي فيس تو فيس..وين هديتي..لا وتبى ساعه شرا ساعة جمان..وخاتم شرا جمان الي عبارة عن حرف الحاء والي مكتوب عليه اسمي .....قلتلها شو رايج ..ما تبين جمان نفسها...لحضه ..لحضه..اميرة شو دراها انه الخاتم عبارة عن حرفي..ومكتوب عليه اسمي ..اذا جمان نفسها ما اكتشفت ها الشي..لانه اسمي مكتوب بخط جد صغير وبطريقة صعبه انك تكتشفها ...حتى ريم نفسها ما تعرف ......معناته انها ركزت على الخاتم ولبستها ...وانا اصلا طالب من ريم تستحلف جمان انه ها الخاتم ما حد يلبسه غيرها ...وجمان اذا حلفت معناته مستحيل تسوي الشي... ومواعدين بعض انهم ما يلبسون الخاتم الا مع بعض ..بيوم عرس وحده منهم ...وبعدين الاشاعات الي انتشرت كانت عبارة عن كلام....عن اثنيه كانوا ميودين ايدين بعض ...والبهارات الي زودها حضن وما ادري شو ....يعني ..ما حد يعرف عن الخاتم غير ريم وجمان...في شي غير طبيعي ...انا لازم اسير صوب بيتها ..واواجها فيس تو فيس..ومن ملامح ويها اعرف اذا تقول الصج ...ولا تتهرب


ما ادري شو فيه ناصر..وايد هادي وكله حاط يده فوق راسه..ويفكر..
سارة:حبيبي ناصر...بشو يالس تفكر
ناصر:سارونتي..يلسي ابى اخذ رايج بموضوع
سارة:امر ...تدلل..يا بعدهم كلهم
ناصر:ربي ما يحرمني منج يا سارونتي...احم الموضوع يخص جوري
سارة:شو فيها جوري
ناصر:سعود يباها
سارة:ها
ناصر:شو ها بعد..اقولج سعود ...ولد عم سالم يباها
سارة:وانت شو رايك
ناصر:انا ما تعاملت مع سعود بشكل مباشر...فما اعرف اخلاقه..بس سالم يمدحه..ما اى اظلمها ....بسها الي ياها
سارة:تبى شوري...انا اجوف سعود انسب واحد لجوري..هم الاثنين عاشوا اليتم...هم الاثنين محتايين لبعض وكل واحد منهم يكمل الثاني ...هم تقريبا مروا بنفس الظروف..سعود عانى طول عمره من ظلم خالتي ام سالم ومن بعد الاهل ...وجوري الي مرت فيه مب هين...يعني كل واحد منهم يقدر يحوي الثاني بسهولة...وبعدين حور محتايه حد يداريها محتايه حنان الابو...وشوري سعود هو انسب واحد يكون ابو لها لانه عاش من غير ابو..فيعرف اشقايل يعوضها عن ابوها البعيد..ويقدر يعوضها عن كل ها...انت قولها ..والشور الاول والاخير بيدها


رايحه ورداه من الغرفه..ويالسه اتنفس بقوة..توني مسكره من عند اسوم...وهي محتشره صياح..عمها اليوم يى بيت عمتها...ويدتها قالتله بسالفتها...وهو احتشر عليها...وما بقى كلمة تجرح ما قالها...ومن غير الضرب الي يايها..وحليلها هي شو ذنبها...في حره على اختها ..سير دورها وطلع حرتك عليها...وفوق كل ها خلها تلم اغراضها وتسير معاه بيتهم ..على قولته ما امنك ..لازم تكوني تحت عيوني...ابى اسير عندها ..وايد كانت تصيح وهي تكلمني..بس الوقت متاخر وما اعتقد عمها بيسمحلها تجوفني...شو اسوي..سمعت صوت الباب...لبست لحافي..وكان ناصر ..
ناصر:لتكوني راقده ..وازعجتك
جوري:لا مب راقده...
ناصر:جوري اباج بموضوع..ممكن تنزلين للصاله علشان نتكلم
جوري:في شي ناصر...خوفتني
ناصر:لا تخافين..كل خير ان شاء الله..ووينها دلوعة عمها
سمعنا صوت حور وهي تصارخ وتناقز تبى ناصر
جوري:ما يحتاي تسال عنها..بروحها منتزقه وبتييك
ناصر:علني فدى ها الريحه والبسمه ..انا بشل حور معاي ..انتي حصلينا تحت
شو السالفه...مب ناقصه بلاوي..شو هاي السنه اللي مب راضيه تنتهي على خير..الله يستر..نزلت الصالة..وجفت ناصر حاط حور على ريوله ويالس يلعبها ..وسارة يالسه حذاه..
جوري:مساء الخير..هلا سوسو اخبارج غناتي
سارة:مساء النور والسرور
جوري:اوه اوه ..سارة شو ها المزاج الرايق
سارة:احم احم...طول عمرنا طول عمرنا بس انت مش واخذ بالك مننا
ناصر:خيبه سارة...شو ياج امي
سارة:وايد فرحانه..من فرح حبايبي
جوري:فرحينا وياج
سارة:مب انا الي بخبرج..اخوج هو الي بيقولج
ناصر:جوفي جوري...ادري التجربة الي مريتها مع زياد مب كانت سهلة..وادري انج انظلمتي كثير معاه صبرتي سنين عليه..صبرتي على اهماله لج..صبرتي على عدم سؤاله عنج..ومن بعد ما خلاج سنين معلقه ..طلقج بمنتهى السهوله ...مهما كانت المشاكل من بينكم ...ومهما وصل سوء التفاهم..اكيد كان في حل لكل ها ..بس مستحيل كان يوصل للطلاق..لو كان يباج..كان تمسك بج...والي سواه ما راح امرره على خير..وادري اشقايل اخذ حقج منه...بس اباج تحطين ببالج ..انه هو الخسران..ولا واحد ييه جوهرة شراتج..ويرفضها..يكون يرفس النعمه بريوله...ما ابى افتح دفاتر مسكره..ومب ياي افتح الجراح..لانه الي ياج مب كان سهل...الشي الوحيد الي يغفر لزياد انه عطاج حور...


طول ما ناصر يتكلم ..وانا منزله راسي..ودموعي متيمعه بعيوني...المفروض خلاص تعودت على ها الموضوع...الفترة الي مرت المفروض تكون كفايه انه جرحي الي ياني من صوب زياد اندمل..صج انا الي تنازلت وانا الي هربت وانا الي تركت كل شي للجوهرة...كنت اقدر اواجها واتمسك بزياد..وابعدها من حياتي..بس شو الفايده اعيش مع واحد قلبه مب لي...مب يايه انتظر وقت اطول لحد ما يحبني..كفايه السنوات الي صبرت وانا انتظره ...بس شكله الي صار معاي ...شرا لم نصطدم سيارة ..سواء كان الاصطدام قوي او حتى بسيط...بس طول ما نجوف دم طالع من جسمنا..نقول خلاص ما صابني شي....ما تعورت ...يمكن من هول الصدمه اني سويت حادث..او يمكن انه الاصطدام مر على خير ...بس لما يمر وقت بسيط من الحادث ..يمكن ساعات او حتى نص يوم...راح نبدا نحس بالالم....نحس كل جزء من جسمنا يالمنا...شرا لما نمشي لمسافات طويله وبالساعات ..ما راح نحس بالم ريولنا..بس اول ما يمر وقت من مشينا او اول ما نرتاح نبدا نحس بالم ريولنا ...ما يقولوا ما راح تحس بالالم الي لما يبرد..يعني يمر وقت من حدوثه ..او يمكن لاني كنت كابته كل الالم بداخلي ما شاركته مع حد ...شرا لما يتوفى شخص عزيز عليج..سواء منج وفيج او حتى شخص لج مشاعر خاصه صوبه..بس من هول الصدمه تحاولين تتهرين من التعبير عن مشاعرج...تحاولي تكونين طبيعية...بس داخلج رغبه بالصراخ ...رغبه بالصياح بصوت عالي...بس كله تحطينه بداخلج ..ما تبين حد يعطف عليج..حد يرحمج...ولما تكونين بروحج تتهربين من مواجهة نفسج...واول ما حد يفتح معاج الموضوع..وتجوفين نظرة الالم الي بعينه..نظرة العطف ...تحسين نفسج منكسرة...كل المشاعر الي داخلج ينفجروا ..وتجوفين نفسك تصيحين من قلب ...ها الي صار معي اللحين..فجاه ومن غير سابق انذار انفجرت بالصياح ...لدرجة انه حور يلست تصيح معاي...سارة لوت علي وحاولت تهديني...جمان نزلت على صوت صياحي..ويت ركض ولوت علي..يلست تقولي كلام المفروض انه يهديني..لا تهتمي هو الخسران هو الي ما عرف قيمتح...وانا والله مب زعلانه عليج..سامحيني جان عصبت عليج..وصرخت بويهج ..وقلت كلام زعلج...بس لا تصيحين جي...بس بدل ما اهدى صحت اكثر..كلامها يى بالصميم ..يى من شي كنت اتهرب منه ..بس نظرة الخوف بعيونها ..مب بس هي كلهم ..ناصر ..سارة..وحتى ميعاد ..خلاني اهدى..على الاقل عندي ناس يحبوني...ناس يحسون فيني..يدارون علي...
جوري:اسفه...ما اعرف شو الي صارلي ...مب قصدي ازعجكم
سارة:لا تتاسفين ...ما صار شي ...كيفج اللحينه
جوري:ما فيني شي...س شكلي حبيت ادلع واجوف غلاتي عندكم
جفتهم كلهم يطالعون علي بنص عين...وميعاد كانت شايله حور...وبعدها تصيح..اشرت عليها تيبها...يلست احضنها واهديها..
ناصر:كل ها بقلبج..وساكته وتتظاهرين انه ما فيج شي وانه الي صار كان شي عادي عندج..ليش كل وحده فيكم تداري الي بقلبها عن الثانيه..ليش ما تتكلمون وتعبرون عن الي بداخلكم ..عن الي يضايقكم..بدل ما تكبتنونه..وتنفجروا مره وحده..ولا ييكم امراض نفسيه...شو تستحون من بعض..ولا ما تعتبرون بعض خوات...من بعد اليوم ما ابى اجوف وحده منكم شايله جروحها بروحها..سامعين ...وبعدين جوري انا بعدني ما قلتلج عن الموضوع الاساسي..الى اباج فيه...
جمان:غرد يا ابيه ...
ناصر:ابيه بعينج طل...بعدين ولش لج انتي بالسالفه
سارة:هذه ماخذه لقافة العالم..ما عندك خبر
ناصر:سعود..ولد عم سالم..ياي يخطبج..ويبى يملج باجر
جمان:والله...مبروك ..مبروك..صبرتي ونلتي..سعود ما فيه منه اثنين
طالعنا عليها كلنا بنص عين
سارة:لتكون الاخت متربيه معاه
جمان:ها...لا يعني ..ريم كانت تمدحه..وبعدين يكفي وقفته مع ريم
ميعاد:انتي مالج دخل بالسالفه...الشور الاول والاخير لجوري..بس هو ليش جي مستعيل..
ناصر:يقول انه يبى يستقر..وانه ماله داعي للتاخير..جوري خذي راحتج بالتفكير ولما تقرري عطيني خبر..بس قبل ما تاخذي اي قرار ..فكري بالموضوع من يميع النواحي ..وفكري بحور


نشيت من الرقاد..على صوت تلفوني المزعج...جيكت على ساعتي..جفتها 5 الصبح..بسم الله منو الي متصل فيني بها الوقت..الرقم غريب...اول ما رديت على التلفون ..وسمعت حس واحد وتنهيدته جنه هموم الدنيا فوق راسه...وقال
:تتزوجيني
طاح التلفون من يدي